@##/ /rgya gar skad du/ Ar+ya pra tI t+ya sa mud pA da hr-i da ya bi d+hi d+hA ra NI/ bod skad du/ 'phags pa rten cing 'brel bar 'byung ba'i snying po'i cho ga'i gzungs/ sangs rgyas dang / byang chub sems dpa' thams cad la phyag 'tshal lo/ /chos gang rgyus byung de dag ni/ /rgyu las 'gog pa gang yin pa/ /de bzhin gshegs pas bka' stsal te/ /de skad gsungs pa dge sbyong che/ /tshig 'di sgrub pa'i cho ga ni/ /sems can rnams la phan byed pa/ /las kun grub par byed pa'i phyir/ /de bzhin gshegs pas rab tu gsungs/ /rigs kyi bu dag gang gis ni/ /dang por bcom ldan sangs rgyas la/ /gus shing dad pa'i sems bskyed nas/ /bcom ldan 'das kyis bka' stsal pa/ /rten 'brel zab mo'i cho ga bshad/ /thams cad las dang 'thun par gsungs/ /dang por 'jug pa'i tshig gsungs pa/ /'di ltar las dang nyon mongs yod gyur na/ /sems can rnams ni 'khor bar 'gro 'gyur la/ /las dang nyon mongs med na 'khor ba las kyang ldog /bden pa 'di yis bdag gis bsam pa 'grub gyur cig /sangs rgyas la phyag 'tshal lo/ /chos la 97.306b phyag 'tshal lo/ /dge 'dun la phyag 'tshal lo/ /yang dag par rdzogs pa'i sangs rgyas gang gA'i klung gi bye ma snyed bzhugs pa la phyag 'tshal lo/ /rang sangs rgyas rnams la phyag 'tshal lo/ /dgra bcom pa rnams la phyag 'tshal lo/ /rgyun du zhugs pa rnams la phyag 'tshal lo/ /'phags pa byams pa la sogs pa'i byang chub sems dpa' rnams la phyag 'tshal lo/ /brtul zhugs grub pa rnams la phyag 'tshal lo/ /sems can gyi sman pa rnams la phyag 'tshal lo/ /nor bu grub pa rnams la phyag 'tshal lo/ /'di lta ste/ na mo rat+na tra yA ya/ o~M ye d+harmA he tu pra b+ha bA he tun+te ShA~M ta thA ga to h+ya ba data/ te ShAny+tsa yo ni ro d+ha e ba~M bA dI ma hA shra ma NaH swA hA/ las rnams kun gyi cho ga la/ /tshigs su bcad pa 'di dag brjod/ /bsam rgyud rang gi lag mthil la/ /sangs rgyas bcom ldan 'das kyi sku/ /skyes bu chen po'i mtshan gyis brgyan/ /dpe byad bzang po brgyad bcus spras/ /me'i khams la zhugs par bsgom/ /de ni lha dag rjes su dran/ /da ni sbyor ba'i las bshad de/ /rim pa bzhin du so sor bstan/ /rims kyis btab nas na ba dang / /klad pa na dang mig nad dang / /khong nad la sogs nad rnams la/ /tshigs bcad 'di dang snying po 'di/ /mang por bzlas shing langs nas ni/ /lag pa g.yas pa'i khu tshur gyis/ /byung pa'i thabs su byab par bya'o/ /nad rnams thams cad sos par 'gyur/ /nyin cig nyin gnyis nyin gsum dang / /nyin bzhi brtag pa'i rims rnaMs la/ /bu mo gzhon nus bkal ba yi/ /skud pa dkar po sum sgril la/ /bzlas brjod nyi shu brgyad bzlas nas/ /mgul du brtags na bde bar 'tsho/ /nad la phan pa'i sman rnams la/ /gzungs sngags 'di dag bzlas shing gtang / /snying nad rtsib logs na ba dang / /khong na nad rnaMs ci yod la/ /chu la sngags 'di mang bzlas 97.307a nas/ /blud na phan zhing bde bar 'gyur/ /nad la phan pa'i sman rnams la/ /bzlas shing btang na 'tsho bar 'gyur/ /g.yan pa dang ni 'brum