//rgya gar gyi mkhan po d+harma shrI mi dra dang / bod kyi lo ts+tsha ba dge slong chos kyi bzang pos bsgyur ba'o/ /stag lung rgyud 'bum la gtugs nas zhus so dag go/ /@/ /rgya gar skad du/ Ar+ya tA rA b+haT+Ta TA ri ka nA ma aSh+Ta sha ta ka~M /bod skad du/ rje btsun ma 'phags ma sgrol ma'i mtshan brgya rtsa brgyad pa zhes bya ba/ rje btsun ma 'phags ma sgrol ma la phyag 'tshal lo/ /dpal ldan yid 'ong po ta la/ /sna tshogs khams kyis rnam par spras/ /sna tshogs ljon pa bkram pa ste/ /skye gnyis du ma sgra 'byin pa/ /'bab chu sna tshogs ku co che/ /ri dgas sna tshogs 'khrugs pa ste/ /me tog sna tshogs rigs rnams kyis/ /kun du dri yis bkang ba ste/ /sna tshogs yid 'ong 'bras bur ldan/ /rkang pa drug pa glu yi sgra/ /mi 'am ci ni glu snyan len/ /glang chen smyon pas yang dag khengs/ /rig 'dzin grub pa'i tshogs rnams dang / /dri za rnams kyang glu len pa/ /thub pa 'dod chags bral rnams dang / /byang chub sems dpa'i tshogs gzhan dang / /sa bcu'i dbang phyug rnams dang ni/ /'phags ma sgrol sogs lha mo rnams/ /rig pa'i rgyal mo stong rnams kyis/ /rtag tu legs par bsten pa'o/ /khro bo'i rgyal po'i tshogs gzhan dang / /rta mgrin la sogs kyis bskor ba/ /sems can kun la phan par brtson/ /bcom ldan 'das ni spyan ras gzigs/ /bzhugs te de phyir dpal dang ldan/ /pad ma'i snying po thub pa'i gdan/ /dka' thub chen po dang ldan pa/ /byams pa dang ni snying rjer ldan/ /lha yi 'khor ni chen po la/ /chos gsung bar ni yang dag bzhugs/ /de ru nyer 'dug yang dag lungs/ /phyag na rdo rje stobs po che/ /mchog tu snying rje dang ldan pas/ /spyan ras gzigs la zhus pa ste/ /rkun po sbrul dang seng ge me/ /glang po stag dang chus 'jigs pas/ /zhi mdzad thub pas sems can rnams/ / 100.75a 'khor ba'i rgya mtshor bying ba rnams/ /'khor ba'i zhags pas bcings pa rnams/ /chags sdang gti mug dri ma las/ /gang gis sems can grol gyur pa/ /de gsungs bdag la thub chen po/ /'jig rten mgon pos 'di skad gsungs/ /dpal ldan de ni spyan ras gzigs/ /phyag na rdo rje rab rtogs byed/ /snyan pa'i tshig ni 'di skad gsungs/ /nyon cig gsang ba'i rgyal dbang po/ /skyob pa 'od dpag med pa yi/ /smon lam stobs kyis byung ba ste/ /nga yis 'jig rten ma ru shes/ /snying rje chen po dang ldan pa'i/ /'gro ba 'don par brtson pa mo/ /nyi ma shar ba dang 'dra ba/ /zla ba nya 'dra byad kyi 'od/ /lha bcas mi dang lha min rnams/ /'di rnams thams cad gsal bar byed/ /'jig rten gsum po g.yo bar byed/ /gnod sbyin srin po 'jigs par byed/ /phyag na ut+pal sngon po bsnams/ /ma 'jigs ma 'jigs zhes brjod ma/ /bar snang du ni 'phar bar gnas/ /'gro ba yang dag bsrung don du/ /mtshon cha'i bskal pa byung ba dang / /'jigs pa sna tshogs 'khrugs don du/ /rgyal ba rnams kyis bdag