rKTs


H694

(e-text produced by ACIP)

see text in transliteration
287a
རྒྱ་གར་སྐད་དུ། ཨཱ་རྱ་མ་ཧཱ་བཛྲ་མེ་རུ་ཤི་ཁ་ར་ཀཱུ་ཊ་གཱ་ར་དྷཱ་ར་ཎི། བོད་སྐད་དུ། འཕགས་པ་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས། །སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དཱི་སྐད་བདག་གིས་ཐོས་པའི་དུས་གཅིག་ན།་བཅོམ་ལྡན་འདས་རྡོ་རྗེའི་ལྷུན་པོ་ཆེན་པོའི་རྩེ་མོའི་ཁང་པ་བརྩེགས་པ་རྡོ་རྗེ་ཆེན་པོའི་ཏིང་ངེ་འཛིན་གྱི་སའི་གནས་རྡོ་རྗེ་ཆེན་པོའི་དཔག་བསམ་གྱི་ཤིང་
287b
ལྗོན་པས་ལེགས་པར་བརྒྱན་པ། རྡོ་རྗེ་ཆེན་པོའི་རྫིང་གི་རིན་པོ་ཆེའི་པདྨའི་འོད་ཀྱིས་སྣང་བར་བྱས་པ། ས་ཕྱོགས་རྡོ་རྗེ་ཆེན་པོའི་བྱེ་མ་བདལ་བ། རྡོ་རྗེ་ཆེན་པོར་བྱིན་གྱིས་བརླབས་པ། འཁོར་གྱི་ཁྱམས་རྡོ་རྗེ་ཆེན་པོ་ལས་བྱས་པ། ལྷའི་དབང་པོ་བརྒྱ་བྱིན་གྱིས་རྡོ་རྗེ་ཆེན་པོའི་སེངྒེའི་ཁྲི་བྱེ་བ་ཁྲག་ཁྲིག་འབུམ་ཕྲག་སྟོང་གིས་རྣམ་པར་མཛེས་པ། ཆོས་བསྟན་པ་དང ། ཆོ་འཕྲུལ་ཅན། སངས་རྒྱས་ཐམས་ཅད་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་པ། ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པ། ཐམས་ཅད་མཁྱེན་པ་ཉིད་ཀྱིས་ངེས་པར་འབྱུང་བ་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞི་ཐམས་ཅད་ཀྱང་སྐྱེ་བ་གཅིག་གིས་ཐོགས་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། མཐུ་ཆེན་པོ་ཐོབ་པ། རྡོ་རྗེ་ཆེན་པོའི་རྣམ་པར་ཐར་པའི་ཏིང་ངེ་འཛིན་གྱིས་སངས་རྒྱས་ཀྱི་ཞིང་རྣམ་པར་འཕྲུལ་པ་དང་ཆོ་འཕྲུལ་ཆེན་པོ་ཀུན་ཏུ་སྟོན་པ། སེམས་ཀྱི་སྐད་ཅིག་ཐང་གཅིག་ཡུངས་ཙམ་གཅིག་ལ་སེམས་ཅན་ཐམས་ཅད་ཀྱི་སེམས་དང་སྤྱོད་པའི་རྗེས་སུ་འཇུག་པའི་ཆོས་བསྟན་པ་སྣ་ཚོགས་མཉམ་པ་ཉིད་སྙན་ཅིང་རྒྱ་ཆེ་ལ་ཟབ་པ་དང ། སྤོབས་པ་དང ། ཆོ་འཕྲུལ་དང་ལྡན་པ། སངས་རྒྱས་ཀྱི་ཞིང་དུ་མར་དེ་བཞིན་གཤེགས་པ་ལ་མཆོད་པ་རྒྱ་ཆེན་
288a
༄#། །པོའི་སྤྲིན་གྱིས་མཆོད་པ་དང ། རྣམ་པར་ཐར་པའི་སྒོ་དང ། གཟུངས་དང ། ཏིང་ངེ་འཛིན་དང ། དབང་དང ། མངོན་པར་ཤེས་པ་དང ། མ་འདྲེས་པ་དང ། བྱང་ཆུབ་ཀྱི་ཡན་ལག་དང ། ལམ་དང ། ས་བཅུ་དང ། ཕ་རོལ་ཏུ་ཕྱིན་པ་དང ། ཐབས་ལ་མཁས་པ་དང ། བསྡུ་བའི་དངོས་པོ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་དང ། བྱམས་པའི་སྟོབས་དང ། དབེན་པ་དང ། ཡོངས་སུ་བྱང་བའི་སེམས་ཀྱི་རྒྱུན་དང་ལྡན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་ཞེས་བྱ་བ་དང ། རྡོ་རྗེའི་མིག་དང ། རྡོ་རྗེའི་ལུས་དང ། རྡོ་རྗེ་བློ་གྲོས་དང ། ལག་ན་རྡོ་རྗེ་དང ། རྡོ་རྗེ་འདུས་པ་དང ། རྡོ་རྗེ་མཐུ་བོ་ཆེ་དང ། རྡོ་རྗེ་རྣམ་པར་འཕྲུལ་པ་དང ། རྡོ་རྗེ་བརྩེགས་པ་དང ། རྡོ་རྗེ་ཕུང་པོ་དང ། རྡོ་རྗེ་ང་རོ་དང ། རྡོ་རྗེ་བཟང་པོ་དང ། བྱང་ཆུབ་སེམས་དཔའ་དཔ་ཆེན་པོ་རྡོ་རྗེ་ཏོག་ཅེས་བྱ་བ་དང ། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་རྩ་བཞི་དང ། ཉན་ཐོས་ཆེན་པོ་རབ་ཏུ་མང་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། སྲིད་པར་ཀུན་ཏུ་སྦྱོར་བ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲེལ་བ། རྫུ་འཕྲུལ་གྱི་སྟོབས་དང ། ཆོ་འཕྲུལ་བསམ་གྱིས་མི་
288b
ཁྱབ་པས་རྣམ་པར་འཕྲུལ་པའི་མཐུ་ཆེན་པོ་ཐོབ་པོ། །ལྟ་བ་ཆགས་པ་མེད་པ། ཐམས་ཅད་ཀྱང་དྲི་མ་དང་བྲལ་བ། ཀུན་ནས་ཉོན་མོངས་པའི་བག་ཆགས་ཀྱི་ས་བོན་ངེས་པར་བསྲེགས་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཤཱ་རདྭ་ཏིའི་བུ་དང ། ཚ་དང་ལྡན་པ་བྱམས་པའི་བུ་གང་པོ་དང ། ཚེ་དང་ལྡན་པ་ཀ་པི་ན་དང ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་མཽ་དགལ་གྱི་བུ་ཆེན་པོ་དང ། ཚེ་དང་ལྡན་པ་སྐུལ་བྱེད་དང ། ཚེ་དང་ལྡན་པ་དགའ་བྱེད་དང ། ཚེ་དང་ལྡན་པ་ག་ཡ་འོད་སྲུང་དང ། ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་ལྟེང་རྒྱས་འོད་སྲུང་དང ། དེ་དག་ལ་སོགས་པ་ཉན་ཐོས་ཆེན་པོ་རབ་ཏུ་མང་པོ་དང ། ལྷའི་བུ་དབང་ཕྱུག་ཆེན་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་གྲངས་མེད་དཔག་ཏུ་མེད་པ་གཞལ་དུ་མེད་པ་དག་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་ཚངས་པ་བཟང་པོ་ལ་སོགས་པ་ཚངས་རིས་ཀྱི་ལྷའི་བུ་རྣམས་དང ། ལྷའི་བུ་རབ་འཐབ་བྲལ་གཡོག་འཐབ་བྲལ་གྱི་ལྷའི་རིས་ཀྱི་ལྷའི་བུ་དང་བཅས་པ་དང ། ཡོངས་སུ་དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ལྷའི་དབང་པོ་བརྒྱ་བྱིན་ལྷའི་བུ་ཐམས་ཅད་ཀྱི་འཁོར་ཅན་དང ། ལྷ་མ་ཡིན་གྱི་དབང་པོ་ཐགས་བཟང་རིས་དང ། སྟོབས་ཅན་དང་
289a
༄#། །རབ་སིམ་དང ། སྒྲ་གཅན་དང ། རྣམ་པར་སྣང་བྱེད་དང ། དེ་དག་ལ་སོགས་པ་ལྷ་མ་ཡིན་གྱི་དབང་པོ་ཚད་མེད་གྲངས་མེད་དཔག་ཏུ་མེད་པ་རྣམས་དང ། ཀླུའི་རྒྱལ་པོ་རྒྱ་མཚོ་དང ། མ་དྲོས་པ་དང ། འཇོག་པོ་དང ། ནོར་རྒྱས་ཀྱི་བུ་དང ། དུང་སྐྱོང་དང ། སྟོབས་ཀྱི་རྒྱུ་དང ། པདྨ་དང ། པདྨ་ཆེན་པོ་དང ། མཐའ་ཡས་དང ། དེ་དག་ལ་སོགས་པ་ཀླུའི་རྒྱལ་པོ་ཚད་མེད་གྲངས་མེད་དཔག་ཏུ་མེད་པ་དག་དང ། མིའམ་ཅིའི་རྒྱལ་པོ་ལྗོན་པ་མིའམ་ཅིའི་རྒྱལ་པོའི་གཡོག་དུ་མ་ཅན་དང་དྲི་ཟའི་རྒྱལ་པོ་གཙུག་ཕུད་ལྔ་པ་དྲི་ཟའི་རྒྱལ་པོའི་གཡོག་དུ་མ་ཅན་དང ། རིག་སྔགས་འཆང་གི་རྒྱལ་པོ་དོན་ཐམས་ཅད་གྲུབ་པ་རིག་སྣང་འཆང་གི་རྒྱལ་པོའི་གཡོག་དུ་མ་ཅན་དང ། ནམ་མཁའ་ལྡིང་གི་རྒྱལ་པོ་གསེར་མིག་ནམ་མཁའ་ལྡིང་གི་རྒྱལ་པོའི་གཡོག་དུ་མ་ཅན་དང ། གནོད་སྦྱིན་གྱི་རྒྱལ་པོ་ཆེན་པོ་རྣམ་ཐོས་ཀྱི་བུ་དང ། ནོར་བུ་བཟང་དང ། གང་བ་བཟང་དང ། གནོད་སྦྱིན་གྱི་རྒྱལ་པོ་ལྔས་རྩེན་གནོད་སྦྱིན་གྱི་རྒྱལ་པོའི་གཡོག་དུ་མ་ཅན་དང ། འཕྲོག་མ་བུ་ལྔ་བརྒྱའི་གཡོག་ཅན་དང ། འཇིག་རྟེན་གྱི་མ་བདུན་དང ། སྲིང་མོ་ཆེན་མོ་བདུན་དང ། དྲང་སྟོང་ཆེན་པོ་བདུན་དང ། བར་སྣང་ལ་རྒྱུ་བའི་རྒྱུ་སྐར་དང ། གཟའི་ལྷ་ཐམས་ཅད་
289b
དང ། ཕྱོགས་ཀྱི་ལྷ་རྣམས་དང ། ཕྱོགས་མཚམས་ཀྱི་ལྷ་རྣམས་དང ། སའི་ལྷ་དང ། དབྱངས་ཅན་དང ། འབྱུང་པོ་རྣམས་དང ། བགེགས་རྣམས་དང ། ལོག་འདྲེན་རྣམས་དང ། ཡི་དྭགས་དང ། འབྱུང་པོ་རྫུ་འཕྲུལ་ཆེན་པོ་རྣམས་དང ། རེའི་རྒྱལ་པོ་ཐམས་ཅད་དང ། འཇིག་རྟེན་སྐྱོང་བ་ཆུ་ལྷ་གཡོག་རྒྱ་མཚོའི་ལྷ་ཐམས་ཅད་དང་བཅས་པ་དང ། འཕགས་སྐྱེས་པོ་དང ། མིག་མི་བཟང་དང ། ལག་ན་བེ་ཅོན་དང ། བདེན་བྲལ་དང ། མེའི་ལྷ་དང ། རླུང་གི་ལྷ་ཆེན་པོ་བདུན་དང ། དབང་བདག་ཆུང་མ་དང་བཅས་པ་ཚོགས་བྱེ་བ་ཁྲག་ཁྲིག་འབུམ་ཕྲག་དུ་མའི་འཁོར་ཅན་དང ། སྲེད་མེད་ཀྱི་བུ་གཡོག་དང་བཅས་པ་དང ། བྱིན་པ་པོ་དང ། ཕྲེང་བ་ཅན་དང ། ལྕགས་ཅན་དང ། ཚོགས་ཀྱི་བདག་པོ་ཆེན་པོ་དང ། སྤྲིན་ཏ་ལ་དང ། ལོག་འདྲེན་དབང་པོ་བགེགས་ལོག་འདྲེན་གྱི་གཡོག་དུ་མ་ཅན་དང ། ཤིང་གསེབ་ཀྱི་ལྷ་དྲུག་ཅུ་དང ། སྲིང་མོ་བཞི་མིང་པོ་དང་བཅས་པ་དང ། མ་བདུན་དང ། རྡོ་རྗེ་ལྕགས་ཀྱུ་དང ། རྡོ་རྗེ་ལུ་གུ་རྒྱུད་དང ། རྡོ་རྗེ་ཕོ་ཉ་མོ་དྲུག་ཅུ་རྩ་བཞི་དང ། རྡོ་རྗེའི་སྡེ་དང ། ལག་བཟང་དང ། གཙུག་གིས་འགྲོ་རྡོ་རྗེའི་རིགས་ཀྱི་འཁོར་དུ་མ་དང་བཅས་པ་དང ། དེ་མ་ཡིན་པ་གཞན་ཡང་སངས་རྒྱས་དང ། ཆོས་དང ། དགེ་འདུན་ལ་མངོན་པར་དད་པའི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་
290a
༄#། །མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། འབྱུང་པོ་དང ། ཡི་དྭགས་དང ། ཤ་ཟ་དང ། སྨྱོ་བྱེད་དང ། བརྗེད་བྱེད་དང ། སྒྲུབ་པ་དང ། སྦྲུལ་འཛིན་བཅས་དང ། གནོན་པོ་ཚད་མེད་དཔག་ཏུ་མེད་གྲངས་མེད་པ་རྣམས་དང ། ལྷའི་བུ་ཉི་མ་དང ། ལྷའི་བུ་ཟླ་བ་དང ། དུས་ཚིགས་ཀྱི་ལྷ་དང ། ནུབ་ཀའི་ལྷ་དང ། དུས་ཀྱི་ལྷ་ཐམས་ཅད་དང ། གནམ་སའི་ལྷ་ཐམས་ཅད་དང་ཡང་ཐབས་ཅིག་གོ། །དེ་ལྟར་ཡང་བཅོམ་ལྡན་འདས་དེ་ཆོས་ཀྱི་འཁོར་ལོ་ནི། ཤིན་ཏུ་བསྐོར།་སངས་རྒྱས་ཀྱི་མཛད་པ་ནི། ཤིན་ཏུ་ཡོངས་སུ་མཐར་ཕྱིན། བསོད་ནམས་དང ། ཡེ་ཤེས་ཀྱི་ཚོགས་ནི། ཤིན་ཏུ་ཡོངས་སུ་རྫོགས། ཐམས་ཅད་མཁྱེན་པ་ཉིད་དང ། བྱང་ཆུབ་ཆེན་པོ་དང ། ཕ་རོལ་ཏུ་ཕྱིན་པ་དང ། ས་བརྙེས་པས་ནི། ཤིན་ཏུ་ཡོངས་སུ་བཟུང ། སྐྱེས་བུ་ཆེན་པོའི་མཚན་འབར་བ་སུམ་ཅུ་རྩ་གཉིས་ཀྱིས་ནི་སྐུ་བརྒྱན། དཔེ་བྱད་བཟང་པོ་བརྒྱད་ཅུས་ནི། ཡན་ལག་དང ། ཉིང་ལག་ཐམས་ཅད་རྣམ་པར་སྤྲས། སྤྱི་གཙུག་ནི། སེམས་ཅན་ཐམས་ཅད་ཀྱིས་བལྟར་མི་མཐོང ། བདུད་ཀྱི་ཚེར་མ་ཐམས་ཅད་ནི། དཀྲུགས། དེ་ཁོ་ན་ཉིད་མཁྱེན་པ་ཉིད་ནི། རིམ་པར་ཐུགས་སུ་ཆུད། སྤྱན་རྣམ་པ་ལྔ་ནི། མངའ། རྣམ་པ་ཐམས་ཅད་མཁྱེན་པའི་མཆོག་
290b
དང་ནི། ལྡན། ཐམས་ཅད་མཁྱེན་པའི་ཡེ་ཤེས་དང་ནི། ལྡན། སངས་རྒྱས་ཀྱི་ཆོས་ཐམས་ཅད་ནི། ལྡན། བདུད་དང་ཕས་ཀྱི་རྒོལ་བ་དང ། ངན་པའི་ཚོགས་ཅན་གྱི་ཚོགས་ཐམས་ཅད་ནི།་བཅོམ། བརྗོད་པའི་སྒྲ་དང་ཚིགས་སུ་བཅས་པ་ནི། འཕགས། ཁྱུ་མཆོག་དང ། སེངྒེའི་སྒྲ་ནི་སྒྲོག། མ་རིག་པའི་མུན་པ་ནི་ཀུན་ཏུ་གསལ། བསྐལ་པ་བྱེ་བ་ཁྲག་ཁྲིག་འབུམ་ཕྲག་གྲངས་མེད་དཔག་ཏུ་མེད་པར་སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་དང ། སྟོབས་དང ། སྨོན་ལམ་དང ། ཡེ་ཤེས་ཀྱི་ཕ་རོལ་ཏུ་ཕྱིན་པ་དང ། དཀའ་བ་སྤྱད་པས་མངོན་པར་གྲུབ་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང ། དཔེ་བྱད་བཟང་པོ་བརྒྱད་ཅུས་སྐུ་བརྒྱན་པས་ནི། མཛེས་ཤིང ། རིན་པོ་ཆེ་རྡོ་རྗེའི་པདྨའི་སྙིང་པོའི་སེངྒེའི་ཁྲི་ལ་ནི། བཞུགས་ཏེ། གདན་རིན་པོ་ཆེ་དང ། རྡོ་རྗེའི་པདྨའི་སེངྒེའི་ཁྲི་རི་རབ་ཙམ་རྡོ་རྗེ་དང ། རིན་པོ་ཆེ་དང ། མུ་ཏིག་དང་ལྡན་པའི་དྲིལ་བུ་གཡེར་ཀའི་དྲ་བ་དུ་མ་སིལ་སིལ་སྒྲ་འབྱུང་བ། རྡོ་རྗེ་དག་རིན་པོ་ཆེ་དུ་མའི་སྟེགས་བུ་ལ་རྩ་པ་ལེགས་པར་བརྟེན་པ།་རྡོ་རྗེ་དང་རིན་པོ་ཆེ་དུ་མའི་ཆུ་སྲིན་གྱི་ཁ་ནས་བྱུང་བའི་མུ་ཏིག་དམར་པོའི་ཕྲེང་བ་དང་ལྡན་པའི་སྣམ་རྟེན་དང་བཅས་པ། རིན་པོ་ཆེ་དུ་མའི་པདྨའི་སྙིང་པོ་ལ་ཆགས་
291a
༄#། །པའི་རིན་པོ་ཆེ་ཀེ་ཀེ་རུ་དང ། ཀེ་ཀེ་རུ་ཆེན་པོ་དང ། ནད་རྙིལ་དང ། མཐོན་ཀ་ཆེན་པོ་དང ། དུན་ལས་དུ་མའི་འོད་ཟེར་འབར་བས་སྣང་བར་གྱུར་པས་ཀུན་ཏུ་མཛེས་པ། རིན་པོ་ཆེ་དང ། རྡོ་རྗེའི་ཐུར་མས་བརྒྱན་པའི་གདུགས་ཡུ་བས་བསྟོད་པ་བྱེ་བ་ཁྲག་ཁྲིག་འབུམ་ཕྲག་དུ་མས་གྲིབ་མར་བསྒྲིབས་ཤིང་བསྐྱབས་པ། དཔག་བསམ་གྱི་ཤིང་དུ་མས་མཛེས་པར་བྱས་པ་རྒྱ་ཆེ་བ་ལ་བཞུགས་ཏེ་གསེར་གྱི་རི་བོ་ལྟར་དཔལ་གྱིས་འབར་བ། ཉི་མ་སྟོང་བས་ལྷག་པའི་འོད་ཀྱི་དཀྱིལ་འཁོར་འབྱོར་པས་ས་ཕྱོགས་མཛེས་པར་གྱུར་བ། ཟླ་བ་ཉ་བ་ལྟར་འཇིག་རྟེན་ཀུན་གྱིས་མཐོང་ན་དགའ་བ། དཔག་བསམ་གྱི་ཤིང་ལྗོན་པ་ཆེན་པོ་ལྟར་སངས་རྒྱས་ཀྱི་ཆོས་རྣམས་ཀྱིས་ཡང་དག་པར་རྒྱས་པར་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་དཀར་བ་ཡང་དག་པར་སྟོན་ཏོ། །དེ་ནས་བཅོམ་ལྡན་འདས་ཀྱི་སྤྱི་གཙུག་གི་མཚམས་ཀྱི་མཛོད་སྤུ་ནས་སངས་རྒྱས་ཀྱི་ཞིང་ཐམས་ཅད་ཀུན་ཏུ་སྟོན་པ་ཞེས་བྱ་བའི་འོད་ཟེར་གྱི་དྲ་བ་ཆེན་པོ་བྱུང་སྟེ། འོད་ཟེར་གྱི་དྲ་བ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
291b
འདི་སྣང་བས་གསལ་བར་བྱས་པར་གྱུར་ཏོ། །གངྒཱའི་ཀླུང་གི་བྱེ་མ་ཇི་སྙེད་པ་དང་མཉམ་པའི་སངས་རྒྱས་ཀྱི་ཞིང་དེ་དག་ཐམས་ཅད་ཀྱང་སྣང་བ་དེས་གསལ་བར་སྣང་བར་གྱུར་ཏོ། །སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཀྱང་སེངྒེའི་ཁྲི་དུ་མ་བཀོད་པའི་ཁང་པ་བརྩེགས་པའི་གཞལ་མེད་ཁང་རྣམས་ན་ཆོས་སྟོན་ཏོ། །ཉན་ཐོས་ཆེན་པོ་དེ་དག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་ཐབས་ཅིག་གོ་།དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་རྣམས་དང་ཡང་ཐབས་ཅིག་གོ་།དེ་དག་ཐམས་ཅད་ཀྱང་རྡོ་རྗེའི་ལྷུན་པོ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ཡང་དག་པར་རབ་ཏུ་སྟོན་ཏོ། །དེ་དག་ཐམས་ཅད་ཀྱང་ཀུན་ཏུ་སྣང་ངོ ། ། སྐད་ཅིག་དེ་ལ་སེམས་ཅན་དེ་དག་ཐམས་ཅད་བདེ་བ་ཐམས་ཅད་ཀྱིས་ཚིམ་པར་གྱུར་ཏོ། །འོན་པ་རྣམས་ནི། སྒྲ་ཐོས་སོ། །ལོང་བ་རྣམས་ནི། མིག་ཐོབ་བོ། །སྨྱོན་པ་རྣམས་ནི།་དྲན་པ་རྙེད་དོ། །ནད་པ་རྣམས་ནི། སོས་པར་གྱུར་ཏོ། །སྦྲུམ་མ་རྣམས་ནི། བདེ་བར་བཙས་སོ། །སེམས་ཅན་དམྱལ་བ་ཐམས་ཅད་ཀྱི་སྡུག་བསྔལ་རྣམས་ནི། མེད་
292a
༄#། །པར་གྱུར་ཏོ། །ཡུད་ཙམ་དེ་ལ་དུད་འགྲོའི་སྐྱེ་གནས་དང ། ཡི་དྭགས་ཀྱི་སྐྱེ་གནས་དང ། གཤིན་རྗེའི་འཇིག་རྟེན་རྣམས་ཀྱིས་མིང་ཡང་མི་གྲགས་པར་གྱུར་ཏོ། །འཇིག་རྟེན་གྱི་བར་གང་དག་མུན་པ་མུན་ནག་དང ། མུན་པ་མུན་ནག་ཆེན་པོར་འདུག་པ་དེ་དག་ཐམས་ཅད་གསལ་བར་སྣང་བར་གྱུར་ཏོ། །དེར་སེམས་ཅན་གང་དག་སྐྱེས་པ་དེ་དག་ཐམས་ཅད་དང ། སེམས་ཅན་གཞན་འདིར་སྐྱེས་པ་རྣམས་ཀྱང་གཅིག་གིས་གཅིག་ཤེས་སོ། །དེ་ནས་སེམས་ཅན་དེ་དག་ཐམས་ཅད་ཀྱིས་ངོ་མཚར་རྨད་དུ་བྱུང་བའི་ཆོས་ཀྱི་དགའ་བ་ཐོབ་སྟེ་མཆོག་གིས་ཚིམ་པར་གྱུར་ནས་ཀུན་ཏུ་བལྟས་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་སྟེ་དེ་དག་གིས་གསེར་གྱི་མཆོད་སྡོང་ལྟར་དཔལ་གྱིས་འབར་ཞིང་རང་གི་གཟི་བརྗིད་ཀྱིས་མངོན་པར་འཕགས་པ་དེ་མཐོང་ནས་དེ་ཉིད་ལ་སྐྱབས་སུ་དོང་ངོ ། །སྐྱབས་སུ་དོང་མ་ཐག་ཏུ་དེ་དག་ཐམས་ཅད་དེ་བཞིན་གཤེགས་པའི་འཁོར་གྱི་དཀྱིལ་འཁོར་དེ་ཉིད་དུ་བདག་སོན་པ་སྙམ་དུ་ཤེས་སོ།། སྣང་བ་དེས་བདུད་ཀྱི་ཁྱིམ་ཐམས་ཅད་ཀུན་ཏུ་འབར། །རབ་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པར་ཀུན་ཏུ་སྣང་ངོ ། །བདུད་ཀྱི་རིས་
292b
ཀྱི་ལྷ་དེ་དག་ཀྱང་སྐད་ཅིག་དེ་ལ་ཉམ་ཐག་པའི་སྒྲར་དུ་ཞིང་སྐྲག་ནས་བྱེར་རོ། །བདུད་སྡིག་ཅན་ཡང་བཞིན་བཟང་པོ་རྙི་རྙི་པོར་གྱུར་ཅིང་ལུས་རྡུལ་ནས་བདུད་ཀྱི་རིས་ཀྱི་ལྷའི་བུ་ཐམས་ཅད་ལ་སྨྲས་པ། གྲོགས་པོ་དག། བདུད་ཀྱི་ཁྱིམ་ཐམས་ཅད་ཀུན་ཏུ་འབར། རབ་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པ་དང ། དགེ་སྦྱོང་གོའུ་མ་རི་རབ་ཀྱི་རྩེ་མོའི་ཁང་པ་བརྩེགས་པ་ན་ཆོས་བསྟན་པ་འདི་ལ་ལྟོས། དེས་བདག་ཅག་ཕུང་ངོ ། །མཐོ་བརྩམས་སོ། །ཕྱོགས་གང་ན་གནས་སུ་གཏོལ་མེད་དོ། །ལོངས་ལ་དགེ་སྦྱོང་གོའུ་ཏ་མ་དེའི་གན་དུ་དོང་སྟེ་བདུད་ཀྱི་ཡུལ་འདི་ཐལ་བར་བྱས་པར་མ་གྱུར་གྱི་བར་དུ་གཞོམ་མོ། །དེ་སྐད་ཅེས་སྨྲས་པ་དང ། བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱིས་རྗེ་བཀའ་བཞིན་འཚལ་ཞེས་སྨྲས་ནས་རང་རང་གི་གནས་སུ་དོང་སྟེ་ལག་ན་མཚོན་ཆ་སྣ་ཚོགས་ཅན། ལུས་ལ་གོ་ཆ་སྣ་ཚོགས་པ། ཆ་བྱད་དང ། རྒྱན་སྣ་ཚོགས་ཅན། མཆེ་བ་མི་བཟད་པར་འཇིགས་སུ་རུང་བ། བཞིན་མི་སྡུག་པར་བསྒྱུར་བ། མིག་དང ། བཞིན་དང ། སྐྲ་ཀུན་ཏུ་འབར་ཞིང་རབ་ཏུ་འབར་བ་དག་སྐད་ཅིག་དེ་ཉིད་ལ་གཅིག་ཏུ་འདུས་ནས་བདུད་སྡིག་ཅན་ག་ལ་བ་དེར་དོང་སྟེ་ཕྱིན་ནས་བདུད་སྡིག་ཅན་ལ་འདི་སྐད་ཅེས་སྨྲས་སོ། །བཞེངས་བཞེངས་ཐོག་མར་བཞུད་
