@#/ /rgya gar skad du/ Ar+ya a ba lo ki ti shwa ra aSh+Tot+ta ra sha ta ka nA ma d+hA ra NI man+t+ra sa hi ta/ bod skad du/ 'phags pa spyan ras gzigs dbang phyug gi mtshan brgya rtsa 98.134b brgyad pa gsungs sngags dang bcas pa/ byang chub sems dpa' chen po spyan ras gzigs dbang phyug la phyag 'tshal lo/ /na maHsarba bud d+ha bo d+hi satwa nA~M/ sa man ta a mo ga a pra ti ha ta shA sa na nA~M/ na maH Ar+ya a ba lo ke te shwa ra ya/ ma hA bo d+hi satwA ya/ badzra satwA ya/ badzra bi pu lA ya/ pad+ma sa~M b+ha bA ya/ pad+ma yo na ye/ tad+ya thA/ o~M hrI ka ra hrI ka ra/ pra b+hA kar/ badzra satwa/ badzra saM b+hA ba/ pad+ma saM b+hA ba/ pad+ma sa ga ra/ pad+ma go tsa ra/ bar d+ha ma hA kA ru Ni ka /kA ru Ni ka b+ha ba/ hU~M hU~M/ d+ha ra d+ha ra/ da ra da ra/ ba ra ba ra/ ma hA kA ru Ni ka ma hA shud d+ha satwA swA hA/ de nas phyogs bcu'i de bzhin gshegs pa thams cad kyis phyag g.yas pa brkyang ste/ /byang chub sems dpa' chen po spyan ras gzigs dbang phyug gi mgo bo la byugs nas bka' stsal pa/ yon tan rin po che'-i phung po khyod kyis gzungs sngags 'di bshad pas sems can rnams la sangs rgyas 'byung ba'i chos bstan pa legs so legs so/ /'di ni thos pa tsam kyis kyang sems can rnams shin tu rnam par dag par byed pa'o/ /gang la la nyan pa dang / 'chang ba dang / klog pa dang / kun chub par byed pa des ni yon tan phun sum tshogs pa thams cad dang / dag pa'i mchog kyang thob par 'gyur ro/ /de nas lha'i dbang po dbang phyug chen po dpag tshad 'bum phrag du mar khyab cing 'jig rten gsum po kun tu rgyas ko lta ste/ 'khor dang bcas pa dang / rdo rje'i dkyil 'khor du 'dus pa'i byang chub sems dpa' thams cad kyis mgo bo btud nas 'phags pa spyan ras gzigs dbang phyug la sa'i dbang phyug dpa' bo rnam par rtse ba zhes bya ba'i mtshan brgya rtsa 98.135a brgyad pas mngon par bstod pa/ sa yi dbang phyug rdo rje'i dkyil 'khor pa/ /srid gsum ma lus yon tan chen po'i bdag /dri med skyon bral gsal ba'i dkyil 'khor can/ /snying rjes khyab pa'i dkyil 'khor rgya che ba/ /rab dga' rab dgyes rab tu ston pa po/ /skal pa bzang po rnam thar zhi ba'i mchog /shin tu rnam dag yon tan chen po'i bdag /rnam dag du mar grag pa'i me tog thod/ /rab mchog srid gsum dag gi mig gcig pa/ /mchog sbyin 'gro ba kun gyi 'byor pa mdzes/ /dpag med pas kyang dpag med bskal par 'byung / /skyabs dang yid 'phrog dag cing gsal bar mdzad/ /nor bu'i thod can rdo rje las byung ba/ /srid gsum gcig pa dpa' bo pad ma'i spyan/ /thos pa'i rgya mtsho sems can kun bas dpa'/ /'gro ba thams cad rnam par grol mdzad mchog /snyan cha mgul zhing pad ma dag pa bsnams/ /dbang phyug bde gshegs bzhugs pa'i thor tshugs can/ /tshul bzang yon tan rgyan du 'tsham pa'i gzugs/ /'jig pa'i rlung chen 'tshab pa'i mtshon cha can/ /dge