@#/ /rgya gar skad du/ shrI sUr+ya tsakra tan+t+ra rA dza nA ma/ bod skad du/ dpal nyi ma'i 'khor lo'i rgyud kyi rgyal po zhes bya ba/ dpal bde mchog la phyag 'tshal lo/ /a la la ho dpa' bo kye/ /ngo mtshar rmad du byung ba yi/ /bskyed dang rdzogs pa chen po ste/ /ma spangs pa dang nges pa dag /mgon pos 87.46a bdag la bshad du gsol/ /bcom ldan 'das kyis bka' stsal pa/ /dang po ma spangs bshad bya ste/ /phung po khams dang skye mched dag /bskyed pa'i rim pa'i rgyu ma spangs/ /phyag mtshan nyi zla yig 'bru dag /bla ma'i man ngag rkyen ma spangs/ /lus ngag sgo bsdams dam tshig las/ /sku gnyis 'byung ba 'bras ma spangs/ /zhe sdang ru drar skye ba'i las/ /zhe sdang rang rig bskyed pa dang / /lus kyi dri ma 'khrud pa las/ /las kyi dbye ba ma spangs pa'o/ /pul+li ra dang dzA lan sogs/ /nang du spyi bo spyi gtsug sogs/ /gnas kyi dbye ba ma spangs pa'o/ /shar sogs bdud kyi snying ga ru/ /zhabs gnas gnas chen ma spangs pa/ /gnas de phyi dang nang du shes/ /gnas kyi dbye ba ma spangs pa'o/ /gser 'gyur rtsi yi rnam pa bzhin/ /phung sogs lha ru 'pho byed pa/ /'di ni 'pho ba ma spangs pa'o/ /rgyu yi gnas ni snying ga ste/ /'bras bu'i gnas ni phung sogs te/ /ma spangs pa ni gnyis su shes/ /phung sogs sgyu mar 'dzin byed pa/ /'di ni rten pa ma spangs pa'o/ /gal te nang du ma zin na/ /phyi ru de nyid ngo bor bsgom/ /de nyid shor ba ma spangs pa'o/ /gnyen po ma spangs sgyu mar bsgom/ /phung sogs la brten lha rnams la/ /sgo gsum ngo bo ma spangs pa/ /tha mal pa dang bskyed rim gnyis/ /gong 'og khyad par shes bya ste/ /sgyu mas gnyen po ma spangs pa'o/ /bdun po rnam dag la sogs pa/ /sngon du 'gro ba ma spangs pa'o/ /phung sogs rtog pa las logs nas/ /phra ba'i gnas su gnas byed pa/ /gnas kyi khyad par ma spangs pa'o/ /lha yi rnam par 'jug pa dang / /gong du sgyu mar bzlog pa gnyis/ /'pho ba'i khyad par ma spangs nyid/ /ye shes me ni cher 'bar te/ /phung sogs sgyu mar gang 'dzin pa/ /rten gyi khyad par ma spangs pa'o/ /mnyam gzhag rjes thob 87.46b kun 'gags ste/ /thams cad rten dang brten par snang / /ngo bo'i khyad par ma spangs pa'o/ /de nyid sgyu ma rang bzhin med/ /gnyen po'i khyad par ma spangs pa'o/ /shes rab phag mo ma spangs pa/ /phyag rgya ma spangs pa ru 'dod/ /ma spangs gcig ni gzhan dang 'dra/ /gong 'og las kyi khyad par ro/ /zhe sdang thugs la 'dod chags gsung / /gti mug sku yi phyag rgya ste/ /phyag rgya'i dbye ba ma spangs pa/ /sku dang gsung dang thugs 'khor lo/ /bde ba chen po'i 'khor lo dag /'khor lo'i dbye ba ma spangs pa'o/ /dang po sgyu ma'i ye shes me/ /gnyis pa sgyu ma ltar snang me/ /gtum mo'i dbye ba ma spangs pa'o/ /phung sogs sgyu ma las g.yo zhing / /phung sogs sgyu mas yang dag bsreg /kun rdzob rtogs pa'i rkyen yin te/ /sgyu ma ltar snang las g.yo zhing / /sgyu ma de nyid lhar bsregs pa/ /don dam gnyis med