@#/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las le'u bzhi bcu rtsa bzhi pa ste/ 'phags pa rin po che'i phung po lung bstan pa/ bam po dang po/ rgya gar skad du/ Ar+ya rad na rA shi nA ma ma hA yA na sU tra/ bod skad du/ 'phags pa rin po che'i phung po zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod phung po'i ri la/ dge slong brgyad stong tsam gyi dge slong gi dge 'dun chen po dang / sangs rgyas kyi 83.165a zhing sna tshogs nas 'dus pa'i byang chub sems dpa' khri drug stong dang thabs gcig tu bzhugs te/ thams cad kyang 'di lta ste/ bla na med pa yang dag par rdzogs pa'i byang chub tu skye ba gcig gis thogs pa phyir mi ldog pa'i bzod pa thob pa sha stag go /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das dge sbyong dge sbyong zhes bgyi ba ji tsam gyis na dge sbyong dge sbyong zhes bgyi ba lags/ de skad ces gsol pa dang / bcom ldan 'das kyis tshe dang ldan pa 'od srung chen po la 'di skad ces bka' stsal to/ /'od srung dge sbyong dge sbyong zhes bya ba ni/ zhi ba dang / dul ba dang / cang shes pa dang / tshul khrims kyi phung po yongs su dag pa dang / ting nge 'dzin la 'jug pa shes pas dge sbyong zhes bya ste/ shes rab dang ldan pa dang / rnam par grol ba'i snying po lhur len pa dang / rnam par thar pa'i sgo gsum la som nyi med cing the tshom mi za ba dang / 'phags pa'i spyod yul la gnas pa dang / dran pa nye bar gzhag pa bzhi la gnas pa dang / yang dag par spong ba bzhi la gnas pa dang / rdzu 'phrul gyi rkang pa bzhi bsgom pa bsgoms pa dang / dad pa'i dbang po dang ldan pa dang / sangs rgyas la dad pa mi phyed pa dang / chos la dad pa mi phyed pa dang / dge 'dun la dad pa mi phyed pa dang / sangs rgyas dang chos dang dge 'dun la shes pas dad pa dang ldan pa dang / gzhan gyi dring la mi 'jog pa'i shes pa dang ldan pa dang / dge ba'i chos rnams la brtson 'grus brtsams pa dang / srid pa bcom pa dang / yang dag par zhugs pa dang / dran pa dang shes bzhin la mkhas pa dang / sems rtse gcig pa dang / shes rab kyis lhag mthong la mkhas pa dang / stobs lnga dang ldan pa dang / nyon mongs pa thams cad kyis mi rdzi ba dang / byang chub kyi yan lag bdun la bsam gtan pa dang / chos rnams kyi brten pa shes pa la mkhas pa dang / lam shes pa dang / lam la mkhas pa dang / yang dag par lta ba dang / yang dag pa'i ting nge 'dzin dang / zhi gnas dang / lhag mthong sgom pa la mkhas pa dang / so so yang dag par rig pa bzhi la gzhan gyi dring mi 'jog pa'i shes rab dang ldan pa dang / don la rton gyi tshig 83.165b 'bru la mi rton pa dang / ye shes la rton gyi rnam par shes pa la mi rton pa dang / nges pa'i don gyi mdo sde la rton gyi drang ba'i don gyi mdo sde la mi rton pa dang / chos nyid la rton gyi gang zag la mi rton pa dang / bdud bzhi'i lam las shin du 'das pa dang / phung po yongs su shes pa srung ba dang / nyon mongs pa bsal ba dang / tha ma'i lus 'dzin pa dang / 'chi bdag gi lam las yang dag par 'das pa dang / sdug bsngal yang dag par yongs su shes pa dang / kun 'byung ba thams cad spangs pa dang / 'gog pa mngon sum du bya ba la zhugs pa dang / lam sgom pa'i rnal 'byor kyi rjes su zhugs pa dang / 'phags pa'i bden pa bzhi mthong ba dang / gzhan gyi dring la mi 'jog pa dang / ston pa'i bstan pa la bya ba byas pa dang / byed pa byas pa dang / zag pa zad pa dang / rnam par thar pa brgyad la bsam gtan pa dang / brgya byin dang / tshangs pa dang / 'jig rten skyong bas bsu ba dang / sngon gyi spyod pa dang / bsam pa phun sum tshogs pa dang / dgon pa la gnas par mngon par dga' ba dang / 'phags pa'i rigs la gnas pa dang / sbyangs pa'i yon tan la gnas pa dang / blo gya gyu med pa dang / rab tu byung nas/ khyim gyi gnas dang mi 'dre ba dang / bse ru ltar gcig pu rgyu ba dang / 'du 'dzis 'jigs skrag pa dang / khams gsum ma lus pa las rnam par grol ba dang / rtag tu 'jigs pa'i yid dang ldan pa dang / yang dag pa'i dge sbyong gi tshul la gnas pa dang / thams cad la 'dod pa med pa dang / 'jig rten gyi chos brgyad po rnyed pa dang ma rnyed pa dang / grags pa dang ma grags pa dang / bde ba dang sdug bsngal ba dang / bstod pa dang / smad pa rnams las yang dag par 'das pa dang / sa dang mtshungs pa'i sems kyis nye bar bsgrubs te gnas pa dang / bdag dang gzhan rjes su srung ba dang / 'khrul pa med pa dang / 'khrug pa med pa dang / yang dag par zhugs pa dang / nam mkha' dang mtshungs pa'i sems kyis nye bar bsgrubs te gnas pa 83.166a dang / mtshan ma thams cad la de'i sems mi chags mi 'ching ste dper na nam mkha' la lag mthil bzhin du mi chags mi 'ching ba yin te/ 'od srung dge sbyong gi chos rnam pa de lta bu de dag dang ldan na dge sbyong dge sbyong zhes bya'o/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das 'di ltar de bzhin gshegs pa dgra bcom pa yang dag par rdzogs pa'i sangs rgyas kyis yang dag pa'i dge sbyong gi yon tan 'di dag yang dag par rab tu bstan pa ni ngo mtshar to/ /bcom ldan 'das ma mchis pa'i dus na gang dag de bzhin gshegs pa'i byang chub bskal pa grangs ma mchis par yang dag par bsgrubs nus par bgyid pa dge sbyong ma lags dge sbyong du mchid kyis 'che zhing / tshangs par spyod pa ma lags par tshangs par spyod pa mchid kyis 'che ba'i dge slong gang la la dag 'byung bar 'gyur lags sam/ bcom ldan 'das kyis bka' stsal pa/ 'od srung nga dang / khyod dang nyan thos chen po 'di dag kyang yongs su mya ngan las 'das shing / byang chub sems dpa' 'di dag kyang sangs rgyas kyi zhing gzhan du dong nas bstan pa 'di rab tu 'jig par 'gyur ba ni tshig gis bstan par mi nus so/ /'od srung de la dge slong lus ma bsgoms pa/ tshul khrims ma bsgoms pa/ sems ma bsgoms pa/ shes rab ma bsgoms pa/ byis pa dman pa/ glen pa/ rmongs pa/ rab tu ma zhi ba/ ma dul ba kha cig 'byung bar 'gyur te/ de dag gi g.yo dang / sgyu dang / dri ma dang / gya gyu dang / dge sbyong gi dri ma dang / dge sbyong gi skyon rnams brjod par bya'o/ /'od srung de la dge sbyong gi dri ma rnams gang zhe na/ 'od srung sum bcu rtsa gnyis po 'di dag ni dge sbyong gi dri ma ste/ de dag spangs na dge sbyong dge sbyong zhes bya'o/ /sum bcu rtsa gnyis gang zhe na/ 'dod pa la rnam par rtog pa dge sbyong gi dri ma dang / gnod sems kyi rnam par rtog pa dge sbyong gi dri ma dang / rnam par 'tshe ba'i rnam par rtog pa dge sbyong gi dri ma dang / bdag la bstod pa dge sbyong gi dri ma dang / gzhan la brnyas pa dge sbyong gi dri ma 83.166b dang / mi mthun pa'i rnyed pa kun du tshol ba dge sbyong gi dri ma dang / rnyed pas rnyed par byed 'dod pa dge sbyong gi dri ma dang / dad pas byin pa chud gzon pa dge sbyong gi dri ma dang / ltung ba 'chab pa dge sbyong gi dri ma dang / khyim pa la sten pa dge sbyong gi dri ma dang / rab tu byung ba dang sten pa dge sbyong gi dri ma dang / 'du 'dzi la mngon par dga' ba dge sbyong gi dri ma dang / rnyed pa yongs su ma grub par rtog pa dge sbyong gi dri ma dang / bdag gi rnyed pas chog par mi 'dzin pa dge sbyong gi dri ma dang / pha rol bsod snyoms rnyed pa la phrag dog dang ser sna byed pa dge sbyong gi dri ma dang / pha rol gyi rnyed pa la 'dod pa dge sbyong gi dri ma dang / bdag gi 'khrul pa la mi rtog pa dge sbyong gi dri ma dang / gzhan gyi 'khrul pa yongs su tshol ba dge sbyong gi dri ma dang / so sor thar pa dang 'dul ba mi srung ba dge sbyong gi dri ma dang / khwa ltar mu cor smra ba dge sbyong gi dri ma dang / ma gus pa dang / rgod pa dang / khengs pa dge sbyong gi dri ma dang / lta bas kun nas dkris pa dge sbyong gi dri ma dang / rten cing 'brel bar 'byung ba dang 'gal ba dge sbyong gi dri ma dang / mthar lta ba la gnas pa dge sbyong gi dri ma dang / 'khor ba la mngon par dga' ba dge sbyong gi dri ma dang / mya ngan las 'das pa la mngon par mi dga' ba dge sbyong gi dri ma dang / 'jig rten rgyang pan pa'i gsang tshig 'dzin pa dge sbyong gi dri ma dang / sgrib pas kun nas dkris pa dge sbyong gi dri ma dang / las kyi rnam par smin pa dang 'gal ba dge sbyong gi dri ma dang / rnam par thar pa'i sgo gsum gyis skrag pa dge sbyong gi dri ma dang / chos zab mo spong ba dge sbyong gi dri ma dang / chos dang 'gal bar gnas pa dge sbyong gi dri ma dang / dkon mchog gsum la mi gus pa dge sbyong gi dri ma ste/ 'od srung sum bcu rtsa gnyis po de dag ni dge sbyong gi dri ma ste/ de dag spangs na dge sbyong dge sbyong zhes bya'o/ /'od srung brgyad po 'di dag ni dge sbyong gi chos kyi sgrib pa ste/ brgyad gang zhe na 'di lta ste/ bla ma rnams la mi gus pa dang / chos rnams la rim gro med pa dang / tshul bzhin ma yin pa yid la byed pa dang / 83.167a ma thos pa'i mdo spong ba dang / bdag med pa sems can med pa/ srog med pa/ gang zag med pa'i chos kyis skrag pa dang / 'dus ma byas kyi chos bstan pa la mi 'jug par 'dus byas nyid kyi rjes su snyegs pa dang / 'du byed rnams ma skyes pa zhes thos na skrag pa dang / chos thams cad rang bzhin gyis ma skyes pa zhes thos na g.yang sa chen por ltung ba bzhin du ltung ba ste/ 'od srung brgyad po de dag ni dge sbyong gi chos kyi sgrib pa ste/ rab tu byung bas de dag yongs su spang par bya'o/ /'od srung dge sbyong ni kha dog dang rtags kyi dbyibs kyis dge sbyong zhes nga mi 'chad kyi/ yon tan gyi chos la nan tan byed pa'i dge sbyong ni dge sbyong zhes ngas bshad do/ /'od srung dge sbyong gis ni rnyog pa med pa'i sems kyis lus la ngur smrig dag bcang par bya'o/ /de ci'i phyir zhe na/ 'od srung rnyog pa med pa la ngas ngur smrig gnad gi /'od srung gang rnyog pa dang bcas pas lus la ngur smrig dag 'chang ba de dag thams cad ni ngur smrig tshig pa'o zhes bshad de/ bsam pas mos pa rnams ni ma gtogs so/ /de ci'i phyir zhe na/ de ni 'phags pa rnams kyi rgyal mtshan yin pa'i phyir te/ skyo zhing 'dod chags dang bral bar spyod pa rnams kyi gos 'di dag ni nye bar zhi ba'i rjes su 'thun pa byams pa'i rjes su zhugs pa'o/ /'od srung de la 'phags pa rnams kyi rgyal mtshan gang zhe na/ 'od srung bcu gnyis po 'di dag ni 'phags pa rnams kyi rgyal mtshan te/ bcu gnyis gang zhe na/ 'od srung tshul khrims 'phags pa rnams kyi rgyal mtshan dang / ting nge 'dzin 'phags pa rnams kyi rgyal mtshan dang / shes rab 'phags pa rnams kyi rgyal mtshan dang / rnam par grol ba 'phags pa rnams kyi rgyal mtshan dang / rnam par grol ba'i ye shes mthong ba 'phags pa rnams kyi rgyal mtshan dang / bden pa la 'jug pa 'phags pa rnams kyi rgyal mtshan dang / rten cing 'brel bar 'byung ba la 'jug pa 'phags pa rnams kyi rgyal 83.167b mtshan dang / bsam gtan bzhi 'phags pa rnams kyi rgyal mtshan dang / tshad med pa bzhi 'phags pa rnams kyi rgyal mtshan dang / gzugs med pa'i snyoms par 'jug pa bzhi 'phags pa rnams kyi rgyal mtshan dang / skyon med pa la 'jug pa 'phags pa rnams kyi rgyal mtshan dang / zag pa zad pa 'phags pa rnams kyi rgyal mtshan te/ 'od srung bcu gnyis po de dag ni 'phags pa rnams kyi rgyal mtshan no/ /'od srung gang la la rgyal mtshan 'di dag dang mi ldan par 'phags pa'i rigs gos ngur smrig dag 'chang ba de ni nor ba'i chos la zhugs pa'o zhes ngas bshad do/ /chos dang 'gal bar gnas pa zhes bshad do/ /de bzhin gshegs pa'i bstan pa las ring du gnas pa zhes bshad do/ /mya ngan las 'das pa'i phyogs kyi mi mthun pa'i phyogs la gnas pa zhes bshad do/ /'khor ba'i phyogs dang 'thun pa zhes bshad do/ /nga rgyal gyi mchil pas zin pa zhes bshad do/ /snying po ma blangs pa zhes bshad do/ /chos las nyams pa zhes bshad do/ /nyam nga ba'i lam la gnas pa zhes bshad do/ /'od srung de lta bas na dge sbyong gis lus la ngur smrig dag 'chang ba na rnyog pa med pa'i sems su bya'o/ /gal te des 'bras bu thob par ma gyur na des gus pa brgyad kyis lus la ngur smrig dag bcang bar bya ste/ brgyad gang zhe na/ mchod rten gyi 'du shes dang / ston