@#/ /rgya gar skad du/ shri kr-iSh+Na ya mA ri tan tra rA dzA tri kalpa nA ma/ bod skad du/ dpal gshin rje'i gshed nag po'i rgyud kyi rgyal po rtog pa gsum pa zhes bya ba/ bcom ldan 'das dpal gshin rje'i gshed po la phyag 'tshal lo/ /don dam chos sku zhi ba nyid/ /gang 'dir khams gsum rnam rgyal te/ /gshin rje'i dgra zhes grags pa yi/ /'khor lo bskor ba'i cho ga bshad/ /yon tan ldan pa'i sngags pa yis/ /cho ga bzhin du bsnyen byas nas/ /dur khrod dben pa la sogs par/ /maN+Dal khru do'i tshad du bya/ /dri dang ba yi rnam lnga dang / /nyi zla sogs pas byi dor bya/ /ba lang la sogs dam rdzas lnga/ /gzhan yang tshogs kyi 'khor lo dang / /phyi nang mchod pa'i bye brag gis/ /legs par mchod pa byas nas ni/ /'khor lo bri dang btu ba dang / /drang dang bsre dang spo ba brtsam/ /sngags pa rnal 'byor ldan pa yis/ /lho yi phyogs su kha bltas te/ /dam tshig rjes su dran pa yis/ /o~M badzra sa ma ya s+t+wa~M/ /gsang sngags 'di ni dran byed cing / /'khor lo bri ba brtsam par bya/ /dbus nas sor tshad bcu drug par/ /kun nas zlum por bskor ba ni/ /'di ni nang gi 'khor lo ste/ /rim pa gsum du bskor ba la/ /sgo med lcags mkhar bcu drug bya/ /'di ni gshin rje'i grong khyer te/ /srid pa gsum gyi 'jug sa yin/ /de yi phyi rim mu khyud gsum/ /kun tu lcags ris bskor ba ste/ /mu khyud de dag re re la'ang / /khang pa sum bcu rtsa gnyis mdzes/ /'gro ba chos bzhin spyod pa yi/ /'khor lo 'di ltar bris nas ni/ /phyi rim mu khyud tha ma la/ /yi ge ka sogs da yig mtha'/ /nga nya bsal nas dgod par bya/ /yi ge d+ha sogs k+ShaHyig mthar/ /de yi rjes su bri bar bya/ /mu khyud dbus ma dag la ni/ /dbyangs yig bcu drug nyis 'gyur dgod/ /btu dang dgod sogs brtsom pa na/ /mtshan ma 'di dag shes par bya/ /zla ba mig dang yon tan dang / /rig byed mda' dang dbang po dang / /rgya mtsho bkra shis gza' dang 90.151b phyogs/ /drag po nyi ma yan lag sa/ /tshes zhes bya bar rab tu grags/ /phyi rol mu khyud tha ma la/ /shar gyi tshangs thig nas brtsams te/ /rim min gza' can khang pa nas/ /yi ge bkra shis tsam blangs te/ /nang gi ngos kyi mu khyud kyi/ /tshangs thig gi ni ngos dag la/ /phyogs bzhir mig gi tshad du sbyin/ /rim min phyogs can khang pa nas/ /yi ge mig gi tshad blangs te/ /shar du de yi g.yas g.yon gzhag /rim min bkra shis khang pa nas/ /dbyangs yig gnyis pa can blangs te/ /mig gi tshad du byas nas ni/ /de yi ngos la re re gzhag /nub kyi tshangs thig nas bgrangs pa'i/ /rgya mtsho can gyi khang pa nas/ /dbyangs yig bcu gcig dang ldan pa/ /mig gi tshad du blangs nas ni/ /lho phyogs de yi g.yas g.yon gzhag /nub nas rim pa min pa yi/ /zla ba can gyi khang pa nas/ /dbyangs yig bcu gsum dang ldan pa/ /mig gi tshad du blangs nas ni/ /lho ru de rjes sbyin par bya/ /de nyid