bu dang / /phol mig dang ni rma red la/ /grog tshang sa la snying po 'di/ /mang du bzlas shing btab na 'tsho/ /gzhang 'brum gzhang nad za khu dang / /pho mtshan skrangs zhing na ba la/ /skyer pa'i kha 'da'i ri lu 'am/ /byang chub sems dpa'i ri lu la/ /nyi shu bzlas shing bskus na phan/ /nad kyi rnam pa gang na yang / /nad tshabs che chung tshod brtags nas/ /tshigs su bcad pa'i bzlas brjod la/ /mang nyung nad dang sbyar nas kyang / /lu la byab cing bzlas na phan/ /'khru bag nad kyis btab pa la/ /sman nam rilu kha zas la/ /bdun nam nyi shu bzlas nas kyang / /khong du btang na phan par 'gyur/ /de la bzlas brjod snga ma ste/ /'di dag rab tu bzlas par bya/ /na mo rat+na tra yA ya/ o~M ye d+harmA he tu pra b+ha bA he tun+te ShAn+ta thA ga to h+ya ba data/ te ShAny+tsa yo ni ro d+ha e ba~M bA dI ma hA shra ma NaH swA hA/ de dag bzlas na nad rnams 'tsho/ /de ni nad rnams 'tsho ba'o/ /de nas yang ni bka' stsal pa/ /nas dang gro dang sran ma dang / /'bras dang sran chung mon sran dang / /shing tog dgun 'brum a ru ra/ /de dag kun la za ba'i/ /srin bu sbur bu phye ma leb/ /bye'u dang byi ba ne tso dang / /lo tog za ba kha bcing na/ /zhing gi khyon dang sbyar nas kyang / /phye ma sa dang thal ba dang / /bzlas brjod brgya ni rtsa brgyad bzlas/ /zhing dang shing tog gtor byas na/ /de dag kun kyang kha bcings 'gyur/ /ha cang char pa ches pa na/ /bcom ldan 'das la phul ba yi/ /me tog dman ma re re la/ /bzlas brjod nyi shu rtsa cig bya/ /gtsang zhing gde ba'i gnas dag tu/ /dkyil 'khor chen po'i dbus dag tu/ /bum pa gang ba'i steng dag tu/ /kham phor gtsang ma'i nang du yang / /me tog gtsang ma bzlas pa de/ /bsregs na char pa 'chad par 'gyur/ /ser ba drag po 'ong ba na/ /se ba nya mig lcug ma la/ /bzlas brjod 97.307b brgya ni rtsa brgyad bzlas/ /ser ba gang nas g.yo ngos su/ /klad la bskor zhing byabs na chad/ /yang na thal chen yungs kar la/ /bzlas brjod brgya ni rtsa brgyad bya/ /thum po byas te lcug ma la/ /btags te brtsugs na ser ba 'chad/ /'byung po sha za yi dag dang / /brjod byed gdon gyi zin pa la/ /dkyil 'khor 'dom gang gru bzhi la/ /bum pa gtsang ma lnga bzhag ste/ /gu gul dud pas bdug nas kyang / /yungs kar ga pur tsan dan dang / /gla rtsi la sogs sman sbyar te/ /bzlas brjod brgya ni rtsa brgyad bzlas/ /gos dang zas ni dkar po sbyar/ /dkyil 'khor de'i nang du bzhug /bum pa'i chu yis bkru bar bya/ /sangs rgyas sku bsil byas pa'i chu/ /bkru zhing blud na rab tu phan/ /nad dang gnod pa kun las thar/ /'byung po brjed byed sha za yis/ /glags kyang rnyed par mi 'gyur ro/ /byis pa gdon gyis 'jigs pa la/ /gi'u wang la ni sngags bzlas ngas/ /snying po stobs chen 'di bris gdags/ /o~M badzra kro d+ha ma hA ba la/ ha na da ha/ pa tsa bi d+h+wa na sa ya/ dza ti la la~M b+ho d+ha ra/ u ts+tshuSh+ma kro d+ha hU~M phaT swA hA/ gtsang sbra byas te mgul par gdags/ /de bzhin yang kar dag