/'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u bzhi bcu rtsa gnyis pa ste 'phags pa byams pas chos brgyad zhus pa lung bstan pa/ bam po phyed pa/ @#/ /rgya gar skad du/ Ar+ya mai tre ya pa ri p-its+tshA nA ma ma hA yA na sU tra/ bod skad du/ 'phags pa byams pas zhus pa zhes bya ba theg pa chen po'i mdo/ / sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das rgyal po'i khab na bya rgod phung po'i ri la dge slong stong nyis brgya lnga bcu'i dge slong gi dge 'dun chen po dang / byang chub sems dpa' khri dang thabs gcig tu bzhugs te/ de nas bcom ldan 'das 'khor brgya stong du mas yongs su bskor cing mdun gyis bltas nas chos ston to/ /de'i tshe byang chub sems dpa' sems dpa' chen po byams pa zhes bya ba 'khor de nyid du 'dus par gyur te 'dug 83.126a go /de nas byang chub sems dpa' sems dpa' chen po byams pa stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba der logs su thal mo sbyar ba btud nas bcom ldan 'das la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs phye na de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu lags so/ /de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to/ /byams pa khyod de bzhin gshegs pa dgra bcom pa yang dag par rdzogs pa'i sangs rgyas la ci dang ci 'dod pa dris shig dang / dris pa de dang de'i lung bstan pas ngas khyod kyi sems rangs par bya'o/ /de nas bcom ldan 'das kyis skabs phye bas byang chub sems dpa' sems dpa' chen po byams pas bcom ldan 'das la 'di skad ces gsol to/ /bcom ldan 'das byang chub sems dpa' sems dpa' chen po chos du dang ldan na bla na med pa yang dag par rdzogs pa'i byang chub las phyir mi ldog pa'i chos can du 'gyur zhing mi nyams la yongs su mi nyams te/ khyad par thob par 'gyur ba dang / bdud phyir rgol ba bcom par 'gyur ba dang / byang chub sems dpa'i spyad pa spyod pa na chos thams cad kyi ngo bo nyid kyi mtshan nyid ji lta ba bzhin du rtogs nas 'khor ba na yongs su mi skyo ba dang / yongs su mi skyo ba'i yid dang ldan par gyur nas kyang gzhan gyi kha na ma las pa'i ye shes kyis myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur lags/ de skad ces gsol pa dang / bcom ldan 'das kyis byang chub sems dpa' 83.126b sems dpa' chen po byams pa la 'di skad ces bka' stsal to/ /byams pa legs so/ /byams pa khyod de bzhin gshegs pa la de na 'di 'dri bar sems pa khyod yang legs so/ /byams pa de'i phyir legs par rab tu nyon la yid la zung shig dang ngas khyod la bshad do/ /bcom ldan 'das de ltar 'tshal lo zhes gsol to/ /byang chub sems dpa' sems dpa' chen po byams pa bcom ldan 'das kyi ltar nyan pa dang / bcom ldan 'das kyis de la 'di skad ces bka' stsal to/ /byams pa byang chub sems dpa' sems dpa' chen po chos brgyad dang ldan na bla na med pa yang dag par rdzogs pa'i byang chub las phyir mi ldog pa'i chos can du 'gyur zhing mi nyams la yongs su mi nyams te/ khyad par thob par 'gyur/ bdud phyir rgol ba bcom par 'gyur/ byang chub sems dpa'i spyad pa spyod pa na chos thams cad kyi ngo bo nyid kyi mtshan nyid ji lta ba bzhin du rtogs nas 'khor ba na yongs su mi skyo bar 'gyur/ yongs su mi skyo ba'i yid dang ldan par gyur nas kyang