dbyangs yig gsal ba ni/ /mig gi tshad du blangs nas ni/ /sngon bzhin nub kyi ngos su sbyin/ /nub nas bkra shis khang pa nas/ /dbyangs yig bcu gsum par ldan pa/ /mig gi tshad du blangs nas ni/ /nub kyi ngos la de bzhin sbyin/ /byang nas bkra shis khang pa nas/ /dbyangs yig bcu gcig par ldan pa/ /mig gi tshad du blangs nas ni/ /byang gi ngos la de bzhin sbyin/ /rlung gi sa bon zhes bya ba/ /mig gi tshad blangs de rjes sbyin/ /mda' can khang pa nang gnas pa/ /'od kyi gong bur byas pa dang / /de nyid nas ni bgrangs pa yi/ /sa can khang pa la gnas pa/ /dbyangs yig gsum par ldan pa dag /zla ba'i tshad du blangs nas ni/ /byang shar mtshams su re re sbyin/ /rgya mtsho'i khang pa na gnas pa/ /dbyangs yig gnyis pa dang ldan dag /rim min yon tan khang pa nas/ /zla ba'i tshad du bzung nas ni/ /shar lho'i mtshams su de bzhin sbyin/ /rim min bkra shis khang pa nas/ /dbyangs yig lnga pa ldan pa dag /yan lag can gyi khang pa nas/ /zla ba'i tshad du blangs nas ni/ /lho nub mtshams su de bzhin sbyin/ /rim min tshes 90.152a can khang pa nas/ /dbyangs yig gsum dang ldan pa dang / /rim min bkra shis khang pa nas/ /zla ba'i tshad du blangs nas ni/ /nub byang mtshams su de bzhin sbyin/ /de ltar dgod pa byas nas ni/ /de nas drang ba brtsam par bya/ /dam tshig rjes su dran byed cing / /rdo rje shugs dang ldan pa yis/ /shar gyi tshangs thig ngos gnyis nas/ /yi ge zung ldan drangs nas ni/ /dbus kyi khang par gzhag par bya/ /phyogs gzhan tshangs thig ngos dag nas/ /de bzhin zung ldan drangs nas ni/ /de bzhin dbus kyi khang par gzhag /de nas shar gyi yi ge yang / /zung ldan gnyis pa drangs nas ni/ /rim pa gnyis pa'i khang par gzhag /phyogs gzhan du yang de bzhin no/ /shar gyi zung ldan gsum pa yang / /rim pa gsum pa'i khang par drang / /phyogs gzhan du yang de bzhin no/ /mtshams kyi yi ge ya bral ni/ /rang rang nang gi mtshams su drang / /de dag phyung ba'i khang steng du/ /dbyangs kyi yi ge drang bar bya/ /dbyangs kyi yi ge'i gzhi la ni/ /ming gi yi ge drang bar bya/ /ming gi yi ge'i gzhi la ni/ /so so las dang mthun pa yi/ /bskul ba'i yi ge dgod par bya/ /gsad dang bskrad dang dbye ba la/ /yi ge phaT ni gzhag par bya/ /mnan pa la ni yi ge la~M/ /zhi ba la ni yi ge o~M/ /rgyas pa de bzhin yi ge swa/ /dbang la ba~M gis brgyan pa ste/ /dgug pa la ni yi ge dzaH/ /de la las kyi 'od zer ni/ /zhi ba chu ste rgyas pa sa/ /dbang ni rlung ste drag po me/ /dbye dgug bskrad pa dbang dang mthun/ /mnan pa la ni rgyas pa bzhin/ /drang ba'i sbyor ba byas nas ni/ /bsre ba'i sbyor ba brtsam par bya/ /gnyis med sngags dang ldan pa yis/ /dbus kyi bkra shis yi ge ya/ /zla ltar 'od kyi gong bur bya/ /'od kyi gong bur de nang du/ /'dod pa'i bsgrub bya gzhag par bya/ /de dkyil