bskyed de/ /ming rnams dran pa nyid kyis kyang / /sems can thams cad bdag gis bsrung / /sna tshogs 'jigs pa'i rgya mtsho las/ /sems can thams cad bdag gis bsgral/ /des na bdag la 'jig rten du/ /rgyal ba'i tshogs kyis sgrol mar bsgrags/ /thal mo sbyar bar byas nas ni/ /spyan sngar 'dug ste 'di skad gsol/ /gus dang bcas pas yang dag gnas/ /gang zhig rgyal bas sngon bsgrags pa/ /gsungs shig mtshan brgya rtsa brgyad pa/ /sa bcu'i dbang phyug mgon po rnams/ /byang chub sems dpa' rab dga' ba/ /sdig pa spong byed bsod nams dang / /bkra shis grags pa 'phel bar byed/ /gter dang nor rnams 'phel byed nyid/ /nad rnams thams cad brlag byed pa/ /dpal ldan shis pa 'jog byed pa/ /nad med tshe ni 'phel bar 100.75b byed/ /sems can rnams la byams bsgoms nas/ /de dag sgrogs shig thub chen po/ /'di skad zhus nas bcom ldan 'das/ /spyan ras gzigs dbang rab tu bzhad/ /phyogs rnams thams cad rab gzigs nas/ /'di lta bu yi byams pa spros/ /phyag ni g.yas pas phyag thabs mdzad/ /bsod nams mtshan nyid ldan pa yi/ /de gsungs shes rab shin du che/ /legs so legs so dka' thub che/ /sems can kun la gcig tu brtse/ /skal ba chen po'i mi rnams nyon/ /mi rnams gang zhig 'di sgrogs pa/ /nor gyi dbang phyug yang dag 'gyur/ /nad rnams thams cad rnam par grol/ /dbang phyug kun dang yang dag ldan/ /dus min 'chi ba nges par 'joms/ /'chi ba bde ba can 'gro ba/ /de rnams bdag gis bshad par bya/ /lha yi dge 'dun bdag la nyon/ /'di la rjes su yid rang gis/ /legs par bsdams par 'gyur la bstod/ /o~M dge ba can ni gzi brjid che/ /'jig rten gso byed snyan pa che/ /dbyangs can ma ni spyan yangs ma/ /shes rab dpal dang blo 'phel ma/ /gso byed ma dang rgyas byed ma/ /swA hA o~M gyi rnam pa 'dod gzugs ma/ /sems can kun la phan par brtson/ /g.yul las sgrol byed rgyal ba mo/ /lha mo shes rab pha rol phyin/ /'phags ma sgrol ma yid 'ong ma/ /rdza rnga dung can rgyas ma mo/ /rig pa'i rgyal mo tshig snyan ma/ /zla ba'i gdong can dkar mo che/ /mi pham gos ni ser mo can/ /sgyu ma chen mo dkar mo che/ /stobs po che la pha rol phyin/ /rtsub mo chen mo gtub chen mo/ /sdang ba'i sems can rlag byed ma/ /rab tu zhi ba zhi ba'i gzugs/ /rnam par rgyal ba 'bar ba'i 'od/ /glog gi phreng ba'i rgyal mtshan can/ /ral gri 'khor lo gzhu thogs mtshon/ /'chol byed rengs byed nag mo che/ /mtshan mo nag mo mtshan spyod ma/ /bsrung byed rmongs byed zhi ba mo/ /mdzes ma dge ma dra ba'i ldi/ /tshangs pa mo ni rig byed ma/ /gsang ba mo ni brag phug gnas/ /bkra shis don byed zhi ba 100.76a mo/ /skye gnas rig byed yid mgyogs ma/ /thod pa can ni shugs chen mo/ /tshangs ma bde ma gzhan mi rgyal/ /ded dpon chen po snying rje gnas/ /chud zos lam ni rab ston ma/ /mchog ster ston byed ston pa