@#/ /rgya gar skad du/ a mr-i ta ra sa ya na/ ta na dz+ha ya/ pra shasta pra ma na shri kan pra sha sta ya na mo/ bod skad du/ tshangs pa la sogs pa drang srong dang / lha dang klu dang mi'i byang chub sems dpa' rnams la phyag 'tshal lo/ /de nas tshangs pa'i gtso bo mchog /dung gi thor tshugs khong seng can/ /tshangs pa kun grol chen po dang / /drang srong chen po ljang sngon dang / /tsa ra ka dang nam so skyes/ /tha skar bu dang lha skabs dang / /rgyun shes pa dang g.yon phyogs lha/ /thang la gnas dang me bzhin 'jug /dka' gnyis spyod dang ka la yan/ /shing khyer dang ni ljang sngon bu/ /nyi ma zla ba klu ru bcas/ /shing gi lha mo 'od 'chang ma/ /sman gyi lha mo nor gyi rgyun/ /'di kun 'khor dang bcas pa yis/ /kun bzang lha la phyag 'tshal nas/ /sman gyi dbang dang dam tshig mnos/ /drang srong rnams la rjes su gnang / /de nas kun bzang bder gshegs kyis/ /sman gyi rgyal po bdud rtsi mchog /nges pa'i lung 'di bka' stsal to/ /de nas thugs rje'i cho 'phrul gyis/ /sa rnams rab tu g.yos 104.188b nas ni/ /stong gsum 'jig rten sa stengs su/ /thams cad sman chen ra sa yan/ /skye ba med las thams cad skyes/ /de ltar smin par byed pa yang / /thugs rje rgya mtsho chen po las/ /thugs rje sprin ni khyab pa yis/ /sprin chen glog gi phreng ba can/ /yud tsam sgra dang bcas pa yis/ /sa stengs khengs par char phab nas/ /de nyid thugs rje snyoms pa'i mgon/ /chu yi phung po bdud rtsi yis/ /ma lus par ni ngoms par byas/ /bdud rtsi'i rgya mtsho thigs chen gyis/ /sa dang sman rnams kun gyi gsos/ /ri rab rtse dang ri sul dang / /sman ljongs dang ni nag tshal dang / /lcang lo can gyi 'khor kun du/ /sprin chen bdud rtsi char gyis rlan/ /chu de thams cad ro gcig ste/ /chu yi bcud las skyes pa ni/ /dpag bsam shing dang gel ba'i shing / /ljon shing dang ni tsu ta'i shing / /sa stengs khebs par skyes pa ste/ /bdud rtsir gyur te thams cad rgyas/ /sdong po dang ni sdong chen dang / /rtsa ba sdong po shun lpags dang / /snying po yal ga lo ma dang / /'dab ma me tog 'bras bur bcas/ /de bzhin 'bru yi rnam grangs kun/ /thams cad bangs shing smin par mdzad/ /'thungs na ngoms te rgyas par gyur/ /so so'i yul dang gnas dag dang / /mdog dang ro dang dri dang mthu/ /gang gi sa bon de nyid las/ /de dag rang rang 'byin par byed/ /de bzhin srog chags thams cad kun/ /ra sa ya na'i rdzas la spyod/ /'gro ba drug gi gsos su 'gyur/ /bdud rtsi sgo ni rnam par phye/ /'jig rten mgon pos bka' stsal to/ /de nas byang chub sems dpa' sems dpa' chen po 'jam dpal rnon pos bsdus te bka' stsal pa/ lha dang klu dang drang srong dang / mi'i byang chub sems dpa'i dge bsnyen chen po dri ma med par grags pa li tsa bi la sogs pa la bdud rtsi ra sa ya na ta nan dz+ha ya 'di dag bstan no/ /dang por bsgrub pa'i yul dang gnas ni/ u hu si ti pa tsa zhes bya ste/ ba tri sa zhes kyang bya ba/ ri'i rgyal po gser mdog can gyi rtse mo rta rna ri zhes bya