rang ming dang por gzhag /phyogs kyi khyim na gnas pa yi/ /yi ge zung ma thams cad kyang / /de tshe 'od kyi gong bur bya/ /sngags kyi rgyal po bcu pa yang / /bcu gnyis khyim du spel te bri/ /byin rlob hU~M zhes bya ba yang / / 90.152b khang pa bzhi la zur re mdzes/ /yongs su dag par bkod byas nas/ /mchod dang gtor ma byas nas ni/ /spo ba dag ni brtsam par bya/ /las kyi dbye ba ji lta bar/ /'khor lo'i ras ni blangs bya ste/ /zhi ba dang ni rgyas pa la/ /shin du dge ba'i ras la bya/ /dbang dang dgug pa smad 'tshong sogs/ /bsad dang dbye dang bskrad pa dang / /mnan pa la ni dur khrod ras/ /gi ha~M gur gum zhi rgyas la/ /dbang dang dgug la tsan dan dmar/ /mnan pa la ni ldong ros sogs/ /bskrad la bya rog khrag gis te/ /dbye la rta dang ma he'i 'o/ /bsad la dug la sogs pas bri/ /dge ba'i ras la bzang po'i shing / /dge min la ni rus pa dang / /lcags la sogs pas bri bar bya/ /zhi ba shar bltas dbang la nub/ /rgyas pa byang ste drag po lho/ /gzhan yang ci rigs sbyar bar bya/ /zhi rgyas dbang dang dgug pa la/ /sa bskor rim bzhin dgod byas te/ /gnam skor dag ni rim las bzlog /bsad bskrad dbye dang mnan pa la/ /sa skor rim las bzlog pa ste/ /gnam bskor dag ni rim bzhin bri/ /'di ltar legs par ma bris na/ /'khor lo rang la ldog par 'gyur/ /de bas nan tan bskyed de bya/ /ras kyi 'khor lo legs zin nas/ /maN+Dal la gnas 'khor lo de/ /ras kyi 'khor lo spyan drangs te/ /rdo rje bsdu ba'i sbyor ba yis/ /maN+Dal 'khor lo bsdu bar bya/ /ras kyi 'khor lo mchod nas ni/ /bden pa'i byin brlabs dmigs par bya/ /ji ltar gsungs pa'i cho ga bzhin/ /'khor lo sba ba byas nas ni/ /gsang sngags bzlas pa brtsam par bya/ /o~M` badzra sa ma ya s+t+wa~M/ /dam tshig gi sngags so/ /o~M` badzra be ga hU~M/ /rdo rje shugs kyi sngags so/ /o~M` a sa me tri sa me ma hA sa ma ye swA hA/ yi ge bsre ba'i sngags so/ /o~M` badzra sa mA dzaH/ 'khor lo spo ba'i sngags so/ /o~M` ya ma rA dzA sa do me ya/ ya me do ru Na yo da ya/ ya da yo ni k+She ya/ ya k+She yats+tsha ni rA ma ya phaT phaT/ 'di ni rtsa ba'i gsang sngags te las thams cad pa'o/ /o~M` hrI Sh+T+rIHwi kr-i tA na na hU~M phaT/ 'di ni las kyi gsang sngags te las thams cad pa'o/ / 90.153a shAn+tiM ku ru swA hA/ /zhi bar bskul ba'o/ /puSh+TiM ku ru swA hA/ rgyas pa'i 'o/ /ba sh+yaM ku ru swA hA/ dbang gi'o/ /mA ra ya phaT/ gsad pa'i 'o/ /bi dwe Sha ya phaT/ dbye ba'i 'o/ /uts+tshA Ta ya phaT/ bskrad pa'i 'o/ /s+t+waM b+ha ya hU~M la~M/ mnan pa'i 'o/ /A kaR+Sha ya hU~M dzaH/ dgug pa'i'o/ /o~M muH/ slar dgrol ba'i 'o/ /A li kA li'i grong khyer ni/ /gsang sngags 'byung ba'i rtsa ba ste/ /las kyi btson ra dag kyang yin/ /yi ge btu ba med na ni/ /gsang sngags sgra ni log par 'gyur/ /yi ge tshang bar ma bkod na/ /gsang