293a
༄#། །ལ་ཇི་ཙམ་དུ་དགེ་སྦྱོང་གོའུ་ཏ་མ་ཉན་ཐོས་དང ། བྱང་ཆུབ་སེམས་དཔའི་དགེ་འདུན་དང་བཅས་བ་དེ་ཅི་ནས་ཀྱང་ཕྱིས་བདག་ཅག་གི་ཡུལ་དུ་གནོད་པ་ཅུང་ཟད་ཀྱང་མི་བསྐྱེད་པ་དང ། བདག་ཅག་གི་ཡུལ་གནོད་པར་མི་འགྱུར་བར་དེང་ཉིད་དུ་ཕྱེ་མར་བརླག་གོ་།རྣམ་པར་གཞོམ་མོ། །དེ་ནས་བདུད་སྡིག་ཅན་དགའ་ཞིང་མགུ་སྟེ་ཤིན་ཏུ་དགའ་བས་སྤུའི་ཁུང་བུ་ཁྱབ་ནས་སྐད་ཅིག་དེ་ཉིད་ལ་བདུད་ཀྱི་རིས་ཀྱི་ལྷའི་བུ་ཐམས་ཅད་དང་ལྷན་ཅིག་ཏུ་བདུད་ཀྱི་རྣམ་པར་འཕྲུལ་པ་ཆེན་པོ་དང ། བདུད་ཀྱི་སྡེ་ཆེན་པོས་བར་སྣང་དཔག་ཚད་སྟོང་ཕྲག་བརྒྱད་ཅུ་རྩ་བཞིར་ཁྱབ་པར་བྱས་ཏེ་དུང་དང ། རྔ་དང ། རྫ་རྔ་དང ། ཁར་རྔ་དང ། རྒྱུད་གཅིག་པ་དང ། ལྕགས་ཀྱི་སིལ་སྙན་དཀྲོལ་བ་དང ། རྔ་པོ་ཆེ་བརྡུང་ཞིང་ཧུ་ཧུ་ཞེས་བྱ་བ་དང ། པི་ཙི་ཞེས་བྱ་བ་དང ། ཟུངས་ཤིག་ཟུངས་ཤིག་།སོད་ཅིག་སོད་ཅིག་ཅེས་བྱ་བའི་སྒྲ་འབྱིན་ཅིང་གཤོལ་དང ། གཏུན་ཤིང་དང ། གཏུན་རྐེད་ཉེག་དང ། ཕུར་བུ་དང ། རྡོ་རྗེ་རྩེ་གཅིག་པ་དང ། མདའ་བོ་ཆེ་དང ། མདུང་ཐུང་དང ། རྩེ་གསུམ་པ་དང ། རལ་གྲི་དང ། འཁོར་ལོ་དང ། གཞུ་དང ། མདའ་ལ་སོགས་པའི་མཚོན་ཆ་ལག་ན་ཐོགས་ཤིང་བཅོམ་ལྡན་འདས་ག་ལ་བ་དེར་སོང་སྟེ་སྐད་ཅིག་དེ་ཉིད་ལ་ཨ་ལ་ལ་ཞེས་བྱ་བའི་སྒྲ་ཕྱུང་
293b
ནས་བཅོམ་ལྡན་འདས་ལ་མཚོན་ཆ་ཐམས་ཅད་ཀྱི་ཆར་ཕབ་པ་དང ། སངས་རྒྱས་ཀྱི་མཐུས་མཚོན་ཆ་དེ་དག་ཐམས་ཅད་མེ་ཏོག་གི་གདུགས་ཀྱི་སྤྲིན་ཆེན་པོ་འགྱུར་པར་སྣང་ངོ ། །བདུད་ཀྱི་སྒྲ་དེ་དག་ཐམས་ཅད་ཀྱང་སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། ཡང་དག་པར་འགྲོ་བའི་སྒྲ་རྣམས་སུ་གྲག་གོ་།བདུད་སྡིག་ཅན་ནི། ཞགས་པ་ལྔའི་བཅིང་བས་བདག་ཉིད་བཅིངས་པར་མཐོང་ངོ ། །དེ་ནས་བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱིས་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་ངོ་མཚར་ཆེན་པོ་དེ་མཐོང་ནས་ངོ་མཚར་དུ་གྱུར་ཅིང་དགའ་བ་ཐོབ་སྟེ་བཅོམ་ལྡན་འདས་དེ་ཉིད་ལ་སྐྱབས་སུ་དོང་ངོ ། །བདུད་སྡིག་ཅན་ནི། བདག་ཉིད་དགྲོལ་བར་འདོད་ན་འགྲོལ་མ་ནུས་ཏེ། དེ་བཞིན་གཤེགས་པའི་འཁོར་གྱི་ཁྱམས་སུ་བཅོམ་ལྡན་འདས་ཀྱི་སྤྱན་སྔར་ཤིང་རྩ་བ་ནས་བཅད་པ་བཞིན་དུ་རྡོ་རྗེའི་འཁོར་གྱི་ཁྱམས་ཆེན་པོར་འགྱེལ་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱམས་པ་ཆེན་པོའི་ཐུགས་དང ། ཐུགས་རྗེ་ཆེན་པོས་བརླན་པའི་སྤྱན་གྱིས་དེ་བཞིན་གཤེགས་པའི་འཁོར་གྱི་ཁྱམས་ཐམས་ཅད་དུ་གཟིགས་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ། བདུད་སྡིག་ཅན་
294a
༄#། །འདི་འཁོར་གྱི་ཁྱམས་འདི་ནས་སློང་ལ་སྟན་ལ་བཞག་སྟེ་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་གྱི་རྣམ་པར་འཕྲུལ་པའི་བྱིན་གྱི་རླབས་བསམ་གྱིས་མི་ཁྱབ་པར་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་གང་གིས་བདུད་ཀྱི་རིས་ཀྱི་ལྷའི་བུ་འདི་དག་དང ། བདུད་སྡིག་ཅན་འདི་སངས་རྒྱས་ལ་སྐྱབས་སུ་འདོང་བ་དང ། གཞན་ཡང་གང་དག་སྡང་བ་བགེགས་དང ། ལོག་འདྲེན་དང ། ཡི་དྭགས་དང ། བརྗེད་བྱེད་དང ། འབྱུང་པོ་དང ། གདོན་དང ། མཁའ་འགྲོ་མ་དང ། སྒྲུབ་པ་དང ། སྦྲུལ་འཛིན་བཅས་དང ། གནོན་པོ་དང ། ཟས་སུ་བཙས་པ་ཟ་བ་ལ་སོགས་པ་སྡང་བའི་སེམས་དང་ལྡན་པ། རབ་ཏུ་སྡང་བའི་སེམས་དང་ལྡན་པ། དེ་བཞིན་གཤེགས་པའི་བསྟན་པ་ལ་མ་གུས་པ་དང ། དེ་བཞིན་གཤེགས་པའི་ཆོས་ཉིད་ཁོང་དུ་མ་ཆུད་པ་དེ་དག་ཐམས་ཅད་གང་གིས་འཛུད་པ་དང ། དཀོན་མཆོག་གསུམ་ལ་སྐྱབས་སུ་འགྲོ་བར་བྱེད་པ་ཡང་སྟོན་ཅིག། དེ་ཅིའི་ཕྱིར་ཞེ་ན། ངན་འགྲོའི་ལོག་པར་ལྟུང་བར་འགྲོ་བའི་ཕྱིར་རོ། །དེ་སྐད་ཅེས་བཀའ་སྩལ་པ་དང ། གསང་བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱི་བཀའ་མཉན་ནས་རིན་པོ་ཆེའི་པདྨའི་རྡོ་རྗེའི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་
294b
གཟར་ནས་པུས་མོ་གཡས་པའི་ལྷ་ང་རིན་པོ་ཆེའི་པདྨའི་སྙིང་པོ་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སེམས་ཅན་ཀུན་གྱི་ཉོན་མོངས་པ། །གཞིག་པའི་སླད་དུ་འདྲེན་པར་བྱུང ། །ཁྱོད་ནི་བདུད་རྣམས་ཀུན་ལས་རྒྱལ། །འཇིག་རྟེན་རྩ་ལག་གཅིག་པུ་ཁྱོད། །ཐར་བའི་གྲོང་ཁྱེར་འཇུག་པའི་ལམ། །ཡེ་ཤེས་མ་ལུས་ཁྱོད་གཅིག་པུས། །ཡང་དག་བརྙེས་ནས་ཐུགས་རྗེ་ཡིས། །སྙན་པའི་གསུང་གིས་བསྟན་པ་མཛད། །ཁྱོད་སྔོན་སྦྱིན་དང་ཚུལ་ཁྲིམས་དང ། །བཟོད་དང་བརྩོན་འགྲུས་བསམ་གཏན་དང ། །ཤེས་རབ་ལ་སོགས་ཡོན་ཏན་གྱིས། །བདག་མཛད་སླད་ཀྱིས་སེམས་ཅན་བཙུད། །ཁྱོད་ཀྱིས་ཆོས་རྣམས་སྐྱེ་མེད་པར། །བཤད་ཅིང་དེ་བཞིན་རྣམ་ཕྱེ་ཡང ། །འབྲས་བུར་དོགས་པ་མ་མཆིས་པ། །ཀྱེ་མ་མགོན་པོ་ཁྱོད་ཀྱིས་བཤད་འཁོར་ལོ་ཡན་ལག་བཅུ་གཉིས་པ། །ཁྱོད་ཉིད་མཁྱེན་ནས་རབ་ཏུ་བསྐོར། །མུ་སྟེགས་ཅན་དང་བདུད་བཏུལ་ཏེ། །ཆོས་ཀྱི་སྣང་བ་གསལ་བར་མཛད། །ཉོན་མོངས་བྲག་ཆེན་རྣམས་ཀུན་ཏུ། །ཡེ་ཤེས་རྡོ་རྗེས་རབ་བཅོམ་ནས། །སུས་ཀྱང་ཐོབ་པར་མ་གྱུར་པའི། །བྱང་ཆུབ་བླ་ན་མེད་པ་བརྙེས། །གང་གི་མཚན་ཡང་རྫོགས་པ་ཡི། །བྱང་ཆུབ་
295a
༄#། །ས་བོན་ཉིད་འགྱུར་བ། །ཁྱོད་ནི་འཇིག་རྟེན་མཆོག་གཅིག་པ། །དམ་པ་རབ་སྦྱིན་བདག་པོ་ལགས། །ཁྱོད་ནི་མགོན་པོ་ཁྱོད་ནི་ཕ། །ཁྱོད་སྐྱབས་ཁྱོད་ནི་དཔུང་གཉེན་ལགས། །ཐུགས་རྗེ་ཆེན་པོ་ཡེ་ཤེས་ཉིད། །མྱ་ངན་འདས་ནས་གཅིག་པུ་ཁྱོད། །ཁྱོད་ཉིད་གཤེགས་ནས་སེམས་ཅན་རྣམས། །སེམས་ཅན་དམྱལ་ལས་རྣམ་པར་དཀྲོལ། །རང་གི་སྐུ་ཡང་ཡོངས་བཏང་ནས། །ཁྱོད་ཀྱིས་སྲོག་ཆགས་རྣམས་ཀྱང་བསྲུངས། །ལུས་ཅན་ཀུན་གྱིས་མ་ཐོབ་པའི། །ཡེ་ཤེས་ཁྱོད་ཀྱིས་བརྙེས་གྱུར་ནས། །གྲོལ་ཏེ་འཇིག་རྟེན་རྣམས་ཀྱང་གྲོལ། །ཀྱེ་མ་ཁྱོད་ནི་རྩ་ལག་བཟང ། །མགོན་པོ་ཁྱོད་ཀྱི་འོད་ཟེར་གྱི། །དྲ་བས་འཇིག་རྟེན་ཁམས་ཁྱབ་སྟེ། །མྱ་ངན་འདས་ལས་ལྷག་པ་བདེ། །ལུས་ཅན་ཀུན་གྱིས་ཐོབ་པར་མཛད། །ཁྱོད་ཀྱི་འོད་ཀྱི་གཟིས་བཅོམ་པས། །གཟའ་རྣམས་ཀུན་དང་དགུང་ཟླ་དང ། །གདུགས་རྣམས་དང་ནི་ཞུགས་རྣམས་དང ། །ནོར་བུ་ལམ་མེར་མ་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་ནས་ཡང་རིན་པོ་ཆེའི་པདྨའི་སྙིང་པོ་ལ་འདུག་སྟེ་བཅོམ་ལྡན་འདས། ལེགས་སོ་ཞེས་གསོལ་ནས་རྡོ་རྗེའི་རྣམ་པར་ཐར་པའི་སྒོ་ཆེན་
295b
པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེས་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་འདི་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། ཀུན་ཏུ་རབ་ཏུ་གཡོས་ཏེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོན་ཤར་ཕྱོགས་དམའ།་ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། སྟེང་མཐོ་ན་འོག་དམའ། འོག་མཐོ་ན་སྟེང་དམའ་བར་གྱུར་ཏོ། །ཕྱོགས་ཐམས་ཅད་དང ། ཕྱོགས་མཚམས་ཐམས་ཅད་ཀྱང་དགའ་བ་དང ། ཡིད་བདེ་བ་སྐྱེས་པར་གྱུར་ནས་ལྷ་མ་མེ། ལྷན་ནེ། ལྷང་ངེའོ། །གསང་བ་པའི་བདག་པོ་ལག་ན་རྡོ་རྗེའི་ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་ཀུན་ཏུ་འབར་བ། རབ་ཏུ་འབར་བ། ཀུན་ཏུ་རབ་ཏུ་མཆེད་ཅིང་འབར་བ་མེ་ལྕེ་གཅིག་ཏུ་གྱུར་པ་དག་བྱུང་བར་ཀུན་ཏུ་སྣང་ངོ ། །རྡོ་རྗེ་འབར་བའི་སྣང་བ་དེས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་མེད་པ་ཇི་སྙེད་པ་དག་ན་སངས་རྒྱས་
296a
༄#། །བཅོམ་ལྡན་འདས་གང་དག་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ།་དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་སྟོན་པ། ཉན་ཐོས་ཀྱི་དགེ་འདུན་དང་བཅས་པ། བྱང་ཆུབ་སེམས་དཔའི་དགེ་འདུན་དང་བཅས་པ་དེ་དག་གི་འཁོར་གྱི་ཁྱམས་རྒྱ་ཆེ་ཞིང་རྒྱ་ཆེ་བ་དག་ན་ཀུན་ཏུ་སྣང་ངོ ། །བྱང་ཆུབ་སེམས་དཔའ་དེ་དག་ཐམས་ཅད་དེ་བཞིན་གཤེགས་པ་དེ་དག་གི་སྤྱན་སྔར་རྡོ་རྗེ་འབར་བའི་སྣང་བ་རྒྱ་ཆེན་པོ་དེས་སྣང་བར་གྱུར་ནས་སངས་རྒྱས་བཅོམ་ལྡན་འདས་དེ་དག་ལ་སོ་སོར་ཞུས་པ། བཅོམ་ལྡན་འདས། སྣང་བ་རྒྱ་ཆེན་པོ་ཀུན་ཏུ་གདའ་བ་འདི་སུའི་ལགས། དེ་ནས་སངས་རྒྱས་བཅོམ་ལྡན་འདས་དེ་དག་གིས་སོ་སོའི་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་མི་མཛད་ཀྱི་འཇིག་རྟེན་གྱི་ཁམས་ན་རི་རབ་ཀྱི་སྟེང་ན་ཆོས་སྟོན་ཏོ། བཅོམ་ལྡན་འདས་དེས་བདུད་སྡིག་ཅན་ཞགས་པའི་བཅིང་བ་ལྔས་བཅིངས་ཏེ་བཅོམ་ལྡན་
296b
འདས་ཀྱི་སྤྱན་སྔར་འགྱེལ་པ་མིགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་ཞེས་བྱ་བ་ལ་འདི་སྐད་དུ་གསང་བ་པའི་བདག་པོ་ལག་ན་རྡོ་རྗེ། ཁྱོད་ཀྱིས་རང་གི་རྫུ་འཕྲུལ་གྱི་རྣམ་པར་འཕྲུལ་པའི་ཆོ་འཕྲུལ་སྟོན་ཅིག་ཅེས་བཀའ་སྩལ་ཏོ། །རིགས་ཀྱི་བུ་དག་།འདི་ནི། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེའི་རྡོ་རྗེའི་རྣམ་པར་འཕྲུལ་པ་ཆེན་པོའི་བྱིན་གྱི་རླབས་སོ། །དེ་སྐད་ཅེས་བཀའ་སྩལ་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གིས་གནང་ནས་རིགས་ཀྱི་བུ་དེ་དག་ཐམས་ཅད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཕྱག་འཚལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པར་འཕྲུལ་པའི་ཆོ་འཕྲུལ་བསམ་གྱིས་མི་ཁྱབ་པས་འཇིག་རྟེན་གྱི་ཁམས་མི་མཇེད་འདིར་ལྷགས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། གསང་བ་པའི་བདག་པོ་ལག་ན་རྡོ་རྗེ་ལ་མཆོད་པའི་སྤྲིན་དང ། གདུགས་ཀྱི་སྤྲིན་དང ། རྒྱན་ཕྲེང་གི་སྤྲིན་དང ། དབུ་རྒྱན་གྱི་སྤྲིན་ཀྱི་སྤྲིན་དང ། མེ་ཏོག་གི་སྤྲིན་དང ། ན་བཟའི་སྤྲིན་ཆེན་པོས་མཆོད་པ་ཆེན་པོ་
297a
༄#། །བྱས་ནས་ནམ་མཁའི་དཀྱིལ་ན་འཁོད་བཞིན་དུ་བཅོམ་ལྡན་འདས་ཤཱཀྱ་ཐུབ་པ་ལ་ལན་བདུན་བསྐོར་བ་བྱས་ཏེ་པུས་མོ་གཡས་པའི་ལྷ་ང་རིན་པོ་ཆེའི་པདྨའི་རྡོ་རྗེའི་སྟན་ལ་བཙུགས་ནས་བཅོམ་ལྡན་འདས་ལོགས་སུ་ལྟ་ཞིང་བཅོམ་ལྡན་འདས་ལ་ཕྱག་འཚལ་བ་དང ། དེ་བཞིན་གཤེགས་པས་གནང་ནས་རང་རང་གི་རིན་པོ་ཆེའི་པདྨའི་རྡོ་རྗེའི་སྟན་དེ་དག་ལ་འཁོད་པར་གྱུར་ཏོ། །དེའི་ཚེ་ཤར་ཕྱོགས་ལོགས་ན་འཇིག་རྟེན་གྱི་ཁམས་རྡོ་རྗེ་ཏོག་ཅེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་བཞེས་ཏེ།་འདི་ལྟར་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་འདི་ཉིད་ལས་བརྩམས་ཏེ་ཆོས་ཀྱང་སྟོན་ཏོ། །རྡོ་རྗེ་འབར་བའི་སྣང་བ་དེས་ཀྱང་འཇིག་རྟེན་གྱི་ཁམས་ཇི་སྙེད་པ་དེ་དག་ཐམས་ཅད་ཀུན་ནས་སྣང་བར་གྱུར་ཏོ། །དེ་ནས་འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ཞེས་བྱ་བ་དེ་བཞིན་གཤེགས་པ་དེའི་འཁོར་གྱི་ཁྱམས་སུ་འདུས་ཏེ་འདུག་པར་གྱུར་པ་དེས་ངོ་མཚར་དེ་མཐོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་
297b
པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་ཞེས་བྱ་བ་དེ་ལ་ཞུས་ཏེ། བཅོམ་ལྡན་འདས། རྡོ་རྗེ་འབར་བའི་སྣང་བ་འདི་ལྟ་བུ་གང་གིས་འཇིག་རྟེན་གྱི་ཁམས་འདི་ཐམས་ཅད་སྣང་བར་གྱུར་ཏེ། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རྒྱུན་ཆད་ཅིང་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། ཡི་དྭགས་དང ། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་མི་གདའ་བར་གྱུར། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང་ལྟོ་འཕྱེ་ཆེན་པོ་ལ་སོགས་པ་འཇིག་རྟེན་ན་རྫུ་འཕྲུལ་ཆེ་ཞིང་དབང་ཆེ་བར་གྲགས་པ་ཐམས་ཅད་ཀྱང་ཀུན་ནས་མཆོད་པའི་སྤྲིན་ཆེན་པོས་དགའ་བ་དང ། ཡིད་བདེ་བ་སྐྱེས་ཏེ་ནུབ་ཕྱོགས་སུ་མཆི་བར་འདའ་བ་འདི་སུའི་ལགས། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ནུབ་ཕྱོགས་ཀྱི་ལོགས་ན་མི་མཇེད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རྡོ་རྗེ་ཆེན་པོའི་རི་རབ་ཀྱི་རྩེ་མོའི་ཁང་པ་བརྩེགས་པ་ན་རྡོ་རྗེ་ཆེན་པོའི་རི་
298a
༄#། །རབ་ཀྱི་རྩེ་མོའི་ཁང་པ་བརྩེགས་པའི་གཟུངས་ཞེས་བྱ་བའི་ཆོས་ཀྱི་རྣམ་གྲངས་སྟོན་ཏོ། །བཅོམ་ལྡན་འདས་དེས་སྤྱི་གཙུག་གི་མཚམས་ཀྱི་མཛོད་སྤུ་ནས་འོད་ཟེར་གྱི་དྲ་བ་ཆེན་པོ་ཕྱུང་སྟེ་འོད་ཟེར་གྱི་དྲ་བ་ཆེན་པོ་དེས་འཇིག་རྟེན་གྱི་ཁམས་དེར་བདུད་སྡིག་ཅན་བསྐུལ་མ་ཐག་ཏུ་ཀུན་ཏུ་ཁྲོས་ནས་ལྷའི་བུ་ཐམས་ཅད་དང ། གཞན་ཡང་བདུད་ཀྱི་རིས་ཀྱི་ལྷའི་བུ་རྣམས་དང ། དཔུང་གི་ཚོགས་ཆེན་པོ་དང་ལྷན་ཅིག་ཏུ་བཅོམ་ལྡན་འདས་དེ་ལ་གཙེ་བའི་ཕྱིར་ལྷགས་པ་དང ། དེ་ཡང་སངས་རྒྱས་ཀྱི་མཐུས་དེ་བཞིན་གཤེགས་པའི་འཁོར་གྱི་ཁྱམས་དེ་ཉིད་དུ་ཞགས་པ་ལྔའི་བཅིང་པས་བཅིངས་ནས་བཅོམ་ལྡན་འདས་ཀྱི་སྤྱན་སྔར་འགྱེལ་ཏེ། དེ་ལ་ཐུགས་བརྩེ་བའི་ཕྱིར་བཅོམ་ལྡན་འདས་དེས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་ལ་སྟོན་ཅིག་པར་བཀའ་ལུང་བྱིན་ནས་གསང་བ་པའི་བདག་པོ་ལག་ན་རྡོ་རྗེ་དེས་རྡོ་རྗེའི་རྣམ་པར་ཐར་པའི་སྒོ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཡན་ལག་དང་ཉིང་ལག་གི་མཚམས་ཐམས་ཅད་ནས་རྡོ་རྗེ་རྣམས་བསྟན་ཏེ། འདི་ནི། རྡོ་རྗེ་དེ་དག་ཉིད་རྡོ་རྗེ་འབར་བའི་སྣང་བའོ། །རིགས་ཀྱི་བུ། རྡོ་རྗེ་འབར་བའི་སྣང་བ་དེས་ཀྱང་ཕྱོགས་བཅུའི་
298b
འཇིག་རྟེན་གྱི་ཁམས་ཚད་མེད་གྲངས་མེད་དཔག་ཏུ་མེད་པ་རྣམས་སུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་དང་མཉམ་པ་ཇི་སྙེད་པ་སྣང་བར་བྱས་ཏེ་འཇིག་རྟེན་གྱི་ཁམས་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཐམས་ཅད་ཀྱང་བསྐུལ། བྱང་ཆུབ་སེམས་དཔའ་དེ་དག་གི་འཁོར་གྱི་དཀྱིལ་འཁོར་དེ་དག་ཀྱང་བསྐུལ་བས་ངོ་མཚར་ཐོབ་པར་གྱུར་པ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་སོ་སོར་ཞུས་སོ། །རིགས་ཀྱི་བུ། དེ་ཉིད་ཀྱི་མཐུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་སྤྱན་སྔ་ན་འདུག་ཅིང་བསྙེན་བཀུར་བྱེད་པ་ཡང་མཐོང་ངོ ། །དེ་སྐད་ཅེས་བཀའ་སྩལ་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་འཇིག་རྟེན་གྱི་ཁམས་མི་མཇེད་དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ལ་བལྟ་བ་དང ། ཕྱག་བགྱི་བ་དང ། བསྙེན་བཀུང་བགྱི་བ་དང ། གསང་བ་
299a
