@#/ /rgya gar skad du/ nI lAm+ba ra d+ha ra badzra pA Ni badzra phA Na kastan+t+ra trai lokya bi dza ya nA ma/ bod skad du/ lag na rdo rje gos sngon po can rdo rje gdengs pa'i rgyud khams gsum las rnam par rgyal ba zhes bya ba/ dpal rdo rje gtum po la phyag 'tshal lo/ /de nas gsang ba'i bdag po 'khor de dag la rnam par gzigs nas rang nyid mkha' dbyings rnam par dag pa zhes bya ba'i ting nge 'dzin la snyoms par zhugs so/ /ting nge 'dzin de la snyoms par zhugs ma thag tu srid pa gsum yang rnam par g.yos so/ /de nas rang nyid sku dang gsung dang thugs rnam par dag pa'i rdo rje las sngags 'di phyung ngo / /o~M na mo gsang sngags rgyal po smras tsam gyis/ /sa steng sa rnams brgyal bar 'gyur/ /klu rnams kun tu skrag nas ni/ /gsang bdag nyid la phyag 'tshal lo/ /snying rje ldan zhing mos pa brten/ /gus shing byang chub sems ldan pa'i/ /phyogs su 'gro bas yid gnas pa'i/ /lha dang bla ma mnyam mchod cing / /brtson 'grus shes rab che ba des/ /rang nyid dang ni gzhan dag tu/ /bde zhing nyams dga'i ri phug gam/ /tshal lam mtsho 'am ljongs rnams su/ /sa yi dkyil 'khor rnam dag par/ /byas nas dri chus legs byugs nas/ /bde ba'i stan la 'dug byas te/ /gsang ba'i bdag po bsgrub par bya/ /gzhan du ri khrod rtsub pa 'am/ /dur khrod ya ma'i khang pa yang / /'khrug cing g.yeng dang bcas pa dang / /rgyal pos gzung zhing gtum mo rgyu/ /'jigs pa'i phyogs nas gang dag rnams/ /rgyal ba bsgrub pa'i gnas yin no/ /dus 'dir byung ba'i blo zhan rnams/ /'jig rten 'di yi g.yeng ba dang / /tshogs pa thams cad skyed par byed/ /chags pa'i stobs kyi chos nyid ni/ /yang dag mi rtog de ni skyon/ /sprul pa'i glang po dang mtshungs so/ /stong nyid spros med rang bzhin las/ /sgyu ma'i sku ni yongs 'byung zhing / /dang po stong nyid rdo rje ste/ /gnyis pa la ni yi ge hUM/ /gsum pa rdo rje rtse dgu pa/ /bzhi pa bcom ldan gsang ba'i bdag /lnga pa lha ni yongs su rdzogs/ /me long dang ni mnyam nyid dang / /chos dbyings ye shes las grub pa'i/ /sku ni ye shes bdag nyid do/ /de 89.295a rdzogs ye shes chen po'o/ /ye shes sku las ye shes kyis/ /sprul pa'ang ye shes nyid du gnas/ /'khor ba'i nyon mongs las 'das nas/ /mi rtog ye shes me phung la/ /gsang ba'i bdag nyid legs par bzhugs/ /rnam grol rnam dag grol ba'i rgyu/ /sngags dbyibs chos bdag don rnal 'byor/ /skad cig skad cig ye shes las/ /sgyu ma lta bu'i sgyu ma'i sku/ /sgyu ma nyid la rnam grol tshe/ /kye kye ha ha dpa' bo che/ /klu yi dgrar gyur 'jigs byed pos/ /gsang ba'i bdag po rdo rje can/ /nyon mongs las rgyal 'jigs su rung / /dbang phyug khams gsum las rgyal ba'i/ /de bas brtson ldan gang yin des/ /shin tu bsgrub pas bsgrub par bya/ /brtan pa'i yid sos par byed pas/ /rgyal ba gsang ba'i bdag po'o/ /de nas gsang ba'i bdag po nyid/ /dngos grub nges par 'byung ba rdo rje zhes bya ba'i ting nge 'dzin la snyoms par zhugs nas sku dang gsung dang thugs rnam par dag pa'i rdo rje las byung ba/ o~M badzra pA Ni sarba a sid d+hi ku ru ku ru swA hA/ lha klu mi min dri za 'am/ /yang na mi yi bu mo yi/ /dpral bar thig le bris nas ni/ /lag tu lcags kyu thogs la gzhag /dkyil 'khor gru bzhi lham pa la/ /brten nas bum pas bsgrub par bya/ /rnam par rgyal ba'i bum par ni/ /sman la sogs pas legs bkang nas/ /ras kyis dkris la gzhag par bya/ /rgyun tu de las bsgrub gyur na/ /zhi dang rgyas sogs dngos grub dang / /gzhan yang dngos grub 'grub par 'gyur/ /de nas yang gsang ba'i bdag po mi 'gyur bar byed pa rdo rje zhes bya ba'i ting nge 'dzin la snyoms par zhugs nas dug thams