@#/ /rgya gar skad du/ pany+tsa shik+t+yA nu sa~M sa sU tra/ bod skad du/ bslab pa lnga'i phan yon gyi mdo/ 'phags pa dkon mchog gsum la gus pas phyag 'tshal lo/ /'di skad bdag gis thos pa dus gcig na/ bcom ldan 'das garga ra dang / chu srin byis pa gsod kyi ri dang / sman gyi nags ri dgas rgyu ba'i gnas na bzhugs so/ /de nas bcom ldan 'das snga dro'i dus su chos gos gyon lhung bzed thogs te/ pha na ku la'i khyim bdag gang na yod pa'i gnas der gshegs shing nye bar gshegs te/ gdan bshams pa la bzhugs so/ /de nas yang pha na ku la'i khyim bdag dang / ma na ku la'i khyim bdag mos/ bcom ldan 'das ga la ba der song zhing nye bar song nas/[ ]bcom ldan 'das la phyag byas te/ phyogs gcig tu 'khod do/ /phyogs gcig tu 'khod nas/ pha na ku la'i khyim bdag des 39.271a bcom ldan 'das la 'di skad ces gsol to/ /gang gi tshe btsun pa bcom ldan 'das/ ma na ku la'i khyim bdag mo bdag khye'u'i dus su bu mo gzhon nu ma blangs te/ ma na ku la'i khyim bdag mo las log par g.yem pa'i sems ma skyes so/ /lus kyi skyon gang yang ma byung ba las btsun pa bcom ldan 'das mthong ba'i chos 'di la phan tshun du mthong ngo / /skye ba gzhan du phan tshun du mthong bar bdag 'dod do/ /ma na ku la'i khyim bdag mos bcom ldan 'das la 'di skad ces gsol to/ /gang gi tshe btsun pa bcom ldan 'das pha na ku la'i khyim bdag gzhon nu'i dus su bdag gzhon nu ma blangs so/ /pha na ku la'i khyim bdag las 'dod pas log par g.yem pa'i sems ma skyes so/ /lus kyi skyon ma byung ba gang las btsun pa bcom ldan 'das mthong ba'i chos 'di la phan tshun du mthong ngo /[ ]/skye ba gzhan du phan tshun du mthong bar 'dod do/ /de nas bcom ldan 'das kyis bka' stsal pa/ khyim bdag dang khyim bdag mo gnyis po la 'dod pa yod par gyur pas mthong ba'i chos 'di la phan tshun du mthong bar gyur to/[ ]/skye ba gzhan du mthong bar 'gyur ro/ /gnyis po dag dad pa mnyam pa dang /[ ]tshul khrims mnyam pa dang / gtong ba mnyam pa dang / shes rab mnyam pa rnams kyis mthong ba'i chos 'di la phan tshun du mthong bar gyur to/ /skye ba gzhan du mthong bar 'gyur ro/ /yang tshigs su bcad pa 'di bka' stsal te/[ ]gnyis ka dad dang chos tshig dang / /mnyam dang chos kyis 'tsho ba dang / /phan tshun du ni dga' ba'i tshig /de ltar skyes pa bud med gcig /nor mang dang ni ldan pa dang / /gnas ni bzang por skye bar 'gyur/ /dgra ni de la dga' ba dang / /gnyis ka mnyam pa'i tshul khrims kyis/ /'di ltar chos ni spyad pa dang / /gnyis ka tshul khrims ldan pa dang / / 39.271b 'dod cing 'dod la yi rang bas/[ ]/lha yi gnas su dga' bar 'gyur/ /de'i phyir bslab pa rnam pa lnga po bsrung bar bya'o/ /'di lta ste/ srog gcod pa spong ba dang / ma byin par len pa spong ba dang / 'dod pas log par g.yem pa spong ba dang /[ ]brdzun du smra ba spong ba dang / myos par 'gyur ba'i chang gi btung ba spong ba'o/ /bslab pa lnga po 'di ni bsrung bar bya'o/ /de nas yang dge slong rnams kyis tshul khrims lnga'i phan yon zhus pa/ gzhan yang btsun pa bcom ldan 'das srog gcod pa spangs pa'i rnam