༄#། །པའི་བདག་པོ་ལག་ན་རྡོ་རྗེ་དེ་ཡང་བལྟ་བར་བགྱི་བའི་སླད་དུ་མཆིའོ། །དེ་སྐད་ཅེས་གསོལ་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། དེའི་དུས་ལ་ད་བབ་པར་ཤེས་ན་སོང་ཞིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་བཅོམ་ལྡན་འདས་དེས་གནང་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོས་རབ་ཏུ་འཇོམས་པ་དེ་ལ་ལན་བདུན་བསྐོར་བ་བྱས་ཏེ་འཇིག་རྟེན་གྱི་ཁམས་དེ་ནས་མི་སྣང་བར་གྱུར་ནས་ནམ་མཁའི་དཀྱིལ་གྱི་ལམ་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་དང་ལྷན་ཅིག་ཏུ་བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོ་དང ། བྱང་ཆུབ་སེམས་དཔའི་རྫུ་འཕྲུལ་ཆེན་པོས་འཇིག་རྟེན་གྱི་ཁམས་མི་མཇེད་འདི་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་དེ་དག་ཐམས་ཅད་དང་ལྷན་ཅིག་སྨྲ་བ་ན། བསོད་ནམས་ཀྱི་ཚོགས་ཆེན་པོ་བསགས་པ་ལས་གྲུབ་པས་
299b
བྱིན་པའི་རིན་པོ་ཆེ་དེ་དག་ལས་འོད་ཟེར་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། ལྗང་སྔོན་དང ། ལྗང་སེར་དང ། བཙོད་ཀ་དང ། ཤེལ་དང ། དངུལ་དང ། ནོར་བུ་དང ། མུ་ཏིག་དང ། གསེར་དང ། པདྨ་རཱ་ག་དང ། །རྡོའི་སྙིང་པོ་དང ། ཀེ་ཀེ་རུ་དང ། ཀེ་ཀེ་རུ་ཆེན་པོ་དང ། ནད་རྙིལ་དང ། མཐོན་ཀ་ཆེན་པོ་དང ། དུན་ལས་དང ། གོ་མུ་ཏ་ར་ག་དང ། མུ་ཏིག་དཀར་པོའི་ཁ་དོག་ལྟ་བུ་རྣམས་བྱུང་སྟེ། དེ་དག་གིས་ཐམས་ཅད་དང་ལྡན་པའི་འཇིག་རྟེན་གྱི་ཁམས་ལ་ལན་འབུམ་ཕྲག་དུ་མར་བསྐོར་བ་བྱས་ཏེ་སྟེང་གི་ངར་སྣང་ཁྱབ་པར་བྱས་ནས་ལྷའི་སྣང་བས་སྣང་བར་བྱས་ཏེ་འདུས་ནས་འཇའ་ལྟ་བུར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་ཞབས་མཚན་ཐམས་ཅད་ཕུན་སུམ་ཚོགས་པ། འཇམ་པ། མཉེན་པ། རབ་ཏུ་གཞོན་པ། ཤ་རྒྱས་པ། སྣུམ་པ། ལོང་བུ་གཉིས་ཀྱི་རྩ་མི་མངོན་པ། པདྨ་གསར་དུ་ཁ་ཕྱེ་བ་ལྟ་བུ། དུང་དང ། ཉ་དང ། རྡོ་རྗེ་དང ། རྒྱལ་མཚན་དང ། ལྕགས་ཀྱུ་དང ། པདྨ་དང ། ཆུ་སྲིན་མ་ཀ་རའི་མཚན་དང་ལྡན་པ་གཉིས་ལ་ལན་འབུམ་ཕྲག་དུ་མར་བསྐོར་བ་བྱས་ནས་ནུབ་པར་གྱུར་ཏོ། །ནམ་མཁའི་དཀྱིལ་ན་འོད་ཟེར་རེ་རེའི་རྩེ་མོ་ལས་པདྨ་བྱེ་བ་ཁྲག་ཁྲིག་འབུམ་ཕྲག་བརྒྱད་ཅུ་
300a
༄#། །ཚད་ཤིང་ཏའི་འཕང་ལོ་ཙམ་པ། རིན་པོ་ཆེ་སྣ་བདུན་གྱི་རྒྱུ་ལས་བྱུང་བ་འདི་ལྟ་སྟེ། གསེར་གྱི་རྒྱུ་ལས་བྱུང་བ་དང ། ནད་རྙིལ་དང ། དངུལ་དང ། བྱི་རུ་དང ། ཤེལ་དང ། ཀེ་ཀེ་རུ་དང ། དུན་ལས་ཀྱི་རྒྱུ་ལས་བྱུང་བ་དག་མཐོན་ཏོ། །དེ་ལ་གསེར་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི། ཨནད་རྙིལ་གྱི་རྒྱུ་ལས་བྱུང་བ་དག་གོ་།སྙིང་པོ་ནི། དངུལ་གྱི་རྒྱུ་ལས་བྱུང་བའོ། །ཟེ་བ་ནི། བྱི་རུའི་རྒྱུ་ལས་བྱུང་བའོ། །ཆུ་བ་ནི། ཤེལ་གྱི་རྒྱུ་ལས་བྱུང་བའོ། །ཟེ་འབྲུ་ནི། ཀེ་ཀེ་རུའི་རྒྱུ་ལས་བྱུང་བའོ། །ནད་རྙིལ་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི། དངུལ་གྱི་རྒྱུ་ལས་བྱུང་བ་དག་གོ་།སྙིང་པོ་ནི། བྱི་རུའི་རྒྱུ་ལས་བྱུང་བའོ། །ཟེ་བ་ནི། ཤེལ་གྱི་རྒྱུ་ལས་བྱུང་བའོ། །ཆུ་བ་ནི། ཀེ་ཀེ་རུའི་རྒྱུ་ལས་བྱུང་བའོ། །ཟེ་འབྲུ་ནི། དུན་ལས་ཀྱི་རྒྱུ་ལས་བྱུང་བའོ། །དངུལ་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི། བྱི་རུའི་རྒྱུ་ལས་བྱུང་བ་དག་གོ་།སྙིང་པོ་ནི། ཤེལ་གྱི་རྒྱུ་ལས་བྱུང་བའོ། །ཟེ་བ་ནི། ཀེ་ཀེ་རུའི་རྒྱུ་ལས་བྱུང་བའོ། །ཆུ་བ་ནི། དུན་ལས་ཀྱི་རྒྱུ་ལས་བྱུང་བའོ། །ཟེ་འབྲུ་ནི། གསེར་གྱི་རྒྱུ་ལས་བྱུང་བའོ། །བྱི་རུའི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི། ཤེལ་གྱི་རྒྱུ་ལས་བྱུང་བ་དག་གོ། སིང་པོ་ནི། ཀེ་ཀེ་རུའི་རྒྱུ་ལས་བྱུང་བའོ། །
300b
ཟེ་བ་ནི། དུན་ལས་ཀྱི་རྒྱུ་ལས་བྱུང་བའོ། །ཆུ་བ་ནི། གསེར་གྱི་རྒྱུ་ལས་བྱུང་བའོ། །ཟེ་འབྲུ་ནི། ཨནད་རྙིལ་གྱི་རྒྱུ་ལས་བྱུང་བའོ། །ཤེལ་གྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི། ཀེ་ཀེ་རུའི་རྒྱུ་ལས་བྱུང་བ་དག་གོ། །སྙིང་པོ་ནི། དུན་ལས་ཀྱི་རྒྱུ་ལས་བྱུང་བའོ། །ཟེ་བ་ནི། གསེར་གྱི་རྒྱུ་ལས་བྱུང་བའོ། །ཆུ་བ་ནི། ཨནད་རྙིལ་གྱི་རྒྱུ་ལས་བྱུང་བའོ། །ཟེ་འབྲུ་ནི། དངུལ་གྱི་རྒྱུ་ལས་བྱུང་བའོ། །ཀེ་ཀེ་རུའི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི། དུན་ལས་ཀྱི་རྒྱུ་ལས་བྱུང་བ་དག་གོ། སྙིང་པོ་ནི། གསེར་གྱི་རྒྱུ་ལས་བྱུང་བའོ། །ཟེ་བ་ནི། ཨནད་རྙིལ་གྱི་རྒྱུ་ལས་བྱུང་བའོ། །ཆུ་བ་ནི། དངུལ་གྱི་རྒྱུ་ལས་བྱུང་བའོ། །ཟེ་འབྲུ་ནི། བྱི་རུའི་རྒྱུ་ལས་བྱུང་བའོ། །དུན་ལས་ཀྱི་རྒྱུ་ལས་བྱུང་བའི་པདྨ་རྣམས་ཀྱི་འདབ་མ་ནི། གསེར་གྱི་རྒྱུ་ལས་བྱུང་བ་དག་གོ་།སྙིང་པོ་ནི། ཨནད་རྙིལ་གྱི་རྒྱུ་ལས་བྱུང་བའོ། །ཟེ་བ་ནི། དངུལ་གྱི་རྒྱུ་ལས་བྱུང་བའོ། །ཆུ་བ་ནི། བྱི་རུའི་རྒྱུ་ལས་བྱུང་བའོ། །ཟེ་འབྲུ་ནི། ཤེལ་གྱི་རྒྱུ་ལས་བྱུང་བའོ། །དེ་བཞིན་དུ་སྦྱར་ཏེ་དེ་ལྟར་རིན་པོ་ཆེ་རྣམ་པ་དུ་མའི་རྒྱུ་ལས་བྱུང་བའི་པདྨ་དག་གོ་།རིན་པོ་ཆེའི་པདྨ་རེ་རེ་ལ་ཡང་ས་བཅུ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་མཛེས་པའི་སྤྱོད་ལམ་ཕུན་སུམ་ཚོགས་པ་དག་ཏིང་ངེ་འཛིན་ལ་
301a
༄#། །སྙོམས་པར་ཞུགས་སོ། །བྱང་ཆུབ་སེམས་དཔའ་རེ་རེའི་ལྟེ་བ་ནས་ཀྱང་འོད་ཟེར་འབུམ་འབུམ་བྱུང་ངོ ། །འོད་ཟེར་གྱི་རྩེ་མོ་རེ་རེ་ལས་ཀྱང་རིན་པོ་ཆེ་ཐམས་ཅད་ཀྱི་རྒྱུ་ལས་བྱུང་བའི་ཁང་པ་བརྩེགས་པ་ནོར་བུ་དང ། རིན་པོ་ཆེ་རྣམ་པ་སྣ་ཚོགས་ཀྱི་སྟེགས་བུས་བསྐོར་བ། ཤེལ་གྱི་རྒྱུ་ལས་བྱུང་བའི་ཟླ་བས་སྤྲས་པའི་ཁང་ཕྲན་གྱི་རྩེ་མོ་ལ་སེངྒེའི་རྣ་བའི་སྟེང་ན་རིན་པོ་ཆེའི་རྒྱལ་མཚན་དང ། བ་དན་དང ། རྣམ་པར་རྒྱལ་བའི་བ་དན་དཔྱངས་པས་ནམ་མཁའ་ཀུན་ཏུ་ཁེབས་པ། པདྨ་རཱ་ག་དང ། ནད་རྙིལ་དང ། མརྒད་དང ། བཻ་ཌཱུརྱ་དང ། རྡོའི་སྙིང་པོ་དང ། སྤུག་དང ། ཀེ་ཀེ་རུ་ལས་བྱས་པའི་ཀ་བ་ཆེན་པོའི་ཀླད་ལ་འཛམ་བུ་ཆུ་བོའི་གསེར་གྱི་ཤིང་ལས་གཅོད་པ་ལྟ་བུའི་ཚོགས་བཀོད་པས་རྣམ་པར་སྤྲས་ཏེ། མཛེས་པར་བྱས་པ། དངུལ་གྱི་ལས་བྱས་པའི་ཕུག་རོན་གྱི་ཕྲེང་གི་མཐའ་མུ་ཏིག་དམར་པོ་དང་ལྡན་པའི་དྲིལ་བུ་གཡེར་ཀའི་དྲ་བ་སྦྱངས་པའི་སྒྲས་སད་པར་གྱུར་ནས་རབ་ཏུ་དགའ་ཞིང་དྲེགས་པའི་ཕུག་རོན་དང ། བྱ་བང་དང ། ནེ་ཙོ་དང ། རི་སྐེགས་དང ། རྨ་བྱའི་ང་རོ་དག་གིས་ཉམས་དགའ་བ། ཁྱམས་དང ། འདུན་ཁང་ཆེན་པོའི་ཉེན་ཀོར་སྟེགས་པུས་བསྐོར་བས་མཛེས་པར་བྱས་པ། རིན་པོ་ཆེ་རྣམ་པ་སྣ་ཚོགས་ལས་
301b
བྱས་པའི་སྒོ་ཁང་ཅན། ཤེལ་གྱི་རྒྱུ་ལས་བྱས་པའི་སྟེགས་བུ་དང་ལྡན་པ། བཀྲ་ཤིས་ཀྱི་གསེར་བུམ་དུ་མ་ནས་ཆུ་དྲི་ཞིམ་པོས་ཆག་ཆག་བཏབ་པ། རྫིང་ཆེན་པོ་འགྲམ་གྱི་ནེའུ་གསིང་མྲྒད་ཀྱི་རྒྱུ་ལས་བྱུང་བ་ཀ་ཙི་ལིན་དའི་གོས་ལྟར་རེག་ན་བདེ་བས་མཛེས་པའི་ཕྱོགས་ན་བདེ་བར་ཉལ་བའི་ངང་པ་དང ། ཁྲུང་ཁྲུང་དང་།ངུར་པ་དང ། ཀ་ལནད་ཀའི་ཁྱུ་གནས་པ། གསེར་གྱི་ཕྱེ་མ་བདལ་བའི་གཏོས་ཆེན་པོ་རིན་པོ་ཆེ་སྣ་བདུན་གྱི་ཐེམ་སྐས་ཀྱིས་ཕྲེང་བས་བརྒྱན་པ། ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ་གྲངས་འབུམ་ཕྲག་དུ་མས་ཀུན་ནས་ཡོངས་སུ་བསྐོར་བ་དག་བྱུང་ངོ ། །རྫིང་བུ་རེ་རེ་ནས་ཀྱང་རིན་པོ་ཆེའི་པདྨ་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུ་རྩ་དགུ་བྱུང་ངོ ། །རིན་པོ་ཆེའི་པདྨ་རེ་རེའི་སྙིང་པོ་ལ་ཡང་སིལ་སྙན་དང ། ཕེག་རྡོབ་པ་དང ། གླུ་དབྱངས་རྣམས་ཀྱི་སྒྲ་བྱུང་བས་ལྷའི་བུ་མོ་དག་གླ་ལེན་གར་བྱེད་ཅིང་ཡོངས་སུ་སྤྱོད་དོ། །སིལ་སྙན་དང ། ཕེག་རྡོབ་པ་དང ། གླུ་དབྱངས་ཀྱི་སྒྲ་བྱུང་བ་དེ་དག་ལས་ཀྱང་ཚིགས་སུ་བཅད་པ་འདི་ལྟ་བུ་འདི་དག་བྱུང་ངོ ། །སྦྱིན་དང་ཚུལ་ཁྲིམས་ཀྱིས་ནི་གང་ཞིག་དཔག་མེད་ཅིང ། །དེ་བཞིན་བཟོད་དང་བརྩོན་འགྲུས་དག་གི་སྟོབས་ལྡན་ལ། །བསམ་གཏན་གྱིས་ནི་ཞི་ཞིང་དབང་གོས་ཀུན་འབྱོར་
302a
༄#། །བ། །ཡེ་ཤེས་སྒྲོན་མ་དེ་ལ་སྐྱབས་སུ་འདོང་བར་གྱིས། །བསམ་གྱིས་མི་ཁྱབ་སྟོབས་དང་སྨོན་ལམ་རྣམས་དང་ལྡན། །ཐབས་དང་བྱང་ཆུབ་ཡན་ལག་ཏིང་འཛིན་རྣམས་ཀྱི་བདག་།རྣམ་པར་གྲོལ་བའི་ལམ་དང་སྟོབས་བཅུ་ལྡན་པ་ཡི། །ཐུབ་པ་གང་ཡིན་དེ་ལ་མཆོད་ཕྱིར་འདོང་བར་གྱིས། །འདམ་རྫབ་ནས་ནི་པདྨ་རྒྱས་པ་ཇི་བཞིན་དུ། །གང་ཞིག་ཉོན་མོངས་འདམ་གྱིས་རྟག་པར་མི་གོས་པ། །འཆི་དང་སྐྱེ་བའི་སྡུག་བསྔལ་རྣམ་པར་བསལ་བ་ཡི། །རྒྱལ་བ་འཇིག་རྟེན་མགོན་པོ་དེ་ལ་བལྟ་ཕྱིར་དེང ། །གཅིག་ཀྱང་མི་ལྡན་མིན་པར་གྱུར་པ་གང་ཞིག་གིས། །སྐྱེ་རྒུ་རྣམས་ཀྱི་གཏི་མུག་སྒོ་གླེགས་རྣམས་བཤིག་ཅིང ། །སྐུ་དང་གསུང་དང་ཐུགས་ཀྱི་སྤྱོད་པ་རབ་ཞི་བ། །ཤཱཀྱའི་ཏོག་ལྡན་དེ་ལ་སྐྱབས་སུ་འདོང་བར་གྱིས། །དེ་ལྟར་ཁང་པ་བརྩེགས་པ་དཔག་བསམ་གྱི་ཤིང་ལྗོན་པས་ལེགས་པར་བརྒྱན་པ། རྣམ་པ་སྣ་ཚོགས་བྱེ་བ་ཁྲག་ཁྲིག་འབུམ་ཕྲག་དུ་མ་ནམ་མཁའི་དཀྱིལ་ན་ཀུན་ཏུ་སྣང་སྟེ། ཁ་ཅིག་ཏུ་ནི། རིན་པོ་ཆེའི་སྤྲིན་གྱི་ཆར་འབབ་པར་ཀུན་ཏུ་སྣང་ངོ ། །ཁ་ཅིག་ཏུ་ནི།་མེ་ཏོག་གི་གདུགས་ཀྱི་སྤྲིན་གྱི་ཆར། ཁ་ཅིག་ཏུ་ནི། གོ་ཤིཪྵའི་ཙནྡན་དང ། སྤོས་དང ། བྱུག་པ་དང ། ཕྱེ་མའི་སྤྲིན་གྱི་ཆར། ཁ་ཅིག་ཏུ་ནི། གོས་ཀྱི་ཕྲེང་བའི་
302b
སྤྲིན་གྱི་ཆར། ཁ་ཅིག་ཏུ་ནི། ཀ་ཤི་ཀའི་རས་དང ། དུ་ཀུ་ལའི་རས་དང ། ཟ་འོག་གི་སྤྲིན་གྱི་ཆར། ཁ་ཅིག་ཏུ་ནི། དཔག་བསམ་གྱི་ཤིང་ལྗོན་པའི་སྤྲིན་གྱི་ཆར། ཁ་ཅིག་ཏུ་ནི།་མེ་ཏོག་པདྨ་དང ། ུཏྤ་ལ་དང ། ཀུ་མུ་ད་དང ། པདྨ་དཀར་པོ་དང ། དྲི་མཆོག་དང ། ཏི་མུཀྟ་ཀ་དང ། ཀ་ཙ་ལིནད་དང ། མ་ཧཱ་ཀ་ཙ་ལི་ད་དང ། བཏང་བཟུང་དང ། བཏང་བཟུང་ཆེན་པོ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་པོ་དང ། མནྡཱ་ར་བ་དང ། མནྡཱ་ར་བ་ཆེན་པོའི་སྤྲིན་གྱི་ཆར་མངོན་པར་བབ་བོ། །མེ་ཏོག་གི་ཆར་དེ་དག་ལས་དྲི་གང་བྱུང་བ་དེས་སངས་རྒྱས་ཀྱི་ཞིང་ཚད་མེད་གྲངས་མེད་པ་གང་དག་གངྒཱའི་ཀླུང་གི་བྱེ་མའི་རྡུལ་ཕྲ་རབ་ཀྱི་རྡུལ་དང་མཉམ་པའི་སངས་རྒྱས་ཀྱི་ཞིང་རྣམས་རྒྱས་པར་ཁྱབ་བོ། །འཇིག་རྟེན་གྱི་ཁམས་དེ་དག་ན་སེམས་ཅན་གང་དག་འགྲོ་བ་དྲུག་ཏུ་སྐྱེས་པ་དེ་དག་ཐམས་ཅད་དྲི་དེས་མཆོག་ཏུ་བདེ་བས་ཚིམ་ཞིང་སེམས་དགའ་བར་གྱུར་ཏེ་སྡུག་བསྔལ་ཐམས་ཅད་དང་བྲལ་ནས་ཕན་ཚུན་འདྲི་བ་དང ། འཇིག་རྟེན་གྱི་ཁམས་མི་མཇེད་དེ་ན་བྱང་ཆུབ་སེམས་དཔའ་རྡོ་རྗེའི་སྙིང་པོ་བྱང་ཆུབ་སེམས་དཔའི་ཆོ་འཕྲུལ་སྣ་ཚོགས་སྟོན་པ་རྒྱང་རིང་པོ་ནས་མཐོང་ངོ ། །དེ་དག་གིས་དེ་མཐོང་ནས་ཀྱང་ཕྱག་འཚལ་ཏོ། །སྐྱེས་བུ་དམ་པ་དེ་ལ་ཕྱག་འཚལ་མ་ཐག་ཏུ་སེམས་ཅན་གང་དག་ངན་འགྲོ་
303a
༄#། །ལོག་པར་ལྟུང་བར་དོང་བ་དེ་དག་ཀྱང་མཆོག་ཏུ་བདེ་བ་དང ། དགའ་བ་དང ། རངས་པ་དང ། དད་པ་ཐོབ་ནས་སྐད་ཅིག་དེ་ཉིད་ལ་ངན་འགྲོ་ལོག་པར་ལྟུང་བ་ལས་གྲོལ་ཏེ་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེས་ནས་བར་སྣང་ལ་འཁོད་དོ། །དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། གསང་བ་པའི་བདག་པོ་ལག་ན་རྡོ་རྗེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་མཆོད་པའི་སྤྲིན་ཆེན་པོས་མཆོད་ནས་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ། དེ་བཞིན་གཤེགས་པའི་རྡོ་རྗེ་འཁོར་གྱི་ཁྱམས་ཆེན་པོ་ཐམས་ཅད་ལྡན་པ་ལ་ལན་བདུན་བསྐོར་བ་བྱས་ནས་ལྷ་རྣམས་བར་སྣང་ལས་བབས་ཏེ་བཅོམ་ལྡན་འདས་ཀྱི་སྤྱན་སྔར་རང་རང་གི་རིན་པོ་ཆེའི་གཞལ་མེད་ཁང་པ་བརྩེགས་པ་དག་ན་ལྷའི་བུ་མོ་བྱེ་བ་ཁྲག་ཁྲིག་འབུམ་ཕྲག་དུ་མ་དང་ལྷན་ཅིག་ཏུ་སིལ་སྙན་དང ། ཕེག་རྡོབ་པ་དང ། གླུ་དབྱངས་ཀྱི་སྒྲ་འབྱིན་ཅིང ། ཚུལ་དང་འདྲ་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །གང་སླད་ངན་འགྲོ་མཆོག་ཏུ་སྡུག་བསྔལ་འཁྲུགས་པ་ཡི། །མིང་ཡང་བདེ་གཤེགས་
303b
སྟོབས་ཀྱིས་དེང་དུ་མི་མཇེད་དང ། །བསོད་ནམས་མི་ལྡན་སེམས་ཅན་རྣམས་ལའང་རྒྱལ་བ་མཆོག་།བྱམས་པར་མཛད་པ་ཀྱེ་མ་ངོ་མཚར་རྨད་དུ་བྱུང ། །བདག་ཅག་རྣམས་ཀྱི་རྨོངས་པའི་སྙིང་གིས་བསྒྲུབས་པ་ཡི། །སྡིག་པའི་ལས་གང་ཤིན་ཏུ་བགྱིད་དཀའ་སྣ་ཚོགས་པ། །དེ་དག་ཐུབ་པའི་བྱ་དགས་དེ་རིང་གློ་བུར་དུ། །སྐད་ཅིག་ཏུ་ནི་ཇི་ལྟར་རྣམ་པར་ཞིག་པར་འགྱུར། །ཇི་ལྟར་གདུགས་ཀྱི་མུན་པ་མུན་ནག་ཀུན་བཅོམ་པ། །ཇི་ལྟར་ཞུགས་འབར་བས་ནི་རས་རྣམས་སྲེག་པ་དང ། །བསེར་མས་ཤིང་བལ་ལྟར་ཡང་སྤྲིན་འཐོར་ཇི་བཞིན་དུ། །དེ་ལྟར་འགྲོ་བའི་སྡིག་པ་བདེ་བར་གཤེགས་ཀྱིས་བཅོམ། །བདེ་གཤེགས་སྲས་པོ་མཐོང་ངམ་ཐོས་སམ་དྲན་གྱུར་ན། །ལྷན་ཅིག་སྐྱེས་དབང་འོད་ཟེར་དྲ་བས་སྡིག་འཕྲོག་པ། །འགྲོ་བ་ཡོངས་ཀྱི་སྲིད་པའི་སྤྲོས་པ་ཞིག་པ་ཡི། །ཐུགས་དང་རྟག་ཏུ་ལྡན་ཞིང་སྐྱོ་བར་འགྱུར་མི་མངའ། །མིག་དང་མགོ་དང་སྙིང་དང་ཤ་ཁྲག་ཚིལ་རྣམས་དང ། །སྲོག་དང་སྡུག་དང་བུ་རྣམས་རྩཝ་ལྟར་བོར་ནས་ནི། །མི་མཚུངས་སེམས་ཅན་དོན་ཕྱིར་ཐུགས་རྗེས་ཐུགས་བརླན་པ། །འཇིག་རྟེན་མགོན་སྲས་དེ་དག་རྣམས་ལ་ཕྱག་འཚལ་ལོ། །ཡི་དྭགས་ལྟོགས་ལ་ཆུ་དང་རོ་བརྒྱའི་ཟས་རྣམས་དང ། །དེ་བཞིན་སྐྱེ་བོ་ནོར་འདོད་སྙིང་དང་ལྡན་པ་ལ། །ཐུགས་རྗེ་སྤྱོད་ཅིང་རྣམ་པ་སྣ་
304a
༄#། །ཚོགས་ཚིམ་མཛད་པ། །བྱང་ཆུབ་སེམས་དཔའ་ཁྱུ་མཆོག་དེ་ལ་སྐྱབས་སུ་མཆི། །གང་དག་མནར་མེད་པ་ཡང་རབ་ཏུ་བསིལ་མཛད་པས། །མཆོག་ཏུ་ཚ་བའི་སེམས་ཅན་དམྱལ་བའང་བསིལ་བར་འགྱུར། །རང་བདེ་མི་གཟིགས་སམས་ཅན་བརྩོན་ལ་ཐུགས་ལྡན་པ། །འཇིག་རྟེན་མགོན་སྲས་མཉམ་མེད་དེ་ལ་ཕྱག་འཚལ་ལོ། །གང་དག་སྲིད་པར་འཁོར་བའི་སྲིད་པའི་སྐྱོན་ལས་གྲོལ། །སྟོང་པ་གསུང་ཡང་ལས་ཀྱི་འབྲས་བུ་མི་འདོར་ཞིང ། །ཡེ་ཤེས་མེ་ཡིས་རྙོག་པ་བསྲེགས་ཀྱང་ཐུགས་རྗེས་བརླན། །སྤྱོད་པ་བརྟག་མེད་དབང་ལྡན་དེ་ལ་ཕྱག་འཚལ་ལོ། །ཀྱེ་མ་དཔལ་ལྡན་རྡོ་རྗེ་སྙིང་པོ་བདེ་གཤེགས་སྲས། །མཚན་གྱིས་མཚན་བཏབ་སྐུ་ལས་འོད་སྟོང་མང་བྱུང་བའི། །དྲི་བ་རྣམས་དང་སྣ་ཚོགས་གླུ་ཡིས་བདག་ཅག་སིམ། །སྐད་ཅིག་གིས་ནི་དམྱལ་ལས་སུམ་ཅུའི་ལྷ་དབང་གྱུར། །བདག་ཅག་རྣམས་ཀྱིས་རྒྱལ་དང་རྒྱལ་སྲས་རྣམས་དང་ནི། །དེ་དག་རྣམས་ཀྱིས་གསུངས་པ་མཆོག་ཏུ་ཞི་ཆོས་ལ། །གུས་བསྟོད་དགེ་བ་རྒྱ་ཆེན་དེ་རིང་གང་ཐོབ་པ། །དེས་མྱུར་འཇིག་རྟེན་ཐམས་ཅད་བདེ་གཤེགས་ཐོབ་པར་ཤོག་།དེ་ལྟར་ཚུལ་དང་འདྲ་བའི་ཚིགས་སུ་བཅད་པ་རྣམས་ཀྱིས་བཅོམ་ལྡན་འདས་ལ་བསྟོད་ནས་བཅོམ་ལྡན་འདས་ཀྱིས་གནང་སྟེ། དེ་
304b
དག་རང་རང་ཁྲི་རིན་པོ་ཆེའི་གཞལ་མེད་ཁང་གི་ཁང་བ་བརྩེགས་པ་རྣམས་སུ་འཁོད་དེ་ཆོས་ཉན་པའི་ཕྱིར་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་བྱང་ཆུབ་སེམས་དཔའི་རྫུ་འཕྲུལ་གྱི་ཆོ་འཕྲུལ་ཆེན་པོ་འདི་ལྟ་བུ་འདི་བསྟན་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། གསང་བ་པའི་བདག་པོ་ལག་ན་རྡོ་རྗེ་དང ། དེ་བཞིན་གཤེགས་པའི་རྡོ་རྗེའི་འཁོར་གྱི་ཁྱམས་ཆེན་པོ་དང་ལྡན་པ་ལ་མཆོད་པའི་སྤྲིན་ཆེན་པོ་རྣམས་ཀྱིས་མཆོད་ནས་ཏིང་ངེ་འཛིན་དེ་ལས་ལངས་ཏེ་བར་སྣང་ལས་བབས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ནས་པུས་མོ་གཡས་པའི་ལྷ་ངས་རིན་པོ་ཆེའི་པདྨའི་སྙིང་པོ་ལ་བཙུགས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ལ་ལྟའོ། །རིགས་ཀྱི་བུ་དེ་དག་ཐམས་ཅད་ཀྱང་དགའ་བ་དང་མགུ་བ་སྐྱེས་ནས་དེ་བཞིན་དུ་བཅོམ་ལྡན་འདས་ལ་ལྟའོ། །བལྟས་ནས་ཀྱང་སྒྲ་སྐད་ཀྱི་ང་རོ་གཅིག་ཏུ་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །དྲན་པའི་གཞུས་
