རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང ། ཞུ་ཆེན་གྱི་ལོཙྪ་བ་བནྡྷེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། རྒྱ་གར་སྐད་དུ། ཨཱརྱ་ཙནྡན་ཨངྒ་ནཱ་མ་དྷཱ་ར་ཎི། བོད་སྐད་དུ། འཕགས་པ་ཙནྡན་གྱི་ཡན་ལག་ཅེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་དགེ་སློང་གི་དགེ་འདུན་ཆེན་པོ་དགེ་སློང་ཁྲི་ཉིས་སྟོང་ལྔ་བརྒྱའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང ། གཞན་ཡང་ལྷ་ཁྱད་པར་ཅན་མང་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་གདན་བཤམས་པ་ལ་དེ་བཞིན་གཤེགས་པའི་ཆོ་འཕྲུལ་གྱིས་ལྷམ་མེ། ལྷན་ནེ། ལྷང་དེར་བཞུགས་སོ། །དེ་ནས་བཅོམ་ལྡན་འདས་ཀྱིས་འཁོར་དེར་བྱང་ཆུབ་ 415a ༄#། །སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང ། ཟླ་འོད་གཞོན་ནུར་གྱུར་པ་ལ་བཀའ་སྩལ་པ། རིགས་ཀྱི་བུ། འཇིག་རྟེན་གྱི་ཁམས་འདིའི་ཕ་རོལ་གྱི་ཡང་ཆེས་ཕ་རོལ་འཇིག་རྟེན་གྱི་ཁམས་བྱེ་བ་ཁྲག་ཁྲིག་འབུམ་ཕྲག་གངྒཱའི་ཀླུང་གྲངས་མེད་པའི་བྱེ་མ་སྙེད་འདས་པ་ན་ཙནྡན་གྱི་དཔལ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙནྡན་གྱི་ཡན་ལག་ཅེས་བྱ་བ་ད་ལྟར་ཡང་བཞུགས་ཏེ་འཚོ་ཞིང་གཞས་ལ་ཆོས་ཀྱང་སྟོན་ཏོ། །གང་འཇིག་རྟེན་གྱི་ཁམས་དེའི་སེམས་ཅན་དེ་དག་ཐམས་ཅད་ནི། ཕྱིར་མི་ལྡོག་པར་འགྱུར་བ་ཤ་སྟག་སྟེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཙནྡན་གྱི་ཡན་ལག་དེས་སེམས་ཅན་ཐམས་ཅད་ཀྱི་དོན་གྱི་ཕྱིར་ཙནྡན་གྱི་ཡན་ལག་ཅེས་བྱ་བའི་གཟུངས་ཀྱི་རིག་པའི་གསང་སྔགས་ཀྱི་གཞི་གསུངས་པ་འདི་ཐོས་ནས་ཕྱིར་མི་ལྡོག་སྟེ་སྡིག་པ་དང་བྲལ་ཞིང་བྱང་ཆུབ་ཀྱི་སེམས་དང་མི་འབྲལ་ལོ། །བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དང ། དེ་བཞིན་གཤེགས་པ་མར་མེ་མཛད་དང ། གཞན་ཡང་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ 415b