@#/ /dge ba dang mi dge 71.216a ba'i las kyi rnam par smin pa bstan pa'i mdo/ bam po gcig go/ /'di skad bdag gis thos pa dus gcig na/ bcom ldan 'das mnyan yod na 'dze ta'i tshal skyabs med zas sbyin gyi kun dga' ra ba na/ byang chub sems dpa' tshad med pa dang / lha dang mi'i 'khor mang pos bskor nas chos ston cing bzhugs so/ /de nas dga' bos 'gro ba mang po'i don gyi phyir bcom ldan 'das la 'di skad ces gsol to/ /bcom ldan 'das da ltar 'jig rten gyi khams 'dir rigs 'thun pa'i nang 'dir skyes pa las/ bzang po yang mchis/ mi sdug pa yang mchis/ drag po yang mchis/ zhan pa yang mchis/ dbul po yang mchis/ phyug po yang mchis/ nyon mongs pa yang mchis/ bde ba yang mchis/ btsan pa yang mchis/ ma rabs kyang mchis/ skad ni mi mtshungs/ tshig ni mi mthun/ la la ni lo brgya lon nas 'chi ba yang mchis/ la la ni sum bcu 'am/ bcu lon nas 'chi ba yang mchis/ la la ni byad bzhin bzang yang dbul la/ la la ni mi sdug pa la phyug pa yang mchis/ nyams rtsal che ba ni ma rabs kyi nang na yang mchis/ nyams rtsal chung la gral mtho ba yang mchis/ la la ni nyon mongs la tshe ring ba yang mchis/ la la ni skyid cing tshe thung / la la ni legs par spyod pa la byur dang phrad/ la la ni mi dge ba spyod pa la legs pa'i don du 'gyur ba yang mchis/ dkar zhing sha bzang la mi g.yo ba yang mchis/ la la ni sngo zhing gnag la mdangs dang ldan pa yang mchis/ la la ni lus chung zhing thung la snying rtsal dang ldan pa yang mchis/ la la ni che zhing ring yang gzhan gyi bran g.yog bgyid pa yang mchis/ la la ni bu tsha mang ba yang mchis/ la la ni rmang ba yang mchis/ la la ni rtag par 71.216b phyi rol du 'khyam la bkres pa yang mchis/ la la ni pho brang gi nang na 'dug cing gos dang zas kyis mi brel te longs spyod pa yang mchis/ gzhon na dbul zhing rgas na phyug cing btsan pa yang mchis/ drang rkan che zhing 'gal bar mi byed pa las gyod la thogs pa yang mchis/ pha ni byams bu ni sri zhu che ste/ gtsug lag gi yi ge dang gzhung smos shing bshad pa yang mchis/ spun mi mthun nas rtsod pa yang mchis/ gnas mtho zhing yo byad rnam pa sna tshogs su ldan pa yang mchis/ bdag gi khyim med la 'dron thabs su gnas pa yang mchis/ bya dang / ri dgas dang / gcan zan dang 'dra bar gnas pa yang mchis/ gos su bal gos gyon zhing zas su sha za zhing yi ge mi shes pa yang mchis/ mi g.yo bar 'dug kyang skyid cing yon tan thob pa yang mchis/ gla za zhing gnas pa yang mchis/ yid gzhungs shing khong grol ba yang mchis/ rmongs shing blun la ngan pa yang mchis/ btsal te ma rnyed pa yang mchis/ ma btsal te rnyed pa yang mchis/ phyug cing btsan la nor dang ldan la ser sna che ba yang mchis/ dbul la sbyin pa la sred pa yang mchis/ tshig smra na bden zhing mnyen par zer ba yang mchis/ tshig smra na gzer ba bzhin du zug pa yang mchis/ gzhan gyis byams shing bkur ba yang mchis/ kun gyis spangs shing bsrings pa yang mchis/ snying rje'i sems kyis sems can gso ba yang mchis/ bag med par srog gcod pa yang mchis/ khong yangs shing kun dang 'thun pa yang mchis/ kun gyis mi 'dod pa yang mchis/ mna' ma dang sgyug mor mi mthun pa yang mchis/ tshag pa mo dang 'dza' ba yang mchis/ la la ni chos kyi gtam la dga' ba yang mchis/ la la ni mdo sde thos nas gnyid bro ba yang mchis/ la la ni brdal bag can la 'dzangs pa yang mchis/ 71.217a la la ni gtsug lag khang la dga' zhing bsgom pa la 'grus/ la la ni byol song gi gzugs dang mtshungs/ la la ni ri dgas rnam pa sna tshogs su 'gyur ba yang mchis na/ bcom ldan 'das kyis rgyu dang 'bras bu rgyas par bshad