@##/ /rgya gar skad du/ Ar+ya Ata dz+nyA na nA ma ma hA yA na sU tra/ bod skad du/ 'phags pa 'da' kha ye shes zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das 'og min lha'i rgyal po'i khang bzang na bzhugs te 'khor thams cad la chos ston pa dang / byang chub sems dpa' sems dpa' chen po nam mkha'i snying pos bcom ldan 'das la phyag 'tshal nas 'di skad ces gsol to/ /bcom ldan 'das byang chub sems dpa' nam 'chi kha ma'i sems ji ltar blta bar bgyi/ bcom ldan 'das kyis bka' stsal pa/ nam mkha'i snying po byang chub sems dpa' nam 'chi ba'i dus kyi tshe 'da' kha ye shes bsgom par bya'o/ /de la 'da' kha ye shes ni chos thams cad rang bzhin gyis rnam par dag pas na dngos po med pa'i 'du shes rab tu bsgom par bya'o/ /chos thams cad byang chub kyi sems 49.149a su 'dus pas na snying rje chen po'i 'du shes rab tu bsgom par bya'o/ /chos thams cad rang bzhin gyis 'od gsal bas na mi dmigs pa'i 'du shes rab tu bsgom par bya'o/ /dngos po thams cad mi rtag pas na ci la yang mi chags pa'i 'du shes rab tu bsgom par bya'o/ /sems rtogs na ye shes yin pas na sangs rgyas gzhan du mi btsal ba'i 'du shes rab tu bsgom par bya'o/ /bcom ldan 'das kyis tshigs su bcad de bka' stsal pa/ chos rnams rang bzhin rnam dag pas/ /dngos po med pa'i 'du shes bsgom/ /byang chub sems dang rab ldan pas/ /snying rje chen po'i 'du shes bsgom/ /chos rnams rang bzhin 'od gsal bas/ /dmigs pa med pa'i 'du shes bsgom/ /dngos po thams cad mi rtag pas/ /chags pa med pa'i 'du shes bsgom/ /sems ni ye shes 'byung ba'i rgyu/ /sangs rgyas gzhan du ma tshol cig /bcom ldan 'das kyis de skad ces bka' stsal pa dang / byang chub sems dpa' nam mkha'i snying po la sogs pa'i 'khor 'dus pa thams cad rab tu dga' mgu yi rangs nas/ bcom ldan 'das kyis gsungs pa la mngon par bstod do// //'phags pa 'da' kha ye shes zhes bya ba theg pa chen po'i mdo rdzogs s+ho// // |