ba der/ ra sa ya na zhes bya ba drang srong rnams kyis bsgrubs so/ /de yang thang cig yud kyis 'grub/ /la la nyin zhag gcig gis 'grub/ /la la nyin zhag bdun gyis 'grub/ /'tha' ma nyi shu gcig gis 'grub/ /de la the tshom med pas 'grub/ /de dag kun gyi mtshan nyid ni/ /rtsa ba sdong bu yal ga dang / / 104.189a lo ma 'dab ma me tog dang / /shun lpags 'bras bu snying por bcas/ /ro dang mthu dang mdog dang las/ /rtsa ba gcig la yan lag brgyad/ /yan lag brgyad las yon tan stong / /'di dag kun gyi yon tan yang / /bzhi brgya rtsa bzhi'i nad sel zhing / /bdud bzhi nges par 'joms par byed/ /sman gyi rgyal po bdud rtsi'i mchog /bcom ldan 'das kyis bka' stsal to/ /drang srong chen po 'di kun kyang / /mngon shes lnga dang ldan 'gyur zhing / /rig pa'i gnas mchog bcwa brgyad shes/ /de nas sman ni bsgrub par bya/ /stegs bu khru gang pa gcig la/ /maN Dal gtsang ma'i dris byugs la/ /de yi dbus su sman gyi mchog /bdud rtsi cong zi rnam gsum dang / /ser skya ba las byung ba yi/ /'o ma bre gang btsags nang du/ /a sho kan 'da'i phye ma dang / /bsres nas bskol ba'i nang du gdab/ /lcags las byas pa'i snod du blugs/ /stegs bu'i dbus su bzhag nas ni/ /byin gyis brlab pa'i sngags 'di dag /stong ngam brgya ni rtsa brgyad bzlas/ /o~M badzra a mr-i ta/ pa la li ka /be la lig tsan da lig swA hA/ dngos grub blang ba'i sngags 'di'o/ /a mr-i ta sid+d+hi byi tsurna ya swA hA/ pu tsa lha ha kan/ byin gyis brlab cing bza' ba yang / /nyi ma'i gung la bza' bar bya/ /don dam thig le bden pa las/ /snying po med las snying po blang / /rnam smin 'bras bu rig 'dzin 'grub/ /nad med lo brgya 'tsho bar byed/ /de nas drang srong nyi shu gcig /grub pa'i rig 'dzin mchog tu gyur/ /de yi 'og tu drang srong mchog /bcwa lnga yis ni bdud rtsi sman/ /ra sa ya na dam pa 'di/ /tshe yi rig 'dzin 'dod pa'i phyir/ /gzhon nu sred ces bya ba dang / /'dron skyob ces ni bya ba dang / /rtsibs kyi mu khyud la sogs pas/ /chu bo gang gA'i 'gram du bsgrubs/ /lha rdzas dge ba a ru ra/ /rigs bdun sa la lhung ba ni/ /brgya byin bdud rtsi 'thung ba'i tshe/ /thigs pa bdun ni kha nas ltung / /rlung gi khyer te sa las skyes/ /bdud rtsi'i gtso bor rab tu grags/ /rlung dang mkhris pa bad kan dang / /'dus pa'i nad dang dus kyi nad/ /dus min 'chi las thar bar byed/ /rlung mkhris bad kan 'di kun yang / /gcig la 'ang lnga lnga yod par bshad/ /de kun rab tu bsal ba'i phyir/ /phung po'i bdud dang nyon mongs bdud/ /lha bu bdud dang 'chi bdag 104.189b bcom/ /bdud rtsi 'di yis sel bar byed/ /shar lho nub byang gang yang rung / /brag phug stong pa yod pa las/ /bdud rtsi 'dzag pa'i khu ba ni/ /rin chen sna lnga 'byung ba'o/ /ming ni shi la mdza' du zhes/ /ra sa ya na bdud rtsi'i mchog /a ru ra brgya rtsa brgyad dam/ /yang na nyi shu rtsa gcig gam/ /sul bu zlum por gyur btsos te/ /de dag rab tu btsos pa dang / /lcags zangs 'khar ba'i snod nang du/ /bkang ste stegs