// rgya gar skad du/ Ar+ya kau shi ka pradz+nyA pA ra mi tA nA ma/ bod skad du/ 'phags pa shes rab kyi pha rol tu phyin pa kau shi ka zhes bya ba/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ri la dge slong gi dge 'dun chen po dang / byang chub sems dpa' 'bum phrag du ma thams cad kyang gzhon nur gyur pa sha stag dang thabs gcig tu bzhugs te/ de nas bcom ldan 'das kyis lha'i dbang po brgya byin la bka' stsal pa/ kau shi ka de la shes rab kyi pha rol tu phyin pa'i don ni 'di yin te/ shes rab kyi pha rol tu phyin pa gnyis su blta bar mi bya/ gnyis ma yin par yang ma yin/ mtshan mar ma yin/ mtshan ma ma yin par yang ma yin blangs bar yang ma yin/ dor bar yang ma yin/ bsnan par ma yin/ bsnan pa med par yang ma yin/ kun nas nyon mongs par ma yin/ kun nas nyon mongs pa ma yin par yang ma yin/ rnam par byang bar ma yin/ rnam par byang ba ma yin par yang ma yin/ spang bar ma yin/ spang ba ma yin par yang ma yin/ gnas su ma yin/ gnas su ma yin par yang ma yin/ sbyor bar ma yin/ sbyor ba ma yin par yang ma yin/ 'brel bar ma yin/ 'brel bar ma yin par yang ma yin/ rkyen du ma yin/ rkyen ma yin par yang ma yin/ chos su ma yin/ chos ma yin par yang ma yin/ de bzhin nyid ma yin/ de bzhin nyid ma yin par yang ma yin/ yang dag pa'i mthar ma yin/ yang dag pa'i mthar ma yin par yang ma yin no/ /kau shi ka de bzhin du/ 96.20a shes rab kyi pha rol tu phyin pa'i don ni 'di lta ste/ chos thams cad mnyam pa nyid kyi phyir shes rab kyi pha rol tu phyin pa nyid mnyam mo/ /chos thams cad zab pa'i phyir shes rab kyi pha rol tu phyin pa zab bo/ /chos thams cad dben pa'i phyir shes rab kyi pha rol tu phyin pa dben no/ /chos thams cad g.yo ba med pa'i phyir shes rab kyi pha rol tu phyin pa g.yo ba med do/ /chos thams cad rloms med pa'i phyir shes rab kyi pha rol tu phyin pa rloms sems med do/ /chos thams cad 'jigs pa med pa'i phyir shes rab kyi pha rol tu phyin pa 'jigs pa med do/ /chos thams cad bag tsha ba med pa'i phyir shes rab kyi pha rol tu phyin pa bag tsha ba med do/ /chos thams cad ro gcig pa'i phyir shes rab kyi pha rol tu phyin pa ro gcig go /chos thams cad skye ba med pa'i phyir shes rab kyi pha rol tu phyin pa skye ba med do/ /chos thams cad 'gags pa med pa'i phyir shes rab kyi pha rol tu phyin pa 'gags pa med do/ /chos thams cad nam mkha' lta bu'i phyir shes rab kyi pha rol tu phyin pa nam mkha' lta bu'o/ /gzugs mu med pa'i phyir shes rab kyi pha rol tu phyin pa mu med do/ /de bzhin du tshor ba dang / 'du shes dang / 'du byed rnams dang / rnam par shes pa mu med pa'i phyir shes rab kyi pha rol tu phyin pa mu med do/ /sa'i khams mu med pa'i phyir shes rab kyi pha rol tu phyin pa mu med do/ /de bzhin du chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams mu med pa'i phyir shes rab kyi pha rol tu phyin pa mu med do/ /ri rab mu med pa'i phyir shes rab kyi pha rol tu phyin pa mu med do/ /rgya mtsho mu med pa'i phyir shes rab kyi pha rol tu phyin pa mu med do/ /rdo rje mnyam pa'i phyir shes rab kyi pha rol tu phyin pa mnyam mo/ /chos thams cad dbyer med pa'i phyir shes rab kyi pha rol tu phyin pa dbyer med do/ /chos thams cad kyi ngo bo nyid dmigs su med pa'i phyir shes rab kyi pha rol tu phyin pa'i ngo bo nyid dmigs su med do/ /chos thams cad bsal ba med par mnyam pa'i phyir shes rab kyi pha rol tu phyin pa bsal ba med par mnyam mo/ /chos thams cad byed pa med pa'i 96.20b phyir shes rab kyi pha rol tu phyin pa byed pa med do/ /chos thams cad bsam gyis mi khyab pa'i phyir shes rab kyi pha rol tu phyin pa bsam gyis mi khyab bo/ /de bzhin du sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin pa dang / thabs kyi pha rol tu phyin pa dang / smon lam gyi pha rol du phyin pa dang / stobs kyi pha rol du phyin pa dang / ye shes kyi pha rol du phyin pa 'khor gsum yongs su dag pas mu med pa'i phyir shes rab kyi pha rol du phyin pa mu med do/ /shes rab kyi pha rol tu phyin pa zhes bya ba ni 'di ltar stong pa nyid bcwa brgyad de/ 'di lta ste/ nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong nyid dang / chos thams cad stong pa nyid dang rang gi mtshan nyid stong pa nyid dang / mi dmigs pa stong pa nyid dang / dngos po med pa stong pa nyid dang / ngo bo nyid stong pa nyid dang / dngos po med pa'i ngo bo nyid stong pa nyid de/ mdor na stong pa nyid 'di ni shes rab kyi pha rol tu phyin pa zhes bya'o/ /skar ma rab rib mar me dang / /sgyu ma zil pa chu bur dang / /rmi lam glog dang sprin lta bu/ /'dus byas de ltar blta bar bya/ /na mo b+ha ga ba t+yai Ar+ya pradz+nyA pA ra mi tA ye/ A+oM d+hIHhrIHshrI shru ti smri smri ti ma ti ga ti bi dza ye swA hA/ 'gag pa med cing skye med la/ /chad pa med cing rtag pa med/ /tha dad don min don gcig min/ /'ong ba med cing 'gro med la/ /spros pa zhi bas zhi ba yi/ /rten cing 'brel bar 'byung ston pa/ /rdzogs pa'i sangs rgyas gang yin pa/ /smra mchog de la phyag 'tshal lo/ /bcom ldan 'das kyis de skad ces bka' stsal nas/ tshe dang ldan pa shA ra dwa ti'i bu dang / lha'i dbang po brgya byin dang / dge slong de dag dang / byang chub sems dpa' de dag dang / lha dang / mi dang / lha ma yin dang / dri zar bcas pa'i 'jig rten yid rangs te/ bcom ldan 'das kyis gsungs pa la mngon par bstod do// //'phags pa shes rab kyi pha rol du phyin pa kau shi ka zhes bya ba/ rdzogs s+ho// // 96.21a [This is a blank page without image] |