pa'i 'du shes dang / nye bar zhi ba'i 'du shes dang / byams pa'i 'du shes dang / sangs rgyas la gus pa'i 'du shes dang / ngo tsha shes pa'i 'du shes dang / khrel yod pa'i 'du shes dang / rnyog pa med par bya'o snyam pa ste/ dge sbyong gi tshul dang 'thun pa'i phyir gus pa brgyad po de dag gis lus la ngur smrig dag bcang bar bya'o/ /'od srung gang dag lhod cing yang dag par ma sdom pa dang / dge sbyong gi yon tan gyi chos 'di dag las nyams par lus la ngur smrig dag 'chang ba rnams ni gus pa 'di dag mi skyed do/ /'od srung dge sbyong gi kha dog dang gzugs can la gnod pa byed pa zhes bya ba'i nyi tshe ba'i sems can dmyal ba yod de/ 'od srung nyi tshe ba'i sems can dmyal ba der dge sbyong gi gzugs su gyur bzhin 83.168a du gos 'bar ba dag dang / mgo 'bar ba dag dang / lhung bzed 'bar ba dag dang / stan 'bar ba dag dang / mal cha 'bar ba dag gnod pa byed de/ de dag gi longs spyod dang yongs su spyad pa gang ci yod pa de dag thams cad 'bar rab tu 'bar te kun du rab tu mched cing 'bar la de mir gyur te/ dge sbyong gi kha dog dang gzugs kyis gnod pa de dag myong bar 'gyur ro/ /de ci'i phyir zhe na/ 'di ltar lus dang ngag dang yid kyi las yongs su ma dag pa dang ldan pa'i phyir te/ lus dang ngag dang yid kyi las yongs su ma dag pa dang ldan pa de dag gi 'gro ba yang yongs su ma dag pa nyid du 'gyur ro/ /'od srung dge sbyong ma yin la dge sbyong du khas 'che ba dang / tshangs par spyod pa ma yin la tshangs par spyad par khas 'che ba gang zhig tshul khrims dang ldan pa rnams dang / yon tan dang ldan pa rnams kyi phyag byas pa bdag gir byed na de mi dge ba'i las des brnyas pa brgyad 'thob te/ brgyad gang zhe na/ bems po lta bur 'gyur ba dang / go dka' zhing le lo can du 'gyur ba dang / skye bo mang pos bgad pa'i bud med du 'gyur ba dang / rang dbang med cing bran du 'gyur ba dang / mdog ngan zhing mi sdug par 'gyur ba dang / mdog ngan zhing dbang chung bar grags par 'gyur ba dang / de la su yang stsu bar mi 'gyur ba dang / sbyin gnas rnams la mgu bar mi byed pa ste/ brnyas pa brgyad po de dag 'thob bo/ /'od srung de lta bas na bzang po ma yin pa'i chos 'di lta bu 'di dag thos nas dge sbyong sdig pa can gyis gzhan gyis phyag byas pa dag gir mi bya'i/ 'od srung gang dge sbyong ma yin la dge sbyong du khas 'che ba dang / tshangs par spyod pa ma yin la tshangs par spyod par khas 'che ba ni tha na sa chen po 'di la mchil ma'i thal ba tsam 'dor ba de yang ngas rnyed par mi 'gyur na gom pa 'deg pa dang 'jog pa lta ci smos/ de ci'i phyir zhe na/ 'od srung sa chen po 'di ni sngon gyi rgyal po rnams kyis tshul khrims dang ldan 83.168b pa rnams dang / yon tan dang ldan pa rnams dang / sbyin gnas rnams la kun tu spyad pa'i don du phul ba'i phyir ro/ /'od srung de la mi blun po de ni gom pa 'jog pa dang 'dor ba gang yin pa de ni thams cad kyang dad pas byin pa la mi dbang bzhin du gom pa 'dor zhing 'jog pa yin na dge 'dun gyi 'am/ phyogs bzhi'i dge 'dun gyi khri 'am/ khri'u 'am/ 'chags 'am/ gding ba 'am/ gnas khang ngam/ gtsug lag khang ngam/ kun dga' ra ba 'am/ kun dga' ra ba'i gzhi 'am/ yongs su spyad pa 'am/ lhung bzed dam/ chos gos sam/ bsod snyoms sam/ mal cha 'am/ na pa'i gsos sman nam/ yo byad kyang rung ste/ thams cad dad pas byin pa la mi dbang bar spyod pa yin pa lta ci smos/ 'od srung khyod mos par bya'o/ /khyod kyis khong du chud par bya'o/ /'od srung dge sbyong ma yin la dge sbyong du khas 'che ba dang / tshangs par spyod pa ma yin la tshangs par spyod par khas 'che bas ni dad pas byin pa skra'i rtse mo'i cha tsam yang yongs su dag par bya mi nus so/ /de ci'i phyir zhe na/ 'od srung 'phags pa'i dge 'dun ni ngas rgya mtsho chen po lta bu dang / bsod nams kyi zhing dang / sbyin gnas rnams kyi mchog tu bstan pa'i phyir ro/ /'od srung bram ze 'am khyim bdag dad pa gang dag de la yon 'bul ba de dag tshad med pa'i 'du shes kyis 'bul ba de la 'od srung mi blun po tshul khrims 'chal bas tha na skra'i rtse mo brgyad gshegs pa'i cha tsam zhig dad pas byin pa yongs su spyad na yang sbyin pa po dang / sbyin bdag de'i yongs su sbyang ba'i phyir dad pas byin pa skra'i rtse mo'i cha tsam ji snyed la spyad pa de snyed kyi las kyi rgya mtsho chen po sogs par 'gyur ro/ /'od srung de lta bas na tshul khrims yongs su dag pas dad pas byin pa yongs su spyad par bya'o zhes khyod kyis de ltar bslab par bya'o/ /bstan pa 'di bshad pa na rnal 'byor spyod pa'i dge slong nyis brgyas bstan pa 'di thos nas rab tu dus te mchi ma zag cing tshig 'di skad ces bdag cag ni gum yang rung ste/ 'bras bu ma thob kyi bar du dad pas stsal ba'i bsod snyoms gcig 83.169a tsam yang yongs su spyad par mi bgyi'o zhes smras so/ /bcom ldan 'das kyis bka' stsal pa/ skyes bu dam pa dag legs so legs so/ /ngo tsha shes pa dang / 'gyod pa dang ldan pa dang / 'jig rten pha rol du kha na ma tho bas 'jigs par lta ba rnam 'di lta bu dag gis gsung rab 'di mdzes so/ /'od srung ngas dge slong gnyis la dad pas byin pa gnang ste/ gnyis gang zhe na ldan pa dang / grol ba'o/ /yang gnyis te/ 'du byed thams cad la mi rtag par lta ba dang / gang yang sems rnam par grol ba byams pa la snyoms par 'jug pa'o/ /dge slong dag de la dge slong ldan pa rnal 'byor spyod pa nga'i bstan pa la zhugs pa gang zhig sbyin pa po dang / sbyin bdag las chos gos dang / bsod snyoms dang / mal cha dang / na pa'i gsos sman dang / yo byad rnams yongs su spyad nas 'khor ba'i skyon mthong / 'du byed thams cad mi rtag par mthong / 'du byed thams cad sdug bsngal bar rig /chos thams cad la bdag med par mos/ mya ngan las 'das pa zhi bar rtog pas ni ri rab tsam kyi kham dag gi dad pas byin pa yongs su spyad kyang de'i yon shin du yongs su dag par 'gyur ro/ /sbyin pa po dang / sbyin bdag gang dag las dad pas byin pa yongs su spyad pa de las de dag gis bsod nams kyi rnam par smin pa 'byor pa chen po dang / phan yon chen por 'gyur ro/ /de ci'i phyir zhe na/ dge slong dag rdzas las byung ba'i bsod nams bya ba'i dngos po rnams las gang byams pa'i sems la snyoms par 'jug pa de mchog yin pa'i phyir ro/ /dge slong dag dge slong gang zhig sbyin pa po dang / sbyin bdag gi chos gos dang / bsod snyoms dang / mal cha dang / yo byad rnams yongs su spyad nas sems rnam par grol ba tshad med pa la snyoms par 'jug na sbyin pa po dang / sbyin bdag de'i rnam par smin pa yang tshad med par shes par bya'o/ /'od srung stong gsum gyi stong chen po'i 'jig rten gyi khams na yod pa'i rgya mtsho chen po rnams ni yongs su zad par 'gyur yang srid kyi de'i bsod nams kyi rgyu 'thun pa ni yongs su 83.169b zad par yang mi 'gyur ro/ /'od srung gang zhig sbyin pa po dang / sbyin bdag gi dad pas byin pa yongs su spyad nas 'chal ba'i tshul khrims kyis log par ltung bar byed na mi gti mug pa de gnod pa ji tsam gyi phyir zhugs pa la ltos/ 'od srung de lta bas na dge sbyong gi dri ma dang / dge sbyong gi skyon dang / dge sbyong gi mi drang pa dang / dge sbyong gi g.yo dang / dge sbyong gi sgyu dang / dge sbyong gi gya gyu rnam pa de lta bu de dag ni dge slong bsam pa dag pas yongs su spang bar bya'o/ /'od srung dge sbyong dge sbyong zhes bya ba ni gang mig nas mi zag cing rna ba nas ma yin/ sna nas ma yin/ lce nas ma yin/ lus las ma yin/ yid nas kyang mi zag pa ste/ de'i phyir dge sbyong dge sbyong zhes bya'o/ /skye mched drug rig pa dang mngon par shes pa drug dang / rjes su dran pa drug dang ldan pa dang / dam pa rnams la gus par gnas pa dang / pha rol du 'gro ba'i chos drug la gnas pa ste/ de'i phyir dge sbyong dge sbyong zhes bya'o/ /dge sbyong gi le'u ste dang po'o/ / 'od srung dge slong dge slong zhes bya ba ni nyon mongs pa bcom pa'i phyir dge slong zhes bya'o/ /bdag tu shes pa bcom pa dang / sems can du 'du shes pa dang / srog tu 'du shes pa dang / gso bar 'du shes pa dang / gang zag tu 'du shes pa dang / skyes par 'du shes pa dang / bud med du 'du shes pa dang / khye 'ur 'du shes pa dang / bu mor 'du shes pa bcom pa ste/ de'i phyir dge slong dge slong zhes bya'o/ /lus bsgoms pa dang / tshul khrims bsgoms pa dang / sems bsgoms pa dang / shes rab bsgoms pa dang / 'jigs skrag pa med pa dang / srid pa'i chu bo las rgal ba dang / 'byung ba dang / 'jig pa la lta ba dang / 'jigs pa thams cad dang bral ba dang / 'jigs pa med pa'i lam la gnas pa ste/ de'i phyir dge slong dge slong zhes bya'o/ /'od srung gang la la zhig chos 'di dag dang mi ldan la bdag ni dge slong dge slong ngo snyam du khas 'che na bsam pas mos pa ma gtogs par nga yang de'i ston pa ma yin la de yang nga'i nyan thos ma yin no/ /'od srung sdig pa can dge 83.170a slong dag phal cher nga'i bstan pa 'di nub par byed par 'gyur te/ 'od bsrung ya mtshan can dgu bcu rtsa lnga dang / phas kyi rgol ba thams cad kyis nga'i bstan pa 'di nub par byed mi nus so/ /gzhan du na nga'i bstan pa 'di las mi gti mug pa nges par mi sems pa gang dag 'byung ba de dag gis nga'i bstan pa nub par byed par 'gyur ro/ /'od srung 'di lta ste dper na ri dgas kyi rgyal po seng ge shi ba'i sha la gcan zan nam bya gang gis kyang za bar mi nus kyi seng ge'i ro de nyid las srin bu gang dag 'byung ba de dag ri dgas kyi rgyal po seng ge'i sha la za'o/ /'od srung de bzhin du nga'i bstan pa 'di nyid la mi blun po brkam pa/ chags pas zil gyis non pa/ chos ma yin pa la lta ba/ nges par mi sems pa/ lhod pa/ brdzun du smra ba/ gang dag 'byung ba de dag nga'i bstan pa nub par byed par 'gyur ro/ /'od srung chos bzhi dang ldan na sdig pa can gyi dge slong du rigs par bya ste/ bzhi gang zhe na/ chags pa dang / zhe sdang dang / gti mug dang / nga'o snyam pa'i nga rgyal te/ bzhi po de dag go /gzhan yang bzhi ste/ bzhi gang zhe na/ khengs pa dang / mu chor smra ba dang / bya khwa lta bu dang / tshig 'chal pa ste/ bzhi po de dag go /gzhan yang bzhi ste/ bzhi gang zhe na/ rgod pa dang / pho theg can dang / rnyed pa 'dod pa dang / chos ma yin pa 'dod pa ste/ bzhi po de dag go /gzhan yang bzhi ste/ bzhi gang zhe na/ g.yo can dang / sgyu can dang / mi mthun pas 'tsho ba dang / mi gtsigs par smra ba yin te/ bzhi po de dag go /gzhan yang bzhi ste/ bzhi gang zhe na/ byas pa mi gzo ba dang / byas pa la smod pa dang / sngon byas pa mi dran pa dang / mdza' bo la 'khu ba yin te/ bzhi po de dag go /gzhan yang bzhi ste/ bzhi gang zhe na dad pas byin pa log par ltung bar byed pa dang / tshul khrims mi srung ba dang / so sor thar pa khyad du gsod pa dang / 'dul ba mi srung ba ste/ bzhi po de dag go /gzhan yang bzhi ste/ bzhi gang zhe na/ bdag tu smra ba yin/ sems can du smra ba yin 83.170b srog tu smra ba yin/ gang zag tu smra ba yin te/ bzhi po de dag go /gzhan yang bzhi ste/ bzhi gang zhe na/ sangs rgyas la mi gus pa yin/ chos la mi gus pa yin/ dge 'dun la mi gus pa yin/ bslab pa rnams la mi gus pa yin te/ bzhi po de dag go /gzhan yang bzhi ste/ bzhi gang zhe na/ dge 'dun 'thun pa la mi dga' ba yin/ gtsug lag khang la dga' ba mi rnyed pa yin/ 'du 'dzi la mngon par dga' ba yin/ 'jig rten rgyang phan pa'i gsang tshig rjod pa yin te/ bzhi po de dag go /gzhan yang bzhi ste/ bzhi gang zhe na/ rnyed pa 'dod pa yin/ grags pa 'dod pa yin/ gnyen bshes 'dod pa yin/ chos la mchog tu dga' ba mi rnyed pa yin te bzhi po de dag go /gzhan yang bzhi ste/ bzhi gang zhe na/ bdud kyis zin pa yin/ bdud kyis non pa yin/ rmugs pa dang gnyid mang ba yin/ 'phags pa'i rigs rnams la mi gnas pa yin te/ bzhi po de dag go /gzhan yang bzhi ste/ bzhi gang zhe na/ lus rul cing brgyan pa dang / nyon mongs pas snad pa dang / mya ngan las 'das pa la rgyab kyis bltas pa dang / 'bras bu thob pa med pa yin te/ bzhi po de dag go /gzhan yang bzhi ste/ bzhi gang zhe na/ 'dod chags kyi yongs