305a
༄#། །འཕངས་པ་ཡི་ཤེས་རབ་མདའ་མང་གིས། །མ་འཕངས་མཐུར་ལྡན་བདུད་བཞི་ཕམ་མཛད་ཅིང ། །འཇིག་རྟེན་ཉོན་མོངས་ཉེན་པའི་མུན་པ་གསལ་མཛད་ནས། །བླ་མ་སྤྲིན་མེད་ཟླ་བ་བཞིན་དུ་ལྷང་ངེ་འོ། །དམ་ཆོས་འོད་མང་གཏི་མུག་བཅོམ་པའི་དྲ་བ་ཡིས། །འདུལ་བའི་པདྨའི་གནས་རྣམས་ཁ་ཕྱེ་ནས། །ཡེ་ཤེས་ནམ་མཁའ་ཆེ་ལ་དྲི་མེད་འབར་བའི་གཟུགས། །ཉི་མ་ཇི་བཞིན་གདུང་བར་བགྱི་བའི་བདུད་སྡེ་གདུངས། །མུ་སྟེགས་ཅན་གྱི་ང་རྒྱལ་མཐའ་དག་ཕམ་མཛད་ཅིང ། །འགྲོ་བའི་འདོད་ཆགས་རབ་གདུང་མ་ལུས་རབ་ཞི་མཛད། །དགེ་བའི་ལོ་ཏོག་རྩི་ཆེན་ཡང་དག་འཕེལ་མཛད་པ། །དགེ་བའི་ཆར་པ་ཕབ་ཅིང་འབྲུག་ལྟར་བསྒྲག་ཏུ་གསོལ། ། མགོན་པོ་མུ་སྟེགས་ཅན་གྱི་ཝ་བརྒྱ་ཕམ་མཛད་ཅིང ། །བདུད་རྣམས་བཅོམ་སྟེ་བྱང་ཆུབ་དམ་པ་རབ་བརྙེས་ནས། །མ་འདྲེས་བསགས་པའི་བདེན་པའི་སྟོབས་ཀྱི་མཐུ་མངའ་བ། །སྐྱེ་བའི་འཇིགས་ལམ་རབ་གྲོལ་སེངྒེ་ཇི་བཞིན་སྒྲོག་།སྤྱོད་བ་ཟབ་ཅིང་བརྟན་ལ་བརྟགས་པས་མི་དཔོག་པ། །སེམས་ཅན་གནས་གྱུར་སྟོབས་དང་ཏིང་འཛིན་ནོར་བུ་བཀྲམ། །དྲི་མེད་ཆོས་ལྷུན་འདུལ་བའི་རི་བོ་རྣམས་འཛིན་པ། །ཡེ་ཤེས་རྒྱ་མཚོ་མཆོག་ཁྱོད་སྐྱེ་རྒུ་མཆོག་གཙོ་བོ། །ཚུལ་ཁྲིམས་བཟང་པོའི་རྩ་བ་སྦྱིན་
305b
པའི་ཆུས་བཏབ་འཕེལ། །བྱམས་དང་བཟོད་པའི་མེ་ཏོག་ཡལ་ག་འཁྲུངས་པས་མཛེས། །བྱང་ཆུབ་ལམ་གྱི་ཡན་ལག་འབྲུ་ཆགས་འདོད་བྱས་བསྟེན། །བསོད་ནམས་དཔག་བསམ་ཤིང་ཁྱོད་དེ་རིང་ག་ལས་བྱུང ། །སུམ་ཅུ་རྩ་གཉིས་འབར་བའི་མཚན་གྱིས་ཡན་ལག་བརྒྱན། །དཔེ་བྱད་བཟང་མཆོག་རིན་ཆེན་མན་ཤེལ་གྱིས་བསྐོར་ཅིང ། །ས་དང་དབང་དང་དམ་ཆོས་ཕུར་པ་བརྟན་བཏབ་པ། །ལྷུན་པོ་བཞིན་དུ་མི་གཡོ་ཁྱོད་ནི་འགྲོ་ལ་མཛེས། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་བཅོམ་ལྡན་འདས་ཀྱིས་གནང་སྟེ་རིན་པོ་ཆེའི་པདྨའི་སྙིང་པོ་ལ་ཕྱོགས་གཅིག་ཏུ་འདུག་གོ། རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་དོ། །དེ་བཞིན་དུ་སྦྱར་ཏེ་དེ་ལྟར་ལྷོ་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དཔལ་བྱུང་བ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་ཏོག་
306a
༄#། །ཅེས་བྱ་བ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ་བཅོམ་ལྡན་འདས་ཀྱིས་གནང་ནས་རིགས་ཀྱི་བུ་དེ་དག་དང་ལྷན་ཅིག་ཏུ་རིན་པོ་ཆེའི་པདྨའི་སྙིང་པོ་ལ་ཕྱོགས་གཅིག་ཏུ་འདུག་པའི་བར་དུའོ། །དེ་བཞིན་དུ་ནུབ་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་ཞེས་བྱ་བ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅེས་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་པ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང ། རིགས་ཀྱི་བུ་དེ་དག་ཐམས་ཅད་ཀྱང་ཆོས་མཉན་པའི་ཕྱིར། དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་བྱང་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
306b
པའི་སངས་རྒྱས་ཆོས་མཆོག་རང་བཞིན་གྱིས་རྣམ་པར་ངེས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཐམས་ཅད་འབྱུང་བ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་རྒྱལ་མཚན་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང ། རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་པར་དུའོ། །དེ་བཞིན་དུ་བྱང་ཤར་གྱི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་མཐའ་ཡས་རབ་གསལ་དབང་ཕྱུག་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དཔལ་བརྩེགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པ་ཞེས་བྱ་བ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང ། རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་
307a
༄#། །བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་ཤར་ལྷོའི་མཚམས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་ཏོག་གི་རྒྱལ་མཚན་གྱི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཐེ་ཚོམ་དང་བྲལ་བ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བཟང་པོ་ཞེས་བྱ་བ། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་ལྷོ་ནུབ་ཀྱི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རྩལ་གྱིས་རྣམ་པར་གནོན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་བརྩེགས་པ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་བློ་གྲོས་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་
307b
ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་ཆོས་ཉན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་རིན་པོ་ཆེའི་པདྨའི་སྙིང་པོ་ལ་འདུག་ཅིང་རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་ནུབ་བྱང་གི་མཚམས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ་བཅོམ་ལྡན་འདས་ཀྱིས་གནང་ནས་ཆོས་མཉན་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་ལྷན་ཅིག་ཏུ་རིན་པོ་ཆེའི་པདྨའི་སྙིང་པོ་ལ་འདུག་ཅིང ། རིགས་ཀྱི་བུ་དེ་དག་ཀྱང་ཆོས་མཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་འོག་གི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་པདྨ་ལ་རབ་ཏུ་གནས་པའི་རི་དབང་གི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་པདྨ་བཀོད་པ་ནས་བྱང་ཆུབ་
308a
༄#། །སེམས་དཔའ་སེམས་དཔའ་ཆེན་པོ་ནམ་མཁའི་བློ་གྲོས་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང ། རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་བཞིན་དུ་སྟེང་གི་ཕྱོགས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཡུལ་ལས་རྣམ་པར་རྒྱལ་བའི་དཔལ་གྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདུད་ཀྱི་ཚེར་མ་དཀྲུགས་པ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཀྱི་སྒྲིབ་པ་ལས་རྣམ་པར་རྒྱལ་བ་ཞེས་བྱ་བ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཏེ་མདུན་དུ་བདར་བ་ནས་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བཅོམ་ལྡན་འདས་ཀྱིས་གནང་ནས་རིན་པོ་ཆེའི་པདྨའི་སྙིང་པོ་ལ་འདུག་ཅིང ། རིགས་ཀྱི་བུ་དེ་དག་ཐམས་ཅད་ཀྱང་ཆོས་ཉན་པའི་ཕྱིར་དེ་བཞིན་དུ་རིན་པོ་ཆེའི་པདྨའི་སྙིང་པོ་དག་ལ་འཁོད་པའི་བར་དུའོ། །དེ་ནས་
308b
དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མི་མཇེད་འདིར་བྱང་ཆུབ་སེམས་དཔའི་རྫུ་འཕྲུལ་གྱི་རྣམ་པར་འཕྲུལ་པ་དུ་མ་བསྟན་པས་གཞལ་མེད་ཁང་དང ། མེ་ཏོག་གི་སྤྲིན་དང ། རིན་པོ་ཆེའི་སྤྲིན་དང ། ཕྱེ་མའི་སྤྲིན་དང ། སྤོས་དང ། གདུགས་དང ། རྒྱལ་མཚན་དང ། བ་དན་དང ། རྣམ་པར་རྒྱལ་བའི་བ་དན་གྱི་སྤྲིན་དང ། རིན་པོ་ཆེའི་སྤུག་དང ། རྡོའི་སྙིང་པོ་དང ། བཻ་ཌཱུརྱ་དང ། ནད་སྙིལ་དང ། བྱི་རུ་དང ། མརྒད་དང ། མུ་ཏིག་དམར་པོ་དང ། འཛམ་བུའི་ཆུ་བོའི་གསེར་གྱི་སྤྲིན་དང ། དཔག་བསམ་གྱི་ཤིང་ལྗོན་པ་དང ། རིན་པོ་ཆེའི་པདྨ་དུ་མས་ཁེབས་པའི་གླིང་གིས་ལེགས་པར་བརྒྱན་པར་གྱུར་ཏོ། །འཇིག་རྟེན་གྱི་ཁམས་འདི་ཇི་ལྟ་བ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་བསམ་གྱིས་མི་ཁྱབ་ཅིང་དཔག་ཏུ་མེད་པ་གཞལ་དུ་མེད་ཅིང་བརྗོད་དུ་མེད་པར་གཏོགས་པ་གངྒཱའི་ཀླུང་གི་བྱེ་མ་སྙེད་ལས་ཤིན་ཏུ་འདས་པའི་འཇིག་རྟེན་གྱི་ཁམས་དག་ན་གསང་བ་པའི་བདག་པོ་ལག་ན་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་རྣམ་པར་འཕྲུལ་པའི་བྱིན་གྱི་རླབས་ཀྱིས་དེ་བཞིན་དུ་ལེགས་པར་བརྒྱན་པར་ཀུན་ཏུ་སྣང་ངོ ། །འཇིག་རྟེན་གྱི་ཁམས་དེ་དག་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
309a
༄#། །སངས་རྒྱས་གང་དག་བཞུགས་ཏེ་འཚོ་ཞིང་གཞེས་པ་དེ་དག་ཐམས་ཅད་དེ་ན་བཞུགས་བཞིན་དུ་ཕྱག་གཡས་པ་གསེར་གྱི་ཁ་དོག་ལྟ་བུ་བརྐྱང་སྟེ་འཇམ་ཞིང་མཉེན་ལ་རབ་ཏུ་གཞོམ་ཞིང་པདྨ་དང ། ཡལ་ག་གཞོན་ཤ་ཆགས་ཤིང་འཇམ་པའི་སོར་མོའི་ངོས་ཅན་གདུགས་དང ། རྒྱལ་མཚན་དང ། ལྕགས་ཀྱུ་དང ། བུམ་པ་དང ། ཉ་དང ། སྒོ་ཁང་དང ། གཞལ་མེད་ཁང་དང ། དུང་དང ། རྡོ་རྗེ་དང ། པདྨ་དང ། དཔལ་བེའུ་དང ། འཁོར་ལོའི་མཚན་གྱིས་བརྒྱན་པ། ཚེ་རབས་བྱེ་བ་ཁྲག་ཁྲིག་འབུམ་ཕྲག་དུ་མ་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་མཛད་པའི་རྒྱུ་མཐུན་པས་མངོན་པར་གྲུབ་པའི་དཔེ་བྱད་བཟང་པོས་རྣམ་པར་སྤྲས་པ།་སེན་མོ་ཟངས་འདྲ་ཞིང་རྒྱས་ལ་སྣུམ་ཞིང་སྲབ་པའི་ནོར་བུའི་མདོངས་ཀྱི་མེ་ཏོག་གི་འོད་ཟེར་གྱིས་མཁྲིག་མ་མཛེས་པར་གྱུར་པ། སེམས་ཅན་ཐམས་ཅད་ལ་མི་འཇིགས་པ་སྦྱིན་པ་དང ། ཡང་དག་པར་མཐུན་པའི་ཕྱག་རྣམས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་ཡང་དག་པར་གཟེངས་བསྟོད་པ་དང ། ཡང་དག་པར་དགའ་བར་བྱ་བའི་ཕྱིར་སྤྱི་བོ་ལས་བྱུགས་ནས་དུས་གཅིག་ཏུ་སྒྲ་སྐད་ཀྱི་ང་རོ་གཅིག་གིས་འཇིག་རྟེན་གྱི་ཁམས་ཐམས་ཅད་གོ་བར་མཛད་ཅིང་འདི་སྐད་ཅེས་
309b
ཀྱེ་རིགས་ཀྱི་བུ་གང་གི་ཕྱིར་བདུད་སྡིག་ཅན་དང ། གཞན་ཡང་དེ་བཞིན་གཤེགས་པའི་བསྟན་པ་ལ་མ་དད་ཅིང་སྡང་བའི་བགེགས་དང་ལོག་འདྲེན་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སེམས་ཅན་ཐམས་ཅད་ཀྱི་དགེ་བའི་རྩ་བ་གཅོད་པའི་ཕྱིར་ཞུགས་པ་ཐམས་ཅད་ཚར་གཅད་པ་དང ། རྣམ་པར་གཞིག་པ་དང ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་དང་པོ་བསྐྱེད་པ་སེམས་ཞུམ་པ་བརྩོན་འགྲུས་བརྟན་པོ་མ་ཡིན་པའི་གོ་ཆ་བགོས་པ་རྣམས་ཀྱང་ཡང་དག་པར་གཟེངས་བསྟོད་པ་དང ། རབ་ཏུ་དགའ་བར་བྱ་བ་ནས་ཁམས་གསུམ་པར་གཏོགས་པའི་སེམས་ཅན་ཐམས་ཅད་ཀྱི་བར་དག་ཀྱང་མྱ་ངན་ལས་འདས་པ་ཐོབ་པར་བྱ་བ་དང ། སངས་རྒྱས་དང ། ཆོས་དང ། དགེ་འདུན་གྱི་རིགས་མི་གཅོད་པའི་ཕྱིར་ཁྱོད་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བསོད་ནམས་དང ། ཡེ་ཤེས་ཀྱི་ཚོགས་བསམ་གྱིས་མི་ཁྱབ་པ་བསགས་པ་ཡོངས་སུ་རྫོགས་པས་གྲུབ་པའི་མཚན་དང་དཔེ་བྱད་བཟང་པོས་སྤྲས་པ། ཏིང་ངེ་འཛིན་དང ། དབང་དང ། གཟུངས་དང ། སྟོབས་དང ། བྱང་ཆུབ་ཀྱི་ཡན་ལག་དང ། འཕགས་པའི་ལམ་ཡན་ལག་བརྒྱད་པའི་མཐུ་གྲུབ་པ། སེམས་ཅན་ཐམས་ཅད་ཀྱི་སྡུག་བསྔལ་དང ། ཉོན་མོངས་པའི་སྒྲིབ་པ་ཉེ་བར་ཞི་བ།
310a
༄#། །སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། ཡི་དྭགས་དང ། གཤིན་རྗེའི་འཇིག་རྟེན་དུ་ལྟུང་བའི་འཇིགས་པའི་དུས་ཀྱི་ཚེར་མ་མ་ལུས་པར་འདོན་པ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ལ་སོགས་པའི་འཁོར་མངོན་པར་དགའ་བ་ཅན་དག་ལ་ངོ་མཚར་རྨད་དུ་བྱུང་བའི་དགའ་བ་དུ་མ་ཀུན་ཏུ་སྐྱེད་པ་ལ་སྙོམས་པར་ཞུགས་པ་ནི། ལེགས་སོ་ལེགས་སོ་ཞེས་བཀའ་སྩལ་ཏོ། །དེ་ལྟར་སངས་རྒྱས་བཅོམ་ལྡན་འདས་དེ་དག་གིས་གསང་བ་པའི་བདག་པོ་ལག་ན་རྡོ་རྗེ་གཟེངས་བསྟོད་དེ་རབ་ཏུ་དགའ་བར་མཛད་ནས་རང་རང་གིས་ཕྱག་བསྐུམ་སྟེ་རང་རང་གི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཉན་དུ་གཟུང་བའི་ཕྱིར་འཇིག་རྟེན་གྱི་ཁམས་མི་མཇེད་འདིར་བཀྱེའོ། །དེ་དག་གིས་གནང་བས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཕྱག་འཚལ་ནས་བྱང་ཆུབ་སེམས་དཔའི་རྣམ་པར་འཕྲུལ་པའི་བྱིན་གྱི་རླབས་ཆེན་པོ་དང ། བྱང་ཆུབ་
310b
སེམས་དཔའི་རྣམ་པར་འཕྲུལ་པ་ཆེན་པོས་ཇི་ཙམ་དུ་སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་བ་དང ། བརྐྱང་བ་ལས་བསྐུམ་པ་ཙམ་གྱི་སྐད་ཅིག་ཐང་གཅིག་ཡུད་ཙམ་དེ་ལ་འཇིག་རྟེན་གྱི་ཁམས་མི་མཇེད་དེར་ཕྱིན་ནས་བཅོམ་ལྡན་འདས་ཀྱིས་གནང་སྟེ་རིན་པོ་ཆེའི་པདྨའི་སྙིང་པོ་དག་ལ་ཕྱོགས་གཅིག་ཏུ་འཁོད་པའི་བར་དུའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེའི་ཚེ་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ། བདུད་སྡིག་ཅན་འདི་རྡོ་རྗེའི་ཞགས་པས་བཅིངས་པ་འདི་ལས་ཁྲོལ་ལ་ཅི་ནས་ཀྱང་སངས་རྒྱས་ལ་སྐྱབས་སུ་འགྲོ་བར་འགྱུར་བ་དང ། ཆོས་ལ་སྐྱབས་སུ་འགྲོ་བར་འགྱུར་བ་དང ། དགེ་འདུན་ལ་སྐྱབས་སུ་འགྲོ་བར་འགྱུར་བ་དང ། གཞན་ཡང་གང་དག་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་གང་དག་ཇི་ཙམ་དུ་དེ་བཞིན་གཤེགས་པའི་བསྟན་པ་ལ་གནས་པར་འགྱུར་བ་དང ། དེ་བཞིན་གཤེགས་པའི་བསྟན་པ་ལ་ཞུགས་ནས་ཀྱང་ཅི་ནས་ཁོང་དུ་ཆུད་པར་འགྱུར་བ་དེ་ལྟར་གྱིས་ཤིག་།དེ་སྐད་ཅེས་བཀའ་སྩལ་པ་དང ། གསང་
311a
༄#། །བ་པའི་བདག་པོ་ལག་ན་རྡོ་རྗེས་བཅོམ་ལྡན་འདས་ཀྱི་ལྟར་མཉན་ནས་བཅོམ་ལྡན་འདས་ལ་ལེགས་སོ་ལེགས་སོ། །ཞེས་གསོལ་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཡང་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེས་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བ་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་རབ་ཏུ་གཡོས་ཏེ། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །གསང་བ་པའི་བདག་པོ་ལག་ན་རྡོ་རྗེ་ཡང་མེ་ལྕེ་འབར་བ་གཅིག་ཏུ་གྱུར་ཏེ། འབར། རབ་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ། འཇིགས་སུ་རུང་བའི་མཆེ་བ་རྣོན་པོ་དྲག་པོ་གཟེངས་ཅན་འཇིགས་པ་ཆེན་པོ་སྐྱེད་པ་གཙིགས་ཏེ་མཆེ་བ་མནན་ནས་མེ་ལྕེ་ཆེན་པོ་ལྟར་སྨ་ར་སེར་ཞིང་འཇིགས་འཇིགས་ལྟར་འདུག་སྟེ། མི་བཟད་པ་རྣ་བ་ལས་འཕྱང་བའི་སྦྲུལ་དུག་འཐོར་བ་དང །
311b
བ་ལང་སྣ་ལྟ་བུ་དང ། གཟར་བུ་ལྟ་བུ་དང ། སྦྲུལ་ཆེན་པོ་ཁ་གདངས་པའི་ཁ་ནས་བྱུང་བའི་མཆེ་བའི་རྩེ་མོ་ནས་དུག་དྲག་པོ་འབར་བ་འབྱུང་བའི་ཚོགས་ཀྱི་ཕྲེང་བ་བཞིན་དུ་མེ་འབར་བ། ལག་པ་སྟོང་ཕྲག་དུ་མ་ལ་རྡོ་རྗེ་དང ། ཞགས་པ་དང ། གཏུན་ཤིང་དང ། གཏུན་ཤིང་རྐེད་ཉག་དང ། རལ་གྲི་དང ། འཁོར་ལོ་དང ། ལྕགས་སྒྲོག་ལ་སོགས་པ་ཐོགས་པའི་མཚོན་ཆའི་རྩེ་མོ་ལ་མེ་སྟག་རབ་ཏུ་འཕྲོ་བའི་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཁོངས་སུ་གཏོགས་པའི་གནོད་སྦྱིན་དང ། སྲིན་པོ་དང ། ཡི་དྭགས་དང ། ཤ་ཟ་དང ། མ་མོ་དང ། འབྱུང་པོའི་གདོན་དང ། བགེགས་དང ། ལོག་འདྲེན་ལ་སོགས་པ་སྡང་བ་རབ་ཏུ་སྡང་བ་རབ་ཏུ་སྡང་བའི་སེམས་ཅན་སྐྲག་པར་བྱེད་པ་རི་དྭགས་ཀྱི་དབང་པོའི་པགས་པ་ཁྲག་དང་བཅས་པ་ཤམ་ཐབས་སུ་བགོས་པ། སྦྲུལ་ཆེན་པོའི་ལུས་ཀྱིས་རྒྱ་གྲམ་དུ་དམ་དུ་བཅིངས་པ། འཇིགས་པ་བས་ཀྱང་འཇིགས་པར་བྱེད་པ། འཆི་བདག་ཀྱང་སྐྲག་པར་བྱེད་པ། ཁམས་གསུམ་པ་ཐམས་ཅད་ཀྱིས་བསྡུས་པ་ལྟ་བུའི་ལུས་དང་ལྡན་པའི་ཁྲོ་བོར་གྱུར་ནས་ལུས་ཀྱི་ཚིགས་ཐམས་ཅད་ལས་ཀྱང་ཁྲོ་བོ་ཁ་དོག་དུ་མ་འདི་ལྟ་སྟེ། ཁ་དོག་སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ནག་པོ་སྟེ་ཐམས་ཅད་ཀྱང་རྡོ་རྗེའི་རང་
