།།རྒྱ་གར་སྐད་དུ། ཤྲཱི་ཛྙཱ་ན་གརྦྷ་ནཱ་མ་ཡོ་གི་ནཱི་མ་ཧཱ་ཏནྟྲ་རཱ་ཛ་ཡ་ཏི་རཱ་ཛ། བོད་སྐད་དུ། དཔལ་ཡེ་ཤེས་སྙིང་པོ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་ཀྱི་ 473a ༄#། །རྒྱལ་པོའི་རྒྱལ་པོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རི་རབ་ཀྱི་རྩེ་མོར་བྱེ་བ་ཕྲག་བདུན་ཅུ་རྩ་གཉིས་ཀྱི་གྲངས་ཀྱི་མཁའ་འགྲོ་དང ། མཁའ་འགྲོ་མས་ཡོངས་སུ་བསྐོར་ནས་བྷ་གུ་ལ་ཆེན་པོའི་སྐྱེད་མོས་ཚལ་ན་བཞུགས་སོ། །དེར་བཅོམ་ལྡན་འདས་ཀྱིས་ལྷ་མོ་ལེགས་དགྱེས་དབང་མོ་དང་ལྷན་ཅིག་རོལ་པ་མཛད་པའི་ཚེ་རྗེ་བཙུན་ལ་བ་སྤུ་ལངས་སོ། །དེའི་དུས་སུ་བཅོམ་ལྡན་འདས་མ་ལེགས་དགྱེས་ཀྱི་སྦྱོར་བ་ལས་ལངས་ཏེ། ལན་གསུམ་དུ་བསྐོར་བ་བྱས་ནས་ཞབས་ལ་མགོ་བོས་ཕྱག་བཙལ་ཏེ། འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས། ཅིའི་ཕྱིར་ཉིད་ཀྱི་སྐུ་ལ་བ་སྤུ་ལངས་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་བཅོམ་ལྡན་འདས་མ། དེ་དགོས་པ་ཅི་ཞིག་ཡོད། གང་གི་དོན་གྱི་ཕྱིར་ངའི་སྐུ་ལ་བ་སྤུ་ལངས་པ་དེ་ནི། གསང་བ་ཆེན་པོའོ། །བཅོམ་ལྡན་འདས་མས་གསོལ་པ། གསང་བ་ཆེན་པོ་ལགས་མོད་ཀྱང་མཆོག་གི་དབང་ཕྱུག་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། ང་ཡིས་ལེགས་དགྱེས་ཀྱི་བདེ་བ་ཉམས་སུ་མྱོང་ཞིང་སྟེང་དང་འོག་གནས་པའི་སྐྱེད་བྱེད་མ་རྣམས་ལ་འདུས་པ་ལས་བ་སྤུ་ལངས་སོ། །བཅོམ་ལྡན་འདས་མ་ས་གསོལ་པ། སྟེང་དང་འོག་ན་གནས་པའི་དགའ་པ་ 473b སྐྱེད་བྱེད་མ་རྣམས་ལ་འདུས་པ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། སྟེང་དང་འོག་ན་གནས་པའི་དགའ་བ་སྐྱེད་བྱེད་མ་རྣམས་ལ་གང་ཞིག་འདུས་པ་དེ་ཅིའི་ཕྱིར་མི་ཤེས་སོ། །བཅོམ་ལྡན་འདས་མས་གསོལ་པ། བཅོམ་ལྡན་འདས། དེ་སྐད་དུ་དེ་ལྟར་ནི་ལགས་མོད་ཀྱི། འོན་ཀྱང་མི་ཤེས་པའི་ཕྱིར་བཅོམ་ལྡན་འདས་ཀྱི་དྲུང་དུ་བདག་གིས་ནི་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། །འདི་ནི། སོ་སོ་རང་གི་ཉམས་སུ་མྱོང་བ་ཡིན་མོད་ཀྱང ། འོན་ཀྱང་ཁྱོད་ཀྱི་ངོར་ངས་བཤད་པར་བྱ་སྟེ། དགའ་བྲལ་གྱི་དགའ་བ་འབྱུང་བའི་སྟོང་ཕྲག་བདུན་ཅུ་རྩ་གཉིས་ཀྱི་བདག་ཉིད་ཀྱི་རྩ་ཡི་དྲ་བ་འདར་ཞིང་གཡོས་པ་ཙམ་གྱིས་ཚུལ་ཤར་རོ། །ཚུལ་ཤར་བས་ཐིག་ལེའི་རྒྱལ་པོ་ཞུའོ། །ཐིག་ལེའི་རྒྱལ་པོ་ཞུ་པ་ལས་སྟེང་དང་འོག་ན་གནས་པའི་དགའ་བ་སྐྱེད་བྱེད་མ་རྣམས་ལ་འདུས་པའོ། །དེ་སྐད་ཅེས་ཐོས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་དམ་དུ་འཁྱུད་པ་བྱས་ནས་མ་མཆུའི་བདུད་རྩིའི་བཏུང་བས་དགྱེས་པར་བྱས་ཏེ་ཕྱིན་ནས་ཡང་ཞུ་བ་མཛད་དོ། །ཀྱེ་བཅོམ་ལྡན་འདས། དགའ་བྲལ་གྱི་དགའ་པའི་དུས་སུ་འདུས་པ་ལགས་ན། དེ་ལ་སྦྱོར་བ་མེད་པ་གང་གི་དུས་ལགས། བཅོམ་ལྡན་འདས་ཀྱིས་བཀའ་སྩལ་པ། དྲིས་པ་ཡང་དག་དགྱེས་པ་མཆོག་།སངས་རྒྱས་རྣམས་ཀྱིས་རྙེད་དཀའ་བ། །དགའ་བྲལ་དུས་སུ་སྦྱོར་བ་མེད།། 474a ༄#། །དེ་ནི་དགའ་བྲལ་དགའ་བ་མིན། །བཅོམ་ལྡན་འདས་མས་གསོལ་པ། ཀྱེ་བཅོམ་ལྡན་འདས། དགའ་བྲལ་གྱི་དགའ་བ་དང ། དགའ་བྲལ་ལ་ཁྱད་པར་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། དགའ་མོ། ཁྱོད་ཅིའི་ཕྱིར་དེ་སྐད་ཅེས་སྨྲ། དགའ་བྲལ་གྱི་དགའ་བ་དང ། དགའ་བྲལ་གཉིས་ལ་ཁྱད་པར་ཆེར་ཡོད་པ་དེ་བརྗོད་པར་བྱའོ། །གང་ཞིག་དགའ་བྲལ་གྱི་དགའ་བ་དེ་ཞུ་བ་གནས་པ་སྟེ། འཕོ་བ་ལ་སོགས་པ་དང་བྲལ་བའོ། །གང་ཞིག་དགའ་བྲལ་དེ་ནི། དགའ་བ་དང་བྲལ་བ་འཕོ་ཞིང་འཇིག་པའོ། །དགའ་བྲལ་གྱི་དགའ་བ་ནི། ཞུ་བ་གནས་པ་སྟེ། འཕོ་བ་ལ་སོགས་པ་དང་བྲལ་བའི་ཕྱིར་རང་གིས་ཉམས་སུ་མྱོང་བའི་ངོ་བོའོ། །བཅོམ་ལྡན་འདས་མས་གསོལ་པ།་རང་གི་ཉམས་སུ་མྱོང་བའི་མཚན་ཉིད་དགའ་བྲལ་གྱི་དགའ་བ་དང ། ལྷན་ཅིག་སྐྱེས་པའི་དགའ་བའི་ཁྱད་པར་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ལྷན་ཅིག་སྐྱེས་པའི་དགའ་བ་ནི། དངོས་པོ་ཡང་མ་ཡིན། དངོས་པོ་མ་ཡིན་པ་ཡང་མ་ཡིན། གསང་བ་ཡང་མ་ཡིན། ཡེ་ཤེས་ཀྱང་མ་ཡིན། ཡེ་ཤེས་ལས་བྱུང་བ་ཡང་མ་ཡིན། སྲིད་པ་ཡང་མ་ཡིན། མྱ་ངན་ལས་འདས་པ་ཡང་མ་ཡིན། ཆར་ཡང་མ་ཡིན། ཐིག་ལེ་ཡང་མ་ཡིན། ཚུལ་ཡང་མ་ཡིན། ཚུལ་ཙམ་ཡང་མ་ཡིན། མཆོག་ཀྱང་མ་ཡིན། གཞན་ 474b མཆོག་ཀྱང་མ་ཡིན། ཤར་བ་ཡང་མ་ཡིན། ནུབ་པ་ཡང་མ་ཡིན། གཟུགས་ཀྱང་མ་ཡིན། སྒྲ་ཡང་མ་ཡིན། དྲི་ཡང་མ་ཡིན། རོ་ཡང་མ་ཡིན། རེག་བྱ་ཡང་མ་ཡིན། ཡི་གེ་ཡང་མ་ཡིན། རྟེན་ཡང་མ་ཡིན། བརྟེན་པ་ཡང་མ་ཡིན། ཁམས་ཀྱང་མ་ཡིན། ཤེས་རབ་ཀྱང་མ་ཡིན། ཐབས་ཀྱང་མ་ཡིན། ཐིམ་པ་ཡང་མ་ཡིན། ལོངས་སྤྱོད་ཀྱང་མ་ཡིན། དབང་ཡང་མ་ཡིན། སྤྲུལ་པ་ཡང་མ་ཡིན། ཆོས་ཀྱང་མ་ཡིན། ལོངས་སྤྱོད་ཀྱང་མ་ཡིན། ལུས་ཀྱང་མ་ཡིན། ངག་ཀྱང་མ་ཡིན། ཡིད་ཀྱང་མ་ཡིན། རྣམ་པ་ཐམས་ཅད་དང་རྣམ་པར་བྲལ་བ། མི་བཟད་པ། དྲི་མ་མེད་པ། སྐྱེ་བ་མེད་པ། འགག་པ་མེད་པ། རྟག་ཏུ་ཤར་བའོ། །བཅོམ་ལྡན་འདས་མས་གསོལ་པ། དེ་ལྟ་བུའི་ལྷན་ཅིག་སྐྱེས་པའི་དགའ་བ་གང་ལས་རྙེད། བཅོམ་ལྡན་འདས་ཀྱིས་བཀའ་སྩལ་པ།་དགའ་བྲལ་གྱི་དགའ་བ་ཉམས་སུ་མྱོང་བ་ལས་རྙེད་དེ། དེ་བཞིན་དུ་བསམ་གཏན་ལ་སོགས་པས་མ་ཡིན་ནོ། །བཅོམ་ལྡན་འདས་མས་གསོལ་བ། ལྷན་ཅིག་སྐྱེས་པའི་དགའ་བ་དེ།་དགའ་བྲལ་གྱི་དགའ་བའི་ཉམས་སུ་མྱོང་བའི་རྒྱུ་ལགས་སམ། འབྲས་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ལྷན་ཅིག་སྐྱེས་པའི་དགའ་བའི་རྒྱུ་ཡིན་ཏེ། འབྲས་བུ་ནི།་མ་ཡིན་ནོ། །བཅོམ་ལྡན་འདས་མས་གསོལ་པ། ལྷུན་གྱིས་གྲུབ་པའི་ལྷན་ཅིག་སྐྱེས་པའི་དགའ་བ་འབྱུང་བ་ལ་རྒྱུའི་དངོས་པོས་དགོས་པ་ཅི་མཆིས། རང་བཞིན་མེད་པའི་ 475a ༄#། །ཕྱིར་རོ། །ཇི་ལྟར་སྲེག་པ་ལ་དུད་པ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དེ་སྐད་དུ་སྨྲ་བ་ནི། ཚད་མ་མ་ཡིན་ཏེ། དང་པོར་སྲེག་པ་མེད་པར་དེར་དུད་པ་འབྱུང་བ་གང་ལས་འོང ། དེ་ལྟ་བུའི་རིགས་ལས་ལྷན་ཅིག་སྐྱེས་པའོ། །བཅོམ་ལྡན་འདས་མས་གསོལ་པ། དེ་ལྟར་ལགས་ན་ལྷན་ཅིག་སྐྱེས་པ་ལས་དགའ་བྲལ་གྱི་དགའ་བ་ནི། རྒྱུ་ཡང་ཡིན་ལ་འབྲས་བུ་ཡང་ཡིན་ན། འོན་ཀྱང་འདིར་རྒྱུ་ནི། གཉིས་སུ་དབྱེ་བ་དང ། འབྲས་བུ་ཡང་གཉིས་སུ་དབྱེ་སྟེ། གསལ་བའི་རྒྱུ་དང ། འབྱུང་བའི་རྒྱུའོ།། འབྲས་བུ་ཡང་དེ་བཞིན་ནོ། །བཅོམ་ལྡན་འདས་མས་གསོལ་པ། ཀྱེ་བཅོམ་ལྡན་འདས། གསལ་བའི་རྒྱུ་ཅི་འདྲ་བ་དང ། འབྱུང་བའི་རྒྱུ་ཅི་འདྲ་བ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གསལ་བའི་རྒྱུ་ནི། དགའ་བྲལ་གྱི་དགའ་བ་སྟེ། ཇི་ལྟར་མར་མེ་བཞིན་ནོ། །འབྱུང་བའི་རྒྱུ་ནི། དགའ་པ་ལས་མཆོག་གི་དགའ་བ་སྟེ། ཇི་ལྟར་ས་བོན་ལས་མྱུ་གུ་བཞིན་ནོ། །དགའ་བྲལ་གྱི་དགའ་བ་ནི། གཞན་རྣམས་དང་མི་འདྲ་བའི་ཕྱིར་འབྱུང་བའི་རྒྱུ་མ་ཡིན་ཏེ། དགའ་བ་གཞན་དང་མི་འདྲ་བ་ལས་འབྱུང་བ་ཡིན་ནོ། །དཔལ་ཡེ་ཤེས་སྙིང་པོ་ལས། ལྷན་ཅིག་སྐྱེས་པའི་དགའ་བའི་དོན་ཞེས་བྱ་བའི་ལེའུ་སྟེ་དང་པོའོ།། །།བཅོམ་ལྡན་འདས་མས་གསོལ་པ། གང་ཞིག་ 475b དཔལ་ཕྱག་རྒྱ་ཆེན་པོའི་ཐིག་ལེའི་རྒྱུད་ཀྱི་རྒྱལ་པོ་ལས་ཕྱག་རྒྱ་ཆེན་པོའི་དོན་བསྟན་པ་དེ་ཐོབ་པར་བྱ་བའི་དོན་དུ་དེའི་ཐབས་བཅོམ་ལྡན་འདས་ཀྱིས་བདག་ལ་བཀའ་སྩལ་དུ་གསོལ་བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་བདག་ལ་ཞུས་པ་གང ། །ཉོན་ཅིག་ལྷ་མོ་རབ་ཏུ་བཤད། །ཕྱག་རྒྱ་ཆེན་པོ་ནི། འདིར་བཞིར་དབྱེ་བ་སྟེ། ལས་ཀྱི་ཕྱག་རྒྱ་དང ། དམ་ཚིག་གི་ཕྱག་རྒྱ་དང ། ཡེ་ཤེས་ཀྱི་ཕྱག་རྒྱ་དང ། ཆོས་ཀྱི་ཕྱག་རྒྱའོ། །གང་ཞིག་ལས་ཀྱི་ཕྱག་རྒྱ་ནི། སྣང་བའི་རང་བཞིན་དགའ་བའི་ལོ་དང་ལྡན་པའོ། །གང་ཞིག་དམ་ཚིག་གི་ཕྱག་རྒྱ་དེ་ནི། སྣང་བ་མཆེད་པའི་རང་བཞིན་སྐྱེ་མཆེད་ཀྱི་ལོ་དང་ལྡན་པའོ། །གང་ཞིག་ཡེ་ཤེས་ཀྱི་ཕྱག་རྒྱ་དེ་ནི། སྣང་བ་ཐོབ་པའི་རང་བཞིན་ཁམས་ཀྱི་ལོ་དང་ལྡན་པའོ། །གང་ཞིག་ཆོས་ཀྱི་ཕྱག་རྒྱ་དེ་ནི། འོད་གསལ་གྱི་རང་བཞིན་ནོ། །ཕྱག་རྒྱ་ཆེན་པོ་དེ་ཡང་འོད་གསལ་མ་ཡིན་པ་གཞན་ལས་མི་རྙེད་དོ། །བཅོམ་ལྡན་འདས་མས་གསོལ་པ། བཅོམ་ལྡན་འདས། འོད་གསལ་ཞེས་བགྱི་པ་ཇི་ལྟར་ལགས། གང་དུ་གནས་པ་ཡིན། བཅོམ་ལྡན་འདས་ཀྱིས་བཀའ་སྩལ་པ། འོད་གསལ་ནི། ནམ་མཁའི་དབུས་སུ་གནས་པའི་ཐིག་ལེའི་ངོ་བོ་སྟེ།་དེས་ནི། ཕྱག་རྒྱ་ཆེན་པོ་རྙེད་པར་འགྱུར་རོ། །བཅོམ་ལྡན་འདས་མས་གསོལ་པ། རེ་ཞིག་འོད་གསལ་ནི། ཇི་ལྟར་རྙེད་པ་ལགས། བཅོམ་ལྡན་འདས་ཀྱིས་བཀའ་སྩལ་པ་ 476a ༄#། །ལས་དང་དམ་ཚིག་དང་ཡེ་ཤེས་དང་ཆོས་ཀྱི་ཕྱག་རྒྱས་སོ། །བཅོམ་ལྡན་འདས་མས་གསོལ་པ། ཕྱག་རྒྱ་རྣམས་ཉིད་ནི། གང་ལས་རྙེད་པར་འགྱུར་ལགས་བཅོམ་ལྡན་འདས་ཀྱིས་བཀའ་སྩལ་པ། དབང་བསྐུར་བའི་ཕྱིའི་ཕྱག་རྒྱ་ལ་བརྟེན་ནས་ནང་གི་ཕྱག་རྒྱ་རྣམས་རྙེད་དོ། །བཅོམ་ལྡན་འདས་མས་གསོལ་པ། ཕྱི་དང་ནང་གི་ཕྱག་རྒྱ་དེ་གནས་གང་དུ་གནས་པར་འགྱུར། མཚན་ནི། ཇི་ལྟ་བུ། རང་གི་ངོ་བོ་ནི། ཇི་ལྟ་བུ། དེར་དབང་ནི། ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། འདིར་དབང་ནི།་བཞི་སྟེ། སློབ་དཔོན་དང ། གསང་བ་དང ། ཤེས་རབ་ཡེ་ཤེས་དང ། དེ་ལྟར་དེ་བཞིན་བཞི་པའོ། །སློབ་དཔོན་གྱི་དབང་ནི། དགའ་བའི་ལོ་དང་ལྡན་པ་གཞོན་ནུ་མ་ལ་རྡོ་རྗེ་དང་དྲིལ་བུ་མཉམ་པར་ལྡན་པས་ནུ་མ་དང་འཛའ་གུ་ནི་རེག་པར་བྱས་པས་སོ། །གསང་བའི་དབང་ནི། སྐྱེ་མཆེད་ཀྱི་ལོ་དང་ལྡན་པའི་གཞོན་ནུ་མ་ལ་ནང་གི་རྐན་ཡོངས་སུ་འཇིབས་པ་ལས་སོ། །ཤེས་རབ་ཡེ་ཤེས་ནི། ཁམས་ཀྱི་ལོ་དང་ལྡན་པའི་གཞོན་ནུ་མ་ལ་ལྷན་ཅིག་སྲུབ་དང་སྲུབ་པའི་ཐབས་ཆེན་པོ་ལས་ཞུ་བ་འཕོ་བའི་དུས་སུ་ཡེ་ཤེས་ཉམས་སུ་མྱོང་བས་སོ། །དེ་ལྟར་དེ་བཞིན་བཞི་པ་ནི། ཤེས་རབ་ཡེ་ཤེས་དེ་ཉིད་བརྟན་པར་བྱེད་པ་སྟེ། དེའི་ཕྱིར་དེ་ལྟར་དེ་བཞིན་ཞེས་བསྟན་པ་ཡིན་ནོ། །བརྟན་པར་བྱས་པ་ཙམ་གྱིས་ 