(nga ) @#/ ! /gsang sngags rgyud 'bum gyi skor bzhugs so/ /[(黃) 秘密經第四部] 87.1b @##/ /rgya gar skad du/ shrI gu h+ya badzra tan+t+ra rA dza/ bod skad du/ dpal gsang ba rdo rje rgyud kyi rgyal po/ / dpal rdo rje mkha' 'gro la phyag 'tshal lo/ /dpal ldan 'khor lo sdom pa ru/ /gsang ba'i 'khor lo mi gsung ba/ /bdag gis zab mo'i don ma rtogs/ /de phyir khyed kyis bdag la gsungs/ /bcom ldan 'das kyis bka' stsal pa/ /nyon cig lha mo spyan gzangs ring / / gsang ba'i 'khor lo shin du zab/ /rgyud rnams kun du ma gsungs pa/ /khyod kyis ngor mdzad nga yis bshad/ /gsang ba rdo rje rgyud kyi rgyal po las gleng bslang ba'i le'u ste dang po'o// // lha mos gsol pa bcom ldan 'das/ /gsang ba zhes pa ji ltar lags/ /de yi 'khor lo ji ltar lags/ /de yi rdo rje ji ltar lags/ /de yi pad ma ji ltar lags/ /bcom ldan 'das kyis bka' stsal pa/ gsang ba zhes pa rnam pa bzhi/ /gsang ba'i pho brang dang po ste/ /de nas gsang ba'i dbang bskur phyir/ /gnyis pa rig pa'i pho brang ste/ /bzhi pa'i don ni rig 87.2a pa'i phyir/ /gsum pa rta mgrin 'khor lo ste/ /de yi mgrin par gnas pa'i phyir/ /bzhi pa gsang ba bde skyong ste/ /sdig pa spong phyir bde skyong yin/ /de rnams don ni gsang ba ste/ /brtul zhugs byed cing gtong phod che/ /e baM zab cing chags la dga'/ /khu ba 'dzag cing rak+ta 'bab/ /'di la ston gyis gzhan la gsang / /rdo rje pad ma zhes bya ba/ /bzhi po gnas pa'i rten yin te/ /dper na khang rten ka ba bzhin/ /rgyud kyi don ni rgyun yin no/ /gsang ba rdo rje'i rgyud kyi rgyal po las rtog pa sel ba'i le'u ste gnyis pa'o// // lha mos gsol pa bcom ldan 'das/ /re re'i dbye ba ma 'tshal bas/ /'jig rten kun rdzob nyid du ltung / /'khrig pa'i zug ngu mi bzad pas/ /bdag ni 'di nyid du ni 'gum/ /bcom ldan 'das kyis bka' stsal pa/ /gsang ba'i pho brang rim pa drug /'dab ma'i grangs ni gnyis 'gyur ro/ /rta mgrin grangs ni dgu ru shes/ /gsang ba bde skyong rim pa gnyis/ /brgyad dang lnga bcu'i grangs yin no/ /rig pa'i pho brang 'dab ma lnga/ /rigs ni me tog lta bu'o/ /b+ha ga rab 'bring gsum yin te/ /rnal 'byor mkhas pas btsal bar bya/ /sman dang snum gyi ri lu yis/ /rnal 'byor sor mo la bskus la/ /gzhang kha nas ni phye mas bdug /gsang ba nas kyang snum gyis bdug /de nas rnal 'byor pho 'am mos/ /rtsa de sor mos legs par btsal/ /ring thung tshad ni sor gnyis nas/ /sor brgyad par ni gar gnas pa/ /shes rab b+ha ga che chung dang / /de bzhin b+ha ga drang dro dang / /chu rnams che zhing bde ba chung / /de la rnal 'byor mkhas pa yis/ /b+ha ga che na bde ba chung / /b+ha ga che na chung ngu bya/ /chung na de bzhin bskyed par gsungs/ /grang na de bzhin bsro bar bya/ /chu rnams che na chung bar bya/ /'di 'dra'i b+ha ga gang la yod/ /bud med 'di la b+ha ga mnga'/ /de phyir bud med bcom ldan 'das/ /thabs kyi rdo rje phra sbom dang / /ring ba dang ni thung ba ste/ /shes rab ji bzhin thabs la'o/ /de yi gnas su gzung bar bya/ /gsang ba rdo rje rgyud kyi rgyal po las gsang 87.2b ba rtogs pa'i le'u ste gsum pa'o// // lha mos gsol pa bcom ldan 'das/ /e