@#/ /rgya gar skad du/ badzra su kha kro d+ha tan tra rA dza/ bod skad du/ rdo rje bde khros rgyud kyi rgyal po/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das bdud las rnam par rgyal ba zhes bya ba 'og min gyi gnas gzhan 'phrul dbang byed kyi pho brang na bzhugs so/ /de'i tshe 'dus pa rnams kyi dang po sems dpa' chen po yid cher g.yos te/ gus pas bkur sti dang / rim gro dang phu dud dang bsti stang du byas de/ e ma'o byam mgon thugs rje can/ /'gro ba'i sems can thams cad kun/ /me yis tshig cing mtshon gyis phog /mun par 'khyams nas ri yis non/ /rlung gis khyer ba snying re rje/ /skyabs kyi dam pa bka' stsal 'tshal/ /zhes zhus pas/ der ni mgon pos sku bstan te/ /zhal gyi pad ma rab phye nas/ /spyan gyi gzi mdangs kun la gzigs/ /ljags kyi dkyil nas bka' stsal pa/ /skyob pa'i dam pa 'di yin gyis/ /rdo rje bde dang khros pa yi/ /dum bu gsum pa ngas bshad kyis/ /legs par nyon la yid la zung / /zhes gsungs so/ /rdo rje bde khros kyi rgyud las gtam rgyud kyi rim pa bstan pa'i le'u ste dang po'o// // de nas mngon par bshad bya ba/ /bkra shis maN+Dal legs byas la/ /tshul dang 'thun pa'i bum pa dgod/ /de yang chu gtsang sna bdun blugs/ /gzhan yang shing tog 'bras bu dang / /mngar gyi rnam pa dang / dri'i rnam pa dang / rin po che'i mchog dang / 'bru'i bye brag dang / /sman rnams blugs so/ /bum pa de'i mgrin pa dar sngon pos dkris te/ /steng du bla re phub la gzhag go /rdo rje bde khros kyi rgyud las sgrub rdzas kyi le'u ste gnyis pa'o// // de nas mngon par bshad bya ba/ /sgrub byed rang rgyud dag pa yis/ /bskyed tshul rgyas sam bsdus kyang rung / /hU~M las phyag na rdo rje ni/ /dbu gsum mthing nag phyag bzhi mdzes/ /sku ni che zhing mtshungs 90.56b pa med/ /zhabs kyis rgya mtsho'i nang du yang / /chu srin sbal ba'i steng du brdzis/ /g.yas g.yon dang po'i phyag gnyis kyis/ /rdo rje gsor zhing dril chen rdung / /mtha' gnyis drug pa zhal du 'dren/ /dbu gsum g.yas dkar rigs lngas brgyan/ /dbu g.yon dmar po sbrul gyis mdzes/ /zhal dbus mthing nag lcags mchu can/ /steng du mkha' lding tshangs pa sprul/ /dpa' bo gdug pa dpung pa'i rgyan/ /rin chen lhun po'i ri rab la/ /stegs bcas zhum pa med par bzhugs/ /de ltar lha dang rab sbyar nas/ /de nyid bstan pa'i yan lag gis/ /rang lus tshagasu gzhug par gyis/ /rdo rje bde ba khros pa'i rgyud las lha bsgom pa'i le'u ste gsum pa'o// // de nas mngon par bshad bya ba/ /sgo gsum sbyor ba shes pa yis/ /gsang ba'i snying po 'bum du bzlas/ /o~M badzra tsaN Da sar+b+ba duSh+Ta~M ta ka ha na/ da ha pa tsa hU~M phaT/ bcwa brgyad sngags kyi rgyal po 'di/ /ma byung mi 'byung 'byung mi 'gyur/ /'di bzlas sngon du grub par 'gyur/ /rtag tu mtshan ma bzang po 'byung / /gzhan gyi sbyor ba 'ong mi 'ong / /rang la nges par