@#/ /rgya gar skad du/ ma hA ma~M ga la sU tra/ bod skad du/ bkra shis chen po'i mdo/ 'phags pa dkon mchog gsum la gus pas phyag 'tshal lo/[ ]/'di skad bdag gis thos pa dus gcig na/ bcom ldan 'das mnyan yod na rgyal byed tshal mgon med zas sbyin gyi kun dga' ra ba na bzhugs so/ /de nas lha du ma rnams mtshan mo kha dog sna tshogs pa dang ldan pa'i 'od rnams kyis dus gcig la rgyal byed tshal 'od kyis snang bar byas nas/ bcom ldan 'das gang du bzhugs pa der lhags te lhags nas/ bcom ldan 'das la phyag byas nas phyogs gcig tu 'khod de/ phyogs gcig tu 'khod nas/ lha de rnams kyis bcom ldan 'das la tshigs su bcad pa mang du zhus so/ /lha dang mi rnams mang po yis/ /bkra shis pas ni bsam gyur pa/ /bkra shis pa la the tshom skyes/ /bkra shis mchog ni gsung du gsol/ /lha'i yang lha yis bka' stsal pa/ /sdig pa thams cad rnam par 'joms/ /'jig rten kun la phan pa'i don/ /bkra shis de rnams khyed la bshad/ /byis pa rnams la bsnyen mi bya/ /mkhas pa rnams la bsnyen par bya/ /mchod la mchod pa'i lan bya ba/ /'di ni mchog gi bkra shis so/ /sngar byas pa yi bsod nams kyis/ /'thun pa'i yul du gnas pa dang / /bdag nyid mchog gi smon lam bya/ /'di ni mchog gi bkra shis so/ /bden dang lag pa'i bzo 39.284b dang ni/ /'dul ba'i sbyor bas legs par bslab/ /gang gis legs par bshad pa'i tshig /'di ni mchog gi bkra shis so/ /pha dang ma la bsnyen bkur bya/ /bu dang chung ma rjes su bzung / /mi mthun pa yi las mi bya/ /'di ni mchog gi bkra shis so/ /sbyin pa chos kyi spyod pa dang / /gnyen 'dun rnams ni rjes su gzung / /kha na ma tho'i las mi byed/ /'di ni mchog gi bkra shis so/ /sdig la dga' ba spang bar bya/ /chang gi btung ba rnam par spang / /gang zhig chos la bag yod pa/ /'di ni mchog gi bkra shis so/ /glo bur bla ma gus par bya/ /byas pa shes shing gus par bya/ /dus su chos ni mnyan par bya/ /'di ni mchog gi bkra shis so/ /tshig ngan pa ni bzod par bya/ /dge sbyong rnams ni mthong bar bya/ /dus su chos kyi 'brel gtam bya/ /'di ni mchog gi bkra shis so/ /dka' thub dang ni tshangs spyod bya/ /'phags pa'i bden pa mthong bar bya/ /mya ngan 'das pa mngon sum bya/ /'di ni mchog gi bkra shis so/ /'jig rten chos la dris pa na/ /gang zhig sems ni g.yo mi bya/ /mya ngan mi dga' med bzod bya/ /'di ni mchog gi bkra shis so/ /de ltar bshad par byas pa rnams/ /thams cad du ni rgyal ba dang / /thams cad du ni zhi bar 'gro/ /de rnams de la mchog bkra shis/ /bcom ldan 'das kyis de skad ces bka' stsal nas/ lha de rnams bcom ldan 'das kyis gsungs pa la mngon par bstod do// // bkra shis chen po'i mdo rdzogs s+ho//[ ]//'di yi bsod nams las kyis ni/ /sangs rgyas ma thob bar du bdag /sman chen po yi shes rab dang / /'od gtso phyug po'i longs spyod dang / /thams cad sgrol gyi sbyin pa dang / /skye ba skye bar bdag la gyur/ /'phags pa chos kyi 'khor lo bskor ba'i mdo/ skyes pa rabs kyi gleng gzhi'i bshad pa/ lcang lo can gyi pho brang gi mdo/ 'dus pa chen po'i mdo/ byams pa'i mdo/ byams pa bsgom pa'i mdo/ 39.285a tshul khrims lnga'i phan yon bstan pa'i mdo/ tshe dang ldan pa ri'i kun dga' bo'i mdo/ klu'i rgyal po dga' bo dang nyer dga' 'dul ba'i mdo/ gnas brtan 'od srung chen po'i mdo/ nyi ma'i mdo/ zla ba'i mdo/ bkra shis chen po'i mdo zhes bya ba ste/ de ltar mdo bcu gsum po 'di rnams ni 'dzam bu'i gling gi dbus/ 'phags pa'i yul/ byang chub kyi snying po rdo rje'i gdan las dpag tshad brgya tsam byang shar du bgrod pa'i bod yul/[ ]gangs ri'i khrod/ rtsang nyang ro tshong 'dus 'gur mo'i sa cha/ 'phags pa rang byung 'jig rten dbang phyug gi gtsug lag khang gi bdag po/ sangs rgyas bcom ldan 'das kyi bstan pa la lhag par mos shing / dpal 'byor dang chab srid du ma la dbang phyug dam pa'i go 'phang thob pa'i zhal bu pa sku zhang grags pa rgyal mtshan du dben sha'i bka' lung gis/ byang chub kyi snying po rdo rje'i gdan las lho phyogs su dpag tshad drug brgya tsam bgrod pa'i gnas/ sing ga gling pa bram ze'i rigs las legs par rab tu byung zhing bsnyen par rdzogs pa sde snod gsum la thugs legs par byang ba'i paN+Di ta A nan+da shrI'i zhal snga nas/ mang du thos pa'i lo cA ba shAkya'i dge slong nyi ma rgyal mtshan dpal bzang pos/ skad gnyis smra ba rnams kyi gdan sa gtsug lag khang chen po dpal thar pa gling du bsgyur cing zhus te/ gtan la phab pa'o// // # |