ba~M rnam pa'i dbus gang du/ /bde ba'i khyad par tshol ba la/ /'di las khyad par med dam ci/ /bcom ldan 'das kyis bka' stsal pa/ /shin du dben pa'i gnas btsal la/ /bza' ba bcud can sna tshogs dang / /btung ba zhim po mang po dang / /gur kum la sogs dri zhim dang / /shin du 'jam pa'i stan bting la/ /rnal 'byor ma yi gnas bcu ru/ /dri zhim thig le re re bya/ /rnal 'byor pha yi gnas lnga ru/ /de bzhin thig le lnga yang bya/ /de nas mkha' gsang byin gyis brlab/ /e las gru gsum gting ring bsam/ /de yi nang du pa~M las ni/ /pad ma 'dab ma brgyad du bsam/ /de yi dbus su 'khor lo bsam/ /'khor lo'i dbus su re mig dgong / /de nas thabs kyi rdo rje yang / /hU~M las rdo rje rtse lnga bsam/ /o~M las rdo rje mgo bor bsam/ /phaT las rdo rje bu ga bsam/ /de nas bde ba'i stan thog du/ /sbyor ba rnam pa gsum bya ste/ /yan lag thabs dang sbyor ba dngos/ /'khor lo nyi shu rtsa dgu la/ /chags pa skye ba'i dri yis byug /bde ba skye ba'i zas zos nas/ /bde ba'i stan la 'dug nas ni/ /thabs kyis gnas dgur 'o yang bya/ /shes rab kyis kyang gnas lngar bya/ /thabs kyis shes rab pad ma la/ /'o byas pad ma rgyas su gzhug /shes rab kyis kyang de bzhin no/ /chags pa skye ba'i rtags 'byung ste/ /de nas gcig gis gcig 'khyud nas/ /he ru ka dang phag mor bsam/ /shes rab rkang pa gnyis brkyang nas/ /thabs ni thabs ldan gyis bskyod nas/ /nang rtags phyi ru bstan pa'i phyir/ /shes rab ma la rtags gsum 'byung / /lus 'dar 'phar ba sku yi rtags/ /mi bzod skad 'don ngag gi rtags/ /shes pa brgyal ba thugs kyi rtags/ /'di ni gsang ba'i dkyil 'khor te/ /'di yis skra dkar gnyer ma spong / /nad kyi zug rngu thams cad 'joms/ /'di ni gsang ba'i bcud kyis len/ /phyi yi dkyil 'khor bsgoms pa min/ /gsang ba'i dkyil 'khor nyid la gnas/ /sbyin sreg la sogs bya ba min/ /gsang ba'i rdo rje rgyud 'di ni/ /kun gyis thos par mi 'gyur te/ /glegs bam sor ni 87.3a bcu gnyis bya/ /glegs bam gsang ba'i gnas su sba/ /yongs su smin pa'i rnal 'byor ma/ /'ga' yis mthong gi gzhan la sba/ /gsang ba ston pa'i bla ma ni/ /sangs rgyas nyid pas btsun pa yin/ /gzhan yang 'dod pa'i stan thog tu/ /gsungs pa'i sbyor thabs kun byas nas/ /lnga bcu nas bzung stong gi bar/ /rnal 'byor ma kun bde med kyang / /sbyor thabs mkhas pas bskyed byas nas/ /bcu gnyis ma dang bde ba mnyam/ /sbyor thabs mi shes rnal 'byor pas/ /rlung mkhris bad kan kun nas skye/ /shes rab kyis kyang thabs la ste/ /sbyor thabs mkhas pa'i shes rab ma/ /thabs kyis rtag tu bsten par bya/ /sbyor thabs mkhas pa'i rnal 'byor ba/ /rnal 'byor ma yi gsang la brten/ /gsang la bsten pa ji ltar lags/ /bcom ldan 'das kyis bka' stsal pa/ /ming sring tshul lam rje 'bangs tshul/ /pha spad tshul lam mkhan slob tshul/ /gzhan gyi mi rig ngo tsha bsrung / /dben pa'i gnas su sbyor ba bya/ /gal te ma bsten dam tshig nyams/ /tshe 'di nyid la dmyal bar ltung / /lha mos gsol pa bcom ldan 'das/ /thabs med rnal 'byor ji ltar lags/ /bde ba khyad med ji ltar lags/ /phyag rgya ma bsten ji ltar lags/ /bcom ldan 'das kyis bka' stsal pa/ /bde ba la gnas gsang ba'i don/ /khyod kyis ngor mdzad nga yis bshad/ /sbyor thabs mi shes rnal 'byor dang / /stan yang gcig la mi 'dug ste/ /'dod chags bsam pa yang mi bya/ /gal te de 'dra rten gyur na/ /'jig rten phal ba'i 'dod chags te/ /shi nas mnar med dmyal bar skye/ /'dod chags spyod pa shal ma ri/ /lcags kyi sor ni bcu drug pa/ /yar la 'dzeg cing mar la 'bab/ /thabs med rnal 'byor 'dra ba 'bod/ /de phyir sbyor thabs mkhas pas bsten/ /sbyor thabs las ni bde ba skye/ /de phyir bde ba khyad par 'phags/ /bde ba khyad med lus zungs nyams/ /rlung khris bad kan kun nas skye/ /las kyi phyag brgya rtag tu bsten/ /phyag brgya ma bsten dam tshig nyams/ /phyag brgya bsten pa'i dus su yang / /rnal 'byor ming sring brda yis mtshon/ /gang zhig mdzub mo ston pa na/ / 87.3b 'ongs sam zhes ni 'dri ba yin/ /sor mo gnyis ni ston pa dang / /mthe bo drang por ston pa dang / /de bzhin srin lag drang por ston/ /rdo rje bo la zhes bya ste/ /pad ma kak+ko la zhes bya/ /de ltar ma byas dam tshig nyams/ /brda yi bye brag ma lus pa/ /sam bu Ta ru shes par bya/ /lha mos gsol pa bcom ldan 'das/ /rdo rje pad ma dga' ba'i gnas/ /de ru gzung ba ji ltar lags/ /bcom ldan 'das kyis bka' stsal pa/ /de ru gzung ba rnam pa gnyis/ /rab kyi dbugs dang shes pas gzung / /dang po btsan thabs sbyor bas gzung / /sbyor ba rnam pa bcu ru gzung / /gcig ni sbom po khro mos gzung / /gzung ba'i rten ni rnam pa bzhi/ /man ngag can gyis shes par bya/ /gal te de ru ma zin na/ /'khor bar ltung bas rang gis su/ /ting nge 'dzin gyi ha~M la bsdu/ /lce yis byang chub sems blangs la/ /ro ma'i 'khor lo ru ni bstim/ /de ltar ma byas dam tshig nyams/ /lha mos gsol pa bcom ldan 'das/ /shes rab bskyod thabs 'ba' zhig gam/ /thabs kyi bskyod pa 'ba' zhig gam/ /rnal 'byor pha dang rnal 'byor ma/ /bde ba khyad par med dam ci/ /bde ba'i ngo bo ji ltar lags/ /bcom ldan 'das kyis bka' stsal pa/ /bskyod pa bud med kyis kyang bskyod/ /sbyor thabs kyang ni thabs kyis bya/ /de las bde ba khyad par 'phags/ /dper na dar dang snal ma bzhin/ /thabs kyis snal ma'i cha tsam myong / /shes rab dar gyi sham bu tsam/ /de phyir rnal 'byor ma'i rgyud/ /rnal 'byor ma yi 'grub par gsungs/ /rgyud kyi nang na mchog yin pas/ /rab gnas sbyin sreg dbang bskur dang / /mchod dang bzlas dang gtor ma dang / /khrus dang bsrung ba la sogs pa/ /gsang ba 'di las gzhan na med/ /'bras bu'i nang na 'di mchog ste/ /ye shes lnga yi spros dang bral/ /de nas lha mos 'khor dpag tu med pa dang / mkha' 'gro ma rnams 'dod chags kyi the tshom yongs su zad nas/ bcom ldan 'das la kun gyis 'khyud nas gsang ba'i mchod pas bde ba chen po'i ros gang bar mchod nas mi snang bar gyur to/ /gsang ba'i yang gsang ba gsang ba rdo rje'i rgyud kyi rgyal po 87.4a 'khor lo sdom pa'i rtog pa rgyu dang 'bras bu'i de kho na bstan pa'i le'u ste bzhi pa'o/ /gsang ba rdo rje'i rgyud kyi rgyal po zhes bya ba rdzogs s+ho// // paN+Di ta rat+na badzra dang / lots+tsha ba dge slong shAkya ye shes kyis bsgyur te gtan la phab pa'o/ / |