la yang / /bzlas brjod byas te gtums la gdags/ /mkha' 'gro'i gdon gyis zin pa na/ /yung kar dang ni gu gul la/ /sngags gnyis lan ni bdun bdun bzlas/ /dud pas bdugs na tsho bar 'gyur/ /de la the rtsom mi za'o/ /byis pa gdon dang nad las thar/ /bud med bu ni thogs gyur na/ /chu la bzlas brjod lnga bdun byas/ /blud na legs par btsas par 'gyur/ /bud med mo sham bud med la/ /sangs rgyas sku bsil byas pa'i chu/ /de la sngags brjod nyi shu bya/ /khrus byas lus ni gtsang ma la/ /chu de blud na bu tsha phan/ /rigs rgyud dag ni 'phel bar 'gyur/ /lam du zhugs te 'gro ba na/ /skud pa dang ni gos 97.308a kyi grwar/ /bzlas brjod bdun bzlas mdud pa bdun/ /mdud bcing bzlas te song ba na/ /bde bar 'gro zhing don yang 'grub/ /dgra dang nye zho med par 'gro/ /yid ni gzhungs par 'dod pa na/ /shu dag tshon gang tsam pa dang / /mar srang sum brgya drug cu la/ /bzlas brjod byas te bsres nas kyang / /bum pa cig tu blug la dkrug /nyi ma re re lo gcig tu/ /shu dag gi ni dum re dang / /mar srang dag ni re re la/ /bzlas brjod re re bya zhing bza'/ /des ni yid gzhungs blo ldan 'gyur/ /de bzhin pa ni ser skya ma'i/ /mar dang 'o ma dag la yang / /bzlas brjod brgya ni rtsa brgyad du/ /bzlas te 'o thug dkrug cing bza'/ /yid gzhungs pa'i mchog tu 'gyur/ /mi dang 'grogs shing mdza' 'dod na/ /gang dag yid dang 'thad pa la/ /me tog dang ni rtswa shing la/ /'bras bu 'am ni 'ji ba dag /lag pa g.yas pa'i chang bar bcug /bzlas brjod brgya ni rtsa gcig gdab/ /gang gi lag tu byin pa na/ /de dang rtag tu mdza' bar 'gyur/ /rta la sogs pa'i phyugs rnams kun/ /'chi bar nye bar gnas pa na/ /chu dang yungs kar bcas pa la/ /bzlas brjod brgya ni rtsa brgyad bya/ /de la gtor na sos par 'gyur/ /yang na yungs kar brgya brgyad la/ /bzlas pa'i thum po mgul du gdags/ /de ni nad med bde bar 'gyur/ /mi rnams 'chi bas 'jigs gyur na/ /yungs kar la ni bzlas brjod bya/ /thum po byas te sgo la gdags/ /bzlas brjod brgya stong 'bum yang bzlas/ /mi nad dang ni phyug nad kun/ /ming yang med cing bde bar 'gyur/ /de dag kun gyis bzlas brjod ni/ /'di dag kun du rgya ched gsungs/ /na mo rat+na tra yA ya/ o~M ye d+harmA he tu pra b+ha bA he tun+te ShAn+ta thA ga to h+ya ba data/ te ShAny+tsa yo ni ro d+ha e ba~M bA dI ma hA shra ma naH swA hA/ rtag tu bzlas brjod byas na ni/ /bsam pa yongs su rdzogs par 'gyur/ /gnod pa cis 97.308b kyang tshugs mi 'gyur/ /dam chos yongs su gzungs bar 'gyur/ /tshigs su bcad pa 'di dag ni/ /mthu dang rdzu 'phrul bsam mi khyab/ /cho ga 'di dag thams cad ni/ /gang la dad pas yid ches na/ /'grub par the tsom med par 'gyur/ bzlas brjod 'bum ni byas gyur na/ /dgos pa thams cad 'grub par 'gyur/ /'phags pa rten cing 'brel par 'byung ba'i snying po'i cho ga'i gzungs/ ston pa shAkya'i thugs rje 'di/ /dge slong ner ban rak+Shi tis/ /tho gar yul nas rnyed pa ste/ /'gro ba kun gyi dpal du shar/ /rdzogs s+ho// // |