@#/ / rgya gar skad du/ Ar+ya kha gar+b+ha aSh+Tot+ta ra sha ta ka nA ma d+hA ra NI man+t+ra sa hi ta/ bod skad du/ 'phags pa nam mkha'i snying po'i mtshan brgya rtsa brgyad pa gzungs sngags dang bcas pa/ 'phags pa nam mkha'i snying po zhal ras rgya che zhing spyan gy-i 'od 'phro bas nam mkha'i dkyil/ /dri zhim par mdzad pa la phyag 'tshal lo/ /nam mkha'i spyod yul can sa'i dkyil 'khor thams cad snang bar mdzad pa la phyag 'tshal lo/ /o~M swa sti ka mA la k+Shi bi bu la sam b+ha ba/ d+harmA d+hA tu go tsa ra swA hA/ /gzungs 'di brjod ma thag tu ngan song dang ngan 'gro thams cad ni rab tu zhi bar gyur/ sa yang g.yos par gyur/ rnga bo che dag gi sgra yang grag par gyur/ sangs rgyas thams cad kyis kyang legs so zhes bya ba byin no/ /de nas bcom ldan 'das rnam par snang mdzad kyis bka' stsal pa/ /kye 'khor gyi dkyil 'khor na 'khod pa'i sems can rnams nam mkha'i snying po'i 98.139b snying po dkyil 'khor mngon sum pa rnams kyi swA hA'i gachog gi gzungs 'byung bar shin du dka' ba/ bsod nams chen po sdig pa dang nyon mong pa thams cad sreg pa/ byang chub sems dpa' thams cad kyi ma/ rin po che'i phung por gyur pa 'di nyon cig dang / 'di thos pas dri ma med par 'gyur zhing legs par khrus byas par 'gyur la shin du rnam par dag par 'gyur ro/ /pad ma lta bur 'gyur te/ 'khor ba'i 'dam gyis mi gos so/ /nyi ma lta bur 'gyur te/ sems can thams cad snang bar byed do/ /zla ba lta bur 'gyur te/ sems can thams cad rab tu sim par byed do/ /nam mkha' lta bur 'gyur te/ ngan song gi sdug bsngal thams cad kyis mi gos so/ /sa gzhi lta bur 'gyur te/ mtho dman med do/ /lhun po lta bur 'gyur te/ sems can thams cad kyis bskyod par mi nus so/ /thar pa lta bur 'gyur te/ bde ba dang sdug bsngal gyis mi gos so/ /de la sogs pa yon tan stong phrag bgrangs ba tshad med grangs med pa dag thob par 'gyur te/ nyan pa dang / 'chang ba dang / klog pa dang / brjod pa dang / ston pa tsam dang / bzlas brjod byas pa tsam gyis gang ci yang rung ste/ de'i 'dod pa dang / smon pa dang / re ba de dag 'grub par 'gyur ro/ /bzlas brjod byas pa tsam gyis kyang char ches pa dang / char mi 'bab pa dang / sdang bas dkrugs pa dang / mi nad dang / rmi lam ngan pa dang / gnod pa 'byung ba dang / 'jig pa'i dus dang / 'chi ba dang / chom rkun dang / dgon pa dang / g.yul 'gyed pa dang / can zan dang / mu ge'i sdug bsngal rnams las yongasu bsrungs bar byed la/ bde ba dang / 'byor pa dang / ci 'dod pa dang / ci la dga' ba thams cad kyang 'grub par 'gyur ro/ /de nas 'khor de dag thams cad kyis ha ha zhes ca co dang ga zha bton te/ sgra ring zhes byas nas gos dang / rgyan sna tshogs bskyod de/ snying nas phyag 'tshal nas byang chub sems dpa' thams cad la dbang byed pa 'phags pa nam mkha'i snying po'i mtshan brgya rtsa brgyad pa'i bsngags pa 98.140a rgya mtsho'i bstod pa yang dag par brjod pa/ nam mkha'i snying po srid gsum sems can mchog /'byor ldan blo gros rin chen rgya mtsho mnga'/ /sems can dag pa bla med rin chen mchog /thar pa'i sa bon 'khor ba'i sdug bsngal sel/ /kun mkhyen tshul mkhyen legs dang legs min mkhyen/ /thar mkhyen chos mkhyen bde dang mi bde mkhyen/ /lam mkhyen gces mkhyen dge dang mi dge mkhyen/ /dus mkhyen dge mkhyen stobs dang stobs min mkhyen/ /'gro mchog chos mchog sems can yon tan mchog /lam mchog sngags mchog tshul dang tshul min mchog /rgyan mchog chos mchog 'dzin dang 'dzin min mchog /dag mchog rtogs mchog mchog dang mchog min