na 'khor mang po kun gyis thos nas sems rtse gcig tu dge ba'i rjes su phyogs par 'gyur lags so/ /bcom ldan 'das kyis bka' stsal pa/ dga' bo khyod kyis ji ltar rnam par smin pa mi 'dra bar 'dri ba de bzhin du/ de dag kun kyang tshe rabs snga ma la spyod pa mi mthun pas/ de'i phyir na khyad par sna tshogs su gyur to/ /de la da ltar byad bzhin bzang po ni bzod pa las 'ongs so/ /mi sdug pa ni zhe sdang dang khong khro ba las 'ongs so/ /dbul phongs pa ni ser sna las 'ongs so/ /btsan zhing che ba ni sangs rgyas la gus par phyag 'tshal ba las 'ongs so/ /mi ma rabs thams cad ni rgyags shing dregs pa las 'ongs so/ /lus ring zhing bzang ba ni bkur sti byas pa las 'ongs so/ /lus thung ba ni chos la le lo byas pa las 'ongs so/ /blun pa ni lug las 'ongs so/ /skam zhing gnag pa ni de bzhin gshegs pa'i sku sgribs pa las 'ongs so/ /mchu dma' ba ni chos ston pa'i zas la myangs pa las 'ongs so/ /mig tshag pa ni me bslangs pa mi ster ba las 'ongs so/ /mun sros nas mig mi mthong ba ni khra'i mig brus pa las 'ongs so/ /lkugs pa ni dam pa'i chos la skur pa 'debs pa las 'ongs so/ /'on pa ni chos thos su mi dga' ba las 'ongs so/ /so sto ba ni rkang dang rus pa la sred pa las 'ongs so/ /sna bsnyer ba ni spos mi zhim pa bsregs te sangs rgyas la mchod pa las 'ongs so/ /sho re ni nya'i mchu phug pa las 'ongs so/ /skra ser ba ni phag gi spu gtogs pa las 'ongs so/ /rna ba ral ba ni rna ba phug pa las 'ongs so/ /thang sbrul 71.217b 'dra ba ni gos mi gtsang ba gyon te sangs rgyas la snyogs pa las 'ongs so/ /ngams gnag pa ni sangs rgyas kyi sku gzugs khyim mam khyams su bzhag pa las 'ongs so/ /zhar ba dang gyol ba ni mkhan po dang bla ma mthong ste mi ldang ba las 'ongs so/ /sgur ba ni gos mi gtsang ba gyon zhing sangs rgyas kyi sku la rgyab kyis phyogs pa las 'ongs so/ /dpral ba 'bur ba ni sangs rgyas mthong nas phyag gus par mi 'tshal zhing lag pa dpral bar gtugs pa las 'ongs so/ /'jing ba thung ba ni btsun pa dang bla ma mthong nas mgo smad cing byol ba las 'ongs so/ /mchin pa na ba ni sems can gyi lus gtubs shing gtsags pa las 'ongs so/ /mdze can ni gzhan gyi nor ma 'os par blangs pa las 'ongs so/ /lud pa mang ba ni dgun mi gzhan la zas grang mo byin pa las 'ongs so/ /bu tsha med pa ni bya phrug mang po bsad pa las 'ongs so/ /bu tsha mang ba ni sems can mang po gsos pa las 'ongs so/ /tshe ring ba ni snying rje che ba las 'ongs so/ /tshe thung ba ni srog gcod pa las 'ongs so/ /phyug pa ni sbyin pa byas pa las 'ongs so/ /rta dang shing rta bdog pa ni dkon mchog gsum la yon phul ba las 'ongs so/ /dbang po rno ba ni slob pa la 'grus pa dang mdo sde kha ton du byas pa las 'ongs so/ /rmun po ni byol song las 'ongs so/ /bran po dang bran mo byed pa ni bu lon ma gzhal ba las 'ongs so/ /spro thung ba ni spre'u las 'ongs so/ /yang mdze can ni dkon mchog gi rten bshig pa las 'ongs so/ /yan lag ma tshang ba ni sems can gyi rkang lag bcad pa las 'ongs so/ /gdug pa ni sbrul dang sdig pa las 'ongs so/ /dbang po drug tshang ba ni tshul khrims bsrungs pa las 'ongs so/ /dbang po drug ma tshang ba ni tshul khrims bshig pa las 'ongs so/ /gtsang sbra chung ba ni 'phags pa la ma mchod pa las 'ongs so/ /glu 71.218a gar dang rol mo la dga' ba ni rol mo mkhan du skye'o/ /'dod chags che ba ni bya las 'ongs so/ /lba ba can snog pa las 'ongs so/ /kha dman pa ni tshig rtsub mo smra ba las 'ongs so/ /mtshan dang mi ldan pa ni khyi dang / phag dang / rta'i 'bras bu bton pa las 'ongs so/ /lce thung ba ni btsun pa dang bla ma