//shis par brjod pa'i tshigs su bcad pa/ dkon mchog gsum la phyag 'tshal lo/ /lha yi bkra shis don sgrub cing / /phyogs rnams bkra shis byed pa des/ /khyed kyi don rnams grub gyur cig /thams cad myur du 'thun par shog /phreng ba mgo la 'dug pa ltar/ /lag pa g.yas na dpal yod shog /g.yon na'ang dpal ni gnas gyur cig /yan lag kun na'ang dpal yod shog /tshong pa dag ni nor tshol zhing / /phyogs bcu dag tu 'gro ba rnams/ /rnyed pa chen po rnyed gyur cing / /de dag bde ba skyid par shog /dgos pa la la gang gi phyir/ /shar phyogs su ni 'gro ba na/ /gang dag phyogs der gnas pa yi/ /rgyu skar khyed la skyong gyur cig /smin drug dang ni snar ma dang / /mgo dang lag dang nam so dang / /rgyal dang skag ces bya ba ste/ /de dag rnams ni shar phyogs pa/ /rgyu skar bdun po de dag ni/ /'jig rten skyong ba grags ldan pa/ /shar phyogs logs na yod ces bstan/ /de dag khyed la kun du bsrungs/ /de dag bdag po rgyal po ni/ /yul 'khor bsrung zhes grags pa ste/ /de ni dri za kun gyi bdag /nyi ma lhan cig bsrung bar shog /de la bu ni mang yod pa/ /mkhas shing ming yang 'thun pa ste/ /dgu bcu rtsa gcig zad par yang / /dbang po zhes bya stobs po che/ /de rnams khyed la nad med cing / /shis par lhag par skyong gyur cig /shar phyogs logs kyi phyogs cha na/ /lha mo gzhon nu brgyad yod de/ /rgyal dang rnam par rgyal ma dang / /don grub ma dang mi pham dang / /dga' mchog ma dang dga' sde dang / /dga' can ma dang dga' 'phel ma/ /de dag khyed la nad med cing / /shis par lhag par skyong bar shog /shar 13.340b phyogs logs kyi phyogs cha na/ /gzhi 'dzin ces bya'i mchod rten yod/ /rgyal ba skyob pa dgra bcom pa/ /de rnams kyis ni bzhugs shing mkhyen/ /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /dgos pa la la gang gi phyir/ /lho phyogs su ni 'gro ba na/ /gang dag phyogs der gnas pa yi/ /rgyu skar khyed la skyong gyur cig /mchu dang gre dang dbo dang ni/ /me bzhi nag pa lnga pa yin/ /sa ri dang ni sa ga ste/ /de dag rnams ni lho phyogs pa/ /rgyu skar bdun po de dag ni/ /'jig rten skyong ba grags ldan pa/ /lho phyogs logs na yod ces bstan/ /de dag khyed la kun du bsrungs/ /de dag bdag po rgyal po ni/ /'phags skyes po zhes bya bar brjod/ /de ni grul bum kun gyi bdag /gshin rje lhan cig bsrung bar shog /de la bu ni mang yod la/ /mkhas shing ming yang 'thun pa ste/ /dgu bcu rtsa gcig zad par yang / /dbang po zhes bya stobs po che/ /de rnams khyed la nad med cing / /shis par lhag par skyong gyur cig /lho phyogs logs kyi phyogs cha na/ /lha mo gzhon nu brgyad yod de/ /dpal ldan ma dang grags ldan ma/ /grags pa thob dang grags 'dzin dang / /legs par langs dang rab ldang dang / /legs par sad dang bde sgrub ma/ /de dag khyed la nad med cing / /shis par lhag par skyong bar shog /lho phyogs logs kyi phyogs cha na/ /pad ma zhes bya'i mchod rten yod/ /rtag tu gzi brjid kyis kyang 'bar/ /rtag tu thams cad gsal byed pa/ /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /dgos pa la la gang gi phyir/ /nub phyogs su ni 'gro ba na/ /gang dag phyogs 13.341a der gnas pa yis/ /rgyu skar khyer la skyong gyur cig /lha mtshams dang ni snron dang yang / /brtson 'grus brtan ldan snrums dang ni/ /chu stod chu smad byi zhin dang / /gro zhin de ni bdun pa yin/ /rgyu skar