o~M pa du me tsin da ma Ni dz+wa la hU~M/ snying po'o/ /o~M b+ha ra da pa du me hU~M/ nye ba'i snying po'o/ /o~M ma Ni badzre ni hU~M/ gsang ba'i snying po'o/ /sngags snying 'byung smon lam dang tshigs su bcad pa dang sngags su bcas pa/ rdzogs s+ho// // rgya gar skad du/ Ar+ya b+ha dra tsAr+ya pra Ni d+hA na rA dza/ bod skad du/ 'phags pa bzang po spyod pa'i smon lam gyi rgyal po/ 'phags pa 'jam dpal gzhon nur gyur pa la phyag 'tshal lo/ /ji snyed su dag phyogs bcu'i 'jig rten na/ /dus gsum gshegs pa mi yi seng ge kun/ /bdag gis ma lus de dag thams cad la/ /lus dang ngag yid dang bas phyag bgyi'o/ /bzang po spyod pa'i smon lam stobs dag gis/ /rgyal ba thams cad yid kyis mngon sum du/ /zhing gis rdul snyed lus rab btud pa yis/ /rgyal ba kun la rab tu phyag 'tshal lo/ /rdul gcig steng na rdul snyed sangs rgyas rnams/ /sangs rgyas sras kyi dbus na bzhugs pa dag /de ltar chos kyi dbyings rnams ma lus pa/ /thams cad rgyal ba dag gis gang bar mos/ /de dag bsngags pa mi zad rgya mtsho rnams/ /dbyangs kyi yan lag rgya mtsho'i sgra kun gyis/ /rgyal ba kun gyi yon tan rab brjod cing / /bde bar gshegs pa thams cad bdag gis bstod/ /me tog dam pa phreng ba dam pa dang / /sil snyan rnams dang byug pa gdugs mchog dang / /mar me mchog dang bdug pa dam pa yis/ /rgyal ba de dag la ni mchod par bgyi/ /na bza' dam pa 107.237b rnams dang dri mchog dang / /phye ma'i phur ma ri rab mnyam pa dang / /bkod pa'i khyad par 'phags pa mchog kun gyis/ /rgyal ba de dag la ni mchod par bgyid/ /mchod pa gang rnams bla med rgya che ba/ /de dag rgyal ba thams cad la yang mos/ /bzang po spyod la dad pa'i stobs dag gis/ /rgyal ba kun la phyag 'tshal mchod par bgyi/ /'dod chags zhe sdang gti mug dbang gis na/ /lus dang ngag dang de bzhin yid kyis kyang / /sdig pa bdag gis bgyis pa ci mchis pa/ /de dag thams cad bdag gis so sor bshags/ /phyogs bcu'i rgyal ba kun dang sangs rgyas sras/ /rang rgyal rnams dang slob dang mi slob dang / /'gro ba kun gyi bsod nams gang la yang / /de dag kun gyi rjes su bdag yi rang / /gang rnams phyogs bcu'i 'jig rten sgron ma dag /byang chub rim par sangs rgyas ma chags brnyes/ /mgon po de dag bdag gis thams cad la/ /'khor lo bla na med pa bskor bar bskul/ /mya ngan 'das ston gang bzhed de dag la/ /'gro ba kun la phan zhing bde ba'i phyir/ /bskal pa zhing gi rdul snyed bzhugs par yang / /bdag gis thal mo rab sbyar gsol bar bgyi/ /phyag 'tshal ba dang mchod cing bshags pa dang / /rjes su yi rang bskul zhing gsol ba yis/ /dge ba cung zad bdag gis ci bsags pa/ /thams cad bdag gis byang chub phyir bsngo'o/ /'das pa'i sangs rgyas rnams dang phyogs bcu yi/ /'jig rten dag na gang bzhugs mchod par gyur/ /gang yang ma byon de dag rab myur bar/ /bsam rdzogs byang chub rim par sangs rgyas spyon/ /phyogs bcu ga la'i zhing rnams ji snyed pa/ /de dag rgya cher yongs su dag par gyur/ /byang chub shing dbang drung gshegs rgyal ba dang / /sangs rgyas sras kyis rab