@#/ /rgya gar skad du/ shrI a mri ta gu h+ya tan+t+ra rA dza/ bod skad du/ dpal gsang ba bdud rtsi'i rgyud kyi rgyal po/ / bcom ldan 'das dpal bde ba chen po la phyag 'tshal lo/ /'di skad bdag gis thos pa dus gcig na/ bcom ldan 'das de bzhin gshegs pa thams cad kyi sku dang gsung dang thugs rdo rje btsun mo'i b+ha ga la bzhugs so/ /de'i tshe byang chub sems dpa' rdo rje snying pos gsol pa/ dkyil 'khor dbye ba ji lta bu/ /sngags dang gtor ma ji lta bu/ /sbyin sreg mchod sogs 87.52b ji lta bu/ /khyod kyis bdag la bshad du gsol/ /bcom ldan 'das kyis bka' stsal pa/ /dang po dkyil 'khor dbye ba yang / /phyi la gzugs brnyan dkyil 'khor te/ /nang du lus kyi dkyil 'khor ro/ /gsang bar b+ha ga'i dkyil 'khor te/ /bzhi pa rang rig byang chub sems/ /de rnams lha yi mtshan nyid kyang / /sku mdog phyag mtshan rags pa'i lam/ /khro tshul drug bcu rtsa bzhi dang / /'bar ba'i gar dgu phyag brgya drug /mtshan nyid sgyu ma lta bu yis/ /tha mal pa yi rnam rtog spong / /lus kyi dri 'khru zhe sdang dag /longs spyod rdzogs pa'i skur gyur pa'o/ /'di dag phyi yi dkyil 'khor te/ /dkyil 'khor dbus su gang gyur pa/ /de nyid kyi ni dkyil 'khor te/ /rdo rje can dang phan pa dang / /de bzhin rdo rje gzi brjid dang / /pad+ma gar gy-i dbang phyug dang / /de bzhin rta bdun rdo rje sems/ /snying po yongs gzung dkyil 'khor te/ /de dag phyi yi dkyil 'khor yin/ /de nas nang gi dkyil 'khor yang / /rnal grol steng du gdan khri rlung / /rang gi bdag po'i lha yin no/ /dang por de nyid shes bya ste/ /rags pa dang ni phra ba dang / /zung 'jug sgo gsum nyi khri dang / /chig stong drug brgya rgyu ba tsam/ /las ni rags pa'i lam 'joms shing / /ngag g-i dri 'khru gti mug dag /sprul pa'i sku yi rgyur gyur pa/ /mkha' spyod rlung du shes par bya/ /gang zhig snang ba bsgom pa dang / /de bzhin mun pa bsgom pa dag /nyin dang mtshan mor rab tu grags/ /gnod mdzes lta stangs dman pa ste/ /tshul de de las bzlog pa'o/ /dang por yid bcing sna rtser bya/ /de bzhin sems bcing rlung bcing yang / /nam mkha' sor bzhi de nas stong / /de nas bar du thig le yang / /yan lag dang bcas yan lag med/ /shin tu yan lag med pa ste/ /yan lag bcas pa bcu gsum ste/ /thabs la thabs kyi sbyor ba ni/ /bla ma'i zhal nas shes par bya/ /ma ning 'dus pa'i sgo ru 87.53a gsungs/ /de nas 'og sgo tsaN+DA li/ /kha sbyor dang ni stug po sogs/ /rkyen dang bcas dang rang bzhin dang / /bdag sbyang ba dang gzhan sbyang dang / /gtum mo rang bzhin sbar ba dang / /gtum mo go bzlog sbar ba dang / /gtum mo rkyen gyis sbar ba dang / /gtum mo zhar la sbar ba dang / /gtum mo bye brag sbar ba dang / /spyi bo'i gtumo sbar ba dang / /grol ba'i rang bzhin gtum mo dang / /chags pa'i rang bzhin gtum mo ste/ /nang gi lha yi ngo bo ste/ /gsang ba'i lha yi ring ba'i rgyu/ /de nas gsang ba'i dkyil 'khor yang / /dbang po gnyis sbyor kun du ru/ /de yi phyir na b+ha ga yin/ /dga' ba la sogs sgyu ma yi/ /phra ba'i lam spong las yin te/ /sems kyi dri 'khrud 'dod chags dag /rang rig sems kyi rgyal po'-i rgyu/ /de nas bzhi pa'i dkyil 'khor ni/ /chos sku skye med nam mkha' bzhin/ /rang rig stong pa 'od gsal la/ /bsgoms pas nyes pa ma yin te/ /ma bsgoms pas kyang nyes pa min/ /bsgom pa nyid kyang rtog pa ste/ /mi bsgom pa yang rtog pa nyid/ /bsgom du rdul tsam med pa la/ /yongs su skad cig med pa 'di/ /lha yi rgyal po yin par 'dod/ /dkyil 'khor rnams kyi mchog gyur pa/ /rang rig ye shes me bo che/ /thams cad 'di la gnas pa ste/ /dper na 'khor los sgyur ba'i rgyal po dag /yul dang grong khyer dag tu mi 'gro yang / /yul na 'dod pa thams cad sdud pa ltar/ /mchod dang gtor ma la sogs pa'i/ /las dang bya ba sna tshogs kun/ /sems kyi de nyid shes gyur na/ /thams cad 'di la bsdud par nges/ /las ni zab pa'i lam spong ste/ /sgo gsum rnam dag dug gsum 'joms/ /gzugs sku gnyis ni 'byung ba'i rgyu/ /sbyin sreg rnam pa bzhi yin te/ /spyi yi