ba'i rgyu ste dam pa stsol ba'i rgyu/ /tshul gyis long spyod bde chen mchog gi rgyu/ /dkyil 'khor mchog gi spyod yul rgyu gcig pa/ /srid gsuM sgrol ba'i zam pa gcig pu lags/ /dkyil 'khor mchog gi rgyan te sdig med pa/ /gser mdog 'od rgyan rten du gyur pa ste/ /mnyam pa nyid kyis mi mnyam mtshungs par 'gyur/ /sa brnyes 'od zer rgyas pa rgyan phreng mnga'/ /chen po'i che ba thog ma med pa ste/ /snga ma mun pa bsal zhing nyon mong med/ /dge bas dag pa spyod yul rnam par dag /tshul gyis dkyil 98.135b 'khor yang shing rnam par dag /srid gsum dbang phyug pad ma las byung ba/ /srid gsum bde can yangs pa'i dbang phyug ste/ /dbang phyug mi g.yo rnal 'byor mkhas pa po/ /de bzhin gshegs pa chen po rab mchog yangs/ /nor bu'i rgyan gyi rdo rje rgyan du thogs/ /pad mas brgyan pa lhun po las byung ba/ /dge snod yon tan chen po'i snod gcig pa/ /bde la longs spyod rnam 'dren chen po'i bdag /smon lam rgya chen rgya mtsho ldan pa ste/ /'gro ba srid par lhung ba grol mdzad pa/ /sa dang mnyam pa thams cad gzigs par mdzad/ /skal bzang bskal pa stong gi snang ba po/ /rdo rje mchog gis bsgegs pa'i dkyil 'khor can/ /yon tan rnam grags khyab par dkyil 'khor ba/ /dge ba'i mtshan nyid dpa' bo'i rtsal mnga' ba/ /de bzhin nyid chos ro mkhyen spyod yul can/ /cod pan thig le dmar po'i dkyil 'khor ldan/ /lha chen brgya mnga' sum bcu gsum bdag dbang / /lha dang lha min dbang byas rnams kyis btud/ /brtson 'grus brgya dang ldan zhing rtsal stong mnga'/ /bsod nams brgya mnga' mtshon cha brgya 'chang ba/ /pad ma brgya pa pad ma nyid las byung / /dkyil 'khor brgya yi dbus na mdzes pa ste/ /chos brgya ldan pa mchog stong ston pa po/ /sangs rgyas stong phrag mang pos yong bstod pa/ /bskal pa rab 'byam mang por mkhas pa te/ /dkyil 'khor mang po dag na dpa' ba'i sku/ /'jig rten 'das pa'i mthu mnga' ston pa po/ /rgya chen dri med dkyil 'khor dbus na bzhugs/ /rab dga' bsgyings pa 'thor mdzad me tog thod/ /na bza' dar dkar la mnabs 'od mdzad pa/ /thugs kyi dkyil 'khor thugs rjes brgyan pa las/ / 98.136a cha phrar gse mdzad mtha' yas zad mi shes/ /dpa' bo nyi ma'i 'od zer brgya mnga' ba/ /nor bu'i dkyil 'khor zla 'dra 'od gsal zhing / /nyi mas kha phye pad ma mchog bsnams pa/ /me tog mtshon cha thog pa'i lha zhes grags/ /gtsug pud gsum pa tshangs sras skye dgu'i bdag /btsun rigs mchog ste rigs chen nang du skyes/ /rang gi rigs gsol dbang chen dkyil 'khor ba/ /pad ma bzang ba'i rigs mchog thig les mtshan/ /spyan bzang dge ba'i lha rnams rten gyur pa/ /gsang sngags mang po 'dzin pa'i dbang phyug po/ /tshogs chen bdun na 'dus pa'i mnga' bdag lags/ /spyan gsum dag gis dkyil 'khor mdzes gyur pa/ /ka la ping ka'i skad kyis sdang ba 'dul/ /mda' dang ru gzhu stobs chen mtshon cha bsnams/ /stobs kyi lha ste