@#/ /rgya gar skad du/ sa man+ta mu kha pra be sha ra sh+mi bi ma loSh+NI Sha pra b+hA sa sarba ta thA ga ta hri da ya sa ma ya bi lo ki te nA ma d+hA ra Ni/ bod skad du/ kun nas sgor 'jug pa'i 'od zer gtsug tor dri ma med par snang ba de bzhin gshegs pa thaMd kyi snying po dang dam tshigs la rnam par lta ba zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ /de nas bcom ldan 'das dga' ldan gyi lha'i gnas na/ byang chub sems dpa'i dge 'dun chen po dang / zham ring ba lha'i tshogs chen po dang / tshangs pa dang / khyab 'jug dang / dbang phyug chen po la sogs pa'i lha rnams dang thabs cig tu bzhugs te/ 'khor mang po tshogs pa la bcom ldan 'das pha rol tu phyin pa drug dang ldan pa'i chos ston par mdzad de/ 'di lta ste/ ji ltar sbyin pa'i 'bras bu gsod nams kyi tshogs chen po bsags pas 'khor lo bsgyur ba'i dbang phyug gi 'bras bu rnam par smin pa dang / rin po che sna bdun gyi char 'bab pa dang / lhun gyis grub pa'i gter chen po skyed par 'gyur ba'i sbyin pa'i pha rol tu phyin pa dang / ji ltar de bzhin gshegs pa'i bstan pa dang / mngon par shes pa lnga dang / tshul khrims dang ldan pa dang tshangs pa dang / lhar skye ba'i 'bras bu rnam par smin par 'gyur 97.274b ba'i tshul khrims kyi pha rol tu phyin pa dang / ji ltar lha'i gzugs yid du 'ong ba lta ba'i chog mi shes pa'i mtshan dang dpe byed bzang pos legs par brgyan pa'i 'bras bu rnam par smin par 'gyur ba'i bzod pa'i pha rol tu phyin pa dang / ji ltar brtson 'grus rtsom pa lta ba dang / bdud 'dul ba dang / rga shi dang / skye ba las grol ba dang / brdzus te skye ba'i sangs rgyas kyi zhing du 'gro ba'i 'bras bu rnam par smin par 'gyur ba'i brtson 'grus kyi pha rol tu phyin pa dang / ji ltar dpa' bar 'gro ba'i ting nge 'dzin la sogs pa'i ting nge 'dzin bye ba khrag khrig 'bum phrag du ma 'thob pa'i 'bras bu rnam par smin par 'gyur ba'i bsam gtan gyi pha rol tu phyin pa dang / ji ltar shes rab dang ye shes kyi tshogs chen po dang / thos pa rgya mtsho bsags pa dang / mang du thos pa'i 'bras bu rnam par smin par 'gyur ba'i shes rab kyi pha rol tu phyin pa'o/ /de nas lha'i bu de dag gis pha rol du phyin pa drug gis chos kyi sgo 'di nyid nyin mtshan du rjes su sems shing rjes su spyad de dka' ba chen po'i phyir sgom par yang byed do/ /de nas lha'i 'khor de nyid kyi nang nas sum bcu rtsa gsum gyi ris kyi lha'i bu nor bu'i snying po dri ma med pa zhes bya ba g.yog lha'i bu bye ba phrag stong dang ldan pa/ lha'i bu mo khri brgyad stong gis skor ba/ lha'i rnam par 'phrul ba'i gzhal med khang rin po che sna bdun dang ldan pa'i rtsig pa rtsig pa'i khang bzangs skyed mo tshal sna tshogs dang / lha'i me tog gis mdzes par byas pa'i rdzing gis legs par brgyan pa dang ldan pa zhig yod de/ lha'i bu nor bu'i snying po dri ma med pa de lha'i bu mo'i mchog me tog rgyas pa dang ldan pa zhes bya ba dang lhan cig dga' ba chen po mang po dang ldan zhing lha'i bde ba la ni chags/ rin po che sna bdun 97.275a las byas pa'i sgo bzhi dang ldan pa'i khang bzang kyi nang na 'dod pa'i yon tan lnga 'byor cing rgyas pa dang / nga rgyal gyis dregs te snyems shing nyal lo/ /de nas nam phyed tsam na lha'i bu de gnyid kyis log cing lha'i bu mo'i tshogs thams cad kyang sgra bskyungs te nyal bar gyur to/ /de nas gnas mchog de na lha'i gnod sbyin gyi gtso bo skar mda' gdong zhes bya ba zhig gnas pa des lha'i bu nor bu'i snying po dri ma med pa de la bskul nas tshig 'di skad ces smras so/ /kye nor bu'i snying po dri ma med pa longs longs/ khyod gnyid la dga' zhing chags pas ci zhig bya/ dga' ba la goms par byed cing chags par gnas pas ci zhig bya/ lha'i longs spyod dpag tu med pa la spyod pas ci zhig bya/ da ste zhag bdun na 'chi ba'i dus byed par 'gyur te/ lha'i longs spyod dang bral zhing sdug bsngal gyi tshor ba chen po myong bar 'gyur na/ khyod kyi gnas gzhal med khang dam pa rin po che sna bdun las byas pa ci dgos/ khyod kyi srog ni yod med kyis/ /thabs ni myur du rnam par soms/ /shes de skad smras nas lha'i gnod sbyin gyi gtso bo skar mda' gdong mi snang bar gyur to/ /de nas lha'i bu nor bu'i snying po dri ma med pas tshig mi snyan pa de thos nas brgyal te mas nas khas bub tu sa la lhung ngo / /de nas lha'i bu mo'i tshogs de dag kyang skra ni bshig /rgyan rnams ni lhung / gos ni bsil/ kha ni khrag dang gsher bag ni chad nas mchu dang / rkan dang / mid pa dang / lce ni skams la/ smre sngags stong phrag du ma ni smre ste ngu zhing cho nges 'debs la/ kyi hud kyi hud ces 'dzer cing / lha'i rin po che'i snod nas spos chu dang / tsan dan gyi chu grang mos 'thor zhing / kha cig ni mgul nas 'ju/ kha cig ni lag pa 97.275b nas 'ju/ kha cig ni de'i skra la'o byed/ kha cig ni rkang pa nas 'ju/ kha cig ni gos la 'ju/ kha cig ni brgyal te 'gyel/ kha cig ni sa'i steng na chu med pa'i nya bzhin du 'gre ldog /kha cig ni lus la mes 'tshig pa bzhin du 'gre ldog /kha cig ni smre sngags du ma 'don cing kyi hud kyi hud ces zer cing ngu'o/ /de nas lha'i bu nor bu'i snying po dri ma med pa de brgyal ba las sangs te/ dran pa thob nas/ kha nas khrag skyug cing sdug bsngal chen po drag po nyamasu myong nas shugs ring du phyung ste/ lus 'dar zhing shing rlung gi shugs kyis btab pa bzhin du g.yo bar gyur la/ sgra skyung ba'i snying gis ring pa ring par lha'i dbang po brgya byin ga la ba der song te phyin nas/ lha'i dbang po brgya byin gyi rkang pa la btugs te rkang pa gnyis la 'jus nas 'di skad ces smras so/ /bcom ldan 'das bdag la skyab tu gsol/ bcom ldan 'das lha'i rgyal po che ba'i bdag nyid can skyab tu gsol/ lha'i gnod sbyin gyi gtso bo skar mda' gdong gis bsgo ba thos nas bdag dgung bdun na 'gum pa'i dus bgyido zhes mchi zhing sems can dmyal ba'i tshor ba soms shig ces mchi na lha'i dbang po thabs gang gis bdag 'chi bdag gi dbang du mchi bar mi 'gyur ba dang ngan 'gror mchi bar mi 'gyur bar 'jigs pa ma mchis pa'i gnyen po bka' stsal du gsol/ lha'i dbang po ci nas kyang bdag 'chi bdag gi sgo nas thar ba'i cho gas bdag la skyab du gsol/ de nas lha'i dbang po brgya byin gyis tshig de thos nas snying rab tu sdug bsngal bas lha'i bu nor bu'i snying po dri ma med pa la 'di skad ces smras so/ /lha'i bu ma 'jigs shig gang gis 'chi bdag pham par 'gyur zhing sems can dmyal ba'i sdug bsngal las thar bar 'gyur ba sangs rgyas bcom ldan 'das 'jig rten na lha dang mi rnams kyi 97.276a ston pa skye ba dang rgas pa dang na ba dang 'chi ba dang mya ngan las rgal ba bla na med pa'i sman pa yod de de ni khyod kyi skyabs dang rtsa lag bzang po dang dpung gnyen dang pha ma lta bur gyur pa yin no/ /de ni ngan 'gro thams cad 'jig par mdzad pa yin gyi 'dren pa de gang na bzhugs pa der bdag cag myur du 'dong ngo / /de nas de'i tho rangs lha'i dbang po brgya byin dang lha'i bu nor bu'i snying po dri ma med pa dang lha dang lha'i bu mo stong phrag du ma dang lhan cig dga' ldan ga la ba der dong nas bcom ldan 'das ga la ba der phyin pa dang bcom ldan 'das kyi zhabs la mgo bos phyag 'tshal te lan gsum skor ba byas nas bcom ldan 'das kyi spyan sngar 'khod de de nas lha'i dbang po brgya byin gyi rnam par dman pa'i tshig gis bcom ldan 'das la 'di skad ces gsol to/ /bcom ldan 'das lha'i bu nor bu'i snying po dri ma med pa 'di la lha'i gtso bo skar mda'a'i gdong gis bskul te de dgung bdun gyi gdugs la nor bu'i snying po dri ma med pa 'di 'chi bdag gi sgo'i dbang du 'gyur ro zhes mchi na bcom ldan 'das de la ji ltar sgrub par bgyi/ de nas bcom ldan 'das de bzhin gshegs pa shAkya thub pas lha'i dbang po brgya byin gyi tshig gsan nas 'dzum pa mdzad de 'dzum pa stan pa de zhal nas kha dog du ma dang ldan pa'i 'od zer byung te 'od zer byung ba des stong gsum gyi stong chen po'i 'jig rten gyi khams snang bar byas te 'od zer gyi snang ba des lha dang klu dang gnod sbyin dang dri za dang lha ma yin dang namakha' lding dang mi 'am ci dang lto 'phye chen po dang srin po dang 'byung po thams cad kyi gnas rnams snang bar byas nas bskul te/ bskul nas kyang 'od zer slar log te bcom ldan 'das la lan gsum bskor ba byas nas bcom ldan 'das kyi zhal gyi sgor zhugs so zhugs ma thag tu lha'i dbang po brgya byin la 'di skad ces bka' stsal to/ /lha'i dbang po lha'i bu 97.276b nor bu'i snying po dri ma med pa 'di zhag bdun gyi nyin par 'chi bdag gis sgo'i 'jigs par 'gyur ba de nyon cig /'di gal te 'chi ba'i dus byed par gyur na/ sdug bsngal shin tu chen po drag po chen po'i tshor ba sems can dmyal ba'i sdug bsngal rnams myong bar 'gyuro/ /thog mar ni grong khyer chen po wA rA Na ser smin mkhan gyi phyis sa khung gi 'dam rdzab kyi nang du sha za mo phag mgo can du skye bar 'gyur te/ phyi sa khung de na bshang ci za'o phy-is khung de nyid kyi nang na srog chags bye ba brgya stong gnas te de dag dus gsum du phag