mo/ /bud med gzugs la dpag med gnon/ /ri khrod ma dang rnal 'byor ma/ /grub ma gtum mo bdud rtsi ma/ /des ma nor sbyin bsod nams ma/ /bskal chen skal bzang mdzes ston ma/ /mthar byed skrag byed 'jigs byed ma/ /drag dang brtul zhugs chen mo ma/ /'gro la gcig tu phan par brtson/ /skyabs byed gus la gsong po ma/ /ngag gi dbang phyug zhi phra ma/ /rtag par kun 'gro rdo rje ma/ /don kun grub byed bzang po ma/ /gsad byed gso byed nor ster ma/ /mi 'jigs bsod nams gau ta ma/ /spyan ras gzigs dbang bdag nyid skyes/ /mtshan brgya rtsa brgyad 'di dag ni/ /phan par byed par grags pa ste/ /mchog tu rmad byung gsang ba mo/ /lha yul na 'ang rnyed dka' ba'i/ /bskal bzang skal ba dang ldan byed/ /dug ni thams cad nyams byed pa/ /nad rnams thams cad zhi byed ma/ /sems can kun la bde ster ma/ /blo ldan gang zhig lan gsum klog /mnyam bzhag gtsang sbra byas pa yis/ /des ni dus mi ring ba ru/ /rgyal srid dpal yang thob par 'gyur/ /rtag tu sdug pa bde bar 'gyur/ /bkren pa phyug por 'gyur ba'o/ /rmongs pa shes rab chen por 'gyur/ /yid gzhungs 'gyur bar the tsom med/ /bcings pa 'ching las grol bar 'gyur/ /tha snyad las kyang rgyal bar 'gyur/ /dgra bo bshes por 'gyur ba'o/ /rwa can dang ni mche ba can/ /dog pa'i 'thab mo rgyal dka' ba/ /sna tshogs 'jigs pa 'khrugs pa las/ /mtshan ni 'di rnams dran pa yis/ /'jigs pa kun las grol bar byed/ /dus min 'chi las grol byed pa/ /skyes bu snyan pa thob par 'gyur/ /mir ni skye ba don dang bcas/ /de gcig pu yi phan yon gyis/ /gang zhig 'dir ni sngar langs nas/ /skyes bu gang zhig sgrogs byed pa/ / 100.76b de ni dus ring tshe dang ldan/ /mi yi dpal ni dga' 'gyur te/ /lha dang klu dang gnod sbyin dang / /dri za dang ni lus srul po/ /'byung po gshed byed srin po dang / /ma mo rtsub pa'i sems ldan pa/ /gnod sbyin mo dang yi dgas byed/ /smyo byed dang ni gnod byed rnams/ /grib gnon dang ni brjed byed dang / /sha za la ni sogs pa rnams/ /ro langs sna tshogs la sogs dang / /skul byed ma dang sems sdang rnams/ /grib ma la yang 'gom mi byed/ /ji ltar slar yang rtsod par 'gyur/ /sdang ba'i sems can 'ching bar byed/ /nad la sogs pas thebs mi 'gyur/ /phyug cing longs spyod yon tan ldan/ /bu dang tsha bo 'phel bar 'gyur/ /rigs dang ldan zhing mthong dgar 'gyur/ /gzi brjid ldan zhing tshig gsal ba/ /blo ldan skye ba dran par 'gyur/ /bstan bcos thams cad rig par 'gyur/ /dge ba'i bshes gnyen yang dag ldan/ /byang chub sems kyis yang dag brgyan/ /gang dang gang du skyes pa der/ /rtag tu sangs rgyas kyis mi spong / /rje btsun ma 'phags ma sgrol ma'i mtshan brgya rtsa brgyad pa/ 'phags pa spyan ras gzigs dbang phyug gis gsungs pa rdzogs s+ho// //stag lung rgyud 'buM la gtugs nas zhus dag par bgyis/ / |