312a
༄#། །བཞིན་ཅན་ཁྲོ་གཉེར་མི་མཉམ་པས་རྣམ་པར་སྤྲས་པའི་གཉེར་མའི་ཁྲེམ་གཉེར་ཅན་གྱི་དཔྲལ་བའི་དབྱེས་ནས་མེ་སྟག་ལྟ་བུའི་རྡུལ་གྱི་ཐིགས་པ་རྩུབ་པོ་འཛག་པ་ལས། དུག་འཆང་རྣམ་པ་སྣ་ཚོགས་ཀུན་ཏུ་བྱུང་བས་ཡན་ལག་དང ། ཉིང་ལག་ཀུན་ཏུ་དཀྲིས་པའི་མངོན་རྟགས་ཅན་དུ་གྱུར་ཅིང་རྡོ་རྗེ་དྲག་ཤུལ་ཅན་དུ་སྣང་སྟེ། མཆེ་བས་མི་བཟད་པར་འདུག་པའི་ཁ་གདངས་པ་ལས་ཧ་ཧ་ཞེས་གད་མོ་རྟ་གད་འབྱུང་ཞིང ། འཇིགས་པའི་དུས་ཀྱི་རླུང་གིས་ཆར་པ་དང་བཅས་པའི་སྤྲིན་དཀྲུགས་པ་ལས་ཆར་གྱི་རྒྱུན་རགས་པ་འབབ་པས་ཡོངས་སུ་གང་བས་རྒྱ་མཚོ་དཀྲུགས་ནས་རླབས་ཆེན་པོ་གཡོ་བ་དང་རྟ་རྒོད་མའི་ཁ་ནས་མེ་བྱུང་བ་ལྟ་བུའི་ཧཱུཾ་ཞེས་བྱ་བ་ཟབ་ཅིང་བརྟན་པས་རྒྱུ་བའི་འབྱུང་པོའི་ཚོགས་འཇིགས་སྐྲག་སྟེ་འབྱེར་ཞིང་འཐོར་ནས་སྡངས་ཏེ་སྐྱབས་འདོང་ཞིང་འདུད་པས། ཉི་མ་སྟོང་བས་འབར་བའི་ལུས་རྣམས་མཐོང་བ་ན་སྣ་སྒར་སྒུར་ཅན་ཞོམ་པ་ལྟ་བུ་བུ་ག་ཟབ་མོའི་སྦུབས་ཀྱི་ནང་ནས་སྦྲུལ་སྣ་ཚོགས་འཁྱིལ་བའི་གཙུག་གི་ནོར་བུའི་འོད་ཀྱིས་འགྲམ་པ་རྣམ་པར་མཛེས་པ། གློག་སྟོང་འདུས་པ་ལྟར་སེར་ཞིང་དམར་བའི་མིག་གི་འབྲས་བུའི་འོད་ཟེར་གྱིས་སྐྲའི་ཚོགས་རྩུབ་ཤིང་གཤོར་ལ་གྱེན་དུ་འགྲེང་བའི་རྩེ་མོ་བརྒྱན་ཅིང་
312b
འདྲེས་ཏེ་གསལ་བར་གྱུར་པ། སྦྲུལ་གྱི་གདེངས་ཀ་སྟོང་གིས་གདུགས་བྱས་ཤིང ། སྦྲུལ་རྣམ་པ་སྣ་ཚོགས་ཀྱི་དོ་ཤལ་དང ། སྐ་རགས་དང ། དཔུང་རྒྱན་དང ། གདུ་བུ་དང ། རྣ་ཆས་ལུས་བརྒྱན་པ། རྡོ་རྗེ་འབར་བ་དྲི་མ་མེད་ཅིང་དྲག་ཤུལ་ཅན། མི་བཟད་པ་ལག་ན་ཐོགས་པ། མཛུབ་མོ་རྣམས་ལས་ཧཱུཾ་ཞེས་བྱ་བའི་སེངྒེའི་སྒྲ་ཆེན་པོ་དག་གིས་བགེགས་དང ། ལོག་འདྲེན་ཐམས་ཅད་ཀུན་ཏུ་བསྡིགས་པ་དག་ཐོན་ཏེ། གང་དེ་དག་གི་མིག་དང ། ཁ་རྣམས་ནས་གནམ་གྲུམ་པ་ལྟ་བུའི་སྒྲ་ཆེན་པོའི་ཚོགས་ལས་མེ་ལྕེ་ཆེན་པོ་འབར་བའི་ཚོགས་ཀྱི་སྣང་བ་བྱུང་སྟེ། དེས་སྡང་བའི་བགེགས་དང ། ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡིག་བ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་རྣམས་ཚིག་པར་བྱེད་དོ། །རྨོངས་པར་བྱེད་དོ། །འཚོག་པར་བྱེད་དེ། མི་ཟད་པ་དྲག་པ་རྩུབ་པ་སྡུག་བསྔལ་བ་ཡིད་དུ་མི་འོང་བའི་ཚོར་བ་མྱོང་བར་བྱེད་དོ། །དེ་དག་ཚོར་བས་ཉེན་པས་དཀོན་མཆོག་གསུམ་ལ་སྐྱབས་སུ་དོང་ངོ ། །དེའི་ཚེ་བདུད་སྡིག་ཅན་གྱིས་བགེགས་དང ། ལོག་འདྲེན་དེ་དག་ཚོར་བ་ཆེན་པོས་ཉེན་ཏེ་དཀོན་མཆོག་གསུམ་ལ་སྐྱབས་སུ་དོང་བ་མཐོང་ནས་འཇིགས་སྡངས་སྐྲག་སྟེ་སྐྱབས་མ་རྙེད་ནས་རླུང་དྲག་པོས་བསྐྱོད་པའི་ཤིང་བཞིན་དུ་འདར།
313a
༄#། །རབ་ཏུ་འདར་ཏེ། དུ་བར་འདོད་ན་ཡང་དུ་མ་ནུས་ནས་རི་མོ་བཞིན་དུ་ལུས་ཐམས་ཅད་གཡོ་བ་མེད་པར་གྱུར་ཏོ། །དེ་ནས་གསང་བ་བའི་བདག་པོ་ལག་ན་རྡོ་རྗེ་སངས་རྒྱས་ཀྱི་མཐུས་བདུད་སྡིག་ཅན་འདུལ་བར་བྱེད་དེ་སྡང་བ་གདོན་དང ། བགེགས་དང ། ལོག་འདྲེན་ཐམས་ཅད་དང ། བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ། རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ལྟ་བུའི་གཟུགས་སུ་འདུག་པའི་རྐང་པ་གཉིས་ལས་ཁྲོ་བོ་འབར་ཞིང་འཇིགས་འཇིགས་ལྟར་འདུག་པ། དྲག་ཤུལ་གྱི་གཟུགས་ཅན། སེངྒེའི་སྒྲ་ཆེན་པོ་ཧཱུཾ་ཞེས་བྱ་བ་འདི་གཉིས་ཕྱུང་སྟེ། དེ་གཉིས་སྐར་མདའ་བཞིན་དུ་ནམ་མཁའི་དཀྱིལ་དུ་རྒྱང་རིང་དུ་འཕུར་ཏེ་ནམ་མཁའ་ལ་གནས་པའི་ཤུགས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཅི་བགྱི་བཀའ་སྩོལ་ཅིག་།དེ་ནས་གསང་བ་པའི་བདག་པོ་ལག་ན་རྡོ་རྗེ་ཅང་མི་སྨྲ་བར་འདུག་སྟེ། ཡང་དཔྲལ་བའི་དཀྱིལ་ནས་རྡོ་རྗེ་ཁྲོ་བོ་འཇིགས་པ་ཆེན་པོའི་གཟུགས་
313b
མཆེ་བ་མི་བཟད་པ་དྲག་པས་འཇིགས་སུ་རུངས་པའི་ཁ་གདངས་ཏེ་མཆུ་མ་རུངས་པར་བསྒྱུར་བའི་ཁ་ནས་དུས་ཀྱི་ཐ་མ་འཇིག་པའི་ཚེ་རྣམ་པར་འཐོར་བའི་རླུང་དྲག་པོའི་ཤུགས་ཀྱིས་རབ་ཏུ་བསྐྱོད་པའི་སྤྲིན་ནག་པོའི་ཚོགས་རབ་ཏུ་སྒྲོག་པས་རྣམ་པར་དཀྲུགས་པའི་རྒྱ་མཚོ་ཆེན་པོའི་སྒྲ་དྲག་པོ་ལྟ་བུའི་ཧཱུཾ་ཞེས་བྱ་བའི་སེངྒེའི་སྒྲས་གང་བ། བགེགས་དང་ལོག་འདྲེན་ཐམས་ཅད་འཇིགས་ནས་འབྲོས་ཤིང་སྒྱིད་ལུག་ནས་ཕྱོགས་བསླད་པར་བྱེད་པ། ལག་པ་དང ། རྐང་པ་དང ། སེན་མོ་དང ། མིག་དང ། ག་ཚོམ་དང ། སྐྲ་ཐམས་ཅད་རྡོ་རྗེ་འབར་བར་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་པ་གཟི་བརྗིད་ཐམས་ཅད་ཀྱི་གཟི་བརྗིད་རྣམས་རང་གི་གཟི་བརྗིད་ཀྱིས་ཟིལ་ཏུ་བརླག་པར་བྱེད་ཅིང ། རྒྱང་རིང་དུ་བྱེད་པའི་རྡོ་རྗེ་འབར་བའི་སྣང་བ་དེས་རྒྱུ་སྐར་དང ། གཟའ་དང ། སྐར་མ་དང ། ནོར་བུ་རྣམས་ཀྱི་འོད་ལྷམ་མེར་མ་ཡིན། ལྷན་ནེར་མ་ཡིན། ལྷང་ངེར་མ་ཡིན་པར་བྱེད་པ། གང་ཉི་མ་དང ། ཟླ་བ་རྫུ་འཕྲུལ་ཆེ་བ། དབང་ཆེ་བར་གྲགས་པ་མཐུ་ཆེ་བ་ཡང་ལྷམ་མེར་མ་ཡིན། ལྷན་ནེར་མ་ཡིན་པར་བྱེད་པ། དེ་བཞིན་གཤེགས་པའི་འོད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་ལ་རབ་ཏུ་གནས་པ་རྣམས་ཀྱི་འོད་མ་གཏོགས་
314a
༄#། །པར་འོད་གཞན་ཐམས་ཅད་འོད་མོག་མོག་པོར་བྱེད་པ་གཞན་བྱུང་ངོ ། །དེ་ནས་རྡོ་རྗེ་ཁྲོ་བོ་དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་འབུམ་ཕྲག་དུ་མ་མཐའ་ཡས་མུ་མེད་པར་བསྐོར་བ་བྱས་ཏེ་བཅོམ་ལྡན་འདས་ཀྱིས་གནང་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཅི་བགྱི་བཀའ་སྩོལ་ཅིག་།དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །སྐྱེས་བུ་དམ་པ་དག་།དེང་ལ་བདུད་སྡིག་ཅན་དཀོན་མཆོག་གསུམ་ལ་སྐྱབས་སུ་འཛིན་དུ་ཆུག་ཅིག། འདི་དམ་ཚིག་ལ་གནས་པར་གྱིས་ཤིག། གཞན་ཡང་གང་དག་སྡང་བ་གདོན་དང ། བགེགས་དང ། ལོག་འདྲེན་ལ་སོགས་པ་དྲག་ཤུལ་དྲག་ཤུལ་གྱི་སེམས་དང་ལྡན་པ།་སྡིག་པ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་དག་དང ། དེ་བཞིན་གཤེགས་པའི་བསྟན་པ་ལ་མི་འཇུག་པ་དང ། མི་རྟོགས་པ་དང ། ཡིད་མི་ཆེས་པ་ཐམས་ཅད་དེ་བཞིན་གཤེགས་པའི་བསྟན་པ་ལ་གནས་པར་གྱིས་ཤིག་དང ། དེས་སེམས་ཅན་ཐམས་ཅད་ཀྱི་ཡུན་རིང་པོའི་
314b
དོན་དང ། ཕན་པ་དང ། བདེ་བར་འགྱུར་རོ། །དེ་སྐད་ཅེས་སྨྲས་པ་དང ། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་གིས་གསང་བ་པའི་བདག་པོ་ལག་ན་རྡོ་རྗེའི་ཚིག་མཉན་ནས་དེ་བཞིན་གཤེགས་པའི་བསྟན་པ་ཡང་བཟུང་སྟེ་དུས་གཅིག་ཏུ་སྒྲ་སྐད་ཀྱི་ང་རོ་གཅིག་ཏུ་སེངྒེའི་སྒྲ་ཆེན་པོ་ཧཱུཾ་ཞེས་བྱ་བས་སྟོང་གསུམ་གྱི་སྟོང་ཆེན་བོའི་འཇིག་རྟེན་གྱི་ཁམས་རྒྱས་པར་འགེངས་ཤིང ། གསང་སྔགས་ཀྱི་གཞི་འདི་དག་སྨྲས་སོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་ཉན་ཐོས་དང ། རང་སངས་རྒྱས་དང ། བྱང་ཆུབ་སེམས་དཔའི་དགེ་འདུན་དང་བཅས་པ་བདུན་པོ་དག་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །རིག་སྔགས་ཀྱི་རྒྱལ་མོ་ཆེན་པོ་རྡོ་རྗེའི་ལྕགས་ཀྱུ་ལ་ཕྱག་འཚལ་ལོ། །རྡོ་རྗེའི་ལུ་གུ་རྒྱུད་ལ་ཕྱག་འཚལ་ལོ། ། རྡོ་རྗེའི་གནམ་ལྕགས་ལ་ཕྱག་འཚལ་ལོ། །རྡོ་རྗེའི་ཤུགས་ལ་ཕྱག་འཚལ་ལོ། །རྡོ་རྗེ་བེ་ཅོན་ལ་ཕྱག་འཚལ་ལོ། །རྡོ་རྗེ་ཡན་ལག་དམར་ལ་ཕྱག་འཚལ་ལོ། །སྟོབས་པོ་ཆེ་ལ་ཕྱག་འཚལ་ལོ། །རྡོ་རྗེས་རྣམ་པར་འཇོམས་པ་ལ་ཕྱག་འཚལ་ལོ། །འགྲོ་ལྡིང་བ་ལ་ཕྱག་འཚལ་ལོ། །རྡོ་རྗེ་ཕོ་ཉ་མོ་དྲུག་ཅུ་རྩ་བཞི་ལ་ཕྱག་འཚལ་ལོ། །རྡོ་
315a
༄#། །རྗེའི་ཁྲོ་བོ་རྣམས་ལ་ཕྱག་འཚལ་ལོ། །ཏདྱ་ཐཱ། ཨོཾ་ཏྲ་ཊ་ཏྲ་ཊ། ཏྲོ་ཊ་ཡ་ཏྲོ་ཊ་ཡ། སྥུ་ཊ་སྥུ་ཊ། སྥོ་ཊ་ཡ་སྥོ་ཊ་ཡ། མོ་ཊ་མོ་ཊ། མོ་ཊ་ཡ་མོ་ཊ་ཡ། གྷཱུརྞྞ་གྷཱུརྞྞ། གྷཱུརྞྞ་པ་ཡ་གྷཱུརྞྞ་པ་ཡ། སརྦ་སཏྭཱ་ནི། ཏྲ་ས་ཏྲ་ས། ཏྲཱ་ས་ཡ་ཏྲཱ་ས་ཡ། བྷྲ་མ་བྷྲ་མ། སཾ་བྷྲ་མ་ཡ་སཾ་བྷྲ་མ་ཡ། སརྦ་བྷཱུ་ཏ་ནི། ཀུཊྚ་ཡ་ཀུཊྚ་ཡ། སཾ་ཀུཊྚ་ཡ་སཾ་ཀུཊྚ་ཡ།་སརྦ་ཤ་ཏྲུན། གྷཊྚ་གྷཊྚ། སཾ་གྷཊྚ་ཡ་སཾ་གྷཊྚ་ཡ། སརྦ་བིདྱ་བཛྲ་བཛྲ། སྥོ་ཊ་ཡ་བཛྲ་བཛྲ། ཀ་ཊ་ཡ་བཛྲ་བཛྲ། མ་ཊ་ཡ་བཛྲ་བཛྲ། ཨུཙྪ་ཊ་ཡ་བཛྲ་བཛྲ། ཧ་ན་བཛྲ་བཛྲ། ད་ཧ་བཛྲ་བཛྲ། པ་ཙ་བཛྲ་བཛྲ། མ་ཐ་བཛྲ་བཛྲ། ཨུ་སཱ་ད་ཡ་མ་ཧཱ་བཛྲ་བཛྲ། དྷཱ་ར་བཛྲ་པཱ་ཎི་པྲི་ཡེ། ཀ་ཧ་ཀ་ཏ། ཧ་ས་ཧ་ས། མ་ཧཱ་ཊཱཊྚ་ཧཱ་ས། ཁ་ཅིག་ཏུ་རྒྱ་མཚོའི་རླབས་འཁྲུགས་པ་ལྟ་བུར་ཟབ་ཅིང་འཇིགས་སུ་རུང་བའི་ཧཱུཾ་ཞེས་བྱ་བའི་སེངྒེའི་སྒྲ་སྡང་བ་རབ་ཏུ་སྡང་བ་\?\་ ་དང་ལོག་འདྲེན་ཀུན་ཏུ་སྐྲག་པར་བྱེད་པ་དང ། སྡང་བ་ཐམས་ཅད་གཞོམ་དུ་གསོལ། འཇོམས་སུ་སྩལ་དུ་གསོལ། ཧཱུཾ་ཧཱུཾ་ཕཊ། བཛྲ་བ་ར་པྲ་ད་སྥོ་ཊ། བསྒྲུབ་པར་བྱ་བ་ལྷ་དང ། ལྷ་མ་ཡིན་དང ། ལྟོ་འཕྱེ་ཆེན་པོ་དང ། གནོད་སྦྱིན་དང ། སྲིན་པོ་དང ། ཡི་དྭགས་དང ། ཤ་ཟ་དང ། མ་མོ་དང ། འབྱུང་པོ་དང ། གདོན་གྱི་ཚོགས་མཐར་ཕྱིན་པ། འབྱེར་བར་མཛད་པ་ཧཱུཾ་ཧཱུཾ་
315b
ཕཊ།་ཧེ་ཧེ་ཕཊ། ཨ་མེ་གྷ་ཕཊ། རྒྱལ་ཆེན་བཞིའི་རིས་ཀྱི་ལྷ་ཁང་ཁྱིམ་དང་བཅས་པ། བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པར་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། འབྱེར་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། སུམ་ཅུ་རྩ་གསུམ་གྱི་ལྷ་ཁང་ཁྱིམ་དང་བཅས་པ། བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། འབྱེར་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། ལྷའི་དབང་པོ་བརྒྱ་བྱིན་ཁང་ཁྱིམ་དང་བཅས་པ། བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པར་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། འཐབ་བྲལ་གྱི་ལྷ་ཁང་ཁྱིམ་དང་བཅས་པ། བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། དགའ་ལྡན་གྱི་ལྷ་ཁང་ཁྱིམ་དང་བཅས་པ། བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། འཕྲུལ་དགའི་ལྷ་ཁང་ཁྱིམ་དང་བཅས་པ། བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་སྩལ་དུ་གསོལ། ཧཱུཾ་ཧཱུཾ་ཕཊ། གཞན་འཕྲུལ་དབང་བྱེད་ཀྱི་ལྷ་ཁང་ཁྱིམ་དང་བཅས་པ་བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་
316a
༄#། །སྩལ་དུ་གསོལ། ཧཱུཾ་ཧཱུཾ་ཕཊ། དེ་བཞིན་དུ་འོད་གསལ་དང ། ཚངས་རིས་ནས་གནས་གཙང་མའི་འོག་མིན་གྱི་བར་གྱི་ལྷ་ཁང་ཁྱིམ་དང་བཅས་པ་བུ་དང ། ཆུང་མ་དང ། ཕྱུགས་དང ། རྩ་ལག་དང་བཅས་པ་གཡོ་བར་བགྱིད་དུ་གསོལ། ཧཱུཾ་ཧཱུཾ་ཕཊ། འབྱེར་བར་བགྱིད་དུ་སྩལ་དུ་གསོལ། རིག་སྔགས་འཆང་གྲུབ་པ་རྣམས་རེངས་པར་མཛད་དུ་གསོལ། རྨུགས་པར་མཛད་དུ་གསོལ། རྨོངས་པར་མཛད་དུ་གསོལ། གཅུ་པར་གསོལ། གཅད་དུ་གསོལ། གཞིག་ཏུ་གསོལ། རྣམ་པར་གཞིག་ཏུ་གསོལ།་མནན་དུ་གསོལ། ཧཱུཾ་ཧཱུཾ་ཕཊ། ཨོཾ་ཁྲོ་བོ་ཁྲོ་བོ་ཆེན་པོ་རྣམ་པར་བཀྲ་བ། སེར་སྐྱ་བོ། ནག་པོ། དམར་པོ། སེར་པོ། མི་ཕམ་པ། རྟག་ཏུ་འབར་བའི་ཁྲོ་བོ། སུ་རུ་སུ་རུ་སུ་རུ། མུ་རུ་མུ་རུ་མུ་རུ། ཏུ་རུ་ཏུ་རུ་ཏུ་རུ། གྷུ་རུ་གྷུ་རུ་གྷུ་རུ། དྷུ་རུ་དྷུ་རུ་དྷུ་རུ། ཐ་ར་ཐ་ར་ཐ་ར། བྷ་ར་བྷ་ར་བྷ་ར། ཧ་ར་ཧ་ར་ཧ་ར། ཡ་ར་ཡ་ར། མ་ར་མ་ར། ཀུ་ཧུ་ཀུ་ཧུ།་ཙི་ལི་ཙི་ལི། མི་ལི་མི་ལི། ལུ་ཊུ་ལུ་ཊུ། སརྦྦ་ཊཱ་ལཱ་མ་མཱ་ཧཱུཾ། པུ་ལུ་པུ་ལུ། ལེནྟཱཾ་ལོ་ཧི་ས་ལེནྟཱཾ། མུ་ལུ་ལཾ་ཁཱ་སེ། ཙུ་ལུ་ཙུ་ལེནྟཾ། མ་ལུ་པུ་ལེནྟཾ། མ་ལུ་རུ་བི། ཀུ་པི་པུརྦྦ།་ལེ་ཎྱུ་སྤུར་གྷ་ཎྱུ། སྤུ་བི་རི་ཙུ། སུ་རུ་སུ་རུ། མུ་རུ་མུ་རུ། སུ་མུ་སུ་མུ་རུ་ཨ་ཀ་ཊེ། བི་ག་ཊེ། ནི་ཀ་ཊེ། ཀ་ཊ་བི་ཀ་ཊེ། ནི་ཀ་ཊེ། ཀ་ཊཾ་ཀ་ཊེ། ཛ་ཡེ་བི་ཛ་ཡེ། ཛ་ཡནྟི།
316b
པི་ཛ་ཡནྟི། ཏི་མིངྒི་སི། མ་ཧཱ་ཏི་མིངྒི་སི། གྷུ་ཏངྒ་མེ་བྷུ་ཏ། བ་ར་ཡ་ཎེ། སྡང་བ་རྣམས་ལ་རྗེས་སུ་འདོམས་པ། མ་དུལ་བ་རྣམས་དུལ་བ། དྲག་ཤུལ་ཅན་རྣམས་འབྱེར་བར་མཛད་པ།་དཔའ་བོ་རྣམས་ཀྱི་ནང་ན་དཔའ་བ། དེས་པ་རྣམས་ཀྱི་ནང་ན་དེས་པ། མ་གྲུབ་པ་རྣམས་གྲུབ་པར་མཛད་པ། གྲུབ་པ་རྣམས་ཆུད་མི་ཟ་བར་མཛད་པ། སེམས་ཅན་ཐམས་ཅད་ལ་ཕན་པ་མཛད་པ། དེ་བཞིན་གཤེགས་པ་ཐམས་ཅད་ཀྱིས་གནས་བསྔགས་པ། སངས་རྒྱས་ཐམས་ཅད་ལ་བསྙེན་བཀུར་མཛད་པ། རྡོ་རྗེའི་རིགས་ཀྱི་རིག་སྔགས་ཐམས་ཅད་ཀྱིས་བྱིན་གྱིས་བརླབས་པ་ཚུར་གཤེགས་ཚུར་གཤེགས། རྡོ་རྗེ་རིགས་ཀྱི་རྩེ་མོའི་ཁང་པ་བརྩེགས་པ་ན་བཅོམ་ལྡན་འདས་ཀྱི་སྤྱན་སྔར་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱི་མདུན་དུ་དམ་ཚིག་གང་བཅས་པ་དེ་རྗེས་སུ་བསྐྱང་དུ་གསོལ། རྗེས་སུ་བསྐྱང་དུ་གསོལ། གཤེགས་སུ་གསོལ། མྱུར་དུ་གཤེགས་སུ་གསོལ། བདག་གི་ལས་རྣམས་མྱུར་བ་མྱུར་བར་སྒྲུབ་ཏུ་གསོལ། སྐྲག་པར་བྱེད་པ།་རྡོ་རྗེ་འཛིན་པ་ལག་ན་རྡོ་རྗེ་ལ་ཕྱག་འཚལ་ལོ། །ཧུ་རུ་ཧུ་རུ། གྲུབ་པ་དྲག་པོ་ལག་ན་རྡོ་རྗེ་བཀའ་སྩོལ་ཅིག་སཝཱཧཱ། ཤིན་ཏུ་གྲུབ་པར་བྱེད་པ་ལ་སཝཱཧཱ། རྡོ་རྗེ་ཆེན་པོ་
317a
༄#། །ལ་སཝཱཧཱ།་རྡོ་རྗེ་ཕུར་པ་ལ་སཝཱཧཱ། རྡོ་རྗེ་འབྱུང་པོ་ལ་སཝཱཧཱ། རྡོ་རྗེ་བྱིན་གྱིས་བརླབས་པ་ལ་སཝཱཧཱ། རྡོ་རྗེ་ཀི་ལི་ཀི་ལི་ལ་སཝཱཧཱ། དྲག་པོ་ཀི་ལི་ཀི་ལི་ལ་སཝཱཧཱ། དམར་པོ་ཀི་ལི་ཀི་ལི་ལ་སཝཱཧཱ། བྱིས་པ་ཀི་ལི་ཀི་ལི་ལ་སཝཱཧཱ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ལ་སཝཱཧཱ། བདག་གི་གནོད་པ་དང ། ནད་འགོ་པ་ཐམས་ཅད་དང ། རིམས་ཐམས་ཅད་མེད་པར་མཛོད་ཅིག་སཝཱཧཱ། དེ་ནས་རྡོ་རྗེ་ཁྲོ་བོ་ཆེན་པོས་འདི་སྐད་སྨྲས་པ་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ཏེ་ཕྱོགས་དང ། ཕྱོགས་མཚམས་ཐམས་ཅད་དང ། དེ་བཞིན་དུ་བར་སྣང་ལ་རྡོ་རྗེའི་སྐར་མདའ་ཆེན་པོའི་བེ་ཅོན་འབབ་པར་སྣང་ངོ ། །གནམ་གྲུམ་པའི་སྒྲ་ཆེན་པོ་ཡང་གྲག་གོ་།ཀུན་ནས་ས་ཆེན་པོ་འདི་གྲུམ་པར་ཀུན་ཏུ་སྣང་ངོ ། །ས་ཆེན་པོའི་སེར་ཀ་དེ་དག་ནས་ཡན་ལག་བརྒྱད་དང་ལྡན་པའི་ཆུའི་རྒྱུན་གྱེན་དུ་བྱུང་ངོ ། །ཆུའི་རྒྱུན་དེ་དག་གིས་རྣམ་པར་འཇིགས་པའི་དུས་ཀྱི་ཆུ་བཞིན་དུ་ས་ཆེན་པོ་ཐམས་ཅད་ཀུན་ཏུ་གང་བར་སྣང་ངོ ། །གང་དག་སའི་འོག་ན་གནས་པའི་ཀླུ་ཆེན་པོ་དང ། ལྷ་ཆེན་པོ་དང ། ལྷ་མ་ཡིན་ཆེན་པོ་དང ། དེ་དག་ཐམས་ཅད་ཀྱང་སའི་འོག་ནས་ཐོན་ཅིང་རི་རབ་ཀྱི་དྲུང་དུ་ཐོན་ཏེ་གྱེན་དུ་བྱུང་
317b
