/ rgya gar skad du/ shrI ma hA kha tan+t+ra rA dza/ bod skad du/ dpal nam mkha' chen po'i rgyud kyi rgyal po/ dpal bde ba chen po la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyi sku dang gsung dang thugs rdo rje btsun mo'i b+ha ga la bzhugs so/ /gzhan yang dpa' bo dang mkha' 'gro ma grangs med pa dang thabs gcig tu bzhugs so/ /de rnams kyi nang nas byang chub sems dpa' chen po rdo rje snying pos/ bcom ldan 'das la g.yas phyogs nas bskor ba lan gsum byas te/ phyi nang gsang ba'i mchod pas mchod nas 'di skad ces gsol pa/ kye ho bcom ldan 'jigs pa che/ /bcom pa gang lags ldan pa gang / /'jigs pa gang lags chen po gang / /bdag la khyod kyis bshad du gsol/ /bcom ldan 'das kyis bka' stsal pa/ /bcom pa bdud bzhi bcom pa ste/ /re re la yang bzhi bzhi ste/ /bcu drug grangs su shes par bya/ /ldan pa de yi gnyen po ste/ /dang po bum dbang bdud bzhi yang / /kha dog dbyibs la log rtog gis/ /bskyed pa'i gzung 'dzin du ma dag /phung po'i bdud du rab tu grags/ /'dod chags zhe sdang la sogs pa/ /nyon mongs pa yi bdud yin no/ /yang dag lam ston bla ma med/ /zhe sdang ru drar skye ba yi/ /rgyu dang lam ston grogs ngan dag /lha yi bu yi bdud yin te/ /las dang nyon mongs pa yi rgyus/ /srog 'chad pa ni 87.18b 'chi bdag bdud/ /bskyed pa'i rim la legs gnas nas/ /lha yi bu yi bdud kyang bcom/ /log rtog du ma'i rtog pa 'gag /des na phung po'i bdud bcom mo/ /rten dang brten pa ro mnyam pas/ /nyon mongs pa yi bdud bcom mo/ /dus min 'chi dang tshe zad pas/ /'di dag 'chi bdag bdud yin te/ /tshe lo stong sogs thub pa yi/ /tshe yi 'chi bdag bdud bcom mo/ /gzhan yang bdud 'joms bye brag ni/ /phyi yi tshe yi bcud kyis len/ /grub na 'chi bdag bdud 'joms so/ /de bzhin lus kyi phung po ste/ /longs spyod kyis ni nyon mongs 'joms/ /sems kyis lha yi bdud bcom ste/ /rten dang brten ni sgyu mar ldan/ /de nas gsang dbang bdud bzhi yang / /phyag mtshan khro tshul gar la sogs/ /phyi ru du ma phung po'i bdud/ /rags pas yid ni nyon mongs pas/ /nyon mongs pa yi bdud yin no/ /dman pa'i lam gang ston pa yi/ /bla ma lha yi bu yi bdud/ /phyi yi tshe yi bcud kyis len/ /de nyid 'chi bdag bdud yin no/ /gzhan yang bdud kyi bye brag ni/ /sgo gsum 'khrul par gang ston pa/ /bla ma lha yi bu yi bdud/ /sgo gsum las ni du ma'i cha/ /de nyid ma shes phung po'i bdud/ /de nyid 'bad de bsgrub byas kyang / /'bras bu mi 'byung sems nyon mongs/ /nyon mongs pa yi bdud yin te/ /rlung sogs gnas pa'i tshul shes pas/ /lha yi bu yi bdud bcom mo/ /de nyid sgyu mar shes par bya/ /de nyid shes pas phung po dang / /nyon mongs pa yi bdud bcom mo/ /dngos po'i mthar lhung skye bas 'chi/ /rgyu med las skye 'chi ba ste/ /rgyu rkyen ma bskyed rang bzhin gnas/ /sgyu mas 'chi bdag bdud bcom mo/ /tshe la dbang sgyur ma lta bu/ /gnyen po'i stobs dang ldan pa'o/ /shes rab ye shes bdud bzhi yang / /rtsa dang shu kra la sogs pa'i/ /dman pa'i lam ston lha yi bdud/ /de nyid du ma phung po'i bdud/ /de sgom rang bzhin nyon mongs pas/ /nyon mongs pa yi bdud yin no/ /kha dog dbyibs ni skyes pas 'jig / 87.19a de nyid 'chi bdag bdud yin no/ /gzhan yang bdud kyi bye brag kyang / /'dod chags chen po'i lam ston pa'i/ /bla ma lha yi bu yi bdud/ /dga' ba bzhi ni du ma ste/ /rgyud la spungs pas phung po'i bdud/ /rang sems nyon mongs nyon mongs bdud/ /'khor bar ltung bas skye ba ste/ /skye ba las byung 'chi bdag bdud/ /rnam par rtog pa skye bas so/ /'dod chags kyis ni 'chi bdag bdud/ /ma spangs sum bcu drug gnyis dang / /nges pa sum bcu rtsa drug gi/ /lam bsten bla mas lha bdud bcom/ /dga' bzhi sgyu ma rang bzhin med/ /bde chen ror 'gyur phung po bcom/ /'bras bu rang rig ye shes sbyin/ /rang sems nyon mongs sdug bsngal bral/ /nyon mongs pa yi bdud bcom mo/ /de yis 'chi ba dang bral bas/ /de nyid 'chi bdag bdud bcom mo/ /'og gi lam gyi bdud bzhi yi/ /dman pa'i stobs kyis zin pa ste/ /rgyal po dmangs su babs pa bzhin/ /de nyid lam gyi bdud kyis zin/ /rgyal po rgyal sa shor ba bzhin/ /bzhi pa dang 'brel bdud bzhi ni/ /gsum pa'i snod dang ldan pa la/ /bzhi pa'i lam ston bla ma ni/ /lha yi bu yi bdud yin te/ /bdud gsum bla ma'i zhal nas shes/ /snod min gsang ba sgrogs pa dang / /mar dang kha ra la sogs pa/ /'thungs te ma zhu dug 'gyur bzhin/ /khyad par bdud kyis zin pa ste/ /rigs ngan rgyal sa 'dzin pa 'dra/ /dbang dang gdams ngag 'brel bcas pa'i/ /bdud 'joms lam gyi stobs dang ldan/ /ye shes lnga 'am yon tan drug /ldan pa dag tu rab tu grags/ /bla ma gcig la snod bcud gnyis/ /thob na de nyid dam pa ste/ /bla ma gcig la dbang thob nas/ /bla ma gcig la mnyan par bya/ /bla ma rnam pa gnyis su gsungs/ /phyi yi bla ma de nyid de/ /nang gi bla ma bdag po'i lha/ /bdud dang dgra yi sde rnams kun/ /thams cad 'jigs shing skrag byed pas/ /'jigs pa zhes ni gsungs pa ste/ /dgra dang bdud kyi g.yul las rgyal/ /dmigs pa lha sogs bdun dang ldan/ /de phyir chen po zhes ni gsungs/ / 87.19b de'i tshe 'khor 'dus pa de dag dang / byang chub sems dpa' chen po rdo rje snying po dang / thams cad rgyud la dga' zhing mgu nas rjes su yi rang bar gyur to/ /dpal nam mkha' chen po'i rgyud kyi rgyal po rdzogs s+ho// //rgya gar gyi mkhan po gA ya d+ha ra dang / lots+tsha ba dge slong shAkya ye shes kyis bsgyur ba'o/ |