mo de'i sha za zhing keng rus 'ba' zhig lus par byed do/ /de nas yang las kyi dbang gi lus kun rdzogs par gyur te lo bdun 'tsho bar 'gyur ro/ /de nas 'chi ba'i dus byed par 'gyur te de nas dgon par ru sbal gyi skye gnas su skye la de na chu'i ming yang mi grags cing shing grib kyang med de nyi tshan gyi lus gdung shing tshig la bye tshan za zhing bya rog dag gis lus btogs nas lus dum bur 'gyur ro/ /de nas yang las kyi dbang gis lus byung nas zhig par 'gyur te lo lnga tshang bar de ltar 'gyur ro/ /de nas 'chi ba'i dus byed par 'gyur te bA rA na ser de nyid du 'bab chu chen por nya chen po skye bar 'gyur ro/ /de nas yang las kyi dbang gis gang na chu med pa der phong nas lus chen po de la sbrul gdug pa dang bya rog dang sre mo dang khyi dang gzig dang dred dang lce spyang la sogs pas za'o srog chags sna tshogs pa gzhan dag gi kyang za'o/ /de nas yang las kyi dbang gi 97.277a lus byung zhing za bar 'gyur te lo gsum du de ltar 'gyur ro/ /de nas yang 'chi ba'i dus byas nas khyim bdun du skye zhing 'dzam bu'i gling gis sdug bsngal myong bar 'gyur te/ mdze can gyi khyim dang dbul po'i khyim dang g.yung po'i khyim dang shen pa'i khyim dang / rigs ngan gyi khyim dang gdol pa'i khyim dang dmus long gi khyim du skye ste lo drug bcu'i bar du sdug bsngal myong bar 'gyur ro/ /sdug bsngal de dag myong nas de nas shi 'phos te sems can dmyal ba chen po bcu drug tu bskal pa rgyad bcu rtsa bzhid sdug bsngal myong bar 'gyur ro/ /lha'i dbang po de lta bu'i sdug bsngal chen po nyams su myong bar 'gyur ro/ /ci ste brgya lam mi'i lus thob na yang dbul ba dang yan lag ma tshang ba dang / shes rab chung ba dang / yi ge mi shes pa dang / sangs rgyas dang / chos dang / dge 'dun dang bral ba dang / 'jig rten thams cad kyis dmad pa dang / rtag tu skom pa dang / bkres pa sems pa dang / tshe thung zhing nad mang bar 'gyur ro/ /de nas lha'i dbang po brgya byin gyis lha'i bu nor bu'i snying po dri ma med pa'i gtam ngan thos nas bcom ldan 'das kyi spyan sngar shin du 'jigs skrag te yid mi dga' nas 'di skad ces gsol to/ /bcom ldan 'das bdag re ba mchi bar gyur to/ /bdag la skyabs bgyid pa ma mchis so/ /bcom ldan 'das kyis bka' stsal pa/ lha'i dbang po 'chi bdag gi 97.277b chad pa chen po'i gnyen po yod kyi de bas na re ba med par ma byed cig des phyi ma'i dus na sems can de dag 'chi ba'i dus phyed kyi tshe bde bar 'chi ba'i dus byed par 'gyur ro/ /sems can dmyal ba dang dud 'gro'i skye gnas thams cad las yongs su thar bar 'gyur ro/ /dran pa tsam gyis sgrib pa thams cad byang bar 'gyur ro/ /tshe ring por 'gyur ro/ /shin du yongs su dag pa'i lus thob par 'gyur ro/ /de nas lha'i dbang po brgya byin dang / rgyal po chen po bzhi dang / tshangs pa dang khyab 'jug dang dbang phyug chen po bcom ldan 'das ga la ba der logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das re ba 'phel bar mdzad du gsol/ bcom ldan 'das lha thams cad skyab du gsol/ bcom ldan 'das skye dgu'i 'jig rten thams cad bsgral du gsol/ bcom ldan 'das 'chi ba'i 'jigs pa zhi bar mdzad du gsol/ bcom ldan 'das sems can dmyal ba'i sdug bsngal mi zad pa bsal du gsol/ bcom ldan 'das ci chos kyi rgyal po gshin rje dgug du gsol/ bcom ldan 'das gling bzhi pa'i 'jig rten gyi khams kyi khams kyi sems can rnams dbugs dbyung du gsol/ bcom ldan 'das sum bcu rtsa gsum pa'i lha'i gnas la gzigs su gsol/ bcom ldan 'das phyogs bcu'i 'jig rten gyi khams na phyogs bcu kun gyi de bzhin gshegs pa'i ye shes 97.277c # kyi phyag rgya chen pos gdab tu gsol/ de bzhin gshegs pa'i byin gyi brlabs kyis byin gyis brlabs du gsol/ bcom ldan 'das bdag cag la thugs brtse ba'i slad du gnyen po ston pa'i chen po bshad du gsol bde bar gshegs pa bshad du gsol/ de nas bac+doMs de bzhin gshegs pa shAkya thub pas de skad ces gsol ba thugasu chud nas/ rnaMs pa kun du rnam par gzigs pa zhes bya ba'i ting nge 'dzin la snyom par bzhugaso/ /ting nge 'dzin de la snyom par zhugs ma thag tu rnam pa kun zhes bya ba'i 'od zer gtsug tor gyi dbus nas byu~M nas/ des phyogs kun du snang bar byas te/ rin po che'i gdugs lta bur naMkha' kha' la 'dug pa dang / bac+doMs kyis mdzum pa mdzad de gzigs nas lha'i dbang po rgya byin la 'di skad ces bka' stsal to/ /lha'i dbang po kunas sgor 'jug pa'i 'od zer gtsug tor dri ma med par snang ba de bzhin gshegs pa thaMd kyi snying po dang daM tshigs la rnaM par lta ba