thun mong yin par gsungs/ /de nas nang gi sbyin sreg kyang / /lte ba snying ka 87.53b spyi bo mgrin/ /rigs ni nges pa'i thab khung ste/ /sku ni spyi bo gsung mgrin pa/ /snying gar thugs te yon tan dang / /phrin las gtum mo gnyis su nges/ /rlung dang rtsa dang thig le dang / /rang bzhin gnas pa'i ye shes me/ /me lha dag pas bdag po'-i lha/ /sku mdog phyag mtshan rnam rtogs dag /sreg rdzas bsreg ste me mchod bya/ /nye bar zhi ba sbyin pa dang / /rnam rtog sreg phyir sbyin sreg ste/ /rang lus ye shes me yis ni/ /rtog pa'i bud shing bsreg bya ba/ /'di ni sbyin sreg tshad ma ste/ /til sogs sdig par nges pa 'am/ /las kyi me nyid ye shes sam/ /bsregs pas nges par tshig gam ci/ /sreg rdzas rtog pa sreg byed me/ /dbang p+so spyod yul ma yin te/ /de phyir las kyi me nyid la/ /til sogs bsreg pa'i las byas kyang / /nges par sdig pa tshig mi 'gyur/ /mchod pa la sogs de bzhin no/ /bstan pa tsam du nges pa ste/ /rgyud ni don dam ma yin te/ /don dam rtogs pas bstan pa med/ /dgang gzar blugs gzar la sogs pa/ /bla ma'i zhal nas shes par bya/ /de nas gsang ba'i sbyin sreg kyang / /thab khung lte ba 'am sna rtse ste/ /chags grol gnas ni nges pa dang / /rang bzhin dang ni gsang ba yi/ /gtum mo ye shes me sbar te/ /g.yas g.yon dgang gzar blugs gzar gyis/ /shu kra rtsa dang rlung sogs kyi/ /phra mo'i rtog pa'i sreg rdzas bsreg /bde ba'i me lha mchod par bya/ /zhi rgyas las kyi rim pa dang / /bzhi pa zhal nas shes par bya/ /de nas sngags kyi dbye ba yang / /phyi yi sngags ni o~M AHhU~M/ /nang du bdud rtsi'i mtshan nyid de/ /gsang bar mchog tshad dbus na gnas/ /mthar thug mtha' bral rang rig go/ /spos sogs phyi yi mchod pa ste/ /bdud rtsi la sogs nang du'o/ /gsang bar bde ba'i ro yis mchod/ /mthar thug stong pa'i 87.54a ro yi mchod/ /'bras sogs phyi yi gtor ma sta/ /dman pa'i bgegs sogs zhi bar byed/ /a ba d+hu tI 'i ka pA lar/ /sha sogs bdud rtsi'i rang bzhin gnas/ /rnam rtog bgegs chen zhi bar byed/ /bde ba chen po'i bdud rtsi'i ros/ /phra ba'i gdon chen zhi byas pa/ /'di ni gsang ba'i gtor mar gsungs/ /rang rig stong pa'i bdud rtsi'i ros/ /bde chen gdon ni zhi byas pa/ /'d-i ni bzhi pa'i gtor mar nges/ /phyag 'tshal skor ba la sogs dang / /sbyang sogs bla ma'i zhal nas shes/ /gang gi phyir na sbyin sreg na/ /dngos grub dam pa ster ba dang / /rnam rtog sreg phyir sbyin sreg ste/ /shing sogs sreg pa sbyin sreg min/ /mnyes pa'i don gyis mchod pa ste/ /spos sogs phul bas mnyes pa med/ /rang sems las su rung ba dag /mnyes pas mchod pa chen po ste/ /gdon dang gnod pa zhi ba dang / /bar chad zhi dang dngos grub dag /'byung ba'i phyir na gtor ma ste/ /'bras sogs phyi yi gtor ma yis/ /gdon sogs zhi bar mi 'gyur te/ /rang gi sgo gsum rnam rtog dag /gdon la sogs par snang ba ste/ /'khrul pa'i rnam rtog ma spangs par/ /gdon sogs zhi bar mi 'gyur phyir/ /sgo gsum rnam rtog 'joms pa yi/ /sems kyi gtor ma gtor ma'i mchog /gdon dang gnod pa zhi ba dang / /dam tshig gso dang lha rnams 'go /dngos grub thams cad 'byung bar 'gyur/ /phy-i nang gtor mar nges pa'o/ /rgyud rnams nye bar zhi ba dang / /lus las 'byung phyir lha yin te/ /phyi yi dkyil 'khor lha ma yin/ /lus dang yan lag lha ma yin/ /kha mig la sogs lha ma yin/ /lus las ma byung g.yeng ba'i phy-ir/ /dbang po sgo gsum g.yeng ba dgag /rang gi lus la rang lus 'byung / / 87.54b sgo gsum zhi phyir lha zhes brjod/ /yid skyob phyir na sngags yin te/ /rang sems las su rung ba dang / /rnam rtog gdon rnams las skyob phyir/ /'di ni sngags kyi rgyal por gsungs/ /gzhan yang dngos grub 'dod pa yis/ /thams cad bla ma'i zhal nas blang / /rgyud 'di gtad kyis nan tan gyis/ /de'i tshe 'khor 'dus pa thams cad rgyud kyi don la yi rang par gyur to/ /dpal gsang ba bdud rtsi'i rgyud kyi rgyal po rdzogs s+ho/ / rgya gar gyi mkhan po gA ya d+ha ra dang / lots+tsha ba dge slong shAkya ye shes kyis bsgyur ba'o/ / |