@#/ /rgya gar skad du/ Ar+ya ma hA pa ri nir bA Na sU tra/ bod skad du/ 'phags pa yongs su mya ngan las 'das pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das ku sha'i grong khyer chen po gyad kyi 49.147a nye 'khor shing sa la zung gi tshal na dge slong stong nyis brgya lnga bcu'i dge slong gi dge 'dun chen po dang thabs gcig tu bzhugs te/ de phyi ma'i dus dang nye bar gyur pa na de'i tshe bcom ldan 'das kyis tshe dang ldan pa kun dga' bo la bka' stsal pa/ kun dga' bo nga yongs su mya ngan las 'das nas lo brgya phrag dang po la ni bstan pa la chos la bla mar byed par 'gyur ro/ /nga'i nyan thos rnams kyang chos kyi kun dga' ra ba la dga' ba dang ldan par 'gyur zhing shes pa la mkhas pa dang shes rab dam pa dang ldan pa'i rang bzhin can du 'gyur ro/ /kun dga' bo yang de'i tshe na rgyal po mya ngan med ces bya ba 'dzam bu'i gling gi dbang phyug la dbang byed par gyur te/ de nga yongs su mya ngan las 'das pa'i sku gdung gi ring bsrel gyi mchod rten rgya cher byed par 'gyur ro/ /kun dga' bo nga yongs su mya ngan las 'das nas lo brgya phrag gnyis pa la ni bstan pa la rnam par grol ba'i snying po can du 'gyur ro/ /nyan thos rnams kyang nga la ston par rtog cing ston par mkhas par byed par 'gyur ro/ /kun dga' bo nga yongs su mya ngan las 'das nas lo brgya phrag gsum pa la ni bstan pa la bsgrub pa snying por byed par 'gyur ro/ /nga'i nyan thos rnams kyang gnyis ka'i cha las rnam par grol bar 'gyur ba'i lus kyis mngon sum du byed cing mthong bar thob pa dang shes rab kyis rnam par grol bar 'gyur ro/ /kun dga' bo nga yongs su mya ngan las 'das nas lo brgya phrag bzhi pa la ni bstan pa la rnam par dben pa'i snying por byed par 'gyur ro/ /nga'i nyan thos rnams kyang nang du yang dag 'jog la dga' bar 'gyur ro/ /kun dga' bo nga yongs su mya ngan las 'das nas lo brgya phrag lnga pa la ni bstan pa la chos bla mar byed par 'gyur ro/ /nga'i nyan thos rnams kyang chos kyi kun dga' ra ba la mngon par dga' bar 'gyur ro/ /kun dga' bo nga yongs su mya ngan las 'das nas lo brgya phrag drug pa la ni bstan pa la klog pa dang 'don pa la mngon par dga' bar 'gyur ro/ /nga'i nyan thos rnams kyang brtson 'grus rtsom par 'gyur ro/ /kun dga' bo nga yongs su mya ngan las 'das 49.147b nas lo brgya phrag bdun pa la ni bstan pa la mchod pa snying por byed par 'gyur ro/ /lha dang klu dang / gnod sbyin dang / dri za dang / lha ma yin dang nam mkha' lding dang / mi 'am ci dang / lto 'phye chen po dang / mi dang mi ma yin pa rnams bstan pa la bsnyen bkur byed cing bla mar byed par 'gyur ba dang / rjed par 'gyur ba dang / mchod par 'gyur ro/ /nga'i nyan thos rnams kyang rnyed pa dang bkur sti dang tshigs su bcad pa lhur len par 'gyur ro/ /kun dga' bo nga yongs su mya ngan las 'das nas lo brgya phrag brgyad pa la ni bstan pa la zhal ta byed par 'gyur ro/ /nga'i nyan thos rnams kyang phan tshun gnod pa byed par 'gyur zhing yi ge la sems par lta ba la mkhas pa dang / mkhan po dang slob dpon la ma gus pa dang / shes bzhin med par gnas par 'gyur ba dang / sgyu dang ldan zhing rang nyid skyes bu ngan pa'i tshig tu smra ba dang / dge 'dun dang mchod rten gyi nor khyim na gnas pa dang / rgyal po'i pho brang du bsdu ba byas nas rnam par 'jig par byed par 'byung bar 'gyur ro/ /kun dga' bo nga yongs su mya ngan las 'das nas lo brgya phrag dgu pa la ni bstan pa las snying por byed par 'gyur ro/ /nga'i nyan thos rnams kyang khyim gyi bya ba'i las byed pa la brtson par 'gyur ro/ /zhing gi las kyi mtha' la dga' ba dang / nyo