rgya gar skad du/ ar+ya dz+wa ra pra sha ma ni nA ma d+ha ra NI/ bod skad du/ 'phags pa rims nad rab tu zhi bar byed pa zhes bya ba'i gzungs/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na dur khrod chen po'i bsil ba'i tshal na bzhugs te/ de nas dge slong zhig bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'dug go /phyogs gcig tu 'dug nas dge slong des bcom ldan 'das la 'di skad ces gsol to/ /btsun pa bcom ldan 'das 'di na sems can rims nad kyis rnam par gtses pa dag mchis na/ bcom ldan 'das de dag la bsrung du gsol/ de nas bcom ldan 'das kyis snam logs su gzigs te/ tshe dang ldan pa kun dga' bo la bka' stsal pa/ kun dga' bo phyogs 'di na me lce phreng ba zhes pa'i rims gnas te/ de sems can rnams la nyin gcig pa dang / nyin gnyis pa dang / nyin gsum pa dang / nyin bzhi pa'i tshul gyis rnam par 'tshe bar byed de/ de bsrung ba'i gsang sngags kyi gzhi ni 'di dag yin no/ /tad+ya thA/ dz+wa la ni dz+wa la ni/ pra dz+wa la ni/ pra ti pa ni/ pra sha ma ni/ bdag gi rims nad song shig /ma 'dug shig swA hA/ bden pa dang bden pa'i tshig gang gis 'jig rten na sangs rgyas bla na med pa dang / 'jig rten na chos dang / dge 'dun bla na med pa'i bden pa dang / bden pa'i tshig des bdag gi rims nad song 107.164b ma 'dug shig swA hA/ sid d+h+ya~M tu man tra pa dA/ ta ra tu/ bid d+h+ya ta~M basma A nu mo taM swA hA/ skud pa nag po la lan nyi shu rtsa gcig bzlas te mdud pa nyi shu rtsa gcig dor ro/ /bcom ldan 'das kyis de skad ces bka' stsal nas/ dge slong de dag yi rangs te/ bcom ldan 'das kyis gsungs pa la mngon par bstod do/ /'phags pa rims nad rab tu zhi bar byed pa zhes bya ba'i gzungs rdzogs s+ho// //rgya gar gyi mkhan po 'dzi na mi tra dang / dA na shI la dang / zhu chen gyi lo ts+tsha ba ban de ye shes sdes bsgyur cing zhus te gtan la phab pa// |