bu gong ma yi/ /dbus su bdud rtsi sman de gzhag /byin gyis brlab pa snga ma bzhin/ /'od dang dri dang bro ba 'ang med/ /rtags 'di rnam gsum gang byung yang / /lag pa g.yon pa dkan te phyar/ /mthe bong srin lag mthil du dgug /blangs te btung ba'i sngags 'di'o/ /o~M a mr-i ta si ti bi tsu rna ya/ /lha ha ka na zhes brjod do/ /de'i yon tan brjod mi lang / /rdo rje brag dang 'drar 'gyur te/ /nad med rtag tu dar la bab/ /grub pa'i rig 'dzin dam par 'gyur/ /srid pa chags nas srubs shing gis/ /bsrubs pa'i 'bras bu rin po che/ /me shel chu shel gnyis byung ba/ /de yang thabs dang shes rab ste/ /nyin mtshan gnyis la dbang byed pa'o/ /de nyid zung yang 'khor du bcas/ /de nas bdud rtsi zags pa ni/ /sa dman dag tu mi skye ste/ /a la pe tas sar kal ba/ /lha dang dri za gnod sbyin dang / /rin chen sna tshogs 'byung khungs gnas/ /legs ldan gangs ri gnyan gyi shod/ /ri brag chu klung bgegs gnas su/ /lhung nas babs te skyes pa ni/ /a~M li ka dang bris rtsi ka /nyi ma gzi brjid ldan pa'i chu/ /a la be ta sar sra kal ba br-ik+Sha 'bru/ /de bzhin zla ba gzi ldan chu/ /de yi sa bon lhung ba ni/ /gser mdog bdud rtsi 'dra bar gsal/ /dmar ba mer blugs bus bus zer/ /gzugs bzang mdzes pa phun sum tshogs/ /tsher ma rno ba dpal dang ldan/ /bdud rtsi shing dang 'bras bur ldan/ /dug rnams 'joms shing slar yang zlog /sna tshogs nad rnams sel bar byed/ /nyi ma'i 'od dang zla ba'i mdog /ro yang rnam pa sna tshogs ldan/ /rag ta'i gtso bor 'di sbyor cig /tshangs pa tshe dang ldan par 'gyur/ /nyi ma zla ba'i dngos grub thob/ /ra sa ya na'i gtso bo yin/ /de nas drang srong gzhon nu srid/ /khyab 'jug spang gnyis bya ba yi/ /rwa yi gzhu thogs mi srun pa/ /lag na mtshon cha sna lnga thogs/ /de'i srid pa chags pa'i 104.190a bcud/ /bdud rtsi rnam lnga bskus pa las/ /kha nas thigs gnyis sa la lhung / /de nas bdud rtsi dam pa'i mchog /ra sa ya na phyi ma'i rgyu/ /bu mo bzang mo gcig tu gyur/ /chu klung gang gA'i bye ma la/ /yod de skye ba bstan pa ni/ /nye'u shing ram nye'u zhes bya'o/ /'gan ta ku le par pa ta/ /gan da pri ya ku ma ha go na sig ha ma kha/ tsher ma yar lta mar lta ba'o/ /de la lha bran tshogs kun gyis/ /bskor zhing mchod pa byed pa yin/ /ston zla tha chung dpyid zla 'bring / /nya yi tshe na btsal bar bya'o/ /btsal ba'i thabs ni 'di ltar ro/ /byis pa lo drug lo bdun pa/ /khrus byas dar ldan gos bskon nas/ /shar phyogs ngos su kha bltas te/ /lha phyag lan gsum byas nas ni/ /de dag rtsa nas dbyung ba'i sngags/ /tad+ya thA sho hod ga te da re swA hA/ phyag 'tshal bdud rtsi mchog khyod la/ /phyag 'tshal bdud rtsi las 'byung ba/ /stobs dang gzi brjid 'phel mdzad ma/ /rang 'byung ston pa'i bka' bzhin du/ /lha mo khyod ni dbang gyur cig /khu ba ra sa ya ni'i mchog /dngos grub mchog tu nye ba khyod/ /tshe dang stobs ni bdag stsol cig /ye shes thams cad gsal bar mdzod/ /shun lpags dang ni rgyud pa bsal/ /tho to