sngags sgra ni nyams par 'gyur/ /gsang sngags brda yis ma brjod na/ /sngags ni dngos grub med par 'gyur/ /drang ba dag ni ma byas na/ /shin du 'khor bar mi 'gyur ro/ /yi ge bsre ba ma byas na/ /bcu drug khang pa don med 'gyur/ /bskor phyogs log na don mi 'grub/ /rig sngags nyams dang log pa ni/ /lha min g.yul las pham pa dang / /dbang po'i dgra yis dgra bsad bzhin/ /'khor lo spo ba ma byas na/ /cho ga dag ni nyams par 'gyur/ /rgyu yin pa dang sbyor ba dang / /dad pa brtan pas 'grub par 'gyur/ /de bas nan tan bskyed de bya/ /dpal gshin rje'i gshed nag po'i 'khor lo bri ba'i cho ga rgyas pa'i rtog pa ste dang po'o// // de nas gzhan yang bshad bya ba/ /sngags pas rtag tu bsten pa ni/ /ru sbal 'o ma zhes bya dang / /de bzhin 'od kyi lo ma dang / /'jim pa skam po nyid dang ni/ /de bzhin me yi khu ba dang / /sgra brnyan gyi ni rdzas dag ste/ /'di rnams rtag tu spyad na ni/ /rang bzhin gyis ni nad med cing / /tshe ring dbang po rgyas pa dang / /rtag tu lang tsho dar la bab/ /lha rnams kun gyis byin gyis rlob/ /'di la dpyad par mi bya ste/ /mthu dang ngo bo nyid kyis 'grub/ /ting 'dzin sngags kyis byin brlabs na/ /las kyi rnam smin sbyong bar byed/ rig pa 'dzin pa'i sa la gnas/ /de phyir cho ga bzhin du bsten/ /tshes gcig skya rengs shar tsam na/ /snod ma reg la ru sbal zho/ /drod ma yal bar btung ba'i/ /yang na nyi ma'i 90.153b sbu gus btung / /mar gyi ngo yi tshes gcig la/ /'od kyis lo ma btsil nas ni/ /de nyid nas ni bzung nas kyang / /zhag gsum skya rengs shar ba na/ /lo ma de bcang bza' bar bya/ /yang na nyi ma'i sbu gus bya/ /'jim pa bzang po sbyar nas ni/ /zhag gsum chu yi nang du sba~M`/ /de blangs nas ni yang skams nas/ /phye ma byi la'i spar tshad re/ /ba yi 'o ma dang sbyar nas/ /sngags pas rtag tu btung bar bya/ /me yi sdong po sar ba ni/ /sa yi mar gyis dril nas ni/ /kha sbyar snod dang ldan byas nas/ /me chu sa yis btsir nas ni/ /btung ngam nyi ma'i sbu gus btung / /lan tshwa bral ba'i sgra las ni/ /zhag gsum bcings pa'i dgra brnyan rdzas/ /nam gyi gung la sngags pas blangs/ /cha gsum snod du zhag gsum gzhag /rtse mo'i cha ni byug pa ste/ /dbus ma'i cha ni bdud rtsi yin/ /rtsa ba'i cha ni dor bar bya/ /'di rnams so sor bsten pa na/ /tha mar 'bras bu gsum gyi phye/ /byi la'i spar tshad re dang sbyar/ /ma sbyar na yang nyes pa med/ /tshogs par bsten na bzang bar bshad/ /re re bsten kyang nyes pa med/ /'jam dpal gyi rtog pa las dam rdzas sman du bsgyur te bsten pa'i cho ga'i rtog pa ste gnyis pa'o// // de nas gzhan yang bshad pa ni/ /las kyi grogs kyi bye brag ste/ /zhi ba'i las ni zla ba yin/ /rgyas pa de bzhin mig tu bsgrags/ /dbye ba yon tan zhes bya ste/ /dbang du bya ba rig byed yin/ /dgug pa'i las ni de bzhin mda'/ /bskrad