@/ /rgya gar skad du/ shrI badzra rA dza ma hA tan+t+ra/ bod skad du/ dpal rdo rje rgyal po chen po'-i rgyud/ dpal sdom pa'i rgyal po la phyag 'tshal lo/ /'di skad bdag gis thos pa dus gcig na/ bcom ldan 87.57a 'das de bzhin gshegs pa thams cad kyi sku dang / gsung dang / thugs rdo rje btsun mo'i b+ha ga la rdo rje snying po la sogs pa'i dpa' bo mkha' 'gro grangs med pa dang thabs cig tu bzhugs pa'i dus su phyi nang gsang ba bla na med pa'i mchod pas mchod nas/ bcom ldan 'das la mngon du phyogs pa dang / bcom ldan 'das zhal 'dzum pa mdzad de/ rdo rje snying po la sogs pas gsol pa/ rdo rje gang lags chen po gang / /rgyud ni gang lags rgyal po gang / /bcom ldan 'das kyis bka' stsal pa/ /don gyi rdo rje rnam pa bzhi/ /dbang bzhi'i grangs su shes par bya/ /rnam rtog 'joms phyir rdo rje ste/ /de la rnam pa bzhi yin te/ /phyi nang gsang ba rab gsang gnyis/ /rtse gsum rtse gcig rtse lnga pa/ /rtse dgu pa ni nyid yin no/ /bcu gnyis de nyid rdo rje ste/ /rtags kyi rdo rje bzhi yin no/ /gnyis su med pa rtse gcig pas/ /rnam rtog thams cad spangs pa yin/ /rtse gsum sku gsung thugs yin te/ /'dod chags zhe sdang gti mug gsum/ /'joms pa'i phy-ir na bshad pa yin/ /rtse lnga ye shes lnga yi rtags/ /me long mnyam nyid so sor rtog /bya ba nan tan chos dbyings shes/ /nyon mongs lnga ni spangs pa ste/ /zhe sdang nga rgyal 'dod chags dang / /phrag dog gti mug 'joms par byed/ /rdo rje rtse dgu gang yin pa/ /ye shes rtse dgu bshad pa ste/ /khams gsum sa dgu 'joms par byed/ /'dod khams gzugs khams gzugs med khams/ /nyan thos rang rgyal byang chub sems/ /rig 'dzin sangs rgyas ye shes che/ /sa dgu la ni gang sgrib pa'i/ /sgrib pa sbyong bar byed pa yi/ /rdo rje rtse dgur bstan pa yin/ /rdo rje rtse mo bcu gnyis pa/ /'khor ba'i rten 'brel bcu gnyis kyi/ /spong ba'i ye shes bcu gnyis yin/ / 87.57b ma rig pa las 'du byed de/ /'du byed rkyen gyis rnam par shes/ /ming dang gzugs dang skye mched drug /reg dang tshor dang sred dang len/ /srid pa skye dang rga shi ste/ /de rnams spong ba'i gnyen po ste/ /chos kyi ye shes mngon du bya/ /de las ye shes drug rang bzhin/ /de las sku gsung thugs ngo bo/ /de las skye mched drug sangs rgyas/ /de las gnyis med reg pa ni/ /de las nyams myong bde chen po/ /rang rig de nyid sred pa ste/ /chos kun ston byed len pa ste/ /srid pa longs spyod rdzogs sku yin/ /skye ba sprul pa'i sku ru bshad/ /rga shi rgyun dang mya ngan 'das/ /'od gsal stong chen ngang du thim/ /de phyir rdo rje bcu gnyis pa/ /rdzas kyi rdo rje bzhi yin te/ /'bigs shing rno ba zur gsum ste/ /gru bzhis rdzas rnams brdar byas pas/ /'jam zhing dang la 'joms par byed/ /pha lam zlum pos rtsub pa 'joms/ /zur lngas thams cad ci dgar byed/ /de nas chen po'i don bshad de/ /dmyigs dang bsam pa spyod pa dang / /brtul zhugs brtson 'grus smon lam dang / /de bzhin ye shes chen po ste/ /re re la yang bdun bdun sbyar/ /de phyir chen po zhes ni bstan/ /rgyud ni rnam pa lnga yin te/ /phyi dang nang dang gsang ba dang / /rab tu gsang dang gsang ba che/ /de rnams rgyun du gnas pa la/ /rgyu yi rgyud du bstan pa yi/ /de rnams don ni ji bzhin rtogs/ /'bras bu'i rgyud du bstan pa yin/ /rgyu dang 'bras bu gnyis med pa/ /rgyu ni gnyis su med pa yi/ /rang rig ye shes mthar