476b དྲུག་ཅུ་རྩ་བཞི་འདབ་མའི་ནང་དུ་ཕྱག་རྒྱ་བཞི་མཉམ་པར་སྦྱོར་བར་འགྱུར་བ་ཡིན་ནོ། །དེ་ཡང་འཇུག་པ་དང ། གནས་པ་དང ། འགྲོ་བ་དང ། རྟེན་པའི་ངོ་བོས་སོ། །འཇུག་པ་ནི། གཏུམ་མོའོ། །གནས་པ་ནི། རང་བཞིན་གྱི་རྟོག་པ་མེད་པའོ། །འགྲོ་བ་ནི། ཕྱག་དོང་མའི་རྩའོ། །རྟེན་པའི་ངོ་བོས་སྒྲོག་མའི་རྩའོ། །དོན་དམ་པར་ཕྱག་རྒྱ་ཆེན་པོ་གཅིག་པུ་སྟེ། འོན་ཀྱང་ལས་ཀྱི་རང་བཞིན་གྱིས་བཞིར་དབྱེའོ། །བཅོམ་ལྡན་འདས་མས་གསོལ་པ། བཅོམ་ལྡན་འདས། དེ་རྣམས་ལ་ལས་ཀྱི་རང་བཞིན་གྱི་བྱེ་བྲག་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཞི་བ་དང ། རྒྱས་པ་དང ། དབང་དང ། དྲག་པོ་སྟེ། ལས་ཀྱི་བྱེ་བྲག་གིས་ཕྱག་རྒྱ་ཆེན་པོ་ཐོབ་པའོ། །བཅོམ་ལྡན་འདས་མས་གསོལ་པ། བཅོམ་ལྡན་འདས། ཞི་བ་དང ། རྒྱས་པ་དང ། དབང་དང ། དྲག་པོ་རྣམས་ཀྱི་མིང་དང ། སྤྱོད་པ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཞི་བ་ནི། དགོད་པའོ། །རྒྱས་པ་ནི། ལྟ་བའོ། །དབང་ནི། ལག་པས་འཁྱུད་པའོ། །དྲག་པོ་ནི། གཉིས་ཀྱི་གཉིས་སྙོམས་པར་འཇུག་པའོ། །དེ་རྣམས་ལ་སྤྱོད་པའི་ཚངས་པའི་གནས་པའི་སྤྱོད་པ་དང ། བརྟུལ་ཞུགས་ཆེན་པོའི་སྤྱོད་པ་དང ། གོས་བྲལ་གྱི་བརྟུལ་ཞུགས་ཀྱི་སྤྱོད་པ་དང ། རང་དབང་གི་སྤྱོད་པས་སོ། །དཔལ་ཡེ་ཤེས་སྙིང་པོ་ལས། ཕྱག་རྒྱ་ཆེན་པོ་དང ། དབང་བསྐུར་བའི་དོན་ཞེས་བྱ་བའི་ལེའུ་སྟེ་གཉིས་པའོ།། །། 477a ༄#། །བཅོམ་ལྡན་འདས་མས་གསོལ་བ། དབང་བསྐུར་བའི་དུས་སུ་དཀྱིལ་འཁོར་རྣམས་ཇི་ལྟ་བུ། སློབ་དཔོན་ནི། ཇི་ལྟ་བུས་བྱ། བཅོམ་ལྡན་འདས་ཀྱིས་བཀའ་སྩལ་པ། སློབ་དཔོན་གྱི་དབང་བསྐུར་བའི་དུས་སུ་རྡུལ་ཚོན་ལ་སོགས་པའི་དཀྱིལ་འཁོར་རོ། །གསང་བའི་དབང་ལ་བླ་མ་ལ་དབུལ་བའི་དཀྱིལ་འཁོར་ནི། རང་བྱུང་གི་མེ་ཏོག་དང་ལྡན་པའི་མེ་ཏོག་གིས་སོ། །ཤེས་རབ་ཡེ་ཤེས་ཀྱི་དབང་གི་དུས་སུ་བྱང་ཆུབ་ཀྱི་སེམས་དང་ལྡན་པའི་བཞི་མཉམ་གྱིས་སོ། །བཞི་པའི་དུས་སུ་གཞན་མ་ཡིན་པ་བྱང་ཆུབ་ཀྱི་སེམས་འབའ་ཞིག་དཀྱིལ་འཁོར་གྱིས་སོ། །དེ་ལ་སློབ་དཔོན་ནི། མཚན་ཐམས་ཅད་ཀྱིས་བརྒྱན་པ་དང ། རྒྱུད་ཐམས་ཅད་མཁྱེན་པ་དང ། དབང་བསྐུར་བ་ལ་མཁས་པ་དང ། ཐུགས་རྗེ་དང་ལྡན་པ་དང ། རྒྱ་ཆེ་བ་ལ་མོས་པ་དང ། སྔགས་ལ་སོགས་པ་དང ། རབ་ཏུ་སྦྱོར་བ་ལ་མཁས་པ་དང ། དངོས་གྲུབ་ཐོབ་པའི་སློབ་དཔོན་ལ་སོགས་པས་དབང་བསྐུར་བ་དང ། དངོས་གྲུབ་ཐོབ་པའི་བླ་མའི་བཀའི་གནང་བ་ཐོབ་པ་དང ། ཡང་ན་རང་ཉིད་དངོས་གྲུབ་ཐོབ་པ་དེས་ནི། དཀྱིལ་འཁོར་དང ། དབང་བསྐུར་བའི་རིམ་པ་དང།་སྒྲུབ་ཐབས་ལ་སོགས་པ་བྱའོ། །དེ་བཞིན་དུ་རྟོག་གེ་པ་ལ་སོགས་པས་ནི། མ་ཡིན་ནོ། །བཅོམ་ལྡན་འདས་མས་གསོལ་པ། ཀྱེ་བཅོམ་ལྡན་འདས་སློབ་དཔོན་གྱི་ནི་དབང་ 477b