zhes bya ba'i gzungs sngags zung shig /phyag rgya 'di ni gang gA'i klung bye ba khrag khrig 'buM phrag drug bcu rtsa gnyis kyi bye ma snyed kyi de bzhin gshegs pa rnaMs kyis gsungs shing rjesu yi rang ba'o/ /gzungs sngags 'di mthong ba dang thos pa tsam gyis sdig pa dang / sgrib pa dang / sems can dmyal ba dang / dud 'gro dang / ngan 'gro'i 'jigs pa thaMd las rnaM bar grol bar 'gyuro/ /sngon gyi las kyi sgrib pa thaMd kyang rnaM par 'jigs par 'gyur zhing / seMn dmyal ba thaMs cad kyang 'jigs par 'gyur te/ dper na me yis rtswa bsregs pa/ /rlung gis thal ba myur du ded/ /de bzhin tshe rabs snga ma la/ bsags pa'i sdig pa thaMd sreg /dper na char pa 'bab 'gyur te/ /ri la 'bab chu bab pa yis/ /sa yi steng gi phyag dar dang / /nyal nyil thaMd 'ded par 'gyur/ /de bzhin gzungs 'di mthong ba dang / /thos pa tsam gyis sdig pa 'byang / /dper na me yis gser sbyangs la/ /sos gcad rung bar snyi bar 'gyur/ /de bzhin bzlas brjod byas tsam gyis/ /lus sbyong 'gyur te the 97.277d # tshom med/ /dper na nyi ma shar gyur na/ /'od zer kun du rab tu 'byung / /de bzhin su zhigazungs 'chang ba/ /de yi lus kyang rnaMs par mdzes/ /dper na skam por nya 'gre ldog /chu dang bral bas 'chi sgor 'gro/ /la las slar yang chur bor bas/ /de na gnas shing yang rtse'o/ /de bzhin dran pa tsam gyis kyang / /mi rnaMs tshe ni bzlog par byed/ /lha'i dbang po gzungs sngags bstan gyis nyon cig /na maHsarba ta thA ga tA nA~M/ o~M ma hA tsin+tA ma Ni dz+wa la na/ sA ga ra gam+b+hi re/ A kaR+Sha ya/ A kaR+Sha ya/ A yun+d+ha ra/ A yun+d+ha ra/ san+d+ha ra san+d+ha ra/ k+Sha Na k+Sha Na/ k+She Ni k+She Ni/ k+Shu Nu k+Shu Nu/ sarba ta thA ga tA sa ma ya/ tiSh+Tha tiSh+Tha/ ma hA b+hu ba na/ sA ga ra/ sa~M sho d+ha ya/ mA~M sarba satwA~Msh+tsa/ b+ha ga ba ti sarba pA pa~M bi ma la/ dza ya dza ya/ dza ya lab+d+he/ s+phu Ta s+phu Ta/ s+pho Ta ya s+pho Ta ya/ bi ga ta A ba ra Na ba ya ha ra Ni/ hU~M hU~M hU~M/ mr-i t+yu daN+Da d+ha re/ a b+ha ya pra de/ uSh+NI Sha bya ba lo ki te/ sa man+ta mu She/ sa man+te bya ba lo ki te/ ma hA mA yi/ ma hA pA sha d+ha ra/ a mo g+ha bi ma le/ A kaR+Sha ya A kaR+Sha ya/ A kaD+D+ha ya/ A kaD+D+ha ya/ b+ha ra b+ha ra/ sam+b+ha ra sam+b+ha ra/ in+d+ra ya bi sho d+ha ni/ b+hu shi ta b+hu dze/ ma hA mu drA bi lo ki te/ dza ya dza ya/ sid+d+he sid+d+he bud b+ha bud b+ha/ bo d+ha ni bo d+ha ni/ sa~M bo d+ha ni sa~M bo d+ha ni/ sa~M sho d+ha ni sa~M sho d+ha ni/ sa~M sho d+ha ni sa~M sho d+ha ni sa~M sha bi sho d+ha ni bi sho d+ha ni/ ha ra ha ra/ ma ma sarba pA pa~M/ sarba ta thA ga ta ku la b+hu dze/ sa ma ya tiSh+Tha/ pra sa ra tu ma ma puN+yaM bi na Shin+tu pA pa~M/ sarba kIlpi Sha ha ra/ ma Ni bi shud+he/ sho d+ha ya bi ma le/ bi ka si ta pad+me/ ka ba tsi ta b+hu dze/ ShaT pA ra mi tA pa ri pu ra Ni/ sarba ta thA ga toSh+NI Sha bi lo ki te swA hA/ sarba ta thA ga ta guh+ya a d+hiSh+ThA na a d+hiSh+Thi te swA hA/ A yurda de swA hA/ pu N+yaM da de swA hA/ pu N+ya bi lo ki te swA hA/ pu N+ya A ba lo ki te swA hA/ mr-i ta t+yu daN+De swA hA/ ya ma daN+Da swA hA/ ya ma du te swA hA/ sa~M ha ra Ni swA hA/ sam+b+ha ra Ni swA hA/ pra ti sa ra Ni swA hA/ o dza ba ti swA hA/ te dzo ba ti swA hA/ dza ya ba ti swA hA/ sarba ta thA ga ta mu drA a d+hiSh+ThA na a d+hiSh+Thi te swA hA/ lha'i dbang po gzungs sngags 'di lha'i bu nor bu'i snying po dri ma med pa la rjesu ston cig / 97.278a de ni khyod kyis lha'i bu de la yun ring por phan pa dang / bde bar 'gyuro/ /kunas sgor 'jug pa'i 'od zer gtsug tor dri ma med par snang ba de bzhin gshegs pa thaMd kyi snying po dang dam tshig la rnaM par lta ba'i gzungs sngags 'di bris la mchod rten gyi nang du gzhugo /mchod rten sar pa 'am rnying pa bcos pa yang rung ste de'i nang du gzhugo /spos dang / byug pa yang phul la gzungs kyi rig sngags brgya rtsa brgyad dran par bya zhing lan brgya rtsa brgyad bsgom par bya'o/ /nyin zhag gcig la nyin lan gsuM mtshan lan gsuM dran par bya'o/ /de nas nyi ma shar ba dang shar phyogasu bltas te spos kyi dkyil 'khor byas la/ nyi ma logasu me tog gis gtor ro/ /a ka ru dang / du ru ka'i bdug pas bdug bste/ te/ de bzhin gshegs pa thaMd la phyag byas la lan brgya rtsa brgyad bzlas brjod bya'o/ /mchod rten brgya rtsa brgyad btab pa la rig sngags kyi snying po 'di bris te mchod rten gyi nang du bcug nas dkyil 'khor gyi steng du bzhag na gang gA'i