rgya gar skad du/ de ba pa ri pri ts+tsha ma~M ga la gA thA/ bod skad du/ lhas zhus pa'i bkra shis kyi tshigs su bcad pa/ dkon mchog gsum la phyag 'tshal lo/ /gzhan gyis mi thub rdzogs sangs rgyas/ /mgon po phyogs gcig bzhugs pa na/ /lha gcig dpa' bo chen po la/ /phyag 'tshal 'di skad tshig gsol to/ /dge ba don du gnyer ba na/ /lha dang mi rnams so so nas/ /bkra shis dag ni brjod bgyis na/ /bkra shis dam pa gang zhig lags/ /bcom ldan 'das kyis bka' stsal pa/ /dge ba don du gnyer ba na/ /lha dang mi rnams so so nas/ /bkra shis rnams ni rjod byed pa/ /de dag bkra shis brjod par bya/ /yul bzang gnas dang grogs mchog dang / /sngon chad bsod nams byas pa dang / /sems ni legs par gtad byas pa/ /de ni bkra shis dam pa yin/ /sbyin dang shin tu snyan smra dang / /yang dag don la rnam nges dang / /khrims ldan rnams dang mtshungs sbyor ba/ /de ni bkra shis dam pa yin/ /byis pa rnams la mi sten dang / /mkhas pa rnams la sten pa dang / /mchod 'os rnams la mchod byed pa/ /de ni bkra shis dam pa yin/ /pha ma bsnyen bkur byed pa dang / /zhi dang tshangs par spyod pa dang / /'byung po kun la snying brtse ba/ /de ni bkra shis dam pa yin/ /sdig pa'i las las ldog pa dang / /dge ba'i las la brten pa dang / /bag yod pa dang rtag mkhas pa/ /de ni bkra shis dam pa yin/ /nga rgyal med dang khengs med dang / /chog shes 'thun pas 'tsho ba dang / /rtag tu byas pa gzo byed pa/ /de ni bkra shis dam pa yin/ /mi dmod de bzhin bzod pa dang / /'phags pa rnams dang 'thun sbyor dang / /dus skabs su ni chos nyan pa/ /de ni bkra shis dam pa yin/ /le lo med dang mang thos 107.244a dang / /chos la legs par rnam nges dang / /de bzhin sems la rnyog med pa/ /de ni bkra shis dam pa yin/ /gang zhig sems can thams cad la/ /byams pa'i sems ni rab sgom zhing / /dpag tu med de mi 'khrugs pa/ /de ni bkra shis dam pa yin/ /gang zhig 'phags pa'i bden rnams la/ /shes rab mig ni rnam sbyangs dang / /tshul khrims nongs par ma gyur pa/ /de ni bkra shis dam pa yin/ /'phags pa'i bden pa mthong ba dang / /tshangs par spyod pa sgom pa dang / /mya ngan 'das pa 'thob 'gyur ba/ /de ni bkra shis dam pa yin/ /gang zhig 'dod chags zhe sdang dang / /ma rig pa yang rnam spangs dang / /shes pa mi 'khrugs skye 'gyur ba/ /de ni bkra shis dam pa yin/ /'jig rten chos rnams kyis bskyod kyang / /gang gi sems ni mi g.yo dang / /dri med zhi dang mya ngan med/ /de ni bkra shis dam pa yin/ /de dang 'di ni ci rigs par/ /'di la bkra shis de dag ni/ /mkhas pa gang zhig stod byed pa/ /de la rtag tu bkra shis 'gyur/ /lhas zhus pa'i bkra shis kyi tshigs su bcad pa/ rdzogs s+ho// |