// @#/ /rgya gar skad du/ sUr+ya sU tra/ bod skad du/ nyi ma'i mdo/ 'phags pa dkon mchog gsum la gus pas phyag 'tshal lo/ /'di skad bdag gis thos pa dus gcig na/ bcom ldan 'das mnyan yod rgyal byed tshal mgon med zas sbyin gyi kun dga' ra ba na bzhugs so/ /de'i tshe lha'i bu nyi ma/[ ]lha ma yin gyi dbang po sgra gcan 'dzin gyis bzung ngo / /de nas lha'i bu nyi mas bcom ldan 'das rjes su dran pa yid la byas te/ de'i dus su tshigs su bcad pa 'di gsol to/ /sangs rgyas dpa' bo de la 'dud/ /thams cad myur du grol bar gyis/ /bdag 'di'i kha ru bcug pas na/ /bdag ni khyed la skyabs su mchi/ /de nas bcom ldan 'das kyis lha'i bu nyi ma'i ched du/ lha ma yin gyi dbang po sgra gcan 'dzin la tshigs su bcad pa bka' stsal pa/[ ]sangs rgyas 'jig rten la brtse bas/ /dgra bcom de bzhin gshegs pa la/ /nyi ma skyabs su song bas na/ /sgra gcan 'dzin gyis nyi ma thong / /gang zhig mun pa snang bas gsal bar byed/ /rnam snang drag po'i gzi brjid dkyil 'khor can/ /nam mkha'i nyi ma sgra gcan sgrib ma byed/ /nyi ma 'di ni sgra gcan gyis thong shig /de nas lha ma yin gyi dbang po sgra gcan 'dzin gyis lha'i bu nyi ma grol bar byas nas/ sngar gyi gzugs bzhin du gang su zhig gis lha ma yin gyi dbang po thags bzang ris kyi drung du song zhing song nas/[ ]sems mi dga' zhing yi mug pas ba spu langs par gyur te/ phyogs gcig tu 'dug go/ /phyogs gcig tu 'dug nas lha ma yin gyi dbang po sgra gcan 'dzin la/ lha ma yin gyi dbang po thags bzang ris kyis 39.283b tshigs su bcad pa smras pa/ ci phyir yid ni skrag par gyur/ /sgra gcan 'dzin gyis nyi ma thong / /gzugs kyi rnam 'gyur kun tu ngan/ /ci phyir 'jigs pas 'di ru lhags/ /des smras pa/ sangs rgyas tshigs bcad thos nas ni/ /bdag gis nyi ma ma btang na/ /mgo bo tshal pa bdun 'gas shing / /'tsho ba la ni bde ba med/ /nyi ma'i mdo rdzogs s+ho//[ ] |