mchog /zhi rab snying rje'i rab ste 'khor gyi rab/ /'od rab thar pa'i rab ste rten gyi rab/ /rgya rab sngags kyi rab ste thugs brtse'i rab/ /mnyam rab sems can rab ste gsum rig rab/ /leg sgron mchog sgron stobs dang stobs min sgron/ /thar sgron rigs sgron rgyal dang rgyal min sgron/ /dge sgron gzi sgron nor bu'i 'od kyi sgron/ /rgyu skar zla ba'i brgyan las shar ba'i sgron/ /mchog 'od yon tan kun gyis 'od zer 'od/ /legs 'od thar pa'i pho brang rten gyi 'od/ /'od chen gti mug rab tu 'byed pa'i 'od/ /rdo rje'i 'od 'bar bde ba'i 'od 'chang ba/ /rdo rje'i dbang po 'dren dbang sems can dbang / /rin chen 'od kyi dkyil 'khor brgyan dbang po/ /rgyal dbang rgyal ba'i stobs rgyun tshad med dbang / /dpa' bo rig sngags 'chang dbang srid gsum dbang / /rdo rje bzang po rdor 'od rdo rje 'bar/ /rdo rje sems dpa' rdo rje 'bar bas brgyan/ /rdo rje 'od can rdor 'dzin rdo rje drag /rdo rje rgya chen rdo rje rab mchog dbang / /na bza' sngo zhing sku yi cha lugs sngo/ /sku mdog sngo zhing sngo ba'i 'od kyis brgyan/ /ral gyi rno 'dzes sngo zhing bstan pa bsnams/ /mkha' sngo gzhal med khang 'bar nang na bzhugs/ /lha zhal dri med shin du 98.140b mi bzad 'bar/ /rab tu drag la 'od zer 'phro zhing 'gyur/ /sdig sel rdul ltar 'khrug byed phreng mchog can/ /glog gi stobs kyis snang bas bsgegs la bstan/ /ral gri mtshon thogs dbang ldan mthu stobs mtshon/ /rdo rje'i cha tshon thogs mda' dang mdung thung 'jigs/ /'khor lo'i mtshon thogs bcibs pa ri dang 'khrul/ /gsal shing mtshon thog bgegs kyi stobs 'joms pa/ /bde 'byung 'jig rten gsum bdag rdo rje'i dbyug /sku rnams thams cad nyi ma 'i 'od kyis brgyan/ /grag pa'i rigasu byung bas rgyal po mdzad/ /mu tig phreng bas bsgeg cing mdzes par bgyis/ /sku mdzes brnyes shing phun sum tshog pa brnyes/ /rab 'byam mchog brnyes sa la 'jug pa brnyes/ /mthu stob lhag pa brnyes shing grub brnyes la/ /rig pa gsum gyi stobs brnyes mthu brnyes pa/ /bde 'dren zhi ba 'dren cing 'od 'dren pa/ /cha lug gsal mchog dar ba chen po 'dren/ /byam 'dren nyi ma 'dren cing skye dgu 'dren/ /leg 'dren zhing gi stob 'dren snying rje can/ /dri med cha lug gsal ba cha lug 'bar/ /rnam grag bsgeg pas grag pa'i ba dan can/ /'gro ba'i skabs bya byed 'jug dang ldog pa mkhyen/ /long spyod gsal bar ston pa'i sems kyis 'jug /sku dmar sku mthon sku mdzes sku bzang ba/ /sku ser sku dkar dar ba chen po'i sku/ /sku rol rdo rje'i sku mnga' spyan legs sku/ /rig sku rig sngags 'chang ba rin chen bsnams/ /gtsug gi nor bu gtsug can cod pan mchog /cod pan can te chos 'dzin rdo rje mchog /dpal 'dzin rin chen dam pa 'chang ba'i mchog /sngags gzhi phyag rgya 'chang ba phun sum tshogs/ /rab mdzes mkha' la gshegs shing rab tu rgyu/ /srid gsum nyi ma gcig pu 'od stong mnga'/ /ri rtse 'char ba bdal legs bkra shis pa/ /yon tan mthu stobs khyad par rnam par grag /nor bu chen po nor sdug nor bu'i 'od/ /nyi ma'i nor bu tshul spyod nor bu 'bar/ /yid bzhin nor bu 'gro kun mgon gcig pu/ /nam mkha'i dkyil na nor bu gcig snang ba/ /sems can 98.141a rnam dag yang shing rnam par grag /srid gsum bsrungs ma gcig pu rgyal sras mchog /zhi ba rab tu zhi ba skyabs 'os rtag /skye dgu'i babag po pad 'byung pad ma skyes/ /kun nas 'od bzang leg bshad chos mnga' ba/ /dar ba legs bshad rab brtul legs bshad phyag /blo bzang 'od bzang bde ldan skye gnas bzang / /mkhas rab zhi rab mchog gi chos dang ldan/ /zhi mdzad rgyal 'byung bde ba 'byung ba'i gnas/ /'od