@#/ /rgya gar skad du/ shrI dz+nyA nA dz+wa la tan+t+ra rA dza/ bod skad du/ dpal ye shes 'bar ba'i rgyud kyi rgyal po dpal kun du bzang po la phyag 'tshal lo/ /kye ma sangs rgyas kye sangs rgyas/ /ngo mtshar rmad du byung ba yi/ /rgyud ni gang lags rgyal po gang / /ye shes gang lags 'bar ba gang / /dpal ni gang lags bdag la gsungs/ /'jigs byed chen pos bka' stsal pa/ /dpal ni gnyis med ye shes te/ /gnyis med bde chen ro las byung / /gzung 'dzin mtha' spangs rang rig go /sna tshogs mdud pa ye shes che/ /rang byin brlab pa lte bar te/ /dkyil 'khor 'khor lo gsang bar ro/ /smin mtshams kyi ni mdzod spu ltar/ /thung ngu gnas shing ring du 'gyur/ /de nyid drang dang kha dbye dang / /rgyas par bya ba gsum yod de/ /dang por drang ba'i rnam pa yang / /'drongs pa'i tshad ni gsum yod de/ /sgo gsum yon tan gsum ldan na/ /sor bzhi phyi ru 'byung bar nges/ /'br-ing la sor gnyis tha ma la/ /sor dang nas kyi tshad kyis 'byung / /sbom phra gzhan skyes phra mo tsam/ /dang po bya gdong nyid na gnas/ /rnam thar sor gnyis skye mched bzhi/ /stong pa bcu drug khams bcwa brgyad/ /nyi shu lte bar nyi shu lnga/ /snying kha ru ni gnas pa'o/ /sman la sogs pa kun ldang bas/ /dang ba'i sbyor ba brtsam par bya/ /rnam snang sku rags bcing ba dang / /rgyab yol dbul dang mchod pa dbul/ /gdan khri dbul dang sku khrus dbul/ /sman mchod dbul dang me mchod dbul/ /de nas reg bya'i 87.40a mchod pa dbul/ /kun rdzob lce yi rtse mo 'am/ /khro bo mdzub mo'i rtse mo la/ /bdud rtsi ri lu legs byas te/ /mkhas pas reg bya'i mchod pa dbul/ /mngon du shes pa don mi za/ /bde ba chen po'i mchod pa yis/ /khams gsum mchod pa gdon mi za/ /dar ram men tri sor bzhi'i tshad/ /rked par ska rags dbul bar bya/ /sprul pa'i g.yas dang g.yon gnyis su/ /ras bal la sogs rgyab yol dbul/ /shing bu rigs dang 'thun pa yin/ /sbom bra rigs kyi bdag po tsam/ /dri med sman dang snum ldan pa'i/ /zug rngu mi skyed mchod rdzas kyis/ /bai ro tsa na'i lam du mchod/ /dri zhim chu yis khrus byas te/ /khrus kyis lus la mchod pa dbul/ /sman dang snum gyi phye ma yis/ /sgo gnyis dag tu mchod pa dbul/ /shin du dro ba'i me dag gis/ /gtum mo'i me la mchod pa dbul/ /rked pa'i tshad mnyam ka ti ka /gdan khri bstab pa'i mchod pa dbul/ /de yis 'drongs par gdon mi za/ /de nas rgyas par bya ba yang / /gzhan ni gong dang 'dra ba ste/ /phyi nang 'dod pa'i mtshan ma kun/ /rgyas par byed pa'i las yin te/ /rgyas pa'i sbyor ba gsum byas na/ /dper na me tog pad+ma bzhin/ /de nas dbye ba'i rim pa yang / /gong du gsungs pa thun mong ste/ /dus gsum lce yi rtse mos kyang / /bskyed na nges par kha 'byed do/ /de nyid gsum ni me rang bzhin/ /me 'bar ba yi rkyen gyur pa/ /rlung nyid yin