su gdung bas yongs su gdungs pa dang / zhe sdang gi yongs su gdung bas yongs su gdungs pa dang / gti mug gi yongs su gdung bas yongs su gdungs pa dang / nyon mongs pa thams cad kyi yongs su gdung bas yongs su gdungs pa ste/ bzhi po de dag go /gzhan yang bzhi ste/ bzhi gang zhe na/ lam ngan pa la gnas te 'byung ba mi mthong ba yin/ ser sna can du gyur te kun mi bged pa'i ngang tshul can yin/ thams cad yongs su 'dzin par 'dod cing chog mi shes pa yin/ ngoms mi myong zhing thos pa'i nan tan dang bral ba yin te/ bzhi po de dag go /gzhan yang bzhi ste/ bzhi gang zhe na/ mun par gzhol bas mun par gyur pa yin/ rmongs pa la gzhol bas rmongs par gyur yin/ log pa'i chos kyis dkris pas chos ma yin pa mthong ba yin/ mya ngan las 83.171a 'das pa'i sgo bcad pas 'khor ba'i 'ching bas bcings pa yin te/ bzhi po de dag go /gzhan yang bzhi ste/ bzhi gang zhe na/ lus kyi tshul 'chos pa yin/ ngag gi tshul 'chos pa yin/ sems kyi tshul 'chos pa yin/ spyod lam gyi tshul 'chos pa yin te/ bzhi po de dag go /de la lus kyi tshul 'chos pa ni ngal gyis 'gro bar tshul 'chos pa yin/ mgo smad pas tshul 'chos pa yin/ gnya' shing gang tsam du lta bar tshul 'chos pa yin/ gos tshags legs gyon par tshul 'chos pa yin/ dgon pa la gnas pa'i yon tan mi tshol bar dgon pa la gnas pa ltar tshul 'chos pa yin/ gong bur 'du shes pa mi sel bar bsod snyoms len pa ltar tshul 'chos pa yin/ ngo tsha shes pa dang khrel yod pa'i rjes su mi 'jug par phyag dar khrod 'chang ba ltar tshul 'chos pa yin/ rten cing 'brel bar 'byung ba la mi 'jug par ri drung shing drung du gnas pa ltar tshul 'chos pa yin/ chos bdud rtsi'i sman mi tshol bar bkus te bor ba'i sman tshol ba ltar tshul 'chos pa yin te/ 'di ni lus kyi tshul 'chos pa zhes bya'o/ /de la ngag gi tshul 'chos pa gang zhe na/ che ge mo zhes bya bas kho bo shes shing che ge mo zhes bya bas 'gron du bos te/ kho bos gang 'dod pa rnyed cing sti stang du byas nas rnyed/ kho bos bzang po rnyed/ kho bos lan mang du rnyed/ kho bos mang du thos/ kho bo tshul khrims dang ldan zhing dge ba'i chos can yin/ kho bo ni bod par 'os pa yin/ kho bo slar lan gdab pa'i 'os yin/ kho bo ni nus pa dang ldan zhing skal pa yod la mthu yod pa yin/ kho bo ni don rnam par nges pa bstan pa la mkhas pa yin/ gang che ge mo zhes bya bas kho bo la 'di skad ces smras te/ kho bos de la 'di skad ces smras nas tshar bcad de spobs pa med par byas/ kho bos 'khor mgu bar byas/ kho bos legs so zhes bya ba thob/ kho bos de las bgo ba thob/ yang 'ong bar bya ba'i phyir kho bo 'gron du gnyer ces bya ba ste/ 'od srung nges par mi sems pa'i sems dang 83.171b ldan pa las tshig 'chal pa de lta bu gang ci 'byung ba de thams cad ni ngag gi tshul 'chos pa ste/ mi rigs pa rnams kyi yin gyi rigs pa rnams kyi ma yin te/ 'di ni ngag gi tshul 'chos pa zhes bya'o/ /'od srung de la sems kyi tshul 'chos pa gang zhe na/ gang sems kyis chos gos dang bsod snyoms rnyed kyang rung bar yongs su rtog la tshig gis bdag la ci yang mi dgos so zhes zer ba dang / gang sems kyis rnyed par 'dod la 'dod pa nyung ba skad du smra ba 'di ni sems kyi tshul 'chos pa zhes bya'o/ /de la 'di skad ces bya ste/ /sems kyis rnyed kyang ci ma rung snyam sems/ /tshig tu bdag la ci yang dgos med smra/ /med pa'i ngo bo'i yid kyis de smras te/ /nam yang bde ba rnyed par 'gyur ma yin/ /sems kyi tshul 'chos bsam pas lha rnams dang / /klu dang lha mig can rnams slu bar byed/ /smras pa'i sems kyis nams kyang dag mi 'gyur/ /de bzhin gshegs pa kun gyis de mkhyen to/ /'od srung de ltar na dge slong chos ma yin pa dang ldan pa sdig pa can rnams kyi chog ma yin pa'i spyod yul la spyod pa 'di lta bu gang yin pa 'di ni sems can dmyal ba dang / dud 'gro'i skye gnas dang / gshin rje'i 'jig rten du 'gro bar 'gyur ba'o/ /dge slong gi le'u ste gnyis po'o// // 'od srung de la dge sbyong gdol pa lta bu gang zhe na/ 'od srung 'di lta ste dper na gdol pa ni rtag tu dur khrod spyod yul pa yin te/ shi ba la re ba dang / byams pa med pa'i mig gis 'gro ba la lta ba dang / shi ba dga' ba yin no/ /'od srung de bzhin du dge sbyong gdol pa lta bu yang rtag tu mdza' bshes kyi khyim dang / slong ba ster ba'i khyim la gdu ba yin te/ de nas rnyed pa dang bkur stis nye bar 'tsho zhing khyim pa de dag chos sam/ 'dul ba yang dag par 'dzin du mi 'jug par dang / de rnyed pa'i ched du 'dris par byed kyi don gyi ched du ma yin pa dang / mdza' ba'i sems med cing rtag tu rnyed pa la re ba 83.172a yin te/ 'od srung 'di ni dge sbyong gdol pa lta bu zhes bya'o/ /'od srung 'di lta ste/ dper na gdol pa ni tshong dpon dang / khyim bdag dang / blon po dang / khams kyi rgyal po dag dang / bram ze dang / rgyal rigs dang / grong rdal gyi mi dang yul gyi mi rnams kyis rtag tu yongs su spang bar bya ba'i 'os yin te/ gdol par rigs nas thag ring po bas kyang ring por yongs su spong ngo / /'od srung de bzhin du dge sbyong gdol pa lta bu yang dge slong dang / dge slong ma dang / dge bsnyen dang / dge bsnyen ma tshul khrims dang ldan pa yon tan dang ldan pa rnams kyis yongs su spang bar bya ba'i 'os yin te/ dge sbyong gdol pa lta bu sdig pa'i chos kun du spyod cing tshul khrims 'chal bar rig nas thag ring po bas kyang ring por yongs su spong ngo / /'od srung 'di lta ste/ dper na gdol pa'i kha phyis sam/ gos sam/ yongs su spyad pa de thams cad la ni skye bo ya rabs rnams/ mi rig cing yongs su myi spyod do/ /'od srung de bzhin du dge sbyong gdol pa lta bu'i lhung bzed dam/ chos gos sam/ yongs su spyad pa de thams cad ni mi mthun pa'i 'tsho bas yongs btsal ba/ lus dang sems rmas pas yongs su btsal ba yin pas tshul khrims dang ldan pa/ yon tan dang ldan pa dag de la mi reg cing mi spyod do/ /'od srung 'di lta ste dper na gdol pa ni kha phyis thogs te/ zhum zhum por byas nas gzhan gyi khyim du 'gro'o/ /'od srung de bzhin du dge sbyong gdol pa lta bu yang zhum zhum por byas nas/ de bzhin gshegs pa'i mchod rten la phyag 'tshal lo/ /zhum zhum por byas nas 'khor gyi nang du 'gro'o/ /zhum zhum por byas nas gtsug lag khang dang / gnas khang dang / gzhan gyi khyim du 'gro'o/ /zhum zhum por byas nas 'gro ba dang / 'dug pa dang / nyal bar byed do/ /'od srung de ltar na zhum zhum por byas pa/ sdig pa 'chab pa de'i spyod lam gang yin pa de thams cad 83.172b ni rung ba ma yin pa las yongs su btags pa'o/ /'od srung 'di lta ste/ dper na gdol pa'i sems ni bde 'gro'i skye ba la mi gnas so/ /de ci'i phyir zhe na/ 'di lta rang rang gi las kyi nyes pa'i phyir ro/ /'od srung de bzhin du dge sbyong gdol pa lta bu'i sems kyang bde 'gror 'gro bar bya ba'i phyir myi gnas shing / de'i 'jig rten pha rol rnam par zhigs la/ de ngan 'gro gsum du gnas par sgrib pa med de/ 'od srung 'di ni dge sbyong gdol pa lta bu zhes bya'o/ /'od srung de la dge sbyong rul pa gang zhe na/ 'od srung 'di lta ste dper na rgyal po la 'os pa'i btung ba'i ro mchog dang ldan pa las gang snying khu'i mchog bcus pa de'i lhag ma ni rul cing mi gtsang bar gyur pa ste myang bar bya ba ma yin no/ /'od srung de bzhin du dge sbyong rul pa yang chos kyi mchog gi snying khu'i ro bro ba dang bral ba yin te/ dri nga ba dang / yongs su spang bar bya ba'i 'os yin/ nyon mongs pa dang / g.yo sgyu 'dzin pa dang / 'chal pa'i tshul khrims kyi dri mi zhim pa dang ldan zhing tshul khrims kyi dri dang bral ba yin/ nyon mongs pa'i dris bsgos pa yin te/ de gang dang gang du 'gro ba de dang de nyid du yang bdag la phan pa'i phyir zhugs kyi gzhan la phan pa'i phyir ma yin te/ 'od srung 'di ni dge sbyong rul pa zhes bya'o/ /'od srung 'di lta ste dper na rul pa zhes bya ba ni gang zos pa dang / 'thungs pa dang / 'chos pa gzags pa de ni rul zhing dri nga ba yin te/ skye bo ya rabs thams cad kyis yongs su spang bar bya ba'i 'os yin no/ /'od srung de bzhin du dge sbyong rul pa yang gzags pa dang mtshungs te/ lus dang ngag dang sems kyi kun du spyod pa yongs su ma dag pas 'phags pa'i skye bos yongs su spang bar bya ba yin te 'di ni dge sbyong rul pa zhes bya'o/ /'od srung 'di lta ste/ dper na sa bon rul pa gang yin pa de ni sa chen po las skyer mi rung ngo / /'od srung de bzhin du dge sbyong rul pa yang sangs rgyas kyi bstan pa 'di la mi skye zhing 83.173a 'phags pa'i chos rnam par grol pa'i sa bon nus pa ma yin la 'bras bu thob par mi 'gyur te/ 'od srung 'di ni dge sbyong rul pa zhes bya'o/ /'od srung de la dge sbyong za ma tog lta bu gang zhe na/ 'od srung 'di lta ste dper na za ma tog phyi rol shin du byi dor byas la nang mi gtsang ba sna tshogs kyis gang ba zhig yod pa de bzhin du 'od srung dge sbyong za ma tog lta bu yang dge sbyong ltar bcos shing phyi rol gtsang sbra spyod pa gyur la/ nang 'dod chags dang / zhe sdang dang / gti mug gis yongs su gang ba yin te/ 'od srung 'di ni dge sbyong za ma tog lta bu zhes bya'o/ /'od srung dge sbyong ku raN DA ka lta bu gang zhe na/ 'od srung 'di lta ste dper na ku raN DA ka zhes bya ba'i me tog ni kha dog blta na sdug pa reg na rtsub pa lci ba'i sbrang ma'i dri mnam zhing shi la bar ka'i rtsa ba'i dri mnam ste/ mkhas pa 'dzangs pa rnams ni me tog de lta bu mi reg /mi len mi bsnom gyi/ gang dag byis pa'i rang bzhin can du gyur pa de'i skyon mi shes pa/ de dag ni me tog de lta bu len cing bsnom mo/ /'od srung de bzhin du dge sbyong ku raN DA ka lta bu yang dge sbyong gi kha dog dang / gzugs dang ldan par gyur kyang mi nges pa yin/ tshig brlang ba yin/ 'chal pa'i tshul khrims kyi dri mi zhim pa yin/ 'tsho ba nyams pa yin/ spyod pa nyams pa yin/ lta ba nyams pa yin te/ 'dzangs pa mkhas pa rnams ni ku raN DA ka lta bu'i dge sbyong de lta bu la sten pa'am/ snyen pa'am/ bsnyen bkur mi byed kyi/ de'i tshul rig pas thag ring po bas kyang ring por yongs su spong ngo / /gang dag byis pa'i rang bzhin can du gyur pa de dag ni ku raN DA ka lta bu'i dge sbyong de lta bu la sten cing snyen la bsnyen bkur byed de/ ku raN DA ka'i me tog byis pa'i lag na 'dug pa bzhin du de dang 'thun pa nyid du 'gyur te/ 'od srung 'di ni ku raN DA ka lta bu'i dge sbyong zhes bya'o/ /'od srung de la chom rkun lta bu'i dge sbyong gang zhe na/ 'od srung 83.173b 'di lta ste dper na/ mi g.yo can gyi rang bzhin can/ rtag tu brkam pa/ chags pa'i zil gyis non pa/ bdag gi rnyed pas chog par mi 'dzin pa/ gzhan gyi nor la re ba/ drag shul can/ dbyug pa dang / mtshon cha dang dgra cha thogs pa/ ngo tsha med pa/ snying rje med pa/ rtag tu gdug cing rab tu gdug pa'i sems dang ldan pa ni de gang gi tshe grong bar ram/ grong ngam/ grong khyer ram/ grong rdal lam/ yul du 'jug pa de'i tshe de 'di snyam du gzhan dag gi nor gyi phung po gang yin pa de bdag gir gyur na re stes snyam du sems shing de zin du 'ong zhes mkhyun bur rgyu ba yin no/ /'od srung de bzhin du chom rkun lta bu'i dge sbyong yang rtag tu brkam pa/ chags pa'i zil gyis non pa/ bdag gi rnyed pas chog mi shes pa/ gzhan gyi rnyed pa la re ba yin te/ de gang gi tshe grong bar ram/ grong ngam/ grong khyer ram/ grong rdal lam/ yul du 'jug pa de'i tshe/ de rnyed pa'i phyir 'jug gi chos kyi phyir ma yin te/ spyod lam thams cad kyang chom rkun lta bur ston pa yin/ 'chab cing sbed pa yin te/ bdag dge slong gzhan gyis tshul khrims 'chal bar shes na mi rung ste/ shes par gyur na so sor thar pa'i mdo 'don pa las bskrad par 'gyur ro snyam nas rtag tu skrag cing rtag tu 'jigs te/ spyod lam thams cad kyang g.yos spyod pas/ lha dang / klu dang / gnod sbyin dang / dri za dag gis chom rkun 'ong ngo / /chom rkun 'gro'o/ /chom rkun 'greng ngo / /chom rkun 'chag go /chom rkun 'dug go /nyal lo/ /chos gos len to/ /chom rkun grong du 'gro'o/ /grong nas 'byung ngo / / chom rkun za'o/ /chom rkun 'thung ngo / /chom rkun skra 'dreg go zhes rig par 'gyur ro/ /'od srung de ltar na lha dang / klu dang / gnod sbyin dang / dri za rnams kyis de'i spyod lam gang yin pa de thams cad rul ba ma yin la/ yongs su brtags pa yin par rig par 'gyur te/ rig nas kyang de la snying rje chen po skyed cing kye ma 'di mtshar cig sdig pa can gyi 83.174a dge slong 'di lta bu dag gis bcom ldan 'das shAkya thub pa'i bstan pa nub par byed par 'gyur zhes 'phya zhing mi snyan par zer ro/ /tshul khrims dang ldan pa/ yon tan dang ldan pa rnams la ni lha dang / klu dang / gnod sbyin dang / dri za rnams kyis kyang 'di dag ni bstan pa yongs su 'dzin pa'o zhes gus pa chen po byed do/ /'od srung chom rkun pa lta bu'i dge sbyong bstan pa 'di la rab tu byung ba ni skyo ba dang / 'dod chags dang bral ba'i sems gcig kyang mi skyed na 'bras bu thob pa lta ci smos kyi de ni gnas med do/ /'od srung 'di ni chom rkun lta bu'i dge sbyong zhes bya'o/ /'od srung de la dge slong shin te ma gang zhe na/ 'od srung 'di lta ste/ dper na 'bru'i nang na gang dag ma smin pa dang / mi grung ba dang / 'ongs med cing 'bru 'dra ba de dag ni shin te ma zhes bya'o/ /'od srung de bzhin du dge sbyong shin te ma yang yang zhing mthu chung la bdud kyis zin pa/ bdud kyis non pa/ nyon mongs pa thams cad kyis non pa/ nyon mongs pa thams cad kyis 'phrogs pa/ rlung gis g.yengs pa lta bu ste/ 'od srung dge sbyong shin te ma zhes bya ba de ni dge slong tshul khrims 'chal ba sdig pa can rnams kyi tshig bla dgas te/ de dag ni ngas dge sbyong shin te ma zhes btags so/ /'od srung de la dge sbyong sun par byed pa gang zhe na/ 'od srung 'di lta ste/ dper na nas kyi ljang bu phun sum tshogs pa'i nang na nas la gnod pa zhig skyes nas de ljang bu'i kha dog 'dra zhing rtags dang dbyibs kyang 'dra bas de la nas kyi bdag po de dag 'di snyam du 'di dag thams can ni nas yin no snyam pa'i 'du shes skyed skyed pa las gang gi tshe na nas kyi ljang bu las snye ma byung bar gyur pa de'i tshe nas la gnod pa de la nas kyi 'du shes mi 'byung ngo / /'od srung de bzhin nu dge sbyong sun par byed pa'i dge slong dge slong gi dge 'dun gyi nang na 'dug pa yang tshul khrims dang ldan pa/ yon tan dang ldan pa/ sbyin pa'i gnas su gyur pa rnams dang kha dog dang rtags kyi dbyibs 'dra 83.174b bas de la sbyin pa po dang / sbyin bdag de dag dge sbyong ngo snyam pa'i 'du shes skyed cing sbyin gnas su 'du shes bskyed pa las de nas gal te gti mug pa dge sbyong ma yin pa la dge sbyong du khas 'che ba/ tshangs par spyod pa ma yin la tshangs par spyod par khas 'che ba/ nang rul cing zag pa de 'khor gyi nang nas byung ste/ shi 'phos shing 'chi ba'i dus byas nas sems can dmyal bar 'gro bar 'gyur te/ lha dang / klu dang gnod sbyin dang / dri za lha'i mig dang ldan pa rnams kyis de sems can dmyal bar skyes par mthong ste/ mthong nas kyang mi gti mug pa 'di ni sngon dge sbyong gi kha dog dang gzugs kyis sdig pa'i las byas pas/ de sems can dmyal ba chen por skyes te/ nas la gnod pa la nas kyi yon tan med pa ltar 'di la yang dge sbyong gi yon tan gyi 'bras bu med do/ /zhes snying rje chen po skyed de/ 'od srung 'di ni dge sbyong sun par byed pa zhes bya'o/ /'od srung de la dge sbyong ltar bcos pa gang zhe na/ 'od srung 'di lta ste dper na ra gan chen po zhes bya ba'i lcags shig yod de/ shin du yongs su sbyang ba byas shing shin du yongs su dag par byas na gser 'dra bar 'gyur te/ 'on kyang gser gyi rin thang dang / gser gyi kha dog dang / bdar 'phro dang / srang la gcal ba'i lcid 'dra ba ni ma yin no/ /'od srung de bzhin du dge sbyong ltar bcos pa'i dge sbyong yang lus shin du bkrus shing gos bzang po mdzes pa gyon la/ dge sbyong gi phyir rol gyi spyod pa thams cad yongs su dag ste/ 'gro ba dang / 'ong ba dang mdun du lta ba dang / g.yas g.yon lta ba dang bskum pa dang brkyang ba dang chos gos snam sbyar dang lhung bzed dang / chos gos 'dzin pa shes bzhin du spyod kyang de 'dod chags kyis bcom pa dang / zhe sdang gis bcom pa dang / gti mug gis bcom pa dang / nyon mongs pas bcom pa dang / rnyed pa dang bkur stis bcom pa dang / nga rgyal dang / che ba'i nga rgyal dang / nga rgyal las kyang nga rgyal dang / nga'i snyam pa'i nga rgyal dang / mngon pa'i nga rgyal dang / cung zad snyam pa'i nga rgyal dang / 83.175a log pa'i nga rgyal gyis bcom pa dang / nyon mongs pas 'khol ba dang / bsnyen bkur lhur len gyi chos lhur mi len pa dang / lus cha bar sbyor ba la brtson gyi tshul khrims kyis tsha bar sbyor ba la mi brtson pa dang / zas dang gos lhur len gyi 'phags pa'i chos lhur mi len pa dang / 'jig rten pha rol du kha na ma tho bas 'jigs par mi lta ba dang / tshe 'di lhur len kyi tshe phyi ma lhur mi len pa dang / lus gso ba dang / rnyed pa dang / bkur sti dang / grags pa la rten gyi chos la rim gror bya ba la mi rten pa dang / sbag pa sna tshogs kyis sbag pa dang / sdig pas bsgos pa dang / khyim gyi las kyi mtha' la mngon par brtson pa dang / khyim pa dang mtshungs pa'i sems dang ldan pas bde ba dag gis kyang bde zhing sdug bsngal dag gis kyang sdug bsngal ba dang / rjes su chags pa dang khong khro bas bcom pa yin te/ de'i dge sbyong gi chos dang / spyod lam thams cad dang sems dang sems las byung ba'i chos thams cad ni sems can dmyal ba dang / dud 'gro'i skye gnas dang / gshin rje'i 'jig rten du gzhol ba yin zhing dge sbyong gi rin thang dang / ri ba dang / dge sbyong gi srang kha dang mi mnyam pa ste/ 'od srung 'di ni dge sbyong ltar bcos pa zhes bya'o/ /'od srung de la ji ltar na dge sbyong gzi 'phrogs pa yin zhe na/ 'od srung 'di lta ste dper na skyes pa 'am/ bud med dang / khye'u 'am/ bu mo gang la la zhig mi ma yin pas mdangs phrogs par gyur na/ de dbang chung bar grags shing mdog ngan la mi sdug par 'gyur te/ de ltar na mdangs phrogs pa rnams la ni sman tam/ gsang sngags sam/ rigs sngags rnams kyis mi slon te/ de 'chi bar 'gyur ba ma gtogs par tha mar gzhan du mi 'gyur ro/ /'od srung de bzhin du dge slong gang la tshul khrims kyi gzi med pa dang / ting nge 'dzin gyi gzi med pa dang / shes rab kyi gzi med pa dang / rnam par grol ba'i gzi med pa dang / rnam par grol ba'i ye shes mthong ba'i gzi med pa dang / byams pa'i 83.175b gzi med pa dang / snying rje'i gzi med pa dang / dga' ba'i gzi med pa dang / btang snyoms kyi gzi med pa dang / sbyin pa dang / yang dag par sdom pa dang / nges pa'i gzi med pa dang / dge sbyong gi yon tan gyi gzi med pa dang / 'phags pa'i rigs la gnas pa'i gzi med pa dang / sbyangs pa'i yon tan dang yo byad bsnyungs pa'i gzi med pa dang / lus dang ngag dang sems yongs su dag pa'i gzi med pa 'di ni 'od srung dge slong gzi phrogs pa zhes bya ste/ 'od srung gzi phrogs pa de lta bu rnams la ni de bzhin gshegs pas sbyar ba'i sman gyis mi tshugs ste/ 'di lta ste/ 'dod chags la mi sdug pa'i sman dang / zhe sdang la byams pa dang / gti mug la rten cing 'brel bar 'byung ba dang / nyon mongs pa rnams la tshul bzhin yid bya ba dang / 'du 'dzi las dben par dga' ba dang / 'dzin pa thams cad spang ba'i phyir dgon par gnas pa dang / gsum bsdam pa'i phyir lus dang ngag dang sems yongs su dag pa dang / sems las su rung bar bya ba'i phyir ting nge 'dzin yongs su dag pa'i sman de bzhin gshegs pas sbyar ba 'di lta bu 'di dag gis de la mi tshugs te/ de shi nas sems can dmyal ba nyid du 'gyur gyi de'i tha ma gzhan du mi 'gyur ro/ /gang dag yang 'jig rten las 'das pa'i sman 'di lta ste/ phung po shes pa dang / khams shes pa dang / skye mched shes pa dang / rten cing 'brel bar 'byung ba shes pa dang / stong pa nyid dang / mtshan ma med pa dang / smon pa med pa shes pa'i 'jig rten las 'das pa'i sman 'di lta bu 'di dag gis kyang de la mi tshugs te/ de shi nas sems can dmyal ba nyid du 'gyur gyi de'i tha ma gzhan du mi 'gyur ro/ /bstan pa 'di bshad pa na dge slong rnal 'byor spyod pa lnga brgya bdag cag tshul khrims yongs su ma dag bzhin du dad pas phyin pa spyod par gyur na mi rung zhes nyams par byas te slar khyim du dong ngo / /de la dge slong gzhan dag cig 'di skad du dge slong che ba'i bdag nyid can rnal 'byor spyod 83.176a pa 'di dag bstan pa las nyams pa ni shin du ma legs so zhes 'phya'o/ /bcom ldan 'das kyis dge slong de dag la 'di skad ces bka' stsal to/ /dge slong dag khyed 'di skad du dge slong che ba'i bdag nyid can 'di dag 'di ltar bstan pa las shin du nyams pa 'di ni shin tu ma legs so zhes ma smra shig /de ci'i phyir zhe na/ dge slong dag mngon par mi dga' nas khyim na gnas pa 'di ni dad pa can rnams kyi chos yin te/ dge slong dad pa dang mos pa mang ba 'gyod pa dang ldan pa 'di dag gis bstan pa 'di thos nas bdag cag tshul khrims yongs su ma dag bzhin du dad pas byin pa yongs su spyad na mi rung ngo zhes nyams par gyur to/ /'od srung nga lung ston te/ dge slong 'di dag ni 'di nas shi 'phos nas dga' ldan gyi lha'i ris su skye bar 'gyur te/ de dag de bzhin gshegs pa byams pa'i nyan thos thog mar 'dus pa'i grangs su chud par 'gyur ro/ /dge sbyong gdol pa lta bu'i le'u ste gsum pa'o// // bam po gnyis pa ste tha ma/ de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das dge slong ji lta bu zhal ta bgyi ba lags/ bcom ldan 'das kyis bka' stsal pa/ 'od srung ngas zhal ta/ bya bar gnang ba'i dge slong gnyis te/ gnyis gang zhe na/ dge slong yongs su dag pa 'jig rten pha rol du kha na ma tho bas 'jigs par lta ba/ las kyi rnam par smin pa la rton pa/ 'dzem pa dang ldan zhing 'gyod pa dang ldan pa dang / gang yang zag pa zad pa dgra bcom par gyur pa ste/ 'od srung dge slong ma nyams pa 'di gnyis zhal ta byed pa ngas gnang ngo / /de ci'i phyir zhe na/ 'od srung legs pa gsungs pa'i chos 'dul ba 'di la rigs sna tshogs las rab tu byang ba/ sems kyi mos pa sna tshogs dang ldan pa/ spong ba'i phyir rnal 'byor sna tshogs la gnas pa/ kha cig ni dgon pa zhi ba'i mal stan la mngon par dga' ba/ kha cig ni bsod snyoms pa 83.176b kha cig ni grong mang ba na gnas pa/ kha cig ni 'tsho ba yongs su dag pa/ kha cig ni mang du thos pa la mngon par brtson pa/ kha cig ni chos smra ba/ kha cig ni 'dul ba 'dzin pa/ kha cig ni ma mo 'dzin pa kha cig ni grong dang / grong khyer dang / grong rdal dang / yul 'khor dang / pho brang 'khor dag tu zhugs nas chos ston pa ste/ sems can gzhan dag gi sems kyi spyod pa rnams bsrung dka' ba'i phyir ro/ /'od srung de la dge slong zhal ta byed pas dge slong gi dge 'dun thams cad kyi sems mgu bar bya'o/ /'od srung de la dge slong dgon pa pa'i bas mtha'i mal stan gang yin pa de dag ni dge slong zhal ta byed pas yongs su bsko bar mi bya'o/ /zhal ta byed pas dge slong dgon pa pa de dag bsrung bar bya ste/ dus ma yin par gsol bar mi bya/ dus ma yin par gtang bar mi bya'o/ /'od srung gal te dge slong dgon pa pa la dge 'dun gyi bya bar gtogs pa slob pa'i las res bab na dge slong zhal ta byed pa de las de bdag nyid kyis bya'o/ /yang na dge slong gzhan zhig bskos la las de byed du gzhug ste dge slong dgon pa la la gnod par mi bya'o/ /'od srung de la dge slong bsod snyoms spyod pa gang yin pa de la dge slong zhal ta byed pa des kha zas bsod pa bgo bsha' bya'o/ /'od srung de la dge slong rnal 'byor spyod pa gang yin pa de dag la dge slong zhal ta byed pas 'thun pa'i 'tshog chas dang / na pa'i gsos sman dang / yo byad rnams sbyin par bya'o/ /dge slong rnal 'byor spyod pa des phyogs ga la gnas pa'i sa phyogs der dge slong zhal ta byed pa des sgra chen po dang / skad drag po mi dbyung zhing byed du yang mi gzhug go /dge slong zhal ta byed pas dge slong rnal 'byor spyod pa de bsrung zhing mal cha yang sbyar bar bya'o/ /kha zas bsod pa dang / yi gar 'ong ba dang / rnal 'byor spyod pa'i sa dang 'thun pa'i bza' ba dang bca' ba rnams