par smin pa ji ltar shes par bgyi/ ma byin par len pa spangs pa'i rnam par smin pa ji ltar shes par bgyi/ 'dod pas log par g.yem pa spangs pa'i rnam par smin pa ji ltar shes par bgyi/ brdzun du smra ba spangs pa'i rnam par smin pa ji ltar shes par bgyi/ myos par 'gyur ba'i chang gi btung ba spangs pa'i rnam par smin pa ji ltar shes par bgyi/ de nas bcom ldan 'das kyis de rnams kyis dris pa de bstan cing rtogs par bya ba'i phyir bka' stsal pa/ dge slong dag srog gcod pa ni sbrul dug can dang 'dra bar blta bar bya'o/ /sdig pa du ma dang ldan pa dang / yi dgas kyi skye gnas su skye ba dang / dud 'gro'i skye gnas su skye ba dang / dmyal ba'i skye gnas su skye bar 'gyur te/ de'i lus zhig nas shi ba'i pha rol du dmyal ba yang sos su skye'o/ /de ni dmyal ba yang sos dmyal ba'i bsrungs mas yang dag par sreg pa dang mtshon sna tshogs pa bzung nas dum bur gcod cing lus la bug pa 'bugs par byed do/ /rnam pa lnga yis bcing ngo zhes pas las byed cing byed la/ dmyal ba'i sems can de yang dang yang du shi nas yang dang yang du 'tsho bas na yang sos su skye'o/ /de rnams de la yang sos kyi sdug bsngal drag po rtsub pa tsha ba 'joms shing 'joms la gang zhig la thams cad lci zhing srog bcad pa'i rnam par 39.272a smin pa de'o/ /de mir skyes kyang tshe thung bar 'gyur ro/ /dbang po yongs su ma tshang bar 'gyur ro/ /gzugs ngan pa dang / shes rab 'chal pa dang / rtag tu skrag pa dang / rtag tu khro ba dang / nad dang bcas pa dang / mya ngan dang bcas pa dang / dga' ba dang 'bral ba dang /[ ]thams cad dang 'bral ba dang / rtag tu yun ring du 'bral bar 'gyur ro/[ ]/de'i phyir bcom ldan 'das kyis bka' stsal pa/ skye ba lnga brgyar yi dgas dang / /nya sbrul ri dgas 'ug pa dang / /ma he khyi dang wa rnams ni/ /srog bcad pa yi nyes pa'o/ /'di ni srog bcad pa'i rnam par smin pa'o/ /srog gcod pa ni spangs pa yis/ /skyes pa 'am ni bud med lus/ /thob par 'gyur te phan yon ni/ /yon tan nyi shu mi dman par/ /yan lag nying lag phun sum tshogs/ /lus ni shed dang ldan pa dang / /rigs bzang por ni myur du skye/ /yan lag gtsang zhing 'jam pa dang / /tshe ring ba dang bde ba dang / /dpa' zhing stobs dang ldan pa dang / /tshig ni mchog tu bzang ba dang / /lha dang bcas pa dga' ba dang / /'jig rten pa yis ngan mi byed/ /'phags pas tshig ngan mi brjod dang / /byad stem ngan pas mi 'chi zhing / /mtha' yas pa yi 'khor dang ldan/ /kha dog gzugs dang yang dag ldan/ /nad dang mya ngan nyung ba dang / /khyim gyi gnas ni mi spong dang / /gzhan gyis mi dgar mi 'gyur ro/ /srog gcod pa ni spangs pa yis/ /skyes pa 'am ni bud med kyis/ /phan yon 'di ni myong bar 'gyur/ /lha rnams dang ni mi rnams su'o/ /de lus zhig cing shi nas bde 'gro mtho ris lha'i 'jig rten du nye bar skye'o/ /ma byin par len pa ni ma byin par pha rol gyi rdzas rnam par shes pa dang bcas pa dang /[ ]rnam par shes pa med pa gang rung khang pa phug nas rku ba la sogs pa'o/ /pha rol bslus nas len pa dang / rang 'tsho ba'i phyir de rnams de lta bu'i rim pas ma