par gsungs pa ste/ /rkyen des me nyid 'bar bar bshad/ /gzhan yang rkyen gyi bye brag dang / /srog rtsol rlung ni dbu mar dgag /bum pa zhabs med rlung phul nas/ /sgo dgu phyi rol drag tu bud/ /lus kyi ngal dub cha mnyams ste/ /sbyor ba rdzogs na bde ba'i rkyen/ /bde ba las ni rdo rje 'chang / /bde ba yis ni bde ba 'grub/ /rgyu bde ba las 'bras bu bde/ /rgyu yi nang na 'di mchog la/ / 87.40b 'bras bu'i nang na 'di mchog go /de nas bde ba'i rkyen gyur pa/ /srid pa dgag dang rlung dgag pa/ /gnas nas gnas su rten gzung ste/ /g.yas brkyang bas ni ro ma dgag /dpa' bo g.yas nas mkha' 'gro g.yon/ /g.yon brkyang bas ni rkyang ma ste/ /sa gas kun dar ma ru gzung / /de bzhin zlum pos dbu mar gzung / /de dag kun gyi bye brag kyang / /dpa' bos g.yas dang gzhan gyis g.yon/ /de bzhin kun la sbyar bar bya/ /gzhan yang gzung ba'i bye brag kyang / /dril can bu gu dgu lam gyis/ /rlung rgyu phyi ru bus byas te/ /rkang lag drag tu bsgrims byas na/ /zin par 'di la the tsom med/ /dpa' bo mkha' 'gro ma gnyis kyis/ /thun mong du ni bya bar gsungs/ /bai ro tsa na las kyi rlung / /gzhan yang lam brgyad rlung rnams dag /dang po nyid du bsdam byas na/ /zin par 'di la the tsom med/ /dbye ba bsdam pa'i man ngag go /byed pa spel mar song gyur na/ /mi zin pa la the tsom med/ /gnas gsum dag tu k+Sha bsams te/ /dbugs gsum pa yis yar drangs te/ /lte ba'i gyen la drangs kyang zin/ /'di ni gang zag mchog gis yin/ /mdzes pa'i spyi bo de nyid la/ /gyen du bkan dang thur du bkan/ /drang por g.yas g.yon btsan thabs la/ /ka ti'i gzer ni btsan thabs gcig /sbom po khro mos mnan pa ste/ /bla ma'i zhal nas ma blangs na/ /lus kyi nad bzhi kun nas skye/ /chu 'gags chu so skrangs la sogs/ /lus smad nad sna nyi shu 'byung / /gzhan yang btsan thabs bcu gnyis ni/ /bla ma'i zhal nas shes par bya/ /bla ma mnyes par bya ba'i phyir/ /lus srog longs spyod thams cad kyis/ /dus gsum maN+Dal dang bcas mchod/ /lus srog btang bar phangs pa bas/ /man ngag dam pa de bas phangs/ /de bas btsan thabs legs 87.41a par sba/ /man ngag chu bo'i rgyun 'dra bas/ /de nyid rgyud du shes par bya/ /zab mo'i don ston rgyal por gsungs/ /rdo rje phag mo la sogs rnams/ /gsang ba'i gsang ba rmad byung 'di/ /khyod la gtad do dam du sbos/ /kun la spel na dam tshig nyams/ /kye ma rgyud ky-i don 'di la/ /phyogs bcu'i 'jig rten khams bzhugs pa'i/ /dpa' bo mkha' 'gro ma yi tshogs/ /thams cad ngo mtshar cher skyes te/ /dga' zhing mgu nas yi rang ngo / /dpal ye shes 'bar ba'i rgyud kyi rgyal po mkha' 'gro ma'i gsang ba las kyang gsang ba rmad du byung ba rdzogs s+ho// // sing ga la'i gling gi rnal 'byor ma tsan+d+ra mA le dang / dge slong shAkya ye shes kyis bsgyur ba'o/ / |