sbyin par bya'o/ /dge 83.177a slong de la dge slong 'di ni de bzhin gshegs pa'i bstan pa rton pa'i phyir gnas pa yin te/ de la bdag gis rjes su 'thun pa'i yo byad thams cad mang du sbyar bar bya'o snyam du shin du phangs pa'i 'du shes bskyed par bya'o/ /'od srung de la dge slong mang du thos pa la mngon par brtson pa gang yin pa de dag la dge slong zhal ta byed pas lung nos shig /lhogs shig /kha ton gyis shig /kho bo ni khyod kyi rim gro byed pa yin gyis/ khyod ji lta ji lta bur mang du thos par gyur pa de lta de lta bur dge slong gi dge 'dun mdzes par 'gyur par gyis shig /'dug la brjod pa'i mdzes par gyis shig /bdag nyid kyi shes rab kyang mchog tu 'gyur bar gyis shig ces spro ba bskyed par bya'o/ /'od srung de la dge slong zhal ta byed pas de dag dus ma yin par gtang bar mi bya/ las su bsko bar mi bya'o/ /dge slong zhal ta byed pa nges dge slong mang dus thos pa de dag bsrung bar bya'o/ /'od srung de la chos smra pa'i dge slong gang yin pa de dag la dge slong zhal ta byed pas las su mi bsko bar bya'o/ /grong dang / grong khyer dang / grong rdal dang yul 'khor dang / rgyal po'i pho brang 'khor dag tu 'jug tu bcug la chos 'chad du gzhug go /chos nyan pa dag bsko bar bya'o/ /'khor gyi dkyil 'khor rnam par dag par bya'o/ /'brel ba'i chos kyi gtam gyi phyir dkyil 'khor du gzhag par bya'o/ /chos smra ba'i dge slong la dge slong gang dag gnod pa byed pa'i dge slong de dag dge slong zhal ta byed pas bzlog par bya'o/ /dge slong zhal ta byed pas chos smra ba'i dge slong la rtag tu bsu bar bya/ legs so zhes bya ba mang du bya'o/ /'od srung de la dge sbyong gang dag 'dul ba 'dzin pa dang / ma mo 'dzin par gyur pa de dag gi gan du dge slong zhal ta byed pa de song la ji ltar na bdag rma med cing ma nyams pa dang / ji ltar na bdag ltung ba med pa'i chos kyi zhal ta bya zhes yongs su dri bar bya'o/ /de nas 83.177b 'dul ba 'dzin pa dang / ma mo 'dzin pa'i dge slong de dag gis dge slong zhal ta byed pa de'i bsam pa rig nas de'i bya ba dang / 'byung ba gang yin pa dang / byed pa gang yin pa de bstan par bya'o/ /dge slong zhal ta byed pas 'dul ba 'dzin pa dang / ma mo 'dzin pa'i dge slong de dag la phangs par bya ba dang / dad pa dang / gus pa dang / rje sa rab tu bskyed par bya'o/ /dge 'dun gyi rnyed pa gang yin pa de dge slong zhal ta byed pas dus dus su dge slong gi dge 'dun la dbul bar bya'i/ dge 'dun gyi rnyed pa bsags shing sba bar mi bya ste/ ji ltar rnyed pa bzhin du sbyin par bya/ ma skul bar sbyin par bya/ gnod pa med par sbyin par bya'o/ /des 'dun pa dang / zhe sdang dang / gti mug dang / 'jigs pas 'gro bar mi bya'o/ /dge slong gi dge 'dun la rton par bya'i/ khyim pa'i phyogs la rton par mi bya'o/ /dge 'dun gyi bya ba la rton par bya'i/ bdag gi bya ba la rton par mi bya'o/ /dngos po gang la yang dbang bya ba'i 'du shes bskyed par mi bya'i/ bya ba ji tsam du chung ba yang dge 'dun gyi gros bzhin bya zhing rang dgar mi bya'o/ /dge 'dun gyi 'am/ phyogs bzhi'i dge 'dun gyi 'am/ mchod rten gyi yo byad gang ci yang rung ste/ ji lta ba bzhin du gzhag par ste/ dge 'dun gyi dang phyogs bzhi'i dge 'dun gyi bsre bar mi bya'o/ /phyogs bzhi'i dge 'dun gyi rnyed pa yang dge 'dun gyi dang bsre bar mi bya'o/ /dge 'dun gyi dang phyogs bzhi'i dge 'dun gyi rnyed pa mchod rten gyi dang bsre bar mi bya'o/ /mchod rten gyi rnyed pa yang dge 'dun gyi dang phyogs bzhi'i dge 'dun gyi dang bsre bar mi bya'o/ /gal te phyogs bzhi'i dge 'dun la brel phongs su gyur la/ dge 'dun gyi rnyed pa che bar gyur na dge slong zhal ta byed pas dge slong gi dge 'dun bsdus la gros 'thun par bgyis te/ dge 'dun gyi rnyed pa de las phyogs bzhi'i dge 'dun la bshug par 83.178a bya'o/ /gal te de bzhin gshegs pa'i mchod rten zhig ral du gyur la/ dge 'dun gyi dang phyogs bzhi'i dge 'dun gyi rnyed pa che bar gyur na dge slong zhal ta byed pas dge slong gi dge 'dun thams cad bsdus la gros 'thun par bgyis te/ 'di skad ces de bzhin gshegs pa'i mchod rten 'di ni zhig ral du gyur la/ dge 'dun gyi dang phyogs bzhi'i dge 'dun gyi rnyed pa ni che bar gyur na/ gal te tshe dang ldan pa rnams gnod pa med cing dad pa dang ldan la bzod cing gnang na bdag gis dge 'dun gyi dang / phyogs bzhi'i dge 'dun gyi rnyed pa 'di las dngos po cung zad cig khyer te de bzhin gshegs pa'i mchod rten 'di bcos par bya'o zhes brjod par bya'o/ /gal te dge 'dun gyis gnang na dge slong zhal ta byed pa des de bzhin du bya'o/ /ci ste dge 'dun gyis ma gnang na dge slong zhal ta byed pa des sbyin pa po dang / sbyin bdag rnams la gsol ba thob la de bzhin gshegs pa'i mchod rten gso bar bya'o/ /'od srung gal te mchod rten gyi rnyed pa ji ltar mang du gyur tu zin kyang dge slong zhal ta byed pas dge 'dun dang phyogs bzhi'i dge 'dun la bshug par mi bya'o/ /de ci'i phyir zhe na/ dad cing dang ba mang po dag gis mchod rten la phul ba ni tha na ras kyi kha tshar gcig tsam gang yin pa de yang lha dang bcas pa'i 'jig rten gyi mchod rten yin na rin po che'am/ rin po cher smos pa dag lta smos kyang ci dgos/ mchod rten la gos phul ba gang yin pa de ni de bzhin gshegs pa'i mchod rten de nyid du rlung dang / nyi ma dang / char pas dengs kyang sla'i/ mchod rten la phul ba'i gos dbyig gam dbyig gi rin du bsgyur bar mi bya'o/ /de ci'i phyir zhe na/ mchod rten gyi ni rin thang cung zad kyang med la/ mchod rten ni cis kyang brel ba med pa'i phyir ro/ /'od srung dge slong zhal ta byed pas de ltar yongs su dag par bya ste/ ngas dkon mchog gsum gyi dang ma 'bags par bya'o/ /bdag gi rnyed pas chog shes par bya'o/ /dkon mchog gsum gyis 83.178b byin gyis brlabs pa'i dngos po rnams la bdag gir 'du shes mi bya'o/ /'od srung dge slong zhal ta byed pa rab tu sdang ba'i sems dang ldan pa gang la la zhig gis tshul khrims dang ldan pa/ yon tan dang ldan pa/ sbyin gnas rnams la sems khros sam/ dbang byed cing bsgo blag byed na de mi dge ba'i las des sems can dmyal bar 'gro bar 'gyur ro/ /gal te mi'i 'jig rten du 'ongs na yang bran dang gzhan gyi las byed par gyur pa dang / khu tshur dang / thal lcag dang / lag cha snyems pas brdegs pa dang phrad par 'gyur ro/ /'od srung gzhan yang dge slong zhal ta byed pa dge 'dun gyi bya ba las 'das te rang dgar dge slong rnams la dbang byed cing bsgo ba dang / chad pas gcod pa dang / 'jigs par byed pa dang / sdigs pa dang / dus ma yin par mngag pa dang / dus ma yin par bsgo ba byed na de mi dge ba'i las des nyi tshe ba'i sems can dmyal ba phur pa mang po zhes bya ba der skye bar 'gyur te/ der skyes nas lus la lcags phur brgya stong zug cing de dag 'bar/ rab tu 'bar la/ kun tu rab tu mched cing 'bar bar 'gyur ro/ /des tshul khrims dang ldan pa/ yon tan dang ldan pa/ sbyin gnas rnams la sdigs shing ngag gi las gdug pa smra bar gyur pa gang yin pa des de der skyes nas lce'i dbang po'i khyon dpag tshad brgya bar 'gyur zhing / de'i lce'i dbang po de la lcags phur brgya stong rab tu 'bab cing de dag kyang 'bar/ rab tu 'bar/ kun du rab tu 'bar la/ kun du rab tu mched cing 'bar te mer 'gyur ro/ /de ci'i phyir zhe na/ 'di ltar des bsdigs shing ngag gi las gdug pa smras par gyur pa'i phyir ro/ /'od srung dge slong zhal ta byed pa gang la las dge 'dun gyi rnyed pa 'dus shing 'dus pa bzhag te dus dus su mi sbyin zhing mtho brtsams la gtses nas sbyin pa dang / kha cig byin/ kha cig ma byin/ kha cig la byin/ kha cig la ma byin na de mi dge ba'i las des yi dgas 83.179a kyi skye gnas rkyag 'jim byin pa nub ces bya ba der skye bar 'gyur ro/ /de der skyes nas yi dgas gzhan gyis kha zas blangs te de la bstan na/ de bstan pa'i tshe mig gnyis ga mi 'dzums par zas de lta zhing bkres pa dang skom pas nyen pa'i sdug bsngal gyi tshor ba myong gi /lo brgya stong du yang zas de thob par mi 'gyur ro/ /ci ste brgya la brgya lam na zas de thob kyang ngan skyugs dang rnag khrag tu 'gyur ro/ /de ci'i phyir zhe na/ 'di lta des tshul khrims dang ldan pa// yon tan dang ldan pa/ sbyin gnas rnams mgu bar ma byas shing rang gi rnyed pas chog mi shes par gyur pa'i phyir ro/ /'od srung dge slong zhal ta byed pa gang la las dge 'dun gyi 'am/ phyogs bzhi'i dge 'dun 'am/ mchod rten gyi tshol bar byas na de'i rnam par smin pa ni ngas bskal pa bgrangs pas kyang brjod kyis mi lang ngo / /'od srung dge slong zhal ta byed pa gang la las nyes dmyigs kyi gnas 'di lta bu 'di dag thos nas khro 'am/ gshe 'am/ gnod par sems sam/ khong khro bskyed na de ni gsor mi rung ngo zhes ngas bshad do/ /'od srung de lta bas na dam pa'i chos 'di lta bu 'di thos nas dge slong zhal ta byed pas lus dang ngag dang yid yongs su dag par bya'o/ /bdag dang gzhan bsrung bar bya'o/ /'od srung dge slong zhal ta byed pa rang gi sha la za yang sla'i/ /dkon mchog gsum gyis byin gyis brlabs pa'i lhung bzed dam/ chos gos sam/ bsod snyoms sam/ na pa'i gsos sman nam/ yo byad yongs su spyad par ni mi bya'o/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das kyis lhod pa rnams kyi lhod pa'i chos dang / 'dzem mdog mchis pa rnams kyi 'dzem mdog gi chos rnams bka' stsal to/ /zhal ta byed pa'i le'u ste bzhi pa'o// // bcom ldan 'das dge slong dgon pa pa gang dag bdag dgon pa pa gang dag bdag dgon 83.179b pa pa zhes mchid kyis 'che na/ bcom ldan 'das ji tsam gyis na dge slong dgon pa pa lags/ ji tsam gyis na dge slong bsod snyoms pa lags/ ji tsam gyis na dge slong phyag dar khrod pa pa lags/ de skad ces gsol pa dang / bcom ldan 'das kyis tshe dang ldan pa 'od srung chen po la 'di skad ces bka' stsal to/ /'od srung 'di la dge slong dgon pa pas dgon pa dang / nags tshal gyi gnas dang / bas mthar gnas mal bca' bar bya'o/ /chom rkun dang / gnag rdzi dang phyugs rdzi med pa/ sdig sbrul med pa/ ri dgas dang bya mang po med pa/ sbrang bu dang sha sbrang nyung ba/ sgra nyung ba/ ca co nyung ba de lta bu'i dgon pa bas mtha' dag tu gnas par bya'o/ /de dgon pa'i gnas de na gnas pa na yid la byed pa brgyad bskyed par bya ste/ brgyad gang zhe na/ lus la mi blta bar bya ba dang / srog la mi blta bar bya ba dang / rnyed pa bkur sti la mi blta bar bya ba dang / 'du 'dzi thams cad la mi blta bar bya ba dang / dgon pa dag tu ri dgas 'chi ba ltar khas blang bar bya ba dang / dgon par dgon pa'i yon tan yang dag par blangs te gnas par bya ba dang / chos kyi 'tsho bas 'tsho'i log pas 'tsho ba ma yin par bya ba dang / zang zing dang nyon mongs pa med pa'i 'tsho bas 'tsho bar bya ba ste/ yid la bya ba brgyad po de dag bskyed nas dgon pa'i gnas su gnas par bya'o/ /de dgon pa'i gnas de na gnas pa na sems can thams cad la byams pa rnam pa brgyad bskyed par bya ste/ brgyad gang zhe na/ phan pa'i byams pa dang / bde ba'i byams pa dang / gnod pa med pa'i byams pa dang / yang dag pa'i byams pa dang / tha dad pa med pa'i byams pa dang / zhi gnas kyi byams pa dang / chos la nges par sems pa'i byams pa dang / bsam pa yongs su dag pa'i byams pa ste/ sems can thams cad la byams pa brgyad po de dag bskyed par bya'o/ /dgon pa'i gnas de na gnas pa na/ 'di ltar sems bskyed par bya ste/ 'di ltar 83.180a bdag ni lam ring po nas 'dir 'ongs la gcig pu gnyis su med pa ste/ legs par byas pa 'am/ nyes par byas pa skul ba'i grogs ni gang yang med kyi/ lha dang / klu dang / gnod sbyin dang / dri za dang / sangs rgyas bcom ldan 'das gang dag bdag gi sems kyi bsam pa dag ni yod de/ bdag dgon pa'i gnas na gnas la mi dge ba'i sems kyi dbang du song na de dag dbang du 'gyur ro/ /bdag lam ring po nas 'ongs shing gcig pu gnyis su med de/ rten pa med/ bdag gi med/ yongs su 'dzin pa med la/ gal te 'dod pa la rnam par rtog pas rnam par rtog /gnod sems kyi rnam par rtog pas rnam par rtog 'tshe ba'i rnam par rtog pas rnam par rtog gam