ཀྱང་སྔོན་ཆད་གསུངས་ཏེ། ངས་ཀྱང་ད་ཁྱེད་རྣམས་ལ་བཤད་ཀྱི། སེམས་ཅན་ཐམས་ཅད་རྗེས་སུ་གཟུང་བའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། ཕྱི་མའི་ཚེ་ཕྱི་མའི་དུས་ལྔ་བརྒྱ་ཐ་མ་ལ་དམ་པའི་ཆོས་རྣམ་པར་འཇིག་པའི་ཚེ་ཐམས་ཅད་ཆོས་དང་མི་ལྡན་པ། མཚམས་མེད་པ་བྱེད་པ། དམ་པའི་ཆོས་ལ་སྨོད་པ། མཆོད་རྟེན་འདྲལ་བ། དགེ་འདུན་གྱི་རྫས་ལ་རྐུ་འཕྲོག་བྱེད་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆི་བ། སློབ་དཔོན་དང་མཁན་པོ་སྤོང་བ་དག་འབྱུང་སྟེ། དེ་དག་རྗེས་སུ་གཟུང་བའི་ཕྱིར་ཙནྡན་གྱི་ཡན་ལག་གི་གཟུངས་ཀྱི་གསང་སྔགས་ཀྱི་གཞི་སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་འདི་བཤད་ཀྱི། བྱང་ཆུབ་སེམས་དཔའ་རྣམས་ང་ལ་ཉོན་ཅིག་།དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང ། ཟླ་འོད་གཞོན་ནུར་གྱུར་པས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བསྐུལ་བ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། གཞན་ཡང་སེམས་ཅན་བྱེ་བ་ཁྲག་ཁྲིག་འབུམ་ཕྲག་རྣམས་ལ་ཐུགས་བརྩེ་བ་དང ། སྡིག་པ་བྱང་བར་བགྱི་བའི་སླད་དུ། བཅོམ་ལྡན་འདས། བཤད་དུ་གསོལ། བདེ་བར་གཤེགས་པ། བཤད་དུ་གསོལ། དེ་བཞིན་གཤེགས་པ། བཤད་དུ་གསོལ། བདག་ཅག་གིས་ 416a ༄#། །ཀྱང་གཟུགས་ཀྱི་གསང་སྔགས་ཀྱི་གཞི་དེ་དག་གཟུང་བར་བགྱི་སྟེ། སེམས་ཅན་ཐམས་ཅད་ཀྱི་དོན་དུ་རྒྱ་ཆེར་ཡང་དག་པར་བཤད་པར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཙི་རཱ་ཏེ། མཱ་རི་ཙི་ཀེ། དུ་རྡ་མེ། དུ་དུ་རྡནྟེ་དུ་རྲཱ་ནུ། པྲ་བིཥྚེ། ཅནྡྣ་ནཱ་དག་ཛེ། ས་མ་ནྟྲ་བ་རི། ཤོ་དྷ་ནི།་བི་ཤུ་དྡྷ་ཤཱི་ལེ། ཙ་རི་ཏྟ་བ་ཏི། ཨ་ན་ཙ་དྱ་པྲ་ཏི་བྷཱ་ནེ། སརྦ་བྡྡྷ་ཨ་དྷི་ཥྵི་ཏེ། བྷ་ག་བ་ཏི། པཱ་པཀཥ་ཡ། ཨཱ་ཤཱ་པ་རི་པུ་ར་ཡ་སཝཱཧཱ། རིགས་ཀྱི་བུ་ཕོའམ། རིགས་ཀྱི་བུ་མོ་གང་ལ་ལ་ཞིག་གཟུངས་ཆེན་པོའི་གསངས་སྔགས་འདི་དག་འཛིན་ཏམ། ཀློག་གམ། སྟོན་ཏམ། ཀུན་ཆུབ་པར་བྱེད་ན། དེའི་ཚེ་འདི་ཉིད་ལ་མིག་རྣམ་པར་དག་པར་འགྱུར་རོ། །ཐོས་མ་ཐག་ཏུ་སྡིག་པའི་ལས་རབ་ཏུ་གྲོལ་བར་འགྱུར། །བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་པར་འགྱུར། །དེ་བཞིན་གཤེགས་པའི་སྐུ་གཟུགས་ཀྱང་མཐོང་བར་འགྱུར། ཟླ་བ་ཕྱེད་ཀྱི་བར་དུ་བཟླས་པ་བྱས་ན། འཕགས་པ་སྤྱན་རས་གཟིགས་དབང་ཕྱུག་དང ། ཟླ་འོད་གཞོན་ནུར་གྱུར་པ་མཐོང་བར་འགྱུར། མཚམས་མེད་པ་ལྔའི་སྡིག་པ་བྱས་པ་ཡང་འབྱང་བར་འགྱུར། སྐྱེ་བ་དྲན་པར་འགྱུར། ཚེ་བརྗེས་ནས་ཀྱང་ལྷ་རྣམས་ཀྱི་ནང་དུ་སྐྱེ་བར་འགྱུར། 416b