@/ /rgya gar skad du/ sta na ma hA da ra pany+tsa/ bod skad du/ 'bras bu chen po lnga bsgral ba'o/ /dpal chen khro rgyal 'khor dang bcas pa la phyag 'tshal lo/ /mi phyed dang bas phyag 'tshal na/ /de nas sta na'i lung bshad de/ /ye nas rgyu nyid dag pa las/ /nga dang bdag tu 'dzin pa yis/ /khams gsum 'khor ba'i rgyu ru gyur/ /khams gsum de dag bsgral ba'i zhing / /A sa ma tsa la d+harma d+ha tu/ swa b+hA ba Ad ma ko ha~M/ ra~M ya~M kha~M ta tha phaT/ bcom ldan 'das kyis bka' stsal to/ /mi g.yo phyag rgya chen po'i ngang / /dbang phyug chen po'i bsgral thabs ni/ /'tsho ba'i bdag po'i tshe dang srog /thugs rje'i ngang dang shes rab dang / /thabs la mkhas pa'i byin brlabs kyis/ /'gro ba thams cad sbyong bar mdzad/ /bdud dang gshin rje 'khor bcas kun/ /gnyis med phyag rgyar rol pa yis/ /dus la bab po sa ma ya/ /o~M sarba pA pa kar he ha sa si stam/ tra~M ka ru ni hU~M dza dza/ ma tang gi ni rnam shes de/ /nges par gzugs la phab nas ni/ /ta gi zhal ni nub tu bstan/ /dbang du bsdu ba'i las mdzad kyis/ /sangs rgyas kun gyi byin gyis brlobs/ /khams gsum ma lus bsgral ba'i zhing / /sta na chen po bya ba'i phyir/ /bder gshegs mang po kun 'dus shing / /byams dang snying rje ldan pa yis/ /nyon mongs 'khor ba'i rgya dral to/ / 104.193b gnas kyi sgo 'di su yis bcad/ /sems kyi bdag pos bcad dam ci/ /gzung 'dzin rkang pa bsnol ba yis/ /yul las 'das pa'i sgo phye shig zhes brjod de/ /sgo dbye'o/ /ka ta ri ka na pra be sha /g.yon pa'i zhabs kyis ru tra'i gzugs/ /gnas kyi sgo 'di bcad bzhin du/ /bde bar gshegs pa'i skyabs su gsol/ /shi ba'i sdug bsngal 'dir byung ngo zhes lha chen po brgyad kyis dus gcig tu tshig de smras so/ /Ta ki brgyad kyis bka' stsal pa/ /dregs pa ma rungs lha chen khyod/ /sems kyi sgo kun da dbye yis/ /rdo rje 'bar ba'i spu gri yis/ /gnas kyi sgo kun des phye nas/ /sems kyis bdag pos gzung bar bya/ /ston pas gsungs pa/ skye ba'i rkyen gyis 'chi ba yin/ /sdig pa'i rkyen gyis bcom pas 'chi/ /bdag kyang dngos por lta bas 'jig /nga yi bstan pa 'di la gzung / /'on kyang 'chi ba'i sdug bsngal bral/ /gzugs 'dzin rkang lag yul las bzlas/ /pho mo bsnol te mnan pa yang / /mgo ni lho nub mtshams su bstan/ /rkang pa byang shar mtshams su brkyang / /ta ka'i zhabs ni g.yas pa yis/ /ru tra ling ga'i steng du mnan/ /de ltar ling ga mnan byas nas/ /thar byed chen po'i 'gying stabs kyis/ /rngom brjid chen pos 'di skad do/ /sa ma ya ke sha tsi ta dz+wa la hU~M phaT/ zhes mnan no/ /ma hA de ba ru tra dza zhes pa dang / khams gsum nas 'byung sems can rnams/ /rdo rje sku yi khyad par gyis/ /'od zer tshul du bsdus nas ni/ /de dag bdag gis gzugs la gzung / /spro ba rdo rje thams cad kyis/ /sku dang ye shes mchog gis bya'o/ /thar pa'i lam 'byed dkyil 'khor 'dir/ /brod pa can rnams 'ong ba ltar/ /skal dang ldan pa rigs kyi bu/ /bde bar 'ongs pa legs te 'ongs/ /rnal 'byor dbang phyug chen po yis/ /rtse rgyal bstan pa'i gnas chen 'dir/ /bo d+hi tsita ta'i dbyings nyid du/ /khams gsum 'khor ba kun bsdu'o/ /chos nyid skye 'gag med pa la/ /bde bar gshegs dang 'gro ba zhes/ /dbyings su gcig pas gnyis su med/ /kun kyang ngo bo mnyam nyid de/ /thams cad snying po byang chub sems/ /ma skyes pas na 'gag pa 'jig /bdag nyid med na mnyam pa'i sku/ /thugs rje chen po cir mi mdzad/ /ye nas de ltar de bzhin du/ /sems can ma rig rmongs pa'i blos/ /bdag dang bdag 104.194a gir so sor 'dzin/ /rtag chad mtha' gnyis ma spongs te/ /nor bas btags pa'i phung po lnga/ /log rtog phyin ci log bzhis bcings/ /nyon mongs sdug bsngal rgyu bsags te/ /'khor ba'i rgyud lnga kha brims pas/ /mya ngan mi 'da' yun rings te/ /phung po khams dang skye mched la/ /'khrul pa'i bag chags bag la nyal/ /bde 'gro'i lam la bsgribs pa'i rnams/ /'khor ba'i lam lnga rgyun gcad phyir/ /ngan song rnam par sbyong pa'o/ /ma tha ma tha sarba pre ta ga ti he tu~M hU~M phaT/ pa tsa pa tsa sarba ti ra ya ba te he tu~M` hu~M phaT/ da ha da ha sarba na raka ga ti he tuM hu~M phaT/ de ltar ngan song rnams sbyangs te/ /sdug bsngal gsum gyi sgo gcad phyir/ /ra~M ya~M kha~M zhes brjod la/ /ye shes 'bar ba'i mes bsregs te/ /mtshan nyid med par stong par 'gyur/ /dus la bab pa'i sems can de/ /las la bab pa'i rnal 'byor pas/ /rdo rje dbyings kyi dkyil 'khor 'dir/ /thugs rje lcags kyus bkug nas ni/ /skal dang ldan pa'i rnam shes de/ /thugs rje chen po'i byin brlabs kyis/ /sku yi sprul pa phyogs bcur bkye/ /gsung gis sems can mtha' dag grol/ /thugs tshad med bzhi dang ldan/ /nyi zla gsal ba'i dkyil 'khor du/ /tshe dpag med par dbang bskur nas/ /yang dag nyid la yang dag sgrol/ /yang dag bsgral na bde chen thob/ /mi ldog sa la nges par phyin/ /phyin pa tsam gyis dbang thob nas/ /rgyal ba'i zhing khams dbyings nyid mthong / /rgyu drug gnas su mi skye phyir/ /dpa' bo 'bru lngas lam lnga dgag /o~M A hU~M swA hA/ 'og min dga' ldan lha yul ru/ /ye shes rlung gis btegs nas ni/ /sbyor ba'i lhums su phaT gyis 'phang / /a nri su tri pri du/ gang yang rung ba'i rnam shes de/ /gsang ba'i dbyings su hU~M gis bsdu/ /skur bskyed ye shes skur spros te/ /dbyings dang ye shes lhun grub pas/ /sangs rgyas zhing khams rab 'byams dang / /bde gshegs pho brang dkyil 'khor du/ /rdzu 'phrul zhabs dang ldan pa yis/ /'phags pa'i lam du rlung zhugs nas/ /chos kyi 'khor lo skor zhing gshegs/ /'jig rten lha yi gtso bo dang / /nyan thos dgra bcom rang rgyal dang / /sa bcu'i byang chub sems dpa' yis/ /'jig rten 'das pa'i mchod pas mchod/ /stug pos brgyan pa'i sa 'das nas/ /pad+ma spyan gyi sa la bzhag /'chi 104.194b ba med pa'i chos sku thob/ /stong gsum ma lus bton pa bas/ /'bum gyi char yang mi phod de/ /rang sems ma bcos ye nas chub/ /skyes bu chen po rnal 'byor gyis/ /bsgral ba 'ba' zhig snying rje'i mchog /de nas ma trang ru tra de bsgral te/ /sngon 'byung ba yi gleng gzhi dang / /gtan tshigs su dgongs nas/ phyi rabs kyi sngags 'chang rnams yid ches par bya ba dang / dad pa can gyi rnal 'byor pa rnams drang ba'i phyir/ dur khrod chen po'i gnas brgyad dang / ma mo chen mo brgyad dang / rang 'byung gi mchod rten chen po brgyad/ 'di man chad gtan tshigs dang bcas te bstan to/ /gong du bsgral ba'i bsam rgyud ni 'og nas zhib tu bstan no/ /'di yang bsnor te lung gcus nas bstan no/ /bdud dang dbang phyug gshin rje de/ /thugs rje tshad med bzhis bsgral nas/ /ro yi nyal thags gan rkyal te/ /'dzam bu'i gling lo'i gling khams su/ /bor nas sa gzhir gyur pa ni/ /dur khrod chen po brgyad du gyur/ /mgo ni lho nub mtshams su bstan/ /rkang pa byang shar mtshams su bstan/ /lag pa gnyis ni g.yas g.yon brkyang / /mgo dang lus snying yan lag kun/ /gnas kyi dur khrod chen po brgyad/ /de ni dpal chen bzhugs gnas yin/ /thugs rje chen po'i byin brlabs kyis/ /ro yi srungs ma chen mo ni/ /ma mo chen mo brgyad bzhag go /de yi gnas rten chen por yang / /mchod rten chen po gzi byin can/ /rang 'byung re re bzhag pa yin/ /de ltar sa gzhi 'di kun yang / /bkra shis ya mtshan thugs rje can/ /chos dang dngos grub 'byung ba'i gnas/ /cho 'phrul 'byung bar bka' stsal to/ /de yi lus snying ma ga ta/ /dur khrod chen po bsil ba'i tshal/ /ma mo chen mo ke'u ri gnas/ /mkhas shing snying stobs che ba'i sa'o/ /mchod rten ming ni bde byed rten/ /de yi mgo bo lho phyogs kyi/ /dur khrod chen po bzhag pa ni/ /sing ga yul gyi gling phran yin/ /ma mo chen mo tse'u ri gnas/ /mthong thos rnam pa'i 'phrul bag can/ /mchod rten ri bo ta la la/ /lag pa g.yas pa shar lho'i mtshams/ /dur khrod chen po bal yul yin/ /ma mo chen mo pu ka si/ /lhag par zas kyi longs spyod che/ /mchod rten kha sho byA g+h+ri kha'o/ /lag pa g.yon ni lho nub mtshams/ /dur khrod 104.195a chen po sa la'i yul/ /ma mo chen mo be ta li/ /phyag na rdo rje dbang gi gnas/ /de ni mthu dang dbang yang che/ /gyad yul chen po'i sa las ni/ /mchod rten ma la sa gan da/ /rkang pa g.yas pa byang shar mtshams/ /dur khrod chen po li yi yul/ /ma mo chen mo tsan Da li/ /lha mo shang ki ni zhes grags/ /chu dang me grub rdzu 'phrul can/ /mchod rten ming ni ge'u to shan/ /rkang pa g.yon pa nub byang mtshams/ /dur khrod chen po kha che'i yul/ /ma mo chen mo pra mo ha/ /bde skyid ldan pa phun sum tshogs/ /mchod rten ming ni ska ni ska/ /pho mtshan steng gi byang phyogs na/ /dur khrod chen po u rgyan yul/ /ma mo chen mo g+ha sma ri/ /'byor pa'i longs spyod lnga dang ldan/ /dngos grub can yang de na mang / /gzi'i mchod rten chen po ste/ /ming yang d+harma tsa kra'o/ /de yi nang grol thams cad kun/ /dur khrod chen po za hor yul/ /rgya mtsho'i sgo gling ma ha do/ /lang ga pu rangs srin po'i gnas/ /ma mo chen mo sma sha ni/ /mngon shes rdzu 'phrul bsam mi khyab/ /srin po srin mo sha za rnams/ /de dag kun la dbang sgyur zhing / /rin chen nor dang dpag bsam shing / /'byor pa'i yo byad kun dang ldan/ /mchod rten bde byed gzhon nu'o/ /'jig rten kun du bstan pa yi/ /dur khrod chen po'i gnas brgyad do/ /de ltar sta na'i dkyil 'khor 'dir/ /'das pa'i dus na sngon 'byung ba'i/ /sangs rgyas kun gyis byin gyis brlabs/ /de ltar gyur pa'i 'dzam gling du/ /skye shi gnas pa'i yul yin pas/ /phyi rabs sngags kyi sgrub pa pos/ /'jig byed chen po khrag mthung gi /dus gsum rgyal ba'i bka' bzhin du/ /bskyed nas byin gyis brlabs pa ni/ /sngags mchog bdud rtsir bsgrub pa'i phyir/ /rgyu dang dam rdzas thams cad ni/ /sangs rgyas sgrub pa'i rgyu dang bzhi/ /dam tshig dam par bsrung ba'i rdzas/ /byin gyi brlab par bya ba'o/ /de nas 'jig byed chen po'i dkyil 'khor bskyed de/ nges don cig tu lam rgyud