@#/ /rgya gar skad du/ Ar+ya hi ra N+ya pa tI nA ma d+ha ra NI/ bod skad du/ 'phags pa dbyig dang ldan pa zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das dga' ldan na la ba dkar po lta bu'i rdo leb la byang chub sems dpa' stong phrag du ma thams cad kyang 'di lta ste/ bla na med pa yang dag par rdzogs pa'i byang chub tu lung bstan pa/ skye ba gcig gis thogs pa sha stag dang thabs gcig tu bzhugs te/ de nas bcom ldan 'das kyis byang chub sems dpa' sems dpa' chen po legs par gnas la bka' stsal pa/ legs par gnas byang chub sems dpa' sems dpa' chen po gang dbyig dang ldan pa'i gzungs 'di 'dzin par mi 'dod pa des/ 'das pa dang / ma byon pa dang / da ltar byung ba'i de bzhin gshegs pa rnams ma mthong ngo / /ma thos so/ /ma myong ngo / /gang gis 'di ltar de bzhin gshegs pa rnams mthong ba dang / thos pa dang / myong ba des gzungs thob bo/ /de ci'i phyir zhe na/ 'di ltar legs par gnas byang chub sems dpa' sems dpa' chen po ni bdag gis bsod nams byas so zhes mi 'dzin/ bdag gis bsod nams ma yin pa dang / dge ba dang / mi dge ba byas so zhes mi 'dzin to/ /de ci'i phyir zhe na/ 'di ltar legs par gnas byang chub sems dpa' sems dpa' chen po ni gzungs 'dzin par mi rtog /rnam par mi rtog go /byang chub sems dpa' sems dpa' chen po gzungs thob pa ni 'das pa dang / ma 'ongs pa dang / da ltar byung ba'i chos rnams la dngos por ram/ mtshan nyid du mi rtog /yongs su mi rtog ste/ rkyen du ma yin/ rkyen med par ma yin/ 'gro bar ma yin/ 'gro ba med par ma yin/ 'chi 'pho bar ma yin/ skye bar ma yin/ stong par ma yin/ mi stong bar ma yin/ mtshan mar ma yin/ mtshan ma med par ma yin/ smon par ma yin/ smon pa med par ma yin/ skye bar ma yin/ 'gag 97.208b par ma yin no/ /legs par gnas byang chub sems dpa' sems dpa' chen po gang mtha' 'dis spyod pa de ni ye shes la gnas pa zhes bya'o/ /gang gi tshe ye shes la gnas par gyur pa de'i tshe mya ngan las 'das pa zhes bya'o/ /gang gi tshe mya ngan las 'das par gyur pa de'i tshe dbyig dang ldan pa'i gzungs len cing kun chub par byed la 'dzin te/ don nam tshig 'bru yang yongs su zad par mi 'gyur ro/ /yongs su ma brtags pa'i tshul khrims can yang yin te/ bden pa'i tshul khrims dang / rnam par dag pa'i tshul khrims can no/ /ma brtags pa'i chos can yin te/ bden pa'i chos can dang / rnam par dag pa'i chos can no/ /gzhan gyi dring la mi 'jog cing rang gi chos la zhugs so/ /sangs rgyas la lhag par bya ba byas pa'o/ /rig pa'i cho ga la zhugs pa'o/ /legs par gnas de ltar na byang chub sems dpa' sems dpa' chen po mi chags so/ /mi 'chang ngo / /mi 'grol 'o/ /legs par gnas gang gi tshe/ byang chub sems dpa' sems dpa' chen po mi chags/ mi 'chang / mi 'grol ba de'i tshe sangs rgyas kyi rigs dang / 'das pa dang / ma byon pa dang / da ltar byung ba'i sangs rgyas bcom ldan 'das rnams kyi rig sngags kyi ming gzhan gyi gsang sngags bzhi rnams kyis dbyig dang ldan pa'i gzungs thob bo/ /tad+ya thA/ ku Ta ku Ti/ ku tsA la/ e lA i mi ri to/ ko thA lA/ i re ri/ i mi ri Ni/ legs par gnas 'di dag ni 'das pa'i sangs rgyas bcom ldan 