༄##། །བོད་སྐད་དུ། འཕགས་པ་རྒྱལ་བུ་དོན་གྲུབ་ཀྱི་མདོ།བམ་པོ་དང་པོ། འདི་སྐད་བདག་གིས་ཐོས་པ་དུས་གཅིག་ན། 76-1-56a བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་དང་དགེ་སློང་མ་དང་དགེ་བསྙེན་ཕ་དང་དགེ་བསྙེན་མ་གྲངས་མེད་པ་དང་ཐབས་ཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་འཛུམ་པ་མཛད་ནས། ཞལ་གྱི་སྒོ་ནས་ འོད་ཟེར་ཁ་དོག་སྣ་ལྔ་དང་ལྡན་པ་བཀྱེ་བ་དང ། ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་གོས་ཚགས་བཅོས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གིས་སངས་རྒྱས་ཀྱི་ཞབས་འབྲིང་ལོ་ཉི་ཤུ་བགྱིས་ཀྱི་བར་དུ་དེ་འདྲ་བར་བཞད་པ་མ་མཐོང་ན། བཅོམ་ལྡན་འདས་ཀྱིས་སངས་རྒྱས་སྔོན་འདས་པའམ་མ་བྱོན་པའམ་ད་ལྟར་བཞུགས་པའི་སངས་རྒྱས་ལ་དགོངས་སམ། དེ་མ་ལགས་པ་ཅི་ལ་དགོངས་པ་དོན་བསྟན་དུ་གསོལ།བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སངས་རྒྱས་འདས་པའམ་མ་འོངས་པའམ་ད་ ལྟར་བཞུགས་པ་ལ་དགོངས་པ་མ་ཡིན་གྱི། མངོན་པར་དྲན་པ་ང་སྔོན་བསྐལ་པ་གྲངས་མེད་པར་འདས་པའི་ཕ་རོལ་ན་སྦྱིན་པ་སྦྱིན་པའི་དངོས་པོ་ལ་དགོངས་ཏེ། དེའི་ཚེ་དེའི་དུས་ན་ཡུལ་ཡ་བ་ཞེས་བྱ་བར་རྒྱལ་པོ་དགེ་བ་ཞེས་བྱ་བ་དྲང་པོའི་ཆོས་ཀྱིས་ཡུལ་གྱི་སྲིད་འཛིན་ཏེ། འགྲོ་བ་མང་པོ་ལ་ སྐྱོང་བ་ཞིག་བྱུང་ངོ ། །རྒྱལ་པོ་དེ་ལ་བློན་པོ་ནི་བཞི་སྟོང་ཞིག་ཡོད་དེ། རྒྱལ་ཕྲན་དྲུག་ཅུ་ལ་དབང་བསྐུར་རོ། །གྲོང་ཁྱེར་ཆེན་པོ་བརྒྱད་བརྒྱ་དང་བལ་གྱི་གླང་པོ་ཆེ་ལྔ་བརྒྱ་ཡོད་དེ། རྒྱལ་པོ་ལ་བཙུན་མོ་ཉི་ཁྲི་ཡོད་ཀྱང་སྲས་མི་མངའ་བས་རི་དང་ཀླུང་གི་ལྷ་གཉན་པོ་ལ་མཆོད་ འབྲང་བྱས་ནས་བཙུན་མོ་དམ་པ་ལ་སྲས་མངའ་བར་གྱུར་ཏེ། བཙུན་མོའི་མལ་ཅ་དང་ཟས་དང་སྐོམ་ལ་སོགས་པ་ཡོ་བྱད་བདམ་ཞིང་བཟང་པོར་སྦྱར་ནས་རྒྱལ་པོ་ཉིད་ཀྱིས་རིམ་གྲོ་བྱས་ཏེ། ཟླ་བ་བཅུར་ཚང་ནས་རྒྱལ་བུ་གཅིག་བཙས་སོ། །ཕོ་བྲང་གི་བཙུན་མོ་ཉི་ཁྲི་སྙེད་ ཀྱང་རྒྱལ་བུ་ཞིག་བཙས་ཞེས་ཐོས་ནས་ཐམས་ཅད་དགའ་མགུ་རངས་ཏེ། ནུ་ཞོ་ཡང་རང་བྱུང་བས་རྒྱལ་བུའི་མཚན་ཡང་དོན་གྲུབ་ཅེས་བཏགས་སོ། །རྒྱལ་བུ་ལ་ནུ་ཞོ་སྣུན་ཅིང་རིམ་གྲོ་བྱེད་པ་བཞི་ཞིག་བསྐོས་ཏེ། གཅིག་ནི་ནུ་ཞོ་སྣུན་པའི་ལས་བྱེད། གཅིག་ནི་རྒྱལ་བུ་པང་དུ་ཁྱེར་བར་ 76-1-56b བསྐོས། གཅིག་ནི་རྒྱལ་བུ་བཀྲུ་བའི་ལས་བྱེད་པར་བསྐོས། གཅིག་ནི་རྒྱལ་བུ་རྩེར་འགྲོ་བའི་ལས་སུ་བསྐོས་སོ། །དེ་ལྟར་བསྐོས་ནས་རྒྱལ་བུ་ལོ་བཅུ་དྲུག་ལོན་པ་དང ། ཡིག་རྩིས་དང ། འཕོང་རྩལ་དང ། བཟོ་དཔྱད་དང ། རོལ་མོ་ལ་སོགས་པ་གང་ཡང་མི་ཤེས་པ་ མེད་དེ་ཐམས་ཅད་ཀྱང་ལོབས། རྒྱལ་པོ་ཡབ་དང་ཡུམ་ལ་ཡང་ལྷ་བཙུན་འདྲ་བར་རིམ་གྲོ་བྱེད་དོ། །རྒྱལ་པོས་ཀྱང་རྒྱལ་བུའི་ཕོ་བྲང་ལོགས་ཤིག་ཏུ་བརྩིགས་སོ། །རྒྱལ་བུ་དེ་ཆུང་ནས་སྦྱིན་པ་ལ་དགའ་ནས་མི་ལ་སོགས་ཏེ། རི་དགས་དང་འདབ་ཆགས་བྱའི་བར་དུ་སེམས་ ཅན་ཐམས་ཅད་བདེ་སྐྱིད་པར་དགའ་སྟེ། ཚིག་ཏུ་ཡང་གང་མི་ཤེས་པ་གཏི་མུག་ཅན་ནི་སྦྱིན་པ་ལ་མི་དགའ་བས་བདག་གིས་བདག་བསླུས་ཏེ་ཕན་པའི་དོན་མེད་ཀྱི། མཁས་པ་ཤེས་རབ་ཅན་ནི་འཇིག་རྟེན་ན་གནས་ཀྱང་སྦྱིན་པ་ལ་ཡོན་ཏན་ཆེར་མཐོང་སྟེ། སྦྱིན་པ་བྱིན་པས་སྔ་མ་འདས་ པ་དང ། མ་བྱོན་པ་དང ། ད་ལྟར་བཞུགས་པའི་སངས་རྒྱས་དང ། རང་སངས་རྒྱས་དང ། འཕགས་པ་དགྲ་བཅོམ་པ་ཐམས་ཅད་ཀྱིས་བསྟོད་ཅིང་བསྔགས་པར་འགྱུར་རོ་ཞེས་སྨྲས་སོ། །རྒྱལ་བུ་བགས་ཀྱིས་ཆེར་སྐྱེས་ནས། །རྒྱལ་པོ་ཞིག་གི་བུ་མོ་མན་ཏེ་ཞེས་བྱ་བ་མངའ་བྱད་ བཟང་ལ་སྡུག་པ། དཔེ་ཟླ་མེད་པ། གསེར་དང ། དངུལ་དང ། བཻ་དཱུརྱ་དང ། རིན་པོ་ཆེ་སྣ་ཚོགས་ཀྱི་རྒྱན་གྱིས་བརྒྱན་པ་གཅིག་བཙུན་མོར་བླངས་ནས་བུ་མིང་སྲིང་གཉིས་ཤིག་ཡོད་པར་གྱུར་ཏོ། །དེ་ནས་རྒྱལ་བུ་དེ་སྦྱིན་པའི་ཕ་རོལ་ཏུ་ཕྱིན་པའི་དོན་སེམས་པ་ལ་ཞུགས་ ནས། ཡབ་རྒྱལ་པོ་ལ་བདག་ནི་རྩེ་ཞིང་ལྟད་མོ་ལྟར་མཆིའོ་ཞེས་གསོལ་པ་དང ། རྒྱལ་པོས་ཀྱང་དེ་བཞིན་དུ་གནང་ངོ ། །དེ་ནས་རྒྱལ་བུ་ཕོ་བྲང་ནས་བྱུང་བ་དང ། བརྒྱ་བྱིན་ལྷའི་དབང་པོས་གྲོང་ཁྱེར་གྱི་སྒོ་ལམ་སྲང་དག་ན་དབུལ་ཕོངས་པ། ལོང་བ་འོན་པ། ལྐུགས་ པའི་སློངས་མོ་པ་དག་ཅིག་སྤྲུལ་ནས་སྡོད་དུ་བཅུག་གོ། །རྒྱལ་བུས་དེ་དག་མཐོང་བ་དང ། དེ་མ་ཐག་ཏུ་ཕྱིར་ལོག་ནས་ཕོ་བྲང་དུ་ཞུགས་ཏེ། མྱ་ངན་ཆེན་པོས་ནོན་ནས་མི་དགའ་ཞིང་འདུག་པ་ལ། ཡབ་རྒྱལ་པོས་སྲས་རྒྱལ་བུ་ལ་འདི་སྐད་ཅེས་བསྒོའོ། །རྩེ་ཞིང་ལྟད་མོ་ལྟར་ 76-1-57a བཏང་ན་ཅིའི་ཕྱིར་མི་དགའ་ཞིང་མྱ་ངན་བྱེད་པར་གྱུར་ཅེས་དྲིས་པ་དང ། རྒྱལ་བུས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །བདག་རྩེ་ཞིང་ལྟད་མོ་ལྟར་མཆིས་པ་ལས། སློངས་མོ་པ་ལོང་བ་འོན་པ་ལྐུགས་པ་མང་པོ་དང་མཇལ་བས་མྱ་ངན་གྱིས་ ནོན་པར་གྱུར་ཏེ། ང་ཡབ་རྒྱལ་པོ་ལ་གསོལ་བ་རྣམ་པ་གཅིག་གསོལ་ན་རྒྱལ་པོས་གནང་ངམ། ཡབ་རྒྱལ་པོས་ཀྱང་རྒྱལ་བུ་ཁྱོད་ཅི་དང་ཅི་འདོད་པ་སྨྲོས་ཤིག་དང་གནང་བར་བྱའོ་ཞེས་བསྒོ་བ་དང ། རྒྱལ་བུས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ནི་ཡབ་ རྒྱལ་པོ་ལ་མངའ་བའི་བང་མཛོད་ན་རིན་པོ་ཆེ་མཆིས་པ་རྣམས་གྲོང་ཁྱེར་གྱི་སྒོ་བཞི་དང་ཚོང་འདུས་སུ་སྤུངས་ཏེ་སློངས་མོ་པ་ཐམས་ཅད་ལ་ཡིད་དང་མི་འགལ་བར་སྦྱིན་པ་བགྱིད་པར་འཚལ་ལོ་ཞེས་གསོལ་པ་དང ། རྒྱལ་པོས་སྲས་རྒྱལ་བུ་ལ་ཁྱོད་ཅི་དང་ཅི་དགའ་བ་ཡིད་དང་མི་འགལ་བར་ གནང་ངོ་ཞེས་བསྒོའོ། །དེ་ནས་རྒྱལ་བུས་བློན་པོ་རྣམས་ལ་བསྒོ་ནས། ནོར་དབྱིག་རིན་པོ་ཆེ་རྣམས་ཤིང་རྟས་བསྐྱས་ཏེ། གྲོང་ཁྱེར་གྱི་སྒོ་བཞི་དང ། ཚོང་འདུས་སུ་སྤུངས་ནས་ཕ་རོལ་པོ་འདོད་པ་བཞིན་སྦྱིན་པ་བྱིན་པ་དང ། ཡུལ་ཁམས་ཕྱོགས་བརྒྱད་ཀུན་ཏུ་རྒྱལ་བུའི་ཡོན་ ཏན་གྲགས་པར་གྱུར་པས། ཁ་ཅིག་ནི་དཔག་ཚད་བརྒྱ། ཁ་ཅིག་ནི་དཔག་ཚད་སྟོང ། ཁ་ཅིག་ནི་དཔག་ཚད་ཁྲིའི་ཕ་རོལ་ནས་ལྷགས་ཏེ། ཁ་ཟས་དང་སྐོམ་འདོད་པ་ལ་ནི་ཟས་དང་སྐོམ་བྱིན། གང་གོས་དང་བགོ་བ་འདོད་པ་ལ་ནི་གོས་དང་བགོ་བ་བྱིན། གང་གསེར་དང་དངུལ་དང་རིན་ པོ་ཆེ་འདོད་པ་ལ་ཡང་ཅི་འདོད་པ་བཞིན་ཡིད་དང་མི་འགལ་བར་གང་ཡང་མི་གཏང་བ་མེད་དོ། །དེའི་ཚེ་དེའི་དུས་ན། དགྲ་ཟླར་གྱུར་པའི་རྒྱལ་ཁམས་གཅིག་ཅིག་ཡོད་པ་དེས། རྒྱལ་བུ་སྦྱིན་པ་སྦྱིན་པ་ལ་དགའ་བས་ཕ་རོལ་པོ་ཅི་འདོད་པ་བཞིན་ཡིད་དང་མི་འགལ་བར་ཡོངས་སུ་གཏོང་ངོ་ ཞེས་ཐོས་ནས་བློན་པོ་རྣམས་དང་མཁས་པ་བློ་དང་ལྡན་པ་ཀུན་ལ་སོགས་པ་བསྡུས་ཏེ་འདི་སྐད་ཅེས་བགྲོས་སོ། །ཡུལ་ཡ་བའི་རྒྱལ་པོ་ལ་བལ་གྱི་གླང་པོ་ཆེ་པད་མོའི་སྟེང་ནས་འགྲོ་བ་སུ་ད་ཡ་ཞེས་བྱ་བ་སྟོབས་དང་ལྡན་པ་ཞིག་ཡོད་དེ་དེ་དག་ནམ་དགྲ་ཟླའི་རྒྱལ་ཁམས་གཞན་དང་འཐབ་པའི་ཚེ། 76-1-57b བལ་གྱི་གླང་པོ་ཆེ་དེས་རྟག་ཏུ་རྒྱལ་བར་གྱུར་པས་ན། ཁྱེད་ལས་སུ་ཞིག་དེར་སོང་སྟ་སློང་བར་ནུས་ཞེས་བགྲོས་ན། །བློན་པོ་ལས་གང་ཡང་འགྲོ་ནུས་པ་མ་བྱུང་ངོ ། །དེའི་ནང་ན་བྲམ་ཟེ་མི་བརྒྱད་ཞིག་གིས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ཅག་གིས་སློང་ཞིང་མཆི་བར་འཚལ་ན་ བདག་ཅག་གི་ཚོགས་དང་རྒྱགས་སྦྱོར་ཅིག་ཅེས་གསོལ་པ་དང ། རྒྱལ་པོས་དེའི་ཚོགས་དང་རྒྱགས་སྦྱར་ནས་བྲམ་ཟེ་དེ་དག་ལ་འདི་སྐད་ཅེས་བསྒོའོ། །གལ་ཏེ་ཁྱོད་ཀྱིས་བལ་གླང་དེ་ཁུགས་ཏེ་འོངས་ན་བྱ་དགའ་ཆེར་སྦྱིན་ནོ་ཞེས་གཙིགས་བྱས་སོ། །དེ་ནས་བྲམ་ཟེ་བརྒྱད་པོ་འཁར་བ་ཐོགས་ཏེ་ ལ་ལུང་བགྲོད་ནས་ཡུལ་ཡ་བ་གང་ན་བ་དེར་སོང་ངོ ། །ཡུལ་དེར་ཕྱིན་ནས། རྒྱལ་པོའི་སྒོར་འཁར་བ་ལ་རྐོམ་ཚུགས་བཅས་ཏེ་རྐང་པ་ཡ་གཅིག་གིས་འགྲེང་ཞིང་སྡོད་དོ། །དེ་ནས་རྒྱལ་བུའི་སྒོ་སྲུངས་ཕོ་བྲང་ནང་དུ་སོང་ནས་ཕྱི་རོལ་ན་བྲམ་ཟེ་དག་ཅིག་ལྷགས་ཏེ། འཁར་བ་ལ་རྐོམ་ཚུགས་བཅས་ ནས་རྐང་པ་ཡ་གཅིག་གིས་འགྲེང་ཞིང་སྡོད་དེ། བདག་ཅག་ནི་ལམ་རིང་པོ་ནས་ཆེད་དུ་འདིར་སློང་དུ་འོངས་སོ་ཞེས་མཆིའོ། །རྒྱལ་བུས་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་སྟེ། མོད་ལ་ཕྱི་རོལ་དུ་བྱུང་ནས་བསུས་ཏེ་ཕྱག་བྱས་སོ། །དཔེར་ན་ཕ་དང་བུ་ཕྲད་པ་ཙམ་དུ་གཅིག་ལ་གཅིག་ གིས་སྤྲོ་བའི་ཚིག་གིས་ཁྱེད་གང་ཕྱོགས་ནས་འོངས། ལམ་དུ་ཉོན་མ་མོངས་སམ། ཅི་འདོད་ཅི་སློང་ན་རྐང་པ་ཡ་གཅིག་འགྲེང་ཞེས་དྲིས་སོ། །བྲམ་ཟེ་བརྒྱད་པོས་སྨྲས་པ། བདག་ཅག་ནི་རྒྱལ་བུ་ཁྱོད་སྦྱིན་པ་སྦྱིན་པ་ལ་རབ་ཏུ་དགའ་བས་ཕ་རོལ་པོ་ཅི་སློང་ཡང་ཡིད་དང་འགལ་བར་མི་མཛད་དོ་ ཞེས་རྒྱལ་བུའི་ཡོན་ཏན་ཕྱོགས་མཚམས་བརྒྱད་དང ། ཡར་ནི་སྟེང་གི་གནམ་ལ་ཐུག་མར་ནི་སའི་མཐིལ་ལ་ཐུག་པ་མན་ཅད་དུ་གྲགས་པས་ན། ཁྱོད་ཀྱི་སྦྱིན་པའི་ཡོན་ཏན་ནི་བསམ་གྱིས་མི་ཁྱབ་སྟེ། ཉེ་རིང་ཐམས་ཅད་ཀྱིས་བསྟོད་ཅིང་བསྒྲགས་པས་གང་ཡང་མ་ཐོས་པའམ་མི་ཤེས་པ་མེད་ དེ་ཀུན་གྱིས་བརྗོད་པ་ཡང་བརྫུན་པ་མ་ཡིན་ལ། ད་ལྷའི་སྲས་སུ་གྱུར་པས་ན་ལྷ་ནི་ཅི་སྨྲ་ཡང་བརྫུན་པ་མ་ཡིན་ཏེ། ད་རྒྱལ་བུས་སྦྱིན་པ་མི་མཛད་ན་བདག་ཅག་གི་ཡིད་དང་འགལ་བར་མཛད་དམ། བདག་ཅག་ནི་རྒྱལ་བུ་ལས་མེ་ཏོག་པད་མོའི་སྟེང་ནས་འགྲོ་བ་བལ་གྱི་གླང་པོ་ཆེ་སློང་དུ་འོངས་སོ་ 76-1-58a ཞེས་སྨྲས་པ་དང ། རྒྱལ་བུས་དེ་དག་བལ་གླང་གི་ལྷས་སུ་ཁྲིད་དེ་བལ་གླང་གཞན་ཞིག་བྱིན་ནོ། །བྲམ་ཟེ་བརྒྱད་པོས་སྨྲས་པ། བདག་ཅག་ནི་པད་མོའི་སྟེང་ནས་འགྲོ་བའི་བལ་གྱི་གླང་པོ་ཆེ་སུ་ད་ཡན་འདོད་དོ། །རྒྱལ་བུས་སྨྲས་པ། བལ་གྱི་གླང་པོ་ཆེ་འདི་ནི་ བདག་གི་ཡབ་རྒྱལ་པོ་ལ་གཅེས་ཤིང་གནང་བ་ཡིན་ཏེ། བལ་གླང་འདི་དང་བདག་ཏུ་ཐ་མི་དད་པར་དགོངས་པས་ཁྱེད་ལ་སྦྱིན་དུ་མི་རུང་ངོ ། །གལ་ཏེ་བདག་གིས་ཁྱེད་ལ་བྱིན་ན། རྒྱལ་པོའི་དགོངས་པ་དང་འགལ་བས་གལ་ཏེ་བལ་གླང་འདིའི་རྐྱེན་གྱིས་བདག་ཡུལ་འདི་ནས་སྐྲོད་པར་ འགྱུར་རོ་ཞེས་སྨྲས་ནས་རྒྱལ་བུ་ཡང་འདི་སྙམ་དུ་བསམས་སོ། །བདག་སྔོན་ཡི་དམ་བཅས་པ་ན། ཕ་རོལ་པོ་ཅི་སློང་ཡང་ཡིད་དང་མི་འགལ་བར་བྱའོ་ཞེས་དམ་བཅས་ན། ད་བདག་གིས་སྔར་བསམས་པ་ལས་བཟློག་སྟེ། སྦྱིན་པ་འདི་མ་བྱིན་ན། ཇི་ལྟར་ཡང་བླ་ན་མེད་པ་ མཉམ་སྙོམས་པའི་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་མི་འགྱུར་རོ། །གལ་ཏེ་སྦྱིན་པ་འདི་བྱིན་ན་བླ་ན་མེད་པ་མཉམ་སྙོམས་པའི་སྦྱིན་སེམས་སུ་འགྱུར་རོ་སྙམ་བསམས་ནས། རྒྱལ་བུས་འདི་སྐད་ཅེས་སྨྲས་སོ། །ཤིན་ཏུ་དཀའ་སྟེ་དེ་བཞིན་དུ་སྦྱིན་པར་བྱའོ་ཞེས་སྨྲས་ནས། དྲུང་ ན་འདུག་པའི་གཡོག་ལ་བལ་གྱི་གླང་པོ་ཆེ་ལ་གསེར་དངུལ་གྱི་སྒ་བསྟད་དེ་མྱུར་དུ་ཁྲིད་དེ་ཤོག་ཅིག་ཅེས་བསྒོ་བ་དང ། བལ་གླང་ཁྲིད་དེ་འོངས་ནས་རྒྱལ་བུས་ལག་པ་གཡོན་པས་ནི་ཆུ་སྣོད་ཐོགས་ཏེ། བྲམ་ཟེའི་ལག་པ་བཀྲུས། ལག་པ་གཡས་པས་ནི་བལ་གླང་གི་སྣ་ཐག་ནས་བཟུང་སྟེ་བྲམ་ཟེ་ བརྒྱད་པོ་ལ་བྱིན་པ་དང ། བྲམ་ཟེ་བརྒྱད་པོས་རྒྱལ་བུ་ལ་སྨོན་ལམ་བཏབ་བོ། །སྨོན་ལམ་བཏབ་མ་ཐག་ཏུ་བལ་གྱི་གླང་པོ་ཆེ་ལ་སྤྲུགས་ཏེ་དགའ་བཞིན་དོང་ངོ ། །དེ་ནས་རྒྱལ་བུས་བྲམ་ཟེ་དེ་དག་ལ་ཡང་འདི་སྐད་ཅེས་བསྒོའོ། །ཁྱེད་མྱུར་དུ་མགྱོགས་པར་སོང་ཤིག་།གལ་ཏེ་ཡབ་ རྒྱལ་པོས་གསན་ན་སྙགས་མ་གཏོང་སྟེ་འཕྲོག་ཏུ་འོང་ངོ་ཞེས་བསྒོ་བ་དང ། དེའི་ཚེ་བྲམ་ཟེ་དེ་དག་གིས་དེ་མ་ཐག་ཏུ་མགྱོགས་སུ་དོང་ངོ ། །བློན་པོ་རྣམས་ཀྱིས་རྒྱལ་བུས་བལ་གྱི་གླང་པོ་ཆེ་དགྲ་ཟླ་ལ་བྱིན་ནོ་ཞེས་ཐོས་ནས། ཐམས་ཅད་སྐྲག་སྟེ་ཁྲི་ལས་རྦབ་ཏུ་ལྷུང་ནས་མྱ་ངན་གྱིས་ནོན་ཏེ། 76-1-58b འདི་སྙམ་དུ་ཡུལ་འདི་ན་བལ་གླང་འདི་ལ་ལྟོས་ན། ད་དགྲ་ཟླ་གཞན་ལ་བྱིན་པར་གྱུར་ཏོ་སྙམ་དུ་བསམས་ནས་རྒྱལ་པོ་ག་ལ་བ་དེར་སོང་སྟེ་འདི་སྐད་ཅེས་གསོལ་ཏོ། །རྒྱལ་བུས་ནི་ཕྱིའི་དགྲ་ཐུབ་པའི་བལ་གླང་རིན་པོ་ཆེ་ཕ་རོལ་གྱི་དགྲ་ཟླ་ལ་བྱིན་ནོ་ཞེས་གསོལ་པ་དང ། རྒྱལ་པོ་ཡབ་ཡེད་ཡེད་པོར་གྱུར་པ་ ལས། བློན་པོས་ཡང་འདི་སྐད་ཅེས་གསོལ་ཏོ། །ད་ལྟར་རྒྱལ་པོ་ལ་བལ་གྱི་གླང་པོ་ཆེ་འདི་མངའ་བས་ཆབ་སྲིད་ཆེ་བ་ལགས་ཏེ། བལ་གྱི་གླང་པོ་ཆེ་དེ་ནི་བལ་གླང་དྲུག་ཅུ་སྙེད་ཀྱི་མཐུ་སྟོབས་དང་ལྡན་པ་ལགས་ན་རྒྱལ་བུས་དགྲ་ཟླ་ལ་སྩལ་ཏེ། དགྲ་ཟླས་འཚལ་བས་ཆབ་སྲིད་ཀྱང་སྟོར་དུ་ མཆི་ན་ཇི་ལྟར་མཛད་པའི་རིགས། འདི་ལྟ་བུ་རང་ཉམས་སུ་སྦྱིན་པ་བྱིན་པས་བང་མཛོད་ཀྱང་སྟོངས་ཤིང་ཡུལ་གྱི་སྲིད་དང་བཙུན་མོ་དང་སྲས་ཀྱི་བར་དུ་སྦྱིན་པ་བགྱིད་པར་དོགས་སོ་ཞེས་གསོལ་པ་དང ། རྒྱལ་པོས་དེ་སྐད་ཅེས་སྨྲས་པ་ཐོས་ནས། ལྷག་པར་མི་དགའ་བར་གྱུར་ཏེ། བློན་ པོ་གཞན་ཞིག་བོས་ནས། བློན་པོ་དེ་ལ་རྒྱལ་བུས་བལ་གྱི་གླང་པོ་ཆེ་དགྲ་ཟླ་ལ་བྱིན་པ་བདེན་ནམ་ཞེས་དྲིས་པ་དང ། བློན་པོ་དེས་ཀྱང་བྱིན་པ་བདེན་ནོ་ཞེས་གསོལ་ཏོ། །རྒྱལ་པོས་དེ་སྐད་སྨྲས་པ་ཐོས་མ་ཐག་ཏུ་ཆེར་དངངས་ནས་གདན་ཁྲི་ལས་ལྷུང་སྟེ། མི་དྲན་པར་བརྒྱལ་བར་གྱུར་ པ་ལས་ཆུས་གཏོར་ནས་རིང་ཞིག་ལོན་པ་དང་ཕྱིར་སངས་པར་གྱུར། བཙུན་མོ་ཉི་ཁྲི་སྙེད་ཀྱང་ཐམས་ཅད་མྱ་ངན་གྱིས་ནོན་པར་གྱུར་ཏོ། །དེ་ནས་རྒྱལ་པོ་དང་བློན་པོ་རྣམས་འདུས་ནས། ད་རྒྱལ་བུ་འདི་ལ་ཇི་ལྟར་བྱ་ཞེས་བགྲོས་པ་དང ། དེའི་ནང་ན་བློན་པོ་གཅིག་གིས་ནི་བལ་ གླང་གི་ལྷས་སུ་སོང་བ་ནི་རྐང་པ་གཅག་པར་རིགས། བལ་གླང་བཟུང་བ་ནི་ལག་པ་གཅག་པར་རིགས། །མིག་གིས་བལ་གླང་ལ་བལྟས་ན་ཡང་མིག་དབྱུང་བར་རིགས་ཞེས་གསོལ། ཁ་ཅིག་གིས་ནི་མགོ་བཅད་པར་རིགས་སོ་ཞེས་བློན་པོ་རྣམས་སོ་སོ་ནས་བགྲོས་ཏེ་གསོལ་བའི་ཚིག་རྒྱལ་ པོས་ཐོས་ནས་རབ་ཏུ་མི་དགའ་ཞིང་མྱ་ངན་གྱིས་ནོན་ཏེ། བློན་པོ་རྣམས་ལ་འདི་སྐད་ཅེས་བསྒོའོ། །ངའི་བུ་འདི་ལེགས་པའི་དོན་ལ་མོས་ཏེ། སྦྱིན་པ་ལ་དགའ་བ་ཡིན་ན། ཇི་ལྟར་མཐོ་འཚམ་ཞིང་གཟུང་བར་བྱ། དེའི་ནང་ན་བློན་པོ་གཅིག་གིས་བློན་པོ་སྔ་མ་རྣམས་ཀྱིས་བགྲོས་ 76-1-59a པ་མི་རུང་ངོ་ཞེས་དཔྱས་ནས་འདི་སྐད་ཅེས་གསོལ་ཏོ། །རྒྱལ་པོ་ལ་སྲས་གཅིག་པུ་ཞིག་མངའ་བ་ལ་རབ་ཏུ་སྡུག་ཅིང་གཅེས་པས་རྒྱལ་བུ་རྒྱལ་ཚབ་ལགས་ན། དེ་ལ་མཐོ་འཚམ་ཞིང་བཟུང་གདགས་བྱ་བའི་སེམས་བསྐྱེད་པར་མི་རིགས་ཏེ། བདག་ནི་རྒྱལ་པོ་ཆེན་པོའི་ སྲས་ལ་བཟུང་གདགས་བྱ་བར་མི་གསོལ་གྱི། རྒྱལ་བུ་འདི་ཡུལ་འདི་ནས་སྤྱུགས་ཏེ། ལོ་བཅུ་གཉིས་ཀྱི་བར་དུ་དགོན་པར་སྤངས་ན་སྨ་བབ་ཅིང་ངོ་ཚ་བར་འགྱུར་རོ་ཞེས་གསོལ་པ་དང ། རྒྱལ་པོས་ཀྱང་བློན་པོ་ཆེན་པོ་དེའི་ཚིག་མཉན་ཏོ། །དེ་ནས་རྒྱལ་པོས་རྒྱལ་བུ་རྒྱལ་ཚབ་བཀུག་སྟེ་ འདི་སྐད་ཅེས་སྨྲས་སོ། །ཁྱོད་ཀྱིས་ངའི་བལ་གྱི་གླང་པོ་ཆེ་དགྲ་ཟླ་ལ་བྱིན་པ་བདེན་ནམ་ཞེས་དྲིས་པ་དང ། རྒྱལ་བུས་གསོལ་པ། བདག་གིས་སྩལ་བ་མད་དོ་ཞེས་གསོལ་ཏོ། །རྒྱལ་པོས་སྨྲས་པ། རྒྱལ་བུ་ཁྱོད་ཅིའི་ཕྱིར་ང་ལ་མ་ཞུས་པར་ངའི་བལ་གྱི་གླང་པོ་ཆེ་དགྲ་ཟླ་ལ་བྱིན་ཞེས་དྲིས་པ་ དང ། རྒྱལ་བུས་རྒྱལ་པོ་ལ་འདི་སྐད་ཅེས་གསོལ་ཏོ། །སྔར་ཡབ་རྒྱལ་པོ་དང་དམ་བཅས་པ་ན་སྦྱིན་པ་ཅི་བྱིན་ན་ཡང་མི་འགལ་བར་མཛད་དོ་ཞེས་གསུངས་པས་ད་རྒྱལ་པོ་ལ་མ་ཞུས་པ་ལགས་སོ། །རྒྱལ་པོས་སྨྲས་པ། སྔར་དམ་བཅས་པ་ནི་ནོར་དབྱིག་དང་རིན་པོ་ཆེ་ལ་དབང་བར་ བྱས་ན། བལ་གྱི་གླང་པོ་ཆེ་ཅི་གཏོགས། རྒྱལ་བུས་གསོལ་པ། དེ་དག་ཐམས་ཅད་རྒྱལ་པོ་ལ་མངའ་བའི་དཀོར་ལགས་ན། ཅིའི་སླད་དུ་འདི་བཀོལ་ཏེ་མ་གཏོགས་ཞེས་གསུངས། རྒྱལ་པོས་རྒྱལ་བུ་རྒྱལ་ཚབ་ལ་སྨྲས་པ། ཁྱོད་ནི་རི་དན་ཏིག་ཏུ་ལོ་བཅུ་གཉིས་སྤངས་ཀྱིས་ཡུལ་ འདི་ནས་མྱུར་དུ་བྱུང་སྟེ་སོང་ཤིག་།རྒྱལ་བུས་རྒྱལ་པོ་ལ་གསོལ་པ། བདག་རྒྱལ་པོ་ཆེན་པོས་བཀའ་སྩལ་པའི་བཀའ་ནི་མི་གཅོག་ན། ད་དུང་ཡང་ཞག་བདུན་ཞིག་སྦྱིན་པ་བགྱིས་ཏེ། བདག་གི་བསམ་པ་རྫོགས་ནས་ཡུལ་འདི་ནས་བྱུང་སྟེ་མཆི་བར་འཚལ་ལོ་ཞེས་གསོལ་ལོ། ། རྒྱལ་པོས་སྨྲས་པ། ཁྱོད་ཀྱིས་སྦྱིན་པ་མ་འོས་པར་བྱས་པས་ཡུལ་གྱི་བང་མཛོད་ཀུན་སྟོངས་ཏེ། ངའི་བལ་གླང་རིན་པོ་ཆེ་ཡང་མེད་པར་བྱས་པས་ཁྱོད་སྤངས་པ་ཡིན་ཏེ། ད་ཕྱིར་འདུག་ཅིང་ཞག་བདུན་སྦྱིན་པ་བྱར་མི་གནང་གིས་མྱུར་དུ་སོང་ཤིག་ཅེས་བསྒོའོ། །རྒྱལ་བུས་གསོལ་ 76-1-59b པ། རྒྱལ་པོ་ཆེན་པོའི་བཀའ་བདག་མི་གཅོག་སྟེ། རྒྱལ་པོའི་བཙུན་མོ་ཉི་ཁྲི་སྙེད་ཀྱང་རྒྱལ་པོ་གང་ན་བ་དེར་ལྷགས་ནས། རྒྱལ་བུ་རྒྱལ་ཚབ་ཞག་བདུན་ཞིག་སྦྱིན་པ་བྱིན་ཏེ་ཡུལ་ནས་མཆི་བར་གསོལ་པས་རྒྱལ་པོས་ཀྱང་དེ་བཞིན་དུ་གནང་ངོ ། །དེ་ནས་རྒྱལ་བུ་རྒྱལ་ཚབ་ཀྱིས་སོ་སོར་བྲན་ གཡོག་མངགས་ཏེ། ཕྱོགས་བཞི་ནས་ནོར་རྫས་འདོད་པ་རྣམས་ཕོ་བྲང་སྒོར་འདུས་ཤིག་།ནོར་ཟས་ཐམས་ཅད་ནི་རྟག་པ་དང་བརྟན་དུ་རུང་བ་མ་ཡིན་ཏེ། མཐར་འཇིག་ཅིང་མེད་པའི་ཆོས་ཅན་ནོ་ཞེས་བསྒོ་ནས། ཕྱོགས་བཞི་ནས་སློང་བ་མང་པོ་ལྷགས་པ་ལ་རྒྱལ་བུ་རྒྱལ་ཚབ་ཀྱིས། ཟས་དང་སྐོམ་དང་ནོར་དང་རིན་པོ་ཆེ་རྣམས་ཞག་བདུན་གྱི་བར་དུ་ཡིད་བཞིན་དུ་བྱིན་ནས། དབུལ་ཕོངས་པ་རྣམས་ལོངས་སྤྱོད་དང་ལྡན་ཞིང་ཐམས་ཅད་བདེ་སྐྱིད་པར་བྱས་སོ། །དེ་ནས་རྒྱལ་བུ་རྒྱལ་ཚབ་ཀྱིས་ཆུང་མ་ལ་སྨྲས་པ། བཞིན་བཟངས་ལོངས་ལ་བདག་ཅི་ཟེར་བ་ཉོན་ ཅིག་།རྒྱལ་པོ་ཆེན་པོས་ནི་བདག་ལོ་བཅུ་གཉིས་ཀྱི་བར་དུ་རི་དན་ཏིག་ཅེས་བྱ་བར་སྤངས་སོ། །ཆུང་མས་རྒྱལ་བུས་སྨྲས་པའི་ཚིག་ཐོས་ནས། ཡེད་ཅེས་དངངས་ཏེ་ལངས་ནས་འདི་སྐད་ཅེས་སྨྲས་སོ། །རྒྱལ་བུ་ལ་ཉེས་པ་ཅི་ཞིག་མཆིས་ན། རྒྱལ་པོས་དེ་ལྟ་དེ་ལྟར་མཛད་ པར་གྱུར། རྒྱལ་བུས་སྨྲས་པ། བདག་གིས་སྦྱིན་པ་མ་འོས་པ་ཞིག་བྱས་ཏེ། རྒྱལ་པོའི་བང་མཛོད་ཀྱང་སྟོངས། བལ་གླང་རིན་པོ་ཆེ་ཡང་དགྲ་ཟླ་ལ་བྱིན་ཞེས་རྒྱལ་པོ་དང་བློན་པོ་རྣམས་ཁྲོས་ནས་བདག་སྤངས་པ་ཡིན་ནོ། །བཙུན་མོ་མན་ཏེས་སྨྲས་པ། རྒྱལ་པོའི་ཡུལ་དུ་ ལོ་ལེགས་པ་དང ། རྒྱལ་པོ་ཆེན་པོ་དང ། བློན་པོ་དང་འབངས་ཀྱི་བར་དུ་བདེ་སྐྱིད་པ་དང ། ལོངས་སྤྱོད་ཆེ་བར་སྨོན་ལམ་ལེགས་པར་བཏབ་ལ་བདག་ཅག་རི་ལ་སྒོམ་དུ་འདོང་ངོ ། །རྒྱལ་བུས་སྨྲས་པ། བཞིན་བཟངས་རི་ནི་འཇིགས་པའི་གནས་ཡིན་ཏེ། ཤིན་ཏུ་བྱ་དཀའ་བ་ བསམ་དགོས་ལ་སེང་གེ་དང་སྟག་ལ་སོགས་པ་གཅན་གཟན་མ་རུངས་པ་ཡོད་པས་རབ་ཏུ་འཇིགས་ན་ཁྱོད་ནི་ལོངས་སྤྱོད་མྱོང་བ་ཡིན་པས་ཁྱོད་དེ་ལྟ་བུ་དག་བཟོད་དམ། ཁྱོད་ཕོ་བྲང་གི་ནང་ན་གོས་སུ་ནི་ཕྲ་བ་དང་འཇམ་པ་གྱོན། གནས་སུ་ནི་གུར་དང་ཡོལ་བས་བསྐོར་བ་ན་འདུག་།ཟས་སུ་ 76-1-60a ནི་ཅི་ལ་དགའ་བ་བཞིན་ཞིམ་པ་དང་མངར་བ་ལ་ཟ་ན། རི་ལ་ནི་སྟན་དུ་ནི་རྩཝ་འདིངས། ཟས་སུ་ནི་འབྲས་བུ་ཟ་ན། ཁྱོད་དེ་ལ་མོས་ཤིང་དགའ་བ་ཅི་ཞིག་ཡོད། དེ་མ་ཡིན་པ་གཞན་ཡང་རླུང་དང་ཆར་པ་དང་འབྲུག་དང་སེར་བ་ཆེ་ཞིང་བ་མོ་དང་ཟིལ་པས་མིའི་སྤུ་ཡང་ལངས་པ་ ཙམ་དུ་གྲང་བའི་ཚེ་ན་ནི་གྲང་རབ་ལ་ཚ་བའི་ཚེ་ན་ནི་ཚ་རབ་སྟེ། ཤིང་གི་གསེབ་ན་འདུག་པའི་གནས་སུ་ཡང་མི་རུང་ན། ས་ལ་གཟེ་མ་དང་གསེག་མ་དང་རྡོ་བ་ཡང་མང་ཞིང་སྦྲུལ་གདུག་པ་ཡང་ཡོད་ན། ཁྱོད་དེ་ལྟ་བུ་དག་བཟོད་དམ། མན་ཏེས་སྨྲས་པ། བདག་ལ་མཉེན་ཞིང་འཇམ་པ་དང་གུར་དང་ ཡོལ་བ་དང་མངར་བ་དང་ཞིམ་པས་ཅི་ཞིག་བགྱི། རྒྱལ་བུ་དང་བྲལ་ཞིང་སོ་སོར་མཆི་བ་བདག་མི་བཟོད་དེ། ནམ་དུ་ཡང་རྒྱལ་བུ་དང་མི་འབྲལ་ཞིང་ལྷན་ཅིག་འགྲོགས་པར་དགའོ། །རྒྱལ་པོའི་ཐོག་མར་འགྲོ་བ་ནི་རྒྱལ་མཚན། མེའི་ཐོག་མར་འགྲོ་བ་ནི་དུད་པ། ཆུང་མའི་ཐོག་མར་ འགྲོ་བ་ནི་ཁྱིམ་ཐབ་ཡིན་པས་བདག་ནི་རྒྱལ་བུ་ལ་ཡིད་བརྟན་ཏེ་སྐྱབས་སུ་མཆིའོ། །རྒྱལ་བུ་ནི་བདག་གི་ལྷ་ལགས་ཏེ། རྒྱལ་བུས་ཕྱོགས་བཞི་ནས་འདུས་པ་ལ་སྦྱིན་པ་བྱིན་པའི་ཚེ། བདག་གིས་ཀྱང་རྒྱལ་བུའི་གྲོགས་བགྱིས་པས། ད་རྒྱལ་བུ་ལམ་རིང་དུ་འགྲོ་བ་ལས། གལ་ཏེ་ཕ་ རོལ་པོ་སློང་བ་འོངས་ན་བདག་གིས་དེ་བཞིན་དུ་གྲོགས་བགྱི། རྒྱལ་བུས་སྦྱིན་པ་མཛད་ན་བདག་གི་སྲོག་ལ་བབ་ཀྱང་ཕྱིར་མི་ནུར་བས་ཐེ་ཙོམ་མི་མཛད་དུ་གསོལ། རྒྱལ་བུས་སྨྲས་པ། བདག་ནི་སྦྱིན་པ་ལ་དགའ་བས་ཕ་རོལ་གྱི་སེམས་མི་ཟློགས་ཏེ། ཕ་རོལ་པོས་བདག་ལ་གལ་ཏེ་བུའམ་ཁྱོད་ ཉིད་སློང་བ་འོངས་ན་ཡང་བདག་གིས་མི་གཏོང་མི་ནུས་སོ། །ཅི་སྟེ་བདག་གིས་བསམས་པ་ཁྱོད་ཀྱིས་དེ་བཞིན་མ་བྱས་ན་ནི་བདག་གི་དགེ་བའི་སེམས་འཁྲུགས་པར་གྱུར་པས་འགྲོ་བར་མི་རིགས་སོ། །མན་ཏེས་སྨྲས་པ། རྒྱལ་བུས་སྦྱིན་པ་མཛད་པ་ནི་འཇིག་རྟེན་ན་གང་ཡང་འདི་འདྲ་བ་མེད་པས་ཡིད་ བཞིན་དུ་སྦྱིན་པ་མཛད་དུ་གསོལ། རྒྱལ་བུས་སྨྲས་པ། ཁྱོད་དེ་ལྟར་ནུས་ན་ཤིན་ཏུ་ལེགས་སོ་ཞེས་རྒྱལ་བུ་དང་བཙུན་མོ་དང་སྲས་གཉིས་དང་བཅས་པ་འགྲོགས་ཏེ། ཡུམ་གང་ན་བ་དེར་སོང་ནས་ད་བདག་ཅག་མཆིའོ་ཞེས་མཆི་ཕྱག་བྱས་ནས་ཡུམ་ལ་འདི་སྐད་ཅེས་གསོལ་ཏོ། །ཡུམ་གྱིས་ 76-1-60b སྐབས་སྐབས་སུ་རྒྱལ་པོ་ཆེན་པོ་ལ། ཅི་ནས་དཀར་པོའི་ཆོས་ཀྱིས་ཡུལ་གྱི་སྲིད་བདེ་ཞིང་འབངས་མང་པོ་གཏམས་ལས་མི་གཅད་པར་གྲོས་གདབ་པར་གསོལ་ལོ། །ཡུམ་གྱིས་རྒྱལ་བུ་འགྲོའོ་ཞེས་མཆི་ཕྱག་བྱས་པ་མཐོང་ནས་ལྷག་པར་མྱ་ངན་གྱིས་གདུངས་ཏེ་དྲུང་ན་འདུག་པ་ལ་འདི་ སྐད་ཅེས་སྨྲས་སོ། །ཁོ་མོའི་ལུས་འདི་ནི་རྡོ་བ་ཡིན་པ་ལྟ། སྙིང་ནི་རྡོ་རྗེ་ཡིན་པ་ལྟ་སྟེ། བདག་གིས་རྒྱལ་པོ་ཆེན་པོའི་རིམ་གྲོ་བྱ་བ་ལ་སྐྱོན་མ་བྱུང་ན། ད་ཁོ་མོའི་བུ་གཅིག་པུ་འདི་དང་བྱེ་བྲལ་ཏེ། འགྲོ་ན་ཅིའི་ཕྱིར་ཁོ་མོའི་སྙིང་འདི་གས་ཏེ་ཤི་བར་མ་གྱུར། བུ་འདི་ཁོ་མོའི་ཁོང་པ་ན་འདུག་པ་ ན་སྐྱེད་ཤིང་གི་འདབ་མ་ལྟར་ཉིན་མཚན་ཆེར་སྐྱེས་ཏེ། ད་སྐྱེད་རྫོགས་ནས་ཁོ་མོ་བོར་ཏེ་སོང་བས་ན། བཙུན་མོ་ཐམས་ཅད་ཀྱང་བདག་ལ་སྙིང་ཚིམ་མོ་ཞེས་བརྗོད་ལ་རྒྱལ་པོས་ཀྱང་བཀུར་བར་མི་འགྱུར་ན། གལ་ཏེ་ལྷ་རྣམས་ཀྱིས་བདག་གི་སྨོན་ལམ་བཞིན་མི་འགལ་བར་མཛད་ན་བདག་གི་བུ་ཕྱིར་ ཡུལ་དུ་འཁོར་བར་ཤོག་ཅིག་ཅེས་སྨོན་ལམ་བཏབ་བོ། །དེ་ནས་རྒྱལ་བུ་བཙུན་མོ་དང་སྲས་གཉིས་དང་བཅས་ཏེ། ཡབ་དང་ཡུམ་ལ་མཆི་ཕྱག་བྱས་ཏེ་དོང་ངོ ། །དེའི་ཚེ་བཙུན་མོ་ཉི་ཁྲིས་ནི་སོ་སོ་ནས་མུ་ཏིག་གི་ཆུན་པོ་རེ་རེ་བརྫངས་སོ། །བློན་པོ་ཆེན་པོ་བཞི་སྟོང་གིས་ནི་རིན་པོ་ཆེ་སྣ་བདུན་ ལས་བྱས་པའི་མེ་ཏོག་པད་མོ་རེ་རེ་རྒྱལ་བུ་ལ་བརྫངས་སོ། །དེ་ནས་རྒྱལ་བུ་ཕོ་བྲང་ནང་ནས་བྱུང་སྟེ་གྲོང་ཁྱེར་གྱི་བྱང་སྒོར་ཕྱིན་ནས། རིན་པོ་ཆེ་སྣ་བདུན་གྱི་མེ་ཏོག་དང་དོ་ཤལ་ཡང་རིལ་གྱིས་ཕྱོགས་བཞི་ནས་འདུས་པ་ལ་མ་ལུས་པར་བྱིན་ནོ། །ཡུལ་དེ་ན་གནས་པའི་མི་མང་པོ་ཁྲི་ཕྲག་དུ་མས་ རྒྱལ་བུ་བསྐྱལ་ཏེ། དེ་དག་འདི་སྐད་ཅེས་གཏམ་དུ་བརྗོད་དོ། །རྒྱལ་བུ་འདི་ནི་ཤིན་ཏུ་དགེ་བ་ཡུལ་གྱི་ལྷ་གཉན་ལྟ་བུ་ཡིན་ན། ཅིའི་ཕྱིར་ཡབ་ཡུམ་གྱིས་སྲས་རིན་པོ་ཆེ་འདི་ལམ་རིང་དུ་སྤངས་ཤེས་མཐོང་བ་ཐམས་ཅད་ཀྱིས་ཕངས་སོ་ཞེས་སྨྲས་སོ། །དེའི་ཚེ་རྒྱལ་བུ་གྲོང་ཁྱེར་གྱི་ཕྱི་རོལ་དུ་ སྐྱེད་ཤིང་གི་དྲུང་ན་འདུག་སྟེ། སྐྱེལ་བའི་མི་རྣམས་ལ་འདི་ནས་ཕྱིར་དེངས་ཤིག་ཅེས་སྤྲོ་བའི་ཚིག་སྨྲས་པ་དང ། སྐྱེལ་སྐྱེལ་བ་ཆེ་ཆུང་ཐམས་ཅད་མཆི་མ་བླགས་ཏེ་ངུས་ནས་ཕྱིར་དོང་ངོ ། །དེ་ནས་རྒྱལ་བུས་བཙུན་མོ་དང་སྲས་གཉིས་ཤིང་རྟའི་ནང་དུ་བཞག་ནས། རྒྱལ་བུ་ཉིད་ཀྱིས་ཤིང་ 76-1-61a རྟ་ཁ་ལོ་བསྒྱུར་ཏེ་སོང་བ་ལས་རྒྱངས་ཆད་པར་ཕྱིན་ཏེ། སྐྱེད་ཤིང་གི་དྲུང་ན་ངལ་སོ་ཞིང་འདུག་པ་ལས་བྲམ་ཟེ་དག་ཅིག་ལྷགས་ནས། རྒྱལ་བུ་ལས་ཤིང་རྟ་ཁྲིད་པའི་རྟ་བསླངས་སོ། །རྒྱལ་བུས་སློང་བ་ལ་རྟ་བྱིན་ནས། སྲས་བུ་གཉིས་ཤིང་རྟའི་སྟེང་དུ་བཞག་སྟེ། བཙུན་ མོས་ནི་ཤིང་རྟའི་ཕྱི་ནས་ཕུལ། རྒྱལ་བུས་ནི་མདུན་ནས་དྲངས་ཏེ་རྐང་པས་ཤིང་རྟ་འདྲེན་ཅིང་སོང་བ་ལས། རིང་པོ་མ་ལོན་པར་ཡང་བྲམ་ཟེ་ཞིག་དང་ཕྲད་ནས་ཤིང་རྟ་བསླངས་པ་དང ། རྒྱལ་བུས་ཤིང་རྟ་ཡང་བྲམ་ཟེ་ལ་བྱིན་ནོ། །དེ་ནས་ཡང་སོང་བ་ལས་རིང་པོ་མ་ལོན་པར་ཡང་བྲམ་ཟེ་སློང་བ་དང་ཕྲད་ ནས་རྒྱལ་བུས་དེ་དག་ལ་འདི་སྐད་ཅེས་སྨྲས་སོ། །གལ་ཏེ་བདག་གིས་ཁྱོད་ལ་མ་བྱིན་ན་ནི་ཆགས་ཤིང་སེར་སྣ་བྱེད་པར་གྱུར་ན། ད་ནི་བདག་ལ་ནོར་ཟས་ཟད་དེ་ཅི་ཡང་མེད་དོ་ཞེས་སྨྲས་པ་དང ། བྲམ་ཟེ་ན་རེ་ནོར་རྫས་མེད་ན་ལུས་ལ་གྱོན་པའི་གོས་དེ་ང་ལ་བྱིན་ཅིག་ཅེས་སྨྲས་པ་དང ། རྒྱལ་བུས་ལུས་ ལ་གྱོན་པའི་གོས་རིན་པོ་ཆེ་ཡང་སློང་བ་ལ་བྱིན་ཏེ། གོས་རྙིང་པ་ཞིག་གྱོན་ཏེ་དོང་བ་ལས་རིང་པོ་མ་ལོན་པར་བྲམ་ཟེ་ཡང་སློང་བ་ཞིག་དང་ཕྲད་ནས་རྒྱལ་བུས་བཙུན་མོའི་གོས་བྱིན་ནོ། །དེ་ནས་ཡང་དོང་བ་ལས་རིང་པོ་མ་ལོན་པར་བྲམ་ཟེ་སློང་བ་དང་ཕྲད་ནས། རྒྱལ་བུས་སྲས་གཉིས་ཀྱི་གོས་ཀྱང་བྱིན་ ནོ། །དེ་ལྟར་རྒྱལ་བུས་རྟ་དང་ཤིང་རྟ་དང་ནོར་རྫས་དང་བགོ་བའི་གོས་ཀྱི་བར་དུ་མ་ལུས་པར་ཟད་པར་བྱིན་པ་ཡང ། ཐོག་མ་ནས་འགྱོད་པའི་སེམས་སྐྲའི་ཉག་མ་ཙམ་མམ་བ་སྤུ་ཙམ་ཡང་མེད་དོ། །རྒྱལ་བུས་ནི་སྲས་བུ་ཁུར་དུ་ཐོགས། བཙུན་མོས་ནི་སྲས་མོ་པང་དུ་ཁྱེར་ནས་རྐང་པས་སོང་ཡང་ རྒྱལ་བུ་དང་བཙུན་མོ་དང་སྲས་གཉིས་ཀྱི་བར་དུ་དགའ་བའི་མདངས་དང་བཅས་ཏེ་རི་ག་ལ་བ་དེར་སོང་ངོ ། །རི་དན་ཏིག་ཅེས་བྱ་བར་ཡུལ་ཡ་བ་ནས་ལམ་སོ་རབ་ཏུ་རིང་སྟེ་དཔག་ཚད་ཕྲག་སྟོང་ཞིག་ཡོད་དོ། །དེ་ལྟར་སོང་སོང་བ་ལས་འབྲོག་དགོན་པར་ཕྱིན་ནས། བཀྲེས་པ་དང་སྐོམ་པའི་སྡུག་ བསྔལ་གྱིས་ཉེན་པ་ལས། སུམ་ཅུ་རྩ་གསུམ་གནམ་གྱི་ལྷའི་དབང་པོས་འབྲོག་དགོན་པ་དེར་གྲོང་ཁྱེར་ཁྱིམ་བཟང་པོ་ཚོང་འདུས་དང་ལམ་སྲང་ཡོད་པ། རོལ་མོ་དང་གོས་དང་བཟའ་བ་དང་བཏུང་བ་དང་ལྡན་པ། གྲོང་ཁྱིམ་དེ་ན་མི་དག་གིས་རྒྱལ་བུ་བསུ་བ་དག་སྤྲུལ་ཏོ། །མི་མང་པོས་རྒྱལ་བུ་གྲོང་ 76-1-61b ཁྱིམ་དུ་བསུས་ཏེ། ཟས་དང་སྐོམ་དང་བདེ་བའི་ཡོ་བྱད་ཀྱིས་བསྟབས་པ་དང ། བཙུན་མོས་རྒྱལ་བུ་ལ་སྨྲས་པ། ལམ་རིང་པོར་བགྲོད་པས་རབ་ཏུ་ངལ་ད་ཐལ་བྱུང་འདུག་ཏུ་མི་རུང་ངམ། རྒྱལ་བུས་སྨྲས་པ། ཡབ་རྒྱལ་པོས་བདག་ཅག་ལ་རི་དན་ཏིག་ཏུ་སོང་ཤིག་ཅེས་བཀའ་སྩལ་ ཏེ། ད་འདིར་འདུག་པར་གྱུར་ན་ཡབ་རྒྱལ་པོའི་བཀའ་དང་འགལ་བར་གྱུར་ཏེ་བུ་སྲི་ཞུ་ཅན་མ་ཡིན་ནོ་ཞེས་གྲོང་ཁྱེར་དེ་ནས་བྱུང་སྟེ་མོད་ལ་སོང་ངོ ། །དེ་ལྟར་སོང་བ་ལས་རིང་པོ་མ་ལོན་པར་རི་དན་ཏིག་གི་རིའི་དྲུང་དུ་ཕྱིན་པ་དང ། རི་དེའི་དྲུང་ན་ཆུ་ཆེན་པོ་ཤིན་ཏུ་ཟབ་པ་རྒལ་བར་མི་ཐར་བ་ཞིག་དང་ ཕྲད་དོ། །དེ་ནས་བཙུན་མོས་རྒྱལ་བུ་ལ་རེ་ཞིག་འདིར་བསྡད་དོ། །ཆུ་ཆེན་པོ་བྲི་ནས་རྒལ་ཏེ་འདོང་ངོ་ཞེས་སྨྲས་པ་དང ། རྒྱལ་བུས་སྨྲས་པ། ཡབ་རྒྱལ་པོས་བདག་ཅག་ལ་རི་དན་ཏིག་ཏུ་སོང་ཤིག་ཅེས་བཀའ་སྩལ་པས། ད་འདིར་འདུག་པར་གྱུར་ན་རྒྱལ་པོའི་བཀའ་དང་འགལ་ཏེ། བུ་སྲི་ ཞུ་ཅན་མ་ཡིན་ནོ་ཞེས་སྨྲས་ནས་རྒྱལ་བུ་དེ་མ་ཐག་ཏུ་བྱམས་པའི་སེམས་ཀྱིས་ཏིང་ངེ་འཛིན་དུ་ཞུགས་པ་དང ། མོད་ལ་ཆུའི་ནང་ནས་རི་ཆེན་པོ་ཞིག་བྱུང་ནས་ཆུའི་རྒྱུན་བཅད་དོ། །དེ་ནས་རྒྱལ་བུ་དང་བཙུན་མོ་གོས་བརྗེས་ཏེ། ཆུ་རྒལ་ནས་ཕར་རྒལ་མ་ཐག་ཏུ་རྒྱལ་བུ་ཡང་འདི་སྙམ་དུ་ བསམས་སོ། །ཐལ་བྱུང་སོང་བར་གྱུར་ན་ཆུ་འཁྱིལ་པ་འདིས་སེམས་ཅན་མང་དུ་འཆི་སྟེ། གྲོག་སྦུར་མང་པོ་ཆུས་ཁྱེར་བར་འགྱུར་རོ་སྙམ་བསམས་ནས། རྒྱལ་བུ་ཕྱིར་ཆུ་ལ་བལྟས་ཏེ་འདི་སྐད་ཅེས་སྨྲས་སོ། །ཆུ་ཁྱོད་སྔ་མཁོ་བཞིན་དུ་རྒྱུན་དུ་འབབ་ཅིང་གལ་ཏེ་བདག་འདོད་པ་ཞིག་འོངས་ ན་ཡང་ཐར་བར་བྱོས་ཤིག་ཅེས་སྨྲས་མ་ཐག་ཏུ་ཆུ་ཡང་སྔ་མཁོ་བཞིན་དུ་འབབ་པར་གྱུར་ཏོ། །དེ་ནས་སོང་བ་ལས་རི་དན་ཏིག་ཏུ་ཕྱིན་ནས་རྒྱལ་བུས་རི་དེ་ལ་བལྟས་ནས། རི་དེ་རད་རོད་དང་ཟད་ཟེད་དུ་འདུག་ལ་ཤིང་མང་པོ་རབ་ཏུ་རྒྱས་ཤིང་བྱ་སྣ་ཚོགས་ཀྱང་སྙན་པའི་སྒྲ་འབྱིན། འབབ་ཆུ་དང་ ཆུ་མིག་དང་མཚེའུ་དང་ལྟེང་ཀར་ལྡན་ཏེ་ཆུ་ནི་མངར། འབྲས་བུ་ནི་ཞིམ། ཆུ་བྱ་དང་ངང་ངུར་དང་འཇོལ་མོ་དང་རི་སྐེགས་ལ་སོགས་པ་བྱ་རྣམ་པ་སྣ་ཚོགས་དག་ཀྱང་གནས་པ་མཐོང་ནས་རྒྱལ་བུས་བཙུན་མོ་ལ་ཡང་འདི་སྐད་ཅེས་སྨྲས་སོ། །རི་འདི་ལ་བལྟས་ན་ཤིང་དང་ཚལ་གནམ་ལ་རེག་པ་ 76-1-62a ཙམ་དུ་སྐྱེས་ན་ཡང ། བརྔས་པའམ་བཅད་པ་མེད་པས་ཆུ་མིག་ཞིམ་པོ་ལ་འཐུང་ཞིང་འབྲས་བུ་མངར་བ་ཟ་སྟེ། རི་འདི་ལ་སྒོམ་པ་དག་ཡོད་པས་འདིར་གནས་པར་བྱའོ། །རྒྱལ་བུ་རི་དེ་ལ་ཕྱིན་པ་ན། རི་དེ་ལ་གནས་པའི་འདབ་ཆགས་བྱ་དང་གཅན་གཟན་དང་རི་དགས་ ཐམས་ཅད་རབ་ཏུ་དགའ་ནས་རྒྱལ་བུ་བསུས་སོ། །དེའི་ཚེ་རི་དེ་ལ་སྒོམ་པའི་དགེ་སློང་ཨ་ཚུ་ཏ་ཞེས་བྱ་བ་ལོ་ལྔ་བརྒྱ་ལོན་པ། ཡོན་ཏན་མཆོག་དང་ལྡན་པ་ཞིག་གནས་ཏེ། རྒྱལ་བུ་དེའི་དྲུང་དུ་སོང་ནས། ཕྱག་བྱས་ཏེ་ཕྱོགས་གཅིག་ཏུ་འདུག་ནས་འདི་སྐད་ཅེས་སྨྲས་སོ། །རི་འདི་ལ་གང་ཕྱོགས་ ན་འབྲས་བུ་དང་ཆུ་མིག་བཟང་པོར་ལྡན་པ་གནས་སུ་རུང་བ་ཅི་ཡོད་ཅེས་དྲིས་པ་དང ། ་ཚུ་ཏས་སྨྲས་པ། རི་འདི་གནས་ཐམས་ཅད་དུ་བསོད་ནམས་དང་ལྡན་པའི་ས་གཞི་ཡིན་པས་གང་དུ་གནས་ཀྱང་རུང་སྟེ། རི་འདི་ནི་ཤིན་ཏུ་དབེན་པའི་གནས་གཙང་མ་ཡིན་པས་ན་ཅི་རྒྱལ་བུ་ཁྱོད་ཆུང་ མ་དང་བུ་སྨད་དུ་བཅས་ཏེ་ཆོས་སློབ་ཏུ་འོངས་སམ། དེ་ལ་རྒྱལ་བུས་སྨྲ་མ་ཁོམ་པར་བཙུན་མོ་མན་ཏེས་སྨྲས་པ། དགེ་སློང་ལ་འདི་སྐད་ཅེས་སྨྲས་སོ། །བཙུན་པ་རི་ལ་ལམ་བསྒོམས་ནས་ཇི་སྲིད་ཅིག་ལོན། དགེ་སློང་གིས་སྨྲས་པ། རི་འདིར་ཕྱིན་ནས་ལོ་བཞི་བརྒྱའམ་ལྔ་བརྒྱ་ ཙམ་ལོན་ནོ། །བཙུན་མོ་མན་ཏེས་སྨྲས་པ། ད་དུང་བདག་དང་བདག་གི་བར་དུ་འཛིན་ན་ནམ་ཞིག་ལམ་ཐོབ་པར་འགྱུར། དེ་སྲིད་དུ་རི་ལ་གནས་ཀྱང་རྡོ་ཤིང་དང་ཐ་མི་དད་དེ་བདག་དང་བདག་གིར་མི་འཛིན་ན་གདོད་ལམ་ཐོབ་པར་འགྱུར་རོ་ཞེའོ། །དགེ་སློང་གིས་སྨྲས་པ། བདག་གིས་ ཡང་དག་པར་དོན་དེ་ལྟ་བུ་མི་ཤེས་སོ། །དེ་ནས་རྒྱལ་བུས་དགེ་སློང་ལ་སྨྲས་པ། བཙུན་པ་ཡུལ་ཡ་བའི་རྒྱལ་བུ་རྒྱལ་ཚབ་དོན་གྲུབ་ཅེས་བྱ་བ་ཐོས་སམ། དགེ་སློང་གིས་སྨྲས་པ། བདག་གིས་རྒྱུན་དུ་ཐོས་ཀྱི་མཐོང་བ་ནི་མ་ཡིན་ནོ། །རྒྱལ་བུས་སྨྲས་པ། བདག་ནི་རྒྱལ་བུ་རྒྱལ་ཚབ་དོན་གྲུབ་ ཅེས་བྱ་བ་ཡིན་ནོ། །དགེ་སློང་གིས་རྒྱལ་བུ་ཁྱོད་གར་འགྲོ་ཅི་འདོད་ཅེས་དྲིས་པ་དང ། རྒྱལ་བུས་སྨྲས་པ། བདག་ནི་ཐེག་པ་ཆེན་པོའི་ལམ་འདོད་དོ་ཞེས་སྨྲས་སོ། །དགེ་སློང་གིས་སྨྲས་པ། རྒྱལ་བུའི་ཡོན་ཏན་དང་སྦྱར་ན། རིང་པོར་མི་ཐོགས་པར་ཐེག་པ་ཆེན་པོའི་ལམ་ཐོབ་པར་འགྱུར་ཏེ། 76-1-62b རྒྱལ་བུ་བླ་ན་མེད་པའི་བྱང་ཆུབ་མངོན་པར་སངས་རྒྱས་པ་ན། བདག་ནི་ཉེ་གནས་རྫུ་འཕྲུལ་གྱི་མཆོག་ཏུ་གྱུར་ཅིག་ཅེས་སྨྲས་ནས། རྒྱལ་བུ་ཁྲིད་དེ་འདུག་པའི་གནས་བསྟན་ཏོ། །དེ་ནས་དགེ་སློང་གིས་ཆོས་བཞིན་དུ་རྒྱལ་བུའི་སྐྲ་སླས་ནས་མདུད་པ་བོར་ནས། ཟས་སུ་ནི་ཤིང་གི་འབྲས་ བུ་ཤིང་ཏོག་ཟ། སྐོམ་དུ་ནི་ཆུ་མིག་འཐུང་ངོ ། །དེ་ནས་རྒྱལ་བུས་ཤིང་དང་རྩཝ་བསྡུས་ཏེ། བདག་འདུག་པའི་རྩཝའི་སྤྱིལ་པོ་ཆུང་ངུ་མ་གཅིག་བྱས། བཙུན་མོ་མན་ཏེ་བུ་མིང་སྲིང་གཉིས་འདུག་པའི་སྤྱིལ་པོ་རེ་རེ་ཡང་བྱས་སོ། །དེའི་ཚེ་ན་ཁྱེའུའི་མིང་ནི་ཡ་རི་ཞེས་བྱ་སྟེ། ལོ་བདུན་ལོན་ནས་ གོས་རང་གྱོན་ནུས་ཏེ། ཕའི་ཕྱི་བཞིན་དུ་འགྲོའོ། །བུ་མོའི་མིང་ནི་གེ་ནོ་ཡན་ཞེས་བྱ་སྟེ་ལོ་དྲུག་ལོན་པས། རི་དགས་ཀྱི་པགས་པ་གྱོན་ཅིང་མའི་ཕྱི་བཞིན་འགྲོའོ། །རི་དེ་ལ་གནས་པའི་གཅན་གཟན་དང ། རི་དགས་དང ། འདབ་ཆགས་བྱ་ལ་སོགས་པ་ཐམས་ཅད་ཀྱང་རབ་ཏུ་ དགའ་ནས། རྒྱལ་བུ་ལ་རྟེན་ཅིང་གནས་སོ། །རྒྱལ་བུ་རི་དེ་ལ་ཕྱིན་ནས་ཞག་གཅིག་ལོན་པ་དང ། སྔོན་སྐམས་པའི་ཆུ་མིག་དང ། རྫིང་ཡང་ཆུས་གང་བར་གྱུར། སྐྱེད་ཤིང་སྐམས་པ་རྣམས་ཀྱང་ཐམས་ཅད་མེ་ཏོག་དང་འདབ་མ་སྐྱེས་པར་གྱུར་ཏེ། སྲིན་བུ་གདུག་པ་རྣམས་ཀྱང་ མེད་པར་གྱུར་ནས། གཅན་གཟན་གཅིག་ལ་གཅིག་ཟ་བ་ཡང་སོ་སོ་ནས་རྩཝ་ལ་ཟ་བར་གྱུར། འབྲས་བུའི་ཤིང་རྣམས་ཀྱང་རྒྱས་ཤིང་བཟང་པོར་གྱུར། བྱ་སྣ་ཚོགས་སྙིང་རྗེའི་སྐད་ཀྱི་སྒྲ་སྐད་སྙན་པ་འབྱིན་པར་གྱུར་ཏོ། །བཙུན་མོ་མན་ཏེས་ནི་ཤིང་གི་འབྲས་བུ་དང་ཤིང་ཏོག་བརྔས་ ཤིང་རྒྱལ་བུ་ལ་ཕུལ་ཏེ། སྲས་མིང་སྲིང་གཉིས་ཀྱང་སྙོད་དོ། །སྲས་བུ་མིང་སྲིང་གཉིས་ནི་སྐབས་སྐབས་སུ་ཕ་མ་གཉིས་དང་བྲལ་ཏེ། ཧ་ཅང་ཡང་མི་རིང་བའི་ཆུ་མིག་འགྲམ་དག་ཏུ་གཅན་གཟན་ནམ་རི་དགས་དག་དང་ལྷན་ཅིག་རྩེ་སྟེ། བར་འགའ་ཞག་ལོན་པར་ཡང་རྩེའོ། །ཕྱིས་ དུས་གཞན་ཞིག་ན་སྲས་ཁྱེའུ་ཡ་རི་སེང་གེ་ལ་ཞོན་པ་ལས། སེང་གེ་རྒལ་ནས་རྡབ་ཅིག་བསྣུན་པས་སྲས་བུའི་གདོང་པ་ཅུང་ཟད་སྣད་དེ་ཁྲག་བྱུང་བ་ལས། སྤྲེའུ་ཞིག་གིས་ཤིང་གི་ལོ་མ་བླངས་ཏེ་གདོང་གི་ཁྲག་ཕྱིས་ནས་ཆུ་འགྲམ་དུ་ཁྲིད་དེ་ཁྲག་བཀྲུས་པ་ཡང་རྒྱལ་བུས་རྒྱང་མ་ནས་མཐོང་ངོ ། ། 76-1-63a དེའི་ཚེ་ཡུལ་ཀཻ་ལཻ་ཞེས་བྱ་བར་བྲམ་ཟེ་དབུལ་པོ་ཞིག་ལོ་བཞི་བཅུ་ལོན་ནས་ཆུང་མ་བླངས་སོ། །ཆུང་མ་ནི་རབ་ཏུ་བཟང་ཞིང་སྡུག་ལ། བྲམ་ཟེ་དེ་ནི་རབ་ཏུ་མི་སྡུག་པའི་མཚན་མ་བཅུ་གཉིས་རྫོགས་པར་ཡོད་དེ། དེའི་ལུས་མདོག་སོལ་བ་ལྟར་གནག་ལ་གདོང་ ལ་འབུར་འབུར་པོ་གསུམ་ཡོད་པ། སྣ་འཁྱོར་ཞིང་མིག་གཉིས་ཤེལ་ལྟར་སྔོ་བ། གདོང་གཉེར་མ་ཅན་ལ་མ་མཆུ་འཕྱང་བ། སྨྲ་བའི་སྐད་མི་སྙན་པ། གསུས་པ་ཆེ་བ། རྐུབ་འབུར་བ། རྐང་པ་གཉིས་གྱོལ་བ། མགོ་ཤུ་བ་ཅན་ལ་སྐྲ་མེད་པ། འདྲེ་ལྟར་མི་སྡུག་པ་ཞིག་ སྟེ། ཆུང་མས་ཀྱང་མཐོང་མི་འདོད་པ་ཙམ་དུ་ཤི་ཡང་སླ་ཞེས་རྒྱུན་དུ་དམོད་མོ་བྱེད་པ་ཞིག་ཡོད་དོ། །དུས་གཞན་ཞིག་ན་ཆུང་མ་དེ་ཆུ་ཆུར་སོང་སོང་བ་ལས། ལམ་དུ་ཁྱོ་ག་གཞོན་ནུ་མ་དག་ཅིག་དང་ཕྲད་ནས་ཁྱོ་ག་རྣམས་ཀྱིས་ཁྱིམ་ཐབ་ཀྱི་གཟུགས་འདི་འདྲའོ་ཞེས་ཅོ་འདྲི་ཞིང་ བགད་ནས། ཁྱོད་ནི་དཔེ་མེད་པར་བཟང་ཞིང་སྡུག་ན། ཅི་ལྟར་འདི་འདྲ་བའི་ཆུང་མ་བྱེད་ནུས་ཅེས་སྨྲས་པ་དང་ཆུང་མས་ཁྱོ་ག་དེ་དག་ལ་འདི་སྐད་ཅེས་སྨྲས་སོ། །རྒན་པོའི་མགོ་ནི་ཤིང་ལ་བ་མོ་ཆགས་པ་ལྟར་སྐྱ་བ་དེ་ནང་ནུབ་ཏུ་ཤི་བར་དགའ་ན་ཤིར་མི་བཏུབ་ཇི་ལྟར་བྱ། དེ་ ནས་ཆུ་སྣོད་ཐོགས་ནས་ཕྱིར་ཁྱིམ་དུ་འོངས་ཏེ།ཁྱིམ་ཐབ་ལ་འདི་སྐད་ཅེས་སྨྲས་སོ། །བདག་ཆུ་ཆུར་སོང་སོང་བ་ལས། ལམ་དུ་ཁྱོ་ག་གཞོན་ནུ་དག་ཅིག་དང་ཕྲད་དེ། དེ་དག་བདག་ལ་ཅོ་འདྲི་ཞིང་བགད་ནས། ད་ཁྱོད་ཀྱིས་བཀོལ་བའི་བྲན་ཁོལ་ཡོད་ན་ཆུ་ཆུ་ཡང་མི་དགོས་ ཏེ། གཞན་གྱིས་དཔྱས་པར་ཡང་མི་འགྱུར་རོ། །ཁྱིམ་ཐབ་ཀྱིས་སྨྲས་པ། བདག་ཅག་ནི་ཤིན་ཏུ་ཡང་དབུལ་ཕོངས་པ་ཡིན་ན་བྲན་ཁོལ་ག་ལས་རྙེད་པར་འགྱུར། ཆུང་མས་སྨྲས་པ། གལ་ཏེ་བདག་གི་ཕྱིར་བྲན་ཁོལ་མ་བཙལ་ན་བདག་ཀྱང་འགྲོ་སྟེ། ཁྱོད་དང་ལྷན་ཅིག་མི་གནས་སོ་ ཞེས་ཆུང་མས་ཡང་འདི་སྐད་ཅེས་སྨྲས་སོ། །ཁོ་མོས་ཐོས་ན། རྒྱལ་བུ་དོན་གྲུབ་སྦྱིན་པ་མ་འོས་པར་བྱིན་པས་ཡབ་རྒྱལ་པོས་རི་དན་ཏིག་ཅེས་བྱ་བར་སྤངས་སོ། །རྒྱལ་བུ་དེ་ལ་བུ་ཁྱེའུ་གཅིག་དང་བུ་མོ་གཅིག་ཡོད་ཅེས་གྲག་གིས། ཁྱོད་དེ་སློང་དུ་སོང་ཤིག་།ཁྱིམ་ཐབ་ཀྱིས་སྨྲས་པ། 76-1-63b རི་དན་ཏིག་ཅེས་བྱ་བ་འདི་ནས་དཔག་ཚད་དྲུག་སྟོང་ལྷག་ཙམ་གཅིག་གི་ལམ་སོ་ཡོད་ལ། སྔོན་ལ་ལུང་བགྲོད་ཀྱང་མ་མྱོང་ན་ད་ཅི་ལྟར་བགྲོད་པར་བྱ། ཆུང་མས་སྨྲས་པ། བདག་གི་ཕྱིར་བྲན་ཁོལ་མ་བཙལ་ན་བདག་འགེགས་ཏེ་འཆིའོ་ཞེས་སྨྲས་པ་དང ། ཁྱིམ་ཐབ་ཀྱིས་སྨྲས་པ། ཉེས་ ན་ཁོ་བོ་ནི་གཅིག་གིས་བསད་ཀྱང་སླའོ། །ཁྱོད་ཤི་བར་མི་འདོད་དོ་ཞེས་སྨྲས་ནས། ཁྱོད་ཀྱིས་བདག་སློང་དུ་འགྲོ་བར་དད་ན་ཁོ་བོའི་རྒྱགས་དང་དགོས་པ་སྦྱོར་ཅིག་ཅེས་བསྒོའོ། །ཆུང་མས་སྨྲས་པ། ད་སོང་ཤིག་རྒྱགས་དང་དགོས་པ་ཡང་མེད་དོ་ཞེས་སྨྲས་ནས། བྲམ་ཟེས་རྒྱགས་ རང་སྦྱར་ཏེ་རྐང་པས་ལམ་དུ་ཞུགས་ཏེ་སོང་ངོ ། །དེ་ནས་བྲམ་ཟེ་ཡུལ་ཡ་བ་ཞེས་བྱ་བ་ག་ལ་བ་དེར་སོང་སྟེ་དེར་ཕྱིན་པ་དང ། རྒྱལ་པོའི་ཕོ་བྲང་གི་སྒོར་འོངས་ནས་སྒོ་སྲུང་བ་ལ་རྒྱལ་བུ་དོན་གྲུབ་ད་ལྟར་ག་ལ་འདུག་ཅེས་དྲིས་པ་དང ། སྒོ་སྲུང་དེ་ཕོ་བྲང་གི་ནང་དུ་སོང་ནས་རྒྱལ་པོ་ལ་ད་ ལྟར་ཕྱི་རོལ་ན་བྲམ་ཟེ་ཞིག་རྒྱལ་བུ་དོན་གྲུབ་ག་རེ་ཞེས་འདྲིའོ། །རྒྱལ་པོས་རྒྱལ་བུ་དོན་གྲུབ་ག་རེ་ཞེས་སྨྲ་བའི་ཚིག་ཐོས་པ་ཙམ་གྱིས་སེམས་འཁྲུག་ཅིང་ཁྲོས་ནས། འདི་སྙམ་དུ་འདི་འདྲ་བ་ཤ་སྟག་གི་ཕྱིར་ངའི་སྲས་སྤངས་པར་གྱུར་ན། ད་ཡང་སློང་དུ་འོངས་སྙམ་བསམས་ནས། དཔེ་འདི་སྐད་ཅེས་བརྗོད་པར་གྱུར་ཏོ། །དཔེར་ན་མེ་ནི་རང་བཞིན་གྱིས་ཚ་ཞིང་འབར་བ་ཡིན་ན། དེའི་སྟེང་དུ་ཤིང་བསྣན་པ་དང་འདྲ་སྟེ་བདག་ཀྱང་ད་ལྟར་མྱ་ངན་གྱིས་གདུངས་ཏེ། མེ་དང་འདྲ་བ་ལས་ད་ཡང་རྒྱལ་བུ་ག་རེ་ཞེས་འདྲི་བ་ནི་མེ་ལ་ཤིང་གིས་བསྣན་པ་དང་འདྲའོ། །བྲམ་ཟེས་ གསོལ་པ། བདག་ནི་ལམ་རིང་པོ་ནས་འོངས་པ་ཡང་རྒྱལ་བུ་རྒྱལ་ཚབ་མིའི་ཡིད་དང་མི་འགལ་བར་སྦྱིན་པ་བགྱིད་དོ་ཞེས་མིང་ཡང་སྙན་པ་སྟེང་དུ་གནམ་ལ་ཐུག་།འོག་ཏུ་ནི་ཆུ་མིག་གི་གཏིང་ལ་ཐུག་གི་བར་དུ་གྲགས་པ་བདག་ལམ་རིང་པོ་ནས་རེ་བ་ཡོད་པས་འོངས་སོ། །རྒྱལ་པོས་ སྨྲས་པ་རྒྱལ་བུ་དོན་གྲུབ་ནི་ད་ལྟར་རི་ཤིན་ཏུ་དབེན་པ་ན་གནས་ཏེ། རབ་ཏུ་དབུལ་ཞིང་ཅི་ཡང་མེད་ན། ཁྱོད་ལ་ཅི་ཞིག་སྦྱིན་དུ་ཡོད། བྲམ་ཟེས་སྨྲས་པ། རྒྱལ་བུ་ལ་ཅི་ཡང་མེད་ཀྱང་བདག་ཕྲད་པར་དགའོ་ཞེས་སྨྲས་པ་དང ། རྒྱལ་པོས་ཀྱང་གཞན་ཞིག་ལ་ལམ་སྟོན་ཅིག་ཅེས་ 76-1-64a བསྒོའོ། །དེ་ནས་བྲམ་ཟེ་དེ་སོང་སོང་བ་ལས་དན་ཏིག་གི་རི་དྲུང་དུ་ཆུ་ཆེན་པོ་ཞིག་ཡོད་པར་ཕྱིན་ནས། རྒྱལ་བུ་འབའ་ཞིག་བསམས་ཤིང་ཡིད་ལ་བྱས་པས་ཆུའི་ཕ་རོལ་ཏུ་ཕྱིན་པར་གྱུར་ཏོ། །དེ་ནས་བྲམ་ཟེ་རི་དེ་ལ་ཕྱིན་ནས་ཐོག་མ་རྔོན་པ་ཞིག་དང་ཕྲད་དེ་རྔོན་ པ་དེ་ལ་ཁྱོད་རི་ལ་རྒྱལ་བུ་དོན་གྲུབ་ཅེས་བྱ་བ་མཐོང་ངམ་ཞེས་དྲིས་པ་དང ། རྔོན་པ་དེས་ཀྱང་རྒྱལ་བུ་སྦྱིན་པ་ལ་དགའ་བས་བྲམ་ཟེ་འདི་དག་གི་ཕྱིར་རི་ལ་སྤངས་པར་ཤེས་པས། རྔོན་པ་དེས་ཀྱང་བྲམ་ཟེ་བཟུང་ནས་ཤིང་ལ་བཅིངས་ཏེ་བརྡེགས་པས་ལུས་ལ་རྨ་ཡང་བྱུང་ངོ ། ། རྔོན་པས་ཡང་སྨྲས་པ། ཁྱོད་རྒྱལ་བུ་དྲིས་ཏེ་ཅི་ཞིག་བྱ་མདའ་འཕང་ངོ་ཞེས་བྱས་པ་དང ། བྲམ་ཟེ་དེ་འདི་སྙམ་དུ། ད་ནི་འདིས་བདག་གསོད་ཡང་དག་ན་བརྫུན་ཞིག་བྱའོ་སྙམ་བསམས་ནས། རྔོན་པ་ལ་ཁྱོད་བདག་ལ་འདྲི་ན་ཅི་ཉེས་ཅེས་སྨྲས་སོ། །དེ་ནས་རྔོན་པས་འོ་ ན་ཅི་ཞིག་སྨྲ་བར་སེམས་ཞེས་དྲིས་པ་དང ། བྲམ་ཟེས་བརྫུན་ཚིག་འདི་སྐད་ཅེས་སྨྲས་སོ། །རྒྱལ་པོ་ཡབ་རྒྱལ་བུ་མཐོང་བར་དགའ་བས་བདག་འདིར་རྒྱལ་བུ་ཕྱིར་འགུགས་སུ་འོངས་སོ་ཞེས་སྨྲས་མ་ཐག་ཏུ་རྔོན་པས་ཀྱང་བཀྲོལ་ཏེ་བཏང་ནས་སྔར་མ་རྟོགས་ཏེ་རྒྱུས་མ་ཤེས་སོ་ཞེས་ བཟོད་པ་གསོལ་ནས་རྒྱལ་བུ་གང་ན་འདུག་པའི་གནས་བསྟན་ཏོ། །དེ་ནས་བྲམ་ཟེ་དེ་རྒྱལ་བུའི་ཐད་དུ་ཕྱིན་པ་དང ། རྒྱལ་བུས་ཀྱང་རྒྱང་མ་ནས་བྲམ་ཟེ་འོངས་པ་མཐོང་ནས་རབ་ཏུ་དགའ་བའི་སེམས་སྐྱེས་ཏེ་བསུས་ནས་གུས་པར་ཕྱག་བྱས་ཏེ། ཁྱོད་ག་ལས་འོངས་ལམ་དུ་ཉོན་མོངས་ཤིང་ ངལ་བར་མ་གྱུར་ཏམ་ཅི་འདོད་ཅེས་སྤྲོ་བའི་གཏམ་བྱས་སོ། །བྲམ་ཟེས་སྨྲས་པ། བདག་ལམ་རིང་པོ་ནས་འོངས་ཏེ་ལུས་ཐམས་ཅད་རྩེ་ཞིང་ངལ་ཏེ་བཀྲེས་སྐོམ་མོ་ཞེས་སྨྲས་པ་དང ། རྒྱལ་བུས་ནང་དུ་ཁྲིད་ནས་སྟན་ལ་འདུག་ཏུ་བཅུག་སྟེ། ཤིང་ཐོག་དང་ཤིང་གི་འབྲས་བུ་དང་བཏུང་ བའི་སྐོམ་མདུན་དུ་ཕབ་ནས། བྲམ་ཟེས་ཀྱང་སྐོམ་འཐུངས་ཤིང་ཐོག་ཟོས་ཏེ། ཐལ་བྱུང་རྒྱལ་བུ་ལ་འདི་སྐད་ཅེས་སྨྲས་སོ། །བདག་ནི་ཡུལ་ཀཻ་ལཻ་ཞེས་བྱ་བའི་ཡུལ་མི་ཡིན་ཏེ། སྔ་ཞིག་ནས་རྒྱལ་བུ་སྦྱིན་པ་ལ་དགའོ་ཞེས་ཕྱོགས་བཅུར་གྲགས་ཤིང་ཐོས་པས། བདག་ནི་དབུལ་ 76-1-64b ཕོངས་ཏེ་རྒྱལ་བུ་ལ་སློང་དུ་འོངས་སོ། །རྒྱལ་བུས་སྨྲས་པ། བདག་ལ་ཡོད་པ་ལས་ཁྱོད་ལ་མ་བྱིན་ན་ནི་ཆགས་ཤིང་སེར་སྣ་བྱེད་པར་ཡང་འགྱུར་ན་བདག་ལ་ཅི་བདོག་པ་སྔར་བཏང་བས་ད་ནི་ཅི་ཡང་སྦྱིན་དུ་མེད་དོ། །བྲམ་ཟེས་སྨྲས་པ། དེ་ལྟར་ནོར་རྫས་སྦྱིན་དུ་མེད་ན་ཁྱོད་ཀྱི་བུ་ མིང་སྲིང་གཉིས་བདག་རྒད་པོའི་འཁོལ་བའམ་བྲན་དུ་བྱིན་ཅིག་ཅེས་དེ་བཞིན་དུ་ལན་གཉིས་ལན་གསུམ་གྱི་བར་དུ་སྨྲས་ནས། རྒྱལ་བུས་ཀྱང་ཁྱོད་ལམ་རིང་པོ་ནས་འོངས་ལ། བདག་གི་བུ་མིང་སྲིང་གཉིས་འདོད་པ་རབ་ཏུ་ལེགས་ཀྱིས་སྦྱིན་ནོ་ཞེས་སྨྲས་སོ། །དེའི་ཚེ་ན་བུ་ མིང་སྲིང་གཉིས་རྩེར་སོང་སོང་བ་ལས། རྒྱལ་བུས་བོས་ནས་བུ་ལ་འདི་སྐད་ཅེས་བསྒོའོ། །བྲམ་ཟེ་འདི་ལམ་རིང་པོ་ནས་བུ་ཁྱེད་གཉིས་སློང་ངོ་ཞེས་ཟེར་ནས། ཁོ་བོས་ཀྱང་སྦྱིན་པར་བྱས་ཀྱིས་ཁྱེད་གཉིས་འདིའི་ཕྱི་བཞིན་སོང་ཤིག་ཅེས་བསྒོ་བ་དང ། བུ་གཉིས་རྒྱལ་བུའི་མཆན་དུ་བྲོས་ནས་ངུ་སྟེ་འདི་སྐད་ཅེས་སྨྲས་སོ། །བདག་ཅག་གིས་བྲམ་ཟེ་དུ་མ་ཡང་མཐོང་ན་འདི་འདྲ་བ་དག་མ་མཐོང་སྟེ། འདི་ནི་བྲམ་ཟེ་མ་ལགས་ཀྱི་ཡང་དག་པར་ཡི་དགས་ལགས་པས་བདག་ཅག་གི་མ་ཤིང་ཐོག་ཚོལ་དུ་མཆིས་པ་ལས། སླར་མ་འཁོར་བར་ བདག་ཅག་གཉིས་ཡི་དགས་འདིའི་ཟས་སུ་སྩལ་ན་གདོན་མི་འཚལ་བར་འགུམ་མོ། །བདག་གི་མ་སླར་མཆིས་ཏེ་བུ་དང་མ་མཇལ་ན། ཇི་ལྟར་བ་དང་བེའུ་བྲལ་བ་ལྟར་ངུ་ཞིང་ཆོ་ངེས་འདེབས་ཏེ་མི་དགའ་བའི་མྱ་ངན་གྱིས་གདུངས་པར་འགྱུར་རོ། །རྒྱལ་བུས་བུ་ལ་ བསྒོ་བ། ཁོ་བོས་སྦྱིན་པར་གནང་བས་བསྡད་དུ་མི་རུང་སྟེ་འདི་བྲམ་ཟེ་ཡིན་གྱི་ཡི་དགས་མ་ཡིན་པས་མི་ཟོས་ཀྱིས་ཁྱེད་གཉིས་འདིའི་ཕྱི་བཞིན་སོང་ཤིག་།བྲམ་ཟེས་སྨྲས་པ། བདག་ནི་ད་ཆས་ཏེ་འགྲོའོ། །གལ་ཏེ་བུའི་མ་འོངས་ན་འགྲོར་མེད་དེ། མ་བཏང་ན་རྒྱལ་བུས་ བདག་ལ་བྱིན་པའི་དགེ་བའི་སེམས། བུའི་མས་ཟློག་ཅིང་ཉམས་པར་འགྱུར་དུ་དོགས་སོ། །རྒྱལ་བུས་སྨྲས་པ། བདག་གིས་སྦྱིན་པ་ཅི་བྱས་ཀྱང་ཐོག་མ་ནས་ཅི་ལ་ཡང་འགྱོད་པའི་སེམས་བྱུང་མ་མྱོང་ངོ ། །དེ་ནས་རྒྱལ་བུས་ཆུ་སྣོད་ཐོགས་ནས། བྲམ་ཟེའི་ལག་པར་ཆུ་བླུགས་ 76-1-65a ནས་བུ་གཉིས་ཀྱི་ལག་པ་ནས་བཟུང་སྟེ། བྲམ་ཟེ་ལ་ཕུལ་བ་ན་ས་ཡང་རབ་ཏུ་གཡོས་སོ། །བུ་གཉིས་བྲམ་ཟེའི་ཕྱི་བཞིན་མཆིར་མ་བཏུབ་ནས། ཕྱིར་ཕ་རྒྱལ་བུའི་དྲུང་དུ་འོངས་ཏེ། པུས་མོ་ས་ལ་བཙུགས་ནས་ཕ་རྒྱལ་བུ་ལ་འདི་སྐད་ཅེས་གསོལ་ཏོ། །བདག་ ཅག་གཉིས་ཀྱིས་ཚེ་རབས་སྔ་མ་ལ་མི་དགེ་བའི་སྡིག་པ་ཅི་བགྱིས་ན་འདི་ལྟ་བུའི་སྡུག་བསྔལ་མྱོང་བར་གྱུར། བདག་ཅག་ནི་རྒྱལ་པོའི་རིགས་སུ་སྐྱེས་ན་ཅིའི་སླད་དུ་ཕ་རོལ་པོའི་བྲན་ཁོལ་དུ་གྱུར་ཅེས་ཕ་རྒྱལ་བུ་ལ་སྡིག་བཤགས་ནས། འདིའི་རྒྱུ་འདིའི་རྐྱེན་གྱིས་སྡིག་པ་བྱང་ཞིང་ བསོད་ནམས་སྐྱེས་ཏེ་གང་ནས་གང་དུ་སྐྱེས་ཀྱང་འདི་ལྟ་བུའི་སྡུག་བསྔལ་དང་ཕྲད་པར་མ་གྱུར་ཅིག་ཅེས་སྨྲས་སོ། །རྒྱལ་བུས་བུ་ལ་སྨྲས་པ། འཇིག་རྟེན་ན་མཛའ་ཞིང་སྡུག་གོ་ཅོག་མཐར་བྱེ་བྲལ་བར་གྱུར་ཏེ། ཐམས་ཅད་མི་རྟག་པས་ཡིད་བརྟན་དུ་མི་རུང ། ཁོ་བོ་ནམ་བླ་ན་ མེད་པའི་མཉམ་སྙོམས་པའི་བྱང་ཆུབ་ཐོབ་པ་ན་ཁྱོད་ཐར་པའི་དོན་བྱའོ་ཞེས་བསྒོའོ། །བུ་གཉིས་ཀྱིས་ཡང་ཡབ་རྒྱལ་བུ་ལ་སྨྲས་པ། བུས་ནི་མ་ལ་མཆི་ཕྱག་བྱ་བ་ལགས་ན་ད་གཞར་ཡང་མི་ཕྲད་དེ། མའི་ངོ་མ་མཐོང་བ་ཡང་བདག་ཅག་གི་སྔོན་གྱི་སྡིག་པའི་ལས་ཀྱིས་གདུངས་ པར་ཟད་ན། བདག་ཅག་གི་མ་ཅིའི་ཕྱིར་མྱ་ངན་གྱིས་གདུངས་ཤིང་སྡུག་བསྔལ་བར་མི་འགྱུར་ཞེས་སྨྲེ་སྔགས་འདོན་ཏོ། །བྲམ་ཟེས་སྨྲས་པ། བདག་རྒས་ལ་ཉམ་ཆུང་བས་བུས་པ་འདི་གཉིས་བདག་བོར་ཏེ་མའི་ཐད་དུ་བྲོས་པར་གྱུར་ན་བདག་གིས་བྱར་མེད་པར་འགྱུར་གྱིས། ཁྱོད་ཀྱིས་ཆིངས་ལ་དཀྲིས་ཤིག་ཅེས་སྨྲས་པ་དང ། རྒྱལ་བུས་ཀྱང་བུ་གཉིས་ཀྱི་ལག་པ་ཕྱིང་ཀ་ལོག་ཏུ་བཟུང་སྟེ། བྲམ་ཟེ་ཉིད་འཆིང་དུ་བཅུག་ནས་ཕྱིང་ཀ་ལོག་ཏུ་བཅིངས་པའི་ཐག་པ་བྲམ་ཟེའི་ལག་པར་བྱིན་ཏེ་སྦྲེལ་ནས་ཁྲིད་དོ། །བུ་གཉིས་ནི་དེ་ལྟར་ཁྲིད་ཀྱང་འགྲོར་མ་ བཏུབ་སྟེ་འཐེན་པ་ལས་བྲམ་ཟེས་ལྕག་ཐོགས་ཏེ། དེད་ནས་གཞུས་པའི་ལམ་དུ་ཁྲག་བྱུང་བ་ཡང་ས་ལ་ཆལ་པར་གང་ངོ ། །རྒྱལ་བུས་དེ་ལྟར་མཐོང་ནས་མཆི་མ་བྱུང་སྟེ། མཆི་མ་ས་ལ་བོ་བས་ས་ཡང་ཁོལ་བར་གྱུར་ཏོ། །རྒྱལ་བུ་དང་རི་དགས་དང་གཅན་གཟན་ 76-1-65b མང་པོ་ཐམས་ཅད་ཀྱིས་བུ་གཉིས་བསྐྱལ་ཏེ་མི་སྣང་བར་གྱུར་པ་དང ། གཟོད་ཕྱིར་ལོག་གོ། །རི་དགས་དང་གཅན་གཟན་ལ་སོགས་པས་རྒྱལ་བུ་བསྐྱལ་ཏེ། ཕྱིར་རྒྱལ་བུ་དང་རྩེ་བའི་གནས་སུ་ཕྱིན་ནས་སྙིང་རྗེ་བའི་སྐད་ཕྱུང་སྟེ་ལུས་ས་ལ་རྡེབས་ཤིང་འགྲོའོ། །བྲམ་ ཟེ་དེས་ལམ་དུ་ཞུགས་ཏེ་སོང་སོང་བ་ལས། ལམ་ཀར་སྐྱེད་ཤིང་ཞིག་ཡོད་པ་ལ་བུ་གཉིས་བཏགས་ཏེ་འདུག་གོ། །དེ་ནས་ཆས་པ་དང་བུ་གཉིས་མ་དང་ཕྲད་དུ་རེ་ནས་ཤིང་གི་ཕག་འཁྲི་ཞིང་འགྲོར་མ་བཏུབ་ནས། བྲམ་ཟེས་ཡང་གཞུས་པ་ལས་བུ་གཉིས་ཀྱིས་འདི་སྐད་ཅེས་ སྨྲས་སོ། །བདག་ཅག་ལ་མ་རྡེག་ཅིག་།བདག་ཅག་རང་འགྲོའོ་ཞེས་གནམ་ལ་ཡར་བལྟས་ཏེ། ཡང་འདི་སྐད་ཅེས་སྨྲས་སོ། །རི་གཉེན་གྱི་ལྷ་དང་ནགས་ཚལ་གྱི་ཤིང་གི་ལྷ་རྣམས་བདག་ཅག་ལ་ཅུང་ཟད་ཐུགས་བརྩེ་བའམ་དགོངས་པ་མི་མངའ་འམ་བདག་ ཅག་ནི་ལམ་རིང་པོར་གཞན་གྱི་བྲན་ཁོལ་བྱེད་དུ་འགྲོ་སྟེ། མ་དང་བྲལ་བར་གྱུར་ན་བདག་ཅག་གི་མ་རི་ལ་ཤིང་ཐོག་ཚོལ་ཞིང་བརྡར་བཏང་སྟེ། མྱུར་དུ་བདག་ཅག་དང་ངོ་ཕྲད་པར་ཤོག་ཅིག་མི་སྦྲན་ནམ་ཞེས་དེ་སྐད་སྨྲས་པ་དང ། བུའི་མ་རི་ལ་འདུག་པའི་རྐང་པ་ གཡོན་པའི་རྐང་མཐིལ་གཡའ་ཞིང་གཡོ་བ་དང་མིག་གཡོན་པ་ཡང་འགུལ་ནུ་མ་གཉིས་ནས་ནུ་ཞོ་ཡང་རང་ཟག་པར་གྱུར་ནས། འདི་སྙམ་དུ་འདི་འདྲ་བའི་ལྟས་ངན་པ་གནའ་བྱུང་མ་མྱོང་ན་བདག་གི་བུ་གཉིས་ལ་ཡེ་འདྲོག་མ་བྱུང་ངམ་སྙམ་བསམས་ནས། ཤིང་ཐོག་གིས་ཅི་ཞིག་ བྱ་སྙམ་སྟེ། ཤིང་ཐོག་བརྔ་བ་ཡང་བཏང་ནས་མྱུར་བར་ཕྱིར་གནས་སུ་འགྲོ་བར་ཆས་སོ། །དེའི་ཚེ་སུམ་ཅུ་རྩ་གསུམ་པའི་གནམ་གྱི་ལྷའི་དབང་པོ། རྒྱལ་བུས་གཞན་ལ་བུ་བྱིན་པར་ཤེས་ནས། བཙུན་མོས་དགེ་བར་བསམས་པའི་སེམས་ཀྱི་བར་ཆད་བྱེད་དུ་དོགས་ པས། སེང་གེ་ཞིག་ཏུ་སྤྲུལ་ནས་ལམ་གྱི་སྲང་དུ་བསྡད་དོ། །བཙུན་མོས་སེང་གེ་ལ་སྨྲས་པ། ཁྱོད་ནི་གཅན་གཟན་གྱི་རྒྱལ་པོ། ཁོ་བོ་ནི་མིའི་རྒྱལ་མོ་ཡིན་ཏེ་རི་ལ་འཁོད་པར་འདྲ་ན་ཅུང་ཟད་ལམ་ལས་བྱོལ་ཏེ་བདག་ཐོང་ཤིག་།བདག་ལ་བུ་ཆུང་ངུ་མ་ཤེད་མ་བྱེ་བ་ 76-1-66a གཉིས་ཤིག་ཡོད་དེ། ད་ཙམ་གྱི་བར་དུ་ཅི་ཡང་མ་ཟོས་པས་བདག་འོང་དུ་རེ་སྟེ་སྡོད་དོ། །སེང་གེས་ཀྱང་བྲམ་ཟེ་དེ་རྒྱང་རིང་དུ་ཐལ་བར་ཤེས་ནས་ལམ་ལས་བྱོལ་ཏེ་བཙུན་མོ་བཏང་ངོ ། །བཙུན་མོ་ཕྱིར་གནས་སུ་འོངས་ནས། རྒྱལ་བུ་འབའ་ཞིག་སྣང་ གི་བུ་གཉིས་མ་མཐོང་བས། བདག་ཉིད་འདུག་པའི་སྤྱིལ་བུར་བལྟས་ན་ཡང་བུ་མ་མཐོང ། བུ་གཉིས་འདུག་པའི་སྤྱིལ་པོར་བལྟས་ན་ཡང་བུ་མ་མཐོང་སྟེ། དེ་ནས་བུ་རྩེ་བའི་གནས་ཆུ་འགྲམ་དུ་བཙལ་ན་ཡང་མ་མཐོང་ངོ ། །སྔོན་བུ་དང་རྩེ་བའི་རི་དགས་ཤ་བ་དང ། ཁ་ཤ་དང ། གཅན་ གཟན་སེང་གེ་དང ། སྤྲེའུ་ལ་སོགས་ཏེ་མདུན་ནས་ལུས་ས་ལ་རྡེབས་ཤིང་སྒྲ་འབྱིན་ལ།སྔོན་རྩེ་བའི་རྫིང་བུའི་ཆུ་ཡང་སྐམས་པར་མཐོང་ནས། ཕྱིར་རྒྱལ་བུ་གང་ན་བ་དེར་སོང་སྟེ་ཕྱིན་པ་དང་རྒྱལ་བུ་ལ་བདག་གི་བུ་གཉིས་ག་རེ་ཞེས་དྲིས་ན། རྒྱལ་བུ་ཅང་མི་སྨྲའོ། །བཙུན་མོས་ཡང་ སྨྲས་པ། བདག་ནམ་ཤིང་ཐོག་ཐོགས་ཏེ་ཕྱིར་གནས་སུ་འཁོར་བ་ན་བདག་གི་བུ་གཉིས་རྒྱང་མ་ནས་རྒྱུག་ཅིང་མདུན་དུ་བསུས་ཏེ། རྡེག་འཆོས་ན་ཡང་ཕྱིར་ལངས་ཏེ་དཀྱུ་མཆོང་ཞིང་ཨ་མ་འོངས་ཨ་མ་འོངས་སོ་ཞེས་འབོད་དེ། བདག་འདུག་པ་ན་གཉིས་ཀ་གཡས་གཡོན་ན་འདུག་ཅིང ། ཕྲག་པའམ་ལུས་ལ་རྡུལ་གོས་ན་ཡང་འཕྱི་ཞིང་སྤྲུག་།ད་བདག་གི་བུ་ག་རེ་མ་མཐོང་ན་གཞན་ལ་མ་བྱིན་ནམ། འདི་ལྟར་མ་མཐོང་བས་བདག་གི་སྙིང་གས་པར་འགྱུར་གྱིས། བདག་གི་བུ་ག་ལ་འདུག་མྱུར་དུ་སྨྲོས་ཤིག་།བདག་མྱོས་པར་འགྱུར་རོ་ཞེས་དེ་ལྟར་ལན་གཉིས་ལན་ གསུམ་གྱི་བར་དུ་དྲིས་ཀྱང་ལན་མ་སྨྲས་སོ། །བཙུན་མོས་ཡང་སྨྲས་པ། ལྷག་པར་སྡུག་བསྔལ་གྱིས་གདུངས་ཏེ། བུ་གཉིས་མ་མཐོང་བ་ལྟ་ཚོད་ཡོད་ན། རྒྱལ་བུས་ལན་མ་སྟེར་བས་ལྷག་པར་མྱོས་ཤིང་འཁྲུགས་པར་གྱུར་ཏོ། །རྒྱལ་བུས་སྨྲས་པ། ཡུལ་ཀཻ་ལཻ་ཞེས་ བྱ་བ་ནས་བྲམ་ཟེ་ཞིག་འོངས་ཏེ། བདག་ལ་བུ་གཉིས་བསླངས་པ་ལས་བདག་གིས་བྱིན་ནོ། །བཙུན་མོས་རྒྱལ་བུས་སྨྲས་པ་ཐོས་མ་ཐག་ཏུ་རི་རྡིབ་པ་ལྟར་ས་ལ་འགྱེལ་ཏེ་འགྲེ་ཞིང་ཆོ་ངེས་བཏབ་བོ། །རྒྱལ་བུས་སྨྲས་པ་རེ་ཞིག་སྡོད་ཅིག་།ཁྱོད་སྔོན་འདས་པའི་དུས་ན་སངས་ 76-1-66b རྒྱས་མར་མེ་མཛད་ཀྱི་ཚེ་དམ་ཇི་ལྟར་བཅས་པ་མི་དྲན་ནམ། དེའི་ཚེ་དེའི་དུས་ན་བདག་ནི་བྲམ་ཟེའི་བུ་གཞོན་ནུ་ཞེས་བྱ། ཁྱོད་ནི་བྲམ་ཟེའི་བུ་མོ་སུན་ད་རི་ཀ་ཞེས་བྱ་སྟེ། ཁྱོད་ནི་དེའི་ཚེ་མེ་ཏོག་པད་མོ་བདུན་ཞིག་ཐོགས། བདག་ལ་དངུལ་གྱི་དོང་ཙེ་ལྔ་ཞིག་ཡོད་དེ། ཁྱོད་ ལས་པད་མོ་ལྔ་ཞིག་ཉོས་ནས་སངས་རྒྱས་ལ་ཕུལ་བར་བྱས་པ་ལས་ཁྱོད་ཀྱིས་པད་མོ་ལྷག་མ་གཉིས་པོ་ཡང་ང་ལ་བྱིན་ཏེ། སངས་རྒྱས་ལ་འབུལ་གྱིས་སྨོན་ལམ་དུ་ཡང་བདག་སྐྱེ་བ་ཕ་རོལ་ཏུ་རྟག་པར་ཁྱོད་ཀྱི་ཆུང་མར་ཤོག་ཅིག་ཅེས་སྨོན་ལམ་བཏབ་པ་ལས། བདག་དེའི་ཚེ་ ཁྱོད་དང་འདི་སྐད་ཅེས་དམ་མ་བཅས་སམ། ཁྱོད་བདག་གི་ཆུང་མར་དགའ་ན་བདག་གི་ཡིད་དང་འགལ་བར་མ་བྱེད་ཅིག་།བདག་སྦྱིན་པ་ཞིག་བྱེད་ན་ཕ་མ་གཉིས་མ་གཏོགས་པར་གཞན་སྦྱིན་ཡང་བདག་གི་ཡིད་བཞིན་དུ་སྦྱིན་པ་ལས་འགལ་བར་མ་བྱེད་ཅིག་ཅེས་དམ་ བཅས་པ་ལས། དེའི་ཚེ་ཁྱོད་ན་རེ་དེ་བཞིན་དུ་བྱའོ་ཞེས་མི་ཟེར་རམ། ད་ཁྱོད་ཀྱི་བུ་གཉིས་གཞན་ལ་བྱིན་པ་ལ་བདག་གི་དགེ་བའི་སེམས་དཀྲུག་ཏུ་ཡང་ཅི་ཡོད་ཅེས་རྒྱལ་བུས་སྨྲས་མ་ཐག་ཏུ། བཙུན་མོས་ཐོས་པ་ཙམ་གྱིས་སེམས་དང་ཡིད་ཀྱིས་སྔོན་གྱི་གནས་དྲན་ པའི་མངོན་པར་ཤེས་པ་ཚོར་བར་གྱུར་ཏེ། རྒྱལ་བུའི་བསམ་པ་མྱུར་བར་རྫོགས་པར་འདོད་པས་ཡིད་བཞིན་དུ་སྦྱིན་པ་ལ་རྗེས་སུ་ཡི་རང་བར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་རྒྱལ་བུས་སྦྱིན་པ་བྱིན་པ་ཇི་ལྟར་སེམས་པ་བསམས་པའི་ཕྱིར་བྲམ་ཟེ་ཞིག་ཏུ་སྤྲུལ་ཏོ། ། བྲམ་ཟེ་དེ་ཡང་མི་སྡུག་པ་རྣམ་པ་བཅུ་གཉིས་དང་ལྡན་ཏེ། རྒྱལ་བུ་ག་ལ་བ་དེར་སོང་ནས་འདི་སྐད་ཅེས་སྨྲས་སོ། །རྒྱལ་བུ་ཁྱོད་སྦྱིན་པ་ལ་དགའ་བས་ཕ་རོལ་པོའི་ཡིད་དང་འགལ་བར་མི་བྱེད་ཅེས་གྲག་སྟེ། བདག་ཀྱང་ཆེད་དུ་འདིར་སློང་དུ་འོངས་ཀྱིས་ཁྱོད་ལ་བཙུན་ མོ་ཡོད་པ་དེ་བདག་ལ་བྱིན་ཅིག་།རྒྱལ་བུས་སྨྲས་པ། ཤིན་ཏུ་ལེགས་ཏེ་དེ་བཞིན་དུ་སྦྱིན་ནོ་ཞེས་སྨྲས་སོ། །བཙུན་མོས་སྨྲས་པ། བདག་ཀྱང་ཕ་རོལ་པོ་ལ་བྱིན་ན་རྒྱལ་བུའི་གཡོག་སུས་བྱ། རྒྱལ་བུས་སྨྲས་པ། ད་ཁྱོད་ཀྱང་སྦྱིན་པ་མ་བྱས་ན་ཇི་ལྟར་ཡང་བླ་ན་མེད་ 76-1-67a པའི་མཉམ་སྙོམས་པའི་བྱང་ཆུབ་ཐོབ་པར་འགྱུར། དེ་ནས་རྒྱལ་བུས་ཆུ་སྣོད་ཐོགས་ཏེ་བྲམ་ཟེའི་ལག་པ་བཀྲུ་བའི་ཕྱིར། ལག་པར་ཆུ་བླུགས་ནས་བཙུན་མོ་ཡང་བྲམ་ཟེ་ལ་ཕུལ་ལོ། །དེ་ལྟར་རྒྱལ་བུ་ལ་འགྱོད་པའི་སེམས་ཅུང་ཟད་ཀྱང་མེད་པར་ བརྒྱ་བྱིན་གྱིས་རྟོགས་ནས་ལྷ་རྣམས་ཀྱིས་བསྟོད་ཅིང་བསྔགས་ཏེ་གནམ་ས་ཡང་ཆེར་གཡོས་སོ། །དེ་ནས་བྲམ་ཟེས་བཙུན་མོ་ཁྲིད་དེ་གོམ་པ་བདུན་ཙམ་དུ་ཕྱིན་པ་དང ། ཕྱིར་ལོག་ནས་བཙུན་མོ་འདི་རྒྱལ་བུ་ལ་ཕྱིར་གཏམས་ཀྱིས་སུ་ལ་ཡང་མ་སྦྱིན་ཅིག་ཅེས་སྨྲས་སོ། ། རྒྱལ་བུས་སླར་སྨྲས་པ། ཅིའི་ཕྱིར་མི་ཁྲིད་མི་འདོད་དམ། ཅི་མིར་སྐྱེས་པའི་ཆུང་མའི་ནང་ན་ཆུང་མ་འདི་ནི་ཤིན་ཏུ་ཡང་བཟང་ཞིང་མཛེས་ཏེ་རྒྱལ་པོའི་བུ་མོ་ཡིན་ལ། རྒྱལ་པོ་དེ་ལ་བུ་མོ་འདི་གཅིག་པུ་ལས་མེད་དེ། ཆུང་མ་འདི་ནི་བདག་ལ་ཆུ་གང་ཆེ་བས་ཁ་ཟས་བཙོ་བ་ དང་བསྲེག་པ་ཡང་ལག་དར་ཏེ་བྱེད། བཟའ་བ་དང་བཏུང་བ་ངན་ཀྱང་ངན་ཅེས་མི་འཁང་སྟེ། རྟག་ཏུ་འགྲུབ་ཆེ་ལ་བྱད་བཞིན་ཡང་བཟང་ལ་མཛེས་པས་ཁྱོད་ཁྱེར་ན་བདག་དགའོ་ཞེས་སྨྲས་སོ། །བྲམ་ཟེས་རྒྱལ་བུ་ལ་སྨྲས་པ། བདག་ནི་བྲམ་ཟེ་མ་ཡིན་གྱི་བརྒྱ་བྱིན་ ལྷའི་དབང་པོ་ཡིན་ཏེ་ཆེད་དུ་ཁྱོད་བགམ་པའི་ཕྱིར་འོངས་པ་ཡིན་ནོ་ཞེས་ཕྱིར་བརྒྱ་བྱིན་གྱི་ལུས་བཟང་པོར་བསྒྱུར་ནས། ཁྱེད་ཅི་དང་ཅིར་སྨོན་ཅེས་སྨྲས་སོ། །དེ་ནས་བཙུན་མོས་གུས་པར་ཕྱག་འཚལ་ཏེ་སྨོན་ལམ་རྣམ་པ་གསུམ་ཞིག་གསོལ་ཏོ། །གང་ཞེ་ན་གཅིག་ཏུ་ བདག་གི་བུ་ཁྲིད་པའི་བྲམ་ཟེ་ཕྱིར་ཡང་བདག་གི་ཡུལ་དུ་སོང་བར་གྱུར་ཅིག་།གཉིས་སུ་ན་བདག་གི་བུ་གཉིས་བཀྲེས་པ་དང་སྐོམ་པས་སྡུག་བསྔལ་བར་མ་གྱུར་ཅིག་།གསུམ་དུ་ན་རྒྱལ་བུ་དང་བདག་ཅག་གཉིས་ཀྱང་ཕྱིར་བདག་ཅག་གི་ཡུལ་དུ་མྱུར་དུ་འཁོར་བར་གྱུར་ཅིག་ ཅེས་སྨྲས་པ་དང ། བརྒྱ་བྱིན་ལྷའི་དབང་པོས་ཀྱང་དེ་བཞིན་དུ་སྨོན་ལམ་གྲུབ་པར་གྱུར་ཅིག་ཅེས་སྨྲས་སོ། །རྒྱལ་བུས་སྨྲས་པ། བདག་ནི་སེམས་ཅན་ཐམས་ཅད་སྐྱེ་བ་དང་རྒ་བ་དང་ན་བ་དང་འཆི་བའི་སྡུག་བསྔལ་ལས་སྒྲོལ་བར་གྱུར་ཅིག་ཅེས་སྨོན་ལམ་བཏབ་པ་དང ། བརྒྱ་བྱིན་ 76-1-67b ལྷའི་དབང་པོས་སྨྲས་པ། སྨོན་ལམ་འདི་ནི་ཤིན་ཏུ་ཡང་རྒྱ་ཆེ་སྟེ་བླ་ན་མེད་པ་ཡིན་ནོ། །གལ་ཏེ་མཐོ་རིས་སུ་སྐྱེ་ཞིང་ཉི་ཟླ་ལ་དབང་བའི་བདག་པོར་འདོད་དམ། འཇིག་རྟེན་གྱི་རྒྱལ་པོར་འདོད་དམ། ཚེ་རིང་ཞིང་ཡུན་ཏུ་གནས་པར་འདོད་ན། བདག་གིས་སྦྱིན་ནུས་ཀྱིས་ ཁྱོད་ཀྱིས་སྨྲས་པའི་སྨོན་ལམ་ཁམས་གསུམ་ལས་མཆོག་ཏུ་འདས་པ་ཡིན་པས་བདག་གིས་ནུས་པ་མ་ཡིན་ནོ། །རྒྱལ་བུས་སྨྲས་པ། ད་ལྟར་རེ་ཞིག་ཤིན་ཏུ་ཕྱུག་པོར་གྱུར་ཏེ་སྔོན་བས་ཀྱང་ལྷག་པར་རྟག་པར་སྦྱིན་པ་བྱིན་ཞིང ། ཡབ་རྒྱལ་པོ་དང་བློན་པོ་རྣམས་ དང ། བདག་ཅག་ཕྲད་པར་ཤོག་ཅིག་ཅེས་སྨྲས་པ་དང་བརྒྱ་བྱིན་གྱིས་སྨོན་པ་བཞིན་དུ་ངེས་པར་གྲུབ་པར་གྱུར་ཅིག་ཅེས་སྨྲས་མ་ཐག་ཏུ་མི་སྣང་བར་གྱུར་ཏོ། །ཡུལ་ཀཻ་ལཻའི་བྲམ་ཟེ་དེས་བྱིས་པ་གཉིས་ཁྲིད་དེ་ཁྱིམ་དུ་འོངས་ན། ཆུང་མས་འདི་སྐད་དུ་ཁྱོད་ངོ་སོ་འདི་ལྟ་ བུས་འཁོར་ཏེ་འོངས་པ་ལྟ་ངོ་མི་ཚའམ། བུས་པ་འདི་གཉིས་ནི་རྒྱལ་པོའི་གདུང་ལ་གཏོགས་པ་ཡིན་ན་སྙིང་རྗེའི་སེམས་ཀྱང་མེད་དེ། འདི་ལྟར་བཙོགས་བརྡེགས་ཤིང་ལུས་ལ་རྨ་དང་རྣག་ཁྲག་གིས་བཙོག་བཙོག་ལྟར་བྱས་པ་བཟོད་དམ་ཞེས་སྤྱོས་བརྒྱད་ནས། བུས་པ་འདི་ གཉིས་ཚོངས་ལ་བཀོལ་དུ་རུང་བ་ཁྲིད་དེ་ཤོག་ཅིག་ཅེས་བསྒོ་བ་དང ། ཁྱིམ་ཐབ་ཀྱང་ཆུང་མས་བསྒོ་བ་བཞིན་ཚོང་འདུས་སུ་སོང་བ་ལས་བརྒྱ་བྱིན་ལྷའི་དབང་པོས་སྤྲུལ་ཏེ་ཚོང་འདུས་སུ་འོངས་ནས་བྲམ་ཟེ་དེ་ལ་བུས་པ་འདི་ནི་ཤིན་ཏུ་རིན་ཆེ་བས་སུ་ཡང་ཉོ་མི་ནུས་སོ་ཞེས་སྨྲས་སོ། ། བུས་པ་དེ་གཉིས་བཀྲེས་ཤིང་སྐོམ་པ་ལས། བརྒྱ་བྱིན་གྱིས་ལྷའི་རྫུ་འཕྲུལ་གྱིས་ལྷའི་དྲི་བསུང་སྤྲུལ་ཏེ། བུས་པ་གཉིས་ཀྱི་བ་སྤུའི་ཁུང་བུ་ནས་ལྟོ་འགྲངས་པར་བྱས་ཏེ། བརྒྱ་བྱིན་གྱིས་བྲམ་ཟེའི་སེམས་ཀྱང་བསྒྱུར་ནས་ཡུལ་ཡ་བར་ཕྱིན་པར་བྱས་སོ། །ཡུལ་དེའི་བློན་ པོ་དང་ཡུལ་མི་ཐམས་ཅད་ཀྱིས་རྒྱལ་བུའི་སྲས། རྒྱལ་པོ་ཆེན་པོའི་ཚ་བོ་ཡིན་པར་མི་ཤེས་པ་མེད་པས་ཡུལ་མི་ཐམས་ཅད་ཀྱང་མྱ་ངན་གྱིས་གདུངས་ཏེ། བློན་པོ་ལ་སོགས་པས་བུ་གཉིས་ག་ལས་འོངས་ཞེས་དྲིས་པ་དང ། བྲམ་ཟེ་ན་རེ་བདག་གིས་བསླངས་ཏེ་འོངས་པ་ལ་ 76-1-68a ཁྱོད་ཀྱིས་དྲིར་ཅི་ཡོད་ཅེས་སྨྲས་སོ། །བློན་པོ་རྣམས་ཀྱིས་སྨྲས་པ། བདག་ཅག་གི་ཡུལ་དུ་འོངས་པས་ན་བདག་ཅག་གིས་དྲི་བར་རིགས་ཀྱི་མི་འདྲི་བ་མ་ཡིན་ནོ་ཞེས་བློན་པོ་དང་ཡུལ་མི་རྣམས་ཀྱིས་བགྲོས་ཏེ། བྲམ་ཟེ་ལས་བུ་གཉིས་དབྲོག་པར་ བྱས་པ་ལས་དེའི་ནང་ན་ཁྱིམ་བདག་གཅིག་གིས་འདི་སྐད་ཅེས་གྲོས་བཏབ་བོ། །འདི་ནི་རྒྱལ་བུས་སྦྱིན་པར་བསམས་ཏེ་བྱིན་པ་འདི་ལ་རྒྱལ་བུས་བསམས་པའི་ཡིད་དང་འགལ་ཞིང་དབྲོག་པར་མི་རིགས་ཀྱི། ཉིས་ན་རྒྱལ་པོ་ཆེན་པོ་ལ་གསོལ་ན། རྒྱལ་པོ་ཆེན་པོ་ཉིད་ཀྱིས་ རིན་གྱིས་བླུ་བར་འགྱུར་རོ་ཞེས་བྱས་པ་དང ། གྲོས་སྔ་མ་བཏང་ནས་བློན་པོ་རྣམས་ཀྱིས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོའི་དབོན་པོ་གཉིས་ད་ལྟར་བྲམ་ཟེ་ཞིག་འཚོང་ཞིང་མཆིས་ཅེས་གསོལ་པ་དང ། རྒྱལ་པོས་ཚིག་དེ་ཐོས་མ་ཐག་ཏུ་ཆེར་དངངས་ ཏེ་བྲམ་ཟེ་དང་བུ་གཉིས་ཕོ་བྲང་ནང་དུ་ཁྲིད་དེ་ཤོག་ཅིག་ཅེས་བསྒོ་ནས། བུ་གཉིས་ཕོ་བྲང་ནང་དུ་འོངས་པའི་ཚེ་རྒྱལ་པོ་དང་བཙུན་མོ་དང་ཕོ་བྲང་གི་སླས་དང་བློན་པོ་རྣམས་ཀྱིས་བུ་གཉིས་མཐོང་ནས་ཐམས་ཅད་དབུགས་ཀྱིས་བརྣངས་པ་ཙམ་དུ་མ་ངུས་པ་མེད་དོ། །དེ་ནས་རྒྱལ་པོས་ བྲམ་ཟེ་དེ་ལ་ཁྱོད་ཀྱིས་བུ་འདི་གཉིས་ཇི་ལྟར་ཐོབ་ཅེས་དྲིས་ན། བྲམ་ཟེ་ན་རེ་བདག་གིས་རྒྱལ་བུ་ལས་བསླངས་ཏེ་ཐོབ་བོ་ཞེས་ཟེར་རོ། །རྒྱལ་པོས་བུས་པ་འདི་གཉིས་བོས་ཏེ། པང་པར་བླང་སྙམ་པ་ལས་བུ་གཉིས་འོང་དུ་མ་བཏུབ་བོ། །དེ་ནས་རྒྱལ་པོས་བུ་འདི་གཉིས་ ཀྱི་རིན་ཅི་ཙམ་འདོད་ཅེས་དྲིས་ན། བྲམ་ཟེ་སྨྲ་མ་ཁོམ་པར་ཁྱེའུ་ཡིས་འདི་སྐད་ཅེས་གསོལ་ཏོ། །བདག་བུ་ཕོ་ནི་དངུལ་གྱི་དོང་ཙེ་སྟོང་དང་བ་ལང་བརྒྱ་ཞིག་རིའོ། །བུ་མོ་ནི་གསེར་གྱི་དོང་ཙེ་སྟོང་དང་བ་བཞོན་ཉིས་བརྒྱ་རིའོ་ཞེས་གསོལ་བ་དང ། རྒྱལ་པོས་ཁྱེའུ་ལ་འདི་ སྐད་ཅེས་སྨྲས་སོ། །འཇིག་རྟེན་ཆོས་ཀྱིས་མིའི་ནང་ན་ཕོ་ནི་རིན་པོ་ཆེ་དབྱིག་ལྟར་རིན་ཆེ་བ་ཡིན་ན། ཅིའི་ཕྱིར་བུ་ཕོ་ནི་རིན་ཆུང ། བུ་མོ་ནི་རིན་ཆེ་བར་འདེབས། བུ་ཁྱེའུ་ཡིས་གསོལ་པ། ཕོ་བྲང་གི་སླས་ལྟ་བུ་རྒྱལ་པོ་དང་ཉེ་བ་མ་ལགས་ལ། མ་རབས་བྲན་ལས་སླས་སུ་ 76-1-68b བཞེས་ཏེ། དེ་ལ་ཐུགས་དགྱེས་པས་བཀུར་ཞིང་བཙུན་པར་མཛད་དེ། རིན་པོ་ཆེའི་གོས་སྐོན་ཞིང་བཟའ་བ་དང ། བཏུང་བ་རོ་བརྒྱ་དང་ལྡན་པ་བསྟབས་ན། སྲས་གཅིག་པུ་ཞིག་མངའ་བ་རི་ལ་སྤངས་ཏེ། ཡ་མཚན་ཕོ་བྲང་གི་སླས་དང་རོལ་ཅིང་རོལ་མོ་མཛད་ཀྱང་སྲས་ལ་ ཅུང་ཟད་ཙམ་ཡང་དགོངས་པའི་ཐུགས་ཀྱང་མི་མངའ་བས། དེ་བས་ན་བུ་ཕོ་ནི་རིན་ཆུང་ལ་བུ་མོ་ནི་རིན་ཆེ་བར་མངོན་ནོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་ལྷག་པར་མི་དགའ་བའི་མྱ་ངན་སྐྱེས་ཏེ། མཆི་མ་བླགས་ནས་འདི་སྐད་དུ་བདག་ནི་རབ་ཏུ་གནོང་ན་ཁྱེད་ཅིའི་ཕྱིར་ཁོ་བོའི་པང་དུ་ མི་འོང། ཁྱེད་ང་ལ་མི་དགའ་འམ་འོན་ཏེ་བྲམ་ཟེས་འཇིགས་ཞེས་དྲིས་ན། བྱིས་པ་ན་རེ་བདག་ཅག་ནི་རྒྱལ་པོ་ཆེན་པོ་ལ་མི་དགའ་བའམ་བྲམ་ཟེས་སྐྲག་པ་ཡང་མ་ལགས་ན། ཐོག་མ་རྒྱལ་པོ་ཆེན་པོའི་ཚ་བོ་ལས་ད་ལྟར་མིའི་བྲན་ཁོལ་དུ་གྱུར་པས། གང་ན་ཡང་མིའི་བྲན་ཁོལ་ རྒྱལ་པོའི་པང་དུ་འདུག་པའི་ཆོས་མེད་པས་མི་སྤོབས་སོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས། ལྷག་པར་མྱ་ངན་གྱིས་གདུངས་པར་གྱུར་ཏེ་མི་དགའ་བར་གྱུར་ནས། བུས་གསོལ་པ་བཞིན་དུ་བྲམ་ཟེ་ལ་རིན་བྱིན་ཅིག་ཅེས་བསྒོ་ནས། བུ་གཉིས་གདོད་རྒྱལ་པོའི་པང་ དུ་བླངས་སོ། །བུ་གཉིས་རྒྱལ་པོས་བླངས་ནས་ཕྱག་གིས་བུ་གཉིས་ཀྱི་མགོ་ནས་བྱུགས་ཏེ་འདི་སྐད་ཅེས་སྨྲས་སོ། །ཁྱེད་རི་ལ་གནས་པ་ན། ཟས་སུ་ནི་ཅི་ཟ། གོས་སུ་ནི་ཅི་གྱོན་ཞེས་དྲིས་ན། བུ་གཉིས་ན་རེ། ཟས་སུ་ནི་ཤིང་གི་འབྲས་བུ་ཤིང་ཐོག་ཟ། གོས་སུ་ ནི་པགས་པ་དང་སྣམ་བུ་གྱོན་ཏེ། བྱ་མང་པོ་དང་རྩེ་དགའ་བས་མྱ་ངན་གྱི་སེམས་མེད་དོ་ཞེས་གསོལ་ཏོ། །དེ་ནས་རྒྱལ་པོས་བྲམ་ཟེ་དེ་ལ་ཕྱི་རོལ་དུ་སོང་ཤིག་ཅེས་བསྒོ་བ་དང ། བུ་གཉིས་ཀྱིས་རྒྱལ་པོ་ལ་འདི་སྐད་ཅེས་གསོལ་ཏོ། །བྲམ་ཟེ་འདི་རབ་ཏུ་བཀྲེས་སྐོམ་གྱིས་ཉེན་ན། དེ་ལ་ཁ་ཟས་ཀྱིས་ཚིམ་པར་མཛད་དུ་གསོལ། རྒྱལ་པོས་སྨྲས་པ། ཁྱོད་ལ་མི་དགའ་བའམ་འཁོན་དུ་འཛིན་པ་མེད་པར་ཕྱིར་ཁ་ཟས་སྦྱིན་པར་སེམས། བུས་སྨྲས་པ། བདག་གི་ཕ་བྱང་ཆུབ་ཀྱི་ལམ་ལ་དགའ་བས་ནོར་རྫས་ཀྱིས་སྦྱིན་དུ་མེད་དེ། བདག་གི་ལུས་ཀྱིས་ 76-1-69a སློང་བ་ལ་བྱིན་པ་ཡང་བདག་ཅག་ལ་དབང་བའི་བདག་པོ་ལགས་ཏེ། འདིས་བདག་ཅག་ལ་བཀོལ་བའི་ལས་ཙམ་བྱེད་དུ་མ་བཅུག་པ་ཡང་ཐོག་མ་ཕས་བསམས་པ་ལྟར་མ་གྱུར་ཏེ། དེ་སྙིང་རྗེའི་སེམས་ཙམ་ཡང་མ་མཆིས་ཏེ་ལྟོགས་ཤིང་སྐོམ་པ་བཞིན་དུ་ འདུག་པ་འདི་མིག་གིས་ཀྱང་སུ་ཞིག་གིས་བཟོད། བདག་གི་ཕས་ནི་བུ་ཡང་མི་ཕངས་པར་ཕ་རོལ་པོ་ལ་སྦྱིན་པ་བྱེད་ན་རྒྱལ་པོ་ཆེན་པོས་མི་གཅིག་གི་ཁ་ཟས་ཙམ་ལ་སེར་སྣ་མཛད་དམ་ཞེས་གསོལ་པ་དང ། རྒྱལ་པོས་ཀྱང་བྲམ་ཟེ་དེ་ལ་ཁ་ཟས་ཀྱིས་ཚིམ་པར་བྱིན་ནས་བྲམ་ཟེ་ཡང་ རབ་ཏུ་དགའ་སྟེ། ཕྱིར་བདག་གི་ཡུལ་དུ་སོང་ངོ ། །དེ་ནས་རྒྱལ་པོས་རྒྱལ་བུ་འགུགས་པའི་ཕོ་ཉ་བཏང་ནས། ཕོ་ཉ་ཡང་དེ་མ་ཐག་ཏུ་ཆས་ཏེ་རྒྱལ་བུ་ག་ལ་བ་དེར་སོང་ངོ ། །དེར་ཕྱིན་པ་དང་ཆུ་ཞིག་ལ་མ་ཐར་ནས་ཕོ་ཉ་དེས་རྒྱལ་བུ་ཉིད་ཡིད་ལ་བྱས་ཏེ་བསམས་མ་ཐག་ ཏུ་ཆུ་དེ་ལས་ཐར་ནས་རྒྱལ་བུ་གང་ན་བ་དེར་ཕྱིན་ཏེ། རྒྱལ་པོའི་བཀས་རྒྱལ་བུ་སླར་ཡུལ་དུ་གཤེགས་སུ་གསོལ་ཞེས་བསྒོའོ། །རྒྱལ་བུས་ཕོ་ཉ་ལ་སྨྲས་པ། ཐོག་མ་རྒྱལ་པོས་ལོ་བཅུ་གཉིས་ཀྱི་བར་དུ་རི་ལ་སྒོམས་ཤིག་ཅེས་བསྒོ་སྟེ། ད་དུང་ལོ་གཅིག་མ་ཚང་བས་ད་ ལོ་ཚང་ནས་བདག་འགྲོའོ་ཞེས་བསྒོའོ། །དེ་ནས་ཕོ་ཉ་ཡང་ཕྱིར་ལོག་ནས་རྒྱལ་པོ་ལ་དེ་བཞིན་དུ་ལན་གསོལ་པ་ལས། རྒྱལ་པོ་ཉིད་ཕྱག་དར་ཏེ་ཡི་གེ་བྲིས་ནས་ཕྱིར་ཕོ་ཉ་ལ་བསྐུར་ཏེ་འདི་སྐད་ཅེས་བསྒོའོ། །ཁྱོད་ནི་མིའི་ནང་ན་མཁས་པ་ཤེས་རབ་ཅན་ཡིན་པས་འགྲོ་བ་ལ་ཡང་ བཟོད་ཅིང་འོང་བ་ལ་ཡང་བཟོད་པ་ཡིན་ན། ཅིའི་ཕྱིར་ཁྱོད་ཁྲོས་ཏེ་འོང་དུ་མི་བཏུབ། ཁྱོད་དང་ལྷན་ཅིག་བཟའ་བ་དང་བཏུང་བ་གཏང་དགོས་ཀྱིས་མྱུར་དུ་ཤོག་ཅིག་ཅེས་ཕོ་ཉ་འགུགས་སུ་བཏང་ངོ ། །དེ་ནས་ཕོ་ཉ་ཡི་གེ་ཐོགས་ཏེ། རྒྱལ་བུ་གང་ན་བ་དེར་སོང་ནས་ཕྱིན་པ་དང་རྒྱལ་བུ་ ལ་ཡི་གེ་ཕུལ་ལོ། །རྒྱལ་བུས་ཡི་གེ་བླངས་ནས་མགོ་བོ་ས་ལ་གཏུགས་ཏེ་ཡི་གེ་ལ་ཕྱག་འཚལ་ནས་ལན་བདུན་བསྐོར་བ་བྱས་ཏེ། མོད་ལ་ཕྱིར་ཡུལ་དུ་འགྲོ་བར་ཆས་སོ། །དེའི་ཚེ་རི་དེ་ནས་ཆས་པ་དང་རི་དེ་ལ་གནས་པའི་རི་དགས་དང་གཅན་གཟན་ལ་སོགས་པ་རྒྱལ་བུ་འགྲོའོ་ཞེས་ 76-1-69b ཐོས་ནས། ཐམས་ཅད་ལུས་ས་ལ་བརྡབས་ནས་ས་ལ་འགྲེ་ཞིང་ངུ་བའི་སྐད་ཕྱུང་ངོ ། །ཆུ་མིག་རྣམས་ཀྱང་སྐམས་ཏེ་གཅན་གཟན་དང་རི་དགས་ཀྱི་ཕྲུ་གུ་ཡང་མི་ནུ། འདབ་ཆགས་བྱ་མང་པོ་ཡང་སྙིང་རྗེའི་སྐད་ཀྱིས་སྒྲ་ཕྱུང་ངོ ། །དེ་ནས་རྒྱལ་བུ་གོས་གྱོན་ནས་བཙུན་མོ་དང་ འགྲོགས་ཏེ། ཕྱིར་ཡུལ་དུ་སོང་བ་ལས་དགྲ་ཟླའི་ཡུལ་གྱི་རྒྱལ་པོས། རྒྱལ་བུ་ཕྱིར་འོང་ངོ་ཞེས་ཐོས་ནས་བལ་གྱི་གླང་པོ་ཆེ་དཀར་པོ་ལ་གསེར་གྱི་སྒ་བསྟད་དེ། གསེར་གྱི་སྣོད་དུ་དངུལ་གྱི་ཉེའུས་བཀང ། དངུལ་གྱི་སྣོད་དུ་ནི་གསེར་གྱི་ཉེའུས་བཀང་བ་བཤམས་ནས། རྒྱལ་བུ་ བསུ་བའི་ཕྱིར་ནམ་མཁའ་ལ་སྟོད་དེ། རྒྱལ་བུ་བསུ་ནས་རྒྱལ་པོའི་ཕྲིན་དུ་འདི་སྐད་ཅེས་གསོལ་ཏོ། །བདག་ནི་མི་ཤེས་པའི་དབང་དུ་གྱུར་ཏེ། རྒྱལ་བུ་ལས་བལ་གྱི་གླང་པོ་ཆེ་བླངས་པས། དེའི་རྐྱེན་གྱིས་རྒྱལ་བུ་སྤངས་པར་གྱུར་པ་ད་འགྱོད་པས་ན་མཐོལ་ཚངས་སུ་གསོལ་ལོ། ། ད་རྒྱལ་བུ་སླར་གཤེགས་ཞེས་ཐོས་ནས་རབ་ཏུ་དགའ་སྟེ། བལ་གྱི་གླང་པོ་ཆེ་དེ་ཉིད་ཀྱང་སླར་ཕུལ་ཞིང་གསེར་དངུལ་གྱི་ཉེའུ་རྣམས་ཀྱང་ཕུལ་ན། འདི་དག་རྣམས་ཀྱང་བཞེས་ཤིག་།ནོངས་པའི་སྐྱོན་རྣམས་ཀྱང་སྦྱང་བར་གསོལ་ཏོ། །རྒྱལ་བུས་སྨྲས་པ། དཔེར་ན་མི་ཞིག་གིས་ ཁ་ཟས་རོ་བརྒྱ་དང་ལྡན་པ་སྦྱར་ཏེ། ཕ་རོལ་པོ་གཅིག་ལ་བྱིན་པ་ལས། མི་དེས་ཁ་ཟས་ཟོས་ནས་ཕྱིར་ས་ལ་སྐྱུགས་ནས། ཕྱིར་སྐྱུགས་པའི་ཁ་ཟས་དྲི་བསུང་དང་ལྡན་པ་དེ་བཟར་རུང་བར་འགྱུར་རམ། བདག་གིས་སྦྱིན་པ་བྱས་པ་ཡང་སྐྱུགས་པ་དང་འདྲ་བས་ཕྱིར་མི་འདོད་ དོ། །ཕོ་ཉ་ཁྱོད་བལ་གྱི་གླང་པོ་ཆེ་འདི་ཞོན་ལ་བདག་གི་ཡུལ་དུ་སོང་ཤིག་།ཁྱོད་ཀྱི་རྒྱལ་པོ་འདི་ལྟར་བདག་བསུ་ཞིང ། སྤྲོ་བའི་ཚིག་གིས་སྙན་པར་སྨྲས་པ་རབ་ཏུ་དགའོ་ཞེས་གསོལ་ཅིག་ཅེས་བསྒོ་བ་དང ། ཕོ་ཉ་དེ་ཡང་བལ་གྱི་གླང་པོ་ཆེ་ལ་ཞོན་ཏེ་ཕྱིར་བདག་གི་ཡུལ་དུ་སོང་ ནས། རྒྱལ་པོ་ལ་དེ་བཞིན་དུ་གསོལ་པ་ལས། བལ་གྱི་གླང་པོ་ཆེ་དེའི་རྐྱེན་གྱིས་འཐབ་པའི་དགྲ་ཟླ་དེ་གཅིག་ལ་གཅིག་བྱམས་ཤིང་སྡུག་པའི་སེམས་སུ་གྱུར་ཏེ། རྒྱལ་པོ་དང་ཡུལ་མི་ཐམས་ཅད་བླ་ན་མེད་པའི་མཉམ་སྙོམས་པའི་སེམས་བསྐྱེད་པར་གྱུར་ཏོ། །དེའི་ཚེ་རྒྱལ་ 76-1-70a པོ་ཡབ་ཀྱང་བལ་གྱི་གླང་པོ་ཆེ་ལ་བཅིབས་ཏེ་རྒྱལ་བུ་བསུས་སོ། །རྒྱལ་བུས་མགོ་དང་གདོང་གིས་ཕྱག་འཚལ་ནས་རྒྱལ་པོའི་ཕྱི་བཞིན་ཕྱིར་ཡུལ་དུ་སོང་སྟེ། ཡུལ་མི་ཐམས་ཅད་ཀྱང་རབ་ཏུ་དགའ་མགུ་རངས་ནས་མེ་ཏོག་དང ། བདུག་སྤོས་དང ། བ་དན་ དང ། རྒྱལ་མཚན་དང ། བླ་རེ་ལ་སོགས་པས་མཆོད་པ་བྱ་བའི་ཕྱིར་བཤམས་ཏེ། ས་གཞི་ཡང་སྤོས་ཆུ་ཆག་ཆག་བཏབ་ནས་བསྡད་དོ། །རྒྱལ་བུ་ཕོ་བྲང་གི་ནང་དུ་འོངས་ནས། ཡུམ་གྱི་དྲུང་དུ་ཕྱིན་པ་དང་མགོ་བོས་ཕྱག་འཚལ་ནས་སྤྲོ་བའི་ཚིག་གིས་སྙུན་གསོལ་ཏོ། ། དེ་ནས་རྒྱལ་པོས་རིན་པོ་ཆེའི་བང་མཛོད་ཐམས་ཅད་ཀྱང་རྒྱལ་བུ་ལ་གཏད་དེ། ཡིད་བཞིན་དུ་སྦྱིན་པ་བྱེད་དུ་བཅུག་ནས། སྦྱིན་པ་སྔ་མ་བས་ཀྱང་ལྷག་པར་རྒྱུན་མ་ཆད་པར་སྦྱིན་པ་བྱེད་དུ་བཅུག་པས། མངོན་པར་སངས་རྒྱས་ཀྱི་བྱང་ཆུབ་ཐོབ་པར་གྱུར་ཏོ། །བཅོམ་ལྡན་འདས་ ཀྱིས་ཀུན་དགའ་བོ་ལ་བཀའ་སྩལ་པ། ངས་སྔོན་གྱི་སྦྱིན་པ་བྱས་པ་མངོན་དུ་དྲན་པ་ནི་དེ་ལྟ་བུ་ཡིན་ནོ། །དེའི་ཚེ་དེའི་དུས་ན་རྒྱལ་བུ་དོན་གྲུབ་ཅེས་བྱ་བ་ནི་ད་ལྟར་ང་ཉིད་ཡིན་ནོ། །དེའི་ཚེ་ཡབ་རྒྱལ་པོར་གྱུར་པ་དེ་ནི་ད་ལྟར་ངའི་ཡབ་རྒྱལ་པོ་ཟས་གཙང་མ་ཡིན་ནོ། །དེའི་ཚེ་ཡུམ་དུ་གྱུར་ པ་དེ་ནི་ད་ལྟར་ཡུམ་ལྷ་མཛེས་ཡིན་ནོ། །དེའི་ཚེ་བཙུན་མོར་གྱུར་པ་ནི་ད་ལྟར་གྲགས་འཛིན་ཉིད་ཡིན་ནོ། །དེའི་ཚེ་དགེ་སློང་ཨ་ཚུ་ཏ་ཞེས་བྱ་བ་ནི་ད་ལྟར་མཽད་གལ་གྱི་བུ་ཆེན་པོ་ཡིན་ནོ། །དེའི་ཚེ་བརྒྱ་བྱིན་ལྷའི་དབང་པོར་གྱུར་པ་དེ་ནི་ད་ལྟར་ཤཱ་རིའི་བུ་ཡིན་ནོ། །དེའི་ཚེ་ རྔོན་པར་གྱུར་པ་དེ་ནི་ད་ལྟར་ཀུན་དགའ་བོ་ཁྱོད་ཡིན་ནོ། །དེའི་ཚེ་ཁྱེའུ་ཡ་རི་ཞེས་བྱ་བ་ནི་ད་ལྟར་ངའི་སྲས་སྒྲ་གཅན་འཛིན་ཡིན་ནོ། །དེའི་ཚེ་བུ་མོར་གྱུར་པ་དེ་ནི་ཡུམ་སྲུ་གཽ་ཏ་མཱི་ཞེས་བྱ་བ་ཡིན་ནོ། །དེའི་ཚེ་བྲམ་ཟེ་སློངས་མོ་པ་དེ་ནི་ད་ལྟར་ལྷ་སྦྱིན་ཉིད་ཡིན་ནོ། །དེའི་ཚེ་བྲམ་ ཟེའི་ཆུང་མར་གྱུར་པ་དེ་ནི་ད་ལྟར་བྲམ་ཟེ་མོ་ཙན་ཙ་མ་ན་ཡིན་ནོ། །དེ་ལྟར་ན་ང་ཤིན་ཏུ་བྱེད་དཀའ་བ་ཡང་གྲངས་མེད་དཔག་ཏུ་མེད། དགེ་བའི་ལས་བྱས་པ་ཡང་གྲངས་མེད་དཔག་ཏུ་མེད་དེ། དེ་བས་མདོ་སྡེ་འདི་དགེ་སློང་དང་བྲམ་ཟེ་ལ་སོགས་པ་ལ་རྒྱས་པར་སྟོན་ཅིག་།བྱང་ 76-1-70b ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་བྱས་པའི་སྦྱིན་པའི་ཕ་རོལ་ཏུ་ཕྱིན་པ་འདི་ལྟ་བུ་དག་ཡིན་ནོ། །འཕགས་པ་རྒྱལ་བུ་དོན་གྲུབ་ཀྱི་མདོ་ཞེས་བྱ་བ་བམ་པོ་གཅིག་པ་རྫོགས་སོ།། །།སྔོན་རྒྱ་ལས་འགྱུར་བའི་བརྡ་རྙིང་པར་འདུག། །། ་་་་་་་་་་་་་ |