// @#/ /rgya gar skad da du/ ma~M ga la gA thA/ bod skad du/ bkra shis tshigs su bcad pa/ dkon mchog gsum la phyag 'tshal lo/ /phun sum tshogs pa mnga' ba gser gyi ri bo 'dra/ /'jig rten gsum gyi mgon po dri ma gsum spangs pa/ /sangs rgyas pad ma rgyas pa'i mdab 'dra'i spyan mnga' ba/ /bkra shis des ni skye dgu zhi byed dang po'o/ /de yis nye bar bstan pa'i mchog rab mi g.yo ba/ /'jig rten gsum na 13.346a grags shing lha dang mis mchod pa/ /chos kyi dam pa skye dgu rnams la zhi byed pa/ /de ni 'jig rten dge ba'i bkra shis gnyis pa'o/ /dge 'dun dam pa'i chos ldan thos pa'i bkra shis phyug /mi dang lha dang lha ma yin gyis mchod pa'i gnas/ /tshogs kyi mchog rab ngo tsha shes dang dpal gyi gzhi/ /de ni 'jig rten dge ba'i bkra shis gsum pa'o/ /sems can kun la phan phyir byang chub mnga' ba po/ /don rnams thams cad 'grub par brtul ba yongs ldan pa/ /tshogs kyi lam dgyes thub pa'i bkra shis gang byung ba/ /bkra shis des ni skye dgu rnams la zhi byed shog /'gro la phan phyir de bzhin gshegs pa dga' ldan lha'i/ /gzhal med khang gi snying po nas ni 'di gshegs te/ /dbang bcas lha yis bskor ba'i bkra shis gang byung ba/ /bkra shis des ni skye dgu rnams la zhi byed shog /lo ma me tog 'od 'bar nyams dga' lum bi'i tshal/ /lha mang dag gis bsten par mgon po bltam pa na/ /srid pa'i mthar phyin pa yi bkra shis gang byung ba/ /bkra shis des ni skye dgu rnams la zhi byed shog /grong khyer ser skya'i gnas nas rgyal po'i pho brang du/ /lhums nas bltam pa ston pa bde gshegs zas gtsang sras/ /myur bskrun bdud rtsi'i chus gtor ba yi bkra shis gang / /bkra shis des ni skye dgu rnams la zhi byed shog /grong khyer dam pa ser skya'i gnas zhes bya bar ni/ /rmad du grags pa che ba'i lha yis mngon bstod pa/ /bsam yas dge bsgrubs bsod nams phung po'i bkra shis gang / /bkra shis des ni skye dgu rnams la zhi byed shog /dgyes shing nam phyed grong khyer mchog nas mngon byung ste/ /dka' thub tshal du mngon par gshegs shing tshangs la sogs/ / 13.346b lha'i tshogs kyis yongs su bskor ba'i bkra shis pa/ /bkra shis des ni skye dgu rnams la zhi byed shog /rab tu 'od 'bar gser dang 'dra ba'i sku mnga' zhing / /bai dUr+ya ltar sngo ba'i rtswa bting steng bzhugs te/ /dkyil mo dkrung bcas mi g.yo mchog gi bkra shis gang / /bkra shis des ni skye dgu rnams la zhi byed shog /chu bo'i 'gram na tsa sha'i phreng gis yongs bskor ba/ /shin du rmad du byung ba'i srid pa sel mdzad pa/ /klu yi rgyal pos phyag byas pa yi bkra shis gang / /bkra shis des ni skye dgu rnams la zhi byed shog /shing rgyal drung gshegs byams pa'i stobs kyis bdud kyi phyogs/ /mang po btul te sa steng dang ni nam mkha' la/ /bcom ldan bkra shis rnam pa sna tshogs gang byung ba/ /bkra shis des ni skye dgu rnams la zhi byed shog /sdug bsngal mtha' dag gzhig phyir rdo rje'i gdan bzhugs te/ /nam gyi tho rangs bdud bzhi po dag rnam btul ba/ /ston pa bde bar gshegs pa'i bkra shis gang yin pa/ /bkra shis des ni skye dgu rnams la zhi byed shog /grong khyer bA rA Na sIr drang srong mchog bzhugs te/ /chos kyi 'khor lo mchog bstan pa yi bkra shis gang / /lha yul deng 'dir shin du rmad du byung gyur pa/ /bkra shis des ni skye dgu rnams la zhi byed shog /bkra shis gang zhig phan byed dam pa dag byed pa/ /bsod nams bya byed 'phags pa'i skye bos mngon bstod pa/ /bcom ldan shAkya thub pa'i seng ges gang gsungs pa/ /bkra shis des ni skye dgu rnams la zhi byed shog /mu stegs byed pa kun gyi nga rgyal gzhom pa dang / /'gro la bde ba bskyed phyir cho 'phrul dam pa dag /nye bar ston pa rgyal ba'i bkra shis gang yin pa/ /bkra shis des ni skye dgu rnams la zhi byed shog /'gro la phan phyir mtho ris nas ni 'dir gshegs te/ /tshangs pa las 13.347a sogs lha tshogs lag na rnga yab gdugs/ /sna tshogs thogs pas yongs su bskor ba'i bkra shis gang / /bkra shis des ni skye dgu rnams la zhi byed shog /de bzhin gshegs pa zhi ba mchog tu nyer gshegs pa/ /man dA ra ba'i me tog mang pos mngon mchod pa/ /lha mchog rnams kyis mngon par bstod pa'i bkra shis gang / /bkra shis des ni skye dgu rnams la zhi byed shog /lha dbang klu dang mi yi dbang pos phyag byas pa/ /mkha' lding gnod sbyin dri za'i dbang pos mchod gyur pa/ /de bzhin gshegs pa'i stobs bcu ldan pa'i bkra shis gang / /bkra shis des ni skye dgu rnams la zhi byed shog /dkon mchog gsum dang mdzad pa bcu gnyis kyi bkra shis kyi tshigs su bcad pa/ rdzogs s+ho// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban d+he ye shes sdes bsgyur cing zhus te gtan la phab pa'o// // |