gzhan gyi kha na ma las pa'i ye shes kyis myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /brgyad gang zhe na/ 'di lta ste/ byams pa 'di la byang chub sems dpa' sems dpa' chen po ni bsam pa phun sum tshogs pa yin/ sbyor ba phun sum tshogs pa yin/ gtong ba phun sum tshogs pa yin/ yongs su bsngo ba la mkhas pa yin/ byams pa phun sum tshogs pa yin/ snying rje phun sum tshogs pa yin/ thabs la mkhas pa yin/ shes rab kyi pha rol du phyin pa la nges par byung ba yin no/ /byams pa ji ltar na byang chub sems dpa' sems dpa' chen po bsam pa phun sum tshogs pa yin/ zhe na/ byams pa 'di la byang chub sems dpa' sems dpa' chen po ni sangs rgyas kyi bsngags pa'am/ bsngags pa ma yin pa thos kyang bla na 83.127a med pa yang dag par rdzogs pa'i byang chub la bsam pa nges pa yin/ chos kyi bsngags pa'am bsngags pa ma yin pa thos kyang bla na med pa yang dag par rdzogs pa'i byang chub la bsam pa nges pa yin/ dge 'dun gyi bsngags pa 'am bsngags pa ma yin pa thos kyang bla na med pa yang dag par rdzogs pa'i byang chub la bsam pa nges pa yin te/ byams pa de ltar na byang chub sems dpa' sems dpa' chen po bsam pa phun sum tshogs pa ni yin no/ /byams pa ji ltar na byang chub sems dpa' sems dpa' chen po sbyor ba phun sum tshogs pa yin zhe na/ byams pa 'di la byang chub sems dpa' sems dpa' chen po ni srog gcod pa spangs pa yin/ ma byin par len pa dang / 'dod pa la log par g.yem pa dang / brdzun du smra ba dang / phra ma'i tshig dang / ngag rtsub po dang / tshig kyal ba spangs pa yin te/ byams pa de ltar na byang chub sems dpa' sems dpa' chen po sbyor ba phun sum tshogs pa yin no/ /byams pa ji ltar na byang chub sems dpa' sems dpa' chen po gtong ba phun sum tshogs pa yin zhe na/ byams pa 'di la byang chub sems dpa' sems dpa' chen po ni dge sbyong dang / bram ze rnams dang / phongs pa dang / slong ba rnams la gos dang / zas dang / mal cha dang / na pa'i gsos sman dang / yo byad rnams gtong ba dang / sbyin bdag tu gyur pa yin te/ byams pa de ltar na byang chub sems dpa' sems dpa' chen po gtong ba phun sum tshogs pa yin no/ /byams pa ji ltar na byang chub sems dpa' sems dpa' chen po yongs su bsngo ba la mkhas pa yin zhe na/ byams pa 'di la byang chub sems dpa' sems dpa' chen po ni lus dang ngag dang / yid kyis dge ba'i rtsa ba mngon par 'du byed pa gang ci yang rung ste/ de thams cad bla na med pa yang dag par rdzogs pa'i byang chub tu yongs su bsngo 83.127b bar byed de/ byams pa de ltar na byang chub sems dpa' sems dpa' chen po yongs su bsngo ba la mkhas pa yin no/ /byams pa ji ltar na byang chub sems dpa' sems dpa' chen po byams pa phun sum tshogs pa yin zhe na byams pa 'di la byang chub sems dpa' sems dpa' chen po ni byams pa'i lus kyi las dang ldan pa yin/ byams pa'i ngag gi las dang ldan pa yin/ byams pa'i yid kyi las dang ldan pa yin te/ byams pa de ltar na byang chub sems dpa' sems dpa' chen po byams pa phun sum tshogs pa yin no/ /byams pa ji ltar na byang chub sems dpa' sems dpa' chen po snying rje phun sum tshogs pa yin zhe na/ byams pa 'di la byang chub sems dpa' sems dpa' chen po ni gnod sems med pa'i lus kyi las dang ldan pa