bdun po de dag ni/ /'jig rten skyong ba grags ldan/ /nub phyogs logs na yod ces bstan/ /de dag khyed la kun du bsrungs/ /de dag bdag po rgyal po ni/ /mig mi bzang zhes bya bar shes/ /de ni klu rnams kun gyi bdag /chu lha lhan cig bsrung bar shog /de la bu ni mang yod la/ /mkhas shing ming yang 'thun pa ste/ /dgu bcu rtsa gcig zad par yang / /dbang po zhes bya stobs po che/ /de dag khyed la nad med cing / /shis par lhag par skyong gyur cig /nub phyogs logs kyi phyogs cha na/ /lha mo gzhon nu brgyad yod de/ /rna cha skra 'dres ma dang ni/ /pad ma dkar dang skya reng dang / /cha med gcig dang dgu pa dang / /rol dang gnag dang stabs myur srid/ /de dag khyed la nad med cing / /shis par lhag par skyong bar shog /nub phyogs logs kyi phyogs cha na/ /nub ces bya ba'i ri bo yod / /nyi ma zla ba gnyis ka'ang nub/ /nub pa'ang khyed la nor sbyin 'gyur/ /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /dgos pa la la gang gi phyir/ /byang phyogs su ni 'gro ba na/ /gang dag phyogs der gnas pa yi/ /rgyu skar khyed la skyong gyur cig /mon gru dang ni mon gre dang / /khrums stod dang ni khrums smad da dang / /nam gru dang ni tha skar dang / /bra nye ste ni bdun pa yin/ /rgyu skar bdun po de dag ni/ /'jig rten skyong ba grags ldan pa/ /byang phyogs logs na yod ces bstan/ /de dag khyed la kun du bsrungs/ /de dag bdag 13.341b po rgyal po ni/ /mi la zhon pa lus ngan po/ /gnod sbyin kun gyi bdag po ste/ /nor bzangs lhan cig bsrung bar shog /de la bu ni mang yod la/ /mkhas shing ming yang 'thun pa ste/ /dgu bcu rtsa gcig zad par yang / /dbang po zhes bya stobs po che/ /de dag khyed la nad med ci nga / /shis par lhag par skyong gyur cig /byang phyogs logs kyi phyogs cha na/ /lha mo gzhon nu brgyad yod de/ /rab chags lha mo gtong lha mo/ /sa dang de bzhin pad ma can/ /rgyal po che la nyer gnas dang / /de dang khrel yod dpal ldan ma/ /de dag khyed la nad med cing / /shis par lhag par skyong bar shog /byang phyogs logs kyi phyogs cha na/ /spos ngad ldang ba'i ri bo yod/ /gnod sbyin 'byung po rnams kyi gnas/ /rtse mo sna tshogs blta na sdug /de yang khyed la nad med cing / /shis par lhag par skyong gyur cig /phyogs na khyed cag bde bar shog /khyed cag sdig par ma gyur cig /lha rnams kun gyis rab bsrungs nas/ /nor rnams rnyed de ldog par shog /rgyu skar nyi shu rtsa brgyad po/ /phyogs bzhi dag na bdun bdun gnas/ /lha yi bu mo sum bcu gnyis/ /phyogs bzhi dag na brgyad brgyad gnas/ /dge sbyong brgyad dang bram ze brgyad/ /yul rnams na ni grong rdal brgyad/ /dbang por bcas pa'i lha brgyad rnams/ /de dag khyed la kun du bsrungs/ /khyed cag 'gro na'ang bkra shis gyur/ /ldog pa na yang bkra shis shog /gnyen la lta ba bkra shis shog /gnyen gyi lta ba'ang bkra shis shog /dbang bcas gnod sbyin rgyal che dang / /dgra bcom pa dag snying brtse bas/ /thams cad du ni bkra shis dang / /bdud rtsi shis pa thob par shog /tshangs pa dang ni de bzhin nor rgyas dang / /zag pa med pa rnam par grol rnams dang / /klu dang gnod sbyin rtag tu snying rjes bsrungs/ /ston brgya mtshungs par tshe ni skyong bar shog / 13.342a 'phags pa rgya cher rol pa'i mdo'i tshong dpon ga gon dang bzang po'i le'u las/ 'byung ba shis par brjod pa'i tshigs su bcad pa/ rdzogs s+ho// |