// @#/ /rgya gar skad du/ swa sti gA thA/ bod skad du/ bde legs kyi tshigs su bcad pa/ dkon mchog gsum la phyag 'tshal lo/ /lha cig nye bar song nas su/ /lhas mchod pa la zhus byas te/ /sangs rgyas chen po thub pa che/ /ci zhig smras na bde legs 'gyur/ /des ni tshig de gsan gyur nas/ /'jig rten rtsa lag bka' stsal pa/ /gang zhig rtag tu brjod byed pa/ /nga yi bde legs 'gyur de nyon/ /'jig rten 'di dang gzhan dang mtho ris na/ /rin chen rgya chen mchog ni gang yod pa/ /des ni rdzogs pa'i sangs rgyas rin chen la/ /cig kyang grangs dang bgrang dang char mi phod/ /ngo mtshar shin du rmad byung dpag med de/ /rdzogs pa'i sangs rgyas rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /zhi 'gog bdud rtsi shin du gya nom gang / /shAkya thub pas mnyam bzhag thugs chud pa/ /chos de dang ni mtshungs pa yod min te/ / 13.338a de mngon byas na phyin chad mya ngan med/ /ngo mtshar shin du rmad byung dpag med de/ /dam pa'i chos kyi rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /rgyal bas gang dag gang zag brgyad gsungs pa/ /de dag rnams ni skyes bu zung bzhi ste/ /sbyin gnas de dag sa steng shin du dkon/ /de dag rnams la byin na dpag med 'gyur/ /ngo mtshar shin du rmad byung dpag med de/ /dge 'dun rin chen gang zhig 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /dam pa gtso bo mchog sbyin gya nom pa/ /'od mchog dpa' bo dam pa mchog gi gnas/ /shes rab dam pa mchog gi dam pa mchog /mchog min mchog mkhyen 'di ni bcom ldan gcig /ngo mtshar shin du rmad byung dpag med de/ /rdzogs pa'i sangs rgyas rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /ting 'dzin dam pa bar chad med pa gang / /mtha' yas blo ldan de bzhin gshegs gsungs pa/ /ting 'dzin de bstan rdo rje dper byas pa/ /ting 'dzin de dang mtshungs pa'i ting 'dzin med/ /ngo mtshar shin du rmad byung dpag med de/ /ting nge 'dzin gyi rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /ji ltar sgo gtan dam zhing rab dam ste/ /stobs chen rlung bzhi dag gis mi bskyod pa/ /de ltar mkhas pa bden bzhi mthong gnas pa/ /'jig rten smra ba rnams kyis 'dir mi g.yo/ /ngo mtshar shin du rmad byung dpag med de/ /dge 'dun rin chen gang zhig 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /thams cad zil gnon kun mkhyen thams cad gzigs/ / 13.338b thams cad mkhyen pa stobs rnams kun dang ldan/ /kun gyi dam pa 'dzin pa kun dang bral/ /bsam pa kun mkhyen 'di ni bcom ldan cig /ngo mtshar shin du rmad byung dpag med de/ /rdzogs pa'i sangs rgyas rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /srid pa 'gog cing mi g.yo 'gyur ba med/ /skyon med 'jigs pa kun las rnam par grol/ /shin du 'gag cing gya nom nges par 'byung / /shin du dri med zhi ba blos mi 'phrogs/ /ngo mtshar shin du rmad byung dpag med de/ /dam pa'i chos kyi rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /shin du sdug bsngal ston cing bde sbyin pa'i/ /bden rnams mthong ste gang dag bag yod pa/ /bden pa rin chen rnams la dogs bral ba/ /de dag skye ba brgyad pa phyis mi len/ /ngo mtshar shin du rmad byung dpag med de/ /dge 'dun rin chen gang zhig 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /dam pa rnams kyis dam pa don dam mkhyen/ /mchog dang mchog min mkhyen cing don dam brtson/ /gzhan gyis mi 'phrogs dam pa thugs chud rtogs/ /shin du sdug bsngal rnams kyi dpung gnyen mchog /ngo mtshar shin du rmad byung dpag med de/ /rdzogs pa'i sangs rgyas rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /'dun pa bskyed nas rnal 'byor ldan gyur cing / /gau tam bstan la rtag brtson rab grol zhi/ /gzhan gyis mi bkri ba dag zhi der reg /'di la de reg grangs su phyin mi 'gyur/ /ngo mtshar shin du rmad byung dpag med de/ /dge 'dun rin chen gang zhig 13.339a 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /bden pa mthong bas brjed pas brgya lam na/ /gal te sdig pa 'ga' zhig byas gyur kyang / /de ni de 'chal ba'i 'os min te/ /chos nyid 'di ni mi g.yo gnas phyir ro/ /ngo mtshar shin du rmad byung dpag med de/ /dge 'dun rin chen gang zhig 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /lha dang bcas pa'i 'jig rten thams cad na/ /sangs rgyas dang ni lhag pa 'am mtshungs pa med/ /lha dang mi yi ston pa bla na med/ /ston pa ded dpon sman pa rnams kyi mchog /ngo mtshar shin du rmad byung dpag med de/ /rdzogs pa'i sangs rgyas rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /so ga'i zla ba dang por thub pa yis/ /nags khrod chos kyi dam pa rab brnyes pa/ /chos de dang ni lhag pa 'am mtshungs pa med/ /'di la de rig grangs su phyin mi 'gyur/ /ngo mtshar shin du rmad byung dpag med de/ /dam pa'i chos kyi rin chen 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /sdig pa rnying zad gsar du byas med na/ /rims nad med pas 'jigs med mya ngan bral/ /srid pa 'gags pas rtsa ba mi bskyed pa/ /bstan pa mar me bzhin du 'bar bar 'gyur/ /ngo mtshar shin du rmad byung dpag med de/ /dge 'dun rin chen gang zhig 'jig rten mchog /ji ltar nga'i 'di de bzhin bden mchog na/ /bden pa 'dis ni shin du bde legs shog /bde legs kyi tshigs su bcad pa/ rdzogs s+ho// // |