/rgya gar skad du/ shrI ma hA bA la tan+t+ra rA dza na ma/ bod skad du/ dpal stobs po che'i rgyud kyi rgyal po zhes bya ba/ dpal sdom pa'i sny-ing po la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyis byin gyis brlabs pa'i byang chub sems dpa' rdo rje snying po la sogs pa dpa' bo'-i tshogs dang / lA ma la sogs pa mkha' 'gro ma'i tshogs dang / rnal 'byor ma dang / ma mo'i tshogs kyis bskor nas btsun mo'-i b+ha ga la snyoms par bzhugs so/ /'jig rten na ni cher grags pa/ /dgra ni chen po drug yin te/ /ji ltar nyi ma nub pa'i tshe/ /grong khyer gyi ni mi rnams kyi/ / 87.33b rta dang glang po la sogs pa/ /rdzas rnams yongs su 'phrog par byed/ /thams cad dbul por skye bar 'gyur/ /de bzhin yul drug gi ni dgras/ /shes rab nyi ma nub pa'i tshe/ /ma rig pa yi mun pa la/ /so so skye bo thams cad kyi/ /ye shes lnga la sogs pa yi/ /rdzas rnams yongs su 'phrog par byed/ /bde ba med pa'i gnas su skye/ /dgra de yongs su gzhom pa'i phyin/ /mchod pa med cing bzlas pa med/ /gtor ma sbyin sreg dkyil 'khor med/ /klog dang sgom pa bsam gtan med/ /g.yeng ba'i tshes dang skar ma'i tshogs/ /thams cad spangs te bde ba yi/ /bstan la bdag nyid legs 'dug ste/ /shes rab ye shes bsrub par bya/ /sh-ing rta yi ni 'khor lo ltar/ /yul la yang dag rgyug pa'i sems/ /de dag las ni bzlog nasu/ /las kyi rlung ni chen po g.yos/ /ye shes me ni chen po 'bar/ /rnam rtog sreg ste bdud rtsi'i ros/ /til gyi 'bru bzhin gang ba ste/ /skye ba med pa'i gnas su gzung / /de nas sems ni brtan gyur nas/ /mtshan mar snang ba 'gag par 'gyur/ /de nyid las ni bzlog nas su/ /rang sems stong par bsgom par bya/ /chos la bdag med rtogs pa na/ /de tshe sems ni rtogs par 'gyur/ /thams cad stong par ros gang ste/ /bde ba chen po'i sku zhes brjod do/ /shes rab pha rol phyin pa ste/ /'di la bsal ba ci yang med/ /bstan par bya ba ci yang med/ /de nyid mthong bas rnam par grol/ /rigs gcig dang ni r-igs gsum dang / /rigs lnga rigs n-i brgya la sogs/ /de nyid 'di la tha dad med/ /ji ltar glang po rnyed gyur nas/ /glang po'i rjes ni mi btsal ltar/ /sems kyi de nyid rnyed gyur na/ /rnam rtog gang yang mi btsal lo/ /ji ltar dug ni 'dod pa la/ /sman nyid dug tu sbyar te byin/ /sman las dug 'byung sbyor ba yang / /sman pa mkhas pas 87.34a sbyor ba shes/ /gzhan yang mar dang kha ra dang / /mar gyi snying po la sogs pa/ /'thungs te zhu na sman du 'gyur/ /de bzhin nga yis gsungs pa yang / /drang ba'i don dang nges pa'i don/ /sgra ni ji bzhin ji bzhin min/ /dgongs pa dang ni dgongs pa min/ /bsregs bcad bdar ba'i gser bzhin du/ /yongs su brtags nas nga yis bka'/ /blang bar bya yi mos pa 'am/ /gzhan gyis mkhas pa 'jug mi bya/ /ji ltar skye bo blun po ste/ /dgra ru gyur pa'i skye bo yis/ /sman yin byas te dug byin na/ /sman du dmigs te dug zos na/ /zos pa'i rjes la 'chi bar 'gyur/ /thabs rnams thams cad sgyu ma shes/ /shes rab brjod du med par gsungs/ /ji ltar rig pa mkhas pa yis/ /dug ni dug gis 'byin par byed/ /ji ltar me yi tshig pa la/ /de bzhin me yis gdung bar bya/ /ji ltar 'dod chags che ba la/ /'dod chags nyid kyis spang bar bya/ /ji ltar zhe sdang che ba la/ /zhe sdang nyid kyis spang bar bya/ /de bzhin gti mug che ba la/ /gti mug nyid kyis spang bar bya/ /dper na rlung ni mar me 'jig pa'i rgyu/ /de nyid nags sreg me yi grogasu 'gyur/ /de bzhin 'dod la brten pa bde ba'i yul/ /dug gis dgra rnams bcom nas gnyis med thob/ /ri lu mig sman la sogs 'di las byung / /las thams ji ltar pha rol thabs ldan pas/ /gzings la brten nas pha rol 'gro/ /pha rol phyin nas 'dor bar byed/ /de bzhin rang rig tshol bas kyang / /bud med sgyu ma la brten te/ /rang rig ye shes thob par bya/ /rang rig ye shes thob pa dang / /bud med sgyu ma dor bar bya/ /zab mo'i dgongs pa ma rtogs par/ /zab mo'i spyod pa spyod par byed/ /sems can dmyal ba chen por ltung / /ji ltar ri yi rtse mo nas/ /skyes bu 'ga' zhig lhung 'gyur na/ /de ni lhung ba chen por 'gyur/ /gzhan yang dar gyi srin bu yis/ / 87.34b rang la rang gis 'ching bar byed/ /mtshan mo me yi srin bu yang / /rang gis rang ni sreg par byed/ /sgyu ma tsam gyi tshul gnas shing / /mtha' bzhi las ni rnam par grol/ /spros pa thams cad nye bar zhi/ /mtshon bya mtshon byed ma yin te/ /lta ba'i dbus na gnas pa yi/ /shes rab pha rol phyin pa'o/ /dpal stobs po che'i rgyud las mngon par rtogs pa'i le'u ste dang po'o// // gang zhig brtag par byed pa yang / /gnas ni shin du bsngags pa ru/ /khru do pa yi maN+Dal la/ /dang po ba yi rnam lnga yis/ /sor gcig tsam du byug par bya/ /de nas dri chen dri chu yis/ /byugs te me tog sngon po dgram/ /rgyan la sogs pas mdzes par brgyan/ /bum pa lnga ni phyogs dang dbus/ /de nas bzlas pa khri 'am 'bum/ /bdud rtsi chu ru byin brlabs te/ /gang zhig brtag pa'i mi de la/ /dang po mtshams gcad khrus byas te/ /rlog pa nag po phyir bzlog gon/ /skra ni gyen bcings sha bcings dang / /ber ka thogs te shar sgor gzhag /tshil chen me mar shar du gtam/ /nub tu me long dngul la sogs/ /dag pa de la sman lnga dang / /dri lngas byug ste bkru bar bya/ /de nas me long nang du yang / /gdon gyi mtshan ma brtag bya ste/ /gtso bo'-i sngags kyi mtha' ru ni/ /gdon gyi ming dang sngags btags na/ /lha yi gdon la sogs pa kun/ /mtshan mar 'byung ba the tsom med/ /mi de rgyan ni tha dad de/ /lha la sogs mthong bye brag go/ /dus ni 'byung po'i nyi ma sogs/ /mtshan ma sna tshogs byung ba'i tshe/ /de tshe gdon ni dbang du bsdu/ /tshe dang bsod nams longs spyod dang / /mdza' bshes zug rngu la sogs pa/ /gdon la sogs pa bsal ba'i phyir/ /dpal ldan mkha' 'gro ma la sogs/ /brtag pa'i rdzas kyi bye brag kyang / /mchod dang tshogs kyi 'khor lo sogs/ /bskor la mtshan ma brtag par bya/ /dbang bskur dus su ye shes kyang / /dbab pa de bzhin sdig la 87.35a sogs/ /mtshan ma me long dag la ni/ /brtags te gzhan yang ci 'dod pa'i/ /mtshan ma brtag la bla ma yi/ /zhal nas yang dag shes par bya/ /nad kyi zug rngu dbyung ba'i phyir/ /gso ba'i rig pa las gsungs pa'i/ /rlung dang bad kan mkhris pa dang / /'dus pa dang ni yan lag bcas/ /gnas bzhir 'khor lor gnas pa ste/ /lus kun khrus byas gnas bzhi ru/ /sngags pas lag pas mnye bya ste/ /me long dkyil du brtag byas na/ /rlung la sogs pa shes par nges/ /de rjes 'khor lo de nyid la/ /gso ba'i sbyor ba shes par bya/ /dug ni brtag pa'i rim pa yang / /nad grol yan lag thams cad la/ /gang du dug zhugs mtshan ma brtag /de nas gso ba'i sbyor ba yang / /sman dang sngags dang chu sbyar te/ /mkhas pas brtags nas gso bar bya/ /dpal stobs po che'i rgyud las mtshan ma thams cad brtag pa'i le'u ste gnyis pa'o// // gang zhig bsrung ba'i rten de yang / /gang dang ldan pa'i rim pa yis/ /bsrung ba'i 'khor lo brtsam par bya/ /gtso bo'i bzlas pa khri 'am 'bum/ /bsnyen pa byas te de nas yang / /gser ram dngul las bzo byas te/ /nang du dkyil 'khor rdzogs pa 'am/ /yang na 'dab brgyad lte bar bcas/ /rdo rje ra ba la sogs bya/ /yungs kar la sogs 'bru lnga dang / /rin chen lnga dang sman lnga dang / /de nang gzhag ste rab gnas bya/ /yongs su rdzogs nas bcing bar bya/ /gzhan yang gro ga'am shing shun nam/ /dur khrod dag gi ro ras la/ /bsang dang bgegs bskrad tshul bzhin bya/ /bzlas pa gong dang 'dra ba ste/ /dkyil 'khor yongs su rdzogs gyur na/ /sngags kyang yongs su rdzogs par bri/ /sku gsung thugs kyi 'khor lo yis/ /lus ngag yid la bsrung bar bya/ /yongs su ma rdzogs zur drug la/ /dpa' bo drug gi sngags bris te/ /bsrung ba'i 87.35b lus la mtshan par bsgom/ /rtsibs mtshan drug la g.yung drung gi/ /yi ge drug ni bris pa ste/ /bsrung bya'i lus la mtshan par bsgom/ /dbus su yi ge k+Sha bris te/ /bar chad thams cad bsal bar bsam/ /cho ga yongs su rdzogs bya ste/ /bzo byas snod ni kha dog sgyur/ /legs par sbas te spyi bo 'am/ /mgrin pa de bzhin dpung pa yi/ /tshangs pa'i bu ga longs spyod mnyam/ /sor bzhi dag tu bcing bar bya/ /gzhan yang nad pa'am rnal 'byor pa/ /ngag la srung na dang por yang / /gdon bsal bsangs te gnas gsum du/ /thig le gsum byas sngags gsum dgod/ /gzhan yang gnas ni sum bcu bdun/ /thig le byas te sngags rnams dgod/ /de nas go cha mtshan ma yang / /tshul bzhin mthun par shes par bya/ /de nas stan nam mal cha la/ /o~M AHbadzra rak+Sha rak+Sha hU~M phaT/ /sgo 'am gzhan la'ang bri bar bya/ /gzhan yang lag pa g.yas pa yis/ /mthil du gur kum dag sbyar te/ /g.yon gyi sbom mo khro mo yis/ /spyi bo dpral ba rna ba mig /sna dang kha dang mgrin pa dang / /dpung pa snying ga lte ba dang / /'og gi snod gnyis yan lag la/ /sngags dang bcas mas legs par 'tsho/ /gzhan yang skud pa sna lnga la/ /sngags dang bcas na bsrung bar 'gyur/ /dpal stobs po che'i rgyud las bsrung ba'i 'khor lo'i le'u ste gsum pa'o// // mgon po thugs rje che ldan pa/ /de nyid la ni phyag 'tshal te/ /rdo rje snying pos yang zhus pa/ /bsrung ba'i 'khor lo de ltar na/ /ye shes bye brag ji ltar lags/ /bcom ldan 'das kyis bka' stsal pa/ /ye shes kyis ni de nyid kyi/ /rtog pa rab tu bshad par bya/ /de la ye shes kyi ni gnas/ /rnam pa lnga ru shes bya ste/ /phyi dang nang dang bsang ba dang / /rab tu gsang dang gsang ba che/ /nga yis bshad kyis legs par nyon/ /de la phyi yi ye shes ni/ /sku mdog 87.36a phyag mtshan dang 'brel ba'o/ /de ltar rtogs pa phyi'i ye shes/ /nang gi phung sogs lha ru rtogs/ /de nyid dang bral ye shes so/ /de nas gsang ba'i ye shes ni/ /rtsa dang rlung dang thig ler rtogs/ /rtog pa de dang bral ba ni/ /gsang ba'i ye shes yin par bshad/ /dga' ba mchog dang bral ba'i dga'/ /lhan cig skyes dga' gang yin pa/ /bde bar rtog pa rnam rtog ste/ /de spong rab gsang ye shes so/ /de nas ye shes chen po bzhi/ /dang po ro mnyam mtha' spangs pa'i/ /ye shes de nyid yod pa la/ /rnam rtog spong ste de bzhin 'jog /de nyid rang rig chen po ste/ /de nyid ye shes chen po'o/ /de ltar shes na rdor 'dzin gyi/ /sa ni nges par thob pa'o/ /dpal stobs po che'i rgyud las ye shes brtag pa'i le'u ste bzhi pa'o// // de nas ye shes chen po'i/ /rtag pa de nyid bshad par bya/ /dang por ro mnyam gyur pa'o/ /stong pa nyid kyi ro mnyam la/ /sku mdog phyag mtshan la sogs pa/ /phung po khams dang skye mched sogs/ /rtsa dang rlung dang thig le dang / /dga' dang mchog dga' bral ba dang / /de la sogs pa thams cad kun/ /sgyu ma tsam du shes par bya/ /de nyid gzhan rig ces bya ste/ /rang rig sems kyi de nyid la/ /gnyis su med par bsgom pa ni/ /de nyid ye shes chen po ste/ /mthar phyin brtag pa rdzogs pa'o/ /dpal stobs po che'i rgyud las ye shes chen po'i le'u ste lnga pa'o// //de ltar bcom ldan 'das kyis bka' stsal pa dang / rdo rje snying po la sogs pa dpa' bo dang / mkha' 'gro ma dang / rnal 'byor ma dang / ma mo'i tshogs thams cad rjes su yi rang nas phyi nang gsang ba'i mchod pas mchod nas/ g.yon phyogs nas lan gsum bskor ba byas nas mi snang bar gyur to/ /dpal stobs po che'i rgyud kyi rgyal po rdzogs so// // paN Di ta gA ya d+ha ra dang / lots+tsha ba dge slong shAkya 87.36b ye shes kyis bsgyur ba'o/ / |