la kha byas pa dang lkog tu 'phyas pa las 'ongs so/ /gzhan gyi chung ma la g.yem pa byas pa ni ngang mo dang ngur par skye'o/ /gnyan dgu la g.yo byas pa ni bye'u mchil par skye'o/ /mdo sde dang gtsug lag gi yi ge spyod cing ser snas gzhan la mi ston pa ni tshe'i dus byas nas thang gi srin bur skye'o/ /mda' gzhu thogs pa dang rta zhon pa la dga' ba ni tshe phyi ma la 'phar ba dang spyang kir skye'o/ /skra thung ba dang mgo rgyan btags pa la dga' ba ni tshe phyi ma la srin bu mchu rings su skye'o/ /nyal zhing za ba la dga' ba ni tshe phyi ma la phag du skye'o/ /dar mtshon gyi gos la dga' ba ni bye'u khre'ur skye'o/ /mi snyan pa zlos shing ku re la dga' ba ni bya ne tso ru skye'o/ /phra ma byed pa la dga' ba ni tshe phyi ma la lto 'phye mgo drug par skye'o/ /ma 'os par ku re byed pa la dga' ba ni tshe phyi ma la srin bu rmongs par skye'o/ /gtam ngan skyel ba la dga' ba ni tshe phyi ma la srin byar skye'o/ /mi la gnod pa dang ngan du dga' zhing gtam la sred pa ni tshe phyi ma la war skye'o/ /mi dngangs pa la dga' ba ni tshe phyi ma la srin bu do log tu skye'o/ /tshe snga ma la shing lham gyon zhing lha khang du 'gro ba ni tshe phyi ma la rtar skye'o/ /tshe snga ma la 'phyen bag med par btang bas ni tshe 'di la sbur bar skye'o/ /tshe snga ma la dge 'dun gyi rang 'thag dang gtun la spyad pa ni tshe 'di la srin bu mgo rdebs su skye'o/ /sems can gyi zas la gegs byas pas ni bya shing rta mor skye'o/ /tshe snga ma la dge 'dun gyi chu brkus pas ni nya dang rul sbal la sogs 71.218b pa chu'i nang na gnas pa'i sems can du skye'o/ /tshe snga ma la dge 'dun smre bar byas pas ni gtsang sbra'i srin bur skye'o/ /dge 'dun gyi shing tog brkus pas ni mchis pa za ba'i srin bur skye'o/ /dge 'dun gyi nor brkus pas ni rang 'thag skor ba'i bong bu dang glang du skye'o/ /dge 'dun gyi nor nan gyis bskyi brnya byas pas ni bya phug ron du skye'o/ /dge 'dun la spyo ba byas pas ni glang gi gnya' ba'i srin bur skye'o/ /dge 'dun gyi ldum skyur zos pas ni ldum bur rtsa ba gang gi srin bur skye'o/ /dge 'dun gyi khri stan la 'dug pas ni srin bu mgo dmar du skye'o/ /dge 'dun gyi nor sna tshogs la spyad pas ni srin bu 'phye bor skye'o/ /mgo la rus pa'i thur ma gtur nas lha khang du 'gro na bya mchu rings su skye'o/ /dkar rtsi dang dmar rtsis byugs te lha khang du 'gro na bya skyung kar skye'o/ /dar tshon gyi gos gyon te lha khang du 'gro na bye'u se rur skye'o/ /khyo shug zhag lon te lha khang du nyal na srin bu mgo sngon du skye'o/ /de bzhin gshegs pa'i mchod rten la mjug stegs 'cha' zhing 'dug pa ni rnga mor skye'o/ /lham dang 'bob gyon zhing gzhal med khang du 'gro na sbal par skye'o/ /chos nyan pa'i tshe long gtam zer na bye'u lhan dkar du skye'o/ /dge slong khrims dag pa la mi gtsang bar bskyed pa ni lcags kyi sems can dmyal bar skye'o/ /ral gri 'khor lo khri phrag brgya snyed du char pa lus kyi steng du 'bebs shing de'i lus gtubs par 'gyur ro/ /de nas dga' bos bcom ldan 'das la 'di skad ces gsol to/ /bcom ldan 'das kyis ji ltar gsungs pa de ltar dge 'dun gyi nor la spyad pa sdig lci bar gsungs te/ gal te de ltar dge ba'i las la phyogs pa dang / sbyin bdag la sogs pa ji ltar gtsug lag khang gi nang du sti stang bgyid pa dang / phyag 'tshal bar bgyid pa lags/ bcom ldan 'das kyis bka' stsal pa/ lha khang du 'gro 71.219a ba la sems rnam pa gnyis yod de/ dge ba'i sems dang / mi dge ba'i sems so/ /de la ji ltar na dge ba'i sems zhes bya zhe na/ lha khang du phyin pa'i tshe sangs rgyas mthong na phyag 