བསྐུར་པའི། །དཀྱིལ་འཁོར་མཚན་མ་ཇི་ལྟར་ལགས། །དཀྱིལ་འཁོར་གྱི་ནི་ཚད་ཇི་ཙམ། །གཙོ་བོ་བདག་པོ་ཡང་ནི་གང ། །ངོ་བོ་གང་གིས་སློབ་མ་གཟུང ། །ལས་ཀྱི་སློབ་དཔོན་ཇི་ལྟ་བུ། །མཆོད་པ་རྣམས་ནི་ཇི་ལྟར་ལགས། །བླ་མའི་ཡོན་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱིས་བདག་ལ་གང་ཞུས་པ། །ལྷ་མོ་ཉོན་ཅིག་བདག་གིས་བཤད། །མཚན་མའི་སློབ་མའི་མོས་པས་སོ། །ཡང་ན་ཇི་ལྟར་དཀྱིལ་འཁོར་གྱི། །སློབ་དཔོན་གྱི་ཡིད་དཔའོ། །དེ་བཞིན་མཐེ་བོའི་སོར་གསུམ་ལྷག་པའི་ཁྲུ་ཕྱེད་དང་དོའི་དཀྱིལ་འཁོར་བྱའོ། །དེ་ནི། རེ་ཞིག་མཚན་མའི་དཀྱིལ་འཁོར་ཡིན་ཏེ། དེའང་རྣལ་འབྱོར་མའི་རྒྱུད་ཀྱི་གོ་རིམ་གྱིས་བྱའོ། །དེ་ཡང་ཡན་ལག་ཐམས་ཅད་ཚང་བའོ། །དེ་ཡི་དབུས་སུ་ཉི་མའི་དཀྱིལ་འཁོར་བྲིའོ། །དེའི་སྟེང་དུ་སྣ་ཚོགས་རྡོ་རྗེ་སྟེ། སྣ་ཚོགས་རྡོ་རྗེའི་ལྟེ་བའི་ནང་དུ་ཧཱུཾ་གཾ་རྣམ་པ། ཕྱི་རོལ་ཏུ་སྣ་ཚོགས་པདྨ་འདབ་མ་བརྒྱད་དང་ལྡན་པ། རྡོ་རྗེའི་ཕྲེང་བས་རྣམ་པར་བརྒྱན་པར་བྱའོ། །དེའི་ཤར་གྱི་འདབ་མ་ལ་འཁོར་ལོ་མདོག་དཀར་པོ་དང ། ལྷོར་རིན་པོ་ཆེ་མདོག་སེར་པོ་དང ། ནུབ་ཏུ་པདྨ་མདོག་དམར་པོ་དང ། བྱང་དུ་རལ་གྲི་མདོག་ལྗང་གུ་དང ། མེའི་མཚམས་སུ་རིན་པོ་ཆེའི་ཤིང་དང ། ཆུའི་མཚམས་སུ་ཟེའུ་འབྲུ་དང ། རླུང་གི་མཚམས་སུ་རྒྱལ་མཚན་དང ། དབང་ལྡན་གྱི་མཚམས་སུ་ཀ་པཱ་ལའོ། །ཤར་སྒོར་རྡོ་རྗེ་ལྕགས་ཀྱུ་དང ། ལྷོར་ཞགས་པ་ 478a ༄#། །དང ། ནུབ་ཏུ་རྡོ་རྗེ་ལྕགས་སྒྲོག་དང ། བྱང་དུ་རྡོ་རྗེ་དྲིལ་བུའོ། །མཚམས་རྣམས་སུ་མེ་ཏོག་གི་ཆུན་འཕྱང་དང ། བདུག་སྤོས་ཀྱི་རེང་བུ་དང ། མར་མེ་དང ། དྲིའི་དུང་ཆོས་སོ། །དེའི་ཕྱི་རོལ་ཏུ་རྡོ་རྗེ་ཕྲེང་བའོ། །སྣ་ཚོགས་རྡོ་རྗེའི་ལྟེ་བའི་ནང་དུ་ཧཱུཾ་གི་རྣམ་པ་ཡོངས་སུ་གྱུར་པ་ལས་རྡོ་རྗེ་འཛིན་པ་ཆེན་པོ་ཞལ་གསུམ་པ། སྤྱན་གསུམ་པ། ཕྱག་བཞི་པ།་རྒྱལ་པོའི་བཞུགས་ཐབས་ཀྱིས་གནས་པ། རང་འོད་ཀྱི་རིག་མས་འཁྱུད་པ། ནམ་མཁའ་སྔོན་པོའི་མདོག་ཅན། རྒྱན་ཐམས་ཅད་ཀྱིས་བརྒྱན་པ། བརྒྱད་གཉིས་ཀྱི་ལོ་དང་ལྡན་པ།་ཉི་མ་བྱེ་བའི་འོད་དང་ལྡན་པ། རལ་པའི་དབུ་རྒྱན་གྱིས་བརྒྱན་པ། རྡོ་རྗེ་དང ། དྲིལ་བུ་དང ། རྔེའུ་ཆུང་དང ། ཀ་པཱ་ལ་དང ། ཁ་ཊྭཱཾ་ག་འཛིན་པའི་བདག་པོའོ། །མཚན་མའི་སྐབས་སུ་དབུས་སུ་རྡོ་རྗེ་དང ། དྲིལ་བུས་བྱའོ། །དེ་ནས་སློབ་མ་སྟ་གོན་བྱས་ལ་སྨན་སྣ་ཚོགས་ཀྱིས་ཁྲུས་བྱས་པ། རྣམ་པར་སྣང་མཛད་ཀྱི་ངོ་བོས་སློབ་མ་གཟུང་བར་བྱའོ། ། ལས་ཀྱི་སློབ་དཔོན་ནི། བསྟན་བཅོས་ཐམས་ཅད་ལ་མཁས་ ། སེར་ནྶ་མེད་པ། མཚན་མ་ཅུང་ཟད་ཐོབ་པའོ། །དེར་མཆོད་པ་པོ་རྣམས་ཤིན་ཏུ་མཁས་པ། ཆགས་པ་ལ་སོགས་པ་དང་བྲལ་བ། མཚན་མ་རྙེད་པ། དབང་གསུམ་ཐོབ་པའོ། །སློབ་དཔོན་ལ་དབང་བསྐུར་བའི་དུས་སུའམ། རྒྱུད་ཐོས་པའི་དུས་སུ་ཤིན་ཏུ་གཅེས་པའི་ཆུང་མ་དང ། བུ་མོ་དང ། 478b གཞན་ཡང་གསེར་དང ། མུ་ཏིག་དང ། ནོར་བུ་དང ། གླང་པོ་ཆེ་དང ། རྟ་དང ། ཞིང་དང ། བྲན་དང ། བྲན་མོ་དང ། །ན་བཟའ་དུ་མ་ལ་སོགས་པ་ཅི་ཙམ་ནུས་པ་དབལ་བར་བྱའོ། །ནོར་ལ་སོགས་པ་ཡོད་ནས་གང་ཞིག་མི་འབུལ་ན། དེ་ནི། བསྐལ་པ་སྟོང་གི་བར་དུ་དམྱལ་བར་སྐྱེ་བར་འགྱུར་རོ། །ལོངས་སྤྱོད་མེད་པར་གྱུར་པས་ཀྱང་རང་གི་ལུས་པོ་དབུལ་བར་བྱ་སྟེ། བྲན་དུ་བྱའོ། །དེས་ནི། ཚེ་འདི་ཉིད་ལ་སངས་རྒྱས་ཉིད་དམ། ཡང་ན་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །ལྷ་མོས་གསོལ་པ། བཅོམ་ལྡན་འདས། སྦྱིན་པ་ལ་སོགས་པ་ཙམ་གྱིས་སངས་རྒྱས་སམ། རྡོ་རྗེ་འཛིན་པར་འགྱུར་རམ་ཅི། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ། སྦྱིན་པ་ལ་སོགས་པ་ཙམ་གྱིས་སངས་རྒྱས་སམ། རྡོ་རྗེ་འཛིན་པར་མི་འགྱུར་ཏེ། འོན་ཀྱང་བླ་མ་ལ་མཆོད་པས་བསོད་ནམས་ཆེན་པོའི་ཚོགས་སྐྱེའོ། །བསོད་ནམས་ཆེན་པོའི་ཚོགས་བསགས་པ་ལས་སྡིག་པའི་ཕུང་པོ་ཟད་དེ། བླ་མའི་མཆོག་སངས་རྒྱས་ཐམས་ཅད་ཀྱི་རང་བཞིན་རང་གི་ལྷའི་སྐུ་ཡང་དག་པ་དང་ཕྲད་པ་ཐོབ་བོ། །ཕྲད་པས་ཡང་དག་པའི་མན་ངག་གནང་བར་འགྱུར་རོ། །མན་ངག་ཐོབ་པ་ལས་བརྩོན་འགྲུས་ཆེན་པོ་དང་ལྡན་པ་ཡིན་ན། དེས་ཚེ་འདི་ཉིད་ལ་སངས་རྒྱས་སམ། རྡོ་རྗེ་འཛིན་པ་ཐོབ་པར་འགྱུར་རོ། །དཔལ་ཡེ་ཤེས་སྙིང་པོ་ལས། དབང་བསྐུར་བ་དང ། དཀྱིལ་འཁོར་གྱི་དོན་ཞེས་བྱ་བའི་ལེའུ་སྟེ་གསུམ་ 479a ༄#། །པའོ།། །།བཅོམ་ལྡན་འདས་མས་གསོལ་པ། ཁྱོད་ཀྱི་དཀྱིལ་འཁོར་ཇི་ལྟར་ལགས། །མངའ་བདག་ཆེན་པོ་བཀའ་སྩོལ་ཅིག་།བཅོམ་ལྡན་འདས་ཀྱིས་བཀའ་སྩལ་པ། །བདག་གི་དཀྱིལ་འཁོར་དགེ་བ་ནི། །ཉོན་ཅིག་ལྷ་མོ་རབ་ཏུ་བཤད། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །དྲ་བ་དྲེ་ཕྱེད་ཆུན་འཕྱང་དང ། །འདོད་ཡོན་རིན་ཆེན་ལ་སོགས་བརྒྱན། །དེ་ཡི་དབུས་སུ་གཞན་མིན་བདག་།ཞལ་བཟང་ཁྱོད་དང་ལྷན་ཅིག་གོ་།ཕྱག་བཞི་པ་ལ་ཞལ་བཞི་པ། །སྤྱན་གསུམ་ཨུཏྤལ་སྔོན་པོའི་མདོག་།ཕྱག་རྒྱ་དྲུག་དང་ལྡན་པ་དང ། །སྣ་ཚོགས་རུས་པའི་རྒྱན་དང་ལྡན། །ཞི་བ་ཆེན་པོའི་རང་བཞིན་ཅན། །སྣ་ཚོགས་པདྨའི་སྟེང་དུ་ནི། །འཇིགས་བྱེད་དུས་མཚན་ཞབས་ཀྱིས་མནན། །རྒྱལ་པོའི་བཞུགས་ཐབས་ཀྱིས་ནི་བཞུགས། །རྡོ་རྗེ་དྲིལ་བུ་རྡེའུ་ཆུང་དང ། །ཀ་པཱ་ལ་དང་ཁ་ཊྭཱཾ་བསྣམས། །ཞལ་གཞན་སེར་དཔད་མར་དང་ལྗང་།། ལྷ་མོ་ཁྱོད་ཀྱང་བདག་གི་མདོག་།ཞལ་གསུམ་མ་ལ་སྤྱན་གསུམ་པ། །ཕྱག་གཉིས་གྲི་གུག་པད་སྣོད་འཛིན། །སྣ་ཚོགས་རྒྱན་གྱིས་བརྒྱན་པའོ། །བཅོམ་ལྡན་འདས་མས་གསོལ་པ། འདི་ཡི་དཀྱིལ་འཁོར་འཁོར་ལོ་ལ། །འཁོར་ནི་གང་ལགས་གྲངས་དུ་མཆིས། །བཅོམ་ལྡན་འདས་ཀྱིས་བཀའ་སྩལ་པ། གང་ཞིག་ཁྱོད་ཀྱིས་བདག་ལ་ཞུས།། 479b ཉོན་ཅིག་ལྷ་མོ་བདག་གིས་བཤད། །དཀྱིལ་འཁོར་ཕྱོགས་བཞིར་དཔའ་ཆེན་པོ། །ཤེས་རབ་ཡན་ལག་མས་འཁྱུད་ཅིང ། །མཚམས་སུ་རྡོ་རྗེ་མ་མོ་བཞི། །སྒོར་ནི་ཁྲོས་པའི་ལྷ་མོ་བཞི། །བཅོམ་ལྡན་འདས་མས་གསོལ་པ། དེ་རྣམས་ལ་སྐྱེད་པའི་ཆོ་ག་ནི། གང ། མདོག་དང་ཕྱག་རྒྱ་དང་བཞུགས་ཐབས་ལ་སོགས་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ།་ཁྱོད་དང་བདག་རོལ་པ་མཛད་ཅིང ། སྲུབ་པ་དང་སྲུབ་པའི་ཐབས་ཆེན་པོའི་སྦྱོར་བའི་དགའ་བའི་རྟགས་ལས་དཔའ་བོ་ཆེན་པོ་ཚངས་པ་ཞེས་བྱ་བ་ཕྱག་བཞི་པ། ཞལ་གསུམ་པ།་སྤྱན་གསུམ་པ། གསེར་གྱི་མདོག་ཉི་མའི་དཀྱིལ་འཁོར་གྱི་སྟེང་དུ་རྒྱལ་པོའི་བཞུགས་ཐབས་ཀྱིས་གནས་པ། རལ་པའི་ཅོད་པན་གྱིས་བརྒྱན་པ། ཤེས་རབ་མའི་ཡན་ལག་གིས་འཁྱུད་པ། ཕྱག་རྒྱ་ལྔ་འཛིན་པ། རྒྱན་སྣ་ཚོགས་ཀྱིས་བརྒྱན་པའོ། །རྡོ་རྗེ་དང ། དྲིལ་བུ་དང ། རྡེའུ་ཆུང་དང ། ཀ་པའི་ལ་དང ། ཁ་ཊྭཱཾ་ག་བསྣམས་པ། ཤར་གྱི་འདབ་མར་རོ། །ཡང་སྲུབ་པ་དང་སྲུབ་པའི་ཐབས་ཀྱིས་མཆོག་གི་དགའ་བའི་རྟགས་ལས་དཔའ་བོ་ཆེན་པོ་ཁྱབ་འཇུག་ཅེས་བྱ་བ་མ་ར་ཀ་ཏའི་མདོག་།ལྷག་མ་ནི། ཚངས་པ་བཞིན་དུ་བྱང་དུའོ། །ཡང་སྲུབ་པ་དང་སྲུབ་པའི་ཐབས་ཀྱིས་དགའ་བྲལ་གྱི་དགའ་བའི་རྟགས་ལས་དཔའ་བོ་ཆེན་པོ་དྲག་པོ་ཞེས་བྱ་བ་མདོག་ནག་པོ། །ཁྱབ་འཇུག་བཞིན་ནུབ་ཏུའོ། །ཡང་སྲུབ་པ་དང་སྲུབ་པའི་ཐབས་ཀྱིས་ 480a ༄#། །ལྷན་ཅིག་སྐྱེས་པའི་དགའ་བའི་རྟགས་ལས་དཔའ་བོ་ཆེན་པོ་དབང་ཕྱུག་ཅེས་བྱ་བ་མདོག་དཀར་པོ། །ཁྱབ་འཇུག་བཞིན་ལྷོ་ཕྱོགས་སུའོ། །པདྨའི་མཚམས་སུ་དྲི་ཞིམ་པ་དང་ལྡན་པའི་ཆུས་གང་བའི་བུམ་པའི་སྟེང་དུ་བདུད་རྩི་ལྔས་བཀང་བའི་ཀ་པཱ་ལ་བཞིའོ། །ཡང་སྲུབ་པ་དང་སྲུབ་པའི་ཐབས་ཀྱིས་རོ་བརྒྱད་ལས་མེའི་མཚམས་སུ་དཔའ་མོ་ཆེན་མོ་དཀར་མོའོ། །ཆུའི་མཚམས་སུ་གཞན་གྱིས་མི་ཐུབ་མ་བཻ་ཌཱུརྱའི་མདོག་གོ་།རླུང་གི་མཚམས་སུ་དུས་མཚན་མ་ནམ་མཁའ་སྔོན་པོའི་མདོག་གོ། དབང་ལྡན་གྱི་མཚམས་སུ་གཽ་རཱི་མདོག་སེར་པོའོ། །ཐམས་ཅད་ཀྱང་ཤིན་ཏུ་ལང་ཚོ་ལ་བབ་པ། ཞལ་གཅིག་པ། སྤྱན་གསུམ་པ། ཕྱག་བཞི་པ། ཉི་མའི་དཀྱིལ་འཁོར་གྱི་སྟེང་དུ་རྒྱལ་པོའི་བཞུགས་ཐབས་ཀྱིས་བཞུགས་པ། ཕྱག་རྒྱ་ལྔ་འཛིན་པ། ཕྱོགས་ཀྱི་གོས་ཅན། གྲི་གུག་དང ། ཀ་པཱ་ལ་དང ། ཁ་ཊྭཱཾ་ག་དང ། རྡེའུ་ཆུང་བསྣམས་པའོ། །ཤར་ཕྱོགས་ཀྱི་སྒོར་རྡོ་རྗེ་གཏུམ་མོ་ནི། ནག་མོ་ཆེན་མོའི་མདོག་གོ་།བྱང་སྒོར་རྡོ་རྗེ་འཇིགས་བྱེད་མ་སེར་མོའི་མདོག་གོ་།ནུབ་སྒོར་རྡོ་རྗེ་སྒྲ་མ་དམར་མོ་ཆེན་མོའི་མདོག་གོ་།ལྷོ་སྒོར་རྡོ་རྗེ་རྩ་རྩི་ཀ་ལྗང་གུའི་མདོག་གོ་།ཕྱག་བཞི་པ། ཞལ་གཅིག་པ། སྤྱན་གསུམ་པ། གཡོན་བརྐྱང་བ། ན་བཟའ་སྤངས་པ་རིམ་པ་བཞིན་དུ་ནམ་མཁའ་ལྡིང་དང ། སེངྒེ་དང ། སྟག་དང ། 480b མ་ཧེའི་སྟེང་ན་གནས་པའོ། །ཕྱག་རྒྱ་ལྔས་བརྒྱན་པ། མགོ་ཆེན་པོའི་ཆུན་པོ་འཕྱང་བ་འཛིན་པ། འཇིགས་བྱེད་ཆེན་པོ་མཆེ་བ་གཙིགས་པ། ལྗགས་འདྲིལ་བ། དབུ་སྐྱེས་འབར་བ། སྒྲ་ཆེན་པོའི་སྒྲ་སྒྲོག་པ། རལ་གྲི་དང ། རྩེ་གསུམ་པ་དང ། ཀ་པཱ་ལ་དང ། ཁ་ཊྭཱཾ་ག་བསྣམས་པ། རང་འོད་ཀྱི་ཐབས་དང་འཁྱུད་པའོ། །བཅོམ་ལྡན་འདས་མས་གསོལ་པ། བཅོམ་ལྡན་འདས།་དཔའ་བོ་ཆེན་པོ་རྣམས་ལ་ཤེས་རབ་མའི་ཡན་ལག་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། དཔའ་བོ་ཆེན་པོ་རྣམས་ལ་ཤེས་རབ་མའི་ཡན་ལག་རང་རང་གི་མདོག་དང་མཚུངས་པ་སྟེ། འོན་ཀྱང་ཁྱོད་བཞིན་དུ་ཞལ་གཅིག་པའོ། །དེ་ལྟའི་དཀྱིལ་འཁོར་རྒྱལ་པོ་ནི། །རྣལ་འབྱོར་རྒྱུད་དུ་རྙེད་པར་དཀའ། །དགྱེས་པ་ཐམས་ཅད་གྲུབ་བྱེད་ཅིང་།། སྡིག་པ་ཐམས་ཅད་འཇིག་པར་མཛད། །བཅོམ་ལྡན་འདས་མས་གསོལ་པ། བཅོམ་ལྡན་ཁྱོད་དང་བདག་སྐྱེད་པའི། །ས་བོན་གང་ལགས་སྙིང་པོ་ཅི། །ཉེ་བའི་སྙིང་པོ་ཅི་ལྟ་བུ། །འཁོར་གྱི་སྔགས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཁྱོད་ཀྱི་བདག་ལ་གང་ཞིག་ཞུས། །ཉོན་ཅིག་ལྷ་མོ་བདག་གིས་བཤད། །ས་བོན་ཡ་སྡེའི་བདུན་པ་ནི། །དབྱངས་ཡིག་ལྔ་པ་དང་ལྡན་པ། །ལྷ་མོ་ཆེན་མོ་ཐིག་ལེ་ལྡན། །ཁྱོད་ཀྱི་ས་བོན་རབ་མཆོག་གི་།ཡ་སྡེའི་ས་བོན་བརྒྱད་པ་ནི། །དབྱངས་ཡིག་དྲུག་པ་དང་ལྡན་པ། །དབུ་ནི་ཐིག་ལེ་ཡིས་ནི་བརྒྱན།། 