@##/ /rgya gar skad du/ Ar+ya sad dzA na pu ru Sha sU tra/ bod skad du/ 'phags pa skyes bu dam pa'i mdo/ 'phags pa 'jam dpal gzhon nur gyur pa la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas bcom ldan 'das kyis dge slong rnams la bka' stsal pa/ dge slong dag lnga po 'di dag ni skyes bu dam pa'i sbyin pa dag yin te/ lnga gang zhe na dge slong dag skyes bu dam pa ni dad pas sbyin pa sbyin par byed pa yin/ gus par byas te rang gi lag pa nas dang / dus su gzhan dag la mi gnod par sbyin pa sbyin par byed pa yin no/ /dge slong dag dad pas sbyin pa byin pa'i 'bras bu rnam par smin par 'dod bya ba gang zhe na/ dad pas sbyin pa byin pas phyug por 'gyur ba yin/ nor mang ba dang / longs spyod che ba yin/ nor gyi yo byad mang ba yin/ bdag dbang ba'i slong che ba yin/ nor dang / 'bru dang / dbyig dang / gser dang / mdzod dang / bde ba'i tshogs mang ba yin/ bran dang / bran mo dang / las byed pa dang / zho shas 'tsho ba mang ba yin mdza' bo dang / blon po dang / nye du dang / snag gi gnyen mtshams mang ba yin te/ dge slong dag dad pas sbyin pa byin pa'i 'bras bu rnams par smin pa de lta bu 'dod par bya'o/ /dge slong dag gus par byas te/ sbyin pa 67.270b byin pa'i 'bras bu rnam par smin pa 'dod par bya ba gang zhe na/ gus par byas te sbyin pa byin pas phyug por 'gyur ba yin/ mdza' bo dang / blon po dang / nye du dang / snag gi gnyen mtshams mang ba yin pa'i bar snga ma bzhin no/ /bu dang / chung ma dag dang bran dang / bran mo dang las byed pa dang / zho shas 'tsho ba dang mdza' bo dang / blon po dang nye du dang / snag gi gnyen mtshams dag gis kyang / /gus par byas par 'gyur ba yin te/ dge slong dag gus par byas te sbyin pa byin pa'i 'bras bu rnam par smin pa de lta bu 'dod par bya'o/ /dge slong dag rang gi lag pa nas sbyin pa'i 'bras bu rnam par smin pa 'dod par bya ba gang zhe na/ rang gi lag pa nas sbyin pa byin pas phyug por gyur pa nas mdza' bo dang / blon po dang nye du dang / snag gi gnyen mtshams mang ba yin pa'i bar snga ma bzhin no/ /de'i khyim gyi longs spyod rgya chen po dag la yang sems 'jug pa yin/ zas kyi longs spyod rgya chen po dag dang / theg pa'i longs spyod rgya chen po dag dang / mal cha'i longs spyod rgya chen po dag dang / gzugs dang / sgra dang / dri dang / ro dang / reg bya rgya chen dag la yang sems 'jug pa yin no/ /dge slong dag rang gi lag pa nas sbyin pa byin pa'i 'bras bu rnam par smin pa de lta bu 'dod par bya'o/ /dge slong dag dus su sbyin pa byin pa'i 'bras bu rnam par smin pa 'dod par bya ba gang zhe na/ dus su sbyin pa byin pas phyug por 'gyur ba yin pa nas/ mdza' bo dang / blon po dang / nye du dang / snag gi gnyen mtshams mang po'i bar snga ma bzhin no/ /de'i nor dag kyang dus su thob pa dang / mang zhing 'thun pa mngon du 'byung ba yin te/ dge slong dag dus su sbyin pa byin pa'i 'bras bu rnam par smin pa de lta bu 'dod par bya'o/ /dge slong dag gzhan la mi gnod par sbyin pa byin pa'i 'bras bu rnam par smin pa 'dod par bya ba gang zhe na/ gzhan la mi 67.271a gnod par sbyin pa byin pas phyug por 'gyur ba yin pa nas mdza' bo dang / blon po dang / nye du dang / snag gi gnyen mtshams mang ba'i bar snga ma bzhin no/ /de'i longs spyod gang dag brtson 'grus brtsams pas thob pa lags/ mthus bsgrubs pa rngul zhing dri ma chags chags su bsgrubs pa/ chos dang ldan pa chos kyis thob pa de dag la yang rgyal po 'am/ rkun po 'am/ me 'am/ chu 'am/ mi 'dza' ba bgo skal la spyod pa 'am/ gang las kyang bar chad mi 'byung ba yin te/ gzhan la mi gnod par sbyin pa byin pa'i 'bras bu rnam par smin pa 'di la 'dod par bya'o/ /bcom ldan 'das kyis de skad ces bka' stsal to/ /bde bar gshegs pas de skad ces gsungs nas 'di ltar ston pas gzhan yang 'di skad ces bka' stsal to/ /dad cing gus par byas te rang gi lag pa nas/ /dus su gnod pa med par mkhas pa sbyin pa byed/ /sbyin pa rgya che ba dang chen po 'dir byin nas/ /kun bged byed pa de ni bzang 'gror 'gro ba yin/ /bcom ldan 'das kyis de skad ces bka' stsal nas dge slong de dag yi rangs te/ bcom ldan 'das kyis gsungs pa la mngon par bstod do/ /'phags pa skyes bu dam pa'i mdo/ rdzogs s+ho// //d+harma shud d+ho pa ri pri ts+tsha'o/[ ]/rgya gar gyi mkhan po d+harmA ka ra dang / lo ts+tsha ba ban de bzang skyong gis bsgyur/ ban de dpal brtsegs kyis zhu chen bgyis/ she/ d+harma shud d+ho ba ri pri ts+tsha'o/ / |