tu gang bar shog /phyogs bcu'i sems can gang rnams ji snyed pa/ /de dag rtag tu nad med bde bar 'gyur/ /'gro ba kun gyi chos kyis don rnams ni/ /'thun par gyur cing re ba 'ang 'grub par shog /byang chub spyod pa dag ni bdag spyod cing / /'gro ba kun tu skye ba dran par 'gyur/ /tshe rabs kun tu 'chi 'pho skye ba na/ /rtag tu bdag ni rab tu 'byung bar shog /rgyal ba kun gyi rjes su slob gyur te/ /bzang po spyod pa 107.238a yongs su rdzogs byed cing / /tshul khrims spyod pa dri med yongs dag par/ /rtag tu ma nyams skyon med spyod par shog /lha yi skad dang klu dang gnod sbyin skad/ /grul bum dag dang mi yi skad rnams dang / /'gro ba kun gyi sgra rnams ji tsam par/ /thams cad skad du bdag gis chos bstan to/ /des shing pha rol phyin la rab brtson te/ /byang chub sems ni nam yang rjed ma gyur/ /sdig pa gang rnams sgrib par gyur pa dag /de dag ma lus yongs su byang bar shog /las dang nyon mongs bdud kyi las rnams las/ /grol zhing 'jig rten 'gro ba rnams su yang / /ji ltar pad ma chus mi chags pa bzhin/ /nyi zla nam mkha' thogs pa med ltar spyad/ /zhing gi khyon dang phyogs rnams ji tsam par/ /ngan song sdug bsngal rab tu zhi bar byed/ /bde ba dag la 'gro ba kun 'god cing / /'gro ba thams cad la ni phan par spyad/ /byang chub spyod pa yongs su rdzogs byed cing / /sems can rnams kyi spyod dang 'thun par 'jug /bzang po spyod pa dag ni rab ston cing / /ma 'ongs bskal pa kun tu spyod par gyur/ /bdag gis spyod dang 'thun par gang spyod pa/ /de dag dang ni rtag tu 'grogs par shog /lus dang ngag rnams dang ni sems kyis kyang / /spyod pa dag dang smon lam gcig tu spyad/ /bdag la phan par 'dod pa'i grogs po dag /bzang po spyod pa rab tu ston pa rnams/ /de dag dang yang rtag tu phrad par shog /de dag bdag gis nam yang yid mi dbyung / /sangs rgyas sras kyis bskor ba'i mgon po rnams/ /mngon sum rtag tu bdag gis rgyal ba blta/ /ma 'ongs bskal pa kun tu mi skyo bar/ /de dag la yang mchod pa rgya cher bgyi/ /rgyal ba rnams kyi dam pa'i chos 'dzin cing / /byang chub spyod pa kun tu snang bar byed/ /bzang po spyod pa rnam par spyad pa yang / /ma 'ongs bskal pa kun tu spyad par bgyi/ /srid pa thams cad du ni 'khor ba na/ /bsod nams ye shes dag ni mi zad rnyed/ /thabs dang shes rab ting 'dzin rnam thar dang / /yon tan kun gyi mi zad mdzod du gyur/ /rdul gcig steng na rdul snyed zhing rnams te/ /zhing der bsam gyis mi khyab sangs rgyas rnams/ /sangs rgyas sras kyi dbus na bzhugs pa la/ /byang chub spyad pa spyod 107.238b cing blta bar bgyi/ /de ltar ma lus thams cad phyogs su yang / /skra tsam khyon la dus gsum tshad snyed kyis/ /sangs rgyas rgya mtsho zhing rnams rgya mtsho dang / /bskal pa rgya mtshor spyod cing rab tu 'jug /gsung gcig yan lag rgya mtsho'i sgra skad kyis/ /rgyal ba kun dbyangs yan lag rnam dag pa/ /'gro ba kun gyi bsam pa ji bzhin dbyangs/ /sangs rgyas gsung la rtag tu 'jug par bgyi/ /dus gsum gshegs pa rgyal ba thams cad dag /'khor lo'i tshul rnams