ston par 'gyur/ /bsnyen pa'i rim pas thub mi thub/ /'bad pas legs par brtag par bya/ /de nas gtor ma'i sbyin pa ni/ /o~M AHhU~M zhes rgyun du gtang ngo / /rdo rje bde khros kyi rgyud las gsang ba'i snying po dang mtshan ltas bstan pa'i le'u ste bzhi pa'o// // de nas mngon par bshad bya ba/ /sten ni rdo rje'i 'od du 'bar/ /bstan pa 'phro tshad hU~M du 'bar/ /'bar ba'i 'od zer kun du 'phro/ /'jig rten ma lus sbyangs nas kyang / /slar la thig le nyid la 'dus/ /dasgra dang bcas te rang gsal 'bar/ /brten par gyur na spro bsdu bya/ /rdo rje bde khros kyi rgyud las me'i bsam gtan gyi le'u ste lnga pa'o// // de nas mngon par bshad bya ba/ /mthing gi shog gu sngon po la/ /gser gyi 'khor lo bris pa'i steng / /bsrung ba'i snying po legs bkod de/ /gang ming rak+Sha sbyar 90.57a bar gyis/ /de yang tri yis yongs bgos te/ /sangs rgyas sems can nyid la bstim/ /de nyid bum par legs bzhugs la/ /mchod cing bzlas brjod gsol ba gdab/ /de nas tshes pa'i dus bzang la/ /rang ngam gzhan la btags gyur na/ /bar chad thams cad nyer zhi nas/ /tshe dpal bsod nams rgyas par 'gyur/ /rdo rje bde khros kyi rgyud las bsrung ba'i le'u ste drug pa'o// // de nas mngon par bshad bya ba/ /'gro ba dug gis gdungs pa la/ /gdug pa'i dbang chen la sogs pa/ /'tshe ba 'di ltar 'byung bar 'gyur/ /mi dga' sems 'phyo 'gro snying 'dod/ /nyams chung 'thibs dang ltas kyang ngan/ /yang yang na zhing gtam bsnol 'ong / /de ni klu yi gnod pa ste/ /tshor nas legs par bcos na bzlog /sa srin mi la 'di ltar gnod/ /lus sbrid sha 'phrig sha ro 'byung / /sha bkra thor bu ngo yang 'gyur/ /de yang tshor nas bcos na bzlog /sa bdag gnod na 'di ltar 'gyur/ /gdon yang shin du ldog 'gyur che/ /na tsha'i zug rngu drag por 'gyur/ /res 'ga' bde ba ltar yang byed/ /skabs su thig le kho nar na/ /de yang bcos dka' shes pas bzlog /gnyan gyi gnod pa 'di yin te/ /shin du na tsha'i tshabs kyang che/ /rkang lag na 'khums dri ma ldog /sha khrag lud nas mig kyang sle/ /kha yo sna yo chu ser za/ /kha yang mi thub gnod pa za/ /chu bur byur na 'tshang yang che/ /tshor bar mi chog bsgrim pa gces/ /gdon tshogs gzhan yang yun mi rtag /phra mo tsam la sogs pa zlog /kun la bsgrims te bcos na 'tsho/ /rdo rje bde khros kyi rgyud las gzhan gyi gnod pa brtag pa'i le'u ste bdun pa'o// // de nas mngon par bshad bya ba/ /dbang chen la sogs thams cad la/ /mchod dang gtor mas mgu bar bya/ /ci 'dod pa yi rdzas rnams sbyin/ /rten yod gnas su legs par sba/ /snyan pa'i tshig gi bsgo byas la/ /bum par nor bu rin chen gzhug /mdzes pa'i dar sna 'bru yi mdzod/ /gang gi rten la sbas gyur na/ /gnod 90.57b pa rags pa zhi bar 'gyur/ /rdo rje bde khros kyi rgyud las zhi byed mchod thabs kyi le'u ste brgyad pa'o// // de nas mngon par bshad bya ba/ /btsan