thug pa/ /mthar thug bla na med pa'i rgyud/ /rgyal po la yang lnga yin te/ /phyi nang gsang dang rab tu gsang / /shin du gsang ba chen po ste/ /de rnams don la dbang bskur dang / /de yi mi mthun phyogs 'joms phyir/ /de phyir rgyal po lnga ru bstan/ /rdo rje snying pos yang gsol pa/ /bcom ldan 'das 87.58a ni ji ltar lags/ /de bzhin gshegs pa thams cad kyi/ /sku gsung thugs ni ji ltar lags/ /btsun mo'i b+ha ga ji ltar lags/ /rdo rje gang lags snying po gang / /dpa' bo gang lags mkha' 'gro gang / /dpag tu med pa ji ltar lags/ /thabs gcig bzhugs pa ji ltar lags/ /phyi nang gsang ba bla med pa'i/ /mchod nas zhes pa ji ltar lags/ /mngon phyogs 'khod pa ji ltar lags/ /zhal 'dzum mdzad pa ji ltar lags/ /gzigs pa zhes pa ji ltar lags/ /bcom ldan 'das kyis bka' stsal pa/ /nyon mongs dang ni 'chi bdag bdud/ /phung po'-i bdud dang lha yi bdud/ /bdud bzhi bcom pas bcom pa'o/ /ldan pa yon tan drug ldan phyir/ /dbang phyug dang ni gzugs bzang dang / /dpal dang grags dang skal ba bzang / /ye shes phun sum tshogs pa la/ /drug po de ldan zhes bya ba/ /'khor ba'i chos ni mya ngan te/ /de ltar bral phyir 'das pa'o/ /'das pa'i de bzhin gshegs pa kun/ /'gro ba'i don mdzad de bzhin gshegs/ /thams cad dus gsum sangs rgyas kyi/ /sku gsung thugs kyi ngo bor bcas/ /btsun mo zhes bya chos kyi dbyings/ /de las byung phyir b+ha ga ste/ /dbyer mi phyed pas bzhugs par bshad/ /rdo rje chos rnams 'jigs pa che/ /snying po ye shes chen po ste/ /sogs pa mang po'-i don yin yin te/ /dpa' bo zhes pa rnam pa lnga/ /phyi nang gsang ba la sogs kyi/ /rnam par rtog pa 'joms phyir yin/ /mkha' la 'gro bas mkha' 'gro ste/ /rtsa sogs la yang shes par bya/ /thams cad de las byung ba'i phyir/ /ma zhes nga yis gsungs pa yin/ /de yi don la mi dpogs pas/ /de yi phyir na dpag tu med/ /thabs gcig bzhugs zhes bya ba 'di/ /de nyid don dang dbyer med phyir/ /gcig gi don du bshad pa'o/ / 87.58b gnyis pa ma yin de dus su/ /phyi nang ma yin mchod pa ni/ /phyi yi mchod pa bshad par bya/ /me tog bdug pa mar me dang / /dri dang lha bshos btung ba dang / /rol mo sil snyan dbyangs nyid dang / /sgeg dang rgod dang gar nyid dang / /rta dang glang po rin chen sogs/ /de nas nang gi mchod pa ni/ /b+ha ga btsums la ku tsa btsir/ /bdud rts-i lnga dang btung ba lnga/ /byang chub sems dang ldan byas te/ /phung po khams dang skye mched rnams/ /de la sogs pas mchod par bya/ /de nas gsang ba'i mchod pa ni/ /rtsa dang rlung dang thig le ste/ /de nyid gnyis med bde ba yis/ /rtsa dang rlung sogs thig les mchod/ /de nas rab gsang mchod pa ni/ /dang po dga' dang mchog dga' dang / /dga' bral de bzhin lhan skyes dga'/ /bde ba'i khyad par de nyid kyis/ /rang bzhin dga' sogs thams cad mchod/ /de nas bla med mchod pas ni/ /rang rig stong par rtogs pa yis/ /'od gsal de nyid chos kyi sku/ /de nyid bla med mchod pa mchog / bcom ldan 'das kyis de skad ces bka' stsal nas/ rdo rje snying po la sogs pa'i 'khor rnams dga' zhing mgu nas rjes su yi rangs par gyur te/ g.yon phyogs nas bskor ba byas nas so so'-i rdzu 'phrul gyis mi snang bar gyur to/ /dpal 'khor lo sdom pa rdo rje rgyal po'-i rgyud rdzogs s+ho// // rnal 'byor ma tsan+d+ra mA le dang / lo ts+tsha ba dge slong shAkya ye shes kyis bsgyur ba'o/ / |