stobs dang brtson pas 'dul/ /rgyan rnams sna tshogs legs par spras pa ste/ /rgyal ba rig sngags 'chang ba mang pos bstod/ /tshogs mchod dag byed rnams gyis rab bstod pa/ /chu srin 'dzin khri'i 'jigs las rab grol mdzad/ /gzugs mang mnga' zhing bde skyid rab sbyin pa/ /lha yul 'gro ba'i khyad par dkyil 'khor can/ /mtshungs med pas kyang mtshungs med mthu rtsal mnga'/ /stabs gshegs yon tan che mchog 'od zer ldan/ /'jig rten nang na mkhas pa spyan ras gzigs/ /sa gzhi'i dkyil 'khor dbus kyi dkyil 'khor can/ /'od zer mang po stong phrag zad mi shes/ /nyon mongs rdul rnams thams cad sel mdzad pa/ /mtha' dang bral ba kun du gzigs pa ste/ /rab zhi kun las 'phags pa'i spyod yul can/ /don dang tshul la sems can gcig dpa' ba/ /theg pa bzang po 'dzin pa'i nyi ma lags/ / 98.136b dul dang sbyin dang tshul la dad pa brnyes/ /skye dgu rnams kyi dri ma ma lus bcom/ /blo gros bzang po rab dgyes ston pa po/ /bde ldan gos brgyan yang ba sna tshogs can/ /bcom ldan 'byung ba'i 'jig pa med par mdzad/ /rtag tu dge ba kun mchog sbyin pa po/ /rgyal bas gsungs pa'i rnam thar brnyes pa'i blo/ /bde ba longs spyod cher 'gyur dri ma med/ /zhal gyi dkyil 'khor rgyas shing dri med pa/ /mi dang sred med brgya byin lag pa'i mchog /'jig rten mang po gzigs pa'i dbang phyug po/ /stobs dang rigs dang mthu stobs che ba lags/ /sangs rgyas mtshungs shing chos mchog rin chen mtshungs/ /dge 'dun mtshungs shing chags bral thub par dka'/ /khyad par gsum 'phags r-in chen mchog chen mtshungs/ /khyab bdag nyon mongs rnam gsum rdul bsol ba/ /rdo rje sems mchog khyod la phyag 'tshal lo/ /pad ma dri med phyag gi dbus bsnams pa/ /thor tshugs can la gzugs ldan cod pan thogs/ /spyi bo 'od dpag med rgyas khyod phyag 'tshal/ /de nas bcom ldan rang byung mun sel ba/ /rnga chen sgra ltar brtan pas bka' rtsal pa/ /mchog chen rdo rje glu la bstod pa yin/ /ming brgya rtsa brgyad skyon sel legs pa mang / /ji ste la la rtag tu dge mchog 'dod/ /spyan ras gzig dbang la ni bstod byed pa/ /des ni ring por mi thogs yon tan gyi/ /longs spyod mchog chen chos ni thob par 'gyur/ /mi n-i gang zhig rtag tu 'dis bstod la/ /spyan ras gzigs dbang dam pa sbyin par byed/ /sdig pa rnams kyang de la 'byung mi 'gyur/ /'dod pa gang yin bde blag de yis 'thob/ /de ni sdig pa'i dri mas mi gos te/ /lam srang bzang por dmigs te 'gro bar 'gyur/ / 98.137a srid gsum skyabs 'os gcig pu pad ma skyes/ /de 'drar chos kyi mchog la spyod par 'gyur/ /de ltar ming gi khyad par grub 'dod cing / /gang zhig rtag tu bde ba 'dod pa yis/ /'gro kun skye dgu'i bdag po spyan ras gzigs/ /pad ma las byung rtag tu bstod par gyis/ /bcom ldan 'das bla ma 'phags pa spyan ras gzigs dbang phyug gi mtshan brgya rtsa brgyad pa gzungs sngags dang bcas pa rdzogs s+ho// // |