'tshal zhing / dge 'dun la bkur sti byed cing / mdo sde 'dri 'am/ 'don nam/ khrims nod dam/ sdig pa bshags pa 'am/ dkon mchog gsum gyi spyi nor la sogs pa gtong ngam/ srog la yang mi chags par dam pa'i chos 'dzin pa ni gom pa gcig bor bas kyang lhar skye bar 'gyur ro/ /ma 'ongs pa'i dus na khyim bdag tu zhugs te/ de dang 'dra ba'i longs spyod dang ldan par 'gyur ro/ /de ni dge ba'i mchog dang ldan pa yin no/ /de la gang mi dge ba ni lha khang du 'jug pa'i tshe dge 'dun la slongs mo dang bskyi brnya byed pa dang / dge 'dun la skyon tshol zhing klan ka tshol ba dang / dge 'dun gyi zhal zas zos kyang tshim pa med cing / bza' shing dang / shing tog dang / ldum skyur la sogs pa khyim du khyer ba de lta bu ni shin du dmyal ba'i 'khor lo dang / shin du 'bar ba dang / ral gri'i ri dang / ral gri'i shing la sogs pa'i dmyal bar shin du sdug bsngal len par 'gyur ro/ /de ni mi dge ba'i mchog ces bya'o/ /bcom ldan 'das kyis bka' stsal pa/ dga' bo khyod ma 'ongs pa'i tshe nga'i nye gnas rnams la dkon mchog gsum gyi dkor la ma spyod par 'dug cig ces gros thob shig /de ltar ma gyur te/ bcom ldan 'das kyis gsungs pa ltar byas na sangs rgyas byams pa 'jig rten du 'byung ba'i tshe gdon mi za bar grol lo/ /bcom ldan 'das kyis bka' stsal pa/ tshe 'di la gzhan gyi nor 'phrog na/ tshe phyi ma la shin tu grang ba'i dmyal bar ltung ngo / /dar gyi srin bur 'gyur te/ btso zhing bzhu bar 'gyur ro/ /tshe 'di la sangs rgyas kyi sku gzugs dang mdo sde la mar me yis snang ba med par byed cing mi dge ba ni kho ra khor yug gi mun nag gi sems can dmyal bar 71.219b 'gyur ro/ /tshe 'di la shan pa byed cing sems can mang po'i srog gcod pa ni ral gri dang / ral gri'i nags tshal gyi sems can dmyal bar ltung ngo / /tshe 'di la khra dang khyi la sogs pa gtong zhing rngon pa byed pa la dga' ba ni lcags kyi sog le'i dmyal bar ltung ngo / /tshe 'di la log par g.yem pa la dad pa che ba ni zangs kyi ka ba dang / lcags kyi khrag gi sems can dmyal bar ltung ngo / /tshe 'di la chung ma mang du blangs pa ni lcags kyi gtun gyi dmyal bar ltung ngo / /tshe 'di la bud med skyes pa dang mang du nyal ba ni sbrul gdug pa'i dmyal bar ltung ste/ tshe 'di la bsreg cing btso ba'i thal ba 'bab pa'i dmyal bar ltung ste/ tshe 'di la phag dang khyi'i spu btogs pas ni shin tu bskol ba'i dmyal bar ltung ngo / /tshe 'di la phag dang khyi dang rta'i 'bras bu bton pas ni rdo zug rngu'i dmyal bar ltung ngo / /tshe 'di'i la chang mang du 'thungs pa myos pa zangs khu 'thungs pa'i dmyal bar skye'o/ /tshe 'di la sems can gtubs shing dmyal bas ni lcags kyi 'khor lo'i dmyal bar ltung ngo / /tshe 'di la dge 'dun gyi shing tog brkus pa ni lcags kyi thu lum gyi dmyal bar ltung ngo / /tshe 'di la khyi dang phag gi rgyu ma zos pas ni mi gtsang ba'i dmyal bar ltung bar 'gyur ro/ /tshe 'di la nya bshor bas ni ral gri'i nags tshal gyi dmyal bar ltung bar 'gyur ro/ /tshe 'di la ma yar mo byas te/ snga ma'i bu la ner pa byed pa ni me'i shing dum gyi dmyal bar ltung bar 'gyur ro/ /tshe 'di la dbyen byed pa ni lcags kyi gshol gyi dmyal bar 'gyur ro/ /tshe 'di la tshig ngan pas mi la spyo bas ni lce med pa'i dmyal bar ltung ngo / /tshe 'di la brdzun zer ba ni lcags kyi gzer bus gzer ba'i dmyal bar ltung ngo / /tshe 'di la srog gcod cing lha'i srin la rjed pas ni lcags kyi bsnyung bu'i dmyal bar ltung ngo / /tshe 'di la bon mo byed cing 'dre bos so zhes brdzun zer zhing nor len pa ni shal ma ri'i dmyal bar ltung ngo / /tshe 'di la bon byed cing 71.220a mig