kyi 'byung gnas bde mdzad dbang du mdzad/ /legs 'byung shes rab 'byung gnas stobs bskyed pa/ /snying rje'i 'byung gnas blo bzang rnam grags mdzad/ /rnam grol nges grol shin du grol ba'i blo/ /blo yangs rnam par bkram zhing rnam par grag /kun du longs spyod sgo ste blo yi mchog /blo gros brtan pa dkon mchog gsum las bsgrubs/ /sangs rgyas pad ma 'dab rgyas 'dra ba'i zhal/ /dag cing spyan yangs cha lugs yid tu 'thad/ /snying po gsal ba'i snying po brtan zhing dul/ /ngo bo nyid kyi rgyun brnyes rab gsal ba/ /spyan zur mnga' ni rab du gtang legs pa/ /'jigs med zhal ras ston kyi zla ba 'dra/ /mdung thung brgya yi mtshon mchog mtshon cha rdzogs/ /drag po 'jigs pa sdig sel gsum las skyes/ /rab dul mkhas pa 'grog dga' 'dris par sla/ /rab tu drag pa gnyen rab gser mdog can/ /lha chen bde byed gsal shing phyag na bsnams/ /spyan gsum rig pa gsum ldan me gsum sel/ /'dod bzang me tog mtshon thogs me tog mnga'/ /na bza' bzang mnabs g.yas 'phen tshabs cher 'phen/ /legs bris sna tshog mtshon cha sna tshogs mnga'/ /na bza' sna tshogs sna tshogs brgyan gyi dpal/ /zhal ras zla ba 'od zer rgyas pa 'dra/ /zhal mdangs bstan pas 'jig rten kun 'byor mdzad/ /bzhad pa nyi ma'i 'od zer rab 'jebs mnga'/ /zhal mdangs rgya mtsho gsal mdzad lam me ba/ /dbang chen rdo rje'i thog lags 'jig pa'i sgra/ /rdo rje drag po nor bu g.yo ba 'dzin/ /sgra brnyan snang bar mdzad pa'i mthu dang ldan/ /blo gros chen po blo 98.141b gros rno ba'i mchog /brgyan 'dzin dpal 'dzin rin chen zhal dang ldan/ /rgyu dang mi rgyu 'gro ba kun gyi gnas/ /de bzhin gshegs pa mgon sras phreng ba bzang / /stobs chen 'jig rten blo gros ngo bo nyid/ /skye dgu'i bdag po bka' lung mnyam zhing brtags/ /mi yi mnga' bdag mtho ris bskyed pa'i rgyu/ /sgyu 'dra 'dod pa'i mda' dang rdo rje can/ /mthu stobs mnga' zhing spyan bzang sdug par ltan/ /ston pa bzang po stong nyid lam gyi stegs/ /gces gsum 'phel ba'i rgyu la 'jug pa mdzad/ /brtan po rgyu la rab tu nges gyur pa/ /dkyil 'khor dam pa kun gyi slob dpon lags/ /gcig pu skye dgu'i dkyil 'khor cho ga mkhyen/ /rnam par snang mdzad zhing gi gnas nas skyes/ /dbang bskur brnyes shing sa bcur legs par gnas/ /gnas chen son pa mchog gnas gcig pu lags/ /skye dgu rnams kyi nyon mongs sel ba dang / /sdig 'joms mtshan brgya rtsa brgyad 'di thos nas/ /bde gshegs sras mchog su zhig 'don byed pa/ /'jig rten zla ba gcig shar bzhin du snang / /nam mkha'i snying po sems can gcig pu yi/ /mdun 'dug nang par bstod pa 'di brjod gang / /de ni srid gsum sems can mchog 'gyur zhing / /dri ma'i gnas kun las kyang thar bar 'gyur/ /g.yul dang 'thab rtsod shin tu mi bzad dang / /mu ge'i gnod pa mi nad byung ba na/ /mkhas pa su zhig sngar langs dad bskyed nas/ /nam mkha'i snying po la ni bstod byed pa/ /de ni 'jigs pa'i 'byung gnas thams cad dang / /sdug bsngal 'byung 'dren sdig pa rnams las grol/ /de ni zhi mchog mchog bde kun gnas dang / /bde ba rgya chen nges par thob par 'gyur/ /bde 'thob long spyod 'phel bar bya ba 'am/ /rgyal srid 'thob dang byed gzugs nor 'thob dang / /rig 'thob yon tan kun gyi gzhi bsgrub phyir/ /bton na 'grub 'gyur 'di la the tsom med/ /de phyir ji ste rtag tu 'dod bde kun/ /'dod na 'gro ba kun la gcig dpa' ba/ /nam mkha'i snying po 98.142a srid gsum mgon po la/ /rtag tu brtan cing sngags kyang bsten par bgyi/ /'phags pa nam mkha'i snying po'i mtshan brgya rtsa brgyad pa gzungs sngags dang bcas pa/ rdzogs s+ho// // |