mi dge ba gzhan la rnam par rtog pas rnam par rtog par gyur na bdag tu 'dzin pa dang / 'du ba la mngon par dga' ba'i sems can rnams dang bye brag med par 'gyur te/ bdag gis lha dang / klu dang / gnod sbyin dang / dri za rnams la bslus par 'gyur zhing sangs rgyas bcom ldan 'das rnams kyang mi mnyes par byas par 'gyur gyis/ ci nas kyang bdag la lha rnams 'phya bar mi 'gyur ba dang / sangs rgyas bcom ldan 'das rnams kyang dgyes par 'gyur ba de ltar bya'o snyam du sems bskyed par bya'o/ /de dgon pa'i gnas de na gnas pa na so sor thar pa'i sdom pas bsdam par bya/ tshul khrims kyi phung po shin du kun bsrung bar bya/ lus dang / ngag dang / sems yongs su dag pa dang / tshul 'chos pa med pa dang / kha gsag med pa dang / 'tsho ba yongs su dag pa dang / ting nge 'dzin gyi sems mngon du bya ba dang / ji ltar thos pa'i chos la rten pa dang / tshul bzhin yid la bya ba dang / rab tu ldan pa dang / yid byung ba dang / 'dod chags dang bral ba dang / 'gog pa dang / mya ngan las 'das pa la gzhol ba dang / 'khor bas 'jigs skrag pa dang / phung po ni gshed ma ste phyir rgol bar rig pa dang / khams bzhi la 83.180b myur du gdug pa'i dug tu 'du shes pa dang / skye mched drug la grong stong par ltar mos pa dang / rten cing 'brel bar 'byung ba la 'jug pa la mkhas pa dang / rtag pa dang chad par lta ba yongs su spangs pa dang / sems can med pa dang / srog med pa dang / gso ba med pa dang / gang zag med par rnam par spyod pa dang / stong pa nyid la mos pa dang / mtshan ma med pa spyod yul ba dang / smon pa med pa'i sems sel ba dang / khams gsum la rtag tu 'jigs pa'i yid dang ldan pa dang / rtag tu mgo dang gos la me 'bar ba bzhin du brtson 'grus rtsom pa dang / brtson pa mi 'dor ba dang / lus kyi skyon la yang dag pa ji lta ba bzhin du so sor rtog pa dang / sems kyi skye ba dang / 'jig pa la lta ba dang / sdug bsngal yongs su shes pa la mngon par brtson pa dang / kun 'byung ba thams cad kyi sred pa spangs pa dang / 'gog pa mngon sum du bya ba la zhugs pa dang / lam bsgom pa'i rnal 'byor la brtson pa dang / phyi'i spyod yul dran pa nye bar gzhag pa la rab tu gnas pa dang / mi dge ba'i chos dang bral ba dang / dge ba'i chos la mngon du phyogs pa dang / yang dag pa'i spong ba la shin du gnas pa dang / rdzu 'phrul gyi rkang pa mngon du gyur pa dang / dbang po lnga dang ldan pa dang / stobs lnga'i shugs dang ldan pa dang / byang chub kyi yan lag bdun la bsam gtan pa dang / 'phags pa'i lam yan lag brgyad pa la mngon par brtson pa dang / zhi gnas la gnas pa dang / lhag mthong gis blta bar bya ste/ 'od srung de lta bu'i go cha 'di dag bgos nas nam gyi cha stod dang / nam gyi cha smad la mi nyal zhing rnal 'byor la brtson pa dang / rtag tu khyad par du 'gro bar dgon pa'i gnas de na gnas par bya'o/ /de dgon pa'i gnas de na gnas pa na lus brgyan par sbyor ba brtson par mi bya'o/ /mal chas brgyan pa la brtson par mi bya'o/ /chos gos kyis brgyan pa la brtson par mi bya'o/ /des rtswa rnying pa skams pa blangs la 'chags dang 83.181a 'dug sar legs par bting ste bdag 'dug pa dang / dge 'dun gyi dang / phyogs bzhi'i dge 'dun gyi dang / ma 'bags pa dang / bdag gi gos kyis chog shes par dgon pa'i gnas der gnas par bya'o/ /'od srung dge slong dgon pa pa gang gi tshe lus gso ba dang / 'phags pa'i lam nye bar brtan pa'i phyir grong ngam/ grong khyer ram/ grong rdal du bsod snyoms kyi phyir 'jug pa na des sems 'di lta bus dgon pa'i gnas de nas 'gro bar bya ste/ ma rnyed kyang yongs su yi chad par mi bya/ rnyed kyang dga' ba skyed par mi bya/ las kyi rnam par smin pa yid la bya/ bsod nams nye bar bstan par bya/ de bzhin gshegs pa yid la bya ba bsam zhing des grong dang / grong khyer dang / grong rdal du bsod snyoms kyi phyir 'jug par bya'o/ /de grong dang / grong khyer dang / grong rdal du bsod snyoms spyod pa na chos kyi go cha bgos la bsod snyoms spyad par bya'o/ /de la chos kyi go cha gang zhe na/ mig gis yid du 'ong ba'i gzugs rnams mthong na rjes su chags par mi bya'o/ /yid du mi 'ong ba'i gzugs rnams mthong na yang khong khro bar mi bya'o/ /de bzhin du sgra dang / dri dang / ro dang / reg bya yid du 'ong ba dang / yid du mi 'ong ba rnams la rjes su chags pa dang khong khro bar mi bya'o/ /dbang po shin du bsdams pa dang / mig mi g.yeng ba dang / gnya' shing gang tsam du lta ba dang / dul ba dang / cang shes kyi sems dang / sngon yid la byed pa'i chos mi 'dor ba dang / zang zing gis ma 'bags pa'i rgyud kyis bsod snyoms spyad par bya'o/ /mthar chags su bsod snyoms blang bar bya'o/ /gang nas bsod snyoms rnyed pa der rjes su chags par mi bya'o/ /gang nas ma rnyed pa der yang khong khro bar mi bya'o/ /khyim bcur bslangs pa las khyim bcu gcig pa las bsod snyoms ma rnyed na yang yongs su yi chad par mi bya'i/ de 'di snyam du bram ze dang khyim bdag 'di dag ni bya ba mang ba dag yin pas de dag gis bdag la sbyin par nges pa med de/ de dag bdag la sems 83.181b pa yang ngo mtshar che na bsod snyoms sbyin pa lta smos kyang ci dgos snyam pa'i 'du shes bskyed par bya ste/ des de ltar yongs su yi chad pa med par bsod snyoms spyad par bya'o/ /sems can gang dag de'i mig lam du snang bar gyur pa'i skyes pa dang / bud med dang / khye'u dang / bu mo dang / tha na dud 'gro'i skye gnas su song ba de dag la yang byams pa dang snying rje'i sems bskyed par bya'o/ /ci nas kyang sems can gang dag bdag gi mig lam du snang bar gyur pa 'am/ bsod snyoms sbyin pa de dag mtho ris su 'gro bar 'gyur ba de ltar bya'o/ /de ltar brtson par bya'o/ /des bsod snyoms ngan nam bzang yang rung blangs ste/ grong ngam/ grong khyer ram/ grong rdal 'di na bdag gi bsod snyoms 'di las bgo bsha' bya dgos pa'i sems can dbul po su yod snyam du phyogs bzhir kun du blta bar bya'o/ /gal te sems can dbul po zhig mthong na des bsod snyoms de las bgo bsha' bya'o/ /gal te sems can dbul po ma mthong na des 'di ltar gang dag bdag gi mig lam du snang bar ma gyur te/ mi snang ba'i sems can de dag la bsod snyoms kyi thog ma'i cha skal sbyin gyis/ byin nas len pa dag yongs su spyod cig snyam du sems bskyed la/ des bsod snyoms de khyer te dgon pa'i gnas der song la lhung bzed dang lag pa bkrus te/ dge sbyong gi spyod pa dang / cho ga dang ldan pa'i spyod pa bzang pos byin gyis brlabs la des skyil mo dkrung bcas te bsod snyoms de bza' bar bya'o/ /ma chags pa dang / gnod sems med pa dang / mi brkam pa dang / ma zhen pas zas zos nas 'di snyam du lus 'di la srin bu'i rigs brgyad khri yod pa dag 'di'i mthus bde bar gnas par gyur cig /da ni 'di dag zang zing gis bsdu bar bya'o/ /byang chub thob nas ni chos kyis bsdu bar bya'o snyam du sems bskyed par bya'o/ /gal te yang de'i bsod snyoms ngan par gyur na des 'di snyam du sems bskyed par bya ste/ kha zas ngan pas ni bdag gi lus yang bar 'gyur/ 83.182a spong ba bzod par 'gyur/ bdag gi bshang gci 'byung ba nyung bar 'gyur/ bdag la dad pas byin pa chung bar 'gyur/ bdag gi lus yang ba dang / sems yang bar 'gyur/ bdag rmugs pa dang gnyid chung bar 'gyur/ bdag la 'dod chags kyi sems kyis kun nas dkris par mi 'gyur snyam du yid la bya ba 'di lta bu 'di dag bskyed par bya'o/ /gal te des bsod snyoms mang zhig rnyed na de la yang ran par bza' bar bya'o/ /dor ba'i chos nyid du yang bya ste/ bsod snyoms de las rdo leb gang yang rung ba'i steng du gtor la 'di snyam du gcan zan dang / bya'i tshogs gang la la zang zing gi zas 'dod pa byin nas len pa de dag 'di zo shig snyam du sems bskyed par bya'o/ /des zas zos nas lhung bzed dang lag pa bkrus te dgon pa la brten nas gnas par bya'o/ /sngon yid la byed pa'i chos de nyid kyang mi dor bar bya'o/ /'od srung gal te dge slong dgon pa pa 'bras bu ma thob pa so so'i skye bo'i drung du sbrul dang gcan zan gtum po dag 'ongs nas des de la 'jigs pa dang skrag par mi bya'i/ des 'di snyam du bdag thog ma nyid nas lus dang srog bor te dgon pa'i gnas su 'ongs kyis/ 'di la bdag gis 'jigs par mi bya/ skrag par mi bya'i/ byams pa'i sems bskyed par bya/ zhe sdang rnam par spang bar bya/ 'jigs pa spang bar bya'o snyam du sems bskyed par bya'o/ /gal te de ltar byas nas sbrul dang gcan zan de dag gis srog gcod cing za na yang des 'di snyam du gcan zan 'di dag la bdag gis zang zing tsam gyis tshim par byed mi nus kyi/ de dag gis bdag gi sha zos nas bde ba la reg par gnas par 'gyur la/ bdag gis kyang snying po med pa'i lus las snying po blangs par 'gyur ba ni bdag gis rnyed pa legs par rnyed do/ /da ni 'di dag zang zing gis bsdu bar bya'o/ /byang chub thob nas ni chos kyis bsdu bar bya'o snyam du sems bskyed par bya ste/ 'od srung dgon pa la gnas pa'i dge slong gis de ltar 83.182b lus dang srog la mi lta bar dgon pa la gnas par bya'o/ /gal te dgon pa'i gnas de na gnas pa na mi ma yin pa 'ongs na mdog sdug kyang rung / mdog mi sdug kyang rung de la chags par mi bya/ khong khro bar mi bya'o/ /gal te sngon sangs rgyas mthong ba'i lha dag dge slong dgon pa pa'i gan du 'ongs te dri ba yongs su 'dri na/ de la dge slong dgon pa pa des ji ltar thos pa bzhin du lha de dag la chos bshad par bya'o/ /ci ste lha de dag zab mo'i dri ba yongs su 'dri ste/ dge slong dgon pa pa des lan mi thebs pa lta na des nga rgyal med par byas la 'di skad ces ma bslabs pa la brnyas par mi bya ste/ sangs rgyas kyi bstan pa la lung mnos nas 'bad de khong du ma chud pa'i chos rnams khong du chud par gyur pa de'i tshe de'i dus na dris pa thams cad kyi lan gdab par bya'o/ /bdag ni chos nyan pa yin gyis khyed spobs par gyis shig ces brjod par bya ste/ 'od srung dge slong dgon pa pas de ltar lha de dag la go bar bya'o/ /'od srung gzhan yang dge slong dgon pa pa dgon pa la gnas pas dgon pa'i 'du shes shin du bsgom par bya ste/ de la lus 'di rtswa dang / shing dang / rtsig pa dang / bong ba dang / mig yor lta bu ste/ bdag po med pa/ bdag gi med pa/ yongs su 'dzin pa med pa'o/ /lus 'di la ni bdag dang / sems can dang / srog dang / gang zag med kyi chos 'di dag ni rten cing 'brel bar 'byung ba ste/ rgyu dang rkyen las byung zhing byed rgyu tshogs pa las byung ba ste/ ci nas kyang bdag gi lta bar gyur pa thams cad nye bar zhi bar 'gyur ba de ltar bdag gis tshul bzhin so sor brtag par bya'o/ /stong pa nyid dang / mtshan ma med pa dang / smon pa med pa'i chos kyang rgyun mi 'chad par yang yid la bya'o/ /snyam du de ltar bslab par bya'o/ /dgon pa'i gnas de na gnas pa des rtswa dang / shing gel ba dang / sman dang / nags tshal de dag ji ltar 'byung ba dang / ji ltar 'jig par 'gyur ba dang / ji ltar phyi rol gyi 83.183a dngos po 'di dag bdag po med pa/ bdag gi med pa/ yongs su 'dzin pa med pa de ltar g.yo ba med cing byed pa med de/ stong bzhin du skye zhing 'jig la su yang de dag skye bar mi byed/ 'gog par mi byed pa'i mtshan ma bzung la/ de bzhin du lus 'di yang rtswa dang / rtsig pa dang shing dang bong ba dang / mig yor lta bu ste/ bdag po med pa/ bdag gi ba med pa/ yongs su 'dzin pa med pa/ g.yo ba med pa/ byed pa med pa/ rgyu dang rkyen tshogs pa las 'byung gi /rgyu dang rkyen ma tshang na mi 'byung ba ste/ 'di la don dam par skye ba dang / 'gag pa'i chos gang yang med do snyam du mtshan ma gzung bar bya'o/ /'od srung de ltar dge slong dgon pa pas chos kyi yi dam gyi spyod pa 'di lta bus dgon pa la gnas par bya'o/ /de lta bu'i chos la gnas pa de nyan thos kyi theg pa pa 'am/ rang sangs rgyas kyi theg pa pa 'am/ byang chub sems dpa'i theg pa pa zhig tu myur du khyad par du 'gyur ro/ /gal te nyan thos theg pa par gyur na ni de myur du 'bras bu thob par 'gyur ro/ /ci ste de las kyi sgrib pas bsgribs te 'bras bu thob par ma gyur na yang de zag pa rnams las sems rnam par grol gyi bar du de bzhin gshegs