cad zhi bar byed pa'i sngags 'di nyid kyis sku dang gsung dang thugs rdo rje yang dag pa las nges par phyung ngo / /o~M na gu na 89.295b ge pro ta~M ga ma ni/ tsa ra po ra~M ya ra ba rA h+yaid ha ri na~M bra~M/ rin chen snod du chu blugs nas/ /sngags kyi rgyal po 'di la ni/ /brgya nas ji srid stong gi bar/ /brjod na 'gro ba'i dug nad sel/ /gzhan yang gsang sngags rgyal po ni/ /gsang ba'i bdag po'i sbyor ba dang / /bcas pas ming du brjod byas nas/ /sgrub pas ci yang 'grub par 'gyur/ /zla ba spyang kis bzung dus su dpral bar go ro tsa nas thig le byas te kha shar phyogs su gyur nas gsang sngags 'di brjod na ci 'dod pa dbang du byed do/ /yang zla ba'am nyi ma gzas bzung ba'i tshe klu'i gan nas mi khrag gis lus byugs te sngags 'di brjod na klu thams cad dbang du 'gyur ro/ /'di la the tshom med do/ /gzhan yang sbyor ba bshad par bya/ /gur gum dang ni 'gi wang gis/ /rtsibs brgyad pa yi 'khor lo la/ /dang po'i sngags bzhi dag dang ni/ /tha ma'i sngags rnams bri bar bya/ /mu khyud gnyis la rtsa ba yi/ /gsang sngags rgyal po rim gyis bri/ /rin chen snod bzhag mchod byas nas/ /gsang sngags stong sogs brjod nas ni/ /rgyal mtshan rtse la gdags par bya/ /gzhan gyi rig sngags gcod par byed/ /gal te char pa dbab par 'dod na sa'i dkyil 'khor gru bzhi par byas te/ dbus su pad ma 'dab ma brgyad pa bris la de'i steng du klu'i rgyal po brgyad kyi gzugs byas te gzhan la rang nyid khro bo'i rgyal po gos sngon po can du byas te/ sman sna tshogs dang / 'o ma dang 'bras chan dang / zho la sogs pa rnams dang / ka ra dang bu ram la sogs pas mchod nas gos dkar po bgos te hU~M 'brug gi sgra lta bu brjod pas mgo 'dren pa'i gsang sngags kyi rgyal po brjod pas char 'bebs par byed do/ /gal te 89.296a ma 'bebs na klu rnams bsdigs pa'i phyir/ dkyil 'khor de'i steng du khrag sna tshogs dang / dug shing la sogs pas sbyin bsreg bya'o/ /des myur du char 'bebs par byed do/ /gal te char ches pa 'am ser ba gcod par 'dod pas nyer shing dang dug ka da ba'i rtsa ba la yi ge bris te/ /dkyil 'khor dkar po'i dbus su btsugs la yungs kar dang thal ba la mang du bzlas par bya'o/ /gal te mi 'dod na bsngags pa tsam gyis kyang nges par 'byung ngo / /rta'i khrag dang dug sna tshogs kyis brgyal ba las sos par byed do/ /rlung zhi bar 'dod na dbang phyug gi gos la tsa ta pa la ri rtsi bas sngags bris te dkyil 'khor gyi steng du bzhag nas/ sngags kyi rgyal po stong la sogs pa ci nus pa brjod nas khang pa'i steng du bzhag na rlung zhi bar byed do/ /gal te yams zhi bar 'dod pas gur gum dang / gi wang gi rtse mo bcu gnyis par bris nas dang po'i sngags rnams dang / tha ma'i sngags rnams rtsibs la bris te/ mu khyud la sngags lhag ma bris te me tog dang 'bras bu ser po thams cad mchod cing gsol ba btab nas gtsug lag gi rtse mo 'am/ dge 'dun gyi 'du ba'i sgo gong la btags na ci 'dod pa 'grub cing nad yams thams cad 'chad par 'gyur ro/ /gal te bu 'dod pas se'u kya dmar po'i sdong bu la steng du sbyin bsreg byas na bu ster bar nges so/ /gal te gter 'dod pas sa'am/ rin po che la rnam thos sras kyi gzugs khru gang pa byas nas rin po che'am spang leb kyi steng du bzhag nas mchod pa rnam pa sna tshogs phul nas gsol ba btab na zhag bdun nas rin po che ster bar byed do/ /gal te shi bar dogs pas dkyil 'khor khru gang zlum po ser por byas nas dbus su bum pa legs par bzhag 89.296b pa'i nang du sman sna tshogs blugs nas ras dkar pos kha bkab par byas te/ gsang sngags kyi rgyal po mang du brjod nas phyis bum pa la dngos grub blangs na ci 'dod