rab tu bskor ba yi/ /de dag gi yang gsung dbyangs mi zad la/ /blo yi stobs kyis bdag kyang rab tu 'jug /ma 'ongs bskal pa thams cad 'jug par yang / /skad cig gcig gis bdag kyang 'jug par bgyi/ /gang yang bskal pa dus gsum tshad de dag /skad cig cha shas kyis ni zhugs par spyad/ /dus gsum gshegs pa mi yi seng ge gang / /de dag skad cig gcig la bdag gis blta/ /rtag tu de dag gi ni spyod yul la/ /sgyu mar gyur pa'i rnam thar stobs kyis 'jug /gang yang dus gsum dag gi zhing bkod pa/ /de dag rdul gcig steng du mngon par bsgrub/ /de ltar ma lus phyogs rnams thams cad du/ /rgyal ba dag gi zhing rnams bkod la 'jug /gang yang ma byon 'jig rten sgron ma rnams/ /de dag rim par 'tshang rgya 'khor lo bskor/ /mya ngan 'das pa rab tu zhi mtha' ston/ /mgon po kun gyi drung du bdag mchi'o/ /kun tu myur ba'i rdzu 'phrul stobs rnams dang / /kun nas sgo yi theg pa'i stobs dag dang / /kun tu yon tan spyod pa'i stobs rnams dang / /kun tu khyab pa byams pa dag gi stobs/ /kun nas dge ba'i bsod nams stobs rnams dang / /chags pa med par gyur pa'i ye shes stobs/ /shes rab thabs dang ting 'dzin stobs dag gis/ /byang chub stobs rnams yang dag sgrub par byed/ /las kyi stobs rnams yongs su dag byed cing / /nyon mongs stobs rnams kun tu 'joms par byed/ /bdud kyi stobs rnams stobs med rab byed cing / /bzang po spyod pa'i stobs ni rdzogs par bgyi/ /zhing rnams rgya mtsho rnam par dag byed cing / /sems can rgya mtsho dag ni rnam par 'grol/ / 107.239a chos rnams rgya mtsho rab tu mthong byed cing / /ye shes rgya mtsho rab tu rtogs par byed/ /spyod pa rgya mtsho rnam par dag byed cing / /smon lam rgya mtsho rab tu rdzogs par byed/ /sangs rgyas rgya mtsho rab tu mchod byed cing / /bskal pa rgya mtshor mi skyo spyad par bgyi/ /gang yang dus gsum gshegs pa rgyal ba yi/ /byang chub spyod pa'i smon lam bye brag rnams/ /bzang po spyod pas byang chub sangs rgyas nas/ /de kun ma lus bdag gis rdzogs par bgyi/ /rgyal ba kun gyi sras kyi thu bo pa/ /gang gi ming ni kun tu bzang zhes bya/ /mkhas pa de dang mtshungs par spyod pa'i phyir/ /dge ba 'di dag thams cad rab tu bsngo/ /lus dang ngag dang yid kyang rnam dag cing / /spyod pa rnam dag zhing rnams yongs dag dang / /bsngo ba'ang bzang po mkhas pa ci 'dra bar/ /de 'drar bdag kyang de dang mtshungs par shog /kun nas dge ba bzang po spyad pa'i phyir/ /'jam dpal gyi ni smon lam spyad par bgyi/ /ma 'ongs bskal pa kun tu mi skyo bar/ /de yi bya ba ma lus rdzogs par bgyi/ /spyod pa dag ni tshad yod ma gyur cig /yon tan rnams kyang tshad gzung med par shog /spyod pa tshad med pa la gnas nas kyang / /de dag 'phrul pa thams cad 'tshal bar bgyi/ /nam mkha'i mthar thug gyur pa ji tsam par/ /sems can ma lus mtha' yang de bzhin te/ /ji tsam las dang nyon mongs mthar gyur pa/ /bdag gi smon lam mtha' yang de tsam mo/ /gang yang phyogs bcu'i zhing rnams mtha' yas pa/ /rin chen brgyan te rgyal ba rnams la phul/ /lha dang mi yi bde ba mchog rnams kyang / /zhing gi rdul snyed bskal par phul ba bas/ /gang gis bsngo ba'i rgyal po 'di thos nas/ /byang chub mchog gis rjes su rab mos shing / /lan cig tsam yang dad pa skyed pa ni/ /bsod nams dam pa'i mchog tu 'di 'gyur ro/ /gang gis bzang spyod smon lam 'di btab pa/ /des ni ngan song thams cad spangs par 'gyur/ /des ni grogs po ngan pa spangs pa yin/ /snang ba mtha' yas de yang des myur mthong / /de dag rnyed pa rab rnyed bde bar 'tsho/ /mi tshe 'dir yang de dag legs par 'ongs/ /kun tu bzang po de yang ci 'dra bar/ /de dag ring por mi 107.239b thogs de bzhin 'gyur/ /mtshams med lnga po dag gi sdig pa rnams/ /gang gis mi shes dbang gis byas pa dag /de yis bzang po spyod pa 'di brjod na/ /myur du ma lus yongs su byang bar 'gyur/ /ye shes dang ni gzugs dang mtshan rnams dang / /rigs dang kha dog rnams dang ldan par 'gyur/ /bdud dang mu stegs mang pos de mi thub/ /'jig rten gsum po kun la'ang mchod par 'gyur/ /byang chub shing dbang drung du de myur 'gro/ /song nas sems can phan phyir der 'dug ste/ /byang chub sangs rgyas 'khor lo rab tu bskor/ /bdud rnams sde dang bcas pa thams cad 'dul/ /gang yang bzang po spyod pa'i smon lam 'di/ /'chang ba dang ni ston tam klog pa yi/ /de yi rnam par smin pa sangs rgyas mkhyen/ /byang chub mchog la som nyi ma byed cig /'jam dpal ji ltar mkhyen cing dpa' ba dang / /kun tu bzang po de yang de bzhin te/ /de dag gi ni rjes su bdag slob cing / /dge ba 'di dag thams cad rab tu bsngo/ /dus gsum gshegs pa rgyal ba thams cad kyis/ /bsngo ba gang la mchog tu bsngags pa des/ /bdag gi dge ba'i rtsa ba 'di kun kyang / /bzang po spyod phyir rab tu bsngo bar bgyi/ /bdag ni 'chi ba'i dus byed gyur pa na/ /sgrib pa thams cad dag ni phyir bsal te/ /mngon sum snang ba mtha' yas de mthong nas/ /bde ba can gyi zhing der rab tu 'gro/ /des song nas ni smon lam 'di dag kyang / /thams cad ma lus mngon sum 'gyur bar shog /de dag ma lus bdag gis yongs su bkang / /'jig rten ji srid sems can phan par bgyi/ /rgyal ba'i dkyil 'khor bzang zhing dga' ba der/ /pad ma dam pa shin tu mdzes las skyes/ /snang ba mtha' yas rgyal las mngon sum du/ /lung bstan pa yang bdag gis der thob shog /der ni bdag gis lung bstan rab thob nas/ /sprul pa mang po bye ba phrag brgya yis/ /blo yi stobs kyis phyogs bcu rnams su yang / /sems can rnams la phan pa mang po bgyi/ /bzang po spyod pa'i smon lam btab pa yis/ /dge ba cung zad bdag gis ci bsags pa/ /des ni 'gro ba'i dge ba'i smon lam rnams/ /skad cig gcig gis thams cad 'byor par shog / 107.240a bzang po spyod pa'i smon lam bsngos pa yis/ /bsod nams dam pa mtha' yas gang thob des/ /'gro ba sdug bsngal chu bor bying ba rnams/ /'od dpag med pa'i gnas rab thob par shog /smon lam rgyal po 'di mchog gtso des ni/ /'gro ba mtha' yas kun la phan byed cing / /kun tu bzang pos brgyan pa'i gzhung grub cing / /ngan song rgyud gsum ma lus stongs par shog /'phags pa bzang po spyod pa'i smon lam gyi rgyal po/ rdzogs s+ho// |