ནས་བཅོམ་ལྡན་འདས་ལ་སྐྱབས་སུ་དོང་ངོ ། །དེ་ནས་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡང་བ་སྡང་བའི་སེམས་དང་ལྡན་པའི་འབྱུང་པོ་དང ། བགེགས་དང ། ལོག་འདྲེན་གང་དག་འཁོད་པ་དེ་དག་ཀྱང་ཀུན་ཏུ་འབར། རབ་ཏུ་འབར་ཞིང་ཀུན་ཏུ་རབ་ཏུ་འབར་ཏེ་མེ་ལྕེ་གཅིག་ཏུ་གྱུར་པ་དག་གིས་རང་རང་གི་ལུས་ཀུན་ཏུ་རྣམ་པར་འཇོམས་པར་ཤེས་ཏེ། དེ་དག་སྡུག་བསྔལ་མི་བཟད་ཅིང་དྲག་ལ་རྩུ་བ་པས་ཉེན་ནས་ཧ་ཧ་ཞེས་བྱ་བའི་དུ་སྐད་བཏོན་ཏེ་ཚིག་འདི་སྐད་ཅེས་སྨྲས་སོ། །གསང་བ་པའི་བདག་པོ། བདག་ཅག་སྐད་ཅིག་གིས་སྲོག་ཀྱང་མ་མཆིས་པར་འགྱུར་དུ་བགྱིད་ན། འཇིགས་པ་ཆེན་པོར་ལྷུང་བ་འདི་ལས་ཡོངས་སུ་བསྐྱབ་ཏུ་གསོལ། བགེགས་དང ། ལོག་འདྲེན་རྣམས་ཇི་ལྟ་བ་དེ་བཞིན་དུ་གཞན་འཇིག་རྟེན་གྱི་ཁམས་གཞན་ཐམས་ཅད་ན་གནས་པ་དང ། རི་དང ། ཆུ་བོ་དང ། ལྟེང་ཀ་དང ། རྫིང་དང ། དུར་ཁྲོད་དང ། ཤིང་དང ། ཐིབས་པོ་དང ། ཁྲོན་པ་རྙིང་པ་དང ། བཏུང་བ་དང ། ལམ་གྱི་བཞི་མདོ་དང ། སུམ་མདོ་དང ། གཙུག་ལག་ཁང་ཞིག་པ་དང ། གནས་དང ། ལྷ་ཁང་ན་གནས་པ་དག་ཐམས་ཅད་ཀྱིས་ཀྱང་གསང་བ་པའི་བདག་པོ་ལག་ན་རྡོ་རྗེ་འཇིགས་པ་ཆེན་པོ་ལྟུང་བ་འདི་ལས་ཡོངས་སུ་བསྐྱབ་ཏུ་གསོལ། ཡོངས་སུ་བསྐྱབ་ཏུ་
318a
༄#། །གསོལ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་བཞིན་དུ་ལྷའི་ཁང་པ་ཐམས་ཅད་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་ཏེ་མོག་མོག་པོར་གྱུར་ཅིང་འོད་མེད་པར་ཀུན་ཏུ་སྣང་ངོ ། །བདུད་ཀྱི་ཁྱིམ་ཐམས་ཅད་ཀྱང་ཀུན་ཏུ་འབར་ཞིང ། ཀུན་ཏུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པར་སྣང་ངོ་།། གང་བདུད་ཀྱི་རིས་ཀྱི་ལྷའི་བུ་དེ་དག་ཐམས་ཅད་ཀྱང་རྡོ་རྗེ་ཁྲོ་བོ་ཆེན་པོས་སྔངས་སྐྲག་ཏེ་རང་རང་གི་མགོ་རྡོ་རྗེ་རྣམས་ཀྱིས་རྣམ་པར་འཇོམས་པ་མཐོང་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། གསང་བའི་བདག་པོ་ལག་ན་རྡོ་རྗེ་ལ་སྐྱབས་སུ་དོང་ངོ ། ། བདུད་སྡིག་ཅན་ཡང་ཤིན་ཏུ་སྡུག་བསྔལ་བའི་ཚོར་བས་ཉམ་ཐག་ཅིང་སྐྲག་ལ་ཞུམ་སྟེ་གནོད་པས་སྡངས་ནས་སངས་རྒྱས་ལ་སྐྱབས་སུ་སོང ། ཆོས་ལ་སྐྱབས་སུ་སོང ། དགེ་འདུན་ལ་སྐྱབས་སུ་སོང་ངོ ། །གསང་བ་པའི་བདག་པོ་ལག་ན་རྡོ་རྗེ་ལ་ཕྱག་འཚལ་ཏེ། ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཡོངས་སུ་སྐྱོབས་ཤིག། ཡོངས་སུ་སྐྱོབས་ཤིག་།བདག་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་སངས་རྒྱས་ལ་སྐྱབས་སུ་འགྲོའོ། །ཆོས་ལ་སྐྱབས་
318b
སུ་འགྲོའོ། །དགེ་འདུན་ལ་སྐྱབས་སུ་འགྲོའོ། །སེམས་ཅན་ཐམས་ཅད་ཀྱི་དོན་གྱི་ཕྱིར་ཕ་ལྟ་བུ་དང ། མ་ལྟ་བུ་དང ། སྤུན་ལྟ་བུ་དང ། གཉེན་ལྟ་བུ་དང ། སྣག་གི་གཉེན་མཚམས་ལྟ་བུར་འགྱུར་བར་བྱང་ཆུབ་ཏུ་སེམས་བསྐྱེད་དོ། །བདག་དེང་ཕྱིན་ཆད་སེམས་ཅན་ཐམས་ཅད་ཀྱི་ཕ་དང ། མ་དང ། སྤུན་དང ། གཉེན་དང ། སྣག་གི་གཉེན་མཚམས་སུ་འགྱུར་བར་བྱའོ། །ལུས་དང ། ངག་དང ། ཡིད་ཀྱི་ལས་ཅུང་ཟད་གང་ཅི་བྱེད་པ་དེ་སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་ཡོངས་སུ་བསྔོའོ། །བདག་དབུགས་ཕྱུང་ནས་གཞན་ཡང་དབུགས་དབྱུང་ངོ ། །བདག་གྲོལ་ནས་གཞན་ཡང་དགྲོལ་ལོ། །བདག་མྱ་ངན་ལས་འདས་ནས་གཞན་ཡང་མྱ་ངན་ལས་བཟླའོ། །རུས་པ་དང ། རྐང་དང ། ཁྲག་དང ། ཤ་དང ། ཉམས་མཐུ་དང ། སྲོག་གིས་ཀྱང་སེམས་ཅན་ཐམས་ཅད་ལ་རིམ་གྲོར་བྱའོ། །མཆོད་པར་བྱའོ། །བརྗེད་པར་བྱའོ། །སངས་རྒྱས་དང ། བྱང་ཆུབ་སེམས་དཔའ་དང ། འཕགས་པ་ཉན་ཐོས་དང ། རང་སངས་རྒྱས་དང ། སློབ་དཔོན་དང ། བླ་མའི་གནས་ཐམས་ཅད་ལ་ཡང་བསྙེན་བཀུར་བྱའོ། །བསྟི་སྟང་དུ་བྱའོ། །རིམ་གྲོར་བྱའོ། །མཆོད་པར་བྱའོ། །དེ་ནས་བདུད་སྡིག་ཅན་གྱིས་དཀོན་མཆོག་གསུམ་ལ་སྐྱབས་སུ་འགྲོ་བ་བཟུང་སྟེ་བྱང་
319a
༄#། །ཆུབ་ཀྱི་སེམས་རིན་པོ་ཆེ་བསྐྱེད་པ་དང ། ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ཏེ་དགའ་བ་ཐོབ་ནས་སྒྲ་སྐད་ཀྱི་ང་རོ་གཅིག་ཏུ་འདི་སྐད་ཅེས་སྨྲས་སོ། །གང་གི་ཕྱིར་ན་བདུད་ཁྱོད་ཀྱིས། །སེམས་ཅན་ཀུན་ལ་བདེ་བའི་ཕྱིར། །བླ་མེད་བྱང་ཆུབ་སེམས་བསྐྱེད་པ། །བདག་ཅག་རྗེས་སུ་ཡི་རང་ངོ་།། རིན་ཆེན་སེམས་འདིས་མི་རིང་བར། །རྣམ་འདྲེན་སངས་རྒྱས་གྱུར་ནས་ནི། །སེམས་ཅན་ཤིན་ཏུ་སྡུག་བསྔལ་ཀུན། །མྱ་ངན་ལས་ནི་བཟླ་བར་གྱིས། །རྒྱལ་བའི་མཆོག་འདི་ཇི་བཞིན་དུ། །སྐྱེ་རྒུ་ཐམས་ཅད་གདུལ་བར་བྱོས། །སྟོབས་པོ་ཆེ་དང་ལྡན་པ་ཡིས། །བདུད་བཞི་པོ་དག་གདུལ་བར་གྱིས། །དེ་སྐད་ཅེས་སྨྲས་པ་དང ། ཐམས་ཅད་དང་ལྡན་པའི་འཁོར་ཆེན་པོ་དེ་སངས་རྒྱས་ཀྱི་མཐུས་རང་རང་གི་ལག་གི་སྙིམ་པ་ནས་མེ་ཏོག་གི་ཕུར་མ་ཐོགས་པ་ཤེས་ཏེ། མེ་ཏོག་གི་ཕུར་མ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དང ། གསང་བ་པའི་བདག་པོ་ལག་ན་རྡོ་རྗེ་དང ། ཁྲོ་བོ་ཆེན་པོ་རྡོ་རྗེའི་ཁྲོ་བོ་དེ་དག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང ། ཕྱོགས་བཅུའི་འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་
319b
དཔའ་སེམས་དཔའ་ཆེན་པོ་དེ་དག་ལ་གཏོར་བ་དང ། དེ་ཡང་སངས་རྒྱས་ཀྱི་མཐུས་མེ་ཏོག་གི་གཞལ་མེད་ཁང་ཆེན་པོར་གྱུར་ཏོ། །བདུད་སྡིག་ཅན་ནི། མཆོག་ཏུ་བདེ་བས་ཚིམ་པར་གྱུར་ནས་སངས་རྒྱས་རྗེས་སུ་དྲན་བསྒོམ་ཞིང་རང་གི་བསོད་ནམས་ཀྱི་རྣམ་པར་སྨིན་པའི་རྫུ་འཕྲུལ་གྱི་མཐུ་དང ། དེ་བཞིན་གཤེགས་པ་རྗེས་སུ་སེམས་པས་མདུན་དུ་རིན་པོ་ཆེའི་གཞལ་མེད་ཁང་ཆེན་པོ་དཔག་བསམ་གྱི་ཤིང་དུ་མས་མིག་མང་རིས་བརྒྱད་དུ་བྲེས་པ། རིན་པོ་ཆེ་དང ། ནོར་བུ་དང ། མུ་ཏིག་དང ། དུང་དང ། མན་ཤེལ་དང ། བྱི་རུ་དང ། མརྒད་དང ། བཻ་ཌཱུརྱ་དང ། ནད་རྙིལ་དང ། མཐོན་ཀ་ཆེན་པོ་དང ། ཀེ་ཀེ་རུ་དང ། ཀེ་ཀེ་རུ་ཆེན་པོ་དང ། རྡོ་རྗེ་དང ། རྡོ་རྗེ་ཆེན་པོ་དང ། དུན་ལས་དང ། དུན་ལས་ཆེན་པོ་དང ། འཛམ་བུའི་ཆུ་བོའི་གསེར་གྱི་དྲ་བས་རྣམ་པར་སྤྲས་པ། གདུགས་དང ། རྒྱལ་མཚན་དང ། བ་དན་དང ། རྣམ་པར་རྒྱལ་བའི་བ་དན་བསྒྲེངས་པས་ལེགས་པར་བརྒྱན་པ། མེ་ཏོག་ཕྲེང་བས་ཀླུབས་པ། པོག་སྣོད་དུ་མ་ནས་བདུག་པ་དྲི་ཞིམ་པོའི་ངད་ཀྱིས་དྲི་ཞིམ་པར་བྱས་པ། ཕྱེ་མ་དྲི་ཞིམ་པོའི་བསྒོ་བས་བསྒོས་པ། ལྷའི་བུ་མོ་འབུམ་ཕྲག་དུ་མ་སིལ་སྙན་དང ། ཕེག་རྡོབ་པ་དང ། གླུ་ལེན་ཅིང་གར་བྱེད་པ། རྫིང་བུ་ཡན་ལག་བརྒྱ་དང་ལྡན་པའི་ཆུ་ཅན་
320a
༄#། །འབུམ་ཕྲག་དུ་མའི་དབུས་ནས་རིན་པོ་ཆེ་སྣ་ཚོགས་པདྨ་དང ། ཀུ་མུ་ད་དང ། པདྨ་དཀར་པོ་དང ། ུཏྤ་ལ་དང ། དྲི་མཆོག་བྱུང་བས་མཛེས་པར་བྱས་པའི་ཕྱོགས་དང་ལྡན་པ་བྱུང་ནས་དེ་མཆོག་ཏུ་དགའ་བ་དང ། རངས་པ་དང ། ཡིད་བདེ་བ་སྐྱེས་པ་དེ་གུས་པ་ཐམས་ཅད་ཀྱིས་དེ་བླངས་ནས་བདུད་ཀྱི་མཐུ་ཆེན་པོ་དང ། བདུད་ཀྱི་རྣམ་པར་འཕྲུལ་བ་ཆེན་པོ་དང ། བདུད་ཀྱི་རྫུ་འཕྲུལ་ཆེན་པོས་ལག་པ་གཉི་གས་སྤྱི་བོ་ལ་བླངས་ཏེ་དགེ་བའི་བཤེས་གཉེན་གསང་བ་པའི་བདག་པོ་ལག་ན་རྡོ་རྗེ་ལ་དགའ་བ་དང ། མཆོད་པའི་ཕྱིར་ཕུལ་ཏེ། ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཇིག་རྟེན་དག་ལ་དབང་བྱེད་དབང་གིས་འབྱོར་གྱུར་པ། །སྟོབས་བཅུའི་སྲས་རབ་མཆོག་ལྡན་ཁྱོད་ལ་བརྟེན་ནས་སུ། །བྱང་ཆུབ་ཕྱིར་ནི་ཆགས་བྲལ་དྲི་མེད་བྱང་ཆུབ་སེམས། །སེམས་ཅན་བདེ་སྒྲུབ་གཏེར་དང་འདྲ་བ་བདག་གིས་ཐོབ། །བདག་མིག་གཏི་མུག་མུན་པས་དྲི་ཅན་དྲི་མེད་གྱུར། །སྲིད་པའི་འདོད་ཆགས་རབ་ཏུ་ཞི་ཞིང་སྤྲོས་དང་བྲལ། །མྱ་ངན་འདས་པའི་དྲང་པོའི་ལམ་ནི་བདག་ལ་བསྟན། །སེམས་དམྱལ་མི་བཟད་ཐམས་ཅད་རབ་ཏུ་ཞི་བར་འགྱུར། །སྡིག་བྲལ་འཇིག་རྟེན་མགོན་ལ་སྐྱབས་སུ་མ་སོང་བ། །ཀྱེ་མ་དམན་པ་ཡུན་རིང་ཇི་ལྟ་བསླུས་
320b
ཤིག་གུ་།དེ་རིང་ཐུབ་དབང་སྲས་པོ་རྣམས་ལ་བསོད་ནམས་དང ། །དད་དང་སྙིང་རྗེ་ཏིང་འཛིན་ཐོབ་ནས་ངོ་མཚར་གྱུར། །ས་མདོག་གཅིག་པུར་སངས་རྒྱས་མྱུར་དུ་གྲུབ་པར་ཤོག་།གཅིག་པུས་འགྲོ་བ་མ་ལུས་མྱ་ངན་བཟླ་བར་བྱ། །སྲིད་པ་གཞན་ན་ཀུན་ཏུ་རྒྱུ་ཚེ་བདག་གི་ཡིད། །རང་ཕན་འཇུག་དང་དགེ་བཤེས་བྲལ་བར་མ་གྱུར་ཅིག། དེ་ནས་བདུད་སྡིག་ཅན་གྱིས་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་གསང་བ་པའི་བདག་པོ་ལག་ན་རྡོ་རྗེ་ལ་མངོན་པར་བསྟོད་ནས་ཅང་མི་སྨྲ་བར་གྱུར་ཏོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་།སྡང་བ་དང ། གདོན་དང ། བགེགས་དང ། ལོག་འདྲེན་དེ་དག་ཐམས་ཅད་གང་གིས་སེམས་ཅན་ཐམས་ཅད་ལ་རྣམ་པར་རྩོམ་པ་རྣམ་པར་མི་འཚེ་བ་དང ། བགེགས་མི་བྱེད་པ་དང ། དཀོན་མཆོག་གསུམ་ལ་སྐྱབས་སུ་འགྲོ་བར་འགྱུར་བར་དེ་བཞིན་གཤེགས་པའི་དམ་ཚིག་འཛིན་དུ་ཆུག་ཅིག་།རིགས་ཀྱི་བུ་དག། འདི་དག་ལ་མི་འཇིགས་པ་ཡང་བྱིན་ཅིག་།དེས་སེམས་ཅན་ཐམས་ཅད་ཀྱི་དོན་དང ། ཕན་པ་དང ། བདེ་བ་དང ། མྱ་ངན་ལས་འདས་པ་བླ་ན་མེད་པ་ཡང་མཐོང་བར་འགྱུར་རོ། །དེ་སྐད་ཅེས་སྨྲས་པ་དང ། ཁྲོ་བོ་ཆེན་པོ་རྡོ་རྗེ་
321a
༄#། །ཁྲོ་བོ་དེ་དག་གིས་གསང་བ་པའི་བདག་པོ་ལག་ན་རྡོ་རྗེ་ལ་ལེགས་སོ་ཞེས་ཏེ་ཚིག་ལ་མངོན་པར་དགའ་ནས་ཡང་ལྷ་དང ། ཀླུ་དང ། གནོད་སྦྱིན་དང ། \?\་དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པ་དེ་དག་ཐམས་ཅད་དང ། སྡང་བ་བགེགས་དང ། ལོག་འདྲེན་དང ། མ་མོ་དང ། ཡི་དྭགས་དང ། ཤ་ཟ་དང ། འབྱུང་པོ་དང ། གདོན་དང ། བརྗེད་བྱེད་དང ། སྲུལ་པོ་དང ། ལུས་སྲུལ་པོ་དང ། རོ་ལངས་དང ། མཁའ་འགྲོ་དང ། སྒྲུབ་པ་དང ། སྦྲུལ་འཛིན་བཅས་པ་ལ་སོགས་པ་དེ་དག་ཐམས་ཅད་དང ། གདོན་གྱི་ཚོགས་དེ་དག་ཐམས་ཅད་ཀྱིས་རྡོ་རྗེ་ཆེན་པོ་མང་པོ་འབབ་པས་དཀྲུགས་པའི་མཚོ་ཆེན་པོ་ཟབ་མོ་ཀློང་འཁྱིལ་བ། འུར་འུར་སྒྲ་ཕྱུང་བ་ལྟ་བུར་དྲག་ཅིང་རྒྱུན་རིང་བའི་སྐད་གསང་མཐོན་པོས་འདི་སྐད་ཅེས་སྨྲས་སོ། །སྡང་བ་འབྱུང་པོ་དང ། གདོན་དང ། བགེགས་དང ། ལོག་འདྲེན་ལ་སོགས་པ་དྲག་ཤུལ་ཅན་དྲག་ཤུལ་གྱི་སེམས་དང་ལྡན་པ། སྡིག་པ་ཅན་སྡིག་པའི་སེམས་དང་ལྡན་པ། སྡང་བ་ཅན་སྡང་བའི་སེམས་དང་ལྡན་པ་ཁྱེད་ཐམས་ཅད་ཉོན་ཅིག་།ཁྱེད་ཀྱིས་དང་ཕན་ཆད་སེམས་ཅན་གང་དག་དེ་བཞིན་གཤེགས་པའི་བསྟན་པར་ཞུགས་པ་དག་དང ། དེ་ལ་
321b
སོགས་པ་གང་དག་གསང་སྔགས་སྒྲུབ་བམ། ཀློག་པ་དེ་དག་ལ་བགེགས་འབྱུང་བར་མི་བྱ་ཞིང་འཆེ་བར་མི་བྱ་སྟེ། སྒྲུབ་པ་དང་རྗེས་སུ་མཐུན་པར་སྟོབས་སྦྱིན་པར་བྱའོ། །སེམས་ཅན་གང་དག་དམ་ཚིག་ལ་མ་ཞུགས་པ་དེ་དག་ལ་བསྲུང་བར་བྱ། ཞི་བ་དང ། བདེ་ལེགས་སུ་འགྱུར་བ་དང ། ཆད་པ་སྤང་བ་དང ། དུག་གཞིལ་བ་དང ། དུག་བསད་པ་དང ། རིག་སྔགས་འགྲུབ་པར་སྦྱིན་པར་བྱའོ། །སྦྲང་རྩི་དང ། ཚིགས་མ་དང ། སྒོག་པ་དང ། ཀེའུ་དང ། གཏོར་མ་དང ། འབྱུང་པོ་དང ། མི་བགྲུངས་པ་རྣམས་ཀྱི་ཤ་དང་ཟས་ཟོས་ཀྱང་སྐྱོན་དུ་\?\་མི་གཟུང་ཞིང་ཉེས་པར་མི་བརྩིའོ། །དེ་ནས་སྡང་བ་འབྱུང་པོ་དང ། བགེགས་དང ། ལོག་འདྲེན་ལ་སོགས་པ་ཐམས་ཅད་ཅེས་བྱ་བ་ནས་སྒྲ་སྐད་ཀྱི་ང་རོ་གཅིག་གིས་འདི་སྐད་ཅེས་སྨྲས་སོ་ཞེས་བྱ་བའི་བར་དུ་སྦྱར་རོ། །རིགས་ཀྱི་བུ་དག། བཀའ་ལུང་ཅི་སྩལ་བ་དེ་བཞིན་དུ་སྦྱར་བར་བགྱིའོ། །དེང་སླན་ཆད་སངས་རྒྱས་བཅོམ་ལྡན་འདས་དང ། ཆོས་དང ། དགེ་འདུན་ལ་སྐྱབས་སུ་མཆིའོ། །སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་ཁྲོ་བོ་ཆེན་པོ་རྡོ་རྗེ་ཁྲོ་བོ་ཆེན་པོ་དག་དང ། སྡང་བ་བགེགས་དང ། ལོག་འདྲེན་དང ། འབྱུང་པོ་
322a
༄#། །དང ། གདོན་གྱི་ཚོགས་དེ་དག་ཐམས་ཅད་ལ་ལེགས་སོ་ཞེས་བྱ་བ་བྱིན་ཏེ། རིག་སྔགས་ཀྱི་ལས་དང ། དམ་ཚིག་དང ། ཕྱག་རྒྱ་ཐམས་ཅད་འཛིན་དུ་བཅུ་གོ་།གསང་བ་པའི་བདག་པོ་ལག་ན་རྡོ་རྗེ་ཡང་རྡོ་རྗེའི་རྣམ་པར་ཐར་པའི་སྒོ་ཆེན་པོའི་ཏིང་ངེ་འཛིན་དེ་ལས་ལངས་སོ། །དེ་ནས་ཚེ་དང་ལྡན་པ་ཤ་རདྭཱ་ཏིའི་བུས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ། གང་ལ་གནས་ནས་ཁྱེད་ཀྱིས་རྫུ་འཕྲུལ་གྱི་ཆོ་འཕྲུལ་འདི་ལྟ་བུ་འདི་བསྟན་པཾ་དང ། བདུད་སྡིག་ཅན་ཡང་བྱང་ཆུབ་ཏུ་སེམས་བསྐྱེད་པ་དང ། གཞན་ཡང་སྡང་བ་གདོན་དང ། འབྱུང་པོ་དང ། བགེགས་དང ། ལོག་འདྲེན་ཐམས་ཅད་དམ་ཚིག་ལ་བཀོད་ཅིང་བྱང་ཆུབ་ཀྱི་སེམས་འཛིན་དུ་བཅུག་པའི་ཏིང་ངེ་འཛིན་འདིའི་མིང་ཅི་ཞེས་བྱ། དེ་སྐད་ཅེས་སྨྲས་པ་དང ། གསང་བ་པའི་བདག་པོ་ལག་ན་རྡོ་རྗེས་ཚེ་དང་ལྡན་པ་ཤཱ་རདྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རདྭ་ཏིའི་བུ། ཏིང་ངེ་འཛིན་འདི་ནི། མིང་དང ། ཡི་གེ་དང ། སྒྲ་སྐད་ཀྱིས་རྟོགས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། གང་མིང་ངམ། གཟུགས་སམ། དབྱིབས་སམ། གནས་སམ། མཉམ་པར་གཞག་པའམ། གཡེང་བ་ཡང་རུང་སྟེ། ཏིང་ངེ་འཛིན་ཅེས་བྱ་བའི་ཆོས་དེ་གང་ཡང་མེད་དོ། །
322b
གང་ལ་མིང་མེད་པ་དང ། གཟུགས་མེད་པ་དང ། དབྱིབས་མེད་པ་དང ། གནས་མེད་པ་དང ། མཉམ་པར་གཞག་པ་མེད་པ་དང ། གཡེང་བ་མེད་པ་འདི་བཙུན་པ་ཤཱ་རདྭ་ཏིའི་བུ་ཏིང་ངེ་འཛིན་འདིའི་མིང་ཅི་ཞེས་བྱ་ཞེས་དེ་ལ་ཇི་སྙམ་དུ་སེམས། ཡང་བཙུན་པ་ཤཱ་རདྭ་ཏིའི་བུ། གསལ་བར་བྱེད་པ་འདི་ནི། བདག་ལ་གསལ་པར་བྱེད་པ་མ་ཡིན། གཞན་ལ་གསལ་བར་བྱེད་པ་མ་ཡིན། གཉི་ག་ལ་གསལ་བར་བྱེད་པ་མ་ཡིན་ནོ། །འོན་ཀྱང་གསལ་བར་བྱེད་པར་བཏགས་པ་ཡོད་དོ། །དེ་ལ་གསལ་བར་བྱེད་པ་ནི། གསལ་བར་བྱེད་པའི་བདག་ཉིད་ཀྱིས་སྟོང ། བདག་ནི། བདག་གིས་སྟོང ། གཞན་ཡང་གཞན་གྱི་བདག་ཉིད་ཀྱིས་སྟོང ། གཉི་ག་ཡང་གཉི་གའི་བདག་ཉིད་ཀྱིས་སྟོང་སྟེ། ཡང་དག་པ་མ་ཡིན་པ་ཀུན་ཏུ་བཏགས་པའི་ཕྱིར་རོ། །འདི་ཅི་ཞེས་བྱ་བའི་ཡི་གེ་གཉིས་ཀྱི་ཚིག་ཀྱང་ཚིག་གིས་བདག་ཉིད་ཀྱིས་སྟོང་སྟེ། ཡི་གེ་ཡང་ཡི་གེ་མ་ཡིན་ནོ། །དེ་ལྟར་ན་རྟེན་ཅིང་འབྲེལ་པར་འབྱུང་བའི་དོན་རྟོགས་པར་བྱེད་པ་ཡིན་ནོ། །དོན་དེ་བརྗོད་པ་ན་ཡང་གང་ནས་ཀྱང་མི་འོང ། གང་དུ་ཡང་མི་འགྲོ་མོད་ཀྱི། གཞན་གྱི་དབང་ལ་བརྟེན་པའི་ཕྱིར་ཡི་གེར་བཏགས་པ་ཡང་ཡོད་དོ། །ཡོངས་སུ་བཏགས་པ་ཡིན་པའི་ཕྱིར་བཏགས་པ་ཡང་སྟོང་པའོ། །རྟེན་ཅིང་འབྲེལ་བར་འབྱུང་བའི་ཕྱིར་གཞན་གྱི་
323a
༄#། །དབང་ཉིད་སྟོང་པའོ། །རྒྱུ་དང་རྐྱེན་ལས་བྱུང་བའི་ཕྱིར་རྟེན་ཅིང་འབྲེལ་བར་འབྱུང་བ་ཡང་སྟོང་པའོ། །གློ་བུར་དུ་རྒྱུ་དང་རྐྱེན་གྱིས་བསྐྱེད་པའི་ཕྱིར་འབྱུང་བའི་བདག་ཉིད་ཀྱིས་སྟོང་ངོ ། །དེ་ལ་རྟེན་ཅིང་འབྲེལ་པར་འབྱུང་བ་ནི། རང་གི་མཚན་ཉིད་ཀྱིས་སྟོང་ངོ ། །རང་གི་མཚན་ཉིད་སྟོང་པ་གང་ཡིན་པ་དེ་མཚན་ཉིད་མེད་པའོ། །མཚན་ཉིད་མེད་པ་གང་ཡིན་པ་དེ་དེ་བཞིན་ཉིད་དོ། །དེ་བཞིན་ཉིད་གང་ཡིན་པ་དེ་མ་ནོར་བ་དེ་བཞིན་ཉིད་དོ། །མ་ནོར་བ་དེ་བཞིན་ཉིད་གང་ཡིན་པ་དེ་གཞན་མ་ཡིན་པ་དེ་གཞིན་ཉིད་དོ། །གཞན་མ་ཡིན་པ་དེ་བཞིན་ཉིད་གང་ཡིན་པ་དེ་ཏིང་ངེ་འཛིན་ཏོ། །ཏིང་ངེ་འཛིན་གང་ཡིན་པ་དེ་རྟོགས་པའོ། །རྟོགས་པ་གང་ཡིན་པ་དེ་སྟོང་པ་ཉིད་དོ། །སྟོང་པ་ཉིད་གང་ཡིན་པ་དེ་ལྷག་མཐོང་ངོ ། །ལྷག་མཐོང་གང་ཡིན་པ་དེ་ཞི་གནས་སོ། །ཞི་གནས་གང་ཡིན་པ་དེ་རྣམ་པར་ཐར་པའོ། །རྣམ་པར་ཐར་པ་གང་ཡིན་པ་དེ་དབུ་མའི་ལམ་ཡིན་ནོ། །དབུ་མའི་ལམ་གང་ཡིན་པ་དེ་ལ་མཐའ་གཅིག་མེད། མཐའ་གཉིས་མེད། གཟུང་བ་མེད། འཛིན་པ་པོ་མེད། འཛིན་པ་མེད། ཆད་པ་མེད། རྟག་པ་མེད། སྐྱེ་བ་མེད། འགག་པ་མེད། རྟོག་པ་མེད། རྣམ་པར་རྟོག་པ་མེད། རང་དབང་མེད། གཞན་གྱི་དབང་མེད། འགྲོ་བ་མེད། འོང་བ་མེད། ཀུན་