pa 'grub bo/ /de ltar yang yang byas pas tshe'i dngos grub thob par 'gyur ro/ /gal te mchog grub par 'dod pas sa 'am rin po che la phyag na rdo rje zhal gcig phyag gnyis pa gdan pad ma dang nyi ma la gnas par byas nas de rin po che'i snod du bzhag la maN Dal dkar po khru gang ba byas pa'i steng du khri'u'i steng du bzhag la me tog dang gos dkar pos mchod cing tsan dan dkar po'i chus ci nus par mchod par byed cing / yang tshes brgyad dang / bcu bzhi dang / bcwa lnga dang / gnam stong la de'i dus su smyung ba byas nas/ phyis ni brgyad stong gi grangs su gsang sngags 'don par byed cing rang nyid kyi spyi bor yi ge o~M` dkar po 'od dang ldan pas bdud rtsi'i chu 'bebs par bsam pas khams gsum pa'i nad thams cad zad par bsam zhing slar rang nyid la rims kyis zhu bar byed pa ni rgyud las grub pa'i bsam gtan te/ 'di goms pas gang dang gang 'dod pa thams cad 'grub cing khams gsum gyi dbang phyug tu 'gyur ro/ /gsang ba'i bdag po nga las nyon/ /'jig rten kun las rnam rgyal ba'i/ /sku ni sangs rgyas kun bdag nyid/ /gang gis bgos par gyur pa las/ /ci 'dod rnyed par byed pa mchog /gal te rtog med de bral na/ /ye shes nyid ni bla na med/ /rgyal ba'i stobs kyis rtogs par byed/ /nyon mongs kun las rgyal byed cing / /nad rnams thams cad zad byed cing / /gal te nad med nad bcas byed/ /dbang dang rengs dang dgug pa dang / /brgyal dang gsad dang dbang phyug dang / /zhi dang bsrung 89.297a dang dpal byed dang / /phyir rgyol ba rnams brlag pa yi/ /phra mo 'grub pa smos ci dgos/ /'jig rten las grol bde ba'i lus/ /rgyal ba'i gsung gis legs 'thob bo/ /sku ni 'dir brjod med pas te/ /spyod tshul rnams las 'das pa'o/ /ming dang tshogs las rnam 'das na/ /nyer zhi spros las shin du 'das/ /tshig gi yul ni rnam par bral/ /rdo rje sgo la de dag ni/ /ci bzhin don ni shes 'gyur gyi/ /gzhan du bskal pa stong du yang / /cis kyang shes par ga la nus/ /gal te dmigs pa zad 'dod pas/ /mi dmigs spros med gang zhig la/ /rang gi sems nyid gzhag par bya/ /de la thar pas grol ba'o/ /gal te dga' 'gyur yid yod na/ /dngos 'di shes pas ci ste stong / /de stong spros dang bral ba la/ /shes pa nyid ni ci la brten/ /gsang sngags drag po'i sbyor ba 'di/ /dbang bskur gnang ba med pa dang / /tshul ngan lang tsho phra ba dang / /nga rgyal dregs shing khengs pa dang / /theg pa che la ma mos la/ /yi ge tsam yang bstan pa min/ /gal te brgya lam rmongs pa 'gas/ /bstan na rang nyid phung bar byed/ /de skad du khams gsum las rnam par rgyal ba zhes bya ba'i 'od zer de slar rang gi thugs kar bsdus nas zhal thams cad zhal la thim zhing phyag thams cad phyag la thim nas/ zhal gcig phyag gnyis par gyur te/ hU~M hU~M hU~M zhes pa'i glu blangs so/ /'di la ci ltar dmigs byas bzhin/ /lha rnams kun la dmigs par 'gyur/ /gsang sngags 'bum du brjod byas nas/ /bsnyen pa'i dam pa 'di 'grub bo/ /'das dang ma 'ongs 'ongs gyur pa'i/ /sangs rgyas rnams kyis sngags 'di bshad/ /'di ni sangs rgyas kun gyi gsang / /ye shes chen po zhes brjod do/ /de nas 'khor de dag thams cad ni gtso bo'i thugs kar thim par 89.297b gyur to/ /kwa'i rdo rje chen po ni/ /lag na rdo rje stobs po che/ /dus gsum sangs rgyas thams cad kyi/ /gsang ba'i mdzod 'dzin gyur pa'o/ /bcom ldan 'das phyag na rdo rje gos sngon po can gyi rdo rje gdengs pa'i rgyud las khams gsum rnam par rgyal ba zhes bya ba'i le'u rdzogs s+ho// // paN Di ta a Da ya shrI ma ti zhes bya ba dang / bod kyi lots+tsha ba ban d+he chos kyi dbang phyug grags kyis bsgyur cing zhus te gtan la phab pa'o// // |