༄##། ་་།རྒྱ་གར་སྐད་དུ། ་ད་ཤ་ཙཀྲ་ཀྵི་ཏི་གར་བྷ་ནཱ་མ་མ་ཧཱ་ཡཱ་ན་སཱུ་ཏྲ། ་བོད་སྐད་དུ། ་འདུས་པ་ཆེན་པོ་ལས་སའི་སྙིང་པོའི་འཁོར་ལོ་བཅུ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་ཁ་ལ་དེ་ཡ་ཞེས་བྱ་བ་དྲང་སྲོང་ཐུབ་པ་མང་པོའི་སྤྱོད་ཡུལ་གྱི་གནས་ན། དགེ་སློང་གི་དགེ་འདུན་ཆེན་པོ་ཚད་མེད་གྲངས་མེད་པ་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་ཉན་ཐོས་ཀྱི་དགེ་འདུན་ཆེན་པོ་ཤ་སྟག་གོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་གྲངས་མེད་པ་དང་ཐབས་གཅིག་པ་ཐམས་ཅད་ཀྱང་བྱང་ཆུབ་སེམས་དཔའི་དགེ་འདུན་ཆེན་པོ་ཤ་སྟག་སྟེ། ཟླ་བའི་སྙིང་པོ་ཞེས་བྱ་བ་བཤད་མ་ཐག་ཏུ། དེའི་ཚེ་ལྷོ་ཕྱོགས་ནས་བསུང་གི་སྤྲིན་ཆེན་པོ་འདུས་པ་ལས་བསུང་གི་ཆར་ཆེན་པོ་རབ་ཏུ་འབབ་བོ། །མེ་ཏོག་གི་སྤྲིན་ཆེན་པོ་འདུས་པ་ལས་མེ་ཏོག་གི་ཆར་ཆེན་པོ་རབ་ཏུ་འབབ་བོ། །རིན་པོ་ཆེའི་ལྷ་རྫས་ཀྱི་རྒྱན་གྱི་སྤྲིན་ཆེན་པོ་འདུས་པ་ལས་རིན་པོ་ཆེའི་ལྷ་རྫས་ཀྱི་རྒྱན་གྱི་ཆར་ཆེན་པོ་རབ་ཏུ་འབབ་བོ། །ལྷ་རྫས་ཀྱི་གོས་ཀྱི་སྤྲིན་ཆེན་པོ་འདུས་པ་ལས་ལྷ་རྫས་ཀྱི་གོས་ཀྱི་ཆར་ཆེན་པོ་རབ་ཏུ་འབབ་པོ། །དེ་ལྟ་བུའི་སྤྲིན་དང་ཆར་ཆེན་པོས་དྲང་སྲོང་ཐུབ་པ་མང་པོའི་སྤྱོད་ཡུལ་གནས་ཀྱི་རི་དེ་ལ་ཁྱབ་པར་གྱུར་ཏོ། །བསུང་དང ། མེ་ཏོག་དང ། རིན་པོ་ཆེའི་རྒྱན་དང ། གོས་དེ་དག་ལས་ཆོས་ཆེན་པོའི་སྒྲ་དབྱངས་རྣམ་པ་སྣ་ཚོགས་བརྒྱ་སྟོང་སྙེད་གྲགས་པར་གྱུར་པ་ནི་འདི་ལྟ་སྟེ། དཀོན་མཆོག་ལ་སྐྱབས་སུ་འགྲོ་བའི་སྒྲ་དང ། བསླབ་པའི་གནས་འཛིན་པའི་སྒྲ་དང ། ངང་དེས་ཤིང་བཟོད་པ་ཅན་གྱི་སྒྲ་དང ། བརྩོན་འགྲུས་རྩོམ་པའི་སྒྲ་དང ། བདུད་བཞི་བཏུལ་བའི་སྒྲ་དང ། ཤེས་རབ་ལ་གཞོལ་ཞིང་འཇུག་པའི་སྒྲ་དང ། གྲགས་པ་ཆེན་པོས་འཇིག་རྟེན་གསུམ་དུ་རྒྱ་ཆེར་གྲགས་པའི་སྒྲ་དང ། དྲན་པ་དང ། ཏིང་འཛིན་དང ། གཟུངས་ཀྱི་ཁྱད་པར་ལ 60.109a ནན་ཏན་བྱ་བའི་སྒྲ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་སྒྲ་དང ། འདོད་ཆགས་ཀྱིས་ཡོངས་སུ་སྐྱོ་བའི་སྒྲ་དང ། གཟུགས་ནི་ཆུའི་ལྦུ་བ་ལྟ་བུའོ་ཞེས་པའི་སྒྲ་དང ། ཚོར་བ་ནི་ཆུའི་ཆུ་བུར་ལྟ་བུའོ་ཞེས་པའི་སྒྲ་དང ། འདུ་ཤེས་ནི་སྨིག་རྒྱུ་ལྟ་བུའོ་ཞེས་པའི་སྒྲ་དང ། འདུ་བྱེད་ནི་ཆུ་ཤིང་ལྟ་བུའོ་ཞེས་པའི་སྒྲ་དང ། རྣམ་པར་ཤེས་པ་ནི་སྒྱུ་མ་ལྟ་བུའོ་ཞེས་པའི་སྒྲ་དང ། མི་རྟག་པའི་སྒྲ་དང ། སྡུག་བསྔལ་བའི་སྒྲ་དང ། བདག་མེད་པའི་སྒྲ་དང ། སྟོང་པའི་སྒྲ་དང ། འཛེམ་པ་དང ། ངོ་ཚ་བར་ལྡན་པའི་སྒྲ་དང ། ཀུན་སྤོང་བའི་སྒྲ་དང ། དྲན་པ་ཉེ་བར་གཞག་པའི་སྒྲ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ཀྱི་སྒྲ་དང ། ཆོས་ཀུན་ཆུབ་པའི་སྒྲ་དང ། མཐོ་རིས་སུ་སྐྱེ་བ་དང་མྱ་ངན་ལས་འདའ་བའི་སྒྲ་དང ། ཐེག་པ་གསུམ་ལ་འབབ་པའི་སྒྲ་དང ། ཆོས་ཆེན་པོའི་འཁོར་ལོ་བསྐོར་བའི་སྒྲ་དང ། ཆོས་ཆེན་པོའི་ཆར་རབ་ཏུ་འབེབས་པའི་སྒྲ་དང ། སེམས་ཅན་ཡོངས་སུ་སྨིན་པར་བྱ་བའི་སྒྲ་དང ། ངན་སོང་གསུམ་ལས་ཡོངས་སུ་སྒྲོལ་བའི་སྒྲ་དང ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པར་བྱ་བའི་ནན་ཏན་བྱ་བའི་སྒྲ་དང ། ཐབས་མཁས་པའི་སྒྲ་དང ། ས་བཅུ་ལ་འབབ་པའི་སྒྲ་དང ། མངོན་པར་ཤེས་པས་རྣམ་པར་རོལ་པའི་སྒྲ་དང ། བླ་ན་མེད་པའི་ཐེག་པ་ཆེན་པོ་རྣམ་པར་རོལ་པའི་སྒྲ་དང ། ས་ལས་ཕྱིར་མི་ལྡོག་པའི་སྒྲ་དང ། མི་སྐྱེ་བའི་ཆོས་ཀྱི་བཟོད་པའི་སྒྲ་དང ། སྤྱི་བོ་ནས་དབང་བསྐུར་བའི་སྒྲ་དང ། སངས་རྒྱས་ཐམས་ཅད་ཀྱི་རྒྱ་མཚོ་ཆེན་པོ་ལ་འཇུག་པའི་སྒྲའི་ང་རོ་གྲགས་པར་གྱུར་ཏོ། །དེའི་ཚེ་འཁོར་གྱི་དཀྱིལ་འཁོར་མང་པོ་དེ་དག་ཐམས་ཅད་ཀྱིས་དེ་ལྟ་བུའི་སྤྲིན་དང་ཆར་རྣམ་པ་སྣ་ཚོགས་མཐོང་ཞིང་དེ་ལྟར་ཆོས་ཀྱི་སྒྲའི་ང་རོ་ཡང་ཐོས་པར་གྱུར་ནས་དེ་དག་གི་སོ་སོའི་ཡིད་ཅི་ལ་མོས་པ་བཞིན་དུ་སོ་སོའི་ལུས་ལ་རྣམ་པ་སྣ་ཚོགས་ཀྱི་བསུང་དང ། མེ་ཏོག་དང ། རིན་པོ་ཆེའི་རྒྱན་དང ། ལྷ་རྫས་ཀྱི་གོས་དམ་པས་ཡོངས་སུ་བརྒྱན་པར་མཐོང་ངོ ། །ཡང་སོ 60.109b སོའི་ལག་མཐིལ་གཉིས་ན་ཡིད་བཞིན་གྱི་ནོར་བུ་རིན་པོ་ཆེ་ཐོགས་ཤིང་ཡིད་བཞིན་གྱི་ནོར་བུ་རིན་པོ་ཆེ་དེ་དག་རེ་རེ་ལས་ཀྱང་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབབ་པར་མཐོང་ངོ ། །གཞན་ཡང་ནོར་བུ་རིན་པོ་ཆེ་དེ་དག་ལས་འོད་ཟེར་རྣམ་པ་སྣ་ཚོགས་སུ་བྱུང་སྟེ། འོད་ཟེར་དེ་དག་གི་དབང་གིས་སེམས་ཅན་དེ་དག་སོ་སོ་ནས་ཕྱོགས་བཅུའི་ཆུ་ཀླུང་གང་གཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་ཡང་མཐོང་ངོ ། །ཡང་འོད་ཟེར་དེ་དག་གི་དབང་གིས་སངས་རྒྱས་ཀྱི་ཞིང་དེ་དག་ན་དེ་བཞིན་གཤེགས་པ་དེ་རེ་རེ་ལ་ཡང་འཁོར་མང་པོ་ཚད་མེད་པས་སྟི་སྟང་དང་བཅས་ཏེ་ཡོངས་སུ་བསྐོར་བར་མཐོང་ངོ ། །གཞན་ཡང་འོད་ཟེར་དེའི་དབང་གིས་སངས་རྒྱས་ཀྱི་ཞིང་དེ་དག་ན་སེམས་ཅན་གང་ནད་ཀྱིས་གཟིར་བ་ཐམས་ཅད་ཀྱང་འོད་ཟེར་དེ་དག་གིས་རེག་མ་ཐག་ཏུ་ནད་ཀྱི་སྡུག་བསྔལ་དང་བྲལ་བར་གྱུར་ཏོ། །གང་བསད་པ་ལ་ཐུག་པ་དང ། བཙོན་དུ་བཟུང་ཞིང་བཅིངས་པ་དག་ཀྱང་འོད་ཟེར་དེ་དག་གིས་རེག་མ་ཐག་ཏུ་དེ་དག་ལས་ཡོངས་སུ་ཐར་བར་གྱུར་ཏོ། །གང་ལུས་དང་ངག་དང་ཡིད་མི་བདེ་བར་སྤྱོད་པའི་གནས་ངན་ལེན་ལྕི་བ་དག་ཀྱང་འོད་དེའི་དབང་གིས་ཤིན་དུ་ཡང་ཞིང་རྣམ་པར་དག་པར་གྱུར་ཏོ། །གང་བཀྲེས་ཤིང་སྐོམ་པ་དག་ཀྱང་འདྲངས་ཤིང་ངོམས་པར་གྱུར་ཏོ། །གང་བསད་པ་དང ། ཆད་པ་རྣམ་པ་སྣ་ཚོགས་ཀྱིས་ཉོན་མོངས་པར་གྱུར་པ་དག་ཀྱང་འོད་ཟེར་དེ་དག་གིས་རེག་མ་ཐག་ཏུ་སྡུག་བསྔལ་བ་དང་བྲལ་བར་གྱུར་ཏོ། །གང་བགོ་བ་དང ། རིན་པོ་ཆེའི་རྒྱན་དང ། དབྱིག་དང ། ནོར་རྫས་ཀྱིས་བྲེལ་ཅིང་ཕོངས་པ་དག་ཀྱང་བསམས་པ་བཞིན་དུ་འབྱོར་ཅིང་ལྡན་པར་གྱུར་ཏོ། །སེམས་ཅན་གང་སྲོག་གཅོད་པ་ལ་དགའ་ཞིང་མོས་པ་ནས་ལོག་པར་ལྟ་བའི་བར་དུ་དགའ་ཞིང་མོས་པ་དག་ཀྱང་འོད་ཟེར་དེས་རེག་མ་ཐག་ཏུ་སྲོག་གཅོད་པ་ཡོངས་སུ་སྤོང་བ་ལ་དགའ་ཞིང་མོས་པ་ནས་ལོག་པར་ལྟ་བའི་བར་དུ་ཡོངས་སུ་སྤོང་བ 60.110a ལ་དགའ་ཞིང་མོས་པར་གྱུར་ཏོ། །སེམས་ཅན་གང་འདོད་པ་མི་རྙེད་པ་རྣམ་པ་སྣ་ཚོགས་ཀྱིས་སྡུག་བསྔལ་བར་གྱུར་པ་དག་ཀྱང་འོད་ཟེར་དེས་རེག་མ་ཐག་ཏུ་ཇི་ལྟར་རེ་བ་བཞིན་དུ་རྙེད་པར་གྱུར་ཏོ། །གཞན་ཡང་འོད་ཟེར་དེའི་དབང་གིས་སངས་རྒྱས་ཀྱི་ཞིང་ཐམས་ཅད་ཀྱི་སེམས་ཅན་གང་སྡུག་བསྔལ་གྱིས་གདུངས་པ་དག་ཐམས་ཅད་ཞི་ནས་རབ་ཏུ་བདེ་བ་དང་ལྡན་པར་མཐོང་ངོ ། །གཞན་ཡང་སངས་རྒྱས་ཀྱི་ཞིང་དེ་དག་ཐམས་ཅད་དུ་འོད་ཀྱིས་སྣང་བར་བྱས་པས་སྤྲིན་དང ། རྡུལ་དང ། ན་བུན་དང ། རླུང་དང ། རྫི་ཆར་དང ། བཀྲ་མི་ཤིས་པའི་སྒྲ་དང ། དྲི་མི་ཞིམ་པ་དང ། ཁ་བ་དང ། ཚ་བ་ལ་སོགས་པའི་རོ་ངན་པ་དང ། ཡིད་དུ་མི་འོང་བའི་རེག་བྱ་དང ། འཇིགས་སྐྲག་པ་དང ། གནོད་པ་མང་པོ་རྣམས་མེད་པར་གྱུར་ཏོ། །གཞན་ཡང་ལས་ངན་པ་དང ། ལོག་པའི་ངག་དང ། ལོག་པའི་བསམ་པ་དང ། ལོག་པར་ཕྱོགས་པ་དང་ཡོངས་སུ་བྲལ་ཏེ་ལྷག་པར་མི་གྲང་བ་དང ། ལྷག་པར་མི་ཚ་བ་དང ། རབ་ཏུ་ཞི་ཞིང་བདེ་བ་དང ། ས་གཞི་ལག་མཐིལ་ལྟར་མཉམ་པ་དང ། བདེ་བའི་ཡོ་བྱད་དམ་པ་ཐམས་ཅད་ཀྱིས་ཡོངས་སུ་གང་བར་གྱུར་ཏོ། །དེའི་ཚེ་ན་འཁོར་མང་པོ་རྣམས་ཀྱི་སོ་སོའི་ལུས་ཀྱི་སའི་ཁམས་ལྷག་པར་ལྕི་ཞིང་མི་ཐེག་པ་ཙམ་དུ་གྱུར་ཏོ། །ལྟས་འདི་ལྟ་བུར་གྱུར་པ་མཐོང་ནས་ཐམས་ཅད་ཀྱང་དངངས་ཏེ། དེ་ཅིའི་རྒྱུ་ཅིའི་རྐྱེན་གྱིས་ལྟས་འདི་ལྟ་བུར་གྱུར་སྙམ་དུ་རྟོག་པ་སྐྱེས་སོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་བརྒྱ་བྱིན་ལྷའི་དབང་པོ་དྲི་མ་མེད་པར་སྐྱེས་ཤེས་བྱ་བ་བཅོམ་ལྡན་འདས་དང་ཧ་ཅང་ཡང་མི་རིང་བ་ཞིག་ན་འདུག་པ་ལས་ལངས་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ནས་ཚིགས་སུ་བཅད་པ་འདི་སྐད་ཅེས་གསོལ་ཏོ། །བདེན་པར་གསུང་ཞིང་བདེན་གཟིགས་པ། །བདེན་ལ་རབ་གནས་ཐུབ་པ་ཁྱོད། །འདུས་པའི་འཁོར་མང་ཐམས་ཅད་ལ། ། 60.110b མཐར་ཕྱིན་བདེན་པའི་ཆོས་གསུངས་ཤིག་།སོ་སོའི་སྐྱེ་བོ་མང་པོ་དག་།སྡུག་བསྔལ་རྒྱུ་དང་སྡུག་བསྔལ་སེལ། །ཅིའི་སླད་དུ་འཁོར་འདིར་ནི། །སྤྲིན་དང་ཆར་རྣམས་གདའ་བར་གྱུར། །འཁོར་རྣམས་རབ་ཏུ་དགའ་རངས་ནས། །ཤིན་དུ་དད་པའི་བསམ་པ་སྐྱེས། །ཐེག་པ་ཆེན་པོར་ཐམས་ཅད་གཞོལ། །ཡང་དག་ལྟ་སྐྱེ་སོམ་ཉི་རྒལ། །འཁོར་མང་ལྷ་དང་མི་ཡི་ལུས། །ལྷག་པར་ས་ཡི་ཁམས་ལྕི་བས། །རང་གིས་མི་ཐེག་གྱུར་པ་འདི། །ཅི་ཡི་རྐྱེན་གྱིས་ལྟས་འདི་བྱུང ། །ལག་མཐིལ་གཉིས་ན་ནོར་བུའི་ལས། །རིན་ཆེན་ཆར་འབབ་འོད་ཀྱང་འགྱེད། །ཕྱོགས་བཅུར་སྣང་བྱས་སྡིག་པ་བསལ། །སྡུག་བསྔལ་ཞི་ནས་བདེ་བ་ཐོབ། །འདྲེན་པས་གསུངས་ཤིག་ཅི་ཡི་རྐྱེན། །འཁོར་གྱི་དཀྱིལ་འཁོར་ཐམས་ཅད་ལ། །སྤོས་དང་ཕྲེང་བ་སྣ་ཚོགས་ཀྱིས། །སོ་སོའི་ལུས་ལ་བརྒྱན་པ་གདའ། །ལྷ་དང་མི་ཀུན་ཐེ་ཙོམ་སྐྱེས། །ཅི་ཡི་རྒྱུ་དང་ཅི་ཡི་རྐྱེན། །སུ་ཞིག་གང་ནས་འདིར་མཆི་ན། །རྫུ་འཕྲུལ་མཐུ་འདི་སྟོན་པར་གྱུར། །སངས་རྒྱས་བྱང་ཆུབ་སེམས་དཔའ་འམ། །འོན་ཏེ་ཚངས་པ་འམ་བདུད་ལགས་སམ། །བརྒྱ་བྱིན་ལགས་སམ་སུ་མཆི་བ། །འདྲེན་པ་ཆེན་པོས་བཤད་དུ་གསོལ། །དེའི་ཚེ་བཅོམ་ལྡན་འདས་ཀྱིས་བརྒྱ་བྱིན་དྲི་མ་མེད་པར་སྐྱེས་པ་ལ་འདི་སྐད་ཅེས་བཀའ་སྩལ་ཏོ། །ཁྱེད་ཀྱིས་འདི་ལྟར་ཤེས་པར་བྱོས་ཤིག་།བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ཞེས་བྱ་བ་ཡོད་དེ། སྔོན་བསྐལ་པ་ཆེན་པོ་ཚད་མེད་གྲངས་མེད་པའི་བར་དུ་རྙོག་པ་ལྔའི་ཚེ། སངས་རྒྱས་མི་བཞུགས་པའི་འཇིག་རྟེན་གྱི་ཁམས་སུ་སེམས་ཅན་ཡོངས་སུ་སྨིན་པར་བྱེད་པ་དེ། ད་ལྟར་འཁོར་བྱང་ཆུབ་སེམས་དཔའ་བྱེ་བ་ཁྲག་ཁྲིག་སྟོང་ཕྲག་བརྒྱད་བཅུ་དང་བཅས་ཏེ་འཇིག་རྟེན་གྱི་ཁམས་འདིར་ང་ལ་ཕྱག་འཚལ་བ་དང ། བསྙེན་བཀུར་དང་མཆོད་པ་བྱ་བ་དང ། གཞན་ཡང་འཁོར་གྱི་དཀྱིལ་འཁོར་རྣམས་ལ་བལྟ་བ་དང ། རྗེས་སུ་ཡི་རང་བ་བསྐྱེད་པའི་ཕྱིར་འཁོར་དང་བཅས 60.111a ཏེ་དགེ་སྦྱོང་གི་གཟུགས་ཀྱིས་འདིར་འོང་བས་མངོན་པར་ཤེས་པའི་མཐུས་ཆོ་འཕྲུལ་འདི་དག་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ཞེས་བྱ་བ་དེ་ཚད་མེད་གྲངས་མེད་བསམ་གྱིས་མི་ཁྱབ་པའི་ཡོན་ཏན་གྱི་ཁྱད་པར་གྱིས་ཡོངས་སུ་བརྒྱན་པས་ཉན་ཐོས་དང ། རང་སངས་རྒྱས་དང ། འཇིག་རྟེན་དུ་བཅས་པ་ཐམས་ཅད་ཀྱིས་དཔོག་ནུས་པ་མེད་དོ། །བྱང་ཆུབ་སེམས་དཔའ་དེ་ནི་ཡོན་ཏན་ཕུལ་དུ་གྱུར་པ་ཐམས་ཅད་ཀྱི་གཏེར་དུ་གྱུར་པའོ། །རྣམ་པར་གྲོལ་བའི་རིན་པོ་ཆེའི་འབྱུང་གནས་ཡིན་ནོ། །བྱང་ཆུབ་སེམས་དཔའ་རྣམས་ཀྱི་མིག་ཡོངས་སུ་དག་པར་བྱེད་པའོ། །མྱ་ངན་ལས་འདའ་བར་འགྲོ་བའི་དེད་དཔོན་དུ་གྱུར་པའོ། །ཡིད་བཞིན་གྱི་ནོར་བུ་རིན་པོ་ཆེ་ལྟར་རིན་པོ་ཆེ་ཐམས་ཅད་ཆར་བཞིན་དུ་འབབ་པས་ཇི་ལྟར་རེ་ཞིང་འདོད་པ་ཐམས་ཅད་ཡོངས་སུ་ཚིམ་པར་བྱེད་པའོ། །ཚོང་པ་མང་པོའི་རིན་པོ་ཆེའི་གླིང་ལྟ་བུའོ། །དགེ་བའི་རྩ་བ་འཕེལ་ཞིང་སྐྱེ་བའི་ཕྱིར་ཞིང་གཤིན་པ་ལྟ་བུའོ། །རྣམ་པར་གྲོལ་བའི་བདེ་བ་ལ་འཇོག་པའི་ཕྱིར་སྣོད་ལྟ་བུའོ། །རིན་པོ་ཆེ་དམ་པའི་འབྱུང་གནས་སུ་གྱུར་པའི་ཕྱིར་ཡོན་ཏན་གྱི་བུམ་པ་བཟང་པོ་ལྟ་བུའོ། །དགེ་བའི་ནན་ཏན་ཅན་ལ་སྣང་བར་བྱེད་པའི་ཕྱིར་ཉི་མ་གསལ་བ་ལྟ་བུའོ། །ལམ་སྟོར་བ་རྣམས་ལ་སྣང་བར་བྱེད་པའི་ཕྱིར་སྒྲོན་མ་ལྟ་བུའོ། །ཉོན་མོངས་པའི་གདུང་བ་སེལ་བའི་ཕྱིར་ཟླ་བ་ལྟར་སིམ་པ་ལྟ་བུའོ། །རྐང་མེད་པ་ལ་ཐེག་པར་གྱུར་པ་ལྟ་བུའོ། །ལམ་རིང་པོར་འགྲོ་བ་ལ་ཚོགས་ཀྱི་སྟེགས་བུ་ལྟ་བུའོ། །འབྲོག་བསླད་པ་ལ་ལམ་སྟོན་པ་ལྟ་བུའོ། །སྨྱོས་ཤིང་འཁྲུགས་པ་ལ་སྨན་དམ་པ་ལྟ་བུའོ། །ནད་ཀྱིས་གཟིར་བ་ལ་སྨན་པ་མཁས་པ་དང་ཕྲད་པ་ལྟ་བུའོ། །རྒས་ཤིང་འཁོགས་པ་ལ་རྟེན་དང་ཁར་བ་ལྟ་བུའོ། །ངལ་བ་དང་དུབ་པ་ལ་ཁྲི་དང་སྟན་ལྟ་བུའོ། །ཆུ་བོ་བཞི་རྒལ་བ་ལ་ཟམ་པ་ལྟ་བུའོ། །ཕ་རོལ་དུ་འགྲོ་བ་ལ་གྲུ་དང་གཟིངས་ལྟ་བུའོ། །དགེ་བའི་རྩ་བ་རྣམ་གསུམ་གྱི་འབྲས་བུ་ཁྱད་པར 60.111b ཅན་སྨིན་པར་བྱེད་པའོ། །དགེ་བ་རྣམ་གསུམ་གྱི་གཞི་འདྲེན་ཅིང་རྒྱུན་དུ་འབེབས་པའོ། །སྦྱིན་པ་གཏོང་བའི་རྒྱུན་མི་འཆད་པ་འཁོར་ལོ་ལྟར་འཇུག་པའོ། །ཚུལ་ཁྲིམས་སྲུང་བ་བརྟན་པས་རི་རབ་ལྷུན་པོ་ལྟ་བུའོ། །བརྩོན་འགྲུས་གཞིག་པར་དཀའ་བ་ནི་རྡོ་རྗེ་རིན་པོ་ཆེ་ལྟ་བུའོ། །བཟོད་པ་མི་གཡོ་བ་ནི་ས་ཆེན་པོ་ལྟ་བུའོ། །བསམ་གཏན་ཟབ་པ་ནི་གཏེར་གསང་བ་ལྟ་བུའོ། །མཉམ་པར་འཇོག་པས་མཛེས་པ་ནི་མེ་ཏོག་གི་ཕྲེང་བ་ལྟ་བུའོ། །ཤེས་རབ་ཟབ་ཅིང་ཡངས་པ་ནི་རྒྱ་མཚོ་ཆེན་པོ་ལྟ་བུའོ། །ཅིས་ཀྱང་མི་ཆགས་པ་ནི་ནམ་མཁའ་ལྟ་བུའོ། །འབྲས་བུ་དམ་པའི་རྒྱུ་དང་ཉེ་བ་ནི་མེ་ཏོག་རྒྱས་པ་ལྟ་བུའོ། །མུ་སྟེགས་ཅན་འདུལ་བ་ལ་སེང་གེའི་རྒྱལ་པོ་ལྟ་བུའོ། །ལྷའི་བདུད་ཡོངས་སུ་འཇོམས་པ་ནི་ཀླུ་འམ་གླང་པོ་ཆེ་ལྟ་བུའོ། །ཉོན་མོངས་པའི་དགྲ་ཐམས་ཅད་གཅོད་པ་ནི་ལྷའི་རལ་གྲི་ལྟ་བུའོ། །འདུ་འཛི་མང་པོས་སྐྱོ་བ་ནི་རང་སངས་རྒྱས་ཀྱི་ཐེག་པ་ལྟ་བུའོ། །ཉོན་མོངས་པའི་དྲི་མ་འཁྲུ་བ་ནི་ཆུ་དང་བ་ལྟ་བུའོ། །མི་གཙང་བའི་ཉལ་ཉིལ་སེལ་བ་ནི་རླུང་དྲག་པོ་ལྟ་བུའོ། །ཀུན་ནས་ཉོན་མོངས་པས་གླགས་མི་གཅོད་པ་ནི་མཚོན་རྣོན་པོ་ལྟ་བུའོ། །འཇིགས་པ་དང་བག་ཚ་བ་ཀུན་ལས་སྲུང་བ་ནི་གཉེན་ནམ་མཛའ་བོ་ལྟ་བུའོ། །ཕས་ཀྱི་རྒོལ་བའི་དགྲ་ལས་སྐྱོབ་པ་ནི་འོབས་སམ་མཁར་ལྟ་བུའོ། །ཉམ་ང་བ་ཐམས་ཅད་ལས་གྲོལ་བར་བྱེད་པས་ཕ་མ་ལྟ་བུའོ། །ཞན་ཅིང་ཉམ་ཆུང་བ་རྣམས་སྦེད་པ་ནི་ནགས་སྟུག་པོ་ལྟ་བུའོ། །དབྱར་ལམ་རིང་པོར་འགྲོ་བ་ལ་བསིལ་གྲིབ་ཀྱི་ཤིང་ཆེན་པོ་ལྟ་བུའོ། །ཚ་བ་དང་སྐོམ་གྱིས་གདུངས་པ་རྣམས་ལ་ཆུ་གྲང་ལྟ་བུའོ། །བཀྲེས་པ་རྣམས་ལ་འབྲས་བུ་ཞིམ་པོ་ལྟ་བུའོ། །གཅར་བུ་རྣམས་ལ་བགོ་བའི་གོས་བྱེད་པའོ། །ཚ་བས་ཉེན་པ་རྣམས་ལ་སྤྲིན་སྟུག་པོར་གྱུར་པའོ། །དབུལ་ཕོངས་པ་ལ་ཡིད་བཞིན་གྱི་ནོར་བུ་རིན་པོ་ཆེར་གྱུར་པའོ། །འཇིགས་སྐྲག་པ་དག་ལ་སྐྱབས་དང་གནས་སུ་གྱུར་པའོ། །ལོ་ཏོག་རྣམས་ལ་ཆར་པར་གྱུར་པའོ། །ཆུ་རྙོག་མ་ཅན་རྣམས་ལ་ནོར་བུ་ཆུ་འདང་དུ་གྱུར་པའོ། །སེམས་ཅན 60.112a མང་པོའི་དགེ་བའི་རྩ་བ་མི་འགོང་བར་བྱེད་པས་སྤྱོད་ཡུལ་དམ་པ་སྟོན་ཅིང་འཁོར་སྤྲོ་བ་དང་ཚིམ་པར་བྱེད་པའོ། །སེམས་ཅན་རྣམས་ལྷག་པའི་འཛེམ་པ་དང་ངོ་ཚ་བ་ལ་སྐུལ་ཞིང་འཛུད་པའོ། །བསོད་ནམས་དང་ཡེ་ཤེས་ཀྱི་ཚོགས་སོགས་པ་ལ་དེའི་རྒྱན་དང་ལྡན་པར་བྱེད་པའོ། །ཉོན་མོངས་པ་ཡོངས་སུ་སེལ་བ་ལ་སྐྱུག་པ་དང་འཁྲུ་བའི་སྨན་ལྟ་བུར་གྱུར་པའོ། །སེམས་འཁྲུགས་པ་སྡུད་པ་ནི་མཉམ་པར་འཇོག་པའི་སྤྱོད་ཡུལ་ལྟ་བུར་གྱུར་པའོ། །སྤོབས་པ་ཐོགས་པ་མེད་པ་ནི་ཟོ་ཆུན་རྒྱུད་པའི་འཁོར་ལོ་ལྟ་བུའོ། །དམིགས་པ་ལ་སེམས་སྡུད་པ་ནི་གཟུགས་བཟང་པོ་ལ་རྟོག་པ་ལྟ་བུའོ། །བཟོད་པ་བརྟན་པ་ནི་རི་རབ་ལྷུན་པོ་ལྟ་བུའོ། །གཟུགས་ཟབ་ཅིང་རྒྱ་ཆེ་བ་ནི་རྒྱ་མཚོ་ཆེན་པོ་ལྟ་བུའོ། །རྫུ་འཕྲུལ་གྱི་རྐང་པ་ཐོགས་པ་མེད་པ་ནི་ནམ་མཁའ་ལྟ་བུའོ། །སྒྲིབ་པའི་བག་ཆགས་ཐམས་ཅད་ཡོངས་སུ་སེལ་བ་ནི་ཇི་ལྟར་ཉི་མ་ཚ་བས་འཁྱག་པ་ཆམ་ཆོམ་བཞུ་བ་ལྟ་བུའོ། །རྟག་ཏུ་བསམ་གཏན་དང ། གཟུགས་མེད་པ་དང ། ཡང་དག་པའི་ལམ་ལ་རོལ་ཅིང་ཐམས་ཅད་མཁྱེན་པའི་ཡེ་ཤེས་ཀྱི་རིན་པོ་ཆེ་དམ་པའི་གླིང་ལྟ་བུར་གྱུར་པས་ཆེད་དུ་མ་བརྩམས་ཀྱང་ཆོས་ཆེན་པོའི་འཁོར་ལོ་རབ་ཏུ་བསྐོར་རོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་དེ་ནི་དེ་ལྟ་བུའི་ཡོན་ཏན་གྱི་ཁྱད་པར་ཚད་མེད་གྲངས་མེད་པ་བསམ་གྱིས་མི་ཁྱབ་པ་དང་ལྡན་པ་དེ་འཁོར་དང་བཅས་ཏེ་གནས་འདིར་ཕྱིན་དུ་ཉེ་བས་འོད་ལས་འདི་ལྟ་བུའི་ཆོ་འཕྲུལ་དང་ལྟས་སྔར་བསྟན་པ་ཡིན་ནོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སའི་སྙིང་པོའི་ཡོན་ཏན་མང་པོ་བཤད་མ་ཐག་ཏུ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་འཁོར་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་དང་བཅས་ཏེ་རྫུ་འཕྲུལ་གྱི་མཐུས་དགེ་སྦྱོང་གི་གཟུགས་སུ་སྟོན་ཅིང་ལྷོ་ཕྱོགས་ནས་བཅོམ་ལྡན་འདས་ཀྱི་སྤྱན་སྔར་ལྷགས་ཏེ། འཁོར་མང་པོ་དང་བཅོམ་ལྡན་འདས་ཀྱི་ཞབས་གཉིས 60.112b ལ་སྤྱི་བོས་གཏུགས་ཏེ་ཕྱག་འཚལ་ནས་ལན་གསུམ་བསྐོར་བ་བྱས་ཏེ། དེ་བཞིན་གཤེགས་པའི་སྤྱན་སྔར་ཐལ་མོ་སྦྱར་ནས། འགྲེང་བཞིན་དུ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །རྣམ་པར་འདྲེན་པ་རྐང་གཉིས་མཆོག་།བྱམས་པའི་ཐུགས་ཀྱིས་ཀུན་ལ་སྐྱོབ། །ས་ཆེན་ལྟར་ནི་ཤིན་དུ་བཟོད། །ཞེ་སྡང་ཁྲོ་བའི་སེམས་ཀུན་བསལ། །མཚན་དང་དཔེ་བྱད་མཆོག་ལྡན་པས། །སངས་རྒྱས་ཀུན་གྱི་ཞིང་རབ་བརྒྱན། །བདེན་པའི་བྱམས་དང་སྙིང་རྗེ་ཡིས། །རྒྱལ་བའི་ཞིང་ཀུན་རབ་ཏུ་འགེངས། །སྲེད་པའི་དྲ་བ་ཀུན་བཅད་ནས། །ཡང་དག་ཅི་བཞིན་བདེ་བར་གནས། །ཡོངས་སུ་དག་པའི་ཞིང་སྤངས་ནས། །རྙོག་པ་ཅན་གྱི་སེམས་ཅན་དགྲོལ། །རྙོག་པའི་ཞིང་འདིར་དམ་བཅས་ཏེ། །ངན་འགྲོ་སེམས་ཅན་སྨིན་པར་མཛད། །ཡང་དག་བརྟན་པའི་རྩོལ་བ་ཡིས། །རིང་མོ་ཞིག་ནས་དཀའ་ཐུབ་སྤྱད། །ཡུན་རིངས་དཀའ་ཐུབ་སྤྱད་པ་དག་།ཐོས་ནས་འཇིགས་པའི་སེམས་ཀྱང་སྐྱེ། །སྦྱིན་པ་ཚུལ་ཁྲིམས་བཟོད་པ་དང ། །བརྩོན་འགྲུས་བསམ་གཏན་ཤེས་རབ་བསྐྱེད། །སངས་རྒྱས་བྱང་ཆུབ་སེམས་དཔའ་དང ། །ཚད་མེད་ཉན་ཐོས་བསྙེན་བཀུར་མཆོག་།གཞན་ཡང་སྐྱེ་བོ་མང་པོ་དག་།བཀྲེས་སྐོམ་ན་འཆི་ཀུན་ལས་བསྒྲལ། །སོ་སོའི་སྐྱེ་བོ་གཞན་གྱི་ཕྱིར། །ལུས་སྲོག་མ་ཆགས་མང་དུ་བཏང ། །ཡང་དག་དམ་པའི་ཆོས་ཚོལ་ཕྱིར། །ཤ་དང་རུས་པའང་མང་དུ་བཏང ། །བདག་གི་བདེ་བ་ཀུན་བཏང་ནས། །སྐྱེ་བོ་རྣམས་ལ་ཐུགས་བརྩེར་དགོངས། །སོ་སོའི་སྐྱེ་བོ་མང་པོའི་ཕྱིར། །ཐེ་ཙོམ་དྲ་བ་གཅོད་ལ་བརྩོན། །དབང་པོ་དྲུག་རྣམས་རབ་བསྡམས་ནས། །འདོད་པ་ཐམས་ཅད་རིང་དུ་སྤངས། །འདུས་བྱས་མི་རྟག་སྡུག་བསྔལ་ཏེ། །བདག་མེད་སྟོང་པ་ཉིད་དུ་རྟོགས། །སྡུག་བསྔལ་ལས་ཀུན་སྐྱེ་བ་ཡི། །རྒྱུ་ནི་འདོད་ཆགས་སྲེད་པའོ། །དེ་ཕྱིར་དབང་པོ་དྲུག་པས་སྔར། །འདོད་ཆགས་ཡོངས་སུ་གཅད་པར་བྱ། །སེམས་ཅན་གནས་པའི་ཁམས་ཀུན་དུ། །རྟག་པར་ཐུགས་རྗེ 60.113a ཆེན་པོས་གནས། །བྱང་ཆུབ་མཆོག་ཏུ་སངས་རྒྱས་ཀྱང ། །སྔོན་གྱི་སྨོན་ལམ་ཀུན་མི་གཏོང ། །སེམས་ཅན་གང་ཞིག་སྡུག་བསྔལ་གྱིས། །རྣམ་པར་གཟིར་བ་དག་གཟིགས་ནས། །ཤིན་དུ་འབབ་པའི་བརྩོན་འགྲུས་ཀྱིས། །དེ་ལས་སྒྲོལ་ཕྱིར་རབ་ཏུ་བརྩོན། །སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཀུན་བསྒོམས་ནས། །ཇི་ལྟར་མ་ནི་བུ་གཅིག་ལ། །བྱམས་པའི་སེམས་ཀྱིས་གསོ་བཞིན་དུ། །སྔོན་ཡང་སེམས་ཅན་རིས་ཀུན་ལ། །རྟག་ཏུ་བྱམས་པའི་ཐུགས་བསྐྱེད་པས། །དེ་ཕྱིར་མྱུར་དུ་སངས་རྒྱས་ནས། །ཚད་མེད་པ་ཡི་འཁོར་རྣམས་སྒྲོལ། །ཇི་ཙམ་བྱང་ཆུབ་སྤྱོད་བསྒོམས་པ། །སེམས་ཅན་དོན་དུ་མ་བསྔོས་མེད། །དེ་བས་སེམས་ཅན་ཐམས་ཅད་ལ། །ཕ་རོལ་ཕྱིན་པ་དྲུག་མི་གཏོང ། །རྟག་ཏུ་དུས་ངན་ཐ་མའི་ཚེ། །བླ་མེད་བྱང་ཆུབ་བསྒྲུབས་པས་ན། །ད་ཡང་དུས་ངན་ཐ་མའི་ཚེ། །བླ་མེད་བྱང་ཆུབ་མངོན་སངས་རྒྱས། །ངན་པར་ལྟ་བའི་ལྷ་ཀླུ་མི། །གནོད་སྦྱིན་དག་ནི་ཀུན་བཏུལ་ཏེ། །ཐེ་ཙོམ་གཅོད་ཅིང་བདེར་བཀོད་པ། །རྡོ་རྗེ་ལྟ་བུའི་ལམ་ལའོ། །ཚད་མེད་པ་ཡི་སྐྱེ་བོ་དག་།བྱང་ཆུབ་མཆོག་ཏུ་ལུང་ཡང་སྟོན། །མཆོད་འོས་འདྲེན་པའི་གཙོར་གྱུར་ཏེ། །མཆོག་གི་བསོད་ནམས་ཞིང་དུ་གྱུར། །དཔེ་ཟླ་མེད་པའི་བཅོམ་ལྡན་འདས། །བྱམས་པས་འགྲོ་བ་ཀུན་ལ་སྐྱོབ། །ཚད་མེད་གྲགས་པ་ཆེན་པོ་ཡིས། །ཕྱོགས་བཅུའི་འཇིག་རྟེན་ཡོངས་སུ་ཁྱབ། །དེ་བས་བྱང་ཆུབ་སེམས་དཔའ་རྣམས། །བདག་གི་དོན་དུ་བསྒྲུབ་པའི་ཕྱིར། །ཀུན་ནས་ལྷན་ཅིག་འདིར་འདུས་ནས། །ཐུབ་པ་ཆེན་པོ་སྤྱན་སྔར་ལྷགས། །དམ་པའི་ཆོས་རྣམས་ཐོས་ནས་ནི། །རབ་ཏུ་དགའ་བའི་སེམས་སྐྱེས་ཏེ། །ལྷག་པར་ཡང་དག་བརྩོན་བསྐྱེད་ནས། །བྱང་ཆུབ་སྤྱོད་ལ་ནན་ཏན་བགྱིད། །རྣམ་པར་འདྲེན་པའི་ཆོས་ཀྱི་མཐུས། །ཐམས་ཅད་མངོན་པར་འཚང་རྒྱ་བས། །དེ་བས་དེང་འདིར་འདྲེན་ཁྱོད་ཀྱིས། །བསྡུས་པའི་འཁོར་ནི་སྔོན་མ་བྱུང ། །གནོད་སྦྱིན་ཁྲི་ཕྲག་བཅུ་གསུམ 60.113b སྙེད། །རྟག་ཏུ་ཤ་ཟ་ཁྲག་འཐུང་བ། །ཐམས་ཅད་སྡིག་པའི་ལས་བཏང་ནས། །བྱང་ཆུབ་ཆེན་པོར་འབབ་ཅིང་གཞོལ། །ཁ་ཅིག་ཁྱད་པར་གཟུགས་མཆོག་དང ། །བཟོད་པ་ཏིང་ངེ་འཛིན་ཡང་ཐོབ། །ཁ་ཅིག་ཟག་པ་ཀུན་ཟད་ནས། །འཇིག་རྟེན་མཆོག་གི་དགྲ་བཅོམ་གྱུར། །ཁ་ཅིག་ཚད་མེད་བཞི་བསྒོམས་ཤིང ། །ཁ་ཅིག་བསྡུ་བ་བཞི་ལ་གནས། །ཁ་ཅིག་ཡང་དག་རིག་བཞི་ཐོབ། །ཁ་ཅིག་འཐུན་པའི་བཟོད་ལ་གནས། །ཁ་ཅིག་དཔའ་འགྲོའི་ཏིང་འཛིན་ཐོབ། །ཁ་ཅིག་ཤེས་རབ་མིག་དང་ལྡན། །ཁ་ཅིག་མི་སྐྱེ་བཟོད་ལ་གནས། །དེ་ཀུན་འདྲེན་པས་བྱིན་གྱིས་བརླབས། །བཅོམ་ལྡན་གཟི་བརྗིད་ཆེན་པོའི་མཐུས། །བདུད་ཀྱི་འཁོར་རྣམས་བཅོམ་ནས་སུ། །རྣམ་པ་དགུ་བཅུ་རྩ་ལྔ་ཡི། །མུ་སྟེགས་ཅན་གྱི་རིས་ཀུན་བཏུལ། །སེམས་ཅན་དམྱལ་བ་བྱོལ་སོང་དང ། །ཡི་དགས་ལྷ་མིན་རྒྱུད་ཀུན་བཅོམ། །བདེ་བས་སེམས་ཅན་བདེན་པ་རྣམས། །ཐམས་ཅད་རྒྱལ་བའི་སྤྱན་སྔར་ལྷགས། །ནད་དང་མཚོན་གྱིས་འཇིགས་པ་དང ། །མུ་གེས་འཇིགས་པའང་དེང་འདིར་བཅིལ། །སེམས་ཅན་མདོངས་ཤིང་འཐོམ་པ་དང ། །ཡང་དག་ལམ་ནི་སྟོར་བ་བསྒྲལ། །ཉོན་མོངས་མྱོས་ཤིང་འཁྲུག་པ་དག་།ཐམས་ཅད་ཞི་བའི་ལམ་ལ་བཀོད། །བདག་གིས་བྱ་བ་ཀུན་སྤངས་ཏེ། །ལྷགས་ནས་བཅོམ་ལྡན་ཞབས་ལ་འཐུག་།དཔག་ཏུ་མེད་པའི་ཞིང་རྣམས་ན། །བཅོམ་ལྡན་ད་ལྟར་བཞུགས་པའི་རྣམས། །ཐམས་ཅད་ཁྱོད་ལ་ཀུན་བསྔགས་པས། །ཐོས་ནས་ཐམས་ཅད་འདི་རུ་ལྷགས། །ཐམས་ཅད་མཁྱེན་པ་རྒྱ་མཚོ་ཡི། །ཡང་དག་ཡོན་ཏན་ཚད་མ་མཆིས། །སེམས་ཅན་མང་པོའི་དོན་མཛད་པ། །མོས་པའི་སེམས་ཀྱིས་ཕྱག་འཚལ་ལོ། །ཚད་མེད་བསོད་ནམས་རྫོགས་བགྱིས་པས། །བཅོམ་ལྡན་ཞབས་ལ་ཕྱག་འཚལ་གྱུར། །ཚད་མེད་བསྐལ་པའི་བར་དུ་ཡང ། །མཆོད་པ་མང་པོས་མཆོད་པར་ཤོག་།བདག་ཀྱང་བཅོམ་ལྡན་ཇི་བཞིན་དུ། །དེ་ལྟ་བུ་ཡི་ཡི་དམ་བཅས། །རྙོག་པ་ཅན་གྱི་འཇིག་རྟེན་འདིར། །བླ་མེད་བྱང་ཆུབ་ཐོབ་པར་ཤོག་།དེའི་ཚེ་བྱང་ཆུབ་སེམས་དཔའ 60.114a སེམས་དཔའ་ཆེན་པོ་སའི་སྙིང་པོས་ཚིགས་སུ་བཅད་པ་དམ་པ་འདི་དག་གིས། བཅོམ་ལྡན་འདས་ལ་མངོན་པར་བསྟོད་ནས་འཁོར་དང་བཅས་ཏེ་གཞན་ཡང་ལྷ་རྫས་ཀྱི་བསུང་དང་མེ་ཏོག་རྣམ་པ་སྣ་ཚོགས་ཀྱི་རིན་པོ་ཆེའི་རྒྱན་ཚད་མེད་པ་སྙེད་ཀྱིས། བཅོམ་ལྡན་འདས་ལ་མངོན་པར་གཏོར་ནས་སྟེང་གི་བར་སྣང་ལ་རིན་པོ་ཆེའི་གདུགས་སུ་གྱུར་ཏེ། དམ་པའི་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་ཅི་ཡང་མི་སྨྲ་བར་འདུག་གོ། །དེའི་ཚེ་འཁོར་གྱི་དཀྱིལ་འཁོར་དེར་འདུས་པའི་འཁོར་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་མཐོང་ནས་ངོ་མཚར་རྨད་དུ་གྱུར་ཏེ། སོ་སོ་ནས་རྣམ་པ་སྣ་ཚོགས་ཀྱི་ལྷ་རྫས་ཀྱི་སྤོས་དང ། མེ་ཏོག་རིན་པོ་ཆེའི་རྒྱན་དང ། ན་བཟའ་དང ། རྒྱལ་མཚན་དང ། བ་དན་དང ། གདུགས་ལ་སོགས་པ་ཕུལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་མཆོད་པ་བྱས་ནས་འདི་སྐད་ཅེས་སྨྲས་སོ། །བདག་ཅག་གིས་རྙེད་པ་རབ་ཏུ་རྙེད་དོ། །བཅོམ་ལྡན་འདས་ཀྱི་བྱིན་གྱིས་བརླབས་ཀྱིས་མངོན་སུམ་དུ་སྐྱེས་བུ་ཆེན་པོ་ཁྱོད་མཐོང་ནས་བསྟི་སྟང་དང་བཅས་ཏེ་མཆོད་པ་བྱས་པར་གྱུར་ཏོ་ཞེས་སྨྲའོ། །དེ་ནས་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་རིགས་པར་ཐེ་ཙོམ་འདྲི་ཞེས་བྱ་བ་ཞིག་འདུག་པ་སྟན་ལས་ལངས་ནས་གོས་ཚགས་བཅོས་ཏེ་ཕྲག་པ་གཡས་པ་ཕྱུང་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འདི་གང་ནས་མཆིས། གནས་པའི་སངས་རྒྱས་ཀྱི་ཞིང་འདི་ནས་ཇི་སྲིད་ཅིག་ན་མཆིས། ཡོན་ཏན་དང་དགེ་བའི་རྩ་བ་ཇི་ཙམ་ཞིག་དང་ལྡན་ན་བཅོམ་ལྡན་འདས་ཀྱིས་བསྟོད་པ་རྣམ་པ་སྣ་ཚོགས་ཀྱིས་བསྔགས་ལ་ཕྱིར་ཡང་བཅོམ་ལྡན་འདས་ཀྱི་ཡོན་ཏན་གྱི་རྒྱ་མཚོ 60.114b བསམ་གྱིས་མི་ཁྱབ་པ་ལ་མངོན་པར་བསྟོད་པར་གྱུར། བདག་ཅག་གིས་སྔོན་མ་མཐོང་པས་ངོ་མཚར་དུ་གྱུར་ན་བཅོམ་ལྡན་འདས་ཀྱིས་བདག་ཅག་ལ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཐོང་ཤིག་།སྐྱེས་བུ་ཆེན་པོ་འདིའི་ཡོན་ཏན་དང་དགེ་བའི་རྩ་བ་ཇི་ཙམ་པ་དེ་འཇིག་རྟེན་དུ་བཅས་པ་ལྷ་དང་མིའི་འཁོར་ཐམས་ཅད་ཀྱིས་རྟོགས་པར་ནུས་པ་མ་ཡིན་ནོ། །གལ་ཏེ་དེ་བཞིན་གཤེགས་པས་སྐྱེས་བུ་ཆེན་པོ་དེའི་ཡོན་ཏན་དང་དགེ་བའི་རྩ་བ་རྒྱས་པར་བཤད་ན་འཇིག་རྟེན་དུ་བཅས་པ་ལྷ་དང་མི་ཐམས་ཅད་ཀྱི་མགོ་རྨོངས་ཏེ་ཡིད་མི་ཆེས་པར་འགྱུར་རོ། །དེ་ནས་བྱང་ཆུབ་སེམས་དཔའ་རིགས་པར་ཐེ་ཙོམ་འདྲི་བས་ཡང་གསོལ་པ། བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཤིན་དུ་ཉོན་ལ་ཡིད་ལ་ཟུང་ཤིག་དང ། ངས་ཁྱོད་ལ་ཕྱོགས་ཙམ་ཞིག་བཤད་པར་བྱའོ། །ཇི་ལྟར་སྐྱེས་བུ་ཆེན་པོ་དེ་ཡོན་ཏན་གྱི་ཁྱད་པར་ཚད་མེད་བསམ་གྱིས་མི་ཁྱབ་པ་དང་ལྡན་ནོ། །འདི་ལྟ་སྟེ། དཔའ་བར་འགྲོ་བའི་ཏིང་ངེ་འཛིན་གྱི་ཁྱད་པར་ལ་བདེ་བར་གནས་པའོ། །དེ་བཞིན་གཤེགས་པའི་སྤྱོད་ཡུལ་ཡང་ཤིན་དུ་རྟོགས་པར་འཇུག་པའོ། །མི་སྐྱེ་བའི་ཆོས་ཀྱི་བཟོད་པའི་ཁྱད་པར་ཡང་ཐོབ་པའོ། །སངས་རྒྱས་ཀྱི་ཆོས་ཐམས་ཅད་ལ་དབང་དུ་གྱུར་པའོ། །ཐམས་ཅད་མཁྱེན་པའི་ཡེ་ཤེས་ཀྱི་ས་ལ་བཟོད་པ་ཐོབ་པའོ། །ཐམས་ཅད་མཁྱེན་པའི་ཡེ་ཤེས་ཀྱི་རྒྱ་མཚོའི་ཕ་རོལ་དུ་ཕྱིན་པའོ། །སེང་གེ་རབ་ཏུ་བསྒྱིངས་པའི་རྒྱལ་མཚན་གྱི་ཏིང་ངེ་འཛིན་ལ་ཡང་ཤིན་དུ་གནས་པའོ། །ཐམས་ཅད་མཁྱེན་པའི་ཡེ་ཤེས་ཀྱི་རི་ལ་ཡང་རབ་ཏུ་འཛེགས་པའོ། །མུ་སྟེགས་ཅན་དང་ཕས་ཀྱི་རྒོལ་བ་ཐམས་ཅད་ཤིན་དུ་ཆོམས་པ་སྟེ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་སངས་རྒྱས་ཀྱི་ཞིང་ཇི་སྙེད་པ་ཐམས་ཅད་དུ་དེ་གནས་པར་བྱེད་དོ། །སྐྱེས་བུ་ཆེན་པོ་དེ་ཇི་ལྟར 60.115a གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་གནས་ཏེ། གང་ཏིང་ངེ་འཛིན་རྣམས་ཀྱིས་ཚད་མེད་པའི་ཡོན་ཏན་གྱི་ཁྱད་པར་སྐྱེད་པར་གྱུར་པས་གདུལ་བའི་སེམས་ཅན་ཚད་མེད་པ་དག་ཡོངས་སུ་སྨིན་པར་བྱེད་དོ། །སྐྱེས་བུ་ཆེན་པོ་དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཡེ་ཤེས་མངོན་པར་སྐྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་འཐུན་པར་ཏིང་ངེ་འཛིན་རྣམས་ཀྱི་སྤྱོད་ཡུལ་ཀུན་མཐོང་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་དཔག་ཏུ་མེད་པའི་ཡེ་ཤེས་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཅི་ནུས་པ་བཞིན་དུ་ཚད་མེད་པའི་མཆོད་པའི་ཡོ་བྱད་དམ་པས་སངས་རྒྱས་བཅོམ་ལྡན་འདས་དེ་ལ་བསྟི་སྟང་དང་བཅས་པས་མཆོད་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་རྣམ་པར་དག་པའི་ཡེ་ཤེས་ཕུན་སུམ་ཚོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཀྱིས་འཐུན་པར་འདོད་པའི་སྤྱོད་ཡུལ་གྱི་ཉེས་པའི་སྐྱོན་ཚད་མེད་པ་མཐོང་ནས་སེམས་རྣམ་པར་དག་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཁྲེལ་བ་དང་ངོ་ཚ་བ་དང་ལྡན་པའི་ཡེ་ཤེས་ཤེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ལྷག་པའི་འཛེམ་པ་དང་ངོ་ཚ་བ་དང་ལྡན་ཞིང་སྡིག་པ་མི་དགེ་བའི་ཆོས་དང་ཡོངས་སུ་བྲལ་ནས་བསམ་པ་མི་ཉམས་པར་འགྱུར་རོ། །དེ་ཇི་ལྟར་གནས་པ 60.115b བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཐེག་པ་ཐམས་ཅད་དང་ལྡན་པ་གསལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཐབས་མཁས་པའི་རྫུ་འཕྲུལ་གྱི་མིག་གི་མངོན་པར་ཤེས་པ་དང ། སྔོན་གྱི་གནས་དྲན་པའི་མངོན་པར་ཤེས་པ་དང ། འཆི་འཕོ་དང་སྐྱེ་བ་མངོན་པར་ཤེས་པ་དང ། འཇིག་རྟེན་འདི་དང་འཇིག་རྟེན་ཕ་རོལ་གྱི་རྒྱུ་དང་འབྲས་བུ་མངོན་པར་རྟོགས་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མྱ་ངན་མེད་པའི་མངོན་པར་ཤེས་པས་རིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་མྱ་ངན་དང ། ཡི་མུག་པ་དང ། རྨུགས་པ་ཐམས་ཅད་དང་བྲལ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མངོན་པར་ཤེས་པའི་ཁྱད་པར་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན། སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཐབས་མཁས་པའི་མངོན་པར་ཤེས་པ་དང་ལྡན་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་འཇིག་རྟེན་ཀུན་དུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་མུན་པ་དང་བྲལ་ཏེ། སངས་རྒྱས་ཀྱི་ཞིང་དེ་ན་གནས་པ་ཐམས་ཅད་ཀྱང་ཕྱོགས་བཅུའི་སངས་རྒྱས་ཀྱི་ཞིང་ཀུན་མངོན་སུམ་དུ་མཆོད་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་སངས་རྒྱས་ཀྱི་སྒྲོན་མ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས 60.116a ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ལོག་པར་ལྟ་བ་ཡོངས་སུ་སྤངས་ནས། དཀོན་མཆོག་གསུམ་ལ་སྐྱབས་སུ་འགྲོ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་གྱུར་ཏེ། གལ་ཏེ་རྡོ་རྗེའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་གི་རི་ཁོར་ཡུག་དང ། ཁོར་ཡུག་ཆེན་པོ་དང ། རི་རབ་ལྷུན་པོ་དང ། དེ་མ་ཡིན་པའི་པེ་གཞན་དང ། ལུང་བ་དང ། ལུང་ཕྲན་དང ། གཅོང་རོང་དང ། གསེག་མ་དང ། གྱོ་མོ་དང ། ཚེར་མ་དང ། རྩ་དང ། ཤིང་ངན་པ་ཐམས་ཅད་མི་སྣང་ངོ ། །སངས་རྒྱས་ཀྱི་ཞིང་དེ་ན་ཇི་ཙམ་དུ་ངན་པར་གདགས་པ་དུག་དང ། བྱད་སྟེམས་དང ། གཅན་གཟན་མ་རུངས་པ་དང ། ཡེ་འདྲོག་དང ། གློ་བུར་དང ། རིམས་ནད་དང ། ཡུལ་ངན་དང ། ནམ་རྨུགས་པ་དང ། རྡུལ་དང ། དྲི་མ་དང ། མི་གཙང་བའི་ཉལ་ཉིལ་ཐམས་ཅད་ཀྱང་ཞི་ཞིང་མེད་པར་འགྱུར་རོ། །སངས་རྒྱས་ཀྱི་ཞིང་དེའི་ས་གཞི་ཡང་ལག་མཐིལ་བཞིན་དུ་མཉམ་ཞིང་བཀྲ་ཤིས་པ་རྣམ་པ་སྣ་ཚོགས་རང་འབྱུང་བ་དང ། རྣམ་པར་དག་པར་འགྱུར་བ་དང ། ཕུལ་དུ་འགྱུར་བ་དང ། དམ་པར་འགྱུར་བ་དང ། མཚན་མ་བཟང་པོ་དུ་མས་ཡོངས་སུ་བརྒྱན་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཡེ་ཤེས་ཀྱི་སྟོབས་གདུལ་དཀའ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་བདུད་ཀྱི་རྒྱལ་པོ་འཁོར་དང་བཅས་ཏེ་ཐམས་ཅད་འཇིགས་སྐྲག་ནས། དཀོན་མཆོག་གསུམ་ལ་སྐྱབས་སུ་འགྲོ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་གློག་གི་འོད་ཟེར་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་འཇིག 60.116b རྟེན་ཕ་རོལ་གྱི་འཇིགས་པ་དང་བྲལ་ཞིང་ཆོས་ཀྱིས་སྤྲོ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མཆོག་དམ་པའི་རོ་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་བསམས་པ་བཞིན་དུ་ཟས་དང་སྐོམ་གྱིས་ཚིམ་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མཆོག་གི་མདངས་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་གང་ཡང་ལྷག་པའི་མཐུ་སྟོབས་དང་མི་ལྡན་པ་མེད་དེ་ནད་ཀྱི་སྡུག་བསྔལ་ཐམས་ཅད་དང་བྲལ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་མཆོག་དམ་པའི་ཡོ་བྱད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན། ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཅི་ལ་མོས་པ་བཞིན་དུ་ཁྲི་སྟན་དང ། གདིང་བ་དང ། གོས་དང ། རིན་པོ་ཆེའི་རྒྱན་དང ། ཅི་ཙམ་དུ་འཚོ་བའི་ཡོ་བྱད་དུ་གཏོགས་པ་དེ་དག་ཐམས་ཅད་ཀྱིས་བྲེལ་ཞིང་ཕོངས་པ་མེད་དེ་རབ་ཏུ་མཛེས་པ་ཤིན་དུ་ཡིད་དུ་འོང་བ་དང་ལྡན་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་རྩོད་པ་མེད་པའི་ཡེ་ཤེས་ཤེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ལུས་དང ། སེམས་ཟོ་མདོག་བདེ་ཞིང་ཡང་བ་དང ། དགྲ་སྡང་བ་དང ། འཆིང་བ་ཐམས་ཅད་དང་བྲལ་བ་དང ། འདུམ་ཞིང་དགའ་བ་དང ། སྤྲོ་བ་དང ། སྦྱིན་པ་དང ། ཚུལ་ཁྲིམས་དང ། བཟོད་པ་དང ། 60.117a བརྩོན་འགྲུས་རྩོམ་པ་དང ། སེམས་མི་འཁྲུག་པ་དང ། ཤེས་རབ་ཡོངས་སུ་རྫོགས་པ་ལ་དགའ་ཞིང་མོས་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ཕུལ་དུ་གྱུར་པའི་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་ཁྱད་པར་ཅན་གྱི་རབ་ཏུ་དགའ་བ་ཚད་མེད་པ་དང་ལྡན་པར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་འཇིག་རྟེན་པའི་ལམ་གྱི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་ཐོགས་པ་མེད་པའི་ཡེ་ཤེས་ཐོབ་ཅིང་རྣམ་པར་དག་པའི་ལས་རྣམ་པ་སྣ་ཚོགས་སྦྱོང་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་རྒྱལ་བའི་རྡོ་རྗེ་ལ་ཤིན་དུ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་ན་གནས་པའི་སེམས་ཅན་ཐམས་ཅད་དབང་པོ་ཀུན་དང་ལྡན་ཞིང་དབང་པོ་མི་ཉམས་པ་དང ། རྟག་ཏུ་ཡང་དག་པར་འབྱུང་བའི་ལམ་ལ་མོས་ཤིང་སེམས་རབ་ཏུ་ཞི་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་ལྷག་པའི་རྒྱལ་མཚན་རྟོག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་བདག་སྡིག་པ་མི་དགེ་བའི་ཆོས་ལ་ཤིན་དུ་སྐྱོ་ཞིང་མི་འདོད་པ་དང ། ཐམས་ཅད་ཀྱང་དགེ་བ་སྲུང་བ་དང ། དགེ་བ་བཅུའི་ལས་ཀྱི་ལམ་གྱིས་མཐོ་རིས་ཀྱི་ལྷར་སྐྱེ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་བྱམས་པ་དང ། སྙིང་རྗེར་ལྡན་པ་ཞེས་བྱ་བའི་ཏིང་ངེ་འཛིན་ལ་ 60.117b བསྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ན་གནས་པའི་སེམས་ཅན་ཐམས་ཅད་བྱམས་པའི་སེམས་དང ། སྙིང་རྗེའི་སེམས་དང ། གནོད་པ་འམ། འཚེ་བ་མེད་པའི་སེམས་དང ། ཀུན་ལ་སྙོམས་པའི་སེམས་དང ། གཅིག་ལ་གཅིག་ཕན་པ་དང་བདེ་བར་བྱེད་པའི་སེམས་སྐྱེ་བར་འགྱུར་རོ། །དེ་ཇི་ལྟར་གནས་པ་བཞིན་དུ་སངས་རྒྱས་ཀྱི་ཞིང་རྣམས་ཀྱང་དེ་བཞིན་དུ་འགྱུར་ཏེ། གལ་ཏེ་བསོད་ནམས་ཐམས་ཅད་ཤིན་དུ་སྡུད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་ཐམས་ཅད་འཐབ་པ་དང ། རྩོད་པ་དང ། ནད་དང ། མུ་གེ་དང་ཡོངས་སུ་བྲལ་ཏེ། དུས་མ་ཡིན་པའི་རླུང་དང ། ཆར་པ་དང ། ཁ་བ་དང ། རྩུབ་པ་དང ། ཚ་བ་དང ། སྡུག་བསྔལ་བ་ལ་སོགས་པའི་རེག་བྱའི་ཡུལ་ཡིད་དུ་མི་འོང་བ་ཐམས་ཅད་ཡོངས་སུ་ཞི་བར་འགྱུར་རོ། །དེ་ལྟར་སྐྱེས་བུ་ཆེན་པོ་དེ་གལ་ཏེ་རྒྱ་མཚོ་གློག་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ན་ཏིང་ངེ་འཛིན་དེའི་མཐུས་སངས་རྒྱས་ཀྱི་ཞིང་དེ་དག་གི་ས་ཆེན་པོ་ཐམས་ཅད་རིན་པོ་ཆེ་རྣམ་པ་སྣ་ཚོགས་ལས་བྱས་པར་འགྱུར་ཞིང་ཉེས་པའི་སྐྱོན་ཐམས་ཅད་དང་ཡོངས་སུ་བྲལ་ཏེ་རྣམ་པ་སྣ་ཚོགས་ཀྱི་རིན་པོ་ཆེའི་ཤིང་དང ། གོས་ཀྱི་ཤིང་དང ། སྣོད་ཀྱི་ཤིང་དང ། རྒྱན་གྱི་ཤིང་དང ། མེ་ཏོག་གི་ཤིང་དང ། འབྲས་བུའི་ཤིང་དང ། རོལ་མོ་སྣ་ཚོགས་ཀྱི་ཤིང་ལ་སོགས་པ་འཚོ་བའི་ཡོ་བྱད་དམ་པ་ཚད་མེད་པ་སྙེད་ཀྱིས་ཡོངས་སུ་བརྒྱན་པར་གྱུར་ཏོ། །དེ་བཞིན་དུ་མདོར་ན་རིགས་ཀྱི་བུ་དེ་ནི་སེམས་ཅན་མང་པོ་ཡོངས་སུ་སྨིན་པར་བྱ་བའི་ཕྱིར་ཉིན་རེ་ཞིང་སྔ་དྲོའི་དུས་སུ་ཏིང་ངེ་འཛིན་གང་གཱའི་ཀླུང་གི་བྱེ་མ་སྙེད་དག་གི་ཏིང་ངེ་འཛིན་ལ་སྙོམས་པར་འཇུག་སྟེ། ཏིང་ངེ་འཛིན་དེ་ལས་ལངས་ནས་ཕྱོགས་བཅུའི་སངས་རྒྱས་ཀྱི་ཞིང་ཀུན་ན་གདུལ་བའི་སེམས་ཅན་ཐམས་ཅད་ལ་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་དེ་དང་དེ་དག 60.118a གིས་ཡོངས་སུ་སྨིན་པར་བྱེད་དོ། །རིགས་ཀྱི་བུ་འདི་ནི་སྔོན་བསྐལ་པ་ཆེན་པོ་ཚད་མེད་དཔག་ཏུ་མེད་པའི་བར་དུ་རྙོག་པ་ལྔའི་ཚེ་དེ་བཞིན་གཤེགས་པ་མི་བཞུགས་པའི་འཇིག་རྟེན་གྱི་ཁམས་སུ་སེམས་ཅན་ཡོངས་སུ་སྨིན་པར་བྱེད་དོ། །ཕྱི་མ་མ་འོངས་པའི་དུས་སུ་འཇིག་རྟེན་གྱི་ཁམས་ལ་ལར་གལ་ཏེ་མཚོན་གྱིས་འཇིགས་པ་བྱུང་སྟེ། སེམས་ཅན་དག་ཡོངས་སུ་གདུངས་པར་གྱུར་ན། རིགས་ཀྱི་བུ་འདི་དེ་ལྟ་བུ་དག་མཐོང་ནས་སྔ་དྲོའི་དུས་ཀྱི་ཚེ་ཏིང་ངེ་འཛིན་རྣམས་ཀྱི་མཐུས་མཚོན་གྱིས་འཇིགས་པ་དེ་དག་ཡོངས་སུ་བཅིལ་ནས་སེམས་ཅན་རྣམས་གཅིག་ལ་གཅིག་བྱམས་པའི་སེམས་ཀྱིས་སྙིང་བརྩེ་བར་བྱེད་དོ། །འཇིག་རྟེན་གྱི་ཁམས་ལ་ལར་ནད་ཀྱིས་འཇིགས་པ་བྱུང་སྟེ་སེམས་ཅན་ཁ་བཏག་པ་ན་རིགས་ཀྱི་བུ་འདིས་དེ་ལྟ་བུ་དག་མཐོང་ནས་སྔ་དྲོའི་དུས་ཀྱི་ཚེ་ཏིང་ངེ་འཛིན་རྣམས་ཀྱི་མཐུས་ནད་ཀྱིས་འཇིགས་པ་ཡོངས་སུ་བཅིལ་ནས་སེམས་ཅན་རྣམས་རབ་ཏུ་བདེ་བ་ཐོབ་པར་བྱེད་དོ། །འཇིག་རྟེན་གྱི་ཁམས་ལ་ལར་གལ་ཏེ་མུ་གེས་འཇིགས་པ་བྱུང་སྟེ་སེམས་ཅན་ཁ་བཏག་པ་ན། རིགས་ཀྱི་བུ་འདིས་དེ་ལྟ་བུ་དག་མཐོང་ནས་སྔ་དྲོའི་དུས་ཀྱི་ཚེ་ཏིང་ངེ་འཛིན་གྱི་མཐུས་མུ་གེས་འཇིགས་པ་ཡོངས་སུ་བཅིལ་ཏེ་སེམས་ཅན་རྣམས་ཁ་ཟས་ཀྱིས་ཡོངས་སུ་ཚིམ་པར་བྱེད་དོ། །རིགས་ཀྱི་བུ་འདིས་དེ་ལྟར་ཏིང་ངེ་འཛིན་མང་པོའི་ཤུགས་ཀྱིས་དེ་ལྟ་བུ་ལ་སོགས་པ་ཚད་མེད། དཔག་ཏུ་མེད། བསམ་གྱིས་མི་ཁྱབ་པའི་ཕན་པ་དང་བདེ་བའི་དོན་གྱིས་སེམས་ཅན་གྱི་དབུགས་འབྱིན་ཏོ། །རིགས་ཀྱི་བུ་འདི་དེ་ལྟར་ནན་ཏན་གྱི་ཁྱད་པར་ཚད་མེད་གྲངས་མེད་པ། བསམ་གྱིས་མི་ཁྱབ་པ་དང་ལྡན་པས་སེམས་ཅན་ཐམས་ཅད་ལ་ཕན་པ་དང ། བདེ་བར་བྱེད་པའི་དོན་ལ་རབ་ཏུ་བརྩོན་པའོ། །སྔོན་འདས་པའི་དུས་ན་སྐྱེ་བོ་མང་པོ་ལ་ཕན་པ་དང་བདེ་བ་དང་ཡོངས་སུ་སྨིན་པར་བྱ་བའི་ཕྱིར་སངས་རྒྱས་བཅོམ་ལྡན་འདས་ཚད་མེད་གྲངས 60.118b མེད་པ་གང་གཱའི་ཀླུང་གི་བྱེ་མ་སྙེད་ལས་ཟད་མི་ཤེས་པའི་ཡི་དམ་ཆེན་པོ་བཅས་ཏེ་སྙིང་རྗེ་ཆེན་པོ་དང ། མི་འཕྲོགས་པའི་བརྩོན་འགྲུས་ཆེན་པོ་རབ་ཏུ་བསྐྱེད་དོ། །དེ་ལྟར་སྙིང་རྗེ་ཆེན་པོ་དང་མི་འཕྲོགས་པའི་བརྩོན་འགྲུས་བསྐྱེད་དེ་ཟད་མི་ཤེས་པའི་ཡི་དམ་བཅས་པས་གོང་ནས་གོང་དུ་འཕགས་པའི་ཤུགས་ཀྱིས་ཉིན་ཞག་གཅིག་གམ། སྐད་ཅིག་ཐང་ཅིག་ཙམ་གྱིས་ཀྱང་སོ་སོའི་སྐྱེ་བོ་ཚད་མེད་པ་བྱེ་བ་ཁྲག་ཁྲིག་བཏུལ་ཏེ། སྡུག་བསྔལ་རྣམ་པ་སྣ་ཚོགས་ལས་བསྒྲལ་ནས་ཐམས་ཅད་ཅི་དང་ཅི་འདོད་པ་དེ་དང་དེ་དག་གིས་རེ་བ་ཡོངས་སུ་རྫོགས་པར་བྱེད་དོ། །གནས་གང་དག་ན་སེམས་ཅན་གང་འདོད་པ་རྣམ་པ་སྣ་ཚོགས་ཀྱིས་སྡུག་བསྔལ་ཏེ། འདོད་པས་ཡོངས་སུ་གདུངས་པར་གྱུར་པ་དག་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང ། དམིགས་པས་བསྟི་སྟང་དང་བཅས་པས་མཆོད་པ་བྱས་ན་ཅི་དང་ཅི་འདོད་པ་ཐམས་ཅད་འཐོབ་ཅིང་སྡུག་བསྔལ་དང་བྲལ་ཏེ། སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་བཟའ་བ་དང ། བཏུང་བས་ཕོངས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན་ཅི་དང་ཅི་འདོད་པ་ཐམས་ཅད་འཐོབ་ཅིང་བཟའ་བ་དང་བཏུང་བ་དང་ལྡན་ཏེ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་བགོ་བ་འམ། རིན་པོ་ཆེའི་རྒྱན་ནམ། ནད་ཀྱི་རྐྱེན་སྨན་ནམ། གདིང་བ་འམ། ཁྲི་སྟན་ནམ། འཚོ་བའི་ཡོ་བྱད་ཀྱིས་བྲེལ་ཅིང་ཕོངས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང 60.119a དམིགས་པས་བསྟི་སྟང་དང་བཅས་པས་མཆོད་པ་བྱས་ན་ཅི་དང་ཅི་འདོད་པ་རྙེད་ཅིང་བགོ་བ་དང ། རིན་པོ་ཆེའི་རྒྱན་དང ། ནད་ཀྱི་རྐྱེན་སྨན་དང ། གདིང་བ་དང ། ཁྲི་དང ། འཚོ་བའི་ཡོ་བྱད་ཐམས་ཅད་འབྱོར་ཅིང་སྐལ་བ་ཇི་ལྟ་བ་བཞིན་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་བྱམས་སྡུག་པ་དང་བྲལ་ཏེ། དགྲ་སྡང་བར་གྱུར་པ་དང་ཕྲད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། བྱམས་སྡུག་པ་དང་ཕྲད་ཅིང་དགྲ་སྡང་བ་དང་བྲལ་ཏེ། སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་ལུས་དང་སེམས་ནད་དང་སྡུག་བསྔལ་མང་པོས་གཟིར་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན་དེ་ཀུན་ལུས་དང་སེམས་བདེ་ཞིང་ནད་ཐམས་ཅད་དང་བྲལ་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་འཐབ་ཅིང་རྩོད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་ལུས་སེམས་བདེ་ཞིང་ནད་ཐམས་དང་བྲལ་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ།[་]།གནས་གང་དག་ན་སེམས་ཅན་གང་འཐབ་ཅིང་རྩོད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ 60.119b སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན་ཞེ་འགྲས་པའི་སེམས་དང་བྲལ་ཏེ་གཅིག་ལ་གཅིག་དགའ་བ་དང ། བཟོད་པ་དང ། གཅིག་ལ་གཅིག་བྱམས་པའི་སེམས་ཀྱིས་འགྱོད་ཅིང་ཆགས་པར་འགྱུར་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་བཙོན་དུ་བཟུང་སྟེ་བཙོན་རར་བཅུག་གམ། ལྕགས་དང ། ཁོང་སྒྲིལ་དང ། ཤིང་གི་གདོས་ཀྱིས་བཅིངས་སམ། ཡན་ལག་བཅིངས་ཏེ་སྡུག་བསྔལ་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་བཙོན་ར་དང ། ལྕགས་དང ། ཁོང་སྒྲིལ་དང ། ལྕགས་སྒྲོག་ལས་ཐར་ཏེ་བག་ཡོངས་སུ་གྱུར་ནས་དགའ་བ་དང ། སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་བཙོན་དུ་བཟུང་ནས་གཞུ་བ་འམ། འཚོག་པ་འམ། ནན་ལ་བོར་བ་དང ། གསོད་པ་ལ་ཐུག་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་བཙོན་དུ་བཟུང་བ་དང ། གཞུ་འཚོག་པ་དང ། ནན་ལ་བོར་བ་ལས་ཐམས་ཅད་ཐར་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་ལུས་དང་སེམས་དུབ་པ་དང ། མཐུ་སྟོབས་དང་མི་ལྡན་ཅིང ། ཉམ་ཆུང་བ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང 60.120a བཅས་པས་མཆོད་པ་བྱས་ན་དེ་ཀུན་ལུས་དང་སེམས་ཡང་ཞིང་བདེ་བ་དང་མཐུ་སྟོབས་བསྐྱེད་དེ་ཅིས་འདུལ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་དབང་པོ་ཉམས་པ་དང་མ་ཚང་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་དབང་པོ་མ་ཚང་བ་མེད་ཅིང་དབང་པོ་དང་ལྡན་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་སྨྱོས་ཤིང་སེམས་འཁྲུགས་སམ། འབྱུང་པོའི་གདོན་གྱིས་བརླམས་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། དེ་ཀུན་སྨྱོས་ཤིང་སེམས་འཁྲུགས་པ་དང་བྲལ་ཏེ་རབ་ཏུ་བདེ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་འདོད་ཆགས་དང ། ཞེ་སྡང་དང ། གཏི་མུག་དང ། ཁོང་ཁྲོ་བ་དང ། ཕྲག་དོག་དང ། ང་རྒྱལ་དང ། ངན་པར་ལྟ་བ་དང ། གཉིད་དང ། བག་མེད་པ་དང ། ཐེ་ཙོམ་ལ་སོགས་པས་ལུས་དང་སེམས་གདུངས་ཏེ་མི་འཕོ་བར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་ཏེ་མཆོད་པ་བྱས་ན། དེ་ཀུན་འདོད་ཆགས་ལ་སོགས་པ་དང་བྲལ་ཏེ་ལུས་དང་སེམས་རབ་ཏུ་བདེ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་མེས་ཚིག་པར་གྱུར་པ་འམ། ཆུས་ཁྱེར་བ་འམ། རླུང 60.120b གིས་ཁྱེར་བ་འམ། རྦབ་ཏུ་ལྷུང་བ་འམ། ཤིང་ཀ་འམ། ཁང་ཐོག་ནས་ལྷུང་སྟེ་སེམས་དངངས་ཤིང་འཁུམས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་མི་བདེ་བའི་བགེགས་དང ། གཡང་ས་དེ་དག་ཐམས་ཅད་ལས་ཐར་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་སྦྲུལ་གདུག་པ་འམ། གཅན་གཟན་གདུག་པས་ཟིན་ཏམ། དུག་རྣམ་པ་སྣ་ཚོགས་ཀྱིས་ཕོག་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་འཚེ་ཞིང་གནོད་པ་ཐམས་ཅད་དང་བྲལ་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་འབྱུང་པོའི་གདོན་གྱིས་བཏབ་སྟེ་རྟག་པའི་རིམས་དང ། ཞག་གཅིག་པ་དང ། ཞག་གཉིས་པ་དང ། ཞག་གསུམ་པ་དང ། ཞག་བཞི་པ་དང ། སྨྱོས་ནས་ལུས་དང་སེམས་འདར་ཞིང་འཁྲུགས་ཏེ། དྲན་པ་ཉམས་ཤིང་ཤེས་པ་མེད་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན། དེ་ཀུན་འཇིགས་པ་ལས་རྣམ་པར་གྲོལ་ཏེ་ལུས་དང་སེམས་རབ་ཏུ་བདེ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་གནོད་སྦྱིན་དང ། སྲིན་པོ་དང་འབྱུང་པོ་དང ། ཤ་ཟ་དང ། སྲུལ་པོ་དང ། ལུས་སྲུལ་པོ་དང ། གྲུལ་བུམ་དང ། མདངས་ཟ་བ་དང ། 60.121a དེ་མ་ཡིན་པ་གཞན་ཡང་སེང་གེ་དང ། སྟག་དང ། སྤྱང་གི་ལ་སོགས་པ་གཅན་གཟན་གདུག་པས་ཉེན་པ་དང ། སྔགས་དང ། བྱད་དང ། གཡུལ་ངོར་ལྷགས་པ་དང ། གཞན་ཡང་འཇིགས་པར་གྱུར་པ་རྣམ་པ་སྣ་ཚོགས་ཀྱིས་དཀྲིས་ཤིང་ཀླགས་ཏེ། ལུས་དང་སེམས་རབ་ཏུ་དངངས་པར་གྱུར་ནས་ཤི་བས་འཇིགས་ཤིང་འཚོ་བར་འདོད་པ་དང ། བདེ་བ་ཚོལ་ཞིང་སྡུག་བསྔལ་མི་འདོད་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་པ་བྱས་ན་དེ་ཀུན་འཇིགས་པ་ཐམས་ཅད་དང་བྲལ་ཏེ་ལུས་དང་སྲོག་ལ་མི་དམའ་བ་དང་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་མང་དུ་ཐོས་པར་འདོད་པ་འམ། མོས་པ་དག་པར་འདོད་པ་འམ། ཚུལ་ཁྲིམས་དག་པར་འདོད་པ་འམ། བསམ་གཏན་བསྒྲུབ་པར་འདོད་པ་འམ། མངོན་པར་ཤེས་པ་འདོད་པ་འམ། ཤེས་རབ་འདོད་པ་འམ། རྣམ་པར་གྲོལ་བ་འདོད་པ་འམ། གཟུགས་དམ་པ་འདོད་པ་འམ། སྒྲ་སྙན་པ་འདོད་པ་འམ། དྲི་ཞིམ་པོ་འདོད་པ་འམ། རོ་ཞིམ་པོ་འདོད་པ་འམ། རེག་བྱ་མཆོག་འདོད་པ་འམ། ཁེ་དང་རྙེད་པ་འདོད་པ་འམ། གྲགས་པ་འདོད་པ་འམ། བསོད་ནམས་འདོད་པ་འམ། བཟོས་འཚོ་བར་འདོད་པ་འམ། མེ་ཏོག་དང ། འབྲས་བུ་འདོད་པ་འམ། སྐྱེད་མོས་ཚལ་འདོད་པ་འམ། ཁྲི་སྟན་འདོད་པ་འམ། གདིང་བ་འདོད་པ་འམ། ཡུལ་གྱུ་པར་འདོད་པ་འམ། ནོར་དང་འབྲུ་འདོད་པ་འམ། ནད་ཀྱི་རྐྱེན་སྨན་འདོད་པ་འམ། ཁང་ཁྱིམ་འདོད་པ་འམ། བྲན་ཁོལ་འདོད་པ་འམ། ཚོན་རྩི་འདོད་པ་འམ། ཆར་པ་འདོད་པ་འམ། ཆུ་འདོད་པ་འམ། ལོ་ཐོག་འདོད་པ་འམ། བསིལ་ཡབ་འདོད་པ་འམ། རླུང་བསིལ་བ་འདོད་པ་འམ། མེ་འདོད་པ་འམ། ཐེག་པ་འདོད་པ་འམ། བུ་ཕོ་དང་བུ་མོ 60.121b འདོད་པ་འམ། ཐབས་མཁས་པར་འདོད་པ་འམ། བསོད་ནམས་བྱ་བར་འདོད་པ་འམ། དྲོ་བར་འདོད་པ་འམ། བསིལ་བར་འདོད་པ་འམ། ཡིད་གཞུངས་པར་འདོད་པ་འམ། དེ་མ་ཡིན་པ་འཇིག་རྟེན་དང་འཇིག་རྟེན་ལས་འདས་པའི་དོན་གྱི་དངོས་པོ་རྣམ་པ་སྣ་ཚོགས་འདོད་པའི་ཕྱིར་ཉོན་མོངས་ཤིང་སྡུག་བསྔལ་གྱི་གདུངས་པར་གྱུར་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་སྟི་སྟང་དང་བཅས་ཏེ་མཆོད་པ་བྱས་ན། རིགས་ཀྱི་བུ་དེའི་ཏིང་ངེ་འཛིན་དམ་པའི་ཡོན་ཏན་དང ། མཐུ་དང་གཟི་བརྗིད་ཀྱི་ཤུགས་ཀྱིས་དེ་དག་ཐམས་ཅད་སྡུག་བསྔལ་གྱིས་གདུངས་པ་དང་བྲལ་ཏེ། རེ་བ་ཐམས་ཅད་ཡོངས་སུ་རྫོགས་ནས་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །གནས་གང་དག་ན་སེམས་ཅན་གང་དག་ཞིང་གཤིན་པ་འམ། ཞིང་མི་གཤིན་པ་ལ་ས་བོན་བཏབ་ནས། གལ་ཏེ་ནན་ཏན་བྱས་ཀྱང་རུང ། ནན་ཏན་མ་བྱས་ཀྱང་རུང་སྟེ། སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་སྟི་སྟང་དང་བཅས་ཏེ་མཆོད་པ་བྱས་ན། རིགས་ཀྱི་བུ་དེའི་ཏིང་ངེ་འཛིན་དམ་པའི་ཡོན་ཏན་དང ། མཐུ་དང ། གཟི་བརྗིད་ཀྱི་ཤུགས་ཀྱིས་དེ་དག་གི་ལོ་ཐོག་ཐམས་ཅད་ལེགས་ཤིང་འབྲས་བུ་སྨིན་ཅིང་ལེགས་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་འདི་ནི་སྔོན་བསྐལ་པ་ཆེན་པོ་ཚད་མེད་གྲངས་མེད་པའི་བར་དུ་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་དག་ལ་བརྩོན་འགྲུས་ཆེན་པོའི་སྦྱོར་བ་དང ། བརྟན་པའི་ཡི་དམ་བཅས་པའི་སྨོན་ལམ་གྱི་དབང་གིས་སེམས་ཅན་ཡོངས་སུ་སྨིན་པར་བྱ་བའི་ཕྱིར་རྟག་ཏུ་ས་ཆེན་པོ་ཐམས་ཅད་ཡོངས་སུ་འཛིན་པ་དང ། རྟག་ཏུ་ས་བོན་གྱི་ཚོགས་ཐམས་ཅད་ཡོངས་སུ་འཛིན་ཅིང་རྟག་ཏུ་སེམས་ཅན་ཐམས 60.122a ཅད་ཀྱིས་ཡིད་བཞིན་དུ་སྤྱོད་པར་བྱེད་དོ། །རིགས་ཀྱི་བུ་དེའི་རྫུ་འཕྲུལ་གྱི་མཐུས་ས་ཆེན་པོ་འདི་ལས་སྐྱེ་བའི་རྩཝ་དང ། ཤིང་གི་རྩ་བ་དང ། ཡལ་ག་དང ། མྱུ་གུ་དང ། ལོ་མ་དང ། སྡོང་པོ་དང ། འདབ་མ་དང ། མེ་ཏོག་དང ། འབྲས་བུ་ལ་སོགས་པ་ཐམས་ཅད་རྒྱས་པར་སྐྱེ་ཤིང ། རྩི་ཤིང་དང ། ལོ་ཏོག་ལ་སོགས་པའི་མེ་ཏོག་དང ། འབྲས་བུ་ཡང་སྨིན་ཅིང་གྲུང་བ་དང ། མངར་བ་དང ། སྣུམ་པ་དང ། དྲི་ཞིམ་པར་བྱེད་དོ། །གནས་གང་དག་ན་སེམས་ཅན་གང་དག་འདོད་ཆགས་དང ། ཞེ་སྡང་དང ། གཏི་མུག་ལ་སོགས་པ་དྲག་ལ་རྣོ་བས་སྲོག་གཅོད་པ་དང ། མ་བྱིན་པར་ལེན་པ་དང ། འདོད་པས་ལོག་པར་གཡེམ་པ་དང ། བརྫུན་དུ་སྨྲ་བ་དང ། ངག་རྩུབ་པོར་སྨྲ་བ་དང ། ཕྲ་མ་བྱེད་པ་དང ། ཚིག་ཀྱལ་པར་སྨྲ་བ་དང ། འདོད་ཆགས་ཅན་དང ། ཞེ་སྡང་དང ། ལོག་པར་ལྟ་བ་དང ། མི་དགེ་བ་བཅུའི་ལས་ཀྱི་ལམ་མངོན་དུ་སྤྱོད་པ་དག་གིས་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད་ཅིང་དམིགས་པས་སྟི་སྟང་དང་བཅས་ཏེ་མཆོད་པ་བྱས་ན་ཉོན་མོངས་པ་ཐམས་ཅད་ཞི་ཞིང་མི་དགེ་བ་བཅུ་དང་ཡོངས་སུ་བྲལ་ཏེ་དགེ་བ་བཅུའི་ལས་ཀྱི་ལམ་དང་ལྡན་ཞིང་སེམས་ཅན་ཐམས་ཅད་ལ་བྱམས་པ་དང ། སྙིང་རྗེ་བ་དང ། ཕན་པ་དང ། བདེ་བའི་སེམས་སྐྱེ་བར་འགྱུར་རོ། །དེ་ལྟར་རིགས་ཀྱི་བུ་འདི་ནི་དེ་ལྟ་བུའི་ཡོན་ཏན་དམ་པ་དང ། ཏིང་ངེ་འཛིན་དང ། མཐུ་དང ། གཟི་བརྗིད་ཀྱི་ཤུགས་དང ། ཤིན་དུ་བརྩོན་པའི་ཏིང་ངེ་འཛིན་གྱིས་སྐད་ཅིག་ཐང་ཅིག་ཏུ་སངས་རྒྱས་ཀྱི་ཞིང་ཚད་མེད་གྲངས་མེད་པར་ཕྱིན་ཅིང ། སངས་རྒྱས་ཀྱི་ཞིང་དེ་རེ་རེར་ཡང་སྐད་ཅིག་ཐང་ཅིག་གིས་སེམས་ཅན་སྣོད་དུ་གྱུར་པ། ཚད་མེད་གྲངས་མེད་པ་གང་གཱའི་ཀླུང་གི་བྱེ་མ་སྙེད་སྡུག་བསྔལ་ལས་བསྒྲལ་ནས་བདེ་བ་ཐོབ་པར་བྱས་ཏེ་སྐལ་བ་ཇི་ལྟ་བ་བཞིན་དུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་འཐོབ་པར་འགྱུར་རོ། །དེ་ལྟར་རིགས་ཀྱི་བུ་དེ་ནི་དེ་ལྟ་བུའི་ཡོན་ཏན་དང ། སྨོན་ལམ་བརྟན་པ་དང ། ཤིན་དུ་འབད་པའི་བརྩོན་འགྲུས་བསམ་གྱིས་མི་ཁྱབ 60.122b པ་དང་ལྡན་ཏེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་སུ་ཁ་ཅིག་ལ་ནི་ཚངས་པ་ཆེན་པོའི་རྒྱལ་པོའི་ལུས་སུ་སྟོན་ཏེ་སེམས་ཅན་རྣམས་ཅིས་འདུལ་བའི་ཆོས་སྟོན་ཏོ། །ཁ་ཅིག་ལ་ནི་དབང་ཕྱུག་ཆེན་པོའི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་འདོད་པའི་ཁམས་ཀྱི་གཞན་འཕྲུལ་དབང་བྱེད་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་འཕྲུལ་དགའ་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་དགའ་ལྡན་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་རབ་མཚེ་མ་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་སུམ་བཅུ་རྩ་གསུམ་གནམ་གྱི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་རྒྱལ་ཆེན་བཞིའི་ལྷའི་ལུས་སུ་སྟོན་ཏོ། །ཁ་ཅིག་ལ་ནི་སངས་རྒྱས་ཀྱི་སྐུར་སྟོན་ཏོ། །ཁ་ཅིག་ལ་ནི་བྱང་ཆུབ་སེམས་དཔའི་ལུས་སུ་སྟོན་ཏོ། །ཁ་ཅིག་ལ་ནི་རང་སངས་རྒྱས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་ཉན་ཐོས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་འཁོར་ལོས་སྒྱུར་བའི་རྒྱལ་པོའི་ལུས་སུ་སྟོན་ཏོ། །ཁ་ཅིག་ལ་ནི་རྒྱལ་རིགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་བྲམ་ཟེའི་ལུས་སུ་སྟོན་ཏོ། །ཁ་ཅིག་ལ་ནི་དམངས་རིགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་རྗེའུ་རིགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་སྐྱེས་པའི་ལུས་སུ་སྟོན་ཏོ། །ཁ་ཅིག་ལ་ནི་བུད་མེད་ཀྱི་ལུས་སུ་སྟོན་ཏོ། །ཁ་ཅིག་ལ་ནི་གཞོན་ནུའི་ལུས་སུ་སྟོན་ཏོ། །ཁ་ཅིག་ལ་ནི་བུ་མོའི་ལུས་སུ་སྟོན་ཏོ། །ཁ་ཅིག་ལ་ནི་དྲི་ཟའི་ལུས་སུ་སྟོན་ཏོ། །ཁ་ཅིག་ལ་ནི་ལྷ་མ་ཡིན་གྱི་ལུས་སུ་སྟོན་ཏོ། །ཁ་ཅིག་ལ་ནི་མིའམ་ཅིའི་ལུས་སུ་སྟོན་ཏོ། །ཁ་ཅིག་ལ་ནི་ལྟོ་འཕྱེ་ཆེན་པོའི་ལུས་སུ་སྟོན་ཏོ། །ཁ་ཅིག་ལ་ནི་ཀླུའི་ལུས་སུ་སྟོན་ཏོ། །ཁ་ཅིག་ལ་ནི་གནོད་སྦྱིན་གྱི་ལུས་སུ་སྟོན་ཏོ། །ཁ་ཅིག་ལ་ནི་སྲིན་པོའི་ལུས་སུ་སྟོན་ཏོ། །ཁ་ཅིག་ལ་ནི་གྲུལ་བུམ་གྱི་ལུས་སུ་སྟོན་ཏོ། །ཁ་ཅིག་ལ་ནི་ཤ་ཟའི་ལུས་སུ་སྟོན་ཏོ། །ཁ་ཅིག་ལ་ནི་ཡི་དགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་སྲུལ་པོའི་ལུས་སུ་སྟོན་ཏོ། །ཁ་ཅིག་ལ་ནི་ལུས་སྲུལ་པོའི་ལུས་སུ་སྟོན་ཏོ། ། 60.123a ཁ་ཅིག་ལ་ནི་གནོན་པོའི་ལུས་སུ་སྟོན་ཏོ། །ཁ་ཅིག་ལ་ནི་སེང་གེའི་ལུས་སུ་སྟོན་ཏོ། །ཁ་ཅིག་ལ་ནི་སྤོས་ཀྱི་བ་ལང་གི་ལུས་སུ་སྟོན་ཏོ། །ཁ་ཅིག་ལ་ནི་རྟའི་ལུས་སུ་སྟོན་ཏོ། །ཁ་ཅིག་ལ་ནི་ཁྱུ་མཆོག་གི་ལུས་སུ་སྟོན་ཏོ། །ཁ་ཅིག་ལ་ནི་གཅན་གཟན་སྣ་ཚོགས་ཀྱི་ལུས་སུ་སྟོན་ཏོ། །ཁ་ཅིག་ལ་ནི་གཤིན་རྗེའི་ལུས་སུ་སྟོན་ཏོ། །ཁ་ཅིག་ལ་ནི་སེམས་ཅན་དམྱལ་བའི་སྲུངས་མའི་ལུས་སུ་སྟོན་ཏོ། །ཁ་ཅིག་ལ་ནི་སེམས་ཅན་དམྱལ་བའི་སེམས་ཅན་གྱི་ལུས་སུ་སྟོན་ཏོ། །དེ་དག་ལ་སོགས་པ་ཚད་མེད་གྲངས་མེད་པའི་རྣམ་པ་སྣ་ཚོགས་ཀྱི་ལུས་སྟོན་ཅིང་སྐྱེ་བོ་མང་པོ་ལ་སྐལ་བ་ཇི་ལྟ་བ་བཞིན་དུ་ཆོས་སྟོན་པས་ཐེག་པ་གསུམ་ལས་ཕྱིར་མི་ལྡོག་པའི་ས་ལ་འཛུད་དོ། །རིགས་ཀྱི་བུ་སྐྱེས་བུ་ཆེན་པོ་དེ་ནི་དེ་ལྟར་དེ་ལྟ་བུའི་བསམ་གྱིས་མི་ཁྱབ་པའི་ཡོན་ཏན་གྱི་ཁྱད་པར་དང་ལྡན་ཏེ། དེ་ནི་ཡོན་ཏན་མཆོག་ཏུ་གྱུར་པ་ཕུལ་དུ་གྱུར་པའི་གཏེར་ཡིན་ནོ། །རྣམ་པར་གྲོལ་བ་རིན་པོ་ཆེ་ཐམས་ཅད་འབྱུང་བའི་འབྱུང་གནས་ཡིན་ནོ། །བྱང་ཆུབ་སེམས་དཔའ་མང་པོའི་མིག་ཡོངས་སུ་དག་པ་ཡིན་ནོ། །མྱ་ངན་ལས་འདའ་བའི་གྲོང་ཁྱེར་ཆེན་པོར་འགྲོ་བའི་དེད་དཔོན་ཡིན་ནོ། །དེ་ལྟར་ཆེད་དུ་མ་བྱས་པར་གོང་དུ་རྒྱས་པར་བཤད་པའི་ཡོན་ཏན་ཆེན་པོས་ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བ་ཡིན་ནོ། །འདི་ལྟ་སྟེ། རིགས་ཀྱི་བུ་གལ་ཏེ་འགའ་ཞིག་གིས་བྱམས་པ་འམ། འཇམ་དཔལ་ལམ། ཀུན་དུ་སྤྱན་རས་གཟིགས་སམ། ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་ལ་བསྐལ་པ་བརྒྱའི་བར་དུ་སེམས་རྩེ་གཅིག་ཏུ་སྐྱབས་སུ་སོང་ནས་དེ་དག་གི་མཚན་ནས་བརྗོད་ཅིང་དམིགས་པས་བསྟི་སྟང་དང་བཅས་པས་མཆོད་ཅིང་ཕྱག་འཚལ་བ་དང ། འདོད་པའི་རེ་བའི་ཕྱིར་སྨོན་ལམ་བཏབ་པ་བས་འགའ་ཞིག་གིས་སྐད་ཅིག་ཐང་ཅིག་ཡུད་ཙམ་སེམས་རྩེ་གཅིག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་མཚན་ནས་བརྗོད 60.123b ཅིང་དམིགས་པས་སྟི་སྟང་དང་བཅས་པས་མཆོད་པ་དང་ཕྱག་བྱས་ན་རེ་བའི་སྨོན་ལམ་ཐམས་ཅད་མྱུར་དུ་འགྲུབ་ཅིང་རྫོགས་པར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་འདི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་སེམས་ཅན་རྣམས་ཀྱི་སྨོན་ལམ་ཡོངས་སུ་རྫོགས་པར་བྱེད་ན་དཔེར་ན་ཡིད་བཞིན་གྱི་ནོར་བུ་རིན་པོ་ཆེའི་གཏེར་དང་འདྲའོ། །དེ་ལྟར་སྐྱེས་བུ་ཆེན་པོ་འདི་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡུན་རིང་པོ་ནས་སྨོན་ལམ་ཆེན་པོ་ཤིན་དུ་བརྟན་པ་དང ། སྙིང་རྗེ་ཆེན་པོ་དང་ཤིན་དུ་འབད་པའི་བརྩོན་འགྲུས་བསྒོམས་པའི་ཕྱིར་བྱང་ཆུབ་སེམས་དཔའ་ཀུན་བས་ཁྱད་པར་དུ་འཕགས་པ་ཡིན་པས་ཁྱེད་ཀྱིས་བསྟི་སྟང་དང་བཅས་པས་མཆོད་པར་བྱའོ། །དེ་ནས་ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང ། ཉན་ཐོས་དང ། ལྷ་དང ། མི་དང ། གནོད་སྦྱིན་དང ། དྲི་ཟ་ལ་སོགས་པ་འཁོར་གྱི་དཀྱིལ་འཁོར་ཐམས་ཅད་འདུག་པ་ལས་ལངས་ནས་ཅི་ནུས་སུ་སོ་སོ་ནས་གསེར་དང ། དངུལ་དང ། རིན་པོ་ཆེ་རྣམ་པ་སྣ་ཚོགས་ཀྱི་མེ་ཏོག་དང ། སྤོས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་མཆོད་པའི་ཕྱིར་མངོན་པར་གཏོར་ཏོ། །དེ་མ་ཡིན་པ་གཞན་ཡང་ལྷ་རྫས་ཀྱི་ན་བཟའ་དང ། ནོར་བུ་དང ། ནོར་བུ་རིན་པོ་ཆེ་དང ། མུ་ཏིག་གི་ཕྲེང་བ་དང ། མུ་ཏིག་གི་སེ་མོ་དོ་དང ། གསེར་དང ། དངུལ་དང ། རིན་པོ་ཆེའི་ཕྲེང་བ་དང ། རྒྱལ་མཚན་དང ། བ་དན་དང ། གདུགས་ལ་སོགས་པས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་མཆོད་པའི་ཕྱིར་ཕུལ་ལོ། །གཞན་ཡང་ཚད་མེད་པའི་ལྷ་རྫས་ཀྱི་རོལ་མོ་སྙན་པ་དང ། ཚིགས་སུ་བཅད་པའི་བསྟོད་པ་རྣམ་པ་སྣ་ཚོགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་སྟི་སྟང་དང་བཅས་པས་མཆོད་པ་བྱས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་རྣམ་པ་སྣ་ཚོགས་ཀྱི་ལྷ 60.124a རྫས་ཀྱི་མཆོད་པའི་ཡོ་བྱད་དེ་དག་སླར་བཅོམ་ལྡན་འདས་ལ་ཕུལ་ནས་ཚིགས་སུ་བཅད་པ་འདི་དག་སྨྲས་སོ། །ལྷ་དང་ཀླུ་དང་གནོད་སྦྱིན་མི་རྣམས་དང ། །ཕྱོགས་བཅུའི་བྱང་ཆུབ་སེམས་དཔའི་མཆོད་པ་རྣམས། །ཡོན་ཏན་ཆེན་པོ་འཇིག་རྟེན་གཙོ་ལ་དབུལ། །མཆོག་གི་མཆོད་པ་འདི་དག་བཞེས་སུ་གསོལ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་ཚིགས་སུ་བཅད་པ་དེ་སྨྲས་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་བ་དང ། དེ་ལ་བཅོམ་ལྡན་འདས་ཀྱིས་ཚིགས་སུ་བཅད་པས་འདི་སྐད་ཅེས་བཀའ་སྩལ་ཏོ། །བརྟན་པའི་བློ་དང་རྣམ་དག་སེམས་བསྐྱེད་ནས། །སེམས་ཅན་ཚད་མེད་པ་ཡི་སྡུག་བསྔལ་བཅིལ། །རིན་ཆེན་དག་ལྟར་བདེ་བ་འབྱུང་བར་མཐོང ། །རྡོ་རྗེ་བཞིན་དུ་ཐེ་ཙོམ་དྲ་བ་གཅོད། །སྙིང་རྗེ་ཆེན་པོའི་བློ་ཅན་བརྩོན་འགྲུས་ཀྱིས། །མཆོད་པ་དམ་པ་བཅོམ་ལྡན་འདས་ལ་དབུལ། །རྒྱ་མཚོ་ཡེ་ཤེས་སེམས་ཅན་སྡུག་བསྔལ་སྒྲོལ། །འཇིགས་པ་མེད་པས་སྲིད་པའི་ཕ་རོལ་ཕྱིན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་འདུག་པ་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཆུ་བོ་བཞི་ལས་སྒྲོལ་བའི་བཅོམ་ལྡན་འདས་ཀྱི་ཉེ་གནས་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ལ་སོགས་པ་དྲན་པ་འཕེལ་བ་དང ། བསྲུང་བའི་དྲན་པ་འཕེལ་བ་དང ། འཚོ་བ་འཕེལ་བ་དང ། ལུས་བདེ་བ་འཕེལ་བ་དང ། ནད་མ་མཆིས་པ་འཕེལ་བ་དང ། གཟུགས་དང་སྟོབས་འཕེལ་བ་དང ། གྲགས་པ་འཕེལ་བ་དང ། འཚོ་བའི་ཡོ་བྱད་འཕེལ་བ་དང ། གཉེན་བཤེས་འཕེལ་བ་དང ། སློབ་མ་འཕེལ་བ་དང ། ཚུལ་ཁྲིམས་འཕེལ་བ་དང ། མང་དུ་ཐོས་པ་འཕེལ་བ་དང ། སྦྱིན་པ་འཕེལ་བ་དང ། ཏིང་ངེ་འཛིན་འཕེལ་བ་དང ། བཟོད་པ་འཕེལ་བ་དང ། ཐབས་མཁས་པ་འཕེལ་བ་དང ། བྱང་ཆུབ་ཀྱི་ཡན་ལག་དག་དང ། འཕགས་པའི་བདེན་པ་འཕེལ་བ་དང ། ཐེག་པ 60.124b ཆེན་པོའི་ཡང་དག་པའི་ལམ་ལ་གཞོལ་བའི་འཕེལ་བ་དང ། ཆོས་ཀྱི་སྒྲོན་མ་འཕེལ་བ་དང ། སེམས་ཅན་ཡོངས་སུ་སྨིན་པར་བགྱི་བ་འཕེལ་བ་དང ། བྱམས་པ་ཆེན་པོ་དང་སྙིང་རྗེ་ཆེན་པོ་འཕེལ་བ་དང ། རྣམ་པར་དཀར་བའི་ཆོས་འཕེལ་བ་དང ། ཁམས་གསུམ་དུ་གྲགས་པ་འཕེལ་བ་དང ། ཁམས་གསུམ་དུ་ཆོས་ཀྱི་ཆར་འཕེལ་བ་དང ། ས་ཆེན་པོ་ཐམས་ཅད་ཀྱི་རོ་བྲོ་བ་འཕེལ་བ་དང ། སེམས་ཅན་ཐམས་ཅད་ཀྱི་མདངས་དང་དགེ་བའི་ལས་འཕེལ་བ་དང ། ཆོས་ཀྱི་དགའ་བ་དང་དགེ་བ་སྤྱོད་པ་འཕེལ་བ་དང ། ཤེས་རབ་ཀྱི་འོད་འཕེལ་བ་དང ། ཕ་རོལ་དུ་ཕྱིན་པ་དྲུག་འཕེལ་བ་དང ། སྤྱན་ལྔ་འཕེལ་བ་དང ། དབང་བསྐུར་བ་འཕེལ་བ་དང ། ལྷར་སྐྱེ་བ་དང་མྱ་ངན་ལས་འདའ་བ་འཕེལ་བ་ལ་སོགས་པ་ཐོབ་པར་བྱེད་པ་ནས། འདི་ལྟ་སྟེ། མེ་དང་ཆུར་ལྡན་པ་དང ། བཀྲ་ཤིས་ཀྱི་འོད་སྣང་བ་དང ། ཐོས་པ་འཛིན་པའི་རིག་སྔགས་ཆེན་པོ་དང ། གཟུངས་ཀྱི་ཚིག་འདི་བདག་གིས་འདས་པའི་སངས་རྒྱས་བཅོམ་ལྡན་འདས་ཆུ་ཀླུང་གང་གཱའི་བྱེ་མ་སྙེད་ལ་བསྙེན་བཀུར་བགྱིས་ནས་གཟུངས་འདི་ཐོས་ཏེ་གཟུངས་འདིས་ནི་རྣམ་པར་དཀར་བའི་ཆོས་ཐམས་ཅད་འཕེལ་ཞིང་སྐྱེ་བ་དང ། ས་བོན་གྱི་ཚོགས་དང ། རྩ་བ་དང ། མྱུ་གུ་དང ། ཡལ་ག་དང ། སྡོང་པོ་དང ། ལོ་མ་དང ། འདབ་མ་དང ། མེ་ཏོག་དང ། འབྲས་བུ་དང ། རྩི་ཤིང་དང ། ལོ་ཐོག་གི་བྲོ་བ་དང་བསུང་འཕེལ་ཞིང་སྐྱེ་བ་དང ། ཆར་ཆུ་དང་ལྡན་པ་དང ། ཕན་པར་འགྱུར་བའི་ས་དང ། ཆུ་དང ། མེ་དང ། རླུང་འཕེལ་ཞིང་སྐྱེ་བ་དང ། དགའ་བ་དང ། བདེ་བ་འཕེལ་ཞིང་སྐྱེ་བ་དང ། རིན་པོ་ཆེ་དང་ནོར་རྫས་འཕེལ་ཞིང་སྐྱེ་བ་དང ། མཐུ་སྟོབས་འཕེལ་ཞིང་སྐྱེ་བ་དང ། འཚོ་བའི་ཡོ་བྱད་ཐམས་ཅད་འཕེལ་ཞིང་སྐྱེ་བར་འགྱུར་རོ། །ཡང་གཟུངས་འདིས་ནི་ཤེས་རབ་སྐྱེ་བས་ཉོན་མོངས་པའི་དགྲ་ཡང་ཡོངས་སུ་བཅོམ་པར་འགྱུར་བའི་སྔགས་ལ་འདི་ལྟ་སྟེ། ཚིམ་བྷོ་ཚིམ་བྷོ། ཙིམ་ཚིམ་བྷོ། ཨཱ་ཀཱ་ཥ་ཚིམ་བྷོ་བ་ཀ་ར་ཚིམ་བྷོ། ཨ་མ་བར་ཚིམ་བྷོ། བར་ཚིམ་བྷོ། བ་ཙིར་ཚིམ་བྷོ། ཨ་རོ་ག་ཚིམ་བྷོ། དྷརྨ་ཚིམ་བྷོ། ས་ཏྭེ་བ་ཚིམ་བྷོ། ས་ཏྭེ་ནི་ཧ་ལ་ཚིམ་བྷེ། བི་བ་ར 60.125a ག་ཤ་བ་ཚིམ་བྷོ། ཨུ་པ་ཤ་མ་ཚིམ་བྷོ། ནཱ་ཡན་ཚིམ་བྷོ། པྲཛྙཱ་ས་མ་མོ་ན་རེདྣར་ཚིམ་བྷོ། ཀྵ་ཎ་ཚིམ་བྷོ། བི་ཥ་མ་བ་རི་ཡ་ཚིམ་བྷོ། ཤ་སི་ཏ་ལ་མ་བ་ཚིམ་བྷོ། བི་ཨ་དྲ་སོ་ཏ་མ་ཧེ་ལེ། དམ་བེ་ཡ་བ། ཙཀྲ་སེ། ཙཀྲ་བ་སེ་ལེ། ཀྵི་ལེ་ཕི་ལ་ཀ་ར་བ།[་]བ་ར་བ་རི་ཏེ། ཧ་སེ་རེ་པྲ་རེ་བེ། པ་རེ་ཙ་ར་བྷན་དྷནེ། པ་ན་ར། ཙ་ཙ་ཙ་ཙ། ཏེ་ལེ་མི་ལ། ཨ་ཀ་ཐ་ཀེ་།ཀི་ལོ། ཐཧཱ་རེ་ཐཧཱ་རེ། མི་ལེ་མ་དྷེ། ནན་ཏེ་ཀུ་ལེ་མི་ལ། ཨཾ་ཀུ་ཙི་ཏ་བྷེ། ཨ་རཻ་གི་རེ། ཀུ་ཏ་ཤ་བ་མ་ལེ། ཏོན་གེ་ཏོན་གེ་ཏོན་གུ་ལེ། ཧུ་རཱུ་ཧཱུ་རཱུ་ཧུ་རཱུ། ཀུ་ལོ་སྟོ་མི་ལེ། མ་རི་ཏོ། མེ་རི་ཏེ། བྷན་དྷ་ཏ། ཧ་ར་ཁ་མ་རེ་མ། ཧུ་རུ་ཧུ་རུ། སྲིད་པའི་དྲི་མ་སྦྱོང་བ་དགེ་བར་གསུངས། །ཐབ་རྩོད་སྐལ་པ་ཞི་བ་འང་དགེ་བར་གསུངས། །མི་དགེ་བསམ་པ་སྦྱོང་བ་དགེ་བར་གསུངས། །འབྱུང་བ་ཆེན་པོ་སྦྱོང་བའང་དགེ་བར་གསུངས། །ངན་པར་འགྲོ་བ་སྦྱོང་བ་དགེ་བར་གསུངས། །སྡིག་པའི་བག་ཆགས་སྦྱོང་བའང་དགེ་བར་གསུངས། །རེ་བ་རྫོགས་པར་བྱེད་པ་དགེ་བར་གསུངས། །ལོ་ཐོག་སྨིན་པར་བྱེད་པའང་དགེ་བར་གསུངས། །སངས་རྒྱས་ཀུན་གྱིས་དགེ་བར་གསུངས་པ་འདི། །དེ་བཞིན་གཤེགས་པ་ཀུན་གྱས་བྱིན་བརླབས་པ། །དགེ་བར་གསུངས་འདིས་བྱང་ཆུབ་སེམས་དཔའི་རྣམས། །བྱིན་གྱིས་རློབ་མཛད་རྗེས་སུ་ཡི་རང་ངོ ། །བཅོམ་ལྡན་འདས་དེ་ལྟར་མེ་དང་ཆུ་དང་ལྡན་པ་དང ། བཀྲ་ཤིས་ཀྱི་འོད་སྣང་བ་དང ། ཐོས་པ་འཛིན་པའི་རིག་སྔགས་ཆེན་པོ་གཟུངས་ཀྱི་ཚིག་འདི་ནི་བདག་གིས་འདས་པའི་སངས་རྒྱས་བཅོམ་ལྡན་འདས་ཆུ་ཀླུང་གང་གཱའི་བྱེ་མ་སྙེད་ལ་བསྙེན་བཀུར་བགྱིས་པས་ཐོས་སོ། །གཟུངས་འདི་ནི་རྣམ་པར་དཀར་བའི་ཆོས་ཐམས་ཅད་འཕེལ་ཞིང་སྐྱེ་བར་བགྱིད་པ་ནས་དེ་བཞིན་དུ་རྒྱས་པའི་ལོངས་སྤྱོད་པའི་ཡོ་བྱད་ཐམས་ཅད་ཀྱི་བར་དུ་འཕེལ་ཞིང་སྐྱེ་བར་བགྱིད་དོ། །བཙུན་པ་བཅོམ་ལྡན་འདས་གཟུངས་འདིས་ནི་ཆུ་བོ་བཞི་ལས་སྒྲོལ་བར་བྱེད་དོ། །བཅོམ་ལྡན་འདས་ཀྱི་ཉེ་གནས་སུ་གྱུར་པ་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་ལ་སོགས་པའི་དམིགས་པ་འཕེལ་བར 60.125b བགྱིད་པ་ནས་དེ་བཞིན་དུ་རྒྱས་པར་འཚོ་བའི་ཡོ་བྱད་ཐམས་ཅད་ཀྱི་བར་དུ་འཕེལ་ཞིང་སྐྱེ་བར་བགྱིད་དོ། །གཟུངས་འདི་ནི་བཅོམ་ལྡན་འདས་ཀྱིས་འཕགས་པའི་གསུང་རབ་བདུད་རྩི་ལྟ་བུ་ཡོངས་སུ་རྒྱས་པ་དང ། ཡུན་དུ་གནས་ཤིང་ཁམས་གསུམ་གྱི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་ཐོས་པ་འཛིན་པའི་རིགས་སྔགས་ཆེན་པོ་དང ། གཟུངས་ཀྱི་ཚིག་འདི་སྨྲས་པ་ན། རི་ཁ་ལ་ཏེ་ཡ་རབ་ཏུ་གཡོས་ནས་ལྷའི་རོལ་མོ་བྱེ་བ་ཁྲག་ཁྲིག་ཀྱང་མ་དཀྲོལ་བར་རང་འཁྲོལ་ཏེ། ལྷའི་སྤོས་དང ། མེ་ཏོག་དང ། རིན་པོ་ཆེ་ཚད་མེད་པ་རྣམ་པ་སྣ་ཚོགས་ཆར་བཞིན་དུ་བབས་ནས་དེའི་ཚེ་འཁོར་མང་པོ་དེ་དག་ཐམས་ཅད་ཀྱང་ངོ་མཚར་རྨད་དུ་གྱུར་ཏོ། །དེའི་ཚེ་ན་འཁོར་གྱི་དཀྱིལ་འཁོར་དེ་ན་ལྷ་མོ་བཀྲ་ཤིས་ཆེན་མོ་དང ། དཔལ་ལྡན་ལྷ་མོ་ཆེན་མོ་དང ། མཆོད་དབྱངས་ལྷ་མོ་ཆེན་མོ་དང ། བརྟན་པ་ལྷ་མོ་ཆེན་མོ་དང ། ཆུ་ཅན་ལྷ་མོ་ཆེན་མོ་དང ། འོད་ཆེན་ལྷ་མོ་ཆེན་མོ་ལ་སོགས་པ་ལྷ་མོ་འབྱུང་བ་ཆེན་པོ་བཞི་ལ་དབང་དུ་གྱུར་པ་སྟོང་ཕྲག་བཅཝ་བརྒྱད་འདུག་པ་ལས་ལངས་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཐལ་མོ་སྦྱར་ནས་བསྟི་སྟང་དང་བཅས་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ངོ་མཚར་ཆེའོ། །བཅོམ་ལྡན་འདས་ངོ་མཚར་ཆེའོ། །བདེ་བར་གཤེགས་པ་བདག་གིས་འབྱུང་བ་ཆེན་པོ་བཞི་དག་ལ་དབང་བསྒྱུར་མོད་ཀྱི་འབྱུང་བ་ཆེན་པོ་བཞིའི་ཐོག་མ་དང ། བར་མ་དང ། ཐ་མའི་སྐྱེ་བ་དང ། འགག་པ་དང ། འཐུན་པ་དང ། མི་མཐུན་པའི་ཕྱོགས་མི་འཚལ་ཏེ། སྐྱེས་བུ་ཆེན་པོ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ཕྲ་བ་ཤིན་དུ་ཟབ་མོ་ཐོབ་ནས་འབྱུང་བ་ཆེན་པོ་བཞིའི་ཐོག་མ་དང ། བར་མ་དང ། ཐ་མའི་མཚན་ཉིད་དང ། སྐྱེ་བ་དང ། འགག་པ་དང ། འཐུན་པ་དང ། མི་མཐུན་པའི་ཕྱོགས་ལ་ཤིན་དུ་མཁས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། རིགས་ཀྱི་བུ་འདི་ནི་ཤེས་རབ་ཀྱི་ཕ་རོལ་དུ་ཕྱིན་པ་ཕྲ་བ་ཤིན་དུ་ཟབ་མོ་ཐོབ་པས་འབྱུང་བ་ཆེན་པོ་བཞིའི་ཐོག་མ་དང ། བར་མ་དང ། ཐ་མའི་མཚན་ཉིད་སྐྱེ་བ་དང ། འགག་པ་དང ། འཐུན་པ་དང ། མི་མཐུན་པའི་ཕྱོགས་ལ་ཤིན་དུ་མཁས་སོ། །ལྷ་མོ་འདི་ལྟར་ཤེས་པར 60.126a བྱའོ། །འདི་ལྟ་སྟེ། ཡིད་བཞིན་གྱི་ནོར་བུ་རིན་པོ་ཆེ་ནི་ཡོན་ཏན་མང་པོ་དང་ལྡན་པས་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབབ་སྟེ་སེམས་ཅན་མང་པོ་ལ་སྦྱིན་པ་བྱེད་དོ། །རིགས་ཀྱི་བུ་འདི་ཡང་དེ་བཞིན་དུ་བྱང་ཆུབ་ཀྱི་ཡན་ལག་གི་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབེབས་ཏེ་སེམས་ཅན་ལ་སྦྱིན་པ་བྱེད་དོ། །འདི་ལྟ་སྟེ། རིན་པོ་ཆེའི་གླིང་ལྟར་རིན་པོ་ཆེ་རྣམ་པ་སྣ་ཚོགས་ཀྱིས་ཡོངས་སུ་གང་བ་བཞིན་དུ་རིགས་ཀྱི་བུ་འདི་ཡང་བྱང་ཆུབ་ཀྱི་ཡན་ལག་གི་རིན་པོ་ཆེ་རྣམ་པ་སྣ་ཚོགས་དང་ལྡན་ནོ། །འདི་ལྟ་སྟེ། ལྷ་རྫས་ཀྱི་ཤིང་པ་རི་ཙི་ཏྲ་ལ་བསུང་དང་མེ་ཏོག་གིས་མཛེས་པ་བཞིན་དུ་རིགས་ཀྱི་བུ་འདི་ཡང་སངས་རྒྱས་ཀྱི་ཆོས་རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་མཛེས་སོ། །འདི་ལྟ་སྟེ། སེང་གེའི་རྒྱལ་པོ་ནི་རི་དགས་ཐམས་ཅད་ཀྱི་ཟིལ་གྱིས་མི་ནོན་ཅིང་མི་སྐྲག་པ་བཞིན་དུ་རིགས་ཀྱི་བུ་འདི་ཡང་སེམས་ཅན་ཐམས་ཅད་ཀྱིས་བག་ཚ་བ་འམ་ཟིལ་གྱིས་ནོན་པ་མེད་དོ། །འདི་ལྟ་སྟེ། ཇི་ལྟར་ཉི་མ་གསལ་བས་འཇིག་རྟེན་གྱི་མུན་པ་ཐམས་ཅད་ཡོངས་སུ་སེལ་བ་བཞིན་དུ་རིགས་ཀྱི་བུ་འདི་ཡང་སེམས་ཅན་ཐམས་ཅད་ཀྱི་ངན་པར་ལྟ་བའི་མ་རིག་པའི་མུན་པ་ཐམས་ཅད་སེལ་བའོ། །འདི་ལྟ་སྟེ། ནམ་ཐང་བའི་ཟླ་བ་ནི་མཚན་མོའི་དུས་སུ་ལམ་སྟོར་བའི་སེམས་ཅན་ཐམས་ཅད་ལ་བདེ་བའི་ལམ་སྟོན་ཏེ་གར་འགྲོ་བར་དགའ་བ་བཞིན་དུ་ཕྱིན་པར་འགྱུར་བ་ལྟར། རིགས་ཀྱི་བུ་འདི་ཡང་མ་རིག་པའི་མཚན་མོར་ཐེག་པ་གསུམ་ལས་འབྲོག་བསླད་དེ་འཁོར་བའི་འབྲོག་དགོན་པར་འཁྱམ་པའི་སེམས་ཅན་ཐམས་ཅད་ལ་ཐེག་པ་གསུམ་གྱིས་ཡང་དག་པའི་ལམ་སྟོན་ཅིང་སྐལ་བ་ཇི་ལྟ་བ་བཞིན་དུ་ཐབས་ཀྱིས་ཡང་དག་པར་འབྱུང་བའི་ལམ་ལ་འགོད་པར་བྱེད་དོ། །འདི་ལྟ་སྟེ། ས་ཆེན་པོ་ལ་ནི་ས་བོན་གྱི་ཚོགས་ཐམས་ཅད་དང ། རྩི་ཤིང་དང ། ལོ་ཐོག་དང ། སའི་ཁམས་སུ་གཏོགས་པའི་སེམས་ཅན་ཐམས་ཅད་ཀྱི་རྟེན་དུ་འགྱུར་བ་ལྟར། རིགས 60.126b ཀྱི་བུ་འདི་ལ་ཡང་བྱང་ཆུབ་ཀྱི་ཡན་ལག་ཁྱད་པར་ཅན་གྱི་ཆོས་ཐམས་ཅད་སྟོན་པའི་གནས་སོ། །འདི་ལྟ་སྟེ། རིན་པོ་ཆེ་ཆེན་པོའི་རི་རབ་རིའི་རྒྱལ་པོ་ནི་ཤིན་དུ་བརྟན་ཞིང་མ་གོད་མ་ཉམས་པ་བཞིན་དུ་རིགས་ཀྱི་བུ་འདི་ཡང་སངས་རྒྱས་ཀྱི་མ་འདྲེས་པའི་ཆོས་ཐམས་ཅད་ལ་ཤིན་དུ་གནས་ཤིང་སེམས་ཅན་ཐམས་ཅད་མི་གཏོང་བའི་ཕྱིར་མི་ཉམས་པ་དང ། དགེ་བའི་རྩ་བ་ཐམས་ཅད་ལ་གཏོང་བའི་ཕྱིར་མ་གོད་པའོ། །འདི་ལྟ་སྟེ། ནམ་མཁའ་ལ་སེམས་ཅན་ཐམས་ཅད་སྤྱོད་པ་བཞིན་དུ། རིགས་ཀྱི་བུ་འདི་ཡང་སེམས་ཅན་ཐམས་ཅད་དེ་ལ་ལོངས་སྤྱོད་དོ། །རིགས་ཀྱི་བུ་འདི་ནི་དེ་ལྟར་ཡོན་ཏན་ཚད་མེད་དཔག་ཏུ་མེད་པ་དང་ལྡན་ནོ། །དེའི་ཚེ་འཁོར་མང་པོ་རྣམས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོའི་ཡོན་ཏན་ཚད་མེད་པ་དང་ལྡན་པ་བསྟོད་པ་ཐོས་ནས་ངོ་མཚར་རྨད་དུ་གྱུར་ཏེ་བཀུར་བསྟི་དང་རིམ་གྲོ་བྱས་ནས་རབ་ཏུ་དགའ་བས་སེམས་རྩེ་གཅིག་ཏུ་བྱང་ཆུབ་སེམས་དཔའ་སའི་སྙིང་པོ་ལ་མིག་མི་འཛུམས་པར་ལྟའོ། །དེ་ནས་བཅོམ་ལྡན་འདས་ཀྱིས་དོན་དེ་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། སྐྱེས་བུ་ཡང་དག་ས་ཡི་སྙིང་པོ་ནི། །ཡོན་ཏན་མང་པོ་ཕུན་སུམ་ཚོགས་པར་ལྡན། །དགེ་སྦྱོང་ཆ་ལུགས་འཛིན་ཅིང་སྟོན་བྱེད་པ། །སྟོན་པ་ཆེན་པོ་ལ་ནི་ཕྱག་འཚལ་ལྷགས། །སེམས་ཅན་ཀུན་ལ་བདེ་བ་རབ་ཏུ་བྱིན། །སྲིད་པ་གསུམ་གྱི་སྡུག་བསྔལ་ཀུན་ལ་སྒྲོལ། །ཚད་མེད་རྣམ་པ་སྣ་ཚོགས་ཆར་ཕབ་ནས། །སྟོན་པ་ཆེན་པོ་ལ་ནི་མཆོད་པ་བྱེད། །བརྒྱ་བྱིན་དྲི་མ་མེད་པར་སྐྱེས་པ་དེས། །ཕྱོགས་བཞི་ཀུན་དུ་བལྟས་ཤིང་བརྟགས་ནས་སུ། །ཐལ་མོ་སྦྱར་ནས་སྟི་སྟང་རབ་བཅས་ཏེ། །སྟོན་པ་ཆེན་པོ་ལ་ནི་བསྔགས་ཤིང་བསྟོད། །བདག་གིས་བཅོམ་ལྡན་འདས་ཀྱི་འཁོར་མཐོང་བ། །ནོར་བུ་རིན་པོ་ཆེ་ཡི་འོད་ཟེར་ལྟར། །སངས་རྒྱས་མང་པོའི་ཞིང་ཀུན་སྣང་བྱས་ཏེ། །ཐམས་ཅད་གསལ་བར་མ་གྱུར་གང་ཡང་མེད། །མངོན་ཤེས་དྲུག་གིས་འཇིག་རྟེན་སྣང་བར་བྱེད། །དེང་འདིར་འདུས་ཤིང་ལྷགས་པར་འགྱུར་བ་ནི། ། 60.127a ཤིན་དུ་དཔའ་བ་ས་ཡི་སྙིང་པོ་སྟེ། །རབ་ཏུ་བྱུང་བའི་སྤྱོད་ལམ་རྣམ་པར་སྟོན། །འཕགས་པའི་ནོར་བུ་འབྱུང་བའི་གཏེར་ཡིན་ཏེ། །འཇིགས་པ་མེད་པའི་སངས་རྒྱས་ང་རོ་དབྱངས། །བྱང་ཆུབ་སེམས་དཔའ་མང་པོའི་རྒྱལ་མཚན་ཏེ། །སེམས་ཅན་མང་པོ་འདྲེན་པའི་གཙོ་བོའོ། །རྣམ་པར་གྲོལ་བའི་རིན་ཆེན་འབྱུང་ཁུང་སྟེ། །བརྩོན་འགྲུས་བརྟན་པའི་བསོད་ནམས་རྒྱ་མཚོ་ཡིན། །བྱམས་པའི་བློ་གྲོས་སྙིང་རྗེ་བརྩེ་ལ་མོས། །སྡུག་བསྔལ་བའི་སེམས་ཅན་མང་པོ་སྒྲོལ། །འཇིགས་པ་སྲུང་བའི་འོབས་དང་མཁར་ཡིན་ཏེ། །ནམ་མཁའ་དང་བའི་ཟླ་བཞིན་ལམ་ཡང་སྟོན། །ས་ལྟར་དགེ་བའི་རྩ་བ་ཐམས་ཅད་སྐྱེད། །རྡོ་རྗེ་ལྟར་ནི་ཐེ་ཙོམ་ཡོངས་སུ་གཅོད། །རྣམ་པར་གྲོལ་བའི་རིན་ཆེན་ཀུན་ལ་གཏོར། །ཆུ་ལྟར་སྒྲིབ་པ་ཐམས་ཅད་འདག་པར་བྱེད། །ཉོན་མོངས་ཚ་བས་གདུངས་པའི་གདུགས་སུ་འགྱུར། །སྨན་པ་ལྟར་ནི་ནད་ཀུན་འཚོ་བར་བྱེད། །ཞག་གཅིག་ས་ཡི་སྙིང་པོའི་མིང་བརྗོད་པའི། །གྲགས་པ་ཆེན་པོའི་བསོད་ནམས་ཐོབ་པ་ནི། །བསྐལ་པ་བྱེ་བ་ཁྲག་ཁྲིག་བར་དུ་ཡང ། །བློ་ཅན་གཞན་གྱི་མིང་ནས་བརྗོད་པས་ལྷག་།སོ་སོའི་སྐྱེ་བོ་གྲོལ་བར་བྱེད་པ་ནི། །ཉོན་མོངས་ཐམས་ཅད་རྣམ་པར་འཆིང་བྱེད་པའོ། །དཔའ་བར་འགྲོ་བའི་ཏིང་འཛིན་མཐར་ཕྱིན་ཅིང ། །ཏིང་འཛིན་གཞན་དག་གི་ཡང་ཕ་རོལ་ཕྱིན། །རྐྱེན་མང་བཅུ་གསུམ་པོ་ཡང་རྣམ་དག་པས། །མང་པོ་ཀུན་ལ་ཡེ་ཤེས་ནམ་མཁའ་བཞིན། །དཔག་ཏུ་མེད་པའི་སངས་རྒྱས་ཞིང་རྣམས་ཀྱི། །སྐྱེ་བོ་མང་པོའི་མུན་པའི་ཚོགས་ཀྱང་བཅོམ། །ཞིང་རྣམས་ཇི་བཞིན་ཏིང་འཛིན་དེར་འཇུག་ཅིང ། །བསམ་གཏན་བཞི་པོ་ལ་ཡང་རྒྱུན་དུ་འདུག་།ཏིང་ངེ་འཛིན་དུ་ཞུགས་ནས་སེམས་ཅན་གྱི། །ཉོན་མོངས་པ་ཡི་གདུང་བ་རབ་ཏུ་སེལ། །སོ་སོའི་སྐྱེ་བོ་སྔོན་གྱི་སྡིག་པའི་ལས། །མཚོན་དང་ནད་དང་མུ་གེས་འཇིགས་པ་དང ། །རྣམ་པ་མང་པོས་འཚེ་ཞིང་གསོད་གྱུར་པ། །དེ་དག་ཀུན་ནས་རྣམ་པར་གྲོལ་བར་བྱེད། །སེམས་ཅན་ཉེ་བར་ལེན་པའི་ཕུང་པོ་ལྔ། །སྡུག་བསྔལ་མང་པོས་འཚེ་ཞིང་གདུངས 60.127b གྱུར་པ། །སའི་སྙིང་པོ་དེ་ལ་སྐྱབས་གསོལ་ན། །སྲིད་པའི་སྡུག་བསྔལ་ཐམས་ཅད་ཞི་བར་འགྱུར། །སེམས་ཅན་སྡུག་བསྔལ་འཁོར་ལོ་རབ་བསྐོར་ཏེ། །གཅིག་གིས་གཅིག་ལ་འཚེ་ཞིང་གནོད་གྱུར་པ། །ས་ཡི་སྙིང་པོ་དེ་ལ་སྐྱབས་གསོལ་ན། །བཟོད་ཅིང་བྱམས་པའི་སེམས་ལ་གནས་པར་འགྱུར། །བཅུ་གསུམ་རྐྱེན་གྱིས་རབ་འཇིགས་སྐྲག་བྱེད་ཅིང ། །ཚོལ་བ་མི་རྙེད་རྐྱེན་གྱིས་སྡུག་པ་དག་།ས་ཡི་སྙིང་པོ་དེ་ལ་སྐྱབས་གསོལ་ན། །འཇིགས་པ་མེད་པ་དེ་ལ་གནས་པར་འགྱུར། །བསོད་ནམས་བྱེད་ལ་མོས་ཤིང་དྲན་པ་དང ། །ཚུལ་ཁྲིམས་མང་ཐོས་ཤེས་རབ་འདོད་པ་དག་།ས་ཡི་སྙིང་པོ་དེ་ལ་སྐྱབས་གསོལ་ན། །རེ་བ་བཞིན་དུ་ཐམས་ཅད་རྫོགས་པར་འགྱུར། །ཡོན་ཏན་སོ་སོར་སྨོས་པའི་བཟོད་རྩལ་དང ། །སྨན་དང་ས་བོན་ཚོགས་ལ་མོས་པ་དག་།ས་ཡི་སྙིང་པོ་དེ་ལ་སྐྱབས་གསོལ་ན། །རེ་བ་ཀུན་དང་ལྡན་ཞིང་རྫོགས་པར་འགྱུར། །ལོ་ཐོག་རྩི་ཤིང་ལེགས་པར་འདོད་པ་དང ། །ཁྱེའུ་དང་བུ་མོ་གོས་དང་བྲན་ཁོལ་ཕྱིར། །ས་ཡི་སྙིང་པོ་དེ་ལ་སྐྱབས་གསོལ་ན། །རང་བྱུང་བཞིན་དུ་ཐམས་ཅད་རྫོགས་པར་འགྱུར། །ཡོན་ཏན་མང་པོ་ཀུན་དང་ལྡན་པས་ན། །ས་ཆེན་འདི་ཡང་མི་གཏོང་རབ་ཏུ་འཛིན། །དེ་ཡི་རྐྱེན་གྱིས་སྨན་དང་ལོ་ཐོག་རྣམས། །སྣུམ་ཞིང་འཇམ་ལ་རོ་དང་ལྡན་པར་འགྱུར། །ཉོན་མོངས་མང་པོས་སྒྲིབས་པར་གྱུར་ནས་སུ། །མི་དགེ་བཅུ་ཡི་ལས་ལ་མོས་པ་དག་།ས་ཡི་སྙིང་པོ་དེ་ལ་སྐྱབས་གསོལ་ན། །མི་དགེ་ཉོན་མོངས་ཐམས་ཅད་ཞི་བར་འགྱུར། །རྣམ་པ་སྣ་ཚོགས་ཀུན་གྱི་ལུས་སྟོན་ཅིང ། །སྐྱེ་བོ་མང་པོ་དག་ལ་ཆོས་ཀྱང་སྟོན། །སྦྱིན་པའི་ཡོན་ཏན་ཐམས་ཅད་རྫོགས་པས་ནི། །སེམས་ཅན་ཀུན་ལ་སྙིང་བརྩེ་བདེ་བར་གྱུར། །གལ་ཏེ་བསྐལ་པ་མང་པོ་བརྒྱ་ཡི་བར། །དེ་ཡི་ཡོན་ཏན་བསྔགས་ཤིང་རབ་བསྟོད་དེ། །མཐར་ཕྱིན་རྫོགས་པར་འགྱུར་བ་ཤིན་དུ་དཀའ། །དེ་བས་ཀུན་གྱིས་སྟི་སྟང་བཅས་པས་མཆོད། །འདུས་པ་ཆེན་པོ་ལས་བྱང་ཆུབ་སེམས་དཔའི་སའི 60.128a སྙིང་པོའི་འཁོར་ལོ་བཅུ་པ་ཞེས་བྱ་བ་ལས་གླེང་གཞིའི་ལེའུ་སྟེ་དང་པོའོ།། ་་།། བམ་པོ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་སྟན་ལས་ལངས་ཏེ་བླ་གོས་ཕྱོགས་གཅིག་དུ་བྱས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ། པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡོན་ཏན་ཚད་མེད་རྒྱ་མཚོ་ཅན། །བཅོམ་ལྡན་འདས་ལ་ཞུ་གསོལ་བ། །ཐེ་ཙོམ་ནེམ་ནུར་ཅི་མཆིས་པ། །བདག་ལ་རྒྱས་པར་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་ཡང་དག་པ་ཁྱོད་ནི་ཆོས་ཐམས་ཅད་ཡེ་ཤེས་ཀྱིས་མཐོང་བ་ལ་ཐོགས་པ་མེད་དོ། །འོན་ཀྱང་སེམས་ཅན་ལ་ཕན་པ་དང་བདེ་བར་འདོད་པའི་ཕྱིར་ཁྱོད་དེ་བཞིན་གཤེགས་པ་ལ་ཅི་དང་ཅི་འདོད་པ་དྲིས་ཤིག་དང ། བཅོམ་ལྡན་འདས་ཀྱིས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་ཚིགས་སུ་བཅད་དེ་གསོལ་པ། བདག་སྔོན་བསྐལ་པ་བཅུ་གསུམ་དུ། །སྤྱོད་པ་དཀའ་བ་ཤིན་དུ་སྤྱད། །སོ་སོའི་སྐྱེ་བོ་ཀུན་དོན་དུ། །འཇིགས་པ་གསུམ་དང་རྙོག་ལྔ་བསལ། །སངས་རྒྱས་བྱེ་བ་ཁྲག་ཁྲིག་ལ། །ཚད་མ་མཆིས་པའི་མཆོད་བགྱིས་པས། །བསམ་པ་དག་པའི་འཁོར་འདི་དང ། །ཚོགས་ཆེན་འདུས་པའང་སྔོན་མཐོང་ངོ ། །བློ་ཅན་བརྩོན་འགྲུས་རྩོལ་བ་དག་།ཐམས་ཅད་འདུས་ཤིང་ཚོགས་འདིར་ལྷགས། །ཤིན་དུ་སྐྱོན་མེད་འཁོར་འདི་དག་།མཐོང་བར་གྱུར་པ་ངོ་མཚར་རྨད། །ཅི་སླད་སངས་རྒྱས་ཞིང་འདི་ཀུན། །སྡིག་པས་དགེ་བ་ཉམས་བགྱིས་ཤིང ། །བློ་ཅན་དག་གིས་སྤངས་པ་ཡི། །ངན་པར་སྤྱོད་ཀུན་ལྷན་ཅིག་གནས། །མཚམས་མེད་སྡིག་པ་བགྱིད་པ་དང ། །ཡང་དག་དམ་པའི་ཆོས་ལ་སྐུར། །འཕགས་ལ་སྨོད་ཅིང་ལོག་ལྟ་བས། །རྟག་དང་ཆད་པའི་གཙུག་ལག་འཆད། །སྡིག་པ་བཅུ་འི་ལས་བགྱིད་ཅིང ། །འཇིག་རྟེན་ཕྱི་མས་མི་འཇིགས་པ། །ཐེག་པ་རྣམ 60.128b གསུམ་རིང་སྤངས་ཤིང ། །སྡིག་ཅན་དག་ལ་ངན་འགྲོར་གཞོལ། །མ་རིག་པས་ནི་བསྒྲིབས་པའི་མིག་།འདོད་ཆགས་ཕྲག་དོག་སྒྱུས་འཚོ་བ། །སངས་རྒྱས་འཁོར་ལོ་རབ་བསྐོར་ཏེ། །སེམས་ཅན་འདི་དག་སྒྲོལ་བར་མཛད། །ཇི་ལྟར་ཉིང་འཚམས་སྦྱོར་བ་ཡི། །ཉོན་མོངས་རྡོ་རྗེ་ལྟ་བུས་བཅད། །ཇི་ལྟ་བུར་ན་གཟུངས་དག་འཐོབ། །དེ་བཞིན་བཟོད་པ་འང་ངེས་པར་འགྱུར། །བདག་གིས་འདྲེན་པ་ཚོགས་ཆེན་དག་།མཐོང་བར་གྱུར་པ་ངོ་མཚར་ཆེ། །འདི་འདྲའི་ཡོན་ཏན་ཀུན་ཚོགས་པ། །ཕྱོགས་གཞན་དག་ན་མ་མཐོང་ངོ ། །ཡོན་ཏན་མང་པོ་ཀུན་ལྡན་ཞིང ། །བྱང་ཆུབ་ལམ་ལ་རབ་བརྩོན་པས། །ཇི་ལྟར་བྱིས་པའི་འཁོར་དག་ལ། །སངས་རྒྱས་འཁོར་ལོ་བསྐོར་བ་མཛད། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱི་སྔོན་འདས་པའི་དུས་ན་ཡང་ཆུ་ཀླུང་གང་གཱའི་བྱེ་མ་སྙེད་ཀྱི་སངས་རྒྱས་དག་གི་ཞིང་ན་རྙོག་པ་ལྔའི་ཚེ། སངས་རྒྱས་བཅོམ་ལྡན་འདས་ཆུ་ཀླུང་གང་གཱའི་བྱེ་མ་སྙེད་ལ་སྔོན་འདི་ལྟ་བུའི་དོན་དག་ཞུ་བ་ཞུས་སོ། །ཁྱོད་ཀྱིས་དྲིས་པའི་དོན་འདི་དག་ལ་སྔོན་ཡང་ནན་ཏན་ཤིན་དུ་བྱས་པས་ཤིན་དུ་རྟོགས་ཤིང་ཁོང་དུ་ཆུད་དོ། །སྤྱོད་པ་མང་པོ་ཕུན་སུམ་ཚོགས་པ་ཕ་རོལ་དུ་ཕྱིན་པས་ཤིན་དུ་ཐབས་མཁས་པའི་ཤེས་རབ་དང་ལྡན་ཏེ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང ། ཕན་པ་དང་བདེ་བའི་དོན་ཐོབ་པར་བྱ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཐབས་མཁས་པས་འཕགས་པའི་སྤྱོད་པའི་གཏེར་སྦྱིན་པ་ལ་སོགས་པ་ཕ་རོལ་དུ་ཕྱིན་པ་དྲུག་གིས་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་སྤྱོད་པའི་ཁྱད་པར་དང ། ཐམས་ཅད་མཁྱེན་པའི་ཡེ་ཤེས་ཀྱི་ཡོན་ཏན་རྒྱ་མཚོ་ཡོངས་སུ་རྫོགས་པར་བྱ་བ་དང ། རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་སྤྱོད་པ་མི་དགེ་བ་ལ་གནས་པ་ཐམས་ཅད་ངན་སོང་གསུམ་ལས་བཟློག་ཅིང་མི་ལྟུང་བར་བྱ་བ་དང ། ཞིང་འདིར་དཀོན་མཆོག་གསུམ་གྱི་གདུང་ཤིན་དུ་རྒྱས་ཤིང་ཡུན་རིང་དུ་གནས་པར་བྱ་བའི་ཕྱིར་འདི་ལྟ་བུའི་དོན 60.129a དྲིས་པ་ལེགས་སོ། །ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང ། ངས་བསྟན་པར་བྱའོ། །བཅོམ་ལྡན་འདས་དེ་ལྟར་བགྱིའོ་ཞེས་གསོལ་ནས། བཅོམ་ལྡན་འདས་ལ་སླར་ཉན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པ་ནི་སྔོན་གྱི་སྨོན་ལམ་གྱི་ཤུགས་ཀྱིས་སངས་རྒྱས་ཀྱི་འཁོར་ལོ་རྣམ་པ་བཅུ་དང་ལྡན་ཏེ། སངས་རྒྱས་ཀྱི་ཞིང་རྙོག་པ་ལྔ་ཅན་གྱི་སེམས་ཅན་ཐམས་ཅད་རྣམ་པར་དཀར་བའི་ཆོས་ཐམས་ཅད་ལས་ཕྱིར་ལྡོག་པ་དང ། འཕགས་པའི་ནོར་རིན་པོ་ཆེ་བདུན་གྱིས་བྲེལ་བ་དང ། མཁས་པ་དག་དང་རིང་དུ་གྱུར་པ་ཆད་པ་དང ། རྟག་པའི་དྲ་བས་ཀུན་ནས་ཀླགས་པ་དང ། ངན་སང་དུ་འགྲོ་བའི་ཤིང་རྟ་ལ་སྤྲོ་ཞིང་དགའ་བ་དང ། སྐྱེ་བ་ཕྱི་མའི་སྡུག་བསྔལ་ལ་འཇིགས་པར་མི་ལྟ་བ་དང ། མ་རིག་པའི་མུན་ནག་ཐིབས་པོ་ལ་གནས་པ་ལ་དད་པ་དང ། མི་དགེ་བ་བཅུའི་ལས་ཀྱི་ལམ་རྫོགས་པར་བྱེད་པ་དང ། མཚམས་མེད་པ་ལྔ་བྱེད་པ་དང ། དམ་པའི་ཆོས་ལ་སྐུར་ཅིང་འཕགས་པ་ལ་དབང་ཟ་བ། དགེ་བའི་ཆོས་ཐམས་ཅད་རིང་དུ་སྤོང་ཞིང་མི་དགེ་བའི་ཆོས་རྫོགས་པར་བྱེད་པའི་གནས་ན་བཞུགས་སོ། །དེ་ལྟ་བུའི་སྡུག་བསྔལ་རྣམ་པ་སྣ་ཚོགས་དང་ལྡན་པའི་ཞིང་ན་བཞུགས་ཀྱང་རབ་ཏུ་བདེ་བར་བཞུགས་ཏེ་བག་ཚ་བ་མེད་པ་དང ། འཇིགས་སྐྲག་པ་མེད་པས་དྲང་སྲོང་ཆེན་པོའི་གནས་སུ་ཕྱིན་ཏེ་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ནས། སོ་སོའི་སྐྱེ་བོ་ཐམས་ཅད་ཀྱི་རིགས་ལ་ཉོན་མོངས་པ་ཤིན་དུ་སྲ་བ་རྡོ་རྗེ་ལྟ་བུ་དག་བསལ་ནས་ཅི་ལ་མོས་པ་བཞིན་དུ་སོ་སོར་བཀོད་དོ། །མཐུ་དང་ལྡན་པའི་སེམས་ཅན་དག་ནི་ཐེག་པ་གསུམ་ལས་ཕྱིར་མི་ལྡོག་པར་ཡང་མཛད་དོ། །རིགས་ཀྱི་བུ་འདི་ལྟ་སྟེ། ཡུལ་ཁ་ཅིག་ཏུ་སྲིད 60.129b མེད་པར་འགྱུར་བ་ན་དེ་ན་གནས་པའི་མི་ཐམས་ཅད་བདག་གི་དམག་དང ། གཞན་གྱི་དམག་གིས་ཡོངས་སུ་གཙེས་ཤིང་ཉོན་མོངས་པ་དང་སྡུག་བསྔལ་བར་གྱུར་ཏེ། དེ་ན་གནས་པའི་མི་མང་པོ་ཡང་མི་བདེ་བས་འཐབ་པ་དང ། རྩོད་པ་དང ། གཅིག་ལ་གཅིག་སྨོད་པ་ཚད་མེད་པ་སྙེད་འབྱུང་སྟེ། བརྫུན་དུ་སྨྲ་བ་དང ། གཡོ་སྒྱུ་དང ། ཚིག་རྩུབ་པོར་སྨྲ་བ་དང ། སྐུར་ཀླང་འདེབས་ཤིང་འཁྲུག་པ་དང ། དམུས་ལོང་དང ། ལིང་ཏོག་ཅན་དུ་འགྱུར་བ་དང ། ནད་རྣམ་པ་སྣ་ཚོགས་ཀྱིས་གཟིར་བ་དང ། གྲང་བ་དང ། ཚ་བའི་ནད་མ་རུངས་པ་དང ། རིམས་རྣམ་པ་མང་པོ་དང ། སྨྱོ་བ་དང ། སྐེམ་བྱེད་དང ། ཁ་ཟས་མི་འཇུ་བ་དང ། སེམས་འཁྲུག་ཅིང་མྱོས་པ་དང ། དབང་པོ་མ་ཚང་ཞིང་ཡན་ལག་དང་ཉིང་ལག་ཉམས་པ་དང ། བགོ་བ་དང ། བཟའ་བ་དང ། འཚོ་བའི་ཡོ་བྱད་རྣམ་པ་སྣ་ཚོགས་ཀྱིས་ཕོངས་ཤིང་བྲེལ་ཏེ། བདོག་པ་ཐམས་ཅད་ཡིད་དུ་མི་འོང་བ་དང ། སྐྱེ་བོ་ཐམས་ཅད་མུ་སྟེགས་ཅན་དང་འཇིག་རྟེན་གྱི་ལྷ་ལ་སྐྱབས་སུ་སོང་ཞིང་ལྟ་བ་ངན་པ་དང ། བསམ་པ་ངན་པ་དང ། མོས་པ་ངན་པ་ཡོངས་སུ་རྒྱས་ཏེ། ཡང་དག་པའི་ལམ་སྟོར་ནས་ངན་སོང་དུ་ལྟུང་བར་འགྱུར་བ་ན། དེའི་ཚེ་ཡུལ་དེ་ན་གནས་པའི་རྒན་པོ་བློ་དང་ལྡན་ཞིང་ཡིད་གཞུངས་པ། མང་དུ་ཐོས་པ། དྲང་དཀན་ཆེ་བ་འདུས་ནས་གྲོས་སུ་བགྲོས་ཏེ། ཡུལ་དང་གྲོང་མི་ཀུན་བསྡུས་ནས་ཐམས་ཅད་ཀྱིས་འཐུན་པར་རྒྱལ་བུ་གཅིག་བཏུས་པ་ནི་སྔོན་སྦྱིན་པ་རབ་ཏུ་བྱས་པ། ཚུལ་ཁྲིམས་ཤིན་དུ་བསྲུངས་པ། བརྩོན་འགྲུས་ལ་བརྟུན་པ། ཤིན་དུ་དཀའ་བ་སྤྱོད་པ་དང་ལྡན་པ་མཆོག་ཏུ་གྱུར་པའི་བསོད་ནམས་ཀྱི་མཚན་དང་ལྡན་པ། དབང་པོ་ཡོངས་སུ་རྫོགས་ཤིང་ཡན་ལག་མ་ཉམས་པ། ལུས་བྱད་ཆེ་ཆུང་རན་པ། མཚན་དང་དཔེ་བྱད་བཟང་པོས་བརྒྱན་པ། ཕུལ་དུ་གྱུར་པའི་མདོག་དམ་པ་དང་ལྡན་པ། ཐམས་ཅད་ཀྱིས་བཀུར་སྟི་དང་རིམ་གྲོ་བྱེད་པ། ཡུལ་དེ་ན་གནས་པའི་མི་ཐམས་ཅད་ཀྱི་ཡིད་དུ་འོང་ཞིང་ལྟ་འདོད་པ། རང་བཞིན་གྱིས་དྲང་ཞིང་བརྟན 60.130a པ། བྱམས་པ་དང ། སྙིང་རྗེར་ལྡན་པ། མང་དུ་ཐོས་པ། རྩལ་ཐམས་ཅད་དང་ལྡན་པ་དང ། དེས་པའི་བཟོད་པས་སེམས་རབ་ཏུ་བརྒྱན་པ། བཙུན་མོ་དམ་པའི་སྲས་ཐུ་བོར་གྱུར་པ། སྤོས་དམ་པ་རྣམ་པ་སྣ་ཚོགས་རྣམ་པར་དག་པའི་ཆུས་ལུས་བཀྲུས་ནས། རིན་པོ་ཆེས་བརྒྱན་པའི་གོས་དམ་པ་སྤོས་ཀྱིས་བདུགས་པ་རྣམ་པ་སྣ་ཚོགས་གྱོན་ཞིང ། ནོར་བུ་རིན་པོ་ཆེ་སྤྱི་བོའི་གཙུག་ཕུད་ལ་བཏགས་པ། རིན་པོ་ཆེའི་མེ་ཏོག་གི་ཕྲེང་བས་བརྒྱན་པའི་གསེར་གྱི་ཅོད་པན་མགོ་ལ་ཐོགས་པ། རབ་ཏུ་ཡང་ལ་འཇམ་པའི་དར་གྱིས་བཅིངས་པ། གཞན་ཡང་ནོར་བུ་རིན་པོ་ཆེ་དང ། མུ་ཏིག་དང ། གསེར་དང ། དངུལ་ལ་སོགས་པ་རིན་པོ་ཆེ་རྣམ་པ་སྣ་ཚོགས་ལ་བྱས་པའི་རྣ་ཆ་དང ། སེ་མོ་དོ་དང ། དཔུང་རྒྱན་དང ། གདུ་བུ་ལ་སོགས་པ་ཐོགས་པ། རིན་པོ་ཆེ་རྣམ་པ་སྣ་ཚོགས་ལས་བྱས་པའི་ལྷམ་གྱིས་རྐང་པ་བཏེག་པ། རིན་པོ་ཆེ་རྣམ་པ་སྣ་ཚོགས་ལས་བྱས་པའི་གདུགས་ཀྱིས་སྟེང་གི་བླ་རེས་བྲེས་པ། སྔོན་ལྷ་དང་དྲང་སྲོང་ཐམས་ཅད་ཀྱིས་བསྲུང་ཞིང་འཛིན་པའི་ཁྲི་བཤམས་པ། བརྒྱ་བྱིན་ལ་སོགས་པ་ཐམས་ཅད་ཀྱིས་བསྲུང་ཞིང་སྐྱོབ་པ། བཟོ་ཤིན་དུ་མཁས་པས་ལས་སུ་བྱས་པའི་གཞལ་མེད་ཁང་ཆེན་པོར་སྔོན་རྒྱལ་པོ་སྔ་མ་འདུག་འདུག་པའི་ཁྲི་ལ་བཞག་ནས་རྒྱལ་པོར་བཅུག་གོ། །རྒྱལ་སར་ཞུགས་ནས་ལྷའི་དབང་པོ་དང ། ཀླུའི་དབང་པོ་དང ། གནོད་སྦྱིན་གྱི་དབང་པོ་དང ། ལྷ་མ་ཡིན་གྱི་དབང་པོ་དང ། གྲུལ་བུམ་གྱི་དབང་པོས་སྲུང་ཞིང་འཛིན་པའི་དྲིལ་བུ་དང ། རྔ་ཆེན་པོ་བརྡུངས་ནས་དེའི་སྒྲས་ཡུལ་ཁམས་ཀུན་དུ་གྲགས་པར་གྱུར་ཏེ། རྒྱལ་རིགས་ལ་སོགས་པ་རིགས་ཆེན་པོ་བཞི་ལ་གཏོགས་པའི་མི་ཚད་མེད་པ་སྙེད་ལུས་ཡང་དག་པར་བཀྲུས་ནས་གོས་གཙང་མ་གྱོན་ཏེ། ལག་ན་རྣམ་པ་སྣ་ཚོགས་ཀྱི་རིན་པོ་ཆེའི་གདུགས་དང ། རྒྱལ་མཚན་དང ། བ་དན་དང ། ནོར་བུ་རིན་པོ་ཆེ་དང ། མུ་ཏིག་དང ། གསེར་དང ། དངུལ་དང ། དུང་དང ། མན་ཤེལ་དང ། བྱི་རུ་དང ། བཻ་དཱུརྱ་ལ་སོགས་པ་ཚད་མེད་པ་སྙད་ཐོགས་ཏེ 60.130b རྒྱལ་པོ་དེ་ལ་ཕུལ་ལོ། །གཞན་ཡང་རིགས་མཐོ་ཞིང་བཙུན་པ་ཚངས་པར་སྤྱོད་པ། ཐོས་པ་དང་ལྡན་ཞིང་ཤེས་པ་ཆེ་བའི་བྲམ་ཟེ་ཐམས་ཅད་ཀྱིས་ཀྱང་ཚིགས་སུ་བཅད་པས་བསྟོད་པ་དང ། གླུ་དང་དབྱངས་དམ་པ་ཚད་མེད་པ་སྙེད་ཀྱིས་རྒྱལ་པོ་དེ་ལ་བསྟོད་པ་བྱས་སོ། །ལེགས་པར་འགྱུར་བ་རྣམ་པ་སྣ་ཚོགས་ཐོབ་པར་གྱུར་ཅིག་ཅེས་སྨོན་ལམ་ཡང་བཏབ་བོ། །བཀྲ་ཤིས་པ་རྣམ་པ་སྣ་ཚོགས་ཀྱིས་རྒྱལ་པོའི་སྤྱི་བོར་གཏོར་ཏོ། །རྒྱལ་པོ་སྔ་མའི་བློན་པོའི་རིགས་ལ་གཏོགས་པ་ཐོས་པ་དང་ལྡན་ཞིང་ཤེས་པ་ཆེ་བ། དྲང་བ། གཡོ་མེད་པ། འཛངས་པ་དག་ཀྱང་ཅི་རིགས་སུ་བློན་པོར་རིམ་པར་ཕྱེ་སྟེ་བཅུག་ནས། རྒྱལ་པོའི་ལས་བྱེད་པས་སྔོན་ཡུལ་དེ་ན་བདག་དང་གཞན་གྱི་དམག་ཐམས་ཅད་ཀྱིས་གཙེ་བར་འགྱུར་བ་དང ། ཕྱིར་རྒོལ་བ་དང་གྲོགས་པོ་ངན་པ་ཐམས་ཅད་མེད་པར་བྱས་ནས་ཕས་རྒོལ་བའི་དགྲ་དང ། གནོད་པ་བྱེད་པ་ཐམས་ཅད་ཞི་བར་གྱུར་ནས། ནག་པོའི་ཕྱོགས་ཐམས་ཅད་བྱང་ཞིང་རྣམ་པར་དཀར་བའི་ཕྱོགས་ཐམས་ཅད་སྐྱེས་ཏེ་འཕེལ་བར་གྱུར་ཏོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟ་བུའི་འཁོར་ལོ་གཅིག་དང་ལྡན་ན། འཁོར་ལོ་དེའི་དབང་གིས་བདག་གི་རྒྱལ་སྲིད་རབ་ཏུ་ཆེ་ཞིང་ཕས་རྒོལ་བའི་དགྲ་ཐམས་ཅད་ཤིན་དུ་ཐུལ་བ་ལས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་རྙོག་པ་ལྔའི་འཇིག་རྟེན་གྱི་ཁམས་མི་མཇེད་ཀྱི་སངས་རྒྱས་ཀྱི་ཞིང་འདིར་སངས་རྒྱས་མི་བཞུགས་པའི་ཚེ། དེ་ན་གནས་པའི་སེམས་ཅན་ཐམས་ཅད་རང་གི་སེམས་ཀྱི་བག་ལ་ཉལ་བའི་ཉོན་མོངས་པས་ཡོངས་སུ་བཅིངས་ནས་ནང་གི་དགྲ་དང ། ཕ་རོལ་གྱི་དགྲས་རྣམ་པར་གཙེས་ཏེ། ཀུན་ནས་ཉོན་མོངས་པས་ཉོན་མོངས་ནས་གཏི་མུག་གིས་ལྡོངས་ཏེ། མི་བདེ་བར་གྱུར་པས་རྟག་པ་དང་ཆད་པ་ལ་རྣམ་པར་ཞེན་ཅིང་ཆགས་པ་ཚད་མེད་པ་བསྐྱོད་ནས་ཕན་ཚུན་རྩོད་ཅིང་འགལ་བར་བྱེད་དེ། གཅིག་ལ་གཅིག་དབང་ཟ་ཞིང་སྨོད་པས་འདོད་ཆགས་དང ། ཞེ་སྡང་དང ། གཏི་མུག་བསྐྱེད་དེ་གཡོ་དང་སྒྱུའི་ཚུལ་དུ་སྨྲ་ཞིང་མི 60.131a དགེ་བ་བཅུའི་ལས་ཀྱི་ལམ་རྫོགས་པར་བྱེད་པ་དང ། རྣམ་པར་ཞེན་ཅིང་ཆགས་པའི་སྐྱེ་བོ་དག་ཉོན་མོངས་པའི་འཇིག་རྟེན་གྱི་ཁམས་འདིར་རྣམ་པ་སྣ་ཚོགས་ཀྱི་ཉོན་མོངས་པའི་ནད་ཀྱིས་གཟིར་བ་དང་ལྡན་པས་ཡང་དག་པའི་ཆོས་ཀྱི་མིག་ལྡོངས་ཏེ། ཞེ་སྡང་དང་ཁོང་ཁྲོ་བས་གདུངས་ཤིང་འཁྲུགས་ཀྱང་ཡང་དག་པ་བདེན་པའི་ཆོས་ཅུང་ཟད་ཀྱང་ཡིད་ལ་མི་བྱེད་དེ། ཡང་དག་པའི་ཆོས་ཀྱི་རོ་ཡོངས་སུ་བཏང་ནས་དགེ་བ་བྱེད་པ་ལ་དབང་ཟ་ཞིང་སྨོད་དོ། །དེ་སྔར་བདེ་ཞིང་སྐྱིད་པས་ནི་བྲེལ་ཅིང་ཕོངས་པར་འགྱུར་གྱི་རྟག་ཏུ་ཉོན་མོངས་པའི་དྲ་བ་རྣམ་པ་མང་པོས་དཀྲིས་ཤིང་ཀླགས་ནས་མུ་སྟེགས་ཅན་གྱི་སྟོན་པ་རྣམ་པ་དྲུག་པོ་ལ་སྐྱབས་སུ་སོང་སྟེ། འཕགས་པའི་ལམ་ལས་ཕྱིར་ལོག་ཅིང་ངན་སོང་གསུམ་ལས་གཞོལ་བར་གྱུར་ཏོ། །དེའི་ཚེ་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་སངས་རྒྱས་ཚད་མེད་པ་སྙེད་ལ་མཆོད་ཅིང་བསྙེན་བཀུར་བྱས་པ། སངས་རྒྱས་ཀྱི་ཡོན་ཏན་གྱི་རྒྱ་མཚོར་ཞུགས་པ། སྔ་མ་འདས་པའི་སངས་རྒྱས་ཀྱི་སྤྱོད་ཡུལ་ལ་གནས་པ་ཐམས་ཅད་འདུས་ཤིང་ཚོགས་ནས་ངའི་སྤྱན་སྔར་ལྷགས་ཏེ་ཚིག་འཐུན་པར་འདི་སྐད་ཟེར་རོ། །ཁྱོད་སྔོན་འདས་པའི་དུས་ན་སྦྱིན་པ་ཚད་མེད་པ་ལ་ནན་ཏན་བྱས་པ་དང ། ཚུལ་ཁྲིམས་རབ་ཏུ་བསྲུངས་པ་དང ། ཤིན་དུ་འབད་པའི་བརྩོན་འགྲུས་ཀྱིས་ཤིན་དུ་སྤྱད་དཀའ་བ་སྤྱད་དེ། ཐམས་ཅད་ཡོངས་སུ་རྫོགས་པར་བསྒོམས་སོ། །དེ་ལྟ་བུའི་བསོད་ནམས་དང་ཡེ་ཤེས་ཀྱི་ཚོགས་དང ། ཤེས་རབ་དང ། ཐབས་མཁས་པ་དང ། སྙིང་རྗེ་ཆེན་པོ་ལ་སོགས་པས་ཡོངས་སུ་བརྒྱན་པས་ཡོན་ཏན་ཆེན་པོའི་གཏེར་དུ་གྱུར་པ། ཏིང་ངེ་འཛིན་ཐམས་ཅད་དང་གཟུངས་རྣམས་ལས་རབ་ཏུ་བཟོད་པ། སའི་ཡོན་ཏན་ཐམས་ཅད་ཡོངས་སུ་རྫོགས་པའི་རྒྱ་མཚོར་གྱུར་པའོ། །གཡོ་དང་སྒྱུ་མེད་ཅིང་ལུས་བྱད་ཤིན་དུ་རིང་ལ་མཚན་དང་དཔེ་བྱད་ཕུན་སུམ་ཚོགས་པར་གྱུར་པ་དང་དེས་པའི་བཟོད་པ་དང་ལྡན་ཞིང་ཤིན་དུ་མཛེས་པར་གྱུར་པ། གཞན་གྱི 60.131b དྲིང་ལ་མི་འབྲང་བས་བྱང་ཆུབ་ཀྱི་ལམ་བསྒོམ་པར་ཡེ་ཤེས་ཀྱི་རྒྱ་མཚོ་ཐམས་ཅད་ཡོངས་སུ་རྫོགས་པར་གྱུར་པ། ཕུལ་དུ་གྱུར་པའི་མདོག་མཆོག་དམ་པ་དང་ལྡན་པར་གྱུར་པ། ཉན་ཐོས་དང་རང་སངས་རྒྱས་ཐམས་ཅད་ཀྱི་སྟོན་པ་ཆེན་པོར་གྱུར་པ། འཁོར་བས་འཇིགས་སྐྲག་པའི་སེམས་ཅན་ཐམས་ཅད་ཀྱི་དཔུང་གཉེན་དུ་གྱུར་པ། བྱམས་པ་དང་སྙིང་རྗེ་ཆེན་པོ་ལ་སོགས་པ་ཡོན་ཏན་ཚད་མེད་པས་ཡོངས་སུ་བརྒྱན་པ། བཅོམ་ལྡན་འདས་ལོག་པར་དད་སེལ་དང ། གསེར་ཐུབ་དང ། འོད་སྲུང་ལ་སོགས་པའི་སྲས་ཡང་དག་པ། བསྐལ་པ་བཟང་པོ་འདིར་མངོན་པར་འཚང་རྒྱ་བ། བྱང་ཆུབ་སེམས་དཔའ་ཐམས་ཅད་ཀྱི་ནང་ན་གཙོ་བོར་གྱུར་པ། ཡོན་ཏན་རྣམ་པ་སྣ་ཚོགས་ཀྱི་སྤོས་ཅན། ཞི་གནས་དང་ལྷག་མཐོང་གི་ཆུ་ཡོངས་སུ་དག་པས་ཁྲུས་བྱས་པ། ཁྲེལ་བ་དང་འཛེམ་པའི་གོས་གྱོན་པ། རྣམ་པར་དག་པའི་ཆོས་ཀྱི་དབྱིངས་གཙུག་གི་ནོར་བུར་ཐོགས་པ། སངས་རྒྱས་ཐམས་ཅད་ཀྱི་སྤྱོད་ཡུལ་རྒྱ་ཆེན་པོའི་མེ་ཏོག་གི་ཕྲེང་བའི་ཅོད་པན་ཐོགས་པ། རྣམ་པར་གྲོལ་བའི་སྲད་བུས་བཅིངས་པ། གཞན་ཡང་རྣམ་པ་ཐམས་ཅད་མཁྱེན་པའི་ཡེ་ཤེས་དང ། མི་སྐྱེ་བའི་བཟོད་པ་ལ་སོགས་པ་ཡོན་ཏན་གྱི་རིན་པོ་ཆེས་ཡོངས་སུ་བརྒྱན་པ། བྱམས་པ་ཆེན་པོ་དང ། སྙིང་རྗེ་དང ། དགའ་བ་དང ། བཏང་སྙོམས་ཀྱི་ལྷམ་རིན་པོ་ཆེ་གྱོན་པ། ཁམས་གསུམ་ཡོངས་སུ་ཁེབས་པའི་སྤྱོད་པ་རྣམ་གསུམ་གྱིས་འཕགས་པའི་རྒྱུ་ཡོངས་སུ་རྫོགས་པར་འགྱུར་བའི་གདུགས་ཀྱིས་བཀབ་པ། སྔོན་གྱི་སངས་རྒྱས་དང ། ལྷ་དང ། དྲང་སྲོང་གིས་ཡོངས་སུ་བཟུང་བའི་རྡོ་རྗེ་ལྟ་བུའི་ཏིང་ངེ་འཛིན་གྱི་གདན་བཤམས་པ། ཉན་ཐོས་དང ། རང་སངས་རྒྱས་ཐམས་ཅད་ཀྱིས་བཀུར་སྟི་དང་བཅས་ཏེ་ཡོངས་སུ་བཟུང་བའི་དྲན་པ་ཉེ་བར་གཞག་པ་བཞི་ལ་བཞུགས་པ། སྔོན་གྱི་སངས་རྒྱས་ཐམས་ཅད་ཀྱིས་བཏིང་བའི་གདན་ལ་བཞུགས་ནས་བླ་ན་མེད་པའི་བྱང་ཆུབ་ཏུ་མངོན་པར་སངས་རྒྱས་སོ། །ཐམས་ཅད་མཁྱེན་པའི་ཡེ་ཤེས་སུ་གྱུར་པ་དཀོན 60.132a མཆོག་གསུམ་གྱི་གདུང་མི་གཅད་པའི་ཕྱིར་ཆོས་ཀྱི་འཁོར་ལོ་བསྐོར་ཏོ། །ཆོས་ཀྱི་རྔ་རབ་ཏུ་བརྡུངས་ནས་ཁམས་གསུམ་ཀུན་དུ་ཆོས་ཀྱི་སྒྲ་བསྒྲགས་ཏེ་ལྷ་དང ། ཀླུ་དང ། གནོད་སྦྱིན་དང ། སྲིན་པོ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། གྲུལ་བུམ་དང ། འབྱུང་པོ་དང ། ཤ་ཟ་དང ། སྲུལ་པོ་དང ། ལུས་སྲུལ་པོ་དང ། མི་དང་མི་མ་ཡིན་པ་ལ་སོགས་པ་ཐམས་ཅད་འཕགས་པའི་བདེན་པ་བཞིས་གྲོལ་བར་བྱས་སོ། །ཡན་ལག་བཅུ་གཉིས་དང་ལྡན་པའི་ཆོས་ཀྱི་འཁོར་ལོ་གང་འཇིག་རྟེན་དུ་བཅས་པ་དགེ་སྦྱོང་དང ། བྲམ་ཟེ་དང ། ལྷ་དང ། བདུད་དང ། ཚངས་པ་དང ། མི་དང་མི་མ་ཡིན་པ་ལ་སོགས་པ་གང་གིས་ཀྱང་མ་བསྐོར་བ་དེ་འཇིག་རྟེན་དུ་བཅས་པ་ལྷ་དང་མི་ཚད་མེད་པ་དག་ལ་ཕན་པ་དང་བདེ་བའི་དོན་ཆེན་པོ་མཆོག་དམ་པ་ཐོབ་པར་བྱ་བའི་ཕྱིར་སྔོན་གང་གིས་ཀྱང་མ་བསྐོར་བ་དེ་རྣམ་པ་གསུམ་དུ་རབ་ཏུ་བསྐོར་ཏོ། །རིགས་ཀྱི་བུ་ང་དེ་ལྟ་བུའི་སངས་རྒྱས་ཀྱི་འཁོར་ལོ་གཅིག་པ་དེ་དང་ལྡན་ཏེ་འཁོར་ལོ་དེའི་དབང་གིས་ཡང་དག་པ་ཇི་ལྟ་བ་བཞིན་དུ་འཇིག་རྟེན་འདི་དང་འཇིག་རྟེན་ཕྱི་མ་དང ། གནས་དང་གནས་མ་ཡིན་པ་མངོན་སུམ་དུ་མཁྱེན་པས་འཇིགས་པ་མེད་པ་ཐོབ་སྟེ། བདེ་བར་གནས་ཤིང་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་ཤིན་དུ་བཏུལ་ནས་ཚངས་པ་ཆེན་པོའི་འཁོར་ལོ་བསྐོར་ཏེ། ཚངས་པ་ཆེན་པོའི་སྤྱད་པ་ཤིན་དུ་གྲུབ་པས་ང་ནི་རྙོག་པ་ལྔའི་སྡིག་པ་ཅན་གྱི་འཇིག་རྟེན་གྱི་ཁམས་འདིར་འཁོར་གྱི་དཀྱིལ་འཁོར་དུ་སེང་གེའི་སྒྲ་ཡང་དག་པར་བསྒྲགས་ཏེ། སེམས་ཅན་ཐམས་ཅད་ཀྱི་མཚམས་མེད་པ་ལྔའི་ལས་ཞི་བར་བྱས་སོ། །དེ་བཞིན་དུ་མི་དགེ་བའི་རྩ་བར་གཏོགས་པ་ཐམས་ཅད་བསལ་ནས་སྐྱེ་བོ་ཐམས་ཅད་ཀྱི་ཉོན་མོངས་པའི་རྒྱུན་རྡོ་རྗེ་ལྟར་སྲ་བ་དག་ཀྱང་ཞི་བར་བྱེད་དོ། །ཟག་པ་ཐམས་ཅད་ཡོངས་སུ་ཟད་པ་རྣམ་པར་གྲོལ་བའི་འབྲས་བུ་དམ་པ་ལ་རྣམ་པར་བཞག་ནས་ཅི་དང་ཅི་ལ་མོས་པ་བཞིན་དུ་ཐམས་ཅད་བདེ་བར་འཇོག 60.132b པ་དང ། མཐུ་དང་ལྡན་པའི་སེམས་ཅན་དག་ནི་ཐེག་པ་གསུམ་ལ་བཞག་སྟེ་ཕྱིར་མི་ལྡོག་པར་ཡང་མཛད་དོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཐོག་མ་རྒྱལ་སར་ཞུགས་ནས་རྒྱལ་པོའི་སྲིད་བཟུང་མ་ཐག་ཏུ་འདས་པ་དང་མ་འོངས་པ་དང ། ད་ལྟར་གྱི་རྒྱལ་པོ་ཐམས་ཅད་ཀྱིས་ཆོས་དང་ཁྲིམས་ལ་ཤིན་དུ་ལྟ་ཞིང་རྟོག་གོ། །དེ་ལྟར་རྒྱལ་པོ་ཀུན་གྱི་ལས་ཀྱི་འཁོར་ལོ་ཤིན་དུ་རྟོགས་ནས་རྒྱུ་དང་འབྲས་བུ་སྨིན་པ་ཡང་ཤེས་ཏེ། ཅི་དང་ཅིར་ལྡན་པ་བཞིན་དེ་དང་དེ་ལྟ་བུའི་ཐབས་བྱིན་ཏེ་ལས་སུ་བཅུག་པས། ཡུལ་དེ་ན་གནས་པའི་འཛངས་ངན་ལས་ལས་ཀྱི་འཁོར་ལོ་རྣམ་པ་གསུམ་བྱེད་དུ་བཅུག་གོ། །ལས་ཀྱི་འཁོར་ལོ་དེའི་དབང་གིས་དེ་ན་གནས་པའི་སེམས་ཅན་ཐམས་ཅད་ཡུན་རིང་པོར་འཚོ་བའི་ཡོ་བྱད་ཡིད་དུ་འོང་བ་རྣམ་པ་སྣ་ཚོགས་ལ་ལོངས་སྤྱོད་པ་དང ། བདེ་སྐྱིད་འཕེལ་ཞིང་སྐྱེ་བ་དང ། ཕས་རྒོལ་བའི་དགྲ་ཐམས་ཅད་ཀྱང་ཐུལ་བར་གྱུར་ཏོ། །ལས་ཀྱི་འཁོར་ལོ་རྣམ་པ་གསུམ་གང་ཞེ་ན། འདི་ལྟ་སྟེ། རྒྱལ་པོ་སྲིད་ཀྱི་ལས་ཀྱི་འཁོར་ལོ་རྣམ་པར་བཞག་པས་གང་དགྲ་ཐབས་མཁས་པར་བསླབས་ཤིང་རྩལ་སྦྱངས་ཏེ་ཕས་རྒོལ་བའི་དགྲ་འདུལ་ཞིང་མི་མང་པོ་སྲུང་བར་བྱེད་པ་དང ། ཞིང་དང་གནས་བྱེད་པའི་ལས་ཀྱི་འཁོར་ལོ་རྣམ་པར་བཞག་པས་གང་ཁང་ཁྱིམ་བརྩིགས་པ་དང་ཞིང་གི་ལས་ལག་བྱད་ཀྱིས་ཕྱིན་པར་བྱེད་དུ་འཇུག་ཅིང་བདེ་བར་བྱས་པས་བཟའ་བ་དང་བཏུང་བས་མི་བྲེལ་བར་བྱེད་པ་དང ། ནོར་རིན་པོ་ཆེ་ཚོལ་བའི་ལས་ཀྱི་འཁོར་ལོ་རྣམ་པར་བཞག་པས་གང་ཚོང་སྤོགས་དང ། བཟོ་རྣམ་པ་སྣ་ཚོགས་སློབ་ཏུ་གཞུག་ཅིང་འཚོ་བའི་ཡོ་བྱད་རྣམ་པ་སྣ་ཚོགས་ཡིད་དུ་སྤྱད་དུ་ཡོད་ལ་བདེ་ཞིང་སྐྱིད་པ་འཕེལ་བར་བྱེད་པའོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་རྒྱལ་པོའི་འཁོར་ལོ་གཉིས་པོ་འདི་དང་ལྡན་ན་འཁོར་ལོ་འདིའི་དབང་གིས 60.133a བདག་གི་ཡུལ་རབ་ཏུ་བདེ་ཞིང་སྐྱིད་པ་དང ། ཕས་རྒོལ་བའི་དགྲ་དང་གྲོགས་པོ་ངན་པ་བཏུལ་ཞིང་ལུས་སྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པའི་ཡང་ཐོག་མ་མངོན་པར་སངས་རྒྱས་ཏེ་བླ་ན་མེད་པའི་ཡེ་ཤེས་ཐོབ་ནས་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་ཐམས་ཅད་ཀྱི་ཆོས་ཀྱི་མིག་ལ་ཤིན་དུ་རྟོག་གོ། །དེ་ལྟར་ཤིན་དུ་བརྟགས་པས་ལས་དང་ཆོས་རྣམས་ཀྱི་རྒྱུ་དང་འབྲས་བུ་རབ་ཏུ་མཁྱེན་ཏེ་འདུལ་བར་འགྱུར་བའི་སེམས་ཅན་ཐམས་ཅད་ལ་ལས་ཀྱི་འཁོར་ལོ་རྣམ་པ་གསུམ་རྣམ་པར་གཞག་གོ། །ལས་ཀྱི་འཁོར་ལོ་དེའི་དབང་གིས་དཀོན་མཆོག་གསུམ་གྱི་གདུང་དང ། ཆོས་ཀྱི་མིག་ཡུན་རིང་དུ་གནས་པ་དང ། བླ་ན་མེད་པ་ཡང་དག་པའི་ཆོས་རྒྱ་ཆེར་ཀུན་དུ་ཁྱབ་པ་དང ། སྐྱེ་བོ་ཐམས་ཅད་རྟག་ཏུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་ཤིན་དུ་བདེ་བ་ཐོབ་པ་དང ། མུ་སྟེགས་ཅན་ལོག་པར་སྨྲ་བ་ཐམས་ཅད་ཀྱིས་མི་ཚུགས་ཤིང་ཡང་དག་པའི་ཆོས་ཀྱི་མིག་གིས་ཕས་རྒོལ་བ་ཐམས་ཅད་ཆོས་བཞིན་དུ་ཐུལ་བར་འགྱུར་རོ། །དེ་ལ་རིགས་ཀྱི་བུ་ལས་ཀྱི་འཁོར་ལོ་རྣམ་པ་གསུམ་གང་ཞེ་ན། འདི་ལྟ་སྟེ། ཏིང་ངེ་འཛིན་བསྒོམ་པའི་ལས་ཀྱི་འཁོར་ལོ་རྣམ་པར་གཞག་པ་དང ། ཁ་དོན་གོམས་པར་བྱ་བའི་ལས་ཀྱི་འཁོར་ལོ་རྣམ་པར་གཞག་པ་དང ། བསོད་ནམས་བྱ་བའི་ལས་ཀྱི་འཁོར་ལོ་རྣམ་པར་གཞག་པ་དང་གསུམ་མོ། །རིགས་ཀྱི་བུ་དེ་ལ་ཇི་ལྟར་ན་དེ་བཞིན་གཤེགས་པའི་ཏིང་ངེ་འཛིན་བསྒོམ་པའི་ལས་ཀྱི་འཁོར་ལོ་གང་ཞེ་ན། ཏིང་ངེ་འཛིན་རྣམ་པ་བཅུ་སྟེ། བཅུ་གང་ཞེ་ན། ཡང་དག་པ་ཇི་ལྟ་བ་བཞིན་དུ་རྣམ་པར་ཤེས་པ་དང་བཅས་པའི་ལུས་འདི་ལ་བརྟགས་ན་ཡུལ་དྲུག་དང ། བདག་དང ། བདག་གིར་ཞེན་ཅིང་ཆགས་པའི་རྒྱུ་དང ། ལས་ཀྱི་ཞིང་དང ། མ་རིག་པས་བསྒྲིབས་པ་དང ། སྲེད་པའི་ཆུས་བརླན་པའི་དབང་མེད 60.133b པར་གཞན་གྱི་དབང་གིས་ཡོད་པར་གྱུར་པས་རྐྱེན་མང་པོ་ལ་རག་ལས་པའོ། །ལས་དང་ཉོན་མོངས་པ་དང་སྡུག་བསྔལ་གྱི་རྒྱུན་རྣམ་པ་གསུམ་པོ་དགག་པའི་ཕྱིར་དེ་ལྟར་བརྟག་གོ། །ལས་ཀྱི་རྒྱུན་གང་ཞེ་ན། གང་སེམས་ཅན་རྣམས་ཇི་སྙེད་ཀྱི་འདུ་བྱེད་མངོན་དུ་སྤྱོད་པ་དེ་མ་རིག་པ་དང ། སྲེད་པའི་རྒྱུ་ལས་སྲིད་པ་སྐྱེ་བས་ཉོན་མོངས་པའི་རྒྱུན་ཅེས་བྱའོ། །ཉོན་མོངས་པའི་དབང་གིས་རྣམ་པར་ཤེས་པའི་རྒྱུ་དང་རྐྱེན་མང་པོ་འདུས་པ་ལས་མིང་དང་གཟུགས་སྐྱེའོ། །མིང་དང་གཟུགས་ཀྱི་རྒྱུ་དང་རྐྱེན་མང་པོ་འདུས་པ་ལས་སྐྱེ་མཆེད་དྲུག་སྐྱེའོ། །སྐྱེ་མཆེད་དྲུག་གི་རྒྱུ་དང་རྐྱེན་མང་པོ་འདུས་པ་ལས་རེག་པ་དང ། ཚོར་བ་དང ། སྲིད་པ་ཕྱི་མའི་སྐྱེ་བ་དང ། རྒ་བ་དང ། འཆི་བ་ལ་སོགས་པ་རིམ་གྱིས་འབྱུང་བ་ནི་སྡུག་བསྔལ་གྱི་རྒྱུན་ཅེས་བྱའོ། །དེ་ལྟར་རྒྱུན་གསུམ་པོ་འདི་ནི་ལས་ཀྱི་ཞིང་ལ་མ་རིག་པའི་རྒྱུ་དང ། སྲེད་པའི་བརླན་གྱིས་སྐྱེ་བར་གྱུར་ཏོ། །འདི་ལྟར་ལས་ཀྱི་ཞིང་ལ་མ་རིག་པའི་རྒྱུ་དང ། སྲེད་པའི་བརླན་གྱིས་རྣམ་པ་གསུམ་པོ་བརྐམ་པའི་ཕྱིར་ཉེ་བར་ལེན་པའི་ཕུང་པོ་ལྔ་ལ་མི་རྟག་པ་དང ། སྡུག་བསྔལ་བ་དང ། བདག་མེད་པ་དང ། བེམས་པོ་དང ། གཡོ་བ་མེད་པ་དང ། སྒྱུ་མ་ལྟ་བུ་དང ། སྨིག་རྒྱུ་བ་ལྟ་བུ་དང ། ཆུའི་ཟླ་བ་ལྟ་བུ་དང ། རྨི་ལམ་ལྟ་བུ་སྟོང་པ་ཅི་ཡང་མེད་པ། མཚན་མ་མེད་པ། སྨོན་པ་མེད་པ། བྱས་པ་མེད་པ། མ་བྱུང་བ། མ་སྐྱེས་པ། གཟུགས་མེད་པ། ཞི་བ་དང ། དབེན་པ་དང ། མ་བྱུང་བ་དང ། སྐྱེ་བའི་གནས་མེད་པར་རྟོགས་སོ། །དེ་ལྟར་ཉེ་བར་ལེན་པའི་ཕུང་པོ་ལྔ་ལ་ཤིན་དུ་བརྟགས་པས་སྟོང་པ་ཉིད་དང་རྗེས་སུ་འཐུན་པའི་བཟོད་པ་དང ། མཚན་མ་མེད་པའི་རྗེས་སུ་འཐུན་པའི་བཟོད་པ་དང ། སྨོན་པ་མེད་པའི་རྗེས་སུ་འཐུན་པའི་བཟོད་པ་ལ་ཕྱོགས་སོ། །ཡང་ཉེ་བར་ལེན་པའི་ཕུང་པོ་ལྔ་ལ་རྗེས་སུ་བརྟག་པར་བྱ་བའི་ཕྱིར་གཞན་ཡང་ཐབས་མཁས་པས་དབུགས་ཕྱི་ནང་དུ་རྒྱུ་བ་ལ་རྟོག་སྟེ་ནང་དུ་རྒྱུ་བ་དང ། ཕྱིར་རྒྱུ་བའི་དྲན་པ་གོམས་པར་བྱེད་དོ། །དེ་ལ་ཇི 60.134a ལྟར་ན་དྲན་པའི་དབང་གིས་ཡང་དག་པ་ཇི་ལྟ་བ་བཞིན་དུ་དབུགས་ཕྱི་ནང་དུ་རྒྱུ་བ་ལ་རྟོག་ཅེ་ན། ཡང་དག་པ་ཇི་ལྟ་བ་བཞིན་དུ་བགྲང་བ་དང ། རྗེས་སུ་འབྲང་བ་དང ། ཞི་གནས་དང ། ལྷག་མཐོང་དང ། འཇུག་པ་དང ། ཡོངས་སུ་དག་པ་ལ་རྟོག་གོ། །དེ་ལ་བགྲང་བས་ནི་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། རྟེན་དུ་གྱུར་པས་རྣམ་པར་རྟོག་པ་དང ། རྣམ་པར་དཔྱོད་པ་རྣམས་ཐུལ་བ་དང ། དབུགས་ཕྱི་ནང་དུ་རྒྱུ་བའི་མཚན་ཉིད་འཛིན་པར་ནུས་པའོ། །རྗེས་སུ་འབྲང་བས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། ཡང་དག་པར་འབྱུང་བ་ལ་རྟེན་ཅིང་རྣམ་པར་རྟོག་པ་དང ། རྣམ་པར་དཔྱོད་པ་དང་བྲལ་བ་དང ། དབུགས་ཕྱི་ནང་དུ་རྒྱུ་བའི་འཇུག་པའི་མཚན་ཉིད་ལ་མཁས་པར་གྱུར་པའོ། །ཞི་གནས་ཀྱིས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། དབུགས་ཕྱི་ནང་དུ་རྒྱུ་བ་བྲི་བར་མངོན་དུ་སྟོན་པ་དང ། ཏིང་ངེ་འཛིན་གྱི་མཆོག་ལ་གནས་པར་ནུས་པའོ། །ལྷག་མཐོང་གིས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། དབུགས་ཕྱི་ནང་དུ་རྒྱུ་བ་ཟད་པར་མངོན་དུ་སྟོན་པ་དང ། སེམས་དང་སེམས་ལས་བྱུང་བའི་ཆོས་སོ་སོར་རྟོགས་པ་ལ་གནས་པའོ། །འཇུག་པས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། ཉེ་བར་ལེན་པའི་ཕུང་པོ་སྤོང་བའི་སྦྱོར་བ་ལ་མཁས་པ་དང ། འཕགས་པའི་སར་འཇུག་པ་ལ་སྦྱོར་བའོ། །ཡོངས་སུ་དག་པས་ཀྱང་བྱ་བའི་ལས་ཀྱི་དངོས་པོ་གཉིས་བྱེད་པར་འགྱུར་ཏེ། ཀུན་ནས་ཉོན་མོངས་པ་སྤོང་བ་དང ། ལྟ་བ་ཡོངས་སུ་དག་པའོ། །དེ་ལྟར་སྦྱོར་བ་རྣམ་པ་དྲུག་གིས་དབུགས་ཕྱི་ནང་དུ་རྒྱུ་བ་ལ་རྟོག་པ་བསྒོམས་པས་ཉེ་བར་ལེན་པའི་ཕུང་པོ་ལྔ་རྟོགས་པ་དང་རྗེས་སུ་འཐུན་པར་འཇུག་གོ། །དེ་ཅིའི་ཕྱིར་ཞེ་ན། ཇི་ལྟར་དབུགས་ཕྱི་ནང་དུ་རྒྱུ་བའི་རང་བཞིན་ནི་གཟུགས་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བ་ལེན་ཅིང་མྱོང་བར 60.134b བྱེད་པ་ནི་ཚོར་བ་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བའི་མཚན་ཉིད་ལེན་པ་ནི་འདུ་ཤེས་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བ་མངོན་དུ་བྱེད་པ་ནི་འདུ་བྱེད་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བ་བྱེ་བྲག་ཏུ་འབྱེད་པ་ནི་རྣམ་པར་ཤེས་པ་ཉེ་བར་ལེན་པའི་ཕུང་པོ་སྟེ། དེ་ལྟར་ཉེ་བར་ལེན་པའི་ཕུང་པོ་རྣམ་པ་ལྔ་བཤད་པ་ནི་སོ་སོ་བ། ཐ་དད་པ་མི་འདྲ་བ། གསར་མ་ཡིན་པ། རྙིང་མ་ཡིན་པ། གནས་མེད་པ། སྤུངས་པ་མེད་པ་མ་ཡིན་པ། བརྗོད་དུ་མེད་པའོ། །དེ་ལྟར་ཉེ་བར་ལེན་པའི་ཕུང་པོ་ལྔ་ཤིན་དུ་རྟོགས་པས་འདུ་བྱེད་རྣམ་པ་གསུམ་ཡོངས་སུ་སྤོང་བར་འགྱུར་རོ། །གལ་ཏེ་དེ་ལྟར་འདུ་བྱེད་རྣམ་པ་གསུམ་ཡོངས་སུ་ཟད་པར་རྗེས་སུ་བརྟགས་པའི་མཐར་ཕྱིན་ན་རྣམ་པར་ཤེས་པ་དང་བཅས་པའི་ལུས་དང ། ཡུལ་དྲུག་རྗེས་སུ་རྟོགས་པའི་མཐར་ཕྱིན་པར་འགྱུར་རོ། །བདག་དང་བདག་གིར་ཞེན་པ་དང ། ལས་དང ། མ་རིག་པ་དང ། སྲིད་པའི་རྒྱུ་དང ། ཞིང་དང ། ཀུན་ནས་འགེབས་པའི་རླན་པ་ཡང་ཐམས་ཅད་ཟད་པར་འགྱུར་རོ། །དེ་བཞིན་དུ་དྲན་པ་ཉེ་བར་གཞག་པ་བཞི་བསྒོམ་པ་ཡང་ཡོངས་སུ་རྫོགས་པ་ནས་འཕགས་པའི་ལམ་ཡན་ལག་བརྒྱད་པའི་བར་དུ་ཡང་བསྒོམ་པ་ཡོངས་སུ་རྫོགས་པར་འགྱུར་རོ། །དེ་བཞིན་དུ་སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཀྱི་བར་དུ་ཡང་བསྒོམ་པ་ཡོངས་སུ་རྫོགས་པར་འགྱུར་རོ། །དེ་བཞིན་དུ་རྣམ་པ་ཐམས་ཅད་མཁྱེན་པའི་ཡེ་ཤེས་དང ། མི་སྐྱེ་བའི་ཆོས་ཀྱི་བཟོད་པ་དང ། དཔའ་བར་འགྲོ་བའི་ཏིང་ངེ་འཛིན་ལ་སོགས་པའི་བར་དུ་བསྒོམ་པ་ཡོངས་སུ་རྫོགས་པར་འགྱུར་རོ། །དེ་བཞིན་དུ་འགྲོ་བ་དང་འོང་བ་རྗེས་སུ་དྲན་པས་གཟུང་བར་བསམ་གཏན་དག་ལ་ཞུགས་པ་ནི་ཡང་དག་པའི་ཆོས་དམ་པ་ལ་གནས་པའི་སེམས་ཅན་ཞེས་བྱའོ། །བསམ་གཏན་ཡང་དག་པ་ཇི་ལྟ་བ་བཞིན་དུ་སྒོམ་པ་ཞེས་བྱའོ། །དུས་གསུམ་གྱི་སངས་རྒྱས་བཅོམ་ལྡན 60.135a འདས་ལ་ཡང་དག་པར་མཆོད་པ་ཞེས་བྱའོ། །སངས་རྒྱས་ཐམས་ཅད་ཀྱི་ཐུགས་ལས་བྱུང་བའི་སྲས་ཐམས་ཅད་ཀྱི་གསུང་ལས་སྐྱེས་པ་ཆོས་ཀྱིས་བཏུལ་བ་ཞེས་བྱའོ། །བྱང་ཆུབ་སེམས་དཔའ་ལ་ལས་དེ་ལྟར་བསྒོམས་པ་ལས་བགས་ཀྱིས་ཕྱིར་ནུར་ན་ཡང་ཟག་པ་ཟད་པའི་དགྲ་བཅོམ་པར་གྱུར་པ་ནས་མངོན་པར་ཤེས་པ་དྲུག་དང་ལྡན་པར་འགྱུར་རོ། །བྱང་ཆུབ་སེམས་དཔའ་ལ་ལ་དེ་ལྟར་བསྒོམས་པས་གོང་ནས་གོང་དུ་འཕར་བ་ནི་ཡོན་ཏན་ཐམས་ཅད་ཡོངས་སུ་རྫོགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོར་གྱུར་པ་ནས་སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་དང ། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡོངས་སུ་རྫོགས་པར་འགྱུར་ཏེ། རིང་པོ་མི་ཐོགས་པར་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །རིགས་ཀྱི་བུ་ངས་རྣམ་པ་དེ་སྙེད་ཀྱི་ལས་དང ། ཆོས་དང ། ཚོར་བ་དང ། རྒྱུ་དང ། འབྲས་བུ་དང ། རྣམ་པར་སྨིན་པ་ལ་ཡེ་ཤེས་ཀྱིས་དུས་གསུམ་གྱི་སངས་རྒྱས་ཀྱི་ཆོས་ལ་བརྟགས་ན་སེམས་ཅན་དག་ཏིང་ངེ་འཛིན་བསྒོམ་པའི་ལས་ཀྱི་འཁོར་ལོ་བཅུ་རྣམ་པར་བཞག་ལ་སྒོམ་དུ་འཛུད་དོ། །རིགས་ཀྱི་བུ་དེ་དག་ནི་དེ་བཞིན་གཤེགས་པའི་ཏིང་ངེ་འཛིན་སྒོམ་པའི་ལས་ཀྱི་འཁོར་ལོ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་དེ་བཞིན་གཤེགས་པའི་ཁ་ཏོན་གོམས་པའི་ལས་ཀྱི་འཁོར་ལོ་ཞེ་ན། གང་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། རིགས་ཀྱི་བུ་འམ། རིགས་ཀྱི་བུ་མོ་དགེ་བའི་རྩ་བ་ཆུང་ཞིང་སྲབ་པ་དང ། ཀུན་རྫོབ་ཀྱི་བདེན་པ་ལ་གནས་པ་དབང་པོ་ཡོངས་སུ་མ་སྨིན་པ་དག་ལ་ངས་ཁ་ཏོན་གོམས་པར་བྱ་བ་ལ་བཙུད་དེ། སྲོད་དང་ཐོ་རངས་ལ་ལེ་ལོ་མེད་པར་ཤིན་དུ་བརྩོན་འགྲུས་རྩོམ་པ་དང ། སེམས་ཅན་གང་བླ་ན་མེད་པའི་ཡེ་ཤེས་ཚོལ་བ་དག་ནི་ངས་རྣམ་པར་དཀར་བའི་ཐེག་པ་ཆེན་པོ་ལ་བཙུད་དེ། བདག་ཉིད 60.135b ཀློག་པ་དང ། ཕ་རོལ་པོ་གཞན་ཀློག་ཏུ་འཇུག་པ་དང ། བདག་ཉིད་འདོན་པ་དང ། ཕ་རོལ་པོ་གཞན་འདོན་དུ་འཇུག་པ་དང ། བདག་ཉིད་འཆང་བ་དང ། ཕ་རོལ་པོ་གཞན་འཆང་དུ་འཇུག་པ་དང ། ཐེག་པ་ཆེན་པོ་ལ་བདག་གོམས་པར་བྱ་བ་དང ། ཕ་རོལ་པོ་གཞན་གོམས་པར་བྱེད་དུ་འཇུག་པ་དང ། བདག་དང་གཞན་གྱི་ཀུན་ནས་ཉོན་མོངས་པ་བསལ་བ་དང ། བླ་ན་མེད་པའི་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བ་དང ། སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བ་དང ། འཇིགས་པ་མེད་པའི་གྲོང་ཁྱེར་ཆེན་པོར་བཞུགས་པའི་ཕྱིར་རྩོལ་ལོ། །སེམས་ཅན་གང་རང་སངས་རྒྱས་ཀྱི་ཐེག་པ་འདོད་པ་དག་ནི་ངས་རྟེན་ཅིང་འབྲེལ་བར་འབྱུང་བའི་ཆོས་ལ་བཙུད་ནས་ཁ་ཏོན་གོམས་པར་བྱེད་དུ་བཅུག་གོ། །སེམས་ཅན་གང་ཉན་ཐོས་ཀྱི་ཐེག་པ་འདོད་པ་དག་ལ་ནི་ངས་གཞུང་ཚིགས་སུ་བཅད་པ་སྟོང་ཕྲག་བརྒྱ་པ་དང ། འདུལ་བ་ཚིགས་སུ་བཅད་པ་སྟོང་ཕྲག་བརྒྱ་པ་དང ། ཆོས་མངོན་པ་དང་མངོན་པར་སྨྲ་བ་ཚིགས་སུ་བཅད་པ་སྟོང་ཕྲག་བརྒྱ་པ་ལ་སོགས་པ་ཁ་ཏོན་གོམས་པར་བྱེད་དུ་བཅུག་པ་དེ་ནི་རིགས་ཀྱི་བུ་དེ་བཞིན་གཤེགས་པའི་ཁ་ཏོན་གོམས་པར་བྱ་བའི་ལས་ཀྱི་འཁོར་ལོ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་དེ་བཞིན་གཤེགས་པའི་བསོད་ནམས་བྱ་བའི་ལས་ཀྱི་འཁོར་ལོ་ཞེ་ན། འདི་ལྟ་སྟེ། སེམས་ཅན་གང་དབང་པོ་རྟུལ་བ་དང ། དགེ་བའི་རྩ་བ་མ་བསྐྱེད་པ། ཤེས་རབ་ཞན་པ་དང ། ལེ་ལོ་དང་བཅས་པ་དྲན་པ་ཉམས་པ་འཚོ་བའི་ཡོ་བྱད་རྣམ་པ་ཀུན་ལ་ཞེན་ཅིང་ཆགས་པ། དགེ་བའི་བཤེས་གཉེན་ཡོངས་སུ་སྤོང་བ་དག་ནི་ངས་བསོད་ནམས་བྱ་བའི་ལས་ལ་བཙུད་དོ། །འདི་ལྟ་སྟེ། སངས་རྒྱས་དང ། ཆོས་དང ། དགེ་འདུན་ལ་བྱ་བ་བྱེད་པ་དང ། མཁན་པོ་དང ། སློབ་དཔོན་ལ་བྱ་བ་བྱེད་པ་སྟེ་རིགས་ཀྱི་བུ་དེ་ནི་དེ་བཞིན་གཤེགས་པའི་བསོད་ནམས་སྒྲུབ་པའི་ལས་ཀྱི་འཁོར་ལོ་ཞེས་བྱའོ། །རིགས་ཀྱི་བུ་དེ་ལྟར་ན་ནི 60.136a སངས་རྒྱས་ཀྱི་འཁོར་ལོ་གཉིས་པ་འདི་དང་ལྡན་ཏེ། འཁོར་ལོ་དེའི་དབང་གིས་བླ་ན་མེད་པའི་དུས་གསུམ་གྱི་ལས་ཀྱི་ཡེ་ཤེས་ཀྱིས་ཡང་དག་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་ལས་དང ། ཆོས་དང ། ཚོར་བ་དང ། རྒྱུ་དང ། འབྲས་བུ་ཡོངས་སུ་སྨིན་པ་མཁྱེན་ཏེ། ཅིས་འདུལ་བ་བཞིན་དུ་ལས་ཀྱི་འཁོར་ལོ་རྣམ་པ་གསུམ་རྣམ་པར་བཞག་ནས་སྣོད་དུ་གྱུར་པའི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དང ། འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ནས་ཚངས་པ་ཆེན་པོའི་འཁོར་ལོ་བསྐོར་ཞིང ། ཚངས་པ་ཆེན་པོའི་སྤྱད་པ་ཡོངས་སུ་གྲུབ་པས་ཡང་དག་པ་ཇི་ལྟ་བ་བཞིན་དུ་སེམས་ཅན་གྱི་རྒྱུ་དང་འབྲས་བུ་ཀུན་མངོན་པར་མཁྱེན་ཏོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་ཐབས་མཁས་པའི་བློ་དང་ལྡན་པས་དགེ་སྦྱོང་དང ། བྲམ་ཟེ་དང ། རྒྱལ་རིགས་དང ། རྗེའུ་རིགས་དང ། དམང་རིགས་ལ་སོགས་པ་ཡོན་ཏན་རྣམ་པ་སྣ་ཚོགས་དང ། མང་དུ་ཐོས་པ་དང ། དཔའ་བོ་དང ། བཟོ་བ་དང ། རྩལ་ཆེ་བ་དང ། སེམས་ཅན་གང་ཕྱུག་ཅིང་ཡོན་ཏན་དང་ལྡན་པ། ཐབས་མཁས་པའི་བློ་དང་ལྡན་པ། དཔའ་ཞིང་རྟུལ་ཕོད་པ། བརྟན་པ། ཕྱིར་མི་ལྡོག་པ། བསོད་ནམས་རྣམ་པ་སྣ་ཚོགས་ཀྱིས་ཡོངས་སུ་བརྒྱན་པ་དེ་དག་ལ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོས་དེ་དག་ཅི་དང་ལྡན་པ་བཞིན་ཅི་འོས་ཅི་རིགས་སུ་རིན་པོ་ཆེ་དང ། ནོར་གྱི་དབྱིག་དང ། ཞིང་འབྲོག་དང ། ཁང་ཁྱིམ་དང ། བྲན་དང་ལས་བྱེད་པའི་མི་ལ་སོགས་པ་ཅི་རིགས་སུ་སྦྱིན་པར་བྱེད་དོ། །ཡུལ་དེ་ན་གནས་པའི་མི་ཡོན་ཏན་དང་ཤེས་པ་ཞན་པ། ལས་བྱས་པ་ཆུང་བ་དག་ལ་ནི་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོས་དེ་དག་ལ་ཡང་ཅི་འོས་ཅི་རིགས་སུ་ཤེས་ཀྱིས་སྦྱིན་པར་བྱེད་དོ། །ཡུལ་དེ་ན་གནས་པ་བསོད་ནམས་མེད་ཅིང་བརྩོན་འགྲུས་ཆུང་བ་ལེ་ལོ་ 60.136b ཆེ་བ། བག་མེད་པ། དྲན་པ་ཉམས་པ། སྙིང་རྗེའི་སེམས་མེད་པ། བྱས་པ་མི་གཟོ་བ། འཇིག་རྟེན་ཕྱི་མའི་སྡུག་བསྔལ་ལ་འཇིགས་པར་མི་ལྟ་བ། ཁྱིམ་གྱི་འདམ་དུ་བྱིང་བ། སྡིག་པ་མང་པོ་བྱེད་པ་དེ་དག་ལ་ནི་རྒྱལ་པོ་ཆེན་པོས་ཅི་རིགས་ཅི་འོས་སུ་ཆད་པ་རྣམ་པ་སྣ་ཚོགས་ཀྱིས་གཅོད་དེ། ཁ་ཅིག་ལ་ནི་ཚིག་ན་བས་སྤྱོས་ཤིང་བརྒྱད་པ་དག་བྱེད་དོ། །ཁ་ཅིག་ལ་ནི་རིན་པོ་ཆེ་དང་ནོར་རྫས་ལ་སོགས་པ་འཕྲོག་གོ། །ཁ་ཅིག་ལ་ནི་འཚོ་བའི་ཡོ་བྱད་དག་ཀྱང་འཕྲོག་གོ། །ཁ་ཅིག་ལ་ནི་ལྕག་གིས་གཞུ་བ་དང་བཙོན་རར་བཅུག་གོ། །ཁ་ཅིག་ལ་ནི་ཡན་ལག་དང་ཉིང་ལག་གཅོད་དོ། །ཁ་ཅིག་ལ་ནི་མགོ་དང་ལུས་ཀྱང་གཅོད་དེ་དེ་དག་ལ་སོགས་པ་ཆད་པ་རྣམ་པ་སྣ་ཚོགས་ཀྱིས་ཆད་པ་གཅོད་དོ། །རིགས་ཀྱི་བུ་དེ་ལྟར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་རྒྱལ་པོའི་འཁོར་ལོ་གསུམ་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པས་ཕས་རྒོལ་བའི་དགྲ་ཐམས་ཅད་དང ། གྲོགས་པོ་ངན་པ་བཏུལ་ཅིང་ལུས་སྲུང་བའི་ནན་ཏན་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་དབང་པོ་ལ་ཤིན་དུ་མཁས་པའི་ཡེ་ཤེས་དང་ལྡན་པས་འཁོར་གང་བསོད་ནམས་དང་ཡེ་ཤེས་ཀྱི་ཚོགས་དང ། ཐབས་དང་ཤེས་རབ་ལས་རིང་དུ་གྱུར་པ། སྦྱིན་པ་དང ། དུལ་བ་དང ། ཞི་བ་ཡོངས་སུ་སྤངས་ཏེ་དྲན་པ་ཉམས་ནས་སེམས་འཁྲུགས་པར་གྱུར་པ་དག་ང་གང་ན་བ་དེར་འོངས་ཏེ་ང་ལ་སྐྱབས་སུ་འོངས་ནས་དེ་དག་གི་དབང་པོ་དང ། དད་པ་དང ། བག་ལ་ཉལ་བ་དང ། མོས་པ་ཤིན་དུ་མཁྱེན་པས་ཅི་དང་ཅིས་འདུལ་བ་བཞིན་དུ་ཆད་པས་གཅད་པའི་ཐབས་འདུལ་བ་ལ་སོགས་པའི་ཆོས་སྟོན་ཏོ། །སེམས་ཅན་གང་ང་རྒྱལ་གྱི་དབང་དུ་གྱུར་ཏེ། བསླབ་པ་མང་པོ་གཟུངས་སུ་མི་འཛིན་པ་དག་ལ་ནི་ངས་བསྟན་པའི་དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར་དངོས་པོ་འདི་དག་བྱེད་དུ་གཞུག་གོ། །ལ་ལར་ནི་དྲན་པར་བྱ་བའི་དམ 60.137a བཅའ་བས་ཆད་པས་གཅོད་དོ། །ལ་ལར་ནི་ཚིག་ན་བས་བསྡིགས་པ་དང ། གཤེ་བ་དང ། སྤྱོ་བས་གཅོད་དོ། །ལ་ལར་ནི་སྐད་ཅིག་དགར་ཞིང་སྨ་དབབ་པས་གཅོད་དོ། །ལ་ལར་ནི་ཕྱག་འཚལ་བ་དང ། མི་སྨྲ་བ་དང ། རྙེད་པ་ལྷན་ཅིག་ཏུ་མི་སྤྱོད་པས་གཅོད་དོ། །ལ་ལར་ནི་རྩ་དགྲམ་པ་ལྟ་བུ་དང ། ལ་ལར་ནི་བསྐྲད་པ་ལ་སོགས་པའི་ཆད་པས་བཅད་པ་སྟེ། དེ་ལྟར་གང་ཟག་དེ་དག་གི་དབང་པོ་དང ། དད་པ་དང ། བག་ལ་ཉལ་བ་དང ། མོས་པ་ཀུན་མཁྱེན་པས་ཅི་རིགས་ཅི་འོས་སུ་ཆད་པས་གཅོད་དོ། །དེ་ཡང་དོན་མེད་པའི་མུན་པའི་ཚོགས་བསགས་པ་གཞོམ་པ་དང ། ཉོན་མོངས་པའི་ཆུ་བོ་བསྐམ་པ་དང ། མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བདེ་བ་ཐོབ་པའི་ཕྱིར་མི་དགེ་བ་སྤྱོད་པའི་གང་ཟག་འདུལ་བའི་ཕྱིར་ཅི་དང་ཅི་རིགས་སུ་ཆད་པས་གཅད་པའི་ཆོས་བསྟན་ཏོ། །མདོ་སྡེ་མང་པོ་ལས་ཀྱང་མི་དགེ་བ་སྤྱོད་པ་ཆད་པས་གཅད་པའི་ཆོས་ཅི་དང་ཅི་རིགས་པ་དེ་དང་དེའི་ཆོས་རྒྱ་ཆེར་བཤད་དོ། །ངས་མཆོག་དམ་པའི་ཡེ་ཤེས་ཀྱིས་སེམས་ཅན་གང་ལྷག་པའི་བསམ་པ་དང ། དད་པ་དང ། མོས་པ་ཡོངས་སུ་དག་པ་དང་ལྡན་པ་ཡང་ཤིན་དུ་མཁྱེན་པས་ཅི་དང་ཅིས་འདུལ་བ་བཞིན་དུ་དགེ་བའི་ཕྱོགས་ཀྱི་ཁྱད་པར་རྣམ་པ་སྣ་ཚོགས་བསྟན་ཏེ། བསླབ་ཅིང་གོམས་སུ་བཅུག་པ་ནས་དགེ་བའི་རྩ་བ་ཐམས་ཅད་ཀྱི་བར་དུ་ཡོངས་སུ་རྫོགས་ཤིང་འཇིགས་པ་མེད་པའི་གྲོང་ཁྱེར་ཆེན་པོར་བཙུད་དོ། །རིགས་ཀྱི་བུ་ང་ནི་དེ་ལྟར་སངས་རྒྱས་ཀྱི་འཁོར་ལོ་གསུམ་པོ་འདི་དང་ལྡན་ཏེ་འཁོར་ལོ་འདིའི་དབང་གིས་སེམས་ཅན་ཐམས་ཅད་ཀྱི་དབང་པོ་རྣམ་པ་སྣ་ཚོགས་དང ། དད་པ་དང ། བག་ལ་ཉལ་བ་དང ། མོས་པ་དང ། བསམ་པ་དང ། ལས་དང ། མྱོང་བའི་ཆོས་ཀུན་མཁྱེན་པས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་དམ་བཅའ་ཞིང་སངས་རྒྱས་ཀྱི་འཁོར་ལོ་རབ 60.137b ཏུ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་དཀྱིལ་འཁོར་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་བདག་གི་ཡུལ་ན་གང་ཟག་ཇི་སྙེད་ཅིག་འཇིག་རྟེན་གྱི་ལྷ་དང་མུ་སྟེགས་ཅན་རྣམ་པ་སྣ་ཚོགས་ལ་སྐྱབས་སུ་སོང་ཞིང་ལོག་པ་ལ་དད་པ་དང ། ལོག་པར་ལྟ་བ་དང ། ལོག་པ་ལ་སློབ་པ་དང ། ལོག་པའི་བརྟུལ་ཞུགས་ལ་མངོན་པར་ཞེན་ཏེ། ལོག་པའི་ལྟས་བཟང་ངན་ལ་ཆགས་ནས་དོན་མེད་པའི་སྡུག་བསྔལ་རྣམ་པ་སྣ་ཚོགས་ཀྱིས་སྡུག་བསྔལ་བར་གྱུར་པ་དག་རྒྱལ་པོ་ཆེན་པོ་དེས་ཤེས་ནས་རྟག་ཏུ་ཡང་དང་ཡང་བསྡུས་ཏེ། རྒྱལ་པོ་སྔ་མའི་དམ་པའི་ཆོས་ལུགས་ཀྱིས་རྒྱས་པར་བསྟན་ནས་ལོག་པར་ལྟ་བ་དང ། ལོག་པར་དད་པ་སྤོངས་ལ། རྒྱལ་པོ་སྔ་མའི་ཆོས་ལུགས་བསླབ་པ་ལ་ནན་ཏན་དུ་སྤྱོད་ཅིག་པར་བཀས་བཏགས་ཏེ། ཡུལ་དེ་ན་གནས་པའི་སེམས་ཅན་ཐམས་ཅད་འཇུག་པ་གཅིག་།ཕྱོགས་པ་གཅིག་།བསམ་པ་གཅིག་།འདོད་པ་གཅིག་པར་ཐམས་ཅད་འཐུན་པར་རྒྱལ་པོ་སྔ་མའི་དམ་པའི་ཆོས་བཞིན་དུ་གནས་པ་དང ། བཀའ་བཞིན་དུ་ཉན་ཅིང་རྗེས་སུ་སྤྱོད་པས་དེ་ན་གནས་པ་ཐམས་ཅད་འཐུན་པར་གང་བྱ་བར་རིགས་པ་རྣམས་བྱེད་དོ། །རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཡང་རྟག་ཏུ་བློན་པོ་རྣམས་དང་འདུས་ནས་སྟོན་མོ་བྱེད་ཅིང་ལོངས་སྤྱོད་དེ། དགའ་བས་རོལ་ཅིང་གཤེགས་པས་གྲོས་འཐུན་པས་རྒྱལ་པོའི་ལས་བྱེད་དོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་རྒྱལ་པོའི་འཁོར་ལོ་བཞི་པོ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང ། ཕས་རྒོལ་བའི་དགྲ་ཐམས་ཅད་དང ། གྲོགས་པོ་ངན་པ་བཏུལ་ཞིང་ལུས་སྲུང་བའི་ནན 60.138a ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་ཤིན་ཏུ་ཐབས་མཁས་པའི་མོས་པ་མཁྱེན་པའི་ཡེ་ཤེས་དང་ལྡན་པས་འཇིག་རྟེན་ན་ལོག་པ་ལ་ཕྱོགས་པ་རྣམ་པ་སྣ་ཚོགས་དང ། ལོག་པར་ལྟ་བ་དང ། ལོག་པའི་བསམ་པ་དང ། ལོག་པའི་ཆོས་ལ་མོས་པ་དང ། ལོག་པའི་ལས་སྤྱོད་པ་དེའི་རྒྱུ་དེའི་རྐྱེན་གྱིས་སྡུག་བསྔལ་ཚད་མེད་པ་མྱོང་བར་དེ་བཞིན་གཤགས་པས་མཁྱེན་ཅིང་གཟིགས་ནས་རྟག་ཏུ་ཡང་དང་ཡང་འཁོར་མང་པོ་བསྡུས་ཏེ་སྔ་མ་འདས་པའི་སངས་རྒྱས་བཅོམ་ལྡན་འདས་ཀྱི་དཀོན་མཆོག་གསུམ་གྱི་གདུང་བསབ་པའི་རྒྱུ་དང ། འབྲས་བུ་དང ། ཕ་རོལ་དུ་ཕྱིན་པ་དྲུག་དང ། རྣལ་འབྱོར་པའི་རྒྱུ་དང ། སྡོམ་པ་གསུམ་ལ་སོགས་པའི་རྒྱུ་དང་འབྲས་བུའི་ཆོས་རྒྱས་པར་ཕྱེ་སྟེ་མངོན་པར་བསྟན་ནས་འཁོར་མང་པོ་རྣམས་རྣམ་པར་གྲོལ་བར་བྱེད་དོ། །ཕྱིན་ཅི་ལོག་ཏུ་ལྟ་བ་རྣམས་ཡང་དག་པའི་ལྟ་བ་དང་དགེ་བ་བཅུའི་ཡང་དག་པའི་ལས་ཀྱི་ལམ་ལ་རྣམ་པར་འཇུག་གོ། །སེམས་ཅན་རྣམས་ནི་རྟག་ཏུ་འཐུན་པར་ཆོས་ལ་འཇུག་།ཆོས་ལ་སྤྱོད་པར་ཐབས་ཀྱིས་དྲང་ཞིང་སྒོམ་དུ་འཛུད་པས་རྒྱུ་དང་འབྲས་བུ་རྒྱུན་མི་འཆད་པར་བྱེད་དོ། །སེམས་ཅན་རྣམས་འཁོར་རྣམ་བཞི་དང་འཐུན་པར་དགེ་བ་སྤྱོད་པའི་ཁྱད་པར་ལ་ནན་ཏན་བྱེད་དུ་བཅུག་ནས་དྲན་པ་ཉེ་བར་གཞག་པ་བཞི་དང ། ཏིང་ངེ་འཛིན་དང ། རྣམ་པར་གྲོལ་བའི་ཡེ་ཤེས་སྟོན་པ་དང ། ལམ་གྱི་ཡན་ལག་ལ་སྤྲོ་བཞིན་དུ་རྩེའོ། །འཕགས་པའི་བསྟན་པ་ཡུན་དུ་གནས་པར་བྱ་བ་དང ། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱ་བའི་ཕྱིར་ཡང་དག་པར་སྤོང་བ་བཞི་དང ། རྫུ་འཕྲུལ་གྱི་རྐང་པ་བཞི་དང ། དབང་པོ་ལྔ་དང ། སྟོབས་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་དང ། དེ་མ་ཡིན་པ་ཏིང་ངེ་འཛིན་དང ། རྣམ་པར་གྲོལ་བའི་ཡེ་ཤེས་སྟོན་པ་དང ། བྱང་ཆུབ་ཀྱི་ཕྱོགས་ཀྱི་ཁྱད་པར 60.138b རྣམ་པ་སྣ་ཚོགས་ལ་ཅི་དགར་རྩེར་བཅུག་གོ། །རིགས་ཀྱི་བུ་ང་ནི་དེ་ལྟར་སངས་རྒྱས་ཀྱི་འཁོར་ལོ་བཞི་པ་འདི་དང་ལྡན་ཏེ། འཁོར་ལོ་དེའི་དབང་གིས་སོ་སོའི་སྐྱེ་བོ་ཅི་དང་ཅི་ལ་མོས་པ་དང ། ཅི་ལ་ཕྱོགས་པ་དང ། ཅི་ལ་དགའ་བ་ཀུན་མཁྱེན་པས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་ནང་དུ་སེང་གེའི་སྒྲ་བསྒྲགས་སོ་ཞེས་གསུངས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་བདག་གི་ཡུལ་ན་གནས་པ་འམ། ཕ་རོལ་པོ་གཞན་གྱི་ཡུལ་ན་གནས་པའི་སེམས་ཅན་ཚད་མེད་པ་སྙེད་པ་དག་གི་ནོར་དང་གཟུགས་ལ་ཆགས་ཤིང་སྐྱོ་མི་ཤེས་པ་དང ། ཕ་རོལ་པོ་གཞན་གྱི་ནོར་དང་གཟུགས་ལ་ཆགས་ཤིང་འདོད་པས་དེ་བསྲུང་བའི་ཕྱིར་གྲོང་དང ། གྲོང་ཁྱེར་དང་གྲོང་འདབ་དང ། རྒྱལ་པོའི་ཕོ་བྲང་ཡང་འཁོར་དང་ར་བས་བསྐོར་བ་ནས་བྱ་ཤ་ལ་དང ། ནེ་ཙོའི་བར་དུ་སྲུང་དུ་འཛུད་དེ་སྟོར་ཅིང་གོད་པར་མི་བྱེད་དོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་འདི་ལྟར་རྒྱལ་པོའི་འཁོར་ལོ་ལྔ་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང ། ཕས་རྒོལ་བའི་དགྲ་ཐམས་ཅད་དང ། གྲོགས་པོ་ངན་པ་བཏུལ་ཅིང་ལུས་སྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་རང་བཞིན་ལ་ཤིན་དུ་ཐབས་མཁས་པས་མཁྱེན་པའི་ཡེ་ཤེས་དང་ལྡན་པས་བདུད་སྡིག་ཅན་མ་རུངས་པ་དང ། མུ་སྟེགས་ཅན་དགུ་བཅུ་རྩ་ལྔ་པོ་དང ། དེ་མ་ཡིན་པ་གཞན་ཡང་བདུད་ཀྱི་རིས་དང ། 60.139a མུ་སྟེགས་ཅན་ཚད་མེད་པ་སྙེད་ཀྱིས་བསླུས་པ་ཀུན་མཁྱེན་ཏེ། སེམས་ཅན་གང་བདག་གི་ནོར་དང་གཟུགས་ལ་མངོན་པར་ཆགས་པ་དང ། ཕ་རོལ་པོ་གཞན་གྱི་ནོར་དང་གཟུགས་ལ་ཡང་ཆགས་ཤིང་འདོད་པས་ཚོལ་ལོ། །ང་དང་ངའི་འཁོར་རྣམས་ལ་ཕྲག་དོག་བསྐྱེད་དེ་ང་གསད་པའི་ཕྱིར་བསོད་སྙོམས་ཀྱི་ནང་དུ་དུག་བཅུག་པ་དང ། མེ་དོང་གི་སྟེང་དུ་གདན་བཏིང་བ་དང ། སྟེང་ནས་དབབ་བཏང་བ་དང ། བལ་གླང་སྨྱོས་པ་སྦད་པ་དང ། རལ་གྲི་ཕྱུང་སྟེ་སྙེགས་པ་དང ། ས་དང་མི་གཙང་བ་འཐོར་བ་དང ། མི་ཚངས་པར་སྤྱོད་དོ་ཞེས་སྐུར་པ་དང ། མ་ནིང་ཡིན་ནོ་ཞེས་བཏགས་པ་དང ། མི་མ་ཡིན་པའོ་ཞེས་བརྗོད་པ་དང ། སྒྱུ་མའོ་ཞེས་ཚིག་ངན་པ་རྣམ་པ་སྣ་ཚོགས་ཀྱིས་ཀྱང་ང་ལ་སྨོད་ཅིང་སྐུར་ཏོ། །ངའི་ཉན་ཐོས་ཀྱི་སློབ་མ་ལ་ཡང་ཕྲག་དོག་བསྐྱེད་དེ་དེའི་རྒྱུ་དེའི་རྐྱེན་གྱིས་སྐུར་ཅིང་སྨོད་པ་རྣམ་པ་མང་པོ་བྱེད་པར་མཁྱེན་ནས། དེ་བཞིན་གཤེགས་པ་དབང་པོ་དྲུག་བསྲུང་བ་ལ་མཁས་པ་དང ། ཚངས་པའི་གནས་བཞི་ལ་གནས་པ་དང ། སོ་སོ་ཡང་དག་པར་རིག་པ་བཞི་དང་ལྡན་པར་གྱུར་པ་དང ། ཉན་ཐོས་རྣམས་ལ་ཡང་ཆོས་ཀྱི་མདོ་རྣམ་པར་ཐར་པའི་སྒོ་གསུམ་ཡོངས་སུ་དག་པ་རྣམ་པར་གཞག་པ་བསྟན་ཏོ། །ངས་ད་ལྟར་འཇིག་རྟེན་དང ། འཇིག་རྟེན་ལས་འདས་པའི་རང་བཞིན་ཀུན་ཡང་དག་པ་ཇི་ལྟ་བ་བཞིན་དུ་མཁྱེན་ཏོ། །དེ་ལྟར་སེམས་ཅན་གྱི་རང་བཞིན་ཐ་དད་པ་རྣམ་པ་སྣ་ཚོགས་ཀུན་མཁྱེན་ནས། དེ་དག་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་མཛད་དོ། །རིགས་ཀྱི་བུ་ངས་དེ་ལྟར་སངས་རྒྱས་ཀྱི་འཁོར་ལོ་ལྔ་པ་འདི་དང་ལྡན་ཏེ། འཁོར་ལོ་དེའི་དབང་གིས་འཇིག་རྟེན་པ་དང ། འཇིག་རྟེན་ལས་འདས་པའི་རང་བཞིན་མཁྱེན་པའི་ཡེ་ཤེས་ཀྱིས་སེམས་ཅན་གྱི་རང་བཞིན་ཚད་མེད་པ་རྣམ་པ་སྣ་ཚོགས་ཀུན་སོ་སོར་མཁྱེན་པས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས 60.139b འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཤིང་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་དཀྱིལ་འཁོར་དུ་སེང་གེའི་སྒྲ་རབ་ཏུ་སྒྲོགས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཇི་ལྟར་གྲོང་ཁྱེར་དང ། གྲོང་རྡལ་དང ། གྲོང་མདབ་དང ། རྒྱལ་པོའི་ཕོ་བྲང་བརྟན་པར་བསྲུང་བའི་ཕྱིར་འོབས་ཀྱིས་བསྐོར་བ་ནས་གཞུང་དེ་བཞིན་དུ་རྒྱས་པར་ཤ་རི་དང་ནེ་ཙོའི་བར་དུ་སྲུངས་མ་བཙུད་དོ། །ཕོ་བྲང་ན་འཁོར་དང་བཙུན་མོ་དང་བུ་མོར་བཅས་པས་ཡོངས་སུ་བསྐོར་ཅིང་འདོད་པ་ལྔ་ལ་རྩེ་ཞིང་ལོངས་སྤྱོད་རྣམ་པ་སྣ་ཚོགས་ལ་བག་མེད་པར་དབང་པོ་དྲུག་ཉམ་རངས་སུ་སྤྱོད་དོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་དེ་ལྟར་རྒྱལ་པོའི་འཁོར་ལོ་དྲུག་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང ། ཕས་རྒོལ་བའི་དགྲ་དང ། གྲོགས་པོ་ངན་པ་ཐམས་ཅད་བཏུལ་ཏེ་ལུས་སྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང ། ཉན་ཐོས་ཆེན་པོ་རྣམས་ཀྱང་ཐམས་ཅད་འཕགས་པས་བསྟན་པའི་གྲོང་ཁྱེར་བརྟན་པར་བཙུད་ནས། དེའི་འོག་ཏུ་བསམ་གཏན་མཆོག་དམ་པ་ལ་སྙོམས་པར་འཇུག་པ་ནས་བསམ་གཏན་བཞིའི་བར་དུ་སྙོམས་པར་འཇུག་པ་དང ། ནམ་མཁའ་མཐའ་ཡས་སྐྱེ་མཆེད་ཀྱི་ཏིང་ངེ་འཛིན་ལ་སྙོམས་པར་འཇུག་པ་ནས། དེ་བཞིན་དུ་རྒྱས་པར་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ཏིང་ངེ་འཛིན་གྱི་བར་དུ་སྙོམས་པར་འཇུག་པ་དང ། དེ་བཞིན 60.140a དུ་སངས་རྒྱས་ཐམས་ཅད་ཀྱི་སྤྱོད་ཡུལ་གྱི་ཏིང་ངེ་འཛིན་གྱི་བར་དུ་སྙོམས་པར་འཇུག་པར་འགྱུར་རོ། །ཏིང་ངེ་འཛིན་དེ་དག་ཏུ་ཞུགས་ནས་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། འབྱུང་པོ་དང ། ཤ་ཟ་དང ། སྲུལ་པོ་དང ། ལུས་སྲུལ་པོ་ལ་སོགས་པ་སེམས་ཅན་ལ་གནོད་ཅིང་འཚེ་བ། བྱམས་པ་དང ། སྙིང་རྗེའི་སེམས་མེད་པ། འཇིག་རྟེན་ཕྱི་མའི་སྡུག་བསྔལ་གྱིས་མི་འཇིགས་པ་ཚད་མེད་པ་བྱེ་བ་བརྒྱ་སྟོང་སྙེད་ངས་སངས་རྒྱས་ཐམས་ཅད་ཀྱི་སྤྱོད་ཡུལ་གྱི་ཏིང་ངེ་འཛིན་དུ་ཞུགས་པ་མཐོང་ནས། ཐམས་ཅད་ང་ལ་ཤིན་དུ་དགའ་བའི་སེམས་བསྐྱེད་དེ། བསམ་པ་ཡོངས་སུ་དག་པས་དཀོན་མཆོག་གསུམ་ལ་མཆོག་དམ་པའི་དགའ་བ་དང་དང་བ་བསྐྱེད་ནས་བསྟི་སྟང་དང་བཅས། བཀུར་སྟི་དང་བཅས་ཏེ་ངོ་མཚར་རྨད་དུ་གྱུར་ནས་ཉེས་པ་ཐམས་ཅད་སོ་སོར་བཤགས་ཏེ་ཡོངས་སུ་གཅད་པར་དམ་བཅའོ། །དེའི་རྒྱུ་དེའི་རྐྱེན་གྱིས་སྐད་ཅིག་ཡུད་ཙམ་གྱིས་ཚད་མེད་དཔག་ཏུ་མེད་པའི་ཉོན་མོངས་པའི་སྒྲིབ་པ་དང ། ལས་ཀྱི་སྒྲིབ་པ་དང ། ཆོས་ཀྱི་སྒྲིབ་པ་ཀུན་བྱང་བར་འགྱུར་ཏེ། ཚད་མེད་དཔག་ཏུ་མེད་པའི་བསོད་ནམས་ཀྱི་ཚོགས་དང ། ཡེ་ཤེས་ཀྱི་ཚོགས་ཀུན་ཡོངས་སུ་རྫོགས་པར་གྱུར་ནས། འཁོར་བ་ལ་རྒྱབ་ཀྱིས་བལྟས་ཤིང་མྱ་ངན་ལས་འདའ་བ་ལ་ཕྱོགས་ནས། དེ་བཞིན་གཤེགས་པ་བླ་ན་མེད་པ་ཡང་དག་པའི་ཆོས་སྲུང་ཞིང་འཛིན་ཏོ། །རིགས་ཀྱི་བུ་ང་ཡང་དེ་ལྟར་སངས་རྒྱས་ཀྱི་འཁོར་ལོ་དྲུག་པ་འདི་དང་ལྡན་ཏེ། འཁོར་ལོ་དེའི་དབང་གིས་དེ་བཞིན་གཤེགས་པ་བསམ་གཏན་དང ། ཏིང་ངེ་འཛིན་དང ། རྣམ་པར་གྲོལ་བ་དང ། སྙོམས་པར་འཇུག་པ་དང ། མཉམ་པར་བཞག་པ་ཚད་མེད་པ་བརྒྱ་སྟོང་སྙེད་ལ་རྣམ་པར་དག་པའི་ཡེ་ཤེས་ཀྱིས་འཇུག་ཅིང ། སེམས་ཅན་གྱི་ཉོན་མོངས་པ་ཚད་མེད་པ་སྙེད་བསལ་ནས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་འགོད་དོ། ། 60.140b འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་དམ་བཅའ་ཞིང་སངས་རྒྱས་ཀྱི་འཁོར་ལོ་བསྐོར་ནས། ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་དཀྱིལ་འཁོར་དུ་སེང་གེའི་སྒྲ་བསྒྲགས་སོ་ཞེས་གསུང་ངོ ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་བློན་པོ་དང ། དམག་རྣམ་བཞི་དང་བཅས་ཏེ་བདག་གི་རིས་སུ་དབང་བའི་གྲོང་ཁྱེར་དང ། གྲོང་རྡལ་དང ། གྲོང་འདབ་དང ། རི་དང ། ལྗོངས་དང ། ལུང་པ་དང་ལུང་ཕྲན་དང ། བསྐྱེད་མོས་ཚལ་དང ། ཞིང་དང ། འབྲོག་དང ། འབབ་ཆུ་དང ། རྫིང་དང ། མཚེའུ་དང ། ཆུ་མིག་དང ། འབྲོག་དགོན་པ་དང ། ནགས་ཚལ་ལ་སོགས་པར་ཀུན་དུ་བྱུལ་ཞིང་བརྟགས་ནས། ཡུལ་དེ་ཕྱོགས་ཀྱི་འཇིགས་པ་དང་ཐེ་ཙོམ་དུ་བཅས་པའི་གནས་སམ། གཡང་ཟ་བ་བསྡུར་མི་རུང་བའི་གནས་སམ། ཕ་རོལ་གྱི་དགྲ་འཁྲས་ཤིང་འཚེ་བའི་གནས་རྣམས་སུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོས་རང་གི་ཉམས་ཀྱིས་དཔགས་ཤིང་རྣམ་པ་ཐམས་ཅད་དུ་སྦྱངས་ཏེ། བདེ་བར་འཇོག་པ་ལ་སྦྱོར་བ་དང ། ལེགས་པར་བསྲུང་ཞིང་བརྟན་པར་བྱས་པས་གནས་པའི་ཕྱོགས་དེ་དག་མཉམ་པ་ལས་བྱར་རུང་བ་ཕས་ཀྱི་དགྲ་དང་གྲོགས་པོ་ངན་པ་གླགས་ལྟ་ཞིང་འཁྲས་པའི་གནས་མེད་པར་བྱས་ཏེ། འཇིགས་པ་དང་བག་ཚ་བ་བསལ་བའི་ཕྱིར་ཡུལ་དེ་ན་གནས་པའི་སེམས་ཅན་ཐམས་ཅད་མི་བདེ་བའི་སྡུག་བསྔལ་དང་བྲལ་ཞིང་རབ་ཏུ་བདེ་ཞིང་སྐྱིད་པར་སྐྱབས་སོ། །རིགས་ཀྱི་བུ་དེ་ལྟར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་རྒྱལ་པོའི་འཁོར་ལོ་བདུན་པ་དེ་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང ། ཕས་རྒོལ་བའི་དགྲ་དང ། གྲོགས་པོ་ངན་པ་ཐམས་ཅད་བཏུལ་ཞིང་ལུས་བསྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི 60.141a བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་སངས་རྒྱས་ཀྱི་སྤྱན་གྱིས་ཡང་དག་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་འདོད་ཆགས་དང ། ཞེ་སྡང་དང ། གཏི་མུག་གི་བསམ་པ་གང་དང་ལྡན་པ་རབ་ཏུ་མཁྱེན་ཏོ། །ཡང་དག་པ་ཇི་ལྟ་བ་བཞིན་ཉོན་མོངས་པ་རྣམ་པ་སྣ་ཚོགས་ཀྱི་ནད་མི་མཐུན་པ་ཡང་རབ་ཏུ་མཁྱེན་ཏོ། །དེ་བཞིན་གཤེགས་པས་དེ་ལྟར་མཁྱེན་པས་ཤིན་དུ་འབད་པའི་བརྩོན་འགྲུས་ཚད་མེད་པ་དང ། ཐབས་མཁས་པའི་ཤུགས་ཀྱིས་ཅི་དང་ཅིས་འདུལ་བ་བཞིན་དུ་ཏིང་ངེ་འཛིན་རྣམ་པ་སྣ་ཚོགས་སྒྲུབ་པའི་སྨན་དམ་པ་བྱིན་པས་སེམས་ཅན་དག་ཉོན་མོངས་པའི་ནད་བསལ་བ་ལ་ནན་ཏན་དང་བརྩོན་འགྲུས་བྱེད་དུ་བཅུག་གོ། །སེམས་ཅན་གང་མི་གཙང་བ་ལ་རྟོག་པའི་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་མི་གཙང་བ་ལ་རྟོག་པའི་སྨན་སྒོམ་དུ་བཅུག་གོ། །སེམས་ཅན་གང་ཚངས་པའི་གནས་ལ་ནན་ཏན་བྱས་པས་ཉོན་མོངས་པའི་ནད་ཞི་བར་འོས་པ་ཞིག་ན་ཚངས་པའི་གནས་ཀྱི་སྨན་སྒོམ་དུ་བཅུག་གོ། །སེམས་ཅན་གང་རྟེན་ཅིང་འབྲེལ་ཏེ་འབྱུང་བ་བསྒོམས་པས་ཉོན་མོངས་པའི་ནད་སེལ་བར་འོས་པ་ཞིག་ན། དེ་ལ་རྟེན་ཅིང་འབྲེལ་ཏེ་བྱུང་བའི་སྨན་སྒོམ་དུ་བཅུག་གོ། །སེམས་ཅན་གང་དབུགས་འགྲང་བ་ཡིད་ལ་བྱས་པས་ནད་ཞི་བར་འོས་པ་ཞིག་ན། དེ་ལ་དབུགས་འགྲང་བ་ཡིད་ལ་བྱ་བའི་སྨན་སྒོམ་དུ་བཅུག་གོ། །སེམས་ཅན་གང་རྣམ་པར་ཐར་པའི་སྒོ་གསུམ་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་རྣམ་པར་ཐར་པའི་སྒོ་གསུམ་གྱི་སྨན་སྒོམ་དུ་བཅུག་གོ། །སེམས་ཅན་གང་བསམ་གཏན་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་བསམ་གཏན་གྱི་སྨན་སྒོམ་དུ་བཅུག་གོ། །སེམས་ཅན་གང་གཟུགས་མེད་པའི་བསམ་གཏན་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་གཟུགས་མེད་པའི་བསམ་གཏན་སྒོམ་དུ་བཅུག་གོ། །སེམས་ཅན་གང 60.141b དཔའ་བར་འགྲོ་བའི་ཏིང་ངེ་འཛིན་གྱི་བར་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་དཔའ་བར་འགྲོ་བའི་ཏིང་ངེ་འཛིན་གྱི་སྨན་སྒོམ་དུ་བཅུག་གོ། །དེ་བས་ན་དེ་བཞིན་གཤེགས་པས་སེམས་ཅན་དག་ལ་དེ་ལྟ་བུའི་ཆོས་ཀྱི་སྨན་གྱི་སྦྱིན་པ་མཛད་དོ། །སྣོད་དུ་གྱུར་པའི་སེམས་ཅན་ཐམས་ཅད་བདུད་རྣམ་བཞིའི་དབང་དུ་འགྱུར་བར་མི་མཛད་དོ། །སྣོད་དུ་གྱུར་པའི་སེམས་ཅན་ཐམས་ཅད་ལྷ་དང་མིའི་ཐེག་པ་ལ་རྒྱབ་ཀྱིས་ཕྱོགས་ཤིང་ངན་སོང་དུ་གཞོལ་བར་མི་མཛད་དོ། །དེ་བཞིན་གཤེགས་པ་བླ་ན་མེད་པའི་ཆོས་ཀྱི་སྨན་དང ། དཀོན་མཆོག་གསུམ་གྱི་གདུང་མྱུར་དུ་མེད་པར་འགྱུར་བར་མི་མཛད་དེ། དེ་ལྟར་ན་དེ་བཞིན་གཤེགས་པས་སེམས་ཅན་རྣམས་ལ་དེ་ལྟ་བུའི་ཆོས་ཀྱི་སྨན་གྱི་སྦྱིན་པ་མཛད་དོ། །རིགས་ཀྱི་བུ་དེ་བཞིན་གཤེགས་པ་དེ་ལྟ་བུའི་སངས་རྒྱས་ཀྱི་འཁོར་ལོ་བདུན་པ་དང་ལྡན་ཏེ། འཁོར་ལོ་དེའི་དབང་གིས་བླ་ན་མེད་པ་ཀུན་དུ་འགྲོ་བའི་ཡེ་ཤེས་ཀྱི་སྤྱོད་པས་སེམས་ཅན་ཐམས་ཅད་ལ་ཆོས་ཀྱི་སྨན་རྣམ་པ་སྣ་ཚོགས་བྱིན་པ་དེ་སྒོམ་དུ་བཙུད་ན་ཉོན་མོངས་པའི་ནད་ཀུན་ཞི་ཞིང་འཇིགས་པ་མེད་པ་ལ་བདེ་བར་གནས་པར་འགྱུར་རོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ། འཁོར་མང་པོའི་དཀྱིལ་འཁོར་དུ་སེང་གེའི་སྒྲ་སྒྲོགསོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་བདག་དང་གཞན་གྱི་རིགས་དང ། ཐོག་མ་བཙས་པ་དང ། གཞོན་ནུའི་ཚེ་རྩེ་བ་ལ་སོགས་པ་ཐམས་ཅད་ལ་དྲན་པ་མངོན་པར་བཞག་ཞེས་སེམས་སོ། །འདི་ལྟ་སྟེ། གནས་གང་དུ་ཐོག་མ་བཙས་པ་དང ། ཁྲུས་བྱས་པ་དང ། པང་དུ་བླངས་ཤིང་ནུ་ཞོ་བསྣུན་པ་དང་ལུས་དང་ཡན་ལག་གི་ཚོགས་མཉེས་པ་དང ། དགའ་བཞིན་དུ་རྩེ་བ་དང ། ས་དང་བྱེ་མ་ལ་རྩེ་བ 60.142a དང ། འཁོར་དང་བཅས་ཏེ་བག་མེད་པ་རྣམ་པ་མང་པོས་རྩེ་བ་དང ། རྩལ་སྦྱོང་བ་དང ། དེ་མ་ཡིན་པའི་ལས་རྣམ་པ་གཞན་བྱེད་པ་དང ། རྒྱལ་པོ་གཞན་གྱི་ཡུལ་དུ་རྒྱུ་ཞིང་འགྲོ་བ་དང ། རྒྱལ་པོའི་བྱ་བ་སྒྲུབ་པ་དང ། རྒྱལ་པོའི་ལས་བྱེད་པ་དང ། རྒྱལ་ཚབ་བྱེད་པ་དང ། རྒྱལ་ཐབས་ཐོབ་ནས་དབང་དུ་གྱུར་ཏེ། བདེ་བའི་ལོངས་སྤྱོད་ཆེན་པོ་མྱོང་བ་དང ། གྲགས་པ་ཆེན་པོས་ཕྱོགས་ཀུན་དུ་གྲགས་པ་དང ། དངོས་པོ་དེ་དག་ལ་སོགས་པ་བསམས་ཏེ་དྲན་ནས། རྒྱལ་པོ་སྔ་མའི་ཆོས་ལུགས་ཡང་དག་པ་རྣམ་པར་བཞག་ནས་དེ་ན་གནས་པའི་སེམས་ཅན་ཐམས་ཅད་ལ་འཚོ་སྐྱོང་སྟེ། བདག་གི་སྲིད་འཛིན་ཅིང་ཕ་རོལ་མི་འཚེའོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་རྒྱལ་པོའི་འཁོར་ལོ་བརྒྱད་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང ། ཕས་རྒོལ་བའི་དགྲ་དང་གྲོགས་པོ་ངན་པ་ཐམས་ཅད་བཏུལ་ཏེ། ལུས་བསྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་འཁོར་གྱི་དཀྱིལ་འཁོར་ན་བཞུགས་པའི་ཚེ་བདག་དང་ཕ་རོལ་པོ་གཞན་གཞན་གྱི་སྔོན་གྱི་སྐྱེ་བ་ཚད་མེད་པ་སྙེད་ན་ཅི་བྱས་པའི་དངོས་པོ་ཀུན་དགོངས་སོ། །འདི་ལྟ་སྟེ། སྐྱེ་བ་གཅིག་དང ། སྐྱེ་བ་གཉིས་དང ། སྐྱེ་བ་གསུམ་ནས་སྐྱེ་བ་ཚད་མེད་པ་བརྒྱ་སྟོང་གི་བར་གྱི་ཅི་བྱས་པའི་དངོས་པོ་ཀུན་དགོངས་སོ། །དེ་བཞིན་དུ་བསྐལ་པ་འགྲུབ་པ་དགོངས་པ་ནས་བསྐལ་པ་འཇིག་པ་ཡང་དགོངས་སོ། །བསྐལ་པ་ཚད་མེད་པ་འགྲུབ་པ་དང ། བསྐལ་པ་ཚད་མེད་པ་འཇིག་པའི་བར་དུ་ཐམས་ཅད་དགོངས་ཏེ། འདི་ནི་སྔོན་འདས་པའི་དུས་ན་ཆེ་གེ་མོ་ཞིག་ན་འདུག་འདུག་སྟེ་རིགས་ནི་འདི་ཞེས་བྱའོ། །མིང་ནི་འདི་ཞེས་བྱའོ། །རུས་ནི་འདི་ཞེས་བྱའོ། །ཁ་ཟས་ནི་འདི་ཟ་ཟའོ། །བདེ་བ་དང་སྡུག་བསྔལ་བ་འདི་དག་མྱོང་ངོ ། ། 60.142b ཚེ་ནི་འདི་སྙེད་ཅིག་གོ། །འདི་སྙེད་ཀྱི་བར་དུ་འདུག་འདུག་གོ། །ཚེའི་མཐར་ཐུག་པ་ན་ཆེ་གེ་མོ་ཞིག་ཏུ་ཚེ་འཕོས་ནས་འདི་དག་ཏུ་སྐྱེས་སོ། །འདི་དག་ཏུ་ཚེ་འཕོས་ནས་ཆེ་གེ་མོ་ཞིག་ཏུ་སྐྱེས་པ་ལ་སོགས་པ་དངོས་པོ་ཚད་མེད་དཔག་ཏུ་མེད་པ་ཀུན་དགོངས་པས་སེམས་ཅན་གྱི་དབང་པོ་སོ་སོ་ཇི་ལྟ་བ་བཞིན་དུ་དམ་པའི་ཆོས་སྟོན་ཏེ། ཕན་པ་དང་བདེ་བའི་དོན་མཛད་དོ། །རིགས་ཀྱི་བུ་ང་དེ་ལྟར་སངས་རྒྱས་ཀྱི་འཁོར་ལོ་བརྒྱད་པ་འདི་དང་ལྡན་ཏེ། འཁོར་ལོ་དེའི་དབང་གིས་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ། སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལ་སོགས་པ་ལོག་པར་སྨྲ་བ་ཐམས་ཅད་བཏུལ་ཏེ། འཁོར་མང་པོའི་དཀྱིལ་འཁོར་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་བསམས་པ་བཞིན་དུ་བདག་གི་རིས་ན་གནས་པའི་སེམས་ཅན་གྱི་རིགས་དང ། རུས་དང ། རྩལ་ཅི་ཡོད་པ་དང ། ལས་ཀྱི་དངོས་པོ་ཅི་བྱེད་པ་དང ། འདི་ནས་ཚེ་འཕོས་ནས་གང་དུ་སྐྱེ་བ་དང་རྒྱུ་དང་འབྲས་བུ་བཟང་ངན་གྱི་ཁྱད་པར་མི་མཐུན་པ་ཀུན་ཤིན་དུ་རྟོག་གོ། །སེམས་ཅན་གང་སུའི་ཁྱིམ་དུ་སྐྱེས་ན་རྟུལ་ཕོད་ཅིང་དཔའ་བ་དང ། ཞན་ཅིང་སྡར་བ་དང ། བཟོ་རྩལ་བསླབས་ན་ལོབས་པ་དང ། མི་ལོབས་པ་དང ། ལས་ཅི་བྱེད་པ་དང ། དགེ་བ་བྱེད་པ་དང ། སྡིག་པ་བྱེད་པ་དང ། ཕྱུག་ཅིང་བཙན་པ་དང ། དབུལ་ཞིང་ཉེན་པ་དང ། མཛེས་པ་དང ། མི་མཛེས་པ་ལ་སོགས་པ་ཀུན་ཤེས་པ་ནས་ཚེ་འཕོ་བའི་བར་དུ་ཀུན་ཤེས་ཏེ་གང་སུ་ཞིག་ལས་མ་ཟད་པར་འཆི་བ་དང ། གང་ནི་ལས་ཟད་དེ་འཆི་བ་དང ། གང་ནི་རྒྱལ་པོའི་ཁྲིམས་དང་འགལ་ནས་བསད་པ་དང ། གང་ན་དགྲས་བསད་པ་དང ། གང་ནི་ལྕག་གིས 60.143a གཞུས་པས་འཆི་བ་དང ། གང་ནི་བཙོན་རར་བཅུག་པས་འཆི་བ་དང ། གང་ནི་བཟོ་རྩལ་སྦྱོང་བའི་ཕྱིར་འཆི་བ་དང ། གང་ནི་ཕས་རྒོལ་བའི་དགྲའི་གཡུལ་ངོར་འཆི་བ་དང ། གང་ནི་རྩོད་ཅིང་འཐབས་ནས་འཆི་བ་དང ། གང་ནི་ནོར་དབྱིག་སྲུང་བའི་ཕྱིར་འཆི་བ་དང ། གང་ནི་འདོད་ཆགས་ཀྱི་དབང་གིས་འཆི་བ་དང ། གང་ནི་ཁོང་ཁྲོ་ཞིང་འཁོན་དུ་འཛིན་པའི་ཕྱིར་འཆི་བ་དང ། གང་ནི་ངལ་ཆད་ནས་འཆི་བ་དང ། གང་ནི་ལྟོགས་ཏེ་འཆི་བ་དང ། གང་ནི་ཉེས་པའི་སྐྱོན་དང་བཅས་ཏེ་འཆི་བ་དང ། གང་ནི་སྐྱོན་མེད་པར་འཆི་བ་དང ། གང་ནི་རྒས་འཁོགས་ཏེ་འཆི་བ་པ་དང ། གང་ནི་དར་ལ་བབ་སྟེ་འཆི་བ་དང ། གང་ནི་གཞོན་ནུ་བྱིས་པའི་ཚེ་འཆི་བ་དང ། གང་ནི་དགེ་བའི་ལས་རྣམ་པ་མང་པོ་བྱས་ནས་འཆི་བ་དང ། གང་ནི་མི་དགེ་བའི་ལས་རྣམ་པ་མང་པོ་བྱས་ཏེ་འཆི་བ་དག་ཀྱང་རབ་ཏུ་ཤེས་སོ། །སེམས་ཅན་གང་ནི་དགེ་བ་སྤྱད་པའི་རྒྱུས་ཤི་ནའང་མཐོ་རིས་སུ་སྐྱེ་བར་འགྱུར་བ་འང་ཤེས་ཏེ། སེམས་ཅན་གང་ནི་མི་དགེ་བ་སྤྱད་པའི་རྒྱུས་ཚེ་འཕོས་ནས་ངན་སོང་དུ་སྐྱེ་བར་འགྱུར་བ་འང་རབ་ཏུ་ཤེས་སོ། །དེ་ལྟར་དངོས་པོ་དེ་དག་ཀུན་རབ་ཏུ་ཤེས་པས་འདི་སྙམ་དུ་བདག་ཀྱང་བརྩོན་པའི་སྦྱོར་བ་ལ་ལུས་དགེ་བ་དང ། ངག་དགེ་བ་དང ། ཡིད་དགེ་བ་ལ་སྤྱོད་པ་ལ་ཤིན་དུ་བརྩོན་པར་བྱའོ་སྙམ་དུ་སེམས་སོ། །བདག་གིས་ཐབས་རྣམ་པ་སྣ་ཚོགས་ཀྱིས་སྦྱིན་པ་ལ་གོམས་པར་བྱ་བ་དང ། ཞི་ཞིང་དུལ་བར་བྱ་སྟེ་ཚེ་འཕོས་ནས་གནས་བཟང་པོར་སྐྱེ་བར་བྱའི། ངན་སོང་དུ་ལྟུང་བར་མི་བྱའོ་སྙམ་དུ་སེམས་སོ། །དེ་ལྟར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟ་བུའི་དངོས་པོ་བསམས་ནས་ཤིན་དུ་འབད་པའི་བརྩོན་འགྲུས་ཀྱིས་ལུས་དང་ངག་དང་ཡིད་གསུམ་གྱིས་དགེ་བ་སྤྱོད་པ་ལས་ཤིན་དུ་རྩོལ་ཏེ། རྟག་ཏུ་སྦྱིན་པ་སྤྱོད་པ་ནི་འདི་ལྟ་སྟེ། ཟས་དང ། སྐོམ་དང ། གོས་དང ། བལ་གླང་དང ། རྟ་དང ། བཞོན་པའི་ཐེག་པ་དང ། མལ་ཆ་དང ། ནད་ཀྱི་གསོས་སྨན་དང ། ཁང་ཁྱིམ་དང ། མར་མེ་དང ། སྒྲོན་མ་དང ། 60.143b དེ་མ་ཡིན་པ་འཚོ་བའི་ཡོ་བྱད་ཐམས་ཅད་དང ། བྲན་དང་ལས་བྱེད་པའི་མི་དང ། གཞན་ཡང་རིན་པོ་ཆེ་དང ། ནོར་དབྱིག་རྣམ་པ་སྣ་ཚོགས་དང ། མགོ་དང ། མིག་དང ། ལག་པ་དང ། རྐང་པ་ནས་ལུས་དང ། སྲོག་གི་བར་དུ་ཕངས་པ་མེད་པར་ཐམས་ཅད་གཏོང་ངོ ། །སྲོག་གཅོད་པ་ཡོངས་སུ་སྤོང་བ་ནས་མ་བྱིན་པར་ལེན་པ་དང ། འདོད་པས་ལོག་པར་གཡེམ་པ་དང ། བརྫུན་དུ་སྨྲ་བ་དང ། ངག་རྩུབ་པོར་སྨྲ་བ་དང ། ཚིག་ཀྱལ་པ་དང ། ཕྲ་མ་དང ། འདོད་ཆགས་དང ། ཞེ་སྡང་དང ། ལོག་པར་ལྟ་བའི་བར་དུ་ཡོངས་སུ་སྤོང་ངོ ། །དེའི་རྒྱུ་དེའི་རྐྱེན་གྱིས་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཡོན་ཏན་གྱི་ཁྱད་པར་རྣམ་པ་བཅུ་ཐོབ་པོ། །བཅུ་གང་ཞེ་ན་འདི་ལྟ་སྟེ། གྲགས་པ་ཆེན་པོ་དང་ལྡན་པ་ཡིན། ནོར་རིན་པོ་ཆེ་དང་ལྡན་པ་ཡིན། མཚན་ཕུན་སུམ་ཚོགས་པ་དང་ལྡན་པ་ཡིན། འཁོར་མང་པོ་དང་ལྡན་པ་ཡིན། མི་བདེ་བ་དང་ནད་མེད་པ་ཡིན། འཁོར་དང་གཉེན་བཤེས་ཀུན་ཤེས་རབ་རྣོ་ཞིང་མང་དུ་ཐོས་པ་ཡིན་ཡང་དག་པ་དང་ཡང་དག་པའི་སྤྱོད་པ་ཅན་ལ་སྟེན་ཅིང་མཆོད་པ་བྱེད་པ་ཡིན། ཕྱོགས་བཅུ་ཀུན་དུ་ཤིན་དུ་སྙན་པས་རྒྱ་ཆེར་གྲགས་པ་ཡིན། གཟི་བརྗིད་ཆེན་པོའི་མཐུ་དང་ལྡན་པའི་ལྷས་རྟག་ཏུ་སྲུང་བ་ཡིན། ཚེ་འཕོས་པར་གྱུར་ན་ཡང་མཐོ་རིས་ཀྱི་ལྷར་སྐྱེ་ཞིང་རྟག་ཏུ་གནས་བཟང་པོར་རབ་ཏུ་བདེ་བའི་ལོངས་སྤྱོད་དང་ལྡན་པ་ཡིན་ནོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་འཁོར་ལོ་དགུ་པ་འདི་དང་ལྡན་ཏེ། འཁོར་ལོ་དེ་དང་ལྡན་པའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང ། ཕས་རྒོལ་བའི་དགྲ་དང ། གྲོགས་པོ་ངན་པ་ཐམས་ཅད་བཏུལ་ཏེ་ལུས་བསྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་ཡང་དག་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་སྐྱེ་བ་དང་འཆི 60.144a འཕོ་བའི་དངོས་པོ་ཀུན་མཁྱེན་ཏོ། །ཡང་དག་པ་ཇི་ལྟ་བ་བཞིན་དུ་སེམས་ཅན་གང་ནི་ལུས་མི་དགེ་བ་སྤྱོད་པ་དང་ལྡན་པ། སེམས་ཅན་གང་ནི་ངག་མི་དགེ་བ་སྤྱོད་པ་དང་ལྡན་པ། སེམས་ཅན་གང་ནི་ཡིད་མི་དགེ་བ་སྤྱོད་པ་དང་ལྡན་ཞིང་འཕགས་པ་རྣམས་ལ་དབང་ཟ་སྟེ། ངན་པར་ལྟ་བ་དང་ལྡན་པས་ངན་པར་ལྟ་བའི་དབང་གིས་ཚེ་འཕོས་ནས་ངན་སོང་དུ་ལྟུང་བ་དང ། གང་ནི་སེམས་ཅན་དམྱལ་བར་ལྟུང་བ་དང ། གང་ནི་བྱོལ་སོང་གི་སྐྱེ་གནས་སུ་སྐྱེ་བ་དང ། གང་ནི་ཡི་དགས་སུ་སྐྱེ་བ་ཡང་རབ་ཏུ་མཁྱེན་ཏོ། །སེམས་ཅན་གང་ནི་ལུས་དགེ་བ་སྤྱོད་པ་དང་ལྡན། གང་ནི་ངག་དགེ་བ་སྤྱོད་པ་དང་ལྡན། གང་ནི་ཡིད་དགེ་བ་སྤྱོད་པ་དང་ལྡན་ཞིང་འཕགས་པ་རྣམས་ལ་དབང་མི་ཟ་བ་དང ། ཡང་དག་པར་ལྟ་བ་དང་ལྡན་ཏེ། ཡང་དག་པར་ལྟ་བའི་རྐྱེན་གྱིས་ཚེ་འཕོས་ནས་མཐོ་རིས་ཀྱི་ལྷར་སྐྱེ་བ་དང ། མིར་སྐྱེ་བ་དང ། ཟག་པ་ཟད་པར་འགྱུར་བ་ཡང་རབ་ཏུ་མཁྱེན་ཏོ། །དེ་ལྟར་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་མཁྱེན་པས་སེམས་ཅན་དེ་དག་ལ་བྱམས་པ་དང ། སྙིང་རྗེ་ཆེན་པོ་བསྐྱེད་དེ། ཤིན་དུ་འབད་པའི་བརྩོན་འགྲུས་ཀྱིས་ཆོ་འཕྲུལ་རྣམ་པ་གསུམ་མངོན་པར་བསྟན་ཏེ། སེམས་ཅན་དེ་དག་སངས་རྒྱས་ཀྱིས་བསྟན་པའི་ཆོས་དང་འདུལ་བ་ལ་ཕྱོགས་ཤིང་འཇིག་རྟེན་དང་འཇིག་རྟེན་ལས་འདས་པའི་དད་པ་ལ་བཀོད་དོ། །གསུམ་གང་ཞེ་ན། འདི་ལྟ་སྟེ། མངོན་པར་ཤེས་པའི་ཆོ་འཕྲུལ་དང ། ཆོས་སྟོན་པའི་ཆོ་འཕྲུལ་དང ། ཕ་རོལ་གྱི་སེམས་ཤེས་པའི་ཆོ་འཕྲུལ་བའོ། །ཆོ་འཕྲུལ་རྣམ་པ་དེ་གསུམ་གྱིས་སེམས་ཅན་དེ་དག་བསྐུལ་ནས་བསྟན་པ་ལ་བཀོད་དེ། འཇིག་རྟེན་དང་འཇིག་རྟེན་ལས་འདའ་བའི་དད་པ་ཐོབ་པར་བྱས་ནས། སྲིད་པ་ན་འཁོར་བའི་སེམས་ཅན་ཐམས་ཅད་རྣམ་པར་གྲོལ་བར་མཛད་དོ། །རིགས་ཀྱི་བུ་ང་དེ་ལྟར་སངས་རྒྱས་ཀྱི་འཁོར་ལོ་དགུ་པ་འདི་དག་དང་ལྡན་ཏེ། འཁོར་ལོ་དེའི་དབང་གིས་སེམས་ཅན་ཚད་མེད་པ་ལ་ཕན་པ་དང 60.144b བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་ལྟ་བ་ཐམས་ཅད་བཏུལ་ཏེ། འཁོར་གྱི་དཀྱིལ་འཁོར་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་འདི་ལྟ་སྟེ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་གླིང་བཞི་པའི་སེམས་ཅན་ཚད་མེད་པའི་ལུས་ཀྱི་ནད་རྣམ་པ་སྣ་ཚོགས་བསལ་བའི་ཕྱིར་རྒྱལ་ཐབས་བཏང་ནས་སྤོས་ཆུས་ལུས་བཀྲུས་ནས་གོས་གཙང་མ་སར་པ་གྱོན་ནས་ལུས་དྲང་པོར་བསྲང་སྟེ། སེམས་ཅན་ཐམས་ཅད་ལ་བྱམས་པ་དང ། སྙིང་རྗེ་དང་མཉམ་པའི་སེམས་ཡིད་ལ་བྱས་ཏེ། ནད་ཐམས་ཅད་ལས་ཐར་བར་བྱ་བའི་ཕྱིར་མེ་ཏོག་དང ། སྤོས་དང ། རོལ་མོ་རྣམ་པ་སྣ་ཚོགས་དང ། དེ་མ་ཡིན་པའི་མཆོད་པའི་ཡོ་བྱད་རྣམ་པ་སྣ་ཚོགས་མང་པོས་མཐུ་ཆེ་བ་གཟི་བརྗིད་དང་ལྡན་པའི་ལྷ་ཐམས་ཅད་ལ་མཆོད་པ་བྱེད་དོ། །དེའི་ཚེ་ན་ལྷའི་དབང་པོ་དང ། ཀླུའི་དབང་པོ་ནས་ལྟོ་འཕྱེ་ཆེན་པོའི་དབང་པོའི་བར་དུ་ཐམས་ཅད་ཀྱིས་དེ་ལྟར་ཤེས་ནས་གཅིག་ལ་གཅིག་འདི་སྐད་ཅེས་ཟེར་རོ། །རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་འདི་ཡོན་ཏན་དང་ལྡན་ཏེ། གཟི་བརྗིད་ཆེ་བས་ན་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འོས་ཀྱིས་བདག་ཅག་གིས་དེར་དོང་ལ་གླིང་བཞི་ལ་དབང་བའི་རྒྱལ་པོར་དབང་བསྐུར་བ་དང ། སེམས་ཅན་རྣམས་ནད་མེད་ཅིང་བདེ་བར་བྱ་བའི་ཕྱིར་འདོང་ངོ་ཞེས་སྨྲས་ནས་ལྷའི་དབང་པོ་ནས་ལྟོ་འཕྱེ་ཆེན་པོའི་དབང་པོའི་བར་དུ་ཐམས་ཅད་ལྷགས་ནས་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་འཁོར་ལོས་སྒྱུར་བའི་རྒྱལ་པོར་དབང་བསྐུར་ཏེ། རིན་པོ་ཆེ་སྣ་བདུན་དང་ལྡན་པ་དང ། གླིང་བཞི་ལ་དབང་བྱེད་པ་དང ། བུ་སྟོང་དང་ལྡན་ཏེ་ཐམས 60.145a ཅད་དཔའ་བ་རྟུལ་ཕོད་པ། མཛེས་ཤིང་ཡིད་དུ་འོང་བ་དང ། ཕས་རྒོལ་བའི་དགྲ་ཐུལ་བ་དང ། དབང་བར་གྱུར་པའི་ས་ཆེན་པོ་རྒྱ་མཚོའི་མཐའ་ནས་ཕོ་བྲང་དུ་ཐུག་གི་བར་དུ་མཚོན་ཆ་མི་སྤྱོད་ཅིང་ཐམས་ཅད་དམ་པའི་ཆོས་སྤྱོད་དེ་བདེ་སྐྱིད་པར་བྱས་སོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་འཁོར་ལོ་བཅུ་པ་འདི་དང་ལྡན་ཏེ། འཁོར་ལོ་དེའི་དབང་གིས་གླིང་ཆེན་པོ་བཞི་ནས་ཕྱོགས་མཚམས་བརྒྱད་དང ། གླིང་ཕྲན་བརྒྱད་ཁྲི་བཞི་སྟོང་དག་ན་སེམས་ཅན་ཇི་སྙེད་གནས་པ་དེ་དག་ཐམས་ཅད་དགེ་བ་བཅུའི་ལས་ཀྱི་ལམ་ལ་གནས་ཤིང ། བདག་གི་ལུས་ཤིན་དུ་སྲུང་བ་དང ། ཚེ་ཡང་རིང་བར་འགྱུར་རོ། །ཚེ་འཕོས་ནས་ཀྱང་མཐོ་རིས་ཀྱི་ལྷར་སྐྱེ་ཞིང་ལོངས་སྤྱོད་དམ་པ་དང་ལྡན་པར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་སྔོན་བྱང་ཆུབ་སེམས་དཔའི་ཚེ་ན་བདག་དང་གཞན་གྱི་ལུས་ལ་ཉོན་མོངས་པའི་ནད་རྣམ་པ་ཚད་མེད་པ་སྙེད་ཡོད་པར་མཁྱེན་ནས་ཏིང་ངེ་འཛིན་གྱི་སྤོས་ཆུས་ནི་ལུས་བཀྲུས། བདེན་པའི་ཆོས་དང ། བྱམས་པ་ཆེན་པོ་དང ། སྙིང་རྗེ་ཆེན་པོའི་ཆུས་ཁྲུས་བྱས་པ་ཁྲེལ་བ་དང་འཛེམ་པའི་གོས་གྱོན་ནས་ཕྱོགས་བཅུའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བསམ་གཏན་དང ། སྙོམས་པར་འཇུག་པ་དང ། བརྩོན་འགྲུས་དང ། ཐབས་དང ། ཤེས་རབ་དང ། བྱམས་པ་དང ། ཐུགས་རྗེས་རྗེས་སུ་བཟུང་སྟེ་ཐམས་ཅད་ཀྱིས་གསུང་འཐུན་པར་འདི་སྐད་དུ་སྐྱེས་བུ་ཆེན་པོ་འདི་ནི་བསོད་ནམས་དང ། ཡེ་ཤེས་ཆེན་པོའི་ཚོགས་ཀྱིས་ཡོངས་སུ་བརྒྱན་པའི་སྣོད་དུ་གྱུར་པས་རྣམ་པར་ཐར་པ་གསུམ་དང་མི་འཇིགས་པ་བཞི་དང ། དེ་བཞིན་གཤེགས་པའི་སྟོབས་བཅུ་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཀྱི་སྣོད་དུ་གྱུར་པའོ། །བླ་ན་མེད་པ་ཐམས་ཅད་མཁྱེན་པའི་ཡེ་ཤེས་ཐོབ་པའི་གནས་བྱམས་པ་ཆེན 60.145b པོ་དང ། སྙིང་རྗེ་ཆེན་པོ་ཡོངས་སུ་རྫོགས་པ། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་བྱེད་པ་ལ་སྤྲོ་བ། སངས་རྒྱས་རིན་པོ་ཆེ་ཚོལ་བའི་ཚོང་དཔོན་དུ་གྱུར་པ། འཁོར་བས་སྡུག་བསྔལ་བའི་སེམས་ཅན་ཡོངས་སུ་སྒྲོལ་བ་སེམས་ཅན་ལ་མྱ་ངན་ལས་འདའ་བའི་བདེ་བ་ཆེན་པོ་རབ་ཏུ་སྟོབས་པ་ཡིན་ཏེ། བདག་ཅག་སངས་རྒྱས་བཅོམ་ལྡན་འདས་ཐམས་ཅད་བདེན་པའི་གསུང་གིས་ཅི་དང་ཅི་འདོད་པ་དེ་དག་ཐམས་ཅད་བྱིན་ཏེ། ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་བླ་ན་མེད་པའི་ཆོས་ཐོབ་ནས་ཆོས་ཀྱི་རྒྱལ་པོ་ཆེན་པོར་གྱུར་ཏེ། ང་དེའི་ཚེ་ན་བསོད་ནམས་དང་ཡེ་ཤེས་ཀྱི་ཚོགས་ལ་བརྟེན་ཏེ་ཤིན་དུ་བརྟན་པའི་བརྩོན་འགྲུས་ཀྱིས་འཕགས་པའི་བདེན་པ་བཞི་ཡང་དག་པ་ཇི་ལྟ་བ་བཞིན་དུ་ཆུད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །རིགས་ཀྱི་བུ་ཇི་ལྟར་འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་ཞིང་དབང་སྒྱུར་བ་བཞིན་དུ་དེ་བཞིན་གཤེགས་པ་ཡང་བསམ་གཏན་བཞི་དང ། གཟུགས་མེད་པའི་ཏིང་ངེ་འཛིན་བཞི་དང ། ཚངས་པའི་གནས་བཞི་དང་སོ་སོ་ཡང་དག་པར་རིག་པ་བཞི་དང ། འཕགས་པའི་བདེན་པ་བཞི་དང ། འཇིགས་པ་མེད་པ་བཞི་དང ། དེ་བཞིན་གཤེགས་པའི་སྟོབས་བཅུ་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་དང ། རྣམ་པ་ཐམས་ཅད་མཁྱེན་པའི་ཡེ་ཤེས་ལ་དབང་དུ་གྱུར་ཏོ། །ཇི་ལྟར་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ལྟར། དེ་བཞིན་གཤེགས་པ་ཡང་བྱང་ཆུབ་ཀྱི་ཡན་ལག་རྣམ་པ་བདུན་དང་ལྡན་ནོ། །ཇི་ལྟར་འཁོར་ལོས་སྒྱུར་བའི་རྒྱལ་པོ་བུ་སྟོང་དང་ལྡན་ཏེ་ཐམས་ཅད་དཔའ་ཞིང་རྟུལ་ཕོད་པ། མཛེས་ཤིང་ཡིད་དུ་འོང་བས་ཕ་རོལ་པོའི་དགྲ་ཐམས་ཅད་ཐུལ་བ་བཞིན་དུ་དེ་བཞིན་གཤེགས་པ་ཡང་དང་པོར་འཕགས་པ་ཅང་ཤེས་ཀཽ་དི་ནྱ་ནས་ཐ་མར་ཚེ་དང་ལྡན་པ་རབ་ཏུ་བཟང་པོ་དང ། 60.146a རབ་དེ་ལ་སོགས་པ་ཉན་ཐོས་ཀྱི་འཁོར་ཆེན་པོ་སངས་རྒྱས་ཀྱི་ཐུགས་ལས་བྱུང་བ། བཅོམ་ལྡན་འདས་ཀྱི་གསུང་ལས་སྐྱེས་པ། བསྟན་པའི་ཆོས་ལས་སྐྱེས་པ། སངས་རྒྱས་ཀྱི་ཆོས་ཐོབ་པ་དག་ཡོད་དེ། ཟག་པ་ཡོངས་སུ་ཟད་པའི་ཕྱིར་དཔའ་ལ་རྩལ་ཆེ་བ་ཞེས་བྱ། ཚངས་པའི་གནས་བཞི་དང་ལྡན་པས་མཛེས་ཤིང་ཡིད་དུ་འོང་བ་ཞེས་བྱ། ལྷའི་བདུད་དང་མུ་སྟེགས་ཅན་ཐུལ་བས་ཕས་རྒོལ་བའི་དགྲ་ཐུལ་བ་ཞེས་བྱའོ། །ཇི་ལྟར་འཁོར་ལོས་སྒྱུར་བའི་རྒྱལ་པོ་གླིང་ཕྲན་བརྒྱད་ཁྲི་བཞི་སྟོང་འདུལ་ཞིང་སྟོན་པ་བཞིན་དུ། དེ་བཞིན་གཤེགས་པ་ཡང་འཛམ་བུའི་གླིང་བྱེ་བ་ཕྲག་བརྒྱ་དང ། ནུབ་ཀྱི་བན་གླང་སྤྱོད་བྱེ་བ་ཕྲག་བརྒྱ་དང ། ཤར་གྱི་ལུས་འཕགས་བྱེ་བ་ཕྲག་བརྒྱ་དང ། བྱང་གི་སྒྲ་མི་སྙན་བྱེ་བ་ཕྲག་བརྒྱ་དང ། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང ། རི་རབ་ལྷུན་པོ་བྱེ་བ་ཕྲག་བརྒྱ་དང ། རྒྱལ་ཆེན་རིས་བཞི་བྱེ་བ་ཕྲག་བརྒྱ་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་བྱེ་བ་ཕྲག་བརྒྱ་དང ། ཁོར་ཡུག་ཆེན་པོ་བྱེ་བ་ཕྲག་བརྒྱ་དེ་དག་སངས་རྒྱས་ཀྱི་ཞིང་ཤིན་དུ་རྒྱ་ཆེ་བ་གཅིག་ཏུ་གྱུར་པར་གསུང་གིས་དབང་སྒྱུར་བ་ལ་མངའ་བརྙེས་པར་གྱུར་ཏོ། །རིགས་ཀྱི་བུ་ང་འདི་ལྟར་སངས་རྒྱས་ཀྱི་འཁོར་ལོ་བཅུ་པ་འདི་དང་ལྡན་ཏེ། འཁོར་ལོ་དེའི་དབང་གིས་ཡང་དག་པ་ཇི་ལྟ་བ་བཞིན་དུ་བདག་དང་གཞན་གྱི་ལུས་ཀྱི་ཟག་པ་ཐམས་ཅད་ཡོངས་སུ་ཟད་པ་མཁྱེན་ནས། སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ། སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་ནང་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་ང་ནི་དེ་ལྟར་སངས་རྒྱས་ཀྱི་འཁོར་ལོ་བཅུ་པ་འདི་དག་དང་ལྡན་ཏེ། སྔོན་གྱི་སྨོན་ལམ་གྱི་ཤུགས་ཀྱིས་སངས་རྒྱས་ཀྱི་ཞིང་རྙོག་པ་ལྔ 60.146b ཅན་གྱི་སེམས་ཅན་ཐམས་ཅད་རྣམ་པར་དཀར་བའི་ཆོས་རྣམས་ཉམས་པ། འཕགས་པའི་ནོར་བདུན་གྱིས་བྲེལ་བ། མཁས་པ་དག་དང་རིང་དུ་གྱུར་པ། རྟག་པ་དང་ཆད་པའི་དྲ་བས་ཀུན་ནས་ཀླགས་ཤིང་ཟིལ་གྱིས་ནོན་པ། ངན་སོང་དུ་འགྲོ་བའི་ཤིང་རྟ་ལ་སྤྲོ་ཞིང་དགའ་བ་སྐྱེད་པ། ཕྱི་མའི་སྡུག་བསྔལ་གྱིས་མི་འཇིགས་པ། རྟག་ཏུ་ཀུན་ནས་ཁེབས་པའི་མ་རིག་པའི་མུན་པར་གནས་པ་ལ་དད་པ། མི་དགེ་བ་བཅུའི་ལས་ཀྱི་ལམ་རྫོགས་པར་བྱེད་པ། མཚམས་མེད་པ་ལྔའི་ལས་བྱེད་པ། དམ་པའི་ཆོས་ལ་སྐུར་ཅིང་འཕགས་པ་ལ་དབང་ཟ་བ། དགེ་བའི་ཆོས་ཐམས་ཅད་རིང་དུ་སྤོང་བ། མི་དགེ་བའི་ཆོས་རྫོགས་པར་བྱེད་པ་འདིར་བཞུགས་ཏེ། ང་ནི་སངས་རྒྱས་ཀྱི་འཁོར་ལོ་རྣམ་པ་བཅུ་པོ་འདི་དང་ལྡན་པས་འཇིགས་པ་མེད་པར་བདེ་བར་གནས་སོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ། སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏོ། །སེམས་ཅན་ཐམས་ཅད་ཀྱི་རིགས་ལ་རྡོ་རྗེ་ལྟར་སྲ་བའི་ཉོན་མོངས་པ་ཐམས་ཅད་བཅོམ་ནས་ཅི་དང་ཅིས་འདུལ་བ་བཞིན་དུ་སྣོད་དུ་གྱུར་པའི་སེམས་ཅན་ཐམས་ཅད་ཐེག་པ་གསུམ་ལས་ཕྱིར་མི་ལྡོག་པར་རྣམ་པར་བཞག་གོ། །དེ་ནས་འཁོར་དེའི་ནང་ནས་འདུལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང ། ཉན་ཐོས་ཀྱི་དགེ་འདུན་ཐམས་ཅད་དང ། ལྷ་དང་ཀླུའི་འཁོར་ཐམས་ཅད་ནས། ལུས་སྲུལ་པོ་དང ། མི་དང་མི་མ་ཡིན་པ་ལ་སོགས་པའི་བར་དུ་འཁོར་མང་པོ་ཐམས་ཅད་རབ་ཏུ་དགའ་ནས། སྐད་འཐུན་པར་ལེགས་སོ་ཞེས་སྨྲས་ཏེ། སྤོས་ཀྱི་ཆར་ཆེན་པོ་རབ་ཏུ་ཕབ་བོ། །མེ་ཏོག་གི་ཆར་ཆེན་པོ་ཡང་རབ་ཏུ་ཕབ་བོ། །རིན་པོ་ཆེའི་ཆར་ཆེན་པོ་ཡང་རབ་ཏུ་ཕབ་བོ། །ན་བཟའི་ཆར་ཆེན་པོ་ཡང་རབ་ཏུ་ཕབ་སྟེ། བརྒྱ་སྟོང་ས་ཆེན་པོ་འདི་ཡང་རབ་ཏུ་གཡོས་སོ། །དེ་ལྟར 60.147a སངས་རྒྱས་ཀྱི་འཁོར་ལོ་རྣམ་པ་བཅུ་པོ་འདི་བཤད་པའི་ཚེ། འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱད་བཅུ་རྩ་བཞི་སྙེད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་བོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་སྙེད་ཀྱིས་གཟུངས་དང ། ཏིང་ངེ་འཛིན་དང ། གཞན་ཡང་སེམས་ཅན་ཚད་མེད་གྲངས་མེད་པ་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པར་གྱུར་ཏོ། །གཞན་ཡང་སེམས་ཅན་ཚད་མེད་གྲངས་མེད་པ་སྙེད་ཀྱིས་འབྲས་བུ་ཐོབ་པར་གྱུར་ཏོ། །འདུས་པ་ཆེན་པོ་ལས་བྱང་ཆུབ་སེམས་དཔའ་སེམས་དཔའ་ཆེན་པོའི་སའི་སྙིང་པོ་འཁོར་ལོ་བཅུ་པ་ཞེས་བྱ་བ་ལས་འཁོར་ལོ་བཅུའི་ལེའུ་སྟེ་གཉིས་སོ།། ་་་་་་་་་་་་་་།། འདུས་པ་ཆེན་པོ་ལས་བྱང་ཆུབ་སེམས་དཔའ་སའི་སྙིང་པོ་འཁོར་ལོ་བཅུ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་གསུམ་པ། དེ་ནས་འཁོར་གྱི་དཀྱིལ་འཁོར་དེའི་ནང་ན་ཚངས་པ་ཆེན་པོ་ལྷའི་སྙིང་པོ་ཞེས་བྱ་བ་དགེ་བའི་རྩ་བ་ཤིན་དུ་བསྐྱེད་པ། ས་བཅུ་ནོན་པ་བྱང་ཆུབ་སེམས་དཔའ་སེམས་དཔའ་ཆེན་པོའི་ཡོན་ཏན་དང་ལྡན་པ་ཞིག་སྟན་ལས་ལངས་ནས་ཐལ་མོ་སྦྱར་ཏེ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཚིགས་སུ་བཅད་པ་འདི་དག་སྨྲས་སོ། །ཤེས་རབ་རྒྱ་མཚོ་ཡོན་ཏན་མཛོད་ཅན་ལ། །བདག་གིས་ཐེ་ཙོམ་ཞུ་ཞིང་གསོལ་བར་བགྱི། །ཤེས་རབ་རྒྱ་མཚོ་ཐུགས་རྗེས་སྐབས་ཕྱེ་སྟེ། །བདག་གི་རྟོག་པའི་ཐེ་ཙོམ་བསལ་བར་གསོལ། །བདག་ཅག་སྐོམ་གྱིས་ཤིན་དུ་གདུངས་པ་ལྟར། །ཡོན་ཏན་སྙིང་པོ་མཆོག་གི་ཆོས་རོ་དང ། །ཕུལ་དུ་གྱུར་པའི་དོན་དམ་ཆོས་ཀྱི་རོ། །འཁོར་དུ་གྱུར་པ་ཐམས་ཅད་ཐོས་པར་སྨོན། །བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱིས་དེ་བཞིན་གཤེགས་པ་ལ་ཅི་དང་ཅི་འདོད་པ་དྲིས་ཤིག་དང ། ངས་དྲིས་པ་དེ་དང་དེའི 60.147b ལུང་བསྟན་པས་ཁྱོད་ཀྱི་སེམས་རངས་པར་བྱའོ། །ཚངས་པ་ཆེན་པོས་གསོལ་པ། བཅོམ་ལྡན་འདས་དེ་ལྟར་བགྱིའོ་ཞེས་གསོལ་ནས་ཚིགས་སུ་བཅད་དེ་ཞུས་པ། ཤེས་རབ་ལྡན་ཞིང་ཏིང་འཛིན་རབ་བསྒོམས་ཏེ། །བདག་མེད་པ་ལ་བདེ་བར་གནས་པའི་རྣམས། །འོན་ཏེ་དམ་པའི་དོན་ལ་གནས་བགྱི་འམ། །འོན་ཏེ་འཁོར་བའི་འཁོར་བར་གནས་པར་བགྱི། །ཉིན་མཚན་ཆོས་མཆོག་དམ་པ་དེ་དག་ལ། །འདོན་ཅིང་གོམས་པར་བགྱིད་དེ་རྩོལ་བ་དག་།འོན་ཏེ་ཉོན་མོངས་མཚོ་ལས་རྒལ་བགྱི་འམ། །འོན་ཏམ་ངན་སོང་དག་ཏུ་ལྟུང་བར་བགྱི། །བསོད་ནམས་བྱེད་ལ་ཤིན་དུ་འབད་རྩོལ་བ། །ངེས་པར་མྱ་ངན་འདའ་ལ་གཞོལ་འགྱུར་རམ། །འོན་ཏེ་འཁོར་བའི་འཁོར་བར་གནས་འགྱུར་རམ། །འོན་ཏེ་ངན་སོང་དག་ཏུ་ལྟུང་བར་འགྱུར། །ཤེས་རབ་ལྡན་པའི་རྒྱལ་ཐབས་དབང་བསྐུར་ཏེ། །འཁོར་ལོ་རྣམ་པ་བཅུ་དང་ལྡན་པ་དག་།འོན་ཏེ་འཁོར་བའི་ནང་དུ་འབྱིང་འགྱུར་རམ། །འོན་ཏེ་སངས་རྒྱས་འབྲས་བུ་ཐོབ་པར་འགྱུར། །ཀུན་ནས་ཉོན་མོངས་པས་ནི་ཀླགས་པའི་སེམས། །ཉོན་མོངས་མང་པོས་འཁྲུལ་པར་གྱུར་པ་དག་།ཇི་ལྟར་སེམས་ནི་ཡོངས་སུ་དག་པར་སྦྱང ། །སྒོམ་དང་འདོན་པའི་ལས་དག་ཇི་ལྟར་བགྱི། །དེ་ནས་བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །ལེགས་སོ། །དོན་འདི་དག་ལེགས་པར་ཞུ་བར་སྤོབས་པ་ལེགས་ཏེ། ཁྱོད་ནི་ཆོས་འདི་དག་ལ་ཤིན་དུ་ནན་ཏན་བྱེད་པའོ། །ཁྱོད་ནི་སྤྱོད་པ་ཐམས་ཅད་ཡོངས་སུ་རྫོགས་པའོ། །ཁྱོད་ནི་སྔོན་འདས་པའི་སངས་རྒྱས་བཅོམ་ལྡན་འདས་ཀླུང་གང་གཱའི་བྱེ་མ་སྙེད་ལ་སྒོ་གསུམ་ཡོངས་སུ་སྦྱང་པའོ། །དམ་པའི་ཆོས་སྤེལ་བའོ། །དཀོན་མཆོག་གསུམ་གྱི་གདུང་འཚོབ་པ་སྟེ། ད་ཡང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱི་ཕྱིར་དེ་བཞིན་གཤེགས་པ་ལ་དོན་ཟབ་མོ་འདི་དག་དྲིས་པ་ལེགས་སོ། །རིགས་ཀྱི་བུ་འདི་ལྟ་སྟེ། 60.148a ཤེས་པ་བརྡ་སྤྲོད་པ་ཆེན་པོ་གནས་པ་དང ། སྤྱད་པར་མི་བྱ་བའི་ཆོས་ཡོད་དེ། སྔོན་འདས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང ། འཁོར་བ་ལས་སྐྱོ་བར་བྱ་བ་དང ། ལས་དང་ཉོན་མོངས་པ་ཡོངས་སུ་བཅད་པ་དང ། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང ། སྤྱད་པར་མི་བྱ་བའི་ཆོས་འདི་གསུངས་སོ། །ད་ལྟར་ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང ། འཁོར་བ་ལས་སྐྱོ་བར་བྱ་བ་དང ། ལས་དང་ཉོན་མོངས་པ་ཡོངས་སུ་བཅད་པ་དང ། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང ། སྤྱད་པར་མི་བྱ་བའི་ཆོས་འདི་ལ་གནས་པ་གསུང་ངོ ། །མ་འོངས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང ། འཁོར་བ་ལས་སྐྱོ་བར་བྱ་བ་དང ། ལས་དང་ཉོན་མོངས་པ་ཡོངས་སུ་གཅད་པར་བྱ་བ་དང ། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང ། སྤྱད་པར་མི་བྱ་བའི་ཆོས་འདི་ལ་གནས་པར་བྱ་བ་འདི་དག་གསུང་བར་འགྱུར་རོ། །ཁྱོད་ཀྱིས་སྔོན་འདས་པའི་དེ་བཞིན་གཤེགས་པ་རྣམས་ལས་ཤེས་པ་བརྡ་སྤྲོད་པ་ཆེན་པོ་གནས་པ་དང ། སྤྱད་པར་མི་བྱ་བའི་ཆོས་འདི་ལ་གནས་པར་བྱ་བ་འདི་རྫོགས་པར་ཐོས་པ་དེ་ངས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང ། འཁོར་བ་ལས་སྐྱོ་བར་བྱ་བ་དང ། ལས་དང་ཉོན་མོངས་པ་ཡོངས་སུ་གཅད་པ་དང ། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང ། སྤྱད་པར་མི་བྱ་བའི་ཆོས་འདི་ལ་གནས་པར་བྱ་བ་འདི་ལ་བསྟན་པར་བྱས། དེ་བས་ན་སྐྱེས་བུ་དམ་པ་ཁྱོད་ཀྱིས་ལེགས་པར་ཉོན་ལ་ཡིད 60.148b ལ་ཟུང་ཤིག་དང་བསྟན་པར་བྱའོ། །བཅོམ་ལྡན་འདས་དེ་ལྟར་བགྱིའོ་ཞེས་གསོལ་ནས། ཚངས་པ་ཆེན་པོ་ལྷའི་སྙིང་པོ་བཅོམ་ལྡན་འདས་ལ་ཕྱིར་ཉན་ཏོ། །བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་ལ་བཀའ་སྩལ་པ། གནས་པ་དང་སྤྱད་པར་མི་བྱ་བའི་ཆོས་རྣམ་པ་བཅུ་ཡོད་དེ། གལ་ཏེ་རྣལ་འབྱོར་ཅན་དག་སྤྱོད་པ་ངན་པ་འདི་ལས་འགའ་ཙམ་གྱི་རྗེས་སུ་ཞུགས་ན་ཡང་འདོད་པའི་ཁམས་ཀྱི་དགེ་བའི་རྩ་བ་ཙམ་ཡང་ཡོངས་སུ་མི་འགྲུབ་པོ།[་]། ཇི་སྟེ་སྔར་གྲུབ་ན་ཡང་དེ་མ་ཐག་ཏུ་ཕྱིར་སྟོར་ཅིང་ཉམས་པར་གྱུར་ན་གཟུགས་དང ། གཟུགས་མེད་པའི་ཏིང་ངེ་འཛིན་ནས་ཐེག་པ་གསུམ་དང་ཐེག་པ་གཅིག་གི་བར་དུ་ཐོབ་པར་འགྱུར་བ་ལྟ་ཅི་སྨོས། བཅུ་གང་ཞེ་ན། འདི་ལྟ་སྟེ། འཇིག་རྟེན་ན་ཁ་ཅིག་ཏིང་ངེ་འཛིན་སྒོམ་འདོད་ཀྱང་འཚོ་བའི་ཡོ་བྱད་ཀྱིས་བྲེལ་བས་ཚོལ་བའི་རྐྱེན་གྱིས་ཉོན་མོངས་པ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཚུལ་ཁྲིམས་ཉམས་ཤིང་ཁ་ན་མ་ཐོ་བ་མང་པོ་བྱེད་པ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཕྱིན་ཅི་ལོག་ཏུ་ལྟ་ཞིང་འཇིག་རྟེན་གྱི་ལྟས་བཟང་ངན་ལ་ཆགས་ཏེ་ལུས་དང་སེམས་མ་དུལ་བ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་སེམས་གཡོ་ཞིང་རྒོད་པས་འཕགས་པ་ལ་མ་གཞོལ་ཏེ་དབང་པོ་རྒོད་པ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཕྲ་མ་བྱེད་པ་ལ་དགའ་བས་དབྱེན་བྱེད་པ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ངག་རྩུབ་པོས་འཕགས་པ་ལ་སྨོད་ཅིང་དབང་ཟ་བ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཚིག་ཀྱལ་པ་དང ། བརྫུན་དུ་སྨྲ་བ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་འདོད་ཆགས་དང ། ཕྲག་དོག་གིས་གཞན་གྱི་ཁེ་དང ། སྟི་སྟང་དང ། རྙེད་པ་ལ་མི་དགའ་བ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཞེ་སྡང་དང་བཅས་པས་སེམས་ཅན་ལ་གནོད་སེམས་སྐྱེས་པ་དང ། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ལོག་པར་ལྟ་བ་དང་བཅས་པས་རྒྱུ་དང་འབྲས་བུ་མེད་པར་ལྟ་བའོ། །ཚངས་པ་ཆེན་པོ་དེ་ལྟར 60.149a ཤེས་པར་བྱ་སྟེ་འདི་དག་ནི་གནས་པ་དང་སྤྱད་པར་མི་བྱ་བའི་ཆོས་རྣམ་པ་བཅུ་ཞེས་བྱའོ། །གལ་ཏེ་ཏིང་ངེ་འཛིན་སྒོམ་པ་དག་སྤྱོད་པ་ངན་པ་འདི་དག་ལས་འགའ་ཙམ་གྱི་རྗེས་སུ་ཞུགས་ན་འདོད་པའི་ཁམས་ཀྱི་དགེ་བ་ཡང་ཡོངས་སུ་མི་འགྲུབ་བོ། །ཇི་སྟེ་སྔར་གྲུབ་ན་ཡང་དེ་མ་ཐག་ཏུ་སྟོར་ཅིང་ཉམས་པར་འགྱུར་ན་གཟུགས་དང་གཟུགས་མེད་པའི་ཏིང་ངེ་འཛིན་དང ། ཐེག་པ་གསུམ་དང ། གཅིག་ཐོབ་པར་འགྱུར་བ་ལྟ་ཅི་སྨོས། ཚངས་པ་ཆེན་པོ་གཞན་ཡང་གནས་པ་དང་སྤྱད་པར་མྱི་བྱ་བའི་ཆོས་རྣམ་པ་བཅུ་ཡོད་དེ། ཏིང་ངེ་འཛིན་སྒོམ་པ་དག་སྤྱོད་པ་ངན་པ་འདི་དག་ལས་འགའ་ཞིག་དང་ལྡན་ན་ཏིང་ངེ་འཛིན་ཡོངས་སུ་མི་འགྲུབ་པོ། །ཇི་སྟེ་སྔར་གྲུབ་ན་ཡང་དེ་མ་ཐག་ཏུ་སྟོར་ཅིང་ཉམས་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། ལས་སུ་བྱ་བའི་དངོས་པོ་ལ་དགའ་ཞིང་ཆགས་པ་དང་བྲེ་མོའི་གཏམ་ལ་དགའ་ཞིང་ཆགས་པ་དང ། གཉིད་ཀྱིས་ལོག་པ་ལ་དགའ་ཞིང་ཆགས་པ་དང ། ཟང་ཟིང་ཚོལ་བ་ལ་དགའ་ཞིང་ཆགས་པ་དང ། གཟུགས་བཟང་པོ་ལ་དགའ་ཞིང་ཆགས་པ་དང ། སྒྲ་སྙན་པ་ལ་དགའ་ཞིང་ཆགས་པ་དང ། དྲི་ཞིམ་པོ་ལ་དགའ་ཞིང་ཆགས་པ་དང ། རོ་ཞིམ་པོ་ལ་དགའ་ཞིང་ཆགས་པ་དང ། རེག་བྱ་འཇམ་པོ་ལ་དགའ་ཞིང་ཆགས་པ་དང ། རྟོག་པ་དང་དཔྱོད་པ་ལ་དགའ་ཞིང་ཆགས་པའོ། །ཚངས་པ་ཆེན་པོ་དེ་ལྟར་ཤེས་པར་བྱ་སྟེ། གནས་པ་དང་སྤྱད་པར་མི་བྱ་བའི་ཆོས་རྣམ་པ་བཅུ་པོ་དེ་ཏིང་ངེ་འཛིན་སྒོམ་པ་དག་སྤྱོད་པ་ངན་པ་འདི་ལས་འགའ་ཞིག་དང་ལྡན་ན་ཡང་ཏིང་ངེ་འཛིན་དག་ཡོངས་སུ་མི་འགྲུབ་པོ། །ཇི་སྟེ་སྔར་གྲུབ་ན་ཡང་དེ་མ་ཐག་ཏུ་སྟོར་ཅིང་ཉམས་པར་འགྱུར་རོ། །གལ་ཏེ་ཏིང་ངེ་འཛིན་མ་བསྒྲུབས་ན་དགེ་བའི་ཚོགས་གཞན་ཅི་བསགས་ཀྱང་དེ་ནི་དོན་དུ་མི་འགྱུར་ཏེ། གང་བདག་གི་ལོངས་སྤྱོད་དང ། དང་བས་སྦྱིན་པ་བསྒྲུབ་པའི་ཕྱིར་སེམས་དང་སེམས་ལས་བྱུང་བའི་ཆོས་ངན་པ་སྐྱེ་བར་འགྱུར་རོ། །དེའི་རྐྱེན 60.149b གྱིས་རྒྱལ་པོ་དང ། བློན་པོ་ཆེན་པོའི་ཁྲིམས་དང་ཡང་འགལ་བར་བྱེད་དེ། ཁ་ཅིག་ལ་ནི་གཤེ་ཤིང་སྤྱོ་བ་ཡང་བྱེད་དོ། །ཁ་ཅིག་ལ་ནི་ལྕག་གིས་གཞུ་བ་དང ། ཁ་ཅིག་ལ་ནི་ལུས་ཀྱི་ཡན་ལག་དང་ཉིང་ལག་གཅོད་ཅིང་གཅོད་པར་ཡང་བྱེད་དོ། །དེའི་རྒྱུ་དེའི་རྐྱེན་གྱིས་ནད་དྲག་པོས་འདེབས་ཤིང་ཡུན་རིང་པོར་སྡུག་བསྔལ་མྱོང་བ་དང ། ཚེ་ཐུང་བ་དང ། འཆི་འཕོས་ནས་ཀྱང་ངན་སོང་གསུམ་གང་ཡང་རུང་བ་ཅིག་གི་ནང་དུ་སྐྱེ་བ་ནས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་ཏེ། ཀུ་དྲཱ་ཀ་དང ། ་ར་ད་ཀ་དང ། དེ་ཤ་ཀུ་པ་ལ་ཀི་དང ། ལྷས་སྦྱིན་ལ་སོགས་པ་དང་འདྲ་བར་བསམ་གཏན་ལས་ཉམས་པ་དང ། མཚམས་མེད་པའི་སེམས་ཅན་དམྱལ་བའི་བར་དུ་ལྟུང་ཞིང་རྣམ་པ་ཚད་མེད་པ་སྙེད་ཀྱི་སྡུག་བསྔལ་ཆེན་པོ་མི་བཟོད་པ་ཀུན་མྱོང་བར་འགྱུར་རོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཅང་ཤེས་ཀཽ་དི་ནྱ་ལ་འདི་སྐད་ཅེས་བཀའ་སྩལ་ཏོ། །ཁྱོད་དང་བས་མཐར་གནས་ཤིང་ཏིང་ངེ་འཛིན་སྒོམ་པའི་དགེ་སློང་དག་གནས་ཁང་མཆོག་དག་ན་གནས་ཤིང་མལ་ཆ་མཆོག་དང ། ཁ་ཟས་མཆོག་ལ་སྤྱོད་ཅིང་དགེ་འདུན་གྱི་ལས་ཐམས་ཅད་མི་བྱེད་པར་གནང་ངོ ། །དེ་ཅིའི་ཕྱིར་ཞེ་ན། ཏིང་ངེ་འཛིན་སྒོམ་པ་དག་གལ་ཏེ་འཚོ་བའི་ཡོ་བྱད་ཀྱིས་བྲེལ་བར་གྱུར་ན་སེམས་དང་སེམས་ལས་བྱུང་བའི་ཆོས་ངན་པ་སྐྱེ་ཞིང་ཏིང་ངེ་འཛིན་ཐམས་ཅད་མི་འགྲུབ་པ་ནས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་ཞིང་མི་བཟད་པའི་སྡུག་བསྔལ་ཆེན་པོ་རྣམ་པ་ཚད་མེད་པ་སྙེད་མྱོང་བར་འགྱུར་རོ། །ཏིང་ངེ་འཛིན་སྒོམ་པ་དག་གལ་ཏེ་འཚོ་བའི་ཡོ་བྱད་དང་ལྡན་ན་ཏིང་ངེ་འཛིན་མང་པོ་མ་གྲུབ་པ་ཡང་གྲུབ་པ་དང ། སྔར་གྲུབ་པ་དག་ཀྱང་མི་ཉམས་སོ། །དེའི་དབང་གིས་མི་དགེ་བའི་ཆོས་ཐམས་ཅད་མི་སྐྱེ་བ་ནས་གཞུང་དེ་བཞིན་དུ་རྒྱས་པར་མི་དགེ་བའི་རྟོག་པ་དང་དཔྱོད་པའི་བར་དུ་མི་སྐྱེ་བ་ལ་མཐོ་རིས་ཀྱི་ལྷར་སྐྱེ་བ་ནས་མྱ་ངན་འདའ་བའི་བར་དུ་འཐོབ་པར་འགྱུར་རོ། །ཏིང་ངེ་འཛིན་སྒོམ་པ་དག 60.150a གལ་ཏེ་ཏིང་ངེ་འཛིན་མང་པོ་མ་གྲུབ་ན་ནམ་གྱི་སྟོད་དང ། ནམ་གྱི་སྨད་ལ་མི་ཉལ་བར་བྱས་ཏེ་བརྩོན་འགྲུས་སུ་བསླབ་ཅིང་བསྒོམ་པ་དང ། འདུ་འཛི་ཡོངས་སུ་སྤངས་ཏེ་འདོད་པ་ཉུང་ཞིང་ཆོག་ཤེས་པར་བྱ་བ་དང ། ཅི་ལ་ཡང་མི་ཆགས་པ་དང་འདོད་ཆགས་དང ། ཞེ་སྡང་དང ། ཁོང་ཁྲོ་བ་དང ། འཆབ་པ་དང ། འཁྲུག་པ་དང ། འཚེ་བ་དང ། ང་རྒྱལ་དང ། རྒྱགས་པ་དང ། ཕྲག་དོག་དང ། འཇུངས་པ་དང ། ཕྲ་མ་དང ། ངག་རྩུབ་པོ་དང ། བརྫུན་དང ། འཇིག་རྟེན་གྱི་རྩོད་པ་དང ། བག་མེད་པ་ཐམས་ཅད་ཡོངས་སུ་སྤོང་ངོ ། །གང་དེ་ལྟར་ནན་ཏན་བྱེད་པ་དེ་ནི་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་བཞི་དང ། འཁོར་ལོས་སྒྱུར་བའི་རྒྱལ་པོ་ལ་སོགས་པས་བསྟོད་པ་དང ། བསྔགས་པ་དང ། ཕྱག་དང ། སྟི་སྟང་དང ། རིམ་གྲོ་དང ། བསྙེན་བཀུར་ལ་སོགས་པ་དང ། སྦྱིན་པ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱང་བླང་བར་བྱ་ན། རྒྱལ་རིགས་དང ། བྲམ་ཟེ་དང ། རྗེའུ་རིགས་ལ་སོགས་པའི་མཆོད་པ་ལེན་པ་ལྟ་ཅི་སྨོས། ཏིང་ངེ་འཛིན་མ་ཐོབ་པ་དག་ཀྱང་དེ་དག་གི་བསྟོད་པ་དང ། བསྔགས་པ་དང ། ཕྱག་དང་བཀུར་སྟི་དང ། རིམ་གྲོ་དང ། བསྙེན་བཀུར་དང ། སྦྱིན་པ་དང ། མཆོད་པ་བདག་གིར་བྱེད་དུ་དབང་ན་ཏིང་ངེ་འཛིན་ཐོབ་པ་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཏིང་འཛིན་བསྒོམས་པས་ཐེ་ཙོམ་གཅོད་འགྱུར་ཏེ། །དེ་མ་གཏོགས་པར་གཞན་གྱིས་ནུས་མ་ཡིན། །དེ་བས་ཏིང་འཛིན་བསྒོམ་པ་མཆོག་ཡིན་གྱིས། །མཁས་པ་དག་གིས་དེ་ལ་མཆོད་པར་བྱ། །དེ་ནས་ཚངས་པ་ཆེན་པོ་ལྷའི་སྙིང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་དག་གལ་ཏེ་རྒྱལ་རིགས་སམ། བློན་པོ་ཆེན་པོ་འམ། དབང་པོས་ལྕག་དང་དབྱུག་པ་ལ་སོགས་པས་གཞུས་སམ། བརྡེགས་སམ། གལ་ཏེ་བཙོན་རར་བཅུག་གམ། སྤྱོས་སམ་བརྒྱད་དམ། ཡན་ལག་གཏུབས་སམ། སྲོག་དང་ཕྲལ་ཏེ་བཀུམ་ན་དེ་ཅི་རིགས 60.150b པ་ལགས་སམ། འོན་ཏེ་རིགས་པར་མ་ལགས་བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སེམས་ཅན་གང་ཞིག་ངའི་བསྟན་པ་ལ་རབ་ཏུ་བྱུང་ནས་སྐྲ་དང་ཁ་སྤུ་བྲེགས་ཏེ། ངུར་སྨྲིག་གི་ཚལ་བུ་གྱོན་ན་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་སམ། ཚུལ་ཁྲིམས་མེད་ཀྱང་རུང་སྟེ། དེ་ལ་ལྷ་དང ། མི་དང ། ལྷ་མ་ཡིན་ལ་སོགས་པ་ཐམས་ཅད་ཀྱིས་ཀྱང་ཁྱིམ་པའི་ཆོས་ཉིད་དང་སྦྱར་དུ་ཡང་མི་གནང་ན། དེ་ལ་ལྕག་དང་དབྱིག་པ་ལ་སོགས་པས་ལུས་ལ་གཞུ་ཞིང་འཚོག་པ་དང ། བཙོན་རར་གཞུག་པ་དང ། གཤེ་བ་དང ། སྤྱོ་བ་དང ། ལུས་ཀྱི་ཡན་ལག་གཏུབ་པ་དང ། འཚོ་བའི་དབང་པོ་དང་ཕྲལ་བ་ཆོས་མ་ཡིན་པ་དང་སྦྱོར་བ་ལྟ་ཅི་སྨོས། དེ་ཅིའི་ཕྱིར་ཞེ་ན། ཚུལ་ཁྲིམས་སྲུང་ཞིང་མང་དུ་ཐོས་པ་དང་ལྡན་པ་ལྟ་ཞོག་ལ། ངའི་བསྟན་པ་ལ་རབ་ཏུ་བྱུང་ནས་ཚུལ་ཁྲིམས་ཉམས་ཏེ་མི་དགེ་བའི་ཆོས་སྤྱོད་པས་ནང་རུལ་ཅིང་མི་གཙང་བས་གང་བའི་སྲིན་ཀཝ་ལཝ་དང་འདྲ་བ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ། ཉོན་མོངས་པ་རྣམ་པ་སྣ་ཚོགས་ལས་ཕམ་པ། ཞིག་པ། ཁས་བུབ་པ་དེ་ལྟ་བུའི་ཚུལ་ཁྲིམས་ཉམས་པའི་དགེ་སློང་ངན་པ་ཡང་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་ལ་སོགས་པ་ཐམས་ཅད་ཀྱི་སྟོན་པ་དང ། འདྲེན་པར་འགྱུར་ཏེ། ཡོན་ཏན་རིན་པོ་ཆེ་དཔག་ཏུ་མེད་པའི་གཏེར་དུ་འགྱུར་རོ། །གཞན་ཡང་རིགས་ཀྱི་བུ་ངའི་བསྟན་པ་ལ་རབ་ཏུ་བྱུང་བ་དག་ཚུལ་ཁྲིམས་ཉམས་ཀྱང་སེམས་ཅན་དག་གཟུགས་མཐོང་བ་ཙམ་གྱིས་ལྷག་པའི་བསམ་པ་རྣམ་པ་བཅུ་སྐྱེ་བས་ན་ཡོན་ཏན་རིན་པོ་ཆེའི་ཕུང་པོ་དཔག་ཏུ་མེད་པ་བཅུ་འཐོབ་པར་འགྱུར་རོ། །བཅུ་གང་ཞེ་ན། 60.151a འདི་ལྟ་སྟེ་ངའི་བསྟན་པ་ལ་རབ་ཏུ་བྱུང་བ་དག་ཚུལ་ཁྲིམས་ཉམས་མོད་ཀྱི། སེམས་ཅན་དག་གིས་མཐོང་བར་གྱུར་ན་སངས་རྒྱས་རྗེས་སུ་དྲན་པས་བཀུར་སྟི་དང་བཅས་པས་དད་ཅིང་གུས་པའི་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་མུ་སྟེགས་ཅན་གྱི་སྟོན་པ་དང ། དེའི་གཙུག་ལག་དང ། དེའི་འཁོར་ལ་ནམ་དུ་འང་མི་ཕྱོགས་པ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་འཕགས་པའི་ཚུལ་ཁྲིམས་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་སྲོག་གཅོད་པ་ཡོངས་སུ་སྤོང་བ་དང ། མ་བྱིན་པར་ལེན་པ་ཡོངས་སུ་སྤོང་བ་དང ། འདོད་པས་ལོག་པར་གཡེམ་པ་ཡོངས་སུ་སྤོང་བ་དང ། བརྫུན་དུ་སྨྲ་བ་ཡོངས་སུ་སྤོང་བ་དང ། བག་མེད་པའི་གནས་སྨྱོ་བའི་ཁུ་བ་ཆང་ལ་སོགས་པ་འཐུང་བ་ཡོངས་སུ་སྤོང་བ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་སྦྱིན་པ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱི་ལོངས་སྤྱོད་ཆེན་པོ་དང་ལྡན་ཞིང་ཡང་དག་པ་དང་ཡང་དག་པའི་སྤྱོད་པ་ཅན་ལ་མཆོད་པ་དང ། བསྙེན་བཀུར་བྱེད་པ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་ངང་དེས་པའི་བཟོད་པ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་ཕྲ་མ་ཡོངས་སུ་སྤོང་བ་དང ། ངག་རྩུབ་པོ་དང ། ཚིག་ཀྱལ་པ་དང་ཞེ་སྡང་ཡོངས་སུ་སྤོང་བ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་རབ་ཏུ་འབྱུང་ཞིང་བརྩོན་འགྲུས་ལ་ནན་ཏན་བྱ་བར་རྗེས་སུ་དྲན་པ་ལ་ལྷག་པའི 60.151b བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་ཁྱིམ་རབ་ཏུ་སྤོང་ཞིང་ཁྱིམ་མ་ཡིན་པའི་ཆོས་ལེན་ཏེ་ཤིན་དུ་འབད་པའི་བརྩོན་འགྲུས་ཀྱིས་སྤྱོད་པའི་མཆོག་ནན་ཏན་བྱེད་པ་ནས་འཇིགས་པ་མེད་པའི་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་འཁྲུག་པའི་སེམས་ཡོངས་སུ་སྤོང་ཞིང་བསམ་གཏན་ལ་མཉམ་པར་གཞོག་པ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་རི་དང ། ཚལ་དང ། བས་མཐའ་དགོན་པ་ལ་མོས་ཤིང་ཉིན་མཚན་དུ་ཏིང་ངེ་འཛིན་བསྒོམ་པ་ལ་བརྩོན་འགྲུས་རྩོམ་པ་ནས་འཇིགས་པ་མེད་པའི་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་ཤེས་རབ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་དམ་པའི་ཆོས་ཉན་པ་དང ། ཀློག་པ་དང ། འདོན་པ་ལ་དགའ་ཞིང་སྤྲོ་བ་ནས་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་ཡང་དག་པར་འབྱུང་བ་དགེ་བའི་རྩ་བ་སྔོན་བསྐྱེད་པར་རྗེས་སུ་དྲན་པ་ལ་ལྷག་པའི་བསམ་པ་སྐྱེ་བ་ནས་འཛུམ་བཞིན་དུ་སྨྲ་བ་དང ། སྤྲོ་བཞིན་དུ་གཏམ་ཟེར་བ་དང ། རྐང་པ་ལ་ཕྱག་འཚལ་བའི་བར་དུ་བྱེད་པར་འགྱུར་རོ། །དེའི་རྒྱུ་དེའི་རྐྱེན་གྱིས་རིགས་ཆེ་ཞིང་མཐོ་བ་དང ། བཙུན་པའི་རིགས་སུ་སྐྱེ་ཞིང་སེམས་ཅན་ཚད་མེད་པ་ཀུན་གྱིས་མཐོང་ན་དགའ་བ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །རིགས་ཀྱི་བུ་ངའི་བསྟན་པ་ལ་རབ་ཏུ་བྱུང་བ་དག་ཚུལ་ཁྲིམས་ཉམས་ཀྱང་སེམས་ཅན་དག་གཟུགས་དང་ཆ་ལུགས་མཐོང་བ་ཙམ་གྱིས་ལྷག་པའི་བསམ་པ་རྣམ་པ་འདི་བཅུ་སྐྱེ་སྟེ། ཡོན་ཏན་རིན་པོ་ཆེའི་ཕུང་པོ་ཚད་མེད་པ་ཐོབ་པར་འགྱུར་རོ། །དེ་བས་ན་རྒྱལ་པོ་དང ། བློན་པོ་ཆེན་པོ་དང ། དབང་པོ་ལ་སོགས་པས 60.152a དེ་ལ་ལྕག་དང ། དབྱིག་པ་ལ་སོགས་པས་གཞུ་ཞིང་འཚོག་པ་དང ། བཙོན་རར་གཞུག་པ་དང ། གཤེ་ཞིང་སྤྱོ་བ་དང ། ལུས་ཀྱི་ཡན་ལག་གཏུབ་པ་དང ། འཚོ་བའི་དབང་པོ་དང་ཕྲལ་བ་ལ་སོགས་པ་བྱ་བར་མི་རིགས་སོ། གཞན་ཡང་ཚངས་པ་ཆེན་པོ་ང་ལ་སྐྱབས་སུ་སོང་སྟེ། རབ་ཏུ་བྱུང་བ་དག་ཚུལ་ཁྲིམས་ཉམས་ཏེ་མི་དགེ་བའི་ཆོས་སྤྱོད་པ་ནང་རུལ་ཅིང་མི་གཙང་བས་གང་བའི་སྲིན་ཀཝ་ལཝ་དང་འདྲ་བ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ། ཉོན་མོངས་པ་རྣམ་པ་མང་པོ་ལས་ཕམ་པ། རུལ་བ། ཁས་བུབ་པ་ལྟ་བུའི་དགེ་སློང་ཚུལ་ཁྲིམས་ཉམས་ཏེ་མི་དགེ་བ་སྤྱོད་མོད་ཀྱི་ལྷ་དང ། ཀླུ་དང ། གནོད་སྦྱིན་དང་དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་ལ་སོགས་པ་ཐམས་ཅད་ཀྱི་སྟོན་པ་དང ། འདྲེན་པའི་དགེ་བའི་བཤེས་གཉེན་བྱེད་ཅིང་ཡོན་ཏན་དཔག་ཏུ་མེད་པའི་གཏེར་དུ་འགྱུར་རོ། །དེ་ལྟར་དགེ་སློང་དེ་ཆོས་ཀྱི་སྣོད་མ་ཡིན་མོད་ཀྱི། སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་གྱོན་ནས་ཆ་ལུགས་དང་སྤྱོད་ལམ་འཕགས་པ་རྣམས་དང་འཐུན་ཏེ། དེ་མཐོང་བ་ཙམ་གྱིས་སེམས་ཅན་ཚད་མེད་པ་རྣམས་དགེ་བའི་རྩ་བ་རྣམ་པ་སྣ་ཚོགས་འཕེལ་ཞིང་སྐྱེ་བར་འགྱུར་རོ། །གཞན་ཡང་སེམས་ཅན་ཚད་མེད་པ་རྣམས་མཐོ་རིས་ཀྱི་ལྷར་སྐྱེ་བ་དང ། མྱ་ངན་ལས་འདའ་བའི་ལམ་ལ་འཛུད་པར་འགྱུར་ཏེ། དེ་བས་ན་ང་ལ་སྐྱབས་སུ་སོང་སྟེ་རབ་ཏུ་བྱུང་བ་དག་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་སམ། ཚུལ་ཁྲིམས་མ་ཉམས་ཀྱང་རུང་སྟེ། འཁོར་ལོས་སྒྱུར་བའི་རྒྱལ་པོ་འམ། རྒྱལ་པོ་གཞན་ནམ། བློན་པོ་ལ་སོགས་པས་ཁྱིམ་པའི་ཆོས་ཉིད་དང་སྦྱོར་དུ་ཡང་མ་གནང་ན། ལྕག་དང་དབྱིག་པ་ལ་སོགས་པས་གཞུ་བ་དང ། འཚོག་པ་དང ། བཙོན་རར་གཞུག་པ་དང ། གཤེ་ཞིང་སྤྱོ་བ་དང ། ལུས་ཀྱི་ཡན་ལག་དང་ཉིང་ལག་གཅོད་ཅིང་གཏུབ་པ་དང ། 60.152b འཚོ་བའི་དབང་པོ་དང་ཕྲལ་བ་ལ་སོགས་པ་ཆོས་མ་ཡིན་པ་གཞན་ལྟ་ཅི་སྨོས། ཚངས་པ་ཆེན་པོ་དེ་ལྟར་ཚུལ་ཁྲིམས་ཉམས་ཤིང་སྡིག་པ་སྤྱོད་པའི་དགེ་སློང་དེ་ངས་བསྟན་པའི་འདུལ་བ་ལས་མི་རོ་ལྟ་བུའོ་ཞེས་གསུངས་མོད་ཀྱི་རབ་ཏུ་བྱུང་བ་དང ། ཚུལ་ཁྲིམས་དང ། ཡོན་ཏན་ལྷག་མའི་མཐུ་ཡོད་དོ། །དཔེར་ན་ཁྱུ་མཆོག་གམ། གླ་བ་ལྟ་བུ་ཤི་སྟེ་རྣམ་པར་ཤེས་པ་དང་བྲལ་ནས་བྱོལ་སོང་གི་ནང་ན་རོ་ཡིན་མོད་ཀྱི། ཁྱུ་མཆོག་ལ་གིའུ་ཝང་ཡོད་པ་དང ། གླ་བ་ལ་གླ་རྩི་ཡོད་པས་སེམས་ཅན་ཚད་མེད་དཔག་ཏུ་མེད་པའི་ཕན་པ་དང་བདེ་བའི་དོན་ཆེན་པོར་འགྱུར་བ་བཞིན་དུ་ཚུལ་ཁྲིམས་ཉམས་པའི་དགེ་སློང་དེ་ཡང་ངས་བསྟན་པའི་འདུལ་བ་ལས་མི་རོ་ལྟ་བུའོ་ཞེས་བྱ་མོད་ཀྱི། རབ་ཏུ་བྱུང་བ་དང ། ཚུལ་ཁྲིམས་དང ། ཡོན་ཏན་ལྷག་མའི་མཐུས་ཀྱང་སེམས་ཅན་ཚད་མེད་དཔག་ཏུ་མེད་པ་ལ་ཕན་པ་དང་བདེ་བའི་དོན་ཆེན་པོར་འགྱུར་རོ། །ཚངས་པ་ཆེན་པོ་འདི་ལྟ་སྟེ། ཚོང་པ་དག་ཀྱང་རྒྱ་མཚོ་ཆན་པོར་ཞུགས་ནས་རིགས་གཅིག་པའི་སེམས་ཅན་ཚད་མེད་པ་དག་བསད་དེ་མིག་ཕྱུང་ནས་མིག་གི་འབྲས་བུ་དེ་དང ། བརྟན་ཞེས་བྱ་བའི་འབྲས་བུ་དང་ལྷན་ཅིག་སྦྱར་ན་མིག་སྨན་རིན་པོ་ཆེར་འགྱུར་རོ། །སེམས་ཅན་གང་ལོང་བ་མིག་མེད་པ་མངལ་ནས་ཕྱུང་ནས་དམུས་ལོང་དུ་གྱུར་པ་དག་གི་མིག་ཏུ་རིན་པོ་ཆེའི་མིག་སྨན་དེས་བྱུགས་ན་མིག་ནད་ཐམས་ཅད་དང་བྲལ་ཏེ་མིག་རྣོ་ཞིང་གསལ་བར་འགྱུར་རོ། །དེ་བཞིན་དུ་ཚུལ་ཁྲིམས་ཉམས་པའི་དགེ་སློང་ཡང་ངས་བསྟན་པའི་འདུལ་བ་ལས་མི་རོ་ལྟ་བུའོ་ཞེས་བྱ་མོད་ཀྱི་རབ་ཏུ་བྱུང་བའི་སྤྱོད་ལམ་དང ། ཆ་ལུགས་ཡོད་པས་སེམས་ཅན་ཚད་མེད་པ་དག་གིས་སྐད་ཅིག་མཐོང་བ་ཙམ་གྱིས་ཀྱང་རྣམ་པར་དག་པའི་ཤེས་རབ་ཀྱི་མིག་ཐོབ་པར་འགྱུར་ན་ཕ་རོལ་པོ་གཞན་ལ་དམ་པའི་ཆོས་སྟོན་ནུས་པ་ལྟ་ཅི་སྨོས། ཚངས་པ་ཆེན་པོ་འདི་ལྟ་སྟེ། བདུག་སྤོས་བསྲེགས་ན་སྤོས་ཉིད་ཚིག་སྟེ་མེད་པར་སོང་ཡང་དྲི་བསུང་གིས་གཞན་ལ་བྲོ་བར་བྱེད་དོ། །དེ་བཞིན 60.153a དུ་ཚུལ་ཁྲིམས་ཉམས་པའི་དགེ་སློང་དེ་ཡང་ཚུལ་ཁྲིམས་ཉམས་པས་བསོད་ནམས་ཀྱི་ཞིང་གཤིན་པ་མ་ཡིན་ཏེ་ཉིན་མཚན་དུ་དད་པས་བྱིན་པས་བསྲེགས་ཏེ་ཚེ་འཕོས་ནས་ངན་སོང་གསུམ་དུ་ལྷུང་མོད་ཀྱི་སེམས་ཅན་ཚད་མེད་དཔག་ཏུ་མེད་པའི་ཕན་པ་དང་བདེ་བའི་དོན་དུ་འགྱུར་ཏེ། མཐོ་རིས་ཀྱི་ལྷར་སྐྱེ་བ་དང་མྱ་ངན་ལས་འདའ་བའི་བསྲང་ཚོར་བར་བྱེད་དོ། །དེ་བས་ན་ཚངས་པ་ཆེན་པོ་དེ་ལྟར་ཚུལ་ཁྲིམས་ཉམས་ཤིང་སྡིག་པ་སྤྱོད་པའི་དགེ་སློང་ལ་ཁྱིམ་པ་ཐམས་ཅད་ཀྱིས་སྟི་སྟང་དང་བཅས་པས་མཆོད་པ་དང ། རིམ་གྲོ་བྱའི་རབ་ཏུ་བྱུང་བ་དེ་ལ་ལྕག་དང་དབྱུག་པས་གཞུ་ཞིང་འཚོག་པ་དང ། བཙོན་རར་གཞུག་པ་དང ། གཤེ་ཞིང་སྤྱོ་བ་དང ། ལུས་ཀྱི་ཡན་ལག་གཏུབ་པ་དང ། འཚོ་བའི་དབང་པོ་དང་དབྲལ་དུ་ངས་མ་གནང་ངོ ། །དེ་དག་ཡོངས་སུ་དག་པའི་དགེ་འདུན་གྱི་ནང་དུ་གསོ་སྦྱིན་བྱ་བ་དང ། ཚུལ་དུ་འཇུག་པ་དང ། ཚུལ་ནས་བྱུང་བའི་ཚེ་བསྐྲད་པ་དང ། ཕྱོགས་བཞིའི་དགེ་འདུན་གྱི་རྙེད་པ་དང ། ལོངས་སྤྱོད་དང ། བཟའ་བ་དང ། བཏུང་བ་དང ། འཚོ་བའི་ཡོ་བྱད་ལ་སོགས་པ་ཐམས་ཅད་ལ་སྤྱོད་དུ་མི་དབང་སྟེ་དགེ་སྦྱོང་གིས་འདུལ་བའི་ལས་བྱེད་པ་ཐམས་ཅད་ཀྱི་ནང་དུ་འོང་དུ་མི་གནང་བར་ཟད་ཀྱི་དེ་ལ་གཞུ་བ་དང ། འཚོག་པ་དང ། འཆིང་བ་དང ། སྲོག་གི་དབང་པོ་ལ་སོགས་པ་དང་དབྲལ་བར་ནི་མ་གནང་ངོ ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཙམ་པ་ཀའི་མེ་ཏོག་རྙིས་གྱུར་ཀྱང ། །མེ་ཏོག་རྣམ་པ་གཞན་པས་ཤིན་དུ་ལྷག་།དགེ་སློང་ཚུལ་ཁྲིམས་ཉམས་ཤིང་སྡིག་སྤྱོད་ཀྱང ། །མུ་སྟེགས་ཅན་དག་ཐམས་ཅད་ཀུན་པས་མཆོག་།གཞན་ཡང་ཚངས་པ་ཆེན་པོ་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་རྣམ་པ་ལྔ་ཡོད་དོ། །ལྔ་གང་ཞེ་ན། ཆེད་དུ་བསམས་ཏེ་ཕ་བསད་པ་དང ། ཆེད་དུ་བསམས་ཏེ་མ་བསད་པ་དང ། ཆེད་དུ་བསམས་ཏེ་དགྲ་བཅོམ་པ་བསད་པ་དང ། ལོག་པར་ལྟ་བས་ཉན་ཐོས་ཀྱི་དགེ་འདུན་གྱི་དབྱེན་བྱས་པ་དང ། ངན་སེམས་ཀྱིས་སངས་རྒྱས་ཀྱི་སྐུ་ལ་ཁྲག་ཕྱུང་བའོ། །རྣམ་པ 60.153b འདི་ལྔ་ནི་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་ཤེས་བྱ་སྟེ། གང་ཟག་གང་ཞིག་རྣམ་པ་འདི་ལྔ་ལས་གཅིག་ཙམ་བྱས་ན་རབ་ཏུ་འབྱུང་ཞིང་བསྙེན་པར་རྫོགས་སུ་མི་རུང་ངོ ། །གལ་ཏེ་རབ་ཏུ་ཕྱུང་ངམ་བསྙེན་པར་རྫོགས་པ་བྱིན་ན་དེའི་སློབ་དཔོན་དེ་ཉེས་པ་དང་བཅས་པ་ཡིན་པས་དགེ་འདུན་གྱི་ནང་ནས་བསྐྲད་པར་བྱའོ། །དེ་ལྟར་གང་ཟག་དེ་རབ་ཏུ་བྱུང་ནས་སྤྱོད་ལམ་དང་ཆ་ལུགས་ཡོད་པའི་ཕྱིར་དེ་ལ་ཡང་ལྕག་དང་དབྱིག་པས་གཞུ་ཞིང་འཚོག་པ་དང ། བཙོན་རར་གཞུག་པ་དང ། གཤེ་ཞིང་སྤྱོ་བ་དང ། ལུས་ཀྱི་ཡན་ལག་གཏུབ་པ་དང ། སྲོག་གི་དབང་པོ་དང་དབྲལ་དུ་མི་གནང་ངོ ། །གཞན་ཡང་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་དང་ཉེ་བ་རྣམ་པ་བཞི་ཡོད་དེ། བཞི་གང་ཞེ་ན། མི་དགེ་བའི་སེམས་ཀྱིས་རང་སངས་རྒྱས་བསད་པ་སྟེ། དེ་ཡང་སྲོག་གཅོད་པའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་ཏེ་ཉེས་པའི་རྩ་བ་ཡིན་ནོ། །དགྲ་བཅོམ་པའི་དགེ་སློང་མ་ལ་མི་ཚངས་པར་སྤྱོད་པ་སྟེ། འདོད་པས་ལོག་པར་གཡེམ་པའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་པས་ཉེས་པའི་རྩ་བ་ཡིན་ནོ། །དད་པས་བྱིན་པའི་དཀོན་མཆོག་གསུམ་གྱི་དཀོར་ནོར་ལ་སྤྱོད་པ་སྟེ། མ་བྱིན་པར་ལེན་པའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་པས་ཉེས་པའི་རྩ་བ་ཡིན་ནོ། །ངན་པར་ལྟ་བས་འདུམ་པའི་དགེ་འདུན་གྱི་དབྱེན་བྱེད་པ་སྟེ། བརྫུན་དུ་སྨྲ་བའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་པས་ཉེས་པའི་རྩ་བ་ཡིན་ནོ། །གང་ཟག་གང་ཞིག་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་དང་ཉེ་བ་རྣམ་པ་བཞི་པོ་འདི་ལས་གཅིག་ཙམ་བྱས་ན་རབ་ཏུ་བྱུང་ཞིང་བསྙེན་པར་རྫོགས་སུ་མི་གནང་སྟེ། གལ་ཏེ་རབ་ཏུ་ཕྱུང་ངམ་བསྙེན་པར་རྫོགས་པ་བྱིན་ན་དེའི་སློབ་དཔོན་ཉེས་པ་དང་བཅས་པ་ཡིན་ཏེ་ངའི་བསྟན་པ་ལས་བསྐྲད་པར་བྱའོ། །དེ་ལྟར་གང་ཟག་དེ་རབ་ཏུ་བྱུང་ངམ་བསྙེན་པར་རྫོགས་ན་སྤྱོད་ལམ་དང་ཆ་ལུགས་དང་ལྡན་པས་དེ་ལ་ཡང 60.154a ལྕག་དང ། དབྱིག་པས་གཞུ་ཞིང་འཚོག་པ་དང ། གཤེ་བ་དང་སྤྱོ་བ་དང ། བཙོན་རར་གཞུག་པ་དང ། ལུས་ཀྱི་ཡན་ལག་གཏུབ་པ་དང ། འཚོ་བའི་དབང་པོ་དང་ཕྲལ་བའི་བར་དུ་བྱེད་དུ་མི་གནང་ངོ ། །དེ་ལྟར་ལ་ལ་ནི་རྩ་བའི་སྡིག་པ་ཡིན་ལ་མཚམས་མེད་པ་མ་ཡིན་པ་ཡང་ཡོད་དོ། །ལ་ལ་ནི་མཚམས་མེད་པ་ཡིན་ལ་རྩ་བའི་སྡིག་པ་མ་ཡིན་པ་ཡང་ཡོད་དོ། །ལ་ལ་ནི་རྩ་བའི་སྡིག་ཀྱང་ཡིན་ལ་མཚམས་མེད་པའི་སྡིག་ཀྱང་ཡིན་པ་ཡོད་དོ། །ལ་ལ་ནི་རྩ་བའི་སྡིག་ཀྱང་མ་ཡིན་ལ་མཚམས་མེད་པ་ཡང་མ་ཡིན་པ་ཡོད་དོ། །དེ་ལ་ཇི་ལྟར་ན་རྩ་བའི་སྡིག་ཀྱང་ཡིན་ལ་མཚམས་མེད་པ་ཡང་ཡིན་པ་ཞེ་ན། འདི་ལྟ་སྟེ་ངའི་བསྟན་པ་ལ་རབ་དུ་བྱུང་ནས་བསྙེན་པར་རྫོགས་པ་ལ་ཆེད་དུ་བསམས་ཏེ་བདེན་པ་མཐོང་བའི་ཕ་རོལ་དུ་ཕྱིན་པའི་གང་ཟག་བསད་པ་སྟེ། འདི་ནི་རྩ་བའི་སྡིག་ཀྱང་ཡིན་ལ་མཚམས་མེད་པ་ཡང་ཡིན་པས་ངས་བསྟན་པའི་འདུལ་བའི་ཆོས་ལས་མྱུར་དུ་བསྐྲད་དགོས་སོ། །དེ་ལ་ཇི་ལྟར་ན་རྩ་བའི་སྡིག་ནི་ཡིན་ལ་མཚམས་མེད་པ་མ་ཡིན་པ་ཞེ་ན། འདི་ལྟ་སྟེ་ངའི་བསྟན་པ་ལ་རབ་ཏུ་བྱུང་ནས་བསྙེན་པར་རྫོགས་པ་ལ་ཆེད་དུ་བསམས་ཏེ་གང་ཟག་ཕ་རོལ་པོ་གཞན་གྱི་སྲོག་བཅད་པ་དང ། ཆུང་ངུ་ན་དུག་བྱིན་པས་མངལ་ན་འདུག་པ་བསད་པ་སྟེ། དེ་དག་ནི་རྩ་བའི་སྡིག་ཡིན་ལ་མཚམས་མེད་པ་ནི་མ་ཡིན་ནོ། །གང་ཟག་དེ་དགེ་འདུན་དང་ལྷན་ཅིག་ཏུ་གནས་ཤིང་ལོངས་སྤྱོད་དང ། ཕྱོགས་བཞིའི་དགེ་འདུན་གྱི་ནོར་ལ་སྤྱོད་དུ་མི་གནང་ངོ ། །དེ་ལ་ཇི་ལྟར་ན་མཚམས་མེད་པ་ནི་ཡིན་ལ་རྩ་བའི་སྡིག་མ་ཡིན་པ་གང་ཞེ་ན། འདི་ལྟ་སྟེ། གང་ཟག་གང་ཞིག་དཀོན་མཆོག་གསུམ་ལ་སྐྱབས་སུ་སོང་ངམ། ཁྲིམས་ལྔ་འཛིན་ཏམ། ཁྲིམས་བཅུ་འཛིན་པ་དག་མཚམས་མེད་པ་ལྔ་ལས་གཅིག་ཙམ་བྱས་པ་དག་ནི་མཚམས་མེད་པའི་སྡིག་ཡིན་ལ་རྩ་བའི་སྡིག་མ་ཡིན་པ་ཞེས་བྱའོ། །གང་ཟག་དེ་ནི་རབ་ཏུ་དབྱུང་ཞིང་བསྙེན་པར་རྫོགས 60.154b སུ་མི་རུང་སྟེ། གལ་ཏེ་རབ་ཏུ་ཕྱུང་ངམ་བསྙེན་པར་རྫོགས་པ་བྱིན་ན། དེའི་སློབ་དཔོན་སྡིག་པ་དང་བཅས་པ་ཡིན་ཏེ། ངའི་བསྟན་པ་ལས་བསྐྲད་པར་བྱའོ། །དེ་ལ་ཇི་ལྟར་ན་རྩ་བའི་སྡིག་ཀྱང་མ་ཡིན་ལ་མཚམས་མེད་པ་ཡང་མ་ཡིན་པ་ཞེ་ན། འདི་ལྟ་སྟེ། གང་ཟག་གང་ཞིག་དཀོན་མཆོག་གསུམ་ལ་སྐྱབས་སུ་སོང་ངམ། ཁྲིམས་ལྔ་བཟུང་བ་ལས་སངས་རྒྱས་དང ། ཆོས་དང ། དགེ་འདུན་ལ་ཐེ་ཙོམ་ཟ་བའི་སེམས་སྐྱེ་སྟེ། མུ་སྟེགས་ཅན་ལ་སྐྱབས་སུ་སོང་ནས་སྟོན་པའི་སློབ་དཔོན་དུ་འཛིན་ཏམ། ལྟས་སུ་བལྟ་བ་སྣ་ཚོགས་ལ་ལྟས་སུ་འཛིན་ཅིང་འཇིག་རྟེན་གྱི་ལྷ་རྗེད་པའོ། །གང་ཟག་གང་ཞིག་དེ་བཞིན་གཤེགས་པས་གསུངས་པའི་དམ་པའི་ཆོས་ཉན་ཐོས་ཀྱི་ཐེག་པ་དང་ལྡན་པའི་དམ་པའི་ཆོས་དང ། རང་སངས་རྒྱས་ཀྱི་ཐེག་པ་དང་ལྡན་པའི་དམ་པའི་ཆོས་དང ། ཐེག་པ་ཆེན་པོ་དང་ལྡན་པའི་དམ་པའི་ཆོས་ལ་སྐུར་ཅིང་སྒྲོ་འདོགས་པ་དང ། བགེགས་དང་བར་ཆད་བྱེད་པ་དང ། བདག་ཡིད་མི་ཤེས་ཤིང་མི་དད་པས་ཕ་རོལ་པོ་གཞན་དག་ཀྱང་དེ་ལས་ཟློག་ཅིང་བར་ཆད་བྱེད་པ་དང ། གཞན་དག་ཀློག་པ་དང ། འདོན་པ་དང ། གླེགས་བམ་དུ་འབྲི་བའི་ཚིགས་བཅད་གཅིག་ཙམ་གྱི་ཡང་བར་དུ་གཅོད་ཅིང་བགེགས་བྱས་ན། དེ་ནི་རྩ་བའི་སྡིག་ཀྱང་མ་ཡིན་ལ་མཚམས་མེད་པ་ཡང་མ་ཡིན་ཏེ། ཁ་ན་མ་ཐོ་བ་ཆེན་པོའི་ལས་མཚམས་མེད་པ་དང་ཉེ་བ་ཞེས་བྱའོ། །གང་ཟག་དེ་ཁ་ན་མ་ཐོ་བའི་སྡིག་པའི་ལས་ཆེན་པོ་དག་འཐོལ་བ་དང ། བཤགས་པ་མ་བྱས་ཀྱི་བར་དུ་རབ་ཏུ་འབྱུང་བ་དང་བསྙེན་པར་རྫོགས་སུ་མི་རུང་སྟེ། ལ་ལ་ཞིག་གིས་རབ་ཏུ་ཕྱུང་ངམ། བསྙེན་པར་རྫོགས་པ་བྱིན་ན། དེའི་སློབ་དཔོན་དེ་སྡིག་པ་དང་བཅས་པ་ཡིན་པས་ངའི་བསྟན་པ་ལས་བསྐྲད་པར་བྱའོ། །གང་ཟག་དེ་རབ་ཏུ་བྱུང་ངམ་བསྙེན་པར་རྫོགས་ནས་ཁ་ན་མ་ཐོ་བའི་སྡིག་པ་དེ་འཐོལ་བ་དང ། བཤགས་པའི་ལས་མ་བྱས་ན་དེ་ནི་ངས་བསྟན་པའི་འདུལ 60.155a བ་ལས་མྱུར་དུ་བསྐྲད་དགོས་སོ། །དེ་ཅིའི་ཕྱིར་ཞེ་ན། གང་ཟག་རྣམ་པ་དེ་གཉིས་ནི་དམ་པའི་ཆོས་ཀྱི་མིག་མེད་པར་བྱེད་པ། དམ་པའི་ཆོས་ཀྱི་སྒྲོན་མ་ནུབ་པར་བྱེད་པ། དཀོན་མཆོག་གསུམ་གྱི་གདུང་ཡོངས་སུ་གཅོད་པ་སྟེ། ལྷ་དང་མི་ལ་སོགས་པ་ཡང་དོན་མེད་པ་ཕན་པ་མེད་པའི་སྡུག་བསྔལ་སྤྱོད་དུ་འཇུག་ཅིང་ངན་སོང་དུ་ལྟུང་བར་བྱེད་པ་ཡིན་ནོ། །གང་ཟག་རྣམ་པ་གཉིས་པོ་དེ་ནི་བདག་ཉིད་ཀྱིས་དམ་པའི་ཆོས་ལ་སྐུར་ཅིང་འཕགས་པ་རྣམས་ལ་སྨོད་པ་ཡིན་ལ། ཕ་རོལ་པོ་གཞན་དག་ཀྱང་དམ་པའི་ཆོས་ལ་སྐུར་ཅིང་འཕགས་པ་རྣམས་ལ་སྨོད་དུ་འཛུད་པ་སྟེ། ཚེ་འཕོས་མ་ཐག་ཏུ་འཚམས་མེད་པའི་སེམས་ཅན་དམྱལ་བ་ཆེན་པོ་ལྟུང་ཞིང་བསྐལ་པའི་བར་དུ་སྡུག་བསྔལ་མྱོང་བར་འགྱུར་ཏེ་ཕྱིར་གསོར་མི་རུང་ངོ ། །ཚངས་པ་ཆེན་པོ་གཞན་ཡང་བཅས་པའི་སྡིག་ལ་མི་གནས་པ་དང་མི་བྱ་བ་ཡང་ཡོད་ལ། རང་བཞིན་གྱི་སྡིག་ལ་མི་གནས་པ་དང་མི་བྱ་བ་ཡང་ཡོད། རང་བཞིན་གྱི་སྡིག་ལ་རྩ་བའི་སྡིག་ཏུ་འགྱུར་བ་མི་གནས་པ་དང་མི་བྱ་བ་ཡང་ཡོད་དོ། །དེ་ལ་ཇི་ལྟར་ན་རྩ་བའི་སྡིག་ལ་མི་གནས་པ་དང་མི་བྱ་བའི་ཆོས་ཤེ་ན། འདི་ལྟ་སྟེ། དགེ་སློང་གང་ཞིག་མི་ཚངས་པར་སྤྱོད་པས་རྩ་བའི་སྡིག་བྱས་པ་དང་ཆེད་དུ་བསམ་ཏེ། སྐྱེ་བོ་མིའི་སྲོག་བཅད་ནས་རྩ་བའི་སྡིག་བྱས་པ་དང ། དཀོན་མཆོག་གསུམ་གྱི་དཀོར་མ་ཡིན་པར་བརྐུས་ནས་རྩ་བའི་སྡིག་བྱས་པ་དང ། བརྫུན་ཆེན་པོ་སྨྲས་ནས་རྩ་བའི་སྡིག་བྱས་པ་སྟེ། དགེ་སློང་གང་ཞིག་རྩ་བའི་སྡིག་རྣམ་པ་འདི་བཞི་ལས་འགའ་ཞིག་བྱས་ན་དགེ་སློང་གིས་ལས་བྱ་བའི་ནང་དུ་མི་ཆུད་དེ། ལོངས་སྤྱོད་ཐམས་ཅད་དང ། ཕྱོགས་བཞིའི་དགེ་འདུན་གྱི་ནོར་ལ་སྤྱོད་དུ་མི་དབང་མོད་ཀྱི་དེ་ལ་ཡང་དབྱིག་པ་དང ། ལྕག་གིས་བརྡེག་ཅིང་གཞུ་བ་དང ། བཙོན་རར་གཞུག་པ་དང ། སྤྱོ་ཞིང་གཤེ་བ་དང ། ལུས་ཀྱི་ཡན་ལག་གཏུབ་པ་དང ། འཚོ་བའི་དབང་པོ་དང་ཕྲལ་བ་ལ་སོགས་པ་ཐམས་ཅད་བྱེད་དུ་མི་གནང་ངོ ། །དེ་དག་ནི་རང 60.155b བཞིན་གྱི་སྡིག་གི་ནང་ན་རྩ་བའི་སྡིག་ལྕི་བ་སྟེ། མི་གནས་པ་དང་མི་བྱ་བ་ཞེས་བྱའོ། །ཅིའི་ཕྱིར་དེ་ལ་རྩ་བའི་སྡིག་ཅེས་བྱ་ཞེ་ན། གང་ཟག་གང་གིས་ཆོས་རྣམ་པ་དེ་བཞི་བྱས་ན། ཚེ་འཕོས་མ་ཐག་ཏུ་ངན་སོང་དུ་ལྟུང་བར་འགྱུར་ཏེ། ངན་སོང་དུ་འགྲོ་བའི་རྩ་བ་ཡིན་པས་ན་རྩ་བའི་སྡིག་ཅེས་བྱའོ། །དེ་ལ་ཅིའི་ཕྱིར་མཚམས་མེད་པ་དང ། མཚམས་མེད་པ་ལ་ཉེ་བ་དང ། རྩ་བའི་སྡིག་ལ་མི་གནས་པ་དང་མི་བྱ་བའི་ཁ་ན་མ་ཐོ་བ་ཆེན་པོའི་ལས་ངན་པ་ཞེས་གསུངས་ཤེ་ན། རིགས་ཀྱི་བུ་འདི་ལྟ་སྟེ། ལྕགས་ཀྱི་ཐུ་ལུམ་འམ། རོ་ཉེའི་གོང་བུ་ནི་སྟེང་གི་ནམ་མཁའ་ལ་བོར་ན་ཅུང་ཟད་ཀྱང་མི་སྡོད་པར་དེ་མ་ཐག་ཏུ་ཕྱིར་ཡང་ས་ལ་ལྟུང་ངོ ། །མཚམས་མེད་པ་ལྔ་དང ། མཚམས་མེད་པ་ལ་ཉེ་བ་དང ། རྩ་བའི་སྡིག་བཞི་དང ། དམ་པའི་ཆོས་ལ་སྐུར་པ་དང ། དཀོན་མཆོག་གསུམ་ལ་ཐེ་ཙོམ་ཟ་བ་དང ། གང་ཟག་སྡིག་པ་ཅན་རྣམ་གཉིས་པོ་ཡང་དེ་དང་འདྲ་སྟེ། གང་ཟག་གང་གིས་སྡིག་པ་རྣམ་པ་བཅུ་གཅིག་པོ་དེ་ལས་འགའ་ཞིག་བྱས་ན་ཚེ་འཕོས་མ་ཐག་ཏུ་ཐོགས་པ་མེད་པར་མཚམས་མེད་པའི་སེམས་ཅན་དམྱལ་བ་ཆེན་པོར་གདོན་མི་ཟ་བར་སྐྱེ་ཞིང་སྡུག་བསྔལ་ཆེན་པོ་མྱོང་བར་འགྱུར་ཏེ། དེ་བས་ན་མི་གནས་པ་དང ། མི་བྱ་བའི་ཁ་ན་མ་ཐོ་བ་ཆེན་པོའི་ལས་ངན་པ་ཞེས་བྱའོ། །མི་གནས་པ་དང ། མི་བྱ་བའི་ཁ་ན་མ་ཐོ་བ་ཆེན་པོའི་ལས་ངན་པ་འདི་དག་བྱས་པའི་གང་ཟག་ནི་ལུས་འདི་ཉིད་ལ་ཉོན་མོངས་པ་ཟད་པར་བྱེད་མི་ནུས་སུ་ངེས་ཏེ་ཏིང་ངེ་འཛིན་ཡང་མི་འགྲུབ་ན་ཡང་དག་པ་མི་འགྱུར་བ་ལ་ཞུགས་པ། ཐོབ་པ་ལྟ་ཅི་སྨོས་ཏེ། ཚེ་འཕོས་མ་ཐག་ཏུ་གདོན་མི་ཟ་བར་སེམས་ཅན་དམྱལ་བར་སྐྱེ་ཞིང་སྡུག་བསྔལ་ཆེན་པོ་མྱོང་བར་འགྱུར་རོ། །ཚངས་པ་ཆེན་པོ་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་གང་གིས་བསམ་པ་དག་པས་ངའི་བསྟན་པ་ལ་དད་ནས་ཉན་ཐོས་ཀྱི་ཐེག་པ་ལ་ཞུགས་སམ། རང་སངས་རྒྱས་ཀྱི་ཐེག་པ་ལ་ཞུགས་སམ། 60.156a ཐེག་པ་ཆེན་པོ་ལ་ཞུགས་ཏེ་ངས་བསྟན་པ་ལ་དད་པས་ཁྱིམ་ནས་ཁྱིམ་མ་ཡིན་པར་རབ་ཏུ་ཕྱུང་སྟེ་བསྙེན་པར་རྫོགས་པར་བསླབ་པའི་གནས་མང་པོ་ལ་ཤིན་དུ་བཀུར་སྟི་དང ། རིམ་གྲོར་བྱ་བ་དང ། རྩ་བའི་སྡིག་པ་བཞི་བསྲུང་བ་ལ་ཤིན་དུ་འབད་པའི་བརྩོན་འགྲུས་ཆེན་པོ་བརྩམ་པར་བྱའོ། །གང་ཟག་དེ་ལ་ནི་རྟག་ཏུ་ལྷ་དང ། མི་དང ། མི་མ་ཡིན་པ་ལ་སོགས་པ་རྗེས་སུ་འབྲང་ཞིང་སྲུང་སྟེ་དེ་ནི་ལྷ་དང ། མི་ལ་སོགས་པའི་མཆོད་པ་ཡང་ཆུད་མི་ཟའོ། །ཐེག་པ་གསུམ་གང་ལ་སྤྲོ་ཞིང་དགའ་བ་བཞིན་དེ་མ་ཐག་ཏུ་མཐའི་གནས་བྱེད་པར་འགྱུར་རོ། །དེ་བས་ན་ཡང་དག་པ་མྱ་ངན་ལས་འདའ་བར་འདོད་པ་དག་ལུས་དང་སྲོག་སྟོར་ཀྱང་སླའི་ཆོས་རྣམ་པ་དེ་བཞི་ཉམས་པར་མི་བྱའོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོ་དག་ནི་རྒྱུ་རྣམ་པ་འདི་གསུམ་གྱིས་མྱ་ངན་ལས་འདའ་བའི་བདེ་བ་ཐོབ་པར་འགྱུར་བའི་ཕྱིར་རོ། །གསུམ་གང་ཞེ་ན། དེ་བཞིན་གཤེགས་པ་ལ་བརྟེན་པའི་རྒྱུ་དང ། འཕགས་པས་བསྟན་པ་ལ་བརྟེན་པའི་རྒྱུ་དང ། ངའི་ཉེ་གནས་ལ་བརྟེན་པའི་རྒྱུ་སྟེ་གསུམ་མོ། །སོ་སོའི་སྐྱེ་བོ་དག་རྒྱུ་རྣམ་པ་འདི་གསུམ་ལ་བརྟེན་ཏེ་བརྩོན་འགྲུས་སུ་ནན་ཏན་བྱས་ན་མྱ་ངན་ལས་འདའ་བའི་བདེ་བ་ཐོབ་པར་འགྱུར་རོ། །གང་ཟག་གང་གིས་ཆོས་རྣམ་པ་དེ་བཞི་ཉམས་ན་ང་ཡང་དེའི་སྟོན་པ་མ་ཡིན་ལ། དེ་ཡང་ངའི་ཉན་ཐོས་མ་ཡིན་ནོ། །གང་ཟག་གང་གིས་ཆོས་རྣམ་པ་དེ་བཞི་ཉམས་ན་དེ་ནི་ངས་བསྟན་པའི་ཤིན་དུ་ཟབ་པ། རྒྱ་ཆེ་བའི་མི་རྟག་པ་དང ། སྡུག་བསྔལ་བ་དང ། སྟོང་པ་ཉིད་དང ། བདག་མེད་པ་དང་ལྡན་པ་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་བར་བསྟན་པ་སོ་སོར་ཐར་པ་ལས་འགལ་བའོ། །གལ་ཏེ་ངས་བསྟན་པའི་སོ་སོར་ཐར་པ་ལས་འགལ་ན་དེ་ནི་བསམ་གཏན་དང ། ཏིང་ངེ་འཛིན་ཐམས་ཅད་ལ་ལྡོངས་ཤིང་འཐོམ་པར་འགྱུར་ཏེ། གཞོལ་ཞིང་འཇུག་མི་ནུས་པ་དང ། ཉོན་མོངས་པ་མང་པོས་དཀྲིས་ཤིང་ཀླགས་ཏེ་ཐེག་པ་གསུམ་གྱི་ཆོས་ཀྱི་སྣོད་ཀྱང་མ་ཡིན་པས་ངན་སོང་དུ་ལྟུང་ཞིང་སྡུག་བསྔལ་ཆེན་པོ་མྱོང་བར་འགྱུར་རོ། །རིགས་ཀྱི་བུ་འམ། རིགས་ཀྱི་བུ་མོ 60.156b གང་གིས་ངས་བསྟན་པའི་སོ་སོར་ཐར་པ་ལས་རྩ་བ་བཞི་མ་ཉམས་ཏེ་ཡོངས་སུ་དག་ན་ང་ཡང་དེའི་སྟོན་པ་ཡིན་ལ། དེ་ཡང་ངའི་ཉན་ཐོས་ཡིན་པས་ངའི་གསུང་གི་རྗེས་སུ་འབྲང་བ། ངའི་ཆོས་ལ་བདེ་བར་གནས་པ། བྱ་བ་ཐམས་ཅད་ཀྱི་མཐར་ཕྱིན་པ་ཡིན་པས་གང་ཟག་དེ་ནི་ཚུལ་ཁྲིམས་ཀྱི་ཕུང་པོ་ལ་ཤིན་དུ་གནས་པས་ན་དགེ་བའི་ཆོས་ཐམས་ཅད་ལ་ལེགས་པར་གནས་པ་ཡིན་ནོ། །ཉན་ཐོས་ཀྱི་ཐེག་པ་ཕུན་སུམ་ཚོགས་པ་ལ་གནས་པ་ཡིན་ནོ། །རང་སངས་རྒྱས་ཀྱི་ཐེག་པ་ཕུན་སུམ་ཚོགས་པ་ལ་གནས་པ་ཡིན་ནོ། །ཐེག་པ་ཆེན་པོ་ཕུན་སུམ་ཚོགས་པ་ལ་གནས་པ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་རང་བཞིན་གྱི་སྡིག་པའི་རྩ་བ་རྣམ་པ་བཞི་པོ་དེ་བསྲུངས་ན། དེ་ནི་ཟག་པ་དང་བཅས་པ་དང ། ཟག་པ་མེད་པའི་དགེ་བའི་ཆོས་ཐམས་ཅད་ཀྱི་རྒྱུ་མཆོག་དམ་པ་རྣམ་པར་གཞག་པ་ཡིན་ནོ། །དེ་བས་ན་ཆོས་རྣམ་པ་འདི་བཞི་སྲུང་བ་ནི་དགེ་བའི་ཆོས་ཐམས་ཅད་ཀྱི་རྩ་བ་ཞེས་བྱའོ། །འདི་ལྟ་སྟེ་ས་ཆེན་པོ་ལ་བརྟེན་ནས་རྩི་ཤིང་དང ། ལོ་ཏོག་དང ། ཤིང་གེལ་པ་དང ། ནགས་ཚལ་ལ་སོགས་པ་ཐམས་ཅད་སྐྱེའོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་འདི་སྲུང་བ་ལ་བརྟེན་ནས་དགེ་བའི་ཆོས་ཐམས་ཅད་འཕེལ་ཞིང་སྐྱེ་བར་འགྱུར་རོ། །འདི་ལྟ་སྟེ་ས་ཆེན་པོ་ལ་བརྟེན་ནས་རི་ཐམས་ཅད་དང ། རི་ཁོར་ཡུག་དང ། རི་ཁོར་ཡུག་ཆེན་པོ་དང ། རི་རབ་རིའི་རྒྱལ་པོ་ལ་སོགས་པ་ཐམས་ཅད་བདེ་བར་གནས་སོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་སྲུང་བ་ལ་བརྟེན་ནས་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་དང ། བླ་ན་མེད་པའི་ཐེག་པ་ཆེན་པོ་བདེ་བར་གནས་པར་འགྱུར་རོ། །འདི་ལྟ་སྟེ་ས་ཆེན་པོ་ལ་བརྟེན་ནས་འཇིག་རྟེན་གྱི་རོ་བྲོ་བའི་མཆོག་ཐམས་ཅད་བཙལ་གྱིས་རྙེད་དོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་སྲུང་བ་ལ་བརྟེན་ནས་དྲན་པ་དང ། ཏིང་ངེ་འཛིན་དང ། གཟུངས་དང ། ངང་དེས་པའི་བཟོད་པ་དང ། འཕགས་པའི་ལམ་ཐམས་ཅད་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཐོབ་པར་འགྱུར་རོ། །འདི་ལྟ་སྟེ་ས་ཆེན་པོ་ནི་གཙང་བ་དང ། མི་གཙང་བ་ཐམས་ཅད 60.157a སྙོམས་པར་འཛིན་ཏོ། །ཚུལ་ཁྲིམས་ཀྱི་རྩ་བ་བཞི་ཤིན་དུ་སྲུངས་བའི་རིགས་ཀྱི་བུ་དང ། རིགས་ཀྱི་བུ་མོ་དག་ཀྱང་དེ་བཞིན་དུ་ཆོས་ཀྱི་སྣོད་དུ་གྱུར་པ་དང ། ཆོས་ཀྱི་སྣོད་དུ་མ་གྱུར་པ་ལ་སེམས་མཉམ་པར་བཞག་སྟེ། དེ་ལ་མི་བརྙས་མི་སྨད་བདག་མི་བསྟོད་མི་སྙེམས་ཅོ་མི་འདྲི་ན་དགེ་བའི་ཆོས་ཐམས་ཅད་སྐྱེ་བའི་གནས་སུ་འགྱུར་རོ། །འདི་ལྟ་སྟེ། ས་ཆེན་པོ་འདི་ལ་ནི་སེམས་ཅན་ཐམས་ཅད་དེ་ལ་ལོངས་སྤྱོད་ཅིང་བདེ་བར་འཚོའོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་ཤིན་དུ་སྲུང་བའི་རིགས་ཀྱི་བུ་དང ། རིགས་ཀྱི་བུ་མོ་དག་ཀྱང་དེ་བཞིན་གཤེགས་པས་བསྟན་པ་ཡང་དག་པའི་ཆོས་ལ་ཤིན་དུ་སྤྲོ་བ་དང ། མཆོག་དམ་པའི་བསམ་པ་དག་པས་སེམས་ཅན་ཐམས་ཅད་ལ་བྱེ་བྲག་གི་འདུ་ཤེས་མེད་པར་བསྡུ་བ་རྣམ་པ་བཞིའི་ཆོས་ཀྱིས་མཉམ་པར་བསྡུས་ཏེ། སེམས་ཅན་ཐམས་ཅད་ཆོས་ཀྱི་དགའ་བ་ལ་ལོངས་སྤྱོད་ཅིང་བདེ་བར་འཚོ་བར་བྱེད་དོ། །དེ་ནས་ཚེ་དང་ལྡན་པ་ཨུ་པ་ལིས་བཅོམ་ལྡན་འདས་ཀྱིས་གསུངས་པ་འདི་དག་ཐོས་ནས་འདུག་པ་ལས་ལངས་ཏེ། གོས་ཚགས་བཅོས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་བླ་གོས་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་ཚུལ་ཁྲིམས་ཀྱི་རྩ་བ་བཞི་ཤིན་དུ་སྲུང་བའི་རིགས་ཀྱི་བུ་དང ། རིགས་ཀྱི་བུ་མོ་དག་ཆོས་ཀྱི་སྣོད་དུ་གྱུར་པའི་ཆོས་ཀྱི་སྣོད་དུ་མ་གྱུར་པ་ཀུན་ལ་སེམས་མཉམ་པར་བཞག་སྟེ། མི་བརྙས་མི་སྨད་བདག་མི་བསྟོད་མི་སྙེམས་གློ་བུར་དུ་ཉེས་པ་མ་གླེང་ངོ་ཞེས་གསུངས་ན། དེ་ལྟ་ན་ནི་མ་མཆིས་པའི་དུས་ན་དགེ་སློང་ཚུལ་ཁྲིམས་ཉམས་ཞིང་མི་དགེ་བ་སྤྱོད་པ། དགེ་སྦྱོང་མ་ལགས་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ལགས་པར་ཚངས་པར་སྤྱོད་པར་ཁས་འཆེ་བ་དག་ལ་དགེ་སློང་གི་དགེ་འདུན་གྱིས་ཇི་ལྟ་བུའི་ཐབས་ཀྱིས་གླེང་ཞིང་དགར་བར་བགྱི། 60.157b བཅོམ་ལྡན་འདས་ཀྱིས་ཚེ་དང་ལྡན་པ་ཨུ་པ་ལི་ལ་བཀའ་སྩལ་པ། ངས་མུ་སྟེགས་ཅན་དང ། ཁྱིམ་པ་རྣམས་ཀྱིས་དགེ་སློང་གི་ཉེས་པ་གླེང་དུ་ནི་གནང་བའི་སྐབས་མེད་དོ། །དགེ་སློང་གི་དགེ་འདུན་གྱིས་ཀྱང་ཆོས་བཞིན་མ་ཡིན་པ་དང ། མ་རྟོགས་པར་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་དུ་མ་གནང་ན་དགར་བ་འམ་བསྐྲད་པ་ལྟ་ཅི་སྨོས། ཆོས་བཞིན་མ་ཡིན་པ་དང ། མ་རྟོགས་པར་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེངས་སམ་གལ་ཏེ་བསྐྲད་ན་ཁ་ན་མ་ཐོ་བ་ཆེན་པོའི་སྡིག་པ་འཐོབ་བོ། །ུ་པ་ལི་འདི་ལྟར་ཤེས་པར་བྱ་སྟེ། ཆོས་བཞིན་མ་ཡིན་པ་དང ། མ་རྟོགས་པ་རྣམ་པ་འདི་བཅུས་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེངས་ན་ཁ་ན་མ་ཐོ་བའི་སྡིག་པ་ཆེན་པོ་ཐོབ་པར་འགྱུར་གྱིས། མཁས་པ་དག་གིས་ནི་དེ་ལྟར་མི་བྱའོ། །བཅུ་གང་ཞེ་ན། དགེ་འདུན་མ་དད་པར་རྒྱལ་པོའི་སྤྱན་སྔར་མ་རྟོགས་བཞིན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། དགེ་འདུན་མ་དད་པར་ཀུན་དུ་རྒྱུ་བའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་དགེ་འདུན་མ་དད་པར་བློན་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། དགེ་འདུན་མ་དད་པར་ཚོང་དཔོན་དང ། ཁྱིམ་བདག་གི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། བུད་མེད་མོང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། སྐྱེས་པ་མང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། མ་རུང་བར་བྱེད་པ་མང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། དགེ་སློང་དང་དགེ་སློང་མ་མང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། ཁོན་ཡོད་པའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང ། ཁྲོ་བ་ཞེ་འགྲས་པའི་མདུན་དུ་མ་རྟོགས་བཞིན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བའོ། །འདི་དག་ནི་ཆོས་མ་ཡིན་པ་དང ། 60.158a མ་རྟོགས་པར་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེངས་ན་ཁ་ན་མ་ཐོ་བའི་སྡིག་པ་ཆེན་པོ་འཐོབ་པར་འགྱུར་བ་བཅུ་ཞེས་བྱའོ། །གལ་ཏེ་བདེན་པ་ཡང་དག་པ་ལ་བརྟེན་ཏེ་གླེངས་ན་ཡང་ཉེས་པར་འགྱུར་ན་བདེན་པ་མ་ཡིན་པ་ལ་བརྟེན་ཏེ་གླེང་བ་ལྟ་ཅི་སྨོས་ཏེ། ཁ་ན་མ་ཐོ་བའི་སྡིག་པ་ཆེན་པོ་ཐོབ་པར་འགྱུར་རོ། །གཞན་ཡང་ཆོས་མ་ཡིན་པ་རྣམ་པ་འདི་བཅུས་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེངས་ན་ཁ་ན་མ་ཐོ་བ་ཆེན་པོའི་སྡིག་འཐོབ་པར་འགྱུར་གྱིས་མཁས་པ་དག་གིས་དེ་ལྟར་མི་བྱའོ། །བཅུ་གང་ཞེ་ན། མུ་སྟེགས་ཅན་དག་གིས་དགེ་སློང་གི་ཉེས་པ་གླེང་བ་དང ། ཚུལ་ཁྲིམས་མེད་པའི་ཁྱིམ་པ་དག་གིས་དགེ་སློང་གི་ཉེས་པ་གླེང་བ་དང ། མཚམས་མེད་པ་བྱས་པ་དག་གིས་དགེ་སློང་གི་ཉེས་པ་གླེང་བ་དང ། དམ་པའི་ཆོས་ལ་སྐུར་པ་དག་གིས་དགེ་སློང་གི་ཉེས་པ་གླེང་བ་དང ། འཕགས་པ་རྣམས་ལ་སྨོད་པ་དག་གིས་དགེ་སློང་གི་ཉེས་པ་གླེང་བ་དང ། གླེན་པ་སེམས་འཁྲུག་པ་དག་གིས་དགེ་སློང་གི་ཉེས་པ་གླེང་བ་དང ། ནད་ཀྱིས་ཡོངས་སུ་གཟིར་པ་དག་གིས་དགེ་སློང་གི་ཉེས་པ་གླེང་བ་དང ། ཕྱོགས་བཞིའི་དགེ་འདུན་གྱི་རུང་བར་བྱེད་པ་བས་དགེ་སློང་གི་ཉེས་པ་གླེང་བ་དང ། བཟའ་ཤིང་གི་ར་བ་སྲུང་བ་དག་གིས་དགེ་སློང་གི་ཉེས་པ་གླེང་བ་དང ། དགེ་སློང་ཆད་པ་པ་དག་གིས་དགེ་སློང་གི་ཉེས་པ་གླེང་བ་སྟེ། ཆོས་མ་ཡིན་པ་རྣམ་པ་འདི་བཅུས་དགེ་སློང་ཚུལ་ཁྲིམས་ཉམས་པའི་ཉེས་པ་གླེངས་ན་ཁ་ན་མ་ཐོ་བའི་སྡིག་པ་ཆེན་པོ་འཐོབ་པར་འགྱུར་རོ། །ཇི་སྟེ་བདེན་པ་ཡང་དག་པ་ལ་བརྟེན་ཏེ་གླེངས་ན་ཡང་ཉེས་པར་འགྱུར་ན་བདེན་པ་མ་ཡིན་པར་གླེང་བ་ལྟ་ཅི་སྨོས་ཏེ། ཁ་ན་མ་ཐོ་བའི་སྡིག་པ་ཆེན་པོ་ཐོབ་པར་འགྱུར་རོ། །གཞན་ཡང་ཨུ་པ་ལི་གལ་ཏེ་དགེ་སློང་ཚུལ་ཁྲིམས་ཉམས་པ་དག་དགེ་སློང་གི་དགེ་འདུན་གྱི་ནང་ན་དགེ་འདུན་དང་ལྷན་ཅིག་ཏུ་གནས་ན། དགེ་སློང་དེའི་ནང་ན་ཚུལ་བཞིན་དུ་བྱེད་པ། སྤྱོད་ལམ་དང་ལྡན་པ། ཡོན་ཏན་ལྔ་ཕྲུགས་དང 60.158b ལྡན་པ་གཅིག་འདུག་པ་ལས་ལངས་ཏེ། གོས་ཚགས་བཅོས་ལ་བསྟི་སྟང་དང་བཅས་པས་དགེ་སློང་གི་དགེ་འདུན་གྱི་རྐང་པ་ལ་ཕྱག་འཚལ་ལ། དེ་ནས་ཚུལ་ཁྲིམས་ཉམས་པའི་དགེ་སློང་གི་མདུན་དུ་སོང་ལ་ཉེས་པ་གླེང་ངོ་ཞེས་འདི་སྐད་གསོལ་བ་ཐོབ་ཤིག་།ཚེ་དང་ལྡན་པ་དགོངས་ཤིག་བདག་དེང་ཚེ་དང་ལྡན་པ་ཁྱོད་ཀྱི་ཉེས་པ་གླེང་ངོ ། །བདེན་པ། བརྫུན་པ་མ་ཡིན་པ་དུས་ལ་བབ་པ་དུས་ལས་མི་འདའ་བ། འཛུམ་བཞིན་དུ་སྨྲ་བ། མི་བརླང་བའི་ཚིག་དང ། བྱམས་པའི་སེམས་དང ། ཞེ་སྡང་མེད་པ་དང ། ཕན་པ་དང ། བདེ་བའི་གནོད་པ་མ་ཡིན་པ་དང ། དེ་བཞིན་གཤེགས་པའི་ཆོས་ཀྱི་མིག་དང ། ཆོས་ཀྱི་སྒྲོན་མ་ཡུན་དུ་གནས་པར་བྱ་བའི་ཕྱིར་གླེང་ངོ ། །ཚེ་དང་ལྡན་པ་ཁྱོད་ཀྱི་ཉེས་པ་བདག་གིས་ཆོས་བཞིན་དུ་གླེང་ངོ་ཞེས་གསོལ་བ་ཐོབ་ཤིག་།གང་ཟག་དེས་གླེང་དུ་གནང་ན་ནི་ཆོས་བཞིན་དུ་གླེང་བར་བྱའོ། །གལ་ཏེ་གླེང་དུ་མ་གནང་ན་ཕྱིར་ཡང་གནས་བརྟན་དང ། དགེ་འདུན་གྱི་རྐང་པ་ལ་ཕྱག་འཚལ་ཏེ་སྟི་སྟང་དང་བཅས་པས་འདི་སྐད་ཅེས་གསོལ་ཅིག་།དགེ་སློང་མིང་འདི་ཞེས་བགྱི་བ་ཉེས་པ་འདི་ལྟ་བུ་ཞིག་བགྱིས་ཏེ། བདག་གིས་ཆོས་ལྔ་ལ་བརྟེན་ཏེ་གླེང་བར་འཚལ་ལོ་ཞེས་གསོལ་ཅིག་།དེ་ནས་དགེ་འདུན་གྱི་ནང་ན་དགེ་སློང་གནས་བརྟན་གྱིས་ཤིན་དུ་རྟོགས་ལ་གླེང་བ་བས་ཅི་གླེང་བ་དང ། ཉེས་པ་ཅི་བྱས་པ་དང ། བདེན་ནམ་བརྫུན་ནམ་ལྕི་འམ་ཡང་བ་རྟོགས་ལ་འདུལ་བ་དང ། མདོ་སྡེ་ལ་བརྟེན་ཏེ་བསྡིགས་པ་དང ། བཞོ་བའི་ཐབས་སྣ་ཚོགས་ཀྱིས་དྲི་ཞིང་གླེང་བར་བྱའོ། །བདུན་ཤིན་དུ་ཞི་བར་བྱ་བའི་ཆོས་ཀྱིས་གང་དང་གང་དུ་འཐུན་པ་དེ་དང་དེའི་ཆོས་ཀྱིས་ཞི་བར་བྱའོ། །གལ་ཏེ་ཉེས་པ་ཆེན་པོ་བྱས་ན་ཡང་ཆད་པ་ཆེན་པོས་གཅད་དོ། །ཉེས་པ་འབྲིང་བྱས་ན་ཡང་ཆད་པ་འབྲིང་གིས་གཅད་དོ། །ཉེས་པ་ཆུང་ངུ་བྱས་ན་ཡང་ཆད་པ་ཆུང་ངུས་གཅད་དེ་ཁྲེལ་བ་དང ། ངོ་ཚ་བས་ཉེས་པ་འཐོལ་དུ་གཞུག་གོ། །དེ་ནས་ཨུ་པ་ལིས་ཡང་བཅོམ་ལྡན་འདས་ལ་འདི་སྐད 60.159a ཅེས་གསོལ་ཏོ། །ཉེས་པ་ཡང་དག་པར་བྱུང་བའི་སྡིག་པ་བགྱིས་པའི་དགེ་སློང་དག་གལ་ཏེ་ཁྱིམ་པའི་མཐུ་ལ་སྙེམས་སམ། ནོར་གྱི་མཐུ་སྙེམས་སམ། མང་དུ་ཐོས་པའི་མཐུ་དང ། སྨྲ་བཤགས་ཀྱི་མཐུ་དང ། སློབ་མའི་མཐུ་ལ་སྙེམས་ཏེ། མཐུ་རྣམ་པ་དེ་ལྟ་བུས་མཇིང་བསྡོམས་ཏེ། དེ་དགེ་འདུན་གྱི་ངག་མི་ཉན་ལ་དགེ་སློང་གནས་བརྟན་མདོ་སྡེ་དང ། འདུལ་བ་དང ། མ་མོ་འཛིན་པས་ཆོས་བཞིན་དུ་བསྟན་ཅིང་བཅོས་ཀྱང་ཉན་དུ་མི་བཏུབ་པའི་དགེ་སློང་དེ་ལ་ཇི་ལྟར་ཆད་པས་གཅད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གནས་བརྟན་སྡེ་སྣོད་གསུམ་འཛིན་པས་དགེ་འདུན་ལ་དད་པ་དྲིས་ཏེ། རྒྱལ་པོ་དང ། བློན་པོ་ཆེན་པོ་ལ་མཐུ་བཙལ་བའི་ཕོ་ཉ་ཐོང་ལ་གདོད་ཆོས་བཞིན་དུ་ཆད་པས་ཆོད་ཅིག་།ུ་པ་ལིས་ཡང་གསོལ་པ། བཅོམ་ལྡན་འདས་གལ་ཏེ་སྡིག་པ་བགྱིད་པའི་དགེ་སློང་དེ་ནོར་དབྱིག་གི་མཐུ་དང ། མང་དུ་ཐོས་པའི་མཐུ་དང ། སྨྲ་བཤགས་ཀྱི་མཐུ་དང ། ཐབས་རྣམ་པ་སྣ་ཚོགས་ཀྱིས་རྒྱལ་པོ་དང ། བློན་པོ་ཡང་དགའ་བར་བགྱིས་ཏེ། ཐམས་ཅད་ཆོས་མ་ལགས་པ་བགྱིད་པ། ཚུལ་ཁྲིམས་ཉམས་པའི་དགེ་སློང་གི་གྲོགས་བགྱིད་དེ། ཚུལ་ཁྲིམས་ངན་པ་ཙམ་གྱི་དགེ་སློང་དེ་དག་སྡིག་པ་ཉམ་རངས་སུ་བགྱིད་དུ་སྩལ་ནས་ཆོས་བཞིན་དུ་ཆད་པས་གཅད་དུ་ཡང་མི་སྟེར་ན། དེའི་ཚེ་དེ་ལ་དགེ་འདུན་གྱིས་ཇི་ལྟར་བགྱི། བཅོམ་ལྡན་འདས་ཀྱིས་ཨུ་པ་ལི་ལ་བཀའ་སྩལ་པ། གལ་ཏེ་དགེ་སློང་དེ་མི་གནས་པ་དང་མི་བྱ་བ་ལ་བརྟེན་ཏེ། དགེ་འདུན་གྱི་ནང་དུ་གནས་ནས་སྡིག་པ་ཆེན་པོ་མངོན་སུམ་དུ་མི་སྣང་ན། དེའི་ཚེ་དགེ་འདུན་གྱིས་སྐད་ཅིག་གཞག་གོ། །གལ་ཏེ་དགེ་སློང་དེ་མི་གནས་པ་དང་མི་བྱ་བའི་སྡིག་པ་ཆེན་པོ་མངོན་སུམ་དུ་སྣང་བཞིན་དུ་དགེ་འདུན་གྱི་ནང་ན་གནས་ན། དེའི་ཚེ་དགེ་འདུན་དག་དད་པ་དྲིས་ཏེ་ཆོས་བཞིན་དུ་བསྐྲད་དེ་སངས་རྒྱས་ཀྱི་ཆོས་ལས་ཕྱིར་དབྱུང་ངོ ། །ུ་པ་ལི་འདི་ལྟ་སྟེ་ནས་ཀྱི་ཞིང་གི་ནང་ན་ནས་ལ་གནོད 60.159b པ་སྐྱེས་པ་ཡང་མྱུ་གུ་དང ། སྡོང་བུ་དང ། ཚིགས་ནས་དང་འདྲ་ཡང ། ནས་བཟང་མོ་སྨྱེ་བར་བྱེད་དེ། ནས་ལ་གནོད་པ་དེ་སྙེ་མ་མ་བྱུང་བ་ན་ནས་ཀྱི་བདག་པོས་སྐད་ཅིག་འཇོག་གོ། །སྙེ་མ་བྱུང་མ་ཐག་པ་ན་ནས་ཀྱི་བདག་པོས་ནས་བཟང་པོ། སྨྱེ་བར་བྱེད་དོ་སྙམ་བསམས་ནས་རྩ་ཐོན་དུ་ཕྱུང་སྟེ་ཞིང་དེའི་ཕྱི་རོལ་དུ་འདོར་རོ། །དེ་བཞིན་དུ་མི་གནས་པ་དང་མི་བྱ་བའི་དགེ་སློང་ཚུལ་ཁྲིམས་ཉམས་པ་དེ་ཁྱིམ་པ་དང་མཐུ་རྣམ་པ་མང་པོ་སྙེམས་ཏེ། དགེ་འདུན་གྱི་ནང་ན་གནས་པ་སྤྱོད་ལམ་དང་ཆ་ལུགས་དགེ་འདུན་དང་འདྲ་ཡང་དགེ་འདུན་རྣམ་པར་དག་པ་སྨྱེ་བར་བྱེད་དེ། སྲུངས་མའི་ལྷས་མ་གླེངས་ཀྱི་བར་དུ་དགེ་འདུན་གྱི་ནང་ན་གནས་ཏེ། སྡིག་པ་ཆེན་པོ་མངོན་སུམ་དུ་མི་སྣང་ན་དེའི་ཚེ་དགེ་འདུན་གྱིས་སྐད་ཅིག་ཞོག་ཤིག་།གལ་ཏེ་ལྷ་སྲུངས་མས་ཀྱང་བསྐུལ་ལ་དགེ་འདུན་གྱི་ནང་ན་ཉེས་པ་ཆེན་པོ་ཡང་མངོན་སུམ་དུ་སྣང་བར་གྱུར་ན། དེའི་ཚེ་དགེ་འདུན་དད་པ་དྲིས་ཏེ། སངས་རྒྱས་ཀྱི་ཆོས་ལས་ཕྱིར་སྐྲོད་ཅིག་།ུ་པ་ལི་འདི་ལྟ་སྟེ། རྒྱ་མཚོ་ཆེན་པོར་ནི་རོ་ཞག་ལོན་པར་མི་འཇོག་གོ། །དེ་བཞིན་དུ་ངའི་ཉན་ཐོས་ཀྱི་དགེ་འདུན་གྱི་སློབ་མ་ཡང་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་རོ་དང་འདྲ་བ་དང་ལྷན་ཅིག་མི་འགྲོགས་སོ། །ུ་པ་ལིས་ཡང་གསོལ་པ། བཅོམ་ལྡན་འདས་གལ་ཏེ་ཚུལ་ཁྲིམས་ཉམས་པ་སྡིག་པ་བྱེད་པའི་དགེ་སློང་དེ་དགེ་འདུན་དད་པ་དྲིས་ཏེ་བསྐྲད་ཀྱང་ནོར་རིན་པོ་ཆེའི་མཐུ་དང ། མང་དུ་ཐོས་པའི་མཐུ་དང ། སྨྲ་བཤགས་ཀྱི་མཐུ་དང ། ཐབས་རྣམ་པ་སྣ་ཚོགས་ཀྱིས་རྒྱལ་པོ་དང ། བློན་པོ་ཆེན་པོ་དགའ་བར་བགྱིས་ཏེ། ཐམས་ཅད་ཚུལ་ཁྲིམས་ངན་པ་ཅན་གྱི་གྲོགས་སུ་གྱུར་ན། མཐུ་ཆེན་པོས་ནན་གྱིས་ལྷན་ཅིག་ཏུ་བཞག་ནས་ཚུལ་ཁྲིམས་ཉམས་པའི་དགེ་སློང་དང་དགེ་འདུན་ལྷན་ཅིག་ཏུ་གནས་ན་དེའི་ཚེ་དགེ་འདུན་གྱིས་དེ་ཇི་ལྟར་བགྱི། བཅོམ་ལྡན་འདས་ཀྱིས་བཀའ་སྩལ་པ། དེའི་ཚེ་དགེ་འདུན་གྱི་ནང་ན་འཛེམ་པ་དང་ངོ་ཚ་བར་ལྡན་པ་དང་ཚུལ་ཁྲིམས་དང 60.160a ལྡན་པའི་དགེ་སློང་དག་ཚུལ་ཁྲིམས་བསྲུང་བའི་ཕྱིར་ཚུལ་ཁྲིམས་ཉམས་པའི་དགེ་སློང་དེ་ལ་ཞེ་སྡང་མི་བསྐྱེད་པ་དང ། རྒྱལ་པོ་དང ། བློན་པོ་ཆེན་པོ་ལ་གནོད་པར་མ་གྱུར་པར་གསོལ་བ་ཐོབ་སྟེ། གནས་དེ་སྤོངས་ལ་གནས་གཞན་དུ་སོང་ཤིག་་་་་་་་ ། བམ་པོ་བཞི་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་སངས་རྒྱས་ཀྱི་ཞིང་རྙོག་པ་ལྔ་ཅན་དེ་བཞིན་གཤེགས་པ་མི་བཞུགས་པ་ན། དེའི་ཚེ་དེ་ན་གནས་པའི་སེམས་ཅན་དག་ཉོན་མོངས་པས་གཟིར་ཏེ་མི་དགེ་བ་སྤྱོད་ཅིང་གླེན་པའི་རང་བཞིན་ཅན་དུ་གྱུར་ནས་ཤིན་དུ་གདུལ་དཀའ་བ་རྒྱལ་རིགས་གདོལ་པ་ཅན་དང ། བློན་པོ་གདོལ་པ་ཅན་དང ། ཁྱིམ་བདག་གདོལ་པ་ཅན་དང ། ཚོང་དཔོན་གདོལ་པ་ཅན་དང ། བྲམ་ཟེ་གདོལ་པ་ཅན་དེ་དག་ལ་སོགས་པ་དགེ་བའི་རྩ་བ་ཆུང་བ། དད་པའི་སེམས་མ་མཆིས་པ། གཡོ་དང་སྒྱུས་འཚོ་བ། གླེན་པ་དག་ཤེས་པ་བསྙེམས་ཤིང་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུས་མི་འཇིགས་པ་དང ། དགེ་བའི་བཤེས་གཉེན་སྤོང་བ། མཚམས་མེད་པའི་སེམས་ཅན་དམྱལ་བ་ལ་འཇུག་ཅིང་འབབ་པ་དེ་དག་ཁེ་དང་རྙེད་པའི་ཕྱིར་ཚུལ་ཁྲིམས་ཉམས་པ་སྡིག་པ་བགྱིད་པའི་དགེ་སློང་དང་སྟེན་ཅིང་ཆོས་མ་ཡིན་པ་ལ་སྤྱོད་པའི་གྲོགས་སུ་གྱུར་ནས། ཐམས་ཅད་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ལ་འཇུག་ཅིང་འབབ་པའི་གནས་དེ་དག་ཏུ་བདག་མཆིས་ཏེ། སངས་རྒྱས་བཅོམ་ལྡན་འདས་ཀྱི་ཆོས་ཀྱིས་སེམས་ཅན་དེ་དག་ལ་ཕན་པ་དང ། བདེ་བ་དང ། དབུགས་དབྱུང་བའི་སླད་དུ་བླ་ན་མེད་པའི་བདུད་རྩི་ལྟ་བུའི་དམ་པའི་ཆོས་ཐབས་ཀྱིས་བསྟན་ཅིང་དྲངས་ཏེ་དེ་ལ་སྤྱོད་དུ་གཞུག་པ་དང ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་མཚམས་མེད་པའི་སེམས་ཅན་དམྱལ་བར་ལྟུང་བ་ལས་རྣམ་པར་བཟློག་པར་བགྱིའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་འདི་སྐད་ཅེས་བཀའ 60.160b སྩལ་ཏོ། །རིགས་ཀྱི་བུ་ཁྱོད་ཕྱི་མ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་སེམས་ཅན་དག་ཉོན་མོངས་པས་ཡོངས་སུ་གདུངས་ནས་སྡིག་པ་སྤྱོད་ཅིང་བྱིས་པ་གཏི་མུག་ཅན་གདུལ་དཀའ་བར་གྱུར་པ་གང་རྒྱལ་རིགས་གདོལ་པ་ཅན་དང ། བློན་པོ་གདོལ་པ་ཅན་དང ། ཁྱིམ་བདག་གདོལ་པ་ཅན་དང ། ཚོང་དཔོན་གདོལ་པ་ཅན་དང ། དགེ་སྦྱོང་གདོལ་པ་ཅན་དང ། བྲམ་ཟེ་གདོལ་པ་ཅན་ལ་སོགས་པ་དགེ་བའི་རྩ་བ་ཆུང་བ། དད་པའི་སེམས་མེད་པ། གཡོ་དང་སྒྱུས་འཚོ་བ། གཏི་མུག་ཅན། ཤེས་པ་སྙེམས་པ་ཅན། དགེ་བའི་བཤེས་གཉེན་སྤོང་བ། སྨྲས་པའི་ཚིག་བདེན་པ་མེད་པ། དགེ་བའི་བཤེས་གཉེན་གྱིས་བསྟན་པ་ལ་མི་འཇུག་པ་དང་བརྙས་ཤིང་དབང་ཟ་བ། ཚིག་ངན་པས་རྣམ་པར་འཐིང་བ། དམ་པའི་ཆོས་ལ་ཐེ་ཙོམ་ཟ་ཞིང་ལོག་པར་ལྟ་བ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་མི་འཇིགས་པ། རྟག་ཏུ་ངང་ཚུལ་ངན་པ་ཅན་དག་ལ་སྟེན་པར་དགའ་བ། སྲོག་གཅོད་པ་ནས་ལོག་པར་ལྟ་བའི་བར་དུ་སྤྱོད་པ་ལ་དགའ་ཞིང་གཡོ་དང་སྒྱུས་འཇིག་རྟེན་སླུ་བ་དང ། བདག་དང་གཞན་ལ་གནོད་པ་བྱེད་པའི་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་ངའི་ཆོས་འཇིག་པར་བྱེད་པ། ངའི་བསྟན་པ་ལ་རབ་ཏུ་བྱུང་ན་ཡང་ཚུལ་ཁྲིམས་ཉམས་ཤིང་འཇིག་རྟེན་གྱི་འདུ་འཛིའི་ལས་བྱེད་པར་སྤྲོ་བ་ལ་རྒྱལ་རིགས་དང ། བྲམ་ཟེ་ལ་སོགས་པས་སྟི་སྟང་དང་བཅས་པས་མཆོད་པ་དང་ཁེ་ལ་བརྐམ་པས་ནོར་ཚོལ་བའི་ཕྱིར་ཚིག་ཙམ་དུ་སྨྲ་ཞིང་སྤྱོད་པ་དང་མི་ལྡན་པ་ཕན་ཚུན་དུ་ཕྲིན་ཅིང་ཡི་གེ་སྐྱེལ་བ་ལ་དགའ་བ་དང ། ཚོང་དང ། ཁེ་སྤོགས་བྱེད་ཅིང་འཇིག་རྟེན་རྒྱང་ཕན་པའི་གཙུག་ལག་སློབ་པ་དང ། ཞིང་རྨོ་བའི་ལས་ལ་དགའ་བ་དང ། ནོར་རིན་པོ་ཆེ་སོགས་ཤིང་སྦེད་པ་དང ། ཁང་ཁྱིམ་དང ། ཆུང་མ་དང ། བུ་སྨད་སྲུང་བ་དང ། འཇིག་རྟེན་གྱི་སྔགས་དང ། ཕྱག་རྒྱས་འབྱུང་པོ་འཁོལ་བ་དང ། ལྟས་བཟང་ངན་བལྟ་བ་དང ། སྨན་སྦྱར་ཅིང་ནད་གསོས་པའི་ནོར་གྱིས་འཚོ་བ་དང ། བཟའ་བ་དང ། བཏུང་བ་དང ། བགོ་བ་དང ། རིན་པོ་ཆེའི་རྒྱན་ལ་ཆགས་ཤིང་ཁྱིམ་པའི་ལས་བྱེད་པ་ལ་དགའ་བ་དང ། ཚུལ་ཁྲིམས་འདྲལ་ཞིང་སྡིག་པ 60.161a སྤྱོད་པ་དང ། དུང་གི་སྒྲ་ལ་ཁྱིའི་སྤྱོད་པ་དང་ལྡན་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ་དང ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ་ཡོད་དེ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་ལ་བསྙེན་བཀུར་བྱེད་ཅིང་སྟི་སྟང་དང་བཅས་པས་མཆོད་པ་བྱེད་དེ། དེ་དག་གི་ངག་ཀྱང་ཉན་ཏོ། །ཚུལ་ཁྲིམས་ཉམས་པ་དེ་དག་ཀྱང་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་ལ་སྟེན་པར་དགའ་ཞིང་བཀུར་སྟི་དང་རིམ་གྲོ་བྱེད་དེ་དེའི་ངག་ཉན་ཏོ། །གལ་ཏེ་གང་ཟག་འགའ་ཞིག་ངའི་བསྟན་པ་ལ་རབ་ཏུ་བྱུང་ནས་ཚུལ་ཁྲིམས་དང་ཡོན་ཏན་དུ་ལྡན་པ། སློབ་པ་དང ། མི་སློབ་པ་ལ་ནན་ཏན་བྱེད་པ་ནས་འབྲས་བུའི་མཐར་ཕྱིན་གྱི་བར་དུ་གྱུར་པ་ལ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་གིས་དེ་ལ་ཕྲག་དོག་བྱེད་དེ། བསྙེན་བཀུར་དང ། སྟི་སྟང་དང ། རིམ་གྲོ་དང ། མཆོད་པ་མི་བྱེད་ཅིང་སླར་ངག་ཉན་པར་ཡང་མི་བྱེད་དོ། །རིགས་ཀྱི་བུ་འདི་ལྟ་སྟེ། མི་ལ་ལ་ཞིག་རིན་པོ་ཆེའི་གླིང་དུ་ཕྱིན་པ་ལས་རིན་པོ་ཆེ་ཨིན་དྲ་ནི་ལ་དང ། མ་ཧཱ་ནི་ལ་དང ། གསེར་དང ། དངུལ་དང ། མུ་ཏིག་དང ། པད་མ་ར་ག་དང ། བཻ་དཱུརྱ་དང ། རིན་ཐང་མེད་པའི་རིན་པོ་ཆེ་རྣམ་པ་སྣ་ཚོགས་བོར་ནས་ནོར་བུ་འཆིང་བུ་ལེན་པ་ལྟར་དེ་བཞིན་དུ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་ཡང་དེ་དང་འདྲ་སྟེ། ངས་བསྟན་པའི་དམ་པའི་ཆོས་ཀྱི་རིན་པོ་ཆེའི་གླིང་དུ་ཕྱིན་ནས་ཚུལ་ཁྲིམས་དང་ཡོན་ཏན་དུ་ལྡན་པ། དོན་དམ་པ་ལ་དགའ་བ། འཛེམ་པ་དང་ངོ་ཚ་བར་ལྡན་པ། སློབ་པ་དང་མི་སློབ་པའི་གང་ཟག་དང ། ཕ་རོལ་དུ་ཕྱིན་པ་དྲུག་ལ་ནན་ཏན་བྱེད་པ་ལ་བརྩོན་པའི་སོ་སོའི་སྐྱེ་བོ་དགེ་བའི་ཡོན་ཏན་དང་ལྡན་པ། འཕགས་པའི་འཁོར་སྤངས་ནས་ཚུལ་ཁྲིམས་ཉམས་པ། སྡིག་པ་མང་པོ་སྤྱོད་པ། ངོ་ཚ་བ་མེད་པ་དང་འཛེམ་པ་མེད་པ། ཚིག་བརླང་ཞིང་རྩུབ་པ། ལུས་དང་སེམས་ང་རྒྱལ་གྱིས་དྲེགས་པ། རྣམ་པར་དཀར་བའི་ཆོས་དང་བྲལ་བ། 60.161b བྱམས་པའི་སེམས་མེད་པ། སྙིང་རྗེ་མེད་པ། སྡིག་པའི་དགེ་སློང་དག་ལ་བསོད་ནམས་ཀྱི་ཞིང་དུ་འཛིན་ཅིང་བཀུར་སྟི་དང་རིམ་གྲོ་དང ། མཆོད་པ་བྱེད་དེ་དེའི་ངག་ཉན་ཏོ། །དེ་ལྟར་སྡིག་པ་ཅན་དེ་དག་ནི་སློབ་དཔོན་དང་སློབ་མར་བཅས་ཏེ་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་སྡིག་པའི་འཁོར་ལོ་རྣམ་པ་བཅུ་ཡོད་དེ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང ། རྗེའུ་རིགས་གདོལ་པ་ཅན་དང ། ཁྱིམ་བདག་གདོལ་པ་ཅན་དང ། ཚོང་དཔོན་གདོལ་པ་ཅན་དང ། དགེ་སྦྱོང་གདོལ་པ་ཅན་དང ། བྲམ་ཟེ་གདོལ་པ་ཅན་དག་སྡིག་པའི་འཁོར་ལོ་རྣམ་པ་བཅུ་པོ་ལས་འགའ་ཞིག་དང་ལྡན་ནམ། གལ་ཏེ་ཀུན་དང་ལྡན་ན་སྔོན་བསགས་པའི་དགེ་བའི་རྩ་བ་ཐམས་ཅད་ཀྱང་ཚིག་སྟེ་ཐལ་བ་བཞིན་དུ་འགྱུར་ལ་རིང་པོ་མི་ཐོགས་པར་ལུས་ཀྱི་ཡན་ལག་ཀྱང་དུམ་བུར་བཅད་པ་དང ། ཉིན་མཚན་དུ་མར་ལྕེ་ལྡིབ་ཅིང་སྨྲ་མི་ནུས་པ་དང ། མི་ཟད་པའི་སྡུག་བསྔལ་ཆེན་པོ་མྱོང་བ་དང ། ཚེ་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། དེ་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དག་གི་ངན་པར་ལྟ་བ་ནི་རྒྱལ་རིགས་དང ། བློན་པོ་ལ་སོགས་པས་བཟོད་ལ། སླར་དེ་བས་མཐར་གནས་པའི་དགེ་སློང་ཡོངས་སུ་དག་པ་མཐོང་ན་དེ་ལ་འདི་སྐད་ཟེར་རོ། །ཀྱེ་སྐྱེས་བུ་དག་འདི་ལྟར་དགེ་སློང་འདི་དག་ནི་གླེན་པ་གཏི་མུག་ཅན། ཚུལ་འཆོས་ཤིང་འཇིག་རྟེན་སླུ་བ་ཡིན་ཏེ། ཁ་ཟས་དང ། བཏུང་བ་དང ། བགོ་བ་དང ། ཁེ་དང ། རྙེད་པ་དང ། གྲགས་པ་འདོད་པའི་ཕྱིར་བདག་ནི་སྟོད། གཞན་ལ་ནི་སྨོད་ཅིང་ཕྲག་དོག་གིས་དཀྲུགས་མ་བྱེད་དོ། །ཁེ་དང་གྲགས་པ་ལ་སྐྱོ་ཞིང་ཆོག་མི་ཤེས་པ་ཡིན་པས་བསྐྲད་པར་འོས་པ་དེ་དག་གི་ཚིག་ཀྱང་མཉན་པར་མི་བྱའོ། །དགེ་སློང་དེ་དག་ནི་བརྫུན་འབའ་ཞིག་སྨྲ་ཞིང་བདེན་པའི 60.162a ཆོས་དང་བྲལ་བས་འབྲས་བུ་ཐོབ་པ་ཡང་མེད། འདོད་པ་དང་བྲལ་ཞིང་ཟག་པ་ཡོངས་སུ་ཟད་པ་ཡང་མ་ཡིན་ལ། ཁེ་དང་གྲགས་པ་དང ། མཆོད་པ་ཙམ་འདོད་པའི་ཕྱིར་བས་མཐར་གནས་ཤིང་ཡོན་ཏན་ཅན་དུ་སྟོན་པ་དག་ལ་མཆོད་པ་དང ། བསྙེན་བཀུར་དང་བསྟི་སྟང་མ་བྱེད་ཅིག་།དེ་ནི་གཡོ་དང་སྒྱུས་འཚོ་བ་ཡིན་གྱི། བསོད་ནམས་ཀྱི་ཞིང་ཡང་དག་པ་འམ། ལམ་ལ་ནན་ཏན་བྱེད་པ་ནི་མ་ཡིན་ནོ་ཞེས་སྐུར་ཏོ། །དེ་ནས་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་ཐམས་ཅད་ཀྱི་བས་མཐར་གནས་པའི་དགེ་སློང་ཡོངས་སུ་དག་པ་ལ་དད་པའི་སེམས་མི་སྐྱེ། དཀོན་པའི་འདུ་ཤེས་མི་འབྱུང་སྟེ། སྟི་སྟང་བྱ་བའི་སེམས་མེད་དོ། །དེ་ལ་མཆོད་པ་དང ། བསྙེན་བཀུར་བྱེད་པ་ལ་མི་མོས་ཤིང ། ཇི་སྐད་དུ་བསྟན་ཀྱང་དེའི་ཚིག་མི་ཉན་ཏེ་དེ་ལ་བརྙས་ཤིང་སྨོད་དོ། །དེ་ལྟར་བས་མཐར་གནས་པའི་དགེ་སློང་ཡོངས་སུ་དག་པ་ལ་བརྙས་སྨོད་པ་ཉིད་ཆོས་ཀྱི་མིག་དང་དཀོན་མཆོག་གསུམ་གྱི་གདུང་ལ་བརྙས་ཤིང་སྨོད་པ་ཡིན་པས་དེའི་ཚེ་ཡུལ་དེ་ན་གནས་པའི་ལྷ་དང ། ཀླུ་དང ། གནོད་སྦྱིན་དང ། ལྷ་ལ་སོགས་པ་དཀོན་མཆོག་གསུམ་ལ་བསམ་པ་དག་པ་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ཐམས་ཅད་ཁྲོས་ཏེ་ཞེ་སྡང་གི་སེམས་སྐྱེས་ནས་གཅིག་ལ་གཅིག་འདི་སྐད་ཟེར་རོ། །ཀྱེ་སྐྱེས་བུ་དག་ལྟོས་རྒྱལ་རིགས་གདོལ་པ་ཅན་དང ། རྗེའུ་རིགས་དང ། ཁྱིམ་བདག་དང་ཚོང་དཔོན་དང ། དགེ་སྦྱོང་དང་བྲམ་ཟེ་གདོལ་པ་ཅན་འདི་དག་ཆོས་ཀྱི་མིག་དཀོན་མཆོག་གསུམ་གྱི་གདུང་འཚོབ་པ་ཐམས་ཅད་ལ་ནི་བརྙས་ཤིང་དབང་བཟས་པས་དགེ་བའི་རྩ་བ་ཡང་མེད་པར་བྱས་ཏེ་མི་དགེ་བའི་བཤེས་གཉེན་གྱི་དབང་དུ་གྱུར་པས་སྡིག་པའི་ལས་ཀྱིས་ངན་སོང་དུ་ལྟུང་བར་འགྱུར་གྱིས་བདག་ཅག་དེང་ཕྱིན་ཆད་དེ་དག་གི་སྐྱབས་མི་བྱའོ། །རྒྱལ་རིགས་གདོལ་པ་ཅན་ལ་སོགས་པ་དེ་དག་གི་གནས་དང ། ཡུལ་དང ། གྲོང་ཁྱེར་དང ། སྲིད་ཀྱང་མི་བསྲུང་ངོ་ཞེས་ཟེར་ཏེ་ལྷ་དང ། ཀླུ་དང ། གནོད་སྦྱིན་དང ། ལྷ་ལ་སོགས་པ 60.162b ཐམས་ཅད་དེ་དག་ལ་མི་སྐྱོབ་མི་འགོ་སྟེ་ཡལ་བར་གཏོང་ངོ ། །དེ་བས་ན་རྒྱལ་རིགས་གདོལ་པ་ཅན་ལ་སོགས་པའི་ཡུལ་དང ། གྲོང་ཁྱེར་ན་གནས་པའི་ཡང་དག་པའི་ཆོས་ཀྱི་སྣོད་དུ་འགྱུར་བ་དང ། ཡང་དག་པར་བསོད་ནམས་ཀྱི་ཞིང་དུ་འགྱུར་བ་ཐམས་ཅད་ཡུལ་དེ་ནས་བྱུང་སྟེ་འགྲོའོ། །ཇི་སྟེ་འདུག་པ་ཞིག་ཡོད་ན་ཡང་མི་འདོད་ཅིང་གཏོང་བའི་བསམ་པ་སྐྱེས་པས་བསྐྱབ་ཅིང་བསྲུང་བའི་སེམས་མེད་དོ། །དེ་ལྟར་ལྷ་དང ། ཀླུ་དང ། གནོད་སྦྱིན་དང ། ལྷ་ལ་སོགས་པ་པ་དང ། ཡང་དག་པའི་ཆོས་ཀྱི་སྣོད་དུ་གྱུར་པ་དང ། བསོད་ནམས་ཀྱི་ཞིང་དུ་འགྱུར་བ་ཐམས་ཅད་ཀྱིས་རྒྱལ་རིགས་གདོལ་པ་ཅན་དང ། དེའི་སྲིད་དང ། ཡུལ་དང ། གྲོང་ཁྱེར་ལ་བསྲུང་ཞིང་བསྐྱབ་པའི་སེམས་མེད་དེ། བསྲུང་ཞིང་བསྐྱབ་པའི་སེམས་མེད་པས་དེའི་ཚེ་ཡུལ་དེའི་སྲིད་ལ་ནང་གི་དགྲ་དང ། ཕྱིའི་དགྲ་གཉི་ག་ལྡང་སྟེ། སྲིད་འཕྲོག་པའི་ཕྱིར་གཅིག་ལ་གཅིག་འཚེ་ཞིང་གསོད་པ་དང ། ནད་དང་མུ་གེ་ལ་སོགས་པ་ཡང་དེའི་དབང་གིས་འབྱུང་ངོ ། །དེ་ནས་རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ཐམས་ཅད་དང ། ཡུལ་དེ་ན་གནས་པ་ཐམས་ཅད་ཀྱང་དགའ་ཞིང་སྤྲོ་བའི་སེམས་མེད་དེ། སྔོན་གྱི་ཡིད་དུ་འོང་བ་དང ། སྡུག་པ་ཐམས་ཅད་དང་ཡང་བྲལ་ནས་གཉེན་བཤེས་དང ། མཛའ་བོ་དང ། གྲོགས་ཀྱང་གཅིག་གིས་གཅིག་ཡིད་བྱུང་ཞིང་ཕྲད་མི་འདོད་པ་དང ། བྱམས་པ་དང ། སྙིང་རྗེ་མེད་དེ། ཕྲག་དོག་དང ། སེར་སྣ་བྱེད་ཅིང་སྡིག་པ་མང་པོ་ཡང་བྱེད་པར་འགྱུར་རོ། །འདི་ལྟ་སྟེ་སྲོག་གཅོད་པ་ནས་ངན་པར་ལྟ་བའི་བར་དུ་ཀུན་སྤྱོད་ཅིང་ངོ་ཚ་བ་དང ། འཛེམ་པ་མེད་པར་མཆོད་རྟེན་གྱི་ནོར་དང ། དགེ་འདུན་གྱི་ནོར་ལ་སྤྱོད་ཅིང་ཟ་བ་ལ་འགྱོད་པའི་སེམས་མེད་དོ། །རྒྱལ་རིགས་གདོལ་པ་ཅན་དེ་འཛངས་ཤིང་དྲང་པོ་ལ་ནི་སྡང་ལ། གཅམ་སྒྱུ་ཅན་ལ་ནི་དགའ་བས་བློན་པོ་དང ། དམངས་གཅིག་ལ་གཅིག་གནོད་པ་བྱེད་ཅིང་འཁོན་དང་ཤར་གཉེར་ནས་འཐབ་ཅིང་རྩོད་པ་དང་ཕ་རོལ་པོའི་དགྲ་དང་གཡུལ་སྤྲོད་པ 60.163a ནའང་འོག་མ་སེམས་མི་མཐུན་པའི་ཕྱིར་གཡུལ་ཡང་ཉེས་པར་འགྱུར་རོ། །རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་དེ་དག་ཐམས་ཅད་རིང་པོ་མི་ཐོགས་པར་ལུས་ཀྱི་ཡན་ལག་ཉམས་ཤིང་ཉིན་མཚན་དུ་མར་ལྕེ་ལྐུག་པར་འགྱུར་བ་དང ། ཤིན་དུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང ། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་ངོ ། །རིགས་ཀྱི་བུ་གཞན་ཡང་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པའི་གདོལ་པ་ཅན་སྡིག་པའི་བཤེས་གཉེན་གྱི་རྗེས་སུ་སྤྱོད་པ་དག་དགེ་བའི་རྩ་བ་ཆུང་བ་གཡོ་དང་སྒྱུས་འཚོ་བ། གླེན་པ་གཏི་མུག་ཅན་ཤེས་པ་སྙེམས་པ། དཀོན་མཆོག་གསུམ་ལ་བསམ་པ་དག་པའི་སེམས་མེད་པ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་ལྟ་བ་དག་དེ་ལ་ཁ་ཅིག་ནི་ཉན་ཐོས་ཀྱི་ཐེག་པ་ལ་ཅུང་ཟད་དད་ཀྱང་ཡང་དག་པར་གླེན་པའི་རང་བཞིན་ཅན་དུ་གྱུར་པས་འདི་སྙམ་དུ་བདག་ལས་ཤེས་ཤིང་མཁས་པ་མེད་དོ་སྙམ་ནས། ངས་བསྟན་པའི་རང་སངས་རྒྱས་ཀྱི་ཐེག་པའི་ཆོས་དང ། ཐེག་པ་ཆེན་པོའི་ཆོས་ལ་བརྙས་སྨོད་དེ་འཕྱ་ཞིང་སྐུར་ནས་སེམས་ཅན་གཞན་དག་ཀྱང་ཚིགས་སུ་བཅད་པ་གཅིག་ཙམ་གྱི་བར་དུ་འཆང་ཞིང་འཛིན་པ་དང ། ཀློག་ཅིང་འདོན་དུ་ཡང་མི་སྟེར་ཏོ། །དེ་ལ་ཁ་ཅིག་ནི་རང་སངས་རྒྱས་ཀྱི་ཐེག་པ་ལ་དད་པ་ཅུང་ཟད་ཐོབ་ཀྱང་ཡང་དག་པར་གླེན་པའི་རང་བཞིན་ཅན་དུ་གྱུར་པས་འདི་སྙམ་དུ་བདག་ལས་མཁས་ཤིང་ཤེས་པ་མེད་དོ་སྙམ་ནས། ངས་བསྟན་པའི་ཉན་ཐོས་ཀྱི་ཐེག་པའི་ཆོས་དང ། ཐེག་པ་ཆེན་པོའི་ཆོས་ལ་བརྙས་ཤིང་སྨོད་དེ་འཕྱ་ཞིང་སྐུར་ནས། སེམས་ཅན་གཞན་དག་ཚིགས་སུ་བཅད་པ་གཅིག་ཙམ་གྱི་བར་དུ་འཆང་ངམ། འཛིན་ཏམ། ཀློག་གམ། འདོན་དུ་ཡང་མི་སྟེར་ཏོ། །དེ་ལ་ཁ་ཅིག་ནི་ཐེག་པ 60.163b ཆེན་པོའི་ཆོས་ལ་དད་པ་ཅུང་ཟད་ཙམ་ཐོབ་ཀྱང་ཡང་དག་པར་གླེན་པའི་རང་བཞིན་ཅན་དུ་གྱུར་པས་འདི་སྙམ་དུ་བདག་ལས་ཤེས་ཤིང་མཁས་པ་མེད་དོ་སྙམ་ནས་ངས་བསྟན་པའི་ཉན་ཐོས་ཀྱི་ཐེག་པའི་ཆོས་དང ། རང་སངས་རྒྱས་ཀྱི་ཐེག་པའི་ཆོས་ལ་བརྙས་སྨོད་དེ་འཕྱ་ཞིང་སྐུར་ནས། སེམས་ཅན་གཞན་དག་ཚིགས་སུ་བཅད་པ་གཅིག་ཙམ་གྱི་བར་དུ་ཡང་འཆང་ཞིང་འཛིན་ཏམ། ཀློག་ཅིང་འདོན་དུ་ཡང་མི་སྟེར་ཏོ། །གང་ཟག་དེ་དག་ནི་སངས་རྒྱས་ཀྱི་དམ་པའི་ཆོས་ལ་བརྙས་སྐུར་བ་དང ། དུས་གསུམ་གྱི་སངས་རྒྱས་བཅོམ་ལྡན་འདས་ལ་དབང་ཟ་བ་དང་།[་]།དུས་གསུམ་གྱི་སངས་རྒྱས་ཀྱི་ཆོས་ཀྱི་སྡེ་སྣོད་ཐམས་ཅད་བཤིག་ནས་བསྲེགས་ཏེ་ཐལ་བ་བཞིན་དུ་འཇིག་པར་བྱེད་པ། འཕགས་པའི་ལམ་གྱི་ཡན་ལག་བརྒྱད་པ་ཐམས་ཅད་གཅོད་པ། ཚད་མེད་པའི་སེམས་ཅན་གྱི་མིག་འཛར་བ་ཞེས་བྱའོ། །རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་དེ་དག་གིས་སངས་རྒྱས་ཀྱིས་བསྟན་པའི་ཉན་ཐོས་ཀྱི་ཐེག་པའི་ཆོས་དང ། རང་སངས་རྒྱས་ཀྱི་ཐེག་པའི་ཆོས་དང ། ཐེག་པ་ཆེན་པོའི་ཆོས་བཅབས་ཏེ་བར་ཆད་བྱས་ནས་ཚིགས་སུ་བཅད་པ་གཅིག་ཙམ་གྱི་བར་དུ་མེད་པར་བྱས་ན། གང་ཟག་དེ་ནི་ཆོས་ཀྱི་མིག་དང་དཀོན་མཆོག་གསུམ་གྱི་གདུང་འཚོབ་པ་ཐམས་ཅད་ལ་མ་གུས་པ་སྟེ། དེའི་རྒྱུ་དང་དེའི་རྐྱེན་གྱིས་ཡུལ་དེ་སྲུང་བའི་ལྷ་དང ། ཀླུ་དང ། གནོད་སྦྱིན་དང ། ལྷ་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང ། དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ཐམས་ཅད་ལ་ཁྲོ་ཞིང་ཞེ་སྡང་བའི་སེམས་སྐྱེ་བ་ནས་གཞུང་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་ཐམས་ཅད་རིང་པོ་མི་ཐོགས་པར་ལུས་ཀྱི་ཡན་ལག་ཉམས་ཤིང་ཉིན་མཚན་དུ 60.164a མར་ལྕེ་ལྐུག་པར་འགྱུར་བ་དང ། ཤིན་དུ་མི་བཟད་པའི་ན་བ་དང ། ཚ་བའི་སྡུག་བསྔལ་ཆེན་པོ་མྱོང་བ་དང ། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ ། །རིགས་ཀྱི་བུ་གཞན་ཡང་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པའི་གདོལ་པ་ཅན་རྣམས་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་གི་རྗེས་སུ་ཞུགས་པ་ནས། གཞུང་དེ་དེ་བཞིན་དུ་རྒྱས་པར་ཡུལ་དེ་ན་ཆོས་ཀྱི་སྣོད་དུ་གྱུར་པ་ཡང་དག་པའི་བསོད་ནམས་ཀྱི་ཞིང་དུ་གྱུར་པ་ཐམས་ཅད་རྒྱལ་རིགས་གདོལ་པ་ཅན་ལ་སོགས་པ་ལ་སྤོང་བའི་སེམས་སྐྱེད་དེ་བསྐྱབ་པ་འམ་སྲུང་བ་མི་བྱེད་དོ། །བརྒྱ་ལ་ཡུལ་དེ་ན་གནས་སུ་ཟིན་ཀྱང་ཆོས་ལ་རྟེན་གྱི་ཁྱིམ་པ་ལ་དགའ་ཞིང་གནས་པར་མི་བྱེད་པ་དང ། སྦྱིན་བདག་གི་ཁྱིམ་དུ་ཡང་དང་ཡང་དུ་འགྲོ་བར་མི་བྱེད་པ་དང ། གལ་ཏེ་སྐད་ཅིག་ཙམ་ཕྱིན་ན་ཡང་ཚིག་སྲུང་ཞིང་མི་སྨྲ་བ་དང ། ཇི་སྟེ་སྨྲ་ན་ཡང་བརྫུན་གྱི་བག་མེད་དེ། ཁྱིམ་པའི་མདུན་དུ་ཚུལ་ཁྲིམས་ཉམས་པ་དག་ལ་འཕྱ་བ་འམ་བརྙས་པར་བྱེད་པ་དང ། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དེ་དག་གི་ཉེས་པ་མི་རྗོད་ཅིང་མི་གླེང་བ་དང ། རྟག་ཏུ་བསོད་ནམས་ཀྱི་ཞིང་ལ་སྟེན་གྱི་ཚུལ་ཁྲིམས་ཉམས་པ་ཡོངས་སུ་སྤོང་ངོ ། །ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དེ་དག་ནི་ཕྱིར་ཚུལ་ཁྲིམས་སྲུང་བ་དགེ་བའི་ཡོན་ཏན་དང་ལྡན་པ་དག་ལ་ཁྲོ་བ་དང ། ཞེ་སྡང་གི་སེམས་བསྐྱེད་དེ་བརྙས་སྨོད་པ་དང ། རྒྱལ་རིགས་གདོལ་པ་ཅན་དང ། དགེ་སྦྱོང་དང ། བྲམ་ཟེ་གདོལ་པ་ཅན་དག་གི་བར་དུ་ཁྱིམ་པའི་བུས་པ་དང ། བུད་མེད་ཀྱི་མདུན་དུ་གཅམ་པ་དང ། སྒྱུ་སྣ་ཚོགས་ཀྱིས་བརྫུན་ཟེར་ཞིང་ཚུལ་ཁྲིམས་སྲུང་བ་དེ་དག་ལ་འཕྱ་ཞིང་སྐུར་པ་དང ། ཚིག་ངན་པ་རྣམ་པ་སྣ་ཚོགས་འདོགས་ཏེ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་ཐམས་ཅད་ངའི་སློབ་མ 60.164b འདོད་པ་ཉུང་ཞིང་ཆོག་ཤེས་པ། ཚུལ་ཁྲིམས་སྲུང་བ། མང་དུ་ཐོས་པ། སྤོབས་པ་དང་ལྡན་པའི་དགེ་སྦྱོང་ལ་ཞེ་སྡང་བ་དང ། ཁྲོ་བའི་སེམས་སྐྱེད་ཅིང་ཚིག་རྩུབ་པོ་རྣམ་པ་སྣ་ཚོགས་ཀྱིས་འཕྱ་ཞིང་སྐུར་དུ་བཅུག་ནས་ལུས་དང་སེམས་མི་བདེ་བར་བྱེད་དོ། །གཞན་ཡང་ཆོས་གོས་དང ། ལྷུང་བཟེད་དང ། འཚོ་བའི་ཡོ་བྱད་ཀྱང་འཕྲོག་ཏུ་བཅུག་ནས་འཚོ་བས་བྲེལ་བར་བྱེད་དོ། །གཞན་ཡང་ཕྱོགས་བཞིའི་དགེ་འདུན་གྱི་ནོར་འཕྲོག་ཏུ་བཅུག་ནས་སྤྱོད་དུ་མི་སྟེར་བ་དང ། ལ་ལ་ནི་བཙོན་རར་བཅུག་ནས་ལྕགས་དང ། ཁྲོང་ཁྲིལ་དང ། ཤིང་གི་གདོས་ལ་སོགས་པའི་ནན་ལ་བོར་རོ། །ལ་ལ་ནི་ལུས་ཀྱི་ཡན་ལག་གཏུབས། ལ་ལ་ནི་མགོ་གཅོད་དུ་བཅུག་གོ། །རིགས་ཀྱི་བུ་ཁྱོད་ལྟོས་ཤིག་།དེ་ལྟར་རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པའི་བར་དུ་གདོལ་པ་ཅན་དེ་དག་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ལ་བརྟེན་ནས་དེ་ལྟ་བུའི་ཁ་ན་མ་ཐོ་བ་ཆེན་པོའི་སྡིག་པ་རྣམ་པ་སྣ་ཚོགས་བྱེད་དོ། །མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་རོ། །སེམས་ཅན་གང་གིས་མཚམས་མེད་པ་ལྔ་བྱས་སམ། ཚུལ་ཁྲིམས་ཀྱི་རྩ་བ་དག་བཤིག་གམ། མཚམས་མེད་པ་ལ་ཉེ་བའི་སྡིག་བྱས་སམ། རང་བཞིན་གྱི་སྡིག་གམ། བཅས་པའི་སྡིག་གང་བྱས་པ་བས་ནི་རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་ཚུལ་ཁྲིམས་ཉམས་པ་ཆོས་ལས་འགལ་བར་བྱེད་པ་ལ་བསྟེན་པ་བས་སྡིག་པ་ཡང་ངོ ། །རིགས་ཀྱི་བུ་དེ་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དག་དེ་ལྟར་ཆོས་ལས་འགལ་བའི་སྡིག་པ་ཆེན་པོ་བྱས་མོད་ཀྱི། འོན་ཀྱང་ངའི་བསྟན་པ་ལ་གནས་ཤིང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས། སྤྱོད་ལམ་དང་ཆ་ལུགས་འཕགས་པ་རྣམས་དང་འཐུན་ཏེ། དེ་ལ་ནི་རྒྱལ་པོ་དང ། བློན་པོ་ཆེན་པོ་དང ། ཁྱིམ་པ་རྣམས་ཀྱིས་ཁྱིམ་པའི་ཆོས་ཉིད་དང་ཡང་སྦྱར་དུ་མི་གནང་ན། གཞུ་བ་དང ། འཚོག་པ་དང ། ནན་ལ་བོར་བ 60.165a དང ། བཙོན་རར་གཞུག་པ་དང ། གཤེ་ཞིང་སྤྱོ་བ་དང ། ལུས་ཀྱི་ཡན་ལག་གཏུབ་པ་དང ། འཚོ་བའི་དབང་པོ་དང་ཕྲལ་བ་ཆོས་མ་ཡིན་པ་བྱེད་པ་ལྟ་ཅི་སྨོས། རྒྱལ་པོ་འམ། བློན་པོ་འམ། ཁྱིམ་པ་རྣམས་ཀྱིས་གལ་ཏེ་དེ་ལྟར་བྱས་ན་ཁ་ན་མ་ཐོ་བའི་སྡིག་པ་ཆེན་པོ་འཐོབ་པར་འགྱུར་ཏེ། གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་སྐྱེའོ། །འདི་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ལ་ཡང་ཆད་པས་གཅོད་དུ་མི་གནང་ན་ཚུལ་ཁྲིམས་དང་ལྡན་པ་དགེ་བ་སྤྱོད་པ་ལ་ལྟ་ཅི་སྨོས། རིགས་ཀྱི་བུ་དགེ་སློང་གང་གིས་ཚུལ་ཁྲིམས་ཀྱི་རྩ་བའི་སྡིག་ལས་གཅིག་ཉམས་པ་ཡང་ཚུལ་ཁྲིམས་ཉམས་ཤིང་སྡིག་པ་སྤྱོད་པའི་དགེ་སློང་ཞེས་བྱ་མོད་ཀྱི། བསྟན་པ་བཞིན་དུ་དད་པའི་དགེ་འདུན་གྱིས་ལས་བྱས་པའི་སྡོམ་པ་རྒྱུན་མི་འཆད་པར་ཡོད་དེ། བསླབ་པ་དང ། ཚུལ་ཁྲིམས་ཀྱི་བར་དུ་བཏང་ཡང་རྣམ་པར་དཀར་བའི་ཆོས་ཀྱི་གསུང་ཙམ་ཡོད་ཀྱིས། དེ་ལ་ཡང་རྒྱལ་པོ་དང ། བློན་པོ་དང ། ཁྱིམ་པ་དང ། སྡོམ་པ་མེད་པ་རྣམས་ཀྱིས་བརྙས་སྨོད་དམ། ཆད་པས་གཅད་དུ་མི་གནང་ངོ ། །དེ་ལྟར་དགེ་སློང་དེ་ཆོས་ཀྱི་སྣོད་མ་ཡིན་ཏེ། འཕགས་པའི་ཆོས་ཉམས་པས་ཡོངས་སུ་དག་པའི་དགེ་འདུན་སྨྱེ་བར་བྱེད་ཅིང་དགེ་སྦྱོང་གི་ལས་སུ་བྱ་བའི་ལས་ཐམས་ཅད་མི་རུང་བར་བྱེད་པ་ཡིན་ཏེ། ཕྱོགས་བཞིའི་དགེ་འདུན་གྱི་ལོངས་སྤྱད་ལ་སྤྱོད་དུ་ནི་མི་དབང་མོད་ཀྱི། འོན་ཀྱང་ཡིད་འཐུན་པའི་དགེ་འདུན་ལས་བསྙེན་པར་རྫོགས་ཏེ་སྡོམ་པ་ཐོབ་པ་མ་བཏང་བས་ཁྱིམ་པ་སྐྱེ་བོ་ཐམས་ཅད་པས་མཆོག་གོ། །རྩ་བའི་སྡིག་ཉམས་ཀྱང་དེ་ལྟ་བུ་ཡིན་ན། དེ་མ་ཡིན་པ་བཅས་པའི་སྡིག་ཕྲ་མོ་གཞན་ཉམས་པ་ལྟ་ཅི་སྨོས་ཏེ། དེ་བས་ན་རྒྱལ་པོ་དང ། བློན་པོ་དང ། ཁྱིམ་པ་རྣམས་ཀྱིས་བརྙས་པ་འམ། སྨོད་པ་བྱེད་དམ། ཆད་པས་གཅོད་དུ་མི་དབང་ངོ ། །དེ་ཅིའི་ཕྱིར་ཞེ་ན། རིགས་ཀྱི་བུ་སྔོན་འདས་པའི་དུས་ན་ཡུལ་ཀ་ཤི་ཞེས་བྱ་བ་ན་རྒྱལ་པོ་ཚངས་པས་བྱིན་ཞེས་བྱ་བ་ཞིག་ཡོད་དེ། དེས་གདོལ་པ་ལྔ་ལ་འདི་སྐད་ཅེས 60.165b བཀའ་སྩལ་ཏོ། །ཁྱེད་དེང་ལ་རི་ཁ་བ་ཅན་གྱི་དྲུང་ན་གླང་པོ་ཆེ་མཆེ་བ་དྲུག་དང་ལྡན་པ་ཨུ་པ་ལིའི་མིག་ཅེས་བྱ་བ་ཞིག་ཡོད་ཀྱིས། ཁྱེད་ཀྱིས་དེའི་མཆེ་བ་ཕྱུང་ལ་འོན་ཅིག་གལ་ཏེ་ཁྱོད་ཀྱིས་མ་ཐོབ་ན་གསོན་དུ་མ་རེ་ཤིག་ཅེས་བསྒོའོ། །དེའི་ཚེ་གདོལ་པ་ཅན་དེ་དག་ལུས་དང་སྲོག་གི་ཕྱིར་མདའ་གཞུ་ཞིག་ཐོགས་ནས་གོས་ཚོན་ཅན་གྱོན་ཏེ། དགེ་སྦྱོང་གི་ཚུལ་ལྟར་བཅོས་ནས་རི་ཁ་བ་ཅན་གྱི་དྲུང་དུ་གླང་པོ་ཆེའི་རྒྱལ་པོ་གང་ན་བར་སོང་ངོ ། །དེར་ཕྱིན་པ་དང་དེ་ན་གླང་པོ་ཆེ་མོ་ཞིག་གིས་སྔར་མཐོང་བ་དང ། མདའ་གཞུ་ཐོགས་པ་དེས་དངངས་ནས་གླང་པོ་ཆེའི་རྒྱལ་པོའི་གན་དུ་བརྒྱུགས་ཏེ་ཕྱིན་ནས་འདི་སྐད་ཅེས་སྨྲས་སོ། །ལྷ་ཆེན་པོ་མ་གཟིགས་སམ། མི་ཁ་ཅིག་མདའ་གཞུ་ཐོགས་ཏེ་དལ་གྱིས་འཇབ་ཅིང་མཆི་ན་ཅི་བདག་ཅག་གི་ཚེའི་བར་ཆད་དུ་མི་འབྱུང་གྲང ། གླང་པོ་ཆེའི་རྒྱལ་པོས་མགོ་བཏེག་ཏེ་བལྟས་ན། སྐྲ་དང་ཁ་སྤུ་བྲེགས་ནས་གོས་ཚོན་ཅན་གྱོན་པ་དག་ཅིག་འོང་བ་མཐོང་ནས་གླང་པོ་ཆེ་མོ་ལ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་གང་གཱའི་ཀླུང་གི་བྱེ་སྙེད་གྱི། །རྒྱལ་མཚན་ཆོས་གོས་གྱོན་པ་འདི་དག་ནི། །སྡིག་པ་ཐམས་ཅད་ཡོངས་སུ་སྤངས་པས་ན། །ངེས་པར་སེམས་ཅན་དག་ལ་གནོད་མི་བྱེད། །དེ་ནས་གླང་པོ་ཆེ་མོས་ཀྱང་ཚིགས་སུ་བཅད་ནས་ལན་བཏབ་པ། ཆོས་གོས་གྱོན་པ་ལྟར་ནི་བྱེད་མོད་ཀྱི། །ཐམས་ཅད་ལག་ན་མདའ་གཞུ་ཐོགས་པས་ན། །འདི་ནི་སྙིང་རྗེ་མེད་ཅིང་མ་རུངས་པ། །སྡིག་པ་བྱེད་ལ་མོས་པའི་གདོལ་པ་ཡིན། །དེ་ནས་གླང་པོ་ཆེའི་རྒྱལ་པོས་ཀྱང་ཚིགས་སུ་བཅད་དེ་སྨྲས་པ། ཆོས་གོས་ཚལ་བུ་གྱོན་པར་སྣང་བས་ན། །བྱམས་དང་སྙིང་རྗེའི་རྩ་བ་དེ་ཉིད་ཡིན། །སེམས་ཅན་ཀུན་ལ་བྱམས་ཤིང་བརྩེ་བའི་ཕྱིར། །སངས་རྒྱས་ལ་ནི་འདི་དག་སྐྱབས་སོང་ངེས། །ཁྱེད་ཅག་འདི་ལ་ཐེ་ཙོམ་མ་ཟ་བར། །མྱུར་དུ་སེམས་དེ་རྗེས་སུ་བཟུང་ན་མཛེས། །ཆོས་གོས་ཚོན་ཅན་གྱོན་པ་འདི་དག་ནི། །འཁོར་བའི་རྒྱ་མཚོ་ལས་ནི་སྒྲོལ་མཛད་པའོ། །དེ་ནས་དེའི་ཚེ་གདོལ་པ་དེ་དག་གིས་མདའ་དུག 60.166a ཅན་གྱིས་གླང་པོ་ཆེའི་རྒྱལ་པོ་ལ་འཕངས་ནས་གཟས་པ་བཞིན་དུ་སྙིང་ལ་ཕོག་གོ། །དེ་ནས་གླང་པོ་ཆེ་མོས་སྐད་ཆེན་པོ་ཕྱུང་སྟེ་ངུས་ནས། སྐད་ཀྱིས་བརྣངས་བཞིན་དུ་ཚིགས་སུ་བཅད་པ་འདི་སྐད་ཅེས་སྨྲས་སོ། །ཆོས་གོས་གྱོན་པ་དེ་དག་ནི། །སངས་རྒྱས་ལ་ནི་སྐྱབས་སོང་སྙམ། །ཆ་ལུགས་ཤིན་དུ་ཞིར་སྣང་ཡང ། །གདུག་པའི་སེམས་ནི་ཁོང་ན་སྲེལ། །ལྷ་ཡི་སྐུ་ལ་མདའ་འཕེན་པའི། །དགྲ་དེ་ཤིན་དུ་བརླག་པའི་ཕྱིར། །མྱུར་དུ་ལུས་ཀུན་བརྫིས་ནས་སུ། །འཚོ་བའི་དབང་དང་དབྲལ་བར་བྱ། །དེ་ནས་གླང་པོ་ཆེའི་རྒྱལ་པོས་ཚིགས་སུ་བཅད་དེ་སྨྲས་པ། འཚོ་བའི་སྲོག་དང་བྲལ་ཀྱང་སླའི། །སྡིག་པའི་སེམས་ནི་བསྐྱེད་མི་རིགས། །འདི་དག་སླུ་བའི་སེམས་ཡོད་ཀྱང ། །ཆ་ལུགས་སངས་རྒྱས་སློབ་མ་འདྲ། །མཁས་པའི་སེམས་ནི་རྣམ་དག་པ། །སྲོག་གི་ཕྱིར་ནི་མ་ཡིན་ཏེ། །སྐྱེ་བོ་མང་པོ་བསྒྲལ་བའི་ཕྱིར། །རྟག་ཏུ་བྱང་ཆུབ་སྤྱད་པ་སྤྱོད། །དེའི་ཚེ་གླང་པོ་ཆེའི་རྒྱལ་པོས་སྙིང་བརྩེ་བའི་སེམས་སྐྱེས་ནས་མི་དེ་དག་ལ་འདི་སྐད་ཅེས་སྨྲས་སོ། །ཁྱེད་ང་ལ་ཅི་འདོད། དེ་དག་གིས་སྨྲས་པ། ཁྱོད་ཀྱི་མཆེ་བ་འདོད་དོ། །གླང་པོ་ཆེའི་རྒྱལ་པོ་སྙིང་ཤིན་དུ་དགའ་ནས་མཆེ་བ་ཕྱུང་སྟེ་དེ་དག་ལ་བྱིན་ནས་ཚིགས་སུ་བཅད་དེ་སྨྲས་པ། ཁྲོ་ཞིང་ཕངས་པའི་བསམ་པ་མེད་བཞིན་དུ། །ཁྱེད་ལ་ང་ཡི་མཆེ་བ་དཀར་པོ་འདི། །བྱིན་པའི་བསོད་ནམས་མངོན་པར་སངས་རྒྱས་ནས། །སྐྱེ་བོའི་ཉོན་མོངས་ནད་རྣམས་ཞི་བྱེད་ཤོག་།རིགས་ཀྱི་བུ་སྔོན་འདས་པའི་དུས་ན་དེ་ལྟར་གླང་པོ་ཆེའི་རྒྱལ་པོ་བྱོལ་སོང་གི་སྐྱེ་གནས་སུ་གྱུར་པ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་ལུས་དང་སྲོག་ལ་མ་ཆགས་པར་བཏང་ནས་ཆོས་གོས་གྱོན་པ་དེ་ལ་རིམ་གྲོ་དང ། སྟི་སྟང་བྱ་བའི་ཕྱིར་དེས་དགྲར་བྱས་ཀྱང་ལན་མི་ལྡོན་པ་ལ་ལྟོས། མ་འོངས་པའི་དུས་ན་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་གདོལ་པ 60.166b ཅན་དག་ཡང་དག་པར་གླེན་པའི་རང་བཞིན་ཅན་ཡིན་ཡང་ཅུང་ཟད་ཙམ་གྱི་ཤེས་པ་སྙེམས་ཏེ། གཡོ་དང་སྒྱུས་འཚོ་ཞིང་འཇིག་རྟེན་དག་བསླུས་ནས་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བས་ངའི་བསྟན་པ་ལ་སྐྱབས་སུ་སོང་ཞིང་རབ་ཏུ་བྱུང་བ་ཆོས་ཀྱི་སྣོད་དུ་གྱུར་པ་དང ། ཆོས་ཀྱི་སྣོད་དུ་མ་གྱུར་པ་ཀུན་ལ་འཚེ་ཞིང་གནོད་པ་བྱེད་དེ་གཤེ་ཞིང་སྤྱོ་བ་དང ། འཚོག་པ་དང ། གཞུ་བ་དང ། བཙོན་རར་གཞུག་པ་དང ། འཚོ་བའི་དབང་པོ་དང་ཕྲལ་བའི་བར་དུ་བྱེད་དོ། །དེ་ནི་འདས་པ་དང ། མ་འོངས་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱེད་པ་སྟེ། གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ ། །དགེ་བའི་རྩ་བ་ཡོངས་སུ་བསྲེགས་ཏེ་རྒྱུན་བཅད་པས་མཁས་པ་ཐམས་ཅད་ཀྱིས་ཡོངས་སུ་སྤང་བར་བྱའོ། །དེ་དག་གིས་དེ་ལྟར་ཁ་ན་མ་ཐོ་བ་སྡིག་པ་ཆེན་པོ་བྱས་ཀྱང་གཡོ་དང་སྒྱུས་འཚོ་སྟེ། ང་རྒྱལ་གྱི་དབང་དུ་གྱུར་ནས་འཇིག་རྟེན་དག་བསླུ་བའི་ཕྱིར་དེ་དག་ཀྱང་སོ་སོ་ནས་བདག་ཅག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པ་ཡིན་ཏེ། བདག་ཅག་ནི་ཐེག་པ་ཆེན་པོས་མངོན་པར་འཚང་རྒྱའོ་ཞེས་ཟེར་རོ། །འདི་ལྟ་སྟེ་དཔེར་ན་མི་ཞིག་བདག་གི་མིག་ཕྱུང་ནས་ལོང་བར་གྱུར་པ་ཕ་རོལ་གཞན་གྱི་ལམ་མཚོན་པའི་ཕྱིར་རི་ཆེན་པོ་ལ་འཛེག་པ་ནི་གནས་མེད་དོ། །དེ་བཞིན་དུ་ཕྱི་མ་མ་འོངས་པའི་དུས་ན་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་གདོལ་པ་ཅན་དག་ཀྱང་དེ་དང་འདྲ་སྟེ། ངའི་བསྟན་པ་ལ་སྐྱབས་སུ་སོང་ཞིང་རབ་ཏུ་བྱུང་བ་ཆོས་ཀྱི་སྣོད་དུ་གྱུར་པ་འམ། ཆོས་ཀྱི་སྣོད་མ་ཡིན་པ་འང་རུང་བའི་སློབ་མ་རྣམས་ལ་འཚེ་ཞིང་གནོད་པར་བྱེད་དེ། གཤེ་ཞིང་སྤྱོ་བ་དང ། བརྡེག་པ་དང ། བཙོན་རར་གཞུག་པ་དང ། འཚོ་བའི་དབང་པོ་དང་ཕྲལ་བའི་བར་དུ་བྱེད་དེ། དེ་ནི 60.167a འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱས་པས་དགེ་བའི་རྩ་བ་ཐམས་ཅད་བསྲེགས་ཤིང་རྒྱུན་བཅད་པས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ ། །དེ་བས་ན་མཁས་པ་རྣམས་ཀྱིས་སྤང་བར་བྱའོ། །དེས་དེ་ལྟར་ཁ་ན་མ་ཐོ་བ་ཆེན་པོ་བྱས་ཀྱང་གཡོ་དང་སྒྱུས་འཚོ་ཞིང་ང་རྒྱལ་གྱི་དབང་དུ་གྱུར་པ་འཇིག་རྟེན་བསླུ་བའི་ཕྱིར་བདག་ཅག་ནི་བླ་ན་མེད་པའི་བྱང་ཆུབ་ཚོལ་བ་ཡིན་ཏེ། བདག་ཅག་ཀྱང་ཐེག་པ་ཆེན་པོས་མངོན་པར་འཚང་རྒྱའོ་ཞེས་ཟེར་རོ། །དེ་དག་གིས་དེ་ལྟར་རབ་ཏུ་བྱུང་བ་ལ་འཚེ་ཞིང་གནོད་པ་བྱས་པས་མ་རབས་ཐ་མའི་ལུས་ཀྱང་མི་ཐོབ་ན་ཐེག་པ་རྣམ་གཉིས་ཀྱི་བྱང་ཆུབ་པ་འམ། བླ་ན་མེད་པའི་ཐེག་པ་ཐོབ་པ་ལྟ་ཅི་སྨོས་ཏེ་སྐལ་བ་ཆད་པ་ཡིན་ནོ། །རིགས་ཀྱི་བུ་གཞན་ཡང་སྔོན་འདས་པའི་དུས་ན་ཡུལ་པན་ཙ་ལ་ཞེས་བྱ་བ་ཡོད་དེ། ཡུལ་དེའི་སྲིད་འཛིན་ཅིང་དབང་བྱེད་དོ། །དེ་ན་དུར་ས་ཆེན་པོ་ཁ་ལམ་པ་ཞེས་བྱ་བ་ཤིན་དུ་འཇིགས་པའི་གནས་ཤིག་ཡོད་དེ། གནོད་སྦྱིན་དང ། སྲིན་པོ་ཡང་དེ་ན་མང་དུ་གནས་སོ། །དེ་དག་ཏུ་ཕྱིན་ན་འཇིགས་ཤིང་སྤུ་ལྡང་ངོ ། །དེ་ཡུལ་དེ་ན་ཉེས་པ་བྱས་པ་གསད་པ་ཞིག་ཡོད་ན་རྒྱལ་པོའི་ཁྲིམས་ཀྱིས་གསད་པ་དེ་བཅིངས་བ་ལྔས་བཅིངས་ནས་ཁ་ལམ་པ་ཞེས་བྱ་བའི་དུར་ས་ཆེན་པོ་དེར་སྐྱེལ་ཏེ། སྲིན་པོ་དང ། འབྱུང་པོ་རྣམས་ཟར་འཇུག་གོ། །གསད་པ་གཅིག་གིས་སྲོག་གི་ཕྱིར་སྐྲ་དང་ཁ་སྤུ་བྲེགས་ཏེ་ཆོས་གོས་ཀྱི་ཚལ་བུ་ཞིག་རྙེད་པ་མགུལ་དུ་བཏགས་སོ། །བཙོན་རྫིས་ཁྲིད་དེ་རྒྱལ་པོའི་ཁྲིམས་བཞིན་དུ་བཅིང་བ་ལྔས་བཅིངས་ནས་དུར་ས་ཆེན་པོ་དེར་བསྐྱལ་ཏོ། །སྐྱེལ་མ་ཕྱིར་ལོག་ནས་དེའི་ནུབ་མོ་སྲིན་མོ་ཆེན་མོ་མཚོན་ཆའི་མིག་ཅེས་བྱ་བ་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །མི 60.167b དེས་རྒྱང་ནས་མཐོང་ནས་རབ་ཏུ་འཇིགས་ཤིང་སྐྲག་གོ། །དེའི་ཚེ་སྲིན་མོ་དེས་མི་དེ་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པ་མཐོང་ནས་གཡས་ནས་བསྐོར་ཏེ་སྟི་སྟང་དང་བཅས་པས་ཕྱག་བྱས་ཏེ་ཐལ་མོ་སྦྱར་ནས་ཚིགས་སུ་བཅད་པས་འདི་སྐད་སྨྲས་སོ། །སྐྱེས་བུ་ཁྱོད་ནི་མ་བསྙེངས་བདེ་བར་བཞུགས། །ཁྱོད་ལ་བདག་ཅག་གནོད་པ་མི་བགྱིད་དོ། །སྐྲ་བྲེགས་ཆོས་གོས་གྱོན་པ་ཁྱོད་མཐོང་ནས། །བདག་ཅག་སངས་རྒྱས་རྗེས་སུ་དྲན་པར་གྱུར། །དེའི་ཚེ་སྲིན་མོའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །བདག་ཅག་ཤིན་དུ་བཀྲེས་སྐོམ་པས། །ལུས་དང་སེམས་ནི་རྣམ་པར་གཟིར། །ལུས་དང་སེམས་ནི་བདེ་བའི་ཕྱིར། །ཡུམ་གྱིས་མི་དེ་འཚལ་དུ་གནོང ། །དེ་ནས་སྲིན་མོས་བུ་རྣམས་ལ་འདི་སྐད་ཅེས་སྨྲས་སོ། །སངས་རྒྱས་གང་གཱི་ཀླུང་གི་བྱེ་སྙེད་ཀྱི། །རྣམ་པར་གྲོལ་བའི་རྒྱལ་མཚན་གོས་གྱོན་པ། །འདི་ལ་མི་དགེ་སྡིག་པའི་སེམས་བསྐྱེད་ན། །ངེས་པར་མཚམས་མེད་སེམས་ཅན་དམྱལ་བར་ལྟུང ། །དེ་ནས་སྲིན་མོའི་བུ་དང་འཁོར་དུ་བཅས་པས་བསྐོར་ཏེ། སྟི་སྟང་དང་བཅས་པས་ཕྱག་བྱས་ཏེ་ཐལ་མོ་སྦྱར་ནས་ཚིགས་སུ་བཅད་པས་འདི་སྐད་ཅེས་སྨྲས་སོ། །ཚོན་ཅན་གྱོན་པ་ཁྱོད་ལ་སོ་སོར་འཆགས། །བདག་ཅག་ཇི་སྟེ་ཕ་དང་མ་དག་ལ། །ལུས་དང་ངག་ཡིད་མི་དགེ་བྱས་སླ་ཡི། །ཁྱོད་ལ་ནམ་དུ་འང་གནོད་པར་མི་བགྱིད་དོ། །དེ་ནས་ཡང་སྲིན་མོ་ཆེན་མོ་བོང་བུ་སོ་ཞེས་བྱ་བ་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །སྲིན་མོ་དེས་ཀྱང་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པའི་མི་དེ་མཐོང་ནས་བསྐོར་ཏེ། སྟི་སྟང་དང་བཅས་པས་ཕྱག་བྱས་ནས་ཐལ་མོ་སྦྱར་ཏེ་ཚིགས་སུ་བཅད་པས་འདི་སྐད་ཅེས་སྨྲས་སོ། །སྐྱེས་བུ་བདག་གིས་མ་བསྙེངས་བདེ་བར 60.168a བཞུགས། །ཁྱོད་ཀྱིས་མགུལ་དུ་བཏགས་པའི་ཚལ་བུ་འདི། །དྲང་སྲོང་ཆེན་པོའི་རྒྱལ་མཚན་ན་བཟའ་ལགས། །དེ་ལ་བདག་ཅག་མཆོད་ཅིང་ཕྱག་འཚལ་ལོ། །དེ་ནས་སྲིན་མོ་དེའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །མི་ཡི་ཤ་དང་ཁྲག་ལས་ཞིམ་པ་མེད། །ལུས་དང་སེམས་སྟོབས་སྐྱེ་ཞིང་འཕེལ་བར་འགྱུར། །ཤིན་དུ་དཔའ་ལ་རྟུལ་ཕོད་འཇིགས་མེད་པ། །ཡུམ་གྱིས་དེ་ལ་བདག་ཅག་འཚལ་དུ་གནོང ། །དེ་ནས་སྲིན་མོས་བུ་རྣམས་ལ་འདི་སྐད་ཅེས་སྨྲས་སོ། །ལྷ་མིའི་ལོངས་སྤྱོད་ལྡན་པ་ཐམས་ཅད་ཀྱང ། །རབ་ཏུ་བྱུང་བ་དག་ལས་ཐོབ་པའི་ཕྱིར། །ཆོས་གོས་གྱོན་པ་འདི་ལ་མཆོད་པས་ན། །བདེ་བ་ཚད་མེད་པ་ཡང་འཐོབ་པར་འགྱུར། །དེ་ནས་སྲིན་མོའི་བུ་རྣམས་འཁོར་དང་བཅས་པས་བསྐོར་ནས་སྟི་སྟང་དང་བཅས་པས་ཕྱག་བྱས་ཏེ། ཐལ་མོ་སྦྱར་ནས་ཚིགས་སུ་བཅད་དེ་སྨྲས་པ། སྐྲ་བྲེགས་ཆོས་གོས་གྱོན་པའི་སྐྱེས་བུ་ལ། །བདག་ཅག་ཤིན་དུ་གུས་པར་ཕྱག་འཚལ་བས། །རྟག་ཏུ་མ་འོངས་པ་ཡི་དུས་ཀུན་དུ། །སངས་རྒྱས་མཐོང་ཞིང་དད་པ་སྐྱེ་བར་ཤོག་།དེའི་ཚེ་ཡང་སྲིན་མོ་ཆེན་མོ་ཁྲོ་གཉེར་འཕྲལ་སྐྲ་ཅན་ཞེས་བྱ་བ་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །སྲིན་མོ་དེས་ཀྱང་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པའི་མི་དེ་མཐོང་ནས་གཡས་ནས་བསྐོར་ཏེ། སྟི་སྟང་དང་བཅས་པས་ཕྱག་བྱས་ནས་ཐལ་མོ་སྦྱར་ཏེ་ཚིགས་སུ་བཅད་པས་འདི་སྐད་ཅེས་སྨྲས་སོ། །དྲང་སྲོང་ཆེན་པོའི་རྒྱལ་མཚན་ན་བཟའ་འདི། །མཁས་པ་ཐམས་ཅད་ཤིན་དུ་བསྟོད་ཅིང་སྔགས། །གང་ཞིག་འདི་ལ་མཆོད་པ་བྱེད་པ་ནི། །སྲིད་པའི་བཅིངས་པ་ཀུན་ལས་ངེས་པར་འགྲོལ། །དེའི་ཚེ་སྲིན་མོ་དེའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །མི་འདིའི་ལུས་ཀྱི་ཤ་དང་ཁྲག་ཀུན་ནི། ། 60.168b རྒྱལ་པོ་ཆེན་པོས་བདག་ཅག་རྣམས་ལ་བསྔོས། །བདག་ཅག་འདི་ལ་ཟ་ཞིང་ཐུང་དུ་གནོང ། །མཐུ་དང་ལྡན་ནས་མ་ཡི་གཡོག་ཀྱང་བགྱི། །དེ་ནས་སྲིན་མོས་བུ་རྣམས་ལ་འདི་སྐད་ཅེས་སྨྲས་སོ། །ཆོས་གོས་བཏགས་པ་གྱོན་པ་འདི་དག་ནི། །ཁྱོད་ཀྱིས་བཟའ་བའི་རིགས་པ་མ་ཡིན་གྱིས། །འདི་ལ་མི་དགེ་སྡིག་པའི་སེམས་བསྐྱེད་ན། །སྡུག་བསྔལ་ཆེན་པོའི་སྣོད་དུ་གྱུར་ཏ་རེ། །དེ་ནས་སྲིན་མོའི་བུ་རྣམས་འཁོར་དང་བཅས་པས་བསྐོར་ནས་སྟི་སྟང་དང་བཅས་པས་ཕྱག་འཚལ་ཏེ་ཐལ་མོ་སྦྱར་ནས་ཚིགས་སུ་བཅད་དེ་སྨྲས་པ། ཁྱོད་ནི་དྲང་སྲོང་ཆེན་པོའི་གོས་གྱོན་ཏེ། །ཤིན་དུ་བསོད་ནམས་ཞིང་དུ་གྱུར་པ་ཡིན། །དེ་བས་བདག་ཅག་ཁྱོད་ལ་མཆོད་པས་ན། །སྲིད་པའི་བཅིངས་པ་ལས་ནི་ཐར་བར་ཤོག་།དེའི་ཚེ་ན་ཡང་སྲིན་མོ་ཆེན་མོ་མཚོན་ཆའི་གདོང་ཞེས་བྱ་བ་ཡང་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །སྲིན་མོ་དེས་ཀྱང་མི་དེ་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པ་མཐོང་ནས་བསྐོར་ཏེ་སྟི་སྟང་དང་བཅས་པས་ཕྱག་འཚལ་ནས་ཐལ་མོ་སྦྱར་ཏེ་ཚིགས་སུ་བཅད་པས་འདི་སྐད་ཅེས་སྨྲས་སོ། །ཁྱོད་ནི་བཏགས་པའི་ཆོས་གོས་གྱོན་པས་ན། །མྱ་ངན་འདའ་བའི་བདེ་བ་ཐོབ་ཏུ་ངེས། །དེ་བས་ཁྱོད་ལ་བདག་ཅག་གནོད་བྱེད་ན། །སངས་རྒྱས་ཀུན་གྱིས་རྣམ་པར་སྨོད་ཀྱིས་དོགས། །དེ་ནས་སྲིན་མོ་དེའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །བདག་ཅག་རྟག་ཏུ་མི་ཡི་མདངས་འཕྲོག་ཅིང ། །དེ་བཞིན་ཤ་དང་ཁྲག་ཀྱང་ཟ་འཐུང་བས། །གཟུགས་དང་མཐུ་ནི་ཡོངས་སུ་འཕེལ་བའི་ཕྱིར། །བདག་ཅག་འདི་ལ་ཅི་བདེར་འཚལ་དུ་གནོང ། །དེ་ནས་སྲིན་མོ་དེས་བུ་རྣམས་ལ་འདི་སྐད་ཅེས་སྨྲསོ། །ཇི་སྟེ་སྐྲ་དང་ཁ་སྤུ་བྲེགས་པ་ཡི། །ཆོས་གོས་གྱོན་པ་འདི་ལ་གནོད་བྱས་ན། །ངེས་པར་མཚམས་མེད་སེམས་ཅན་དམྱལ་བར་ལྟུང ། །ཡུན་རིང་སྡུག་བསྔལ་ཆེན་པོའི་སྣོད་དུ་འགྱུར། །དེ་ནས་སྲིན་མོ་བུ་རྣམས་དང་འཁོར་དུ 60.169a བཅས་པས་བསྐོར་ནས་སྟི་སྟང་དང་བཅས་པས་ཕྱག་འཚལ་ཏེ། ཐལ་མོ་སྦྱར་ནས་ཚིགས་སུ་བཅད་པ་འདི་དག་སྨྲས་སོ། །བདག་ཅག་སེམས་ཅན་དམྱལ་བས་རབ་འཇིགས་ཏེ། །དེ་བས་ཁྱོད་ཀྱི་སྲོག་ལ་གནོད་མི་བགྱིད། །བཅིངས་པ་འདི་ཡང་བཀྲོལ་ཏེ་ཁྱོད་གཏང་གིས། །དམྱལ་བའི་སྡུག་བསྔལ་ཀུན་ལས་ཐར་བར་ཤོག་།དེའི་ཚེ་སྲིན་མོ་བུ་སྨད་འཁོར་དང་བཅས་པ་སྙིང་རྗེའི་སེམས་བསྐྱེད་ནས་མི་དེའི་བཅིངས་པ་བཀྲོལ་ཏེ་བཤགས་པ་དང ། སྤྲོ་བ་བསྐྱེད་པ་བྱས་ནས་ཕྱིར་བཏང་ངོ ། །མི་དེ་ཕྱིས་ཉིན་སྔ་རབ་ཏུ་རྒྱལ་པོའི་དྲུང་དུ་འོངས་ནས་དངོས་པོ་དེ་དག་རྒྱུས་ཀྱིས་ཞིབ་ཏུ་གསོལ་ཏོ། །དེའི་ཚེ་རྒྱལ་པོ་དགྲ་ལས་རྒྱལ་བ་འཁོར་དང་བཅས་པས་དེ་སྐད་ཐོས་ནས་དངངས་ཏེ་ངོ་མཚར་རྨད་དུ་གྱུར་ནས་ཁྲིམས་སུ་བཅས་ཏེ་ཡུལ་གྱི་མི་རྣམས་ལ་བཀས་བཏགས་པ། དེང་ཕྱིན་ཆད་ངའི་ཡུལ་ན་གནས་པ་སངས་རྒྱས་ཀྱི་སློབ་མ་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་སམ། ཆུང་ངུ་ན་ཚུལ་ཁྲིམས་མེད་པར་སྐྲ་དང་ཁ་སྤུ་བྲེགས་ཏེ་ངུར་སྨྲིག་གྱོན་པ་ལ་སུ་ཞིག་ཀྱལ་ཀ་འམ་གནོད་པ་བྱས་ན་ཐམས་ཅད་གསད་དོ་ཞེས་ཁྲིམས་སུ་བྱས་སོ། །དེའི་རྒྱུ་དེའི་རྐྱེན་གྱིས་མི་མང་པོ་ཡང་བསོད་ནམས་ལ་དགའ་བས་ཐམས་ཅད་བགས་ཀྱིས་བསྟན་པ་ལ་ཕྱོགས་ནས་འཛམ་བུའི་གླིང་ན་རྒྱལ་པོ་དེ་དབང་བའི་མི་ཐམས་ཅད་བསམ་པ་དེས་པས་དཀོན་མཆོག་གསུམ་ལ་སྐྱབས་སུ་གསོལ་ཏོ། །རིགས་ཀྱི་བུ་དེ་ལྟར་འདས་པའི་དུས་ན་སྲིན་མོ་ཡི་དགས་ཀྱི་རྒྱུད་དུ་སྐྱེས་པ། མདངས་འཕྲོག་པ་ཤ་དང་ཁྲག་ཟ་བ། སྡིག་པ་ལ་བརྐམ་པ། སྙིང་རྗེ་མེད་པ་ཡང་དེ་ལྟ་བུའི་ཚུལ་ཁྲིམས་མེད་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པ་དེ་ལ་བསྐོར་བ་དང ། སྟི་སྟང་དང ། རིམ་གྲོ་དང ། ཕྱག་བྱ་བ་དང ། མཆོད་པ་དང ། ཚིགས་སུ་བཅད་པས་བསྟོད་ད། གནོད་པ་བྱེད་པའི་སེམས་མེད་ན་ཕྱི་མ་མ་འོངས་པའི་དུས་སུ་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ 60.169b གདོལ་པ་ཅན་ལ་སོགས་པ་གདུག་པའི་སེམས་འཆང་ཞིང་སྙིང་རྗེ་མེད་པ། གནོད་སྦྱིན་དང ། སྲིན་པོ་བས་ཐུ་བར་སྡིག་པ་བྱེད་དོ། །གླེན་ཞིང་གཏི་མུག་ཅན་དགེ་བའི་རྩ་བ་ཡོངས་སུ་གཅོད་པ་དེ་ངའི་བསྟན་པ་ལ་རབ་ཏུ་བྱུང་བའི་ཆོས་ཀྱི་སྣོད་དུ་གྱུར་པ་དང ། ཆོས་ཀྱི་སྣོད་དུ་མ་གྱུར་པ་ཡང་རུང ། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པའི་སློབ་མ་ལ་དད་པ་དང་བཀུར་སྟི་མི་བྱེད་དེ། དེ་ལ་གནོད་པ་དང ། གཤེ་ཞིང་རྡེག་པ་དང ། ནན་ལ་འདར་ཞིང་བཙོན་རར་གཞུག་པ་དང ། འཚོ་བའི་དབང་པོ་དང་ཕྲལ་བའི་བར་དུ་བྱེད་པ་དེ་ནི་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བསྟན་པའི་ཁ་ན་མ་ཐོ་བ་ཆེན་པོ་དང་འགལ་བར་བྱེད་པ་སྟེ། དགེ་བའི་རྩ་བ་ཡོངས་སུ་བསྲེགས་ནས་རྒྱུན་བཅད་པས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་བས་མཁས་པ་རྣམས་ཀྱིས་ཡོངས་སུ་སྤང་བར་བྱའོ། །ཡང་རིགས་ཀྱི་བུ་སྔོན་རྒྱལ་པོ་བསོད་ནམས་ཆེན་པོ་ཞེས་བྱ་བ་ཞིག་ཡོད་དེ། རྒྱལ་པོ་དེ་སྙིང་རྗེ་ཆེ་བས་ཉེས་པ་བྱས་པས་གསད་པ་ལ་ཐུག་པ་དག་ཀྱང་གསོད་དུ་མི་དགའོ། །དེའི་ཚེ་བློན་པོ་བློ་དང་ལྡན་པ་གཅིག་གིས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཐུགས་ངན་མ་མཛད་ཅིག་།རྒྱལ་པོས་ཀྱང་སྲོག་གཅོད་པའི་སྡིག་པ་མི་འཐོབ་ལ། གཤེད་མས་ཀྱང་འགུམ་མི་འཚལ་བར་མི་དེ་འགུམ་པའི་ཐབས་མཆིས་སོ་ཞེས་གསོལ་ནས་བློན་པོ་ཆེན་པོ་དེས་གསད་པ་ལ་ཐུག་པའི་མི་དེ་བལ་གླང་རྨིས་པ་མ་རུངས་པའི་མདུན་དུ་བཞག་གོ། །དེ་ནས་བལ་གླང་རྨིས་པ་དེས་མི་དེ་སྣས་བཟུང་སྟེ་ཡར་བཏེག་ནས་ས་ལ་བརྡབས་པ་ལས། མི་དེ་གོས་དམར་པོ་གྱོན་པ་མཐོང་ནས་ཆོས་གོས་ཡིན་ནོ་སྙམ་སྟེ། བསམ་པ་དག་པའི་དད་པ་སྐྱེས་ནས་དལ་གྱིས་ས་ལ་བཞག་ཅིང་དེ་ལ་འགྱོད་ནས་ས་ལ་བཏུད་ཏེ། མི་དེའི་རྐང་པ་ལ་སྣས་འཕྱི་ཞིང་སྟི་སྟང་དང་བཅས་པས་མིག་མི་འཛུམས་པར་མི་དེ་ལ་ལྟའོ། ། 60.170a བློན་པོ་ཆེན་པོ་དེས་དེ་ལྟ་བུར་གྱུར་པ་མཐོང་ནས་བརྒྱུགས་ཏེ། རྒྱལ་པོ་དེ་ལ་དེ་བཞིན་དུ་གསོལ་ཏོ། །རྒྱལ་པོས་དེ་སྐད་ཅེས་ཐོས་ནས་དངངས་ཏེ་ངོ་མཚར་རྨད་དུ་གྱུར་ནས། མི་ཡོངས་ལ་དེང་ཕྱིན་ཆད་དཀོན་མཆོག་གསུམ་ལ་སྟི་སྟང་གྱིས་ཤིག་པར་བཀས་བཏགས་སོ། །དེའི་རྒྱུ་དེའི་རྐྱེན་གྱིས་སྲོག་གཅོད་པ་ཡང་སྤངས་ཏེ་འཛམ་བུའི་གླིང་ལ་དབང་བྱེད་པར་གྱུར་ཏོ། །ལྟོས་རིགས་ཀྱི་བུ་དེ་ལྟར་འདས་པའི་དུས་ན་བལ་གླང་རྨིས་པ་བྱོལ་སོང་གི་སྐྱེ་གནས་སུ་གྱུར་པ་ཡང་ཆོས་གོས་ལ་གུས་པས་སྡིག་མི་བྱེད་ན། མ་འོངས་པའི་དུས་ན་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་སོགས་པ་སེམས་གདུག་པ་ཅན་སྙིང་རྗེའི་སེམས་མེད་པ། བལ་གླང་རྨིས་པ་བས་ཐུ་བའི་སྡིག་པའི་ལས་བྱེད་དོ། །བུས་པ་གླེན་པ་ཅན་དེ་དག་ངའི་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དུ་གྱུར་པ་འམ། ཆོས་ཀྱི་སྣོད་མ་ཡིན་པ་འང་རུང ། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པ་ལ་དད་པ་དང་གུས་པ་མི་བྱེད་དེ། དེ་ལ་གནོད་པ་དང ། གཤེ་ཞིང་སྤྱོ་བ་དང ། གཞུ་ཞིང་འཚོག་པ་དང ། བཙོན་རར་གཞུག་པ་དང ། འཚོ་བའི་དབང་པོ་དང་ཕྲལ་བའི་བར་དུ་བྱེད་པས་འདས་པ་དང ། མ་འོངས་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བསྟན་པའི་ཁ་ན་མ་ཐོ་བ་ཆེན་པོ་དང་འགལ་བར་བྱེད་པས་དགེ་བའི་རྩ་བ་བསྲེགས་ནས་རྒྱུན་གཅད་པས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་བས་མཁས་པ་རྣམས་ཀྱིས་སྤང་བར་བྱའོ། །གལ་ཏེ་རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་སྡིག་པའི་འཁོར་ལོ་གསུམ་པོ་འདི་དང་ལྡན་པས། དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང ། ཀླུ་དང ། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་ཐམས 60.170b ཅད་རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་གདོལ་པ་དེ་དག་ལ་ཁྲོ་ཞིང་ཞེ་སྡང་བའི་སེམས་སྐྱེ་བ་ནས་གཞུང་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་དེ་ཐམས་ཅད་རིང་པོར་མི་ཐོགས་པར་ལུས་ཀྱི་ཡན་ལག་དུམ་བུར་ཆད་ཅིང་ཞག་མང་དུ་ལྕེ་ལྡིབས་པ་དང ། ཤིན་དུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བར་འགྱུར་བ་དང ། འཆི་འཕོས་ནས་ཀྱང་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་ཕྱི་མ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་སོགས་པ་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཆུང་ཞིང་ཞན་པ་ནས་དེ་བཞིན་དུ་རྒྱས་པར་འཇིག་རྟེན་ཕྱི་མའི་སྡུག་བསྔལ་མ་མཐོང་བ་དག་ཕྱོགས་བཞིའི་དགེ་འདུན་གྱི་ནོར་དང ། གཙུག་ལག་ཁང་གི་ནོར་དང ། གཙུག་ལག་ཏུ་བསྔོས་པའི་ནོར་དང ། སྐྱེད་ཤིང་གི་ར་བ་དང ། སྐྱེད་ཤིང་གི་ར་བར་བསྔོས་པའི་ནོར་དང ། ཞིང་འབྲོག་དང ། ཞིང་འབྲོག་ཏུ་བསྔོས་པའི་ནོར་དང ། གཙུག་ལག་ཁང་སོ་སོའི་རུང་བར་བྱེད་པར་གཏོགས་པའི་སྐྱེས་པ་དང ། བུད་མེད་ཕྲོགས་པ་དང ། ནོར་ཕྱུགས་ཕྲོགས་པ་དང ། གོས་དང ། བསོད་སྙོམས་ཕྲོགས་པ་དང ། གདིང་བ་དང ། ཁྲི་སྟན་ཕྲོགས་པ་དང ། ནད་ཀྱི་རྐྱེན་སྨན་ཕྲོགས་པ་དང ། དེ་མ་ཡིན་པའི་འཚོ་བའི་ཡོ་བྱད་རྣམ་པ་སྣ་ཚོགས་ལ་འཕྲོག་པ་སྟེ། དེ་ལྟར་ཕྱོགས་བཞིའི་དགེ་འདུན་ལ་ཕུལ་བའི་ནོར་དེ་ནི་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། བརྩོན་འགྲུས་རྩོམ་པ། སློབ་པ་དང་མི་སློབ་པ་ལ་ནན་ཏན་དུ་བྱེད་པ 60.171a ནས་མཐའི་གནས་བྱས་པའི་འབྲས་བུ་ཐོབ་པའི་བར་གྱི་དགེ་སློང་ཡོངས་སུ་དག་པ་སྤྱོད་དུ་གནང་བར་ཟད་ན། རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་གིས་མཐུ་དང་དཔུང་སྙེམས་ཏེ་ནན་གྱིས་ཕྲོགས་ནས། དགེ་སློང་ཚུལ་ཁྲིམས་དང་ལྡན་པ་ཡོངས་སུ་དག་པ་དག་ནི་སྤྱོད་དུ་མི་སྟེར་གྱི། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ཁྱིམ་ན་གནས་ཤིང་ཁྱིམ་པའི་ལས་བྱེད་པ་དག་ལ་བྱིན་ནས་ཁ་ཅིག་ནི་ཐུན་མོང་དུ་སྤྱོད། ཁ་ཅིག་ནི་ཁུད་པར་ཡང་སྤྱོད་དོ། །ཚུལ་ཁྲིམས་ཉམས་པའི་དགེ་སློང་དག་གིས་དེ་དག་ཐོས་ནས་ཀྱང་ཁ་ཅིག་ནི་ཐུན་མོང་དུ་སྤྱོད། ཁ་ཅིག་ནི་ཁུད་པར་ཡང་སྤྱོད་དོ། །ཁ་ཅིག་ནི་ཁྱིམ་པ་ལ་བྱིན་ནས་དེ་དང་ཡང་ཐུན་མོང་དུ་སྤྱོད་དོ། །དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང ། ཀླུ་དང ། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ལ་ཁྲོས་ཏེ་ཞེ་སྡང་གི་སེམས་སྐྱེ་བ་ནས་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་དེ་དག་རིང་པོ་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་དང ། ཞག་མང་དུ་ལྕེ་ལྡིབས་པ་དང ། ཤིན་དུ་མི་ཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་ཞིང་འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་སོགས་པ་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཆུང་ཞིང་ཞན་པ་ནས་དེ་བཞིན་དུ་རྒྱས་པར 60.171b འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་མ་མཐོང་བ་དག་གིས་ངའི་བསྟན་པ་ལ་རབ་ཏུ་བྱུང་བ། ཤེས་རབ་རྣོ་བ་མང་དུ་ཐོས་པ། ཚིག་དང་དོན་རྫོགས་པར་སྨྲ་བ་དང་ལྡན་པ། ཉན་ཐོས་ཀྱི་ཐེག་པའི་ཆོས་སྟོན་ནུས་པ་འམ། རང་སངས་རྒྱས་ཀྱི་ཐེག་པའི་ཆོས་ཆུད་ཅིང་སྟོན་ནུས་པ་འམ། བླ་ན་མེད་པའི་ཐེག་པའི་ཆོས་སྟོན་ནུས་ཤིང་རྒྱས་པར་སེམས་ཅན་ལ་ཕན་པ་དང ། བདེ་བའི་དོན་དུ་སྟོན་ནུས་པའི་ཆོས་སྨྲ་བ་ལ་སྤྱོ་ཞིང་གཤེ་བ་དང ། སྨད་པ་དང ། འཕྱ་ཞིང་སྐུར་པ་དང ། དབང་ཟ་བ་དང ། གནོད་པ་བྱེད་ཅིང་ཆོས་སྟོན་པའི་བར་ཆད་བྱེད་དོ། །དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང ། ཀླུ་དང ། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་དགེ་སྦྱོང་དང ། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ལ་ཁྲོས་ཏེ། ཞེ་སྡང་གི་སེམས་སྐྱེ་བ་ནས་གཞུང་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་ནས་བློན་པོ་དང ། ཁྱིམ་བདག་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་དེ་དག་ཐམས་ཅད་རིང་པོ་མི་ཐོགས་པར་བདག་གི་ལུས་དུམ་བུར་ཆད་པ་དང ། ཞག་མང་དུ་ལྕེ་ལྡིབས་པ་དང ། ཤིན་དུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང ། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་ཕྱི་མ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཞན་ཅིང་ཆུང་བ་ནས་དེ་བཞིན་དུ་རྒྱས་པར་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ་དག་ཕྱོགས་བཞིའི་དགེ་འདུན་ལ་ཕུལ་བའི་ནོར་དང ། 60.172a གཙུག་ལག་ཁང་གི་ཞིང་འབྲོག་དང ། ནོར་ཕྱུགས་དང ། རིན་པོ་ཆེ་དང ། མེ་ཏོག་གི་ཤིང་དང ། འབྲས་བུའི་ཤིང་དང ། ཁ་དོག་གི་ཤིང་དང ། བསིལ་གྲིབ་དང ། བསུང་དང ། སྨན་གྱི་ཤིང་ལ་སོགས་པ་དང ། དེ་མ་ཡིན་པ་འཚོ་བའི་ཡོ་བྱད་རྣམ་པ་སྣ་ཚོགས་ལ་འཕྲོག་ཅིང་ངའི་སློབ་མ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། བརྩོན་འགྲུས་རྩོམ་པ། སློབ་པ་དང་མི་སློབ་པ་ལ་ནན་ཏན་བྱེད་པ་ནས་མཐའི་གནས་བྱས་པའི་འབྲས་བུའི་བར་དུ་ཐོབ་ཏུ་ཉེ་བའི་དགེ་སློང་ཡོངས་སུ་དག་པ་འབའ་ཞིག་གིས་སྤྱོད་དུ་དབང་བར་ཟད་ན། རྒྱལ་རིགས་གདོལ་པ་ཅན་དང ། དགེ་སྦྱོང་དང་བྲམ་ཟེ་གདོལ་པ་ཅན་ལ་སོགས་པ་མཐུ་དང་དཔུང་སྙེམས་ཏེ་ནན་གྱིས་ཕྲོགས་སམ། གཞན་འཕྲོག་ཏུ་བཅུག་གམ། བདག་སྤྱོད་དམ། གཞན་སྤྱོད་དུ་བཅུག་ཀྱང་རུང ། དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང ། ཀླུ་དང ། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་སོགས་པ་ལ་ཁྲོས་ཏེ། ཞེ་སྡང་གི་སེམས་སྐྱེ་བ་ནས་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་སོགས་པ་དེ་དག་ཐམས་ཅད་རིང་པོ་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་དང ། ཞག་མང་དུ་ལྕེ་ལྡིབས་པ་དང ། ཤིན་དུ་མི་ཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང ། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་སོགས་པ་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཆུང་ཞིང་ཞན 60.172b པ་བསམ་པ་མ་དག་པ་གཡོ་དང་སྒྱུས་འཚོ་བ། གླེན་པ་གཏི་མུག་ཅན་ཅུང་ཟད་ཀྱི་ཤེས་པ་ཙམ་སྙེམས་པ། ཚིག་ལ་བདེན་པ་མེད་པ། དགེ་བའི་བཤེས་གཉེན་སྤོང་བ། སྡིག་པའི་གྲོགས་པོ་ལ་སྟེན་ཅིང་མི་དགེ་བ་སྤྱོད་པ། འཕགས་པའི་ཆོས་ལ་ཐེ་ཙོམ་ཟ་བ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ་དག་སྡིག་པའི་སྡོམ་པ་སྲུང་བར་དགའ་བ། སྲོག་གཅོད་པ་ནས་ངན་པར་ལྟ་བའི་བར་དུ་མོས་པ། ང་རྒྱལ་གྱིས་མངོན་པར་ཟིན་པ། འཇིག་རྟེན་པ་དག་སླུ་བ། བདག་ནི་ཚུལ་ཁྲིམས་ཀྱི་སྡོམ་པ་ལ་གནས་པའོ་ཞེས་ཁས་འཆེ་བའི་རྒྱལ་རིགས་གདོལ་པ་ཅན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་སོགས་པ་དག་།ཐབས་རྣམ་པ་སྣ་ཚོགས་ཀྱིས་ངའི་བསྟན་པ་འཇིག་པར་བྱེད་ཅིང་ངའི་བསྟན་པ་ལ་རབ་ཏུ་བྱུང་བ་དག་ལ་ཡང་དང་ཡང་དུ་ཁྲོ་ཞིང་གཤེ་བ་དང ། སྤྱོ་ཞིང་སྨོད་པ་དང ། ནན་ལ་བོར་བ་དང ། བཙོན་རར་གཞུག་པ་དང ། ལུས་ཀྱི་ཡན་ལག་གཏུབ་པ་དང ། འཚོ་བའི་དབང་པོ་དང་ཕྲལ་བའི་བར་དུ་བྱེད་དེ། ངས་བསྟན་པའི་ཆོས་ལ་ཡིད་མི་ཆེས་པ། མཆོད་རྟེན་འཇིག་པ། གཙུག་ལག་ཁང་འཇིག་པ། དགེ་སློང་དག་ཁྱིམ་པར་འབེབས་པ། སྐྲ་དང་ཁ་སྤུ་འདྲེག་ཅིང་གོས་ངུར་སྨྲིག་གྱོན་པའི་བར་ཆད་བྱེད་པ་ལས་རྣམ་པ་སྣ་ཚོགས་བྱེད་དུ་འཇུག་ཅིང་འཁོལ་བ་སྟེ། དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང ། ཀླུ་དང ། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་དང ། དགེ་སྦྱོང་དང ། བྲམ་ཟེ་གདོལ་པ་ཅན་ལ་ཁྲོས་ཏེ་ཞེ་སྡང་གི་སེམས་བསྐྱེད་པ་ནས་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་དེ་དག་རིང་པོ་མི་ཐོགས་པར་ལུས་ཀྱི་ཡན་ལག་ཀུན་དུམ་བུར་ཆད་པ་དང ། ཞག་མང་དུ་ལྕེ་ལྡིབས་པ་དང ། ཤིན་དུ་མི་བཟད་པའི་ན 60.173a བ་དང་ཚ་བའི་སྡུག་བསྔལ་ཆེན་པོ་མྱོང་བ་དང ། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་འདི་དག་སྡིག་པའི་འཁོར་ལོ་རྣམ་པ་བཅུ་པོ་གསུངས་པ་འདི་ལས་འགའ་ཞིག་དང་ལྡན་ན་ཡང་དགེ་བའི་རྩ་བ་སྔར་བསགས་པ་ཐམས་ཅད་ཐལ་བ་བཞིན་དུ་ཚིག་སྟེ་མེད་པར་འགྱུར་ལ། རིང་པོར་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་དང ། ཞག་མང་དུ་ལྕེ་ལྡིབས་པ་དང ། ཤིན་དུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང ། ཤི་ནས་ཀྱང་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རྒྱལ་རིགས་གདོལ་པ་ཅན་དང ། བློན་པོ་དང ། ཁྱིམ་བདག་དང ། ཚོང་དཔོན་དང ། དགེ་སྦྱོང་དང ། བྲམ་ཟེ་ལ་སོགས་པ་གདོལ་པ་ཅན་འདི་དག་མ་འོངས་པའི་དུས་ན་མི་མ་རབས་ཐ་མའི་ལུས་ཀྱང་ཐོབ་པར་དཀའ་ན་ཐེག་པ་རྣམ་པ་གཉིས་ཀྱི་བྱང་ཆུབ་བམ་བླ་ན་མེད་པའི་བྱང་ཆུབ་ཐོབ་པ་ལྟ་ཅི་སྨོས་ཏེ་སྐལ་བ་མེད་པ་མེད་དོ། །སྡིག་པ་ཅན་དེ་ཐེག་པ་ཆེན་པོའི་མིང་ཡང་ཐོས་པར་དཀའ་ན་བླ་ན་མེད་པར་མངོན་པར་འཚང་རྒྱ་བའི་འབྲས་བུ་ཐོབ་པ་ལྟ་ཅི་སྨོས་ཏེ། གང་ཟག་དེ་ནི་ཡུན་དུ་བདག་མ་རུང་ལ་གཞན་ཡང་མ་རུང་བར་བྱས་པས་སངས་རྒྱས་ཐམས་ཅད་ཀྱིས་ཀྱང་བསྐྱབ་མི་སྤྱོད་དོ། །རིགས་ཀྱི་བུ་འདི་ལྟ་སྟེ། འབྲུའི་མར་འཚིར་བའི་ལས་བྱེད་པ་ནི་འབྲུ་རེ་རེ་ལས་སྲིན་བུ་རེ་རེར་གྱུར་ཏེ་བཙིར་ནས་མར་འབྱུང་ངོ ། །ཁྱོད་ལྟོས་ཤིག་མར་འཚིར་བའི་ལས་བྱེད་པ་དེ་ཉིན་གཅིག་ལ་སེམས་ཅན་ཇི་སྙེད་ཅིག་གསོད་པར་འགྱུར། གལ་ཏེ་འབྲུ་མར་འཚིར་བ་དེ་མར་འཚིར་བའི་གནས་རྣམ་པ་བཅུ་བཅས་ནས་ཉིན་ཞག་གཅིག་ལ་གནས་དེ་རེ་རེར་ཡང་འབྲུ་ཁལ་སྟོང་སྟོང་རྒྱུན་མི 60.173b འཆད་པར་ལོ་སྟོང་ཚང་བར་འཚིར་ན་གང་ཟག་དེས་སྲོག་གཅོད་པའི་ཁ་ན་མ་ཐོ་བའི་ལས་རབ་ཏུ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། རབ་ཏུ་མང་ངོ ། །བཅོམ་ལྡན་འདས་རབ་ཏུ་མང་ངོ ། །བདེ་བར་གཤེགས་པ་གང་ཟག་དེས་སྲོག་གཅོད་པ་ཡང་ཚད་མ་མཆིས། དཔག་ཏུ་མ་མཆིས་ལ་ཁ་ན་མ་ཐོ་བའི་ལས་ཀྱང་གཞལ་བར་རམ། རྩི་བར་རམ། བགྲང་བར་རམ། དཔེར་ཡང་མི་བཟོད་དེ། དེ་བཞིན་གཤེགས་པ་ཉག་གཅིག་གིས་མཁྱེན་གྱི་གཞན་གྱིས་འཚལ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལྟ་སྟེ། གལ་ཏེ་མི་ལ་ལ་ཞིག་གིས་ནོར་དང་ཁེའི་ཕྱིར་སྨད་འཚོང་མའི་གནས་རྣམ་པ་བཅུ་བཅས་ཏེ། གནས་དེ་གཅིག་ཏུ་ཡང་བུད་མེད་སྨད་འཚོང་མ་སྟོང་སྟོང་བཞག་ནས་བུད་མེད་དེ་དག་སོ་སོ་ནས་རྒྱན་རྣམ་པ་སྣ་ཚོགས་ཀྱིས་བརྒྱན་ཏེ། སྐྱེ་བོ་བསླུས་ནས་འདོད་ཆགས་ཀྱི་ལས་རྒྱུན་མི་འཆད་པར་ལོ་སྟོང་གི་བར་དུ་བྱེད་དུ་བཅུག་ན། གང་ཟག་དེའི་ཁ་ན་མ་ཐོ་བའི་སྡིག་པ་ཡང་གཞལ་དུ་མེད་དེ། བརྩི་བས་སམ། བགྲང་བས་སམ། དཔེར་ཡང་མི་བཟོད་དོ། །འབྲུ་མར་འཚིར་བའི་གནས་བཅུ་པོའི་སྡིག་པ་དེ་ནི་སྨད་འཚོང་མའི་གནས་གཅིག་བཅས་པའི་སྡིག་དང་མཉམ་མོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་གང་ལ་ལ་ཞིག་ནོར་དང་ཁེའི་ཕྱིར་ཆང་འཚོང་བའི་གནས་བཅུ་བཅས་ཏེ། གནས་དེ་སོ་སོར་རྣམ་པ་སྣ་ཚོགས་ཀྱི་རྒྱན་གྱིས་ཤིན་དུ་བརྒྱན་ནས་གནས་དེ་རེ་རེར་ཡང་ཐབས་རྣམ་པ་སྣ་ཚོགས་ཀྱིས་ཆང་དད་ཆེ་བའི་མི་སྟོང་སྟོང་བྲིད་དེ་ཆང་བླུད་ནས་ཉིན་མཚན་དུ་རྒྱུན་མི་འཆད་པར་ལོ་སྟོང་གི་བར་དུ་རྩེ་ན། གང་ཟག་དེའི་སྡིག་པ་ཡང་དཔག་ཏུ་མེད་དེ། བརྩི་བས་སམ། བགྲང་བས་སམ། དཔེར་ཡང་མི་བཟོད་དོ། །གོང་དུ་བཤད་པའི་སྨད་འཚོང་མའི་གནས 60.174a བཅུ་པོའི་སྡིག་པ་དེ་ཆང་འཚོང་བའི་གནས་བཅས་པའི་སྡིག་གཅིག་དང་མཉམ་མོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་ལ་ལ་ཞིག་ནོར་དང་ཁེའི་ཕྱིར་ཤན་པའི་གནས་རྣམ་པ་བཅུ་བཅས་ཏེ། གནས་དེ་རེ་རེར་ཡང་ཉིན་ཞག་གཅིག་ལ་བལ་གླང་དང ། ལུག་དང ། རྔ་མོ་དང ། ཤ་བ་དང ། བྱ་དང ། ཕག་སྟོང་སྟོང་རྒྱུན་མི་འཆད་པར་ལོ་སྟོང་གི་བར་དུ་བསད་ན་གང་ཟག་དེའི་ཁ་ན་མ་ཐོ་བའི་སྡིག་ཀྱང་གཞལ་དུ་མེད་དེ། བརྩི་བས་སམ། བགྲང་བས་སམ། དཔེར་ཡང་མི་བཟོད་དོ། །དེ་ལྟར་སྔར་བཤད་པའི་ཆང་འཚོང་བའི་གནས་བཅུ་པོའི་སྡིག་པ་དེ་ཤན་པའི་གནས་གཅིག་བཅས་པའི་སྡིག་དང་མཉམ་མོ། །འདི་ལྟར་ཤན་པའི་གནས་བཅུ་པོའི་སྡིག་དེ་རྒྱལ་རིགས་གདོལ་པ་ཅན་ནས། དགེ་སྦྱོང་དང ། བྲམ་ཟེ་ལ་སོགས་པའི་གདོལ་པ་ཅན་དེ་དག་སྡིག་པའི་འཁོར་ལོ་བཅུ་པོ་ལས་འགའ་ཞིག་དང་ལྡན་ན་ཉིན་ཞག་གཅིག་གི་ཁ་ན་མ་ཐོ་བའི་སྡིག་ཀྱང་སྔ་མ་དང་མཉམ་མོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། མར་འཚིར་གནས་སྡིག་བཅུ་པོ་དག་།སྨད་འཚོང་གནས་སྡིག་གཅིག་དང་མཉམ། །སྨད་འཚོང་གནས་སྡིག་བཅུ་པོ་དག་།ཆང་འཚོང་གནས་སྡིག་གཅིག་དང་མཉམ། །ཆང་འཚོང་གནས་ནི་བཅུ་པོ་དག་།ཤེན་པའི་གནས་སྡིག་གཅིག་དང་མཉམ། །ཤེན་པའི་གནས་ནི་བཅུ་བཅས་པས། །རྒྱལ་པོ་གདོལ་ཅན་སྡིག་གཅིག་མཉམ། ་་་་་་་་་ ། བམ་པོ་ལྔ་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གལ་ཏེ་རྒྱལ་རིགས་དགེ་བ་འམ། བློན་པོ་དགེ་བ་དང ། ཁྱིམ་བདག་དགེ་བ་དང ། ཚོང་དཔོན་དགེ་བ་དང ། དགེ་སྦྱོང་དགེ་བ་དང ། བྲམ་ཟེ་དགེ་བ་དག་བདག་ཤིན་དུ་སྐྱོང་ཞིང 60.174b གཞན་དག་ཀྱང་ཤིན་དུ་སྐྱོང་ལ། འཇིག་རྟེན་ཕྱི་མས་ཀྱང་འཛེམ་པ། སངས་རྒྱས་ཀྱི་བསྟན་པ་ལ་གནས་པ། རབ་ཏུ་བྱུང་བ་ཆོས་ཀྱི་སྣོད་དུ་གྱུར་པ་འམ། ཆོས་ཀྱི་སྣོད་དུ་མ་གྱུར་པ་འམ། ཆུང་ངུ་ན་ཚུལ་ཁྲིམས་མ་མཆིས་པ་འང་རུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་འཚལ་བ་ལ་ཤིན་དུ་སྟི་སྟང་དང་བཅས་ཏེ་རིམ་གྲོ་དང་མཆོད་པ་བགྱིད་དོ། །གཞན་ཡང་ཉན་ཐོས་ཀྱི་ཐེག་པའི་ཆོས་དང ། རང་སངས་རྒྱས་ཀྱི་ཐེག་པའི་ཆོས་དང ། ཐེག་པ་ཆེན་པོའི་ཆོས་ལ་སྟི་སྟང་དང་བཅས་པས་མཆོད་པ་ཉན་པ་དང་བ་གཟུངས་སུ་འཛིན་པ་མཆོད་པ་བྱེད་པ་ཐེག་པ་ཆེན་པོ་ལ་གནས་ཤིང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ། བརྩོན་འགྲུས་རྩོམ་ཞིང་ནན་ཏན་དུ་བགྱིད་པ་ནས་འབྲས་བུ་ལ་གནས་པའི་བར་གྱི་གང་ཟག་རྗེས་སུ་སྲུང་ཞིང་མཐུ་སྟོབས་བསྟང་བ་དང ། ཞུ་ཞིང་འདྲི་བ་དང ། ཉན་ཅིང་འཛིན་པ་དང ། དགའ་བཞིན་དུ་གཏམ་ཟེར་ཞིང་གླེང་བ་དང ། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་རིང་དུ་སྤོང་བ་དང ། ཕྱོགས་བཞིའི་དགེ་འདུན་གྱི་ནོར་ལ་ཕ་རོལ་པོ་གཞན་ཆུད་གཟོན་དུ་མི་གཞུག་ཅིང་ཤིན་དུ་སྲུང་བ་དང ། ཕྱོགས་བཞིའི་དགེ་འདུན་གྱི་ནོར་དང ། མཆོད་རྟེན་གྱི་ནོར་ལ་བདག་ཀྱང་མི་རྐུ། གཞན་ཡང་རྐུར་མི་འཛུད་པ་དང ། བདག་མི་སྤྱོད། གཞན་ཡང་སྤྱོད་དུ་མི་འཛུད་པ་དང ། ཐེག་པ་རྣམ་གསུམ་གྱི་ཆོས་སྨྲ་བ་ལ་སྟི་སྟང་དང་བཅས་པས་མཆོད་ཅིང་མཐུས་བསྟང་བ་དང ། ཕ་རོལ་པོ་གཞན་དག་འཕྱ་ཞིང་སྐུར་པ་དང་སྨོད་དུ་མི་འཛུད་པ་དང ། དེ་ལ་རིམ་གྲོ་བགྱིད་ཅིང་སྤྲོ་བ་སྐྱེད་པ་དང ། གང་རབ་ཏུ་བྱུང་བ་དག་དང ། སངས་རྒྱས་ཀྱི་བསྟན་པའི་ཆོས་ལ་དད་པས་སྲུང་ཞིང་རྗེས་སུ་འཛིན་པ་དང ། མཆོད་རྟེན་མི་འཇིག་པ་དང ། དགེ་འདུན་གྱི་གནས་དང ། གཙུག་ལག་ཁང་ཡང་ཤིན་དུ་སྲུང 60.175a བ་དང ། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པའི་རབ་ཏུ་བྱུང་བའི་གང་ཟག་ལ་མི་བརྙས་མི་སྨོད་པ་དང ། སྡིག་པའི་འཁོར་ལོ་རྣམ་པ་བཅུ་ལ་བདག་མི་སྤྱོད། ཕ་རོལ་པོ་གཞན་སྡིག་པའི་འཁོར་ལོ་བཅུ་ལས་རིང་དུ་གྱུར་ཅིང་རྒྱལ་པོ་སྔ་མའི་ཆོས་དང་ལུགས་ཀྱིས་རྒྱལ་པོའི་སྲིད་འཚོ་བ་དང ། དཀོན་མཆོག་གསུམ་གྱི་གདུང་འཚོབ་ཅིང་དད་ཅིང་རྒྱས་པར་བྱེད་པ་དང ། རྟག་ཏུ་དགེ་བའི་བཤེས་གཉེན་ལ་སྟེན་ཅིང་བྱམས་པའི་སེམས་ཀྱིས་མི་ཡོངས་ལ་སྐྱོང་བ་དང ། ཐམས་ཅད་ལ་ཅི་དང་ཅིས་འདུལ་བ་བཞིན་དུ་དེ་དང་དེའི་ཆོས་ཀྱིས་འདུལ་ཞིང་སྟོན་ཏེ། །ངན་པར་ལྟ་བ་སྤངས་ནས་ཡང་དག་པའི་ཆོས་ལ་ནན་ཏན་བྱེད་དུ་འཛུད་པའི་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་དགེ་བ་དེ་དག་བསོད་ནམས་ཇི་སྙེད་ཅིག་ཐོབ་ཅིང་སྡིག་པ་ཇི་སྙེད་ཅིག་འབྱང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ། སྔ་དྲོའི་དུས་སུ་ཡང་རིན་པོ་ཆེ་སྣ་བདུན་གྱིས་འཛམ་བུ་གླིང་ཡོངས་སུ་བཀང་ནས་སངས་རྒྱས་དང་དགེ་འདུན་ལ་འབུལ་བ་དང ། ཉི་མའི་གུང་ལ་ཡང་རིན་པོ་ཆེ་སྣ་བདུན་གྱིས་འཛམ་བུའི་གླིང་ཡོངས་སུ་བཀང་སྟེ་སངས་རྒྱས་དང་དགེ་འདུན་ལ་འབུལ་བ་དང ། ཕྱི་དྲོའི་དུས་སུ་ཡང་རིན་པོ་ཆེ་སྣ་བདུན་གྱིས་འཛམ་བུའི་གླིང་ཡོངས་སུ་བཀང་སྟེ་སངས་རྒྱས་དང་དགེ་འདུན་ལ་འབུལ་བ་དང ། དེ་བཞིན་དུ་ཉིན་རེ་རེར་ཡང་རྒྱུན་མི་འཆད་པར་ལོ་བརྒྱ་སྟོང་གི་བར་དུ་སྦྱིན་པ་བྱིན་ན་གང་ཟག་དེའི་བསོད་ནམས་ཀྱི་ཚོགས་དེ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། ཤིན་དུ་མང་ངོ ། །བཅོམ་ལྡན་འདས་ཤིན་དུ་མང་ངོ ། །བདེ་བར་གཤེགས་པ་གང་ཟག་དེའི་བསོད་ནམས་ཀྱི་ཚོགས་ནི་ཚད་མ་མཆིས། དཔག་ཏུ་མ་མཆིས་ཏེ། བརྗོད་པ་འམ། བརྩི་བ་འམ། བགྲང་བ་འམ། དཔེར་ཡང་མི 60.175b བཟོད་དེ། སངས་རྒྱས་ཉག་གཅིག་གིས་མཁྱེན་གྱི་གཞན་གྱིས་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་དེ་བཞིན་ནོ། །གལ་ཏེ་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་ཞིག་སྡིག་པའི་འཁོར་ལོ་རྣམ་པ་བཅུ་པོ་བདག་ཀྱང་མི་སྤྱོད་ལ་ཕ་རོལ་པོ་གཞན་སྤྱོད་པ་དག་སྡིག་པའི་འཁོར་ལོ་བཅུ་སྤོང་བར་ཡང་གཞན་ལ་སྟོན་པའི་བསོད་ནམས་ཀྱི་ཕུང་པོ་ནི་བསོད་ནམས་ཀྱི་ཕུང་པོ་སྔ་མ་བས་ཚད་མེད། དཔག་ཏུ་མེད། བརྗོད་པར་རམ། བརྩི་བས་སམ། བགྲང་བས་སམ། དཔེར་ཡང་མི་བཟོད་པར་ཆེའོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ་ཕྱོགས་བཞིའི་དགེ་འདུན་གྱི་ཕྱིར་གཙུག་ལག་ཁང་དང ། གནས་ཁང་ཤིན་དུ་བཟང་ཞིང་ཡངས་པ་གླིང་བཞི་དང་མཉམ་པ་བརྩིགས་ནས་གནས་དེ་དག་ཀུན་དུ་ཁྲི་སྟན་དང ། ན་བཟའ་དང ། བསོད་སྙོམས་དང ། སྙུན་གྱི་རྐྱེན་སྨན་དང ། འཚོ་བའི་ཡོ་བྱད་ཐམས་ཅད་དང་ལྡན་པར་བཤམས་ཏེ་དེ་བཞིན་གཤེགས་པ་དང ། ཉན་ཐོས་དང ། བྱང་ཆུབ་སེམས་དཔའི་ཉེ་གནས་ཆེན་པོའི་འཁོར་ཐམས་ཅད་དེ་ན་བཞུགས་པ་ལ། བརྩོན་འགྲུས་སུ་དགེ་བའི་ཕྱོགས་རྣམ་པ་སྣ་ཚོགས་ལ་ནན་ཏན་བྱེད་ཅིང་ཉིན་མཚན་ལེ་ལོ་མེད་པར་ལོ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་མཆོད་པ་དང་བསྙེན་བཀུར་རྒྱུན་མི་འཆད་པར་བྱེད་ན། གང་ཟག་དེའི་བསོད་ནམས་ཀྱི་ཕུང་པོ་ཤིན་དུ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། ཤིན་དུ་མང་ངོ ། །བཅོམ་ལྡན་འདས་ཤིན་དུ་མང་ངོ ། །བདེ་བར་གཤེགས་པ་གང་ཟག་དེའི་བསོད་ནམས་ཀྱི་ཕུང་པོ་ནི་ཚད་མ་མཆིས། དཔག་ཏུ་མ་མཆིས་ཏེ། བརྗོད་པར་རམ། རྩི་བས་སམ། བགྲང་བས་སམ། དཔེར་ཡང་མི་བཟོད་དེ། སངས་རྒྱས་ཉག་གཅིག 60.176a གིས་མཁྱེན་གྱི་གཞན་གྱིས་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ་ཕྱོགས་བཞིའི་དགེ་འདུན་གྱི་ཕྱིར་གཙུག་ལག་ཁང་དང་གནས་ཁང་ཤིན་དུ་བཟང་ལ་ཡངས་པ། གླིང་བཞི་པ་བཅུ་དང་མཉམ་པ་བརྩིགས་ཏེ། གནས་དེ་དག་ཀུན་དུ་ཁྲི་སྟན་དང ། ན་བཟའ་དང ། བསོད་སྙོམས་དང ། གསོས་སྨན་དང ། འཚོ་བའི་ཡོ་བྱད་ཐམས་ཅད་དང་ལྡན་པར་བཤམས་ཏེ་དེ་བཞིན་གཤེགས་པ་དང ། ཉན་ཐོས་དང ། བྱང་ཆུབ་སེམས་དཔའི་དགེ་འདུན་ཆེན་པོའི་ཉེ་གནས་ཐམས་ཅད་དེ་ན་བཞུགས་པ་ལ་བརྩོན་འགྲུས་སུ་དགེ་བའི་ཕྱོགས་རྣམ་པ་སྣ་ཚོགས་ལ་ནན་ཏན་བྱེད་ཅིང་ཉིན་མཚན་ལེ་ལོ་མེད་པར་ལོ་བརྒྱ་སྟོང་བྱེ་བ་ཁྲག་ཁྲིག་གི་བར་དུ་མཆོད་པ་དང ། བསྙེན་བཀུར་རྒྱུན་མི་འཆད་པར་བྱེད་ན། གང་ཟག་དེའི་བསོད་ནམས་ཀྱི་ཕུང་པོ་ཤིན་དུ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། ཤིན་ཏུ་མང་ངོ ། །བཅོམ་ལྡན་འདས་ཤིན་དུ་མང་ངོ ། །བདེ་བར་གཤེགས་པ་གང་ཟག་དེའི་བསོད་ནམས་ཀྱི་ཕུང་པོ་ནི་ཚད་མ་མཆིས། དཔག་ཏུ་མ་མཆིས་ཏེ། བརྗོད་པར་རམ། རྩི་བས་སམ། བགྲང་བས་སམ། དཔེར་ཡང་མི་བཟོད་དེ། སངས་རྒྱས་ཉག་གཅིག་གིས་མཁྱེན་གྱི་གཞན་གྱིས་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཇི་ལྟར་ཁྱོད་ཀྱིས་སྨྲས་པ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ། སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་ཤིན་དུ་མཛེས་པ། མཐོ་ཞིང་ཡངས་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང་མཉམ་པ་བརྩིགས 60.176b ལ་སྔར་བཤད་པ་བཞིན་ཕྱོགས་བཞིའི་དགེ་འདུན་གྱི་ཕྱིར་གཙུག་ལག་ཁང་དང ། གནས་ཁང་བརྩིགས་པའི་བསོད་ནམས་ཀྱི་ཕུང་པོ་བས་སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་བརྩིགས་པའི་བསོད་ནམས་ཀྱི་ཕུང་པོ་ཆེ་སྟེ། བརྒྱའི་ཆར་ཡང་ཉེ་བར་མི་འགྲོ་བ་ནས་སྟོང་གི་ཆར་ཡང་ཉེ་བར་མི་འགྲོའོ། །བརྒྱ་སྟོང་གི་ཆར་ཡང་ཉེ་བར་མི་འགྲོའོ། །བྱེ་བའི་ཆར་ཡང་ཉེ་བར་མི་འགྲོའོ། །ཁྲག་ཁྲིག་གི་ཆར་ཡང་ཉེ་བར་མི་འགྲོའོ། །གྲངས་ཀྱི་ཆར་རམ། རྩིས་ཀྱི་ཆར་རམ། དཔག་པའི་ཆར་རམ། དཔེའི་ཆར་རམ། རྒྱུའི་ཆར་ཡང་ཉེ་བར་མི་འགྲོའོ། །རིགས་ཀྱི་བུ་གཞན་ཡང་འདི་ལྟ་སྟེ། གལ་ཏེ་ཕ་རོལ་དུ་ཕྱིན་པ་ཐོབ་པ། རྣམ་པར་གྲོལ་བ་བརྒྱད་དང་ལྡན་པ་བསམ་གཏན་ལ་སྙོམས་པར་ཞུགས་པའི་དགྲ་བཅོམ་པ་ཆེན་པོ་ཤ་སྟག་གིས་སྟོང་གསུམ་གྱིས་སྟོང་ཆེན་པོའི་འཇིག་རྟེན་གྱི་ཁམས་འདིར་ཡོངས་སུ་གང་བ་ནི་འདི་ལྟ་སྟེ། འབྲས་ཀྱི་ལྗང་བུ་འམ། ཏིལ་ལམ། འོད་མ་འམ། འདམ་བུ་འམ། བུ་རམ་ཤིང་གི་ཚལ་ལྟ་བུར་གྱུར་ལ། དེ་དག་ཐམས་ཅད་བཅིང་བ་ལྔས་བཅིངས་ནས་ལོ་བྱེ་བ་བརྒྱ་སྟོང་སྙེད་ལོན་པ་ལས་མཐུ་ཆེན་པོ་དང་ལྡན་པའི་གང་ཟག་གཅིག་འཇིག་རྟེན་དུ་མངོན་པར་བྱུང་སྟེ། བསོད་ནམས་འདོད་པའི་ཕྱིར་དེ་དག་གི་བཅིངས་པ་ཐམས་ཅད་བཀྲོལ་ནས་དགྲ་བཅོམ་པ་དེ་དག་ཐམས་ཅད་སྤོས་ཆུས་བཀྲུས་ཏེ། ཆོས་གོས་དང ། ལྷུང་བཟེད་ལོ་བརྒྱ་སྟོང་གི་བར་དུ་ཕུལ་ནས། གནས་ཁང་དང ། ཁྲི་སྟན་དང ། གོས་དང ། བསོད་སྙོམས་དང ། ནད་ཀྱི་གསོས་སྨན་དང ། འཚོ་བའི་ཡོ་བྱད་རྣམ་པ་སྣ་ཚོགས་ཀྱང་ཡིད་བཞིན་དུ་བྱིན་ལ། དགྲ་བཅོམ་པ་དེ་དག་མྱ་ངན་ལས་འདས་ནས་ཀྱང་མཆོད་པ་བྱས་ཏེ། བསྲེགས་ནས་དེ་དག་གི་རིང་ལ་བསྡུས་ནས་རིན་པོ་ཆེ་སྣ་བདུན་གྱི་མཆོད་རྟེན་གྱི་ནང་དུ་བཅུག་གོ་།གཞན་ཡང་རིན་པོ་ཆེའི་རྒྱལ་མཚན་དང ། བ་དན་དང ། གདུགས་དང ། སྤོས་དང ། མེ་ཏོག་དང ། རོལ་མོ་རྣམ་པ་སྣ་ཚོགས་ཀྱིས་མཆོད་པའི 60.177a བསོད་ནམས་ཀྱི་ཕུང་པོ་བས་སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་བརྩིགས་པའི་བསོད་ནམས་ཀྱི་ཕུང་པོ་མང་སྟེ། དགྲ་བཅོམ་པའི་བཅིང་བ་བཀྲོལ་ཏེ་མཆོད་པ་བྱས་པའི་བསོད་ནམས་ཀྱིས་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་ཡང་ཉེ་བར་མི་འགྲོའོ། །བརྒྱ་སྟོང་གི་ཆར་ཡང་ཉེ་བར་མི་འགྲོའོ། །བྱེ་བའི་ཆར་ཡང་ཉེ་བར་མི་འགྲོའོ། །ཁྲག་ཁྲིག་གི་ཆར་ཡང་ཉེ་བར་མི་འགྲོ་བ་ནས། རྩིས་ཀྱི་ཆར་རམ། གྲངས་ཀྱི་ཆར་རམ་དཔག་པའི་ཆར་རམ། དཔེའི་ཆར་རམ། རྒྱུའི་ཆར་ཡང་ཉེ་བར་མི་འགྲོའོ། །རིགས་ཀྱི་བུ་གལ་ཏེ་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་གིས་སྡིག་པའི་འཁོར་ལོ་བཅུ་པོ་བདག་ཀྱང་མི་བྱེད་ལ། གཞན་དག་ཀྱང་སྡིག་པའི་འཁོར་ལོ་བཅུ་པོ་མ་སྤྱོད་ཅིག་པར་གྲོས་འདེབས་ན་དེའི་བསོད་ནམས་ཀྱི་ཕུང་པོ་ནི་བསོད་ནམས་ཀྱི་ཕུང་པོ་སྔ་མ་གང་བས་ཀྱང་ཚད་མེད། དཔག་ཏུ་མེད། བརྗོད་དུ་མེད་པར་ཆེ་སྟེ། ཇི་སྙེད་ཀྱི་བསོད་ནམས་སྐྱེས་པ་དེ་སྙེད་ཀྱི་སྡིག་ཀྱང་ཡོངས་སུ་འབྱང་བར་འགྱུར་རོ། །རིགས་ཀྱི་བུ་གལ་ཏེ་རྒྱལ་རིགས་དགེ་བ་འམ། བློན་པོ་དགེ་བ་འམ། ཁྱིམ་བདག་གམ། ཚོང་དཔོན་ནམ། དགེ་སྦྱོང་ངམ། བྲམ་ཟེ་དགེ་བ་གང་ཞིག་མ་འོངས་པའི་དུས་ལྔ་བརྒྱའི་ཐ་མ་ལ་དམ་པའི་ཆོས་རྣམ་པར་འཇིག་ཏུ་ཉེ་བ་ན་ངས་བསྟན་པའི་ཆོས་ཀྱི་མིག་ཤིན་དུ་སྲུང་ཞིང་བདག་ཀྱང་ཤིན་དུ་སྡོམ་ལ། ཕ་རོལ་པོ་གཞན་ཡང་སྲུང་བ། འཇིག་རྟེན་ཕྱི་མའི་བག་བྱེད་པ་ངའི་བསྟན་པ་ལ་རབ་ཏུ་བྱུང་བའི་སློབ་མ་ཆོས་ཀྱི་སྣོད་དུ་གྱུར་པ་འམ་ཆོས་ཀྱི་སྣོད་དུ་མ་གྱུར་པ་ཡང་རུང ། མཐར་ནི་ཚུལ་ཁྲིམས་མེད་པ་ཡང་རུང་སྟེ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་ལ་ཤིན་དུ་བག་བྱེད་ཅིང་སྟི་སྟང་དང་བཅས་པས་མཆོད་དེ་གནོད་པ་མི་བྱེད་དམ། གཞན་ཡང་ཐེག་པ་གསུམ་གྱི་དམ་པའི་ཆོས་ཤིན་དུ་སྲུང་ཞིང་ཉན་ཏེ་འཛིན་པ་དང ། ཉན་ཐོས་ཀྱི་ཆོས་ལ་སྟི་སྟང་བྱེད་པ་ན་རང་སངས་རྒྱས་ཀྱི་ཐེག་པའི་ཆོས་དང་ཐེག་པ་ཆེན་པོའི་ཆོས་ལ 60.177b མི་འཕྱ་མི་སྐུར་པ་དང ། རང་སངས་རྒྱས་ཀྱི་ཐེག་པ་པ་དང ། ཐེག་པ་ཆེན་པོ་ལ་ཕྲག་དོག་མི་སྐྱེད་པ་དང ། རང་སངས་རྒྱས་ཀྱི་ཐེག་པའི་ཆོས་ལ་རིམ་གྲོ་བྱེད་དེ་ཉན་ཅིང་འཛིན་པ་ན། ཉན་ཐོས་ཀྱི་ཐེག་པ་དང ། ཐེག་པ་ཆེན་པོའི་ཆོས་ལ་མི་འཕྱ་མི་སྐུར། ཉན་ཐོས་ཀྱི་ཐེག་པ་དང ། ཐེག་པ་ཆེན་པོ་ལ་ཕྲག་དོག་མི་སྐྱེད་པ་དང ། ཐེག་པ་ཆེན་པོའི་ཆོས་ལ་རིམ་གྲོ་བྱེད་དེ་ཉན་ཅིང་འཛིན་པ་ན་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པའི་ཆོས་ལ་མི་བརྙས། མི་སྐུར་ཅིང ། ཉན་ཐོས་ཀྱི་ཐེག་པ་པ་དང ། རང་སངས་རྒྱས་ཀྱི་ཐེག་པ་ལ་ཕྲག་དོག་མི་སྐྱེད་ལ། ཉན་ཐོས་ཀྱི་ཐེག་པ་དང་རང་སངས་རྒྱས་ཀྱི་ཐེག་པའི་ཆོས་མངོན་དུ་མི་བྱེད་དོ། །ཐེག་པ་ཆེན་པོའི་ཆོས་ཡང་དག་པ་ཉིད་མངོན་དུ་བྱེད་པ་དང ། ཐེག་པ་ཆེན་པོ་ལ་གནས་པས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། བརྩོན་འགྲུས་རྩོམ་པ་ནས་འབྲས་བུ་ལ་གནས་པའི་བར་དུ་ནན་ཏན་བྱེད་པའི་གང་ཟག་ལ་རྟག་ཏུ་བསྙེན་བཀུར་བྱེད་ཅིང་གཡོག་དང ། མཆོད་པ་དང ། དད་པའི་སེམས་ཀྱིས་བཀུར་སྟི་བྱེད་དེ་འདྲི་བ་དང ། ཉན་པ་དང ། འཛིན་པར་བྱེད་པ་དང ། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དག་རིང་དུ་སྤོང་བ་དང ། དད་པས་ཕུལ་བའི་ཕྱོགས་བཞིའི་དགེ་འདུན་གྱི་ནོར་ལ་ཆོས་མ་ཡིན་པས་ཆུད་གཟོན་དུ་མི་གཞུག་པ་དང ། ཕྱོགས་བཞིའི་དགེ་འདུན་གྱི་ནོར་དང ། མཆོད་རྟེན་དང ། དགེ་འདུན་གྱི་ཁུད་པའི་ནོར་ལ་བདག་ཀྱང་ཐུགས་ཐུབ་མི་བྱེད་ཅིང ། ཕ་རོལ་པོ་གཞན་ཡང་ཐུག་ཐུབ་ཏུ་སྤྱོད་དུ་མི་འཛུད་པ་དང ། ཐེག་པ་གསུམ་གྱི་ཆོས་སྨྲ་བའི་གང་ཟག་ལ་ཤིན་དུ་སྟི་སྟང་དང་བཅས་པས་མཆོད་ཅིང་མཐུ་བསྟང་བ་དང ། ཕ་རོལ་པོ་གཞན་དག་འཕྱ་ཞིང་སྐུར་པ་དང ། སྨོད་དུ་མི་གཞུག་པ་དང ། རབ་ཏུ་བྱུང་བའི་གང་ཟག་ལ་ཤིན་དུ་དད་པས་སྤྲོ་བ་སྐྱེད་པ་དང ། དེ་བཞིན་གཤེགས་པས་གསུངས་པའི་འཕགས་པའི་བཀའ་ལ་དད་ཅིང་འཛིན་པ་དང ། མཆོད་རྟེན་མི་འཇིག་པ་དང ། ཕྱོགས་བཅུའི་དགེ་འདུན་གྱི་གནས་གཙུག་ལག་ཁང་སྐྱོང་བ་དང ། ངའི་བསྟན་པ་ལ་རབ་ཏུ 60.178a བྱུང་བའི་སློབ་མ་དག་ལ་དབང་མི་ཟ་ཞིང་ཕྱིར་ཡང་ཁྱིམ་པར་མི་འབེབས་པ་དང ། སྡིག་པའི་འཁོར་ལོ་རྣམ་པ་བཅུ་པོ་དག་ལ་བདག་ཀྱང་མི་སྤྱོད་ཅིང་ཕ་རོལ་པོ་གཞན་ཡང་སྡིག་པའི་འཁོར་ལོ་རྣམ་པ་བཅུ་པོ་ཡོངས་སུ་སྤོངས་ཤིག་པར་གྲོས་འདེབས་པ་དང ། རྒྱལ་པོ་སྔ་མའི་ཆོས་ལུགས་དང་སྲིད་ཀྱིས་འཚོ་ཞིང་དགེ་བ་བཅུའི་ལས་ཀྱི་ལམ་གྱིས་འཇིག་རྟེན་མང་པོ་ཡོངས་སུ་སྡུད་ཅིང་སྟོན་པ་དང ། རྟག་ཏུ་དགེ་བའི་བཤེས་གཉེན་ལ་སྟེན་པ་དང ། དཀོན་མཆོག་གསུམ་གྱི་གདུང་འཚོབ་ཅིང་ཤིན་དུ་རྒྱས་པར་བྱེད་པ་དང ། ཆོས་ཀྱི་མིག་ནམ་དུ་ཡང་མི་ནུབ་པར་སྲུང་བའི་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་དེ་དག་དེ་ལྟ་བུའི་ཡོན་ཏན་དང་ལྡན་པས་ན་དེ་དག་འཚོ་བས་སྤྱོད་པ་ཆུད་ཟ་བར་མི་འགྱུར་བ་དང ། ལྷ་དང་མི་དང ། གནོད་སྦྱིན་དང ། ཡི་དགས་དང ། ལུས་སྲུལ་པོ་ལ་སོགས་པ་ཐམས་ཅད་ཀྱང་དགའ་སྟེ་བྱམས་པའི་སེམས་ཀྱིས་སྲུང་ཞིང་སྐྱོབ་བོ། །ཆོས་ཀྱི་སྣོད་དུ་གྱུར་པ་བསོད་ནམས་ཀྱི་ཞིང་ཡང་དག་པ་ཐམས་ཅད་ཀྱང་དགའ་ཞིང་སྙིང་རྗེའི་སེམས་ཀྱིས་སྐྱོབ་ཅིང་རྗེས་སུ་འཛིན་པར་འགྱུར་རོ། །དེའི་རྒྱུ་དེའི་རྐྱེན་གྱིས་གནས་པའི་ཡུལ་དང ། སྐྱེ་བོ་ཐམས་ཅད་ཀྱང་ཕྱིར་ཞིང་བདེ་ལ་ཤིན་དུ་སྐྱིད་པ་དང ། ཕྱིའི་དགྲས་ཀྱང་གནོད་པ་བྱེད་མ་ནུས་ཤིང་ཐམས་ཅད་བཀའ་ཉན་ཏེ་མ་ཕམ་པར་ངང་འདུ་བ་དང ། དེའི་དབང་གིས་དགེ་བའི་ཕྱོགས་ལ་ཕྱིར་ཞིང་བརྩོན་ཏེ་མི་དགེ་བའི་རྒྱུད་ཡོངས་སུ་སྐེམས་པ་དང ། ལྷ་དང་མི་ལ་སོགས་པ་ཡོངས་སུ་རྒྱས་ཤིང་ཀུན་དུ་སྲུང་བའི་ཕྱིར་ཚེ་ཤིན་དུ་རིང་བར་འགྱུར་བ་དང ། བདག་གི་ཉོན་མོངས་པ་ཡོངས་སུ་འཇོམ་ཞིང་ཕ་རོལ་པོའི་ཉོན་མོངས་པ་ཡང་འཇིལ་བར་བྱེད་པ། བྱང་ཆུབ་སེམས་དཔའི་ལམ་ཕ་རོལ་དུ་ཕྱིན་པ་དྲུག་ཡོངས་སུ་བཟུང་བས་ལོག་པར་ལྟ་བའི་ལམ་ངན་པ་ཐམས་ཅད་ཡོངས་སུ་བཅོམ་པས་འཁོར་བའི་རྒྱ་མཚོར་ཡུན་རིང་པོར་འཁོར་བ་ལས་ལྡོག་པ། སྡིག་པའི་བཤེས་གཉེན་སྤོང་ཞིང་དགེ་བའི་བཤེས་གཉེན་ལ་རྟག་ཏུ་སྟེན་པ་དང ། གང་ནས་གང་དུ་སྐྱེ་བའི་གནས་ཐམས 60.178b ཅད་དུ་སངས་རྒྱས་དང ། བྱང་ཆུབ་སེམས་དཔའ་དང་ཕྲད་ཅིང་བསྙེན་བཀུར་བ་དང ། མཆོད་པ་རྒྱུན་མི་འཆད་པར་བྱེད་པར་འགྱུར་བ་དང ། རིང་པོ་མི་ཐོགས་པར་བསམས་བཞིན་དུ་གང་ནས་གང་དུ་དགེ་བའི་སངས་རྒྱས་ཀྱི་ཞིང་དེ་དང་དེ་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་དེའི་ཚེ་འཁོར་དེའི་ནང་ནས་ལྷའི་དབང་པོ་འཁོར་དང་བཅས་པ་ཐམས་ཅད་ནས་ཤ་ཟའི་དབང་པོ་འཁོར་དང་བཅས་པ་ཐམས་ཅད་ཀྱི་བར་དུ་འདུག་པ་ལས་ལངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་ཐལ་མོ་སྦྱར་ནས་སྟི་སྟང་དང་བཅས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མ་མཆིས་པའི་དུས་ལྔ་བརྒྱའི་ཐ་མ་ལ་སངས་རྒྱས་ཀྱི་ཞིང་འདིར་དམ་པའི་ཆོས་རབ་ཏུ་རྣམ་པར་འཇིག་ཏུ་ཉེ་བ་ན། གལ་ཏེ་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་སྡིག་པའི་འཁོར་ལོ་བཅུ་པོ་བདག་ཀྱང་ཡོངས་སུ་སྤངས་ལ་གཞན་ཡང་ཡོངས་སུ་སྤོངས་ཤིག་པར་གྲོས་འདེབས་པ་དང ། བདག་དང་གཞན་སྲུང་བ་ལ་མཁས་པ། འཇིག་རྟེན་སླད་མའི་བག་བགྱིད་པ་ལ་མཁས་པ། དམ་པའི་ཆོས་སྲུང་བ། དཀོན་མཆོག་གསུམ་གྱི་གདུང་འཚོབ་ཅིང་རྒྱུན་མི་འཆད་པར་རྒྱས་པར་བགྱིད་པ་ནས་མདོར་ན་བཅོམ་ལྡན་འདས་ཀྱིས་གསུངས་པ་ལྟར་གང་ཟག་དེ་དག་ལ་སོགས་པ་ཐེག་པ་གསུམ་གྱི་ཆོས་ལ་སྟི་སྟང་དང་བཅས་པས་ཉན་ཅིང་འཛིན་ཏེ། ནམ་དུ་ཡང་མི་འཆབ་པ་དང་ཐེག་པ་གསུམ་ལ་གནས་པའི་གང་ཟག་ལ་ཤིན་དུ་སྲུང་ཞིང་མཆོད་པ་བགྱིད་དེ་གནོད་པ་མི་བགྱིད་པ་དང ། དཀོན་མཆོག་གསུམ་གྱི་ནོར་རྫས་ལ་ཤིན་དུ་སྲུང་ཞིང་གོད་པར་མི་བགྱིད་པའི་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་དེ་དག་ལ་བདག་ཅག་འཁོར་དང་བཅས་པས་བསྲུང་བ་དང ། བསྐྱབ་པ་དང ། ཆོས་རྣམ་པ་འདི་བཅུ་ཡང་སྐྱེ་ཞིང་འཕེལ་བར་བགྱིའོ། །བཅུ་གང་ཞེ་ན་ཚེ་རིང་བར་འགྱུར་བ་དང ། བགེགས་མེད་པ་སྐྱེ་ཞིང་འཕེལ་བ་དང ། 60.179a ནད་མེད་པ་སྐྱེ་ཞིང་འཕེལ་བ་དང ། འཁོར་སྐྱེ་ཞིང་འཕེལ་བ་དང ། ནོར་དང་རིན་པོ་ཆེ་སྐྱེ་ཞིང་འཕེལ་བ་དང ། འཚོ་བའི་ཡོ་བྱད་སྐྱེ་ཞིང་འཕེལ་བ་དང ། གོ་འཕང་སྐྱེ་ཞིང་འཕེལ་བ་དང ། གྲགས་པ་སྐྱེ་ཞིང་འཕེལ་བ་དང ། དགེ་བའི་གྲོགས་པོ་སྐྱེ་ཞིང་འཕེལ་བ་དང ། ཤེས་རབ་སྐྱེ་ཞིང་འཕེལ་བ་སྟེ། བཙུན་པ་བཅོམ་ལྡན་འདས་གལ་ཏེ་རྒྱལ་རིགས་དགེ་བ་དང་བྲམ་ཟེ་དགེ་བའི་བར་དུ་སྡིག་པའི་འཁོར་ལོ་རྣམ་པ་བཅུ་པོ་ཡོངས་སུ་སྤོང་ཞིང་ཕ་རོལ་པོ་གཞན་ཡང་སྤོང་བར་གྲོས་འདེབས་ལ། ཡོན་ཏན་སྔར་སྨོས་པ་དང་ལྡན་ན་བདག་ཀྱང་སྲུང་ཞིང་སྐྱོབ་པ་དང་ཆོས་རྣམ་པ་བཅུ་པོ་ཡང་སྐྱེ་ཞིང་འཕེལ་བར་འགྱུར་རོ། །བཅོམ་ལྡན་འདས་གཞན་ཡང་རྒྱལ་རིགས་དགེ་བ་དང ། བྲམ་ཟེ་དགེ་བའི་བར་དུ་གང་སྔར་སྨོས་པའི་ཡོན་ཏན་དེ་དག་དང་ལྡན་ན་བདག་ཅག་འཁོར་དང་བཅས་པས་དེ་ལ་བསྲུང་ཞིང་བསྐྱབ་པ་དང ། ཆོས་རྣམ་པ་བཅུ་པོ་འདི་དང་ཡོངས་སུ་བྲལ་བར་བགྱིའོ། །བཅུ་གང་ཞེ་ན། འདི་ལྟ་སྟེ་ཞེ་འགྲས་པ་ཐམས་ཅད་དང་ཡོངས་སུ་བྲལ་བ་དང ། ཡིད་དུ་མི་འོང་བའི་གཟུགས་དང ། སྒྲ་དང་དྲི་དང ། རོ་དང ། རེག་བྱའི་ཡུལ་དང་ཡོངས་སུ་བྲལ་བ་དང ། རིམས་དང་ནད་ཐམས་ཅད་དང་ཡོངས་སུ་བྲལ་བ་དང ། ལོག་པར་འཛིན་ཅིང་ངན་པར་ལྟ་བ་ཐམས་ཅད་དང་ཡོངས་སུ་བྲལ་བ་དང ། ལོག་པ་ལ་སྐྱབས་སུ་འགྲོ་བ་དང་ཡོངས་སུ་བྲལ་བ་དང ། ལོག་པའི་ལྟས་ངན་པ་ཐམས་ཅད་དང་ཡོངས་སུ་བྲལ་བ་དང ། ལོག་པའི་ལས་ངན་པའི་དངོས་པོ་ཐམས་ཅད་དང་ཡོངས་སུ་བྲལ་བ་དང ། ལོག་པའི་བཤེས་གཉེན་ངན་པ་ཐམས་ཅད་དང་ཡོངས་སུ་བྲལ་བ་དང ། ཁྱིམ་ན་གནས་པའི་འདམ་རྫབ་ཐམས་ཅད་དང་ཡོངས་སུ་བྲལ་བ་དང ། དུས་མ་ཡིན་པར་བློ་བུར་དུ་འཆི་བ་ཐམས་ཅད་དང་ཡོངས་སུ་བྲལ་བ་སྟེ། བཙུན་པ་བཅོམ་ལྡན་འདས་གལ་ཏེ་ཤིན་དུ་དགེ་བའི་རྒྱལ་རིགས་ནས་བྲམ་ཟེ་དགེ་བའི་བར་དུ་གང་ཞིག་ཡོན་ཏན་སྔར་གསུངས་པ་རྣམས་དང་ལྡན་ན་བདག་ཅག་འཁོར་དང་བཅས་ཏེ་དེ་ལ་སྲུང་ཞིང་སྐྱོབ་པ་དང ། ཡོངས་སུ་བྲལ་བའི 60.179b ཆོས་རྣམ་པ་བཅུ་པོ་འདི་ཡང་ཐོབ་པར་བགྱིད་དོ། །བཅོམ་ལྡན་འདས་གཞན་ཡང་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་གིས་སྔར་གསུངས་པའི་ཡོན་ཏན་ཡོངས་སུ་རྫོགས་པར་ནན་ཏན་བྱེད་ན་བདག་ཅག་འཁོར་དང་བཅས་ཏེ་བསྲུང་ཞིང་བསྐྱབ་པར་འཚལ་ལོ། །རྒྱལ་པོ་འཁོར་དང་བཅས་པ་དང་ཡུལ་དེ་ན་གནས་པའི་མི་ཐམས་ཅད་ཀྱང་ཆོས་རྣམ་པ་འདི་བཅུ་དང་ཡོངས་སུ་བྲལ་བར་བགྱིའོ། །བཅུ་གང་ཞེ་ན། ཡུལ་ཕ་རོལ་གྱི་དགྲ་ཐམས་ཅད་དང ། ཡོངས་སུ་བྲལ་བ་དང ། བདག་གི་ཡུལ་གྱི་དགྲ་ཐམས་ཅད་དང་བྲལ་བ་དང ། བཀྲ་མི་ཤིས་པའི་ཡི་དགས་ཐམས་ཅད་དང་ཡོངས་སུ་བྲལ་བ་དང ། ཐན་པ་དང་ཡོངས་སུ་བྲལ་བ་དང ། གནོད་པར་འགྱུར་བའི་ཆར་ཆུ་དང་ཡོངས་སུ་བྲལ་བ་དང ། དུས་མ་ལགས་པའི་ཚ་བ་དང ། གྲང་བ་དང ། རླུང་དང ། ཆར་དྲག་པོ་དང ། སད་དང ། སེར་བ་གནོད་པར་འགྱུར་བ་ཐམས་ཅད་དང་ཡོངས་སུ་བྲལ་བ་དང ། གཟའ་དང་ལྟས་ངན་དུ་གྱུར་པ་ཐམས་ཅད་དང་ཡོངས་སུ་བྲལ་བ་དང ། མུ་གེའི་གནོད་པ་ཐམས་ཅད་དང་ཡོངས་སུ་བྲལ་བ་དང ། དུས་མ་ཡིན་པར་ནད་ཀྱིས་འཆི་བར་འགྱུར་བ་དང་ཡོངས་སུ་བྲལ་བ་དང ། ལོག་པར་འཛིན་ཅིང་ངན་པར་ལྟ་བ་ཐམས་ཅད་དང་ཡོངས་སུ་བྲལ་བ་སྟེ། བཙུན་པ་བཅོམ་ལྡན་འདས་གལ་ཏེ་རྒྱལ་རིགས་དགེ་བའི་རྒྱལ་པོས་ཡོན་ཏན་སྔར་གསུངས་པ་དེ་དག་ཀུན་ལ་ནན་ཏན་བགྱིད་ཅིང་ཡོངས་སུ་རྫོགས་པར་བྱེད་ན་བདག་ཅག་འཁོར་དང་བཅས་པས་བསྲུང་ཞིང་བསྐྱབ་པར་འཚལ་ལོ། །རྒྱལ་པོ་འཁོར་དང་བཅས་པ་དང ། ཡུལ་དེ་ན་གནས་པའི་མི་ཐམས་ཅད་ཀྱང་ཡོངས་སུ་བྲལ་བའི་ཆོས་བཅུ་པོ་འདི་དག་ཐོབ་པར་བགྱིད་དོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་འཁོར་དང་བཅས་པ་ནས་ཤ་ཟའི་དབང་པོའི་བར་དུ་འཁོར་དང་བཅས་པ་ལ་ལེགས་སོ་ལེགས་སོ་ཞེས་བསྟོད་ནས་ཁྱད་རྣམས་འདི་སྐད་དུ་ཡི་དམ་བཅས་པའི་དངོས་པོ་འདི་དག་ཁྱེད་ཀྱིས་བྱ་བའི་རིགས་པ་སྟེ། དེའི་རྒྱུ་དེའི་རྐྱེན་གྱིས་ཁྱེད་ལ་འང་ཡུན་རིང་པོར་ཕན་པ་དང་བདེ་བའི་དོན་དུ་འགྱུར་རོ། །དེ་ནས་ཚངས་པ་ཆེན་པོ་ལྷའི་སྙིང་པོས 60.180a བཅོམ་ལྡན་འདས་ལ་ཡང་འདི་སྐད་ཅས་གསོལ་ཏོ། །མ་མཆིས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་དགེ་བ་ཐམས་ཅད་ཀྱི་སླད་དུ་ཡུལ་སྲུང་བ་ལ་སེམས་ཕྱིར་མི་ལྡོག་པའི་གཟུངས་འདི་དག་འཕུལ་ལོ། །ཡུལ་ཡོངས་སུ་བསྲུང་བའི་ཕྱིར་ཕྱིར་མི་ལྡོག་པའི་འཁོར་ལོ་ཞེས་བྱ་བའི་གཟུངས་སྔགས་ཆེན་པོའི་ཚིག་འདིའི་གཟི་བརྗིད་དང་མཐུས་མ་མཆིས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་དགེ་བའི་རྒྱལ་པོ་ཐམས་ཅད་ལ་ཕས་རྒོལ་བའི་དགྲ་ཐམས་ཅད་ཀྱིས་མི་ཚུགས་པ་དང ། ཕས་རྒོལ་བའི་དགྲ་ཐམས་ཅད་ཞི་ཞིང་རང་ལྡོག་པར་འགྱུར་བ་དང ། ལུས་དང ། ངག་དང ། ཡིད་ཀྱི་ལས་ཤིན་དུ་སྡོམ་པ་དང ། མཁས་པ་རྣམས་ཀྱིས་བསྔགས་ཤིང་བསྟོད་པ་དང ། སྡིག་པའི་ཆོས་ཡོངས་སུ་སྤོང་ཞིང་དགེ་བའི་ཆོས་ལ་རྟག་ཏུ་ནན་ཏན་བགྱིད་པ་དང ། ངན་པར་ལྟ་བ་དང ། ངན་པར་ཕྱོགས་པ་རྟག་ཏུ་སྤོང་ཞིང་ཐེག་པ་ཆེན་པོ་ལ་ཤིན་དུ་འབད་པའི་བརྩོན་འགྲུས་བརྟན་པས་ནན་ཏན་བགྱིད་པ་དང ། སྣོད་དུ་གྱུར་པའི་སེམས་ཅན་ཚད་མེད་གྲངས་མེད་པ་ཡོངས་སུ་སྨིན་པར་བགྱིད་པ་དང ། ཤེས་པ་གཞན་གྱི་དྲིང་ལ་མི་འབྲང་བར་མཁས་པའི་རང་བཞིན་ཅན་དུ་གྱུར་པ་ཕ་རོལ་དུ་ཕྱིན་པ་དྲུག་གི་རིན་པོ་ཆེའི་གཏེར་རྫོགས་པར་ནན་ཏན་བགྱིད་པས་ཁོང་ཁྲོ་བ་དང ། སེར་སྣ་དང ། ཕྲག་དོག་ལ་སོགས་པ་ཀུན་ནས་ཉོན་མོངས་པའི་དྲི་མ་ཐམས་ཅད་ཡོངས་སུ་སྤོང་བ་དང ། མི་དང་མི་མ་ཡིན་པ་ལ་སོགས་པ་ཐམས་ཅད་ཀྱིས་སྟི་སྟང་དང་བཅས་པས་སྐྱོབ་པར་འགྱུར་བ་དང་བྱ་བ་རྣམས་ལ་བརྗེད་མི་ངས་པ་དང ། བསྡུ་བ་རྣམ་བཞིའི་དངོས་པོ་ལ་དགའ་བས་སེམས་ཅན་མི་གཏོང་བ་དང ། རྟག་ཏུ་ཆོས་ཀྱི་སྣོད་བསོད་ནམས་ཀྱི་ཞིང་དུ་གྱུར་པ་དང་མི་འབྲལ་བར་འགྱུར་རོ། །ཡང་བཅོམ་ལྡན་འདས་ཀྱིས་ལྷའི་སྙིང་པོ་ལ་བཀའ་སྩལ་པ། ཁྱོད་ཀྱིས་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་པོ་རྒྱལ་རིགས་དགེ་བའི་ཡུལ་བསྲུང་བའི་ཕྱིར་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་སྨྲོས་ཤིག་། 60.180b ཡུལ་ཡོངས་སུ་བསྲུང་བ་ལ་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་གི་མཐུ་དང་གཟི་བརྗིད་ཀྱིས་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་པོ་རྒྱལ་རིགས་དགེ་བ་ཐམས་ཅད་ལ་ཕས་རྒོལ་པའི་དགྲ་ཐམས་ཅད་ཀྱིས་མི་ཚུགས་པ་ནས་དེ་བཞིན་དུ་རྒྱས་པར་སངས་རྒྱས་དང་སངས་རྒྱས་ཀྱི་འཁོར་གྱི་བར་དུ་ཐམས་ཅད་དང་མི་འབྲལ་བར་བསྲུང་བར་འགྱུར་བ་སྨྲོས་ཤིག་།དེ་ནས་ཚངས་པ་ཆེན་པོ་ལྷའི་སྙིང་པོས་ཡུལ་ཡོངས་སུ་སྲུང་བ་ལ་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་འདི་དག་སྨྲས་སོ། །ཏད་ཡ་ཐཱ། མུ་ནི་མོ་རི། མུ་ནེ་གརྦྷེ། མུ་ནི་ཁི་ལི་དྷ་ཡེ། མུ་ནི་རོ་ག་བི་ཙ་ལེ། མུ་ནི་ཧ་ལི་ཏེ། མུ་ནི་ག་མེ། ཤུ་ལ་པཀྵེ། པཱ་ལ་ལ་པཀྵེ། སོའུ་རི་ས་ཀྲི་ཏི། ཏོ་ར་ཎ་ཀྲི་ཙ་ལེ། པ་ཏ་ག་ཤ་ཀྲི་ཏེ། ཀུ་ཀུ་ལ་མྲི་ལེ། ཨ་པཀྵ་ས་ར། ཨོ་ད་ཧ་ཀི་ལི་བ། མུ་ནི་པཱ་ཐ་བ་སཝཱ་ཧཱ། ཚངས་པ་ཆེན་པོ་ལྷའི་སྙིང་པོས་གཟུངས་འདི་དག་སྨྲས་ནས་བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་མང་པོ་དང་བཅས་ཏེ་བདག་གིས་བཤད་པའི་གཟུངས་ཆེན་པོ་འདི་ལ་རྗེས་སུ་ཡི་རང་བར་མཛད་དུ་གསོལ། བཅོམ་ལྡན་འདས་ཀྱིས་ལེགས་སོ་ལེགས་སོ་ཞེས་བཀའ་སྩལ་ཏོ། །འཁོར་མང་པོ་ཐམས་ཅད་ཀྱིས་ཀྱང་ལེགས་སོ་ལེགས་སོ་ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ན་ཚེ་དང་ལྡན་པ་མཽད་གལ་ཡ་ན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་ཚངས་པ་ཆེན་པོ་ལྷའི་སྙིང་པོས་ཕུལ་བ་ཡུལ་ཡོངས་སུ་བསྲུང་བ་ལ་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་འདི་དག་གཟུངས་སུ་ཟུང་ཤིག་།མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་དགེ་བའི་རྒྱལ་པོ་ཐམས་ཅད་ལ་ཡང་རྒྱས་པར་སྟོན་ཅིག་།དེའི་རྒྱུ་དེའི་རྐྱེན་གྱིས་ན་རྒྱལ་རིགས་དགེ་བའི་རྒྱལ་པོ་འཁོར་དང་བཅས 