pa gnyis sam gsum las mi 'da'o/ /gal te rang sangs rgyas kyi theg pa par gyur na ni de myur ba nyid du rang byang chub thob par 'gyur ro/ /gal te byang chub sems dpa'i theg pa par gyur na ni de tshe 'di nyid la mi skye ba'i chos la bzod pa thob par 'gyur te/ de sgrib pa med par sangs rgyas mthong bar 'gyur ro/ /sgrib pa med par sangs rgyas mthong nas myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro/ /dgon pa pa'i le'u 'di bshad pa na dge slong lnga brgya len pa med pa zag pa rnams las sems rnam par grol lo/ /dgon pa pa'i le'u ste lnga pa'o// // 'od srung de la ji ltar na dge slong bsod snyoms spyod pa yin zhe na/ 'od srung 'di la dge slong bsod snyoms spyod pas 'di 83.183b ltar bdag bsod snyoms kyi kha zas la gnas te legs par gsungs pa'i chos 'dul ba la rab tu byung la bdag sngon gyi smon lam dang dam bcas pa la gnas par bya'o snyam du bslab par bya'o/ /dge slong bsod snyoms spyod pa lhag pa'i bsam pa dang ldan pa des mi brkam pa dang / tshul 'chos pa med pa dang / kha gsag med pa dang / 'gron du bod pa thams cad kyi sems med pa dang / dge 'dun gyi rnyed pa dang ma 'bags pa dang yid la brtan par bya'o/ /des kha zas bzang po rnams la ro bro ba'i 'du shes thams cad kyi thams cad du bskyed par mi bya'o/ /des 'di ltar bdag gis gdol bu lta bu dang / lus dang sems gtsang mar bya'i kha zas kyis lus gtsang mar ni mi bya'o/ /de ci'i phyir zhe na/ zas bzang po ji snyed cig zos pa de thams cad ni tha mar rnag tu zag go /tha mar mi mthun no/ /tha mar dri nga ba'o/ /de lta bas na bdag gis bzang po 'dod par mi bya'o snyam du bslab par bya'o/ /de de ltar shin tu nges par sems pa'i sems kyis grong ngam/ grong khyer ram/ grong rdal du bsod snyoms kyi phyir 'jug pa na mthar chags su bslang bar bya'o/ /des 'di ltar sems bskyed par bya ste/ bdag la skyes pa bsod snyoms ster gyi bud med ni ma yin no zhe 'am/ bdag la bu med bsod snyoms ster gyi skyes pa ni ma yin no zhe 'am/ bdag khye'u bsod snyoms ster gyi bu mo ni ma yin no zhe 'am/ bdag la bu mo bsod snyoms ster gyi khye'u ni ma yin no zhe 'am/ bdag gis bzang po rnyed kyi ngan pa ni ma yin no zhe 'am/ bdag gis sti stang du byas nas rnyed kyi sti stang du ma byas par ni ma yin no zhe 'am/ bdag gis bde blag tu rnyed kyi sha thang bar ni ma yin no zhe 'am/ bdag la skyes pa dang / bud med dang / khye'u dang / bu mo bsu bar 'gyur ro zhe 'am/ phyin ma thag tu sems par 'gyur ram/ bdag sdod dgos par 'gyur ram/ shin du bsdogs 83.184a pa rnyed par 'gyur ram/ bdag gis kha zas bzang po ro sna tshogs dang ldan pa rnyed par 'gyur gyi dbul po'i zas lta bu ngan pa rnyed pa ni ma yin no/ /snyam du des mi dge ba'i yid la byed pa thams cad bskyed par mi bya'o/ /'di lta bu'i go cha bgo bar yang bya ste/ rnyed pa ma rnyed kyang yongs su yi chad par mi bya ba dang / ngan pa dang bzang po'i 'du shes bskyed par mi bya ba 'di ni dge slong bsod snyoms spyod pa dag gi chos nyid do/ /de ci'i phyir zhe na/ sems can phal cher ni ro la brkam ste/ zas kyi phyir sdig pa'i las rnams byas nas sems can dmyal ba rnams su skye'o/ /gang dag chog shes pa/ mi brkam pa/ ma zhen pa dang / ro la mi gdu ba/ lce'i dbang po chog shes pa/ zas ngan ngon ji tsam gyis kyang 'tsho ba de dag ni shi 'phos te/ shi ba'i dus byas nas mtho ris su skye bar 'gyur/ lha dang mi rnams kyi nang du bde 'gror 'gro bar 'gyur/ lhar skyes nas bdud rtsi za bar 'gyur ro/ /'od srung de ltar na bsod snyoms spyod pa'i dge slong gis ro la sred pa bzlog ste sems nges par sems pas lhad zan zhag bdun lon pa za yang yid chad par mi bya'o/ /de ci'i phyir zhe na/ lus gso ba dang / 'phags pa'i lam gyi tshogs bsags pa'i don du bdag gis zas bza'o snyam pa'i phyir ro/ /'od srung bsod snyoms spyod pa'i dge slong gis lhung bzed du 'ongs pa/ lhung bzed du chud pa chos dang ldan pa/ chos kyi rnyed pa/ tshangs pa mtshungs par spyod pa'i dge slong dag dang thun mong du byas la bza' bar bya'o/ /'od srung gal te dge slong bsod snyoms spyod pa na par gyur te/ nad g.yog med la bsod snyoms la 'jug kyang mi nus na/ des 'di snyam du bdag ni grogs med la bdag ni gcig pu gnyis su med pa/ bdag ni rab tu byung ba/ bdag gi grogs po ni chos yin te/ bdag ni chos la rton pa yin la/ bdag ni mi bde zhing sdug bsngal te rab tu na pas de bzhin 83.184b gshegs pas chos kyi sman gsungs pa gang yin pa de ji ltar thos pa bzhin du chos de dag bdag gis tshul bzhin brtag par bya'o snyam du sems bskyed par bya'o/ /'od srung de la gang lus 'di la yang dag pa ji lta ba bzhin du so sor rtog pa 'di ni tshul bzhin la sbyor ba'o/ /de lus 'di la skyon du yang dag pa ji lta ba bzhin du so sor rtog pa na tshul bzhin la zhugs pa de sems rtse gcig tu 'gyur zhing dran pa dang ldan la/ shes bzhin dang ldan pas bsam gtan dang po bskyed pa'i gnas gang yin pa de yod par 'gyur te/ des bsam gtan thob nas bsam gtan gyi bde ba 'dod pa na nyi ma gcig gam/ nyi ma gnyis sam/ nyi ma gsum nas nyi ma bdun gyi bar du bsam gtan gyi bde ba'i zas kyis gnas so/ /gal te 'di ltar rnal 'byor la zhugs pa bsam gtan bskyed par mi nus na/ de ltar brtson zhing rnal 'byor spyod pa'i dge slong chos la gnas pa de la mngon par shes pa mngon par shes pa'i lha dang / klu dang / gnod sbyin dag kha zas 'bul bar 'gyur ro/ /de ci'i phyir zhe na/ 'di ni rnal 'byor spyod pa rnams kyi rgyu 'thun pa ste/ de lhas yongs su bzung ba rnyed pa'i phyir ro/ /'od srung gal te sprin 'dus shing char 'bab ste bsod snyoms spyod pa'i dge slong la bsod snyoms la 'jug mi nus pa'i dus kyi tshe byams pa'i zas kyi go bgos te/ chos sems pa yid la byed pa la gnas nas/ zhag gnyis sam/ zhag gsum zhig zan chad na/ 'di ltar yi dgas gshin rje'i 'jig rten pa nyes par byed pa'i las byas pa gang dag lo brgyar yang mchil ma thal ba 'ga' bzur ma rnyed pa dag kyang yod de/ de lta bas na bdag tshul bzhin du chos sems pa la gnas pas lus nyam chung ba 'am/ sems nyam chung ba bskyed par mi bya ste/ bkres pa dang skom pas ji mi snyam par bya'o/ /'phags pa'i 83.185a lam bsgom par bya ba la brtson 'grus rgyun mi 'chad par bya'o snyam du 'du shes bskyed par bya'o/ /'od srung dge slong bsod snyoms spyod pas khyim 'dris pa dang / skyes pa 'dris pa dang / bud med 'dris pa dang / khye'u 'dris pa dang bu mo 'dris par mi bya'o/ /khyim gang na bsod snyoms gtsang ma byed pa'i khyim der stan la 'dug ste bsod snyoms gtsang ma byed pa zin gyi bar du chos kyi gtam brjod par bya'o/ /de nas bsod snyoms de blangs la stan las langs te 'gro bar bya'o/ /'od srung bsod snyoms spyod pa'i dge slong gis 'khor bar mi bya/ kha gsag mi bya/ tshul bcos par mi bya'o/ /de la 'khor ba gang zhe na/ gang gzhan dag la tshig 'di skad smra ba ste/ bdag gi bsod snyoms ni ngan pa'o/ /bdag gi bsod snyoms ni rtsub pa'o/ /bdag gis sngon 'di lta bu dang ma 'drangs par ma zos so/ /bdag gi bsod snyoms ni skye bo mang po dang thun mong du byas so/ /bdag gis nyung zhig zos te/ bdag ma 'drangs pas bdag gi lus nyam chung ngo zhes bya ba ste/ 'di ltar 'khor ba'i mtshan ma gang ci yang rung ba 'di lta bu 'di ni sems kyi tshul 'chos pa zhes bya ste/ dge slong bsod snyoms spyod pas de dag thams cad mi bya'o/ /gang lhung bzed du 'ongs pa ngan kyang rung / bzang yang rung / nyung yang rung / mang yang rung / gtsang yang rung / mi gtsang yang rung ste de bza' bar bya'o/ /yongs su gdung ba med pa dang / bsam pa yongs su dag pa dang / chos nges par sems pa mang ba dang / lus gso ba dang / 'phags pa'i lam nye bar brtan pa'i phyir des bsod snyoms bza' bar bya'o/ /'od srung gal te dge slong bsod snyoms spyod pas grong ngam/ grong khyer ram/ grong rdal du bsod snyoms bslangs te ma rnyed la/ ji ltar lhung bzed bkrus pa bzhin du phyir byung na/ des de bzhin gshegs pa yid la bya ste/ /de bzhin gshegs pa bsod nams kyi gzi 'arjid kyis brjid pa/ 'khor los sgyur ba'i rgyal 83.185b srid spangs nas rab tu byung la/ lha dang / klu dang / gnod sbyin dang / dri zas mchod pa/ mi dge ba'i chos thams cad spangs pa/ dge ba'i chos thams cad dang ldan pa nyon mongs pa thams cad dang bral ba de nyid grong du bsod snyoms kyi phyir gshegs na yang ji ltar lhung bzed bkrus pa bzhin du slar gshegs na/ bdag lta bu bsod nams chung ba dang / dge ba'i rtsa ba ma bskyed pa ji ltar lhung bzed bkrus pa bzhin du phyir byung bas ci'i phyir yi chad par bya/ de ci'i phyir zhe na/ dge ba'i rtsa ba ma bskyed pas kha zas bzang po dag mi rnyed pa'i phyir ro/ /gal te bdud kyi las sam/ bdud kyi byin gyi brlabs kyis bram ze dang khyim bdag de dag bdag la bsod snyoms mi ster na/ ci nas bdud bzhi las yang dag par 'das pa dang / nyon mongs pa thams cad dang bral bar 'gyur ba de ltar bya'o snyam du bsam mo/ /de ltar nga'i nan tan la gnas pa de la bdud dang bdud kyi ris kyi lha rnams kyis glags rnyed par mi 'gyur te/ 'od srung dge slong bsod snyoms spyod pas de ltar 'phags pa'i rigs rnams yongs su sbyang bar bya'o/ /bsod snyoms spyod pa'i le'u ste drug pa'o// // 'od srung de la dge slong phyag dar khrod pa pas ji lta bu'i sems kyis phyag dar khrod pa bsdu bar bya zhe na/ ngo tsha shes pa dang / khrel yod pas g.yog pa'i sems su bya'i/ chos gos kyis cha bar sbyor ba la brtson pa'i sems kyis ni ma yin no/ /rlung dang / nyi ma dang sbrang bu dang / sha sbrang dang / sdig sbrul gyis reg par 'gyur ba yongs su bskyab pa'i phyir yin gyi lus brgyan pa'i phyir ma yin no/ /de bzhin gshegs pa'i gsung rab la nan tan gyis gnas pas gos gtsang ma la mngon par dga' ba med de/ des phyag dar gyi phung po las phyag dar khrod pa blangs la 'du shes gnyis bskyed par bya ste/ gnyis gang zhe na/ chog shes pa'i 'du shes dang / mgu sla ba'i 'du shes so/ /gzhan yang 'du shes gnyis bskyed par bya ste/ 83.186a gnyis gang zhe na/ nga rgyal med pa'i 'du shes dang / 'phags pa'i rigs la gnas pa'i 'du shes so/ /gzhan yang 'du shes gnyis bskyed par bya ste/ gnyis gang zhe na/ lus brgyan pa dang / sems gtsang ba'o/ /'od srung gal te dge slong phyag dar khrod pa pas phyag dar gyi phung po las phyag dar khrod pa len pa na sa phyogs de na sngon gnyen bshes su gyur pa 'am/ sngon gtam 'dres pa 'am/ phebs par smra ba de dag gis mthong na bdag la smod par 'gyur gyis dogs te phyag dar khrod pa de ma blangs na/ 'od srung dge slong phyag dar khrod pa pa'i phyag dar khrod pa de lta bu ni yongs su dag pa ma yin no zhes ngas bshad do/ /de ci'i phyir zhe na/ dge slong phyag dar khrod pa pas rdo rje lta bu'i sems dang / rdo rje lta bu'i sems kyis dogs pa med par phyag dar khrod pa blang bar bya ba'i phyir ro/ /des phyag dar khrod pa de blangs nas legs par bkrus te shin du gtsang zhing dri ma med par byas la tshon btsal te kha legs par bsgyur la chos gos snam sbyar la glan par bya'o/ /de phyis 'jig par mi 'gyur bar legs par glan legs par sbyar/ legs par btsems te bgo bar bya'o/ /'od srung dge slong phyag dar khrod pa pas 'dod chags nye bar zhi bar bya ba'i phyir mi sdug pa yid la bya bas gnas la phyag dar khrod pa dag lus la bgo bar bya'o/ /zhe sdang nye bar zhi bar bya ba'i phyir byams pa'i sems kyis phyag dar khrod pa dag lus la bgo bar bya'o/ /gti mug nye bar zhi bar bya ba'i phyir rten cing 'brel bar 'byung ba la gnas te phyag dar khrod pa dag lus la bgo bar bya'o/ /nyon mongs pa thams cad spang ba'i phyir tshul bzhin yid la byed pa la zhugs pas phyag dar khrod pa dag lus la bgo bar bya'o/ /skye mched drug yongs su shes par bya ba'i phyir dbang po legs par bsdams te phyag dar khrod pa dag lus la bgo bar bya'o/ /lha dang klu dang gnod sbyin dag mgu bar bya ba'i phyir tshul 'chos pa med pa dang / 83.186b kha gsag med par phyag dar khrod pa dag lus la bgo bar bya'o/ /'od srung ci'i phyir phyag dar khrod pa zhes bya zhe na/ 