481a ༄#། །བདག་གི་ས་བོན་རབ་མཆོག་གོ་།དེ་ནི་ས་བོན་གཉིས་ཀ་རབ། །ཐམས་ཅད་དབང་དུ་བྱེད་པ་ནི། །ལུས་ཅན་གསུམ་གྱི་སྙིང་ལ་བཞུགས་སྐྱེ་བ་དང་ནི་སྡུད་བྱེད་དོ། །དྲུག་པ་བརྒྱད་པ་བཞི་པ་དང ། །བཅུ་གཉིས་པ་དང་བཅུ་དང་ཉི། །དང་པོར་ཨོཾ་དང་ཧཱུཾ་ཕཊ་མཐར། །བདག་གི་སྙིང་པོ་རབ་ཏུ་མཆོག་།ཉི་ཤུ་པ་དང་བཅུ་གཉིས་མཁའ། །དང་པོ་དང་ནི་བཅུ་དྲུག་ཉི། །དབང་པོ་ཚངས་པ་ཧཱུཾ་ཕཊ་མཐར། །ཁྱོད་ཀྱི་སྙིང་པོ་དགྱེས་པ་མཆོག་།དང་པོར་ཨོཾ་དང་ཧཱུཾ་ཕཊ་མཐར། །དབུས་སུ་མིང་དང་སྤེལ་བ་ནི། །ཚོགས་ཀུན་གྱི་ནི་སྔགས་ཡིན་ཏེ། །མཆོད་པའི་དུས་སུ་མཆོད་པར་བྱ། །ོཾ་སརྦ་མཱ་ར་བི་མརད་ན་མཧཱ་བི་ར་རཱ་ཛ་ཧཱུཾ་ཧཱུཾ་ཕཊ་ཕཊ། སྐལ་ལྡན་མོ་དེ་ཁྱོད་ཀྱི་ནི། །ཉེ་བའི་སྙིང་པོ་དྲག་པོ་ཆེ། །ོཾ་ཧཾ་ཧཾ་ཧཾ་ཧཾ་ཧཾ། ཀེ་ལེ་ཀེ་ལེ་སརྦ་དོ་སྟ་པྲ་བྷཱ་ཛ་ཀ་ཧཱུཾ་ཧའཽམ་ཕཊ་ཕཊ། པདྨཱི་ཞལ་དེ་དག་གི་ནི། །འོད་ཆེན་ཉེ་བའི་སྙིང་པོའོ། །བཅོམ་ལྡན་འདས་མས་གསོལ་པ།་སྔགས་འདི་ལ་ནུས་པའི་མཐུ་ཅི་ཙམ་ཞིག་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། གྲུབ་པ་ཙམ་གྱིས་ཁམས་གསུམ་ཐམས་ཅད་དབང་དུ་བྱེད་པར་འགྱུར་རོ། །རྣལ་འབྱོར་པ་ཁྲོ་བའི་ལྟ་བས་འབུམ་ཕྲག་གཅིག་བཟླས་པ་བྱས་ན། ལྷ་མ་ཡིན་གྱི་དབང་པོ་ལྟ་བུ་ལ་འབུམ་ཕྲག་གཅིག་གིས་གསོད་པར་བྱེད་དོ། །ཞི་བའི་ 481b \?\་གྱིས་བཟླས་པ་བྱས་ནས། གྲངས་མེད་པའི་ནད་དང ། ཉོན་མོངས་པ་དང ། དབུལ་པོ་དང ། མཛེ་དང ། ཕོལ་མིག་འཇིག་པར་བྱེད་དོ། །ཕྲ་མོའི་གྲུབ་པ་བརྒྱད་སྐད་ཅིག་གིས་བྱེད་དོ། །གཞན་ཡང་ལས་དུ་མ་རྗེས་སུ་འབྲང་བར་བྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་མ་ལེགས་དགྱེས་དབང་མོ་སྟན་ལས་ལངས་ནས་མགོ་པོས་ཕྱག་འཚལ་ཏེ། འཁོར་ཐམས་ཅད་དང་ལྷན་ཅིག་ཏུ་ལན་གསུམ་དུ་བསྐོར་བ་བྱས་ནས་རང་རང་གི་རྫུ་འཕྲུལ་གྱིས་མཆོད་པ་བྱས་ཏེ། བཅོམ་ལྡན་འདས་མཆོག་གི་དབང་ཕྱུག་ལེགས་སོ་ལེགས་སོ་ཞེས་བརྗོད་ནས་ཡང་གཉིས་སུ་མེད་པའི་སྦྱོར་བས་བཞུགས་སོ། །དེའི་དུས་སུ་ནམ་མཁའ་ལ་མེ་ཏོག་རྣམ་པ་སྣ་ཚོགས་བའི་ཆར་དང ། རིན་པོ་ཆེ་སྣ་ཚོགས་ཀྱི་ཆར་ཆེན་པོ་བཅོམ་ལྡན་འདས་ཀྱི་ཞབས་ཀྱི་དྲུང་དུ་འབབས་པར་གྱུར་ཏོ། །དེ་ནས་བཅོམ་ལྡན་འདས་མེ་ཏོག་དང་རིན་པོ་ཆེ་དེ་དག་གིས་ཐོག་ཏུ་བཅིབས་ཏེ་འཁོར་དང་བཅས་པ་མི་སྣང་བར་གྱུར་ཏོ། །དཔལ་ཡེ་ཤེས་སྙིང་པོ་ལས། གསང་བའི་དཀྱིལ་འཁོར་འབྱུང་བའི་དོན་ཞེས་བྱ་བའི་ལེའུ་སྟེ་བཞི་པའོ།། །།དཔལ་ཡེ་ཤེས་སྙིང་པོ་ཞེས་བྱ་བ་རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོའི་རྒྱལ་པོ་རྫོགས་སོ།། །།རྒྱ་གར་གྱི་མཁན་པོ་དཔལ་ 482a ༄#། །ཤེས་རབ་གསང་བའི་ཞལ་སྔ་ནས་བསྒྱུར་བའོ། །དཔལ་ཕྱག་རྒྱ་ཆེན་པོའི་ཐིག་ལེ་རྣལ་འབྱོར་མའི་རྒྱུད་ཀྱི་རྒྱལ་པོའི་ཕྱི་མའི་ཕྱི་མའོ།། |