//'phags pa byams pa'i mtshan brgya rtsa brgyad pa gzungs sngags dang bcas pa/ byang chub sems dpa' sems dpa' chen po byams pa la phyag 'tshal lo/ /de nas byang chub sems dpa' chen po byams pas rang gi snying po smras pa/ na ma s+t+rai ye da d+h+wi kA nA~M/ sarba ta thA ga tA nA~M/ tad+ya thA/ sa ra sa ra/ su ru su ru/ d+ha ra d+ha ra/ ma hA d+ha ra/ tsa ra tsa ra/ ma hA tsa ra/ b+ha ra b+ha ra/ ma hA b+ha ra/ kam pa kam pa/ ma hA kam pa/ hU~M ma hA s+pha ra Na d+harma gra/ sA ga ra swA hA/ de nas de bzhin gshegs pa thams cad kyis 'di skad ces bka' stsal to/ /kye ma gzungs chen mo 'di ni yon tan che ba ste mtha' yas par khyab pa/ bskal pa bye ba phrag mang por yang shin tu thos par dka' ba/ sangs rgyas 106.101b 'byung ba thams cad ston pa/ de bzhin gshegs pa grangs med pa 'jig rten gyi khams thams cad snyed kyis bsnyen bkur mdzad mdzad pa/ sgrib pa dang / sdug bsngal ba dang / 'khrug pa dang / rmi lam ngan pa dang / ltas ngan pa thams cad las thar bar byed pa/ sems can gyi khams mtha' yas mu med pa yongs su thar bar byed pa ste shin tu dkon pa'o/ /de nas rdo rje'i dkyil 'khor gyi 'khor lha dang lha ma yin du bcas pa/ nor bu'i cod pan gyis bsgyings pa/ /rgyan phreng rab tu g.yo ba rnams kyis spyi bor thal mo sbyar nas byang chub sems dpa'i mchog 'phags pa byams pa la mtshan brgya rtsa brgyad kyis mngon bar bstod pa/ dpa' bo chen po thabs brnyes pa/ /rgyal tshab mi yi bdag po ste/ /'jig rten bdag po rnam par gsal/ /dar ba chen po mngon par rgyas/ /tshan chen stobs ldan che ba ste/ /de bzhin yangs shing rdul dang bral/ /dbang chen rtse ltar 'od ldan pa/ /sa yi dbang phyug rnam par gnon/ /rgyal chen mtshon cha brgya pa ste/ /mtshon cha chen po rdo rje'i mtshon/ /yon tan 'od brgyas bsgyings pa ste/ /nor bu'i rna cha'i rgyan thogs pa/ /srid gsum dag na spa ba'i sku/ /rgya mtsho lta bu'i spyod yul can/ /lhun po zla 'byin ti se yi/ /rtse nas dkyil 'khor 'char ba po/ /dkyil 'khor chen po longs spyod pa/ /rab tu dga' ba de bzhin des/ /yongs su dga' ldan chen po'i lha/ /che ba lha rnams kun gyi mchog /sangs rgyas gdung rgyud rgyas mdzad cing / /sangs rgyas dkyil 'khor rgyan dang ldan/ /sangs rgyas longs spyod longs par spyod/ /sangs rgyas bstan pa ston pa po/ /ti se zla 'byin bzhin du yangs/ /sa yi dbang phyug bde mdzad pa/ /pad ma 'dab stong rtse mo can/ /rdo rje'i pad ma legs par skyes/ /chos kyi longs spyod longs par spyod/ /sa dang mnyam pa thub par dka'/ /snang bar byed pa 'byung ba po/ / 106.102a srid gsum ye shes nyi ma lags/ /gtso bo chen po cher grags pa/ /seng ge chen po stobs po che/ /cha lugs chen po zhal che ba/ /skye bo ngan dang sdug bsngal 'dul/ /rdo rje byi ru bai dUr+ya/ /nor bu'i dbu thod rgyan du thogs/ /byi ru gser gyi gcal bkram la/ /sku chen zhabs kyi stabs kyis gshegs/ /zhal mdangs nyi ma du ma'i gzi/ /lcang lo cod pan dbu thod can/ /rig sngags 'chang brgyas zhabs la btud/ /rjed par bya ba rnams kyis mchod/ /nor bu brgya 'gul 'od zer gyis/ /brang gi phyogs rnams dag par byas/ /cod pan can te 'od 'tsher ba/ /nyi ma bye ba brgya 'od ldan/ /rin chen sna tshogs mchog bkram zhing / /dri med dkyil 'khor rab tu 'phro/ /rlung gis ma lus bskyod