60.181a པ་ཐམས་ཅད་དང ། ཡུལ་དེ་ན་གནས་པའི་མི་ཐམས་ཅད་ལ་ཕན་པ་དང ། བདེ་བའི་དོན་དུ་འགྱུར་ཏེ། རྟག་ཏུ་ཆོས་ཀྱི་འཁོར་ལོ་སྐོར་བ་དང ། ཤིན་དུ་གྲགས་པ་ཆེ་བ་དང ། གཟི་བརྗིད་ཆེ་བར་འགྱུར་བ་དང ། ངན་པར་ལྟ་བ་འཇོམས་ཤིང་ཡང་དག་པའི་ལྟ་བ་འཛུགས་པ་དང ། ཆོས་ཀྱི་མིག་སྲུང་ཞིང་དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ་དང ། སེམས་ཅན་ཚད་མེད་དཔག་ཏུ་མེད་པ་ཡོངས་སུ་སྨིན་པར་བྱེད་པ་དང ། ཐེག་པ་ཆེན་པོ་ལ་དད་པ་ཤིན་དུ་བརྟན་པ་དང ། ཡུན་རིང་པོ་ནས་ཕ་རོལ་དུ་ཕྱིན་པ་དྲུག་བསྒོམ་པ་ལ་གནས་ཤིང་སྒྲིབ་པ་ཐམས་ཅད་བཅད་ནས་མྱུར་དུ་མཐའི་གནས་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དེ་ཚེ་ཚངས་ཆེན་ལྷ་ཡི་སྙིང་པོས། །རྐང་གཉིས་མཆོག་ལ་འདི་སྐད་ཞུས་སོ། །དབང་པོ་རྣོ་བའི་སྐྱེ་བོ་དག་ནི། །ཏིང་འཛིན་སྒོམ་ཞིང་བསོད་ནམས་བྱེད་མོས། །རྒྱལ་པོ་མཁས་པས་ཆོས་ལུགས་བྱས་པ། །ཤིན་དུ་འཁྱམ་པ་འདེག་ཅིང་བསྒྲལ་ཕྱིར། །སྤྱོད་པའི་དངོས་པོ་གསུམ་པོ་འདི་ལ། །གང་དག་ཐེ་ཙོམ་སེལ་ཅིང་མི་ལྡོག་།བཅོམ་ལྡན་འདས་ཀྱིས་འདི་སྐད་བཀའ་སྩལ། །གལ་ཏེ་མི་གནས་མི་བྱ་མི་བྱས། །བློ་གྲོས་ཆེ་ཞིང་ཤེས་རབ་རྣོ་ཡང ། །མཚམས་མེད་སེམས་ཅན་དམྱལ་བར་ལྟུང་འགྱུར། །མཁས་པ་མ་ཡིན་ཡང་དག་པ་དག་།སྡིག་པ་བཅུ་ཡི་འཁོར་ལོ་སྤྱོད་མོས། །དགེ་བའི་རྩ་བ་ཡོངས་སུ་བཅད་པས། །མྱུར་དུ་སེམས་ཅན་དམྱལ་བར་ལྟུང་འགྱུར། །ཏིང་ངེ་འཛིན་ནི་ཉོན་མོངས་ཀུན་གཅོད། །ཉན་པའི་བསོད་ནམས་ཀྱིས་ནི་མ་ཡིན། །དེ་བས་མྱ་ངན་འདའ་བར་འདོད་པ། །རྟག་ཏུ་བསམ་གཏན་ལ་ནི་མཉམ་བཞག་།མཁས་པས་ཤིན་དུ་བརྩོན་འགྲུས་རྩོམ་པ། །ང་ཡི་ཡང་དག་ཆོས་ནི་སྲུང་འཛིན། །ངུར་སྨྲིག་གྱོན་ལ་དད་ཅིང་གུས་པས། །ཉོན་མོངས་རྒྱ་མཚོ་ལས་ནི་གྲོལ་འགྱུར། །ཤིན་དུ་དབེན་པའི་བས་མཐར་གནས་ཏེ། །མཚམས 60.181b མེད་བྱེད་པ་རྣམ་པར་རིང་སྤངས། །ཚུལ་ཁྲིམས་འཛིན་ཅིང་ཏིང་འཛིན་སྒོམ་ལ། །དད་པས་སྲིད་པའི་རྒྱ་མཚོར་སྒྲོལ་འགྱུར། །ཐེག་པ་རྣམ་གསུམ་ཀུན་ལ་དད་པ། །ང་ཡི་ཡང་དག་ཆོས་ནི་རྒྱས་བྱེད། །ངུར་སྨྲིག་གྱོན་ལ་མཆོད་པ་བྱས་ན། །ཡོན་ཏན་རྣམ་པའི་རྒྱ་མཚོར་ངེས་འགྱུར། །གདུལ་དཀའི་སེམས་ནི་ཤིན་དུ་བཏུལ་ཏེ། །དགེ་སློང་རྣམས་ཀྱི་ཉེས་པ་མི་གླེང ། །ཆོག་ཤེས་འཕགས་པའི་རིགས་འཚོ་བ་ནི། །རྐང་གཉིས་དམ་པའི་མཆོག་ཏུ་ངེས་འགྱུར། །དགེ་སློང་སྡིག་ཅན་དག་ནི་སྤངས་ཏེ། །འཕགས་པའི་སྤྱོད་པའི་གནས་ལ་བསྟེན་བྱ། །དགེ་འདུན་ནོར་ལ་མི་སྤྱོད་མི་ཟ། །མྱུར་དུ་བྱང་ཆུབ་ཆེན་པོ་འཐོབ་འགྱུར། །ཁམས་གསུམ་ཀུན་ན་བདེ་ཞིང་སྐྱིད་པ། །དེ་ཡང་དཀོན་མཆོག་གསུམ་ལས་བྱུང་བས། །དེ་བས་བདེ་ཞིང་སྐྱིད་པ་འདོད་པ། །རྟག་ཏུ་དཀོན་མཆོག་གསུམ་ལ་མཆོད་བྱོས། །གདོལ་པའི་རྒྱལ་པོ་དག་ལ་སོགས་པ། །དགེ་སློང་སྡིག་པ་སྤྱོད་པའི་གྲོགས་དག་།དཀོན་མཆོག་གསུམ་ལ་ཉེས་པ་བསྐྱེད་པས། །མཚམས་མེད་སེམས་ཅན་དམྱལ་བར་ལྟུང་འགྱུར། །འབྲུ་མར་འཚིར་བ་བཅུའི་སྡིག་པ། །སྨད་འཚོང་གཅིག་གི་སྡིག་དང་དེ་མཉམ། །སྨད་འཚོང་མ་ནི་བཅུའི་སྡིག་དང ། །ཆང་འཚོང་གཅིག་གི་སྡིག་དང་དེ་མཉམ། །ཆང་འཚོང་གནས་ནི་བཅུའི་སྡིག་དང ། །ཤེན་པ་གཅིག་གི་སྡིག་དང་དེ་མཉམ། །ཤེན་པའི་གནས་ནི་བཅུ་ཡི་སྡིག་དང ། །རྒྱལ་པོ་གཅིག་གི་སྡིག་དང་དེ་མཉམ། །ཡང་དག་དགེ་བའི་རྒྱལ་པོ་དག་ནི། །ང་ཡི་ཡང་དག་ཆོས་ཀུན་རྒྱས་བྱེད། །ཐེག་པ་རྣམ་གསུམ་ཀུན་ལ་མཆོད་པས། །ཡོན་ཏན་རྣམ་པའི་རྒྱ་མཚོར་དེས་འགྱུར། །རིན་ཆེན་སྣ་བདུན་འཛམ་གླིང་བཀང་སྟེ། །སངས་རྒྱས་དགེ་འདུན་རྣམས་ལ་ཕུལ་བའི། །བསོད་ནམས་ཕུང་པོ་ཐོབ་པ་དེས་ནི། །སངས་རྒྱས་ཆོས་སྲུང་ཙམ་དུ་མི་ཕོད། །སངས་རྒྱས་དགེ་འདུན་བཞུགས་པའི་གནས་དག་།གླིང་བཞི་བཅུ་དང་མཉམ་པར་བྱས་པའི། །བསོད་ནམས་ཕུང་པོ་ཐོབ་པ་དེས་ཀྱང ། ། 60.182a སངས་རྒྱས་ཆོས་སྲུང་ཙམ་ནི་མི་ཕོད། །སངས་རྒྱས་དག་གི་མཆོད་རྟེན་བརྩིགས་པ། །སྟོང་གསུམ་ཁམས་དང་མཉམ་པ་བྱས་པའི། །བསོད་ནམས་ཕུང་པོ་ཐོབ་པ་དེས་ཀྱང ། །སངས་རྒྱས་ཆོས་སྲུང་ཙམ་ནི་མི་ཕོད། །དགྲ་བཅོམ་པ་ཡི་བཅིངས་པ་བཀྲོལ་ནས། །མཆོད་པ་རྣམ་པ་སྣ་ཚོགས་ཀུན་པས། །ཆོས་ཀྱི་བར་ཆད་མ་བྱས་པ་ཡི། །བསོད་ནམས་དེ་ནི་དེ་བས་མཆོག་འགྱུར། །བསྐལ་པ་བྱེ་བ་སྟོང་གི་བར་དུ། །མཁས་པས་ཏིང་འཛིན་བསྒོམས་པ་ཡི་ནི། །ཁྱད་པར་ཅན་གྱི་བློ་སྐྱེས་གང་བས། །ཆོས་སྲུང་བའི་བསོད་ནམས་དེ་ཆེ། །ཤིན་དུ་དགེ་བའི་རྒྱལ་པོ་གང་དག་།སྡིག་པ་བཅུའི་འཁོར་ལོ་སྤངས་ཏེ། །ང་ཡི་ཡང་དག་ཆོས་འདི་བསྐྱབས་སམ། །ངུར་སྨྲིག་གྱོན་པ་དག་ཀྱང་བསྲུངས་ན། །ངས་གསུངས་པ་ཡི་ཐེག་པ་གསུམ་དང ། །གང་ཟག་དག་ལ་འཕྱ་སྐུར་མི་བྱེད། །ཀུན་ཀྱང་ཉན་ཅིང་མཆོད་པ་བྱེད་ལ། །ཆོས་སྨྲ་བ་ཡི་སྐྱབས་དང་མགོན་བྱེད། །དཀོན་མཆོག་གསུམ་ནོར་ཆུད་མི་གཟོན་ཅིང ། །ཆོས་གོས་གྱོན་པའི་བར་ཆད་མི་བྱེད། །སྣོད་དང་སྣོད་མ་ཡིན་པ་ཀུན་ལ། །གུས་ན་དེའི་བསོད་ནམས་དཔེ་མེད། །ཇི་ལྟར་ཉི་མ་ལྔ་པོ་ཤར་ན། །རྒྱ་མཚོ་ཆེན་པོ་ཀུན་ནི་སྐེམས་ཏེ། །དེ་བཞིན་ང་ཡི་ཆོས་སྲུང་བ་དེ། །ཉོན་མོངས་པ་ཡི་རྒྱ་མཚོ་སྐེམས་འགྱུར། །ཇི་ལྟར་རླུང་གིས་འཇིག་པ་བྱུང་སྟེ། །རི་རྣམས་ཐམས་ཅད་འཇིག་པ་བཞིན་དུ། །ང་ཡི་ཆོས་ལ་སྲུང་བ་དེ་ཡང ། །ཀུན་ནས་ཉོན་མོངས་ཐམས་ཅད་འཇོམས་འགྱུར། །ཇི་ལྟར་ཆུ་ཡིས་འཇིག་པ་བྱུང་ཚེ། །ས་ཆེན་ཆུ་ཡིས་གཡེངས་ཏེ་འཇིག་འགྱུར། །དེ་བཞིན་ང་ཡི་ཆོས་སྲུང་བ་ཡང ། །ཡིད་དུ་མི་འོང་འབྲས་བུ་འཇོམས་འགྱུར། །ཇི་ལྟར་རིན་ཆེན་ཡིད་བཞིན་ནོར་བུས། །འདོད་པ་ཐམས་ཅད་ཡོངས་སུ་རྫོགས་བྱེད། །དེ་བཞིན་ཐེག་པ་གསུམ་གྱི་ཆོས་ཀྱང ། །སེམས་ཅན་ཀུན་གྱི་སྨོན་པ་རྫོགས་བྱེད། །གང་གིས་བུམ་པ་བཟང་པོ་རྙེད་ན། །དབུལ་དང་བྲལ་ཏེ་བདེ་སྐྱིད་ཐོབ་འགྱུར། ། 60.182b དེ་བཞིན་སངས་རྒྱས་ཆོས་དང་ཕྲད་པ། །ཐེ་ཙོམ་གཅོད་ཅིང་བྱང་ཆུབ་ཐོས་འགྱུར། །ཇི་ལྟར་བཅོ་ལྔའི་ཟླ་བ་ཉ་ན། །འོད་ཀྱིས་ནམ་མཁའ་ཐམས་ཅད་ཀུན་སྣང ། །དེ་བཞིན་ཆོས་སྲུང་བ་ཡི་གང་ཟག་།ཤེས་རབ་ཀྱིས་ནི་ཆོས་དབྱིངས་ཀུན་ཁྱབ། །ཇི་ལྟར་ནམ་མཁའ་ཀུན་དུ་མཉམ་ལ། །རྫས་ཀྱང་མེད་ཅིང་མཚན་མ་མེད་པ། །དེ་བཞིན་ཆོས་སྲུང་བའི་གང་ཟག་།ཐམས་ཅད་ཆོས་ནི་རོ་གཅིག་པར་ཤེས། །ཇི་ལྟར་ཉི་མའི་འོད་ནི་བཀྱེ་བ། །འཇིག་རྟེན་མུན་པ་ཐམས་ཅད་ཀུན་སེལ། །དེ་བཞིན་ཆོས་སྲུང་བའི་གང་ཟག་།རྟག་ཏུ་འཇིག་རྟེན་ཀུན་དུ་བདེ་བྱེད། །ཤིན་དུ་རྒྱས་པ་ཆེན་པོའི་མདོ་སའི་སྙིང་པོ་འཁོར་ལོ་བཅུ་པ་ཞེས་བྱ་བ་ལས་གནས་ཤིང་སྤྱད་པར་མི་བྱ་བའི་ལེའུ་སྟེ་གསུམ་མོ།། ་་་་་་།། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་ཞེས་བྱ་བ་འཁོར་གྱི་དཀྱིལ་འཁོར་དེའི་ནང་ན་འདུག་པ་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ནས་བླ་གོས་ཕྱོགས་གཅིག་ཏུ་བྱས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་བ་བཏུད་དེ་ཚིགས་སུ་བཅད་པས་གསོལ་པ། ཚུལ་ཁྲིམས་ཉམས་པས་རྣམ་དག་ཡོན་ཏན་སྟོར་བ་དག་།འཕགས་པའི་སྣོད་མིན་པ་ཡིས་སྲས་མ་ཡིན་ཞེས་གསུངས། །དགེ་སྦྱོང་ཆོས་ཉིད་སྤངས་ཤིང་ཐལ་བ་འདྲ་བ་དག་།ང་ཡི་རྣམ་དག་འཁོར་འདིར་གནས་པ་མཛེས་པ་མིན། །དྲི་མ་གསུམ་གྱིས་བསྒོས་ཤིང་འགོག་དང་ལམ་སྟོར་བའི། །ཁྱད་པར་ཅན་གྱི་མཆོད་པ་གང་ཡང་དེས་མི་ཞུ། །ཕྱོགས་བཞིའི་དགེ་འདུན་དབང་བར་བསྔོས་པའི་ནོར་དག་ལ། །ཆ་ཤས་ཅུང་ཟད་ཙམ་ཡང་སྤྱོད་དུ་ངས་མ་གནང ། །ཚུལ་ཁྲིམས་རྩ་བ་བཞི་ལས་གཅིག་ཙམ་ཉམས་པ་དག་།དགེ་འདུན་འཁོར་དུ་མི་ཆུད་རྒྱ་མཚོའི་རོ་དང་མཚུངས། །ཅི་ཡི་སླད་དུ་དེང་འདིར་དགེ་སློང་སྡིག་ཅན་ལ། །སྙིང་རྗེས་དང་དུ་བླངས་ཏེ་ཆད་པས་མི་གཅོད་པར། །ཕྱིར་ཡང་ང་ལ་མཆོད་པ་བྱོས་ཤེས་སྐུལ་མཛད་ཅིང ། །བརྩེ་ལ 60.183a སྙིང་རྗེ་ཅན་གྱིས་ངན་སེམས་ཡོངས་སྤོངས་ལ། །དེ་ལ་སྟི་སྟང་བཅས་ཏེ་བསྟན་པའི་ཆོས་མཉན་ན། །བསོད་ནམས་ཡེ་ཤེས་ཚོགས་ཐོབ་སྙིང་རྗེ་ཆེན་པོ་ཅན། །མངོན་ཤེས་འཇིག་རྟེན་སྐྱོང་བས་མདོ་སྡེ་གཞན་དག་ལ། །ཕྲ་ལ་ཟབ་པར་གྱུར་པའི་ཡང་དག་བྱང་ཆུབ་ལམ། །ཐེག་པ་ཆེན་པོ་དེ་ལ་ཁྱེད་ཀྱིས་དད་བྱས་ཤིང ། །ཐེག་པ་གཉིས་ཀྱིས་གྲོལ་བའི་ལམ་དེ་སྤོངས་ཤེས་གསུངས། །ཅི་ཡི་སླད་དུ་དེང་འདིར་ཐེག་པ་གསུམ་བཤད་དེ། །ཀུན་གྱིས་དེ་ལ་ཉན་ཅིང་མཆོད་པ་བགྱི་བར་སྐུལ། །དབང་པོ་སྟོབས་དང་བྱང་ཆུབ་དགེ་སྦྱོང་འབྲས་བུ་ཡང ། །མདོ་སྡེ་འདི་ལས་འབྱུང་གི་གཞན་དུ་གསུངས་པ་མེད། །དཔེ་མེད་འཕགས་པའི་ལམ་ནི་ཡན་ལག་བརྒྱད་པ་འདིར། །ཐེག་པ་རྣམ་གསུམ་ཀུན་ཀྱང་ལམ་དེར་འཇུག་བྱེད་དེ། །རྣམ་པར་གྲོལ་བར་འདོད་པས་བརྩོན་འགྲུས་རབ་བསྐྱེད་ན། །སོ་སོར་རེ་བ་བཞིན་དུ་བྱང་ཆུབ་འཐོབ་པར་འགྱུར། །འགྲོ་བ་ཀུན་གྱིས་གཙོ་བོས་འདི་དག་རྣམ་དབྱེ་བ། །སྔ་ཕྱིར་བསྟན་པ་འདི་དག་མི་འགལ་བསྟན་པ་ན། །ལྷ་དང་མི་དང་བྱང་ཆུབ་སེམས་དཔའི་འཁོར་ཐམས་ཅད། །ཡང་དག་བདེན་པ་རྟོགས་ཤིང་རྣམ་གྲོལ་དགའ་བ་བསྐྱེད། །ཐེག་པ་ཆེན་པོ་བཤད་པས་གང་ལ་ཕན་འགྱུར་དང ། །ཐེག་པ་ཆེན་པོ་བཤད་པས་གང་ལ་གནོད་པར་འགྱུར། །ཉན་ཐོས་ཐེག་པས་རྣམ་པར་གྲོལ་བ་བཅུ་པོ་ཡིས། །བཤད་པ་ཐོས་ནས་གང་ལ་གནོད་དང་གང་ལ་ཕན་པར་འགྱུར། །གང་ཞིག་ཆོས་འདི་ཐོས་པས་གོང་ནས་གོང་དུ་འཕར། །གང་གིས་ཆོས་འདི་ཐོས་པས་ཕྱིར་ཞིང་ལྟུང་བར་འགྱུར། །ཇི་ལྟར་འདུས་བྱས་ཀུན་གྱི་སྐྱོན་གྱིས་སྐྱོ་བས་ན། །རྒ་དང་འཆི་བའི་རྒྱ་མཚོ་མྱུར་དུ་སྐེམས་པར་འགྱུར། །ཉིན་མཚན་དགེ་བ་རྣམས་ལ་ཤིན་དུ་བརྩོན་པ་དག་།དོན་མཆོག་གང་ལ་གནས་ཤིང་ཐེག་པ་གང་བགྲོད་པས། །ཤིན་དུ་ཡངས་ཤིང་ཟབ་པའི་ཆུ་བོ་བཞི་ལས་སྒྲོལ། །འཇིག་རྟེན་སྐྱོང་བས་རྣམ་པར་ཕྱེ་སྟེ་ཀུན་སྲུངས་ཤིག་།དེ་ནས་བཅོམ་ལྡན་འདས 60.183b ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ལེགས་སོ། །རིགས་ཀྱི་བུ་ཁྱོད་སྐྱེ་བོ་ཚད་མེད་པ་ལ་ཕན་པ་དང ། བདེ་བའི་དོན་གྱི་ཕྱིར་ལྷ་དང ། མི་དང ། ལྷ་མ་ཡིན་ལ་སོགས་པའི་དོན་ཆེན་པོའི་ཕྱིར་དེ་བཞིན་གཤེགས་པ་ལ་ཤིན་དུ་ཟབ་མོའི་དོན་འདི་དག་ཞུས་པ་ལེགས་སོ། །ཤིན་དུ་ལེགས་པར་ཉོན་ལ་ཤིན་དུ་ཡིད་ལ་ཟུང་ཤིག་དང ། ངས་ཁྱོད་ལ་རྣམ་པར་ཕྱེ་སྟེ་བཤད་དོ་ཞེས་བཀའ་སྩལ་ནས། བྱང་ཆུབ་སེམས་དཔའ་རྡོ་རྗེའི་སྙིང་པོ་བཅོམ་ལྡན་འདས་ལ་སླར་ཉན་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་ཟག་རྣམ་པ་བཅུ་པོ་འདི་དག་ནི་འཁོར་བར་འཁོར་ཞིང་མི་ལུས་ཤིན་དུ་རྙེད་པར་དཀའོ། །གང་ཟག་རྣམ་པ་བཅུ་པོ་གང་ཞེ་ན། འདི་ལྟ་སྟེ། དགེ་བའི་རྩ་བ་མི་སྐྱེད་པ་དང ། བསོད་ནམས་ཀྱི་ལས་མི་བྱེད་པ་དང ། ཀུན་ནས་ཉོན་མོངས་པའི་ཉིང་འཚམས་སྦྱོར་བ་དང ། གྲོགས་པོ་སྡིག་པའི་རྗེས་སུ་སྤྱོད་པ་དང ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ་དང ། འདོད་ཆགས་བདོ་བར་འགྱུར་བ་དང ། ཞེ་སྡང་བདོ་བར་འགྱུར་བ་དང ། གཏི་མུག་བདོ་བར་འགྱུར་བ་དང ། སེམས་མྱོས་ཤིང་འཁྲུག་པ་དང ། ལོག་པར་ལྟ་བའི་སྡིག་པ་ཅན་དུ་འཛིན་པ་སྟེ། གནས་ཤིང་སྤྱད་པར་མི་བྱ་བ་རྣམ་པ་བཅུ་པོ་འདིའི་རྒྱུས་སེམས་ཅན་དག་ཚུལ་ཁྲིམས་ཀྱི་རྩ་བ་འཇིག་ཅིང་ཚུལ་ཁྲིམས་ཉམས་པར་བྱེད་པས་ངན་སོང་དུ་ལྟུང་བར་འགྱུར་རོ། །གནས་ཤིང་སྤྱད་པར་མི་བྱ་བ་རྣམ་པ་བཅུ་པོ་གང་ཞེ་ན། འདི་ལྟ་སྟེ། ངའི་བསྟན་པ་ལ་རབ་ཏུ་བྱུང་བ་དག་ལ་ལ་ནི་ལྷག་པའི་སྤྱོད་པ་ཉམས་ལ་མོས་པ་མ་ཉམས་པ་ཡོང་ཡོད། ལ་ལ་ནི་མོས་པ་ཉམས་ལ་ལྷག་པའི་སྤྱོད་པ་མ་ཉམས་པ་ཡང་ཡོད། ལ་ལ་ནི་ལྷག་པའི་སྤྱོད་པ་དང་མོས་པ་གཉི་ག་ཉམས་པ་ཡང་ཡོད། ལ་ལ་ནི་ཚུལ་ཁྲིམས་ཉམས་ལ་ལྟ་བ་མ་ཉམས་པ་ཡང་ཡོད། ལ་ལ་ནི་ལྟ་བ 60.184a ཉམས་ལ་ཚུལ་ཁྲིམས་མ་ཉམས་པ་ཡང་ཡོད། ལ་ལ་ནི་ཚུལ་ཁྲིམས་དང་ལྟ་བ་གཉི་ག་ཉམས་པ་ཡང་ཡོད་དོ། །ལ་ལ་ནི་ལྷག་པའི་སྤྱོད་པ་དང ། མོས་པ་དང ། ཚུལ་ཁྲིམས་དང ། ལྟ་བ་མ་ཉམས་ཀྱང་སྡིག་པའི་གྲོགས་པོའི་དབང་དུ་གྱུར་ཏེ་གནས་ཤིང་སྤྱད་པར་མི་བྱ་བ་དག་བྱེད་པ་ཡང་ཡོད། ལ་ལ་ནི་དགེ་བའི་བཤེས་གཉེན་ལ་རྟེན་པའི་དབང་དུ་གྱུར་ཀྱང་གླན་པའི་རང་བཞིན་ཅན་ལུག་བཞིན་དུ་ལྐུག་པ་ལས་ཀྱི་དངོས་པོའི་བྱེ་བྲག་ཀྱང་མི་ཕྱེད་ལ། དགེ་བའི་བཤེས་གཉེན་གྱིས་དགེ་བ་དང་མི་དགེ་བའི་ཆོས་བསྟན་པ་ཐོས་ཀྱང་མི་གོ་མི་འཛིན་མི་ཤེས་ཏེ། དེའི་རྒྱུ་དེའི་རྐྱེན་གྱིས་གནས་ཤིང་སྤྱད་པར་མི་བྱ་བ་དག་བྱེད་དེ། ནོར་དང ། རིན་པོ་ཆེ་དང ། འཚོ་བའི་ཡོ་བྱད་རྣམ་པ་སྣ་ཚོགས་ཀྱིས་མི་སྐྱོ་བར་ཀུན་དུ་ཚོལ་བའི་རྒྱུས་སེམས་འཁྲུགས་པས་གནས་ཤིང་སྤྱད་པར་མི་བྱ་བ་དག་བྱེད་པའི་འདུས་བྱས་ཀྱི་ནད་མང་པོས་གཟིར་ཅིང་གདུངས་པའི་འཇིག་རྟེན་པའི་ལྷ་རྗེད་པ་དང ། སྔགས་ལ་སོགས་པ་བྱེད་པ་དེའི་རྒྱུ་དེའི་རྐྱེན་གྱིས་གནས་པ་དང་སྤྱད་པར་མི་བྱ་བ་དག་བྱེད་དོ། །འདི་ལྟར་གནས་པ་དང་སྤྱད་པར་མི་བྱ་བ་རྣམ་པ་བཅུ་པོའི་རྒྱུས་སེམས་ཅན་དག་ཚུལ་ཁྲིམས་ཀྱི་རྩ་བ་ཉམས་ཤིང་མཐོང་བའི་ཆོས་ལ་འཕགས་པའི་སྣོད་དུ་མ་གྱུར་པ། ཚུལ་ཁྲིམས་ཉམས་པའི་ཕྱིར་ངན་སོང་དུ་ལྟུང་བར་འགྱུར་རོ། །རིགས་ཀྱི་བུ་གང་ཟག་གང་ལྷག་པའི་སྤྱོད་པ་ཉམས་ཀྱང་མོས་པ་མ་ཉམས་པ་དག་གནས་པ་དང ། སྤྱད་པར་མི་བྱ་བ་གང་ཡང་རུང་བ་རྣམ་པ་གཅིག་གི་རྒྱུས་རྩ་བའི་སྡིག་གཅིག་ཉམས་པ་ལས་དེ་ཤིན་དུ་འཇིགས་སྐྲག་སྟེ་འཛེམ་པ་དང ། ངོ་ཚ་བས་ཕྱིན་ཆད་ཀྱང་གང་ཡང་མི་བྱེད་པར་སྡིག་པ་སྤངས་ན་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་ལམ་སུན་འབྱིན་པའི་དགེ་སྦྱོང་ཞེས་གསུངས་སོ། །དེ་ཅིའི་ཕྱིར་ཞེ་ན། དེ་ལྟ་བུའི་སྡིག་པ་ཆེན་པོའི་ལས་བྱས་ཀྱང་འཕྲལ་དུ་མི་འཆབ་པར་འཐོལ་ཏེ། འཛེམ་པ་དང་ངོ་ཚ་བས་འགྱོད་ཚངས་བྱས་ན། དེས་དེ་ལྟར་འཛེམ་པ་དང་ངོ་ཚ་བས་སོ 60.184b སོར་བཤགས་པས་སྡིག་པ་བྱང་བའི་ཕྱིར་ཕྱིན་ཅད་བྱེད་པའི་རྒྱུན་གཅོད་པར་འགྱུར་རོ། །དེས་དགེ་སྦྱོང་གི་ལས་དང་ཆོ་གར་བྱ་བ་ཐམས་ཅད་ཀྱི་ནང་དུ་མི་ཆུད་ལ། བསྐྲད་པར་བྱ་ཞིང་དགེ་སྦྱོང་གི་འཚོ་བའི་ཡོ་བྱད་ཐམས་ཅད་ལ་ཡང་སྤྱོད་དུ་མི་དབང་མོད་ཀྱི། གང་ཟག་དེ་ནི་ཐེག་པ་གསུམ་གྱི་ཆོས་ཀྱི་སྣོད་དུ་འགྱུར་བས། དེ་བཞིན་གཤེགས་པས་ཐུགས་བརྩེ་བའི་ཕྱིར་དེ་ལ་བར་བར་ནི་ཉན་ཐོས་ཀྱི་ཐེག་པའི་ཆོས་ཀྱང་འཆད་དོ། །བར་བར་ནི་རང་སངས་རྒྱས་ཀྱི་ཐེག་པའི་ཆོས་ཀྱང་འཆད་དོ། །བར་བར་ནི་དེ་ལ་བླ་ན་མེད་པའི་ཐེག་པའི་ཆོས་ཀྱང་བཤད་པས་སྐྱེ་བ་གཉིས་སམ་གསུམ་ན་སྨོན་ལམ་གྱི་མཐུ་དང ། དགེ་བའི་བཤེས་གཉེན་གྱི་མཐུས་སྡིག་པའི་ལས་བྱས་པ་སྡིག་པར་གྱུར་པ་ཐམས་ཅད་བྱང་སྟེ། ལ་ལ་ནི་ཉན་ཐོས་ཀྱི་ཐེག་པའི་འབྲས་བུ་ཐོབ་བོ། །ལ་ལ་ནི་རང་སངས་རྒྱས་ཀྱི་ཐེག་པས་མྱ་ངན་ལས་འདའོ། །ལ་ལ་ནི་ཤིན་དུ་རྒྱ་ཆེ་བ་བླ་ན་མེད་པའི་ཐེག་པའི་དོན་རྟོགས་པར་འགྱུར་བའང་སྲིད་དོ། །གཞུང་དེ་བཞིན་དུ་ཚུལ་ཁྲིམས་ཉམས་ལ་ལྟ་བ་མ་ཉམས་པ་ཡང་ཤེས་པར་བྱའོ། །གང་ཟག་གང་མོས་པ་ཉམས་ལ་ལྷག་པའི་སྤྱོད་པ་མ་ཉམས་ན་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་ཚངས་པའི་གནས་བཞི་བསྒྲུབ་པའི་ཆོས་སྟོན་ཏེ། འདི་ནི་ཉན་ཐོས་ཀྱི་ཐེག་པའི་སྣོད་དོ། །འདི་ནི་རང་སངས་རྒྱས་ཀྱི་ཐེག་པའི་སྣོད་དང་ལྡན་པའོ། །གང་ཟག་གང་ལྷག་པའི་སྤྱོད་པ་དང་མོས་པ་གཉི་ག་ཉམས་ན་དེ་ཐེག་པ་གང་གི་ཆོས་ཀྱི་སྣོད་དུ་ཡང་མི་འགྱུར་མོད་ཀྱི། དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་སྦྱིན་པའི་བསྔགས་པ་འཆད་དོ། །གང་ཟག་གང་ལྟ་བ་ཉམས་ལ་ཚུལ་ཁྲིམས་མ་ཉམས་ན་དེ་ཐེག་པ་གང་གི་ཆོས་ཀྱི་སྣོད་དུ་ཡང་མི་འགྱུར་མོད་ཀྱི། དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་དེ་ལ་རྟེན་ཅིང་འབྲེལ་པར་འབྱུང་བའི་ཆོས་བཤད་དེ་ངན་པར་ལྟ་བ་སྤངས་ཏེ་ལུས་འདི་ཉིད་ཀྱིས 60.185a ཉན་ཐོས་སམ་རང་སངས་རྒྱས་ཀྱི་ཆོས་རྟོགས་པར་མཛད་དོ། །ཡང་ན་སྐྱེ་བ་གཞན་གྱི་དུས་ན་ཆུད་ཅིང་རྟོགས་པར་མཛད་དོ། །གང་ཟག་གང་ཚུལ་ཁྲིམས་དང་ལྟ་བ་གཉིས་ཀ་ཉམས་ན་དེ་ནི་འཕགས་པའི་ཆོས་ཀྱི་སྣོད་མ་ཡིན་ན་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་སྦྱིན་པའི་བསྔགས་པ་འཆད་དོ། །གང་ཟག་གང་ལྷག་པའི་སྤྱོད་པ་དང ། མོས་པ་དང ། ཚུལ་ཁྲིམས་དང ། ལྟ་བ་ཀུན་མ་ཉམས་ཀྱང་སྡིག་པའི་བཤེས་གཉེན་གྱི་དབང་དུ་གྱུར་ཏེ་རྟེན་ཅིང་གནས་ན་དེ་བཞིན་གཤེགས་པས་དེ་ལ་ཕན་གདགས་པའི་ཕྱིར་དགེ་བ་བཅུའི་ལས་ཀྱི་ལམ་བསྔགས་ཤིང་འཆད་དོ། །གང་ཟག་གང་ཞིག་དགེ་བའི་བཤེས་གཉེན་ལ་རྟེན་དུ་ཟིན་ཀྱང་ངན་ཅིང་གླེན་པའི་རང་བཞིན་ཅན་ལུག་བཞིན་དུ་ལྐུག་ཅིང་དགེ་བ་དང་མི་དགེ་བ་གང་ཡང་བརྡ་མི་ཕྲད་པ་དེ་ལ་དེ་བཞིན་གཤེགས་པས་ཕན་གདགས་པའི་ཕྱིར་ཁ་ཏོན་གོམས་པར་བྱ་བའི་ཕྱིར་བསྔགས་པ་འཆད་དོ། །གང་ཟག་གང་འདོད་ཆགས་ཀྱི་ནད་རྣམ་པ་སྣ་ཚོགས་ཀྱིས་ཡོངས་སུ་གཟིར་ཏེ། འདུས་བྱས་རྣམ་པ་སྣ་ཚོགས་ཀྱི་ལྟ་བས་མྱོས་པ་རྣམས་ལ་དེ་བཞིན་གཤེགས་པས་ཕན་གདགས་པའི་ཕྱིར་རྣམ་པར་གྲོལ་བ། ཚོལ་བ་ལ་ནི་འཁོར་བ་ལས་བྱུང་བར་བྱེད་པ་ཉན་ཐོས་ཀྱི་ཐེག་པ་འཕགས་པའི་བདེན་པ་བཞི་འཆད་དོ། །ཆད་པར་ལྟ་བ་ལ་ནི་རྟེན་ཅིང་འབྲེལ་བར་འབྱུང་བའི་བསྔགས་པ་འཆད་དོ། །རྟག་པར་ལྟ་བ་ལ་ནི་ཁམས་གསུམ་གྱི་སྲིད་པའི་རྒྱུན་འདི་དག་ནས་ཤི་འཕོས་ནས་གཞན་དུ་སྐྱེ་སྟེ། རྫ་མཁན་གྱི་འཁོར་ལོ་ལྟར་རྒྱུན་མི་འཆད་པར་འཁོར་བ་དང ། མི་རྟག་པ་ལ་སོགས་པའི་ཆོས་འཆད་དོ། །རིགས་ཀྱི་བུ་དེ་བཞིན་གཤེགས་པས་ཇི་སྐད་དུ་མིང་དང ། བརྡ་དང ། ཡི་གེ་དང ། ཚིག་དང ། སྒྲ་སྐད་ཀྱིས་བསྟན་པ་ཐམས་ཅད་འབྲས་བུ་མེད་ཅིང་དོན་མེད་པ་མ་ཡིན་ཏེ། ཀུན་ཀྱང་སེམས་ཅན་ཡོངས་སུ་སྨིན་པར་བྱ་བའི་དོན་དུ་མ་བསྟན་པ་མེད་དོ། །དེ་བས་ན 60.185b དེ་བཞིན་གཤེགས་པས་གསུངས་པའི་ཆོས་ལ་འཕྱ་ཞིང་སྐུར་ན་སེམས་ཅན་རྣམས་ཀྱི་ཡང་དག་པའི་ཆོས་གྱི་མིག་བཅར་བའི་སྡིག་པ་ཡིན་པས་མཚམས་མེད་པ་ལས་འདས་པ་འམ། མཚམས་མེད་པ་དང་འདྲ་བའི་ཁ་ན་མ་ཐོ་བའི་སྡིག་པ་ཚད་མེད་པ་ཐོབ་པར་འགྱུར་རོ། །གང་གིས་ངས་སེམས་ཅན་ལ་ཕན་པ་དང་བདེ་བའི་ཕྱིར་གསུངས་པའི་དམ་པའི་ཆོས་ཉན་ཐོས་ཀྱི་ཐེག་པ་ལ་བརྟེན་ཏེ་གསུངས་སམ། རང་སངས་རྒྱས་ཀྱི་ཐེག་པ་ལ་བརྟེན་ཏེ་གསུངས་སམ། ཐེག་པ་ཆེན་པོ་ལ་བརྟེན་ཏེ་གསུངས་པ་གང་ལ་ཡང་རུང ། འཕྱ་ཞིང་སྐུར་པ་འམ། བར་ཆད་དང་བགེགས་བྱས་སམ། ཆུང་ངུ་ན་ཚིགས་སུ་བཅད་པ་གཅིག་ཙམ་འཆབ་པའི་ལས་བྱས་ན་དེ་ནི་དམ་པའི་ཆོས་ལ་སྐུར་པ་ཡིན་པར་རིགས་པར་བྱ་སྟེ། འཕགས་པའི་ལམ་གྱི་ཡན་ལག་བརྒྱད་མེད་པར་བྱེད་པ། སེམས་ཅན་ཐམས་ཅད་ཀྱི་དམ་པའི་ཆོས་ཀྱི་མིག་ཉམས་པར་བྱེད་པ་ཡིན་པས་གང་ཟག་དེ་ནི་དེ་ལྟར་བདག་ཀྱང་དོན་མེད་པ་ཆེན་པོ་སྤྱོད་ལ། ཕ་རོལ་པོ་གཞན་དོན་མེད་པ་ཆེན་པོ་སྤྱོད་དུ་འཇུག་པའོ། །ཡང་གང་ཟག་དེ་ནི་ཁྲེལ་བ་དང ། ངོ་ཚ་བ་མེད་པའི་དགེ་འདུན་ལ་བརྟེན་ཅིང་དེ་བཞིན་གཤེགས་པའི་དམ་པའི་ཆོས་ལ་འཕྱ་ཞིང་སྐུར་པ་འདེབས་པའོ་ཞེས་བྱའོ། །རིགས་ཀྱི་བུ་གཞན་ཡང་དགེ་སློང་རྣམ་པ་བཞི་ཡོད་དོ། །བཞི་གང་ཞེ་ན། དོན་དམ་པའི་དགེ་སློང་དང ། ཀུན་རྫོབ་གྱི་དགེ་སློང་དང ། ལུག་ལྐུག་པ་ལྟ་བུའི་དགེ་སློང་དང ། ཁྲེལ་བ་དང་ངོ་ཚ་བ་མེད་པའི་དགེ་སློང་ངོ ། །དེ་ལ་ཇི་ལྟར་ན་དོན་དམ་པའི་དགེ་སློང་ཞེ་ན། འདི་ལྟ་སྟེ། སངས་རྒྱས་བཅོམ་ལྡན་འདས་སམ། བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་སློང་ཡོན་ཏན་ཆེན་པོ་དང་ལྡན་པ་ཆོས་ཐམས་ཅད་ལ་དབང་དུ་གྱུར་པ་འམ། རང་སངས་རྒྱས་ཀྱི་བྱང་ཆུབ་བམ། དགྲ་བཅོམ་པ་འམ། ཕྱིར་མི་འོང་བ་འམ། ལན་ཅིག་ཕྱིར་འོང་བ་འམ། རྒྱུན་དུ་ཞུགས་པ་སྟེ། གང་ཟག་རྣམ་པ་བདུན་པོ་འདི་དག་ནི་དོན་དམ་པའི་དགེ་སློང་དུ་བསྡུ་བ་དང ། 60.186a སྐྱེ་བོ་གང་ཁྱིམ་ན་གནས་ཤིང་སྐྲ་དང་ཁ་སྤུ་ཡང་མ་བྲེགས། ཆོས་གོས་ཀྱང་མི་གྱོན། རབ་ཏུ་བྱུང་བ་སོ་སོར་ཐར་པའི་ཚུལ་ཁྲིམས་ཐམས་ཅད་ཀྱང་མ་མནོས་གསོལ་བ་དང ། ཞུ་བའི་ལས་དང ། གསོ་སྦྱིན་དང ། ཚུལ་གྱི་ལས་ཐམས་ཅད་ཀྱི་ནང་དུ་མི་ཆུད་མོད་ཀྱི། འཕགས་པའི་ཆོས་དང་ལྡན་ལ་འཕགས་པའི་འབྲས་བུ་ཐོབ་པས་ན་དེ་ཡང་དོན་དམ་པའི་དགེ་སློང་དུ་བསྡུས་ཏེ། དེ་དག་ནི་དོན་དམ་པའི་དགེ་སློང་ཞེས་བྱའོ། །དེ་ལ་ཇི་ལྟར་ན་ཀུན་རྫོབ་ཀྱི་དགེ་སློང་ཞེ་ན། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་ཅིང་རབ་ཏུ་བྱུང་ལ་སོ་སོར་ཐར་པའི་ཚུལ་ཁྲིམས་དང་ལྡན་ན་དེ་ནི་ཀུན་རྫོབ་ཀྱི་དགེ་སློང་ཞེས་བྱའོ། །དེ་ལ་ཇི་ལྟར་ན་ལུག་ལྐུག་པ་ལྟ་བུའི་དགེ་སློང་ཞེ་ན། རྩ་བའི་སྡིག་ལ་སོགས་པ་ཉམས་སམ་མ་ཉམས་པ་ཡང་མི་ཤེས། ལྕི་བ་འམ་ཡང་བ་ཡང་མི་ཤེས་ཉེས་པ་ཕྲ་མོ་རྣམ་པ་སྣ་ཚོགས་བྱས་ཀྱང་འགྱོད་ཅིང་འཐོལ་མི་ཤེས། ཉེས་པ་བྱས་པ་ལ་སླ་གྱད་བྱེད་ཅིང་སྡིག་པ་ཕྲ་མོ་ལ་མི་ལྟ། མི་འཇིགས། མཁས་པའི་སྐྱེས་བུ་ལ་ནི་མི་སྟེན། སྐབས་སྐབས་སུ་མང་དུ་ཐོས་པ་ཤེས་རབ་དང་ལྡན་པ་ལ་བསྙེན་བཀུར་དང ། གཡོག་ཀྱང་མི་བྱེད། སྟི་སྟང་དང་བཅས་ཏེ་ཞུ་ཞིང་འདྲི་བ་ཡང་མི་ཤེས། དགེ་བ་ནི་གང ། མི་དགེ་བ་ནི་གང ། སྡིག་པ་ནི་གང ། སྡིག་པ་མེད་པ་ནི་གང་གང་བྱས་ན་ལེགས། གང་བྱས་ན་མ་ལེགས་པ་ཡང་ཞུ་བ་དང་འདྲི་བ་མི་བྱེད་པའི་གང་ཟག་དེ་དག་ནི་ལུག་ལྐུག་པ་ལྟ་བུའི་དགེ་སློང་དུ་བསྡུས་ཏེ། ལུག་ལྐུག་པ་ལྟ་བུའི་དགེ་སློང་ཞེས་བྱའོ། །དེ་ལ་ཇི་ལྟར་ན་ཁྲེལ་བ་དང ། ངོ་ཚ་བ་མེད་པའི་དགེ་སློང་གང་ཞེ་ན་སེམས་ཅན་གང་འཚོ་བ་ཙམ་གྱི་ཕྱིར་ངའི་བསྟན་པ་ལ་ཕྱོགས་ཏེ་རབ་ཏུ་བྱུང་ངོ ། །རབ་ཏུ་བྱུང་ནས་སོ་སོར་ཐར་པའི་ཚུལ་ཁྲིམས་སྲུང་བ་ཐམས་ཅད་ཉམས་ཏེ་ཁྲེལ་བ་དང་ངོ་ཚ་བ་མེད་ལ་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་མི་ལྟ། མི་འཇིགས། ཁོང་རུལ་ཅིང་བཙོག་པས་གང་བའི་སྲིན་ཀཝ་ལཝ་འདྲ་བ། དུང 60.186b གི་སྒྲ་ལ་ཁྱིའི་སྤྱོད་པ་དང་ལྡན་པ། རྟག་ཏུ་བརྫུན་སྨྲ་ཞིང་བདེན་པའི་ཚིག་མེད་པ། སེར་སྣ་དང་ཕྲག་དོག་དང ། གཏི་མུག་དང་ང་རྒྱལ་གྱིས་མངོན་པར་ཟིན་ཏེ་ལས་ཀྱི་མཆོག་དམ་པ་གསུམ་ལས་རིང་དུ་གྱུར་པ་ཁེ་དང་བཀུར་སྟི་དང་གྲགས་པ་ལ་ཆགས་ཏེ་ཡུལ་དྲུག་ལ་མོས་པ། འདོད་ཆགས་ཀྱིས་གཡེངས་པ། གཟུགས་དང ། སྒྲ་དང ། དྲི་དང ། རོ་དང ། རེག་བྱའི་ཡུལ་ལ་ཆགས་པའི་གང་ཟག་དེ་དག་ནི་ཁྲེལ་བ་དང ། ངོ་ཚ་བ་མེད་པ་དམ་པའི་ཆོས་ལ་འཕྱ་ཞིང་སྐུར་པའི་ནང་དུ་བསྡུས་ཏེ། དེ་ནི་ཁྲེལ་བ་དང་ངོ་ཚ་བ་མེད་པའི་དགེ་སློང་ཞེས་བྱའོ། །རིགས་ཀྱི་བུ་དོན་དམ་པའི་དགེ་སློང་ཞེས་བྱ་བ་ནི་ལ་ལ་འཕགས་པའི་ལམ་ལས་རྒྱལ་བའི་དགེ་སྦྱོང་གི་ནང་དུ་བསྡུ་བ་ཡང་ཡོད་དེ། ལམ་ལས་རྒྱལ་བ་ཞེས་བྱ་བ་ནི་གང་འཕགས་པའི་ལམ་གྱི་ཡན་ལག་བརྒྱད་ལ་གནས་ཤིང་བདག་ཀྱང་ཉོན་མོངས་པའི་ཆུ་བོ་ལས་སྒྲོལ་ལ་ཕ་རོལ་པོ་གཞན་དག་ཀྱང་སྒྲོལ་བའོ། །དེ་ཡང་ཇི་ལྟ་ཞེ་ན། སངས་རྒྱས་བཅོམ་ལྡན་འདས་དང ། རང་རྒྱལ་བ་དང ། དགྲ་བཅོམ་པ་སྟེ། གང་ཟག་རྣམ་པ་གསུམ་པོ་འདི་དག་ནི་སྲིད་པའི་ཡན་ལག་གི་འཁོར་ཐམས་ཅད་དང་རིང་དུ་གྱུར་པའི་ཕྱིར་འཕགས་པའི་ལམ་ལས་རྒྱལ་བ་ཞེས་བྱའོ། །གཞན་ཡང་བྱང་ཆུབ་སེམས་དཔའི་དགེ་འདུན་གཞན་གྱི་དྲིང་ལ་མི་འཇོག་པར་ཆོས་ཐམས་ཅད་ལ་ཡེ་ཤེས་ཀྱིས་ཐོགས་པ་མེད་པར་གཟིགས་ཤིང་སེམས་ཅན་ཐམས་ཅད་ལ་ཕན་པ་དང ། བདེ་བའི་དོན་གྱིས་སྡུད་པ་ཡང་ལམ་ལས་རྒྱལ་བའི་དགེ་སྦྱོང་གི་ནང་དུ་བསྡུའོ། །དོན་དམ་པའི་དགེ་སློང་དང ། ཀུན་རྫོབ་ཀྱི་དགེ་སློང་ཁ་ཅིག་ནི་ལམ་སྟོན་པའི་དགེ་སློང་གི་ནང་དུ་བསྡུའོ། །གང་སོ་སོར་ཐར་པའི་ཚུལ་ཁྲིམས་དང་ལྡན་ཞིང ། ཡང་དག་པའི་དགེ་བའི་སྐྱེ་བོ་ནས་འཇིག་རྟེན་གྱི་ཡང་དག་པར་ལྟ་བ་དང་ལྡན་པའི་བར་དུ་ཤེས་པ་བརྡ་སྤྲོད་པ་ལ་བརྟེན་ཏེ་ཆོ་འཕྲུལ་གྱི་མཐུས་གཞན་ལ་འཕགས་པའི་ལམ་གྱི་ཆོས་རྣམ་པར་ཕྱེ་སྟེ་སྟོན་ཅིང་འཆད་པའི་གང་ཟག་དེ་ནི་ལམ་སྟོན་པའི་དགེ 60.187a སྦྱོང་ཐ་མ་སྟེ། ལམ་སྟོན་པའི་དགེ་སྦྱོང་ཞེས་བྱའོ། །རྒྱུན་དུ་ཞུགས་པའི་འབྲས་བུ་ཐོབ་པའི་གང་ཟག་ནི་གཉིས་པ་ཞེས་བྱའོ། །ལན་ཅིག་ཕྱིར་འོང་བའི་འབྲས་བུ་ཐོབ་པའི་གང་ཟག་ནི་གསུམ་པ་ཞེས་བྱའོ་ཕྱིར་མི་འོང་བའི་འབྲས་བུ་ཐོབ་པའི་གང་ཟག་དེ་ནི་བཞི་པ་ཞེས་བྱའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་དགེ་འདུན་ནི་ལྔ་པ་ཞེས་བྱའོ། །ས་དང་པོ་ལ་གནས་པ་ནས་ས་བཅུ་དང་སྲིད་པ་ཐ་མའི་ལུས་ལ་གནས་པ་དེ་ཡང་ལམ་སྟོན་པའི་དགེ་སྦྱོང་གི་ནང་དུ་བསྡུའོ། །གང་སོ་སོར་ཐར་པའི་ཚུལ་ཁྲིམས་དང་ལྡན་ཞིང་སྤྱོད་ལམ་རྣམ་པར་དག་པ་དང་ལྡན་པ་དག་ནི་ལམ་གྱིས་འཚོ་བའི་དགེ་སྦྱོང་གི་ནང་དུ་བསྡུས་ཏེ། ལམ་གྱིས་སྲོག་འཛིན་པའི་ཕྱིར་ལམ་གྱིས་འཚོ་བའི་དགེ་སྦྱོང་ཞེས་བྱའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་སྡུད་ཅིང་ཕ་རོལ་དུ་ཕྱིན་པ་དྲུག་ལ་ནན་ཏན་བྱེད་པ་དང་ལྡན་པ་དེ་ཡང་ལམ་གྱིས་འཚོ་བ་ཞེས་བྱའོ། །དེ་ལྟར་ལམ་ལས་རྒྱལ་བ་དང ། ལམ་སྟོན་པ་དང ། ལམ་གྱིས་འཚོ་བའི་དགེ་སྦྱོང་རྣམ་པ་གསུམ་པོ་འདི་ནི་འཇིག་རྟེན་པའི་བསོད་ནམས་ཀྱི་ཞིང་ཡང་དག་པ་ཞེས་བྱའོ། །དེ་ལས་གཞན་པའི་དགེ་སྦྱོང་དག་ནི་ལམ་སུན་འབྱིན་པ་ཞེས་བྱ་སྟེ། ཡང་དག་པ་མ་ཡིན་མོད་ཀྱི་དེ་ཡང་བསོད་ནམས་ཀྱི་ཞིང་གི་གྲངས་སུ་འགྲོའོ། །གང་འཛེམ་པ་དང་ངོ་ཚ་བ་མེད་པའི་དགེ་འདུན་ལ་གནས་ཤིང་བརྟེན་པའི་གང་ཟག་དེ་ནི་ངས་ཡང་དག་པར་བསྟན་པའི་འདུལ་བའི་ཆོས་ལས་མི་རོ་ལྟ་བུའོ་ཞེས་གསུངས་སོ། །ཡོངས་སུ་དག་པའི་དགེ་འདུན་གྱི་རྒྱ་མཚོ་ལས་དབྱུང་བར་བྱ་བ་ཆོས་ཀྱི་སྣོད་མ་ཡིན་པས་ན་གང་ཟག་དེ་ལ་ང་ནི་སྟོན་པ་ཡིན་ནོ་ཞེས་མི་གསུངས་ལ་གང་ཟག་དེ་ཡང་ངའི་ཉན་ཐོས་མ་ཡིན་ནོ། །ངོ་ཚ་མེད་པའི་དགེ 60.187b སློང་ཆོས་ཀྱི་སྣོད་དུ་མ་གྱུར་པ་དག་ང་ལ་སྟོན་པར་འཛིན་ཅིང ། ངའི་རིང་བསྲེལ་དང ། ངའི་སྐུ་གཟུགས་བརྙན་ལ་ཤིན་དུ་དད་པ་དང ། ངའི་ཆོས་དང་དགེ་འདུན་དང ། འཕགས་པའི་ཚུལ་ཁྲིམས་ལ་ཡང་ཤིན་དུ་དད་པས་བདག་ཀྱང་ལྟ་བ་ངན་པར་མི་འཛིན་ལ་ཕ་རོལ་པོ་གཞན་ཡང་ལྟ་བ་ངན་པ་ལ་ཆགས་པར་མི་བྱེད་པ་དང ། ངས་བསྟན་པའི་ཆོས་རྒྱས་པར་སྟོན་ཏེ། ཤིན་དུ་བསྔགས་ཤིང་བསྟོད་པ་བྱེད་ཀྱི། དེ་ལ་འཕྱ་བ་འམ། སྐུར་པ་མི་འདེབས་པ་དང ། རྟག་ཏུ་ཡང་དག་པའི་སྨོན་ལམ་འདེབས་པ་དང ། སྡིག་པ་བྱས་མ་ཐག་ཏུ་ཡང་དང་ཡང་འཐོལ་ཅིང་འགྱོད་དེ་སྤོང་ན་ལས་ཀྱི་སྒྲིབ་པ་མང་པོ་ཞི་བར་འགྱུར་ཏེ། དེ་ལྟར་གང་ཟག་དེ་དཀོན་མཆོག་གསུམ་དང ། འཕགས་པའི་ཚུལ་ཁྲིམས་ལ་དད་པའི་ཤུགས་ཀྱིས་མུ་སེགས་ཅན་དགུ་བཅུ་རྩ་ལྔ་བས་བརྒྱ་སྟོང་སྙེད་ཀྱིས་ལྷག་གོ། །མྱུར་དུ་མྱ་ངན་ལས་འདའ་བའི་གྲོང་ཁྱེར་དུ་ཕྱིན་པ་ནི་མ་ཡིན་མོད་ཀྱི་འཁོར་ལོས་སྒྱུར་བའི་རྒྱལ་པོས་ཀྱང་མི་སྐུར་ན། དེ་མ་ཡིན་པ་སྐྱེ་བོ་གཞན་ལྟ་སྨོས་ཀྱང་ཅི་དགོས་དེ་བས་ན་དེ་བཞིན་གཤེགས་པས་སེམས་ཅན་ཐམས་ཅད་ལས་དང་མྱོང་བའི་ཆོས་ཀྱི་མཚན་ཉིད་རྣམ་པ་ཐ་དད་པར་མཁྱེན་ཅིང་གཟིགས་པའི་ཕྱིར་གང་འདི་སྐད་དུ་ངའི་བསྟན་པའི་ཆོས་ལ་དད་ནས་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་གྱོན་པ་ལ་རྒྱལ་རིགས་ལ་སོགས་པ་གཤེ་ཞིང་སྤྱོ་བ་དང ། ཆད་པས་གཅད་དུ་མི་དབང་ངོ་ཞེས་གསུངས་ཏེ། གང་གིས་བརྙས་སྨད་དམ། རབ་ཏུ་བྱུང་བ་ཐམས་ཅད་ལ་གཤེ་ཞིང་སྤྱོས་སམ། ཆད་པས་བཅད་ན་ཁ་ན་མ་ཐོ་བའི་འབྲས་བུ་སྨིན་པ་ནི་ཇི་ལྟར་རྒྱས་པར་བཤད་པ་བཞིན་ནོ། །གཞན་ཡང་ངའི་བསྟན་པ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་ན། དེ་ལ་འདས་པ་དང ། མ་བྱོན་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཐུགས་རྗེས་རྗེས་སུ་འཛིན་ཏོ། །སྤྱོད་ལམ་དང ། ཆ་ལུགས་དང ། 60.188a ཆོས་གོས་གྱོན་པ་ལ་ཡང་འདས་པ་དང ། མ་བྱོན་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་ཐུགས་རྗེས་རྗེས་སུ་འཛིན་ཏོ། །དེ་བས་ན་སྐྲ་དང་ཁ་སྤུ་བྲགས་ཏེ་གོས་ངུར་སྨྲིག་གྱོན་པའི་རབ་ཏུ་བྱུང་བ་ལ་བརྙས་སྨད་ན། དེ་ནི་འདས་པ་དང ། མ་བྱོན་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ལ་བརྙས་སྨོད་པ་ཡིན་ནོ། །དེའི་རྒྱུ་དེའི་རྐྱེན་གྱིས་མཁས་པས་བློ་ཅན་སྡུག་བསྔལ་གྱིས་སྐྱོ་ཞིང་འཇིགས་པ། ལྷ་དང ། མི་དང ། མྱ་ངན་ལས་འདའ་བའི་བདེ་བ་འདོད་པ་དག་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་སྐྲ་དང་ཁ་སྤུ་བྲགས་ནས་གོས་ངུར་སྨྲིག་གྱོན་པ་ལ་བརྙས་པ་དང ། སྨོད་པ་མི་བྱའོ། །གང་ངོ་ཚ་བ་མེད་པའི་དགེ་སྦྱོང་ཚུལ་ཁྲིམས་ཉམས་པ་ཐེག་པ་གསུམ་གྱི་འཕགས་པའི་ཆོས་ཀྱི་སྣོད་དུ་མ་གྱུར་པ་བདག་ཉིད་ལྟ་བ་ངན་པའི་སྡིག་པ་ལ་མངོན་པར་ཞེན་ཏེ། གཞན་ཡང་ལྟ་བ་ངན་པའི་སྡིག་པ་ལ་ཆགས་པར་བྱེད་པ་དེ་ལ་རྒྱལ་རིགས་དགེ་བ་དང ། དགེ་སྦྱོང་དང ། བྲམ་ཟེ་དང ། བློན་པོ་དང་ཁྱིམ་བདག་དང་ཚོང་དཔོན་དང་རྗེའུ་རིགས་དང ། དམངས་རིགས་དང ། སྐྱེས་པ་དང ། བུད་མེད་དག་མེད་དོ་ཞེས་སྨྲ་བ་དང ། གཞན་ཡང་འཇིག་རྟེན་ན་ཕ་ཡང་མེད། མ་ཡང་མེད་པ་ནས། དགེ་བ་དང་མི་དགེ་བ་དང ། རྣམ་པར་སྨིན་པའི་འབྲས་བུ་ཡང་མེད། འཕགས་པའི་ལམ་གྱི་འབྲས་བུ་ཐོབ་པ་ཡང་མེད་དོ་ཞེས་སྨྲ་བ་དང ། ཆོས་ཐམས་ཅད་རྒྱུ་ལས་སྐྱེས་པ་མ་ཡིན་ནོ་ཞེས་སྨྲ་བ་དང ། གཞན་ཡང་གཟུགས་ཡོད་པའི་ཁམས་ནི་རྟག་པ་ཡིན་གྱི་འཇིག་པའི་ཆོས་མ་ཡིན་པར་འཛིན་པ་དང ། གང་གཟུགས་མེད་པའི་ཁམས་ནི་རྟག་པ་ཡིན་གྱི། འཇིག་པའི་ཆོས་མ་ཡིན་པར་འཛིན་པ་དང ། ལ་ལ་ནི་མུ་སྟེགས་ཅན་གྱི་བརྟུལ་ཤུགས་ཀྱིས་མཐར་ཕྱིན་པའི་རྣམ་པར་དག་པ་ཐོབ་པར་འཛིན་ཏོ། །ལ་ལ་ནི་ཉན་ཐོས་ཀྱི་ཐེག་པ་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོས་མ 60.188b ཡིན་པར་འཛིན་ཏེ། ཉན་ཐོས་ཀྱི་ཐེག་པ་ལ་དད་ཅིང་ཡིད་ཆེས་ནས་བསྔགས་ཤིང་བསྟོད་པ་དང ། འབྱེད་ཅིང་སྟོན་གྱི། རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོ་ལ་འཕྱ་ཞིང་སྐུར་པ་འདེབས་པ་དང ། སྨོད་ཅིང་བར་ཆད་བྱེད་པ་བགེགས་བྱེད་དེ་སྟོན་དུ་མི་སྟེར་བ་ཡང་ཡོད་དོ། །ལ་ལ་ནི་རང་སངས་རྒྱས་ཀྱི་ཐེག་པ་འབའ་ཞིག་གིས་མཐར་ཕྱིན་པའི་རྣམ་པར་དག་པ་འཐོབ་ཀྱི། ཉན་ཐོས་ཀྱི་ཐེག་པ་དང ། ཐེག་པ་ཆེན་པོས་མ་ཡིན་པར་འཛིན་ཏེ། རང་སངས་རྒྱས་ཀྱི་ཐེག་པ་ལ་དད་ཅིང་ཡིད་ཆེས་ཏེ་བསྟོད་ཅིང་བསྔགས་པ་དང ། འབྱེད་ཅིང་སྟོན་གྱི་ཉན་ཐོས་ཀྱི་ཐེག་པ་དང ། ཐེག་པ་ཆེན་པོ་ལ་འཕྱ་ཞིང་སྐུར་པ་འདེབས་པ་དང ། སྨོད་ཅིང་བར་ཆད་བྱེད་པ་ལ་བགེགས་བྱེད་དེ་སྟོན་དུ་མི་སྟེར་བ་ཡང་ཡོད་དོ། །ལ་ལ་ནི་ཐེག་པ་ཆེན་པོ་འབའ་ཞིག་གིས་མཐར་ཕྱིན་པའི་རྣམ་པར་དག་པ་འཐོབ་ཀྱི། ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐག་པས་མ་ཡིན་པར་འཛིན་ཏེ། ཐེག་པ་ཆེན་པོ་ལ་བདག་དད་ཅིང་ཡིད་ཆེས་པས་ཕ་རོལ་གཞན་ཡང་དད་ཅིང་ཡིད་ཆེས་པར་བྱེད། བདག་རིམ་གྲོ་དང ། བཀུར་སྟི་བྱེད་པས་ཕ་རོལ་པོ་གཞན་ཡང་རིམ་གྲོ་དང ། བཀུར་སྟི་བྱེད་དུ་འཛུད། བདག་དེ་ལ་བསྟོད་ཅིང་བསྔགས་པས་ཕ་རོལ་པོ་གཞན་ཡང་བསྟོད་ཅིང་བསྔགས་སུ་བཅུག་པ་དག་གླེགས་བམ་དུ་བྲིས་པས་ཕ་རོལ་པོ་གཞན་ཡང་གླེགས་བམ་དུ་འདྲིར་བཅུག་བདག་ཀློག་ཅིང་འདོན་པས་ཕ་རོལ་པོ་གཞན་ཡང་ཀློག་ཅིང་འདོན་དུ་འཇུག་བདག་ཉན་ཅིང་འཛིན་པས་ཕ་རོལ་པོ་གཞན་དག་ཀྱང་ཉན་ཅིང་འཛིན་དུ་བཅུག་།བདག་སེམས་ཤིང་ཡིད་ལ་བྱེད་པས་ཕ་རོལ་པོ་གཞན་ཡང་སེམས་ཤིང་ཡིད་ལ་བྱེད་དུ་བཅུག་སྟེ། སྐྱེ་བོ་ཆོས་ཀྱི་སྣོད་དུ་གྱུར་པ་འམ། སྣོད་དུ་མ་གྱུར་པ་ཡང་རུང་ཐམས་ཅད་ལ་ཐེག་པ་ཆེན་པོ་དོན་དམ་པ་ཤིན་དུ་ཟབ་པ་ཕྲ་བ་རྣམ་པར་འབྱེད་ཅིང་སྟོན་ཏེ་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་ལ་འཕྱ་ཞིང་སྐུར་པ་འདེབས་པ་དང་སྨོད་ཅིང་བགེགས་དང་བར་ཆད 60.189a བྱེད་དེ་སྟོན་དུ་མི་སྟེར་བ་དང ། བདག་མ་དད་པས་གཞན་དད་པ་སྐྱེ་བའི་བགེགས་བྱེད་པ་དང ། བདག་རིམ་གྲོ་མི་བྱེད་པས་གཞན་རིམ་གྲོ་བྱེད་པའི་བགེགས་བྱེད་པ་དང ། བདག་མི་སྟོད་པས་གཞན་སྟོད་པའི་བགེགས་བྱེད་པ་དང ། བདག་གླེགས་བམ་དུ་མི་འདྲི་བས་གཞན་གླེགས་བམ་དུ་འབྲི་བའི་བགེགས་བྱེད་པ་དང ། བདག་ཀློག་པ་དང ། འདོན་པ་དང ། ཉན་པ་དང ། འཛིན་པ་དང ། ཤེས་པ་དང ། ཡིད་ལ་མི་བྱེད་པས་གཞན་ཀློག་པ་དང ། འདོན་པ་དང ། ཉན་པ་དང ། འཛིན་པ་དང ། སེམས་པ་དང ། ཡིད་ལ་བྱེད་པའི་བགེགས་བྱེད་དེ། ཐེག་པ་གཉིས་ཀྱི་ཆོས་མི་སྟོན་པ་ཡང་ཡོད་དོ། །ལ་ལ་ནི་སྦྱིན་པ་འབའ་ཞིག་བྱས་པས་མཐར་ཕྱིན་པའི་རྣམ་པར་དག་པ་འཐོབ་ཀྱི། ཚུལ་ཁྲིམས་ཀྱིས་མ་ཡིན། བཟོད་པས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་ཚུལ་ཁྲིམས་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། སྦྱིན་པ་དང ། བཟོད་པས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་བཟོད་པ་འབའ་ཤིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། སྦྱིན་པ་དང ། ཚུལ་ཁྲིམས་ཀྱིས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་བརྩོན་འགྲུས་འབའ་ཤིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི་སྦྱིན་པ་དང ། ཚུལ་ཁྲིམས་ཀྱིས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་བསམ་གཏན་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི་སྦྱིན་པ་དང ། ཚུལ་ཁྲིམས་ཀྱིས་མ་ཡིན་པ་ནས་ཤེས་རབ་ཀྱི་བར་དུ་མ་ཡིན་པར་འཛིན་ཏོ། །ལ་ལ་ནི་ཤེས་རབ་འབའ་ཞིག་གིས་མཐར་ཕྱིན་པའི་རྣམ་པར་དག་པ་ཐོབ་ཀྱི། སྦྱིན་པ་དང ། ཚུལ་ཁྲིམས་ཀྱིས་མ་ཡིན་པ་ནས་བསམ་གཏན་གྱི་བར་དུ་མ་ཡིན་པར་འཛིན་ཏོ། །ལ་ལ་ནི་འཇིག་རྟེན་གྱི་བཟོ་རྩལ་རྣམ་པ་སྣ་ཚོགས་སྦྱངས་ཤིང་ཤེས་པས་མཐར་ཕྱིན་པའི་རྣམ་པར 60.189b དག་པ་ཐོབ་པར་འཛིན་ཏོ། །ལ་ལ་ནི་བྲག་ལས་མཆོང་བ་དང ། མེ་མ་མུར་དུ་མཆོང་བ་དང ། སྨྱུང་བ་ལ་སོགས་པའི་བརྟུལ་ཤུགས་ཀྱི་རྣམ་པ་མང་པོས་མཐར་ཕྱིན་པའི་རྣམ་པར་དག་པ་ཐོབ་པར་འཛིན་ཏེ་སྟོན་ཏོ། །རིགས་ཀྱི་བུ་དེ་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ཆོས་ཀྱི་སྣོད་མ་ཡིན་པ་དེས་བརྫུན་རྣམ་པ་སྣ་ཚོགས་ཀྱིས་ཡང་དག་པའི་ཆོས་ཀྱི་སྣོད་ཀུན་བསླུས་ཏེ་སྐྱེ་བོ་མང་པོ་ལྟ་བ་ངན་པ་ལ་བལྟར་བཙུད་དོ། །དེ་ལྟར་དེ་དག་ཕྱིན་ཅི་ལོག་ཏུ་ངན་པར་ལྟ་བའི་དབང་གིས་རྒྱལ་རིགས་དགེ་བ་ནས་རྗེའུ་རིགས་དང ། དམངས་རིགས་དང ། སྐྱེས་པ་དང ། བུད་མེད་ལ་སོགས་པ་དད་པ་ཡོངས་སུ་དག་པ་དག་མ་རུང་བར་བྱས་ནས་ཚུལ་ཁྲིམས་དང ། ཐོས་པ་དང ། སྦྱིན་པ་དང ། ཤེས་རབ་ཀྱང་ཉམས་པར་བྱས་ཏེ། རྒྱལ་རིགས་གདོལ་པ་ཅན་ནས་རྗེའུ་རིགས་གདོལ་པ་ཅན་གྱི་བར་དུ་ཐམས་ཅད་གདོལ་པ་ཅན་དུ་བསྒྱུར་བས་དེ་དག་ནི་ཆོས་ཀྱི་སྣོད་མ་ཡིན་ཏེ། ཚུལ་ཁྲིམས་ཉམས་པའི་དགེ་སློང་དང ། རྒྱལ་རིགས་གདོལ་པ་ཅན་ལ་སོགས་པ་སྟོན་པ་དང་སློབ་མར་བཅས་ཏེ། དགེ་བའི་རྩ་བ་བཅད་པས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་རོ། །རིགས་ཀྱི་བུ་ཇི་ལྟར་མི་རོ་བམ་ནས་རུལ་ཅིང་ཞིག་པ་ལས་འགྲོ་བ་ཐམས་ཅད་ཀྱི་ཡིད་དུ་མི་འོང་ཞིང་སྣར་མནམ་པ་རེག་མ་ཐག་ཏུ་འཇིག་པ་དང་ཉེ་འམ། འབགས་ན་མནམ་པ་བཞིན་དུ་རྒྱལ་རིགས་དགེ་བ་ནས་དམངས་རིགས་དགེ་བའི་བར་དུ་ཚུལ་ཁྲིམས་ཉམས་པ། སྡིག་པ་སྤྱོད་པ། ཆོས་ཀྱི་སྣོད་མ་ཡིན་པ་དེ་ལྟ་བསྙེན་ཏམ་འགྲོགས་སམ། ལྷན་ཅིག་གནས་སམ། ལས་ལྷན་ཅིག་བྱེད་ན་དེ་མ་ཐག་ཏུ་ངན་པར་ལྟ་བ་བཙོག་ཅིང་མནམ་པ་གོས་པར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་རྒྱལ་རིགས་དགེ་བ་ནས་དམངས་རིགས 60.190a དགེ་བའི་བར་དུ་དད་པ་དང ། ཚུལ་ཁྲིམས་དང ། ཐོས་པ་དང ། སྦྱིན་པ་དང ། ཤེས་རབ་ཀུན་ཉམས་ཏེ། གདོལ་པ་ཅན་དུ་གྱུར་པས་དེ་ནི་སྟོན་པ་དང་སློབ་མར་བཅས་ཏེ་དགེ་བའི་རྩ་བ་བཅད་པས་ན་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་རོ། ་་་་་་་་ ། བམ་པོ་དྲུག་པ། རིགས་ཀྱི་བུ་དེ་ལྟར་རྒྱལ་རིགས་ལ་སོགས་པ་སྐྱེ་བོ་ཚད་མེད་པ་ཚུལ་ཁྲིམས་ཉམས་པ་སྡིག་པ་སྤྱོད་པ། ཆོས་ཀྱི་སྣོད་མ་ཡིན་པའི་དགེ་སློང་བསྟེན་པས་དགེ་བའི་ཆོས་ཐམས་ཅད་ཉམས་པ་ནས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་བ་ལ་ལྟོས་དེ་བས་ན་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བདེ་བའི་བར་དུ་འདོད་པ་དག་ལམ་ལས་རྒྱལ་བའི་དགེ་སྦྱོང་ལ་བསྙེན་བཀུར་དང ། མཆོད་པ་དང ། བཀུར་སྟི་བྱས་ཏེ་ཐེག་པ་གསུམ་གྱི་ཆོས་ཀྱི་མདོ་མཉན་པར་གསོལ་བ་གདབ་བོ། །གཞན་ཡང་ལམ་སྟོན་པ་ནས་ལམ་གྱིས་འཚོ་བའི་དགེ་སྦྱོང་བཙལ་བར་བྱའོ། །ལམ་དེ་གསུམ་ལ་གནས་པའི་དགེ་སྦྱོང་མེད་ན་ཡང་ལམ་སུན་འབྱིན་པའི་དགེ་སྦྱོང་བཙལ་བར་བྱའོ། །ཚུལ་ཁྲིམས་ཉམས་མོད་ཀྱི། ཡང་དག་པར་ལྟ་བ་དང ། མོས་པ་དང ། ལྷག་པའི་སྤྱོད་པ་དང་ལྡན་པས་དེ་ལ་ནི་བསྙེན་བཀུར་དང ། མཆོད་པ་དག་བྱོས་ལ་ཐེག་པ་གསུམ་གྱི་དོན་དྲི་བར་བྱའི་ལྷག་པའི་སྤྱོད་པ་དང ། མོས་པ་དང་ལྟ་བ་ཀུན་ཉམས་པ་ལ་ནི་བསྙེན་བཀུར་དང ། མཆོད་པ་བྱ་བ་མ་ཡིན་ནོ། །ཚུལ་ཁྲིམས་ཉམས་པ་དག་ཚུལ་ཁྲིམས་ཉམས་མོད་ཀྱི་ལོག་པར་མི་ལྟ་ལ། མོས་པ་དང ། ལྷག་པའི་སྤྱོད་པ་དང་ལྟ་བར་ལྡན་པས་ན་དེ་དང་དེ་གང་ན་བར་སོང་སྟེ་ཉན་ཐོས་ཀྱི་ཐེག་པའི་ཆོས་དང ། རང་སངས་རྒྱས་ཀྱི་ཐེག་པའི་ཆོས་དང ། ཐེག་པ་ཆེན་པོའི་ཆོས་ཞུ་ཞིང་མཉན་པར་བྱའི་བརྙས་ཤིང་སྨད་པར་མི་བྱའོ། །ཐེག་པ་གསུམ་ལས་གང་ཡང་རུང་བ་ཅིག་ལ་དད་དེ་སྨོན་ལམ་འདེབས་ཤིང་བརྩོན་འགྲུས་རྩོམ་ཞིང་རྗེས་སུ་སློབ་ཀྱང་ཐེག་པ་གཞན་ལ་ཡང་བརྙས་པ་དང་སྨད་པར་མི་བྱའོ། །གང་གིས་ཐེག 60.190b པ་གསུམ་ལས་ཐེག་པ་གང་ཡང་རུང་སྟེ། གཅིག་གི་ཚིགས་སུ་བཅད་པ་གཅིག་ཙམ་ལ་བརྙས་སྨོད་པ་དེ་ལ་ནི་བསྙེན་བཀུར་མི་བྱ་མི་བསྙེན་མི་འགྲོགས་ལྷན་ཅིག་ཏུ་མི་གནས་ལས་འཐུན་པར་མི་བྱའོ། །གང་གིས་དེ་ལ་བསྙེན་བཀུར་བྱེད་ཅིང་བསྟེན་ཏམ་འགྲོགས་སམ་ལྷན་ཅིག་ཏུ་གནས་སམ་ལས་ལྷན་ཅིག་བྱེད་ན་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་དེ་བས་ན་ཐེག་པ་གསུམ་ལས་གང་ཡང་རུང་བ་གཅིག་ལ་གནས་ཏེ། འཁོར་བ་ལས་འདའ་ཞིང་རབ་ཏུ་བདེ་བ་ལ་མོས་ཏེ། སྡུག་བསྔལ་གྱི་སྐྱོ་བ་དག་དེ་བཞིན་གཤེགས་པས་གསུངས་པའི་དམ་པའི་ཆོས་ཉན་ཐོས་ཀྱི་ཐེག་པ་ལ་བརྟེན་ཏེ་གསུངས་པ་དང ། རང་སངས་རྒྱས་ཀྱི་ཐེག་པ་ལ་བརྟེན་ཏེ་གསུངས་པ་དང ། ཐེག་པ་ཆེན་པོ་ལ་བརྟེན་ཏེ་གསུངས་པ་ཀུན་ལ་དད་ཅིང་ཤིན་དུ་བཀུར་སྟི་བྱའི། དེ་ལ་འཕྱ་ཞིང་སྐུར་པ་འདེབས་པ་དང ། བར་ཆད་དང ། བགེགས་དང་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་བགེགས་ཀྱང་མ་བྱེད་ཅིག་རྟག་ཏུ་སྟི་སྟང་དང་བཅས་ཏེ་ཀློག་པ་དང་འདོན་པ་དང་ཉན་པ་ལ་ཤིན་དུ་བརྟེན་པའི་ཡི་དམ་བཅས་ཏེ་རྟོགས་པར་བྱའོ། །ཐེག་པ་གསུམ་ལས་གང་ཡང་རུང་བའི་ཆོས་གཅིག་ལ་འཕྱ་ཞིང་སྐུར་ན་དེ་དང་ལྷན་ཅིག་ཏུ་མི་གནས་ཆུང་ངུ་ན་ཞགཅིག་ཙམ་ཡང་བསྙེན་བཀུར་དང་ཆོས་མཉན་པར་མི་བྱའོ། །སེམས་ཅན་གང་ཞིག་ཐེག་པ་གསུམ་ལས་ཐེག་པ་གཅིག་ཙམ་ལ་འཕྱ་ཞིང་སྐུར་ཏམ། ཐེག་པ་གསུམ་ལ་འཕྱ་ཞིང་སྐུར་པའི་གང་ཟག་ལ་བརྟེན་ཏེ་འདྲི་བ་དང་ཉན་པ་བྱས་ན། དེའི་རྒྱུ་དེའི་རྐྱེན་གྱིས་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ཞིང་སྡུག་བསྔལ་ཆེན་པོ་མྱོང་བར་འགྱུར་ཏེ་རབ་ཏུ་ཐར་བར་དཀའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ང་སྔོན་འདས་པའི་དུས་ན་བྱང་ཆུབ་སེམས་དཔའི་སྤྱད་པ་སྤྱོད་ཅིང་བླ་ན་མེད་པའི་ཡེ་ཤེས་ཚོལ་བ་ལ་བརྩོན་པས་ནན་ཏན་བྱེད་པ་ན་བར་བར་ནི་ཉན་ཐོས་ཀྱི་ཐེག་པ་དང་ལྡན་པའི་དམ་པའི་ཆོས་འདོད་པའི་ཕྱིར་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་ཕྱིར་ཡང་ལུས་ཀྱི་ཡན་ལག་ལག་པ་དང ། རྐང་པ་དང ། ཤ་དང་ཁྲག་དང ། ལྤགས་པ་དང ། རུས་པ་དང ། མགོ་དང ། མིག་དང་རྐང་དང་ཀླད་པའི་བར་དུ་ཡོངས་སུ་གཏོང་ངོ ། །བར་བར་ནི 60.191a རང་སངས་རྒྱས་ཀྱི་ཐེག་པ་ལ་བརྟེན་ཏེ་གསུངས་པའི་དམ་པའི་ཆོས་འདོད་པའི་ཕྱིར་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་ཕྱིར་ཡང་ལུས་ཀྱི་ཡན་ལག་ལག་པ་དང ། རྐང་པ་དང ། ཤ་དང ། ཁྲག་དང ། ལྤགས་པ་དང ། རུས་པ་དང ། མགོ་དང ། མིག་དང ། རྐང་དང ། ཀླད་པའི་བར་དུ་ཡོངས་སུ་གཏོང་ངོ ། །བར་བར་ནི་ཐེག་པ་ཆེན་པོ་ལ་བརྟེན་ཏེ་གསུངས་པའི་དམ་པའི་ཆོས་འདོད་པའི་ཕྱིར་ཆུང་ངུ་ན་ཚིགས་སུ་བཅད་པ་གཅིག་ཙམ་གྱི་ཕྱིར་ཡང་ལུས་ཀྱི་ཡན་ལག་ལག་པ་དང ། རྐང་པ་དང ། ཤ་དང ། ཁྲག་དང ། ལྤགས་པ་དང ། རུས་པ་དང ། མགོ་དང ། མིག་དང ། རྐང་དང ། ཀླད་པའི་བར་དུ་ཡོངས་སུ་གཏོང་ངོ ། །དེ་ལྟར་དཀའ་བ་སྤྱད་པས་ཐེག་པ་གསུམ་ལ་ཆུང་ངུ་ན་ཚིགས་སུ་བཅད་པ་གཅིག་ཙམ་རྙེད་ན་ཤིན་དུ་དགའ་རངས་ཏེ་སྟི་སྟང་དང་བཅས་པས་འཆང་ཞིང་གཟུངས་སུ་འཛིན་ལ་ཇི་སྐད་གསུངས་པ་བཞིན་དུ་སྤྱོད་དེ། ཅུང་ཟད་ཀྱང་མི་གཏོང་བས་བསྐལ་པ་ཚད་མེད་པའི་བར་དུ་ཤིན་དུ་སྤྱད་དཀའ་བ་ཐམས་ཅད་སྤྱད་པས་གདོད་མཐའི་ལས་བྱས་པས་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་གྱུར་ཏོ། །གཞན་ཡང་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་ཐེག་པ་གསུམ་གྱི་དམ་པའི་ཆོས་ལས་རྣམ་པར་ཕྱེ་སྟེ་བཤད་དོ། །དེ་ལྟ་བས་ན་དེ་ལ་འཕྱ་ཞིང་སྐུར་པ་དང ། བར་ཆད་དང ། བགེགས་དང ། ཆུང་ངུ་ན་ཚིགས་སུ་བཅད་པ་གཅིག་ཙམ་ཡང་འཆབ་པར་མི་བྱའོ། །དེ་ལ་རྟག་ཏུ་བཀུར་སྟི་དང་བཅས་པས་ཀློག་པ་དང ། འདོན་པ་དང་ཉན་པར་ཤིན་དུ་བརྟན་པའི་ཡི་དམ་བཅའོ། །རིགས་ཀྱི་བུ་འདི་ལྟར་ཐེག་པ་གསུམ་པོའི་དམ་པའི་ཆོས་འདི་ནི་འདས་པ་དང ། མ་འོངས་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཀླུང་གང་གཱའི་བྱེ་མ་དང་མཉམ་པ་ཐམས་ཅད་ཀྱིས་འཐུན་པར་གསུངས་ཏེ། བྱིན་གྱི་བརླབས་ཀྱིས་ཐམས་ཅད་བྱིན་གྱིས་རློབ་བོ། །སེམས་ཅན་ཐམས་ཅད་འཁོར་བའི་སྡུག་བསྔལ་ཆེན་པོ་ལས་གདོན་ཅིང་བསྒྲལ་བ་དང ། དཀོན་མཆོག་གསུམ་གྱི་གདུང་རྒྱུན་མི་འཆད 60.191b པར་བྱ་བའི་ཕྱིར་ཡོངས་སུ་གཟུང་བ་ཡིན་ནོ། །དེ་བས་ན་ཐེག་པ་གསུམ་གྱི་དམ་པའི་ཆོས་ལ་ཐམས་ཅད་ཀྱིས་དད་ཅིང་བཀུར་སྟི་བྱའི། དེ་ལ་འཕྱ་ཞིང་སྐུར་པ་འདེབས་པ་དང ། བར་ཆད་དང ། བགེགས་མི་བྱ་སྟེ། ཐེག་པ་གསུམ་གྱི་དམ་པའི་ཆོས་ལས་ཚིགས་སུ་བཅད་པ་གཅིག་ཙམ་མེད་པར་བྱས་ན་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང ། བྲམ་ཟེ་གདོལ་པ་ཅན་དང ། བློན་པོ་གདོལ་པ་ཅན་དང ། ཁྱིམ་བདག་གདོལ་པ་ཅན་དང ། དགེ་སྦྱོང་གདོལ་པ་ཅན་དང ། ཚོང་དཔོན་གདོལ་པ་ཅན་དང ། རྗེའུ་རིགས་དང་དམང་རིགས་གདོལ་པ་ཅན་གྱི་སྐྱེས་པ་འམ། བུད་མེད་དེ་དག་གཡོ་དང་སྒྱུས་འཚོ་ཞིང་གླན་པ་གཏི་མུག་ཅན་ཅུང་ཟད་ཙམ་གྱི་ཤེས་པ་སྙེམས་པ། རང་བཞིན་གྱིས་གཏུམ་པ་ཁྲོ་བ། སྤྲོ་ཐུང་བ་བརླང་བ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ། སྲོག་གཅོད་པ་ལ་དགའ་བ་ནས་ལོག་པར་ལྟ་བ་དང ། སེར་སྣ་དང ། ཕྲག་དོག་དང ། འཇུངས་པ་དང ། འདོད་ཆགས་ཀྱི་བར་དུ་དགའ་ཞིང་དགེ་བའི་བཤེས་གཉེན་ལ་རྒྱབ་ཀྱིས་ཕྱོགས་ནས་སྡིག་པའི་བཤེས་གཉེན་ལ་བསྟེན་པ་ཐེག་པ་གསུམ་གྱི་འཕགས་པའི་ཆོས་ཀྱི་སྣོད་མ་ཡིན་པ་དག་ཉན་ཐོས་ཀྱི་ཐེག་པའི་ཆོས་ཅུང་ཟད་ཐོས་པས་སངས་རྒྱས་ཀུན་གྱིས་ཡོངས་སུ་བཟུང་བའི་རང་སངས་རྒྱས་ཀྱི་ཐེག་པའི་ཆོས་དང ། བླ་ན་མེད་པའི་ཐེག་པ་ཆེན་པོའི་ཆོས་ལ་འཕྱ་ཞིང་སྐུར་པ་འདབས་པ་དང ། སྨོད་པ་དང ། བར་ཆད་དང ། བགེགས་བྱེད་དེ་ཡོངས་སུ་རྒྱས་པར་མི་བྱེད་དོ། །ལ་ལ་ནི་རང་སངས་རྒྱས་ཀྱི་ཐེག་པའི་ཆོས་ཅུང་ཟད་ཐོས་ནས། སངས་རྒྱས་ཀུན་གྱིས་ཡོངས་སུ་བཟུང་བའི་ཉན་ཐོས་ཀྱི་ཐེག་པའི་ཆོས་དང ། བླ་ན་མེད་པའི་ཐེག་པའི་ཆོས་ལ་འཕྱ་བ་དང ། སྐུར་པ་འདེབས་པ་དང ། སྨོད་པ་དང ། བར་ཆད་དང་བགེགས་བྱེད་དེ་ཡོངས་སུ་རྒྱས་པར་མི་བྱེད་དོ། ། 60.192a ལ་ལ་ནི་བླ་ན་མེད་པའི་ཐེག་པ་ཆེན་པོའི་ཆོས་ཅུང་ཟད་ཐོས་ནས་སངས་རྒྱས་ཀུན་གྱིས་ཡོངས་སུ་གཟུང་བའི་ཉན་ཐོས་ཀྱི་ཐེག་པའི་ཆོས་དང ། རང་སངས་རྒྱས་ཀྱི་ཐེག་པའི་ཆོས་ལ་འཕྱ་བ་དང ། སྐུར་པ་འདེབས་པ་དང ། སྨོད་པ་དང ། བར་ཆད་དང ། བགེགས་བྱེད་དེ་ཡོངས་སུ་རྒྱས་པར་མི་བྱེད་ལ། ཁེ་དང་གྲགས་པའི་ཕྱིར་འདི་སྐད་དུ་བདག་ནི་ཐེག་པ་ཆེན་པོ་པ་ཡིན་ཏེ། ཐེག་པ་ཆེན་པོའི་གྲོགས་སུ་གྱུར་པ་ཐེག་པ་ཆེན་པོ་འབའ་ཞིག་ཉན་པ་དང ། འཆང་བ་དང ། གཟུངས་སུ་འཛིན་པར་དགའི། ཉན་ཐོས་དང ། རང་སངས་རྒྱས་ཀྱི་ཐེག་པ་པའི་ཆོས་ལ་མི་དགའ། ཐེག་པ་གཉིས་པོ་ལ་སྟེན་པར་མི་འདོད་དོ་ཞེས་ཟེར་རོ། །དེ་ལྟར་ཐེག་པ་ཆེན་པོ་པ་ཡིན་ནོ་ཞེས་བརྫུན་ཟེར་བ་དེ་བདག་གཏི་མུག་གིས་མངོན་པར་ཟིན་ཏེ། ང་རྒྱལ་གྱི་དབང་དུ་གྱུར་པས་དེ་ལྟར་ཐེག་པ་གསུམ་གྱི་ཡང་དག་པའི་ཆོས་ལ་འཕྱ་ཞིང་སྐུར་པ་འདེབས་པ་དང ། བར་ཆད་དང་བགེགས་བྱེད་དེ་ཡོངས་སུ་རྒྱས་པར་ཡང་མི་བྱེད་དོ། །ཐེག་པ་གསུམ་པོ་སློབ་པའི་གང་ཟག་ལ་ཡང་འཕྱ་ཞིང་སྐུར་ནས་སྨོད་དེ་མཐུ་མེད་པར་བྱེད་དོ། །རིགས་ཀྱི་བུ་འདས་པ་དང ། མ་འོངས་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་སེམས་ཅན་ཐམས་ཅད་ལ་ཕན་པ་དང ། བདེ་བའི་དོན་གྱི་ཕྱིར་ཐུགས་རྗེ་ཆེན་པོའི་ཤུགས་ཀྱིས་དངོས་པོ་རྣམ་པ་འདི་གཉིས་ཡོངས་སུ་བཟུང་ངོ ། །གང་ཞེ་ན། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་དང ། ཐེག་པ་གསུམ་ལས་བྱུང་བ་འཕགས་པའི་བདེན་པ་བཞི་ལ་སོགས་པ་དམ་པའི་ཆོས་དང་ལྡན་པའོ། །དངོས་པོ་རྣམ་པ་གཉིས་པོ་འདི་ནི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་གིས་ཡོངས་སུ་བཟུང་བ་མཛད་ཀྱིས་ཉན་ཐོས་དང་རང་སངས་རྒྱས 60.192b ལ་སོགས་པས་ནི་མ་ཡིན་ནོ། །གཞན་ཡང་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱི་ཚངས་པ་ཆེན་པོ་དང ། བརྒྱ་བྱིན་ལྷའི་དབང་པོ་དང ། གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོ་ལ་སོགས་པས་ཡོངས་སུ་བཟུང་བ་མ་ཡིན་ནོ། །མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དག་ངའི་བསྟན་པ་ལ་རབ་ཏུ་བྱུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་ལ་ཐབས་ཀྱིས་ཉེ་བའི་སྐྱོན་དང་ཀླན་ཀ་ཚོལ་ཏེ། རྐྱེན་རྣམ་པ་མང་པོས་གཤེ་ཤིང་སྤྱོ་བ་དང ། སྨོད་ཅིང་སྨ་ཕབ་པ་དང ། གཞུ་བ་དང ། འཚོག་པ་དང ། བཙོན་རར་གཞུག་པ་དང ། འཚོ་བའི་ཡོ་བྱད་འཕྲོག་པ་དང ། ཆོས་གོས་འཕྲོག་པ་ནས་ཁྱིམ་པར་ཕབ་སྟེ། ཁྱིམ་པའི་ལས་རྣམ་པ་སྣ་ཚོགས་བྱེད་དུ་བཅུག་པ་དང ། ནན་གྱིས་འཁོལ་ཞིང་ཆད་པས་གཅོད་པ་དང ། སྐྲོད་པ་དང ། བཟའ་བ་དང ། བཏུང་བ་གཅོད་པ་དང ། འཚོ་བའི་དབང་པོ་དང་བྲལ་བའི་བར་དུ་བྱེད་དོ། །རྒྱལ་པོ་རྒྱལ་རིགས་གདོལ་པ་ཅན་དེ་དེ་ལྟར་གླན་ཞིང་གཏི་མུག་གི་རང་བཞིན་ཅན་དུ་གྱུར་པས་ང་རྒྱལ་གྱི་དབང་གིས་མངོན་པར་ཟིན་པ་དེ་སངས་རྒྱས་དང ། བྱང་ཆུབ་སེམས་དཔའི་ཐུགས་རྗེའི་མཐུས་ཡོངས་སུ་བཟུང་བའི་སློབ་མ་རྣམས་ལ་སྨོད་པ་དང ། སྨ་འབེབས་པ་དང ། ནན་གྱིས་ཆད་པས་གཅོད་པ་ལ་སོགས་པ་བྱེད་པའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཐུགས་རྗེ་ཆེན་པོའི་ཤུགས་ཀྱིས་ཡོངས་སུ་བཟུང་བའི་ཆོས་ཤིན་དུ་ཟབ་མོ་ལ་ཡང་འཕྱ་ཞིང་སྐུར་ཏེ་མ་རུང་བར་བྱེད་དོ། །དུས་གསུམ་གྱི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་བཟུང་བའི་ཐེག་པ་རྣམ་པ་གསུམ་གྱི་དམ་པའི་ཆོས་ཀྱི་བར་ཆད་དང་བགེགས་བྱེད་དེ་ཡོངས་སུ་རྒྱས་པར་མི་བྱེད་དོ། །དེ་ལྟར་རྒྱལ་རིགས་གདོལ་པ་ཅན་ནས་རྗེའུ་རིགས་དང ། དམངས་རིགས་གདོལ་པ་ཅན་གྱི་བར་དུ་གླེན་ཞིང་གཏི་མུག་གི་རང་བཞིན་ཅན་དང ། ང་རྒྱལ་གྱིས་མངོན་པར་ཟིན་པ་དེ་ནི་ཐེག་པ་ཆེན་པོ་པའོ་ཞེས་ཁས་འཆེ 60.193a བ་དེ་དག་ཉན་ཐོས་དང ། རང་སངས་རྒྱས་ཀྱི་ཐེག་པའི་སྣོད་དུ་ཡང་མ་གྱུར་ན་བླ་ན་མེད་པ་ཐེག་པ་ཆེན་པོའི་ཆོས་ཀྱི་སྣོད་དུ་གྱུར་པ་ལྟ་ཅི་སྨོས་ཏེ། ཁེ་དང་གྲགས་པ་དང ། བཀུར་སྟི་དང ། མཆོད་པ་འདོད་པའི་ཕྱིར་འཇིག་རྟེན་པ་གླེན་ཞིང་གཏི་མུག་ཅན་ཐམས་ཅད་བསླུས་ནས་བདག་ནི་ཐེག་པ་ཆེན་པོ་པའོ་ཞེས་ཟེར་ཏེ། དེ་བཞིན་གཤེགས་པའི་ཐེག་པ་གཉིས་ཀྱི་དམ་པའི་ཆོས་ལ་འཕྱ་ཞིང་སྐུར་པ་འདེབས་སོ། །དེ་ལྟར་གང་ཟག་གླེན་ཞིང་གཏི་མུག་ཅན་གཡོ་དང་སྒྱུས་འཚོ་ཞིང་ང་རྒྱལ་གྱིས་མངོན་པར་ཟིན་པ་སེར་སྣ་དང ། ཕྲག་དོག་དང ། འདོད་ཆགས་ཀྱིས་ཀུན་ནས་བསླང་བས་དེའི་རྒྱུ་དེའི་རྐྱེན་གྱིས་ངའི་ཆོས་ཀྱི་མིག་མ་རུང་བ་དང་མྱུར་དུ་མེད་པར་བྱས་སོ། །དེས་ནི་དུས་གསུམ་གྱི་སངས་རྒྱས་བཅོམ་ལྡན་འདས་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱེད་པ་ཡིན་ནོ། །དུས་གསུམ་གྱི་བྱང་ཆུབ་སེམས་དཔའ་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱས་པ་ཡིན་ནོ་དུས་གསུམ་གྱི་ཉན་ཐོས་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོའི་སྡིག་བྱེད་པ་ཡིན་ཏེ། རིང་པོ་མི་ཐོགས་པར་ལུས་ཀྱི་ཡན་ལག་ཀུན་ཞིག་པ་དང ། ནད་མ་རུངས་པ་ཆེན་པོ་རྣམ་པ་མང་པོས་བཏབ་པར་འགྱུར་རོ། །རྒྱལ་རིགས་གདོལ་པ་ཅན་ནས་རྗེའུ་རིགས་དང ། དམངས་རིགས་དང ། གདོལ་པ་ཅན་གྱི་སྐྱེས་པ་འམ། བུད་མེད་འདི་དག་ཐམས་ཅད་སྡིག་པའི་ལས་བྱེད་ཅིང་ཕྱིན་ཅི་ལོག་ཏུ་ལྟ་བའི་དབང་གིས་དགེ་བའི་རྩ་བ་ཐམས་ཅད་བཅད་པས། གལ་ཏེ་དུས་གཞན་དུ་སྦྱིན་པའི་བསོད་ནམས་མང་དུ་བྱས་སུ་ཟིན་ཀྱང་མ་འོངས་པའི་དུས་ན་ཡི་དགས་སམ་བྱོལ་སོང་གི་ཁམས་སུ་སྐྱེ་སྟེ་ཕྱུག་པོའི་བདེ་བ་མྱོང་བར་མི་འགྱུར་རོ། །ལུས་དེ་ཉིད་ཀྱིས་གཟུགས་དང་གཟུགས་མེད་པའི་ཁམས་སུ་སྐྱེ་བའི་དགེ་བའི་རྩ་བ་ཆུང་ངུ་ཡང་བསྐྱེད་མི་ནུས་ན་ཉན་ཐོས་སམ། རང་སངས་རྒྱས་སམ་བླ་ན་མེད་པའི་ཐེག་པ་ཆེན་པོ་ལྷུན་གྱིས་གྲུབ་པ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི 60.193b དགེ་བའི་རྩ་བའི་ས་བོན་སྐྱེད་པ་ལྟ་ཅི་སྨོས། གཞན་ཡང་དེའི་ལྕེ་ལ་རྟག་ཏུ་ནད་ཀྱིས་གནོད་པར་འགྱུར་ཞིང ། ཉིན་ཞག་དུ་མར་ལྕེ་ལྐུག་ཅིང་སྨྲ་མི་ནུས་པ་དང ། ཤིན་དུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང ། འཆི་འཕོས་ནས་ཀྱང་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །དེ་བས་ན་དེ་བཞིན་གཤེགས་པས་རྒྱལ་རིགས་དགེ་བ་ནས་རྗེའུ་རིགས་དང ། དམངས་རིགས་ལ་སོགས་པའི་སྐྱེས་པ་འམ། བུད་མེད་དེ་དག་ལ་ཡུན་རིང་པོར་ཕན་པ་དང་བདེ་བའི་དོན་གྱི་ཕྱིར་ཡང་དང་ཡང་འདི་སྐད་གསུངས་ཏེ། ཁྱེད་ཀྱིས་ངའི་བསྟན་པ་ལ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གི་ཚལ་བུ་གྱོན་ཅིང་རབ་ཏུ་བྱུང་བ་ལ་གནོད་པ་དང ། གཤེ་ཞིང་སྤྱོ་བ་ལ་སོགས་པ་མ་བྱེད་ཅིག་།ངས་བསྟན་པའི་ཐེག་པ་གསུམ་གྱི་དམ་པའི་ཆོས་ལ་འཕྱ་ཞིང་སྐུར་པ་འདེབས་པ་དང ། སྨོད་པ་དང ། བར་ཆད་དང ། བགེགས་མ་བྱེད་ཅིག་ཅེས་གསུངས་སོ། །ངས་བསྟན་པ་ལས་ཆེད་དུ་འགལ་བར་བྱས་ན་སྡིག་པའི་རྣམ་པར་སྨིན་པ་ནི་ཇི་ལྟར་རྒྱས་པར་བཤད་པ་བཞིན་ནོ། །དེ་ཅིའི་ཕྱིར་ཞེ་ན། ངའི་བསྟན་པ་ལ་སྐྱབས་སུ་སོང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་ཅིང་རབ་ཏུ་བྱུང་བའི་ཆ་ལུགས་ཅན་དེ་ལ་འདས་པ་དང ། མ་འོངས་པ་དང ། ད་ལྟར་བཞུགས་པའི་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་ཐམས་ཅད་ཀྱིས་ཐུགས་རྗེ་ཆེན་པོའི་བྱིན་གྱི་བརླབས་ཀྱིས་ཡོངས་སུ་བཟུང་བའོ། །སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་ཅིང་རབ་ཏུ་བྱུང་བའི་སྤྱོད་ལམ་ཅན་དེ་ནི་འཕགས་པ་རྣམས་ཀྱི་རྣམ་པར་གྲོལ་བའི་རྒྱལ་མཚན་ཡིན། ཉན་ཐོས་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་རྒྱལ་མཚན་ཡིན་ནོ། །རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་རྒྱལ་མཚན་ཡིན་ནོ། །ཐེག་པ་ཆེན་པོ་པ་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་རྒྱལ་མཚན་ཡིན་ནོ། །དེ་བཞིན་གཤེགས་པས་གསུངས་པའི་ཐེག་པ་གསུམ་གྱི་དམ་པའི་ཆོས་ཡིན་ནོ། །དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད 60.194a ཀྱི་ཐུགས་རྗེ་ཆེན་པོའི་བྱིན་གྱི་བརླབས་ཀྱིས་ཡོངས་སུ་བཟུང་བ་ཡིན་ནོ། །འཕགས་པ་རྣམས་ཀྱི་རྣམ་པར་གྲོལ་བའི་གནས་ཡིན་ནོ། །ཉན་ཐོས་ཀྱི་ཐེག་པ་པ་ཐམས་ཅད་ཀྱི་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་གནས་ཡིན་ནོ། །རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་གནས་ཡིན་ནོ། །ཐེག་པ་ཆེན་པོ་པ་ཐམས་ཅད་ཀྱི་རྣམ་པར་གྲོལ་བས་ལོངས་སྤྱོད་པའི་ཆོས་ཀྱི་རོའི་གནས་ཡིན་ནོ། །རིགས་ཀྱི་བུ་དེ་ལྟ་བས་ན་རྣམ་པར་གྲོལ་བ་ཚོལ་བ་དག་ངའི་བསྟན་པ་ལ་སྐྱབས་སུ་སོང་བ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པ་རབ་ཏུ་བྱུང་བའི་གང་ཟག་ལ་བསྙེན་བཀུར་དང ། མཆོད་པ་དང ། སྟི་སྟང་བྱའོ། །བདག་གིས་སྔར་ཉན་ཐོས་ཀྱི་ཐེག་པའི་ཆོས་ལ་དད་དེ། བདག་ཉན་ཅིང་གཟུངས་སུ་འཛིན་ན་གཞན་ཡང་ཉན་ཅིང་འཛིན་དུ་གཞུག་གོ། །བདག་ཀློག་ཅིང་ཁ་ཏོན་བྱེད་ན་གཞན་ཡང་ཀློག་ཅིང་འདོན་དུ་གཞུག་གོ། །བདག་གླེགས་བམ་དུ་འདྲི་ན་གཞན་ཡང་གླེགས་བམ་དུ་འདྲིར་གཞུག་གོ། །བདག་སྦྱིན་པ་བྱེད་ན་གཞན་ཡང་སྦྱིན་པ་བྱེད་དུ་གཞུག་གོ། །བདག་སྟོན་ཅིང་འཆད་ན་གཞན་ཡང་སྟོན་ཅིང་འཆད་པ་དང ། ཡིད་ལ་བྱ་བ་དང ། ནན་ཏན་བྱ་བ་དང ། རྒྱ་ཆེར་སྤེལ་དུ་གཞུག་གོ། །ཇི་ལྟར་རང་སངས་རྒྱས་ཀྱི་ཐེག་པའི་ཆོས་ལ་དད་ཅིང་ཡིད་ཆེས་ཏེ། བདག་ཉན་ཅིང་གཟུངས་སུ་འཛིན་ན་གཞན་ཡང་ཉན་ཅིང་འཛིན་དུ་གཞུག་གོ། །བདག་ཀློག་ཅིང་ཁ་ཏོན་དུ་བྱེད་ན་གཞན་ཡང་ཀློག་ཅིང་འདོན་དུ་གཞུག་གོ། །བདག་གླེགས་བམ་དུ་འདྲི་ན་གཞན་ཡང་གླེགས་བམ་དུ་འབྲིར་གཞུག་གོ། །བདག་སྦྱིན་པ་བྱེད་ན་གཞན་ཡང་སྦྱིན་པ་བྱེད་དུ་གཞུག་གོ། །བདག་སྟོན་ཅིང་འཆད་ན་གཞན་ཡང་སྟོན་ཅིང་འཆད་པ་དང ། ཡིད་ལ་བྱ་བ་དང ། ནན་ཏན་བྱ་བ་དང ། རྒྱ་ཆེར་སྤེལ་དུ་གཞུག་གོ། །འདི་ལྟར་ཐེག་པ་ཆེན་པོ་ལ་དད་ཅིང་ཡིད་ཆེས་ཏེ། བདག་ཉན་ཅིང་གཟུངས་སུ་འཛིན་ན་གཞན་ཡང་ཉན་ཅིང་འཛིན་དུ་གཞུག་གོ། །བདག་ཀློག་ཅིང་ཁ་ཏོན་བྱེད་ན་གཞན 60.194b ཡང་ཀློག་ཅིང་འདོན་དུ་གཞུག་གོ། །བདག་གླེགས་བམ་དུ་འདྲི་ན་གཞན་ཡང་གླེགས་བམ་དུ་འདྲིར་གཞུག་གོ། །བདག་སྦྱིན་པ་བྱེད་ན་གཞན་ཡང་སྦྱིན་པ་བྱེད་དུ་གཞུག་གོ། །བདག་སྟོན་ཅིང་འཆད་ན་གཞན་ཡང་སྟོན་ཅིང་འཆད་པ་དང ། ཡིད་ལ་བྱ་བ་དང ། ནན་ཏན་བྱ་བ་དང ། རྒྱ་ཆེར་སྤེལ་དུ་གཞུག་གོ། །གལ་ཏེ་སྣོད་དུ་མ་གྱུར་ན་བདག་ཀྱང་མི་ཉན་གཞན་ཡང་ཉན་དུ་མི་གཞུག་པ་ནས་གཞུང་དེ་བཞིན་དུ་རྒྱས་པར་བཤད་པ་བཞིན་ནོ། །སྡིག་པའི་ཆོས་ཐམས་ཅད་རིང་དུ་སྤང་བ་དང ། སྡིག་པའི་གྲོགས་པོ་སྤང་བ་དང ། དགེ་བའི་བཤེས་གཉེན་ལ་སྟན་པ་དང ། ཕ་རོལ་དུ་ཕྱིན་པ་དྲུག་ལ་བརྩོན་ཞིང་སུ་ནན་ཏན་བྱེད་པ་དང ། མི་དགེ་བའི་ལས་ཐམས་ཅད་ཡང་དང་ཡང་འགྱོད་ཅིང་མཐོལ་བ་དང ། ཅི་ལ་མོས་པ་བཞིན་དུ་ཡང་དག་པའི་སྨོན་ལམ་གདབ་པར་བྱའོ། །གང་དེ་ལྟར་བྱེད་པ་ནི་ལུས་འདི་ཉིད་ཀྱིས་ཉན་ཐོས་ཀྱི་ཐེག་པའི་སྣོད་དུ་ཡང་འགྱུར་ལ། རང་སངས་རྒྱས་ཀྱི་རིགས་ལས་ཀྱང་ཕྱིར་མི་ལྡོག་།ཐེག་པ་ཆེན་པོའི་རིགས་ལས་ཀྱང་ཕྱིར་མི་ལྡོག་པའི་གནས་ཡོད་དོ། །དེ་བས་ན་ཐེག་པ་གསུམ་ཆར་ལ་ཡང་བསླབ་ཅིང་ནན་ཏན་བྱའི། ང་རྒྱལ་གྱིས་ཐེག་པ་ཆེན་པོ་པའོ་ཞེས་ཁས་འཆེ་ཞིང་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པའི་ཆོས་ལ་འཕྱ་ཞིང་སྐུར་པར་མི་བྱའོ། །ངས་སྔོན་ཐེག་པ་ཆེན་པོའི་ཆོས་ཀྱི་སྣོད་དུ་གྱུར་པ་བརྟན་པར་སྤྱོད་པ་འབའ་ཞིག་ལ་དེ་སྐད་དུ་ཐེག་པ་ཆེན་པོ་སྒོམ་པ་འབའ་ཞིག་གིས་མཐའི་གནས་བྱེད་པར་འགྱུར་རོ། །ཞེས་བཤད་པ་དང་འདིར་འགལ་བ་མེད་དོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་པ་འདི་གསུངས་སོ། །འཁོར་གྱི་དཀྱིལ་འཁོར་ཆེན་པོའི་མངོན་སུམ། །རྡོ་རྗེའི་སྙིང་པོས་ང་ལ་ཞུས་པ། །ཚུལ་ཁྲིམས་ཉམས་པའི་དགེ་སློང་དག་ལ། །ཅི་ཕྱིར་མཆོད་པ་གྱིས་ཤིག་ཅེས་སྐུལ། །སྦྱངས་པའི་ཡོན་ཏན་ཀུན་ཀྱང་ཉམས་ནས། །གླེན་ཞིང་ངན་པར་ལྟ་བ 60.195a འཛིན་པ། །ཆོས་ཀྱི་སྣོད་མིན་ལམ་སུན་འབྱིན་ལ། །སྤྱོ་འམ་ཆད་པས་གཅད་དུ་མི་གནང ། །དེ་ལས་ཐེག་པ་གསུམ་གྱི་དམ་ཆོས། །ཡང་དག་པ་ཡི་རྣམ་པར་སྒྲོལ་བ། །སྨན་བཟང་ལྟ་བུ་བཤད་པ་ཐོས་ན། །ཞི་བའི་མྱ་ངན་འདས་འགྱུར་ཞེས་གསུངས། །ཅི་ཡི་ཕྱིར་ན་མདོ་སྡེ་གཞན་ལས། །ཐེག་པ་ཆེན་པོ་གཅིག་གིས་གྲོལ་འགྱུར། །ཐེག་པ་གཉིས་ཀྱི་ཆོས་ལ་སློབ་སྤངས། །ཡང་འདིར་ཐེག་པ་གསུམ་བཤད་ཅི་ཕྱིར། །སེམས་ཅན་ཀུན་ལ་ཐུགས་བརྩེ་ཅན་གྱིས། །ངན་པར་ལྟ་བའི་ལས་ཀུན་སྤངས་ཏེ། །ཕན་པ་དང་ནི་བདེ་བའི་དོན་ཕྱིར། །རྣམ་པར་གྲོལ་ཞིང་ཐེ་ཙོམ་གཅོད་གསོལ། །རྒྱལ་རིགས་རྒྱལ་པོ་དག་ལ་ཕན་པ། །རྗེའུ་རིགས་དམངས་རིགས་བར་དུ་བདེ་ཕྱིར། །དགེ་སློང་དག་ལ་གནོད་བྱེད་མི་གནང ། །ཁ་ན་མ་ཐོ་ཆེན་པོའི་སྡིག་འགྱུར། །ཁ་སྤུ་བྲེགས་ཤིང་ངུར་སྨྲིག་གོས་གྱོན། །སངས་རྒྱས་རྣམས་ཀྱི་ཆོས་ཀྱི་རྒྱལ་མཚན། །རྣམ་པར་གྲོལ་བའི་ལམ་གྱི་མིག་ཡིན། །སངས་རྒྱས་ཀུན་གྱིས་བྱིན་གྱིས་བརླབས་པ། །སྤྱོད་ལམ་མང་པོ་ཡོངས་སུ་ཉམས་ཀྱང ། །རྣམ་པར་གྲོལ་བ་ཡོངས་སུ་སྤངས་མིན། །ངན་པར་ལྟ་བའི་སྡིག་པ་སྤངས་པས། །མྱུར་དུ་མྱ་ངན་འདས་པ་འཐོབ་འགྱུར། །ཇི་ལྟར་སྨན་རབ་འཁུས་པར་གྱུར་ཀྱང ། །ནད་རྣམས་ཀུན་ལ་ཤིན་དུ་ཕན་འགྱུར། །དེ་བཞིན་སྤྱོད་ལམ་ཉམས་པ་དེ་ཡང ། །ཕ་རོལ་སྡུག་བསྔལ་ཞི་བར་བྱེད་འགྱུར། །ཞུ་བའི་ལས་དང་གསོ་སྦྱིན་དག་ཏུ། །དགེ་སྦྱོང་དེ་ནི་དེར་འདུག་མ་གནང ། །གཞན་ལ་དམ་པའི་ཆོས་སྟོན་དབང་སྟེ། །གཉི་གས་བསོད་ནམས་ཆེན་པོ་ཐོབ་འགྱུར། །དཀོན་མཆོག་གསུམ་ལ་དད་ཅིང་ཕྱོགས་ཏེ། །ང་ལ་སྟོན་པ་ཆེན་པོར་འཛིན་པ། །མི་དགེ་སྡིག་པ་མང་པོ་སྤོང་འགྱུར། །མུ་སྟེགས་མང་པོ་གང་བས་དེ་མཆོག་།ཇི་ལྟར་སྲིན་མོའི་གླིང་དུ་འཁྱམས་པའི། །འཇིགས་ཤིང་སྐྲག་པའི་ཚོང་པ་དེ་དག་།ཀུན་གྱིས་རྟ་སྤུ་ཉག་རེ་བཟུང་བས། །རྒྱ་མཚོ་ལས་རྒལ 60.195b བགེགས་དང་བྲལ་བ། །དེ་ལྟར་ཚུལ་ཁྲིམས་ཉམས་པ་དེ་ནི། །མི་དགེ་ངན་པར་ལྟ་བ་སྤངས་ཏེ། །དད་པ་གཅིག་གི་རྒྱུ་ཡི་མཐུས་ན། །ཉོན་མོངས་པ་ཡི་སྲིན་ལས་ཐར་འགྱུར། །རྣམ་པར་གྲོལ་བའི་རྒྱལ་མཚན་བསྲུངས་ཏེ། །སངས་རྒྱས་མང་པོས་བྱིན་གྱིས་བརླབས་པའི། །ཚུལ་ཁྲིམས་ཉམས་ལ་གནོད་མི་བྱེད་ན། །ཁ་ན་མ་ཐོའི་སྡིག་ལྕི་སྤོང་འགྱུར། །བསོད་ནམས་ཆེན་པོ་ལ་ནི་མོས་ཤིང ། །ཡང་དག་རྣམ་པར་གྲོལ་ལ་དགའ་བ། །སྣོད་དང་སྣོད་མིན་ཀུན་ལ་མཉམ་སྲུང ། །དེས་ནི་རྣམ་གྲོལ་ཐོབ་པར་མི་དཀའ། །གླེན་པ་ང་རྒྱལ་ཐེག་པ་ཆེན་པོར། །ཁས་འཆེ་དེ་ནི་ཤེས་པའི་མཐུ་མེད། །ཐེག་པ་གཉིས་ཀྱི་ཆོས་ལ་རྨོངས་ན། །ཐེག་པ་ཆེན་པོར་རིག་འགྱུར་ཅི་སྨོས། །དཔེར་ན་མིག་གི་འབྲས་བུ་ཉམས་ན། །ཁ་དོག་རྣམ་པ་མཐོང་བར་མི་འགྱུར། །དེ་བཞིན་དད་པ་ཉམས་ཤིང་མེད་ན། །ཐེག་པ་ཆེན་པོ་ཤེས་པར་མི་ནུས། །ཆུ་བྲན་བཏུང་བའི་མཐུ་ཡང་མེད་ན། །རྒྱ་མཚོ་ཆེན་པོ་ག་ལ་རྔུབ་ནུས། །ཐེག་པ་གཉིས་ཀྱང་གོམས་མི་ནུས་ན། །ཐེག་པ་ཆེན་པོ་ག་ལ་སློབ་ནུས། །ཐེག་པ་གཉིས་ཀྱི་ཆོས་ལ་དད་ནས། །ཐེག་པ་ཆེན་པོ་ལ་ནི་དད་འགྱུར། །ཐེག་ཆེན་ཆོས་ལ་དད་པ་མེད་པར། །ཚིག་ཏུ་སྨྲ་བས་དོན་དུ་མི་འགྱུར། །ནང་ནི་ཡང་དག་ཆད་པར་ལྟ་ཞིང ། །ཐེག་པ་ཆེན་པོ་ཅན་ཞེས་ཁས་འཆེ། །མི་དགེ་གསུམ་གྱི་ལས་ནི་མི་སྲུང ། །ང་ཡི་དམ་ཆོས་མ་རུང་འཇིག་བྱེད། །གང་ཟག་དེ་ནི་ཚེ་འཕོས་གྱུར་ནས། །མཚམས་མེད་སེམས་ཅན་དམྱལ་བར་ལྟུང་ངེས། །དེ་བས་དབང་པོ་བརྟན་ཅིང་བཤད་བྱའི། །སྣོད་དུ་མ་གྱུར་པ་ལ་མ་ཡིན། །བྱམས་པའི་སེམས་མེད་ང་རྒྱལ་དྲེགས་ཤིང ། །གཏུམ་ཞིང་བརླང་བ་དབང་པོ་ཞེན་པ། །དེ་ནི་ཆད་པར་ལྟ་བ་ཡིན་པར། །མཁས་པ་རྣམས་ཀྱིས་དེ་དག་ཤེས་བྱ། །ཉན་ཐོས་དང་ནི་རང་རྒྱལ་བ་དང ། །ཐེག་པ་ཆེན་པོའི་སྣོད་མ་ཡིན་ནོ། །སངས་རྒྱས་ཀུན་ལ་སྨད་ཅིང་སྐུར་པས། །ངེས་པར་མཚམས་མེད་དམྱལ་བར་ལྟུང་འགྱུར། །འདུ་འཛི་ལ་དགའ 60.196a ཚུལ་ཁྲིམས་སྲུང་ཞིང ། །སློབ་དཔོན་འཆབ་ཅིང་སྡུག་བསྔལ་འཇིགས་པ། །མཁས་པ་དག་གིས་ཤེས་པར་གྱིས་ཤིག་།དེ་ནི་ཉན་ཐོས་ཐེག་པ་ཡིན་ནོ། །སྦྱིན་ལ་དགའ་ཞིང་སྐྱེ་འགོག་རྟོག་པ། །བས་མཐའི་གནས་ལ་དགའ་བ་དག་ནི། །རང་རྒྱལ་པ་ཡི་ཐེག་པ་ཡིན་པར། །མཁས་པ་དག་གིས་ཤེས་པར་གྱིས་ཤིག་།དགེ་བའི་རྩ་བ་ཀུན་དང་ལྡན་ཞིང ། །བྱམས་པ་དང་ནི་སྙིང་རྗེའི་སེམས་ཀྱིས། །རྟག་ཏུ་ཕན་པའི་དོན་ལ་དགའ་བ། །དེ་ནི་ཐེག་པ་ཆེན་པོ་ཡིན་ནོ། །ཚུལ་ཁྲིམས་བསྲུང་ཕྱིར་ལུས་སྲོག་སྤོང་ཞིང ། །སེམས་ཅན་དག་ལ་མི་འཚེ་མི་གནོད། །སྟོང་པ་ཉིད་ཀྱི་ཆོས་ལ་བརྩོན་པ། །ཐེག་པ་ཆེན་པོ་ཡིན་པར་ཤེས་བྱ། །ཐམས་ཅད་ཆོས་ལ་སེམས་ཀྱིས་བཟོད་ཅིང ། །སྨྲ་བའི་ཚིག་འཇམ་འཇུངས་པ་མེད་པ། །ཆོས་ལ་རྟག་ཏུ་དགའ་ཞིང་སྤྲོ་བ། །དེ་ཡང་ཐེག་པ་ཆེན་པོ་ཡིན་ནོ། །ཆོས་ཀྱི་སྣོད་དང་སྣོད་མིན་ཀུན་ལ། །བསམ་པ་མཉམ་པས་ཕན་པའི་དོན་བྱེད། །འཇིག་རྟེན་ཆོས་ཀྱིས་མི་གོས་ལ་དག་།དེ་ཡང་ཐེག་ཆེན་ཡིན་པར་ཤེས་བྱ། །དེ་བས་མཁས་པ་བློ་ཅན་དག་ནི། །ཐེག་པ་གསུམ་ལ་ཤིན་དུ་དང་བསྐྱེད། །དགེ་འདུན་དག་ལ་གནོད་མི་བྱེད་ན། །མྱུར་དུ་བླ་མེད་བྱང་ཆུབ་གྲུབ་འགྱུར། །རིགས་ཀྱི་བུ་གཞན་ཡང་རྒྱལ་རིགས་དགེ་བ་དང ། བྲམ་ཟེ་དགེ་བ་དང ། བློན་པོ་དགེ་བ་དང ། ཁྱིམ་བདག་དགེ་བ་དང ། ཚོང་དཔོན་དགེ་བ་དང ། དགེ་སྦྱོང་དགེ་བ་དང ། རྗེའུ་རིགས་དང ། དམངས་རིགས་ལ་སོགས་པའི་སྐྱེས་པ་འམ། བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་རྣམ་པ་བཅུ་དང་ལྡན་ན་ལུས་འདི་ཉིད་ཀྱིས་ཉན་ཐོས་ཀྱི་ཐེག་པའི་རིགས་ལས་ལྡོག་ཅིང་ཉམས་པར་མི་འགྱུར་བ་དང ། ཚེ་འདི་ཉིད་ལ་ཉན་ཐོས་ཀྱི་ཐེག་པའི་འཕགས་པའི་ཆོས་ཀྱི་སྣོད་དུ་འགྱུར་ཏེ། རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོའི་སྣོད་དུ་ནི་མ་ཡིན་ནོ། །བཅུ་གང་ཞེ་ན་འདི་ལྟ་སྟེ། བསམ་པ་ཡོངས་སུ་དག་པའི་དད་པས་དགེ་བ་དང་མི་དགེ་བའི་ལས་ཀྱི་འབྲས 60.196b བུ་ཡོད་པར་ཡིད་ཆེས་པ་དང ། ཁྲེལ་བ་དང་ངོ་ཚ་བ་དང་ལྡན་པས་མི་དགེ་བའི་གྲོགས་དང་ངན་པར་ལྟ་བ་ཐམས་ཅད་ཡོངས་སུ་སྤོང་བ་དང ། སྡོམ་པ་ལ་ཤིན་དུ་གནས་ཏེ། སྲོག་གཅོད་པ་ཡོངས་སུ་སྤོང་བ་ནས་བག་མེད་པར་འགྱུར་བའི་ཁུ་བ་འཐུང་བའི་བར་དུ་ཡོངས་སུ་སྤོང་བ་དང ། བྱམས་པའི་སེམས་ལ་གནས་ཏེ་ཞེ་སྡང་དང ། ཁོང་ཁྲོ་བ་ཐམས་ཅད་ཡོངས་སུ་སྤོང་བ་དང ། སྙིང་རྗེའི་སེམས་ལ་གནས་ཏེ་སེམས་ཅན་ཉམ་ཐག་པ་ཐམས་ཅད་སྒྲོལ་བ་དང ། དགའ་བའི་སེམས་ལ་བདེ་བར་གནས་ཏེ། ངག་གི་ལས་མི་དགེ་བ་བཞི་ཡོངས་སུ་སྤོང་བ་དང ། བཏང་སྙོམས་ཀྱི་སེམས་ལ་གནས་ཏེ། འདོད་ཆགས་དང་སེར་སྣ་དང ། ཕྲག་དོག་ཐམས་ཅད་ཡོངས་སུ་སྤོང་བས་དང་ཡང་དག་པ་ལ་ཕྱོགས་ཏེ་སླུ་བའི་ལྟས་བཟང་ངན་ཀུན་ཡོངས་སུ་སྤོང་ཞིང་ལོག་པ་མུ་སྟེགས་ཅན་ལ་མི་སྟེན་པ་དང ། ཤིན་དུ་འབད་པའི་བརྩོན་འགྲུས་དང་ལྡན་ཏེ་དགེ་བའི་ཆོས་ཀུན་ལ་ནན་ཏན་བྱེད་པ་དང ། རྟག་ཏུ་དགོན་པ་ལ་དགའ་ཞིང་ཆོས་ཀྱི་དོན་ཚོལ་བ་ལ་མི་སྐྱོ་བར་སྤྲོ་བའོ། །རིགས་ཀྱི་བུ་རྒྱལ་རིགས་དགེ་བ་ནས་རྗེའུ་རིགས་དང ། དམངས་རིགས་ལ་སོགས་པའི་སྐྱེས་པ་དང ། བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་བཅུ་པོ་འདི་དག་དང་ལྡན་ན་ཚེ་འདི་ཉིད་ལ་ཉན་ཐོས་ཀྱི་ཐེག་པ་པའི་རིགས་ལས་ལྡོག་ཅིང་ཉམས་པར་མི་འགྱུར་བ་དང ། ཚེ་འདི་ཉིད་ལ་ཉན་ཐོས་ཀྱི་ཐེག་པའི་འཕགས་པའི་ཆོས་མངོན་དུ་གྱུར་པ་དང་ཉན་ཐོས་ཀྱི་འཕགས་པའི་ཆོས་ཀྱི་སྣོད་དུ་གྱུར་ཏེ། རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོའི་འཕགས་པའི་ཆོས་མངོན་དུ་གྱུར་པ་དང ། རང་སངས་རྒྱས་ཀྱི་ཐེག་པ་དང་ཐེག་པ་ཆེན་པོའི་སྣོད་དུ་འགྱུར་བ་ནི་མ་ཡིན་ནོ། །གཞུང་དེས་རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོ་ཡང་ཤེས་པར་བྱའོ། །རིགས་ཀྱི་བུ་དེ་ལྟར་གནས་པ་དང་སྤྱད་པར་ལྡན་པའི་འཁོར་ལོ་བཅུ་པོ་དེ་དག་ནི་ཉན་ཐོས་དང ། རང་སངས་རྒྱས་དང ། བྱང་ཆུབ་སེམས 60.197a དཔའ་དང ། སངས་རྒྱས་བཅོམ་ལྡན་འདས་ཐམས་ཅད་ཀྱི་ཐུན་མོང་དུ་ཡོད་པའོ། །རིགས་ཀྱི་བུ་གཞན་ཡང་གནས་པ་དང་སྤྱད་པར་བྱ་བའི་འཁོར་ལོ་རྣམ་པ་བཅུ་ཉན་ཐོས་དང་ཐུན་མོང་མ་ཡིན་པ། རང་སངས་རྒྱས་དང ། བྱང་ཆུབ་སེམས་དཔའ་དང ། སངས་རྒྱས་བཅོམ་ལྡན་འདས་དང་ཐུན་མོང་བ་ཡོད་དོ། །གང་རྒྱལ་རིགས་དགེ་བ་ནས་རྗེའུ་རིགས་དང ། དམངས་རིགས་ལ་སོགས་པའི་སྐྱེས་པ་དང ། བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་བཅུ་པོ་འདི་དག་དང་ལྡན་ན་ཚེ་འདི་ཉིད་ཀྱིས་རང་སངས་རྒྱས་ཀྱི་ཐེག་པའི་རིགས་ལས་ཀྱང་ཉམས་པར་མི་འགྱུར་བ་དང ། ལྡོག་པ་དང་ལུས་འདི་ཉིད་ལ་རང་སངས་རྒྱས་གྱི་ཐེག་པའི་འཕགས་པའི་ཆོས་རིག་པ་དང ། རང་སངས་རྒྱས་ཀྱི་འཕགས་པའི་ཆོས་ཀྱི་སྣོད་དུ་འགྱུར་རོ། །བཅུ་གང་ཞེ་ན། འདི་ལྟ་སྟེ་ལུས་དང ། ངག་དང ། ཡིད་ཀྱི་ལས་རྣམ་པར་དག་པར་སྦྱོང་བ་དང ། ཁྲེལ་བ་དང ། ངོ་ཚ་བ་དང་ལྡན་ཏེ། བདག་གི་ལུས་ཀྱིས་སྐྱོ་བ་དང་ཉེ་བར་ལེན་པའི་ཕུང་པོ་ལྔ་ལ་ཤིན་དུ་འཇིགས་པ་སྐྱེད་པ་དང ། འཁོར་བའི་འདོད་པ་ལས་ཤིན་དུ་རྒལ་དཀའ་བར་ལྟ་བ་དང ། རྟག་ཏུ་དབེན་པའི་གནས་ལ་དགའ་ཞིང་འདུ་འཛི་ཡོངས་སུ་སྤོང་བ་དང ། བས་མཐའ་དགོན་པ་ལ་དགའ་ཞིང་གཞན་གྱི་སྐྱོན་མི་གླེང་བ་དང ། དབང་པོ་རྣམས་སྡོམ་ཞིང་སེམས་རྟག་ཏུ་ཞི་བས་ཏིང་ངེ་འཛིན་དུ་བྱེད་པ་དང ། རྟེན་ཅིང་འབྲེལ་ཏེ་འབྱུང་བ་ལ་མཁས་པས་རྒྱུ་དང་འབྲས་བུ་ལ་ཤིན་དུ་རྟོག་པ་དང ། རྟག་ཏུ་བསམ་གཏན་ལ་མཉམ་པར་འཇོག་པར་དགའ་བ་དང ། ཀུན་ནས་ལྡང་བའི་ཆོས་ཡོངས་སུ་འགོག་པ་ལ་མཁས་པའོ། །རིགས་ཀྱི་བུ་རྒྱལ་རིགས་དགེ་བ་ནས་རྗེའུ་རིགས་དང ། དམངས་རིགས་ལ་སོགས་པའི་སྐྱེས་པ་དང་བུད་མེད་དེ་དག་གནས་པ་དང་སྤྱད་པར་བྱ་བའི་འཁོར་ལོ་བཅུ་པོ་འདི་དག་དང་ལྡན་པས་ཚེ་འདི་ཉིད་ཀྱིས་རང་སངས་རྒྱས་ཀྱི་ཐེག་པའི་རིགས་ལས་ཕྱིར་ལྡོག་ཅིང་ཉམས་པ་ཡོད་པར་མི་འགྱུར་བ་དང ། ཚེ་འདི་ཉིད་ཀྱིས་རང་སངས་རྒྱས་ཀྱི་ཐེག་པའི 60.197b འཕགས་པའི་ཆོས་མངོན་དུ་འགྱུར་བ་དང ། རང་སངས་རྒྱས་ཀྱི་ཐེག་པའི་འཕགས་པའི་ཆོས་ཀྱི་སྣོད་དུ་འགྱུར་བའོ། །རིགས་ཀྱི་བུ་འདི་དག་ནི་ཉན་ཐོས་དང ། རང་སངས་རྒྱས་ཐམས་ཅད་ཀྱི་གནས་པ་དང་སྤྱད་པར་བྱ་བའི་འཁོར་ལོ་ཞེས་བྱ་སྟེ། ཉན་ཐོས་དང ། རང་སངས་རྒྱས་ཐམས་ཅད་ཀྱིས་འཁོར་ལོ་འདི་ལ་གནས་ན་མྱུར་དུ་སྲིད་པ་གསུམ་གྱི་རྒྱ་མཚོ་ལས་རྒལ་ཏེ་མྱ་ངན་ལས་འདས་པའི་གྲོང་ཁྱེར་ཆེན་པོར་ཕྱིན་པར་འགྱུར་རོ། །རིགས་ཀྱི་བུ་གནས་པ་དང་སྤྱད་པར་བྱ་བའི་འཁོར་ལོ་ཞེས་བྱ་བའི་ཚིག་གི་དོན་གང་ལགས་དེ་ལ་གནས་པ་ཞེས་བྱ་བ་ནི་འཛིན་པ་དང་བཅས་པ། བདག་གི་བའི་གནས་སུ་བཅས་པ། སྡུད་པར་བྱེད་པ་དང་བཅས་པ་འབྲེལ་བར་བྱེད་པ་དང་བཅས་པའོ། །དེ་ལ་སྤྱད་པ་ཞེས་བྱ་བ་ནི་ཕུང་པོ་སྤྱོད་པ་དང ། ཁམས་སྤྱོད་པ་དང ། སྐྱེ་མཆེད་སྤྱོད་པ་དང ། འབྲེལ་པ་དང་བཅས་པའི་སྤྱོད་པའོ། །འཁོར་ལོ་ཞེས་བྱ་བ་ནི་བསླབ་པ་དང ། དམ་ཚིག་གི་འཁོར་ལོ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་ནི་ཤིང་རྟའི་འཁོར་ལོ་འམ་འཁོར་ལོ་དེ་གཙོ་བོར་སྤྱོད་དོ། །དེ་བཞིན་དུ་ཉན་ཐོས་དང ། རང་སངས་རྒྱས་ཐམས་ཅད་འཁོར་ལོ་འདི་ལ་བརྟེན་ནས་མྱ་ངན་ལས་འདའ་བའི་ལམ་ཚོལ་ཏེ། དེ་བས་ན་རྣམ་པ་འདི་གཉིས་ནི་ཐེག་པ་ཆེན་པོའི་སྣོད་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་སྤྱོད་པ་དམའ་ཞིང་ཞན་པ་ལ་བརྟེན་པས་ཐེག་པ་ཆེན་པོའི་སྣོད་མ་ཡིན་ནོ། །བདག་ཕུང་པོ་རྣམས་སྤྱོད་པ་ལ་འཛིན་པར་བྱེད་པ་དང་བཅས་པ་ལ་སྐྱོ་ཞིང་འཇིགས་ཏེ། བདག་འབའ་ཞིག་སྡུག་བསྔལ་ཐམས་ཅད་ལས་རྣམ་པར་གྲོལ་བ་ཚོལ་གྱི་སེམས་ཅན་ཐམས་ཅད་རྣམ་པར་དགྲོལ་བའི་ཕྱིར་ནན་ཏན་བྱེད་པ་མ་ཡིན་པས་ཐེག་པ་ཆེན་པོའི་སྣོད་མ་ཡིན་ནོ། །བདག་ཁམས་རྣམས་སྤྱོད་པ་ལ་གནས་སུ་བཅས་པས་སྐྱོ་ཞིང་འཇིགས་ཏེ། བདག་སྡུག་བསྔལ་ཐམས་ཅད་ལས་རྣམ་པར་གྲོལ་བ་ཚོལ་གྱི་སེམས་ཅན་ཐམས་ཅད་རྣམ་པར་དགྲོལ་བའི་ཕྱིར་ནན་ཏན་བྱེད་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །བདག་སྐྱེ 60.198a མཆེད་མངོན་པར་འདུ་བ་རྣམས་སྤྱོད་པ་ལ་སྡུད་པར་བྱེད་པ་དང་བཅས་པས་སྐྱོ་ཞིང་འཇིགས་ཏེ། བདག་སྡུག་བསྔལ་ཐམས་ཅད་ལས་རྣམ་པར་གྲོལ་བ་ཚོལ་གྱི་སེམས་ཅན་ཐམས་ཅད་རྣམ་པར་དགྲོལ་བའི་ཕྱིར་ནན་ཏན་བྱེད་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །དེ་དག་འབྲེལ་པ་དང་བཅས་པའི་སྤྱོད་པ་ལ་འབྲེལ་པའི་དབང་གིས་གནས་ཤིང་བརྟེན་ནས་གནས་ཤིང་བརྟེན་པ་མངོན་པར་འདུ་བྱེད་དེ་སེམས་ཅན་ཐམས་ཅད་སྡུད་པ་ལ་མི་དགའ་ཞིང་བྱམས་པ་དང ། སྙིང་རྗེ་མེད་དེ་འབྲེལ་པ་དང་བཅས་པའི་ཕྱིར་ཐེག་པ་ཆེན་པོའི་སྣོད་མ་ཡིན་ནོ། །གཞན་དག་སྡུག་བསྔལ་མང་པོ་མྱོང་བར་མཐོང་ཡང་ཡལ་བར་བཏང་སྟེ་མི་སྐྱོ་བ་ལ་བདག་འབའ་ཞིག་རྣམ་པར་གྲོལ་བ་ཚོལ་བའི་ཕྱིར་ཐེག་པ་ཆེན་པོའི་སྣོད་མ་ཡིན་ནོ། །དེ་དག་བདག་གི་ཀུན་ནས་ཉོན་མོངས་པའི་མགོ་བཅད་པས་སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པའི་མགོ་གཅོད་པ་ལ་མི་སྤྲོ་བས་ཐེག་པ་ཆེན་པོའི་སྣོད་མ་ཡིན་ནོ། །དེ་དག་ཐེག་པ་ཆེན་པོའི་འཁོར་ལོས་བྱང་ཆུབ་ལ་འབབ་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །དེ་དག་འོད་ཆེན་པོའི་འཁོར་ལོས་བྱང་ཆུབ་ལ་འབབ་པ་མ་ཡིན་པས་ན་ཐེག་པ་ཆེན་པོའི་སྣོད་མ་ཡིན་ནོ། །དེ་དག་གཅིག་པུ་ཟླ་མེད་པར་མྱ་ངན་ལས་འདས་པའི་གྲོང་ཁྱེར་དུ་འགྲོ་བ་ལ་དགའ་ཞིང་ནན་ཏན་བྱེད་པས་ན་ཐེག་པ་ཆེན་པོའི་སྣོད་མ་ཡིན་ནོ། །རིགས་ཀྱི་བུ་སེམས་ཅན་གང་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པའི་ཆོས་ལ་ལ་ནན་ཏན་མ་བྱས་པ་བརྩོན་འགྲུས་མ་བརྩམས་པ་དག་ནི་དབང་པོ་ཡོངས་སུ་མ་སྨིན་ཏེ། དབང་པོ་ཞན་པ། བརྩོན་འགྲུས་ཆུང་བ་དག་ལ་གལ་ཏེ་ཤིན་དུ་ཟབ་མོ་ཐེག་པ་ཆེན་པོའི་དམ་པའི་ཆོས་བསྟན་ན་བཤད་པ་དང་ཉན་པ་གཉི་ག་ཁ་ན་མ་ཐོ་བ་ཆེན་པོའི་སྡིག་ཐོབ་པར་འགྱུར་ཏེ་དེ་ནི་སངས་རྒྱས་ཐམས་ཅད་ལ་འཁུས་པ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་གང་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པའི་ཆོས་ལ་ནན་ཏན་མ་བྱས་ཤིང་བརྩོན 