yin/ gnod sems med pa'i ngag gi las dang ldan pa yin/ gnod sems med pa'i yid kyi las dang ldan pa yin te/ byams pa de ltar na byang chub sems dpa' sems dpa' chen po snying rje phun sum tshogs pa yin no/ /byams pa ji ltar na byang chub sems dpa' sems dpa' chen po thabs la mkhas pa yin zhe na/ byams pa 'di la byang chub sems dpa' sems dpa' chen po ni kun rdzob kyi don la mkhas pa yin/ dam pa'i don la mkhas pa yin/ gnyis ga'i don la mkhas pa yin te/ byams pa de ltar na byang chub sems dpa' sems dpa' chen po thabs la mkhas pa yin no/ /byams pa ji ltar na byang chub sems dpa' sems dpa' chen po sher rab kyi pha rol du phyin pa la nges par 'byung ba yin zhe na byams pa 'di la byang chub sems dpa' sems dpa' chen po ni 'di ltar yang dag par slob ste/ 'di yod pa'i phyir 'di 'byung / 'di skyes pas 'di skye ba ste/ 'di lta ste/ ma rig pa'i rkyen gyis 'du byed rnams/ 'du byed kyi rkyen gyis rnam par shes pa rnam par 83.128a shes pa'i rkyen gyis ming dang gzugs/ ming dang gzugs kyi rkyen gyis skye mched drug skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar 'gyur te/ de ltar na sdug bsngal gyi phung po chen po 'ba' zhig po 'di 'byung bar 'gyur ro/ /'di med pa'i phyir 'di mi 'byung / 'di 'gags pas 'di 'gag ste/ 'di lta ste/ ma rig pa 'gags pas 'du byed 'gag /'du byed 'gags pas rnam par shes pa 'gag rnam par shes pa 'gags pas ming dang gzugs 'gag /ming dang gzugs 'gags pas skye mched drug 'gag / skye mched drug 'gags pas reg pa 'gag /reg pa 'gags pas tshor ba 'gag /tshor ba 'gags pas sred pa 'gag /sred pa 'gags pas len pa 'gag /len pa 'gags pas srid pa 'gag /srid pa 'gags pas skye ba 'gag /skye ba 'gags pas rga shi dang / mya ngan dang / smre sngags 'don pa dang / sdug bsngal ba dang yid mi bde ba dang / 'khrug pa rnams 'gag par 'gyur te/ de ltar na sdug bsngal gyi phung po chen po 'ba' shig po 'di 'gag par 'gyur ro/ /snyam pa ste/ byams pa de ltar na byang chub sems dpa' sems dpa' chen po shes rab kyi pha rol du phyin pa la nges par byung ba yin no/ /byams pa byang chub sems dpa' sems dpa' chen po chos brgyad po de dag dang ldan na bla na med pa yang dag par rdzogs pa'i byang chub las phyir mi ldog pa'i chos can du 'gyur zhing mi nyams la yongs su mi nyams te/ khyad par thob par 'gyur/ bdud phyir rgol ba bcom par 'gyur/ byang chub sems dpa'i spyad pa spyod pa na chos thams cad kyi ngo bo nyid kyi 83.128b mtshan nyid ji lta bzhin du rtogs nas 'khor ba na yongs su mi skyo bar 'gyur/ yongs su mi skyo ba'i yid dang ldan nas kyang gzhan gyi kha na ma las pa'i ye shes kyis myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /bcom ldan 'das kyis de skad ces bka' stsal nas/ byang chub sems dpa' sems dpa' chen po byams pa dang / dge slong de dag dang / byang chub sems dpa' de dag dang / lha dang mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las byams pas zhus pa chos brgyad pa zhes bya ba'i le'u ste bzhi bcu rtsa gnyis pa rdzogs so// // rgya gar gyi mkhan po dzi na mi tra dang / dA na shI la dang / zhu chen gyi lo ts+tsha ba ban de ye shes sdes bsgyur cing zhus te skad gsar chad kyis kyang bcos nas gtan la phab pa/ |