btsums nas khyod kyi bla ma mchod 'os so zhes zer zhing slu ba ni rked par gtubs pa'i dmyal bar ltung ngo / /tshe 'di la bon byed cing srog gcod du bcug ste/ lha srin rjed du bcug pa ni sta res gtubs pa'i dmyal bar ltung ste/ bsrungs mas lus gtubs shing lcags kyi bya mchu can gyis mig gnyis kyi 'bras bu btsogs par 'gyur ro/ /tshe 'di la bon byed cing gshin rngog du 'dur ba dang / khang khyim bzang ngan lta ba dang / rigs lnga'i khams bde mi bde lta ba dang / glen pa bslus te nor mang du len pa ni lcags kyi dra bar bcug pa'i dmyal bar skye'o/ /bya ma rungs pa grangs med pas lus kyi steng du 'dug nas steng gi sha zad nas rus pa dang rgyus pa btogs te/ sdug bsngal mu med pa byed par 'gyur ro/ /tshe 'di la sman byed cing nad pa gso mi nus par brdzun gyis nor len pa ni lcags kyi thur mas btsugs pa'i dmyal bar ltung ste/ lus la kun du me 'bar ro/ /tshe 'di la lha khang dang mchod rten bshig cing dge 'dun dang / pha ma dang mkhan po la bag med par sri zhu chung ba ni mnar med pa'i sems can dmyal ba chen po brgyad du mthar gyis 'gro'o/ /de nas sems can dmyal ba chen po brgya sum bcu rtsa drug gi nang du 'gro ste/ la la ni bskal pa gcig /la la ni bskal pa gnyis/ la la ni bskal pa lnga'i bar du 'gro ba nas/ gzod mthar phyin nas dge ba'i bshes gnyen dang phrad na ni byang chub tu sems skye bar 'gyur ro/ /gal te ma phrad na slar yang sems can dmyal bar ltung ngo / /bcom ldan 'das kyis bka' stsal pa/ mi lus bong che zhing gnag la spro thung ba 'gro ba la dga' ba ni rnga mo las 'ongs so/ /'gro ba la sred la za ba la rngam ste/ nyam nga ba la 'byol ba ni stag las 'ongs so/ /tsha ba dang grang bas mi 'jigs shing gzugs che ba ni glang las 'ongs so/ /sgra che zhing 'dzem 71.220b bag med la gang 'dod pa dam du 'dzin cing bzang ngan bye brag mi phyed pa ni bong bu las 'ongs so/ /rtag tu sha la sred cing rngam ste 'jigs pa med pa ni seng ge las 'ongs so/ /lus ring zhing mig zlum la ri 'am dgon par shin du 'gro la chung ma la sdang ba ni stag las 'ongs so/ /spu ring zhing mig zlum ste gnas gcig tu mi dga' ba ni bya las 'ongs so/ /'gyur ldog che zhing srin bu gsod pa la dga' ba ni wa las 'ongs so/ /dpa' bshor che zhing khrel 'dzem chung zhing chung ma dang bu la sred pa ni spyang ki las 'ongs so/ /g.yon can gyi ngos 'dzin la gnyid chung la khro ba ni khyi las 'ongs so/ /khro ba la dga' zhing smra bar ni 'dod la mi kun gyis byams pa ni ne tso las 'ongs so/ /mang por 'dus shing smra ba la dga' zhing mya ngan mang ba ni bya khu byug las 'ongs so/ /bong chung zhing g.yem pa la dad che ste snying mi brtan pa ni bye'u mchil pa las 'ongs so/ /mig tshag la spro thung la kha nas lbu ba 'ong la nyal ba'i tshe na lus sbrid 'dod pa ni rtsangs pa las 'ongs so/ /smra na khro zhing pha rol gyi tshig mi go la khro la mi la gdug pa'i tshig 'byung ba ni sdig pa las 'ongs so/ /gcig pu 'dug cing za ba la brkam ste nub mo gnyid chung ba ni byi la las 'ongs so/ /khyim phugs dang rku ba la dad che ste gnyen ngo mi shes pa ni byi ba las 'ongs so/ /bcom ldan 'das kyis bka' stsal pa/ gang la la zhig gtsug lag khang dang mchod rten 'jig cing / gang gis dkon mchog gsum gyi rdzas blangs shing spyad na tshe phyi ma la bstir med pa'i sems can dmyal bar skye ste/ ci ste der skyes nas dmyal ba las thar na yang 'di lta ste/ phug ron dang / mchil pa dang / ngur pa dang / ne tso dang / bye'u ske sngo dang / nya dang / rus sbal dang / spre'u dang / phag pa dang / sha bar skye'o/ /gal te mir skyes na yang / ma ning dang / bud