'od srung dper na phyag dar de la ni su yang 'dod pa mi skyed/ su yang chags pa mi skyed cing yongs su mi len te phyag dar ni dor ba'i cha'o/ /'od srung de bzhin du phyag dar dang mtshungs par bdag gi med pa/ yongs su 'dzin pa med pa/ rnyed sla ba/ mod pa/ gzhan la gsol mi dgos pa/ gzhan gyi ngor blta mi dgos pa/ gzhan la rag ma lus pa/ phyag dar lta bur bor ba ste/ de'i phyir phyag dar khrod pa phyag dar khrod pa zhes bya'o/ /'di ni drang srong rnams kyi rigs so/ /'di ni 'phags pa rnams kyi rigs gtsang ma'o/ /'di ni 'phags pa'i rigs kyi gnas so/ /'di ni sbyangs pa'i yon tan rnams kyi rton pa'o/ /'di ni tshul khrims kyi phung po kun srung ba'o/ /'di ni ting 'dzin gyi phung po'i sgo'o/ /'di ni shes rab kyi phung po'i rten to/ /'di rnam par grol ba'i phung po 'byung ba'o/ /'di ni rnam par grol ba'i ye shes mthong ba'i phung po dang 'thun pa ste/ 'od srung de ltar phyag dar khrod pa ni yon tan mang ba/ skabs mang ba/ go skabs med pa/ bla gab med pa ste/ dri ma med par 'gyur zhing khur khyer bar 'gyur ba'o/ /'od srung dge slong phyag dar khrod pa pa gang phyag dar khrod pa'i gos kyis chog par 'dzin pa de la lha rnams kyang dga' bar 'gyur ro/ /'od srung 'di lta bu'i dus dang / 'di lta bu'i man yod de/ 'di ltar dge slong phyag dar khrod pa pa chos gos ngan pa 'chang ba/ bsam gtan gyi bde ba la snyoms par zhugs pa de la brgya byin dang / tshangs pa dang / 'jig rten skyong ba rnams kyang thal mo sbyor zhing rkang pa la gtugs te phyag 'tshal bar 'gyur na/ lha gzhan phyag 'tshal bar 'gyur ba lta ci smos/ 'od srung dge slong dag chos gos kyis cha ba la mngon par brtson gyi/ rnal 'byor la mi brtson pa lus kyi rgyan lhur len phyi rol gyi gtsang sbra spyod 83.187a pa/ nang 'dod chags dang / zhe sdang dang / gti mug gi dri mas yongs su gang ba dag ni gos bzang po ji tsam gyon yang 'od srung de dag lha rnams dga' ba'i gzugs ma yin no/ /de ci'i phyir zhe na/ lha rnams kyis lus cha bar sbyor ba la brtson pa de dag gi sems dang sems las byung ba rnams shes te/ shes nas kyang de dag rgyang bsrings te yongs su spong bar 'gyur ro/ /'od srung dge tshul skul byed mi gtsang bas 'bags pa'i phyag dar khrod pa thogs nas bsod snyoms blangs te mtsho ma dros par song ba dang / de der song ba'i tshe mtsho mchog de na gnas pa'i lha de dag gis rgyang ring po nas bsu ste rkang pa la mgo bos phyag 'tshal nas gtsang sbra spyod pa'i lha de dag gis mi gtsang bas 'bags pa'i phyag dar khrod pa de bdag nyid kyis bkrus te dri ma med par byas nas bkrus pa'i chu dri ma can des rang gi lus la skud de/ skul byed kyi tshul khrims kyi yon tan yang dag par blangs pa dang / snyoms par zhugs pa shes nas mtsho de'i lha rnams yan lag lngas phyag 'tshal lo/ /kun du rgyu rab tu bzang po zhes bya ba de gos gtsang ma bgos nas bsod snyoms blangs te mtsho ma dros par song ba dang / mtsho de na gnas pa'i lha de dag gis de mtsho mchog 'dir kha zas zos nas lhag ma bor na mtsho mchog mi gtsang bar byas su 'ong zhes rgyang grags gcig kho ra khor yug tsam gyi nang du 'dar ma ster ba la ltos/ 'od srung 'phags pa'i chos kyi yon tan sgrub pa'i khyad par dang skul byed kyi phyag dar khrod pa bkrus pa'i chu dri ma can lha dag rang gi lus la skud pa dang / kun du rgyu rab tu bzang po ni 'gror yang ma ster ba la ltos/ 'od srung de lta bas na dge slong phyag dar khrod pa pa yon tan gyi chos 'di lta bu 'di dag 'dod pa/ zhum zhum por ma gyur pa/ 'phags pa'i rigs la gnas pas mchod rten gyi 'du shes dang / ston pa'i 'du shes dang / bdag gi ba med cing yongs su 'dzin pa med 83.187b pa'i 'du shes kyis lus la phyag dar khrod pa dag bgo bar bya'o/ /'di ltar yang sems kyis lus dag par 'gyur gyi/ lus kyis sems dag par ni mi 'gyur ro/ /de bas na sems dag par 'gyur bar bya'i lus cha bas dag pa ni ma yin te/ sems dag pa ni bcom ldan 'das kyi bstan pa la tshangs par spyod pa zhes gsungs so snyam du sems nges par bsam par bya'o/ /'od srung de ltar na dge slong phyag dar khrod pa pas khyod dang nga'i rjes su bslab par bya'o/ /'od srung 'di lta bu'i dus dang / 'di lta bu'i man yod de/ 'od srung chos gos ngan pa gyon pa/ chos gos ngan ngon gyis chog par 'dzin pa khyod gang du chos gos snam sbyar khri'u 'am khri'i steng du bzhag ste/ khyod bla gos gyon nas 'chag sar 'chag pa'i tshe lha brgya stong phrag mang po dag der lhags nas 'di ni tshul khrims dang / ting nge 'dzin dang / shes rab kyis yongs su bsgos pa'i lus la bgo bgo ba'i chos gos so zhes khyod kyi chos gos snam sbyar de la phyag 'tshal bar 'gyur ro/ /'od srung ltos/ chos gos la yang phyag 'tshal bar 'gyur na lus la lta ci smos/ 'od srung ji ltar na dge slong nga'i rjes su slob pa dag de bzhin du sgrub par 'gyur snyam ste/ ngas 'khor los sgyur ba'i rgyal srid spangs nas rab tu byung ste/ ka shi pa phra mo dang / du gu la'i ras dang / ko tam pa'i ras dang / ngang ris can gyi chos gos rnams spangs nas 'phags pa'i rigs la dga' ba'i phyir sha na'i ras kyi gos rnams lus la bgos so/ /'od srung ngas khyod las dar gos ngan pa blangs te/ ngas khyod la sha na'i ras byin pa gang yin pa de thams cad kyang khyod nyid la snying brtse ba'i phyir yin gyi/ chags pa'i phyir ma yin/ lus brgyan pa'i phyir ma yin no/ /'od srung 'di la mi gti mug pa kha cig khyod dang nga'i rjes su mi slob cing brkam pa dang chags pa'i zil kyis non pa/ chos gos sogs par byed pa/ lhung bzed sogs par 83.188a byed pa/ 'jig rten gyi zang zing sogs par byed pa/ 'gron bu dang / gser dang / nor bu dang / 'bru sogs par byed pa/ ba lang dang / lug dang / bya gag dang / phag dang / bong bu dang / rta dang / thong gshol dang / shing rta 'dren pa dag nye bar 'jog par byed pa/ khyim pa'i las kyi mtha' spyod pa dag pas ni 'od srung khyim pa dag la khyad par du 'gyur ba yod kyi/ mi blun po rab tu byung ba'i mtshams las 'das pa de dag la ni khyad par du 'gyur ba gang yang myed do/ /'od srung khyim pa rnams khyad par du 'gyur ba ni dge sbyong ma yin la dge sbyong du khas 'che ba/ tshangs par spyod pa ma yin la tshangs par spyod par khas 'che ba/ gos ngur smrig bgos shing bya ba mang ba/ sbag pa sna tshogs kyis sbags pa/ zas dang gos lhur len pa de dag khyim pa dag gis ngur smrig gyon par rig nas rje sa dad gus pa bskyed pa dang / chos gos dang / bsod snyoms kyis sdud par byed pa dang / gus par smra zhing phyag 'tshal la ldang bar byed pa ste/ 'od srung 'di ni khyim pa de dag gi khyad par du 'gyur ba yin gyi/ de dag rab tu byung ba de dag la ni med pa'o/ /de ci'i phyir zhe na/ 'di ltar de dag ni yongs su len pa la brtson pa ma yin zhing ci yang mi sogs pa'i phyir ro/ /'od srung de'i tshe de'i dus na dge slong phal cher lhung bzed dang chos gos mang zhing snod spyad mang ba dang rnyed pa mang bar 'gyur te/ de dag la sti stang byed pa 'gyur/ btsun par byed par 'gyur/ ri mo byed cing mchod pa byed par 'gyur ro/ /de ci'i phyir zhe na/ 'di ltar de sbyin pa dang / phyir sbyin pa dus dus su byed cing bya ba ji lta ba bzhin du yongs su 'dzin pa'i phyir ro/ /dge slong gang dag tshul khrims dang ldan pa/ dge ba'i chos can/ zag pa rnams zad par byed pa la mngon par brtson pa dang / yid byung ba/ mgo dang / gos la me 'bar ba bzhin du brtson pa/ don nyung ba byed pa nyung ba/ rang gi don la brtson pa/ 'dris par byed pa yongs su 83.188b spangs pa dag 'byung ba de dag gi gan du ni de'i tshe de'i dus na su yang mi 'gro/ mi sten cing bsnyen bkur mi byed par 'gyur ro/ /de ci'i phyir zhe na/ 'di ltar khyim pa dag ni chags pa'i rang bzhin can tshe 'di lhur len gyi/ tshe rabs phyi ma lhur len pa ma yin pas de dag 'di snyam du dge slong de dag la ni bdag cag gi 'tsho ba med na bdag cag gis ci'i phyir ste/ ci'i phyir phyag bya/ ci'i phyir mchod/ ci'i phyir bsnyen bkur bya snyam du sems pa'i phyir ro/ /gzhan du na gang dag dge ba'i rtsa ba bskyed pa/ sngon gyi sbyor ba phun sum tshogs pa dag 'byung zhing tshul khrims dang ldan pa/ dge ba'i chos can de lta bu de dag la sten par byed/ snyen par byed cing bsnyen bkur byed pa ni ma gtogs te nyung ngo / /'od srung chos 'di lta bu/ tshul dang 'thun pa 'di lta bu 'di dag ni gang zag gnyis kyi yid du 'ong bar 'gyur te/ gnyis gang zhe na/ bden pa mthong zhing 'khor ba la 'jigs par lta ba dang / rnal 'byor spyod pa la brtson zhing 'bras bu thob par 'dod pa/ las kyi rnam par smin pa la rton pa/ chos don du gnyer zhing chos 'dod pa'o/ /'od srung mngon par mi brtson pa/ chos ma yin pa la lta ba/ las kyi rnam par smin pa dang 'gal ba/ 'jig rten pha rol tu kha na ma tho bas 'jigs par mi lta bas tshe 'di lhur len pa/ tshe rabs phyi ma lhur mi len pa thams cad kyi sgo ngas bshad par bya'o/ /'od srung gang dag tha na thar pa dang ldan pa'i sems gcig tsam yang mi skyed pa'i mi gti mug pa de dag la ni ngas 'di lta bu'i chos 'di skabs mi 'byed kyi steng du 'di lta bu'i chos 'di dag thos na bdag sgrub pa las nyams par rig nas smad par bya bar sems te/ 'di dag ni sangs rgyas kyis gsungs pa ma yin gyi/ 'di dag ni rang bzor sbyar ba 'am/ bdud kyis mtho brtsams nas byas pa'o zhes smra zhing de dag 'di ltar skye bo mang po dag log par 'dzin du 83.189a 'jug par 'gyur ro/ /de dag ni bdag kyang phung la gzhan dag kyang phung bar byed par 'gyur/ bdag kyang nyon mongs pa can du gyur la gzhan yang nyon mongs pa can du byed par 'gyur te/ de ltar mi gti mug pa de dag ni bdag la phan pa dang / gzhan la phan pa'i phyir zhugs pa ma yin no/ /de nas bcom ldan 'das la tshe dang ldan pa 'od srung chen pos 'di skad ces gsol to/ /bcom ldan 'das bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis dkon mchog brtsegs pa'i chos kyi rnam grangs 'dir nan tan snying por bgyid pa'i gang zag chos kyi dbang phyug rnams la sangs rgyas bcom ldan 'das rnams kyi thugs rje chen po gang lags pa de rgya cher yang dag par rab tu bshad lags so/ /bcom ldan 'das sems can gang dag chos kyi rnam grangs 'di thos nas mos shing de bzhin nyid du sgrub pa de dag ni sangs rgyas kyis yongs su bzung ba lags so/ /bcom ldan 'das kyis bka' stsal pa/ 'od srung de de bzhin no/ /de de bzhin te/ gang dag chos kyi rnam grangs 'di thos nas mos shing / de bzhin nyid du sgrub pa'i sems can de dag ni sangs rgyas kyis yongs su bzung ba yin no/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo khyod kyis rigs kyi bu dang / rigs kyi bu mo dge ba'i rtsa ba bskyed pa/ zhi ba 'dod pa grol bar 'dod pa de dag gi ched du chos kyi le'u 'di zung shig /khyim pa dang rab tu byung ba de dag kyang chos 'di la bslabs nas phung po thams cad rab tu spangs ba'i mya ngan las 'das pa thob par 'gyur ro/ /gsol pa bcom ldan 'das bdag gis chos kyi rnam grangs 'di bzung lags na/ bcom ldan 'das chos kyi rnam grangs 'di'i ming ci lags/ 'di ji ltar gzung bar 83.189b bgyi/ bcom ldan 'das kyis bka' stsal pa/ kun dga' bo de'i phyir chos kyi rnam grangs 'di chos thams cad yang dag par bsdus pa zhes bya bar zung shig /'phags pa'i rigs sbyangs pa'i yon tan gyi gnas dang / tshul khrims dang ldan pa yongs su 'dzin pa dang / tshul khrims 'chal ba spa 'gong ba dang / rin po che brtsegs pa dang / rin po che'i phung po dang / rin po che bsags pa dang / rin po che'i chos kyi sgo'i le'u zhes bya bar yang zung shig /bcom ldan 'das kyis de skad ces bka' stsal nas/ tshe dang ldan pa 'od srung chen po dang / tshe dang ldan pa kun dga' bo dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa dkon mchog brtsegs pa chen po'i chos kyi rnam grangs le'u stong phrag brgya pa las rin po che'i phung po'i le'u zhes bya ste bzhi bcu rtsa bzhi pa rdzogs so// //rgya gar gyi mkhan po su ren dra bo d+hi dang / zhu chen gyi lo ts+tsha ba ban de ye shes sdes bsgyur cing zhus te gtan pa phab pa/ / |