klung gi bye ba khrag khrig 'bum phrag dgu bcu rtsa dgu'i bye ma snyed kyi de bzhin gshegs pa rnaMs kyi sku gdung dang ring bsrel mchod rten re re'i nang du bcug par 'gyuro/ /ring bsrel gyi snying por yang 'gyur ro/ /snying po 'di bris la gzhugo /\u0f00 na ma s+t+rai ya d+h+wi kA nA~M/ sarba ta thA ga ta hri da ya gar+b+he dz+wa la dz+wa la/ d+harma d+hA tu gar+b+he sa~M b+ha ra ma ma A yuH/ sa~M sho d+hA ya/ sa~M sho d+hA ya/ ma ma sarba pA ba~M/ sarba ta thA ga ta sa man+toSh+NI Sha bi ma la bi shud+he/ hU~M hU~M hU~M/ a~M ba~M sa~M dzaHswA hA/ kun nas sgor 'jug pa'i 'od zer gtsug tor dri ma med par snang ba zhes bya ba dus gsuM gyi de bzhin gash+yes pa thaMd kyi snying po 'di la gus par byas te mchod rten gyi las byas na tshe zad pa las slar nur te tshe ring por sbyong bar byed do/ /gal te shi 'phos na yang sbrul gyi lpags pa brjes pa bzhin du lus bor nas skal ba mnyaM pas 'jig rten gyi khaMs bde ba can du 'gro bar 'gyuro/ /'chi ba'i sdug bsngal myong bar mi 'gyuro/ /phyin chad nam yang 'chi ba'i tshor ba myong bar mi 'gyuro/ /phyin chad seMs can dmyal ba dang / dud 'gro dang / gshin 97.278b rje'i 'jig rten dang / ngan 'gror 'gro zhing skye bar mi 'gyuro/ /phyin chad seMs can dmyal ba pa'i sgra rna lam du yang grag par mi 'gyur na 'bras bu rnam par smin par 'gyur ba lta ci smos te de ni gnas med do/ /de nas lha'i dbang po rgya byin gyis rig sngags 'di bac+doMs las bzung nas lha'i bu nor bu'i snying po dri ma med pa dang lhan cig tu nam langs pa dang rang gi gnas su song ste/ de bzhin gshegs pas bka' stsal ba'i lung bzhin du cho ga go rims bzhin du mchod rten gyi las byas nas/ bzlas rjod kyi cho ga yang byas pa dang / byas ma thag tu lha'i bu nor bu'i snying po dri ma med pa sdug bsngal thaMd nye bar zhi nas sdig pa thaMd dang bral te/ lus rnaM par dag nas lpags pa'i mdog ni gser gyi kha dog lta bur gyur/ skra dang mig ni mthon mthing lta bur gyur/ de bzhin gshegs pa thaMd ni mngon du mthong / nakha'i dbyings nas de bzhin gshegs pas legaso legaso zhes bya ba'i gsung ni phyung ngo / /de nas lha'i bu de sgrib pa dang bral ba'i lusu gyur par mthong nas ya mtshan cher bzung ste rab tu dga' nas/ a la la sangs rgyas/ a la la rig sngags/ a la la chos/ 'bras bu 'phral du ston pa bac+doMs de bzhin gshegs pa shAkya thub pa/ thugs rje mchog tu che ba yid bzhin gyi nor bu lta bu de la phyag 'tshalo/ /phyag 'tshalo zhes ched du brjod pa ched du brjod do/ /de nas lha'i bu de rang gi gnasu song nas lha'i me tog dang / bdug pa dang / spos dang / phreng ba dang / byug pa sna tshogs blangs te/ lha'i gos dang / spud pa dang / rgyan kyang blangs nas g.yog 'khor thaMd dang / lha'i bu mo dang / lha'i tshogs dang / lha'i dbang po rgya byin la sogs pa dang / dga' ldan gyi gnasu dong ste/ bcom ldan 'das ga la ba der dong nas phyin pa dang / bcom ldan 'das la mchod pa chen po byas te lan brgya stong du bskor ba byas nas chos nyan pa'i phyir de nyid du bac+doMs kyi spyan sngar 'dug go /de nas rgyal po chen po bzhi dang / tshangs pa dang / khyab 'jug dang / dbang phyug chen po dang / gnod sbyin gyi sde dpon chen po lag na rdo rjes bac+doMs ga la ba de logs 97.279a su thal mo sbyar ba btud nas/ bac+doMs la 'di skad ces gsol to/ /bcom ldan 'das su las gang gis lha'i bu nor bu'i snying po dri ma med pa la mi bzad cing shin tu tsha ba'i 'bras bu rnam par smin pa rnam 'byung bar 'gyur/ bac+doMs kyis bka' stsal pa/ skyes bu dam pa dag legaso legaso/ /skyes bu dam pa dag legs par dris so/ /de'i phyir nyon cig dang bshad par bya'o/ /lag na rdo rje sngon 'byung ba 'das pa'i dus na lho phyogs kyi rgyud na yangs pa 'khyil ba zhes bya ba'i grong khyer yod de/ de na bram ze dri ma med pa zhes bya ba mkhas pa/ byang ba/ gsal ba/ yid gzhungs pa/ gzugs bzang zhing mdzes pa/ blta na sdug pa/ mdog bzang po rgyas pa mchog dang ldan pa/ dad pa dang ldan pa/ dge ba'i bsaM pa can rig pa smra ba zhig gnas te/ de rig sngags kyi rgyal mo 'di rjesu sems shing sgom la sngan du byed de/ sems can thaMd la phan par 'dod do/ /de nas grong khyer de nyid na khyim bdag rab snang zhes bya ba phyug pa nor che ba longs spyod che ba/ g.yog 'khor mang ba zhig gnas te/ khyim bdag de ni dad pa dang mi ldan zhing gzhan mu steg can la dad do/ /bram ze de ni khyim bdag de la yang dang yang rig sngags kyi rgyal mo 'di snying po dang bcas pa sgrogs kyang khyim bdag de ni de la dad pa'i sems mi bskyed kyi/ de 'di snyam du sems te/ ngas bram ze 'di dum bu dum bur btub la nya dang ru sbal bsregs pa bzhin du bor te kha ngan skyugs kyis dgang ngo snyam mo/ /des 'di snyam du bsams ma thag tu khyim bdag de la sha bkra dang / mdze'i nad kyis btab bo/ /de nas 'chi ba'i dus byas nas 'chi kar sdug bsngal gyi tshor ba chen po myong ste/ shi nas sems can dmyal ba chen po mnar med par skyes nas/ der bskal pa'i tshad du sdug bsngal gyi tshor ba myong ngo / / // // // // // // // // 97.279b de nas shi 'phos nas nya dang / phag dang / rus sbal gyi nang du bskal par sdug bsngal myong ngo / /de nas 'chi ba'i dus byas nas sems can dmyal ba thig nag tu skyes te/ der yang bskal pa'i tshad du sdug bsngal chen po myong ngo / /de nas shi 'phos nas grong khyer de nyid du dmus long gi khyim du skyes te/ dmus longs du gyur nas phan tshun du slong mo la song ba dang / gtsug lag khang zhig tu phyin pa na/ de na dge slong snying rje la gnas pa zhig 'dug ste/ des de mthong nas byaMs pas rgyas par byas te zas byin no/ /rig sngags kyi rgyal mo 'di yang bsgragaso/ /dmus long des gzungs sngags 'di thos pa dang tshe rabs dran par gyur nas braM ze de yang dran te/ rjesu sems shing skye ma'o mi bzad pa'i las byaso snyam nas ngo tsha dang / khrel yod par gyur te/ 'chi ba'i dus byas pa dang gzungs sngags 'di'i mthus sum bcu rtsa gsuM pa'i lha'i nang du skyes te/ gzhal med khang chen po'i nang na lha'i bu mo'i tshogs kyis bskor cing lha'i longs spyod chen po myong bar gyur to/ /de'i tshe de'i dus na khyim bdag dmus long du gyur pa de gzhan zhig yin snyaM du khyod dogs shing the tshom za 'am yid gnyisu gyur na de ltar mi blta ste/ lha'i bu nor bu'i snying po dri ma med pa 'di nyid do/ /lag na rdo rje de lta bas na sdom pa gsum gyis bsdam par bya'o/ /lag na rdo rje las ngas 'bras bu rnaM par smin pa sdug bsngal gyi tshor ba 'di lta bu myong ngo / /lha'i bu 'dis byang chub kyi snying po'i mthar thug gi bar du las kyi 'bras bu tha ma 'di myong ngo / /lag na rdo rje de'i tshe de'i dus na bram ze dri ma med par gyur pa de gzhan zhig yin snyam du khyod dogs shing the tshoM 'aM yid gnyisu gyur na de ltar mi lta ste/ lag na rdo rje khyod nyid do/ /dmus long la gzungs sngags 'di sgrogs pa'i dge slong de ni 'jam dpal gzhon nur gyur pa 'di nyid yin te/ de'i tshe de'i dus dge slong du gyur to/ /de nas lha'i 'khor mang po des sngon byung ba 'di thos nas rmad du byung bar gyur/ dga' ba thob par gyur te/ ca co dang ga zha'i sgra chen po phyung nas a la la de 97.280a bzhin gshegs pa'i dam tshigs rig sngags 'di'i mthu ni yid bzhin gyi nor bu rin po che lta bu'o zhes ched du brjod pa ched du brjod do/ /de nas 'khor de las lha'i bu khri nyis stong ni phyir mi ldog par gyur to/ /lha'i bu mo bye ba phrag 'bum ni bud med kyi dbang po dang bral nas skyes pa'i dbang po byung ste phyir mi ldog pa nyid la gnas so/ /de nas bac+doMs la gnod sbyin gyi sde dpon chen po lag na rdo rjes 'di skad ces gsol to/ /bac+doMs gzung kyi tshig rig sngags kyi rgyal mo 'di ni mthu che ba phan yon che ba lags so/ /bac+doMs ji ltar slad ma'i tshe slad ma'i dus na sems can rnaMs la phan pa dang bde bar 'gyur zhing / gang gis sems can dmyal ba dang / dud 'gro'i skye gnas nas yongasu grol bar 'gyur ba'i sgrub pa'i cho ga bshad du gsol/ bac+doMs kyis bka' stsal pa/ lag na rdo rje gzungs sngags 'di'i phan yon dang / sgrub pa'i cho ga 'di nyon cig /'di ltar phyi ma'i tshe phyi ma'i dus na rigs kyi bu 'am/ rigs kyi bu mo 'am/ dge slong ngam/ dge slong ma 'am/ dge bsnyen nam/ dge bsnyen mas rig sngags kyi rgyal mo 'di dus gcig tu dran par bya'o/ /ring bsrel gyi snying po 'am/ de bzhin gshegs pa'i ring bsrel gyi snying po can gyi mchod rten la bskor ba bya'o/ /yid bzhin gyi nor bu rin po che 'di gnyis kyang dus gcig tu dran par bya'o/ /des ni gang gA'i klung gi bye ma snyed khrag khrig phrag 'bum gyi bye ma snyed kyi de bzhin gshegs pa rnaMs la dge ba'i rtsa ba bskyed par 'gyuro/ /bsod naMs chen po dang ldan par 'gyuro/ /mtshams med pa lnga'i las kyi sgrib pa rnaMs kyang yongasu byang bar 'gyuro/ /sems can dmyal ba dang / dud 'gro'i skye gnas dang / gshin rje'i 'jig rten gyi ngan song rnaMs las yongasu thar bar 'gyuro/ /tshe ring por 'gyuro/ /sbrul gyi lpags pa brjes pa bzhin du lus bor nas skal ba mnyam pa'i