lnga ni 'bras bu chen po lnga yin te/ de dag thams cad 'jigs byed chen po'i dkyil 'khor gyis dus gcig tu bsgral ba'i phyir/ bdud yag sha ma hA ru tra zhes bya ba zhig /dus der bsgral zhing gnas spar ro/ /de la bdag nyid sku ni smug nag 104.195b 'bar/ /phyag na mtshon cha sna tshogs bsnams/ /pradz+nyA ke sha tsi ta dz+wa la hU~M phaT/ ma nu da ra~M to sha phyung / u ma da ram badzra ma hA mang sa/ tra ma kha'i zhes bsgral te/ e h+ye hi ma hA ru tra/ sha tu ma ka ra/ badzra ni hU~M phaT/ ma hA de baM ru tra hU~M dza dzA zhes brjod de/ sta na dang g+ha na chen por byas/ rnam par shes pa byang chub sems su dbang bskur ro/ /de na sta na'i dkyil 'khor 'dir/ /dur khrod bdag po btul nas ni/ /'khor bcas ma lus dbang du bsdus/ /'jig rten gtso bo lha brgyad dang / /srin mo brgyad dang bu mo brgyad/ /dbang phyug nyi shu rtsa brgyad kyis/ /'di skad ces ni khas blangs te/ /mgrin gcig tu ni rab smras pa/ /ho rdo rje 'bar ba'i me dpung gis/ /bskal pa bas kyang sreg mdzad pa/ /'jig tshul rngam pa'i khyad par can/ /dbu mang rtsub pa'i tshig sgrogs shing / /phyag mangs 'jig pa'i mtshon cha bsnams/ /zhi ba'i phyag stong spyan stong yang / /'jig rten khams kun spa gong na/ /khro gnyer phyag stong spyan stong gis/ /dpa' bo sgeg dang 'jigs su rung / /rgod dang gshe dang 'jigs par byed/ /snying rje rngam dang zhi bar ston/ /'bar ba'i tshogs chen sna tshogs can/ /khams gsum lha chen thams cad dang / /'jig rten thal bar rlog mdzad pa/ /e ma ho che mchog he ru ka /khro rgyal khyod la skyabs su mchi'o/ /thugs rje nan tan bdag cag gzung / /gal te bka' bzhin ma bgyis na/ /bdag cag rnams kyi mgo lus snying / /dum bu brgyar ni gtubs 'gyur bgyid/ /de phyir 'bar bas bdag ma gtang / /zhes 'thun par smras so/ /khams gsum thams cad bsgral ba'i zhing / /rgyu drug gnas pa'i sems can rnams/ /bsdu ba'i sbyor bas kun bsdus nas/ /mi ldog dbyings su yang dag nyid/ /thig le chen pos dbang bskur te/ /zla gsang dbus na byang chub sems/ /rdzogs sangs rgyas la som nyi med/ /sha chen bshang gci khu ba khrag /bde gshegs lnga'i sa bon te/ /rnam par dri chen snang bar mdzad/ /phyi rol chen po lnga dag la/ /nang gi rgyu 'bras ye nas dag /mi bskyod byang chub sems nyid de/ /dmigs su med pas dag pa yin/ /mang sa rin chen 'byung ldan po/ /mnyam dang mi mnyam dbyer med do/ /snag pa rak+ta mtha' yas thugs/ /skye 'gag med de ye nas dag /don yod 104.196a dri chu las grub pa/ /dri med rgyu nas rnam par dag /kun kyang gtsang zhing dri med pas/ /thams cad ma lus sangs rgyas lnga/ /lus pa med pas ye shes dang / /ma bcos ye nas de nyid do/ /de phyir sman chen bcud gyis mchog /bdud rtsi zhes ni de la bya'o/ /rtogs pa'i klung du su 'dris pa/ /mi zhes bya ba sangs rgyas yin/ /bcom ldan 'das ni gud na med/ /'byung ba lnga las gyur pa'i rgyu/ /sprul pas rigs lnga'i sangs rgyas yin/ /rang gi lus la bsdu ba'i phyir/ /sku gsum rdo rje dbang thob 'gyur/ /de phyir bsgrub pa'i rdzas su gsungs/ /de skad ces sman spyod pa'i lung du bka' stsal to/ /bdud rtsi chen po mchog gi lung / 'bum sder bzhugs pa'i nang nas/ lung a nu yo ga'i spyod pa bla na med bstan pa ste/ bam po chen po bzhi pa// // |