byin par len de de'i lus zhig nas shi ba'i pha rol du ngu 'bod du skye bar 39.272b 'gyur ro/ /ngu 'bod ces pa'i ming ni ngu 'bod gnyis te/[ ]'bar ba'i ngu 'bod dang / du ba'i ngu 'bod do/ /'bar ba'i ngu 'bod ni tshe bskal pa gcig tu gnas so/ /bar bar du me 'bar bas yongs su gang ba'o/[ ]/du ba'i ngu 'bod ni du ba 'tshub cing de gnyis la me 'bar bas ngu 'bod du sems can dmyal ba rnams 'tshed do/ /bu ga dgu nas me 'byung zhing lus sreg go/ /'di ni du ba'i ngu 'bod do/ /du ba'i ngu 'bod ni sems can dmyal ba rnams su 'tshed do/ /bu ga dgu nas du ba 'tshub cing 'byung ngo / /ji ltar zan 'tshed pa ltar lus 'tshed do/ /sems can gnyis ka mya ngan gyi sgra chen po sgrogs so/ /de dag ni der sdug bsngal drag cing rtsub pa dang tsha ba myong bar 'gyur ro/ /ma byin par len pa ni dge slong dag sbrul dug can dang 'dra bar blta bar bya'o/ /dmyal bar 'jug pa dang yi dgas kyi yul du 'jug pa dang / dud 'gro'i skye gnas su skye bar 'gyur ro/ /gang zhig ma byin par len pa'i rnam par smin pa ni shin du chen po'o/ /mir skyes kyang longs spyod rnams nyams par 'gyur ba dang / ma byin par blangs pa'i sems can gyi lag tu dngos po cung zad kyang 'chags par mi 'gyur ro/ /bza' ba dang /[ ]btung ba dang / gos dang / stan la sogs pa rnyed dka' bar 'gyur ba dang / rgyun mi 'chad par zug rngu can dang / gzhan sdang ba dang / 'tshe bar 'gyur ro/ /gang dang gang rnyed pa de dang de ni nyams par 'gyur ro/ /gzhan gyis longs spyod par 'gyur ro/ /gang 'dod pa'i longs spyod ni rnyed dka' bar 'gyur ro/ /dngos po yod pa rnams 'phel bar mi 'gyur ro/ /bde ba dang 'bral bar 'gyur ro/ /de'i phyir bcom ldan 'das kyis gsungs pa/[ ]'dir ni dbul dang bkren pa dang / /gzugs ngan nye bar 'tshe ba dang / /rigs ngan du ni skye ba ni/ /ma byin len pa'i nyes pa'o/ /ma byin par len pa'i rnam par smin pa'o/ /ma byin len pa spangs pa yis/ /skyes 39.273a pa 'am ni bud med ni/ /thob par 'gyur te phan yon ni/ /yon tan nyi shu mi dman par/ /rtag tu 'bru ni mang ba dang / /mtha' yas longs spyod phun sum tshogs/[ ]/sngar med pa ni rab tu 'phel/ /'dod pa rnams ni brtan pa dang / /gzugs sgra ro dang dri dang ni/ /reg bya rnams ni yid du 'ong / /don du gnyer ba thams cad la/ /bsam pa thams cad myur du 'grub/ /de la rgyal po chom rkun dang / /mi mdza' ba yis mi 'phrogs dang / /me 'am yang na chu dang ni/[ ]/de rnams kyis ni 'tshe mi 'gyur/ /'di 'dra ba yi longs spyod ldan/ /gang zhig ster dang za ba la/ /med ces pa ni 'byung mi 'gyur/ /rtag tu bde bar gnas pa dang / /ma byin len pa spangs pa yis/ /skyes pa 'am ni bud med la/ /thob par 'gyur te phan yon no/ /lha rnams dang ni mi rnams su'o/ /de lus zhig cing shi nas bde 'gro mtho ris dang lha'i 'jig rten du nye bar skye'o/[ ]/'dod pa rnams la log par g.yem pas ni 'tsho ba'i 'jig rten 'dir 'dod par byed pa ni/ de'i lus zhig nas shi ba'i pha rol du ngu 'bod chen por skye zhing ltung bar 'gyur ro/ /de nas phyi ru chu bo rab med kyi ngogs gnyis su/ shal ma li'i nags dpag tshad brgyad bcu gyen du