rgya gar skad du/ / tsai t+ya pa dak+Shi Na gA thA/ bod skad du/ mchod rten bskor ba'i tshigs su bcad pa/ dkon mchog gsum la phyag 'tshal lo/ /shes rab blo ldan 'jig rten na/ /chos kyi 'khor lo rjes bskor ba/ /shes rab chen po shA ri'i bus/ /ston pa la ni zhu ba zhus/ /mchod rten bskor ba bgyis pa yis/ /rnam par smin pa cir 'gyur ba/ /skal ba chen po'i 'jig rten mchog /rnam par 'dren pas bdag la gsungs/ /rdzogs pa'i sangs rgyas rkang gnyis mchog /ston pas de la bka' stsal pa/ /mchod rten bskor ba byas pa yi/ /yon tan gang yin phyogs tsam bstan/ /mchod rten bskor ba byas pa yis/ /lha klu gnod sbyin dri za dang / /lha min mkha' lding mi 'am ci/ /lto 'phye che rnams mchod byed 'gyur/ /dal ba rnyed dka' thob gyur nas/ /skad cig gcig tsam bar du yang / /mchod rten bskor ba byas pas ni/ /mi khom brgyad rnams spong bar 'gyur/ /mchod rten bskor ba byas pas ni/ /dran dang ldan zhing blo gros ldan/ /kha dog ldan zhing 'dzangs pa dang / /thams cad du ni mchod par 'gyur/ /mchod rten bskor ba byas pas ni/ /lha dang de bzhin mi rnams kyis/ /tshe ring ba yang de yis 'thob/ /grags pa chen po'ang 'thob par 'gyur/ /mchod rten bskor ba byas pas ni/ /'dzam bu'i gling du rus kyi mchog /cho rigs yongs su dag par yang / / 67.213b blo ldan de ni skye bar 'gyur/ /mchod rten bskor ba byas pas ni/ /kha bzhin dag kyang bzang ba dang / /mdog sdug pa dang mkhas pa dang / /bde bar gnas pa thob par 'gyur/ /mchod rten bskor ba byas pas ni/ /phyug cing nor yang mang ba dang / /ser sna med cing gtong phod dang / /sbyin pa dag la dpa' bar 'gyur/ /mchod rten bskor ba byas pas ni/ /yid du 'ong zhing blta na sdug /mdog bzang mthong na dga' ba dang / /longs spyod rgya chen spyod par 'gyur/ /mchod rten bskor ba byas pas ni/ /'du byed stong par mthong nas kyang / /de ni chos la rmongs mi 'gyur/ /myur du dga' ba thob par 'gyur/ /mchod rten bskor ba byas pas ni/ /rgyal rigs mchog tu skye bar 'gyur/ /bu smad 'khor dang ldan pa dang / /stobs dang brtson 'grus ldan par 'gyur/ /mchod rten bskor ba byas pas ni/ /bram ze che zhing mtho bar skye/ /tshul khrims ldan zhing thos dang ldan/ /rig byed gsang sngags ldan par 'gyur/ /mchod rten bskor ba byas pas ni/ /khyim bdag che zhing mtho bar skye/ /phyug cing nor yang mang ba dang / /nor dang 'bru rnams ldan par 'gyur/ /mchod rten bskor ba byas pas ni/ /'dzam bu'i gling gi mnga' bdag rje/ /sa steng mtha' dag dbang byed pa'i/ /chos dang ldan pa'i rgyal por 'gyur/ /mchod rten bskor ba byas pas ni/ /rin chen bdun dang ldan pa yi/ /'khor los sgyur ba'i rgyal por 'gyur/ /chos bzhin 'khor lo skor bar byed/ /mchod rten bskor ba byas pas ni/ /'di nas 'phos nas mtho ris 'gro/ /sangs rgyas bstan la dga' ba dang / /rnal 'byor ldan zhing rdzu 'phrul che/ /mchod rten bskor ba byas pas ni/ /lha yul dag nas 'phos nas kyang / /de ni mi yi nang du skye/ /rmongs pa med par mngal du 'jug /mchod rten bskor ba byas pas ni/ /mngal gyi skyon gyi dri ma yis/ /de la gos par mi 'gyur te/ /de ni nor bu dag pa bzhin/ /mchod rten bskor ba byas pas ni/ /ma ltor bde bar gnas par 'gyur/ /de ni bde bar btsa' ba dang / /bde bar nu zho 'thung bar 'gyur/ /mchod rten bskor ba byas pas ni/ /phas kyang g.yog 'khor mang 67.214a po yis/ /de la gso zhing gnas par 'gyur/ /ma mas rtag tu rim gro byed/ /mchod rten bskor ba byas pas ni/ /nye du rnams kyi snying du sdug /de bzhin pha ma lhag par byams/ /skyes nas longs spyod 'phel bar 'gyur/ /mchod rten bskor ba byas pas ni/ /sha za dang ni srin rnams kyis/ /de la gnod par mi 'gyur te/ /longs spyod dag la skyon med spyod/ /mchod rten bskor ba byas pas ni/ /bskal pa brgyar yang de dag rnams/ /zhar ba grum por yong mi 'gyur/ lus kyang rnam par dag par 'gyur/ /mchod rten bskor ba byas pas ni/ /mig kyang rnam par dag par 'gyur/ /dkyus ring mthon mthing sdug pa dang / /lha yi mig kyang de yis 'thob/ /mchod rten bskor ba byas pas ni/ /lus bde sems kyang brtan pa dang / /de bzhin brtson 'grus brtan pa dang / /dpung mgo zlum zhing brtan par 'gyur/ /mchod rten bskor ba byas pas ni/ /stobs dang byad gzugs phun sum tshogs/ /yan lag thams cad mtshan rnams kyis/ /legs par brgyan cing ldan par 'gyur/ /mchod rten bskor ba byas pas ni/ /sum bcu rtsa gsum dbang phyug rje/ /rdzu 'phrul che ba'i brgya byin du/ /lha yi dbang po chen por 'gyur/ /mchod rten bskor ba byas pas ni/ /'thab bral lha yi rgyal po dang / de bzhin yongs su dga' ldan dang / /'phrul dga' gzhan 'phrul dbang byed 'gyur/ /mchod rten bskor ba byas pas ni/ /tshangs pa'i 'jig rten tshangs pa yi/ /dbang phyug nyid du de 'gyur zhing / /lha rnams bye ba snyed kyis mchod/ /mchod rten bskor ba byas pas ni/ /bskal pa bye ba stong dag dang / /khrag khrig phrag brgya dag tu yang / /shes rab ldan pa rtag tu mchod/ /mchod rten bskor ba byas pas ni/ /bskal pa bye ba stong dag tu/ /lus gtsang gos kyang gtsang ba dang / /dkar po'i chos dang ldan par 'gyur/ /mchod rten bskor ba byas pas ni/ /stobs dang brtson 'grus phun sum tshogs/ /de ni le lo med pa dang / /shin du bsgrub pa thob par 'gyur/ /mchod rten bskor ba byas pas ni/ /brtson 'grus brtan zhing 67.214b mthu yang brtan/ /rtsal brtan cis kyang mi tshugs shing / /don rnams myur du 'grub par byed/ /mchod rten bskor ba byas pas ni/ /gdangs snyan gsang yang mtho ba dang / /yid du 'ong ba'i nga ro can/ /gnod pa med cing nad med 'gyur/ /mchod rten bskor ba byas pas ni/ /nga nyid kyis ni bstan pa yi/ /gnas der myur du de 'gro zhing / /shas cher skye ba thob par 'gyur/ /mchod rten bskor ba byas pas ni/ /dran pa nye bar gzhag pa bzhi/ /sems kyi tshad med bzhi po dang / /rdzu 'phrul rkang pa'i dbang yang 'thob/ /mchod rten bskor ba byas pas ni/ /'phags pa'i bden pa bzhi po dang / /dbang po rnams dang stobs rnams dang / /byang chub yan lag 'bras bu 'thob/ /mchod rten bskor ba byas pas ni/ /mngon shes drug ldan zag pa med/ /nyon mongs thams cad spangs pa yi/ /dgra bcom rdzu 'phrul chen por 'gyur/ /mchod rten bskor ba byas pas ni/ /'dod chags zhe sdang spangs pa dang / /'khor rnams thams cad spangs pa yi/ /rang rgyal byang chub 'thob par 'gyur/ /mchod rten bskor