323b
ནས་ཉོན་མོངས་པ་མེད། རྣམ་པར་བྱང་བ་མེད། འདུ་བ་མེད། འབྲལ་བ་མེད་དོ། །དེ་ནི། ལྷག་མཐོང་ཡིན་ནོ། །ལྷག་མཐོང་གང་ཡིན་བ་དེ་ལ་ཕུང་པོ་མེད། ཁམས་རྣམས་མེད།་དབང་པོ་རྣམས་མེད། སྐྱེ་མཆེད་རྣམས་མེད། ཡུལ་རྣམས་མེད། ཡུལ་དུ་གདགས་པ་མེད། ལས་མེད། ལས་ཀྱི་འབྲས་བུ་མེད་དོ། །གང་ལ་ལས་མེད་ཅིང་ལས་ཀྱི་འབྲས་བུ་མེད་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་གང་ཡིན་པ་དེ་བླ་ན་མེད་པ་ཡང་དག་པར་རྫོགས་པའི་སངས་རྒྱས་སོ། །བླ་ན་མེད་པ་ཡང་དག་པར་རྫོགས་པའི་སངས་རྒྱས་གང་ཡིན་པ་དེ་ཆོས་སོ། །ཆོས་གང་ཡིན་པ་དེ་མི་སྐྱེ་མི་འཆིའོ། །མི་སྐྱེ་མི་འཆི་བ་གང་ཡིན་པ་དེ་ནམ་མཁའ་དང་མཉམ་པ་ཉིད་དུ་ཁོང་དུ་ཆུད་པར་བྱའོ། །བཙུན་པ་ཤ་རདྭཱ་ཏིའི་བུས་སྨྲས་པ། རིགས་ཀྱི་བུ། ཁྱོད་ཀྱིས་ཏིང་ངེ་འཛིན་བསྟན་པ་འདི་ནི། ཤིན་ཏུ་ཟབ་སྟེ། འདི་ལ་ཉན་ཐོས་དང ། རང་སངས་རྒྱས་ཐམས་ཅད་ཀྱི་འགྲོ་བ་ཡང་མེད་ན། འཇིག་རྟེན་པའི་མུ་སྟེགས་ཅན་དང ། ཕས་ཀྱི་རྒོལ་བ་ཐམས་ཅད་ལྟ་སྨོས་ཀྱང་ཅི་དགོས། ཆོས་ཀྱི་རྣམ་གྲངས་འདི་ནི། དགེ་བའི་རྩ་བ་མ་བསྐྱེད་པ་དང ། མོས་པ་ཆུང་བ་ཐམས་ཅད་ཀྱིས་ཤེས་པར་དཀའ་བ་སྟེ། གཞན་དུ་ན་འདི་དེ་བཞིན་གཤེགས་པའི་སྤྱན་གྱི་ཡུལ་དུ་
324a
༄#། །གྱུར་པ་ནི། མ་གཏོགས་སོ། །དེ་ལ་དེ་བཞིན་གཤེགས་པའི་སྤྱན་ནི། དམིགས་པ་མེད་པ། གནས་པ་མེད་པའོ། །དེ་སྐད་ཅེས་སྨྲས་པ་དང ། གསང་བ་པའི་བདག་པོ་ལག་ན་རྡོ་རྗེས་ཚེ་དང་ལྡན་པ་ཤ་རདྭཱ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤ་རདྭཱ་ཏིའི་བུ། དེ་བཞིན་གཤེགས་པ་ཞེས་བྱ་དེ་ནི། དེ་བཞིན་ཉིད་ཀྱི་མཚན་ཉིད་དོ། །སྟོང་པ་ཉིད་གང་ཡིན་པ་དེ་ལ་དེ་བཞིན་གཤེགས་པ་མེད་དོ། །དེ་བཞིན་གཤེགས་པའི་མཚན་ཉིད་མེད་དོ། །ཤ་རདྭཱ་ཏིའི་བུས་སྨྲས་པ། རིགས་ཀྱི་བུ།་གལ་ཏེ་དེ་བཞིན་གཤེགས་པ་མཚན་ཉིད་མེད་པ་ཡིན་ན། དེ་ལ་ཇི་ལྟར་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དེ་བཞིན་གཤེགས་པ་ཞེས་བསྟན་ཅིང་དཔེ་བྱད་བཟང་པོ་བརྒྱད་ཅུས་སྐུ་ལེགས་པར་བརྒྱན། ཇི་ལྟར་དེ་བཞིན་གཤེགས་པའི་སྐུ་གསུམ་རྣམ་པར་གཞག་པར་ལྟ། ཇི་ལྟར་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས། གསང་བ་པའི་བདག་པོ་ལག་ན་རྡོ་རྗེས་སྨྲས་པ། བཙུན་པ་ཤ་ར་དྭཱ་ཏིའི་བུ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཞེས་བྱ་བ་དེ་ནི། ཀུན་རྫོབ་ཀྱི་བརྡའི་ཚིག་གོ་།བརྒྱན་ཅེས་བྱ་བ་ནི། སྤྲོས་པའི་ཡི་གེ་དང ། སྒྲའོ། །དཔེ་བྱད་བཟང་པོ་ཞེས་བྱ་བ་དེ་ནི། སྒྱུ་
324b
མ་དང ། རྨི་ལམ་གྱི་ངོ་བོ་ཉིད་མཚན་ཉིད་དོ། །ཡང་དག་པར་རྫོགས་པའི་བྱང་ཆུབ་ཅེས་བྱ་བ་དེ་ནི། ནམ་མཁའི་ངོ་བོ་ཉིད་ཀྱི་མཚན་ཉིད་དོ། །སྐུ་གསུམ་རྣམ་པར་གཞག་པ་ཞེས་བྱ་བ་ནི། ཚོགས་གཉིས་ཀྱིས་སྤྲུལ་པའི་མཚན་ཉིད་དོ། །བཙུན་པ་ཤཱ་རདྭཱ་ཏིའི་བུ། ཡང་འདི་ནི། དེ་བཞིན་གཤེགས་པའི་སྐུའི་གསང་བའི་ཡུལ་ཏེ། དེ་ལ་སྐུ་གསང་བ་ཞེས་བྱ་བ་དེ་ནི། བསོད་ནམས་ཆེན་པོའི་རྒྱུ་མཐུན་པའི་མཚན་ཉིད་དོ། །བསོད་ནམས་ཀྱི་རྒྱུ་མཐུན་པ་གང་ཡིན་པ་དེ་དེ་བཞིན་གཤེགས་པའི་རྫོགས་པར་ལོངས་སྤྱོད་པའི་སྐུ་སྟེ། འདི་ཡང་དེ་བཞིན་གཤེགས་པའི་སྐུའི་འཕྲིན་ལས་དང ། སྐུའི་གསང་བ་པའོ། །བཙུན་པ་ཤཱ་རདྭཱ་ཏིའི་བུ། གསུང་ཞེས་བྱ་བ་དེ་ནི། ཀུན་རྫོབ་དང ། དོན་དམ་པ་གཉིས་ཀྱི་མཚན་ཉིད་དོ། །ཀུན་རྫོབ་དང ། དོན་དམ་པ་གཉིས་ཀྱི་མཚན་ཉིད་གང་ཡིན་པ་དེ་དེ་བཞིན་གཤེགས་པའི་སྤྲུལ་པའི་སྐུའོ། །རྟེན་ཅིང་འབྲེལ་པར་འབྱུང་བ་ཆད་པ་མེད་པ་དང ། རྟག་པ་མེད་པར་འཇུག་པ་ཐུགས་སུ་ཆུད་པ། ཡིད་ཀྱི་རྣམ་པར་ཤེས་པའི་ལམ་གྱིས་འཇུག་པ། བསམ་གཏན་གོམས་པར་བྱས་པས་ཤེས་བར་བྱ་བ་སྟེ། དམིགས་པ་མེད་པ་ཀུན་ནས་ཉོན་མོངས་པ་དང ། རྣམ་པར་བྱང་བས་སྟོང་པ། ལུས་ཀྱི་ཡུལ་མ་ཡིན་པ། ངག་གི་སྤྱོད་ཡུལ་མ་ཡིན། ཡིད་ཀྱི་རང་གི་ངོ་
325a
༄#། །བོའི་ཡུལ་མ་ཡིན་པ་གང་ཡིན་པ་དེ་ནི། དེ་བཞིན་གཤེགས་པའི་ཆོས་ཀྱི་སྐུ་ནམ་མཁའི་ཁམས་སུ་ཡང་དག་པར་འདུ་བའོ། །དེ་བཞིན་གཤེགས་པའི་སྐུ་གསུམ་རྣམ་པར་གཞག་པ་དེ་ལྟར་བལྟ་བར་བྱའོ། །བཙུན་པ་ཤཱ་རདྭཱ་ཏིའི་བུ། གཞན་ཡང་དེ་བཞིན་གཤེགས་པའི་སྐུའི་གསང་བ་གང་ཡིན་པ་དེ་ནི། ཆོས་ཀྱི་སྐུའོ།། ཆོས་ཀྱི་སྐུ་གང་ཡིན་པ་དེ་ནི། ཆོས་རྣམས་ཀྱི་དབུ་མའི་ལམ་དུ་བལྟའོ། །དབུ་མའི་ལམ་གང་ཡིན་པ་དེ་ནི། མི་སྐྱེ་མི་འཆི་བ་སྟེ། དེ་བཞིན་གཤེགས་པ་རྣམས་བྱུང་ཡང་རུང ། མ་བྱུང་ཡང་རུང ། ཆོས་ཀྱི་སྐུ་འདི་ནི། གནས་པ་ཉིད་དོ། །བཙུན་པ་ཤཱ་རདྭ་ཏིའི་བུ། བསོད་ནམས་ཀྱི་རྒྱུ་མཐུན་པ་ཞེས་བྱ་བ་དེ་ནི། ཕ་རོལ་ཏུ་ཕྱིན་པ་དག་གི་རྣམ་གྲངས་སུ་གཏོགས་པའོ། །དེ་ལ་ཕ་རོལ་ཏུ་ཕྱིན་པ་ཞེས་བྱ་བ་དེ་ཡང་བསོད་ནམས་ཀྱི་རྒྱུ་མཐུན་པ་ཉིད་དུ་བལྟའོ། །དེ་ཅིའི་ཕྱིར་ཞེ་ན། བཙུན་པ་ཤཱ་རདྭ་ཏིའི་བུ། སྦྱིན་པའི་ཕ་རོལ་ཏུ་ཕྱིན་པ་ཞེས་བྱ་བ་དེ་ནི། ཕྱི་ནང་གི་དངོས་པོ་རྣམ་པ་གཉིས་ཡོངས་སུ་གཏང་བར་བྱ་བའོ། །དེ་ལ་ཕྱི་ཞེས་བྱ་བ་དེ་ནི། ཀུན་རྫོབ་ཀྱི་ཚིག་གོ། ནང་ཞེས་བྱ་བ་དེ་ནི། དོན་དམ་པའི་ཚིག་གོ་།དེ་ལ་ཕྱི་ཞེས་བྱ་བ་དེ་ནི། གང་ཟས་འདོད་པ་རྣམས་ལ་ཟས་དང ། སྐོམ་འདོད་པ་རྣམས་དང ། དེ་བཞིན་བྲན་ཕོ་དང །
325b
བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། གླང་པོ་ཆེ་དང ། རྟ་དང ། ཤིང་རྟ་དང ། ས་དང ། མགོ་དང ། ལག་པ་དང ། རྐང་པ་དང ། མིག་དང ། ཤ་དང ། ཁྲག་དང ། རྐང་དང ། ཚིལ་དང ། རུས་པའི་བར་དུ་སྦྱིན་པ་སྟེ། དེ་ཡང་ཐབས་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་པས་ཡོངས་སུ་བསྔོས་པ་རྣམ་པར་སྨིན་པ་ལ་མི་རེ་བ་དང ། གྱ་ནོམ་པ་དང ། རྒྱན་པ་དང ། རང་གི་བསྟི་སྟང་དུ་བྱས་ཏེ་རྣམ་པ་ཐམས་ཅད་སེམས་ཅན་ཐམས་ཅད་ལ་སྦྱིན་པ་འདི་ནི། ཕྱིའི་འོ། །ནང་གི་ཆོས་སྦྱིན་པའོ། །དེ་ཡང་རྣམ་པ་གཉིས་ཏེ། རྟེན་ཅིར་འབྲེལ་བར་འབྱུང་བ་ལ་འཇུག་པར་ཡང་དག་པར་གཞོལ་བ་དང ། སྦྱིན་པའི་གཏམ་དང ། ཚུལ་ཁྲིམས་ཀྱི་གཏམ་དང ། བཟོད་པའི་གཏམ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་དང ། སྟོབས་དང ། སྨོན་ལམ་དང ། ཡེ་ཤེས་ཀྱི་གཏམ་དང ། སྙིང་རྗེས་ཡོངས་སུ་ཟིན་པ་ཐབས་ཀྱི་ཕ་རོལ་ཏུ་ཕྱིན་པར་ཡང་དག་པར་འདུ་བའོ། །གཞན་ཡང་ནང་གི་སྦྱིན་པ་ནི། གང་འདི་མཐར་འཛིན་པ་དང ། སྐྱེ་བ་དང ། འགག་པར་ཡོངས་སུ་རྟོགས་པ་དང ། རྣམ་པར་རྟོག་པ་དང ། ཤེས་པ་དང ། ཤེས་བྱ་རྣམ་པར་སྤོང་བར་དགའ་བས་ཡོངས་སུ་ཟིན་པའི་སྟོབས་ཀྱི་ཕ་རོལ་ཏུ་ཕྱིན་པར་ཡང་དག་པར་འདུ་བ་སྟེ། འདི་ནི། ཆོས་ཀྱི་སྦྱིན་པའོ། །གང་འདི་ཉིད་ལ་
326a
༄#། །ལུས་དང ། ངག་དང ། ཡིད་རྒོད་པ་མེད་པ་དང ། ཁེངས་པ་མེད་པ་དང ། ལུས་རྣམ་པར་གཡེང་བ་མེད་པ་དང ། ངག་རྣམ་པར་གཡེང་བ་མེད་པ་དང ། ཡིད་རྣམ་པར་གཡེང་བ་མེད་པར་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་པ། གཅིག་ཏུ་ཉོན་མོངས་པ་མེད་པར་གནས། བཏང་སྙོམས་ཀྱིས་ཡོངས་སུ་ཟིན་པ།་ཐབས་ཀྱི་ཕ་རོལ་ཏུ་ཕྱིན་པར་ཡང་དག་པར་འདུ་བ་འདི་ནི། ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གང་འདི་ཉིད་ལ་རང་གི་ལུས་དང་སྲོག་ལ་མི་ལྟ་བར་བསོད་ནམས་དང ། བསོད་ནམས་མ་ཡིན་པ་དང ། ཆོས་དང ། ཆོས་མ་ཡིན་པ་དང ། བདེན་པ་དང ། བདེན་པ་མ་ཡིན་པ་དང ། གཡོ་བ་དང ། མི་གཡོ་བའི་དངོས་པོ་རྣམ་པར་སྤོང་ཞིང་བྱམས་པས་ཡོངས་སུ་ཟིན་པ་ཤེས་རབ་ཀྱི་ཕ་རོལ་ཏུ་ཕྱིན་པར་ཡང་དག་པར་འདུ་བ་འདི་ནི། འདིར་བཟོད་པའི་ཕ་རོལ་ཏུ་ཕྱིན་པའོ། །གང་སྦྱིན་པ་དང ། ཚུལ་ཁྲིམས་དང ། བཟོད་པ་དང ། ཏིང་ངེ་འཛིན་ཐོབ་པར་བྱ་བའི་ཕྱིར་སེམས་སྤྲོ་ཞིང་རྩོམ་པ་དང ། ཡོངས་སུ་མི་སྐྱོ་བར་རྟག་ཏུ་གནས་པ་མེད་པ་དང ། དེ་དམིགས་པ་མེད་པ་དང ། བྱམས་པས་ཡོངས་སུ་ཟིན་པ་ཡེ་ཤེས་ཀྱི་ཕ་རོལ་ཏུ་ཕྱིན་པར་ཡང་དག་པར་འདུ་བ་འདི་ནི། འདིར་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །བཙུན་པ་
326b
ཤཱ་རའྡྭ་ཏིའི་བུ། འདི་ནི། བསོད་ནམས་ཀྱི་ཚོགས་ཏེ། དེ་བཞིན་གཤེགས་པའི་རྫོགས་པར་ལོངས་སྤྱོད་པའི་སྐུའི་གསང་བ་གྲུབ་པར་བྱེད་པའོ། །བཙུན་པ་ཤཱ་རྡྭ་ཏིའི་བུ། གཞན་ཡང་ཡེ་ཤེས་ཀྱི་ཚོགས་ནི། གང་ཕ་རོལ་ཏུ་ཕྱིན་པ་བཞི་པོ་འདི་དག་ཉིད་རྫོགས་པ་སྟེ། ཕ་རོལ་ཏུ་ཕྱིན་པ་རྣམས་འབྱེད་པ་དང ། འགྲེལ་བ་དང ། གསལ་བར་བྱེད་པ་དང ། དེ་ལ་གཞོལ་ཞིང་མི་རྟག་པ་དང ། བདག་མེད་པ་དང ། སྟོང་པ་དང ། གསོབ་དང ། གསོག་དང ། དངོས་པོ་མེད་པ་དང ། དངོས་པོ་ཐམས་ཅད་དངོས་མེད་པར་ཡང་དག་པར་སྟོན་ཏོ། །མདོར་བསྡུ་བ་ན་འདོད་ཆགས་དང ། ཞེ་སྡང་དང ། གཏི་མུག་དང ། ཉོན་མོངས་པ་དང ། ཉེ་བའི་ཉོན་མོངས་པ་སེལ་ཅིང་ཆོས་ཀྱི་དབྱིངས་ནམ་མཁའ་མཐའ་ཡས་སྐྱེ་མཆེད་དང་མཉམ་པར་ཡང་དག་པར་སྟོན་ཏོ། །དམིགས་པ་དང་བྲལ་བ་འདི་ནི། འདིར་བསམ་གཏན་གྱི་ཕ་རོལ་ཏུ་ཕྱིན་པའོ། །དེ་བཞིན་ཉིད་དང ། སྟོང་པ་ཉིད་དང ། མཐའ་ལས་འདས་པ་སྟོང་པ་ཉིད་དང ། ཕྱི་མའི་མཐའ་སྟོང་པ་ཉིད་དང ། ཆོས་ཀྱི་དབྱིངས་ཀྱི་རང་གི་ངོ་བོ་ཉིད་གང་ཡིན་པ་འདི་ནི། འདིར་ཤེས་རབ་ཀྱི་ཕ་རོལ་ཏུ་ཕྱིན་པའོ། །བཙུན་པ་ཤ་རྡྭཱ་ཏིའི་བུ། འདི་ནི། ཡེ་ཤེས་ཀྱི་ཚོགས་སོ། །བསོད་ནམས་ཀྱི་ཚོགས་དང ། ཡེ་ཤེས་ཀྱི་ཚོགས་དང ། ཚོགས་འདི་གཉིས་ནི། བྱང་ཆུབ་ཀྱི་ཕྱོགས་
327a
༄#། །ཀྱི་ཆོས་དང ། ཤེས་པ་དང ། ཤེས་བྱ་མཐའ་དག་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་རྟོགས་པར་བྱེད་པ་སྟེ། བཙུན་པ་ཤཱ་རྡྭ་ཏིའི་བུ། འདི་ནི། དེ་བཞིན་གཤེགས་པའི་སྐུའི་གསང་བ་དག་གིས་མདོར་བསྡུས་ཏེ་བསྟན་པའོ། །རྒྱ་ཆེར་རྣམ་པར་དབྱེ་བ་ནི། གསལ་ཏེ་དེ་བཞིན་གཤེགས་པ་ཉིད་ཀྱིས་སྐུ་ཚེའི་ཚད་བསྐལ་པར་བཞུགས་ཏེ་བསྟན་ཅིང་བཤད་ཀྱང་མཐར་ཕྱིན་པར་མི་འགྱུར་རོ། །སྐུའི་གསང་བ་ཇི་ལྟ་བ་བཞིན་དུ་གསུང་གི་གསང་བ་ཡང་དེ་བཞིན་ནོ། །ཐུགས་ཀྱི་གསང་བ་ནི། དེ་བཞིན་གཤེགས་པས་རྣམ་པ་དང ། སོ་སོའི་རྣམ་པ་དང ། ཁ་དོག་དང ། རྟགས་དང ། དབྱིབས་དང ། ངག་གི་རྣམ་པར་རྟོག་པའི་སྤྱོད་ཡུལ་དང ། བྱ་བ་ཐ་དད་པའི་སྦྱོར་བ་རྣམས་ཀྱིས་ཀྱང་བསྟན་པར་མི་སྤྱོད་མོད་ཀྱི། འོན་ཀྱང་དེ་བཞིན་གཤེགས་པའི་སོ་སོ་རང་གིས་རིག་པའི་ཐུགས་ཀྱི་གསང་བ་ཡིན་པར་ཤེས་པར་བྱའོ། །བཙུན་པ་ཤཱ་རྡྭ་ཏིའི་བུ། དེ་ནི། དེའི་ཕྱིར་རྣམ་གྲངས་འདིས་དེ་ལྟར་རིག་པར་བྱ་སྟེ། བདག་ཅག་ལྟ་བུ་བྱང་ཆུབ་མངོན་པར་རྫོགས་པར་སངས་རྒྱས་པ་རྣམས་ཀྱིས་བསྟན་པ་ལྟ་སྨོས་ཀྱང་ཅི་དགོས། འོན་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་སེམས་ཅན་གྱི་ཁམས་མཐའ་ཡས་མུ་མེད་
327b
པའི་བསམ་པ་དང ། ལྷག་པའི་བསམ་པ་དང ། མོས་པ་དང ། བློ་གྲོས་དང ། བློ་དང ། རྟོགས་པ་དང ། མངོན་པར་འདོད་པ་མཐའ་ཡས་མུ་མེད་པ་དང ། སེམས་ཀྱི་རྒྱུན་རྣམ་པ་ཐ་དད་པ་སྣ་ཚོགས་ཀྱི་རྗེས་སུ་འགྲོ་བའི་སྤྱོད་ཡུལ་དང ། སྐྱེ་གནས་སྣ་ཚོགས་དང ། ལྷན་ཅིག་སྐྱེས་པའི་ལས་སྣ་ཚོགས་དང ། མི་ཤེས་པ་དང ། མ་རིག་པའི་མུན་པ་དང ། མི་སྣང་བ་དང ། མུན་ནག་དང ། འགྲོ་བ་ལྔ་དང ། འགྲོ་བ་དྲུག་དང ། ཁམས་གསུམ་པ་ཐོག་མ་དང ། དབུས་དང ། འཇིག་པར་གནས་པ། སྔོན་གྱི་མཐའ་དང ། ཕྱི་མའི་མཐའ་ཡོངས་སུ་མ་ཆད་པར་གནས་པར་དུས་གསུམ་དང ། ཕྱོགས་ལ་མགོ་རྨོངས་པ། སྐྱེ་བ་དང ། རྒ་བ་ལ་སོགས་པ་ན་བ་དང ། ནད་དང ། མྱ་ངན་པ་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་ལ་སོགས་པས་ཉིན་གཅིག་བཞིན་དུ་བཅོམ་པའི་སེམས་ཅན་རྣམས་ཀྱི་སེམས་ཅན་གྱི་ཁམས་མ་རྒལ་བ་བསྒྲལ་བ་དང ། མ་གྲོལ་བ་དགྲོལ་བ་དང ། དབུགས་མ་ཕྱིན་པ་དབུགས་དབྱུང་བ་དང ། ཡོངས་སུ་མྱ་ངན་ལས་འདས་པ་ཡོངས་སུ་མྱ་ངན་ལས་བཟླ་བ་དང ། ཆོས་ཀྱི་རྣམ་གྲངས་འདི་ལ་གཟུད་པ་དང ། གནས་པ་ཐམས་ཅད་གྱུར་བའི་ལམ་ལ་དགོད་པ་དང ། མྱ་ངན་ལས་འདས་པ་ཤིན་ཏུ་དེ་བ། དོན་དམ་པ། ཞི་བ། འཁྲུགས་པ་མེད་པ། དགེ་བ། ནད་མེད་པ་
328a
༄#། །དང ། སངས་རྒྱས་བཅོམ་ལྡན་འདས་རྣམས་ཀྱི་སོ་སོ་རང་གི་རིག་པའི་ཡེ་ཤེས་ཀྱི་དབྱིངས་མཉམ་པ་ཉིད་ཀྱིས་མི་མཉམ་པ་དང་མཉམ་པ། རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ལ་སྦྱོར་བ་དང ། ཡང་དག་པར་འཛིན་དུ་འཇུག་པ་དང ། ཡང་དག་པར་གཟེངས་བསྟོད་པ་དང ། ཡང་དག་པར་རབ་ཏུ་དགའ་བར་བྱ་བ་དང ། དགའ་བ་དང ། དང་བ་དང ། མགུ་བའི་ས་ལ་ཡང་དག་པར་གཟུད་པ་དང ། ཆོས་རྟོགས་པའི་ཁྱད་པར་བརྗོད་པ་དང ། རྒྱ་མཚོ་ཆེན་པོ་ལྟར་འདུལ་བའི་སེམས་ཅན་ཡོངས་སུ་སྨིན་པར་བྱ་བའི་དུས་དང ། ཚོད་ལས་མི་འདའ་བར་བྱ་བ་དང ། དེ་དག་ལ་རྒྱུ་དེའི་དབང་དུ་བྱས་ཏེ་སྐྱེ་བོའི་ཚོགས་ཆེན་པོའི་དོན་དང་ཕན་པ་དང ། བདེ་བ་དང ། ལྷ་དང ། མི་རྣམས་ཀྱི་དོན་དང ། ཐེག་པ་ཆེན་པོ་བླ་ན་མེད་པའི་ཆོས་ཀྱི་ཚུལ་གཅིག་ནས་གཅིག་ཏུ་བརྒྱུད་དེ་གནས་པར་བྱ་བ་དང ། གཅིག་ནས་གཅིག་ཏུ་ལུང་བྱིན་པས་ཐོས་པ་དང ། བསམ་པ་དང ། བསྒོམས་པ་ལས་བྱུང་བའི་ཤེས་རབ་དང ། ཡེ་ཤེས་གོམས་པ་རྣལ་འབྱོར་དུ་གྱུར་པའི་རྒྱུད་ཀྱི་རྒྱུན་མི་བཅད་པ་དང ། སྐལ་པ་ཡོད་ལ་ཡོངས་སུ་མ་སྨིན་པ་ཡོངས་སུ་སྨིན་པར་བྱ་བའི་འོས་སུ་གྱུར་པའི་དོན་གྱི་ཕྱིར་ཕྱོགས་ཙམ་གྱི་སྒོ་གཅིག་མདུན་དུ་བྱས་ཏེ་
328b
འཇུག་པར་བྱེད་པ་ཅུང་ཟད་ཅིག་བཤད་པར་བྱའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་ཤཱ་རྡྭ་ཏིའི་བུ། མཆོག་ཏུ་ངོ་མཚར་དུ་གྱུར་ཅིང་རྨད་དུ་བྱུང་བར་གྱུར་ཏེ་དགའ་བ་ཐོབ་ནས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲོས་སོ། །རིགས་ཀྱི་བུ། ལེགས་སོ་ལེགས་སོ། གང་གི་ཕྱིར་ཁོ་བོ་ཅག་ལྟ་བུའི་ཉི་ཚེ་བའི་ཤེས་པ་དང་ལྡན་པ་གཞན་གྱིས་སྒྲ་བསྒྲགས་པའི་རྗེས་སུ་འགྲོ་བའི་ཉན་ཐོས་རྣམས་ལ་ཆོས་ཟབ་མོའི་ཚིག་གི་དོན་འདི་ལྟ་བུ་གསལ་བར་བྱས་པ་ནི། རིགས་ཀྱི་བུ། ཁྱོད་ཡང་ལེགས་སོ། །ལག་ན་རྡོ་རྗེས་སྨྲས་པ། བཙུན་པ་ཤཱ་རྡྭ་ཏིའི་བུ། དེ་དེ་བཞིན་ཏེ། ཇི་སྐད་སྨྲས་པ་དེ་བཞིན་ནོ། །བཙུན་པ་ཤཱ་རྡྭ་ཏིའི་བུ། ཏིང་ངེ་འཛིན་འདིའི་མིང་ཅི་ཞེས་དེ་སྐད་ཟེར་བ་ནི། ཏིང་ངེ་འཛིན་འདི་མིང་རྡོ་རྗེའི་རྣམ་པར་ཐར་པའི་སྒོ་ཆེན་པོ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཕྱག་གཡས་པ་གསེར་གྱི་ཁ་དོག་བརྐྱང་སྟེ་ཕྱག་གཡས་པ་འཇམ་ཞིང་མཉེན་ལ་ཤིན་ཏུ་གཞོན་ཤ་ཆགས་པ་གསང་བ་པའི་བདག་པོ་ལག་ན་རྡོ་རྗེའི་མགོ་ལ་བཞག་སྟེ་ཆེད་དུ་བཀའ་སྩལ་པ་འདི་དག་ཀྱང་ཆེད་དུ་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ། ཁྱོད་ཀྱིས་གང་མདོ་སྡེ་ཟབ་མོ་འདི་ལྟ་བུ་འདི་གསང་བ་པའི་ཚིག་གི་དོན་བཞིན་དུ་སེམས་ཅན་ཐམས་ཅད་ལ་ལུང་བསྟན་ཅིང་བཤད་དེ་དཀྲོལ་