med dang / mtshan 71.221a nyid pa dang / mtshan ma med pa spun pa la sogs par skye'o/ /mi zhe sdang che ba ni sbrul gdug pa dang / seng ge dang / stag dang / spyang ki dang / dom dang / dred dang / byi la dang / khra la sogs pa thams cad du skye'o/ /ci ste mi lus thob na yang bya dang / phag dang / gsod pa la dad cing / rngon pa dang / btson rdzir 'gyur ro/ /gti mug che zhing dge mi dge'i bye brag mi phyed pa ni tshe phyi ma la bal glang dang / phag dang / ba lang dang / lug dang / ma he dang / shig dang / lji ba dang / sbrang ma dang / mchu bsnyung dang / grog mo la sogs par skye'o/ /ci ste mi lus thob na yang / 'on pa dang / dmus long dang / lkugs pa dang / lba ba can dang / sgur po la sogs par skye'o/ /yan lag ma tshang ba dang / dbang po ma tshang ba'i lus su 'gyur te/ chos la nan tan byed mi nus so/ /rgyags shing dregs pa ni tshe phyi ma la mi gtsang ba'i nang gi srin bu dang / rnga mo dang / bong bu dang / khyi dang / rta la sogs par skye'o/ /ci ste mi lus thob na yang bran khol du skye'o/ /dbul phongs te slongs mo byed la thams cad kyis brnyas shing dmad par 'ong ngo / /gang dbang po yod pas bran du gzer zhing gzhan gyi nor la len pa ni tshe phyi ma la shal ma li'i sems can dmyal bar ltung ste/ sems can khri phrag brgyad stong snyed sos sha gcod cing za bar 'gyur ro/ /tshe 'di la pha rol po 'greng du mi dga' ba ni tshe phyi ma la ba lang gi lus su skye ste/ rkang lag rengs shing nyal mi shes pas gnyid log tu med par 'gyur ro/ /tshe 'di la mchod ston zos pa'i nub mo zas zos na tshe phyi ma la 'dre ltogs su 'gyur ro/ /lo khri brgya stong gi bar du bza' ba dang / btung ba rnyed par mi 'gyur ro/ /yan man du 'gro ba'i tshe tshigs thams cad du me 'bar ro/ /tshe 'di la sgren mor 'dug par dad pa ni spu nyung ba'i bya rtag tu 'bod par skye'o/ /tshe 71.221b 'di la mchod ston gyi zas zos kyi lhag ma khyim du khyer ba ni tshe phyi ma la lcags 'bar ba'i sems can dmyal bar ltung ngo / /ci ste mir skyes na yang lkog nad can dang / tshe thung bar 'gyur ro/ /tshe 'di la sangs rgyas la phyag 'tshal ba'i tshe dpral ba sa la ma gtugs na spyi'u tshugs kyi dmyal bar ltung ngo / /ci ste mir skyes na yang mi'o cog gis brnyas shing slu bar skye'o/ /tshe snga ma la sangs rgyas la phyag 'tshal ba'i tshe thal mo mi sbyor ba ni tshe phyi ma la mtha' 'khob du skye ste/ las mang du byas te 'bras bu 'grub pa chung ngo / /tshe 'di la zhal ton nyal nas mi langs pa ni tshe phyi ma la lto 'phye'i ris su skye'o/ /lus ring zhing che ba ni srin bu pho mo thams cad kyis za bar 'ong ngo / /tshe 'di la lag pa bsnol te sangs rgyas la phyag 'tshal ba ni tshe phyi ma la phyin ka log tu bcings pa'i sems can dmyal bar ltung ngo / /mi ru skyes na yang nye bar gyod la thogs par 'ong ngo / /tshe 'di la thal mo sbyar te yan lag smad lnga sa la gtugs te/ rtse gcig pa'i sems kyis sangs rgyas la phyag 'tshal ba ni gang nas gang du skyes par rtag tu btsan zhing skyid par 'ong ngo / /tshe 'di la mkhong zhing spro thung ba ni byol song las 'ongs so/ /tshe 'di la mig yon por 'dug pa ni gzhan gyi chung ma la mig zur gyis bstegs pa las 'ongs so/ /tshe 'di la chung ma'i non byas te pha ma la rgol ba ni lce gtubs pa 'i sems can dmyal bar ltung ngo / /tshe 'di la chang gi dbang du sred pa ni tshe phyi ma la chu'i srin bur skye'o/ /ci ste mir skyes na yang lha gor dang dbugs mi bde ba'i nad kyis 'chi bar 'gyur ro/ /bcom ldan 'das kyis bka' stsal pa/ dga' bo ngas ji ltar bshad pa'i sdug bsngal mang po rnam pa sna tshogs kun gyis mi dge ba rnams las gyur te rab ni sems can dmyal bar ltung ngo / /'bring ni byol song gi rgyur 'gyur ro/ / 71.222a tha ma ni yi dgas kyi rgyur 'gyur ro/ /srog gcod pas sems can ngan song gsum du ltung ngo / /ci ste mir skyes na yang 'bras bu rnam pa gnyis smin te/ dbul phongs pa dang / nor thun mong du spyad pa'i dbang med do/ /mi tshangs par spyod pas kyang sems can ngan song gsum du ltung ngo / /ci ste mir skyes na yang 'bras bu rnam pa gnyis smin te/ bdag gi chung ma la 'phyo ba dang / chen chun gnyis rtsod pa dang / bdag gi bsam pa bzhin mi 'grub bo/ /brdzun du smra ba yang sems can ngan song gsum du ltung bar 'gyur ro/ /ci ste mir skyes na yang 'bras bu rnam pa gnyis smin te/ gzhan gyis skur pa 'debs pa dang / ma 'ongs pa kun gyis slu bar 'gyur ro/ /phra ma byed pa yang sems can ngan song gsum du ltung bar byed do/ /ci ste mir skyes na yang gnyen zhig pa dang / gnyen ngan pa dang / phrag dog can du 'gyur ro/ /ngag mi snyan par smra na yang sems can ngan song gsum du ltung ngo / /ci ste mir skyes na yang 'bras bu rnam pa gnyis smin te/ rtag tu sgra mi snyan pa mang po thos pa dang / smras so cog skyon can rtsod par 'gyur ro/ /tshig khyal pa byed pa yang ngan song gsum du ltung bar 'gyur te/ ci ste mir skyes na yang 'bras bu rnam pa gnyis smin te/ bden pa'i tshig smras pa yang kun gyis yid mi ches pa dang / smras pa thams cad mi gsal bar 'ong ngo / /'dod chags kyi kha na ma tho ba yang sems can ngan song gsum du ltung bar byed do/ /ci ste mir skyes na yang 'bras bu rnam pa gnyis smin te/ nor la chags shing chog mi shes pa'i rang bzhin dang / mang du tshol yang bsams pa bzhin mi 'grub po/ /zhe sdang gi kha na ma tho ba yang sems can ngan song gsum du ltung bar byed do/ /ci ste mir skyes na yang 'bras bu rnam pa gnyis smin te/ gzhan gyis rtag tu glags tshol 71.222b ba dang / rtag tu gzhan gyis 'tshe bar 'gyur ro/ /log par lta ba'i kha na ma tho ba yang sems can ngan song gsum du ltung ngo / /ci ste mir skyes na yang 'bras bu rnam pa gnyis smin te/ rtag par log par lta ba'i khyim du skye ba dang / g.yon can du skye bar 'gyur ro/ /kye rgyal ba'i sras dag de lta bu'i mi dge ba bcu ni sdug bsngal mang pos gdungs ba'i rgyu yin no/ /de nas 'khor mang po'i nang nas mi dge ba bcu'i las kyi lam byed pa dag bcom ldan 'das kyis sems can dmyal ba'i sdug bsngal rnams bshad pa 'di thos nas thams cad kyis cho nges btab ste/ bcom ldan 'das la 'di skad ces gsol to/ /bdag cag rnams kyis dge ba ji lta bu zhig gis sdug bsngal de dag las ji ltar thar bar 'gyur/ bcom ldan 'das kyis bka' stsal pa/ khyed rnams sems can thams cad bsod nams kyi las 'thun par gyis shig /ji ltar na bsod nams byed ce na/ gang la la zhig bdag nyid kyi sems can gyi don chen po byed pa gtso bor byas pa la mchod rten dang / gtsug lag khang brtsigs na ma 'ongs pa'i dus na gdon mi za bar rgyal por 'gyur te/ 'gro ba mang po'i don byed cing 'gro'o cog gi kun la mi mthun pa med do/ /tshe 'di la chos kyi 'gro ba dang / chos la dad pa ni mi'i mchog tu 'gyur ro/ /ma 'ongs pa'i dus na gdon mi za bar blon che 'am/ khams kyi dbang po blon du 'gyur ro/ /gos dang rta dang ldan zhing dgos so cog tshogs par 'gyur ro/ /tshe 'di la mi mang po la btud cing bsod nams byed pa ni phyug cing btsan pa'i khyim bdag tu 'gyur te/ mang po kun gyis bkur ba dang / phyogs bzhi dag tu 'gro yang bgegs med cing bya'o cog 'grub bo/ /tshe 'di la sangs rgyas kyi mdun du me mar 'bud cing snang gsal la dad pa ni ma 'ongs 71.223a pa'i dus