ba byas pas ni/ /'jig rten dag tu de bzhin gshegs/ /mtshan rnams kyis ni brgyan pa dang / /gser gyi sku mdog 'thob par 'gyur/ /lus kyi las kyang bskor ba yin/ /ngag gi las kyang bskor ba yin/ /yid kyi las kyang bskor ba yin/ /smon lam btab pa 'ang bskor ba yin/ /'dir ni bskor ba byas pa yis/ /bgrod dka' bde dgur don rnams 'grub/ /'jig rten mgon po'i mchod rten la/ /bskor ba byas pa'i yon tan gang / /de ni tshig tsam nyi tshe yis/ /legs par bstan par mi nus so/ /sems can rnams la snying brtse'i phyir/ /shA ri'i bus ni zhus nas kyang / /mchod rten phyag byas yon tan gang / /'jig rten mgon pos bstan pa yin/ /rta brgya dang ni gser srang brgya/ /drel mo'i shing rta brgya dag dang / /rgod ma brgya yi shing rta rnams/ /rin chen sna tshogs bkang ba yang / /bskor ba'i gom pa gcig bor ba'i/ /bcu drug char yang mi phod do/ /kam po dzi 67.215a yi bu mo brgya/ /nor bu rna cha gdub 'khor thogs/ /gser gyi dpung rgyan 'chang ba dang / /mgrin pa gser gyis legs brgyan pa/ /bskor ba'i gom pa gcig bor ba'i/ /bcu drug char yang mi phod do/ /gangs kyi glang chen brgya rten dag /lus chen nam tshong yangs pa dang / /sna yang gshol mda' 'dra ba'i glang / /gser dang nor bus brgyan pa dang / /bskor ba'i gom pa gcig bor ba'i/ /bcu drug char yang mi phod do/ /mkhas pa gang gis sangs rgyas mchod rten la/ /dga' ba'i sems kyis gom pa gcig bor ba/ /'dzam bu'i chu klung gser srang 'bum grangs snyed/ /de ni de dang mtshungs pa yod ma yin/ /mkhas pa gang gis sangs rgyas mchod rten la/ /dga' ba'i sems kyis 'jim gong gcig bor ba/ /'dzam bu'i chu klung gser gyi pho brang 'bum/ /de ni de dang mtshungs pa yod ma yin/ /mkhas pa gang gis sangs rgyas mchod rten la/ /dga' ba'i sems kyis me tog sil ma spungs/ /'dzam bu'i chu klung gser snod 'bum bzhag pa/ /de ni de dang mtshungs pa yod ma yin/ /mkhas pa gang gis sangs rgyas mchod rten la/ /dga' ba'i sems kyis me tog phreng ba thogs/ /'dzam bu'i chu klung gser khal bye ba gnyis/ /de ni de dang mtshungs pa yod ma yin/ /mkhas pa gang gis sangs rgyas mchod rten la/ dga' ba'i sems kyis spos chus dbang bskur ba/ /'dzam bu'i chu klung gser gyi phung po 'bum/ /de ni de dang mtshungs pa yod ma yin/ /mkhas pa gang gis sangs rgyas mchod rten la/ /dga' ba'i sems kyis mar me 'bul byed pa/ /'dzam bu'i chu klung gser srang bye ba 'bum/ /de ni de dang mtshungs pa yod ma yin/ /mkhas pa gang gis sangs rgyas mchod rten la/ /dga' ba'i sems kyis rgyal mtshan 'phan gdugs thogs/ /gser gyi ri bo lhun po tshad 'bum yang / /de ni de dang mtshungs pa yod ma yin/ /'di ni dpag med de bzhin gshegs/ /rgya mtsho 'dra ba'i rdzogs sangs rgyas/ /ded dpon bla na med pa la/ /phul ba'i phan yon bstan pa yin/ /bzhugs pa'i tshe na gang gis 67.215b mchod/ /mya ngan 'das 'og gang gis mchod/ /sems dge ba ni mtshungs 'gyur na/ /bsod nams la ni khyad par med/ /de ltar sangs rgyas bsam mi khyab/ /sangs rgyas chos kyang bsam mi khyab/ /bsam mi khyab la dad rnams kyis/ /rnam par sman pa 'ang bsam mi khyab/ /mchod rten bskor ba'i tshigs su bcad pa rdzogs so// // |