329a
༄#། །ཞིང་རྣམ་པར་ཕྱེ་བ་ལེགས་སོ་ལེགས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ལག་ན་རྡོ་རྗེ་ལ་ཇི་ལྟར་ལེགས་སོ་ཞེས་བྱ་བ་བྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་སུ་གཏོགས་པའི་དེ་བཞིན་གཤེགས་པ་ཐམས་ཅད་ཀྱིས་ཀྱང་གསང་བ་པའི་བདག་པོ་ལག་ན་རྡོ་རྗེའི་མགོ་ལ་ཕྱག་བཞག་སྟེ་ཆེད་དུ་བཀའ་སྩལ་པ་འདི་དག་ཀྱང་ཆེད་དུ་བཀའ་སྩལ་ཅིང་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ། ཆོས་ཀྱི་རྣམ་གྲངས་འཇིག་རྟེན་གྱི་ཁམས་མང་པོ་དག་ན་མིང་འཛིན་པ་ཡང་དཀོན་ན། རབ་ཏུ་གསལ་བར་བྱེད་པ་ལྟ་ཅི་སྨོས། གསང་བ་པའི་བདག་པོ་ལག་ན་རྡོ་རྗེས་ཆོས་ཀྱི་རྣམ་གྲངས་འདི་བཤད་པ་ན་ལྷའི་བུ་གངྒཱའི་ཀླུང་ཚད་མེད་གྲངས་མེད་དཔག་ཏུ་མེད་པའི་བྱེ་མའི་རྡུལ་ཕྲ་རབ་ཀྱི་རྡུལ་ལས་ཤིན་ཏུ་འདས་པ་སྙེད་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་རབ་ཏུ་མང་པོ་དག་ནི་།མི་སྐྱེ་
329b
བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་བས་ཀྱང་ཆེས་མང་བའི་སེམས་ཅན་རྣམས་ནི། ཕྱིར་མི་ལྡོག་པ་ཉིད་དུ་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དང ། དེ་མ་ཡིན་པ་སངས་རྒྱས་ཀྱི་ཞིང་གཞན་དཔག་ཏུ་མེད་ཅིང་གྲངས་མེད་ལ་བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་རྣམ་པ་དྲུག་ཏུ་གཡོས་སོ། །གསང་བ་པའི་བདག་པོ་ལག་ན་རྡོ་རྗེ་ལ་ཡང་ཆོས་ཀྱི་དགབ་པ་དང ། མཆོད་པའི་ཕྱིར་ནམ་མཁའི་དཀྱིལ་ན་རྔ་རྣམས་མ་བརྡུངས་པར་ཀུན་ནས་སྒྲ་བྱུང་ངོ ། །བྱང་ཆུབ་སེམས་དཔའི་རྫུ་འཕྲུལ་གྱི་གཞལ་མེད་ཁང་གི་ཁང་པ་བརྩེགས་པ་རྣམས་སུ་ཀུན་ནས་སིལ་སྙན་དང ། ཕེག་རྡོབ་པ་དང ། གླུ་དབྱངས་བླངས་པས་ལྷའི་བུ་མོ་རྣམས་གར་བྱེད་དོ། །སྤོས་དང ། བྱུག་པ་དང ། བདུག་པ་དང ། ཕྱེ་མ་དང ། གོས་དང ། གདུགས་དང ། རྒྱལ་མཚན་དང ། བ་དན་དང ། དཔག་བསམ་གྱི་ཤིང་ལྗོན་པ་དང ། རིན་པོ་ཆེ་དང ། མུ་ཏིག་གི་རྒྱན་ཕྲེང་དང ། མེ་ཏོག་པདྨ་དང ། ཀུ་མུ་ད་དང ། ུཏྤ་ལ་དང ། དྲི་མཆོག་དང ། སྣ་མའི་མེ་ཏོག་དང ། པ་རི་ཤ་ཀ་དང ། པ་རི་ཤ་ཀ་ཆེན་པོ་དང ། བཏང་བཟུང་དང ། བཏང་བཟུང་ཆེན་པོ་དང ། མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་
330a
༄#། །པོ་དང ། ཀུན་ནས་སྐྱེས་དང ། ཀུན་ནས་སྐྱེས་ཆེན་པོའི་མེ་ཏོག་གི་ཆར་གྱི་སྤྲིན་ཀུན་ནས་མངོན་པར་བབ་བོ། །སྤོས་ཆུའི་ཆར་གྱི་སྤྲིན་ཡང་མངོན་པར་བབ་བོ། །དེ་ནས་ཚངས་པ་དང ། ཁྱབ་འཇུག་དང ། དབང་ཕྱུག་ཆེན་པོ་དང ། བརྒྱ་བྱིན་དང ། འཇིག་རྟེན་སྐྱོང་བ་དང ། གནོད་སྦྱིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མ་མོའི་གདོན་གྱི་ཚོགས་དང ། འབྱུང་པོ་དང ། བརྗེད་བྱེད་དང ། སྐེམ་བྱེད་དང ། སྒྲུབ་པ་དང ། སྦྲུལ་འཛིན་བཅས་དང ། གནོན་པོ་དང ། མ་མོ་དང ། ཡི་དྭགས་དང ། ཤ་ཟ་དང ། བྲམ་ཟེའི་སྲིན་པོ་དང ། མཁའ་འགྲོ་མ་དང ། ཕྱོགས་དང ། ཕྱོགས་མཚམས་དང ། མཁར་དང ། རི་དང ། སའི་ལྷ་ལ་སོགས་པ་སྡང་བ་གདོན་བགེགས་དང ། ལོག་འདྲེན་ཐམས་ཅད་དང ། དེ་མ་ཡིན་པ་གཞན་ཡང་ལྷ་དང ། མི་དང ། མི་མ་ཡིན་པ་དག་བླ་གོས་རྣམས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གིས་བདག་ཅག་གཟིར་ཅིང་ཉེ་བར་གཟིར་བས་རིག་སྔགས་འཆང་ཐམས་ཅད་ལ་དངོས་གྲུབ་སྩོལ་བ་དང ། དམ་ཚིག་ཐམས་ཅད་
330b
འཛིན་དུ་འཇུག་པ་ལ་ཡང་དག་པར་གནང་བར་བགྱིད་པར་འགྱུར་བ་རང་གི་སྙིང་པོ་འདི་བདག་ཅག་ལ་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་ཚངས་པ་ལ་སོགས་པ་ལྷའི་ཚོགས་དེ་དག་ལ་ལེགས་སོ་ཞེས་བྱ་བ་བྱིན་ཏེ། གྲོགས་པོ་དག་།གང་གི་ཕྱིར་ཁྱེད་ཅག་འདི་ལྟར་སེམས་ཅན་ཐམས་ཅད་ལ་ཕན་པའི་ཕྱིར་ཞུགས་པ་ནི། ལེགས་སོ་ལེགས་སོ། །དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། ངས་ཁྱེད་རང་རང་གི་སྙིང་པོ་བསྟན་པར་བྱའོ། །དེ་དག་གིས་ཀྱང་བཅོམ་ལྡན་འདས་ལ་ལེགས་སོ་ལེགས་སོ། །ཞེས་གསོལ་ཏོ། །བཅོམ་ལྡན་འདས་ཀྱིས་ལྷའི་རྔ་བོ་ཆེ་དང ། རྒྱ་མཚོ་དང ། སྤྲིན་ཆེན་པོའི་སྒྲ་ལྟ་བུའི་གསུང་ཚངས་པ་ཆེན་པོའི་སྒྲ་བས་ལྷག་པ་སྣ་ཚོགས་པ་སྙན་ཅིང་རྒྱ་ཆེ་ལ་ཟབ་པ། ཐོག་མ་དང ། བར་དང ། ཐ་མར་དགེ་བ། སེམས་ཅན་ཐམས་ཅད་ཀྱི་སྙིང་དུ་འཐད་པ། གསལ་བ། འཇེབས་པ། དག་པ། མཉེན་པ། སྙན་པ། བརྗོད་པའི་ཚིག་ཁམས་གསུམ་པ་ཐམས་ཅད་ལ་གོ་བར་བྱེད་པ། དེ་བཞིན་གཤེགས་པའི་སེངྒེའི་སྒྲ་བླ་ན་མེད་པ་དེས་གྲུབ་པའི་གསང་སྔགས་ཀྱི་གཞི་འདི་དག་གསུངས་སོ། ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཛ་ཡ་ཛ་ཡ། ཛ་ཡཱ་བ་ཧཱ། ཙི་ལི་ཙི་ལི། མི་ལི་མི་ལི།
331a
༄#། །ལུ་ཊུ་ལུ་ཊུ། ཛ་ཡེ་བི་ཛ་ཡེ། ཛ་ཡནྟི། བི་ཛ་ཡནྟི། ཨ་ཛི་ཏེ། ཨ་པ་རཱ་ཛི་ཏེ། ཏདྱ་ཏེ། སརྦ་དུཥྚ་སྟམྦྷ་ནི། ཛམྦྷ་ནི། མོ་ཧ་ནི། ཤཝེ་ཏེ་ཀ་རཱ་ལེ། ཀེ་ཡཱུ་རེ། སརྦ་བུདྡྷ་ཨ་དྷི་ཥྛི་ཏེ། པཱཎྜ་རཱ་བ་སི་ནི། པརྞ་ཤ་བ་རི། ཤྲི་ཡེ་མ་ཧཱ་ཤྲི་ཡེ་སརྦ་ཨད་བྷུ་ཏ་ཡ་ཤྲི་ཡེ། པདྨ་བ་ཧེ། པདྨ་མཱ་ལི་ནི་བཛྲ་ཨངྐུ་ཤི། བཛྲ་མཱ་ཏེ། བཛྲ་པཱ་ཏཱ་ལི། ཤཱུ་ལི་ནི་བཛྲ་དྷ་རེ།་ཧི་ཧི་ཧི་ཧི། བཛྲ་པཱ་ཎི། ཧེ་ཧེ་ཧེ་ཧེ། བཛྲ་པཱ་ཎི། བཛྲ་ཤུ་ལི་ནི། ཙཀྲ་དྷ་རེ་།ཧི་ཧི་།བཛྲ་པཱ་ཎི། ཧེ་ཧེ་བཛྲ་པཱ་ཎི། ཧི་ཧི་ཧི་ཧི། ཧེ་ཧེ་ཧེ་ཧེ། བཛྲ་པཱ་ཎི། ཀ་ལ་ཀ་ལ། བ་ལ་བ་ལ།་ར་ལ་ར་ལ། དྷ་མ་དྷ་མ། ས་ར་ས་ར། ཧཱ་ཧཱ་ཧཱ་ཧཱ་ཧཱ། ཙི་ལི་མི་ལི། ཚི་ལེ་དི་ལེ། དི་དི་ལ། དི་མི་ལེ། ཛྭ་ལེ། མ་ཧཱ་ཛྭ་ལེ། ཛྭ་ལི་ཏི། པྲ་ཛྭ་ལི་ཏི། ཋ་ར་ཐ་ག་གེ་ཐ་རེ། མུ་ཀུ་ཏི།་ཀྵ་མེ། ཀྵ་མ་མེ། གྲུབ་པའི་ཚོགས་ཀྱིས་ཕྱག་བྱས་མ། ལྷ་ཐམས་ཅད་ཀྱི་སྙིང་ཀུན་ཏུ་འཇུག་པར་བྱེད་མ། སེམས་ཅན་ཐམས་ཅད་ཀྱི་སྙིང་འབིགས་མ། སྡང་བ་རབ་ཏུ་སྡང་བ་ཐམས་ཅད་ཀྱི་སྙིང་འཇོམས་མ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྗེས་སུ་སྐྱོང་མ། བྱང་ཆུབ་སེམས་དཔའ་ཐམས་ཅད་ཀྱི་སྙིང་པོ་ལ་འཇུག་མཚུར་ཤོག་།དམ་ཚིག་རྗེས་སུ་སྐྱོངས་ཤིག། སེམས་ཅན་ཐམས་ཅད་ཀྱི་སྙིང་རྣམས་ཁུག་ལ་དམ་ཚིག་ལ་ཁོད་ཅིག། ཐམས་ཅད་མཁྱེན་པ་ལ་ཕྱག་འཚལ་
331b
ལོ་སཝཱཧཱ།་འཇིག་རྟེན་མཁྱེན་པ་ཐམས་ཅད་ལ་ཕྱག་འཚལ་ལོ་སཝཱཧཱ། ཏྲ་ཊ་ཏྲ་ཊ། སྥོ་ཊ་ཡ་སཝཱཧཱ། གྱེན་དུ་ལྟ་ལ་སཝཱཧཱ། རྣམ་པར་ལྟ་ལ་སཝཱཧཱ། ཆུ་སྲིན་ལ་སཝཱཧཱ། མེ་ལ་སཝཱཧཱ། ཚངས་པ་ལ་སཝཱཧཱ།་ཁྱབ་འཇུག་ལ་སཝཱཧཱ། དྲག་པོ་རྣམས་ལ་སཝཱཧཱ། བརྒྱ་བྱིན་ལ་སཝཱཧཱ། འཇིག་རྟེན་སྐྱོང་བ་རྣམས་ལ་སཝཱཧཱ། ཐམས་ཅད་ལ་སཝཱཧཱ། ལྷ་རྣམས་ལ་སཝཱཧཱ། ནོར་རྣམས་ལ་སཝཱཧཱ། མ་མོ་རྣམས་ལ་སཝཱཧཱ། མཚུན་རྣམས་ལ་སཝཱཧཱ། བགེགས་དང་ལོག་འདྲེན་ཐམས་ཅད་ལ་སཝཱཧཱ། ས་ལ་སཝཱཧཱ། དབྱངས་ཅན་ལ་སཝཱཧཱ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་ཐམས་ཅད་དང ། སྲིན་པོ་ལ་སོགས་པ་ཁམས་གསུམ་ཐམས་ཅད་དུ་གཏོགས་པའི་སེམས་ཅན་ཐམས་ཅད་ལ་སཝཱཧཱ། ཚུར་ཤོག་ཚུར་ཤོག་།དམ་ཚིག་རྗེས་སུ་སྐྱོངས་ཤིག་།ཀུ་རུ་ཀུ་རུ། ས་ར་ས་ར། ཏིཥྛ་ཏིཥྛ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཧཱུཾ་ཡཱུཾ་ཧཱུཾ། ཙཎྜཱ་ལི། མ་ཏངྒི་།ཌོམྦྷི་ནི། པུཀྐ་སི། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །བདག་ལ་གསང་སྔགས་ཀྱི་གཞི་རྣམས་གྲུབ་པར་གྱུར་ཅིག་སཝཱཧཱ། དེ་བཞིན་གཤེགས་པས་རང་གི་སྙིང་པོ་དང ། ལྷ་ཐམས་ཅད་ཀྱི་སྙིང་པོ་འདི་གསུངས་པ་ན་ཐམས་ཅད་དང་ལྡན་པའི་འཁོར་དེ་འཇིགས་སྔངས་སྐྲག་པར་གྱུར་ནས་ཆུ་ཤིང་གི་ཚལ་རླུང་དྲག་
332a
༄#། །པོ་ཆེན་པོས་བསྐྱོད་དེ་རྩ་བ་བཅད་པ་བཞིན་དུ་གཡོ་ཞིང་འགུལ་ལ་སྙིང་ཚིག་སྟེ་རྡོ་རྗེའི་ཕུར་བུས་བཏབ་པ་བཞིན་དུ་ཟུགས་ཤིང་ཞིགས་ལ་འགྲེ་ཞིང་སྐྱབས་བཙལ་བའི་ཕྱིར་འདུ་ཤེས་ཙམ་གྱིས་སངས་རྒྱས་བཅོམ་ལྡན་འདས་ལ་འབོད་པ་དང ། བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ལྷའི་འཁོར་འདི་སློངས་ཤིག་།ངས་དམ་ཚིག་འདི་ཡོངས་སུ་འཛིན་དུ་གཞུག་གོ། རིག་སྔགས་གྲུབ་འབྱོར་བར་བྱེད་པའི་སྙིང་པོ་ལ་གཞོལ་བ་བསྒྲགས་སོ། །དེ་སྐད་ཅེས་བཀའ་སྩལ་པ་དང ། གསང་བ་པའི་བདག་པོ་ལག་ན་རྡོ་རྗེས་གསང་བ་པའི་སྙིང་པོ་འདིས་ལྷའི་འཁོར་དེ་དག་ཐམས་ཅད་བསླང་ངོ ། །དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ོཾ་ཀཱི་ལི་ཀཱི་ལ། བཛྲ་ཀཱི་ལི་ཀཱི་ལ་ཡ་སཝཱཧཱ། བཅོམ་ལྡན་འདས། འདི་ནི། བདག་གི་སྙིང་པོ་མཆོག་ཏུ་གསང་བ་ལགས་ཏེ། རིག་སྔགས་ཐམས་ཅད་འགྲུབ་པར་བགྱིད་པ་ལགས་སོ། །དེས་ནི། བདག་ཀྱང་དྲངས་ནས་གཞན་གྱིས་མ་བཏང་བར་མཆིའོ། །དབང་དུ་མཆིའོ། །དངོས་གྲུབ་སྩལ་བར་བགྱིའོ། །ལུང་བཞིན་བགྱིའོ། །བསྲུང་བར་བགྱིའོ། །དཔལ་བསྐྱེད་པར་བགྱིའོ། །
332b
བགེགས་དང་ལོག་འདྲེན་ཐམས་ཅད་རྣམ་པར་བཤིག་གོ། སེམས་ཅན་ཐམས་ཅད་གདུལ་བར་བགྱིའོ། །འབྱུང་པོ་ཐམས་ཅད་རྣམ་པར་བཤིག་པར་བགྱིའོ། །ནད་ཐམས་ཅད་བསལ་བར་བགྱིའོ། །སྔོན་གྱི་ལས་ཀྱི་རྣམ་པར་སྨིན་པ་ནི། མ་གཏོགས་སོ། །བཅོམ་ལྡན་འདས། བདག་གི་སྙིང་པོ་མཆོག་ཏུ་གསང་བ་འདི་ནས་བསྐལ་པ་གྲངས་མ་མཆིས་པ་གསུམ་དུ་དཀའ་བ་སྤྱོད་པ་ཆེན་པོ་བགྱིད་པ་ན་གནོད་པ་བགྱིད་པ་བགེགས་དང་ལོག་འདྲེན་ཐམས་ཅད་ཀྱིས་རྣམ་པར་གཙེས་པའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོ་མཆོག་འཛིན་མེ་ལྟར་བློས་རྣམ་པར་བསྒྱིངས་ཤིང་རྣམ་པར་རོལ་པ་མངོན་ཤེས་དྲི་ཞིམ་སྣང་དཔལ་གྱིས་བདག་ལ་བསྲུང་བའི་སླད་དུ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེས་སྙིང་པོ་མཆོག་ཏུ་གསང་བ་འདི་སྨྲས་མ་ཐག་ཏུ་འཁོར་དེ་ཐམས་ཅད་བསམ་གཏན་གྱི་དགའ་བ་དང ། བདེ་བས་ཚིམ་པར་གྱུར་ཏེ། གསང་བ་པའི་བདག་པོ་ལག་ན་རྡོ་རྗེའི་དམ་ཚིག་གི་བསྟན་པ་ལ་གནས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་ཆོས་ཀྱི་རྣམ་གྲངས་འདི་ཟུངས་ཤིག་།ཆོངས་ཤིག་།ལྷོགས་ཤིག། འཛིན་དུ་ཆུག་ཅིག་།ཀུན་ཆུབ་པར་གྱིས་ཤིག །
333a
༄#། །གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་དང ། དེས་སེམས་ཅན་མང་པོ་ལ་ཡུན་རིང་པོར་ཕན་པ་དང ། བདེ་བ་དང ། ཐ་མར་དེ་བཞིན་གཤེགས་པའི་ཡེ་ཤེས་བླ་ན་མེད་པ། ཆགས་པ་མེད་པ། སྒྲིབ་པ་མེད་པ་ཐོབ་ཅིང་རྟོགས་པར་འགྱུར་རོ། །སུ་ཆོས་ཀྱི་རྣམ་གྲངས་འདི་འཆང་བ་དང ། ཀློག་པ་དང ། འཛིན་དུ་འཇུག་པ་དང ། ཀུན་ཆུབ་པར་བྱེད་པ་དང ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དང ། མཆོད་པ་དང ། ཡི་གེར་འབྲི་བ་དང ། ཡི་གེར་འབྲིར་འཇུག་པ་དང ། ཁ་ཏོན་བྱེད་པ་དང ། ཉན་པ་དང ། སེམས་པ་དེ་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འདི་ནས་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་ངན་འགྲོ་ལོག་པར་ལྟུང་བར་མི་འགྱུར་རོ། །རིགས་དམའ་བ་རྣམས་སུ་སྐྱེ་བར་མི་འགྱུར། དབུལ་པོའི་རིགས་རྣམས་སུ་སྐྱེ་བར་མི་འགྱུར་ཏེ། ཤེས་རབ་མེད་པ་ཡང་མ་ཡིན། མ་དུལ་བར་མ་ཡིན་།ཚེ་ཐུང་བར་མ་ཡིན་ཞིང་ཚེ་རབས་ཚེ་རབས་སུ་ཚེ་རབས་དྲན་པར་འགྱུར་རོ། །བྱང་ཆུབ་ཀྱི་སེམས་བརྗེད་པར་མི་འགྱུར་རོ། །ཐོས་པ་འཛིན་པར་འགྱུར་རོ། །རབ་ཏུ་དབེན་པ་ལ་མངོན་པར་དགའ་བར་འགྱུར་རོ། །འཁོར་ངན་པ་ཅན་མ་ཡིན་པར་འགྱུར་རོ། །ཚིག་
333b
གཟུང་བར་འོས་ཤིང་སྙན་པར་འགྱུར་རོ། །སྐལ་པ་བཟང་ཞིང་གཟུགས་བཟང་བར་འགྱུར་རོ། །ཤེས་རབ་ཆེན་པོ་དང་སྤོབས་པ་ཆེན་པོ་དང་དབང་དང་ལྡན་པར་འགྱུར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱ་བ་ལ་མཁས་པར་འགྱུར་རོ། །དགེ་བའི་བཤེས་གཉེན་གྱིས་ཡོངས་སུ་ཟིན་པར་འགྱུར་རོ། །སྡིག་པའི་གྲོགས་པོ་ཡོངས་སུ་སྤོང་བར་འགྱུར་རོ། །ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བ་ལ་མཁས་པར་འགྱུར་རོ། །སེམས་ཅན་ཐམས་ཅད་ཡོངས་སུ་རྫོགས་པར་བྱ་བ་ལ་མཁས་པར་འགྱུར་རོ། །སངས་རྒྱས་ཀྱི་ཞིང་ཆེ་ཞིང་མཐའ་ཡས་པ་ལ་རྫུ་འཕྲུལ་དང་ལྡན་པར་འགྱུར་རོ། །ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་དེ་བྱང་ཆུབ་ཀྱི་སེམས་མི་བརྗེད་པར་འགྱུར་རོ། །ཚེ་འདི་ཉིད་ལ་བགེགས་དང ། ལོག་འདྲེན་དང ། རིགས་སྔགས་འཆང་གྲུབ་པ་དང ། འབྱུང་པོ་དག་དང ། གདོན་གྱི་ཚོགས་དང ། མ་མོ་དང ། ཡི་དྭགས་དང ། ཤ་ཟ་དང ། ལྷ་དང ། ཀླུ་དང་།གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ཀྱིས་མི་ཐུལ་བར་འགྱུར་རོ། །དེའི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ། །ནད་ཐམས་ཅད་དང་བྲལ་བར་འགྱུར་རོ། །སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་འཆི་བའི་དུས་བྱེད་པར་མི་འགྱུར་རོ། །དེ་ལ་རིག་སྔགས་
334a
༄#། །ཐམས་ཅད་ཀྱང་འགྲུབ་པར་འགྱུར་རོ། །དེ་ལ་ལྷ་ཐམས་ཅད་ཀྱང་སྲུང་ཞིང་སྦེད་པ་དང ། ཡོངས་སུ་སྐྱོབ་པར་འགྱུར་རོ། །དེའི་རྩོམ་པ་ཐམས་ཅད་ཀྱང་སླ་བར་འགྱུར་རོ། །འཇིག་རྟེན་པ་དང ། འཇིག་རྟེན་ལས་འདས་པ་དང ། དཀྱིལ་འཁོར་ཐམས་ཅད་ཀྱི་དམ་ཚིག་ལ་ཞུགས་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་ཐམས་ཅད་ཀྱི་མཆོད་པའི་སྤྲིན་དུ་བསྟན་པ་ཞེས་བྱ་བར་ཟུངས་ཤིག་།དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་སྒྲིབ་པ་མེད་པ་བསྐོར་བ་ཞེས་བྱ་བར་ཡང་ཟུངས་ཤིག་།དེ་བཞིན་གཤེགས་པའི་ཆོས་ཀྱི་དབྱིངས་ལ་མཁས་པ་ཞེས་བྱ་བར་ཡང་ཟུངས་ཤིག ། བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བར་ཡང་ཟུངས་ཤིག་།བདུད་ཀྱི་ཕྱོགས་འདུལ་བ་ཞེས་བྱ་བར་ཡང་ཟུངས་ཤིག་།རྟེན་ཅིང་འབྲེལ་པར་འབྱུང་བ་ལ་འཇུག་པ་རབ་ཏུ་རྟོགས་པ་ཞེས་བྱ་བར་ཡང་ཟུངས་ཤིག་།དམ་པའི་ཆོས་ཀྱི་ཕྱག་རྒྱའི་མཚན་ཉིད་ཅེས་བྱ་བར་ཡང་ཟུངས་ཤིག་།རིག་སྔགས་དང ། དཀྱིལ་འཁོར་
334b
དང ། ཕྱག་རྒྱ་དང ། དམ་ཚིག་ཐམས་ཅད་ལ་རབ་ཏུ་འཇོག་པ་ཞེས་བྱ་བར་ཡང་ཟུངས་ཤིག་།ལག་ན་རྡོ་རྗེའི་རྣམ་པར་ཐར་པའི་ཏིང་ངེ་འཛིན་གྱི་ཆོ་འཕྲུལ་ཞེས་བྱ་བར་ཡང་ཟུངས་ཤིག་།རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་ཞེས་བྱ་བར་ཡང་ཟུངས་ཤིག་།དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱིས་གསུངས་པ་ལ་ལེགས་སོ། །ཞེས་གསོལ་ཏེ་མངོན་པར་དགའ་ནས་ཅང་མི་སྨྲ་བར་གྱུར་ཏོ། །དེ་ནས་བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་དེ་དག་ཐམས་ཅད་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང་།མི་མ་ཡིན་པ་དེ་དག་ཐམས་ཅད་དང ། ཐམས་ཅད་དང་ལྡན་པའི་འཁོར་དེ་བཅོམ་ལྡན་འདས་ལག་ན་རྡོ་རྗེས་གསུངས་པ་ལ་མངོན་པར་བསྟོད་དོ། །འཕགས་པ་རྡོ་རྗེའི་རི་རབ་ཆེན་པོའི་རྩེ་མོའི་ཁང་པ་བརྩེགས་པའི་གཟུངས་རྫོགས་སོ།། །།རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང ། ཛྙཱ་ན་སིདྡྷི་དང ། ཞུ་ཆེན་གྱི་ལོཙྪ་བ་བནྡྷེ་ཡེ་ཤེས་སྡེས་བསྒྱུར་
335a
༄#། །ཞིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ།