rgya gar skad du/ Ar+ya ad b+hu ta d+harma par+yA ya nA ma/ bod skad du/ 'phags pa rmad du byung ba zhes bya ba'i chos kyi rnam grangs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /de nas tshe dang ldan pa kun dga' bo snga dro'i dus kyi tshe chos gos dang sham thabs bgos te/ lhung bzed thogs nas rgyal po'i khab tu bsod snyoms kyi phyir zhugs te/ tshe dang ldan pa kun dga' bo rgyal po'i khab kyi grong khyer du mthar chags su bsod snyoms spyod pa'i tshe phyogs shig na khang pa brtsegs pa sgo brgyad bcu yod la/ byug pas byugs pa/ gdugs dang rgyal mtshan dang ba dan bsgreng ba dar gyi lda ldi mang po spyangs pa zhig mthong nas/ de 'di snyam du sems te/ rigs kyi bu 'am rigs kyi bu mo dad pa gang la la zhig gis khang pa brtsegs pa 'di lta bu byas te/ phyogs bzhi'i dge slong gi dge 'dun la phul ba dang / gang de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'ji ba las skyu ru ra'i 'bras bu tsam byas la/ khab tsam gyi srog shing btsugs te/ rgya shug gi lo ma tsam gyi gdugs gsol nas/ nas kyi 'bru tsam gyi sku gzugs byas la/ yungs 'bru tsam gyi ring bsrel bcug na de gnyis las bsod nams shin du che ba gang yin snyam mo/ /de yang 'di snyam du sems te/ ston pa ni bdag gi mngon sum du gyur/ bde bar gshegs pa ni bdag gi mngon sum du gyur gyis/ 67.208b bcom ldan 'das la bdag gis don 'di nyid gsol te/ bcom ldan 'das kyis bdag la ji skad bstan pa bzhin du gzung bar bya'o snyam mo/ /de nas tshe dang ldan pa kun dga' bo rgyal po'i khab tu bsod snyoms blangs te/ zas kyi bya ba byas nas bsod snyoms kyi zas phyi ma spangs te/ chos gos dang lhung bzed bzhag nas rkang pa bkrus te/ bcom ldan 'das ga la ba der song nas phyin pa dang / bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas kyang bcom ldan 'das la tshe dang ldan pa kun dga' bos 'di skad ces gsol to/ /btsun pa bdag 'dir snga dro'i dus kyi tshe chos gos dang sham thabs bgos lhung bzed thogs te rgyal po'i khab tu bsod snyoms kyi slad du zhugs te/ rgyal po'i khab kyi grong khyer du mthar chags su bsod snyoms spyod pa'i tshe phyogs shig na khang pa brtsegs pa chab sgo brgyad bcu mchis la byug pas byugs pa/ gdugs dang rgyal mtshan dang ba dan bsgreng ba/ dar gyi lda ldi mang po spyangs pa dag mthong nas 'di snyam du bsams te/ rigs kyi bu 'am rigs kyi bu mo dad pa gang la la zhig gis khang pa brtsegs pa 'di lta bu bgyis te/ phyogs bzhi'i dge slong gi dge 'dun la phul ba dang / gang gis de bzhin gshegs pa dgra bcom pa yang dag par rdzogs pa'i sangs rgyas mya ngan las 'das pa'i mchod rten 'ji ba las skyu ru ra'i 'bras bu tsam bgyis la khab tsam gyi srog shing btsugs te/ rgya shug gi lo ma tsam gyi gdugs gsol nas/ nas kyi 'bru tsam gyi sku gzugs bgyis la yungs 'bru tsam gyi ring bsrel stsal na de gnyis bsod nams shin du che ba gang lags snyam mo/ /bdag gis yang 'di snyam du bsams te/ ston pa ni bdag gi mngon sum du gyur/ bde bar gshegs pa ni bdag gi mngon sum du gyur 67.209a gyis/ bcom ldan 'das la bdag gis don 'di nyid gsol te/ bcom ldan 'das kyis bdag la ji skad bstan pa bzhin du gzung bar bgyi snyam nas/ bcom ldan 'das la bdag don 'di nyid zhu lags na thugs brtse ba nye bar bzung ste/ bcom ldan 'das kyis bdag la don 'di nyid legs par bstan du gsol/ de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo khyod skye bo mang po la phan pa dang / skye bo mang po la bde ba dang / 'jig rten la snying brtse ba'i phyir zhugs nas lha dang mi rnams la phan pa dang / bde ba'i don gyi phyir khyod de bzhin gshegs pa la don 'di nyid 'dri bar sems pa ni/ legs so legs so/ /kun dga' bo de'i phyir legs par rab tu nyon la yid la zung shig dang bshad do/ /kun dga' bo 'dzam bu gling gi gling ni chur dpag tshad bdun stong / rgyar yang dpag tshad bdun stong / byang du ni kha tshon che ba/ lhor ni sogs kar 'dug pa de rigs kyi bu 'am rigs kyi bu mo dad pa gang la la zhig gis rin po che sna bdun gyi rang bzhin du byas te/ rgyun du zhugs pa rnams dang lan cig phyir 'ong ba rnams dang / phyir mi 'ong ba rnams dang dgra bcom pa rnams dang rang sangs rgyas rnams dang / phyogs bzhi'i dge slong gi dge 'dun la phul ba bas gang gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'ji ba las skyu ru ra'i 'bras bu tsam byas la khab tsam gyi srog shing btsugs te/ rgya shug gi lo ma tsam gyi gdugs gsol nas nas kyi 'bru tsam gyi sku gzugs byas la/ yungs 'bru tsam gyi ring bsrel bcug na de ni de bas ches bsod nams che'o zhes nga smra'o/ /kun dga' bo 'dzam bu'i gling lta zhog gi /kun dga' bo shar gyi lus 'phags zhes bya ba'i gling yod de chur ni dpag tshad brgyad stong / rgyar yang dpag 67.209b tshad brgyad stong ste/ kun nas zla gam lta bur grub pa de/ rigs kyi bu 'am rigs kyi bu mo gang la la zhig gis rin po che sna bdun gyi rang bzhin du byas te/ rgyun du zhugs pa rnams dang / lan cig phyir 'ong ba rnams dang phyir mi 'ong ba rnams dang dgra bcom pa rnams dang / rang sangs rgyas rnams dang phyogs bzhi'i dge slong gi dge 'dun la phul ba bas gang gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'ji ba las skyu ru ra'i 'bras bu tsam byas la khab tsam gyi srog shing btsugs te/ rgya shug gi lo ma tsam gyi gdugs gsol nas/ nas kyi 'bru tsam gyi sku gzugs byas la yungs 'bru tsam gyi ring bsrel bcug na de ni de bas ches bsod nams che'o zhes nga smra'o/ /kun dga' bo 'dzam bu'i gling lta 'ang zhog /shar gyi lus 'phags kyi gling lta 'ang zhog ste/ kun dga' bo nub kyi ba lang spyod ces bya ba'i gling yod de chur ni dpag tshad dgu stong / zheng yang dpag tshad dgu stong ste/ kun nas zla ba nya ba lta bu grub pa de rigs kyi bu 'am rigs kyi bu mo dad pa gang la la zhig gis rin po che sna bdun gyi rang bzhin du byas te/ rgyun du zhugs pa rnams dang lan cig phyir 'ong ba rnams dang phyir mi 'ong ba rnams dang dgra bcom pa rnams dang rang sangs rgyas rnams dang phyogs bzhi'i dge slong gi dge 'dun la phul ba bas/ gang gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'ji ba las skyu ru ra'i 'bras bu tsam byas la khab tsam gyi srog shing btsugs te/ rgya shug gi lo ma tsam gyi gdugs gsol nas/ nas kyi 'bru tsam gyi sku gzugs byas la/ yungs 'bru tsam gyi ring bsrel bcug na de ni de bas ches bsod nams che'o zhes nga smra'o/ /kun dga' bo 'dzam bu'i gling lta 'ang zhog /shar gyi lus 'phags kyi gling lta 'ang zhog /nub kyi ba lang spyod kyi 67.210a gling lta 'ang zhog ste/ kun dga' bo byang gi sgra mi snyan ces bya ba'i gling yod de/ chur ni dpag tshad khri/ rgyar yang dpag tshad khri ste/ kun nas gru bzhi lham par grub pa de rigs kyi bu 'am rigs kyi bu mo dad pa gang la la zhig gis rin po che sna bdun gyi rang bzhin du byas te/ rgyun du zhugs pa rnams dang lan cig phyir 'ong ba rnams dang phyir mi 'ong ba rnams dang dgra bcom pa rnams dang / rang sangs rgyas rnams dang / phyogs bzhi'i dge slong gi dge 'dun la phul ba bas/ gang gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'ji ba las skyu ru ra'i 'bras bu tsam byas la khab tsam gyi srog shing btsugs te/ rgya shug gi lo ma tsam gyi gdugs gsol nas nas kyi 'bru tsam gyi sku gzugs byas la yungs 'bru tsam gyi ring bsrel bcug na de ni de bas bsod nams che'o