@#/ / rgya gar skad du/ a ni t+ya ta sU tra/ bod skad du/ mi rtag pa nyid kyi mdo/ sangs rgyas dang / byang chub sems dpa' thams cad phyag 67.170a 'tshal lo/ /'di skad bdag gis thos pa dus gcig na bcom ldan 'das mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas bcom ldan 'das kyis dge slong rnams la bka' stsal pa/ dge slong dag 'du byed thams cad mi rtag pa dang / mi brtan pa dang / yid brtan du mi rung ba dang / yongs su 'gyur ba'i chos can te/ dge slong dag chog gis 'du byed thams cad las sems zlog shig /dge slong dag ma chags pa dang / ma zhen pa dang / rnam par grol bar gyis shig /gang yang sems can thams cad dang / 'byung po thams cad dang / srog chags thams cad kyi gson pa'i mtha' ni 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang khyim bdag gi rigs shing sA la chen po lta bu 'am/ bram ze'i rigs shing sA la chen po lta bu 'am/ rgyal rigs shing sA la chen po lta bu phyug pa/ nor mang ba/ longs spyod che ba/ nor bu dang / mu tig dang / bai dU r+ya dang / shang ka shi la dang / byi ru dang / gser dang / dngul dang / nor dang / longs spyod mang ba dang / 'bru dang / dbyig dang / gser dang / mdzod dang / bang ba bsags pa mang ba dang / bran pho dang / bran mo dang / zho shas 'tsho ba mang ba dang / mdza' bshes dang / nye du dang / snag gi gnyen mtshams mang ba de dag gi gson pa'i mtha' yang 'chi bar 'gyur ba ste/ skyes nas 'chi bar mi 'gyur ba med do/ /gang yang rgyal po rgyal rigs spyi bo nas dbang bskur ba/ yul la dbang ba/ mthu thob pa/ sa chen po'i dkyil 'khor du mngon par rgyal bas gnas pa de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang drang srong nags na gnas pa rtsa ba dang / 'bras bu za zhing rtsa ba dang 'bras bu la spyod pa/ rtsa ba dang / 'bras bus 'tsho zhing gnas pa de dag gi gson pa'i mtha' yang 'chi bar 67.170b 'gyur ba ste/ skyes nas 'chi bar mi 'gyur ba med do/ /gang yang rgyal chen bzhi'i ris kyi lha rnams dang / sum bcu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams te/ de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang bsam gtan gsum pa thob pa'i lha rnams te/ dge chung dang / tshad med dge dang / dge rgyas pa ste/ de dag gi gson pa'i mtha' yang 'chi ba yin zhing mthar yang 'chi bar 'gyur te/ skyes nas 'chi bar mi 'gyur ba med do/ /gang yang bsam gtan bzhi pa thob pa'i lha rnams te/ sprin med dang / bsod nams 'phel dang / 'bras bu che ba dang / 'du shes med pa'i sems can dang / mi che ba dang / mi gdung ba dang / shin du mthong ba dang / gya nom snang dang / 'og min gyi lha rnams te/ de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang gzugs med pa'i lha rnams te/ nam mkha' mtha' yas skye mched du nye bar gtogs pa dang / rnam shes mtha' yas skye mched du nye bar gtogs pa dang / ci yang med pa'i skye mched du nye bar gtogs pa dang / 'du shes med 'du shes med min skye mched du nye bar gtogs pa'i lha rnams te/ de dag gi gson pa'i mtha' yang 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /gang yang dgra bcom pa/ zag pa zad pa/ bya ba byas pa/ byed pa byas pa/ khur bor ba/ bdag gi don rjes su thob pa/ srid par kun du sbyor ba yongs su zad pa/ yang dag pa'i shes pas sems kyi dbang thams cad kyi dam pa'i pha rol du son pa de rnams kyang yid du 'ong ba'i lus spong bar byed pa'i chos can no/ /gang yang rang sangs rgyas bse ru lta bu dang / tshogs na spyod pa bdag nyid gcig pu 'dul bar byed cing bdag nyid zhi bar byed la/ bdag nyid yongs 67.171a su mya ngan las 'da' bar byed pa de rnams kyang yid du 'ong ba'i lus spong bar byed pa'i chos can no/ /gang yang de bzhin gshegs pa dgra bcom pa yang dag par rdzogs pa'i sangs rgyas stobs bcu'i stobs dang ldan pa/ mi 'jigs pa bzhis bsnyengs pa mi mnga' ba/ khyu mchog gi gnas su zhal gyis 'che ba/ sku la sred med kyi stobs brtan pa 'dus pa/ seng ge'i sgra yang dag par sgrogs pa de rnams kyang yid du 'ong ba'i sku spong bar mdzad pa'i chos can no/ dge slong dag de bzhin du sems can thams cad dang / 'byung po thams cad dang / srog chags thams cad kyi gson pa'i mtha' ni 'chi ba yin zhing mthar 'chi bar 'gyur ba ste/ skyes nas 'chi bar mi 'gyur ba med do/ /bcom ldan 'das kyis de skad ces bka' stsal te/ bde bar gshegs pas de skad gsungs nas ston pa gzhan yang 'di skad bka' stsal to/ /kye ma 'du byed rnams mi rtag /skye zhing 'jig pa'i chos can yin/ /skye nas 'jig par 'gyur ba ste/ /de bas nye bar zhi ba bde/ /de ltar rab tu 'bar ba la/ /dgar byar ci yod mgur ci yod/ /mun pa'i nang zhugs gnas pa dag /ci phyir sgron ma tshol mi byed/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do/ /mi rtag pa nyid kyi mdo/ rdzogs so// // |