dug gu gul gla rtsi dang / /shu dag shing kun mu zi drug /gsang sngags btab ste lus la byug /gu gul nya mkhris gla rtsi dang / /sgog pa shu dag dri chen rnams/ /bdug pa byas te yang na bkru/ /gser g.yu byi ru mig ma phug /btsan dug rma bya'i mkhris par bcas/ /bcangs na bsrung ba'i mchog tu 'gyur/ /rdo rje bde khros kyi rgyud las rten 'brel rdzas kyi le'u ste dgu pa'o// //rdo rje bde khros kyi rgyud las dum bu dang po bstan pa'o// // de nas mngon par bshad bya ba/ /gdug pa thams cad 'dul ba'i phyir/ /drag sngags 'di dag brjod par bya'o/ /o~M mA ra Na sod sod/ mA ra Na bying bying / mA ra Na rmugs rmugs/ mA ra Na ha la ha la/ mA ra Na dun dun/ mA ra Na myos myos/ mA ra Na myos bying thum ril dzaH/ mi tshig spangs te drag sngags 'di/ /dbugs ma shor bar sbub mas drangs/ /bum par bstim nas rtags thob nas/ /'thungs sam bkrus na dngos grub 'thob/ /sngags la gang ming sbyar byas nas/ /yungs kar gdug pa'i phur pa la/ /brjod de las la sbyar gyur na/ /gang la bzlas pa brlag par 'gyur/ /ma bsgrubs lan cig brjod pas kyang / /dngos grub thams cad thob par 'gyur/ /ma byung mi 'byung 'byung mi 'gyur/ /rdo rje bde khros kyi rgyud las drag sngags khros pa'i le'u ste bcu pa'o// // de nas mngon par bshad bya ba/ /rdzas bsag lha bskyed drag sngags bzlas/ /dgos pa tshang ba'i bum pa ste/ /mi dmigs ba~M las rin po che'i/ /bum pa tshul dang 'thun par bsam/ /de nas ba~M dang la~M las ni/ /chu dang sa yi dkyil 'khor bsam/ /lha bsgoms khyad par bum pa 'dzin/ /mchu ni rdo rje'i sbu gu ste/ /de nas sngags kyi 'od zer 'phros/ /phyir 'phros gdug pa ma lus bsreg /'od zer lcags kyi sbub mar drangs/ /bum par khro chu khol mar gyur/ /de 'thungs bkrus pas gang gnod pa/ /rdul du brlag ste dag par bsam/ /brtsams pa'i las la the tshom med/ /rdo rje khros pa'i rgyud 90.58a las bum pa khros pa'i le'u ste bcu gcig pa'o// // de nas mngon par bshad bya ba/ /rdzas bsag lha bsgom 'khor lo bskor/ /ro ras byi dug bya rog sgros/ /khru gang tsam gyi mtshan nyid la/ /'chi bar byed pa'i snag tsha la/ /'ug pa'i sgro rtsa g.yas pa yis/ /drag sngags mnyam pa'i re'u mig bri/ /de nas mtshan mar gang dmigs gzugs/ /kha dog rigs bzhi nyid du bya/ /de snying drag sngags re re dgod/ /maN Dal gtsang ma dris byugs te/ /dkar dang dmar dang ser dang ljang / /rma bya'i sgro yis brgyan byas te/ /lha bsgom khyad par 'khor lo 'dzin/ /'khor lo bskor ba'i rim pa ni/ /drags sngags mnyam pa'i 'khor lo bskor/ /sngags ni/ nA ga tsakra mA ra Na hU~M phaT/ gang bsams 'di la the tshom med/ /rdo rje khros pa'i rgyud las 'khor lo khros pa'i le'u ste bcu gnyis pa'o// // de nas mngon par bshad bya ba/ /rdzas bsag lha bsgom phur pa gdab/ /lcags sam seng ldeng dug shing la/ /sngags grangs mnyam pa'i phur pa bsham/ /'khor