tshong la mngon par dga' ba dang / 'dod pa la rab tu 'jug cing pho nyar gtong bas 'tsho ba bsgrub par 'gyur ba dang / le lo can du 'gyur ba dang / de bzhin gshegs pas legs par bcas pa'i bslab pa rnams bsrung bar mi 'gyur ro/ /kun dga' bo nga yongs su mya ngan las 'das nas lo stong gi ni bstan pa la gtam gyi snying por byed par 'gyur ro/ /nga'i nyan thos rnams kyang gtam sna tshogs la mngon par dga' ba dang ldan par 'gyur zhing gang gi 'jig rten las 'das pa'i sangs rgyas kyi gsung 'di lta ste/ mdo'i sde dang / dbyangs kyis bsnyad pa'i sde dang / lung bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa'i rabs kyi sde dang / shin tu rgyas pa'i sde dang / rmad du byung ba'i sde dang / chos rnam 49.148a par gtan la dbab par bstan pa'i sde rnams spangs nas sbyor ba gzhan dang ldan par gnas par 'gyur te/ 'di lta ste/ rgyal po'i gtam dang / rkun po'i gtam dang / thab mo'i gtam dang / zas kyi gtam dang / btung ba'i gtam dang / grogs kyi gtam dang / bdag gi gtam dang / khyad par gyi gtam dang / gzhon nu'i gtam dang / grong khyer gyi gtam dang / rgya mtsho'i gtam ste/ de lta bu la sogs pa'i gtam rnams la nges par dga' bar 'gyur ro/ /dge sbyong dang bram ze rnams kyang nga'i dam pa'i chos spong bar byed par 'gyur ro/ /chos 'dul ba 'di la btang snyoms su byed par 'gyur ro/ /gang dge slong rnams dang / dge slong ma rnams dang / dge bsnyen dang / dge bsnyen ma rnams te/ de dag kyang lus ma bsgoms pa dang / tshul khrims ma bsgoms pa dang / shes rab ma bsgoms pa dang / 'thab par byed pa dang / mtshang 'dru zhing rtsod par smra ba la brtson par byed par 'gyur ro/ /lhung bzed bzang po dang chos gos bzang por 'gyur zhing lo brgyar bsrung bar bya ba'i phyir tshul khrims kyang myur du 'dor bar 'gyur ro/ /'di lta ste sdig pa la nges par sems shing 'dres pas sdig pa dang yid mi bde ba la sogs pas de bzhin du lo brgyar bsags pa'i dge ba'i rtsa ba rnams kyang myur du 'jig par byed par 'gyur ro/ /kun dga' bo nga yongs su mya ngan las 'das nas lo stong chig brgya na dge slong tshul khrims 'chal pa rnams 'byung bar 'gyur ba ni 'khor dang g.yog mang bar 'gyur ro/ /tshul khrims dang ldan pa rnams ni 'khor nyung zhing g.yog nyung bar 'gyur ro/ /de nas tshe dang ldan pa kun dga' bo sdug bsngal ba dang yid mi bde bar gyur nas bcom ldan 'das la 'di skad ces gsol to/ /bcom ldan 'das chos 'dul ba 'di la snying por gyur pa gang lags/ bcom ldan 'das kyis bka' stsal pa/ kun dga' bo dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / zhi gnas dang / 49.148b lhag mthong dang / rnam par thar pa'i sgo gsum ste/ kun dga' bo 'di dag ni chos 'dul ba 'di la snying po yin no/ /kun dga' bo dge slong tshul khrims 'chal pa rnams kyis dge slong tshul khrims dang ldan pa rnams la gshe zhing mtshang 'dru bar 'gyur te/ de dag thams cad ni lus dang bral zhing shi ba'i 'og tu ngan 'gro ngan song du rnam par lhung nas sdug bsngal bar 'gyur ro/ /de'i tshe gang zhig khro ba med par gyur pa de dag thams cad ni bde 'gro rnams su skye bar 'gyur ro/ /bcom ldan 'das kyis de skad ces bka' stsal nas tshe dang ldan pa kun dga' bo dang / dge slong de dag dang / thams cad dang ldan pa'i 'khor de dag dang / lha dang / mi dang / lha ma yin dang / nam mkha' lding dang / dri zar bcas pa'i 'jig rten yid rangs te/ bcom ldan 'das kyis gsungs pa la mngon par bstod do/ /'phags pa yongs su mya ngan las 'das pa chen po'i mdo rdzogs sto// // rgya gar gyi mkhan po ka ma la gup+ta dang / zhu chen gyi lots+tsha ba dge slong rin chen bzang pos bsgyur// // |