zhes nga smra'o/ /kun dga' bo 'dzam bu'i gling lta 'ang zhog /shar gyi lus 'phags kyi gling lta 'ang zhog /nub kyi ba lang spyod kyi gling lta 'ang zhog /byang gi sgra mi snyan gyi gling lta yang zhog ste/ kun dga' bo lha'i dbang po brgya byin gyi khang bzang rnam par rgyal byed ces bya ba yod de/ de rigs kyi bu 'am rigs kyi bu mo dad pa gang la la zhig gis rin po che sna bdun gyi rang bzhin du byas te/ rgyun du zhugs pa rnams dang / lan cig phyir 'ong ba rnams dang phyir mi 'ong ba rnams dang dgra bcom pa rnams dang rang sangs rgyas rnams dang phyogs bzhi'i dge slong gi dge 'dun la phul ba bas/ gang gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'ji ba las skyu ru ra'i 'bras bu tsam byas la khab tsam gyi srog shing btsugs te/ rgya shug gi lo ma tsam gyi gdugs gsol nas nas kyi 'bru tsam gyi sku gzugs byas la yungs 'bru tsam gyi ring bsrel bcug na de ni de bas ches bsod nams 67.210b che'o zhes nga smra'o/ /kun dga' bo 'dzam bu'i gling lta yang zhog /shar gyi lus 'phags kyi gling lta yang zhog /nub kyi ba lang spyod kyi gling lta yang zhog /byang gi sgra mi snyan gyi gling lta yang zhog /lha'i dbang po brgya byin gyi khang bzang rnam par rgyal byed ces bya ba lta yang zhog ste/ kun dga' bo stong gsum gyi stong chen po'i 'jig rten gyi khams yod de/ de rigs kyi bu 'am rigs kyi bu mo dad pa gang la la zhig gis rin po che sna bdun gyi rang bzhin du byas te/ rgyun du zhugs pa rnams dang / lan cig phyir 'ong ba rnams dang phyir mi 'ong ba rnams dang dgra bcom pa rnams dang rang sangs rgyas rnams dang phyogs bzhi'i dge slong gi dge 'dun la phul ba bas/ gang gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'ji ba las skyu ru ra'i 'bras bu tsam byas la khab tsam gyi srog shing btsugs te/ rgya shug gi lo ma tsam gyi gdugs byas nas nas kyi 'bru tsam gyi sku gzugs byas la yungs 'bru tsam gyi ring bsrel bcug na de ni de bas ches bsod nams che'o zhes nga smra'o/ /de ci'i phyir zhe na/ kun dga' bo de bzhin gshegs pa ni ye shes kyis dpag tu med pa/ tshul khrims kyis dpag tu med pa/ bzod pas dpag tu med pa/ brtson 'grus kyis dpag tu med pa/ bsam gtan gyis dpag tu med pa/ shes rab kyis dpag tu med pa/ byams pas dpag tu med pa/ snying rjes dpag tu med pa/ dga' bas dpag tu med pa/ btang snyoms kyis dpag tu med pa/ sangs rgyas kyi chos ma 'dres pa bcwa brgyad dang / stobs bcu dang mi 'jigs pa bzhi dang sangs rgyas kyi chos dran pa nye bar gzhag pa ma 'dres pa gsum dang snying rje chen pos dpag tu med pa ste/ kun dga' bo de bzhin gshegs pa dgra bcom pa yang dag par rdzogs pa'i sangs rgyas ni yon 67.211a tan dpag tu med pa dang ldan pa'i phyir ro/ /de skad ces bka' stsal pa dang / tshe dang ldan pa kun dga' bos/ bcom ldan 'das la 'di skad ces gsol to/ /bcom ldan 'das 'di lta ste/ chos kyi rnam grangs 'di ni ngo mtshar lags so/ /bde bar gshegs pa ngo mtshar lags so/ /chos kyi rnam grangs 'di'i ming ci lags/ 'di ji ltar gzung bar bgyi/ bka' stsal pa/ kun dga' bo de'i phyir chos kyi rnam grangs 'di rmad du byung ba'i chos kyi rnam grangs shes bya bar zung shig /de bas na chos kyi rnam grangs 'di ni rmad du byung ba'i chos kyi rnam grangs shes bya ba'i tshig bla dgas so/ /bcom ldan 'das kyis de skad ces bka' stsal nas tshe dang ldan pa kun dga' bo yi rangs te/ bcom ldan 'das kyis gsungs pa la mngon par bstod do/ /'phags pa rmad du byung ba'i chos kyi rnam grangs/ rdzogs so// // rgya gar gyi mkhan po 'dzi na mi tra dang / su ren dra bo d+hi dang / zhu chen gyi lo ts+tsha ba ban de ye shes sdes zhus te gtan la phab pa/ / |