bsnyil te slar la sba'o/ /snying po brdungs la khu ba yang / /ras ni sar pa'i nang du btsir/ /bdag nyid lus kyang khrus byas te/ /dar ldan gos bzangs gyon nas ni/ /sman du bsgrub pa'i 'dzab la 'jug /bsnyen dang 'dzab bsgom byas nas ni/ /stong ngam 'bum 'am ci nus bzlas/ /bza' ba 'am yang na 'thung ba'i tshe/ /nyug chu ba'i 'o ma btung / /yang na phye ma mchog tu bgam/ /bza' zhing btung ba'i sngags 'di'o/ /na ma dza ra a ga dza tu swA hA/ zhag gam za ma re re yang / /srang re'i cha nas bskyed de bza'/ /zos pa'i yon tan 'di rnams so/ /lus ngag yid gsum dbang po gsal/ /bdud rtsi 'di dag su 'thung ba/ /ji ltar lha rnams 'chi med ltar/ /klu rnams la ni sman bzhin no/ /shing rnams la ni chu bzhin no/ /me tog la ni zla ba bzhin/ /lo ni lnga brgya lon bar du/ /bcu drug mdog ni gzhon nu 'dra/ /nad med rtag tu dar la bab/ /stobs kyang glang po che dang 'dra/ /mngon shes lnga dang ldan par 'gyur/ /'o ma dag dang btung ba'am/ /mar khu 'am sbrang rtsi dag dang btung / / 104.190b zhag gcig zos na yon tan bcu/ /zhag bdun zos na yon tan brgya/ /nyi shu rtsa gcig zos na ni/ /brgya rtsa brgyad 'dis thob par 'gyur/ /bud med stong la khyab par sbyor/ /sa bon mi zad 'bras bu yang / /bu phor 'phel zhing dpa' dang ldan/ /mi rnams kyis ni mi sod do/ /zla gcig zos na yon tan ni/ /ngo yang zla ba nya ba bzhin/ /gnod sbyin srin pos mi sod do/ /lha rnams kun dang mnyam par 'gyur/ /zag pa zad nas nam mkhar 'phur/ /rdo rje 'gros kyis nam mkhar 'gro/ /rigs 'dzin go 'phang 'dir thob bo/ /'dres pa gang zag mi yi zas/ /zos na dngos grub mi thob nges zhes lung du bka' stsal to/ /de nas drang srong trag sha na/ /rgyal po shes nyen can zhes bya/ /lha dang drang srong thams cad la/ /mchod sbyin rgya chen byas pa las/ /ma hA de ba lha chen po/ /kun gyi 'jug tu spyan drangs pas/ /lha chen drag po de khros te/ /lha chen de yi dpral ba las/ /mig gcig lhag par byung ba ste/ /lha dang drang srong thams cad la/ /rlung 'khris bad kan sna tshogs dang / /de bzhin mi la rims nad dag /rlung lha'i lag par bskur nas gtor/ /lha dang drang srong mang pos kyang / /ma shes ma tshor myos par 'gyur/ /phye ma'i rgyal po 'dab ma 'di/ /sa stengs khyab par skyes pa la/ /drang srong rnams kyang mchod pa byed/ /lug mig me tog chen po 'di/ /ra sa ya na'i rgyal mo ste/ /ba yi 'o ma dag dang bskol/ /rngubs cig 'thungs pas ba spu langs/ /rngubs gnyis 'thungs ba'i yon tan ni/ /rims nad thams cad byang bar byed/ /rngubs gsum 'thungs pa'i yon tan ni/ /mig rtsa dmar zhing mdog kyang gzhon/ /phye ma grib mar bskams pa dang / /ma to la yi khu bar sbyar/ /blud na dgra rnams myos par 'gyur/ /lha yis bsrungs kyang 'chi bar 'gyur/ /byin gyi brlab pa'i sngags 'di'o/ /stong ngam brgya ni rtsa brgyad bzlas/ /o~M so'u gri bA ha na ha na hU~M/ ma ra ya ma ra ya/ tse ta ya tse ta ya su gri ba phaT/ bdud rtsi ra sa ya na'i gtso/ /shu dag dang ni ru rta dang / /phye mar byas te su blud pa/ /rgyal po bud med dbang du 'gyur/ /'gri ha 'gro lo ki dang sbyar/ /dgra la blud na rna ba 'on/ /lug mig grib mar bskams pa dang / /su ti'i 'o mar sbyar ba ni/ /dgra la blud na 'chi bar 'gyur/ /lha chen drag pos bskyed pa ni/ /'jam dpal gzhon nus mkhyen pa las/ /lha dang drang srong gzhan mi shes/ /de skad ces bcom ldan 'das 104.191a 'jam dpal gzhon nus/ mi mjed kyi bdag po lha tshangs pa dang / drang srong dang / klu'i rgyal po 'jog po dang / skal pa bzang po'i mi'i byang chub sems dpa' li tsa bi la sogs pa rnams la bka' stsal to/ /de yang tshe phyi ma 'am dus phyi mar mi sdod par/ skal pa bzang po'i 'bras bu mngon du thob pa dang / 'bras bu tshe 'di nyid la smin to/ /de nas rtsi yi lha mo mchog /ming ni grub pa'i blo gros ma/ /bu mo mu la zhes bya ba/ /de yi sa bon lhung ba ni/ /'dzam gling shing gi nags la skyes/ /rag ta zhes ni 'dir grags pa/ /ra sa ya na'i gtso mo ste/ /rtsa ba rag ta mu la kha/ /rtsa ba me tog 'bras bu rnams/ /'thun par zad par dmar ba ste/ /'bras bu sran ma ma sha tsam/ /gyen du zug pa de brko ba/ /ston zla ra ba'i nya la brko'o/ /srid pa'i na dang nags las skyes/ /khrag gi nyungs ma zhes ni grags/ /rlon pa'i khu ba btsir ba dang / /pad+ma'i rag ta cha mnyams bsres/ /de dag bsgrub pa'i sngags 'di'o/ /o~M na mo ra ga rag ta mu la bu ne swA hA/ 'gro ba dbang byed dam pa yin/ /rtsi yi lha mos bka' stsal to/ /ming gi med du mi rung ngo / /rgyal bu don grub bya ba de/ /mya ngan 'das pa'i sku gdung ni/ /sha ri ram zhes grags pa yin/ /de yi sa bon 'phel ba ni/ /'dzam gling sa stengs khyab par skyes/ /ma hA ni le zhes bya ba/ /ming ni tha skar rdo rje yin/ /me tog tha skar gzhon nu ste/ /snye ma zur gsum til gang 'dra/ /rdo rje brag kyang 'joms par nus/ /sha ri ram dang rus pa yi/ /sbyar ba'i 'phrad kyi dam par rung / /ming gi med du mi rung ngo / /de'i yon tan thams cad kyang / /rus pa sra 'khregs rdo rjer 'gyur/ /phyag na rdo rje'i mthu yang mnyam/ /ra sa ya na'i mchog tu gsungs/ /de nas lha yi dbang po mchog /brgya byin bu yi lag pa ru/ /gnod sbyin rgyal pos mda' brgyab pa/ /de yi dum bu lag sor yang / /sa stengs khyab par skyes pa ni/ /li rtsi tsi lag dbang po lag /sdong bu yal ga mdzer ba med/ /me tog zur gsum mda' sgro 'dra/ /rtsa ba lag sor lnga pa ste/ /dbyar zla tha chungs nya la brgo/ /bsgrub pos lag mthil g.yon du gzhag /ra sa ya na thams cad kyi/ /dngos grub blang ba'i phyag rgya yin/ /de tshe med du mi rung ngo / /mang du 'phel 'gyur bsgrub rdzas yin/ /lus la 'byung ba'i dri chen dang / /bsgral ba'i dri chen yungs kar gsum/ /cha mnyams 'thungs na dug rnams thub/ / 104.191b 'tsho byed dug ni sel ba'i phyir/ /bdud rtsi zhes ni de la bya'o/ /ming gis med du mi rung ngo / /'chi bdag bdud kyang des bcom mo/ /purna zhes bya'i rna ba yang / /srin po purna yi rna ba ste/ /bsgral ba'i rna ba dag dang sbyar/ /rna ba'i mngon shes