dang mnan pa dbang po yin/ /mnan pa rjes su 'brang ba yis/ /gsad pa'i las ni rgya mtshor 'dod/ /las rnams de dag re re yang / /'phags sogs mchod sbyin dang po ste/ /nyi ma gnyis pa gtor ma sbyin/ /gsum pa bzlas pa rnam par 'bad/ /bzhi pa sbyin sreg tshang bar bya/ /lnga pa las kyi 'khor lo bskor/ /drug pa bsam gtan rtse gcig bya/ /bdun pa las kyi lhag chad bskang / /grogs kyi las la khyad par du/ /las kyi gtsor ni gang bsgrub de'i/ /'khor lo bskor ba nyi ma bzhi/ /las kyi bye brag 'di shes na/ /zhi bas 'jigs pa brgyad las skyob/ / 90.154a rgyas pas yon tan drug dang sbyor/ /dbang gis mos pa rnam bzhir 'gyur/ /dbye bas gsang sde brgyad dang 'byed/ /mnan pas dbang po drug 'ching byed/ /gzhan ni ji ltar de bzhin no/ /sngags dang rdzas kyi sbyor ba la/ /dpyad na dngos grub mi 'grub ste/ /gal te yid gnyis za gyur tam/ /bsam par 'gyur ram dad pa nyams/ /de tshe dngos grub nye ba yang / /phyir ldog 'gyur bar gdon mi za/ /dad pa brtan pos bsgrub pa na/ /nam mkha' med par gyur na yang / /sngags kyi dngos grub med mi srid/ /lha dang drang srong gis bshad pa'i/ /rig sngags bslu ba mi srid na/ /'dod chags bral bas bshad pa yi/ /gsang sngags sbyor bas bslu ba ni/ /ma byung 'byung bar mi 'gyur ro/ /chos nyid bsam gyis mi khyab pa'i/ /don la the tshom med pa yi/ /mkhas pa la ni dngos grub nye/ /yang na blun po dad pa brtan/ /de la sbyor ba'i dngos grub nye/ /rtog cing dpyod pa'i rtog ge pa/ /de la sbyor ba'i dngos grub ring / /bla mas man ngag bstan byas kyang / /slob ma yid gnyis yod pa na/ /de la dngos grub ring bar bshad/ /bla mas man ngag sbas byas kyang / /slob ma yid gnyis mi za zhing / /bla ma'i man ngag dam pa zhes/ /gces spras byas na 'grub par nges/ /de yi phyir na sngags pa yis/ /rang gi yid gnyis spang ba'i phyir/ /bla ma mnyes par bya ba gces/ /bsnyen bkur byas na nus mthu che/ /gsang ste brjod pas bar chad med/ /yon chen phul ba byas pas ni/ /rang sems rin chen rnam gnyis 'gyur/ /rin chen gnyis las grub pa 'byung / /dkon par gyur pas bsngags pa brjod/ /bsngags na yon tan 'byung 'gyur te/ /bsngags pa dag ni ma byas na/ /ji ltar yid bzhin nor bu yang / /gang gis bsngags pa ma byas pa/ /de la 'dod don mi ster ro/ /dad pa sangs rgyas dad pa chos/ /dad pa dge 'dun dad pa ma/ /dad pa bla ma dad pa pha/ /dad pa lam chen dad pa gru/ /dad pa yid bzhin nor bu ste/ /dad pa gsang sngags dngos grub nyid/ /dad pa bsod nams nor nyid de/ /de yi phyir na sngags pa yis/ / 90.154b rang sems dad pa bskyed pa'i phyir/ /gzhan la gus pas mchog tu bkur/ /dpal gshin rje'i gshed nag po'i 'khor lo bskor ba'i cho ga las/ las kyi rgyud dang grogs bsten pa'i rtog pa ste gsum pa'o// //dpal gshin rje'i gshed nag po'i rgyud rtog pa gsum pa rdzogs s+ho// |