mnyam zhing mtho ba/ tsher ma sor bcu drug pa yal ga rnams thur la 'phyang ba/ lus po rgyang grags bcu gnyis dang ldan zhing lus la me gyen du 'bar ba/ dpag tshad drug bcur gyen du 'gro zhing de la rtag tu sna tshogs pa'i mtshon gyis phan tshun du gsod cing / de ni shal ma li'i shing gi nags la shon no/ /lo stong phrag mang por shing gi tsher ma la 'dzeg go/ /gzhan yang dmyal ba'i srung ma rnams kyis mtshon blangs nas brgyab pas ngu zhing mgo thur la bstan nas lhung ngo / /lhung ba'i dus su lcags bsregs kyi sa gzhir gsal shing btsugs pa rnams la lhung ngo / / 39.273b de rnams bshang lam nas 'thon pas/ de rnams kyis sdug bsngal myong bar 'gyur ro/ /rgyun du ngu zhing dpag tshad drug bcu pa'i lcags kyi bum par bskal pa gcig tu sdod do/ /me mdag gis yongs su gang bar dmyal ba'i bsrungs ma rnams kyi khar ldugs so/ /de'i phyir bcom ldan 'das kyis bka' stsal pa/[ ]ri nag brtsegs pa mnyam zhing mtho/ /shing ni tsher mar bcas pa dang / /lcags kyi tsher ma rnon po yis/ /'jig rten mi la bde ba med/ /shing gi rtse mor gnas pa yi/ /dus kyi chung mas ci zhig bya/ /de'i phyir bcom ldan 'das kyis bka' stsal pa/ dge slong dag 'dod pa rnams la log par g.yem pa ni/ sbrul dug can dang 'dra bar blta bar bya'o/ /dmyal bar 'jug pa dang / yi dgas kyi yul du 'jug pa dang / dud 'gro'i skye gnas su skye bar 'gyur ro/ /gang zhig 'dod pa rnams la log par g.yem pa'i rnam par smin pa ni shin du chen po'o/ /de mir skyes kyang sdug bsngal chen po myong bar 'gyur ro/ /de'i phyir bcom ldan 'das kyis bka' stsal pa/ skye ba lnga brgyar bud med 'gyur/ /de bzhin du ni ma ning 'gyur/ /skyug bro'i mdze can yang yang 'gyur/ /log par g.yem pa'i nyes pa'o/ /skye ba du mar nye bar 'tshe ba dang /[ ]dgra mang bar 'gyur ba dang / mi mdza' ba dang rtag tu lhan cig tu gnas par 'gyur ba dang / nyal ba dang ldang ba'i tshe sdug bsngal dang bcas pa dang / dus rtag tu khro ba dang / mis gnod par byed pa dang / rtag tu lus sgur bar 'gyur ba dang / 'on pa dang / skye ba nas skye bar dmus long la stsogs par skye bar 'gyur/ rnam par 'gyur bar nges pa dang / rtag tu sems mi dga' bar 'gyur ba dang / phan tshun du 'thab pa la dga' ba dang / dga' ba'i sems dang 'bral bar 'gyur ro/ /de lus zhig nas shi ba'i pha rol du ngu 'bod chen po'i dmyal bar ltung zhing skye bar 'gyur ro/ /der yang de la 39.274a sdug bsngal drag pa dang / rtsub pa dang / tsha ba nyams su myong bar 'gyur/[ ]'dod pas log par g.yem pa'i rnam par smin pa'o/ /log par g.yem pa spangs pa yi/ /skyes pa 'am ni bud med kyis/ /thob par 'gyur te phan yon ni/ /yon tan nyi shu mi dman par/ /de la dgra ni med pa dang / /'jig rten thams cad dga' ba dang / /bza' dang btung ba rnyed par sla/ /gos dang stan dang gnas rnams dang / /bde bar nyal dang bde bar 'dug /de ni bde bar ldang ba dang / /ngan song 'jigs las rnam par grol/ /mya ngan med dang 'jigs pa 'ang med/ /nad rnams thams cad de la med/ /ma ning bud med du mi skye/ /cung zad gang ni don gnyer 'dod/ /de yi 'dod pa grub par 'gyur/ /phan tshun du ni mdza' ba mang / /gzhan ni mi dga' de la med/ /dbang po kun ni tshang ba dang / /dge ba'i mtshan nyid yang dag ldan/ /mi bzod chung dang dogs pa med/ /skyes pa bud med dogs med do/ /log par g.yem pa spangs pa yi/ /skyes pa 'am ni bud med kyis/ /phan yon 'di ni myong bar 'gyur/ /lha 'am yang na mi rnams kyis/ /de'i lus zhig nas shi ba'i pha rol du mtho ris dang lha'i 'jig rten du bde 'gror skye bar 'gyur ro/ /gang zhig skyes pa 'dod pa yis/ /skye ba yang dang yang du ni/ /bud med gzhan la 'gro mi bya/ /sems kyi dri ma bkru ba'o/ /bud med gang zhig gi gyos rgyug la nye bar mi bsnyen pa dang / rang gi khyo la nye bar mi bsnyen pa dang / rang gi khyo la mi brtsi ba dang / rang gi khyo'i phu bo la mi 'dud pa dang / rang gi khyo'i sring mo rnams la gnod par byed pa dang / gzhan yang lag pa dang / rkang pa dang / rgyab la las su bya ba mi byed pa dang / bza' ba dang btung ba gang 'dod pa mi ster ba dang / de rnams la ngo tsha dang khrel du mi byed pa dang /[ ]rang gi khyo bo la klog par byed pa dang / bskur pa btab na dmyal bar skye bar 'gyur ro/ /lcags bsregs kyi sa gzhi'i steng du nyal ba dang / 39.274b 'bar ba'i lcags kyu kha ru bcug nas mchil pa'i nya la bya ba bzhin du/ lce'i rtse mo phyi rol du phyung ste/ thag pas bcings nas phyi rol du 'don to/ /de ltar phyi rol du bton pa la/ lce'i rtse mo la mtshon chas brgyab nas brgyab pa'i gnas su mchu rang la skyes pa'i srin bu chen pos za'o/ /de ltar zos pas cung zad kyang smra bar mi nus so/ /de ltar de ni de la lo stong phrag du mar 'tshed par 'gyur ro/ /btsos nas yang dmyal ba chen por lhung bar 'gyur ro/ /de'i phyir bcom ldan 'das kyis bka' stsal pa/ gang zhig bud med skyes pa 'dod/ /skye ba skye bar yang dang yang / /lha dang lha mo ji bzhin du/ /rang gi khyo ni spang mi bya/ /brdzun du smras pas slar yang thig nag tu skye bar 'gyur ro/ /der yang dmyal ba'i srung ma rnams kyis sgra chen po'i tshig sgrogs shing / mtshon cha 'bar ba sna tshogs pa blangs nas lcags bsregs kyi sa gzhi la dmyal ba'i sems can gcig gis gcig 'grud pa dang / 'bar ba'i thig nag pos 'debs pa dang / 'bar ba'i mtshon cha bzung nas yang dag par bsgyur ba dang /[ ]zhib mas 'tshag pa bzhin du ste'u dang dgra stas 'jog pa dang / de rnams kyis sgra chen po sgrogs te ngu zhing gnas so/ /rang gi khrag 'thung zhing nang du der gnas pa de thig nag ste brdzun du smras pas skye'o/ /der sdug bsngal drag pa dang / rtsub pa dang / tsha ba'i tshor ba myong bar 'gyur ro/ /dge slong dag brdzun du smra ba ni sbrul dug can dang 'dra bar yid la bya'o/ /des sdug bsngal mang po byed do/ /dmyal bar 'jug pa dang / yi dgas kyi yul du 'jug pa dang / dud 'gro'i skye gnas su skye bar 'gyur ro/ /gang zhig brdzun du smra ba ni rnam par smin pa chen po'o/ /de mir skyes kyang snying rje med pa dang /[ ]skad bya rog gi dang 'dra ba dang / lce mi bde ba dang / so la srin 'byung ba dang / kha dri mi zhim pa dang / so mi snyoms pa dang / tshig rtsub pa dang / gre ba 