thob par byed/ /ming gis med du mi rung ngo / /b+ha hu lug mig me tog dang / /mkha' lding bya yi mig dang sbyar/ /A la bi ga shang shang de'u/ /rma bya ngang pa ko k-i la/ /'di rnams bsgral ba'i mig dang sbyar/ /mig gis mngon shes des thob ste/ /stobs ldan gyi ni mig yin no/ /ming gis med du mi rung ngo / /tsi ta ka dang snying zho sha /thams cad gnod sbyin snying gi brla/ /bsgral ba'i tsid ta dag dang sbyar/ /mngon shes lnga yi dngos grub thob/ /ming gis med du mi rung ngo / /bud med gong bshad 'dra ba yi/ /klad pa go ro tsa na 'byung / /de ni ban glang rigs can yin/ /bsgral ba'i klad pa thams cad dang / /thang phal hwa yi rtsa bar sbyar/ /mdangs kyi dngos grub des thob 'gyur/ /ha lce ki ya kha 'bar ma'i/ /lce yin pas na lce dang sbyar/ /dbang ngo lcags kyi dngos grub dang / /spyan ras gzigs kyi dngos grub thob/ /ming gis med du mi rung ngo / /srid pa'i bdag po tshangs pa'i gtso/ /ming ni mgo btsun phywa zhes bya'o/ /nal gyi bu ni dzi hwi zhes/ /skad ma phyung gi lce zhes bya'o/ /skad phyung ba ni tshangs pa ste/ /skad ma phyung gi grubs par gcad/ /de dang sbyar ba'i 'phrad nu ni/ /me tog rma lo kril kril ste/ /ming ni ba ya sa ya'o/ /rtsa ba ma hA go na sig /me tog gser gyi mdun zhu can/ /shar phyogs su ni kha lta ba/ /'di'i kun ha lce ki ya ste/ /cha mnyams btags te phye mar bya/ /zla ba gza' yis zin pa'i tshe/ /yi dam lha la mchod bya zhing / /phye ma rgya chang nang du gdab/ /thang cig yud kyis 'grub pa ste/ /rta mgrin dbang gis dngos grub thob/ /bsgral ba'i lce ni thams cad dang / /sbyar ba 'phrad kyi dam par rung / /ming gis med du mi rung ngo / /sna dang gna' ma'i 'bras bur sbyar/ /tshangs pa'i gsung dbyangs sgrogs nus 'gyur/ /bsgral ba'i sna ni thams cad sbyar/ /ming gis med du mi rung ngo / /dung dang 'brug rus gdung dang ni/ /bsgral ba'i rus pa thams cad sbyar/ /lus kyi rdo rje mngon shes thob/ /ming gis med du mi rung ngo / /rgya mtsho dbu' ba 'dus pa'i chu/ /sna tshogs chu dang gangs kyi chu/ /lan tshwa sna 104.192a tshogs dri chu rnams/ /bsgral ba'i chu ni thams cad sbyar/ /rdo rje chu yi bdud rtsi ste/ /rtag tu 'gro ba'i don byed nus/ /ming gis med du mi rung ngo / /dgongs pa'i don du sems can mtha' dag la snang ba dang / /nus mthu'i yon tan gyis sems can kun la phan 'dogs par nus so/ /'gro ba yongs kyi gsos mdzad par dgongs nas/ bcom ldan 'das dpal kun tu bzang pos ye shes kyi thugs nas dgongs nas mgur gyi bum par dril te/ ljags kyi dbang po la bkram ste/ zhal 'dzum pa mdzad nas/ mkhyen rab kyi dang po 'jam dpal rnon po dang / rdo rje chos la bka' stsal to/ /'jam dpal gyis dkyil 'khor gyi sras mchog nye ba dang / tshangs pa dang drang srong dang / lha dang klu dang / mi'i byang chub sems dpa' ba ma la g+hir ti rnams la bka' stsal to/ /bdud rtsi chen po mchog gi lung gi sde las/ sman ra sa yan bsgrub pa'i lung 'bum sde las btus pa/ bam po chen po gnyis pa// // |