ཁྱིམ་བདག་ཆེན་པོ་སྐྱིད་པ་དག་གི་ནང་དུ་སྐྱེ་བར་འགྱུར། །སྐྱེ་བོ་ཐམས་ཅད་དགའ་བར་འགྱུར་རོ། །འདི་ལྟར་ས་ཆེན་པོར་ལུས་བ་འདི་ནི། གྲུམ་པར་འགྱུར་ཡང་སྲིན། །རྒྱ་མཚོ་ནི། བསྐམས་ཀྱང་སྲིད། དེ་བཞིན་དུ་རིའི་རྒྱལ་པོ་རི་རབ་ནི། འཇིག་པར་འགྱུར་ཡང་སྲིད། རླུང་ནི། ཞགས་པས་བཅིང་དུ་རུང་ཡང་སྲིད། ཟླ་བ་དང་ཉི་མ་ནི། སའི་སྟེ་དུ་ལྷུང་ཡང་སྲིད། ནམ་མཁའ་ནི། ལག་པ་གཉིས་ཀྱིས་མནན་དུ་རུང་ཡང་སྲིད། མེ་ནི། ཆུར་འགྱུར་ཡང་སྲིད། འབྱུང་བ་ཆེན་པོ་བཞི་ནི། གཞན་དུ་འགྱུར་ཡང་སྲིད། སེམས་ཅན་ཐམས་ཅད་ཀྱི་སེམས་ནི། གཅིག་ཏུ་འགྱུར་ཡང་སྲིད་ཀྱི། དེ་བཞིན་གཤེགས་པས་གསུངས་ཤིངས་བྱིན་གྱིས་བརླབས་པ་ནི། གཞན་དུ་འགྱུར་མི་སྲིད་དེ། སུས་ཀྱང་བསྐྱོད་པའམ། བསྒུལ་བར་མི་ནུས་སོ། །འདི་ནི། བདུད་སྡིག་ཅན་གྱིས་གླགས་རྙེད་པར་མི་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འད།ས་བདག་གིས་ཀྱང་གཟུངས་འདིའི་ཆོ་ག་བཤད་པར། བགྱིའོ། །ཆོས་ཀྱི་རྒྱལ་པོའི་མཆོད་རྟེན་རིང་བསྲེལ་དང་བཅས་པའམ། སངས་རྒྱས་ཀྱི་སྐུ་གཟུགས་ཀྱི་སྤྱན་སྔར་ཙནྡྣ་དཀར་པོའི་དཀྱིལ་འཁོར་བགྱིས་ཏེ་མེ་ཏོག་སིལ་ 417a ༄#། །མ་གཏོར་ལ། ཙནྡྣ་གྱི་བདུག་པས་བདུགས་ཏེ་ཟླ་བ་ཚེས་པ་ནས་བརྩམས་ནས་ཚེས་བཅོ་ལྔའི་བར་དུ་དུས་གསུམ་དུ་ཁྲུས་བགྱི་ཞིང་གོས་ཀྱང་ལན་གསུམ་དུ་བརྗེས་ཏེ་\?\་བསྲེག་བྱ་འཚལ་ཞིང ། གསོ་སྦྱོང་དང་ལྡན་པ། སེམས་ཅན་ཐམས་ཅད་ལ་སེམས་སྙོམས་པ་དང་།། ཟླ་བ་ཉའི་བར་གཞག་གཅིག་སྨྱུང་བར་བགྱིས་ཏེ། རྨ་བམ་གྱི་སྟེང་དུ་མཆིས་ཤིང ། རྩཝ་བམ་བཏིང་བའི་སྟེང་དུ་ཉལ་ལ་སེམས་རྩེ་གཅིག་ཏུ་བཟླས་པ་བགྱི་ཞིང ། མེ་ཏོག་དྲི་ཞིམ་པོ་ལན་བརྒྱ་སྟོང་དུ་གཏོར་ནས་གཡོ་བར་འགྱུར། བདག་ཉིད་ཀྱང་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དང ། སྤྱན་རས་གཟིགས་དབང་ཕྱུག་མཐོང་བར་འགྱུར། གཟུངས་ཆེན་པོ་ཐོས་མ་ཐག་ཏུ་ཅི་འདོད་པ་དེ་ཐོབ་པར་འགྱུར། ཐོས་པ་འཛིན་པར་ཡང་འགྱུར། ལས་ཀྱི་སྒྲིབ་པ་ཐམས་ཅད་ཀྱང་འབྱང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དེ་དག་དང ། བྱང་ཆུབ་སེམས་དཔའ་དེ་དག་དང ། ཐམས་ཅད་དང་ལྡན་པའི་འཁོར་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཙནྡྣ་གྱི་ཡན་ལག་ཅེས་བྱ་ 417b བའི་གཟུངས་རྫོགས་སོ།། །། |