'das kyi rig sngags kyi ming gzhan no/ /ma byon pa dang / da ltar byung ba'i sangs rgyas bcom ldan 'das kyi rig sngags kyi ming gzhan no/ /legs par gnas dbyig dang ldan pa'i gzungs 'di ni 'das pa dang / ma byon pa dang / da ltar byung ba'i sangs rgyas bcom ldan 'das rnams kyi yum mo/ /de ci'i phyir zhe na/ 'das pa'i don la mi gnas/ ma 'ong pa dang / da ltar byung ba'i don la mi gnas pa'i phyir ro/ /legs par gnas byang chub sems dpa' sems dpa' chen po gang la la dbyig dang 97.209a ldan pa'i gzungs 'di 'dzin pa des sangs rgyas bcom ldan 'das grangs med pa la mchod pa dang / bsnyen bkur byas pa yin no/ /sangs rgyas bcom ldan 'das grangs med pa dag gis bsgrags pa dang / khong du chud par byas pa yin no/ /sangs rgyas bcom ldan 'das grangs med pa dag gis bla na med pa yang dag par rdzogs pa'i byang chub tu lung bstan pa yin no/ /legs par gnas dbyig dang ldan pa'i gzungs 'di 'dzin pa'i byang chub sems dpa' sems dpa' chen po 'di snyam du bdag gis sangs rgyas bcom ldan 'das grangs med pa dag 'di lta ste/ sangs rgyas kyi ye shes mnyes par byas/ bsnyen bkur byas/ mchod pa byas so/ /bsod nams grangs med pa bskyed do/ /snyam du shes par bya'o/ /su zhig bsam pa gang gis dbyig dang ldan pa'i gzungs 'di 'dzin pa de la de nye bar gnas par 'gyur te/ shes rab 'dod pa la shes rab dang / gzungs 'dod pa la gzungs dang / dbyig 'dod pa la dbyig dang / thos pa 'dod pa la thos pa nye bar gnas par 'gyur ro/ /'di'i cho ga ni 'di yin te/ zla ba yar gyi ngo la nyi ma shar kar 'bras sA lu'i chan dang 'o mar spags te bza'o/ /sangs rgyas kyi rig sngags 'di dag dang / sangs rgyas bcom ldan 'das rnams kyi rig sngags kyi ming gzhan dag rgyun du yid la bya'o/ /'on kyang gsang sngags bzhi dag gi mthu gang dag gang gA'i klung gi bye ma snyed kyi 'jig rten gyi khams dag na 'khod pa'i lha ma yin nam/ nam mkha' lding ngam/ mi 'am ci 'am/ lto 'phye chen po 'am/ gnod sbyin nam/ yi dgas sam/ grul bum 'am/ sha za 'am/ mi 'am/ mi ma yin pa de dag la sems dga' bar 'gyur ro/ /bar chad byed par mi 'gyur/ rtag tu yongs su bzung bar 'gyur/ byang chub sems dpa' sems dpa' chen po dga' bzang dang / yangs pa chen po dang / lag na rdo rje dang / yongs su dga' ldan dang / ri dben pa la gnas pa dang / gangs ri la gnas pas kyang yongs su bzung bar 'gyur ro/ /'og min gyi bar gyi 97.209b byang chub sems dpa' de dag gis kyang 'di lta ste/ dbyig dang ldan pa'i gzungs kyi mthus 'jigs pa 'am/ dgon par de la byin gyis rlob par 'gyur/ de la mi 'jigs pa sbyin par 'gyuro/ /bcom ldan 'das kyis dga' ldan na la ba dkar po lta bu'i rdo leb la bzhugs shing / de skad ces bka' stsal nas/ byang chub sems dpa' sems dpa' chen po legs par gnas dang / byang chub sems dpa' stong phrag du ma de dag yi rangs te/ bcom ldan 'das kyis gsungs pa la mngon par bstod do/ /'phags pa dbyig dang ldan pa zhes bya ba'i gzungs rdzogs s+ho// //rgya gar gyi mkhan po dzi na mi tra dang / dA na shI la dang / zhu chen gyi lo tsa ba ban de ye shes sdes bsgyur cing zhus te skad gsar chad kyis kyang bcos nas gtan la phab pa/ |