phyir 'jig rten gyi khaMs bde ba can du 'gro bar 'gyuro/ /phyin chad mngal gyi gnas kyi dri mas mi gos par 'gyuro/ /gang dang gang du skye ba de dang der brdzus 97.280b te skye zhing pad ma las skye bar 'gyuro/ /tshe rabs thaMd du tshe rabs dran par 'gyuro/ /rtag tu de bzhin gshegs pa thaMd la lta 'dod par 'gyuro/ /bsam pa thaMd yid bzhin du yongasu rdzogs par 'gyuro/ /gal te cho ga bya bar 'dod na des khrus byas la gos sar pa bgos te/ spos kyi dkyil 'khor gru bzhi pa bya'o/ /snying po'i rig sngags gro ga la bri bar bya'o/ /mchod rten lnga gdab par bya'o/ /rig sngags 'di yang mchod rten gyi nang du gzhugs par bya'o/ /mchod rten bzhi ni grwa bzhir gzhago /go/ /gcig ni dkyil 'khor gyi dbusu gzhago /shing bu btsugs te ba dan dmar po dpyang bar bya'o/ /me tog gis gtor ro/ /bum pa gang ba lnga gzhago /grwa bzhir pog por bzhi nas du ru ka dang / a ka ru dang / tsan dan dang / gu gul gyi bdug pas bdug par spos kyi mchod yon gyi snod bzhi gzhag par bya'o/ /yid bzhin gyi nor bu rin po che 'di gnyis kyang lan brgya rtsa brgyad zlas brjod bya'o/ /snying po'i sngags brjod cing dkyil 'khor la bskor ba brgya rtsa brgyad bya'o/ /nad kyis btab pa dang / gnod pa dang / nad tshabs che ba dang / tshe zad pa dang / dus ma yin par 'chi bas 'jigs pa dang / rgyal po dang / pha rol gyi dmag tshogs kyis skrag pa dang / bu 'dod pa dkyil 'khor la mngon par phyogs par gzhago /rma bya'i sgro lngas byab par bya'o/ /mchod rten gyi dkyil 'khor la mchod par bya'o/ /cho ga 'di lan gcig byas na bskal pa 'buM tu bsags pa'i las kyi sgrib pa dang bral nas sgrib pa med par 'gyuro/ /nad thaMd dang / nyon mongs pa thaMd dang / sems can dmyal ba dang / dud 'gro'i skye gnas dang / gshin rje'i 'jig rten gyi ngan song thaMd dang / 'jigs pa thaMd las yongasu thar bar 'gyuro/ /'jig rten pa dang / 'jig rten las 'das pa'i sdug bsngal dang sgrib pa dang / sdig pa dang / gdug pa thaMd tshe rabs cig nas gcig tu rgyud de/ byang chub kyi snying po'i thar thugs gi bar du rnaM par 'jigs par 'gyuro/ /tshe zad pa yang phyir nur zhing tshe ring bar 'gyuro/ /yun ring du nad kyis brnyongs te sha zad pa yang lus yongs rdzogs par 'gyuro/ /lus shin du yongasu dag par 'gyuro/ /bsaM pa yid bzhin du yongasu rdzogs 97.281a par 'gyuro/ /phyin chad 'chi bdag gi sgo'i sdug bsngal mi mthong bar 'gyuro/ /sbrul gyi lpags pa brjes pa bzhin du lus bor nas skal pa mnyam pas phyir/ 'jig rten gyi khams bde ba can du 'gro bar 'gyuro/ /gang dang gang du skye ba dang der pad ma las skye bar 'gyuro/ /thaMd du rgyan thaMd kyis brgyan par 'gyuro/ /skye ba thams cad du tshe rabs dran par 'gyuro/ /'di bzlas brjod kyi cho ga bzhin du nyin cig bzhin du dus gsum du lan nyi shu rtsa gcig bzlas brjod byas na de'i sdig pa'i sgrib pa dang / nyon mongs pa thaMd las rnaM par grol bar 'gyuro/ /bzlas brjod cho ga bzhin du lo gcig tshang bar byas na 'jigs pa med par lta ba kun nas sgo'i 'od zer zhes bya ba'i ting nge 'dzin 'thob po/ /phyogs bcu'i sang+yas kyi zhing thaMd du de bzhin gshegs pa thaMd mthong bar 'gyuro/ /dri ma med par rnam par dag pa 'bar ba'i gzi brjid ces bya ba'i lus yongasu dag pa 'thob par 'gyuro/ /tshe rnam par dag pa thob par 'gyuro/ /gang gA'i klung bye ba khrag khrig 'buM phrag brgyad bcu rtsa gnyis kyi bye ma snyed kyi de bzhin gshegs pa rnams la dge ba'i rtsa ba bskyed par 'gyuro/ /tshe rabs cig nas gcig tu brgyud pa rnaMs su yang shin tu yongasu dag par 'gyuro/ /sangs rgyas kyi zhing gang dang gang du 'gro 'dod pa der 'gro bar 'gyuro/ /sbrul gyi lpags pa brjes pa bzhin du lus bor nas skal ba mnyaM pa'i phyir 'jig rten gyi khaMs bde ba can du skye bar 'gyuro//'chi bdagi sgo mi mthong zhing rmi lam lta bur kun du shes so/ /tshes brgyad dam/ bcu bzhi 'am/ bcwa lnga la yid bzhin gyi nor bu rin po che chen po'i gzungs sngags 'di gnyis lan brgya rtsa brgyad bzlas brjod byas shing ring bsrel dang bcas pa'i mchod rten la bskor ba byas na bzlas brjod byas pa tsam gyis phral du mchod rten la sgra 'byung ste/ legaso zhes bya ba sbyin par 'gyuro/ /'phral du sdig pa'i sgrib pa dang / nyon mongs pa thaMd dang / 'dod chags dang / zhe sdang dang / gti mug gi dri ma dang / ser sna dang / phrag dog dang bral bar 'gyur ro/ / 97.281b lus dri ma med cing yongasu dag par 'gyuro/ /skyes pa 'am/ bud med dam/ khye'u 'am/ bu mo gang dang gtam byas pa de dag thams cad kyang