'dzer ba dang / mchu mi bde ba dang / phrag dog dang bcas pa dang /[ ]rtag tu sred pa dang ldan pa dang / 39.275a de lus zhig nas shi ba'i pha rol du thig nag tu skye bar 'gyur ro/ /de'i phyir bcom ldan 'das kyis bka' stsal pa/ kha nas rnag gi dri ldang zhing / /dpag tshad gcig tu dri ngan 'gro/ /chos ni shes par mi 'gyur ba/ /rdzun du smras pa'i nyes pa'o/ /brdzun du smras pa'i rnam par smin pa'o/ /brdzun du smra ba spangs pa yis/ /skyes pa 'am ni bud med ni/ /thob par 'gyur te phan yon ni/ /sum bcu rtsa gsum mi nyung ba'i/[ ]/mig dang rna ba sna dang ni/ /lce dang lus dang de bzhin yid/ /de la rnam par dag par 'gyur/ /pad ma'i ze 'bru ltar mtshungs so/ /mig dang so ni mnyam pa dang / /lus ni mi ring mi thung la/ /ha cang sbom dang phra ba min/ /'di ltar legs par bshad pa'i tshig /ji ltar uta pa la yi dri/ /rtag tu kun da kha yi dri/ /g.yog rnams thams cad bsnyen bkur 'gyur/ /mchod par 'os pa'i tshig gis so/ /chos rnams kun la mkhas pa dang / /don dang tshig 'bru rnam par mkhas/ /sems kyi rtog la zhum pa med/ /rtag tu khyad par 'phags pa'i tshig /brdzun du smra ba spangs pa yis/ /skyes pa 'am ni bud med kyis/ /phan yon 'di ni myong bar 'gyur/ /lha dang mi ru skyes pa na/[ ]de'i lus zhig nas shi ba'i pha rol du bde 'gro lha'i 'jig rten dang mtho ris su skye'o/ /brdzun du smra ba zhes bya ba ni/ kha na ma tho ba dang bcas pa'o/ /'dod pa'i don rnams la rigs kyi bus mi bya ba nyid do/ /bden pa dang legs pa'i bcud rnams de lta bu ni blang bar bya'o/ /brdzun du smra ba zhes bya ba don med par byed pa'o/ /'jig rten slu bar byed do/ /skye ba gzhan du mar mnar med pa'i dmyal bar skye bar 'gyur ro/ /de'i phyir 'tsho ba'i slad du brdzun du smra bar mi bya'o/ /thams cad mkhyen pa sangs rgyas/ byang chub sems dpa' sgrib pa dang bcas pa'i dus na 'ang phra ma ni/ yung ba'i kha dog ltar yun ring por mi gnas so/ /phub ma'i phung po'i steng du phur pa btsugs na yun ring du mi gnas pa bzhin no/ /rta'i rgyab du shing thog ril bu bzhag na yun 39.275b ring du mi gnas pa bzhin du/ smras pa'i tshig la ral gris ske 'breg pa'i tshe tshig gnyis mi smra ba bzhin no/ /bden pa yun ring por smras pas dge sbyong dang bram zes pha rol du sgrol bar byed do/ /chang 'thungs pa ni tsha ba'i dmyal bar ltung zhing skye bar 'gyur ro/ /der lhung ba'i sems can ni lo stong phrag mang por 'tshed par 'gyur ro/ /de nas phyir phyung nas chu bo rab med kyi ngogs su skyur bar byed do/ /gang du'ang 'gro sa med par yang dang yang du skyal bar byed do/[ ]/der dmyal ba'i bsrungs ma rnams kyis mchil pa'i nya 'don pa ltar/ lcags bsregs kyi sa gzhi la rdebs par byed do/ /'di ltar sgrogs te/ kye skyes bu khyod ci 'dod/ jo bo skom mo/ /dmyal ba'i bsrungs ma des lcags 'bar ba'i lcags kyus kha phye ste lcags bzhu ba'i khu ba ldugs par byed do/ /de la de yi mchu sreg go/ /mgrin pa yang sreg go/ /brang sreg go/ /rgyu ma sreg go/ /snying yang sreg go/ /bshang lam nas mar 'thon par byed do/ /de rnams kyis sdug bsngal myong bar byed cing / ngu la 'dre bar byed do/ /de'i dus su yang 'chi bar ni mi 'gyur te/ ji srid kyi bar du sdig pa'i las kyi 'bras bu myong bar byed do/ /de srid du de rnams kyis rnam par smin pa'i tshor ba myong bar byed do/ /de'i phyir bcom ldan 'das kyis bka' stsal pa/ tsha zhing rtsub pa'i chu bo ni/ /rab med shin du bgrod par dka'/ /lcags kyi pad ma'i 'dab ma rnams/ /'dab ma rno ba'i steng du 'gre/ /chu bo rab med gzhi med par/ /chos min ji ltar spyod par 'gyur/ /gang zhig chang 'thung ba de ni sdig pa chung ba ma yin no/ /de mir gyur kyang rtag tu brjed ngas pa dang / lug ltar lkugs pa dang /[ ]shes rab 'chal pa dang / rig pa mi shes pa dang / rtag tu gnyid du 'gro ba dang / blo gros dman pa dang / gti mug che ba dang / 'jigs pa dang /[ ]skrag par 'gyur ba dang / dogs par 'gyur ba dang / phra ma can dang /[ ]tshig mi brtan pa dang / ser sna can dang / phrag dog can dang / nges 39.276a par mi 'byung ba dang / ngo tsha med pa dang / khrel med pa dang / shes rab chung ba dang / dge ba'i chos rnams mi rig pa ste/ skye ba lnga brgyar gnod sbyin skye/ /skye ba lnga brgyar khyi dang ni/ /mtha' yas smyon par skye bar 'gyur/ /chang 'thungs pa yi nyes pa'o/ /myos par 'gyur ba'i chang gi btung ba'i rnam par smin pa'o/ /chang 'thung ba ni spangs pa yis/ /skyes pa 'am ni bud med ni/ /thob ste de yi phan yon ni/ /sum bcu rtsa drug gi dman par/ /'das dang ma 'ongs pa yi dus/ /da ltar byung ba cung zad du/ /myur du shes par 'gyur ba dang / /rtag tu dran pa gnas pa dang / /de ni smyo bar mi 'gyur zhing / /khyad par 'phags pa'i shes rab dang / /mi rmongs pa dang bag yod dang / /tshig ni shin du gsal ba dang / /ngo tsha shes shing tshig ni gsal/ /de ni log par smra mi 'gyur/ /phra ma dang ni tshig rtsub med/ /don med pa la mi bstod cing / /nyin dang mtshan du de bzhin du/ /byas pa shes shing byas pa tshor/ /'dod med gtong dang tshul khrims ldan/ /khro ba med cing tshig ni drang /[ ]/'jigs pa med cing rnam par mkhas/ /ngo tsha khrel yod phun sum tshogs/ /'jigs pa dang ni dogs pa med/ /yid gzhungs thos pa 'dzin pa dang / /don yod skye bo mang nang mkhas/ /chang gi btung ba spangs pa yis/ /skyes pa 'am ni bud med kyis/ /phan yon 'di rnams myong bar 'gyur/ /lha rnams dang ni mi rnams su/ /de'i lus zhig nas shi ba'i pha rol du bde 'gro mtho ris lha'i 'jig rten dang mtho ris su skye'o/ /tshul khrims 'di rnams bsrung bar bya'o/ /'di gang zag gang su dag skyes pa 'am bud med kyi tshul khrims bsrung bar mi byed pa dang / bsgom par mi byed na de'i lus zhig nas shi ba'i pha rol du ngan song ngam ngan 'gro log par ltung bar skye bar 'gyur ro/ /gang su dag tshul khrims srung bar byed pa dang / sgom par byed pa rnams ni de'i lus zhig nas shi ba'i pha rol du bde 'gro 39.276b mtho ris dang /[ ]lha'i 'jig rten du skye bar 'gyur ro/ /bcom ldan 'das kyis de skad ces bka' stsal pa dang /[ ]dge slong de rnams bcom ldan 'das kyis gsungs pa la mngon par bstod do/ /tshul khrims lnga'i phan yon bstan pa'i mdo rdzogs so//[ ]// |