rkyen yin te/ /rkyen gyi dbye ba ma spangs pa'o/ /'khor ba spong zhing rnam rtog bskyed/ /kun rdzob bden pa sems kyi las/ /'khor bar mi 'khor rang rig bskyed/ /don dam sems kyi las yin te/ /las kyi dbye ba ma spangs pa/ /'di dag ma spangs nyi shu brgyad/ /bum pa'i dbang dang 'bral ba'o/ /gsang dbang bla ma'i zhal nas blang / /bzhi pa'i ma spangs nyi shu brgyad/ /rang rig lhan cig skyes pa yi/ /chos nyid ma dag bzhi pa'i rgyu/ /zhal gyi man ngag rkyen ma spangs/ /'gro ba'i chos rnams rang rig mes/ /bsregs pa las ma spangs pa yin/ /gong 'og rim pas dbye ma spangs/ /a ba d+hU tI 'og min gnas/ /gnas dang gnas chen ma spangs pa/ /de nyid phyi dang nang du nges/ /phyi nang dbye ba ma spangs pa'o/ /stong pa dang ni gzung 'dzin char/ /'pho ba ma spangs a dang ha~M/ /rten ma spangs te rtog pa la/ /sems 'phros de nyid rang rig bsgom/ /shor ba ma spangs par rig la/ /dbang 87.47a po'-i sgo bsdu ngo ma spangs/ /rtog bcom gnyen po ma spangs pa'o/ /rang rig spyi la sems pa las/ /sngon 'gro ma spangs ma spangs brgyad/ /bla ma'i zhal nas shes par bya/ /spyi dang rang gi mtshan nyid la/ /'pho ba ma spangs rang rig bsgom/ /phyag rgya ma spangs rang rig las/ /phrin las nyi shu rtsa bzhi 'byung / /las ma spangs te gzhan rnams ni/ /bla ma'i zhal nas shes par bya/ /dad med bla ma ma bsten dang / /bla ma dam pa ma rnyed dang / /ma spangs ngo bo ma shes par/ /rang rig 'bras bu gang 'dod pa/ /de dag mi shes dri mas bsgribs/ /dper na sbrul gyi 'o ma bzhin/ /de nas nges pa bcwa lnga yang / /rgyu dang rkyen dang gnas dang yang / /gtad ba go rim grangs dang rim/ /nges pa bdun ni gzhan du gsungs/ /sngags ni spros bcas spros med nges/ /rkyen ni ye shes me rlung nges/ /rgyu 'bras gnas ni a ha~M nges/ /dbang bzhi gong 'og khyad par nges/ /sun 'byin gnyen po nges pa dang / /ngo bo nges dang dbye ba nges/ /las nges pa dang bcwa lnga ste/ /de las byung ba'i nges pa dag /bcu bdun bla ma'i zhal nas shes/ /ma spangs pa dang nges pa yi/ /mtshan nyid yongs su shes gyur na/ /'khrul pa dang ni 'khrul pa'i gzhi/ /thams cad 'di yis spong bar byed/ /'jig rten 'jig rten 'das pa yi/ /dngos grub thams cad 'di las 'byung / /gong bu chu dang gzugs su gnas/ /de bzhin gzugs las 'das pa ste/ /gnas pa rnam pa bzhi ru yang / /rgyud ni nges pa kho na ste/ /rgyud ni dbang po'i ngo bor gnas/ /de phyir dngos grub 'dod pas kyang / /'bad pas bla ma mnyes bya ste/ /rgyud kyi ngo bo dbang rnams dang / /de yi man ngag shes par bya/ /bla ma mnyes par ma byas shing / /dbang rnams thob par ma byas par/ /nyan pa la sogs byed pa n-i/ /'bras bu med cing brlag par 'gyur/ /de bas 'bad de nan tan bya/ /dpal nyi ma'i 'khor lo'i rgyud kyi rgyal po 87.47b rdzogs s+ho// // rgya gar gyi mkhan po gA ya d+ha ra dang / lots+tsha ba dge slong shAkya ye shes kyis bsgyur cing zhus te gtan la phab pa/ / |