pa yi/ /'bar ba chen po'i lta ba can/ /'od zer mang pos phog pa yi/ /phan pa'i thabs ni rab ston pa/ /brjid pa'i tshul gyis bzhad pa yi/ /'od kyis zhal gsal rnga yab bskyod/ /dpung rgyan 'od zer spel mar bkod/ /tshon bris shin tu mdzes par 'tsher/ /lhun po phrad cing 'khrugs pa ltar/ /ha ha zhes pa'i sgra chen sgrogs/ /rdo rje chen po rtsed mo can/ /shin tu dga' mdzad bde sbyin pa/ /byams pa'i dkyil 'khor go char bgos/ /btsan pa kun las rnam par rgyal/ /snying rje'i stobs las byung ba ste/ /mtshon cha chen po shin tu 'bar/ /byams pa byams pa'i rtog pa can/ /kun nas spa ba'i dkyil 'khor ba/ /ma pham thub med dag pa ste/ /sangs rgyas cha lugs mnyam med che/ /byams pa'i snying po snying po che/ /byams pa'i pad ma las byung ba/ /rdo rje 'chang chen rdo rje can/ /rdo rje'i bstan pa'i dkyil 'khor pa/ /rig sngags 'chang ba rnams kyis btud/ /de bzhin bsnyen cing bstod pa po/ /grub pa chen po rig sngags grub/ /rdo rje'i dkyil 'khor mdzes par mdzad/ /thams cad grub mdzad grub pa po/ /sangs rgyas gdung gi sdong chen lags/ / 106.102b gsang sngags chen po'i rnam par nges/ /mdo sde'i bkod pa mdo sdud pa/ /nges gyur nges pa'i 'od sgron gyi/ /snang bas dri ma sel bar mdzad/ /'bar ba rtsa dmar 'od snang ba/ /dkyil 'khor dkar po che ba ste/ /gzhung dang 'thun pa'i chos dbyings dang / /nye bar gyur cing shin tu nges/ /swA hA swA hA'i bdag po mchog /'od zer bde legs bde legs mdzad/ /stobs chen 'chang ba bkra shis pa/ /nyi ma 'dra ste snyoms pa lags/ /stong byed rgyal ba'i longs spyod ldan/ /mkha' ltar dri med spyod yul can/ /dpa' bo rdo rjes 'joms par mdzad/ /rdo rje chen po rab sgrub pa/ /sgrub pa po ste rtsod pa med/ /dkyil 'khor ldan pa rdo rje ston/ /rlung chen shugs kyis bskyod pa yi/ /g.yo dang 'brug sgrogs sgra ldan pa/ /sangs rgyas spyod yul pad ma ste/ /de bzhin nyid kyi mtsho las skyes/ /mngon shes chen po mngon shes brnyes/ /khyab bdag sangs rgyas kun dang mnyam/ /de nas sa yi dbang phyug po/ /byams pa'i dkyil 'khor byams pa la/ /bstod nas kun mkhyen gnod bral ba/ /thub pa nyi mas bka' stsal pa/ /kye ma ming brgya rtsa brgyad mchog /ming gi yon tan 'od ldan pa/ /bde dang phun sum tshogs sgrub pa/ /thabs chen bla na med pa ste/ /ming brgya rtsa brgyad 'di dag ni/ /'jig rten kun gyi bde skyed pa/ /'di ni bton pa tsam gyis kyang / /sdig pa thams cad dag par 'gyur/ /sdig pa dag las rgyal ba yi/ /byams pa bstod pa'i gnas po la/ /ming brgya rtsa brgyad dam pa 'dis/ /mi ni la la gang bstod pa/ /de la lha la sogs kun dang / /lag na rdo rje stobs chen rnams/ /rtag pa nyid du sdug bsngal kun/ /gtan du bsal phyir brtson par byed/ /gang zhig ming brgya rtsa brgyad mchog /myur du 'don pa'i mi de ni/ /sangs rgyas sa yang thob 'gyur te/ /'di la the tshom yod med do/ /nang par mal nas langs nas ni/ /gang zhig byams 106.103a pa'i sems kyis bstod/ /de la byams pa rtogs pa yi/ /byams pa bde legs byed par 'gyur/ /de phyir dri ma thams cad sel byed cing / /sdig 'joms yon tan thams cad skyed pa dang / /de bzhin 'jig rten sdug bsngal sel ba yi/ /ming brgya rtsa brgyad ched du dag par lhogs/ /'phags pa byams pa'i mtshan brgya rtsa brgyad pa gzungs sngags dang bcas pa/ rdzogs so// |