na nyi ma dang zla ba'i lhar skye'o/ /'od kyis bdag la gsal bar 'gyur ro/ /tshe 'di la snying rje'i sems kyis sbyin pa byin na ma 'ongs pa'i dus na rab tu phyug cing zas dang gos kyang yid bzhin du 'grub bo/ /tshe 'di la zas skom mi la sbyin pa la dga' ba ni gar skyes pa thams cad du yid bzhin gyi zas su 'gyur zhing zas dang / skom yang ldan la dbang po rno zhing spobs pa che ste tshe ring bar 'gyur ro/ /gang gis byol song la zas byin na ni lan brgya 'gyur 'thob bo/ /log sred la sbyin pa sbyin pas ni lan stong 'gyur 'thob bo/ /dge slong ngam/ dge slong ma 'am/ khrims gtsang ma la sbyin pa byin pas ni lan khrir 'gyur ro/ /chos smra ba'i dge slong theg pa chen po spel zhing de bzhin gshegs pa'i gter bshad pa mang po kun gyi mig phyed nus pa la byin na lan grangs med tshad med pa snyed do/ /gal te sangs rgyas dang / byang chub sems dpa' rnams la byin na 'bras gu mthar gtugs par 'gyur ro/ /gzhan yang sbyin gnas gsum la sbyin pa byas na rnam par sbyin pa'i 'bras bu zad mi shes so/ /gsum gang zhe na/ sangs rgyas dang / pha ma dang / nad pa'o/ /de dag la zas gcig sbyin pa byas pas kyang de lta bu'i 'bras bu mi zad pa 'thob par 'gyur na/ rtag tu sbyin pa byin pa lta ci smos/ tshe 'di la dge 'dun mang po la khrus byas na skye ba thams cad du byad bzhin bzang zhing / yid bzhin gyi gos dang ldan la mang po kun gyis bkur bar 'gyur ro/ /tshe 'di la dam pa'i chos kyi mdo sde klog pa dang / 'don pa la bsngags pas ni skye ba thams cad du sgra dbyangs snyan cing kun gyis thos par dga' bar 'gyur ro/ /tshe 'di la tshul khrims sdom pas ni skye ba thams cad du byad bzhin bzang ba dang / mi'i mchog tu 'gyur ro/ /tshe 'di la chu dkon pa'i sar khron pa mang po 71.223b brkos la skom sbyar la/ lam srang du kun shong bar byed de/ bskyed cing mi'o cog sgrol ba ni skye ba thams cad du mi'i rgyal po byed cing zas skom ro brgya dang ldan pa yid bzhin du 'byung bar 'gyur ro/ /tshe 'di la mdo sde la sogs pa 'dri 'am gzhan la byin te klog tu bcug pa ni skye ba thams cad du tshig la thogs pa med cing slob pa thams cad lan cig thos pas mi brjed par zin par 'gyur ro/ /sangs rgyas dang byang chub sems dpa' yang rtag tu de la dgongs par 'gyur ro/ /mi'i nang na mchog dang phul du 'gyur ro/ /gtso bor 'gyur ro/ /tshe 'di la zam pa dang gru la sogs pa byed de/ skye bo mang po sgrol bar byed pa la dga' ba ni skye ba thams cad du rin po che sna bdun dang ldan zhing phal mang pos bkur te bsngags so/ /'gro zhing 'ong ba la bsu bskyal bar 'gyur ro/ /bcom ldan 'das kyis bka' stsal pa/ dga' bo ji ltar ngas mdo sde thams cad las rgyu dang 'bras bur bshad do/ /sems can rnams 'don nam/ klog gam/ rjes su spyod na/ mi khom pa dang / sdug bsngal las grol bar 'gyur ro zhes gsungs so/ /gang la la zhig gis mdo sde 'di la skur pa 'debs pa ni tshe 'di nyid la yang lce rtsa ba nas 'chad par 'gyur ro/ /de nas dga' bos bcom ldan 'das la 'di skad ces gsol to/ /bcom ldan 'das mdo sde'i ming cir gdags/ ji ltar gzung bar bgyi/ bcom ldan 'das kyis bka' stsal pa/ dga' bo mdo sde 'di ni dge ba dang mi dge ba'i rgyu dang 'bras bu zhes kyang bya/ byang chub sems dpa'i lam dang spyod pa zhes kyang bya ste/ de ltar zung shig /de'i tshe bcom ldan 'das kyis mdo sde 'di bshad na 'khor mang po'i nang du lha dang mi brgyad khri snyed bla na med pa'i byang chub tu sems bskyed do/ /bud med brgyad stong snyed ni mo'i lus las phor gyur te/ mi dge ba'i sems can thams cad kyang dge bar gyur to/ / 71.224a dge sdig rnam par dbye ba'i mdo/ rdzogs so// |