sdig pa rnams las grol bar 'gyuro/ /dud 'gro'i skye gnas su song ba la smras na yang dud 'gro'i skyes gnasu gtogs pa thaMd las yongasu thar 'gyuro/ /bya'i tshogs thaMd la smras na yang bya'i tshogs thaMd yongasu grol bar 'gyuro/ /tha na khyi dang / ru sbal dang / sbrul dang / byi la dang / sre mo dang / srog chags sna tshogs la smras na yang thams cad yongasu grol bar 'gyuro/ /bye ma la lan nyi shu rtsa gcig bzlas brjod byas te dur khrod du gtor na/ gang gi rus pa la phog pa de dag sems can dmyal ba gang dang gang du skyes pa de dang de nas yongasu thar te mtho risu skye bar 'gyur ro/ /gang dag mtho risu skyes pa de dag gi lus la me tog gi char 'bab par 'gyuro/ /gcan zan dang / bya sna tshogs gang dag dur khrod der 'gro ba de dag thams cad kyang bde 'gror 'gro bar 'gyuro/ /ris la gtor na ri dgas dang / bya rgyu ba de dag thams cad bde 'gror 'gro bar 'gyuro/ /kun nas sgor 'jug pa'i 'od zer gtsug tor dri ma med par snang ba dus gsum gyi de bzhin gshegs pa'i snying po lan brgya stong bzlas brjod byas na/ gal te mtshams med pa lnga byed pa dag mnar med par lhung nas gdung bas bsregs pa las 'phral du yongs su thar bar 'gyur ro/ /lan 'bum bzlas brjod byas na/ gal te mgul nas thag pas btags te khrid pa yang gshin rje'i gnas nas 'phral du ldog par 'gyuro/ /de'i 'jigs pa chen po las yongasu grol bar 'gyuro/ /sems can dmyal ba thaMd kyang rnam par zhi zhing rnam par 'jigs par 'gyur te the tshom med do/ /chos kyi rgyal po gshin rje yang bran bzhin du sems shing 97.282a 'dug go /lus bsam gtan gyi lam bzhin nam/ sbrul gyi lpags pa brjes pa bzhin du lus bor nas 'jig rten gyi khams bde ba can du mngon par dga' zhing 'gro bar 'gyur ro/ /'chi bdag gi sdug bsngal mi mthong bar 'gyur ro/ /'bum bris te mchod rten gyi nang du bcug na/ 'bum tshang nas mchod rten thams cad 'bar bar 'gyur ro/ /bdag kyang 'bar bar 'gyur ro/ /nges par 'phral du phyir mi ldog par 'gyur ro/ /sa bcu la gnas par 'gyur ro/ /gang gA'i klung bye ba khrag khrig 'bum phrag dgu bcu rtsa dgu'i bye ma snyed kyi bcom ldan 'das de bzhin gshegs pa rnams la dge ba'i rtsa ba bskyed cing lung bstan pa thob par 'gyur ro/ /de nas mchod rten chen po gcig gi nang du bcug ste shing bu bsgreng ba byas na dus gsum gyi de bzhin gshegs pa'i ring srel gyi snying po 'bum gyi mchod rten zhes bya'o/ /gang dag de las bya ba rnams byed pa de dag thams cad kyang phyir mi ldog par 'gyur ro/ /bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro/ /tha na dud 'gro'i skye gnas su gtogs pa rnams dang / gzhan yang srog chags kyi rigs sna tshogs gang dag der 'dong ba de dag kyang phyir mi ldog par 'gyur ro/ /tha na grib mas phog na yang yongs su grol bar 'gyur na bkur bsti mang du byed pa lta smos kyang ci dgos te/ 'di'i yon tan dang phan yon ni brjod par mi nus so/ /de nas gnod sbyin gyi sde dpon chen po lag na rdo rje dang / rgyal po chen po bzhi dang / tshangs pa dang / khyab 'jug dang / dbang phyug chen po dang / dga' ldan gyi gnas na gnas pa'i lha'i bu de dag dang / brgya byin la sogs pa sum bcu rtsa gsum gyi ris kyi lha'i bu rnams dang / lha'i bu nor bu'i snying po dri ma med pa dang / de dag thams cad bcom ldan 97.282b 'das ga la ba der song ste phyin nas/ bcom ldan 'das la lan gsum bskor ba byas te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das gzungs sngags mthu chen po 'di ni yid bzhin gyi nor bu rin po che lta bur mthong ba dang / thos par dka' ba lags te/ bcom ldan 'das bdag cag lhan cig tshogs nas slad ma'i tshe slad ma'i dus na yid bzhin gyi nor bu rin po che 'di gzung bar bgyi'o/ /rgyas par bgyi'o/ /sems can tha~Md la bsgrag par bgyi'o/ /'di 'dzin pa'i sems can chen po de'i slad bzhin 'brang zhing rtag tu rgyun mi 'chad par bsrung ba dang / bskyab pa dang / sba bar bgyi'o/ /bu bzhin du yongs su bskyang bar bgyi'o/ /bcom ldan 'das kyis bka' stsal pa/ grogs po dag legs so legs so/ /khyod kyis de ltar gyis shig /rig sngags kyi rgyal mo yid bzhin gyi nor bu rin po che 'di ngas khyod la gtad do/ /'phags pa kun nas sgor 'jug pa'i 'od zer gtsug tor dri ma med par snang ba de bzhin gshegs pa thams cad kyi snying po dang dam tshig la rnam par lta ba zhes bya ba'i gzungs/ rdzogas+ho// //rgya gar gyi mkhan po dzi na mi tra dang / shI len+d+ra bo d+hi dang / zhu chen gyi lo ts+tsha ba ban de ye shes sdes bsgyur cing zhus te gtan la phab pa/ / |