།།རྒྱ་གར་སྐད་དུ། དྷརྨ་ས་མུ་དྲ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། ཐེག་པ་ཆེན་པོའི་མདོ་ཆོས་རྒྱ་མཚོ་ཞེས་བྱ་བ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱ་མཚོའི་གླིང་ཕྲན་པོ་ཊ་ལ་ཀའི་རི་ལ་རྒྱལ་བའི་སྲས་ཕྱིར་མི་ལྡོག་པ་ཕལ་པོ་ཆེས་བསྐོར་ཅིང་མདུན་དུ་བྱས་ཏེ་བཞུགས་སོ། །དེ་ནས་བཅོམ་ལྡན་འདས་ཀྱིས་འཇིག་རྟེན་གྱི་དབང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བཀའ་སྩལ་པ།་སྐྱེས་བུ་དམ་པ། ཆོས་ཀྱི་གཏམ་ཅི་འདོད་པ་དྲི་བར་གྱིས་ཤིག་།ཅེས་པ་དང ། བརྩེ་བ་ལ་བསྒྲིབས་པ་མེད་པས་རྣམ་པར་གྲོལ་བ་ཐོབ་པ། འཇིག་རྟེན་གྱི་དབང་པོ་བྱང་ཆུབ་སེམས་དཔས་བཅོམ་ལྡན་འདས་ལ་གསོལ་པ། བཙུན་པ། ཇི་ལྟར་ན། གཞོན་ནུར་གྱུར་པས་བདུད་ལས་རྒྱལ་བ་ལགས། གང་གིས་བྱང་ཆུབ་ཀྱི་སེམས་བསྐྱེད་མ་ཐག་གིས་འདོད་པ་ལ་རྟོག་ཅིང་མི་སྟེན་པ་དང ། མི་འཆང་བ་དང ། ང་རྒྱལ་མེད་པ་དང ། ཤེས་རབ་དང ། ཐབས་ལ་མཁས་པ་དང ། སྟོང་པ་ཉིད་ལ་ཤིན་ཏུ་མོས་པ་དང་ལྡན་ཏེ། ཡོད་པ་དང་མེད་པ་སྤངས་པ་དང ། ཡང་དག་པ་མ་ཡིན་པ་ལ་བརླགས་པས་གྲངས་མེད་པར་འཁོར་བར་གྱུར། ཇི་ལྟར་ན་ 110a ༄#། །དགེ་བར་གསུངས་པའི་ཆོས་དང་འདུལ་བར་རབ་ཏུ་བྱུང་ཞིང་ཡང་དག་པར་རྫོགས་པའི་བསྙེན་པར་རྫོགས་པ་ལགས། འགྲོ་བ་ཐ་དད་པའི་ཆེས་རྣམས་ལས་འདས་པ་དང ། གནས་ངན་ལེན་ལ་བརྟེན་ཅིང་འཇུག་པའི་སེམས་དང ། ཡིད་དང ། ཡིད་ཀྱི་རྣམ་པར་ཤེས་པ་ལས་འདས་ཏེ་མི་གཉིས་པའི་ཆོས་ཐོས་པ་ནི། ཤིན་ཏུ་རབ་ཏུ་བྱུང་བའོ། །སེམས་ཅན་གང་ཐ་དད་པ་འདི་ལྟ་བུས་རབ་ཏུ་བྱུང་བ་དེ་ནི། ཡང་དག་པར་རབ་ཏུ་བྱུང་བའོ། །གང་རབ་ཏུ་བྱུང་ཡང་ཚུལ་ཁྲིམས་དང ། སྤྱོད་ཡུལ་དང ། འཚོ་བ་དང ། ལྟ་བ་དང ། བསམ་པ་ཉམས་པ་སྟེ། དེ་ནི། མགོ་དང་ཁ་སྤུ་བྲེགས་ཀྱང་དོན་མེད་པ་སྟེ། རྙོག་པ་འཆང་བས་རང་རྙོག་པ་དེས་ངན་སོང་དུ་གཞོལ་བ་ཡིན་ནོ། །ངས་དད་བས་བྱིན་པ་སྤྱོད་དུ་གནང་བ་ནི། རིགས་པས་གྲོལ་བ་སྟེ། དགེ་སློང་གང་བརྩོན་པ་མི་འདོར་བ་དེས་གཟུགས་མི་འདོར། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་མི་འདོར། ཕུང་པོ་ལྔ་ཐ་དད་པ་དང ། རིལ་གྱིས་བརྟགས་པའི་རང་བཞིན་བས་ན། མི་རྟག་པ་དང ། སྡུག་བསྔལ་བ་དང ། སྟོང་པ་དང ། བདག་མེད་པར་ལྟ་བ་དེ་དག་ཀྱང་མི་དམིགས་པའི་ཙུལ་གྱིས་ཁམས་དང ། སྐྱེ་མཆེད་རྣམས་མ་ཡིན་པར་སྤྲོ་བ་དམ་པར་བྱེད་པས་ 110b རྟག་ཏུ་སྒོམ་མོ། །སྙིང་པོ་མེད་པ་དང ། འབྲུམ་པ་ཅན། ཟུག་རྡུ་ཅན་དང་ལྡན་པས་སྐྱོན་ཅན། ཕ་རོལ་པོ་སླུ་བའི་ཆོས་ཉིད་ཅེས་སུན་འབྱིན་པ་དེ་དག་ཀྱང་མི་དམིགས་པའི་ཚུལ་དུ་སྦྱོར་བས། གང་ལུས་ཀྱིས་ལུས་ལ་སྲེད་པ་དང ། ལུས་ལ་བྱསྨ་པ་དང ། ལུས་ལ་བདག་ཡིད་ཆེས་པ་དང ། ལུས་ལ་ཞེན་པ་དེ་དག་རབ་ཏུ་སྤོང་ངོ ། །གང་འདི་ལྟ་བུའི་དགེ་སློང་ནི། དགེ་བར་གསུངས་པའི་ཆོས་དང་འདུ་ལས་ལ་རབ་ཏུ་བྱུང་བར་གྱུར། དད་པས་བསྙེན་པར་རྫོགས་པའི་ཡང་དག་པར་རྫོགས་པ་ཡིན་ཏེ།་འདི་ལྟ་བུའི་དགེ་སློང་ནི། ལྷ་དང་འཇིག་རྟེན་དུ་བཅས་པ་རྣམས་ཀྱི་སྦྱིན་གནས་སུ་གྱུར་པའོ། །དེ་ནས་བྱམས་པ་བྱང་ཆུབ་སེམས་དཔས་འཇིག་རྟེན་གྱི་དབང་པོ་བྱང་ཆུབ་སེམས་དཔའ་ལ་སྨྲས་པ། བཅོམ་ལྡན་འདས་ཀྱིས་ཅི་ལས་དགོངས་ཏེ་འགྲོ་བ་ཐ་དད་པའི་ཆོས་རྣམས་ལས་འདས་ཤིང་འཇིག་རྟེན་ལས་འདས་པའི་ཆོས་རྣམས་ཐོབ་པ་དེ་ནི། དགེ་བར་གསུངས་པའི་ཆོས་དང་འདུལ་བ་ལ་རབ་ཏུ་བྱུང་བར་གྱུར། བསྙེན་པར་རྫོགས་པའི་ཡང་དག་པར་རྫོགས་པ་ཞེས་གསུངས། གཞན་གང་ཞིག་རབ་ཏུ་བྱུང་ཞིང་བསྙེན་པར་རྫོགས་ཀྱང་བདག་བསླུས་པ་སྟེ། ཕ་བང་ལྟར་བྱི་བའང་མ་ཡིན། བྱའང་མ་ཡིན་པ་བཞིན་དུ་དེ་ནི། ཁྱིམ་པའང་མ་ཡིན། རབ་ཏུ་ 111a ༄#། །བྱུང་བའང་མ་ཡིན་པས་ན་གླེན་པའི་སྐྱེས་བུ་དེ་དེ་ལྟ་བུའི་ཚུལ་དུ་ཟུངས་ཤིག་།སྐྱེས་བུ་དམ་པ་འགྲོ་བ་ཐ་དད་པའི་ཆོས་དེ་དག་ནི། སྒྱུ་མ་ལྟ་བུ་སྟེ།་དེ་ལས་འདའ་བར་ཡང་མི་ནུས། འགྲོ་བ་ཐ་དད་པའི་ཆོས་ནི། ཡོངས་སུ་མ་རྫོགས་པས་ན་དེ་ལས་འདའ་བར་ཡང་དཀའ། སེམས་ཅན་གྱི་ཁམས་ནི། ཕྱི་ནའང་མེད། ནང་ནའང་མེད་དེ། གཉིས་ཀར་ཡང་དམིགས་སུ་མེད་པས་ན། གང་སེམས་ཅན་གྱི་ཁམས་ཀྱི་དངོས་པོ་དེ་ནི། འགྲོ་བ་ཐ་དད་པའི་ཆོས་ཀྱི་དངོས་པོ་སྟེ། དེ་ལས་འདའ་བར་ཡང་དཀའ་བ་དེ་ལ་ཀྱེ་རྒྱལ་བའི་སྲས། བཅོམ་ལྡན་འདས་ཀྱིས་འགྲོ་བ་ཐ་དད་པའི་ཆོས་ལས་འདས་ཤིང་འཇིག་རྟེན་ལས་འདས་པའི་ཆོས་ཐོབ་པའི་དགེ་སློང་དེ་ནི། རབ་ཏུ་བྱུང་བར་གྱུར། བསྙེན་པར་རྫོགས་པར་ཡང་དག་པར་རྫོགས་པ་སྟེ། དེ་ནི། དད་པས་བྱིན་པ་སྤྱོད་པའི་མཆོད་གནས་སུ་གྱུར་པའོ། །ཞེས་གསུངས་པའང་ཀྱེ་རྒྱལ་བའི་སྲས། རྟེན་པའི་གནས་མེད་ན་དེ་ལ་ཐོབ་པ་གང་ཅི་སྟེ་འཇིག་རྟེན་ལས་འདས་པའི་ཆོས་རྣམས་འཐོབ་པར་འགྱུར་ན། དེ་ནི།་དམིགས་པར་གྱུར་པའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཉིད་ནི། མི་དམིགས་པ་སྟེ། བཅོམ་ལྡན་ 111b འདས་ཀྱིས་ཀྱང་འདི་ལྟར་དགོངས་ནས་འགྲོ་བ་ཐ་དད་པའི་ཆོས་ལས་འདས་ཤིང་འཇིག་རྟེན་ལས་འདས་པའི་ཆོས་ཐོབ་པ་དེ་ནི། དགེ་སློང་ཡང་དག་པར་གྱུར་པ་སྟེག་དད་པས་བྱིན་པ་སྤྱོད་པའི་མཆོད་གནས་སོ། །དེ་ནས་བྱམས་པ་བྱང་ཆུབ་སེམས་དཔས་འཇིག་རྟེན་གྱི་དབང་པོ་བྱང་ཆུབ་སེམས་དཔའ་ལ་སྨྲས་པ། བཅོམ་ལྡན་འདས་ཀྱིས་ཅི་ལས་དགོངས་ཏེ་བརྩོན་པ་མི་འདོར་བའི་དགེ་སློང་གང་གིས་གཟུགས་མི་འདོར། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་མི་འདོར་བ་དེ་ནི། རབ་ཏུ་བྱུང་བའི་དགེ་སློང་སྟེ། དེ་ནི། དགེ་བར་གསུངས་པའི་ཆོས་ཀྱི་འདུལ་བ་ལ་ཤིན་ཏུ་རབ་ཏུ་བྱུང་བར་གྱུར་པས་ན། འདི་ལྟ་བུའི་དགེ་སློང་ནི།་དད་པས་བྱིན་པ་སྤྱོད་པའི་མཆོད་གནས་སུ་གྱུར་པའོ། །ཞེས་གསུངས། འཇིག་རྟེན་གྱི་དབང་པོས་སྨྲས་པ། ཀྱེ་རྒྱལ་བའི་སྲས། བཅོམ་ལྡན་འདས་ཀྱིས་ཆོས་ཉིད་ལ་དགོངས་ཏེ་ཆོས་ཀྱི་དབྱིངས་ནང་ནའང་མེད། ཕྱི་ནའང་མེད་དེ། གཉི་གར་ཡང་དམིགས་སུ་མེད་པས་ན། ནད་མེད་པར་བཏགས་པ་དང ། མི་སྐྱེ་བར་བཏགས་པ་དང ། མི་འགག་པར་བཏགས་པ་རྣམས་གདགས་སུ་མེད་པ་སྟེ། སེམས་ཅན་གྱི་ཁམས་མཉམ་པ་བཞིན་དུ་ཆོས་ཀྱི་དབྱིངས་མཉམ་པ་ཉིད། 112a ༄#། །ཆོས་ཀྱི་དབྱིངས་མཉམ་པ་བཞིན་དུ་སེམས་ཅན་གྱི་ཁམས་མཉམ་པ་ཉིད་དེ། སེམས་ཅན་གྱི་ཁམས་མཉམ་པ་ཉིད་དང ། ཆོས་ཀྱི་དབྱིངས་མཉམ་པ་ཉིད་དུ་མི་གཉིས་སྟེ། གཉིས་སུ་མེད་དོ། །དེ་མི་གཉིས་ཏེ་གཉིས་སུ་མེད་པས་ན། དེ་ལ་དོར་བའང་མེད། མི་དོར་བའང་མེད། གང་དོར་བའང་མེད།་མི་དོར་བའང་མེད་པས་ན། དེ་ལ་འདའ་བ་དང ། ཐོབ་པར་མི་ནུས་ཏེ། བཅོམ་ལྡན་འདས་ཀྱིས་ཀྱང་འདི་ལྟར་དགོངས་ནས་གདགས་སུ་མེད་པའི་དགེ་སློང་བཏགས་པ་ལ་མི་འཇུག་གོ་།གང་ཡི་གེ་མེད་པའི་དགེ་སློང་ཡི་གེ་ལས་འདས་པ་སྟེ། དེ་ལ་གྲངས་ཀྱིས་བསྟན་པར་ཡང་མི་རུང་སྟེ། དེ་ནི། མི་འོང ། མི་འགྲོ། །མི་གནས།་མི་འདུག་།ཉལ་བར་ཡང་མི་རྟོག་གོ། ཞི་བ་དང ། ཉེ་བར་ཞི་བ་རྣམས་མི་དམིགས་པའི་དགེ་སློང་ལ་བརྟགས་པ་སྟེ། སྤྱོད་པ་རྣམས་ཀྱང་བརྟགས་པའོ། ། ལོག་པ་ལ་རྣམ་པ་མང་དུ་རྟོག་པའི་དགེ་སློང་སྤྱོད་པ་ནི། མ་བརྟགས་པའོ། །བཅོམ་ལྡན་འདས་ཀྱིས་འདི་ལྟར་དགོངས་ནས་འདི་ལྟ་བུའི་དགེ་སློང་ནི། དད་པས་སྤྱིན་པ་སྤྱོད་པའི་སྦྱིན་གནས་སུ་གྱུར་པའོ། །དེ་ནས་བཅོམ་ལྡན་འདས་ཀྱིས་སྤྱན་རས་གཟིགས་ཀྱི་དབང་པོ་བྱང་ཆུབ་སེམས་དཔའ་ལ་དགེ་བ་བྱིན་ཏེ། ངས་དགོངས་ 112b ཏེ་བཤད་པ་བཞིན་དུ་སྐྱེས་བུ་དམ་པ་ཁྱོད་ཀྱིས་བསྟན་པ་ནི། དགེའོ་དགེའོ། །དགེ་བར་གསུངས་པའི་ཆོས་ཀྱི་འདུལ་བ་ལ་རབ་ཏུ་བྱུང་བ་འདི་བླ་ན་མེད་པ་དམ་པའི་ཆོས་ཀྱི་ཕྱག་རྒྱ་སྟེ། འདི་ཚུལ་ཁྲིམས་ཉམས་པ་དང ། མ་དུལ་བ་དང ། ང་རྒྱལ་མངོན་པར་བྱེད་པ་རྣམས་ཀྱི་མདུན་དུ་མི་བཤད་པར་གྱིས་ཤིག་།དེ་ལྟ་བུ་དེ་དག། རྣམས་ཀྱི་སྙེམས་པ་སྤང་པའི་ཕྱིར་ཕྱག་རྒྱ་འདི་ལ་གང་གིས་ཡང་དག་པ་ཇི་ལྟ་བ་བཞིན་དུ་ཤེས་རབ་ཀྱིས་བལྟས་ཤིང་མི་དམིགས་པའི་ལུས་མངོན་དུ་བྱས་ན། དེས་ཡིད་ཀྱི་ལུས་མྱུར་དུ་འཐོབ་བོ། །གང་གི་ཡིད་ཀྱི་ལུས་དེས་གྲངས་མེད་པའི་སེམས་ཅན་རྣམས་བྱང་ཆུབ་ཏུ་སྨིན་པར་བྱེད་དོ། །དེ་ནས་ཆོས་ཀྱི་གཞུང་འདི་བཤད་པའི་ཚེ་དགེ་སློང་བདུན་སྟོང་ཟག་པ་མེད་པར་མི་སྐྱེ་བའི་སེམས་རྣམ་པར་གྲོལ་བར་གྱུར། བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར། དམིགས་པ་ཅན་གྱི་དགེ་སློང་ལྔ་བརྒྱ་ཆོས་ཀྱི་གཞུང་འདི་མི་སྒྲུབ་ཅིང་མི་འཇུག་པ་དང ། མ་དད་པས་ན་སྟན་ལས་ལངས་ཏེ་དོང་ངོ ། །བཅོམ་ལྡན་འདས་ངས་དགོངས་ཏེ་གསུངས་པ་འདི་དག་འཇིག་རྟེན་ཐམས་ཅད་ཡིད་མི་ཆེས་པའི་གཉེན་པོ་ཡིན་པས་ན། ཆོས་ཀྱི་གཞུང་འདི་དམིགས་པ་དང་བཅས་པ་རྣམས་མི་མཐུན་པའོ། །ཡོད་པ་མ་ 113a ༄#། །ཡིན་པ་ལ་བརྟེན་པ་རྣམས་དང་མི་འགལ་ཏེ། དགེ་བའི་བཤེས་གཉེན་གྱིས་བཟུང་བ་རྣམས་དང ། ཟབ་མོའི་ཆོས་ལ་མོས་པ་རྣམས་དང ། སྐྱོ་ཞིང་ཆོག་ཤེས་པས་བསྙུངས་ཏེ་དབེན་པ་ལ་མངོན་པར་དགའ་བ་རྣམས་དང ། སྔོན་གྱི་སངས་རྒྱས་རྣམས་ལ་དགེ་བའི་རྩ་བ་བསྐྲུན་པ་རྣམས་ཀྱིས་ངའི་ཆོས་ཀྱི་གཞུང་འདི་ལ་སྟོན་པར་ཤེས་སོ། །ཀྱེ་རྒྱལ་བའི་སྲས། འདི་ལྟ་སྟེ། དཔེར་ན། སྐྱེས་བུ་གང་ཞིག་གཉིད་ཀྱིས་ལོག་པའི་རྨི་ལམ་ན་འགྲོ་བ་མང་པོའི་མདུན་ན་སྨྲ་ཞིང་ཆོས་འཆད་ཀྱང་ཆོས་དེ་འཇིག་རྟེན་ཐམས་ཅད་ལས་མ་གྲགས་ན། ཀྱེ་རྒྱལ་བའི་སྲས། ཅི་འགྲོ་བ་མང་པོ་དེ་རྣམས་ཡོད་དེ། གང་དེས་སངས་རྒྱས་ཀྱི་ཆོས་བཤད་པ་དང་མི་འགལ་བ་སྙམ་དུ་སེམས་སམ། བྱམས་པས་སྨྲས་པ། རྨི་ལམ་ནི། ཡང་དག་པར་མ་མཆིས་པ་སྟེ། འཁྲུལ་བ་ཙམ་ཞིང་མཆིས་པར་བས་ན། དེ་ངན་འགྲོ་ཕལ་པོ་ཆེ་ལ་ཆོས་འཆད་པར་གྱུར་པ་ལྟ་ག་ལ་ཞིག་མཆིས། ཀྱེ་རྒྱལ་བའི་སྲས། དེ་ལྟར་དེ་བཞིན་དུ་ཆོས་ཐམས་ཅད་ནི། རྨི་ལམ་དང་མཚུངས་ཏེ། ཡང་དག་པ་མ་ཡིན་པར་འབྱུང་བར་བྱུང་ནས་ཀྱང་མེད་པར་གྱུར་པ་སྟེ། ཀུན་རྫོབ་ཀྱང་འཁྲུལ་པ་ཙམ་ཞིག་ཡོད་ཀྱི་དོན་དམ་པར་ནི། མ་ཡིན་ནོ། །འཕགས་པའི་ཤེས་རབ་ཀྱིས་ཇི་ལྟ་བ་ 113b མངོན་དུ་བྱས་ན་བསམ་གཏན་སེམས་པའི་བསམ་གཏན་པའང་མི་དམིགས་པ་སྟེ། དེ་ལ་ཆོས་ཀྱི་ཚུལ་ཙམ་ཞིག་ཡོད་ཀྱི་ཀུན་ཏུ་བཏགས་པ་དང ། གཞན་གྱི་དབང་ལས་ཀྱི་རྣམས་ནི། ཡོད་པ་མ་ཡིན་ནོ། །དེ་ལྟར་དེ་བཞིན་དུ་ཆོས་འདི་ནི། འཇིག་རྟེན་པ་ཐམས་ཅད་དང་མི་མཐུན་པའོ། །ཆོས་འདི་དག་ལ་དམིགས་པ་རྣམས་ཀྱིས་ནི། དོན་དམ་པར་འཛིན་གྱི་འཕགས་པའི་རྣམས་ནི། མི་དམིགས་སོ། །བྱིས་པ་རྣམས་མི་ཤེས་པས་དེ་ལ་མངོན་པར་ཞེན་པས་ན། དམྱལ་བ་དང ། ཡི་དྭགས་རྣམས་ཀྱིས་སྡུག་བསྔལ་གྱིས་ཉོན་མོངས་པ་མྱོང་བར་འགྱུར་རོ། །ཆོས་ཀྱི་གཞུང་འདི་ཇི་ལྟ་བ་དེ་ནི། དམིགས་པའོ། །ཇི་ལྟར་དམིགས་པ་དེ་ནི། ཆོས་ཐམས་ཅད་དོ། །དེ་ལྟར་དུས་གསུམ་གྱི་ཆོས་ཐམས་ཅད་མཉམ་པ་ཉིད་དེ། མི་དམིགས་པས་ན་གང་དམིགས་པ་དེ་ནི། རྟགས་པའོ། །གང་རྟོགས་པ་དེ་ནི། ཐོབ་པ། གང་ཐོབ་པ་དེ་ནི། བྱང་ཆུབ། གང་བྱང་ཆུབ་པ་དེ་ནི། དེ་བཞིན་ཉིད། གང་དེ་བཞིན་ཉིད་པ་དེ་ནི། ཡང་དག་པའི་མཐའ། གང་ཡང་དག་པའི་མཐའ་དེ་ནི། སྟོང་པ་ཉིད། གང་སྟོང་པ་ཉིད་དེ་ནི། མཚན་མ་མེད་པ།་གང་མཚན་མ་མེད་པ་དེ་ནི། སྨོན་པ་མེད་པ། གང་སྨོན་པ་མེད་པ་དེ་ནི། དོན་དམ་པ། གང་དོན་དམ་པ་དེ་ནི། ཆོས་ཀྱི་དབྱིངས། གང་ཆོས་ཀྱི་དབྱིངས་དེ་ནི། 114a ༄#། །གཉིས་སུ་མེད་པའི་མཐའ། གང་གཉིས་སུ་མེད་པའི་མཐའ་དེ་ནི། དབུ་མར་སྒྲུབ་པ། གང་དབུ་མར་སྒྲུབ་པ་དེ་ནི། ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་སྐུ་རྟག་པ། བརྟན་པ། མི་འགྱུར་བ་སྟེ། རྟག་པའང་མ་ཡིན། མི་རྟག་པའང་མ་ཡིན་ཏེ། དེ་ནི། གདགས་པའང་མ་ཡིན། མི་གདགས་པའང་མ་ཡིན། གང་གདགས་པའང་མ་ཡིན། མི་གདགས་པའང་མ་ཡིན་པ་དེ་ནི། འཇིག་རྟེན་པའང་མ་ཡིན། འཇིག་རྟེན་ལས་འདས་པའང་མ་ཡིན།་གང་འཇིག་རྟེན་པའང་མ་ཡིན། འཇིག་རྟེན་ལས་འདས་པའང་མ་ཡིན་པ་དེ་ནི། བརྗོད་དུ་མེད་པ། གང་བརྗོད་དུ་མེད་པ་དེ་ནི། ཅུང་ཟད་ཀྱང་མེད་པ ། གང་ཅུང་ཟད་ཀྱང་མེད་པ་དེ་ནི། སེམས་ཅན་རྣམས་ཀྱི་བསོད་ནམས་ཀྱི་ཞིང ། གང་སེམས་ཅན་རྣམས་ཀྱི་བསོད་ནམས་ཀྱི་ཞིང་དེ་ནི། སྟོན་པ། གང་སྟོན་པ་དེ་ནི། རྣམ་པར་མི་རྟོག་པ། གང་རྣམ་པར་མི་རྟོག་པ་དེ་ནི། དམིགས་པ་མེད་པ། གང་དམིགས་པ་མེད་པ་དེ་ནི། མི་འགྱུར་བ་གྲུབ་པ། གང་མི་འགྱུར་བ་གྲུབ་པ་དེ་ནི། ཡིད་བཞིན་ནོར་བུ་རིན་པོ་ཆེ་སྟེ། འདུལ་བའི་སེམས་ཅན་རྣམས་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཇི་ལྟར་མོས་པ་ཐམས་ཅད་བྱེད་དོ། །དེ་ནས་བྱང་ 114b ཆུབ་སེམས་དཔའ་མང་པོ་དེ་དག་གི་ཚིག་མཐུན་པར་སྨྲས་པ། ཆོས་ཀྱི་གཞུང་འདི་གང་ན་སྤྱོད་པའི་ས་ཕྱོགས་དེ་རྡོ་རྗེ་ལྟ་བུ་སྟེ། སངས་རྒྱས་དང ། བྱང་ཆུབ་སེམས་དཔའ་རྣམས་བཞུགས་པས་ན། སེམས་ཅན་དེ་མྱུར་དུ་མངོན་པར་ཤེས་པ་དང ། དབང་པོ་རྣོན་པོར་འགྱུར་བར་རིག་པར་བྱའོ། །གང་ཞིག་ཆོས་ཀྱི་གཞུང་འདི་ལ་བརྗོད་དམ།་འཛིན་ཏམ། ཀློག་གམ། ཆུབ་པར་བྱེད་དམ། ཁ་ཏོན་དུ་བྱེད་དམ། ཚུལ་བཞིན་དུ་ཡིད་ལ་བྱེད་ན། དེ་བདུད་ཀྱི་དབང་དུ་མི་འགྱུར་རོ། །བཅོམ་ལྡན་འདས་ཀྱིས་དགོངས་པ་འདི་བཤད་ནས་འཇིག་རྟེན་གྱི་དབང་པོ་དང ། བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་དང ། ཉན་ཐོས་ཆེན་པོ་རྣམས་དང ། ལྷ་དང་མིར་བཅས་པ་དང ། ལྷ་མ་ཡིན་དང ། དྲི་ཟའི་འཇིག་རྟེན་རྣམས་བཅོམ་ལྡན་འདས་ཀྱིས་བཤད་པ་ལ་མངོན་པར་དགའོ། །ཐེག་པ་ཆེན་པོའི་མདོ་ཆོས་རྒྱ་མཚོ་ཞེས་བྱ་བ་རྫོགས་སོ།།་ |