lo'i mtha' ma bskor te dgod/ /lha bsgom khyad par phur bu 'dzin/ /drag sngags bzlas pa'i rim pa ni/ /nA ga badzra kI la ya mA ra Na hU~M phaT/ /sngags grangs mnyam pa'i phur pa bsham/ /brtsam pa'i las la the tshom med/ /rdo rje bde khros pa'i rgyud las phur pa khros pa'i le'u ste bcu gsum pa'o// // de nas mngon par bshad bya ba/ /rdzas bsag lha bsgom sbyin sreg bya/ /gdug pa'i shing bu khru gang tshad/ /sngags kyi grangs kyang mnyam par bya/ /sngon dmar skud pas rim gsum dkri/ /bar der 'khor lo'i srog rtsa gcad/ /lag tu gri thog drag sngags brjod/ /nA ga tik+Sh+Na che ge mo mA ra ya hU~M phaT/ /rim par bgrangs te g.yang gzhi'i khud/ /byang shar mtshams su rnam par gzhag /de nas maN Dal dbus nyid du/ /hom khung bris te dug khrag byug /nang du hom du gzugs par bya/ /'khor lo gris gtub thogs nas ni/ /grangs dang mnyam par bsreg par bya/ /me de yugs sa'i khyim nas bslang / /lha bsgom khyad par me dpung 'dzin/ /gsang sngags 90.58b bzlas pa'i rim pa 'di/ /nA ga tsita ta dz+wa la ra~M/ mA ra ya phaT/ /bsregs nas las brtsams 'grub par 'gyur/ /rdo rje bde khros kyi rgyud las me dpung khros pa'i le'u ste bcu bzhi pa'o// // de nas mngon par bshad bya ba/ /rdzas bsag lha bsgom mnan sngags bzlas/ /chu srin sram mam byi ba'i mgor/ /bsreg pa'i thal ba bsdus byas la/ /gang yin nyid kyi sbyor ba bcas/ /lha bsgom khyad par ri rab 'dzin/ /drag sngags bzlas pa'i rim pa ni/ /nA ga stam b+ha ya nAn/ /mnan byas chu srin kha ru bsgom/ /'di byas gang la bzlas pa brlag /'di la the tshom mi bya'o/ /rdo rje bde khros kyi rgyud las ri rab khros pa'i le'u ste bcwa lnga pa'o// //rdo rje bde khros kyi rgyud las dum bu gnyis pa'o// // de nas mngon par bshad bya ba/ /glang po'i lpags par 'brug bris nas/ /gang ming bcug ste drag sngags bzlas/ /gnam lcags 'bab pa bzlog par 'gyur/ /'bru yi pad ma 'dab brgyad la/ /klu yi gzugs rnams bris pa la/ /bstim nas drag sngags rgyab gyur na/ /gnam chu dus su phebs par 'gyur/ /thod par e bris sngags kyis bskor/ /gang yin bcug la bstim pa la/ /drag sngags gang yin bzlas byas na/ /myur du 'grub par gdon mi za/ /srog chags 'jigs par gyur pa la/ /'chi ba'i chu yis drag sngags bri/ /'jigs byed bkug ste de la mchod/ /de nyid yungs kar thum por 'debs/ /gang la btags pa bsrung ba'i mchog /rdo rje bde khros kyi rgyud las las phra mo'i le'u ste bcu drug pa'o// // de nas de dag la 'khor rnams mngon par dga' ste/ bcom ldan 'das la mchod cing bstod nas rjes su yi rang ba phul te mi snang bar gyur to/ /mnyam pa chen po la bzhag pa'o/ /rdo rje bde khros kyi rgyud las rjes su yi rang ba'i le'u ste bcu bdun pa'o// //rdo rje bde khros kyi rgyud las dum bu gsum pa'o// //rdzogs s+ho// //mchog tu gsang ba'o/ /dz+nyA na kA ras bsgyur ro// // // // // // // // |