60.198b འགྲུས་མ་བརྩམས་ཏེ། དབང་པོ་ཞན་པ། བརྩོན་འགྲུས་ཆུང་བ་དག་ཤིན་དུ་ཟབ་པ་ཐེག་པ་ཆེན་པོའི་དམ་པའི་ཆོས་མཉན་ན་སེམས་ཅན་དེ་ནི་ཡང་དག་པར་གླེན་པ། གཏི་མུག་པ་ཡིན་ཏེ་དེ་ནི་བདག་ཤེས་པར་ཁས་འཆེ་ཡང་ཆད་པའི་མཐའ་དང ། ལོག་པའི་འདུ་ཤེས་སུ་འགྱུར་བ་དང་རྒྱུ་མེད་པར་སྨྲ་ཞིང་ལས་ཀྱི་འབྲས་བུ་རྣམས་ལ་མེད་པར་འཛིན་པས་དགེ་བ་བྱས་པ་དང ། སྡིག་པ་བྱས་པ་ཐམས་ཅད་ལ་མེད་པར་འཛིན་པ་དང ། ཐེག་པ་ཆེན་པོ་ལ་བརྫུན་དུ་སྨྲ་ཞིང་ངའི་དམ་པའི་ཆོས་མ་རུང་བར་བྱེད་པ་ཆོས་མ་ཡིན་པ་ལ་ནི་ཆོས་ཡིན་པར་འཆད་པ་ཆོས་ལ་ནི་ཆོས་མ་ཡིན་པར་འཆད་པ། དགེ་སྦྱོང་མ་ཡིན་པ་ལ་དགེ་སྦྱོང་ཡིན་པར་འཆད་པ་དགེ་སྦྱོང་ཡང་དག་པ་ལ་ནི་དགེ་སྦྱོང་མ་ཡིན་པར་འཆད་པ་འདུལ་བ་མ་ཡིན་པ་ལ་ནི་འདུལ་བར་འཆད་པ་འདུལ་བ་ཡང་དག་པ་ལ་ནི་འདུལ་བ་མ་ཡིན་པར་འཆད་དེ། གླེན་པ་གཏི་མུག་གི་རང་བཞིན་ཅན་ང་རྒྱལ་གྱིས་མངོན་པར་ཟིན་པ་ཕྲག་དོག་དང་སེར་སྣས་ཡོངས་སུ་བསྟེན་པ་ཐེག་པ་ཆེན་པོའི་ཆོས་ལ་བསྟོད་ཅིང་སྲུང་བ་དང་ཀུན་དུ་རྒྱས་པར་བྱེད་ཀྱང་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པའི་ཆོས་ལ་འཕྱ་ཞིང་སྐུར་ནས་རྒྱས་པར་མི་བྱེད་དོ། །དེ་ནི་ཉན་ཐོས་ཀྱི་ཐེག་པ་དང་རང་སངས་རྒྱས་ཀྱི་ཐེག་པ་དང ། བླ་ན་མེད་པ་ཡང་དག་པའི་ཐེག་པ་ལ་བརྟན་ཏེ། ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་ནས་བསྙེན་པར་རྫོགས་ཀྱང་དགེ་སློང་ཉིད་དུ་འགྱུར་བར་ཡང་དག་པ་ཇི་ལྟ་བ་བཞིན་དུ་མི་ཤེས་པ་དང ། དགེ་བའི་ཆོས་ཐམས་ཅད་མངོན་པར་སྡུད་པའི་རྒྱུ་ཡང་དག་པ་ཇི་ལྟ་བ་བཞིན་དུ་མི་ཤེས་པས་ངའི་སློབ་མ་ཆོས་ཀྱི་སྣོད་དུ་གྱུར་པ་དང ། ཆོས་ཀྱི་སྣོད་དུ་མ་གྱུར་པ་དང ། སློབ་པ་དང ། མི་སློབ་པ་ལ་ནན་ཏན་བྱེད་པ་དང ། མཐའི་གནས་བྱས་པའི་འབྲས་བུ་ཐོབ་པ་དང ། དགེ་བའི་སྐྱེ་བོ་ཚུལ་ཁྲིམས་སྲུང་བ་དང ། ཚུལ་ཁྲིམས་ཉམས་པ་དང ། ཚུལ་ཁྲིམས་མེད་པ་དག་ལ་རྣམ་པ་སྣ་ཚོགས་ཀྱིས་སྤྱོ་ཞིང་གཤེ་བ་དང ། གནོད་པ་བྱེད་པ་དང ། ཆོས་གོས་དང ། ལྷུང་བཟེད་འཕྲོག་པ་དང ། 60.199a འཚོ་བའི་ཡོ་བྱད་ལ་སྤྱོད་དུ་མི་སྟེར་བ་དང ། བཟུང་ཞིང་བཅིང་བ་ཡང་བྱེད་དོ། །དེ་ལྟར་རྒྱུ་དང་འབྲས་བུ་ཐམས་ཅད་མེད་པར་ལྟ་ཞིང་ཆད་པར་སྨྲ་བ་དག་ནི་མིའི་ནང་ན་གནས་ཀྱང ། དེ་ནི་ཡང་དག་པར་སྲིན་པོ་ཞེས་བྱ་སྟེ། མ་འོངས་པའི་དུས་ན་བསྐལ་པ་ཆེན་པོ་གྲངས་མེད་པའི་བར་དུ་ཡང་མིའི་ལུས་ཐོབ་པར་དཀའོ། །སེམས་ཅན་དམྱལ་བར་ཚད་མེད་པའི་སྡུག་བསྔལ་མྱོང་བར་ཡང་སླའི། མིའི་ནང་ན་ཆད་པར་ལྟ་བ་ནི་མ་ཡིན་ནོ། །དེ་ལྟར་གང་ཟག་གླེན་པ་དེ་ནི་རིང་པོ་མི་ཐོགས་པར་ལུས་ཀྱི་ཡན་ལག་དུམ་བུར་ཆད་ཅིང་ཉིན་ཞག་དུ་མར་ལྕེ་ལྐུག་ཅིང་སྨྲ་མི་ནུས་པ་དང ། ཤིན་དུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང ། ཚེ་འཕོས་ནས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་ཞིང་ངན་སོང་ཀུན་དུ་འཁོར་ལོ་བཞིན་དུ་འཁོར་ལ་སྡུག་བསྔལ་མང་པོ་ལེན་ཏེ་ཐར་བའི་དུས་མེད་དོ། །བསྐལ་པ་བརྒྱ་སྟོང་གི་བར་དུ་ཡང་མིའི་ལུས་ཐོབ་པར་དཀའོ། །གལ་ཏེ་བསྐལ་པ་ཚད་མེད་གྲངས་མེད་པ་འདས་ནས་མིའི་ལུས་ཐོབ་ན་ཡང་སངས་རྒྱས་མི་བཞུགས་པ་རྙོག་པ་ལྔའི་འཇིག་རྟེན་གྱི་ཁམས་སུ་སྐྱེ་སྟེ་དམུས་ལོང་དུ་འགྱུར་བ་དང་འོན་པ་དང་ལྐུག་པ་དང་ལྕེ་མེད་པ་དང ། ནད་རྣམ་པ་སྣ་ཚོགས་ཀྱིས་གཟིར་བ་དང་ལུས་ཐུང་ཞིང་མི་སྡུག་པས་ཀུན་གྱི་ཡིད་དུ་མི་འོང་བ་དང ། སྨྲ་མི་མཁས་ཤིང་ཚིག་རྣར་མི་འོང་བ་དང ། སེམས་རྟག་ཏུ་མྱོས་ཤིང་ཅི་ཡང་མི་ཤེས་པ་དང ། དབུལ་ཕོངས་པའི་རིགས་སུ་སྐྱེས་ནས་ཅི་ཡང་མི་རྙེད་པ་དང ། དགེ་བའི་བཤེས་གཉེན་དང་མི་ཕྲད་པ་དང ། སྡིག་པའི་བཤེས་གཉེན་གྱི་རྗེས་སུ་སྡིག་པའི་ལས་བྱེད་པ་ལ་དགའ་བ་དང ། ངན་པར་ལྟ་བ་ལ་ཆགས་ཤིང་མཚམས་མེད་པའི་སྡིག་པ་བྱེད་པ་ལ་དགའ་བས་ཕྱིར་ཡང་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་ཏེ། ངན་སོང་ལས་ཤིན་དུ་ཐར་བར་དཀའོ། །དེ་ལྟར་གླེན་པ་གཏི་མུག་ཅན་ཆད་པ་དང ། འགོག་པར་སྨྲ་བ་དེས་ངའི་དམ་པའི་ཆོས་མ་རུང་བར་བྱས་ནས་ངའི་སློབ་མ 60.199b ཚུལ་ཁྲིམས་སྲུང་བ་དང ། ཚུལ་ཁྲིམས་ཉམས་པ་དང ། ཚུལ་ཁྲིམས་མེད་པ་ལ་ནན་ཏན་གྱིས་ཆད་པས་གཅོད་ཅིང་དགེ་བའི་ཕྱོགས་ལ་བདེ་བར་སྤྱོད་དུ་མི་སྟེར་ཏེ། དེའི་རྒྱུ་དེའི་རྐྱེན་གྱིས་བསྐལ་པ་བརྒྱ་སྟོང་གི་བར་དུ་ངན་སོང་དུ་ལྷུང་ནས་མུན་པ་ནས་མུན་པར་རྒྱུ་སྟེ། ཐར་བའི་དུས་མེད་དོ། །དེ་ལྟར་སེམས་ཅན་དེའི་སྡིག་པ་རྣམ་པར་སྨིན་པ་ནི་ཉན་ཐོས་དང་རང་སངས་རྒྱས་ཀྱི་ཐེག་པའི་ཆོས་མཉན་པ་ལ་ནན་ཏན་མ་བྱས་པར་ཤིན་དུ་ཟབ་པ་ཐེག་པ་ཆེན་པོའི་དམ་པའི་ཆོས་ལ་ཉན་ཅིང་ནན་ཏན་བྱེད་པ་ལ་རྩོལ་བའི་ཕྱིར་རོ། །དེ་ལྟར་གླེན་པ་གཏི་མུག་ཅན་ཆད་པར་ལྟ་བར་སྨྲ་བ་དེ་མི་མ་རབས་ཐ་མའི་ལུས་ཀྱང་ཐོབ་པར་དཀའ་ན་འཕགས་པའི་ཆོས་ཀྱི་སྣོད་དུ་འགྱུར་བ་ལྟ་ཅི་སྨོས་ཉན་ཐོས་དང ། རང་སངས་རྒྱས་ཀྱི་མྱ་ངན་ལས་འདའ་བ་ཡང་མི་ཐོབ་ན་ཤིན་དུ་ཟབ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་ལྟ་ཅི་སྨོས་ཏེ། སེམས་ཅན་དེའི་ཉེས་པ་ནི་ཉན་ཐོས་ཀྱི་ཐེག་པའི་ཆོས་དང ། རང་སངས་རྒྱས་ཀྱི་ཐེག་པའི་ཆོས་མ་བསླབས་པར་ཐེག་པ་ཆེན་པོའི་ཆོས་ལ་ཞུགས་པར་གྱུར་པའི་ཕྱིར་རོ། །རིགས་ཀྱི་བུ་འདི་ལྟ་སྟེ། རྫ་སོ་མ་བཏང་བའི་ནང་དུ་མར་དང་འོ་མ་བླུགས་ན་ཐམས་ཅད་འཐུངས་ནས་སྣོད་དང་བཅུད་གཉི་ག་མ་རུང་བར་བྱེད་དོ། །དེ་ཅིའི་ཕྱིར་ཞེ་ན། སྣོད་ལ་སྐྱོན་ཡོད་པའི་ཕྱིར་རོ། །དེ་བཞིན་དུ་སེམས་ཅན་དག་ཀྱང་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པའི་ཆོས་ལ་ཤིན་དུ་ནན་ཏན་མ་བྱས་པ་ཡང་དག་པའི་བརྩོན་འགྲུས་མ་བརྩམས་པ་དབང་པོ་ཡོངས་སུ་མ་སྨིན་པ་དབང་པོ་ཞན་པ། བརྩོན་འགྲུས་ཆུང་བ་དག་ལ་གང་གིས་ཤིན་དུ་ཟབ་པ་ཐེག་པ་ཆེན་པོའི་དམ་པའི་ཆོས་བཤད་ན་བཤད་པ་དང་ཉན་པ་གཉི་ག་ཁ་ན་མ་ཐོ་བ་ཆེན་པོའི་སྡིག་ཐོབ་པར་འགྱུར་ཏེ། སངས་རྒྱས་ཐམས་ཅད་ལ་འཁུས་པའི་སྐྱོན་དུ་འགྱུར་བ་ནི་གོང་དུ་རྒྱས་པར་བཤད་པ་བཞིན་ནོ། །ཡང་འདི་ལྟ་སྟེ་འཇིག་རྟེན་པའི་བང་མཛོད་ཟག་པ་ཞིག་རལ་ཅན་གྱི་ནང་དུ་ནོར་རིན་པོ་ཆེ་བཅུག་ན 60.200a ན་ཆུད་ཟོས་ཤིང་སྟོར་བར་འགྱུར་རོ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་འཕྱ་ཞིང་སྐུར་ཏེ་མ་དད་པ་ནན་ཏན་དུ་མི་སློབ་པ་དག་ལ་ཐེག་པ་ཆེན་པོ་བཤད་ན་ཡང་དག་པ་ཇི་ལྟ་བ་བཞིན་དུ་མི་ཤེས་ཏེ། དེའི་དབང་གིས་སྡིག་བྱེད་ཅིང་འཁོར་བའི་མཐའ་ཟད་མི་ཤེས་པར་འགྱུར་རོ། །འདི་ལྟ་སྟེ་གྲུ་ཟག་པ་བུག་རྡོལ་ཅན་སྐྱེད་པ་དང་འདེག་པ་མི་ནུས་པ་ལ་ཞོན་ཏེ་རྒྱ་མཚོའི་ནང་དུ་འཇུག་པ་དེ་བཞིན་དུ་སེམས་ཅན་གང་སེར་སྣ་དང ། ཕྲག་དོག་གི་དབང་དུ་གྱུར་པ་ཐེག་པ་གཉིས་ཀྱི་ཆོས་ལ་ནན་ཏན་མ་བྱས་པར་བདག་ནི་ཐེག་པ་ཆེན་པོ་པ་ཡིན་ནོ་ཞེས་ཁས་འཆེ་བ་དེ་ནི་ཆད་པར་ལྟ་བ། ང་རྒྱལ་ཅན་གཡོ་དང་སྒྱུས་ཟག་པ་ཅན་དུ་གྱུར་པའི་ལུས་ཀྱིས་ཐམས་ཅད་མཁྱེན་པའི་རྒྱ་མཚོར་འཇུག་མི་ནུས་སོ། །འདི་ལྟ་སྟེ་གང་ཟག་དམུས་ལོང་དུ་གྱུར་པ་ནི་རིན་པོ་ཆེ་རྣམ་པ་སྣ་ཚོགས་བསྟན་པའི་གནས་སུ་མི་འགྱུར་རོ། །དེ་བཞིན་དུ་ང་རྒྱལ་གྱི་དབང་དུ་གྱུར་པ་བག་མེད་པ་སྟོང་པར་ལྟ་བ་ལ་ཆགས་ཤིང་ཐེག་པ་གཉིས་མི་སློབ་པའི་ཤེས་རབ་ཀྱི་མིག་མེད་པས་དམུས་ལོང་དུ་གྱུར་པ་ལ་ནི་བླ་ན་མེད་པའི་ཐེག་པ་ཆེན་པོའི་ཡོན་ཏན་རིན་པོ་ཆེ་བསྟན་པའི་གནས་སུ་མི་འགྱུར་རོ། །འདི་ལྟ་སྟེ་ལུས་ཤིན་དུ་མནམ་ཞིང་རུལ་བར་གྱུར་པ་ལ་བྱུག་པ་དྲི་ཞིམ་པ་རྣམ་པ་སྣ་ཚོགས་ཀྱིས་བྱུགས་ཀྱང་དྲི་ཞིམ་པར་མི་འགྱུར་རོ། །དེ་བཞིན་དུ་སེམས་ཅན་གླེན་པ་གཏི་མུག་ཅན་ང་རྒྱལ་གྱིས་མངོན་པར་ཟིན་པ། ཐེག་པ་གཉིས་ཀྱི་ཆོས་ལ་བརྩོན་པར་མ་དད་ཅིང་སྲོག་གཅོད་པ་མ་སྤངས་པ་ནས་ལོག་པར་ལྟ་བའི་བར་དུ་མ་སྤངས་པ་དེ་དག་ནི་བླ་ན་མེད་པའི་ཐེག་པ་ཆེན་པོ་ལ་ནན་ཏན་བྱེད་ཀྱང་ཤིན་དུ་ཟབ་མོའི་ཆོས་ཤེས་པར་མི་ནུས་སོ། །འདི་ལྟ་སྟེ་གྲམ་ཁྲོད་དུ་ས་བོན་བཟང་པོ་བཏབ་སྟེ་ཤིན་དུ་ལས་ཆེར་བྱས་ཀྱང་འབྲས་བུ་དང་ལོ་ཏོག་རྙེད་པར་མི་འགྱུར་རོ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ང་རྒྱལ་དང ། ལེ་ལོ་བྱེད་དེ་ནན་ཏན་མི་བྱེད་པ་དང ། འདོད་པ་ལྔ་ལ་ཆགས་ཏེ་མི་སྐྱོ་བ་དག་ལུས 60.200b དེ་ཉིད་ལ་ཐེག་པ་ཆེན་པོའི་རིགས་སུ་ཤིན་དུ་སྤྱད་དཀའ་བའི་བརྩོན་འགྲུས་བྱས་ཀྱང་ཅིར་ཡང་འགྲུབ་པའི་དོན་མེད་དོ། །འདི་ལྟ་སྟེ། རྫ་མ་སྔར་དུག་གི་སྣོད་བྱས་པའི་ནང་དུ་ཕྱིས་ཤ་ཁ་ར་ཆུང་ཟད་ཙམ་བཏབ་པས་སྤྱད་དུ་མི་རུང་ངོ ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ནན་ཏན་མི་བྱེད་པ་རྒྱུ་མེད་པར་སྨྲ་བ་ལ་ཐེག་པ་ཆེན་པོ་བསྟན་ཀྱང་བདག་དང་གཞན་ལ་ཕན་པའི་དོན་དུ་མི་འགྱུར་རོ། །འདི་ལྟ་སྟེ། སྔར་ཤ་ཁ་རའི་སྣོད་བྱས་པའི་རྫ་མའི་ནང་དུ་ཕྱིས་དུག་ཅུང་ཟད་བཏབ་ན་ཡང་སྤྱད་དུ་མི་རུང་ངོ ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ནན་ཏན་མ་བྱས་པར་ཐེག་པ་ཆེན་པོ་སྟོན་ན་གཉི་ག་ཉམས་ཤིང་འཁྱམས་པར་འགྱུར་རོ། །འདི་ལྟ་སྟེ། དཔེར་ན་སྨྱོས་ཤིང་སེམས་འཁྲུགས་པའི་མདུན་དུ་རོལ་མོ་སྣ་ཚོགས་བྱས་ཀྱང་བྱེ་བྲག་མི་ཕྱེད་པ་དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ཤིན་དུ་ནན་ཏན་མ་བྱས་པ་འདོད་ཆགས་དང ། ཞེ་སྡང་དང ། གཏི་མུག་ལ་སོགས་པའི་ཉོན་མོངས་པ་དྲག་པོས་སེམས་བསླད་པས་རྒྱུ་མེད་པར་འཛིན་པ། ཆད་པ་དང་མེད་པར་སྨྲ་བ། དབང་པོ་མ་སྨིན་པ་དག་ལ་ཐེག་པ་ཆེན་པོ་ཡུན་རིང་མོ་ཞིག་ཏུ་བཤད་ཀྱང་ཤེས་པར་རམ་རྟོགས་པར་མི་ནུས་སོ། །འདི་ལྟ་སྟེ། གང་ཞིག་གོ་ཆ་མེད་དེ་མཚོན་ཆ་མི་ཐོགས་པར་གཡུལ་ངོར་སོང་ན་གདོན་མི་ཟ་བར་རྨས་ཤིང་སྡུག་བསྔལ་མྱོང་བར་འགྱུར་རོ། །དེ་བཞིན་དུ་སེམས་ཅན་གང་ཐེག་པ་གཉིས་ཀྱི་ཆོས་ལ་ནན་ཏན་མ་བྱས་པ་ཤེས་རབ་ཞན་པ། དབང་པོ་དང་སྣོད་དུ་མ་གྱུར་པ་དག་ལ་ཐེག་པ་ཆེན་པོ་བཤད་ན་གདོན་མི་ཟ་བར་ལོག་པར་འཛིན་པའི་ཕྱིར་སྡིག་པའི་ལས་ཀུན་བྱེད་པ་ལ་ཟད་པའི་མཐའ་མེད་དོ། །དེ་ལྟར་གླེན་པ་གཏི་མུག་ཅན་དེ་རིང་པོ་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་ཉིན་ཞག་དུ་མར་ལྕེ་ལྐུག་ཅིང་སྨྲ་མི་ནུས་པ་དང ། ཤིན་དུ་མི་ཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་སྐྱེ་སྟེ་ངན་སོང་རྣམས་སུ 60.201a འཁོར་ཞིང་འཇུག་པ་ནི་ཇི་ལྟར་སྔར་རྒྱས་པར་བཤད་པ་བཞིན་ནོ། །རིགས་ཀྱི་བུ་དེ་བས་ན་མཁས་པ་དག་ནི་སྔར་ཕ་རོལ་པོའི་སེམས་བརྟགས་ཏེ་གདོད་ཆོས་བསྟན་པར་བྱའོ། །སྔར་བྱམས་པའི་སེམས་དང ། སྙིང་རྗེའི་སེམས་དང ། དགའ་བའི་སེམས་དང ། ཕན་པའི་སེམས་དང ། ལེ་ལོ་མེད་པའི་སེམས་དང ། ཤིན་དུ་བཟོད་པའི་སེམས་དང ། ང་རྒྱལ་མེད་པའི་སེམས་དང ། ཕྲག་དོག་མེད་པའི་སེམས་དང ། འཇུངས་པ་མེད་པའི་སེམས་དང ། མཉམ་པར་གཞག་པའི་ཏིང་ངེ་འཛིན་གྱི་སེམས་བསྐྱེད་ནས་གདོད་ཕ་རོལ་པོ་ལ་དམ་པའི་ཆོས་བསྟན་པར་བྱའི། སེམས་ཅན་ཕ་རོལ་པོས་ཆོས་ཐོས་ནས་འཁོར་བར་འཁོར་བའི་གཡང་ས་ཆེན་པོར་ལྷུང་བར་མི་བྱའོ། །དེ་བས་ན་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་སེམས་ཀྱི་མཚན་ཉིད་ཐུགས་སུ་ཆུད་ནས་དྲི་མ་མེད་པ་མི་ལེན་པར་སྤྱོད་པའི་འཁོར་ལོས་དམ་པའི་ཆོས་སྟོན་ཏེ། གོ་ཆ་ཆེན་པོ་བགོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གཞན་ལ་ཆོས་སྟོན་པ་ཡང་དེ་བཞིན་ཏེ། བྱམས་ཤིང་བརྩེ་བའི་ཕྱིར་ཉོན་མོངས་པ་ཐམས་ཅད་ཡོངས་སུ་གཅད་པ་དང ། སྲིད་པ་གསུམ་གྱི་རྒྱ་མཚོ་ལས་བསྒྲལ་བ་དང ། སེམས་ཅན་དག་ཐེག་པ་གསུམ་གང་ལ་དད་པའི་ཐེག་པ་གཅིག་ལ་འཛུད་ཅིང་མྱུར་དུ་རྫོགས་པར་བྱ་བའི་ཕྱིར་དམ་པའི་ཆོས་སྟོན་གྱི། འཁོར་བར་འཁོར་བའི་གཡང་ས་ཆེན་པོར་ལྟུང་བར་ནི་ནམས་ཀྱང་མི་བྱེད་དོ། །དེ་ལ་ཇི་ལྟར་ན་དྲི་མ་མེད་པར་སྤྱོད་པའི་འཁོར་ལོ་ཞེས་བྱ་ཞེ་ན། དེ་ལ་དྲི་མ་མེད་པ་ཞེས་བྱ་བ་ནི་ཆོས་སྟོན་པའི་ཚེ་ན་ཕུང་པོ་ཡོད་པའི་ཕྱིར་མ་ཡིན། སྐྱེ་མཆེད་ཡོད་པའི་ཕྱིར་མ་ཡིན། ཁམས་ཡོད་པའི་ཕྱིར་མ་ཡིན། འདོད་པའི་ཁམས་ཡོད་པའི་ཕྱིར་མ་ཡིན། གཟུགས་ཡོད་པའི་ཁམས་ཡོད་པའི་ཕྱིར་མ་ཡིན། གཟུགས་མེད་པའི་ཁམས་ཡོད་པའི་ཕྱིར་མ་ཡིན། འཇིག་རྟེན་འདི་ཡོད་པའི་ཕྱིར་མ་ཡིན། འཇིག་རྟེན་ཕ་རོལ་པོ་ཡོད་པའི་ཕྱིར་མ་ཡིན། འདུ་བྱེད་ཡོད་པའི་ཕྱིར་མ་ཡིན། ཚོར་བ 60.201b ཡོད་པའི་ཕྱིར་མ་ཡིན། འདུ་ཤེས་ཡོད་པའི་ཕྱིར་མ་ཡིན། རྟོག་པ་ཡོད་པའི་ཕྱིར་མ་ཡིན། རིག་པ་ཡོད་པའི་ཕྱིར་མ་ཡིན། ཡིད་ལ་བྱ་བ་ཡོད་པའི་ཕྱིར་མ་ཡིན། མ་རིག་པ་ཡོད་པའི་ཕྱིར་མ་ཡིན་པ་ནས་རྒ་ཤིའི་བར་དུ་ཡོད་པའི་ཕྱིར་མ་ཡིན། འགྲོ་བ་ཡོད་པ་དང ། འགྲོ་བ་མེད་པའི་ཕྱིར་སེམས་ཅན་ལ་དམ་པའི་ཆོས་སྟོན་པ་མ་ཡིན་ནོ། །འདི་ལྟ་སྟེ། ཕུང་པོ་དང ། ཁམས་དང ། སྐྱེ་མཆེད་ནས་འགྲོ་བ་དང་འགྲོ་བ་མེད་པའི་བར་དུ་རྒྱས་པར་བཤད་པ་ཀུན་ཀྱང་རབ་ཏུ་ཞི་བས་སེམས་ཅན་ལ་དམ་པའི་ཆོས་སྟོན་ཏོ། །དེ་ལྟ་བས་ན་དྲི་མ་མེད་པ་ཞེས་བྱའོ། །སྤྱོད་པ་ཞེས་བྱ་བ་ནི་འདི་ལྟ་སྟེ། འདི་ནས་འཆི་འཕོ་བ་དང་ཕ་རོལ་དུ་སྐྱེ་བ་ཡོངས་སུ་གཅད་པའི་ཕྱིར་སེམས་ཅན་དག་ལ་ཆོས་སྟོན་ཏོ། །ཕུང་པོ་དང ། ཁམས་དང ། སྐྱེ་མཆེད་ཡོངས་སུ་གཅད་པ་ནས་དེ་བཞིན་དུ་འགྲོ་བ་དང་མི་འགྲོ་བའི་བར་དུ་རྒྱས་པར་ཡོངས་སུ་གཅོད་པའི་ཕྱིར་སེམས་ཅན་རྣམས་ལ་ཆོས་སྟོན་པ་ནི་སྤྱོད་པ་ཞེས་བྱའོ། །འཁོར་ལོ་ཞེས་བྱ་བ་ནི་འདི་ལྟ་སྟེ། ཟླ་བ་ཉ་བའི་འོད་ཤིན་དུ་སིམ་ཞིང་གསལ་བ་ཐོགས་པ་མེད་པར་ནམ་མཁའ་ལ་སྣང་བས་ཐམས་ཅད་དུ་ཐོགས་པ་མེད་པའི་སྤྱོད་ཡུལ་དུ་འགྱུར་བ་དེ་བཞིན་དུ་དེ་བཞིན་གཤེགས་པ་དང ། བྱང་ཆུབ་སེམས་དཔའ་རྣམས་ཀྱི་ཇི་སྙེད་རྫུ་འཕྲུལ་དང ། མངོན་པར་ཤེས་པ་དང ། ཤེས་པ་བརྡ་སྤྲོད་པ་དང ། བསླབ་པར་བྱ་བ་དང ། རྣམ་པར་རྒྱལ་བའི་འཁོར་ལོ་གསུམ་པོས་མཛད་པ་ཐོགས་པ་མེད་པར་འཇིག་རྟེན་གྱི་ཁམས་ཀུན་དུ་སྣོད་དུ་གྱུར་པའི་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་སེམས་ཅན་དག་གཞན་ལ་སྐྱབས་སུ་འགྲོ་བ་དང ། འཇིག་རྟེན་རྒྱང་པན་པ་ཐམས་ཅད་དང་མ་འདྲེས་པ་དང ། ཉན་ཐོས་དང ། རང་སངས་རྒྱས་ཐམས་ཅད་དང་མ་འདྲེས་པར་སེམས་ཅན་དག་འཁོར་བའི་སྡུག་བསྔལ་ཐམས་ཅད་བཅད་དེ། ཤིན་དུ་བདེ་བའི་བྱང་ཆུབ་ཀྱི་མྱ་ངན་ལས་འདའ་བ་ཐོབ་པར་བྱེད་པ་ནི་འཁོར་ལོ་ཞེས 60.202a བྱའོ། །དེ་ལྟར་ན་དེ་དག་ནི་སངས་རྒྱས་དང ། བྱང་ཆུབ་སེམས་དཔའ་རྣམས་ཀྱི་དྲི་མ་མེད་པར་སྤྱོད་པའི་འཁོར་ལོ་ཞེས་བྱའོ། །དེ་ལ་ཇི་ལྟར་ན་མི་ལེན་པར་སྤྱོད་པའི་འཁོར་ལོ་ཞེ་ན། ཆོས་ཐམས་ཅད་ལ་ཐོགས་པ་མེད་པར་ཇི་ལྟར་ཉི་མའི་དཀྱིལ་འཁོར་ཀུན་དུ་སྣང་བ་བཞིན་དུ་ཐེག་པ་གསུམ་གྱི་དབང་པོ་དང་སྣོད་ཇི་ལྟ་བ་བཞིན་དུ་ཆགས་པ་མེད་པར་དམ་པའི་ཆོས་སྟོན་ཏོ། །དེ་བཞིན་གཤེགས་པ་སེམས་ཅན་རྣམས་ལ་ཆོས་སྟོན་པ་ནི་ཇི་ལྟར་ནམ་མཁའ་ཐ་དད་པའི་མཚན་ཉིད་མེད་པ་ལྟར་ཚད་མེད་པའི་ཏིང་ངེ་འཛིན་དང ། རྣམ་པར་གྲོལ་བའི་དབང་དང ། བཀོད་པས་ཡོངས་སུ་ཟིན་པར་སེམས་ཅན་དག་ལ་ཆགས་པ་མེད་པར་དམ་པའི་ཆོས་སྟོན་ཏོ། །གོ་ཆ་ཆེན་པོ་བགོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཕ་རོལ་ལ་ཆོས་སྟོན་པ་ཡང་དེ་དང་འདྲ་སྟེ། ཆོས་སྟོན་པ་ནི་ཡོད་པ་ཡང་མ་ཡིན། མེད་པ་ཡང་མ་ཡིན། གཟུགས་ཉིད་སྟོང་པ་མ་ཡིན། གཟུགས་ལས་གཞན་པ་སྟོང་པ་མ་ཡིན་པ་ནས་རྣམ་པར་ཤེས་པ་ཉིད་ཀྱི་བར་དུ་སྟོང་པ་མ་ཡིན། རྣམ་པར་ཤེས་པ་ལས་གཞན་པ་སྟོང་པ་མ་ཡིན་ནོ། །མིག་ཉིད་སྟོང་པ་མ་ཡིན། མིག་ལས་གཞན་པ་སྟོང་པ་མ་ཡིན་པ་ནས་ཡིད་ཉིད་ཀྱི་བར་དུ་སྟོང་པ་མ་ཡིན། ཡིད་ལས་གཞན་པ་སྟོང་པ་མ་ཡིན་ནོ། །གཟུགས་ཉིད་སྟོང་པ་མ་ཡིན། གཟུགས་ལས་གཞན་པ་སྟོང་པ་མ་ཡིན་པ་ནས་ཆོས་ཉིད་ཀྱི་བར་དུ་སྟོང་པ་མ་ཡིན། ཆོས་ལས་གཞན་པ་སྟོང་པ་མ་ཡིན་ནོ། །མིག་གི་རྣམ་པར་ཤེས་པ་ཉིད་སྟོང་པ་མ་ཡིན། མིག་གི་རྣམ་པར་ཤེས་པ་ལས་གཞན་པ་སྟོང་པ་མ་ཡིན་པ་ནས་ཡིད་ཀྱི་རྣམ་པར་ཤེས་པ་ཉིད་ཀྱི་བར་དུ་སྟོང་པ་མ་ཡིན་ནོ། །ཡིད་ཀྱི་རྣམ་པར་ཤེས་པ་ལས་གཞན་པ་སྟོང་པ་མ་ཡིན་ནོ། །འདོད་པའི་ཁམས་ཉིད་སྟོང་པ་མ་ཡིན། འདོད་པའི་ཁམས་ལས་གཞན་པ་སྟོང་པ་མ་ཡིན་པ་ནས་ནམ་མཁའ་མཐའ་ཡས་སྐྱེ་མཆེད་སྟོངས་ཉིད་སྟོང་པ་མ 60.202b ཡིན། ནམ་མཁའ་མཐའ་ཡས་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན་ནོ། །རྣམ་ཤེས་མཐའ་ཡས་སྐྱེ་མཆེད་སྟེངས་ཉིད་སྟོང་པ་མ་ཡིན། རྣམ་ཤེས་མཐའ་ཡས་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན། ཅུང་ཟད་མེད་པའི་སྐྱེ་མཆེད་སྟེངས་ཉིད་སྟོང་པ་མ་ཡིན། ཅུང་ཟད་མེད་པའི་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན་ནོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཉིད་སྟོང་པ་མ་ཡིན། འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལས་གཞན་པ་སྟོང་པ་མ་ཡིན་ནོ། །དྲན་པ་ཉེ་བར་གཞག་པ་བཞི་ཉིད་སྟོང་པ་མ་ཡིན། དྲན་པ་ཉེ་བར་གཞག་པ་བཞི་ལས་གཞན་པ་སྟོང་པ་མ་ཡིན་པ་ནས་འཕགས་པའི་ལམ་ཡན་ལག་བརྒྱད་པ་ཉིད་ཀྱི་བར་དུ་སྟོང་པ་མ་ཡིན། འཕགས་པའི་ལམ་ཡན་ལག་བརྒྱད་པ་ལས་གཞན་པ་སྟོང་པ་མ་ཡིན་ནོ། །རྟེན་ཅིང་འབྲེལ་ཏེ་འབྱུང་བ་ཉིད་སྟོང་པ་མ་ཡིན། རྟེན་ཅིང་འབྲེལ་ཏེ་འབྱུང་བའི་ཆོས་ལས་གཞན་པ་སྟོང་པ་མ་ཡིན་ནོ། །བསྲུང་བར་བྱ་བ་གསུམ་པོ་ཉིད་སྟོང་པ་མ་ཡིན། བསྲུང་བར་བྱ་བ་གསུམ་པོ་ལས་གཞན་པ་སྟོང་པ་མ་ཡིན་ནོ། །འཇིགས་པ་མེད་པ་བཞི་ཉིད་སྟོང་པ་མ་ཡིན། །འཇིགས་པ་མེད་པ་བཞི་ལས་གཞན་པ་སྟོང་པ་མ་ཡིན་ནོ། །སྟོབས་བཅུ་ཉིད་སྟོང་པ་མ་ཡིན། སྟོབས་བཅུ་ལས་གཞན་པ་སྟོང་པ་མ་ཡིན་ནོ། །མ་འདྲེས་པའི་ཆོས་བཅཝོ་བརྒྱད་ཉིད་སྟོང་པ་མ་ཡིན། མ་འདྲེས་པའི་ཆོས་བཅཝ་བརྒྱད་ལས་གཞན་པ་སྟོང་པ་མ་ཡིན་ནོ། །བྱམས་པ་ཆེན་པོ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང ། བཏང་སྙོམས་ཆེན་པོ་ཉིད་སྟོང་པ་མ་ཡིན། བྱམས་པ་ཆེན་པོ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང ། བཏང་སྙོམས་ཆེན་པོ་ལས་གཞན་པ་སྟོང་པ་མ་ཡིན་ནོ། །མྱ་ངན་ལས་འདའ་བ་ཉིད་སྟོང་པ་མ་ཡིན། མྱ་ངན་ལས་འདས་པ་ལས་གཞན་པ་སྟོང་པ་མ་ཡིན་ནོ། །དེ་དག་ནི་དེ་བཞིན་གཤེགས་པ་དང ། བྱང་ཆུབ་སེམས་དཔའ་རྣམས་ཀྱི་སེམས་ཅན་རྣམས་ལ་དམ་པའི་ཆོས་སྟོན་པ་ལ 60.203a དབུ་མའི་ནན་ཏན་ཞེས་བྱའོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་པས་སེམས་ཅན་དག་ལ་དྲི་མ་མེད་པར་སྤྱོད་པའི་འཁོར་ལོས་ཆོས་སྟོན་ཏེ། ཇི་ལྟར་ཟླ་བ་ཉ་བའི་འོད་ཤིན་དུ་གསལ་ཞིང་སིམ་པ་དང ། ཐོགས་པ་མེད་པར་ནམ་མཁའ་ཀུན་དུ་ཁྱབ་པ་དང ། སྤྱོད་ཡུལ་ཐམས་ཅད་དུ་ཐོགས་པ་མེད་པར་སྣང་བ་ནས་གཞུང་དེ་བཞིན་དུ་རྒྱས་པར་སྟོན་ཏོ། །དང་དུ་མི་ལེན་པར་སྤྱོད་པའི་འཁོར་ལོས་ཀྱང་དམ་པའི་ཆོས་སྟོན་ཅིང་ཆོས་ཐམས་ཅད་ལ་ཐོགས་པ་མེད་པ་ནི་ཇི་ལྟར་ཉི་མའི་འོད་ཀུན་དུ་གསལ་བ་ལྟར་ཐེག་པ་གསུམ་གྱི་སྣོད་དང་དབང་པོ་ཇི་ལྟ་བ་བཞིན་དུ་དམ་པའི་ཆོས་ཆགས་པ་མེད་པར་སྟོན་ཏོ། །དེ་བཞིན་གཤེགས་པས་སེམས་ཅན་དག་ལ་ཆོས་སྟོན་པ་ནི་ཇི་ལྟར་ནམ་མཁའ་ལ་མཚན་ཉིད་ཐ་དད་པ་མེད་པ་ལྟར་ཏིང་ངེ་འཛིན་ཚད་མེད་པས་རྣམ་པར་རོལ་པའི་དབང་དང ། བཀོད་པས་ཡོངས་སུ་བཟུང་བས་སེམས་ཅན་དག་ལ་ཆགས་པ་མེད་པར་དམ་པའི་ཆོས་སྟོན་ཏེ། ཐེག་པ་གསུམ་ལས་གང་དང་འཐུན་པ་བཞིན་དུ་འཛུད་དོ། །གོ་ཆ་ཆེན་པོ་བགོས་པའི་བྱང་ཆུབ་སེམས་དཔའ་སེམས་དཔའ་ཆེན་པོས་གཞན་ལ་ཆོས་སྟོན་པ་ཡང་དེ་བཞིན་ཏེ། སེམས་ཅན་རྣམས་ལ་མཆོག་དམ་པ་ཤིན་དུ་ཟབ་པའི་ཆོས་འདི་ཐོས་པར་བྱས་ཏེ་ཐེག་པ་གསུམ་ལས་གང་ལ་མོས་པ་དེ་གཅིག་ལ་འཛུད་ཅིང་དགེ་བའི་རྩ་བ་ཡོངས་སུ་སྨིན་པར་བྱ་བ་དང ། ཐེག་པ་གཅིག་ལ་བདེ་བར་དགོད་པ་དང ། གང་འཁོར་བའི་གནས་སུ་སྡིག་པ་མི་དགེ་བའི་ལས་རྣམ་པ་ཐམས་ཅད་འཕེལ་བར་མི་བྱེད་ཅིང ། ཐམས་ཅད་མྱ་ངན་ལས་འདའ་བ་ཤིན་དུ་བརྟན་པ་དང་ཕྱིར་མི་ལྡོག་པར་ཡང་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་སེམས་ཅན་གྲངས་མེད་ཚད་མེད་པའི་འཁོར་བ་ཡོངས་སུ་གཅད་པའི་ཕྱིར་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་བདག་གི་འཁོར་བ་འབའ་ཤིག་གཅད་པའི་ཕྱིར་ཕ་རོལ་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ 60.203b ཆེན་པོ་ནི་སེམས་ཅན་ཚད་མེད་གྲངས་མེད་པ་དག་ཆུ་བོ་བཞི་ལས་བསྒྲལ་བའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་བདག་ཆུ་བོ་བཞི་ལས་བསྒྲལ་བའི་ཕྱིར་གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཚད་མེད་གྲངས་མེད་པའི་ཉོན་མོངས་པའི་ནད་བསལ་བའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་བདག་ཉིད་ཀྱི་ཉོན་མོངས་པའི་ནད་བསལ་བའི་ཕྱིར། གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ཀྱི་ཕུང་པོའི་ཉོན་མོངས་པའི་བག་ཆགས་ཀྱི་རྒྱུན་ལྷག་མ་མ་ལུས་པར་གཅད་པའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་བདག་འབའ་ཤིག་གི་ཕུང་པོའི་ཉོན་མོངས་པའི་བག་ཆགས་ཀྱི་རྒྱུན་ལྷག་མ་མ་ལུས་པར་གཅད་པའི་ཕྱིར་གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྙིང་རྗེ་ཆེན་པོའི་འབྲས་བུ་བསྒྲུབ་པའི་ཕྱིར་སྙིང་རྗེ་ཆེན་པོས་རྒྱུ་བྱས་ཏེ་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་སྙིང་རྗེ་ཆེན་པོའི་འབྲས་བུའི་ཕྱིར་སྙིང་རྗེ་ཆེན་པོས་རྒྱུ་བྱས་ཏེ་གཞན་ལ་ཆོས་སྟོན་པ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་དམིགས་ཏེ་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་སེམས་ཅན་རྣམས་ལ་དམིགས་པ་མེད་པར་གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་བདག་འབའ་ཞིག་གི་སྡུག་བསྔལ་ཞི་བར་བྱ་བའི་ཕྱིར་གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་ཆོས་ཀྱི་རོས་ཁྱབ་པར་བྱ་བའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་བདག་འབའ་ཞིག་ལ་ཆོས་ཀྱི་རོས་ཁྱབ་པར་བྱ་བའི་ཕྱིར། 60.204a གཞན་ལ་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་རྒྱལ་བའི་ཆོས་ཀྱི་འོད་ཐོབ་པར་བྱ་བའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་བདག་འབའ་ཞིག་རྒྱལ་བའི་ཆོས་ཀྱི་འོད་ཐོབ་པར་བྱ་བའི་ཕྱིར་གཞན་ལ་ཆོས་སྟོན་ཏོ། །རིགས་ཀྱི་བུ་མདོར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྡོམ་པ་ཚད་མེད་པས་སེམས་ཅན་ཐམས་ཅད་ཀྱི་མ་རིག་པའི་མུན་པ་ཆེན་པོ་ཡོངས་སུ་བསལ་བ་དང ། འཇིགས་པའི་དངོས་པོ་ཆེན་པོ་དང ། གནོད་པར་འགྱུར་བ་ཐམས་ཅད་ཡོངས་སུ་བསལ་ཏེ་འོད་ཀྱི་སྣང་བ་ཆེན་པོ་འཐོབ་པ་དང ། གྲགས་པ་ཆེན་པོ་འཐོབ་པ་དང ། ཡང་དག་པ་ཇི་ལྟ་བ་བཞིན་དུ་ཐམས་ཅད་མཁྱེན་པའི་ཡེ་ཤེས་རྟོགས་པར་བྱ་བའི་ཕྱིར་གཞན་ལ་ཆོས་སྟོན་ཏོ། །ཉན་ཐོས་དང ། རང་སངས་རྒྱས་ནི་སྡོམ་པ་ཅུང་ཟད་ཀྱིས་བདག་གི་མ་རིག་པའི་མུན་པ་བསལ་བ་དང ། འོད་སྣང་བ་ཅུང་ཟད་འཐོབ་པ་དང ། གྲགས་པ་ཅུང་ཟད་འཐོབ་པ་དང ། ཡང་དག་པ་ཇི་ལྟ་བ་བཞིན་དུ་ཆོས་ཆུད་པའི་ཡེ་ཤེས་ཅུང་ཟད་རྟོགས་པར་བྱ་བའི་ཕྱིར་གཞན་ལ་ཆོས་སྟོན་ཏོ། །རིགས་ཀྱི་བུ་ཉན་ཐོས་དང ། རང་སངས་རྒྱས་ནི་གཞན་ལ་ཡང་དག་པར་དམིགས་པ་མེད་དོ། །གཞན་ལ་ཡང་དག་པར་སྙིང་རྗེ་བ་མེད་དོ། །གཞན་ལ་ཡང་དག་པར་མི་བརྙས་པའི་སེམས་མེད་དོ། །གཞན་ལ་ཡང་དག་པར་ཕན་པ་དང་བདེ་བར་བྱ་བའི་སེམས་མེད་དོ། །གཞན་ལ་ཡང་དག་པར་དཀྲོལ་ཞིང་སྒྲོལ་བའི་སེམས་མེད་དོ། །གཞན་ལ་ཡང་དག་པར་འདེག་པའི་སེམས་མེད་དོ། །གཞན་ལ་ཡང་དག་པར་བསྔགས་ཤིང་བསྟོད་པའི་སེམས་མེད་དོ། །ཕ་རོལ་ལ་ཡང་དག་པར་གཡོ་དང་སྒྱུ་མེད་པར་བསྟོད་པ་མ་ཡིན་ནོ། །གཞན་ལ་ཡང་དག་པར་བདག་གི་ལུས་ལ་མི་ལྟ་ཞིང་གཞན་གྱི་ཕན་པ་དང་བདེ་བ་སྒྲུབ་པ་མ་ཡིན་ནོ། །གཞན་ལ་ཡང་དག་པར་ལུས་དང ། ངག་དང ། ཡིད་ཀྱི་ལས་མི་ཉམས་པ་མ་ཡིན་ནོ། །རིགས་ཀྱི་བུ་ཐེག་པ་ཆེན་པོ་ལ་གནས་ན་ཅི་ཡང་བདག་གིར་དམིགས་པ 60.204b གང་ཡང་ཡང་དག་པར་མེད་པ་ནས་དེ་བཞིན་དུ་རྒྱས་པར་ཕ་རོལ་ལ་ལུས་དང ། ངག་དང ། ཡིད་ཀྱི་ལས་གཞན་ལ་གནོད་པ་སྐྱེད་པ་གང་ཡང་མེད་དོ། ་་་་་་་ ། བམ་པོ་བདུན་པ། རིགས་ཀྱི་བུ་གཞན་ཡང་སེམས་ཅན་གང་རང་བཞིན་གྱིས་གདུག་པ། ཚིག་བརླང་ཞིང་རྩུབ་པ། ཡང་དག་པར་གླེན་པ། གཏི་མུག་གི་རང་བཞིན་ཅན་ཤེས་པ་སྙེམས་པ་སྲོག་གཅོད་པ་མ་སྤངས་པ་ནས་ངན་པར་ལྟ་བའི་བར་དུ་མ་སྤངས་པ། གཞན་དག་གི་ཁེ་དང ། བཀུར་སྟི་དང ། མཆོད་པ་དང ། གྲགས་པ་རྙེད་པ་མཐོང་ན་ཕྲག་དོག་སྐྱེད་པ། བདག་རྟག་ཏུ་ཁེ་དང ། བཀུར་སྟི་དང ། མཆོད་པ་དང ། གྲགས་པ་ཚོལ་བས་མི་ངོམས་པ། བདག་སྟོད་ཅིང་གཞན་ལ་སྨོད་པ། བདག་གི་ལུས་དང ། ངག་དང ། ཡིད་ཀྱི་ལས་མི་སྡོམ་པ། སྡིག་པ་ཐམས་ཅད་སྤྱོད་པ་ལ་རྟག་ཏུ་དགའ་བ། རང་གི་སེམས་གདུག་པ། སྙིང་རྗེའི་སེམས་མེད་པ། འཛེམ་པ་མེད་པ། ངོ་ཚ་བ་མེད་པ། གཞན་ལ་འཚེ་བ་ལ་དགའ་བ། བསོད་ནམས་ཀྱི་ཞིང་ལ་བཟང་ངན་དུ་རྣམ་པར་འབྱེད་པ། ངའི་བསྟན་པ་ལ་ཞུགས་པ་རབ་ཏུ་བྱུང་བ་ལ་སྐྱོན་ཚོལ་ཞིང་གནོད་པར་ཀླགས་ལྟ་བ་ལ་དགའ་བ། སྐྱོན་ཅུང་ཟད་ཙམ་བྱུང་ན་བདེན་ནམ་བརྫུན་མ་བརྟགས་པར་འཕྱ་ཞིང་སྐུར་ཏེ་གཤེ་ཞིང་སྤྱོ་བ། སེམས་མ་དུལ་བ། རྒོད་པ་གཡེང་བ། རབ་ཏུ་བྱུང་བ་ལ་འཚེ་བར་དགའ་བ། བདག་གི་སྐྱོན་ལ་མི་སེམས་ཤིང་གཞན་ལ་འཕྱ་བ། ཐེག་པ་ཆེན་པོའི་ཡོན་ཏན་དང ། བསྔགས་པ་བརྗོད་པ་ཐོས་ན་ཚོལ་ཞིང་འཇུག་པའི་སེམས་སྐྱེ་མོད་ཀྱི། ཁ་ན་མ་ཐོ་བའི་སྡིག་ལྕི་བ་སྤྱོད་པ་ལ་དགའ་བ། རབ་ཏུ་མ་ཞི་བ། གཞན་ལ་བསླུ་བའི་ཕྱིར་ཐེག་པ་ཆེན་པོའི་ཆོས་ལ་བདག་ཉན་ཅིང་གཞན་ཡང་ཉན་དུ་གཞུག་པའི་ཚུལ་སྟོན་པ་དང ། བདག་ཀློག་པ་དང ། ཁ་ཏོན་བྱེད་ཅིང་གཞན་ཡང་ཀློག་ཅིང་ཁ་ཏོན་བྱེད་དུ་འཇུག་པའི་ཚུལ་སྟོན་པ་དང ། བདག་བསྟོད་པའི་ཕྱིར་གཞན་ལ་སྨོད་པ་དེ་ཐེག་པ་ཆེན་པོའི་ཆོས་ལ་སྟི་སྟང་དང་བཅས་པས་བསྟོད་ཀྱང་ཐེག་པ་ཆེན་པོའི་སྤྱོད་ཡུལ་ལ་ནན་ཏན་དུ་མ་བསླབས་པས་དོན་ཁོང་དུ་ཆུད་པ་མེད 60.205a པར་བདག་ནི་ཐེག་པ་ཆེན་པོ་པའོ་ཞེས་ཁས་འཆེ་ཞིང་ཁེ་དང ། གྲགས་པ་དང ། བདག་གི་འཚོ་བ་བཙལ་བའི་ཕྱིར་གཞན་བདག་ལ་གནས་འཆའ་ཞིང་སློབ་ཏུ་འཇུག་གོ་།དཔེར་ན་ཚུལ་ཁྲིམས་ཉམས་པ་སྡིག་པ་སྤྱོད་པའི་འདུལ་བ་འཛིན་པ་ལྟ་བུ་བདག་ཚུལ་ཁྲིམས་ཉམས་ལ་སྡིག་པ་སྤྱོད་ཀྱང་ཁེ་དང ། གྲགས་པའི་ཕྱིར་གཞན་དག་འདུལ་བའི་སྡེ་སྣོད་སློབ་པར་གཞེན་འདབས་པ་དེ་ལྟར་གཡོ་དང་གྱ་གྱུར་ལྡན་ལ་སླུ་བའི་ངང་ཅན་གྱི་སེམས་ཅན་དེ་དག་ནི་མིའི་ལུས་ཐ་མ་ཡང་ཐོབ་པར་དཀའ་ཞིང་མཐོ་རིས་ཀྱི་ལྷ་དང ། ཐེག་པ་གཉིས་ཀྱི་མྱ་ངན་ལས་འདའ་བ་ཡང་ཉམས་ཏེ་མི་ཐོབ་ན་ཐེག་པ་ཆེན་པོ་ཐོབ་པ་ལྟ་ཅི་སྨོས་ཏེ་དེ་ནི་གནས་མེད་དོ། །དེ་འཆི་འཕོས་ནས་ཀྱང་སེམས་ཅན་དམྱལ་བར་ལྟུང་སྟེ། ཐར་པའི་དུས་མེད་པས་མཁས་པ་དག་གིས་དེ་ལ་བསྟེན་པར་མི་བྱའོ། །ཁྲེལ་བ་དང ། ངོ་ཚ་བ་མེད་པ་འཁོར་མང་པོའི་ནང་དུ་ཁེ་དང ། བཀུར་སྟིའི་ཕྱིར་ང་ནི་ཐེག་པ་ཆེན་པོ་པའོ་ཞེས་སེང་གེའི་སྒྲ་སྒྲོགས་པས་གླེན་པ་གཏི་མུག་ཅན་དག་དང་བསྙེན་ཅིང་གྲོགས་སུ་བྱེད་དོ། །དེ་ནི་དཔེར་ན་བོང་བུས་སེང་གེའི་ལྤགས་པ་གྱོན་ཏེ་བདག་ནི་སེང་གེའོ་ཞེས་ཁས་འཆེ་བས་མི་ཞིག་གིས་རྒྱང་ནས་མཐོང་ན། དེ་སེང་གེ་ཉིད་ཡིན་པར་འཛིན་ཏོ། །དེ་ནས་དེས་སྒྲ་ཕྱུང་བ་དང ། ཐམས་ཅད་ཀྱིས་བོང་བུ་ཡིན་པར་ཤེས་ནས་ཀུན་གྱིས་མཆིལ་མས་བཏབ་སྟེ། སོ་སོ་ནས་སྨྲས་པ། འདི་ཀོ་མི་གཙང་བ་ཟ་བའི་སྡིག་ཏོ་བོང་བུ་ལྟ་ན་ཞེས་ཚིག་ངན་པ་སྣ་ཚོགས་ཀྱིས་སྨད་དེ་དོང་ངོ ། །དེ་ལྟར་ན་དེ་བཞིན་དུ་ངས་བཤད་པའི་གང་ཟག་མི་དགེ་བ་བཅུའི་ལས་ཀྱི་ལམ་སྤྱོད་པ་ལ་སྤྲོ་བ། ལྷ་དང་མི་ཐམས་ཅད་ཀྱི་ས་བོན་བསྲེགས་པ་ཡིན་ཏེ། ཉན་ཐོས་དང ། རང་སངས་རྒྱས་ཀྱི་ཐེག་པའི་ཆོས་ལས་ཀྱང་ཕྱིར་ལྡོག་པ་ཡིན་ན་ཐེག་པ་ཆེན་པོའི་སྣོད་དུ་འགྱུར་བ་ལྟ་ཅི་སྨོས། དེ་ལྟར་གླེན་པ་གཏི་མུག་ཅན་ང་རྒྱལ་གྱིས་མངོན་པར་ཟིན་ཏེ་བདག་ཐེག་པ་ཆེན་པོ་པའོ་ཞེས་ཕ་རོལ་ལ་སྒྱུས་བརྗོད་ཅིང་ཁེ་དང ། བཀུར་སྟི་སྡུད་པ་དེ་ནི་དཔེར་ན་རྐང 60.205b ལག་མེད་པའི་མི་གླེན་པ་ཞིག་དགྲ་ལ་བརྒལ་བའི་ཕྱིར་གཡུལ་དུ་ཞུགས་ཀྱི་ང་བདག་ཉོན་མོངས་པ་ལས་དོན་དུ་འགྲུབ་པ་མེད་དོ། །དེ་ལྟར་དེ་བཞིན་དུ་ཐེག་པ་ཆེན་པོ་པར་སྒྱུས་ཁས་འཆེ་བ་དེ་ཡང་འདི་ལྟར་དད་པའི་ལག་པ་དང ། ཚུལ་ཁྲིམས་ཀྱི་རྐང་པ་མ་ཚང་བར་རང་གི་ལས་དང་སྤྱོད་པ་ལ་མི་དཔོག་ཅིང་ཉོན་མོངས་པའི་གཡུལ་ཆེན་པོ་ལ་རྒོལ་བར་ཆགས་པ་ནི་བདག་ཉོན་མོངས་པ་ཙམ་ལས་དོན་དུ་མི་འགྱུར་རོ། །གང་ཟག་དེ་སྒོ་གསུམ་མི་སྡོམ་པར་སྡིག་པ་འབའ་ཞིག་སྤྱོད་ཅིང་བདག་ནི་ཐེག་པ་ཆེན་པོ་པའོ་ཞེས་ཁས་འཆེ་ཡང་ཐེག་པ་གསུམ་གྱི་ཆོས་ཀྱི་སྣོད་མ་ཡིན་པས་སེམས་ཅན་ཐམས་ཅད་ཀྱི་ཉོན་མོངས་པའི་དགྲ་ཤིན་ཏུ་གནས་པ་ཆོམས་པར་རམ། སེམས་ཅན་ཐམས་ཅད་ལ་འཕགས་པའི་ལམ་གྱི་ཡན་ལག་བརྒྱད་སྟོན་པར་རམ། འཇིགས་པ་མད་པའི་མྱ་ངན་ལས་འདའ་བའི་གྲོང་ཁྱེར་དུ་དགོད་པའི་གནས་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཐེག་པ་ཆེན་པོ་ཞེས་བྱ་བ་ནི་ཕུལ་དུ་གྱུར་པའི་ཚུལ་ཁྲིམས་རྣམ་པར་དག་པར་སྲུང་བ། ཕུལ་དུ་གྱུར་པའི་དགེ་བའི་མཆོག་སྤྱོད་པར་ལྡན་པ། ཕུལ་དུ་གྱུར་པའི་ཁྲེལ་བ་དང ། ངོ་ཚ་བར་བརྟེན་པའོ། །འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་ཤིན་དུ་ལྟ་ཞིང་འཇིགས་པའོ། །མི་དགེ་བའི་ཆོས་ཐམས་ཅད་ཡོངས་སུ་སྤོང་ཞིང་དགེ་བའི་ཆོས་ཐམས་ཅད་ལ་ནན་ཏན་བྱེད་པ་ལ་སྤྲོ་བའོ། །བྱམས་པ་དང ། སྙིང་རྗེས་སེམས་ཅན་ཐམས་ཅད་ལ་ཁྱབ་པའོ། །སེམས་ཅན་ཐམས་ཅད་ལ་ཕན་པ་དང ། བདེ་བའི་དོན་བྱ་བའི་ཕྱིར་རྩོལ་བའོ། །སེམས་ཅན་ཐམས་ཅད་འཁོར་བའི་སྡུག་བསྔལ་ལས་སྒྲོལ་ཞིང་འདོན་པའོ། །བདག་གིས་ལུས་ཀྱི་བདེ་བ་ལ་མི་ལྟ་བར་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་སྟོབས་པ་སྟེ། དེ་དག་ནི་ཐེག་པ་ཆེན་པོ་ལ་གནས་པ་ཞེས་བྱའོ། །རིགས་ཀྱི་བུ་མཚན་ཉིད་གང་དག་དང་ལྡན་ན་ཉན་ཐོས་ཀྱི་ཐེག་པ་ཞེས་བྱ་ཞེ་ན། གང་དག་ཡང་དག་པའི་དྲན་པ་ལ་བདེ་བར་གནས་ཞིང་ཏིང་ངེ་འཛིན་ལ་མཉམ་པར་འཇོག་པར་མོས 60.206a པས་རྟག་ཏུ་བརྩོན་པ་དང ། གཡོ་དང་སྒྱུ་སྤངས་ཤིང་ལས་ཀྱི་འབྲས་བུ་ལ་ཡིད་ཆེས་པ་དང ། འདོད་པ་ལྔ་ལ་མི་ཆགས་ཤིང་འཇིག་རྟེན་གྱི་ཆོས་བརྒྱད་ཀྱིས་མི་གོས་པ་དང ། མགོའི་ཐོད་ལ་མེ་འབར་བ་བཞིན་དུ་དགེ་བ་ལ་ཤིན་དུ་བརྩོན་པ་དང ། ཕུང་པོ་དང ། ཁམས་དང ། སྐྱེ་མཆེད་ལ་ཤིན་དུ་རྟོག་པ་དང ། འཕགས་པའི་རིགས་ལ་བདེ་བར་གནས་པར་རྟག་ཏུ་མོས་པ་སྟེ། མཚན་ཉིད་འདི་དག་དང་ལྡན་པ་ནི་ཉན་ཐོས་ཀྱི་ཐེག་པ་ཞེས་བྱ་སྟེ། གང་ཟག་འདི་རང་སངས་རྒྱས་ཀྱི་ཐེག་པའི་སྣོད་དུ་ཡང་མི་འགྱུར་ན་ཐེག་པ་ཆེན་པོའི་སྣོད་དུ་འགྱུར་བ་ལྟ་ཅི་སྨོས། རིགས་ཀྱི་བུ་མཚན་ཉིད་གང་དག་དང་ལྡན་པས་རང་སངས་རྒྱས་ཀྱི་ཐེག་པ་ཞེས་བྱ་ཞེ་ན། སེམས་ཅན་གང་དག་ཉན་ཐོས་ཀྱི་ཡོན་ཏན་དེ་དག་ཐམས་ཅད་དང་ལྡན་ལ་གཞན་ཡང་ཉེ་བར་ལེན་པའི་ཕུང་པོ་ལྔ་ལ་ཡང་དང་ཡང་དུ་མི་རྟག་པར་རྗེས་སུ་རྟོག་པ་ལ་གནས་པ་དང ། སྐྱེ་ཞིང་འགོག་པ་ལ་ཡང་དང་ཡང་དུ་རྗེས་སུ་རྟོག་པ་ལ་གནས་པ་དང ། རྟེན་ཅིང་འབྲེལ་ཏེ་འབྱུང་བའི་ཆོས་རྣམས་ནི་འགོག་པའི་ཆོས་ཅན་དུ་ཤིན་དུ་རྟོག་པ་སྟེ། མཚན་ཉིད་འདི་དག་དང་ལྡན་ན་རང་སངས་རྒྱས་ཀྱི་ཐེག་པ་ཞེས་བྱ་སྟེ། སེམས་ཅན་དེ་ཐེག་པ་ཆེན་པོའི་ཆོས་ཀྱི་སྣོད་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་དག་བཟླས་པའི་ཕྱིར་ཚིགས་སུ་བཅད་དེ་གསུངས་པ། གལ་ཏེ་དགེ་བའི་རྒྱལ་རིགས་རྒྱལ་པོ་དང ། །རྗེའུ་རིགས་དམངས་རིགས་ཤིན་དུ་དགེ་བའི་བར། །དད་ལ་སོགས་པའི་འཁོར་ལོ་བཅུ་བསྒོམས་ན། །ཉན་ཐོས་ཐེག་པའི་སྣོད་དུ་དེ་འགྱུར་རོ། །རང་རྒྱལ་ཐེག་པའི་སྒོ་གསུམ་རྣམ་པར་དག་།ཁྲེལ་དང་འཛེམ་པར་ལྡན་ཞིང་ཕུང་པོས་འཇིགས། །ཉེས་པའི་སྐྱོན་ཤེས་བས་མཐའི་གནས་ལ་དགའ། །དྲན་པས་དབང་པོ་སྲུང་ཞིང་སེམས་ཀྱང་ཞི། །རྟེན་ཅིང་འབྲེལ་བ་རྟོགས་པས་བསམ་གཏན་སྒོམ། །ཕུང་པོ་ཁམས་དང་སྐྱེ་མཆེད་རྟོགས་ལ་མཁས། །གནས་དང་སྤྱོད་ལམ་འཁོར་ལོ་འདི་བཅུས་ན། །ཐེག་པ་མཆོག་གི་སྣོད་འགྱུར་སྲིད་མཚོ་རྒལ། །ཐེག་པ་གསུམ་མིན་གཉིས་ཀྱི་འཁོར་ལོ་ཡིས། །བདག་ཉིད་ཉོན་མོངས་རྣམ་པར་གྲོལ་རྩོལ་ཞིང ། །བག་ཆགས་མི་གཏོང་སེམས་ཅན་མི་སྒྲོལ 60.206b བའི། །གང་ཟག་དེ་ནི་ཐེག་ཆེན་སྣོད་མ་ཡིན། །བྱིས་པ་དབང་པོ་ཞན་པའི་ལེ་ལོ་ཅན། །ཐེག་པ་གཉིས་ལ་ནན་ཏན་མི་བྱེད་པ། །ཐེག་པ་ཆེན་པོའི་འཁོར་ལོ་ལྡན་མི་འགྱུར། །དེ་ནི་རྒྱ་ཆེན་ཐེག་ཆེན་སྣོད་མ་ཡིན། །བྱིས་པ་གཅིག་པུ་རྣམ་པར་གྲོལ་ཚོལ་བ། །བློ་དང་སྤྱོད་པར་ཞན་ཅིང་བྱམས་སེམས་མེད། །ཆད་པར་ལྟ་ལ་ཆགས་པ་ངན་སོང་གཞོལ། །ཡང་དག་ཆོས་སྤོང་ཆོས་མ་ཡིན་པ་སྟོན། །ཐེག་པ་གཉིས་ལ་སྐུར་ཅིང་སྡོམ་པ་སྤོང ། །བསྙེན་པར་རྫོགས་ཤིང་ཐེག་ཆེན་ཁས་འཆེ་བ། །ང་ཡི་ཆོས་འཇིག་སེམས་ཅན་ཀུན་ལ་སླུ། །དེ་ཡི་དབང་གིས་མི་ལུས་ཐོབ་པར་དཀའ། །ང་ཡི་བསྟན་ལ་ཞུགས་པའི་འཕགས་པ་དང ། །ངུར་སྨྲིག་གྱོན་ལ་འཚེ་འམ་གནོད་བྱེད་དམ། །གཤེ་འམ་སྤྱོས་སམ་ལྷུང་བཟེད་གོས་ཕྲོགས་ན། །ལྷ་དང་མི་ཡི་བདེ་བ་ཡུན་དུ་སྟོར། །དེ་བས་གང་ཞིག་མི་ལུས་ཐོབ་འདོད་ཅིང ། །འཆི་བའི་དུས་ན་ལྐུག་པའི་སྐྱོན་སྤངས་ཤིང ། །རྟག་ཏུ་སངས་རྒྱས་ཀུན་དང་ཕྲད་འདོད་པ། །ཐེག་གསུམ་ཆོས་རྣམས་ཀུན་དུ་བསྲུང་བར་བྱོས། །ཐེག་པ་གསུམ་ལས་ཐེག་པ་མཆོག་འདོད་པ། །ཐེག་པ་གསུམ་ཆོས་རྟོག་ལ་མཁས་པ་སྟེ། །དགའ་ཞིང་སྤྲོ་བས་གཞན་ལ་རྒྱས་སྟོན་ན། །ངེས་པར་སངས་རྒྱས་འགྱུར་ལ་ཐེ་ཙོམ་སྤོངས། །ཚུལ་ཁྲིམས་ཉམས་ཤིང་འཇུངས་པ་ང་རྒྱལ་ཅན། །བདག་བསྟོད་གཞན་སྨོད་ཐེག་ཆེན་ཁས་འཆེ་བ། །དེ་དག་སྤངས་ཏེ་མཁས་ལ་བསྟེན་པར་བྱ། །ངེས་པར་འཚང་རྒྱ་ཁམས་གསུམ་འདའ་བར་འགྱུར། །ཐེག་པ་གསུམ་ལས་གང་དང་འཐུན་པ་བཞིན། །བྱམས་དང་སྙིང་རྗེས་ཐེག་པ་གསུམ་ཆོས་སྟོན། །མི་རེ་བཞིན་དུ་ཡོངས་སུ་རྫོགས་བྱས་ན། །ངེས་པར་འཚང་རྒྱར་འགྱུར་ལ་ཐེ་ཙོམ་སྤོངས། །ཕུང་པོ་ཁམས་དང་སྐྱེ་མཆེད་ཞི་བར་ཤེས། །ནམ་མཁའ་བཞིན་དུ་ཅི་ལ་འང་མི་གནས་ཏེ། །ཆོས་བསྟན་སེམས་ཅན་མང་པོ་ཀུན་ཡང་སྡུད། །དཔག་མེད་ཡེ་ཤེས་བློ་གྲོས་དམ་པ་ཐོབ། །ཚུལ་ཁྲིམས་ཉམས་པར་དགའ་ལ་སྡིག་པ་ཅན། །ཐེག་པ་ཆེན་པོའི་ཡོན་ཏན་མཆོག་ཐོས་ནས། །ཁེ་དང་གྲགས་ཕྱིར་ཐེག་ཆེན་ཁས་འཆེ་བ། །བོང་བུ་སེང་གེའི 60.207a ལྦགས་པ་གྱོན་པ་བཞིན། །དེང་འདིར་ཐམས་ཅད་འཁོར་ལ་བཀའ་སྩལ་པ། །གང་ཞིག་མྱུར་དུ་བྱང་ཆུབ་མཆོག་འདོད་ན། །དགེ་བཅུའི་ལས་ཀྱི་ལམ་ལ་ནན་ཏན་བྱོས། །ང་ཡི་ཆོས་ལ་མི་སྨད་ཤིན་དུ་བསྲུང ། །ངས་སྔོན་མདོ་སྡེ་གཞན་དག་ལས་གསུངས་ལ། །བྱང་ཆུབ་ཆེན་པོ་འདོད་པས་ཐེག་ཆེན་སྤྱད། །ཉན་ཐོས་རང་རྒྱལ་ཐེག་པ་སྤོངས་ཤིག་པ། །དེ་ནི་རྣམ་དག་འཁོར་ལ་བསྟན་པའི་ཆོས། །སངས་རྒྱས་ཚད་མེད་བྱེ་བ་མཆོད་བྱས་པས། །སྡིག་པ་སྤངས་ནས་རྣམ་དག་སེམས་སྦྱོང་བ། །ཤིན་དུ་བརྩོན་པའི་སྐྱེ་བོ་དེ་དག་ལ། །གཉིས་སུ་མེད་དེ་ཐེག་པ་གཅིག་པུ་བཤད། །ད་ལྟའི་འཁོར་འདི་ཐེག་པ་གསུམ་སྣོད་ཅན། །ལ་ལ་ཉན་ཐོས་ཐེག་པའི་ཆོས་དང་ལྡན། །ལས་ཀྱི་དངོས་པོ་མང་པོས་འཇིགས་པ་དག་།དེ་ནི་བྱང་ཆུབ་མཆོག་གི་སྣོད་མ་ཡིན། །ལ་ལ་དབེན་པར་དགའ་ཞིང་རང་བྱང་ཆུབ། །དེ་ཡང་བྱང་ཆུབ་མཆོག་གི་སྣོད་མ་ཡིན། །ལ་ལ་ཡེ་ཤེས་མཆོག་ལ་བཀོད་འོས་པ། །དེ་བས་མོས་པ་བཞིན་དུ་ཐེག་གསུམ་ཤོད། །སྦྱངས་པའི་ཡོན་ཏན་ཙམ་གྱིས་གྲོལ་འདོད་པ། །ཐེག་ཆེན་བཤད་པ་ཐོས་ན་ངན་སོང་ལྟུང ། །བད་ཀན་ནད་ལ་འོ་མ་འཐུང་བཅུག་བཞིན། །དེ་ཕྱིར་དུག་ཏུ་འགྱུར་གྱི་ནད་མི་སེལ། །དེ་བཞིན་སྣོད་མིན་ཉན་ཐོས་ཐེག་པ་དག་།ཐེག་ཆེན་བཤད་པ་ཐོས་ན་རྨོངས་འགྱུར་ཞིང ། །ཆད་པར་སྨྲ་ལ་ངན་སོང་ལྟུང་འགྱུར་བས། །དེ་བས་དབང་པོ་བརྟགས་ཏེ་ཆོས་བསྟན་ཏོ། །ཤིན་དུ་རྒྱས་པ་ཆེན་པོའི་མདོ་སའི་སྙིང་པོའི་འཁོར་ལོ་བཅུ་པ་ཞེས་བྱ་བ་ལས་གནས་པ་དང་སྤྱད་པའི་ལེའུ་སྟེ་བཞི་པའོ།། ་་་་་་་།། དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་དེ་དག་གསུངས་པ་ན་འཁོར་གྱི་དཀྱིལ་འཁོར་དེའི་ནང་ན་སེམས་ཅན་ཚད་མེད་པ་བརྒྱ་སྟོང་སྙེད་སྔོན་ཆོས་ཐོས་པ་ལས་ཡིད་གོལ་ཏེ་སྟོང་པ་ཡིན་པར་གོ་ནས་རྒྱུ་དང་འབྲས་བུ་མེད་པར་ལྟ་ཞིང་དགེ་བའི་རྩ་བ་ཡོངས་སུ་བཅད་ནས་ངན་སོང་དུ་ལྟུང་བར་འགྱུར་བ་དག་མདོ་སྡེ་འདི་བཤད་པ་ཐོས་ནས་ཕྱིར་ཡང་ཡང་དག་པའི་ལྟ་བ་དང་ལྡན་པར་གྱུར་ཏོ། །དེ་ནས་དེ 60.207b དག་འདུག་པ་ལས་ལངས་ཏེ། བཅོམ་ལྡན་འདས་ཀྱི་སྤྱན་སྔར་ཤིན་དུ་འཛེམ་པ་བསྐྱེད་དེ། སོ་སོར་བཤགས་པ་བྱ་བའི་ཕྱིར་ཐལ་མོ་སྦྱར་བ་བཏུད་དེ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་སྔོན་ཉན་ཐོས་ཀྱི་ཐེག་པའི་རིགས་སུ་དགེ་བའི་རྩ་བ་བསྐྱེད་པ་ལས་ཉན་ཐོས་ཀྱི་ཐེག་པ་དེ་ཡང་ཡོངས་སུ་མ་སྨིན་པར་རང་སངས་རྒྱས་ཀྱི་ཐེག་པའི་ཆོས་ཐོས་སོ། །དེ་ལ་འང་རྨོངས་ཤིང་མངོན་དུ་མ་གྱུར་པས་སྟོང་པར་ལྟ་ཞིང་རྒྱུ་དང་འབྲས་བུ་ཡང་མེད་པར་འཛིན་ཏོ། །དེའི་རྒྱུ་དེའི་རྐྱེན་གྱིས་ལུས་དང ། ངག་དང ། ཡིད་ཀྱི་སྒོ་ནས་སྡིག་པ་མི་དགེ་བའི་ལས་ཚད་མེད་པ་བགྱིས་པས་ངན་སོང་དག་ཏུ་ལྟུང་བར་འགྱུར་བ་ལས་དེང་བཅོམ་ལྡན་འདས་ཀྱི་སྤྱན་སྔར་མདོ་སྡེ་འདི་བཤད་པ་ཐོས་ནས་སླར་ཡང་ཡང་དག་པའི་ལྟ་བ་རྙེད་དེ་ཤིན་དུ་འཛེམ་པ་དང ། ངོ་ཚ་བའི་སེམས་ཀྱིས་སོ་སོར་བཤགས་ཏེ་མ་བཅབས་པས་དེ་དག་ཡོངས་སུ་བྱང་བར་གྱུར་ཅིག་།དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བདག་ཅག་གི་སྡིག་པ་དེ་དག་ཡོངས་སུ་སྦྱང་བ་དང ། སླན་ཆད་མི་བགྱིད་པར་བཅོམ་ལྡན་འདས་ཐུགས་བརྩེ་བས་རྗེས་སུ་གཟུང་དུ་གསོལ། བདག་ཅག་མ་འོངས་པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་ཐུགས་བརྩེ་བས་བསྐྱབ་ཏུ་གསོལ། བདག་ཅག་སླར་ཡང་སྔོན་སྤྱད་པའི་ཉན་ཐོས་ཀྱི་ཐེག་པ་ལ་སྤྱོད་ཅིང་ནན་ཏན་བགྱིད་ཀྱིས། བཅོམ་ལྡན་འདས་ཐུགས་བརྩེ་བའི་སླད་དུ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཁྱེད་འདི་ལྟར་འཛེམ་པ་དང ། ངོ་ཚ་བས་སོ་སོར་བཤགས་པ་ལེགས་སོ། །ངའི་བསྟན་པ་ལ་མ་ཉམས་པའི་སྐྱེས་བུ་དམ་པ་གཉིས་ཡོད་དེ། གཅིག་ནི་རང་བཞིན་གྱིས་ཡོངས་སུ་དག་ཅིང་ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང་ངོ་ཚ་བས་སོ་སོར་འཆགས་པ་སྟེ་སྐྱེས་བུ་དམ་པ་འདི་གཉིས་ནི་ངའི་ཆོས་ལ་ཤིན་དུ་འདུན 60.208a པ་རྣམ་པར་དག་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེ་དག་གི་མོས་པ་བཞིན་དུ་འཕགས་པའི་བདེན་པ་བཞིའི་ཆོས་བསྟན་ཏེ། འཁོར་དེའི་ནང་ན་ལ་ལས་ནི་བཟོད་པ་ཐ་མ་ཐོབ། ལ་ལས་ནི་བཟོད་པ་བར་མ་ཐོབ། ལ་ལས་ནི་བཟོད་པ་མཆོག་ཐོབ། ལ་ལས་ནི་འཇིག་རྟེན་གྱི་མཆོག་གི་ཆོས་ཐོབ། ལ་ལས་ནི་རྒྱུན་དུ་ཞུགས་པའི་འབྲས་བུ་ཐོབ། ལ་ལས་ནི་ལན་ཅིག་ཕྱིར་འོང་བའི་འབྲས་བུ་ཐོབ། ལ་ལས་ནི་ཕྱིར་མི་འོང་བའི་འབྲས་བུ་ཐོབ་བོ། །གཞན་ཡང་དགེ་སློང་བརྒྱད་ཁྲི་བཞི་སྟོང་ཟག་པ་ཐམས་ཅད་ཟད་པ། སེམས་རྣམ་པར་གྲོལ་བ། བློ་ཤིན་དུ་རྣམ་པར་དག་པའི་དགྲ་བཅོམ་པར་གྱུར་ནས་དགའ་བཞིན་དུ་སངས་རྒྱས་ལ་ཕྱག་འཚལ་ཏེ་ཕྱིར་ཡང་སོ་སོར་སྟན་ལ་འཁོད་དོ། །ཡང་འཁོར་གྱི་དཀྱིལ་འཁོར་དེའི་ནང་ན་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུ་རྩ་བདུན་གྱིས་སྔོན་ཐོས་པའི་ཆོས་སྟོང་པ་ཡིན་པར་འཁྲུལ་ནས་རྒྱུ་དང་འབྲས་བུ་མེད་པར་ལྟ་ཞིང ། དགེ་བའི་རྩ་བ་ཡོངས་སུ་བཅད་ནས་ངན་སོང་དུ་ལྟུང་བར་འགྱུར་བ་ནས་མདོ་སྡེ་འདི་བཤད་པ་ཐོས་ནས་ཕྱིར་ཡང་ཡང་དག་པའི་ལྟ་བ་རྙེད་དེ་འདུག་པ་ལས་ལངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ། བཅོམ་ལྡན་འདས་ཀྱི་སྤྱན་སྔར་ཤིན་དུ་འཛེམ་པ་དང་ངོ་ཚ་བ་དང་བཅས་པས་སོ་སོར་བཤགས་ཏེ་ཐལ་མོ་སྦྱར་བ་བཏུད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་སྔོན་རང་སངས་རྒྱས་ཀྱི་ཐེག་པའི་རིགས་སུ་དགེ་བའི་རྩ་བ་བསྐྱེད་པ་ལས་རང་སངས་རྒྱས་ཀྱི་ཐེག་པའི་སྣོད་དུ་ཡང་ཡོངས་སུ་མ་སྨིན་པར་ཐེག་པ་ཆེན་པོའི་ཆོས་ཐོས་ནས་དད་པ་དང་མོས་པ་སྐྱེས་ཀྱང་མ་རིག་པས་ལྡོངས་ཤིང་རྟོགས་པར་མ་གྱུར་ཏེ་སྟོང་པར་ལྟ་ཞིང་རྒྱུ་དང་འབྲས་བུ་མེད་པར་བཟུང་ངོ ། །དེའི་རྒྱུ་དེའི་རྐྱེན་གྱིས་ལུས་དང ། ངག་དང ། ཡིད་ཀྱིས་སྡིག་པ་མི་དགེ་བའི་ལས་ཚད་མེད་པ་དག་བགྱིས་པས་བསྐལ་པ་ཚད་མེད་པའི་བར་དུ་ཤིན་དུ་མི་བཟད་པའི་སྡུག་བསྔལ་རྣམ་པ་སྣ་ཚོགས་མྱོང་ཞིང་ངན་སོང་དུ་ལྟུང་བར་འགྱུར་བ་ལས་དེང་བཅོམ་ལྡན་འདས་ཀྱི་སྤྱན་སྔར་མདོ 60.208b སྡེ་བཤད་པ་ཐོས་ནས་སླར་ཡང་དག་པའི་ལྟ་བ་རྙེད་དེ། ཤིན་དུ་འཛེམ་པ་དང་ངོ་ཚ་བར་ལྡན་པ་མི་འཆབ་པའི་སེམས་ཀྱིས་སོ་སོར་འཆགས་ཏེ། དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་ཡོངས་སུ་བྱང་བ་དང ། སླན་ཆད་མི་བགྱིད་པར་རྗེས་སུ་གཟུང་དུ་གསོལ། བདག་ཅག་མ་འོངས་པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་བཅོམ་ལྡན་འདས་ཀྱིས་ཐུགས་རྗེས་བསྐྱབ་ཏུ་གསོལ། བདག་ཅག་སླར་ཡང་སྔོན་སྤྱད་པའི་རང་སངས་རྒྱས་ཀྱི་ཐེག་པ་ལ་སྤྱོད་ཅིང་ནན་ཏན་བགྱིད་ཀྱིས་བཅོམ་ལྡན་འདས་ཐུགས་བརྩེ་བ་ཅན་གྱིས་བསྟན་དུ་གསོལ། བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ཏེ་ལེགས་སོ། །ལེགས་སོ། །ཁྱེད་འདི་ལྟར་འཛེམ་པ་དང ། ངོ་ཚ་བས་སོ་སོར་བཤགས་པ་ལེགས་སོ། །ངའི་བསྟན་པ་ལ་མ་ཉམས་པའི་སྐྱེས་བུ་གཉིས་ཡོད་དེ། གཅིག་ནི་རང་བཞིན་གྱིས་ཡོངས་སུ་དག་ཅིང་ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང་ངོ་ཚ་བས་སོ་སོར་འཆགས་པ་སྟེ། སྐྱེས་བུ་དམ་པ་འདི་གཉིས་ནི་ངའི་ཆོས་ལ་ཤིན་དུ་འདུན་པ་རྣམ་པར་དག་པ་ཞེས་བྱའི། །དེ་ནས་བཅོམ་ལྡན་འདས་ཀྱིས་དེ་དག་གིས་མོས་པ་བཞིན་དུ་རྟེན་ཅིང་འབྲེལ་ཏེ་འབྱུང་བའི་ཆོས་བསྟན་ནས་ད་དག་ཐམས་ཅད་རང་སངས་རྒྱས་ཀྱི་ཐེག་པ་ལ་ནན་ཏན་བྱས་ཏེ། ཐམས་ཅད་མཐར་ཀྱིས་རྒྱལ་མཚན་ལ་དམིགས་པ་ཞེས་བྱ་བའི་ཏིང་ངེ་འཛིན་ཡོངས་སུ་རྫོགས་ནས་རང་སངས་རྒྱས་ཀྱི་ཐེག་པ་ལས་ཕྱིར་མི་ལྡོག་ཅིང་དགའ་བཞིན་དུ། བཅོམ་ལྡན་འདས་ལ་ཕྱག་འཚལ་ནས་ཕྱིར་ཡང་སོ་སོའི་སྟན་ལ་འཁོད་དོ། །ཡང་འཁོར་གྱི་དཀྱིལ་འཁོར་དེའི་ནང་ན་སེམས་ཅན་བྱེ་བ་བརྒྱ་སྟོང་ཕྲག་བརྒྱད་བཅུ་སྙེད་སྔོན་འདས་པའི་སངས་རྒྱས་ཀྱི་ཆོས་ལ་སྐུར་བ་ནས་ཆུང་ངུ་ན་སངས་རྒྱས་ཀྱི་བསྟན་པ་ཚིགས་སུ་བཅད་པ་གཅིག་ཙམ་ལ་སྨད་པ་དེའི་རྒྱུ་དེའི་རྐྱེན་གྱིས་ངན 60.209a སོང་དག་ཏུ་ལྟུང་ཞིང་སྡུག་བསྔལ་མང་པོ་མྱོང་སྟེ། སླར་མིའི་ལུས་ཐོབ་ན་ཡང་ཐོག་མ་ནས་ལྐུག་པ་དིག་པ་ལྕེ་ལྡིབ་ཅིང་སྨྲ་མི་ཤེས་པ་དག་མདོ་སྡེ་འདི་བཤད་པ་ཐོས་ནས་ཡང་དག་པའི་ལྟ་བ་རྙེད་དེ། དེ་དག་འདུག་པ་ལས་ལངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་ཤིན་དུ་འཛེམ་པ་དང ། ངོ་ཚ་བས་སྔོན་གྱི་སྡིག་པའི་ལས་སོ་སོར་བཤགས་ནས་ཐལ་མོ་སྦྱར་བ་བཏུད་ཏེ། བཅོམ་ལྡན་འདས་ལ་མིག་མི་འཛུམས་པར་ལྟའོ། །བཅོམ་ལྡན་འདས་ཀྱིས་དེ་དག་ཐམས་ཅད་སྨྲ་ནུས་པར་བྱིན་གྱིས་བརླབས་ཏེ། དེའི་ཚེ་བཅོམ་ལྡན་འདས་ཀྱིས་མཁྱེན་བཞིན་དུ་དེ་དག་ལ་བཀའ་སྩལ་པ། ཁྱེད་རྣམས་སྔོན་མི་དགེ་བའི་ལས་ཅི་ཞིག་བྱས་ན་འཁོར་གྱི་དཀྱིལ་འཁོར་འདིའི་ནང་ན་སྨྲ་མི་ཤེས་པར་གྱུར། དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཁ་ཅིག་གིས་ནི་སྔོན་རྣམ་པར་གཟིགས་དེ་བཞིན་གཤེགས་པའི་བསྟན་པའི་ཆོས་ལ་ཁ་ཅིག་གིས་ནི་ཐེག་པ་ཆེན་པོའི་ཆོས་ལ་སྐུར་ཏོ། །ལ་ལ་ནི་རང་སངས་རྒྱས་ཀྱི་ཐེག་པའི་ཆོས་ལ་སྐུར་ཏོ། །ཁ་ཅིག་གིས་ནི་ཉན་ཐོས་ཀྱི་ཐེག་པའི་ཆོས་ལ་སྐུར་ཏོ། །དེ་ལ་ཆུང་ངུ་ན་ཚིགས་སུ་བཅད་པ་གཅིག་ཙམ་ལ་སྐུར་པས་བདག་ཅག་མི་དགེ་བའི་ལས་དེ་དག་གི་དབང་གིས་བསྐལ་པ་དགུ་བཅུ་རྩ་གཅིག་གི་བར་དུ་འཁོར་བར་འཁོར་ཞིང་རྟག་ཏུ་སེམས་ཅན་དམྱལ་བ་དང ། བྱོལ་སོང་གི་སྐྱེ་གནས་དང ། ཡི་དགས་ཀྱི་འཇིག་རྟེན་དུ་སྐྱེས་ཏེ། ལྐུག་པ་དང ། དིག་པ་དང ། ལྕེ་མེད་པ་དང ། སྨྲ་མི་ནུས་པ་དང ། ཤིན་དུ་མི་བཟད་པའི་སྡུག་བསྔལ་ཆེན་པོ་མྱོང་སྟེ། གདོད་ཚེ་འདི་ལ་མི་ལུས་ཐོབ་ཀྱིས་ཀྱང་ལྐུག་པ་དང ། དིག་པ་དང ། རྟག་ཏུ་ལྕེ་ནད་དུ་གྱུར་པ་ལས་བཅོམ་ལྡན་འདས་ཀྱི་བྱིན་གྱི་བརླབས་ཀྱིས་སྨྲ་ནུས་པ་དང ། སྔོན་འདས་པའི་དུས་ན་མི་དགེ་བའི་ལས་ཀྱི་སྒྲིབ་པ་ཅི་དང་ཅི་བགྱིས་པ་ཐམས་ཅད་དང་དྲན་པར་གྱུར་ཏོ། །དེའི་ནང་ན་ཡང 60.209b ཁ་ཅིག་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་བཅོམ་ལྡན་འདས་གཙུག་ཏོར་ཅན་གྱི་བསྟན་པའི་ཆོས་ལ་ཁ་ཅིག་གིས་ནི་ཐེག་པ་ཆེན་པོ་ལ་སྐུར་ཏོ། །ཁ་ཅིག་གིས་ནི་རང་སངས་རྒྱས་ཀྱི་ཐེག་པ་ལ་སྐུར་པ་ནས་སྔོན་གྱི་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་རྒྱས་པར་བཤད་པ་བཞིན་ནོ། །དེའི་ནང་ན་ཁ་ཅིག་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་ཐམས་ཅད་སྐྱོབ་དེ་བཞིན་གཤེགས་པའི་བསྟན་པ་ལ་ཁ་ཅིག་གིས་ནི་ཐེག་པ་ཆེན་པོ་ཡང་དག་པའི་ཆོས་ལ་སྐུར་པ་ནས་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་རྒྱས་པར་བཤད་པ་ཡིན་ནོ། །དེ་ལ་ཁ་ཅིག་གིས་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་ལོག་པར་དད་སེལ་དེ་བཞིན་གཤེགས་པའི་བསྟན་པ་ལ་ཁ་ཅིག་ནི་ཐེག་པ་ཆེན་པོ་ཡང་དག་པའི་ཆོས་ལ་སྐུར་བ་ནས་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་གིས་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་གསེར་ཐུབ་དེ་བཞིན་གཤེགས་པའི་བསྟན་པ་ལ་ཁ་ཅིག་གིས་ནི་ཐེག་པ་ཆེན་པོ་ཡང་དག་པའི་ཆོས་ལ་སྐུར་པ་ནས་དམིགས་པ་ཇི་ལྟ་བ་བཞིན་དུ་སྟོན་པ་ཡང་ཇི་ལྟར་གོང་དུ་རྒྱས་པར་བཤད་པ་ཡིན་ནོ། །དེ་ལ་ཁ་ཅིག་གིས་ནི་འདི་སྐད་དུ་བཙུན་པ་བཅོམ་ལྡན་འདས་བདག་ཅག་སྔོན་འོད་སྲུངས་དེ་བཞིན་གཤེགས་པའི་བསྟན་པ་ལ་ཁ་ཅིག་གིས་ནི་ཐེག་པ་ཆེན་པོའི་དམ་པའི་ཆོས་ལ་སྐུར་ཏོ། །ཁ་ཅིག་གིས་ནི་རང་སངས་རྒྱས་ཀྱི་ཐེག་པའི་ཆོས་ལ་སྐུར་ཏོ། །ཁ་ཅིག་གིས་ནི་ཉན་ཐོས་ཀྱི་ཐེག་པ་པའི་ཆོས་ལ་སྐུར་བ་ནས་ཆུང་ངུ་ན་ཚིགས་སུ་བཅད་པ་གཅིག་ཙམ་ལ་སྐུར་པས་མི་དགེ་བའི་ལས་ཀྱི་དབང་གིས་དེ་ཚུན་ཆད་འཁོར་བར་འཁོར་ཏེ། རྟག་ཏུ་སེམས་ཅན་དམྱལ་བ་དང ། བྱོལ་སོང་གི་སྐྱེ་གནས་དང ། གཤིན་རྗེའི་འཇིག་རྟེན་དུ་སྐྱེས་ཤིང་ལྐུགས་པ་དང ། དིག་པ་དང ། 60.210a ལྕེ་མེད་པ་དང ། བརྡ་མི་ཕྲད་པ་དང ། ཤིན་དུ་མི་བཟད་པའི་སྡུག་བསྔལ་ཆེན་པོ་མྱོང་ནས་གདོད་ཚེ་འདི་ལ་མིའི་ལུས་ཐོབ་ཀྱིས་ཀྱང་ལྐུག་པ་དང ། དིག་པ་དང ། ལྕེ་ནད་ཅན་དུ་གྱུར་པ་དང ། བརྡ་མི་ཕྲད་པ་ལས་བཅོམ་ལྡན་འདས་ཀྱི་བྱིན་གྱི་བརླབས་ཀྱིས་གདོད་སྨྲ་ནུས་པ་དང ། སྔོན་འདས་པའི་དུས་ན་མི་དགེ་བའི་ལས་ཀྱི་སྒྲིབ་པ་ཅི་བགྱིས་པ་ཐམས་ཅད་དྲན་པར་གྱུར་ཅིང ། བདག་ཅག་བཅོམ་ལྡན་འདས་ཀྱི་སྤྱན་སྔར་མདོ་སྡེ་བཤད་པ་འདི་ཐོས་ནས་སླར་ཡང་ཡང་དག་པའི་ལྟ་བ་རྙེད་དེ་ཤིན་དུ་ངོ་ཚ་བ་དང ། འཛེམ་པ་དང ། མི་འཆབ་པའི་སེམས་ཀྱིས་སོ་སོར་འཆགས་སོ། །དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་ཡོངས་སུ་བྱང་བ་དང ། སླན་ཆད་མི་བགྱིད་པར་རྗེས་སུ་གཟུང་དུ་གསོལ། མ་འོངས་པ་ན་ཡང་ངན་སོང་གི་སྡུག་བསྔལ་ཡོངས་སུ་མྱོང་བར་འགྱུར་བ་ལས་བཅོམ་ལྡན་འདས་ཀྱི་ཐུགས་རྗེས་བསྐྱབ་པ་དང ། དམ་པའི་ཆོས་བསྟན་དུ་གསོལ། བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ཏེ། ལེགས་སོ་ལེགས་སོ། །ཁྱེད་འདི་ལྟར་འཛེམ་པ་དང ། ངོ་ཚ་བས་སོ་སོར་བཤགས་པ་ལེགས་སོ། །ངའི་བསྟན་པ་ལ་སྐྱེས་བུ་དམ་པ་མ་ཉམས་པ་ཞེས་བྱ་བ་གཉིས་ཡོད་དེ། གཅིག་ནི་རང་བཞིན་གྱིས་ཡོངས་སུ་དག་ཅིང་ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང ། ངོ་ཚ་བས་སོ་སོར་འཆགས་པ་སྟེ། སྐྱེས་བུ་དམ་པ་འདི་གཉིས་ནི་ངའི་བསྟན་པའི་ཆོས་ལ་ཤིན་དུ་འདུན་པ་རྣམ་པར་དག་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེ་དག་མོས་པ་ཇི་ལྟ་བ་བཞིན་དུ་དམ་པའི་ཆོས་རྣམ་པ་སྣ་ཚོགས་བསྟན་ཅིང་བཤད་དེ་སོ་སོར་ཅི་དགའ་བའི་བདེ་བ་ཐོབ་པར་བྱས་སོ། །དེ་དག་དགའ་བཞིན་དུ་བཅོམ་ལྡན་འདས་ལ་ཕྱག་འཚལ་ནས་སོ་སོའི་སྟན་ལ་འཁོད་དོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་ཉན་ཐོས 60.210b ཚད་མེད་པ་བརྒྱ་སྟོང་སྙེད་དང ། བྱང་ཆུབ་སེམས་དཔའ་ཚད་མེད་པ་བྱེ་བ་བརྒྱ་སྟོང་སྙེད་ཀྱིས་མདོ་སྡེ་འདི་བཤད་པ་ཐོས་ནས་མི་དགེ་བའི་ལས་ཀྱི་སྒྲིབ་པ་སྔོན་ཅི་བྱས་པ་དྲན་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་ཤིན་དུ་འཛེམ་པ་དང་ངོ་ཚ་བའི་སེམས་ཀྱིས་སོ་སོར་བཤགས་ཤིང་ཐལ་མོ་སྦྱར་ཏེ་སྟི་སྟང་དང་བཅས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་སྔོན་སངས་རྒྱས་ཚད་མེད་པ་དག་གི་དམ་པའི་ཆོས་ལ་ལ་ལ་ནི་འདི་སྐད་དུ་བདག་ཅག་སངས་རྒྱས་དེའི་ཉེ་གནས་ཆོས་ཀྱི་སྣོད་དུ་གྱུར་པ་འམ། ཆོས་ཀྱི་སྣོད་དུ་མ་གྱུར་པ་ལ་ཁྲོ་བ་དང ། ཞེ་སྡང་བ་དང ། གཤེ་ཞིང་སྤྱོ་བ་དང ། སྨོད་པ་དང ། བརྙས་པ་དང ། རྣམ་པ་སྣ་ཚོགས་ཀྱིས་འཕྱ་ཞིང་སྐུར་ཏེ། གནོད་པར་ཀླགས་ལྟ་བ་དང ། ཡོན་ཏན་བཅབས་ནས་ཉེས་པ་བསྒྲགས་ཏེ། བདག་ཅག་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་ཞིང་ཤིན་དུ་མི་བཟད་པའི་སྡུག་བསྔལ་ཆེན་པོ་མྱོང་ངོ ། །ཕྱིས་སངས་རྒྱས་ཚད་མེད་པ་དག་ལ་བསྙེན་བཀུར་དང ། མཆོད་པ་བགྱིས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་སྙེད་ལ་བསྙེན་བཀུར་དང ། མཆོད་པ་དང ། གཡོག་བགྱིས་ནས་སངས་རྒྱས་དེ་རེ་རེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རེ་རེ་ལ་ཤིན་དུ་འཛེམ་པ་དང་ངོ་ཚ་བས་སྡིག་པའི་ལས་ཀྱི་སྒྲིབ་པ་དག་སོ་སོར་བཤགས་སོ། །སངས་རྒྱས་དེ་རེ་རེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རེ་རེ་ལ་ཡང་ཆོས་ཀྱི་རྣམ་གྲངས་ཚད་མེད་པ་སྙེད་མཉན་ཏེ། ཐོས་ནས་ཤིན་དུ་ནན་ཏན་བགྱིས་པ་དང ། ཤིན་དུ་སྤྱད་དཀའ་བ་ཚད་མེད་པ་དག་སྤྱད་ཀྱང་ལས་ཀྱི་སྒྲིབ་པའི་ལྷག་མ་ལུས་པས་བདག་ཅག་ཤིན་དུ་བདེ་བའི་མྱ་ངན་ལས་འདའ་བ་མ་ཐོབ་པོ། །བདག་ཅག་ཏིང་ངེ་འཛིན་ཀྱི་སྒོའི་ཁྱད་པར་དང ། ཡོན་ཏན་ཡང་མ་ཐོབ་པོ། །བདག་ཅག་དེང་བཅོམ་ལྡན་འདས་ཀྱི་སྤྱན་སྔར་མདོ་སྡེ 60.211a བཤད་པ་འདི་ཐོས་ནས་ལྷག་པར་ཤིན་དུ་འཛེམ་པ་དང ། ངོ་ཚ་བའི་སེམས་དང ། མི་འཆབ་པའི་སེམས་ཀྱིས་སོ་སོར་འཆགས་སོ། །ཡོངས་སུ་བྱང་བར་ཤོགས་ཤིག་།དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་ཡོངས་སུ་བྱང་བ་དང ། སླན་ཆད་མི་བགྱིད་པར་རྗེས་སུ་གཟུང་དུ་གསོལ། བདག་ཅག་མ་འོངས་པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་བཅོམ་ལྡན་འདས་ཀྱི་ཐུགས་རྗེས་བསྐྱབ་དུ་གསོལ། བདག་ཅག་བཅོམ་ལྡན་འདས་ཀྱིས་བྱིན་གྱི་བརླབས་ཀྱི་མཐུས་མོས་པ་ཇི་ལྟ་བ་བཞིན་དུ་མྱ་ངན་ལས་འདའ་བའི་བདེ་བ་མྱུར་དུ་ཐོབ་པ་དང ། ཏིང་ངེ་འཛིན་ཀྱི་སྒོའི་ཡོན་ཏན་གྱི་ཁྱད་པར་ཐོབ་པར་མཛད་དུ་གསོལ། དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པ་ལ་ཚིག་རྩུབ་པོ་ཞེ་གཅོད་པ་རྣམ་པ་སྣ་ཚོགས་ཀྱིས་འཚེ་ཞིང་གནོད་པ་བགྱིས་པས་བདག་ཅག་སྡིག་པ་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བར་གྱུར་པ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །ལ་ལ་ནི་བདག་ཅག་འདི་སྐད་དུ་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པ་ལ་གཞུ་བ་དང ། འཚོག་པས་འཚེ་བ་དང ། གནོད་པ་བགྱིས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བར་གྱུར་པ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པའི་ཆོས་གོས་དང ། ལྷུང་བཟེད་ཕྲོགས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བར་གྱུར་པ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གིས་ཉེ་གནས་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པའི་འཚོ་བའི་ཡོ་བྱད་རྣམ་པ་སྣ་ཚོགས་ཕྲོགས 60.211b ཏེ་བཟའ་བ་དང ། བཏུང་བ་ཕྲོགས་ཤིང་བར་ཆད་བྱས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པ་དག་གི་ཆོས་གོས་ཕྲོགས་ནས་ཁྱིམ་པར་ཕབ་སྟེ། ལས་རྣམ་པ་སྣ་ཚོགས་བྱེད་དུ་བཅུག་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ངན་སོང་དུ་ལྟུང་བ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་རབ་ཏུ་བྱུང་བ་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པ་དག་ཉེས་པ་བྱས་པ་དང ། ཉེས་པ་མ་བྱས་པ་ལ་ལྕགས་དང ། ཁོང་སྒྲིལ་དང ། ཤིང་སྒྲོག་དུ་བཅུག་སྟེ་གཙེས་པས་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་བདག་ཅག་ངན་སོང་དུ་ལྷུང་བ་ནས་དེ་བཞིན་དུ་གོང་དུ་རྒྱས་པར་བཤད་པ་བཞིན་ནོ། །དེ་ལ་ཁ་ཅིག་ནི་འདི་སྐད་དུ་བདག་ཅག་སྔོན་བཅོམ་ལྡན་འདས་ཆེ་གེ་མོ་ཞིག་གི་ཉེ་གནས་རབ་ཏུ་བྱུང་བ་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པ་དག་ལ་དབང་ཟ་བའི་སེམས་ཀྱིས་འཚེ་བ་དང ། གནོད་པ་རྣམ་པ་སྣ་ཚོགས་ཀྱིས་མི་བདེ་བར་བགྱིས་པས་བདག་ཅག་མི་དགེ་བའི་ལས་དེའི་དབང་གིས་བསྐལ་པ་ཚད་མེད་པའི་བར་དུ་ཤིན་དུ་མི་བཟད་པའི་སྡུག་བསྔལ་ཆེན་པོ་མྱོང་བར་གྱུར་ཏོ། །ཕྱིས་སངས་རྒྱས་ཚད་མེད་པ་དག་ལ་བསྙེན་བཀུར་དང ། མཆོད་པ་དང ། མཉེས་པ་བགྱིས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་སྙེད་དེ་དག་ལ་ཡང་བསྙེན་བཀུར་བ་དང ། མཆོད་པ་དང ། མཉེས་པ་བགྱིས་ཏེ། སངས་རྒྱས་དེ་རེ་རེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་རེ་རེ་ལ་ཡང་ཤིན་དུ་འཛེམ་པ་དང་བཅས་པས་མི་དགེ་བའི་ལས་དེ་དག་སོ་སོར་འཆགས་སོ། །སངས་རྒྱས་དེ་རེ་རེ་དང ། བྱང་ཆུབ 60.212a སེམས་དཔའ་སེམས་དཔའ་ཆེན་པོ་དེ་རེ་རེ་ལས་ཀྱང་ཚད་མེད་པའི་ཆོས་ཀྱི་རྣམ་གྲངས་མཉན་ཏེ་ཐོས་ནས། ཤིན་དུ་འབད་པའི་བརྩོན་འགྲུས་ཀྱིས་ནན་ཏན་བགྱིས་ཏེ། ཤིན་དུ་སྤྱད་དཀའ་བ་སྤྱད་ཀྱང་ལས་ཀྱི་སྒྲིབ་པའི་ལྷག་མ་ལུས་པས་བདག་ཅག་ད་དུང་ཤིན་དུ་བདེ་བའི་མྱ་ངན་ལས་འདས་པའི་བདེ་བ་མ་ཐོབ་པོ། །ཏིང་ངེ་འཛིན་གྱི་ཡོན་ཏན་གྱི་སྒོའི་ཁྱད་པར་མ་ཐོབ་པོ། །བདག་ཅག་དེང་བཅོམ་ལྡན་འདས་ཀྱི་སྤྱན་སྔར་མདོ་སྡེ་འདི་ཐོས་ནས་ལྷག་པར་ཤིན་དུ་འཛེམ་པ་དང ། མི་འཆབ་པས་སོ་སོར་བཤགས་ཏེ་ཡོངས་སུ་བྱང་བར་གྱུར་ཏོ། །དེང་སླན་ཆད་ཇི་སྙེད་སྒྲིབ་པར་འགྱུར་བའི་ལས་རྣམས་མི་བགྱིད་པར་ཡོངས་སུ་བསྲུང་བར་འཚལ་ལོ། །བཅོམ་ལྡན་འདས་ཐུགས་བརྩེ་བ་ཅན་གྱིས་བདག་ཅག་གི་སྡིག་པ་དེ་དག་ཡོངས་སུ་བྱང་བ་དང ། སླན་ཆད་མི་བགྱིད་པར་རྗེས་སུ་གཟུང་དུ་གསོལ། བདག་ཅག་མ་འོངས་པ་ན་ངན་སོང་གི་སྡུག་བསྔལ་མྱོང་བར་འགྱུར་བ་ལས་བཅོམ་ལྡན་འདས་ཀྱི་ཐུགས་རྗེས་བསྐྱབ་དུ་གསོལ། བདག་ཅག་བཅོམ་ལྡན་འདས་ཀྱི་བྱིན་གྱི་བརླབས་ཀྱི་མཐུས་མྱ་ངན་ལས་འདའ་བའི་བདེ་བ་མྱུར་དུ་ཐོབ་པ་དང ། གཞན་ཡང་ཏིང་ངེ་འཛིན་གྱི་སྒོའི་ཡོན་ཏན་གྱི་ཁྱད་པར་ཐོབ་པར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཉན་ཐོས་དང་བྱང་ཆུབ་སེམས་དཔའི་འཁོར་དེ་དག་ལ་བཀའ་སྩལ་པ། ལེགས་སོ་ལེགས་སོ། །ཁྱེད་འདི་ལྟར་ཤིན་དུ་འཛེམ་པ་དང་བཅས་པས་སོ་སོར་བཤགས་པ་ལེགས་སོ། །ཡོངས་སུ་མ་ཉམས་པའི་སྐྱེས་བུ་དམ་པ་གཉིས་ཡོད་དེ། གཅིག་ནི་རང་བཞིན་གྱིས་རྣམ་པར་དག་ཅིང་ཐོག་མ་ནས་ཉེས་པ་མི་བྱེད་པའོ། །གཅིག་ནི་ཉེས་པ་བྱས་སུ་ཟིན་ཀྱང་འཛེམ་པ་དང་བཅས་པས་སོ་སོར་འཆགས་པ་སྟེ། སྐྱེས་བུ་འདི་གཉིས་ནི་ངའི་བསྟན་པ་ལ་ཤིན་དུ་འདུན་པ་རྣམ་པར་དག་པ་ཞེས་བྱའོ། །རིགས་ཀྱི་བུ་འདི་ལྟར་སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་ཉེ་གནས་ལ་གནོད་པ་བྱས་པའི་སྡིག་པའི་གནན་གོང་དུ་བཤད་པའི་མཚམས་མེད་པ་དང ། ཉེ་བའི་སྡིག་པ་ནི་མིང 60.212b ཙམ་དུ་ཟད་དེ། སྡིག་པ་ཞེས་ཀྱང་མི་བྱའོ། །སངས་རྒྱས་ཀྱི་ཉེ་གནས་རབ་ཏུ་བྱུང་བ་ལ་གནོད་པ་བྱས་ན་དེའི་སྡིག་པ་ནི་གོང་དུ་བཤད་པའི་མཚམས་མེད་པ་ལྔའི་སྡིག་པ་ལས་ཚད་མེད་གྲངས་མེད་པས་ལྷག་པར་ཆེའོ། །དེ་ཅིའི་ཕྱིར་ཞེ་ན་དགེ་སློང་གང་ཚུལ་ཁྲིམས་ཉམས་ཏེ་སྡིག་པ་བྱེད་ཀྱང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་ལ་མྱ་ངན་ལས་འདའ་བ་ཕྱིན་ཅི་མ་ལོག་པའི་ལམ་སྟོན་ནུས་སོ། །སེམས་ཅན་མང་པོ་ལ་ཡོན་ཏན་ཆེན་པོའི་རིན་པོ་ཆེའི་གཏེར་དུ་འགྱུར་བ་ནས་དེ་བཞིན་དུ་ཇི་ལྟར་རྒྱས་པར་བཤད་པ་བཞིན་ནོ། །ཚུལ་ཁྲིམས་སྲུང་ཞིང་དགེ་བའི་ཆོས་སྤྱོད་པ་ལྟ་ཅི་སྨོས། དེ་བས་ན་གང་གིས་སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་སློབ་མ་ལ་འཚེ་བ་དང་གནོད་པ་བྱས་ན་དེ་ནི་དཀོན་མཆོག་གསུམ་གྱི་གདུང་གཅོད་པ་ཡིན་པར་ཤེས་པར་བྱའོ། །དེ་ནི་སེམས་ཅན་ཐམས་ཅད་ཀྱི་ཆོས་ཀྱི་མིག་བཅར་བ་ཡིན་ནོ། །དེ་ནི་ངས་སྔོན་ཤིན་དུ་དཀའ་བ་སྤྱད་ནས་རྙེད་པའི་དམ་པའི་ཆོས་མ་རུང་བར་བྱས་པ་ཡིན་ནོ། །དེ་ནི་སེམས་ཅན་ཐམས་ཅད་ལ་ཤིན་དུ་གནོད་པ་ཆེན་པོ་བྱས་པ་ཡིན་ནོ། །དེ་བས་ན་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་ལ་གནོད་པ་བྱས་ན་དེའི་སྡིག་པ་ནི་སྔར་བཤད་པའི་མཚམས་མེད་པ་ལྔའི་སྡིག་པ་བས་ཚད་མེད་གྲངས་མེད་པས་ལྷག་པར་ཆེའོ། །དེ་བས་ན་ཁྱེད་ཀྱིས་དེང་ངའི་མདུན་དུ་ཤིན་དུ་བསམ་པ་དག་ཅིང་ལྷག་པའི་འཛེམ་པ་དང་འབད་པར་བཅས་པས་སྔོན་མི་དགེ་བའི་ལས་ཀྱི་སྒྲིབ་པ་ཐམས་ཅད་སོ་སོར་བཤད་པའི་ཕྱིར་ཁྱེད་ལ་ཐུགས་རྗེ་ཆེན་པོས་རྗེས་སུ་བཟུང་བས་ཁྱེད་ཀྱི་སྡིག་པའི་ལས་ཀྱི་སྒྲིབ་པ་ཐམས་ཅད་ཁད་ཀྱིས་བྱང་བར་གྱུར་ཏེ་སངས་རྒྱས་ཀྱི་ཞིང་འདིར་བསྐལ་པ་བཟང་པོའི་སངས་རྒྱས་སྟོང་འབྱུང་བ་ཐམས་ཅད་ལ་ཡང་ཁྱེད་ཀྱིས་འདི་བཞིན་དུ་དེ་བཞིན་གཤེགས་པ་དེ་དག་གི་སྤྱན་སྔར་ཡང་སྡིག་པའི་ལས་ཀྱི་སྒྲིབ་པ་ཐམས་ཅད་ཤིན་དུ་སོ་སོར་ཤོགས་ཤིག་།མ་འོངས་པའི་ཉེས་པ་ཡང་ཤིན་དུ་བསྲུང་བར་གྱིས་ཤིག་། 60.213a བསྐལ་པ་བཟང་པོའི་སངས་རྒྱས་སྟོང་གི་ཐ་མ་སྣང་མཛད་ཅེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ་སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་དེའི་སྤྱན་སྔར་ཡང་སྡིག་པའི་ལས་ཀྱི་སྒྲིབ་པ་ཐམས་ཅད་ཤིན་དུ་སོ་སོར་ཤོགས་ཤིག་དང ། ལྷག་མ་མ་ལུས་པར་ཡོངས་སུ་བྱང་བར་འགྱུར་རོ། །དེའི་ཚེ་ཉན་ཐོས་དེ་དག་དང ། བྱང་ཆུབ་སེམས་དཔའ་དེ་དག་གིས་གསོལ་པ། དེ་དེ་བཞིན་ནོ། །བཅོམ་ལྡན་འདས་བདག་ཅག་གལ་ཏེ་འདི་ལྟར་སངས་རྒྱས་ནངས་ཀྱི་ཐ་མ་སྣང་མཛད་ཀྱི་ཚེ། ཡང་དག་པའི་ལྟ་བ་ཐོབ་ཅིང་ལོག་པར་ལྟ་བ་རྣམ་པར་སྤངས་ཏེ། སྡིག་པའི་ལས་ཀྱི་སྒྲིབ་པ་ཐམས་ཅད་ལྷག་མ་མ་ལུས་པར་འབྱང་ཞིང་སྡུག་བསྔལ་ཐམས་ཅད་ལས་རྣམ་པར་གྲོལ་བར་འགྱུར་ན། བདག་ཅག་བསྐལ་པ་བཟང་པོ་འདི་ལ་མཚམས་མེད་པའི་སེམས་ཅན་དམྱལ་བར་སྐྱེས་ཏེ། སྡུག་བསྔལ་རྣམ་པ་སྣ་ཚོགས་མྱོང་ན་ཡང་བཟོད་དོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཁྱེད་ཀྱིས་འདི་ལྟར་རྟུལ་ཕོད་པ་དང ། ཤིན་དུ་འབད་པའི་བརྩོན་འགྲུས་བརྟན་པ་དང ། སྨོན་ལམ་གྱི་མཐུས་གདོན་མི་ཟ་བར་སངས་རྒྱས་སྣང་མཛད་ཀྱི་ཚེ་སྔོན་གྱི་ལས་ཀྱི་སྒྲིབ་པ་ཐམས་ཅད་བྱང་བ་དང ། ལྷག་པའི་བསམ་པས་སྟི་སྟང་དང་བཅས་ཏེ་བསྙེན་བཀུར་དང ། མཆོད་པ་གདོན་མི་ཟ་བར་བྱེད་པར་འགྱུར་རོ། །དེ་བཞིན་གཤེགས་པ་སྣང་མཛད་ཀྱིས་ཀྱང་གདོན་མི་ཟ་བར་ཉོན་མོངས་པ་ཐམས་ཅད་ཡོངས་སུ་གཅད་པའི་དགྲ་བཅོམ་པར་འགྱུར་བར་མཛད་དོ། །གདོན་མི་ཟ་བར་ཏིང་ངེ་འཛིན་གྱི་སྒོའི་ཡོན་ཏན་གྱི་ཁྱད་པར་ཐོབ་པར་མཛད་དོ། །དེ་ནས་ཉན་ཐོས་དེ་དག་དང ། བྱང་ཆུབ་སེམས་དཔའ་དེ་དག་དགའ་བཞིན་དུ་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་ཕྱིར་ཡང་སོ་སོའི་སྟན་ལ་འཁོད་དོ། །དེའི་ཚེ 60.213b བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་བཀའ་སྩལ་པ། རིགས་ཀྱི་བུ་ངས་སངས་རྒྱས་ཀྱི་སྤྱན་གྱིས་འཇིག་རྟེན་ཐམས་ཅད་ལ་བརྟགས་ན། མ་འོངས་པའི་དུས་ན་སངས་རྒྱས་ཀྱི་ཞིང་འདིར་ཚད་མེད་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱི་རྒྱལ་རིགས་གདོལ་པ་ཅན་དང ། བྲམ་ཟེ་གདོལ་པ་ཅན་དང ། བློན་པོ་གདོལ་པ་ཅན་དང ། ཁྱིམ་བདག་གདོལ་པ་ཅན་དང ། ཚོང་དཔོན་གདོལ་པ་ཅན་དང ། དགེ་སྦྱོང་གདོལ་པ་ཅན་དང ། རྗེའུ་རིགས་དང ། དམངས་རིགས་དང་གདོལ་པ་ཅན་གྱི་སྐྱེས་པ་འམ། བུད་མེད་ལ་སོགས་པ་དེ་དག་དགེ་བའི་རྩ་བ་ཆུང་ངུ་བསྐྱེད་པས་མིའི་ལུས་ཐོབ་དུ་ཟིན་ཀྱང་མི་དགེ་བའི་བཤེས་གཉེན་དང་སྟེན་ཅིང་ལོག་པའི་ལྟ་བ་བསྐྱེད་པས་སྡིག་པ་མི་དགེ་བའི་ལས་ཀྱིས་ངའི་བླ་ན་མེད་པའི་དམ་པའི་ཆོས་ཤིན་དུ་ཟབ་མོ་འཇིག་པར་བྱེད་དོ། །ངའི་བསྟན་པ་རྒྱས་པར་མི་བྱེད། རྒྱས་པ་རྣམས་མེད་པར་བྱེད་ཅིང་མོས་པ་མི་སྐྱེད། ངས་བསྟན་པའི་ཉན་ཐོས་ཀྱི་ཐེག་པ་ཅན་གྱི་དམ་པའི་ཆོས་ལ་འཕྱ་ཞིང་སྐུར་ཏེ། བགེགས་དང་བར་ཆད་བྱེད་ཅིང་རྒྱས་པར་མི་བྱེད་པ་དང ། བར་བར་ནི་ངས་བསྟན་པའི་རང་སངས་རྒྱས་ཀྱི་ཐེག་པ་ཅན་གྱི་དམ་པའི་ཆོས་ལ་འཕྱ་ཞིང་སྐུར་པ་དང ། བགེགས་དང་བར་ཆད་བྱེད་ཅིང་རྒྱས་པར་མི་བྱེད་པ་དང ། བར་བར་ནི་ངས་བསྟན་པའི་བླ་ན་མེད་པའི་ཐེག་པ་ཅན་གྱི་དམ་པའི་ཆོས་ལ་འཕྱ་ཞིང་སྐུར་པ་དང ། བགེགས་དང་བར་ཆད་བྱེད་ཅིང་རྒྱས་པར་མི་བྱེད་པ་དང ། བར་བར་ནི་ངས་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དང ། ཆོས་ཀྱི་སྣོད་མ་ཡིན་པ་ལ་ཞེ་སྡང་སྐྱེད་ཅིང་གཤེ་བ་དང ། སྤྱོ་བ་དང ། སྨོད་པ་དང ། ཚིག་རྣམ་པ་སྣ་ཚོགས་ཀྱིས་གནོད་པར་ཀླགས་ལྟ་སྟེ། འཕྱ་ཞིང་སྐུར་བ་དང ། ཡོན་ཏན་བཅས་ནས་ཉེས་པ་བསྒྲགས་ཏེ། དེ་བཞིན་དུ་སྨོད་པའི་སེམས་ཀྱིས་འཚེ་བ་དང ། གནོད་པ་རྣམ་པ་སྣ་ཚོགས་བྱེད་དོ། །དེ་ལྟར་གང་ཟག་འཕགས་པའི་ཆོས་ཀྱི་སྣོད་དུ་མ་གྱུར་པ་དེ་ཡང་ཡང་དག་པར་གླེན་ཞིང་གཏི་མུག་གི 60.214a རང་བཞིན་ཅན་ཡིན་ཏེ། ཆུང་ཟད་ཙམ་གྱི་ཤེས་པ་སྙེམས་པའི་ང་རྒྱལ་ཅན་དེ་འདི་ནས་ཚེ་འཕོས་མ་ཐག་ཏུ་ངན་སོང་གསུམ་དུ་ལྷུང་སྟེ། ཚད་མེད་པ་སྙེད་ཀྱིས་ཤིན་དུ་མི་ཟད་པའི་སྡུག་བསྔལ་ཆེན་པོ་མྱོང་བར་འགྱུར་རོ། །བསྐལ་པ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་མིའི་ལུས་ཐོབ་པར་དཀའ་བ་ནས་དེ་བཞིན་དུ་རྒྱས་པར་གོང་དུ་བཤད་པ་བཞིན་ནོ། །རིགས་ཀྱི་བུ་སེམས་ཅན་དེ་མཚམས་མེད་པའི་སེམས་ཅན་དམྱལ་བ་ཆེན་པོ་ན་འདུག་སྟེ། སྡུག་བསྔལ་ཆེན་པོ་མྱོང་ཡང་སླའི་དེ་ལྟ་བུའི་ལུས་སྡིག་པ་ཅན་ང་རྒྱལ་གྱིས་མངོན་པར་ཟིན་པ། སྡིག་པའི་བཤེས་གཉེན་གྱི་རྗེས་སུ་འབྲང་ཞིང་མི་དགེ་བའི་ལས་བྱེད་པས་འཁོར་བར་འཁོར་ཏེ། ཤིན་དུ་བསྒྲལ་དཀའ་བ་རྟག་ཏུ་འཁོར་བར་སྡུག་བསྔལ་གྱིས་གདུངས་པར་གྱུར་པ་ནི་མ་ཡིན་ནོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་བློ་གྲོས་ཆེན་པོ་ཅན་གྱི་སེམས་ཅན་ཚད་མེད། གྲངས་མེད་པ་སྙེད་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ་མཆི་མ་བླགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟར་འཇིག་རྟེན་གྱི་སེམས་ཅན་འདི་དག་མིའི་ལུས་ཤིན་དུ་ཐོབ་པར་དཀའ་བ་རྙེད་ཀྱང་དད་པ་ཡོངས་སུ་སྤོང་ངོ ། །ཡང་དག་པའི་སྨོན་ལམ་ཡོངས་སུ་སྤོང་ངོ ། །ཡང་དག་པའི་མོས་པ་དང ། ཡང་དག་པའི་ལྟ་བ་ཡོངས་སུ་སྤོང་ངོ ། །དགེ་བའི་བཤེས་གཉེན་ཡོངས་སུ་སྤོང་ངོ ། །དུས་བཟང་པོ་དང ། གནས་བཟང་པོ་དང ། ཚུལ་ཁྲིམས་དག་པ་ཡོངས་སུ་སྤོང་ངོ ། །ཡང་དག་པའི་ཏིང་ངེ་འཛིན་དང ། ཡང་དག་པའི་ཤེས་རབ་ཡོངས་སུ་སྤོང་ངོ ། །སེམས་ཅན་འདི་དག་ཤིན་དུ་ཐོབ་པར་དཀའ་བའི་མིའི་ལུས་ཐོབ་མོད་ཀྱི། གླེན་པ་མི་ཤེས་པ་དང ། ང་རྒྱལ་གྱི་དབང་གིས་ཇི་ལྟར་གོང་དུ་བཤད་པའི་སྡིག་ལྕི་བ་རྣམས་ཀུན་བགྱིད་དེ། བཅོམ་ལྡན་འདས་ཀྱི་དམ་པའི་ཆོས་ལ་སྐུར་བ་དང ། བཅོམ་ལྡན་འདས 60.214b ཀྱི་བསྟན་པ་ལ་རབ་ཏུ་བྱུང་བའི་ཉེ་གནས་ལ་འཚེ་བ་དང་གནོད་པ་བགྱིད་དོ། །བདག་ཅག་དེང་བཅོམ་ལྡན་འདས་ཀྱི་སྤྱན་སྔར་སེམས་རྩེ་གཅིག་པས་ཡང་དག་པའི་ཡི་དམ་བཅུའོ། །བདག་ཅག་དེང་སླན་ཆད་འཁོར་བར་འཁོར་བ་འདི་ཕན་ཆད་ནས་ནམ་རྣམ་པར་གྲོལ་བ་མ་ཐོབ་ཀྱི་བར་དུ་དེ་ལྟ་བུའི་སྡིག་པའི་གྲོགས་པོ་དང་མི་མཇལ་བ་དང ། དེ་ལྟ་བུའི་སྡིག་པའི་ལས་མི་བགྱིད་པ་དང ། སངས་རྒྱས་ཀྱི་དམ་པའི་ཆོས་ལ་མི་སྐུར་བ་དང ། རབ་ཏུ་བྱུང་བའི་གང་ཟག་ལ་གནོད་པ་མི་བགྱིད་པ་དང ། སེམས་ཅན་གྱི་ཆོས་ཀྱི་མིག་མི་འབྱིན་པ་དང ། དཀོན་མཆོག་གསུམ་གྱི་གདུང་རྒྱུན་མི་འཆད་པར་དམ་བཅས་པ་དང ། བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་དམ་བཅས་པ་དེ་དག་རྗེས་སུ་གཟུང་དུ་གསོལ། དེའི་ཚེ་འཁོར་གྱི་དཀྱིལ་འཁོར་དེའི་ནང་ན་སེམས་ཅན་བློ་དང་ལྡན་པ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་སྙེད་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་དེང་བཅོམ་ལྡན་འདས་ཀྱི་སྤྱན་སྔར་བསམ་པ་ངེས་པར་དམ་བཅའ་བར་འཚལ་ཏེ། འཁོར་བར་འཁོར་བ་འདི་ཕན་ཆད་ནས་ནམ་ཆོས་ཀྱི་བཟོད་པ་མ་ཐོབ་ཀྱི་བར་དུ་རྒྱལ་པོར་མ་གྱུར་ཅིག་།བློན་པོར་མ་གྱུར་ཅིག་།ཡུལ་གྱི་སྟོན་པར་མ་གྱུར་ཅིག་།གྲོང་རྡལ་དང ། གྲོང་ཁྱེར་དང ། གྲོང་འདབ་ཀྱི་བདག་པོར་མ་གྱུར་ཅིག་།དམག་ལ་དབང་བའི་བདག་པོར་མ་གྱུར་ཅིག་།ཚོང་དཔོན་དུ་མ་གྱུར་ཅིག་།མཆོད་པ་དང ། གཙུག་ལག་ཁང་ལ་དབང་བའི་བདག་པོར་མ་གྱུར་ཅིག་།ཚོང་དཔོན་དང ། ཁྱིམ་བདག་དང ། དགེ་སྦྱོང་གི་བདག་པོར་མ་གྱུར་ཅིག་།སློབ་དཔོན་དང་བླ་མར་མ་གྱུར་ཅིག་།ཁྱིམ་པའི་ལུས་སུ་མ་གྱུར་ཅིག་།ཞལ་ཆེ་ལྕེ་གཅོད་པའི་དབང་པོར་མ་གྱུར་ཅིག་།ཕྱུག་པ་དང་བཙན་པའི་བདག་པོར་མ་གྱུར་ཅིག་།བདག་ཅག་ཆོས་ཀྱི་བཟོད་པ་མ་ཐོབ་པར་དེ་ལྟ་བུའི་གནས་སུ་སྐྱེས་ན་དེ་ཉིད་སངས་རྒྱས་ཀྱི་བསྟན 60.215a པ་ལ་མི་དགེ་བའི་རྒྱུར་འགྱུར་བ་ཞེས་བྱ་སྟེ། ཁ་ན་མ་ཐོ་བའི་སྡིག་པ་ཆེན་པོ་བྱེད་པས། བཅོམ་ལྡན་འདས་ཀྱིས་གསུངས་པའི་དམ་པའི་ཆོས་ལ་འཕྱ་ཞིང་སྐུར་བ་ཞེས་བགྱིའོ། །སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་ལ་འཚེ་ཞིང་གནོད་པ་བགྱིད་པའོ། །སེམས་ཅན་མང་པོའི་ཆོས་ཀྱི་མིག་འབྱིན་པའོ། །དཀོན་མཆོག་གསུམ་གྱི་གདུང་རྒྱུན་གཅོད་པའོ། །སེམས་ཅན་ཚད་མེད་པ་ལ་གནོད་པ་དང་འཚེ་བ་བགྱིད་པའོ། །དེའི་དབང་གིས་གདོན་མི་འཚལ་བར་མཚམས་མེད་པའི་སེམས་ཅན་དམྱལ་བར་ལྟུང་སྟེ། ངན་སོང་དུ་འཁོར་བ་ལས་ཐར་པའི་དུས་མ་མཆིས་སོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་སྨོན་ལམ་འདི་དག་བྱིན་གྱིས་བརླབ་པར་གསོལ། དེའི་ཚེ་འཁོར་གྱི་དཀྱིལ་འཁོར་དེར་འདུས་པའི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། མི་དང ། མི་མ་ཡིན་ལ་སོགས་པ་ཐམས་ཅད་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་མཆི་མ་བླགས་ཏེ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ཐོག་མ་མ་མཆིས་པ་ནས་འཁོར་ཞིང་གླེན་པ་དང ། མི་ཤེས་པ་དང ། ང་རྒྱལ་གྱི་དབང་གིས་མི་དགེ་བའི་ལས་ཐམས་ཅད་བསྐྱེད་དེ། ལུས་ཀྱི་ལས་མི་དགེ་བ་དང ། ངག་གི་ལས་མི་དགེ་བ་དང ། ཡིད་ཀྱི་ལས་མི་དགེ་བ་བདག་གིས་བགྱིས་པ་དང ། གཞན་བགྱིད་དུ་སྩལ་བ་དང ། མཐོང་བ་དང་ཐོས་པ་ལ་རྗེས་སུ་ཡི་རང་བའི་སྡིག་པ་དེ་དག་ཐམས་ཅད་དེང་བཅོམ་ལྡན་འདས་ཀྱི་སྤྱན་སྔར་ཤིན་དུ་འཛེམ་པ་དང ། མི་འཆབ་པའི་སེམས་ཀྱིས་སོ་སོར་བཤགས་པས་སླན་ཆད་མི་བགྱིད་པར་ཡོངས་སུ་བསྲུང་བ་དང ། མ་མཆིས་པའི་དུས་ཀྱི་སྒྲིབ་པར་འགྱུར་བའི་སྡིག་པ་བྱང་བར་གྱུར་ཅིག་།དེ་བཞིན་དུ་ལན་ཅིག་།ལན་གཉིས། ལན་གསུམ་གྱི་བར་དུ་བརྗོད་དོ། །དེང་སླན་ཆད་འཁོར་བའི་མཐས་གཏུགས་པའི་བར་དུ་རྟག་ཏུ་སྡིག་པའི་གྲོགས་པོ་དང་མི་ཕྲད་པ་དང ། མི་དགེ་བའི་དབང་དུ་མ་གྱུར་ཅིག་།གལ་ཏེ་ཕྲད་ན 60.215b ཡང་དེའི་རྗེས་སུ་མི་འཇུག་པར་བསམ་པ་ངེས་པས་དམ་བཅའ་བར་འཚལ་ལོ། །སྡིག་པའི་ལས་དེ་དག་ཐམས་ཅད་བགྱིད་པར་མ་གྱུར་ཅིག་།བདག་ཅག་ཡུན་རིང་པོར་སྡུག་བསྔལ་མྱོང་བར་མ་གྱུར་ཅིག་།བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་སྨོན་ལམ་འདི་དག་རྗེས་སུ་གཟུང་བར་གསོལ། དེ་ནས་བཅོམ་ལྡན་འདས་ཀྱིས་འདུས་པའི་འཁོར་དེ་དག་ཐམས་ཅད་ལ་བཀའ་སྩལ་པ། ལེགས་སོ་ལེགས་སོ། །ཁྱེད་མ་འོངས་པའི་སྡུག་བསྔལ་གྱིས་འཇིགས་པ་དང ། འཛེམ་པས་སོ་སོར་བཤགས་པ་ལེགས་སོ། །ཁྱེད་ཀྱིས་འཁོར་བའི་ཆུ་བོ་ཆེན་པོ་ལས་བསྒྲལ་བ་དང ། འཇིགས་པ་མེད་པའི་མྱ་ངན་ལས་འདས་པའི་གྲོང་ཁྱེར་དུ་འཇུག་པའི་ཕྱིར་འདི་ལྟ་བུའི་སྨོན་ལམ་བཏབ་པ་ལེགས་སོ། །རིགས་ཀྱི་བུ་ཆོས་རྣམ་པ་འདི་བཅུ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་ཐོབ་པར་འགྱུར་རོ། །བཅུ་གང་ཞེ་ན་འདི་ལྟ་སྟེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་ལུས་ལ་མི་གནས། ཕྱི་རོལ་གྱི་ལུས་ལ་མི་གནས། ཕྱི་ནང་གི་ལུས་ལ་མི་གནས། འདས་པའི་ལུས་ལ་མི་གནས། མ་འོངས་པའི་ལུས་ལ་མི་གནས། ད་ལྟར་གྱི་ལུས་ལ་མི་གནས་པ་སྟེ། ཆོས་དང་པོ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་ཚོར་བ་ལ་མི་གནས། ཕྱི་རོལ་གྱི་ཚོར་བ་ལ་མི་གནས། ཕྱི་ནང་གཉི་གའི་ཚོར་བ་ལ་མི་གནས། འདས་པའི་ཚོར་བ་ལ་མི་གནས། མ་འོངས་པའི་ཚོར་བ་ལ་མི་གནས། ད་ལྟར་གྱི་ཚོར་བ་ལ་མི་གནས་པ་སྟེ། ཆོས་གཉིས་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན 60.216a ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་འདུ་ཤེས་ལ་ཅི་གནས་ཕྱི་རོལ་གྱི་འདུ་ཤེས་ལ་མི་གནས་ཕྱི་ནང་གཉི་གའི་འདུ་ཤེས་ལ་མི་གནས་འདས་པའི་འདུ་ཤེས་ལ་མི་གནས་མ་འོངས་པའི་འདུ་ཤེས་ལ་མི་གནས་ད་ལྟར་གྱི་འདུ་ཤེས་ལ་མི་གནས་པ་སྟེ་ཆོས་གསུམ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་འདུ་བྱེད་ལ་མི་གནས་ཕྱི་རོལ་གྱི་འདུ་བྱེད་ལ་མི་གནས་ཕྱི་ནང་གཉི་གའི་འདུ་བྱེད་ལ་མི་གནས་འདས་པའི་འདུ་བྱེད་ལ་མི་གནས་མ་འོངས་པའི་འདུ་བྱེད་ལ་མི་གནས་ད་ལྟར་གྱི་འདུ་བྱེད་ལ་མི་གནས་པ་སྟེ། ཆོས་བཞི་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་ནང་གི་རྣམ་པར་ཤེས་པ་ལ་མི་གནས་ཕྱི་རོལ་གྱི་རྣམ་པར་ཤེས་པ་ལ་མི་གནས། ཕྱི་ནང་གཉི་གའི་རྣམ་པར་ཤེས་པ་ལ་མི་གནས། འདས་པའི་རྣམ་པར་ཤེས་པ་ལ་མི་གནས། མ་འོངས་པའི་རྣམ་པར་ཤེས་པ་ལ་མི་གནས། ད་ལྟར་གྱི་རྣམ་པར་ཤེས་པ་ལ་མི་གནས་པ་སྟེ། ཆོས་ལྔ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་འཇིག་རྟེན་འདི་ལ་མི་གནས་པ་སྟེ་ཆོས་དྲུག་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་འཇིག་རྟེན་ཕ་རོལ་ལ་མི་གནས་པ་སྟེ། ཆོས་བདུན་པ་འདིས་ན་བྱང་ཆུབ་སེམས་དཔའ 60.216b སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་གང་འདོད་པའི་ཁམས་ལ་མི་གནས་པ་སྟེ། ཆོས་བརྒྱད་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཟུགས་ཡོད་པའི་ཁམས་ལ་མི་གནས་པ་སྟེ། ཆོས་དགུ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཟུགས་མེད་པའི་ཁམས་ལ་མི་གནས་པ་སྟེ། ཆོས་བཅུ་པ་འདིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡང་དག་པའི་ལམ་སྐྱོན་མེད་པའི་ཆོས་ཀྱི་བཟོད་པ་འཐོབ་པར་འགྱུར་རོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པའི་ཚེ་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་བརྒྱ་སྟོང་བདུན་བཅུ་རྩ་གཉིས་སྙེད་ཀྱིས་མི་སྐྱེ་བའི་ཆོས་ཀྱི་བཟོད་པ་འཐོབ་བོ། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞི་སྙེད་ཀྱིས་ཆོས་ཀྱི་རྗེས་སུ་འཐུན་པའི་བཟོད་པ་འཐོབ་བོ། །ཉན་ཐོས་ཚད་མེད་པ་བརྒྱ་སྟོང་སྙེད་ཀྱིས་ཉོན་མོངས་པ་ཐམས་ཅད་ཡོངས་སུ་བཅད་པ་ནས་དགྲ་བཅོམ་པའི་བར་དུ་ཐོབ་པར་གྱུར་ཏོ། །སེམས་ཅན་ཁྲག་ཁྲིག་བརྒྱ་སྟོང་སྙེད་ཀྱིས་སྔོན་མ་བསྐྱེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་དེ་བཞིན་གཤེགས་པ་ལས་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །སེམས་ཅན་གྲངས་མེད་ཚད་མེད་པ་སྙེད་ཀྱིས་སྔོན་རང་སངས་རྒྱས་ཀྱི་སེམས་མ་བསྐྱེད་པ་དེ་སེམས་བསྐྱེད་པར་གྱུར་ཏོ། །གཞན་ཡང་སེམས་ཅན་གྲངས་མེད་ཚད་མེད་པ་སྙེད་ཀྱིས 60.217a སྔོན་ཉན་ཐོས་ཀྱི་སེམས་མ་བསྐྱེད་པ་དེ་བསྐྱེད་པར་གྱུར་ཏོ། །ཡང་དེའི་ཚེ་བཅོམ་ལྡན་འདས་ཀྱིས་འཁོར་མང་པོ་ལ་བཀའ་སྩལ་པ། སེམས་ཅན་གང་ཆོས་ཀྱི་བཟོད་པ་ཐོབ་པས་ནི་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་གནས་སུ་གནས་པར་བྱས་ཏེ། ནོར་རིན་པོ་ཆེ་རྣམ་པ་སྣ་ཚོགས་ལ་ལོངས་སྤྱོད་ཅིང་བདག་ཉིད་ཆེན་པོའི་གནས་སུ་ལོངས་སྤྱོད་པར་ངས་གནང་གི་སེམས་ཅན་གཞན་ནི་མ་ཡིན་ནོ། །བྱང་ཆུབ་སེམས་དཔའ་རྡོ་རྗེའི་སྙིང་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གང་ཆོས་ཀྱི་བཟོད་པ་མ་ཐོབ་པར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་གནས་སུ་གནས་ཏེ། ནོར་རིན་པོ་ཆེ་རྣམ་པ་སྣ་ཚོགས་ལ་སྤྱོད་པ་དང ། བདག་ཉིད་ཆེ་བའི་གནས་སུ་གནས་པར་ངེས་པར་མ་གནང་ངམ། འོན་ཏེ་གནང་བའི་སྐབས་ཀྱང་མཆིས། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་གང་ཆོས་ཀྱི་བཟོད་པ་མ་ཐོབ་ཀྱང་དགེ་བ་བཅུའི་ལས་ཀྱི་ལམ་སྤྱོད་ལ། སེམས་ཅན་གཞན་ཡང་སློབ་དུ་བཅུག་ན། དེ་ཡང་ངས་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་གནས་སུ་ནོར་རིན་པོ་ཆེ་རྣམ་པ་སྣ་ཚོགས་དང ། གཞན་ཡང་བདག་ཉིད་ཆེ་བའི་གནས་སུ་འདུག་ཅིང་ལོངས་སྤྱོད་དུ་གནང་ངོ ། །སེམས་ཅན་གང་ཆོས་ཀྱི་བཟོད་པ་ཡང་མ་ཐོབ་ལ། དགེ་བ་བཅུའི་ལས་ཀྱི་ལམ་ཡང་མི་སྤྱོད་དེ། སེམས་ཅན་གཞན་ཡང་སློབ་པ་ལ་མི་འཛུད་ལ་དབང་ཆེན་པོ་དང་ནན་ཏན་གྱིས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་བྱེད་དེ། ནོར་རིན་པོ་ཆེ་རྣམ་པ་སྣ་ཚོགས་དང ། བདག་ཉིད་ཆེན་པོའི་གནས་སུ་ལོངས་སྤྱོད་པ་དག་ནི་རྒྱལ་རིགས་གདོལ་པ་ཅན་དང ། གཞན་ཡང་བདག་ཉིད་ཆེ་བའི་གནས་སུ་ལོངས་སྤྱོད་པའི་གདོལ་པ་ཅན་གྱི་བདག་པོ་ཞེས་བྱ་སྟེ། གླེན་པ་གཏི་མུག་ཅན་ང་རྒྱལ་གྱིས་མངོན་པར་ཟིན་པ། ངའི་དམ་པའི་ཆོས་ཤིན་དུ་ཟབ་མོ་འཇིག་པར་བྱེད་པ། དཀོན་མཆོག་གསུམ་གྱི་གདུང་གཅོད་ཅིང་དམ་པའི་ཆོས་ཀྱི་སྒྲོན་མ་མེད 60.217b པར་བྱེད་པ། ངའི་བསྟན་པ་ལ་རབ་ཏུ་བྱུང་བ་དག་ལ་གནོད་པ་དང ། འཚེ་བ་རྣམ་པ་སྣ་ཚོགས་བྱེད་པ། འཚོག་པ་དང ། གཞུ་བ་དང ། ཆད་པས་གཅོད་པ་དང ། ཆོས་གོས་དང ། ལྷུང་བཟེད་དང ། འཚོ་བའི་ཡོ་བྱད་འཕྲོག་པ་དང ། ཆོས་གོས་ཕྲོགས་ཏེ་ཁྱིམ་པར་ཕབ་ནས་ལས་རྣམ་པ་སྣ་ཚོགས་བྱེད་དུ་བཅུག་པ་དང ། བཅིངས་པ་དང ། བཙོན་དུ་བཟུང་བ་ནས་འཚོ་བའི་དབང་པོ་དང་ཕྲལ་བ་དང་ངའི་བསྟན་པ་དམ་པའི་ཆོས་ལ་འཕྱ་ཞིང་སྐུར་པ་དང ། བར་དུ་གཅོད་ཅིང་བགེགས་བྱེད་ཅིང་ཡོངས་སུ་རྒྱས་པར་མི་བྱེད་པ་དང ། མཆོད་རྟེན་དང ། དགེ་འདུན་གྱི་ནོར་འཕྲོག་པར་བྱེད་པའི་གང་ཟག་དེ་ནི་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་སྟེ། སྡུག་བསྔལ་ཆེན་པོ་མྱོང་ཞིང་ངན་སོང་གི་གནས་སུ་འཁོར་ཞིང་ཐར་པའི་དུས་མེད་དོ། །དེ་ནས་བྱང་ཆུབ་སེམས་དཔའ་རྡོ་རྗེའི་སྙིང་པོས་ཡང་གསོལ་པ། བཅོམ་ལྡན་འདས་སེམས་ཅན་གང་ཆོས་ཀྱི་བཟོད་པ་ཡང་མ་ཐོབ། དགེ་བ་བཅུའི་ལས་ཀྱི་ལམ་ཡང་མི་སྤྱོད། སེམས་ཅན་གཞན་ཡང་སྤྱོད་པར་མི་སྐུར་བར་དབང་ཆེན་པོ་དང་ནན་གྱིས་རྒྱལ་ཐབས་སྤྱི་བོ་ནས་དབང་བསྐུར་བའི་གནས་སུ་རྒྱལ་པོ་བགྱིད་ཅིང་ནོར་རིན་པོ་ཆེ་རྣམ་པ་སྣ་ཚོགས་དང ། གཞན་ཡང་བདག་ཉིད་ཆེ་བའི་གནས་སུ་གནས་པ་ལ་རྒྱུ་གཞན་དང་ཐབས་གཞན་གྱིས་མཚམས་མེད་པའི་སེམས་ཅན་དམྱལ་བ་ལས་གདོན་ཅིང་ངན་སོང་གཞན་གྱི་སྡུག་བསྔལ་ལས་ཀྱང་ཐར་བར་བགྱི་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱུ་གཞན་དང་ཐབས་གཞན་གྱིས་གདོན་དུ་རུང་བ་ཡོད་དོ། །སེམས་ཅན་གང་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོར་ཞུགས་ལ་ལོངས་སྤྱོད་རྣམ་པ་སྣ་ཚོགས་ལ་སྤྱོད་པ་ཆོས་ཀྱི་བཟོད་པ་ཡང་མ་ཐོབ། དགེ་བ་བཅུའི་ལས་ཀྱི་ལམ་ཡང་མི་ལྡན་ཡང་དད་པའི་མཐུ་དང་ལྡན་ཏེ། དཀོན་མཆོག་གསུམ་ལ་རིམ་གྲོ་དང ། སྟི་སྟང་བྱེད་ཅིང་སངས་རྒྱས་ཀྱི་བསྟན་པའི་ཐེག་པ་གསུམ་དང་ལྡན་པའི་དམ་པའི་ཆོས་ལ་ཆུང་ངུ་ན་ཚིགས་སུ་བཅད་པ་གཅིག་ཙམ་ལ་ཡང 60.218a འཕྱ་ཞིང་སྐུར་བ་འམ། བར་དུ་གཅོད་པ་འམ། བགེགས་མི་བྱེད་ལ། སངས་རྒྱས་ཀྱི་བསྟན་པ་ལ་རབ་ཏུ་བྱུང་བའི་ཉེ་གནས་ཚུལ་ཁྲིམས་ཅན་ནམ། ཚུལ་ཁྲིམས་ཉམས་པ་འམ། ཚུལ་ཁྲིམས་མེད་ཀྱང་རུང ། སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་གྱོན་པ་ཐམས་ཅད་ལ་འཚེ་བ་དང ། གནོད་པ་དང ། གཞུ་བ་དང ། འཚོག་པ་དང ། ཆད་པས་གཅོད་པ་དང ། ཆོས་གོས་དང ། ལྷུང་བཟེད་དང ། འཚོ་བའི་ཡོ་བྱད་ཕྲོགས་པ་དང ། ཆོས་གོས་ཕྲོགས་ཏེ་ཁྱིམ་པར་ཕབ་ནས་ལས་བྱེད་དུ་བཅུག་པ་དང ། བཙོན་རར་བཅུག་པ་ནས་འཚོ་བའི་དབང་པོ་དང་ཕྲལ་བའི་བར་དུ་མི་བྱེད་ལ། མཆོག་རྟེན་དང ། དགེ་འདུན་གྱི་ནོར་མི་འཕྲོག་པ་དང ། ངན་པ་སྡིག་པ་ཅན་དག་རབ་ཏུ་བྱུང་བ་ལ་འཚེ་བ་དང ། གནོད་པ་བྱེད་དུ་མི་འཛུད་པ་དང ། དཀོན་མཆོག་གསུམ་གྱི་ནོར་ལ་འཕྲོག་ཅིང་སྤྱོད་དུ་མི་འཛུད་པ་དང ། སངས་རྒྱས་ཀྱི་བསྟན་པ་ཐེག་པ་གསུམ་དང་ལྡན་པའི་དམ་པའི་ཆོས་ལ་སྟི་སྟང་དང་བཅས་པས་མཉན་ཅིང་གཟུངས་སུ་འཛིན་པ་དང ། མཉན་ཏེ་གཟུངས་སུ་བཟུང་ནས་ཀྱང་ཇི་ལྟར་བཤད་པ་བཞིན་དུ་ཆོས་ཀྱི་རྗེས་སུ་བརྩོན་འགྲུས་དང ། ནན་ཏན་བྱེད་པ་དང ། ངས་བསྟན་པའི་ཐེག་པ་གསུམ་གྱིས་འཕགས་པའི་ཉེ་གནས་དག་ལ་མཆོད་པ་དང ། བསྙེན་བཀུར་དང ། སྟི་སྟང་དང་བཅས་པས་གཡོག་བྱེད་པ་དང ། ཐེག་པ་ཆེན་པོ་ལ་ཤིན་དུ་བརྟན་པའི་ཡི་དམ་བཅས་ཏེ་ཐེ་ཙོམ་དང་ཕྱིར་ལྡོག་པའི་སེམས་མི་སྐྱེད་པ་དང ། གཞན་ཡང་སེམས་ཅན་དག་ཐེག་པ་ཆེན་པོ་ལ་དད་ཅིང་ཡིད་ཆེས་པ་དང ། གཟུངས་སུ་འཛིན་པ་དང ། སློབ་པ་ལ་ནན་ཏན་བྱེད་དུ་འཇུག་ན། རྒྱལ་རིགས་གདོལ་པ་ཅན་འདི་དང ། གཞན་ཡང་བདག་ཉིད་ཆེ་བའི་གདོལ་པ་ཅན་དག་ནི་སྔ་མ་འདས་པའི་སངས་རྒྱས་ཀྱིས་ཀྱང་རྒྱལ་ཐབས་ཀྱི་དབང་བསྐུར་ཞིང་ལོངས་སྤྱོད་རྣམ་པ་སྣ་ཚོགས་ལ་སྤྱོད་དུ་གནང་ངོ ། ། 60.218b གཞན་ཡང་གྲོང་དང ། གྲོང་ཁྱེར་དང ། ནོར་དབྱིག་ཐམས་ཅད་ལ་སྤྱོད་ཀྱང་མཚམས་མེད་པའི་སེམས་ཅན་དམྱལ་བར་མི་ལྟུང་བ་ནས། ངན་སོང་གཞན་གྱི་བར་དུ་ཡང་ལྟུང་བར་མི་འགྱུར་རོ། །དེ་ནི་ངས་རྒྱལ་ཐབས་ཀྱི་དབང་སྐུར་ཞིང་ལོངས་སྤྱོད་རྣམ་པ་སྣ་ཚོགས་ལ་སྤྱོད་དུ་གནང་ངོ ། །དེ་ལྟར་ན་དེ་དག་ནི་གྲོང་དང་གྲོང་ཁྱེར་ན་སྤྱོད་ཀྱང་མཚམས་མེད་པའི་སེམས་ཅན་དམྱལ་བར་མི་ལྟུང་བ་ནས་ངན་སོང་གཞན་དུ་ཡང་མི་ལྟུང་ངོ ། །སེམས་ཅན་གང་སྡིག་པའི་ལས་ཀྱི་སྒྲིབ་པ་ཐམས་ཅད་ལྷག་མ་མ་ལུས་པར་བྱང་བར་འདོད་ན་ངས་བསྟན་པའི་དམ་པའི་ཆོས་ཀྱི་རྣམ་གྲངས་འདི་ལ་ནན་ཏན་དུ་བསླབ་ཅིང་གཟུངས་སུ་གཟུང་བར་བྱའོ། །གང་གིས་དེ་ལྟར་དགེ་འདུན་གྱི་མངོན་སུམ་དུ་གྱུར་པ་ལ་ཤིན་དུ་འཛེམ་པ་དང ། ངོ་ཚ་བའི་སེམས་ཀྱིས་སྡིག་པའི་ལས་སོ་སོར་བཤགས་ན་སྔོན་གྱི་དུས་ན་བྱས་པའི་སྡིག་པའི་ལས་ཐམས་ཅད་ལྷག་མ་མ་ལུས་པར་ཡོངས་སུ་བྱང་བར་འགྱུར་རོ། ་་་་་་་་་།བམ་པོ་བརྒྱད་པ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ན་ཉན་ཐོས་ཀྱི་ཐེག་པ་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མ་མཆིས་པ་ལགས། ཇི་ལྟར་ན་རང་སངས་རྒྱས་ཀྱི་ཐེག་པ་ལ་འཁྲུལ་པ་མ་མཆིས་པ་ལགས། ཇི་ལྟར་ན་རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཐེག་པ་ཆེན་པོ་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཐེག་པ་ཆེན་པོའི་གང་ཟག་ལ་འཁྲུལ་པ་མ་མཆིས་པ་ལགས། ཇི་ལྟར་ན་དཀོན་མཆོག་གསུམ་གྱི་གདུང་རྟག་པར་ཡོངས་སུ་འཕེལ་བར་བགྱིད་པ་ལགས། ཇི་ལྟར་ན་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དམ། ཆོས་ཀྱི་སྣོད་མ་ལགས་པ་ཡང་རུང ། ཆུང་ངུ་ན་ཆོས་གོས་ཀྱི་ཚལ་བུ 60.219a འཚལ་ཞིང་སྐྲ་དང་ཁ་སྤུ་བྲེགས་པ་ཐམས་ཅད་ལ་འཁྲུལ་པ་མ་མཆིས་པ་ལགས། ཇི་ལྟར་ན་ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པར་འགྱུར་བ་ལགས། ཇི་ལྟར་ན་རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བར་འགྱུར་བ་ལགས། ཇི་ལྟར་ན་ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ལ་དབང་དུ་འགྱུར་ཞིང་ཕྱིར་མི་ལྡོག་པར་འགྱུར་བ་ལགས། ཇི་ལྟར་ན་རྟག་ཏུ་དགེ་བའི་བཤེས་གཉེན་དང་མཇལ་ཞིང་རྗེས་སུ་འཐུན་པར་འགྱུར་བ་ལགས། ཇི་ལྟར་ན་རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང ། བསྙེན་བཀུར་བགྱིད་པ་དང་མི་འབྲལ་བར་འགྱུར་བ་ལགས། ཇི་ལྟར་ན་དགེ་བའི་རྩ་བ་ཐམས་ཅད་ལ་རབ་ཏུ་བརྩོན་པས་སེམས་མི་ངོམས་པ་ལགས། ཇི་ལྟར་ན་བྱང་ཆུབ་ཀྱི་སྤྱོད་པ་རྣམ་པ་སྣ་ཚོགས་ལ་སེམས་མི་ངོམས་པ་ལགས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་འདི་སྐད་ཅེས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ལོ་རྣམ་པ་བཅུ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་བཅུ་པ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར་རོ། །ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་རྟག་པར་ཡོངས་སུ་འཕེལ་བར་འགྱུར་རོ། །དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཞིང་སྐྲ་དང་ཁ་སྤུ་བྲེགས་པ་ཐམས་ཅད་ལ 60.219b འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་ཐམས་ཅད་དང ། གཟུངས་དང ། བཟོད་པ་དང ། ས་རྣམས་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང ། རང་སངས་རྒྱས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པ་དང ། སྔོན་སྡིག་པ་མི་དགེ་བའི་ལས་ཅི་བྱས་པ་ཐམས་ཅད་འཕགས་པའི་ཆོས་ཀྱི་ཡེ་ཤེས་རྡོ་རྗེ་ལྟར་ས་ལ་རྣོ་བས་ལྷག་མ་མ་ལུས་པར་བཅོམ་སྟེ་རྣམ་པར་སྨིན་པའི་འབྲས་བུ་མི་མྱོང་བ་དང ། གསར་དུ་སྡིག་པ་མི་དགེ་བའི་ལས་ཐམས་ཅད་མི་བྱེད་པ་དང ། སྐྱོ་བ་དང་སྒྱིད་ལུག་པ་མེད་པའི་སེམས་ཀྱིས་བླ་ན་མེད་པའི་ཆོས་ཀྱི་འཁོར་ལོ་སྐོར་བ་དང ། བྱང་ཆུབ་ཀྱི་ཡན་ལག་རིན་པོ་ཆེ་སྣ་བདུན་ནན་ཏན་བྱེད་པ་ལ་སྐྱོ་ཞིང་སྒྱིད་ལུག་པ་མེད་པའི་སེམས་དང ། སེམས་ཅན་ཐམས་ཅད་ཀྱི་ཉོན་མོངས་པའི་ནད་རྣམས་འཇིལ་བ་ལ་སྐྱོ་ཞིང་སྒྱིད་ལུག་པ་མེད་པའི་སེམས་ཀྱིས་སེམས་ཅན་ཐམས་ཅད་ཀྱི་རྟེན་དང ། གནས་སུ་འགྱུར་ཞིང་ཉེ་བར་འཚོ་བ་ཡིན་ནོ། །རིགས་ཀྱི་བུ་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ནི་གར་འགྲོ་ཡང་རིན་པོ་ཆེའི་འཁོར་ལོ་ཐོག་མར་འགྲོ་སྟེ། རིན་པོ་ཆེ་གཞན་དེའི་ཕྱི་བཞིན་འབྲང་ངོ ། །གླིང་བཞི་ཀུན་དུ་རྒྱུ་ཞིང་སེམས་ཅན་ཐམས་ཅད་ཀྱི་ལུས་དང་སེམས་ཀྱི་རྙོག་པ་ཐམས་ཅད་ཀྱང་བསལ་ཏེ། སེམས་ཅན་ཐམས་ཅད་ཀྱི་ལུས་དང་སེམས་ཀྱི་བདེ་བ་ཡང་སྐྱེ་ཞིང་འཕེལ་བར་བྱེད་དོ། །བྱང་ཆུབ་སེམས 60.220a དཔའ་སེམས་དཔའ་ཆེན་པོ་ཡང་དེ་བཞིན་དུ་འཁོར་ལོ་བཅུ་པོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པ་ནས། སེམས་ཅན་ཐམས་ཅད་ཀྱི་རྟེན་དང་གནས་སུ་འགྱུར་ཞིང་ཉེ་བར་འཚོ་བའི་བར་དུ་འཐོབ་པར་འགྱུར་རོ། །རིགས་ཀྱི་བུ་འདི་ལྟ་སྟེ། ཤིང་རྟ་ཆེན་པོ་ནི་འཁོར་ལོ་བཞི་དང་ལྡན་ཏེ། མི་མང་པོ་དེའི་ནང་དུ་འདུག་ནས་ལམ་ཆེན་པོར་འགྲོའོ། །ལམ་དེ་ནི་བོང་བ་འམ། གྱོ་མོ་འམ། གསེག་མ་འམ། རྩ་འམ། ཤིང་ངམ། ལོ་མ་འམ། ཡལ་ག་འམ། མེ་ཏོག་གམ། འབྲས་བུ་ཇི་སྙེད་ཡོད་པ་ཐམས་ཅད་ཤིང་རྟའི་འཁོར་ལོ་དེའི་འོག་ཏུ་སོང་ནས་ཐམས་ཅད་ཆག་ཅིང་གྲུགས་ཏེ་ནོར་དུ་མི་རུང་བར་བྱེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་བཅུ་དང་ལྡན་ན་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་ཐམས་ཅད་ཡོངས་སུ་བཅོམ་སྟེ། རྣམ་པར་སྨིན་པ་མི་ལེན་པར་བྱེད་དོ། །རིགས་ཀྱི་བུ་འདི་ལྟ་སྟེ། འཁོར་ལོ་རྣོན་པོ་ནི་ཐང་ཅིག་འཕངས་པས་ཕས་རྒོལ་བའི་དགྲའི་མགོ་དང ། ཡན་ལག་བཅད་དེ། དེ་སྤྱོད་པའི་མཐུ་མེད་པར་བྱེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་བཅུ་པོ་འདི་དང་ལྡན་ན་རྒྱུད་ལྔར་འཁོར་བའི་སྡུག་བསྔལ་ཆེན་པོ་ཐམས་ཅད་འཇོམ་པ་དང ། ཉོན་མོངས་པ་དང་སྡིག་པའི་ལས་ཐམས་ཅད་ཡོངས་སུ་གཅད་དེ། རྣམ་པར་སྨིན་པ་ལེན་པར་མི་བྱེད་དོ། །རིགས་ཀྱི་བུ་འདི་ལྟ་སྟེ། མེའི་བསྐལ་པ་བྱུང་བའི་ཚེ་ཉི་མ་ལྔ་གཅིག་ཅར་ཤར་ནས་གླིང་བཞིའི་ཀླུང་དང ། མཚོ་དང ། ཆུ་བོ་དང ། ཆུའི་ཁམས་སུ་གཏོགས་པ་གཤེར་བ་ཐམས་ཅད་གང་ཡང་མི་སྐེམས་པ་མེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་བཅུ་པོ་འདི་དང་ལྡན་ན་རྒྱུ་བཞི་དང ། ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། སྡུག་བསྔལ་གྱི་རྩ་བར་སྨིན་པ་ཐམས་ཅད་ཡོངས་སུ་སྐེམས་པར་བྱེད་དོ། །རིགས་ཀྱི་བུ་འདི་ལྟ་སྟེ། རླུང་གི་བསྐལ་པ་བྱུང་བའི་ཚེ་ཕྱོགས་བཞི 60.220b ནས་རླུང་ཆེན་པོ་དུས་གཅིག་ཏུ་ལངས་པས་འཇིག་རྟེན་གྱི་ཁམས་ཐམས་ཅད་ནི་རི་བོ་ཆེ་ཆུང་དང ། ས་ཆེན་པོ་རྣམས་ཐམས་ཅད་འཇིག་ཅིང་འཐོར་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ན་འཇིག་རྟེན་གྱི་ཕྱིན་ཅི་ལོག་བཞི་དང ། ང་རྒྱལ་གྱི་རི་བོ་ཐམས་ཅད་མི་ཤིགས་པ་གང་ཡང་མེད་པ་དང ། སེམས་ཅན་ཐམས་ཅད་ཀྱི་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང་ཆོས་ཀྱི་སྒྲིབ་པ་དང ། སྡུག་བསྔལ་གྱི་རྣམ་པར་སྨིན་པའི་རྩ་བ་ཐམས་ཅད་ཀྱང་འཇིག་ཅིང་འཐོར་བར་འགྱུར་རོ། །རིགས་ཀྱི་བུ་འདི་ལྟ་སྟེ། སེང་གེའི་རྒྱལ་པོ་རལ་པ་ཅན་གྱི་སྐད་ཐང་ཅིག་ཕྱུང་བས་གཅན་ཟན་ཐམས་ཅད་དང ། འཕུར་བ་དང ། འགྲོ་བ་ཐམས་ཅད་སྐྲག་ཅིང་འགུལ་མི་ནུས་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་པའི་ཆོས་ཀྱི་སྒྲ་ཐང་ཅིག་བསྒྲགས་པས་མུ་སྟེགས་ཅན་དང ། ལོག་པར་སྟོན་པའི་སྡིག་པའི་གྲོགས་སུ་གྱུར་པ་ཐམས་ཅད་འཇིགས་སྐྲག་ནས་སྨྲ་བའི་ཚིག་འཁྲུལ་ཞིང་འདྲི་བ་དང་རྒོལ་མི་ནུས་པར་འགྱུར་རོ། །རིགས་ཀྱི་བུ་འདི་ལྟ་སྟེ། བརྒྱ་བྱིན་ལྷ་ཡི་དབང་པོ་ལྷ་མ་ཡིན་དང་འཐབ་པའི་ཚེ་ལྷའི་དམག་གིས་བསྐོར་ཅིང་ལག་ན་རྡོ་རྗེ་ཐོགས་ཏེ་གཡུལ་དུ་ཞུགས་ན་ལྷ་མ་ཡིན་ཐམས་ཅད་སྐྲག་པས་ལྡོག་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ན་ལོག་པར་ལྟ་བའི་མུ་སྟེགས་ཅན་ཐམས་ཅད་དང ། ལོག་པར་སྟོན་པའི་སྡིག་པའི་གྲོགས་པོ་ཐམས་ཅད་སྐྲག་ནས་འབྲོས་པར་འགྱུར་རོ། །རིགས་ཀྱི་བུ་འདི་ལྟ་སྟེ། ཡིད་བཞིན་གྱི་ནོར་བུ་རིན་པོ་ཆེ་རྒྱལ་མཚན་གྱི་རྩེ་མོ་ལ་བཏགས་ན་རིན་པོ་ཆེ་རྣམ་པ་སྣ་ཚོགས་ཆར་བཞིན་དུ་འབབ་སྟེ། དབུལ་ཕོངས་པའི་སེམས་ཅན་ཐམས་ཅད་ལ་སྦྱིན་པ་བྱེད་དོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ 60.221a ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ཏེ། རྣམ་པར་དག་པའི་ཚུལ་ཁྲིམས་ཀྱི་རྒྱལ་མཚན་ལ་གནས་ན་ཆོས་ཆེན་པོའི་ཆར་རབ་ཏུ་འབེབས་པས་སེམས་ཅན་ཚད་མེད་པ་སྙེད་ཐམས་ཅད་ལ་སྦྱིན་པ་བྱེད་པར་འགྱུར་རོ། །རིགས་ཀྱི་བུ་འདི་ལྟ་སྟེ། མཚན་མོའི་དུས་སུ་འཇིག་རྟེན་ཀུན་མུན་པར་གྱུར་བས་འཐོམ་ཞིང་འབྲོག་བསླད་པ་ན་ཟླ་བ་ཉ་བ་ཤར་བས་མུན་པ་ཐམས་ཅད་བསལ་ཏེ། འབྲོག་བསླད་པ་རྣམས་ཀྱི་ལམ་མཚོན་པར་འགྱུར་བ་དེ་བཞིན་དུ། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ན་སེམས་ཅན་གང་མ་རིག་པའི་མུན་པས་ལྡོངས་ཏེ་འཕགས་པའི་ལམ་ཡན་ལག་བརྒྱད་སྟོར་བ་རྣམས་ལ་བྱང་ཆུབ་སེམས་དཔའ་དམ་པའི་ཆོས་བཤད་དེ། མ་རིག་པའི་མུན་པ་ཐམས་ཅད་བསལ་ནས། ཆོས་ཀྱི་སྣང་བ་སྐྱེས་པའི་ཕྱིར་འཕགས་པའི་ལམ་ཡན་ལག་བརྒྱད་པ་མངོན་དུ་གྱུར་ཏེ། ཟག་པ་ཐམས་ཅད་བཅད་ནས་སྡུག་བསྔལ་གྱི་མཐའ་ཟད་པར་བྱེད་དོ། །རིགས་ཀྱི་བུ་འདི་ལྟ་སྟེ། ཉི་མའི་དཀྱིལ་འཁོར་ཆེན་པོ་འཇིག་རྟེན་དུ་ཤར་བ་ན་ལོ་ཏོག་ཐམས་ཅད་སྐྱེ་ཞིང་འཕེལ་ཏེ། མེ་ཏོག་དང ། ལོ་ཐོག་དང ། ལོ་མ་ཐམས་ཅད་རྒྱས་པ་དང ། མནམ་ཤིང་བཙོག་པ་ཐམས་ཅད་སེལ་བ་དང ། ལོ་ཐོག་གི་འབྲུ་དང ། སྨན་གྱི་འབྲས་བུ་ཐམས་ཅད་སྨིན་པ་དང ། གངས་ཀྱི་རི་བོ་ཀུན་ཞུ་བས་འབབ་ཆུ་ཀུན་བྲུག་སྟེ། རིམ་གྱིས་རྒྱ་མཚོ་ཆེན་པོར་འབབ་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འཁོར་ལོ་རྣམ་པ་འདི་བཅུ་དང་ལྡན་ཏེ། ལྷག་པའི་སྦྱིན་པ་ལ་གནས་ཤིང ། དུལ་བའི་ཚུལ་ཁྲིམས་དང ། བདེ་བའི་བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཐབས་དང ། བྱམས་པ་དང ། སྙིང་རྗེ་དང ། སྤོབས་པའི་ཡོན་ཏན་ཤིན་དུ་རྒྱས་ཤིང་སེམས་ཅན་ཐམས་ཅད་ལ་དམ་པའི་ཆོས་སྟོན་ཏོ། །ཆོས་དེའི་འོད་ཀྱི་གཟི་བརྗིད་ཀྱིས་སེམས་ཅན་ཐམས་ཅད་ཀྱི་དགེ 60.221b བའི་རྩ་བ་ལྷག་པའི་ལོ་ཏོག་རྣམ་པ་སྣ་ཚོགས་སྐྱེ་ཞིང་འཕེལ་བ་དང ། ལྷག་པའི་སྤྱོད་པ་དམ་པའི་མེ་ཏོག་དང ། ལོ་མ་རྣམ་པ་སྣ་ཚོགས་ཤིན་དུ་རྒྱས་པ་དང ། ཉོན་མོངས་པའི་ལས་ངན་པ་ཐམས་ཅད་ཡོངས་སུ་སེལ་བ་དང ། མཐོ་རིས་དང ། མྱ་ངན་ལས་འདའ་བའི་འབྲས་བུ་ཡོངས་སུ་སྨིན་པར་འགྱུར་བ་དང ། ལོག་པར་ལྟ་བ་དང ། ང་རྒྱལ་གྱི་རི་བོ་ཐམས་ཅད་ཞུ་ཞིང་འབབ་པས་ཡང་དག་པའི་དང་བ་དང ། ཚུལ་ཁྲིམས་དང ། ཐོས་པ་དང ། གཏོང་བ་དང ། ཤེས་རབ་དང ། ཏིང་ངེ་འཛིན་གྱི་ཆུ་རིམ་གྱིས་འབབ་ཅིང་མྱ་ངན་ལས་འདའ་བའི་རྒྱ་མཚོ་འགེངས་པ་དང ། སེམས་ཅན་ཐམས་ཅད་ཡིད་བཞིན་དུ་འཇིགས་པ་མེད་པ་མྱ་ངན་ལས་འདའ་བའི་གྲོང་ཁྱེར་དུ་འཇུག་པར་འགྱུར་རོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་ལོ་བཅུ་པོ་གང་ཞེ་ན། རིགས་ཀྱི་བུ་འཁོར་ལོ་བཅུ་ཞེས་བྱ་བ་ནི་ཆོས་གཞན་ལ་མི་གདགས་ཀྱི། དགེ་བ་བཅུའི་ལས་ཀྱི་ལམ་ཉིད་ཡིན་པར་ཤེས་པར་བྱའོ། །འཁོར་ལོ་རྣམ་པ་བཅུ་པོ་འདི་དག་དང་ལྡན་པས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་སྟེ། སྡིག་པ་ཐམས་ཅད་ལས་རྣམ་པར་གྲོལ་བ་དང ། དགེ་བའི་ཆོས་ཐམས་ཅད་ཡིད་བཞིན་དུ་རྫོགས་པ་དང ། མྱུར་དུ་མྱ་ངན་ལས་འདའ་བ་ཆེན་པོའི་རྒྱ་མཚོ་ཡོངས་སུ་འགེངས་པ་དང ། ཐབས་མཁས་པ་ཆེན་པོའི་ཡེ་ཤེས་ཀྱི་འོད་ཀྱིས་སྐྱེ་བོ་ཐམས་ཅད་ཡོངས་སུ་སྨིན་པར་བྱེད་ཅིང་ཐམས་ཅད་ལ་ཕན་པ་དང ། བདེ་བ་ཡོངས་སུ་ཐོབ་པར་བྱེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་སྔ་མ་འདས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་མི་དགེ་བ་བཅུའི་ལས་ཀྱི་ལམ་ཡོངས་སུ་སྤངས་ཏེ། དགེ་བ་བཅུའི་ལས་ཀྱི་ལམ་འདི་ལ་ཡོངས་སུ་བསྔགས་པས་འབྲས་བུ་ཐོབ་པར་གྱུར་ཏོ། །དེ་བས་ན་གང་གིས་དགེ་བ་བཅུའི་ལས་ཀྱི་ལམ་བཤད་པ་འདི་དག་ལས། འགའ་ཞིག་ནམ་འཚོའི་བར་དུ་མ་ཉམས་པར་སྲུང་ན་འབྲས་བུ་ཁྱད་པར་ཅན་མཆོག་ཏུ་འགྱུར་བ 60.222a ཐམས་ཅད་ཐོབ་པ་ནི་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་སྲོག་གཅོད་པ་ཡོངས་སུ་སྤངས་ན་དེ་ཉིད་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་ཡིན་ཏེ། སེམས་ཅན་དག་ལ་འཇིགས་ཤིང་བག་ཚ་བར་མི་བྱེད་པས་དེའི་འཇིགས་པའི་སྡུག་བསྔལ་མི་སྐྱེད་པའི་དབང་གིས་དགེ་བའི་རྩ་བ་ཐམས་ཅད་མྱུར་དུ་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བའི་རྒྱ་མཚོར་བྱིང་བ། སྲོག་གཅོད་པའི་དབང་གིས་ལུས་དང ། ངག་དང ། ཡིད་ཀྱིས་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཇུག་ཅིང་མཐོང་བ་དང ། ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། ཚེའི་སྒྲིབ་པས་བསྒྲིབས་པར་གྱུར་ཏོ། །འདི་ལྟར་སྲོག་གཅོད་པ་ཡོངས་སུ་སྤངས་པའི་འཁོར་ལོས་དེ་དག་ལྷག་མ་མ་ལུས་པར་ཡོངས་སུ་བཅོམ་ཞིང་བརྙིལ་བས་རྣམ་པར་སྨིན་པའི་འབྲས་བུ་མི་མྱོང་བར་བྱེད་དོ། །ལུས་འདི་ཉིད་ལ་ཡང་ལྷ་དང ། མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང ། དོགས་པ་མི་སྐྱེ་བ་དང ། ལུས་དང་སེམས་རབ་ཏུ་བདེ་ཞིང་ཡུན་རིང་དུ་འཚོ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང ། ཆུང་མ་དང ། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་ཀྱི་ཤིན་དུ་འཇིགས་པ་གཤིན་རྗེའི་ཕོ་ཉ་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང ། དེ་ལ་བཀུར་སྟི་དང་བཅས་པས་ཤིན་དུ་དད་པ་སྐྱེ་བར་འགྱུར་རོ། །ཡང་ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་སྟེ། 60.222b དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་ནད་མེད་པ་དང ། ཚེ་རིང་བ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང ། སྲོག་གཅོད་པ་ཡོངས་སུ་སྤོང་བ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྦྱོར་བ་ཐམས་ཅད་ལ་རིམ་གྱིས་གཞོལ་ཞིང་ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་ཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་མཚོན་ཆ་མེད་པ་དང ། དགྲ་དང་འཚེ་བའི་མིང་མི་གྲག་པ་དང ། འཇིགས་པ་ཐམས་ཅད་དང་བྲལ་ཏེ་རབ་ཏུ་བདེ་སྐྱིད་པ་དང ། ནད་མེད་པ་དང ། ཚེ་རིང་བའི་ཞིང་དུ་སེམས་ཅན་དག་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ་སེམས་ཅན་དག་ཅིས་འདུལ་བའི་བཞིན་དུ་དད་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་པ་ཡོངས་སུ་སྤངས་པའི་འཁོར་ལོ་སྟེ་དང་པོའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་དེ་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི 60.223a གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང ། ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་འགྲོ་བ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་ཐོབ་པ་ཡང་ཇི་ལྟར་རྒྱས་པར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་མ་བྱིན་པར་ལེན་པ་ཡོངས་སུ་སྤངས་ན་དེ་ཉིད་སེམས་ཅན་ཐམས་ཅད་ལ་མི་འཇིགས་པའི་སྦྱིན་པ་ཡིན་ཏེ། ཡོངས་སུ་གདུང་བ་མེད་པ་དང ། འཚེ་བ་མེད་པ་དང ། བདག་ཉིད་ཚུལ་བཞིན་དུ་རྙེད་པའི་ནོར་གྱིས་ཆོག་ཤེས་པར་གནས་ཀྱིས། ཆོས་མ་ཡིན་པའི་ནོར་དང་ཁེ་ལ་རེ་བ་མེད་པ་དེའི་དབང་གིས་དགེ་བའི་རྩ་བ་ཐམས་ཅད་ཀྱང་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་ཞིང་འཁོར་བའི་རྒྱ་མཚོར་བྱིང་བར་འགྱུར་བ་ཡང་མ་བྱིན་པར་ལེན་པའི་དབང་གིས་ལུས་དང ། ངག་དང ། ཡིད་མི་དགེ་བའི་ལམ་རྣམས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང 60.223b མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། རིན་པོ་ཆེ་དང་ནོར་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་མ་བྱིན་པར་ལེན་པ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་མྱོང་སྟེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བས་དོགས་པ་མི་སྐྱེ་བ་དང ། ལུས་དང་སེམས་རབ་ཏུ་བདེ་བ་དང ། ནོར་རིན་པོ་ཆེ་ཐམས་ཅད་དང་ལྡན་པར་འགྱུར་རོ། །ནམ་འཆི་འཕོ་བའི་དུས་བྱེད་པ་ན་ཡང་ལུས་དང་སེམས་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང་ཆུང་མ་དང ། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་ཀྱི། ཤིན་དུ་འཇིགས་པ་གཤིན་རྗེའི་ཕོ་ཉ་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་གྱི་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང་དེ་ལ་བཀུར་སྟི་དང་བཅས་པས་དང་བ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་སྟེ། དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་ལོངས་སྤྱོད་ཆེན་པོ་དང་ལྡན་ཞིང་བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། འཇིགས་པ་ལྔ་དང་ནོར་ཐུན་མོང་དུ་མི་འགྱུར་རོ། །ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་དང་ཡོན་ཏན་དང་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་ཅིང་མ་བྱིན་པར་ལེན་པ་ཡོངས་སུ་སྤོང་བ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས 60.224a དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་བ་དང ། ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་ཀྱི་བར་དུ་འཐོབ་པར་འགྱུར་རོ། །ཡང་སངས་རྒྱས་ཀྱི་ཞིང་རིན་པོ་ཆེ་རྣམ་པ་སྣ་ཚོགས་ཀྱིས་བརྒྱན་པ་དང ། རིན་པོ་ཆེའི་ཤིང་དང ། རིན་པོ་ཆེའི་རྫིང་དང ། རིན་པོ་ཆེའི་གཞལ་མེད་ཁང་ལ་སོགས་པས་ཡོངས་སུ་གང་བ་དང ། བདག་དང་བདག་གིར་འཛིན་པ་དང་བྲལ་བ་རྒྱན་ཐམས་ཅད་ཀྱིས་བཀོད་པ་དང་ལྡན་པའི་ཞིང་དེར་སེམས་ཅན་དག་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ་སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོས་མ་བྱིན་པར་ལེན་པ་ཡོངས་སུ་སྤངས་པའི་འཁོར་ལོ་གཉིས་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར་རོ། །ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ 60.224b ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་ཐོབ་པ་དག་ཀྱང་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོ་བའི་བར་དུ་འདོད་པས་ལོག་པར་གཡེམ་པ་ཡོངས་སུ་སྤངས་ན། དེ་ཉིད་སེམས་ཅན་ཐམས་ཅད་འདོད་པའི་རླུང་གིས་གཡེངས་པ་ལས་འཇིགས་པ་མེད་པ། ཕྲག་དོག་མེད་པ། འཚེ་བ་མེད་པ། ཡོངས་སུ་གདུང་བ་མེད་པ། འཁྲུག་པ་མེད་པའི་སྦྱིན་པ་ཡིན་ཏེ། བདག་གི་ཆུང་མས་ཆོག་ཤེས་ཤིང་གཞན་གྱི་ཆུང་མ་ལ་རེ་བ་མེད་པས་དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་འདོད་པས་ལོག་པར་གཡེམ་པའི་དབང་གིས་ལུས་དང་ངག་དང ། ཡིད་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཇུག་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། ཆུང་མའི་སྒྲིབ་པས་བསྒྲིབས་པར་གྱུར་ཏོ། །འདི་ལྟར་འདོད་པས་ལོག་པར་གཡེམ་པ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་བཅོམ་པས་རྣམ་པར་སྨིན་པའི་འབྲས་བུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བས་དོགས་པ་མི་སྐྱེ་བ 60.225a དང ། ལུས་དང་སེམས་རབ་ཏུ་བདེ་བ་དང ། ཆུང་མ་ལྷོད་པ་དང་བཅས་པ་མ་ཡིན་པར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུངས་ཤིང་ཡིད་དུ་འོང་བའི་བུ་དང ། ཆུང་མ་དང ། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་དུ་འཇིགས་པའི་གཤིན་རྗེའི་ཕོ་ཉ་ནི་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང ། དེ་ལ་བཀུར་སྟི་དང་བཅས་པས་དེ་ལ་ཤིན་དུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེས་ཏེ། དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་འཁོར་ཕུན་སུམ་ཚོགས་པ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཕྱིར་ཡང་ཤིན་དུ་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་ཅིང་འདོད་པས་ལོག་པར་གཡེམ་པ་ཡོངས་སུ་སྤོང་བ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་སྤོང་བ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་ཞིང་ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་བུད་མེད་མེད་པ་དང ། འདོད་ཆགས་དང་གཡེམ་པ་མེད་པ། ཚངས་པར་སྤྱོད་པ་མཆོག་དང་ལྡན་པའི་སེམས་ཅན་དག་ཞིང་དེར་སྐྱེ་སྟེ། དེ་དག་ཐམས་ཅད་ཀྱང་རྫུས་ཏེ་སྐྱེའི་མི་གཙང་བའི་མངལ་ནས་སྐྱེ་བ་ནི་མ་ཡིན་ནོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། 60.225b སེམས་ཅན་དག་ལ་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང ། སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འདོད་པས་ལོག་པར་གཡེམ་པ་ཡོངས་སུ་སྤངས་པའི་འཁོར་ལོ་གསུམ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཞིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་འཐུན་པར་འགྱུར་བ་དང ། རྟག་ཏུ་སངས་རྒྱས་མཐོང་བ་དང་མི་འབྲལ་ཞིང ། བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས 60.226a ཀྱིས་སེམས་མི་ངོམས་པ་དང ། འབྲས་བུ་གཞན་དག་ཐོབ་པ་ཡང་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་བརྫུན་དུ་སྨྲ་བ་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་རྟག་ཏུ་བཀུར་བ་དང ། ཚིག་བཙུགས་པ་ཚད་མར་འགྱུར་བ་དང ། ཚིག་ཀུན་ཉན་ཅིང་གུས་པ་དང་དོགས་པ་མི་སྐྱེ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་བརྫུན་དུ་སྨྲ་བའི་དབང་གིས་ལུས་དང ། ངག་དང ། ཡིད་ཀྱིས་སྡིག་པ་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། ཚིག་བཙུགས་པ་ལས་སྒྲིབ་པས་བསྒྲིབས་པར་འགྱུར་རོ། །འདི་ལྟར་བརྫུན་དུ་སྨྲ་བ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་ལེན་པར་འགྱུར་རོ། །ལུས་འདི་ཉིད་ལ་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང ། དོགས་པ་མི་སྐྱེ་བ་དང ། ལུས་དང་སེམས་རབ་ཏུ་བདེ་བ་དང ། ཚིག་ཏུ་སྨྲ་བ་ཐམས་ཅད་ལ་གཞན་ཡིད་ཆེས་ཤིང་ཉན་པར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ཀྱི་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང ། ཆུང་མ་དང ། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་ཀྱི་ཤིན་དུ་འཇིགས་པའི་གཤིན་རྗེའི་ཕོ་ཉ་ནི་མཐོང་བར་མི་འགྱུར་རོ། །གཞན་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང ། དེ་ལ་བཀུར་སྟི་དང་བཅས་པས་ཤིན་དུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ལུས་སུ་སྐྱེ་ཞིང་དབང 60.226b པོ་ཡོངས་སུ་རྫོགས་པ་ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་ཚིག་བཙུགས་པ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང ། བརྫུན་དུ་སྨྲ་བ་ཡོངས་སུ་སྤངས་པ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ། དགེ་བའི་ཆོས་ཁྱད་པར་ཅན་ཐམས་ཅད་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་བ་དང ། ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་ཐམས་ཅད་བདེན་པར་སྨྲ་བ། སྒྱུ་དང་བྲལ་བ། ལྷའི་གསུང་གིས་ཡོངས་སུ་བརྒྱན་པ་དང ། སླུ་བ་མེད་ཅིང་སེམས་ཀྱི་སྤྱོད་པ་དྲང་བ་དང ། ཡང་དག་པའི་སྤྱད་པ་རྣམ་པར་དཀར་བའི་ཆོས་འབའ་ཤིག་ལ་སྤྱོད་པ། ལྷའི་གོས་བསུང་ཅན་གྱོན་པ། རིན་པོ་ཆེའི་རྒྱན་གྱིས་བཀོད་པའི་སེམས་ཅན་དག་ཞིང་དེར་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་བརྫུན་དུ་སྨྲ་བ་ཡོངས་སུ་སྤངས་པའི་འཁོར་ལོ་བཞི་པའོ། །བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན 60.227a པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བར་བྱེད་པ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པར་འགྱུར་བ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་འཕེལ་ཞིང་སྐྱེ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང ། རྟག་ཏུ་སངས་རྒྱས་མཐོང་བ་དང་མི་འབྲལ་བ་དང ། བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་ཞིང་དགེ་བའི་རྩ་བ་ཐམས་ཅད་ཤིན་དུ་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་འཐོབ་པ་ཡང་ཇི་ལྟར་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཕྲ་མ་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་རྟག་ཏུ་བཀུར་ཞིང་བླ་མར་བྱེད་པ་དང ། ཚིག་ཏུ་སྨྲ་བ་ཐམས་ཅད་གཞན་གྱིས་མཉན་པ་དང ། འདུམ་པ་དང ། དོགས་པ་མི་སྐྱེ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ཕྲ་མ་བྱས་པའི་དབང་གིས་ལུས་དང ། ངག་དང ། ཡིད་ཀྱིས་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། 60.227b ཆོས་ཀྱི་སྒྲིབ་པ་དང ། འདུམ་པ་ལ་སྒྲིབ་པས་བསྒྲིབས་པར་འགྱུར་རོ། །འདི་ལྟར་ཕྲ་མའི་ཚིག་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་ལན་པར་བྱེད་དོ། །ལུས་འདི་ཉིད་ལ་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང ། དོགས་པ་མི་སྐྱེ་བ་དང ། ལུས་དང་སེམས་རབ་ཏུ་བདེ་བ་དང ། ཚིག་ཏུ་སྨྲ་བ་ཐམས་ཅད་ལ་ཉན་ཅིང་འདུམ་པར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང ། ཆུང་མ་དང ། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་དུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ། ལུས་དང་སེམས་རབ་ཏུ་དགའ་བ་དང་བཀུར་སྟི་དང་བཅས་པས་ཤིན་དུ་དད་པ་སྐྱེ་བར་འགྱུར། ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་སྟེ། དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་སྨྲ་བའི་ཚིག་འཇམ་ཞིང་འདུམ་པ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང ། ཕྲ་མའི་ཚིག་དང་ཡོངས་སུ་བྲལ་བས་སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་ཞིང་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་ཐོབ་པའི་བར་དུ་འགྱུར་རོ། ། 60.228a སངས་རྒྱས་ཀྱི་ཞིང་ཤིན་དུ་བརྟན་པ་སྲ་བ་མི་ཤིགས་པ་དང ། ་ལྷ་རྫས་བཟང་པོས་ཡོངས་སུ་བརྒྱན་པར་འགྱུར་བ་དང ། འཐུན་པ་དང ། མི་རྩོད་པ་ཤིན་དུ་དུལ་ཞིང་འདུམ་པ་དགེ་བའི་ཆོས་ཚོལ་བའི་སེམས་ཅན་དག་ཞིང་དེར་སྐྱེ་བར་འགྱུར་རོ། །རྟག་ཏུ་འདུམ་ཞིང་གུས་པས་དམ་པའི་ཆོས་ཉན་པ་དང ། དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དོ། །སེམས་ཅན་དག་ཅི་དང་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཕྲ་མ་ཡོངས་སུ་སྤངས་པའི་འཁོར་ལོ་ལྔ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཞིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འགྲོ་བ་དང ། རྟག་ཏུ་སངས་རྒྱས་མཐོང་བ་དང་མི 60.228b འབྲལ་ཞིང་བྱང་ཆུབ་སེམས་དཔའ་དང་ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང ། སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་ཐོབ་པ་ཡང་ཇི་སྐད་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཞེ་གཅོད་པའི་ཚིག་ཐམས་ཅད་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང ། ཚིག་ཏུ་སྨྲ་བ་ཀུན་ལ་ཕ་རོལ་པོ་ཀུན་དགའ་ཞིང་ཉན་པས་དོགས་པ་མེད་པར་འགྱུར་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ཞེ་གཅོད་པའི་ཚིག་གི་དབང་གིས་ལུས་དང ། ངག་དང ། ཡིད་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། ཤིན་དུ་དུལ་བ་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་ཞེ་གཅོད་པའི་ཚིག་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པའི་དབང་གིས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་བས་དོགས་པ་མི་སྐྱེ་བ་དང ། ལུས་དང་སེམས་རབ་ཏུ་བདེ་བ་དང ། ཚིག་ཏུ་སྨྲ་བ་ཐམས་ཅད་ཕ་རོལ་གྱི་ཡིད་དུ་འོང་བ་དང་སྙན་པར་འགྱུར་རོ། །ནམ་འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཉོན་མི་མོངས་པ་དང ། ཡིད་དུ་འོང་བའི་བུ་དང་ཆུང་མ་དང་འཁོར་ཐམས 60.229a ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི་ཤིན་དུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང ། དེ་ལ་བཀུར་སྟི་དང་བཅས་པས་ཤིན་དུ་དད་པ་སྐྱེ་བར་འགྱུར་རོ། །ཚེ་འཕོས་ཀྱང་ཕྱིར་མིའི་ནང་དུ་སྐྱེས་ན་ཡང་དབང་པོ་ཡོངས་སུ་རྫོགས་ཤིང་ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་ཚིག་འཇམ་པོར་སྨྲ་བ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང ། ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་དེའི་རྗེས་སུ་སློབ་པ་དང ། ཞེ་གཅོད་པའི་ཚིག་ཡོངས་སུ་སྤོང་བ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་རིམ་གྱིས་གཞོལ་ཞིང་ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་ཀྱི་བར་དུ་འཐོབ་པ་དང ། སངས་རྒྱས་ཀྱི་ཞིང་ན་ཡིད་དུ་མི་འོང་བའི་སྒྲ་ཐམས་ཅད་དང་བྲལ་ཏེ། ཡིད་དུ་འོང་བའི་སྒྲ་དབྱངས་སྙན་པ་རྣམ་པ་སྣ་ཚོགས་དང ། ཆོས་ཀྱི་སྒྲས་ཞིང་དེ་ཡོངས་སུ་གང་བ་དང ། དྲན་པ་དང་བློ་གྲོས་སུ་ལྡན་པ། ཚངས་པའི་དབྱངས་ཅན། ཤིན་དུ་དུལ་བའི་སེམས་ཅན་དག་ཞིང་དེར་སྐྱེ་བ་དང ། རྟག་ཏུ་ཚིག་འཇམ་པོས་གཅིག་ལ་གཅིག་སྐུལ་བར་བྱེད་དོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་ཆོས་སྟོན་པ་དང ། ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན 60.229b རིང་དུ་གནས་ཞིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེ་གཅོད་པའི་ཚིག་ཡོངས་སུ་སྤོང་བའི་འཁོར་ལོ་དྲུག་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་པས་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ།། དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་འགྲོ་བར་འགྱུར་བ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང ། བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་དག་ཐོབ་པ་ཡང་ཇི 60.230a སྐད་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཚིག་ཀྱལ་པ་ཡོངས་སུ་སྤངས་པས་སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང ། ཚིག་ཏུ་སྨྲ་བ་ཐམས་ཅད་དོན་དུ་འགྱུར་ཞིང་ཚིག་ཐོས་པ་རྣམས་ཉན་ཅིང་གུས་པས་དོགས་པ་མེད་པར་འགྱུར་རོ། །དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་བྱིང་བ་ཡང་ཚིག་ཀྱལ་པ་སྨྲ་བའི་དབང་གིས་ལུས་དང ། ངག་དང ། ཡིད་མི་དགེ་བའི་ལས་བདག་ཀྱང་བྱེད་ལ། གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། དོན་དུ་སྨྲ་བ་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་ཚིག་ཀྱལ་པ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་མི་ལེན་པར་བྱེད་དོ། །ལུས་འདི་ཉིད་ལ་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བས་དོགས་པ་མེད་པར་འགྱུར་བ་དང ། ལུས་དང་སེམས་རབ་ཏུ་བདེ་བ་དང ། ཚིག་ཏུ་སྨྲ་བ་ཐམས་ཅད་དོན་དུ་འགྱུར་བ་དང ། འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང ། ཆུང་མ་དང ། འཁོར་གྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི་ཤིན་དུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང ། དེ་ལ་བཀུར་སྟི་དང་བཅས་ཤིང་ཤིན་དུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ 60.230b ཡོངས་སུ་རྫོགས་པ་ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་ཕན་པ་དང ། དོན་དུ་འགྱུར་བའི་ཚིག་སྨྲ་བ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ། དེའི་རྗེས་སུ་སློབ་པ་དང ། ཚིག་ཀྱལ་པར་སྨྲ་བ་ཡོངས་སུ་སྤོང་བ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་ཞིང་ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་དོན་མེད་པའི་ཚིག་ཐམས་ཅད་དང་བྲལ་ཏེ། བྱང་ཆུབ་སེམས་དཔའི་སྡེ་སྣོད་དུ་གཏོགས་པའི་ཆོས་ཆེན་པོའི་སྒྲ་མཆོག་དམ་པ་རྣམ་པ་མང་པོས་ཞིང་དེ་ཡོངས་སུ་ཁྱབ་པ་དང ། དཔག་ཏུ་མེད་པའི་སྨོན་ལམ་དང ། ཡེ་ཤེས་དམ་པ་ཕུན་སུམ་ཚོགས་པས་ཆོས་ཀྱི་དོན་རྣམ་པ་སྣ་ཚོགས་འཆད་པ་ལ་མཁས་པའི་སེམས་ཅན་དེ་ལྟ་བུ་དག་ཞིང་དེར་སྐྱེ་བར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་ཀྱལ་པ་ཡོངས་སུ་སྤངས་པའི་འཁོར་ལོ་བདུན་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་པས་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི 60.231a གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ་ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉན་དང་ཕྲད་ཅིང་དེའི་རྗེས་སུ་འགྲོ་བ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང་ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་ཐོབ་པ་ཡང་ཇི་སྐད་བཤད་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ཆགས་སེམས་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་བཀུར་ཞིང་བཙུན་པར་བྱེད་པ་དང ། སེམས་རྣམ་པར་དག་ཅིང་རྙོག་པ་དང་བྲལ་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས 60.231b པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ཆགས་སེམས་ཀྱི་དབང་གིས་ལུས་དང ། ངག་དང ། ཡིད་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། འདོད་སེམས་མེད་པ་ལ་སྒྲིབ་པས་བསྒྲིབས་པར་འགྱུར་རོ། །འདོད་སེམས་ཡོངས་སུ་སྤོང་བའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང ། དོགས་པ་མེད་པར་འགྱུར་བ་དང ། ལུས་དང་སེམས་རབ་ཏུ་བདེ་བ་དང ། སེམས་རྣམ་པར་དག་ཅིང་རྙོག་པ་དང་བྲལ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་བ་དང ། ཡིད་དུ་འོང་བའི་བུ་དང ། ཆུང་མ་དང ། འཁོར་གྱིས་ཡོངས་སུ་བསྐོར་བས་འཆི་བའི་དུས་བྱད་པར་འགྱུར་གྱི། ཤིན་དུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང ། དེ་ལ་བཀུར་སྟི་དང་བཅས་པས་ཤིན་དུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ་ཡོངས་སུ་རྫོགས་པ། ཡན་ལག་དང་ལྡན་པ། གང་ནས་གང་དུ་སྐྱེས་པར་སེམས་རྣམ་པར་དག་ཅིང་རྙོག་པ་མེད་པ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན 60.232a ཏན་དུ་ལྡན་པ་བསོད་ནམས་ཀྱི་ཞིང་ཡང་དག་པ་དང་ཕྲད་དེ་དེའི་རྗེས་སུ་སློབ་པ་དང ། ཆགས་སེམས་ཡོངས་སུ་སྤོང་བ་དང ། མི་དགེ་བའི་ཆོས་ཡོངས་སུ་གཅད་པ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་ལ་རིམ་གྱིས་གཞོལ་ཞིང་ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་ལག་མཐིལ་བཞིན་དུ་མཉམ་ལ་རིན་པོ་ཆེ་རྣམ་པ་མང་པོས་ཡོངས་སུ་གང་བ་དང ། རིན་པོ་ཆེའི་ཤིང་རྣམ་པ་སྣ་ཚོགས་དཀྲིགས་པ་དང ། རིན་པོ་ཆེའི་གོས་དང ། རིན་པོ་ཆེའི་རྒྱན་གྱི་ཡོ་བྱད་དང ། རིན་པོ་ཆེའི་རྒྱལ་མཚན་དང ། བ་དན་དང ། གདུགས་དང ། གསེར་དང ། དངུལ་དང ། མུ་ཏིག་གི་དྲ་བ་དང ། ཤིང་ལ་སོགས་པས་ཡོངས་སུ་གང་བ་དང ། ཤིན་དུ་ཡིད་དུ་འོང་ཞིང་བལྟ་ན་སྡུག་པ། ང་རྒྱལ་ཡོངས་སུ་སྤངས་པ། བྱད་གཟུགས་ཤིན་དུ་མཛེས་པ་དང ། དབང་པོ་མ་ཉམས་པ། སེམས་མཉམ་པའི་སེམས་ཅན་དག་ཞིང་དེར་སྐྱེ་བར་འགྱུར་ཏེ། ཆགས་སེམས་མེད་པའི་ཡོན་ཏན་ཕུན་སུམ་ཚོགས་པས་བརྒྱན་པར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཆགས་སེམས་ཡོངས་སུ་སྤངས་པའི་འཁོར་ལོ་བརྒྱད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད 60.232b པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་འཐུན་པར་འགྱུར་བ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང ། བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང ། བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་མི་ངོམས་པ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་དག་ཐོབ་པ་ཡང་ཇི་སྐད་བཤད་པ་བཞིན་ནོ། ་་་་་་་་་་ ། བམ་པོ་དགུ་པ། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་གནོད་སེམས་ཡོངས་སུ་སྤངས་ན། སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང ། སེམས་རྣམ་པར་དག་པ་དང ། དྲི་མ་དང་བྲལ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར 60.233a འཁོར་བར་འཁོར་བའི་རྒྱ་མཚོར་འབྱིང་བ་ཡང་གནོད་སེམས་ཀྱི་དབང་གིས་ལུས་དང ། ངག་དང ། ཡིད་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བ་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང ། ཆོས་ཀྱི་སྒྲིབ་པ་དང ། གནོད་སེམས་བྱེད་པ་ལ་སྒྲིབ་པས་བསྒྲིབས་པར་གྱུར་ཏོ། །འདི་ལྟར་གནོད་སེམས་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་ཡོངས་སུ་བཅོམ་པས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང ། དོགས་པར་མི་འགྱུར་བ་དང ། སེམས་རྣམ་པར་དག་པ་དང ། དྲི་མ་དང་བྲལ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང ། ཆུང་མ་དང ། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་དུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང ། དེ་ལ་བཀུར་སྟི་དང་བཅས་པས་ཤིན་དུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ་ཡོངས་སུ་རྫོགས་པ་དང ། ཡན་ལག་དང་ལྡན་པ་དང ། གང་ནས་གང་དུ་སྐྱེས་པར་སེམས་རྣམ་པར་དག་ཅིང་དྲི་མ་དང་བྲལ་བ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་དེའི་རྗེས་སུ་འཐུན་པར་སློབ་པ་དང ། གནོད་སེམས་ཡོངས་སུ་སྤོང་བ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང ། 60.233b དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་རིམ་གྱིས་གཞོལ་ཞིང་ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་རྙོག་པ་དང ། སྨྱེ་བ་དང ། སྤྲིན་དང ། ཁུག་རླངས་དང ། རྡུལ་དང ། དྲི་མ་དང ། མི་སྡུག་པ་དང ། མི་མཛེས་པ་ཐམས་ཅད་དང་བྲལ་ཏེ། རིན་པོ་ཆེ་མང་པོས་ཤིན་དུ་བརྒྱན་པ་ཡིད་དུ་འོང་བ་དང ། ང་རྒྱལ་དང་བྲལ་བ། གཟུགས་མཛེས་ཤིང་སྡུག་པ། དབང་པོ་མ་ཉམས་པ། སེམས་རྟག་ཏུ་ཞི་བའི་སེམས་ཅན་དག་ཞིང་དེར་སྐྱེ་སྟེ། བྱམས་པ་དང ། སྙིང་རྗེ་དང ། ཡོན་ཏན་ཕུན་སུམ་ཚོགས་པས་བརྒྱན་པར་འགྱུར་རོ། །དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་དམ་པའི་ཆོས་སྟོན་ཏོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་གནོད་སེམས་ཡོངས་སུ་སྤངས་པའི་འཁོར་ལོ་དགུ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་འདི་དང་ལྡན་ན་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད 60.234a མ་ཡིན་པ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོའི་ཆོས་ལ་གོང་ནས་གོང་དུ་འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་དེའི་རྗེས་སུ་སློབ་པ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང ། བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང ། བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང་སྨོན་ལམ་རྣམ་པ་སྣ་ཚོགས་ཀྱིས་སེམས་མི་ངོམས་པར་འགྱུར་ཏེ། འབྲས་བུ་གཞན་དག་ཐོབ་པ་ཡང་ཇི་སྐད་བསྟན་པ་བཞིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ནམ་འཚོའི་བར་དུ་ལོག་པར་ལྟ་བ་ཡོངས་སུ་སྤངས་ན་སེམས་ཅན་ཐམས་ཅད་ཀྱིས་བཀུར་ཞིང་བླ་མར་བྱེད་པ་དང ། སེམས་རྣམ་པར་དག་ཅིང་ལོག་པར་རྟོག་པ་དང་བྲལ་བར་འགྱུར་ཏེ། དེའི་དབང་གིས་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་འགྱུར་རོ། །ཐོག་མ་མེད་པའི་མཐའ་ནས་རྒྱུད་ལྔར་འཁོར་བར་འཁོར་བའི་རྒྱ་མཚོར་འབྱིང་བ་ཡང་ལོག་པར་ལྟ་བའི་དབང་གིས་ལུས་དང ། ངག་དང ། ཡིད་སྡིག་པ་མི་དགེ་བའི་ལས་བདག་ཀྱང་བྱེད་ལ་གཞན་ཡང་བྱེད་དུ་འཛུད་ཅིང་མཐོང་བ་དང་ཐོས་པའི་རྗེས་སུ་ཡི་རང་བ་ལས་བྱུང་བའི་ཉོན་མོངས་པའི་སྒྲིབ་པ་དང ། སེམས་ཅན་གྱི་སྒྲིབ་པ་དང་ཆོས་ཀྱི་སྒྲིབ་པ་དང ། ཡང་དག་པར་ལྟ་བ་ལ་སྒྲིབ་པས་བསྒྲིབས་པར་གྱུར་ཏོ། ། 60.234b འདི་ལྟར་ལོག་པར་ལྟ་བ་ཡོངས་སུ་སྤངས་པའི་འཁོར་ལོས་ལྷག་མ་མ་ལུས་པར་བཅོམ་པས་རྣམ་པར་སྨིན་པའི་འབྲས་བུ་ཡོངས་སུ་མི་ལེན་ཏེ། ལུས་འདི་ཉིད་ལ་ཡང་ལྷ་དང་མི་ལ་སོགས་པ་ཀུན་དགའ་ཞིང་ཡིད་དུ་འོང་བ་དང ། དོགས་པ་མེད་པར་འགྱུར་བ་དང ། ལུས་དང་སེམས་རབ་ཏུ་བདེ་བ་དང ། སེམས་རྣམ་པར་དག་ཅིང་ལོག་པར་ལྟ་བ་དང་བྲལ་བར་འགྱུར་རོ། །འཆི་འཕོ་བའི་དུས་བྱེད་པ་ན་ཡང་ལུས་དང་སེམས་ལ་སྡུག་བསྔལ་གྱིས་མི་གདུང་ཞིང་ཡིད་དུ་འོང་བའི་བུ་དང ། ཆུང་མ་དང ། འཁོར་ཐམས་ཅད་ཀྱིས་ཡོངས་སུ་བསྐོར་བས་འཆི་འཕོ་བའི་དུས་བྱེད་པར་འགྱུར་གྱི། ཤིན་དུ་འཇིགས་པའི་གཤིན་རྗེའི་ཕོ་ཉ་མཐོང་བར་མི་འགྱུར་རོ། །ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ་ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་ལུས་དང་སེམས་རབ་ཏུ་དགའ་བ་དང ། བཀུར་སྟི་དང་བཅས་པས་ཤིན་དུ་དད་པ་སྐྱེ་བར་འགྱུར་རོ། །ཚེ་འཕོས་ནས་ཀྱང་ཕྱིར་མིའི་ནང་དུ་སྐྱེ་ཞིང་དབང་པོ་ཡོངས་སུ་རྫོགས་པ་ཡན་ལག་དང་ལྡན་པ་གང་ནས་གང་དུ་སྐྱེས་པར་སེམས་རྣམ་པར་དག་ཅིང་ལོག་པར་ལྟ་བ་དང་བྲལ་བ་དང ། བྱད་གཟུགས་བཟང་བ་དང ། ཡིད་གཞུངས་པ་དང ། རབ་ཏུ་བདེ་ཞིང་སྐྱིད་པ་དང ། ཕྱིར་ཡང་ཡིད་དུ་འོང་བའི་དགེ་བའི་བཤེས་གཉེན་ཆོས་ཀྱིས་དུལ་བ། ཚུལ་ཁྲིམས་དང་ཡོན་ཏན་དུ་ལྡན་པ། བསོད་ནམས་ཀྱི་ཞིང་ཡང་དག་པ་དང་ཕྲད་དེ་དེའི་རྗེས་སུ་འཐུན་པར་སློབ་པ་དང ། ལོག་པར་ལྟ་བའི་ཆོས་ཡོངས་སུ་སྤོང་བ་དང ། སྡིག་པ་མི་དགེ་བའི་ཆོས་ཐམས་ཅད་ཡོངས་སུ་གཅོད་པ་དང ། དགེ་བའི་ཆོས་ཁྱད་པར་ཅན་ཐམས་ཅད་ཡོངས་སུ་རྫོགས་པ་དང ། ཐེག་པ་ཆེན་པོའི་ཆོས་ཀྱི་རྣམ་གྲངས་ཐམས་ཅད་ཚོལ་བ་དང ། བྱང་ཆུབ་སེམས་དཔའི་སྨོན་ལམ་དང་སྤྱོད་པ་ཐམས་ཅད་རིམ་གྱིས་གཞོལ་ཞིང་ཤིན་དུ་ཡངས་པའི་ཡེ་ཤེས་ཀྱི་རྒྱ་མཚོ་ལ་འཇུག་པ་ནས་བླ་ན་མེད་པའི་བྱང་ཆུབ་འཐོབ་པའི་བར་དུ་འགྱུར་རོ། །སངས་རྒྱས་ཀྱི་ཞིང་ཉན་ཐོས་དང ། རང་སངས་རྒྱས་ཀྱི་ཐེག་པ་དང་བྲལ་བ་དང ། ལྷའི 60.235a བདུད་ཀྱི་འཁོར་ཐམས་ཅད་དང་བྲལ་བ་དང ། མུ་སྟེགས་ཅན་གྱི་འཁོར་ཐམས་ཅད་དང་བྲལ་བ་དང ། རིན་པོ་ཆེ་རྣམ་པ་སྣ་ཚོགས་ཀྱིས་བརྒྱན་ཅིང་ཤིན་དུ་མཛེས་པ་དང ། ཡང་དག་པར་ལྟ་བ་དང་ལྡན་ཞིང་ངོ་མཚར་དང ། བཀྲ་ཤིས་དང ། ཚུལ་ངན་པའི་ལྟ་བ་སྣ་ཚོགས་དང ། རྟག་པར་ལྟ་བ་དང ། ཆད་པར་ལྟ་བ་དང ། བདག་དང་བདག་གིར་ལྟ་བ་ཐམས་ཅད་ཡོངས་སུ་སྤངས་པའི་སེམས་ཅན་དག་ཞིང་དེར་སྐྱེ་སྟེ། ཤིན་དུ་ཚེ་རིང་བ་དང ། ཐེག་པ་ཆེན་པོའི་རོ་གཅིག་ལ་ལོངས་སྤྱོད་པར་འགྱུར་བ་དང ། དེ་བཞིན་གཤེགས་པའི་ཚེའི་ཚད་ཀྱང་དཔག་ཏུ་མེད་དེ། སེམས་ཅན་དག་ཅིས་འདུལ་བ་བཞིན་དུ་ཆོས་སྟོན་པ་དང ། ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ཡུན་རིང་དུ་གནས་ཤིང ། སེམས་ཅན་ཚད་མེད་པ་ལ་ཕན་པ་དང ། བདེ་བའི་དོན་དུ་རོ་གཅིག་པའི་ཆོས་བསྟན་པ་ལ་རྩོད་པ་མེད་པས་ཡོངས་སུ་རྒྱས་པར་བྱེད་ཅིང་བགེགས་དང་བར་ཆད་མེད་པར་འགྱུར་རོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ལོག་པར་ལྟ་བ་ཡོངས་སུ་སྤངས་པའི་འཁོར་ལོ་བཅུ་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་རྣམ་པ་བཅུ་པོ་འདི་དང་ལྡན་པས་ཉན་ཐོས་ཀྱི་ཐེག་པ་ལ་འཁྲུལ་པ་མེད་པར་འགྱུར། ཉན་ཐོས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །རང་སངས་རྒྱས་ཀྱི་ཐེག་པ་ལ་འཁྲུལ་པ་མེད་པར་འགྱུར། རང་སངས་རྒྱས་ཀྱི་ཐེག་པའི་གང་ཟག་ལ་འཁྲུལ་པ་མེད་པར་འགྱུར་རོ། །ཐེག་པ་ཆེན་པོ་ལ་འཁྲུལ་པ་མེད་པར་འགྱུར། ཐེག་པ་ཆེན་པོའི་གང་ཟག་ལ་འཁྲུལ་པ་མེད་པར་འགྱུར་རོ། །དཀོན་མཆོག་གསུམ་གྱི་གདུང་ཡོངས་སུ་འཕེལ་བ་དང ། དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བའི་ཉེ་གནས་ཆོས་ཀྱི་སྣོད་དམ། ཆོས་ཀྱི་སྣོད་མ་ཡིན་པ་ལ་ཡང་རུང་ཆུང་ངུ་ན་ཆོས་གོས་ཀྱི་ཚལ་བུ་གྱོན་ཅིང་སྐྲ་དང་ཁ་སྤུ་བྲེགས་པ་ལ་འཁྲུལ་པ་མེད་པར་འགྱུར་བ་དང ། ཐེག་པ་ཆེན་པོའི་ཆོས་ལ་གོང་ནས་གོང་དུ 60.235b འཕར་ཞིང་ཕྱིར་མི་ལྡོག་པ་དང ། རྣོ་བའི་ཤེས་རབ་དང ། བསོད་ནམས་ཀྱི་ཁྱད་པར་རྟག་ཏུ་སྐྱེ་ཞིང་འཕེལ་བ་དང ། ཏིང་ངེ་འཛིན་དང ། གཟུངས་དང ། བཟོད་པ་དང ། ས་རྣམས་ཐམས་ཅད་ལ་དབང་དུ་འགྱུར་ཞིང་ཕྱིར་མི་ལྡོག་པ་དང ། རྟག་ཏུ་དགེ་བའི་བཤེས་གཉེན་དང་ཕྲད་ཅིང་རྗེས་སུ་སློབ་པ་དང ། རྟག་ཏུ་སངས་རྒྱས་ཐམས་ཅད་མཐོང་བ་དང་མི་འབྲལ་ཞིང ། བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང ། བསྙེན་བཀུར་བྱེད་པ་དང་མི་འབྲལ་བ་དང ། དགེ་བའི་རྩ་བ་ཐམས་ཅད་ཚོལ་བ་ལ་བརྩོན་པས་སེམས་མི་ངོམས་པ་དང ། བྱང་ཆུབ་ཀྱི་སྤྱོད་པ་དང ། སྨོན་ལམ་དང ། ཕ་རོལ་དུ་ཕྱིན་པ་དྲུག་ལ་སེམས་མི་ངོམས་པར་འགྱུར་ཏེ། འབྲས་བུ་གཞན་འཐོབ་པ་ཡང་ཇི་སྐད་བཤད་པ་བཞིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་རྣམ་པ་བཅུ་པོ་དེ་དག་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ཅིའི་ཕྱིར་ཞེ་ན། སྔ་མ་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱང་མི་དགེ་བ་བཅུའི་ལས་ཡོངས་སུ་སྤངས་ནས་ཐམས་ཅད་ཀྱིས་དགེ་བ་བཅུའི་ལས་ཀྱི་ལམ་གྱི་འབྲས་བུ་བསྔགས་ཤིང་བསྟོད་དེ། སེམས་ཅན་ཐམས་ཅད་ལ་བདེ་བ་དང་ཕན་པའི་དོན་དང ། བྱང་ཆུབ་ཀྱི་ལམ་སྐྱེ་ཞིང་འཕེལ་བར་བྱ་བ་དང ། སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་སྡུག་བསྔལ་ལྷག་མ་མ་ལུས་པར་བསལ་བར་བྱ་བ་དང ། ངན་སོང་གསུམ་བསྐམ་པར་བྱ་བ་དང ། དཀོན་མཆོག་གསུམ་གྱི་གདུང་བསབ་པར་བྱ་བ་དང ། ཁམས་གསུམ་གྱི་སྲིད་པ་ཡོངས་སུ་གཅད་པར་བྱ་བ་དང ། ཕུང་པོ་དང ། ཁམས་དང ། སྐྱེ་མཆེད་གཅད་པར་བྱ་བ་དང ། ཐམས་ཅད་མྱུར་དུ་འཇིགས་པ 60.236a མེད་པའི་མྱ་ངན་ལས་འདའ་བའི་གྲོང་ཁྱེར་དུ་གཟུད་པའི་ཕྱིར་ཇི་སྐད་བཤད་པ་བཞིན་དུ་མི་དགེ་བ་བཅུའི་ལས་ཀྱི་འབྲས་བུ་ཡོངས་སུ་སྤོང་ངོ ། །དེ་བས་ན་རིགས་ཀྱི་བུ་གལ་ཏེ་ཡང་དག་པ་ཇི་ལྟ་བ་བཞིན་དུ་དགེ་བ་བཅུའི་ལས་ཀྱི་ལམ་འདི་མ་བསྒྲུབས་པར་མངོན་པར་འཚང་རྒྱ་བ་འམ། ཆུང་ངུ་ན་ཡང་དག་པ་ཇི་ལྟ་བ་བཞིན་དུ་དགེ་བ་བཅུའི་ལས་ཀྱི་ལམ་འགའ་ཙམ་ཡང་མི་སྲུང་བར་ང་ནི་ཐེག་པ་ཆེན་པོ་ཡང་དག་པར་སྤྱོད་པའོ་ཞེ་འམ། ང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པའོ་ཞེས་ཟེར་ན། གང་ཟག་དེ་ནི་ཤིན་དུ་བརྫུན་པར་སྨྲ་བ་སྟེ། ཕྱོགས་བཅུའི་སངས་རྒྱས་བཅོམ་ལྡན་འདས་ཀྱི་སྤྱན་སྔར་འཇིག་རྟེན་སླུ་བ་དང ། འཛེམ་པ་དང ། ངོ་ཚ་བ་མེད་པ་ཡང་སྟོང་པར་སྨྲ་ཞིང་ཆད་པར་ལྟ་བ། གླེན་པ་མི་ཤེས་པ་སླུ་བ་ཅན་ཡིན་ཏེ། དེའི་ཚེ་འཕོས་ནས་ངན་སོང་དུ་ལྟུང་བར་ཤེས་པར་བྱའོ། །རིགས་ཀྱི་བུ་གང་ཚིག་ཏུ་བརྗོད་པ་ཙམ་འམ་མཉན་པ་ཙམ་གྱིས་ཆོག་སྟེ། དགེ་བ་བཅུའི་ལས་ཀྱི་ལམ་བསྒོམས་པ་འམ། ནན་ཏན་བྱ་མི་དགོས་པར་བྱང་ཆུབ་དང ། མྱ་ངན་ལས་འདས་པར་ཐོབ་དུ་ཟིན་ན་ནི་བསྐལ་པ་གཅིག་ལ་ཡུད་ཙམ་ཐང་ཅིག་གིས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ཀྱི་སའི་ཁམས་ཀྱི་རྡུལ་ཕྲ་མོ་སྙེད་ཀྱི་སེམས་ཅན་ཐམས་ཅད་བྱང་ཆུབ་མངོན་པར་འཚང་རྒྱ་སྟེ། མྱ་ངན་ལས་འདའ་བར་འགྱུར་བ་ཞིག་ན་དེ་ནི་དེ་ལྟ་བུའི་གནས་མེད་དོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ཀྱི་ལམ་ནི་ཐེག་པ་ཆེན་པོའི་རྩ་བ་ཡིན་ཏེ། བྱང་ཆུབ་ཀྱི་རྒྱུ་དང་མྱ་ངན་ལས་འདའ་བའི་ཐེམ་སྐས་ལྟ་བུའོ། །རིགས་ཀྱི་བུ་གལ་ཏེ་སེམས་བསྐྱེད་པ་ཙམ་འམ་སྨོན་ལམ་བཏབ་པ་ཙམ་གྱིས་ཆོག་སྟེ། དགེ་བ་བཅུའི་ལས་ཀྱི་ལམ་གོམས་པར་ནན་ཏན་བྱ་མི་དགོས་པར་བྱང་ཆུབ་དང ། ཡོངས་སུ་མྱ་ངན་ལས་འདའ་བ་འཐོབ་དུ་ཟིན་ན་ནི་བསྐལ་པ་གཅིག་ལ་ཡུད་ཙམ་ཐང་ཅིག་གིས་ཕྱོགས་བཅུའི 60.236b སངས་རྒྱས་ཀྱི་ཞིང་ཐམས་ཅད་སའི་ཁམས་ཀྱི་རྡུལ་ཕྲ་མོ་སྙེད་ཀྱི་སེམས་ཅན་དག་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་ཞིང་མྱ་ངན་ལས་འདའ་བར་འགྱུར་བ་ཞིག་ན་དེ་ནི་དེ་ལྟ་བུའི་གནས་མེད་དོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ཀྱི་ལམ་ནི་འཇིག་རྟེན་དང་འཇིག་རྟེན་ལས་འདའ་བའི་འབྲས་བུའི་ཁྱད་པར་དང་ཡོན་ཏན་གྱི་རྒྱུར་འགྱུར་རོ། །རིགས་ཀྱི་བུ་གལ་ཏེ་དགེ་བ་བཅུའི་ལས་ཀྱི་ལམ་ལ་ནན་ཏན་དུ་མ་བྱས་ན་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཕྲ་མོ་སྙེད་ཀྱི་བསྐལ་པར་བདག་ནི་ཐེག་པ་ཆེན་པོ་པའོ་ཞེས་ཟེར་ཏེ། འཆད་དམ། ཉན་ཏམ། སེམས་བསྐྱེད་དམ། སྨོན་ལམ་བཏབ་ཀྱང་བྱང་ཆུབ་དང ། མྱ་ངན་ལས་འདའ་བ་འཐོབ་པར་མི་འགྱུར་ལ་གཞན་ཡང་འཁོར་བའི་སྡུག་བསྔལ་ལས་འདོན་མི་ནུས་སོ། །རིགས་ཀྱི་བུ་དགེ་བ་བཅུའི་ལས་ཀྱི་ལམ་ལ་ནན་ཏན་བྱས་པས་འཇིག་རྟེན་ན་རྒྱལ་རིགས་དང ། བྲམ་ཟེ་ལ་སོགས་པ་རིགས་ཆེན་པོ་དང ། རྒྱལ་ཆེན་རིས་བཞིའི་ལྷ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་བར་དུ་ཡོད་པ་དང ། ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཡང་ཡོད་པར་འགྱུར་ཏེ། དེ་དག་ཀུན་ཀྱང་དགེ་བ་བཅུའི་ལས་ཀྱི་ལམ་ལ་ཤིན་དུ་ནན་ཏན་བྱེད་པའི་ཁྱད་པར་དང་བྱེ་བྲག་ལས་གྱུར་ཏོ། །དེ་བས་ན་རིགས་ཀྱི་བུ་གང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་ན་དགེ་བ་བཅུའི་ལས་ཀྱི་ལམ་ལ་ནན་ཏན་གྱི་རྒྱན་གྱིས་བརྒྱན་ཏེ། མི་དགེ་བ་བཅུའི་སྡོམ་པ་ལ་མི་གནས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །གང་མྱུར་དུ་ཐེག་པ་ཆེན་པོའི་སྤྱོད་ཡུལ་དུ་ཆུད་པར་འདོད་དམ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་དམ། མྱུར་དུ་དགེ་བའི་ཆོས་ཐམས་ཅད་ཡོངས་སུ་རྫོགས 60.237a པར་འདོད་ན་སྔར་དགེ་བ་བཅུའི་ལས་ཀྱི་ལམ་ཤིན་དུ་བསྲུང་བར་བྱའོ། །དེ་ཅིའི་ཕྱིར་ཞེ་ན། དགེ་བ་བཅུའི་ལས་ཀྱི་ལམ་གྱིས་ནི་དགེ་བའི་ཆོས་ཐམས་ཅད་དང ། ཡོན་ཏན་རྣམ་པར་གཞག་པའི་གཞི་དང ། འཇིག་རྟེན་དང ། འཇིག་རྟེན་ལས་འདའ་བའི་འབྲས་བུའི་མཆོག་ཐོབ་པར་བྱེད་པའི་རྒྱུ་ཡིན་ནོ། །དེ་བས་ན་དགེ་བ་བཅུའི་ལས་ཀྱི་ལམ་ལ་ཤིན་དུ་ནན་ཏན་བྱའོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་གསུངས་པ། སྲིད་པའི་སྡུག་བསྔལ་ཀུན་གཅོད་ཅིང ། །བྱང་ཆུབ་ཆེན་པོ་འཐོབ་འདོད་པ། །དགེ་བཅུའི་འཁོར་ལོའི་ནན་ཏན་ལ། །ལེ་ལོ་མ་བྱེད་བརྩོན་པར་གྱིས། །ཐེག་པ་གསུམ་གྱི་དམ་ཆོས་དང ། །ཐེག་པ་རྣམ་གསུམ་གང་ཟག་དང ། །རབ་ཏུ་བྱུང་བ་ཐམས་ཅད་ལ། །འཁྲུལ་པ་མེད་པར་འཐོབ་པར་འགྱུར། །ཐེག་ཆེན་སྤྱོད་ལ་དད་མོས་ཤིང ། །ཐམས་ཅད་འཁོར་གྱི་དབུགས་འབྱིན་པའི། །ཆོས་མཆོག་རྟོགས་ནས་ཞིང་དག་དེར། །བྱང་ཆུབ་ཆེན་པོ་མྱུར་དུ་འཐོབ། །གལ་ཏེ་སྲོག་གཅོད་ཡོངས་སྤངས་ན། །ཀུན་གྱིས་བཀུར་ཞིང་བླ་མར་བྱེད། །རྟག་ཏུ་ནད་མེད་ཚེ་ཡང་རིང ། །བདེ་ཞིང་སྐྱིད་ལ་གནོད་པ་མེད། །སྐྱེ་བའི་གནས་ནི་ཐམས་ཅད་དུ། །སངས་རྒྱས་སྤྱོད་ཡུལ་ལམ་ལ་མོས། །སངས་རྒྱས་ཆོས་དང་དགེ་འདུན་མཐོང ། །མྱུར་དུ་བླ་མེད་བྱང་ཆུབ་འཐོབ། །མ་བྱིན་ལེན་པ་ཡོངས་སྤངས་ན། །མཁས་པས་བཀུར་ཞིང་བླ་མར་བྱེད། །འདོད་ཆགས་སྐྱེ་བའི་ལམ་ཀུན་ཞི། །འདོད་ཆགས་མེད་པ་སྐྱེ་བར་འགྱུར། །སྐྱེ་བ་ཀུན་དུ་ལོངས་སྤྱོད་ལྡན། །སྦྱིན་བདག་ཆེན་པོར་དེ་འགྱུར་ཏེ། །རིན་ཆེན་མང་པོས་བརྒྱན་པ་དང ། །ཡིད་འོང་སངས་རྒྱས་ཞིང་ཡང་འཐོབ། །འདོད་པས་ལོག་གཡེམ་ཡོངས་སྤངས་ན། །ཉོན་མོངས་དྲི་མ་ཞི་བར་འགྱུར། །འདོད་ཆགས་སྲིད་པའི་མཚོ་ཡང་སྐེམས། །རྣམ་དག་སངས་རྒྱས་ཞིང་མྱུར་འཐོབ། །སེམས་ཅན་རྣམ་པ་མང་པོ་ཡང ། །འདོད་པའི་འདམ 60.237b ལས་འབྱིན་པར་འགྱུར། །ཐེག་ཆེན་ལ་ནི་རབ་བཀོད་ནས། །ཚངས་པའི་སྤྱད་པ་སྤྱོད་དུ་བཙུད། །བརྫུན་དུ་སྨྲ་བ་ཡོངས་སྤངས་ན། །འཕགས་པའི་དབང་དང་ཡེ་ཤེས་འཐོབ། །རྟག་ཏུ་བདེན་ལ་སྨྲ་བར་དགའ། །བརྫུན་དུ་འགྱུར་བའི་སྡུག་བསྔལ་འཇིལ། །ཚིག་གཅིག་ཚད་མར་བཙུགས་པས་ན། །སངས་རྒྱས་ཆོས་དང་དགེ་འདུན་མཐོང ། །བརྫུན་མི་སྨྲ་བ་བསྒོམས་པས་ན། །བྱང་ཆུབ་ཆེན་པོ་མྱུར་དུ་འཐོབ། །ཕྲ་མའི་ཚིག་སྨྲ་ཡོངས་སྤངས་ན། །དགེ་བའི་ཆོས་ཀྱི་སྣོད་དུ་འགྱུར། །སངས་རྒྱས་ཆོས་དང་དགེ་འདུན་མཐོང ། །ཆད་པར་ལྟ་བར་ཡོང་མི་འགྱུར། །འཕགས་པའི་ཆགས་མེད་དགའ་བ་དང ། །རིན་ཆེན་གཏེར་གྱི་གཟུངས་འཐོབ་ཅིང ། །ཟབ་མོ་ཆོས་ཀྱི་རྒྱ་མཚོར་རིག་།མྱུར་དུ་བླ་མེད་བྱང་ཆུབ་འཐོབ། །གལ་ཏེ་ཞེ་གཅོད་ཚིག་སྤངས་ཏེ། །འཇམ་ཞིང་མཉེན་པའི་ཚིག་སྨྲས་ན། །སེམས་ཅན་ཀུན་གྱིས་བཀུར་བར་འགྱུར། །སྔ་མའི་མི་དགེ་ལས་ཀྱང་ཞི། །འཁོར་རྣམས་རྟག་ཏུ་དགའ་བ་དང ། །བྱང་ཆུབ་སེམས་དཔའི་སྟོན་པར་འགྱུར། །སངས་རྒྱས་མང་པོའི་སྤྱོད་ཡུལ་ཤེས། །ས་བཅུ་ལས་ཀྱང་འདའ་བར་འགྱུར། །ཀྱལ་པར་སྨྲ་བ་ཡོངས་སྤངས་ན། །མཁས་པས་བཀུར་ཞིང་བླ་མར་བྱེད། །གཞན་ལ་ཚིག་ཏུ་སྨྲ་བ་ཀུན། །ཡོན་ཏན་རྣམ་ལྔ་འཐོབ་པར་འགྱུར། །རྟག་ཏུ་འཕགས་པའི་ཚིག་ཉན་ཅིང ། །འཕགས་པའི་ལམ་ཚོལ་སྤྲོ་བར་འགྱུར། །སངས་རྒྱས་རྒྱ་མཚོ་ཡོངས་རྫོགས་ཤིང ། །ཐམས་ཅད་མཁྱེན་པ་མྱུར་དུ་འཐོབ། །གལ་ཏེ་ཆགས་སེམས་ཡོངས་སྤངས་ཏེ། །འཕགས་པ་རྣམས་ལ་མི་སྨོད་ཅིང ། །ངུར་སྨྲིག་གྱོན་ལ་མཆོད་པར་བྱེད། །ཐེག་པ་གསུམ་གྱི་བྱང་ཆུབ་སྒྲུབ། །རྟག་ཏུ་རྣམ་དག་ཞིང་དུ་སྐྱེ། །སྟོན་པའི་གནས་སུ་གནས་པར་འགྱུར། །བླ་མེད་ཐེག་པ་ལ་ཞོན་ཏེ། །རྒྱལ་བའི་ཡེ་ཤེས་མྱུར་དུ་འཐོབ། །གལ་ཏེ་གནོད་སེམས་ཡོངས་སྤངས་ཏེ། །གཅིག་ཏུ་བྱམས་པའི་སེམས་བསྒོམས་ན། །མཉམ་པར་གཞག་པའང་མྱུར་དུ 60.238a འཐོབ། །འཕགས་པའི་སྤྱོད་ཡུལ་མོས་པར་འགྱུར། །རྣམ་དག་སངས་རྒྱས་ཞིང་དུ་སྐྱེ། །ཉེས་པའི་སྐྱོན་རྣམས་ཀུན་དང་བྲལ། །དེ་ལ་གནས་ན་བྱང་ཆུབ་འཐོབ། །གནོད་སེམས་ཐམས་ཅད་སྤང་བར་བྱ། །ངན་པར་ལྟ་བ་ཡོངས་སྤངས་ཏེ། །རྣམ་དག་དད་པའི་སེམས་སྒོམས་ན། །ཐེག་གསུམ་སྟོན་ལ་མོས་བྱེད་ཅིང ། །སངས་རྒྱས་ཀུན་ལ་མཆོད་པ་བྱེད། །ངན་སོང་གསུམ་ལས་ཡོངས་ཐར་ཏེ། །འཕགས་པའི་དགེ་འདུན་རྣམས་དང་ཕྲད། །བྱང་ཆུབ་སེམས་དཔའི་ཡོན་ཏན་ལྡན། །ཡེ་ཤེས་མཆོག་ཀྱང་འཐོབ་པར་འགྱུར། །དགེ་བ་བཅུ་ཡི་ལས་ལམ་གྱིས། །བྱང་ཆུབ་མཆོག་ཐོབ་འགྱུར་ཞེས་གསུངས། །སྙོམས་པར་འཇུག་དང་གཟུངས་རྣམས་དང ། །ས་དང་བཟོད་པ་སྐྱེ་བར་འགྱུར། །བདག་ཉིད་ཆེ་བའི་འཁོར་ལོ་འདིས། །ངན་སོང་ཐམས་ཅད་རབ་བཅོམ་ནས། །སྡིག་པའི་སྒྲིབ་པ་ཀུན་ཀྱང་ཆོམས། །མྱུར་དུ་བྱང་ཆུབ་ཆེན་པོ་ཐོབ། །འཕགས་པ་ཤིན་དུ་རྒྱས་པ་ཆེན་པོ་སའི་སྙིང་པོ་འཁོར་ལོ་བཅུ་པ་ཞེས་བྱ་བ་ལས་དགེ་བ་བཅུའི་ལས་ཀྱི་ལམ་ཞེས་བྱ་བའི་ལེའུ་སྟེ་དྲུག་པའོ།། ་་་་་་་་་།། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཟང་ཟིང་གི་སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་རང་སངས་རྒྱས་ཐམས་ཅད་ལས་ཤིན་དུ་འདས་ནས་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང་རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱེད་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། རྣམ་པ་སྣ་ཚོགས་ཀྱི་ཟས་དང ། སྐོམ་དང ། གོས་དང ། རིན་པོ་ཆེའི་རྒྱན་དང ། བལ་གླང་དང ། རྟ་དང ། ཤིང་རྟ་དང ། ལུས་ཀྱི་ཡན་ལག་དང ། རྐང་པ་དང ། ལག་པ་དང ། རྣ་བ་དང་སྣ་དང ། མགོ་དང ། མིག་དང ། 60.238b རྐང་དང ། ཀླད་པ་དང ། ལྤགས་པ་དང ། རུས་པ་དང ། ཤ་དང ། ཁྲག་དང ། ཡུལ་དང ། སྲིད་དང ། བུ་དང ། ཆུང་མ་དང ། བྲན་ཕོ་དང ། བྲན་མོ་དང ། ཁང་ཁྱིམ་དང ། ཞིང་འབྲོག་ལ་སོགས་པ་དེ་དག་ཐམས་ཅད་སྦྱིན་པ་དེ་རེ་རེ་བྱེད་པ་ན་ལུས་དང་སྲོག་ལ་མི་ལྟ་ཞིང་བདག་གཅིག་པུ་འཇིག་རྟེན་དང་འཇིག་རྟེན་ལས་འདས་པའི་བདེ་བ་འདོད་པའི་ཕྱིར་སེམས་བསྐྱེད་དེ་སྦྱིན་པ་བྱེད་པ་མ་ཡིན་གྱི། སེམས་ཅན་ཐམས་ཅད་ལ་བྱམས་པ་ཆེན་པོ་སྙིང་རྗེ་ཆེན་པོའི་མྱུ་གུ་བསྐྱེད་པའི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །ཐབས་མཁས་པ་དང་ཤེས་རབ་མཆོག་བསྐྱེད་པའི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །སེམས་ཅན་ཐམས་ཅད་ལ་བྱམས་པ་ཆེན་པོ་ཕན་པ་དང ། བདེ་བའི་དོན་གྱི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །སེམས་ཅན་ཐམས་ཅད་ཀྱི་སྡུག་བསྔལ་བསལ་བའི་ཕྱིར་སྦྱིན་པ་སྦྱིན་པའི་སེམས་བསྐྱེད་དོ། །གཞན་ལས་སྤག་གོ་སྙམ་པ་མེད་པའི་སེམས་དང ། བརླང་བ་མེད་པའི་སེམས་དང ། ཕྲག་དོག་མེད་པའི་སེམས་དང ། སེར་སྣ་དང་ཞུམ་པ་མེད་པའི་སེམས་ཀྱིས་སྦྱིན་པ་སྦྱིན་ནོ། །གང་སྦྱིན་པའི་དངོས་པོ་ཆེ་ཡང་རུང ། ཆུང་ཡང་རུང ། ཆུང་ངུ་ན་ཟན་ཆངས་གཅིག་ཙམ་གྱི་སྦྱིན་པ་བྱས་ན་ཡང་རྣམ་པར་སྨིན་པའི་འབྲས་བུ་ལ་མི་རེ་བར་སྦྱིན་པ་སྦྱིན་པའི་སེམས་བསྐྱེད་དོ། །ཉན་ཐོས་ཀྱི་ཐེག་པའི་འབྲས་བུ་ལ་མི་རེ་བར་སྦྱིན་པ་སྦྱིན་པའི་སེམས་བསྐྱེད་དོ། །རང་སངས་རྒྱས་ཀྱི་ཐེག་པའི་འབྲས་བུ་ལ་མི་རེ་བར་སྦྱིན་པ་སྦྱིན་པའི་སེམས་བསྐྱེད་དོ། །གང་སྦྱིན་པའི་དངོས་པོ་དེ་ཆེ་ཡང་རུང ། ཆུང་ཡང་རུང ། ཆུང་ངུ་ན་ཟན་ཆངས་གཅིག་ཙམ་གྱི་སྦྱིན་པ་བྱས་ན་ཡང་རྣམ་པ་ཐམས་ཅད་མཁྱེན་པའི་ཡེ་ཤེས་སུ་བསྔོ་ཞིང་སྦྱིན་པ་སྦྱིན་པའི་སེམས་བསྐྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཟང་ཟིང་གི་སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་པོ་དེ་དང་ལྡན་ན། ཐོག་མ་སེམས་བསྐྱེད་པ་ན་འདོད་པ་རྣམ་པ་ལྔ་ཡོངས་སུ་བསལ་བའི་ཕྱིར་ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ་དང ། ཉན་ཐོས་དང ། 60.239a རང་སངས་རྒྱས་ཐམས་ཅད་ཀྱི་བསོད་ནམས་ཆེན་པོའི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་ཅིང་བསྙེན་བཀུར་བྱ་བ་དང ། ཡོངས་སུ་བསྲུང་བར་འགྱུར་རོ། །དེ་ཅིའི་ཕྱིར་ཞེ་ན། ཉན་ཐོས་དང ། རང་སངས་རྒྱས་ཀྱིས་སྦྱིན་པ་སྦྱིན་པའི་སེམས་བསྐྱེད་པ་ནི་བྱམས་པ་དང ། སྙིང་རྗེ་ཆེན་པོའི་སེམས་མེད་ཀྱི་བདག་གི་དབུལ་བ་དེ་སྤོང་བ་དང ། བདག་སྡུག་བསྔལ་ལས་ཐར་པ་དང ། བདག་བདེ་བ་ཐོབ་པར་བྱ་བ་དང ། བདག་མྱ་ངན་ལས་འདའ་བར་བྱ་བའི་ཕྱིར་སྦྱིན་པ་བྱེད་དེ། སེམས་ཅན་ཐམས་ཅད་ཀྱི་ཕྱིར་སྦྱིན་པ་བྱེད་པ་ནི་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་སྦྱིན་ན་ནི་བྱམས་པ་དང ། སྙིང་རྗེ་ཆེན་པོའི་སེམས་ཀྱིས་སེམས་ཅན་ཐམས་ཅད་ཀྱི་དབུལ་ཕོངས་པ་སྤོང་བ་དང ། སེམས་ཅན་ཐམས་ཅད་སྡུག་བསྔལ་ལས་གདོན་པ་དང ། སེམས་ཅན་ཐམས་ཅད་བདེ་བ་ཐོབ་པར་བྱེད་པ་དང ། སེམས་ཅན་ཐམས་ཅད་མྱ་ངན་ལས་བཟླ་བའི་ཕྱིར་སྦྱིན་པ་བྱེད་ཀྱི། བདག་འབའ་ཤིག་གི་ཕྱིར་སྦྱིན་པ་སྤྱོད་པ་མ་ཡིན་ནོ། །དེ་ལྟ་བས་ན་ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྙེན་བཀུར་བྱེད་ཅིང་ཡོངས་སུ་སྲུང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཟང་ཟིང་གི་སྦྱིན་པའི་ཕ་རོལ་དུ་ཕྱིན་པ་ལ་སྤྱོད་པ་ན་འདོད་པ་རྣམ་ལྔའི་མཆོག་ལ་སེམས་མི་ཆགས་ཏེ། བདག་ཉིད་དབང་བ་བདེ་བའི་ཡོ་བྱད་ཐམས་ཅད་སེམས་ཅན་ཀུན་ལ་སྦྱིན་པ་བྱེད་དེ། སེམས་ཅན་ཐམས་ཅད་ཡོངས་སུ་སྡུད་པའི་སེམས་དང ། བདག་གི་སྡུག་བསྔལ་ཐམས་ཅད་ལ་ཇི་མི་སྙམ་པའི་བཟོད་པའི་སེམས་དང ། སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བའི་སེམས་དང ། སེམས་ཅན་ཐམས་ཅད་ལ་བདེ་བ་སྦྱིན་པའི་སེམས་དང ། སེམས་ཅན 60.239b ཐམས་ཅད་མྱ་ངན་ལས་བཟླ་བའི་སེམས་ལ་གནས་ཏེ་སྦྱིན་པ་བྱེད་དོ། །དེ་བས་ན་ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ། ཉན་ཐོས་དང་རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྙེན་བཀུར་དང ། སྲུང་བ་བྱེད་པར་འགྱུར་རོ། །རིགས་ཀྱི་བུ་གལ་ཏེ་འདོད་པ་ལྔ་ལ་སེམས་མི་ཆགས་ཤིང་བྱམས་པ་དང ། སྙིང་རྗེ་ཆེན་པོས་སྦྱིན་པ་བྱེད་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང་རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་ཞེས་བྱའོ། །གལ་ཏེ་འཇིག་རྟེན་གྱི་འདོད་པ་རྣམ་ལྔ་ཡང་མ་སྤངས་ལ་བྱམས་པ་དང ། སྙིང་རྗེ་ཆེན་པོ་ཡང་མེད་པར་སྦྱིན་པ་བྱེད་ན་སྦྱིན་པའི་དངོས་པོ་ཚད་མེད་གྲངས་མེད་དཔག་ཏུ་མེད་པ་བཏང་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་མི་བྱ་སྟེ། ཉན་ཐོས་དང ། རང་སངས་རྒྱས་ཀྱི་བསོད་ནམས་ཀྱི་ཞིང་ཡང་དག་པ་ཡང་མ་ཡིན་པས་སྦྱིན་པ་འདི་ནི་འཕགས་པ་རྣམས་ཀྱི་ཕྱག་རྒྱས་བཏབ་པ་མ་ཡིན་ནོ། །དེ་བས་ན་འཇིག་རྟེན་གྱི་འདོད་པ་ལྔ་སྤངས་ཏེ། བྱམས་པ་དང ། སྙིང་རྗེ་ཆེན་པོ་དང་ལྡན་པས་སྦྱིན་པ་བྱའོ། །གལ་ཏེ་འཇིག་རྟེན་གྱི་འདོད་པ་ལྔ་ཡང་མ་སྤངས་ལ་བྱམས་པ་དང ། སྙིང་རྗེ་ཆེན་པོ་ཡང་མེད་པར་སྦྱིན་པ་བྱེད་ན་བྱང་ཆུབ་སེམས་དཔའ་ཞེས་ཀྱང་མི་བྱ་ལ་བསོད་ནམས་ཀྱི་ཞིང་ཡང་དག་པ་ཡང་མ་ཡིན་ནོ། །རིགས་ཀྱི་བུ་འདོད་པ་རྣམ་པ་ལྔ་ལ་ཆགས་པས་སྦྱིན་པ་བྱེད་ན་བདག་ཉིད་ཀྱི་ལུས་ཀྱི་སྡུག་བསྔལ་གྱི་ཆ་ཆུང་ཟད་ཀྱང་ཞི་བར་མི་འགྱུར་ན་སེམས་ཅན་ཐམས་ཅད་ཀྱི་སྡུག་བསྔལ་ཚད་མེད་པ་བསལ་བ་ལྟ་ཅི་སྨོས། དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཟང་ཟིང་སྦྱིན་པའི་འཁོར་ལོ་ལྡན་པ། །མཁས་པ་བསམ་པ་དག་པའི་མོས་པས། ། 60.240a འདོད་པ་རྣམ་ལྔ་དག་ནི་སྤངས་ཏེ། །སེམས་ཅན་ཀུན་ལ་ཕན་དང་བདེ་བྱེད། །སེམས་ཅན་ཀུན་ལ་བདེ་བའི་ཕྱིར་གྱི། །རྣམ་སྨིན་འབྲས་བུ་དེ་ཕྱིར་མ་ཡིན། །སྦྱིན་པའི་དངོས་པོ་བྱིན་པ་ཆུང་ཡང ། །ཡང་དག་བསོད་ནམས་ཞིང་དུ་དེ་འགྱུར། །སྦྱིན་པའི་དངོས་པོ་མང་དུ་བྱས་ཀྱང ། །འདོད་པ་རྣམ་ལྔ་དག་ལ་གནས་ན། །འཕགས་པ་དག་གི་ཕྱག་རྒྱས་མ་བཏབ། །མ་ངེས་པ་ཡི་ཚོགས་ལ་གནས་འགྱུར། །སྦྱིན་པའི་དངོས་པོ་བྱིན་པ་ཆུང་ཡང ། །འདོད་པ་ལྔ་ལ་མི་གནས་པ་ནི། །ཉན་ཐོས་དག་དང་རང་རྒྱལ་བ་ཡི། །ཡང་དག་བསོད་ནམས་ཞིང་དུ་དེ་འགྱུར། །དེ་བས་འདོད་པ་རྣམ་ལྔ་སྤངས་ལ། །རྟག་ཏུ་རྣམ་དག་སྦྱིན་པ་བྱེད་ཅིང ། །སེམས་ཅན་ཀུན་ལ་བདེ་བ་བྱས་ན། །ཡང་དག་བསོད་ནམས་ཞིང་དུ་དེ་འགྱུར། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཀྱི་སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་ལྔ་ཡོངས་སུ་བསལ་བའི་ཕྱིར་མྱུར་དུ་ཉི་མའི་སྒྲོན་མའི་འོད་ཅེས་བྱ་བའི་ཏིང་ངེ་འཛིན་ཐོབ་ཅིང་ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཆེན་པོའི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱ་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱིས་བསྟན་པ་དམ་པའི་ཆོས་ཉན་ཐོས་ཀྱི་ཐེག་པ་དང་ལྡན་པའི་དམ་པའི་ཆོས་དང ། རང་སངས་རྒྱས་ཀྱི་ཐེག་པ་དང་ལྡན་པའི་དམ་པའི་ཆོས་དང ། ཐེག་པ་ཆེན་པོ་དང་ལྡན་པའི་དམ་པའི་ཆོས་དང ། འཇིག་རྟེན་གྱི་ཆོས་དང ། འཇིག་རྟེན་ལས་འདས་པའི་ཆོས་དང ། ཟག་པ་དང་བཅས་པའི་ཆོས་དང ། ཟག་པ་ཟད་པའི 60.240b ཆོས་དང ། འདུས་བྱས་ཀྱི་ཆོས་དང ། འདུས་མ་བྱས་ཀྱི་ཆོས་དང ། གཉིས་སུ་མེད་པའི་ཆོས་རྣམས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་རྣམ་པ་བཅུ་པོ་འདི་ལ་དད་ཅིང་གུས་པར་བྱེད་པ་དང ། ཇི་སྐད་ཐོས་པ་རྣམས་ཅི་ནུས་སུ་གཟུངས་སུ་འཛིན་ཅིང་ཡིད་ལ་བྱེད་དོ། །རབ་ཏུ་རྟོག་གོ། །མཐར་ཁོང་དུ་ཆུད་པར་བྱེད་ཅིང་གཞན་དག་ལ་ཡང་ཅི་རིགས་པར་རྟོག་པར་བྱེད་དོ། །ནམ་ཆོས་སྟོན་པའི་ཚེ་ན་ཕྲག་དོག་མེད་པའི་སེམས་དང ། སེར་སྣ་མེད་པའི་སེམས་དང ། ང་རྒྱལ་མེད་པའི་སེམས་དང ། རྙེད་པར་མི་རེ་བའི་སེམས་དང ། གཞན་མི་སྨོད་པའི་སེམས་དང ། བདག་མི་སྟོད་པའི་སེམས་དང ། སྟི་སྟང་དང་བཅས་པའི་སེམས་དང ། ཕན་པའི་སེམས་དང ། བྱམས་པ་ཆེན་པོའི་སེམས་དང ། སྙིང་རྗེ་ཆེན་པོའི་སེམས་སུ་བྱའོ། །ཉན་ཐོས་ཀྱི་ཐེག་པ་ཅན་གྱི་གང་ཟག་ལ་ནི་ཉན་ཐོས་ཀྱི་ཆོས་སྟོན་ཅིང་འཆད་ཀྱི། དེ་ལ་རང་སངས་རྒྱས་ཀྱི་ཆོས་སམ། ཐེག་པ་ཆེན་པོའི་ཆོས་ཀྱིས་མ་ཡིན་པ་དང ། རང་སངས་རྒྱས་ཀྱི་ཐེག་པ་ཅན་གྱི་གང་ཟག་ལ་ནི་རང་སངས་རྒྱས་ཀྱི་ཐེག་པའི་ཆོས་སྟོན་གྱི། ཉན་ཐོས་ཀྱི་ཐེག་པའི་ཆོས་སམ། ཐེག་པ་ཆེན་པོའི་ཆོས་ཀྱིས་མ་ཡིན་པ་དང ། ཐེག་པ་ཆེན་པོའི་གང་ཟག་ལ་ནི་ཐེག་པ་ཆེན་པོའི་ཆོས་སྟོན་གྱི། ཉན་ཐོས་དང ། རང་སངས་རྒྱས་ཀྱི་ཐེག་པ་པའི་ཆོས་ཀྱིས་མ་ཡིན་པ་དང ། སེམས་ཅན་གྱི་དབང་པོ་དང ། སྣོད་ཇི་ལྟ་བ་བཞིན་དུ་དམ་པའི་ཆོས་སྟོན་གྱི། དབང་པོ་དང་སྣོད་དུ་མ་གྱུར་པ་ལ་ཆོས་མི་སྟོན་ཏོ། །གང་ཐེག་པ་ཆེན་པོའི་སེམས་ཅན་ལ་རང་སངས་རྒྱས་ཀྱི་ཐེག་པ་སྤྱོད་ཅིག་པར་རམ། ཉན་ཐོས་ཀྱི་ཐེག་པ་སྤྱོད་ཅིག་པར་མི་སྐུལ་ལོ། །རང་སངས་རྒྱས་ཀྱི་ཐེག་པ་ཅན་གྱི་སེམས་ཅན་ལ་སྐབས་ཁ་ཅིག་ཏུ་ཐེག་པ་ཆེན་པོའི་སྤྱོད་པ་ལ་ནན་ཏན་བྱོས་ཤིག་ཅེས་སྐུལ་བའི་སྐབས་ནི་ཡོད་དེ། ཉན་ཐོས་ཀྱི་ཐེག་པ་ཅན་གྱི་སེམས་ཅན་ལ་སྐབས་ཁ་ཅིག་ཏུ་རང་སངས་རྒྱས 60.241a ཀྱི་ཐེག་པའི་སྤྱོད་པ་དང ། ཐེག་པ་ཆེན་པོའི་སྤྱོད་པ་ལ་ནན་ཏན་གྱིས་ཤིག་ཅེས་སྐུལ་བའི་སྐབས་ཀྱང་ཡོད་དེ། དེ་བཞིན་གཤེགས་པའི་བསྟན་པའི་དམ་པའི་ཆོས་ཆུང་ངུ་ན་ཚིགས་སུ་བཅད་པ་གཅིག་གམ་ཚིགས་སུ་བཅད་པ་ཕྱེད་ཙམ་ལ་ཡང་ཤིན་དུ་དད་ཅིང་བཀུར་སྟི་བྱེད་ཀྱི། དེ་ལ་འཕྱ་བ་འམ་སྐུར་པ་འམ། བགེགས་སམ། བར་ཆད་མི་བྱེད་དེ། ཆོས་སྟོན་པ་ལ་སངས་རྒྱས་དང་འདྲ་བར་འདུ་ཤེས་པ་དང ། ཆོས་ཉན་པའི་འཁོར་རྣམས་ལ་ནད་པ་དང་འདྲ་བར་འདུ་ཤེས་པ་དང ། གང་འཆད་པའི་ཆོས་ལ་སྨན་བཟང་པོ་དང་འདྲ་བར་འདུ་ཤེས་ཤིང་འདོད་པ་རྣམ་པ་ལྔ་ཡོངས་སུ་བཅད་དེ་རེ་བ་མེད་པས་དམ་པའི་ཆོས་སྟོན་ཏོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཆོས་ཀྱི་སྦྱིན་པའི་གོ་ཆ་ཆེན་པོའི་འཁོར་ལོ་རྣམ་པ་བཅུ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་འདོད་པ་ལྔ་ཡོངས་སུ་བསལ་ཏེ། མྱུར་དུ་ཉི་མའི་སྒྲོན་མའི་འོད་ཅེས་བྱ་བའི་ཏིང་ངེ་འཛིན་ཐོབ་ཅིང་ཉན་ཐོས་དང་རང་སངས་རྒྱས་ཐམས་ཅད་ལས་ཤིན་དུ་འདས་པ་དང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། མཁས་པ་ཆོས་ཀྱི་སྦྱིན་པ་སྤྱོད་པ་དག་།སྣོད་བཞིན་ཐེག་པ་གསུམ་གྱི་ཆོས་སྟོན་ཏོ། །ཐེག་པ་གཞན་དག་དེ་ལ་སྟོན་མི་བྱེད། །ཐོས་ནས་དེ་ལ་འཕྱ་ཞིང་སྐུར་མི་འགྱུར། །དབང་པོ་སྣོད་བཞིན་དམ་པའི་ཆོས་སྟོན་གྱི། །དབང་པོ་སྣོད་མིན་དག་ལ་མ་ཡིན་ནོ། །སོ་སོར་ཇི་ལྟར་ཅི་ལ་མོས་པ་བཞིན། །དེ་དང་དེ་ཡི་ཆོས་སྟོན་མགུ་བར་བྱེད། །ཐེག་པ་ཆེན་པོ་སྤྱོད་པའི་གང་ཟག་ལ། །ཐེག་པ་རྣམ་པ་གཉིས་ཀྱི་ཆོས་མི་བསྟན། །བར་རབ་ཐེག་པ་གཉིས 60.241b ཀྱི་གང་ཟག་ལ། །ཐེག་པ་འབྲིང་དང་རབ་ཀྱི་ཆོས་སྟོན་ཏོ། །ཤིན་དུ་དད་ཅིང་གུས་པས་ཆོས་མཉན་གྱི། །དེ་ལ་འཕྱ་ཞིང་སྐུར་བར་མི་བྱའོ། །ཆོས་སྨྲ་བ་ལ་མཆོད་པ་བྱེད་པ་ནི། །སངས་རྒྱས་འདྲ་བར་དེ་ལ་འདུ་ཤེས་བསྐྱེད། །ཀུན་ནས་ཉོན་མོངས་པ་ཡི་ནད་བསལ་ཕྱིར།[་\ུ0f7ེ་]།དམ་པའི་ཆོས་ཀྱི་སྨན་དག་ཉན་པར་བསྐུལ། །ཁེ་དང་གྲགས་པ་ཤིན་དུ་རིང་སྤངས་ཏེ། །དམ་པའི་ཆོས་དག་བསྟན་ཅིང་བཤད་པར་བྱ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་རྣམ་པར་དག་པའི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན། ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱ་བར་འགྱུར་རོ། །དེ་ལ་ཇི་ལྟར་ན་ཚུལ་ཁྲིམས་རྣམ་པར་དག་པ་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པ་རྣམ་པ་གཉིས་ཏེ། ཐུན་མོང་བ་དང ། ཐུན་མོང་བ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པའི་འཁོར་ལོ་ཐུན་མོང་བ་ཞེ་ན་གང་ཁྱིམ་ན་གནས་པ་དགེ་བསྙེན་ཕ་དང ། དགེ་བསྙེན་མའི་ཚུལ་ཁྲིམས་ཀྱི་སྡོམ་པ་བླངས་པ་འམ། ཡང་ན་རབ་ཏུ་བྱུང་བ་སོ་སོར་ཐར་པའི་ཚུལ་ཁྲིམས་ཀྱིས་བསྙེན་པར་རྫོགས་པ་སྟེ། སྡོམ་པ་འདི་དང་སོ་སོར་ཐར་པའི་ཚུལ་ཁྲིམས་འདི་ནི་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པའི་འཁོར་ལོ་ཐུན་མོང་བ་སྟེ། ཉན་ཐོས་དང ། རང་སངས་རྒྱས་ཐམས་ཅད་དང་ཐུན་མོང་བ་ཡིན་ནོ། །བྱང་ཆུབ་སེམས་དཔའ་ཚུལ་ཁྲིམས་ཀྱི་འཁོར་ལོ་རྣམ་པར་དག་པ་འདིའི་དབང་གིས་སེམས་ཅན་ཐམས་ཅད་ཀྱི་ཀུན་ནས་ཉོན 60.242a མོངས་པ་ཆོད་པར་རམ། ལོག་པར་ལྟ་བ་སེལ་བར་རམ། ལས་ཀྱི་སྒྲིབ་པ་དང ། འཁོར་བ་ལས་གྲོལ་བར་མི་འགྱུར་ཏེ། གོ་ཆ་ཆེན་པོའི་འཁོར་ལོ་ཞེས་ཀྱང་མི་བྱ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང་རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པ་གོ་ཆ་ཆེན་པོའི་འཁོར་ལོ་ཐུན་མོང་མ་ཡིན་པ་ཞེ་ན། གང་བྱང་ཆུབ་སེམས་དཔའ་རྣམས་ཕྱོགས་བཅུའི་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་དང ། གནོད་པ་མེད་པའི་སེམས་དང ། འཁོན་དུ་འཛིན་པ་མེད་པའི་སེམས་ཀྱིས་རྣམ་པར་དག་པའི་ཚུལ་ཁྲིམས་སྲུང་ངོ ། །ཚུལ་ཁྲིམས་དང ། ཚུལ་ཁྲིམས་ངན་པ་ཅན་དང ། སྦྱིན་པ་དང ། སེར་སྣ་དང ། བྱམས་པ་དང ། ཞེ་སྡང་དང ། བརྩོན་འགྲུས་དང ། ལེ་ལོ་ཅན་རབ་འབྲིང་ཐ་མ་ཀུན་ལ་བྱེ་བྲག་མི་འབྱེད་པའི་སེམས་དང ། ཁྱད་པར་མེད་པའི་འདུ་ཤེས་ཀྱིས་ཚུལ་ཁྲིམས་ཡོངས་སུ་སྲུང་ངོ ། །ཁམས་གསུམ་གྱི་སེམས་ཅན་ཐམས་ཅད་ལ་ཞེ་སྡང་མེད་པ་དང ། ཁོང་ཁྲོ་བ་མེད་པ་དང ། ངན་པར་སྤྱོད་པ་མེད་པས་ཚུལ་ཁྲིམས་ཡོངས་སུ་སྲུང་ངོ ། །སྲིད་པ་གསུམ་གྱི་ཕུང་པོ་དང ། ཁམས་དང ། སྐྱེ་མཆེད་ལ་རྣམ་པར་རྟོག་པ་མེད་པས་ཚུལ་ཁྲིམས་ཡོངས་སུ་སྲུང་ངོ ། །འདོད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ ། །གཟུགས་ཡོད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ ། །གཟུགས་མེད་པའི་ཁམས་ལ་མི་གནས་པར་ཚུལ་ཁྲིམས་སྲུང་ངོ ། །སྲིད་པའི་རྣམ་པར་སྨིན་པའི་འབྲས་བུ་ཐམས་ཅད་ལ་མི་གནས་པར་ཚུལ་ཁྲིམས་སྲུང་ངོ ། །རྙེད་པ་དང་མི་རྙེད་པ་ལ་མི་གནས་པར་ཚུལ་ཁྲིམས་སྲུང་ངོ ། །འདུ་བྱེད་རྣམས་ལ་མི་གནས་པར་ཚུལ་ཁྲིམས་སྲུང་སྟེ། འདི་དག་ནི་བྱང་ཆུབ་སེམས་དཔའི་ཚུལ་ཁྲིམས་རྣམ་པར་དག་པ་གོ་ཆ་ཆེན་པོའི་འཁོར་ལོ་ཐུན་མོང་མ་ཡིན་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཚུལ་ཁྲིམས་རྣམ་པར་དག་པ 60.242b གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ཤིང་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཁྱིམ་ན་གནས་ཤིང་སྡོམ་པ་ལེན་པ། །རང་བྱུང་སོ་སོར་ཐར་པའི་ཚུལ་ཁྲིམས། །ཐེག་པ་གཉིས་དང་ཐུན་མོང་ཡིན་ཏེ། །བྱང་ཆུབ་ཆེན་པོ་ཞེས་ནི་མི་བྱ། །མཁས་པ་སྟོང་པ་ཉིད་ཆོས་སྒོམ་པ། །འཇིག་རྟེན་ཀུན་ལ་མི་རྟེན་མི་གནས། །སྲིད་པ་ཀུན་ལ་གནས་མ་ཡིན་པར། །རྣམ་པར་དག་པའི་ཚུལ་ཁྲིམས་སྲུང་ངོ ། །མཚན་མ་སྤོང་བའི་ཚུལ་ཁྲིམས་དག་ནི། །ཆགས་པ་མེད་དེ་ཟག་པ་ཀུན་མེད། །ཚུལ་ཁྲིམས་འདི་ལྟ་སྲུང་བ་དག་ནི། །ཡང་དག་བསོད་ནམས་ཞིང་ཞེས་དེ་བྱ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་བཟོད་པའི་གོ་ཆ་ཆེན་པོའི་འཁོར་ལོ་ཞེས་བྱ་བ་ཡོད་དེ་བྱང་ཆུབ་སམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་བཟོད་པའི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བཟོད་པ་ལ་མཚན་ཉིད་རྣམ་པ་གཉིས་ཏེ། གང་ཞེ་ན་འཇིག་རྟེན་པ་དང ། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་གྱི 60.243a བཟོད་པ་ཞེ་ན། དེ་ནི་ཟག་པ་དང་བཅས་པའི་བཟོད་པ་སྟེ། སེམས་ཅན་ལ་དམིགས་པ། ལེན་པ་དང་བཅས་པ། མཚན་མ་དང་བཅས་པ་རྣམ་པར་སྨིན་པའི་འབྲས་བུ་ལ་རྟེན་པ། བསོད་ནམས་ཀྱི་ལས་ལ་བརྟེན་ཏེ་བཟོད་པར་བྱེད་པའོ། །གཞན་ཡང་བདག་གི་གཟུགས་དང ། སྒྲ་དང ། དྲི་དང ། རོ་དང ། རེག་བྱ་ལ་བརྟེན་ནས་བཟོད་པར་བྱེད་པའོ། །འཇུག་པ་དང་བཅས་པའི་བཟོད་པ་ཇི་མི་སྙམ་པ་མེད་པའི་བཟོད་པ་དང ། མཐུ་ཞན་པའི་བཟོད་པའི་སེམས་ཅན་གཏོང་བའི་བཟོད་པ་དང ། གཡོ་དང་སྒྱུར་བཅས་པའི་བཟོད་པ་དང ། ཕ་རོལ་ལ་འདྲིད་པའི་བཟོད་པ་དང ། སེམས་ཅན་ལ་ཕན་པ་དང་བདེ་བའི་དོན་མི་བྱེད་པའི་བཟོད་པ་སྟེ། འདི་དག་ནི་བྱང་ཆུབ་སེམས་དཔའི་འཇིག་རྟེན་གྱི་བཟོད་པ་ཞེས་བྱ་སྟེ། བཟོད་པ་འདི་ནི་ཉན་ཐོས་དང་རང་སངས་རྒྱས་ལ་སོགས་པ་དང་ཐུན་མོང་མ་ཡིན་གྱི་གོ་ཆ་ཆེན་པོའི་འཁོར་ལོ་ཞེས་མི་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་མ་ཡིན་ཏེ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་ཞེས་ཀྱང་མི་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་བཟོད་པ་གོ་ཆ་ཆེན་པོའི་འཁོར་ལོ་ཞེ་ན། ཟག་པ་མེད་པའི་བཟོད་པ་སྟེ། འཕགས་པ་ཐམས་ཅད་ཀྱི་ཆོས་ཆེན་པོའི་འོད་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་ཆགས་པ་མེད་པའི་བཟོད་པ་དང ། བྱ་བའི་དངོས་པོ་ཐམས་ཅད་དང ། ཚིག་ཏུ་སྨྲ་བ་དང ། རྒྱུ་དང ། མཚན་མ་དང ། ཡི་གེ་དང ། སྒྲ་སྐད་ཐམས་ཅད་ཡོངས་སུ་བཅད་པའི་སྐྱེ་མཆེད་ལ་བརྟེན་པའི་བཟོད་པ་སྤྱོད་དོ། །བཟོད་པ་འདི་བསྒོམས་པས་ཀུན་ནས་ཉོན་མོངས་པ་གསུམ་དང ། བསྐལ་པ་རྣམ་གསུམ་དང ། མཚན་ཉིད་གསུམ་དང ། དུས་གསུམ་དང ། སྲིད་པ་གསུམ་དང ། འདུ་བྱེད་རྣམ་གསུམ་དང ། མི་དགེ་བའི་རྩ་བ་གསུམ་དང ། ཆུ་བོ་བཞི་དང ། མདུད་པ་རྣམ་བཞི་དང ། ཉེ་བར་ལེན་པ་བཞི་དང ། ལུས་ཀྱི་མདུད་པ 60.243b རྣམ་བཞི་ལ་སོགས་པ་ཡོངས་སུ་བཅད་པས་བཟོད་པ་འདི་སྒོམ་པའི་ཚེ་སེམས་དང་ཡིད་རབ་ཏུ་ཞི་བས་འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་གོ་ཆ་ཆེན་པོའི་འཁོར་ལོའི་བཟོད་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོའི་འཁོར་ལོའི་བཟོད་པ་དེ་དང་ལྡན་པས་ཐོག་མ་སེམས་བསྐྱེད་པ་ནས་འདོད་པ་ལྔ་རྣམས་ཡོངས་སུ་བསལ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ཤིང་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། བཟོད་པ་ལ་ནི་རྣམ་པ་གཉིས་ཏེ། །མཚན་མར་བཅས་དང་མཚན་མ་མེད་པ། །མཚན་མར་བཅས་པའི་བཟོད་པ་ཆགས་ཡོད། །མཁས་པ་དག་ནི་དེ་ལ་མི་བསྟོད། །འདུ་བྱེད་རྣམ་གསུམ་ཕུང་པོ་ཁམས་དང ། །སྐྱེ་མཆེད་ལ་རྟེན་བཟོད་པ་སྒོམ་པ། །དེ་ནི་ཟག་བཅས་བཟོད་པ་ཡིན་ཏེ། །བྱང་ཆུབ་སེམས་དཔའ་ཆེན་པོ་མ་ཡིན། །ཕྱིན་ཅི་ལོག་ནི་རྣམ་བཞི་བསལ་ནས། །ཆགས་པ་མེད་པའི་བཟོད་པ་སྒོམ་ཞིང ། །འདུ་བྱེད་རྣམ་པ་གསུམ་དག་ཞི་ན། །བཟོད་པ་འདི་ལ་ཐམས་ཅད་བསྟོད་འགྱུར། །འདུ་བྱེད་ཐམས་ཅད་རབ་ཏུ་ཞི་ཞིང ། །རྟོག་པ་ཐམས་ཅད་ཡོངས་སུ་སྤངས་ཏེ། །སེམས་ནི་ནམ་མཁའ་འདྲ་བར་མཉམ་པ། །བཟོད་པ་འདི་ལ་ཐམས་ཅད་བསྟོད་འགྱུར། །ཐམས་ཅད་ཆོས་ལ་རོ་གཅིག་འཐུན་པར། །སྟོང་པ་མཚན་མ་མེད་པ་ཞི་བ། །སེམས་ནི་ཅི་ལ་འང་མི་གནས་མི་ཆགས། །བཟོད་པ་འདི་ནི་ཕན་དོན་ཆེར་འགྱུར། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི 60.244a བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང་རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱད་པར་འགྱུར་རོ། །དེ་ལ་ཇི་ལྟར་ན་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བརྩོན་འགྲུས་ལ་རྣམ་པ་གཉིས་ཏེ། འཇིག་རྟེན་པ་དང ། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་པའི་བརྩོན་འགྲུས་ཞེ་ན། བྱང་ཆུབ་སེམས་དཔའ་རྣམས་ཤིན་དུ་འབད་པའི་བརྩོན་འགྲུས་ཀྱིས་འཇིག་རྟེན་གྱི་བསོད་ནམས་ཀྱི་ལས་ཀྱི་དངོས་པོ་རྣམ་པ་གསུམ་ལ་ནན་ཏན་བྱེད་དོ། །བསོད་ནམས་གང་ཞེ་ན། འདི་ལྟ་སྟེ། སྦྱིན་པ་བྱེད་པའི་བསོད་ནམས་ཀྱི་ལས་དང ། ཚུལ་ཁྲིམས་སྲུང་བའི་བསོད་ནམས་བྱེད་པའི་ལས་དང ། བསྒོམ་པའི་བསོད་ནམས་བྱེད་པའི་ལས་སོ། །ལས་འདི་དག་བྱེད་པ་ནི་བརྩོན་འགྲུས་རྣམ་པ་གསུམ་ཞེས་བྱ་སྟེ། བརྩོན་འགྲུས་རྣམ་པ་གསུམ་པོ་འདི་དག་ནི་སེམས་ཅན་ལ་དམིགས་པ་ཟག་པ་དང་བཅས་པ། ཉེ་བར་ལེན་པ་དང་བཅས་པ། རྣམ་པར་སྨིན་པའི་འབྲས་བུ་ལ་བརྟེན་པ་བསོད་ནམས་ཀྱི་ལས་ལ་བརྟེན་པ་སྟེ། དེ་ནི་བྱང་ཆུབ་སེམས་དཔའི་འཇིག་རྟེན་གྱི་བརྩོན་འགྲུས་ཞེས་བྱའོ། །བརྩོན་འགྲུས་འདི་ནི་ཉན་ཐོས་དང ། རང་སངས་རྒྱས་ཀྱི་ཐེག་པ་ལ་སོགས་པ་དང་ཐུན་མོང་ཡིན་ཏེ། གོ་ཆ་ཆེན་པོའི་འཁོར་ལོ་ཞེས་མི་བྱ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་ཡང་མ་ཡིན་ནོ། ། 60.244b དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཞེ་ན། བྱང་ཆུབ་སེམས་དཔའ་དག་ཤིན་དུ་འབད་པའི་བརྩོན་འགྲུས་ཀྱིས་སེམས་ཅན་ཐམས་ཅད་ལ་མཉམ་པའི་སེམས་ཀྱིས་ཉོན་མོངས་པའི་ལས་དང་སྡུག་བསྔལ་ཐམས་ཅད་སེལ་བ་སྟེ། བརྩོན་འགྲུས་འདི་ནི་འཕགས་པ་ཐམས་ཅད་ཀྱིས་བསྔགས་པ། ཟག་པ་མེད་པ། ཉེ་བར་ལེན་པ་མེད་པ། རྟེན་དང་གནས་མེད་དེ། བརྩོན་འགྲུས་དང ། ལེ་ལོ་དང ། སྦྱིན་པ་དང ། སེར་སྣ་དང ། ཚུལ་ཁྲིམས་དང ། ངན་པའི་ཚུལ་ཁྲིམས་ཅན་དང ། བྱམས་པ་དང ། ཞེ་སྡང་དང ། སེམས་ཅན་རབ་དང ། འབྲིང་དང ། ཐ་མ་ཀུན་ལ་མི་འབྱེད་པའི་སེམས་དང ། བྱེ་བྲག་མེད་པའི་འདུ་ཤེས་ཀྱིས་ཤིན་དུ་འབད་པའི་བརྩོན་འགྲུས་རྩོམ་མོ། །ཁམས་གསུམ་གྱི་སེམས་ཅན་ཐམས་ཅད་ལ་མཉམ་པ་ཉིད་དང ། དམིགས་པ་མེད་པས་བྱ་བའི་ལས་བྱེད་དེ་སྨྲ་བ་དང ། རྟོག་པ་དང ། དཔྱོད་པའི་གནས་ཐམས་ཅད་ལ་མི་གནས་པའི་སེམས་ཀྱིས་ཤིན་དུ་འབད་པའི་བརྩོན་འགྲུས་རྩོམ་མོ། །སྲིད་པ་གསུམ་གྱི་ཕུང་པོ་དང ། ཁམས་དང ། སྐྱེ་མཆེད་ལ་རྣམ་པར་རྟོག་པ་མེད་པས་ཤིན་དུ་འབད་པའི་བརྩོན་འགྲུས་རྩོམ་སྟེ། འདོད་པའི་ཁམས་ལ་མི་གནས་པའི་འབད་པའི་བརྩོན་འགྲུས་དང ། གཟུགས་ཡོད་པའི་ཁམས་ལ་མི་གནས་པའི་འབད་པའི་བརྩོན་འགྲུས་དང ། གཟུགས་མེད་པའི་ཁམས་ལ་མི་གནས་པའི་འབད་པའི་བརྩོན་འགྲུས་དང ། སྲིད་པའི་རྣམ་པར་སྨིན་པའི་འབྲས་བུ་ཐམས་ཅད་ལ་མི་རྟོག་པའི་འབད་པའི་བརྩོན་འགྲུས་དང ། རྙེད་པ་དང་མ་རྙེད་པ་ཀུན་ལ་མི་གནས་པའི་འབད་པའི་བརྩོན་འགྲུས་དང ། འདུ་བྱེད་རྣམས་ལ་མི་གནས 60.245a པའི་འབད་པའི་བརྩོན་འགྲུས་དང ། འཇིག་རྟེན་གྱི་བསོད་ནམས་ཀྱི་ལས་ཀྱི་དངོས་པོ་གསུམ་ལ་མི་གནས་པའི་འབད་པའི་བརྩོན་འགྲུས་དང ། འཇིག་རྟེན་ལས་འདས་པ་དང་ལྡན་པའི་བསོད་ནམས་ཀྱི་ལས་ཀྱི་དངོས་པོ་རྣམ་པ་གསུམ་ལ་མི་གནས་པའི་འབད་པའི་བརྩོན་འགྲུས་དང ། འཇིག་རྟེན་ལས་འདས་པ་དང་ལྡན་པའི་བསོད་ནམས་ཀྱི་ལས་ཀྱི་དངོས་པོ་རྣམ་པ་གསུམ་ལ་ཤིན་དུ་བརྩོན་འགྲུས་རྩོམ་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་གང་བརྩོན་འགྲུས་ཀྱི་གོ་ཆ་ཆེན་པོའི་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་རྣམ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ཏེ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། དབང་པོ་དྲུག་ལ་ཤིན་དུ་ཆགས་པའི། །བུས་པ་ཆུ་བོ་ལྔས་ནི་ཁྱེར་བ། །ཤིན་དུ་འབད་པའི་བརྩོན་འགྲུས་རྩོམ་ཡང ། །མཁས་པ་རྣམས་ཀྱིས་དེ་ལ་སྨོད་འགྱུར། །སེམས་ཅན་དམིགས་ཤིང་ཟག་དང་བཅས་ལ། །ལེན་པར་བཅས་ཤིང་བརྩོན་འགྲུས་རྩོམ་ན། །ཡང་དག་བསོད་ནམས་ཞིང་མ་ཡིན་ཏེ། །བྱང་ཆུབ་སེམས་དཔའ་ཆེན་པོ་མ་ཡིན། །མཁས་པ་བརྩོན་འགྲུས་རྩོམ་པ་དག་ནི། །ཆགས་པ་ཐམས་ཅད་རིང་དུ་སྤངས་ཏེ། །སེམས་ནི་ཅི་ལ་འང་མི་གནས་མི་ཆགས། །ཡང་དག་བསོད་ནམས་ཞིང་ཞེས་དེ་བྱ། །མིང་དང་གཟུགས་ལ་ཆགས་པ་མེད་ཅིང ། །ཕུང་པོ 60.245b ཁམས་དང་སྐྱེ་མཆེད་སྤངས་ཏེ། །ཐམས་ཅད་འཁོར་གྱི་རྟེན་དུ་འགྱུར་བ། །དེ་ནི་བྱང་ཆུབ་སེམས་དཔའ་ཆེན་པོ། །འཇིག་རྟེན་སྤྱོད་ཀྱང་ཆུ་ཟླ་བཞིན་ཏེ། །འབད་པའི་བརྩོན་འགྲུས་རྩོམ་པའི་མཐར་ཕྱིན། །འཁོར་ལོ་འདི་ཡིས་ཡོངས་སུ་བཅོམ་པ། །སྐྱེ་བོ་ཀུན་ནས་ཉོན་མོངས་བཅིངས་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་བསམ་གཏན་གྱི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ནས་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་བསམ་གཏན་གྱི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བསམ་གཏན་ལ་རྣམ་པ་གཉིས་ཏེ། འཇིག་རྟེན་དང ། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་གྱི་བསམ་གཏན་ཞེ་ན། བྱང་ཆུབ་སེམས་དཔའ་རྣམས་ཕུང་པོ་ལ་གནས་ནས་བསམ་གཏན་སྒོམ་པ་དང ། ཁམས་ལ་གནས་ནས་བསམ་གཏན་སྒོམ་པ་དང ། སྐྱེ་མཆེད་ལ་གནས་ནས་བསམ་གཏན་སྒོམ་པ་དང ། འདོད་པའི་ཁམས་ལ་གནས་ནས་བསམ་གཏན་སྒོམ་པ་དང ། གཟུགས་ཡོད་པའི་ཁམས་ལ་གནས་ནས་བསམ་གཏན་སྒོམ་པ་དང ། གཟུགས་མེད་པའི་ཁམས་ལ་གནས་ནས་བསམ་གཏན་སྒོམ་པ་དང ། སྡོམ་པ་གསུམ་ལ་གནས་ནས་བསམ་གཏན་སྒོམ་པ་དང ། རྣམ་པར་གྲོལ་བ་གསུམ་ལ་གནས་ནས་བསམ་གཏན་སྒོམ་པ་དང ། དྲན་པ་ཉེ་བར་གཞག་པ་བཞི་ལ་གནས་ནས་བསམ་གཏན་སྒོམ་པ་དང ། ཡང་དག་པར་སྤོང་བ་བཞི་ལ་གནས 60.246a ནས་བསམ་གཏན་སྒོམ་པ་དང ། རྫུ་འཕྲུལ་གྱི་རྐང་པ་བཞི་ལ་གནས་ནས་བསམ་གཏན་སྒོམ་པ་དང ། དབང་པོ་ལྔ་ལ་གནས་ནས་བསམ་གཏན་སྒོམ་པ་དང ། སྟོབས་ལྔ་ལ་གནས་ནས་བསམ་གཏན་སྒོམ་པ་དང ། བྱང་ཆུབ་ཀྱི་ཡན་ལག་བདུན་ལ་གནས་ནས་བསམ་གཏན་སྒོམ་པ་དང ། འཕགས་པའི་ལམ་ཡན་ལག་བརྒྱད་པ་ལ་གནས་ནས་བསམ་གཏན་སྒོམ་པ་དང ། སའི་ཁམས་ལ་གནས་ནས་བསམ་གཏན་སྒོམ་པ་དང ། ཆུའི་ཁམས་ལ་གནས་ནས་བསམ་གཏན་སྒོམ་པ་དང ། མེའི་ཁམས་ལ་གནས་ནས་བསམ་གཏན་སྒོམ་པ་དང ། རླུང་གི་ཁམས་ལ་གནས་ནས་བསམ་གཏན་སྒོམ་པ་དང ། ནམ་མཁའི་ཁམས་ལ་གནས་ནས་བསམ་གཏན་སྒོམ་པ་དང ། རྣམ་པར་ཤེས་པའི་ཁམས་ལ་གནས་ནས་བསམ་གཏན་སྒོམ་པ་དང ། བདེ་བའི་ཚོར་བ་ལ་གནས་ནས་བསམ་གཏན་སྒོམ་པ་དང ། སྡུག་བསྔལ་བའི་ཚོར་བ་ལ་གནས་ནས་བསམ་གཏན་སྒོམ་པ་དང ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པའི་ཚོར་བ་ལ་གནས་ནས་བསམ་གཏན་སྒོམ་པ་དང ། ནམ་མཁའ་མཐའ་ཡས་སྐྱེ་མཆེད་ལ་གནས་ནས་བསམ་གཏན་སྒོམ་པ་དང ། རྣམ་ཤེས་མཐའ་ཡས་སྐྱེ་མཆེད་ལ་གནས་ནས་བསམ་གཏན་སྒོམ་པ་དང ། ཅུང་ཟད་མེད་པའི་སྐྱེ་མཆེད་ལ་གནས་ནས་བསམ་གཏན་སྒོམ་པ་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་གནས་ནས་བསམ་གཏན་སྒོམ་པ་དང ། འཇིག་རྟེན་འདི་ལ་གནས་ནས་སྒོམ་པ་དང ། འཇིག་རྟེན་ཕ་རོལ་ལ་གནས་ནས་བསམ་གཏན་སྒོམ་པ་དང ། འདུ་ཤེས་ཆུང་ངུ་ལ་གནས་ནས་བསམ་གཏན་སྒོམ་པ་དང ། འདུ་ཤེས་ཆེན་པོ་ལ་གནས་ནས་བསམ་གཏན་སྒོམ་པ་དང ། འདུ་ཤེས་ཚད་མེད་པ་ལ་གནས་ནས་བསམ་གཏན་སྒོམ་པ་སྟེ། བསམ་གཏན་དེ་དག་ནི་ཟག་པ་དང་བཅས་པ། ཉེ་བར་ལེན་པ་དང་བཅས་པ། ཆགས་པ་དང་བཅས་པ་སྟེ། འདི་ནི་བྱང་ཆུབ 60.246b སེམས་དཔའི་འཇིག་རྟེན་དང་བཅས་པའི་བསམ་གཏན་ཞེས་བྱའོ། །བསམ་གཏན་འདི་ནི་ཉན་ཐོས་དང ། རང་སངས་རྒྱས་ཀྱི་ཐེག་པ་དང་ཐུན་མོང་བ་ཞེས་བྱ་སྟེ། གོ་ཆ་ཆེན་པོའི་འཁོར་ལོ་མ་ཡིན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་མི་བྱ་སྟེ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པར་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་བསམ་གཏན་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་ཕུང་པོ་དང་བྲལ་བར་བསམ་གཏན་སྒོམ་པ་དང ། ཁམས་དང་བྲལ་བར་བསམ་གཏན་སྒོམ་པ་དང ། སྐྱེ་མཆེད་དང་བྲལ་བར་བསམ་གཏན་སྒོམ་པ་དང ། འདོད་པའི་ཁམས་དང་བྲལ་བར་བསམ་གཏན་སྒོམ་པ་དང ། གཟུགས་ཀྱི་ཁམས་དང་བྲལ་བར་བསམ་གཏན་སྒོམ་པ་དང ། གཟུགས་མེད་པའི་ཁམས་དང་བྲལ་བར་བསམ་གཏན་སྒོམ་པ་དང ། སྡོམ་པ་གསུམ་དང་བྲལ་བར་བསམ་གཏན་སྒོམ་པ་དང ། རྣམ་པར་ཐར་པ་གསུམ་དང་བྲལ་བར་བསམ་གཏན་སྒོམ་པ་དང ། དྲན་པ་ཉེ་བར་གཞག་པ་བཞི་དང་བྲལ་བར་བསམ་གཏན་སྒོམ་པ་དང ། ཡང་དག་པར་སྤོང་བ་བཞི་དང་བྲལ་བར་བསམ་གཏན་སྒོམ་པ་དང ། རྫུ་འཕྲུལ་གྱི་རྐང་པ་བཞི་དང་བྲལ་བར་བསམ་གཏན་སྒོམ་པ་དང ། དབང་པོ་ལྔ་དང་བྲལ་བར་བསམ་གཏན་སྒོམ་པ་དང ། སྟོབས་ལྔ་དང་བྲལ་བར་བསམ་གཏན་སྒོམ་པ་དང ། བྱང་ཆུབ་ཀྱི་ཡན་ལག་བདུན་དང་བྲལ་བར་བསམ་གཏན་སྒོམ་པ་དང ། འཕགས་པའི་ལམ་ཡན་ལག་བརྒྱད་པ་དང་བྲལ་བར་བསམ་གཏན་སྒོམ་པ་དང ། སའི་ཁམས་དང་བྲལ་བར་བསམ་གཏན་སྒོམ་པ་དང ། ཆུའི་ཁམས་དང་བྲལ་བར་བསམ་གཏན་སྒོམ་པ་དང ། མེའི་ཁམས་དང་བྲལ་བར་བསམ་གཏན་སྒོམ་པ་དང ། རླུང་གི་ཁམས་དང་བྲལ་བར་བསམ་གཏན་སྒོམ་པ་དང ། ནམ་མཁའི 60.247a ཁམས་དང་བྲལ་བར་བསམ་གཏན་སྒོམ་པ་དང ། རྣམ་པར་ཤེས་པའི་ཁམས་དང་བྲལ་བར་བསམ་གཏན་སྒོམ་པ་དང ། བདེ་བར་ཚོར་བ་དང་བྲལ་བར་བསམ་གཏན་སྒོམ་པ་དང ། སྡུག་བསྔལ་དུ་ཚོར་བ་དང་བྲལ་བར་བསམ་གཏན་སྒོམ་པ་དང ། སྡུག་བསྔལ་བ་ཡང་མ་ཡིན་བདེ་བ་ཡང་མ་ཡིན་པར་ཚོར་བ་དང་བྲལ་བར་བསམ་གཏན་སྒོམ་པ་དང ། ནམ་མཁའ་མཐའ་ཡས་སྐྱེ་མཆེད་དང་བྲལ་བར་བསམ་གཏན་སྒོམ་པ་དང ། རྣམ་ཤེས་མཐའ་ཡས་སྐྱེ་མཆེད་དང་བྲལ་བར་བསམ་གཏན་སྒོམ་པ་དང ། ཆུང་ཟད་མེད་པའི་སྐྱེ་མཆེད་དང་བྲལ་བར་བསམ་གཏན་སྒོམ་པ་དང ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དང་བྲལ་བར་བསམ་གཏན་སྒོམ་པ་དང ། འཇིག་རྟེན་འདི་དང་བྲལ་བར་བསམ་གཏན་སྒོམ་པ་དང ། འཇིག་རྟེན་ཕ་རོལ་དང་བྲལ་བར་བསམ་གཏན་སྒོམ་པ་དང ། འདུ་ཤེས་ཆུང་ངུ་དང་བྲལ་བར་བསམ་གཏན་སྒོམ་པ་དང ། འདུ་ཤེས་ཆེན་པོ་དང་བྲལ་བར་བསམ་གཏན་སྒོམ་པ་དང ། འདུ་ཤེས་ཚད་མེད་པ་དང་བྲལ་བར་བསམ་གཏན་སྒོམ་པ་སྟེ། བསམ་གཏན་འདི་ནི་འཕགས་པའི་འོད་ཟེར་ཆེན་པོ་བསྐྱེད་པ། ཟག་པ་མེད་པ། ཉེ་བར་ལེན་པ་མེད་པ། ཆགས་པ་མེད་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་བསམ་གཏན་གྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་བསམ་གཏན་གྱི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ཤིང་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག 60.247b པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། བདག་གི་ཁུར་ལྕི་སྤོང་བའི་ཕྱིར་ནི། །དམིགས་དང་བཅས་པའི་ཏིང་འཛིན་བསྒོམས་ཏེ། །བདག་གི་ཀུན་ནས་ཉོན་མོངས་གཅོད་འདོད། །ཡང་དག་མཁས་པའི་མཚན་ཉིད་མ་ཡིན། །སྣོད་ལ་རྟེན་ཅིང་རྟོག་དང་བཅས་པ། །རྣམ་པར་གྲོལ་འདོད་ཏིང་འཛིན་སྒོམ་ཡང ། །ཚུ་རོལ་ཕ་རོལ་མུ་ལ་གནས་ན། །སེམས་ཅན་དག་ལ་ཕན་དོན་བྱེད་མིན། །སེམས་ཅན་ཀུན་ལ་ཕན་དང་བདེ་ཕྱིར། །ཏིང་འཛིན་སྒོམ་ཞིང་ཁུར་ལྕི་སྤོངས་ཏེ། །ཀུན་ནས་ཉོན་མོངས་ཐམས་ཅད་སེལ་བ། །དེ་ནི་ཡང་དག་མཁས་པའི་མཚན་ཉིད། །སེམས་ཅན་ཐམས་ཅད་སིམ་པར་བྱེད་ཕྱིར། །མི་གནས་པ་ཡི་ཏིང་འཛིན་སྒོམ་སྟེ། །འདོད་པའི་སྲིད་པ་ཐམས་ཅད་ཆོད་པ། །དེ་ནི་བློ་གྲོས་ཆེན་པོ་ཞེས་བྱ། །སྲིད་པས་བཅིངས་པ་ཐམས་ཅད་བཀྲོལ་ཏེ། །འཇིགས་པ་མེད་པའི་གྲོང་དུ་བཟུང་ཕྱིར། །རབ་ཏུ་ཞི་བའི་ཏིང་འཛིན་སྒོམ་པ། །དེ་ནི་བྱང་ཆུབ་སེམས་དཔའ་ཆེན་པོའོ། ་་་་་་་་་་ ། བམ་པོ་བཅུ་པ་སྟེ་ཐ་མ། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེས་བྱ་བ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་དེ་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ཤིང་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་ཤེས་རབ་ལ་ནི་རྣམ་པ་གཉིས་ཏེ། འཇིག་རྟེན་གྱི་དང 60.248a འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་པའི་ཤེས་རབ་ཅེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་ཐེག་པ་གསུམ་གྱི་དམ་པའི་ཆོས་ཀློག་པ་དང ། འདོན་པ་དང ། གླེགས་བམ་དུ་འདྲི་བ་དང ། ཉན་པ་དང ། ཕ་རོལ་ལ་སྟོན་ཅིང་འཆད་པ་འབའ་ཤིག་ལ་རྟེན་ཏེ། སེམས་ཅན་ཐམས་ཅད་ཀྱི་མ་རིག་པའི་མུན་པ་སེལ་བར་འདོད་པ་དང་སེམས་ཅན་ཐམས་ཅད་ཀྱི་ཤེས་རབ་ཀྱི་སྒྲོན་མ་འབྱུང་བའི་ཕྱིར་དེ་བཞིན་གཤེགས་པའི་བསྟན་པའི་ཉན་ཐོས་ཀྱི་ཐེག་པ་དང་ལྡན་པའི་ཆོས་ལ་ཤིན་དུ་འབད་པའི་བརྩོན་འགྲུས་ཀྱིས་ཀློག་པ་དང ། འདོན་པ་དང ། ཉན་པ་དང ། གླེགས་བམ་དུ་འདྲི་བ་དང ། གཞན་དག་ལ་རྒྱས་པར་སྟོན་ཅིང་འཆད་པ་དང ། ཡང་དག་པའི་བརྩོན་འགྲུས་ཀྱིས་ནན་ཏན་བྱེད་པ་དང ། དེ་བཞིན་གཤེགས་པས་བསྟན་པའི་རང་སངས་རྒྱས་ཀྱི་ཐེག་པ་དང་ལྡན་པའི་ཆོས་ལ་ཀློག་པ་དང ། འདོན་པ་དང ། ཉན་པ་དང ། གླེགས་བམ་དུ་འདྲི་བ་དང ། གཞན་དག་ལ་རྒྱས་པར་སྟོན་ཅིང་འཆད་པ་དང ། ཡང་དག་པའི་བརྩོན་འགྲུས་ཀྱིས་ནན་ཏན་དུ་སྤྱོད་དོ། །དེ་བཞིན་གཤེགས་པས་བསྟན་པའི་ཐེག་པ་ཆེན་པོ་དང་ལྡན་པའི་ཆོས་ལ་བརྩོན་འགྲུས་སུ་ཀློག་པ་དང ། འདོན་པ་དང ། ཉན་པ་དང ། གླེགས་བམ་དུ་འདྲི་བ་དང ། གཞན་ལ་ཡང་རྒྱས་པར་སྟོན་ཅིང་འཆད་པ་དང ། ཡང་དག་པའི་བརྩོན་འགྲུས་ཀྱིས་ནན་ཏན་བྱེད་པ་སྟེ། འཕགས་པའི་ཟག་པ་མེད་པའི་ལམ་གྱི་ཡན་ལག་ཚོལ་བ་མ་ཡིན། འཕགས་པའི་ལམ་ཚོལ་བ་མ་ཡིན། འཕགས་པའི་ལམ་དུ་གཏོགས་པའི་རྣམ་པར་གྲོལ་བ་ཚོལ་བ་མ་ཡིན། རབ་ཏུ་ཞི་བ་ཡང་དག་པའི་ཤེས་རབ་ལ་ནན་ཏན་བྱེད་པ་མ་ཡིན་ཏེ། རྟག་ཏུ་ལྟ་བ་དང་བཅས་པ། ཤེས་རབ་དང་བཅས་པའི་ཤེས་རབ་ལ་ནན་ཏན་བྱེད་དོ། །དེ་ལྟར་ལེན་པ་དང་བཅས་པ། ཆགས་པ་དང་བཅས་པའི་ཤེས་རབ་ནི་བྱང་ཆུབ་སེམས་དཔའི་འཇིག་རྟེན་གྱི་ཤེས་རབ་ཅེས་བྱའོ། །ཤེས་རབ་དེ་ནི་ཉན་ཐོས་དང ། རང་སངས 60.248b རྒྱས་ཐམས་ཅད་དང་ཐུན་མོང་བ་ཡིན་ཏེ། གོ་ཆ་ཆེན་པོའི་འཁོར་ལོ་ཞེས་མི་བྱ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཤེས་རབ་ཅེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བྱང་ཆུབ་ཀྱི་ལམ་ལ་བརྩོན་འགྲུས་སུ་ནན་ཏན་བྱེད་པ་ནི་ཅི་ནུས་སུ་ཐེག་པ་གསུམ་གྱི་ཡང་དག་པའི་ཆོས་ལ་ཀློག་པ་དང ། འདོན་པ་དང ། ཉན་པ་དང ། གླེགས་བམ་དུ་འབྲི་བ་དང ། གཞན་དག་ལ་རྒྱས་པར་སྟོན་ཅིང་འཆད་ཀྱང་དེ་ལ་དམིགས་སུ་མེད་པའི་སྦྱོར་བ་ལ་གནས་ཏེ། མི་གཡོ་བ་དང ། མི་རྟོག་པ་དང ། ངོ་བོ་ཉིད་མེད་པ་དང ། ནམ་མཁའ་ལྟ་བུའི་སེམས་དང ། རབ་ཏུ་ཞི་བའི་སེམས་དང ། འཕེལ་བ་དང ། འགྲིབ་པ་མེད་པའི་ཤེས་རབ་དང ། ཆགས་པ་མེད་པའི་སེམས་དང ། སྐྱེ་བ་དང་འགོག་པ་མེད་པའི་སེམས་དང ། ཕྱིར་མི་ལྡོག་པའི་སེམས་དང ། ཆོས་མཉམ་པ་ཉིད་གྱི་སེམས་དང ། དེ་བཞིན་ཉིད་ཀྱི་སེམས་དང ། ཡང་དག་པའི་མཐའི་སེམས་དང ། ཆོས་ཀྱི་དབྱིངས་ཀྱི་སེམས་དང ། བདག་མེད་པའི་སེམས་དང ། རྣམ་པར་མི་རྟོག་པའི་སེམས་དང ། རབ་ཏུ་ཞི་བ་དང ། བཟོད་པ་དང ། རྟོག་པ་དང་བྲལ་བའི་སེམས་ཀྱིས་གྲུབ་པ་དང ། འཇིགས་པ་མེད་པའི་ས་ལ་ཤིན་དུ་ཐབས་མཁས་པས་བདེ་བར་གནས་པ་དང ། མི་གནས་པ་མི་ཆགས་པའི་མཆོག་དམ་པའི་བློ་གྲོས་ཀྱི་ས་ལ་ཐབས་མཁས་པས་བདེ་བར་གནས་པ་སྟེ། ཤེས་རབ་འདི་ནི་ལེན་པ་མེད་པ་ཆགས་པ་མེད་པས་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཤེས་རབ་ཀྱི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་གོ་ཆ་ཆེན་པོའི་འཁོར 60.249a ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང ། རང་སངས་རྒྱས་ཀྱི་ས་ལས་ཤིན་དུ་འདས་ཤིང་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་མཆོད་པ་དང ། སྲུང་བ་དང ། བསྙན་བཀུར་བྱ་བའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་མཁས་པའི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། ཉན་ཐོས་དང་རང་སངས་རྒྱས་ཐམས་ཅད་ལས་ཤིན་དུ་འདས་ནས་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་ཐབས་མཁས་པའི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་ཐབས་མཁས་པ་ལ་རྣམ་པ་གཉིས་ཏེ། འཇིག་རྟེན་པ་དང ། འཇིག་རྟེན་ལས་འདས་པའོ། །དེ་ལ་ཇི་ལྟར་ན་བྱང་ཆུབ་སེམས་དཔའི་འཇིག་རྟེན་པའི་ཐབས་མཁས་པ་ཡིན་ཞེ་ན། འདི་ལྟ་སྟ། བྱང་ཆུབ་སེམས་དཔའ་རྣམས་བདག་གི་དོན་ནམ་གཞན་གྱི་དོན་ནམ། གཉི་གའི་དོན་ལ་བདག་དང་གཞན་དུ་རྟོག་ཅིང་བཟོ་དང་སྒྱུ་རྩལ་རྣམ་པ་སྣ་ཚོགས་ཀྱིས་བདག་དང་གཞན་གྱི་དོན་ཡོངས་སུ་བསྒྲུབ་པའི་ཕྱིར་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དང ། རང་སངས་རྒྱས་དང ། ཉན་ཐོས་ལ་མཆོད་པ་དང ། བསྙེན་བཀུར་བྱེད་པ་དང ། ཕ་དང ། མ་དང ། ནད་པ་དང ། ཉམ་ཐག་པ་དང ། མགོན་དང་རྟེན་མེད་པ་དང ། གནོད་པ་མང་པོས་སྡུག 60.249b བསྔལ་བར་གྱུར་པ་མཐོང་ན་ཤིན་དུ་ཐབས་མཁས་པས་སྒྲོལ་ཞིང་བསྡུ་བའི་དངོས་པོ་རྣམས་ཞེས་སེམས་ཅན་ཡོངས་སུ་སྨིན་པར་བྱེད་དོ། །བྱང་ཆུབ་སེམས་དཔའ་དེ་བདག་ཐེག་པ་ཆེན་པོ་ལ་གནས་པས་ཉན་ཐོས་ཀྱི་ཐེག་པ་པ་དང ། རང་སངས་རྒྱས་ཀྱི་ཐེག་པ་པ་དང ། ཐེག་པ་ཆེན་པོའི་སྣོད་མ་ཡིན་པ་ཉན་ཐོས་དང ། རང་སངས་རྒྱས་ཀྱི་དབང་པོ་ཡོངས་སུ་མ་སྨིན་པ་ལ་ཤིན་དུ་ཕྲ་ལ་ཟབ་པ་དམ་པའི་ཆོས་སྟོན་ཏེ། སློབ་ཏུ་གཞུག་པ་དང ། འཕགས་པའི་བསམ་གཏན་ལ་ནན་ཏན་དུ་བྱེད་དུ་གཞུག་གོ། །གཞན་ཡང་དོན་དམ་པའི་བདེན་པ་བསྟེན་ཏེ་ནན་ཏན་བྱེད་དུ་གཞུག་པ་དང ། ཕྱིན་ཅི་ལོག་བཞི་ལས་བཟླ་ཞིང་མི་ལྟུང་བའི་ཆོས་ཀྱི་མཚན་ཉིད་རིག་པར་བྱ་བ་དང ། སོ་སོ་ཡང་དག་པར་རིག་པ་བཞི་ལ་གཞོལ་བར་བྱ་བ་ནས། གཞན་ཡང་དྲན་པ་ཉེ་བར་གཞག་པ་བཞི་དང ། ཡང་དག་པར་སྤོང་བ་བཞི་དང ། རྫུ་འཕྲུལ་གྱི་རྐང་པ་བཞི་དང ། དབང་པོ་ལྔ་དང ། སྟོབས་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་དང ། ལྷག་མ་དང་བཅས་པ་དང ། ལྷག་མ་མ་ལུས་པའི་ལམ་དང་ལམ་གྱི་འབྲས་བུའི་བར་དུ་འཇུག་པར་བྱ་བ་ལ་མཁས་པའི་ཡེ་ཤེས་ཀྱིས་ཡོངས་སུ་སྨིན་པར་བྱེད་དོ། །སེམས་ཅན་གང་ཁེ་དང ། གྲགས་པ་དང ། ལོངས་སྤྱོད་ལ་ཆགས་ཏེ་དབང་པོ་རྒོད་པ། དགེ་བའི་རྩ་བ་ཡོངས་སུ་མ་སྨིན་པ་ལ་ནི་མདོ་སྡེ་དང ། འདུལ་བ་དང ། མ་མོ་ཀློག་པ་དང ། འདོན་པ་བྱེད་དུ་གཞུག་པ་དང ། སངས་རྒྱས་གཞན་གྱིས་བཤད་པ་ལས་གཞན་པ་རྣམ་པར་གྲོལ་བ་དང་འཐུན་པའི་གཙུག་ལག་ཀློག་ཅིང་འདོན་དུ་བཅུག་སྟེ་ཡོངས་སུ་སྨིན་པར་བྱེད་དོ། །སེམས་ཅན་གང་སྦྱིན་པ་བྱེད་པ་ལ་མི་མོས་པ་ལ་ནི་ནོར་རིན་པོ་ཆེ་དང ། ནོར་དབྱིག་རྣམ་པ་སྣ་ཚོགས་གཏོང་བར་སྐུལ་བས་ཡོངས་སུ་སྨིན་པར་བྱེད་དོ། །སེམས་ཅན་གང་གཏུམ་པ་མི་ངེས་པའི་རང་བཞིན་ཅན་ཚངས་པའི་གནས་བཞི་སློབ་ཏུ་སྐུལ 60.250a བ་དང་སེམས་ཅན་གང་ཞེ་སྡང་ཅན་ལ་བཟོད་པ་སློབ་པར་སྐུལ་བ་དང ། སེམས་ཅན་གང་ལེ་ལོ་ཅན་ལ་ནི་བརྩོན་འགྲུས་སློབ་ཏུ་སྐུལ་བ་དང ། སེམས་ཅན་གང་སེམས་གཡེང་བ་ལ་ནི་བསམ་གཏན་སྒོམ་པར་སྐུལ་བ་དང ། སེམས་ཅན་གང་འཆལ་བའི་ཤེས་རབ་ཅན་ལ་ནི་ཡང་དག་པའི་ཆོས་སྟོན་པས་བཀའ་ལུང་བརྡ་སྤྲོད་ཅིང་ལུང་འབོགས་པ་ལ་ཐབས་མཁས་པས་ཡོངས་སུ་སྨིན་པར་བྱེད་དོ། །སེམས་ཅན་གང་དཀོན་མཆོག་གསུམ་ལ་མངོན་པར་མ་དད་ཅིང་མི་གནས་པ་དང ། མི་སྤྱོད་པ་ཅན་ལ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་དང ། དཀོན་མཆོག་གསུམ་ལ་དད་པ་དང ། དགེ་བསྙེན་མའི་སྡོམ་པ་བསླབས་པས་ཡོངས་སུ་སྨིན་པར་བྱེད་དོ། །གཞན་ཡང་བཟོ་དང་སྒྱུ་རྩལ་རྣམ་པ་སྣ་ཚོགས་ཀྱི་གནས་ལ་སློབ་ཅིང་སྤྱོད་དུ་བཙུད་པས་ཡོངས་སུ་སྨིན་པར་བྱེད་དོ། །དེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་པའི་ཤིན་དུ་ཐབས་མཁས་པའི་ཡེ་ཤེས་ཀྱི་རྣམ་པ་ནི་ཆུ་ཀླུང་གང་གཱའི་བྱེ་མ་སྙེད་པས་མང་ངོ ། །དེ་ལྟར་ཡི་གེ་དང ། གཙུག་ལག་དང ། བཟོ་དང ། སྒྱུ་རྩལ་གྱི་ལས་ཀྱི་གནས་ཐམས་ཅད་ལ་ལྷག་པའི་སྤྱོད་པ་དང ། བརྩོན་འགྲུས་དང ། ཐབས་མཁས་པའི་ཡེ་ཤེས་ཀྱིས་མུ་སྟེགས་ཅན་དང ། སྟོན་པ་གཞན་ལ་ཞུགས་པ་ཐམས་ཅད་བཏུལ་བ་དེ་ནི་བྱང་ཆུབ་སེམས་དཔའི་འཇིག་རྟེན་པའི་ཐབས་མཁས་པའོ། །ཐབས་མཁས་པ་འདི་ནི་ཉན་ཐོས་དང ། རང་སངས་རྒྱས་ཐམས་ཅད་དང་ཐུན་མོང་བ་ཡིན་ཏེ། སངས་རྒྱས་ཀྱི་ཆོས་ཐམས་ཅད་གནས་པའི་རྒྱུར་གྱུར་པ། ཐབས་མཁས་པ་སྤྱོད་པའི་གནས་སུ་གྱུར་པ་དགེ་བསྙེན་པའི་སྡོམ་པ་ལ་བསླབ་པ་དང ། ཤིན་དུ་ཐབས་མཁས་པ་ལྷུན་གྱིས་གྲུབ་པས་རྟོག་པ་མེད་པའི་ཕྱིར་ལྡོག་པ་མེད་པའི་ཆོས་སུ་གྱུར་པའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་གང་སྟོན་པ་མཁས་པ་ལ་འང་མི་རྟེན། དགེ་བའི་བཤེས་གཉེན་ལ་འང་མི་ལྟོས་པར་འཇིག་རྟེན་གྱི་ཐབས་མཁས 60.250b པ་ལ་ནན་ཏན་བྱེད་ན། བྱང་ཆུབ་སེམས་དཔའ་དེ་ནི་འཇིག་རྟེན་གྱི་ཐབས་མཁས་པས་རྨོངས་པ་ཡིན་ཏེ། ངན་སོང་དུ་ལྟུང་བར་འགྱུར་རོ། །དེ་ནི་འཇིག་རྟེན་ལས་འདས་པའི་ཤིན་དུ་ཐབས་མཁས་པའི་ཡེ་ཤེས་ལ་གཞོལ་ཞིང་གནས་པར་ཡང་མི་ནུས་ལ། ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །ཤིན་དུ་ཐབས་མི་མཁས་པས་སེམས་ཅན་གྱི་དབང་པོ་དང ། སྤྱོད་པའི་ཁྱད་པར་ཡང་མི་ཤེས་ལ། ཤིན་དུ་ཐབས་མཁས་པ་ལ་འང་རྨོངས་པར་གྱུར་པས་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་དང ། ཐེག་པ་ཆེན་པོའི་སྣོད་མ་ཡིན་པ་དང ། ཐེག་པ་ཆེན་པོའི་དབང་པོར་མ་སྨིན་པ་དག་ལ་ཐེག་པ་ཆེན་པོ་སྟོན་པ་དང ། སློབ་ཅིང་ནན་ཏན་བྱེད་དུ་བཅུག་གོ། །གང་ཐེག་པ་ཆེན་པོའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་ཉན་ཐོས་དང ། རང་སངས་རྒྱས་ཀྱི་ཐེག་པའི་ཆོས་སྟོན་ཅིང ། ཉན་ཐོས་དང ། རང་སངས་རྒྱས་ཀྱི་ཐེག་པ་ལ་སློབ་ཅིང་ནན་ཏན་བྱེད་དུ་བཅུག་གོ། །གང་སངས་རྒྱས་ཀྱི་ཐེག་པའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་ཉན་ཐོས་ཀྱི་ཐེག་པའི་ཆོས་སྟོན་ཅིང ། ཉན་ཐོས་ཀྱི་ཐེག་པ་ལ་སློབ་ཅིང་ནན་ཏན་བྱེད་དུ་བཅུག་གོ། །གང་ཉན་ཐོས་ཀྱི་ཐེག་པའི་ཆོས་ཀྱི་སྣོད་དུ་གྱུར་པའི་སེམས་ཅན་ལ་ནི་འཁོར་བའི་ཆོས་ལ་ནི་བདེ་བ་དང་དགའ་བར་སྟོན་ཏེ། འཁོར་བའི་ཆོས་ལ་སྐྱོ་བ་སྐྱེད་པར་མི་སྟོན་ཏོ། །གཞན་ཡང་ཤིན་དུ་ཐབས་མཁས་པ་ལ་རྨོངས་པས་སེམས་ཅན་གང་སྲོག་གཅོད་པ་ལ་དགའ་བ་ནས་དེ་བཞིན་དུ་ལོག་པར་ལྟ་བའི་བར་དུ་མོས་པ་དག་ལ་ནི་ཤིན་དུ་ཟབ་པ་ཐེག་པ་ཆེན་པོའི་ཆོས་སྟོན་ཏེ། དེ་ལ་འཁོར་བ་འདི་ནས་ཤི་འཕོས་ནས་ཕ་རོལ་དུ་སྐྱེ་ཞིང་སྡུག་བསྔལ་གྱི་འབྲས་བུ་རྣམ་པར་སྨིན་པ་མྱོང་བ་ལ་སྐྱོ་ཞིང་འཇིགས་པ་དང ། སྡིག་པ་མི་དགེ་བའི་ཆོས་སྤང་བ་མི་སྟོན་ཏོ། །གཞན་ཡང་ཤིན་དུ་ཐབས་མཁས་པ་ལ་རྨོངས་པས་སེམས་ཅན་གང་ཚུལ་ཁྲིམས་སྲུང་བར་མོས་པ་ལ་ནི་སྦྱིན 60.251a པ་སྤྱོད་དུ་འཇུག་གོ། །སེམས་ཅན་གང་བཟོད་པ་སྒོམ་པར་མོས་པ་ལ་ནི་བཟོད་པ་སྤོང་བ་སྟོན་ཅིང་ཚུལ་ཁྲིམས་སྲུང་དུ་འཇུག་གོ། །སེམས་ཅན་གང་བརྩོན་འགྲུས་སྒོམ་པར་མོས་པ་ལ་ནི་བརྩོན་འགྲུས་སྤོང་བ་སྟོན་ཅིང་བཟོད་པ་སྤྱོད་དུ་འཇུག་གོ། །སེམས་ཅན་གང་བསམ་གཏན་སྒོམ་པར་མོས་པ་ལ་ནི་བསམ་གཏན་སྤོང་བ་སྟོན་ཅིང་བརྩོན་འགྲུས་ལ་ནན་ཏན་བྱེད་དུ་བཅུག་གོ། །སེམས་ཅན་གང་ཤེས་རབ་སྒོམ་པར་མོས་པ་ལ་ནི་ཤེས་རབ་སྤོང་བ་སྟོན་ཅིང་བསམ་གཏན་སྒོམ་དུ་འཇུག་གོ། །དེ་ལྟར་བྱང་ཆུབ་སེམས་དཔའ་འཇིག་རྟེན་གྱི་ཐབས་མཁས་པ་ལ་རྨོངས་པས་ཡང་དག་པ་ཇི་ལྟ་བ་བཞིན་དུ་སེམས་ཅན་ལ་ཕན་པ་དང་བདེ་བའི་དོན་བྱེད་མི་ནུས་ཏེ། སེམས་ཅན་ཐམས་ཅད་ཀྱི་སྡིག་པའི་གྲོགས་པོར་གྱུར་ཏོ། །ཐབས་མཁས་པ་འདི་ནི་དམིགས་པ་དང་བཅས་པ་ཆགས་པ་དང་བཅས་པ་སྟེ། འདི་ནི་བྱང་ཆུབ་སེམས་དཔའི་འཇིག་རྟེན་གྱི་ཐབས་མཁས་པ་ཞེས་བྱའོ། །དེ་ལྟར་འཇིག་རྟེན་གྱི་ཐབས་མཁས་པ་འདི་ནི་ཉན་ཐོས་དང ། རང་སངས་རྒྱས་ཀྱི་ཐེག་པ་དང་ཐུན་མོང་པ་ཡིན་ཏེ། གོ་ཆ་ཆེན་པོའི་འཁོར་ལོ་མ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་ཀྱང་མི་བྱ་སྟེ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཡང་དག་པ་མ་ཡིན་ནོ། །དེ་ལ་ཇི་ལྟར་ན་བྱང་ཆུབ་སེམས་དཔའ་འཇིག་རྟེན་ལས་འདས་པའི་ཤིན་དུ་ཐབས་མཁས་པ་ཡིན་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བདག་གི་དོན་བཏང་སྟེ། གཞན་གྱི་དོན་ལྷུར་བྱེད་པས་བཟོ་དང་སྒྱུ་རྩལ་རྣམ་པ་སྣ་ཚོགས་མངོན་པར་སྟོན་པས་ཡོངས་སུ་སྨིན་པར་བྱ་བའི་ཕྱིར་སངས་རྒྱས་བཅོམ་ལྡན་འདས་དང ། བྱང་ཆུབ་སེམས་དཔའ་དང ། ཉན་ཐོས་དང ། རང་སངས་རྒྱས་དང ། ཕ་དང་མ་ལ་བསྙེན་བཀུར་དང ། མཆོད་པ་བྱེད་པ་དང ། ནད་པ་དང ། ཕོངས་པ་ཉམ་ཐག་པ་དང ། མགོན 60.251b དང་སྐྱབས་མེད་པ་དང ། ཤིན་དུ་སྡུག་བསྔལ་རྣམ་པ་མང་པོས་གཟིར་བ་ལ་ཐབས་ཀྱིས་སྒྲོལ་བ་དང ། བསྡུ་བའི་དངོས་པོ་རྣམ་པ་བཞིས་སེམས་ཅན་ཡོངས་སུ་སྨིན་པར་བྱེད་དོ། །ཅི་ལ་མོས་པ་དང ། དབང་པོ་དང ། སྣོད་ཇི་ལྟ་བ་བཞིན་དུ་སེམས་ཅན་ལ་དམ་པའི་ཆོས་སྟོན་ཏོ། །གཞན་ཡང་རིམ་གྱིས་ཉན་ཐོས་ཀྱི་ཐེག་པ་པ་ནི་རང་སངས་རྒྱས་ཀྱི་ཐེག་པ་ལ་སློབ་ཅིང་ནན་ཏན་བྱེད་པར་སྐུལ་བ་དང ། རང་སངས་རྒྱས་ཀྱི་ཐེག་པ་པ་ནི་ཐེག་པ་ཆེན་པོ་སློབ་ཅིང་ནན་ཏན་བྱེད་པར་སྐུལ་བ་དང ། གལ་ཏེ་ཉན་ཐོས་དང ། རང་སངས་རྒྱས་ཀྱི་ཐེག་པར་དབང་པོ་མ་སྨིན་པ་ནི་འཁོར་བའི་སྡུག་བསྔལ་གྱི་ཆོས་ཀྱིས་སྐྱོ་བ་སྟོན་ཅིང་འཁོར་བས་སྐྱོ་བ་དང ། མྱ་ངན་ལས་འདའ་བ་ཚོལ་བར་སྐུལ་ལོ། །སེམས་ཅན་གང་སྲོག་གཅོད་པ་ལ་མོས་པ་ནས་ལོག་པར་ལྟ་བའི་བར་དུ་ཆགས་པ་ལ་ནི་དབང་པོ་དང ། རང་བཞིན་ཇི་ལྟ་བ་བཞིན་དུ་འཁོར་བར་འཁོར་བའི་ཆོས་སྟོན་པ་དང ། འཇིག་རྟེན་འདི་ནས་ཕ་རོལ་དུ་སྐྱེ་བ་དང ། ཕ་རོལ་ཀྱི་སྡུག་བསྔལ་གྱི་འབྲས་བུ་མྱོང་བར་སྟོན་ཏེ། སྡིག་པ་མི་དགེ་བའི་ཆོས་ཀྱིས་འཇིགས་པ་དང་སྐྱོ་བ་སྟོན་ཏོ། །ཁ་ཅིག་ལ་ནི་ཉན་ཐོས་ཀྱི་ཐེག་པ་དང་ལྡན་པའི་ཆོས་སྟོན་ཏོ། །ཁ་ཅིག་ལ་ནི་རང་སངས་རྒྱས་ཀྱི་ཐེག་པ་དང་ལྡན་པའི་ཆོས་སྟོན་ཏོ། །ཁ་ཅིག་ལ་ནི་བླ་ན་མེད་པའི་ཐེག་པའི་ཆོས་ཡང་དག་པར་བསྟན་ཏེ་ཁད་ཀྱིས་སློབ་ཏུ་འཇུག་གོ། །སེམས་ཅན་གང་སྦྱིན་པ་ལ་མོས་པར་གྱུར་པ་རྣམས་ལ་ནི་ཚུལ་ཁྲིམས་རྣམ་པར་དག་པའི་མཆོག་སྲུང་བར་བསྟན་པ་དེ་བཞིན་དུ་རྒྱས་པར་སེམས་ཅན་གང་བསམ་གཏན་ལ་མོས་པར་གྱུར་པ་ལ་ནི་ཟག་པ་མེད་པ་འཕགས་པའི་ལམ་གྱི་མཆོག་གིས་བསྡུས་པ་དང ། ཤེས་རབ་བླ་ན་མེད་པ་སྟོན་ཅིང་ནན་ཏན་བྱེད་དུ་བཅུག་སྟེ། ཤིན་དུ་ཐབས་མཁས་པ་འདི་ནི་དམིགས་པ་མེད་པ་དང ། ཆགས་པ་མེད་པ་སྟེ། 60.252a འདི་ནི་བྱང་ཆུབ་སེམས་དཔའི་འཇིག་རྟེན་ལས་འདས་པའི་ཐབས་མཁས་པའི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤིན་དུ་ཐབས་མཁས་པའི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་པ་ལྔ་ཡོངས་སུ་བསལ་བས་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ཤིང་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱ་བའོ། །དེ་ནས་བཅོམ་ལྡན་འདས་ཀྱིས་དོན་དེ་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཤེས་རབ་ནན་ཏན་རྣམ་གཉིས་ཏེ། །འཇིག་རྟེན་བཅས་དང་འཇིག་རྟེན་འདས། །ཆགས་པ་དེ་ནི་འཇིག་རྟེན་བཅས། །ཆགས་མེད་པ་ནི་འཇིག་རྟེན་འདས། །ཤིན་དུ་ཐབས་མཁས་ནན་ཏན་ནི། །ཁྱད་པར་རྣམ་པ་གཉིས་ལ་གནས། །དམིགས་པ་ཡོད་པ་འཇིག་རྟེན་བཅས། །དམིགས་མེད་དེ་ནི་འཇིག་རྟེན་འདས། །གང་ཞིག་ཐེག་པ་གཅིག་སྟོན་པ། །དེ་ནི་ལེགས་པར་ཆོས་སྟོན་མིན། །བདག་ཀྱང་ཡོངས་སུ་མི་སྨིན་ན། །གཞན་གྱི་དོན་དུ་ག་ལ་འགྱུར། །གཅིག་ཏུ་མི་དགེ་སེམས་ཅན་ལ། །ཐེག་པ་གསུམ་གྱི་ཆོས་སྟོན་ན། །དེ་ནི་གཏི་མུག་རྨོངས་པ་སྟེ། །བྱང་ཆུབ་ཆེན་པོ་དེ་མ་ཡིན། །ཐེག་པ་གསུམ་ལ་འཇུག་སྤྲོ་ཞིང ། །ཡང་དག་པ་ཡི་ཆོས་འདོད་ལ། །འཁོར་བས་སྤྲོ་བའི་ཆོས་སྟོན་ན། །མཁས་པའི་རང་བཞིན་དེ་མ་ཡིན། །རྩེ་གཅིག་བློ་ཡིས་རབ་བརྟགས་ཏེ། །འདོད་དང་མོས་པ་བཞིན་དུ་སྟོན། །འདི་ནི་ཤིན་དུ་ཐབས་མཁས་པས། །མཁས་པ་རྣམས་ཀྱིས་དེ་ལ་བསྔགས། །སེམས་ཅན་སྡིག་པ་དག 60.252b སྤྱོད་ཅིང ། །ཐེག་པ་གསུམ་གྱི་སྣོད་འགྱུར་ན། །དབང་པོའི་སྣོད་བཞིན་ཆོས་བསྟན་ཏེ། །སྡིག་པ་ཀུན་ལས་གྲོལ་བར་བྱེད། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཡོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པས་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱ་བར་འགྱུར་རོ། །དེ་ལ་ཇི་ལྟར་ན་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཞེ་ན། རིགས་ཀྱི་བུ་བྱང་ཆུབ་སེམས་དཔའི་བྱམས་པ་ལ་རྣམ་པ་གཉིས་ཏེ། ཆོས་ལ་དམིགས་པའི་བྱམས་པ་དང ། སེམས་ཅན་ལ་དམིགས་པའི་བྱམས་པའོ། །ཆོས་ལ་དམིགས་པའི་བྱམས་པ་ནི་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཞེས་བྱའོ། །སེམས་ཅན་ལ་དམིགས་པའི་བྱམས་པ་ནི་བྱམས་པ་ཆེན་པོའི་གོ་ཆ་ཞེས་མི་བྱའོ། །དེ་ཅིའི་ཕྱིར་ཞེ་ན། སེམས་ཅན་ལ་དམིགས་པའི་བྱམས་པ་ནི་ཉན་ཐོས་དང ། རང་སངས་རྒྱས་ཀྱི་ཐེག་པ་དང་ཐུན་མོང་དུ་གྱུར་པ་སྟེ། ཉན་ཐོས་དང ། རང་སངས་རྒྱས་ནི་བདག་ལ་ཕན་པ་དང་བདེ་བའི་དོན་གྱི་ཕྱིར་སེམས་ཅན་ལ་དམིགས་པའི་བཟོད་པ་ལ་ནན་ཏན་བྱེད་པའོ། །ཉན་ཐོས་དང ། རང་སངས་རྒྱས་ནི་བདག་ཞི་བ་དང ། བདག་མྱ་ངན་ལས་འདའ་བ་དང ། བདག་གི་སྒྲིབ་པ་བསལ་བ་དང ། བདག་གི་ཀུན་ནས་ཉོན་མོངས་པ་གཅད་པའི་ཕྱིར་ཡིན་གྱི། སེམས་ཅན་ཐམས་ཅད་ཀྱི་ཕྱིར་སེམས་ཅན་ལ་དམིགས་པའི་བྱམས་པས་བརྩོན་འགྲུས་ལ་ནན་ཏན་བྱེད་པ་ནི་མ་ཡིན་ནོ། ། 60.253a དེ་བས་ན་བྱམས་པ་འདི་ནི་བྱམས་པ་ཆེན་པོ་ཞེས་མི་བྱ་སྟེ། གོ་ཆ་ཆེན་པོ་མ་ཡིན་ནོ། །ཆོས་ལ་དམིགས་པའི་བྱམས་པ་ནི་ཉན་ཐོས་དང ། རང་སངས་རྒྱས་ཀྱི་ཐེག་པ་པ་དང་ཐུན་མོང་བ་མ་ཡིན་གྱི། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འབའ་ཞིག་གིས་ནན་ཏན་བྱེད་ནུས་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ། བརྩོན་འགྲུས་ཀྱི་སྦྱོར་བས་ཆོས་ལ་དམིགས་པའི་བྱམས་པ་འདི་ལ་ནན་ཏན་བྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ཡོངས་སུ་མྱ་ངན་ལས་འདས་པ་དང ། ཀུན་ནས་ཉོན་མོངས་པ་ཡོངས་སུ་གཅད་པའི་ཕྱིར་ཤིན་དུ་འབད་པའི་བརྩོན་འགྲུས་ཀྱིས་ཆོས་ལ་དམིགས་པའི་བྱམས་པ་ལ་ནན་ཏན་བྱེད་དོ། །དེ་བས་ན་བྱམས་པ་འདི་ནི་བྱམས་པ་ཆེན་པོའི་གོ་ཆ་ཆེན་པོ་ཞེས་བྱའོ། །གཞན་ཡང་བྱང་ཆུབ་སེམས་དཔའ་ཆོས་ལ་དམིགས་པའི་བྱམས་པ་ལ་ནན་ཏན་བྱེད་པ་ནི་ཕུང་པོ་ལ་མི་གནས། སྐྱེ་མཆེད་ལ་མི་གནས། ཁམས་ལ་མི་གནས། དྲན་པ་ཉེ་བར་གཞག་པ་རྣམས་ལ་མི་གནས་པ་ནས་བྱང་ཆུབ་ཀྱི་ལམ་གྱི་ཡན་ལག་གི་བར་དུ་མི་གནས་སོ། །འདོད་པའི་ཁམས་ལ་མི་གནས། གཟུགས་ཀྱི་ཁམས་ལ་མི་གནས། གཟུགས་མེད་པའི་ཁམས་ལ་མི་གནས། འཇིག་རྟེན་འདི་ལ་མི་གནས། འཇིག་རྟེན་ཕ་རོལ་ལ་མི་གནས། ཚུ་རོལ་གྱི་མུ་ལ་མི་གནས། ཕ་རོལ་གྱི་མུ་ལ་མི་གནས། དམིགས་པ་ལ་མི་གནས། མི་དམིགས་པ་ལ་མི་གནས་ཏེ། དེ་ལྟར་བྱང་ཆུབ་སེམས་དཔའ་ཆོས་ལ་དམིགས་པའི་བྱམས་པ་ལ་ནན་ཏན་བྱེད་པས་ཉན་ཐོས་དང ། རང་སངས་རྒྱས་ཐམས་ཅད་ཀྱི་ཐེག་པའི་ས་ལས་ཤིན་དུ་འདས་ཏེ། དེ་ནི་བྱང་ཆུབ་སེམས་དཔའི་ཆོས་ལ་དམིགས་པའི་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་ཞེས་བྱའོ། །རིགས་ཀྱི་བུ་བྱང་ཆུབ་སེམས 60.253b དཔའ་སེམས་དཔའ་ཆེན་པོ་གང་བྱམས་པ་ཆེན་པོའི་གོ་ཆ་ཆེན་པོའི་འཁོར་ལོ་འདི་དང་ལྡན་པའི་ཐོག་མ་སེམས་བསྐྱེད་ནས་འདོད་པ་རྣམ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་ཐམས་ཅད་ཀྱིས་མཆོད་པ་དང ། བསྲུང་བ་དང ། བསྙེན་བཀུར་བྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཉན་ཐོས་དང་ནི་རང་རྒྱལ་བ། །སེམས་ཅན་དམིགས་པའི་བྱམས་སྒོམ་པ། །སེམས་ལ་བཅུ་གསུམ་སྐྱོན་འཆང་ཞིང ། །བདག་ལ་ཕན་པའི་དོན་ཕྱིར་རྩོལ། །བྱང་ཆུབ་སེམས་དཔའ་གྲགས་ཆེན་ནི། །སེམས་ཅན་ཐམས་ཅད་ཀུན་གྱི་ཕྱིར། །ཐུན་མོང་མ་ཡིན་བྱམས་ཆེན་བསྒོམས། །བཅུ་གསུམ་སེམས་ཀྱི་སྐྱོན་རྣམས་སྤངས། །དྲི་མ་བཅུ་གསུམ་རབ་སྤངས་ནས། །བྱང་ཆུབ་ཆེན་པོར་གཞོལ་བར་བྱེད། །ཆོས་ལ་དམིགས་པའི་བྱམས་བསྒོམས་ན། །བསོད་ནམས་ཞིང་གྲུབ་རིང་བ་མིན། །བཅུ་གསུམ་སྟོབས་ལ་བདེར་གནས་ན། །སེམས་ཅན་ཀུན་ལས་ཤིན་དུ་འཕགས། །ཇི་ལྟར་སེང་གེའི་རྒྱལ་པོ་དེ། །རི་དགས་ཀུན་ལས་འཕགས་པ་བཞིན། །བཅུ་གསུམ་དགྲ་རྣམས་ཤིན་དུ་བཏུལ། །རྟག་དང་ཆད་པའི་མཐར་འཛིན་སྤངས། །སེམས་ལ་ཅིས་ཀྱང་མི་གོས་ན། །མྱུར་དུ་བྱང་ཆུབ་ཆེན་པོ་འཐོབ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་ཡོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས 60.254a བསྐྱེད་ནས་འདོད་པ་རྣམ་པ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པས་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་ཞིང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ཇི་ལྟར་ཞེ་ན། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ནི་བདག་ལ་ཕན་པ་དང་བདེ་བའི་དོན་གྱི་ཕྱིར་སྙིང་རྗེ་ལ་སྤྱོད་ཀྱི། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་སྙིང་རྗེ་ཆེན་པོ་སྐྱེད་པ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདག་འབའ་ཞིག་ལ་ཕན་པ་དང་བདེ་བའི་དོན་གྱི་ཕྱིར་སྙིང་རྗེ་ཆེན་པོ་བསྐྱེད་པ་མ་ཡིན་གྱི། སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་སྙིང་རྗེ་ཆེན་པོ་སྐྱེད་དོ། །དེ་བས་ན་བྱང་ཆུབ་སེམས་དཔའ་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་དང་ལྡན་པས་ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་བསྡུ་བའི་དངོས་པོ་རྣམ་པ་བཞིས་སེམས་ཅན་ཡོངས་སུ་སྨིན་པར་བྱེད་དོ། །སྙིང་རྗེ་ཆེན་པོས་སེམས་ཅན་ཐམས་ཅད་ལ་བདེ་བའི་དོན་གྱི་ཕྱིར་སྦྱིན་པས་ཡོངས་སུ་སྡུད་པ་ནི་འདི་ལྟ་སྟེ། རིན་པོ་ཆེ་དང ། ནོར་དང ། དབྱིག་དང ། ཐེག་པ་དང ། བྲན་དང ། ལས་བྱེད་པའི་མི་དང ། ཡུལ་དང ། སྲིད་དང ། བུ་དང ། ཆུང་མ 60.254b དང་།[་]ལུས་དང ། སྲོག་གི་བར་དུ་ཡོངས་སུ་གཏོང་བ་ལ་སེར་སྣ་མེད་དེ། མི་དམིགས་པའི་སྤྱོད་པ་ལ་སྦྱོར་བས་འདུལ་བའི་སེམས་ཅན་ཡོད་པར་མི་མཐོང ། སྦྱིན་པ་བྱེད་པར་མི་མཐོང ། ལེན་པར་མི་མཐོང ། ནོར་གྱི་དངོས་པོར་མི་མཐོང ། སྦྱིན་པ་སྤྱོད་པར་མི་མཐོང ། སྦྱིན་པ་བྱས་པའི་འབྲས་བུར་མི་མཐོང་བ་ནས་མི་དམིགས་པའི་བར་དུ་ཡང་མི་མཐོང་སྟེ། དེ་ལྟ་བུའི་སྙིང་རྗེ་ཆེན་པོ་སྐྱེད་དོ། །སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་ངག་སྙན་པ་དང ། དོན་སྒྲུབ་པ་དང ། དོན་འཐུན་པས་ཅི་དང་ཅིས་འདུལ་བ་བཞིན་དུ་མི་དམིགས་པ་ཡང་མི་མཐོང་བའི་བར་དུ་དེ་དང་དེས་རྒྱས་པར་སྟོན་ཅིང་འཆད་དོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྟག་ཏུ་མཆོག་དམ་པའི་དུལ་བའི་སེམས་དང ། རབ་ཏུ་ཞི་བའི་སེམས་དང ། ཚད་མེད་པའི་སེམས་དང ། ཕུང་པོ་དང ། ཁམས་དང ། སྐྱེ་མཆེད་ཐམས་ཅད་ལ་མངོན་པར་འདུ་མི་བྱེད་པའི་སེམས་ཀྱིས་གང་ནས་གང་དུ་སྐྱེས་ཀྱང་གཡོ་བ་མེད་པ་དང ། མི་གནས་པའི་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་འདིས་སྣོད་དུ་གྱུར་པའི་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་ལ་སྐྱོ་བ་མེད་དོ། །དེ་ལྟར་ན་བྱང་ཆུབ་སེམས་དཔའ་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་ཞེས་བྱ་སྟེ། ཉན་ཐོས་དང ། རང་སངས་རྒྱས་ཐམས་ཅད་དང་ཐུན་མོང་བ་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་སྙིང་རྗེ་ཆེན་པོའི་གོ་ཆ་ཆེན་པོའི་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་ལྔ་ཡོངས་སུ་བསལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་ཤིང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ 60.255a དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཤིན་དུ་ཟབ་མོ་དམ་པའི་ཆོས་དག་།སྙིང་རྗེ་ཆེན་པོའི་གཞི་རུ་དེ་འགྱུར། །ཤིན་དུ་དཔག་དཀའ་ནམ་མཁའ་འདྲ་སྟེ། །གནས་པ་མེད་དེ་གཟུགས་ཀྱང་མེད་དོ། །བྱང་ཆུབ་སེམས་དཔའི་བརྩོན་འགྲུས་ཆེན་པོ། །ཡོན་ཏན་ཆེན་པོ་དང་ནི་ལྡན་ཏེ། །རྒྱལ་བའི་ཡེ་ཤེས་སྙིང་རྗེ་ཆེན་པོས། །དཔའ་བོ་འཇིག་རྟེན་འདའ་བར་དེས་འགྱུར། །མགོན་དང་སྐྱབས་མེད་སེམས་ཅན་དག་ནི། །འཁོར་བའི་སྡུག་བསྔལ་རྙོག་པས་བཅིངས་པ། །སྙིང་རྗེ་ཆེན་པོའི་ཆུ་ཡིས་བཀྲུས་ཏེ། །སེམས་ཅན་རྣམ་པར་གྲོལ་བར་བྱེད་དོ། །བྱང་ཆུབ་སེམས་དཔའི་སྙིང་རྗེ་བསྐྱེད་པས། །འཁོར་བའི་རྒྱ་མཚོ་སྐེམས་པར་བྱེད་དེ། །ཉན་ཐོས་ཐེག་པའི་འཁོར་རྣམས་དང་ནི། །རང་རྒྱལ་ཐེག་པ་སྤྱོད་པས་མ་ཡིན། །འདོད་ཆགས་ཞེ་སྡང་གཏི་མུག་སེམས་ཅན། །ངན་སོང་དག་ཏུ་ལྟུང་བར་འགྱུར་བ། །སྙིང་རྗེ་ཆེན་པོའི་ཆུ་ཡིས་བཀྲུས་ཏེ། །སྡུག་བསྔལ་ཀུན་ལས་གྲོལ་བར་བྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་སོ་སོ་ཡང་དག་པར་རིག་པ། ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཤིན་དུ་རྒྱ་ཆེན་པོ་དང་ལྡན་པ་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང ། གཟུངས་རྣམས་དང ། ཤིན་དུ་བརྟན་པའི་བཟོད་པ་ཆེན་པོའི་གོ་ཆ་ཆེན་པོའི་འཁོར་ལོ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་ནས་འདོད་པ་རྣམ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས་ཤིན་དུ་འདས་པ་ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་ཆེན་པོར་འགྱུར་བ་དང ། ཉན་ཐོས་དང ། རང་སངས་རྒྱས 60.255b ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ་མཐའ་ཡས་པ། ཤིན་དུ་རྒྱ་ཆེ་བ་དང་ལྡན་པ་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང ། གཟུངས་རྣམས་དང ། ཤིན་དུ་བརྟན་པ་ཆེན་པོའི་གོ་ཆ་ཆེན་པོའི་འཁོར་ལོ་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་ཆོས་ཐམས་ཅད་ལ་ཤིན་དུ་རྟོག་པ་ནི་ཇི་ལྟར་ཟླ་བའི་དཀྱིལ་འཁོར་གྱི་འོད་ཀྱིས་ནམ་མཁའ་ཀུན་དུ་ཁྱབ་པ་བཞིན་དུ། སེམས་མཉམ་པ་ཉིད་དུ་གྱུར་པ། མཚན་མ་མེད་པ་རྟེན་པ་མེད་པ་མི་གནས་པ། གོས་པ་མེད་པའི་ཏིང་ངེ་འཛིན་ཐམས་ཅད་ཀྱི་སྒོ་དང ། གཟུངས་ཀྱི་སྒོ་ཐམས་ཅད་ལ་སེམས་ཀྱི་སྤྱོད་པ་མེད་པ། མིག་དང ། གཟུགས་དང ། མིག་གི་རྣམ་པར་ཤེས་པ་དང ། མིག་གི་འདུས་ཏེ་རེག་པ་ལ་ཡིད་ཀྱིས་རྣམ་པར་ཞེན་པ་དང་བྲལ་བ། སེམས་ཀྱི་སྤྱོད་པ་མེད་པ་ལས་མིག་གི་འདུས་ཏེ་རེག་པའི་རྐྱེན་གྱིས་ནང་གི་ཚོར་བ་རྣམ་གསུམ་སྐྱེས་ཏེ། བདེ་བ་དང ། སྡུག་བསྔལ་དང ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པར་ཚོར་བ་ལ་སེམས་རབ་ཏུ་ཞི་ཞིང་ཆགས་པ་མེད་དོ། །དེ་བཞིན་དུ་རྣ་བ་དང ། སྒྲ་དང ། རྣ་བའི་རྣམ་པར་ཤེས་པ་དང ། རྣ་བའི་འདུས་ཏེ་རེག་པ་དང ། སྣ་དང ། དྲི་དང ། སྣའི་རྣམ་པར་ཤེས་པ་དང ། སྣའི་འདུས་ཏེ་རེག་པ་དང ། ལྕེ་དང ། རོ་དང ། ལྕེའི་རྣམ་པར་ཤེས་པ་དང ། ལྕེའི་འདུས་ཏེ་རེག་པ་དང ། ལུས་དང ། རེག་བྱ་དང ། ལུས་ཀྱི་རྣམ་པར་ཤེས་པ་དང ། ལུས་ཀྱི་འདུས་ཏེ་རེག་པ་དང ། ཡིད་དང ། ཆོས་དང ། ཡིད་ཀྱི་རྣམ་པར་ཤེས་པ་དང ། ཡིད་ཀྱི་འདུས་ཏེ་རེག་པའི་བར་དུ་གཞུང་དེ་བཞིན་དུ་རྒྱས་པར་སེམས་དང ། ཡིད་དང ། རྣམ་པར་ཤེས་པ་ཐམས་ཅད་རྟག་ཏུ་ཞི་ཞིང་ཆགས་པ་མེད་དོ། །སེམས་དང ། ཡིད་དང ། རྣམ་པར་ཤེས་པ་ལས་སྐྱེས 60.256a པའི་ཚོར་བ་རྣམ་གསུམ་སྟེ། བདེ་བ་དང ། སྡུག་བསྔལ་དང ། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པར་ཚོར་བ་ལ་སེམས་རྟག་ཏུ་ཞི་ཞིང་ཆགས་པ་མེད་དོ། །དུས་གསུམ་གྱི་ཕུང་པོ་དང ། ཁམས་དང ། སྐྱེ་མཆེད་རྣམས་ཀྱི་རྣམ་པ་ཐམས་ཅད་ལ་ལེན་པ་མེད་པ། སེམས་ཀྱི་སྤྱོད་པ་མེད་པའོ། །གང་ཇི་སྙེད་ཁམས་གསུམ་དང ། འདུ་བྱེད་གསུམ་དང ། རེག་བྱ་གསུམ་དང ། ཚོར་བ་གསུམ་དང ། དབང་པོ་གསུམ་དང ། ཐེག་པ་གསུམ་དང ། སྡོམ་པ་གསུམ་དང ། རྣམ་པར་གྲོལ་བ་གསུམ་དང ། རྣམ་པ་དེ་དག་ཐམས་ཅད་ལ་སེམས་རབ་ཏུ་ཞི་བ། གནས་མེད་པ། མཚན་མ་མེད་པ། ལེན་པ་མེད་པས་མཉམ་པ་ཉིད་དུ་གནས་སོ། །གང་ཇི་སྙེད་སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང ། ཕ་རོལ་དུ་ཕྱིན་པ་ཐམས་ཅད་ལ་སེམས་ཀྱི་སྤྱོད་པ་མེད་པ་རབ་ཏུ་ཞི་བར་གནས་སོ། །དེ་བཞིན་དུ་དྲན་པ་ཉེ་བར་གཞག་པ་བཞི་དང ། ཡང་དག་པར་སྤོང་བ་བཞི་དང ། རྫུ་འཕྲུལ་གྱི་རྐང་པ་བཞི་དང ། དབང་པོ་ལྔ་དང ། སྟོབས་ལྔ་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་ལ་ཡང་སེམས་ཀྱི་སྤྱོད་པ་མེད་པ་རབ་ཏུ་ཞི་བར་གནས་སོ། །གང་ཇི་སྙེད་དགུ་མཐར་གྱིས་གནས་པའི་སྙོམས་པར་འཇུག་པ་ལ་ཡང་སེམས་ཀྱིས་སྤྱོད་པ་མེད་པར་རབ་ཏུ་ཞི་བར་གནས་སོ། །གཞན་ཡང་མངོན་པར་འདུ་བྱེད་པ་གསུམ་དང ། ཆོས་ལ་སྒྲིབ་པ་མེད་པའི་ཡེ་ཤེས་དང ། ལམ་གྱི་ཡན་ལག་དང ། ལམ་གྱི་རང་བཞིན་འདྲེན་པར་བྱེད་པ་དག་ལ་ཡང་ལེན་པ་མེད་པ། སེམས་ཀྱི་སྤྱོད་པ་མེད་པ། ཀུན་གཞི་རྣམ་པར་ཤེས་པ་དང ། ཀུན་གཞི་རྣམ་པར་ཤེས་པ་མ་ཡིན་པ་དང ། ཉེ་བར་ལེན་པ་དང་བཅས་པ་དང ། ཉེ་བར་ལེན་པ་མེད་པ་དང ། ཟག་པ་དང་བཅས་པ་དང ། ཟག་པ་མེད་པ་དང ། ཚུ་རོལ་གྱི་མུ་དང ། ཕ་རོལ་གྱི་མུ་དང ། ཆུང་ངུ 60.256b དང ། ཆེན་པོ་དང ། ཚད་མེད་པ་དང ། བྱེད་པ་དང ། མི་བྱེད་པ་དང ། དགེ་བ་དང ། མི་དགེ་བ་དང ། ལུང་དུ་མི་སྟོན་པ་ཐམས་ཅད་ཀྱི་རྣམ་པ་ལ་ལེན་པ་མེད་པ་དང ། སེམས་ཀྱི་སྤྱོད་པ་མེད་པར་རབ་ཏུ་ཞི་བར་གནས་སོ། །གང་ཇི་སྙེད་བྱམས་པ་ཆེན་པོ་དང ། སྙིང་རྗེ་ཆེན་པོ་དང ། ཐབས་མཁས་པས་སེམས་ཅན་སྨིན་པར་བྱེད་པ་ནས་སྲུང་བར་བྱ་བ་མེད་པ་གསུམ་དང ། མི་འཇིགས་པ་བཞི་དང ། སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཀྱི་བར་དུ་ཆོས་ཐམས་ཅད་ཀྱི་རྣམ་པ་ལ་ལེན་པ་མེད་པ། སེམས་ཀྱི་སྤྱོད་པ་མེད་པར་རབ་ཏུ་ཞི་བར་གནས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དག་འཁོར་ལོ་འདིའི་དབང་གིས་ཚོར་བ་རྣམ་གསུམ་གྱི་ཉེས་པ་ཡོངས་སུ་བསལ་བ་དང ། རྣམ་པར་རྟོག་པ་ཐམས་ཅད་ཡོངས་སུ་ཞི་བ་དང ། མཚན་མའི་ཆོས་ཐམས་ཅད་ཡོངས་སུ་སྤོང་བར་འགྱུར་རོ། །གཞན་ཡང་ཇི་སྙེད་ནམ་མཁའི་མིག་དང ། སྤྱི་བོའི་ཏིང་ངེ་འཛིན་རྣམས་དང ། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ཡང་འདྲེན་པར་འགྱུར་ཏེ། བྱང་ཆུབ་སེམས་དཔའ་འཁོར་ལོ་དེ་ལ་གནས་པས་གང་འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང ། གཞན་ཡང་སྲིད་པ་དང ། འགྲོ་བ་རྣམས་སུ་འཁོར་བའི་ལས་ཐམས་ཅད་ལྷག་མ་མ་ལུས་པར་ཡོངས་སུ་བསལ་ཏེ། རྣམ་པར་སྨིན་པའི་འབྲས་བུ་མི་མྱོང་བར་བྱེད་དོ། །གཞན་ཡང་རིགས་ཀྱི་བུ་འདི་ལྟ་སྟེ། མུན་པ་ནག་པོས་ནམ་མཁའ་ཐམས་ཅད་ཡོག་པ་ན་ཉི་མ་ཤར་བའི་ཚེ་མུན་པ་ཐམས་ཅད་སེལ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ 60.257a ཆེན་པོ་དང་ལྡན་པས་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང ། གཟུངས་རྣམས་དང ། ཤིན་དུ་བརྟེན་པའི་བཟོད་པའི་གོ་ཆ་ཆེན་པོའི་འཁོར་ལོ་ཡང་གྲུབ་ཅིང་འདྲེན་པར་འགྱུར་རོ། །གཞན་ཡང་ནམ་མཁའི་མིག་དང ། སྤྱི་བོའི་ཏིང་ངེ་འཛིན་རྣམས་དང ། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ལ་གནས་པ་དཔག་ཏུ་མེད་པ་ནམ་མཁའ་ལྟ་བུའི་ཡེ་ཤེས་ཀྱི་ཉི་མས་ཕྱིན་ཅི་ལོག་བཞིའི་མུན་པ་ཡོངས་སུ་བསལ་ཏེ། འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང ། གཞན་ཡང་སྲིད་པ་དང་འགྲོ་བ་རྣམས་སུ་འཁོར་བར་འཁོར་བའི་ལས་ཐམས་ཅད་ལྷག་མ་མ་ལུས་པར་ཡོངས་སུ་སེལ་ཏེ། རྣམ་པར་སྨིན་པའི་འབྲས་བུ་མྱོང་བར་མི་བྱེད་དོ། །གཞན་ཡང་དེའི་དབང་གིས་སངས་རྒྱས་ཀྱི་ཆོས་རྣམས་ལ་དབང་ཐོབ་པ་དང ། ཕྱིར་མི་ལྡོག་པར་འགྱུར་ཏེ། སྡིག་པའི་གྲོགས་པོའི་དབང་དུ་མི་འགྲོ་ཞིང་རྗེས་སུ་མི་སྤྱོད་པ་དང ། རྟག་ཏུ་སངས་རྒྱས་མཐོང་བ་དང་མི་འབྲལ་བ་དང ། བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། ཡོན་ཏན་ཐམས་ཅད་ལ་སེམས་མི་ངོམས་པ་ནས་བྱང་ཆུབ་ཀྱི་བར་དུ་རྒྱུན་མི་འཆད་དེ། རྟག་ཏུ་སངས་རྒྱས་རྗེས་སུ་དྲན་པ་དང་མི་འབྲལ་བ་ནི་ཆུང་ངུ་ན་རྨི་ལམ་དུ་ཡང་བར་ཆད་མེད་པར་འགྱུར་རོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་སོ་སོ་ཡང་དག་པར་རིག་པས་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པས་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང ། གཟུངས་རྣམས་དང ། ཤིན་དུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་འདྲེན་པར 60.257b འགྱུར་ཞེ་ན། འདི་ལྟ་སྟེ། བྱང་ཆུབ་སེམས་དཔའ་རྣམས་བསམ་གཏན་དང་པོ་ནས་བསམ་གཏན་བཞི་པའི་བར་དུ་སྙོམས་པར་འཇུག་པ་དང ། ནམ་མཁའ་མཐའ་ཡས་སྐྱེ་མཆེད་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་བར་དུ་སྙོམས་པར་འཇུག་པ་དང ། འདུ་ཤེས་དང་ཚོར་བ་འགོག་པའི་ཏིང་ངེ་འཛིན་ལ་སྙོམས་པར་འཇུག་པའི་ཏིང་ངེ་འཛིན་འདི་ལ་གནས་ན་ཚོར་བ་རྣམ་གསུམ་དང ། འདུ་བྱེད་གསུམ་པོ་ཡོངས་སུ་བཅད་དེ། མངོན་པར་འདུ་བྱེད་པ་དང ། གཡོ་བའི་སེམས་ཀྱི་སྤྱོད་པ་མེད་པ། ཚོར་བ་དང ། འདུ་ཤེས་དང ། སེམས་པ་དང ། རིག་པ་དང ། ཡིད་ལ་བྱེད་པ་ལ་སོགས་པ་ཀུན་གཅོད་པར་འགྱུར་རོ། །ཏིང་ངེ་འཛིན་འདི་ལ་གནས་ན་ཞག་གཅིག་གམ། ཞག་བདུན་གྱི་བར་དུ་བསམ་གཏན་གྱི་ཟས་ཟ་བར་འགྱུར་རོ། །ཏིང་ངེ་འཛིན་དེ་ལས་ལངས་ན་ཡང་སེམས་རབ་ཏུ་ཞི་བ་ལེན་པ་མེད་ཅིང ། ལྷན་ནེར་གནས་པར་འགྱུར་རོ། །གཞན་ཡང་དོན་དམ་པའི་མཐས་གཏུགས་པའི་སྟོང་པ་ཉིད་ཀྱི་ཏིང་ངེ་འཛིན་ལ་མཉམ་པར་འཇོག་གོ། །ཏིང་ངེ་འཛིན་དེ་ལ་གནས་ན་སེམས་རབ་ཏུ་མཉམ་པས་ནམ་མཁའ་ལྟར་ཆགས་པ་མེད་པ་དང ། ལུས་ཀྱི་བ་སྤུའི་བུ་ག་ཀུན་ནས་ཟིལ་དངར་གྱི་ཐིགས་པ་སྐར་མ་སྣར་མ་ལྟ་བུ་མངོན་པར་བྱུང་བས་ཀུན་ནས་ཉོན་མོངས་པས་བཅིངས་པའི་ཡོངས་སུ་གདུང་བ་ཐམས་ཅད་སེལ་བར་འགྱུར་རོ། །ཏིང་ངེ་འཛིན་དེ་ལས་ལངས་ནས་ཡང་དག་པའི་དྲན་པ་ཐོབ་སྟེ། དགའ་བ་ཁྱད་པར་ཅན་གྱིས་ལུས་ལ་ཁྱབ་པར་གྱུར་པ་ནི་ཇི་ལྟར་ལྷའི་སྲས་པོ་དང ། དབང་ཕྱུག་ཆེན་པོ་དང ། བདེ་བའི་ཏིང་ངེ་འཛིན་ཐམས་ཅད་ལ་འཇུག་པ་ནས་ལུས་ཀྱི་བ་སྤུའི་ཁུང་བུ་ཀུན་ནས་རབ་ཏུ་བདེ་བ་མྱོང་བ་བཞིན་དེ་ལྟར་བྱང་ཆུབ་སེམས་དཔའ་དེ་ལུས་ལ་བདེ་བས་རེག་པས་སངས་རྒྱས་རྗེས་སུ་དྲན་པར་འགྱུར་རོ། །སངས་རྒྱས་རྗེས་སུ་དྲན་པས་སངས་རྒྱས་མཐོང་བ་ལས་མཚན་མ་གཞན་མཐོང་བ་མེད་དོ། །བྱང་ཆུབ་སེམས་དཔའ་དེའི་ཚེ་སངས་རྒྱས་གཅིག་ཡིད་ལ་བྱས་ན་སངས་རྒྱས་གཅིག་མཐོང་ངོ ། །གལ་ཏེ་སངས 60.258a རྒྱས་མང་པོ་ཡིད་ལ་བྱས་ན་སངས་རྒྱས་མང་པོ་མཐོང་ངོ ། །གལ་ཏེ་སངས་རྒྱས་ཀྱི་སྐུ་ཆུང་བར་ཡིད་ལ་བྱས་ན་སངས་རྒྱས་ཀྱི་སྐུ་ཆུང་ངུར་མཐོང་ངོ ། །གལ་ཏེ་སངས་རྒྱས་ཀྱི་སྐུ་ཆེན་པོར་ཡིད་ལ་བྱས་ན་སངས་རྒྱས་ཀྱི་སྐུ་ཆེན་པོར་མཐོང་ངོ ། །གལ་ཏེ་སངས་རྒྱས་ཀྱི་སྐུ་ཚད་མེད་པར་ཡིད་ལ་བྱས་ན་སངས་རྒྱས་ཀྱི་སྐུ་ཚད་མེད་པར་མཐོང་ངོ ། །གལ་ཏེ་བདག་གི་ལུས་སངས་རྒྱས་ཀྱི་སྐུའི་མཚན་དང་ལྡན་པར་ཡིད་ལ་བྱས་ན་བདག་གི་ལུས་དེ་སངས་རྒྱས་ཀྱི་སྐུ་དང་འདྲ་བར་མཚན་ཕུན་སུམ་ཚོགས་པར་མཐོང་ངོ ། །གལ་ཏེ་གཞན་གྱི་ལུས་སངས་རྒྱས་ཀྱི་སྐུར་ཡིད་ལ་བྱས་ན་གཞན་གྱི་ལུས་སངས་རྒྱས་དང་འདྲ་བར་མཚན་ཕུན་སུམ་ཚོགས་པར་མཐོང་ངོ ། །གལ་ཏེ་སེམས་ཅན་དང་སེམས་ཅན་མ་ཡིན་པ་དང ། ཇི་སྙེད་གཟུགས་སུ་གཏོགས་པ་ཐམས་ཅད་སངས་རྒྱས་ཀྱི་སྐུ་མཚན་དང་ལྡན་པར་ཡིད་ལ་བྱས་ན་སེམས་ཅན་དང ། སེམས་ཅན་མ་ཡིན་པ་དང ། ཇི་སྙེད་གཟུགས་སུ་གཏོགས་པ་ཐམས་ཅད་སངས་རྒྱས་ཀྱི་སྐུ་དང་འདྲ་བར་མཚན་ཕུན་སུམ་ཚོགས་པར་མཐོང་གི་གཟུགས་གཞན་དུ་མི་མཐོང་ངོ ། །བྱང་ཆུབ་སེམས་དཔའ་དེའི་ཚེ་ཡང་འདི་སྙམ་དུ་ཆོས་ཐམས་ཅད་དང ། གཟུགས་ཐམས་ཅད་ནི་སྒྱུ་མ་དང་འདྲ་སྟེ། ཡང་དག་པ་མ་ཡིན་པས་བདག་གིས་ཚོར་བ་རྣམ་གསུམ་དང ། འདུ་བྱེད་གསུམ་ལ་སོགས་པ་ཆོས་ཐམས་ཅད་ལྷག་མ་མ་ལུས་པར་ཡོངས་སུ་གཅད་དོ་སྙམ་ནས་འགོག་པའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེ་ལ་གནས་ནས་བློ་སྔོན་དུ་བཏང་བ་བཞིན་དུ་ཐམས་ཅད་ཡོངས་སུ་བཅད་དེ་ཏིང་ངེ་འཛིན་གྱི་རོའི་ཟས་ཀྱིས་འཚོའོ། །གལ་ཏེ་ན་ཞག་བདུན་ནམ། ཞག་བདུན་གཉིས་སམ། བདུན་གསུམ་འམ། བཞི་འམ། ལྔ་འམ། དྲུག་གམ། བདུན་ནམ། བརྒྱད་དམ། གལ་ཏེ་ན་བསྐལ་པ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་ཅི་ནུས་སུ་གནས་ཏེ། ཏིང་ངེ་འཛིན་གྱི་ཟས་ཟའོ། །ཏིང་ངེ་འཛིན་དེ་ལས་ལངས་ནས་སེམས་རབ་ཏུ་ཞི་བས་ཅི་ལ་ཡང་མི་ཆགས་ཏེ་བདེ་བར་གནས་སོ། །གལ་ཏེ་དོན་དམ་པའི་མཐས་གཏུགས 60.258b པའི་ཏིང་ངེ་འཛིན་ལ་ཞུགས་ན་ཡང་སྔར་ཇི་སྐད་བཤད་པ་བཞིན་དུ་སངས་རྒྱས་ཀྱི་སྐུ་མཚན་དང་ལྡན་པ་ཡིད་ལ་བྱ་བ་ནས་ཆོས་ཐམས་ཅད་དང ། གཟུགས་ཐམས་ཅད་སྒྱུ་མ་དང་འདྲ་སྟེ་ཡང་དག་པ་མ་ཡིན་པའི་བར་དུ་ཆུད་པར་བྱེད་དོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པ་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་ཐམས་ཅད་དང ། གཟུངས་ཐམས་ཅད་དང ། ཤིན་དུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དག་འཁོར་ལོ་འདི་དང་ལྡན་ན་ནམ་མཁའི་མིག་དང ། སྤྱི་བོའི་ཏིང་ངེ་འཛིན་རྣམས་དང ། གཟུངས་རྣམས་ལས་ཤིན་དུ་ཐབས་མཁས་པ་ཐམས་ཅད་ལྷག་མ་མ་ལུས་པར་སྤངས་ཏེ་རྣམ་པར་སྨིན་པའི་འབྲས་བུ་ལེན་པར་མི་བྱེད་དོ། །གཞན་ཡང་རིགས་ཀྱི་བུ་འདི་ལྟ་སྟེ། འཇིག་རྟེན་གྱི་ཁམས་སུ་མེས་འཇིག་པ་འབྱུང་དུ་ཉེ་བ་ནི་ཉི་མ་ལྔ་ཅིག་ཅར་ཤར་ཏེ། འཇིག་རྟེན་གྱི་ཁམས་ན་རྫིང་བུ་དང ། རྫིང་བུ་ཆེན་པོ་དང ། འབབ་ཆུ་དང ། འབབ་ཆུ་ཆེན་པོ་དང ། མཚོ་དང ། མཚོ་ཆེན་པོའི་ཆུ་རྣམས་ལྷག་མ་མ་ལུས་པར་ཐམས་ཅད་སྐེམས་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པས་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང ། གཟུངས་རྣམས་དང ། ཤིན་དུ་བརྟེན་པའི་བཟོད་པ་ཆེན་པོ་གོ་ཆ་ཆེན་པོའི་འཁོར་ལོ་ཡང་མངོན་པར་འདྲེན་ཏོ། །གཞན་ཡང་ནམ་མཁའི་མིག་དང ། སྤྱི་བོའི་ཏིང་ངེ་འཛིན་རྣམས་དང ། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ལ་ཡང་གནས་ཤིང་འདྲེན་པར་འགྱུར་རོ། །གང་འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ། ངན་འགྲོ་མནར་མེད་པ་དང ། གཞན 60.259a ཡང་སྲིད་པ་དང ། འགྲོ་བ་རྣམས་སུ་འཁོར་བར་འཁོར་བའི་ལས་ཐམས་ཅད་ལྷག་མ་མ་ལུས་པར་ཡོངས་སུ་བསྐམས་ཏེ། རྣམ་པར་སྨིན་པའི་འབྲས་བུ་མི་ལེན་པར་བྱེད་དོ། །གཞན་ཡང་རིགས་ཀྱི་བུ་འདི་ལྟ་སྟེ། འཇིག་རྟེན་དུ་ཆུའི་འཇིག་པ་བྱུང་བ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཆུ་འདིའི་ཁམས་ཆུང་ངུའི་གླིང་ཆེན་པོ་བཞི་དང ། གླིང་ཕྲན་བརྒྱད་དང ། རི་རབ་རིའི་རྒྱལ་པོ་དང ། རི་ཕྲན་ཐམས་ཅད་ཆུ་ཡིས་བཀྲུས་ཏེ་ཞིག་ནས་ལྷག་མ་མ་ལུས་པར་ཟད་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་ཡང་ཚིག་སོ་སོ་ཡང་དག་པར་རིག་པ་ནམ་མཁའི་དབྱིངས་དང་མཉམ་པ། ཚད་མེད་པ། མཐའ་ཡས་པ། ཡངས་ཤིང་རྒྱ་ཆེ་བ་དང་ལྡན་པས་ཇི་སྙེད་སངས་རྒྱས་ཀྱི་ཆོས་ཐམས་ཅད་དེ། ཏིང་ངེ་འཛིན་རྣམས་དང ། གཟུངས་རྣམས་དང ། ཤིན་དུ་བརྟན་པའི་བཟོད་པའི་གོ་ཆ་ཆེན་པོའི་འཁོར་ལོ་ཡང་འགྲུབ་ཅིང་འདྲེན་པར་འགྱུར་རོ། །ནམ་མཁའི་མིག་དང ། སྤྱི་བོའི་ཏིང་ངེ་འཛིན་རྣམས་དང ། གཟུངས་རྣམས་ལ་ཐབས་མཁས་པའི་གོ་ཆ་ཆེན་པོའི་འཁོར་ལོ་ལ་གནས་ཤིང་འདྲེན་པར་འགྱུར་བས་འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང ། གཞན་ཡང་སྲིད་པ་དང ། འགྲོ་བ་རྣམས་སུ་འཁོར་བ་འཁོར་བའི་ལས་ལ་མཁས་པའི་གོ་ཆ་ཆེན་པོའི་འཁོར་ལོ་ལ་ཡང་གནས་པར་འགྱུར་རོ། །འཁོར་ལོ་འདི་ལ་གནས་པས་དཔག་ཏུ་མེད་པ་ནམ་མཁའ་ལྟ་བུའི་ཡེ་ཤེས་ཀྱི་ཉི་མ་བྱུང་བས་རང་གི་ལུས་ལ་ཕྱིན་ཅི་ལོག་བཞི་དང ། མ་རིག་པའི་མུན་པ་ཐམས་ཅད་ཡོངས་སུ་སེལ་བར་འགྱུར་རོ། །འདས་པའི་དུས་ཀྱི་སྡིག་པ་མི་དགེ་བའི་ལས་ཀྱི་ལྷག་མས་གཉེར་ཏེ་ངན་འགྲོ་མནར་མེད་པ་དང ། གཞན་ཡང་སྲིད་པ་དང ། འགྲོ་བ་རྣམས་སུ་འཁོར་བར་འཁོར་བའི་ལས་ཐམས་ཅད་ཀྱང་ལྷག་མ་མ་ལུས་པར་ཡོངས་སུ་སེལ་ཏེ། རྣམ་པར་སྨིན་པའི་འབྲས་བུ་ཡང་མྱོང་བར་མི་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་འཁོར་ལོ་འདི་དང་ལྡན་ན་ཐོག་མ་སེམས་བསྐྱེད་པ་ནས་འདོད་པ་རྣམ་ལྔ་ཡོངས་སུ་བསལ་ཏེ། ཉན་ཐོས་དང ། རང་སངས་རྒྱས་ཐམས་ཅད་ལས 60.259b ཤིན་དུ་འདས་ཤིང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་བསོད་ནམས་ཀྱི་ཞིང་དུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་ཐེག་པ་པ་ཐམས་ཅད་ཀྱིས་མཆོད་པ་དང ། སྲུང་བ་དང ། བསྙེན་བཀུར་བྱེད་པར་འགྱུར་རོ། །འཁོར་ལོ་འདིའི་དབང་གིས་སངས་རྒྱས་ཀྱི་ཆོས་ཐམས་ཅད་ལ་དབང་དུ་འགྱུར་བ་དང ། ཕྱིར་མི་ལྡོག་པ་དང ། སྡིག་པའི་གྲོགས་པོའི་དབང་དུ་མི་འགྲོ་བ་དང ། སངས་རྒྱས་ཐམས་ཅད་མཐོང་བ་དང་མི་འབྲལ་ཞིང་བྱང་ཆུབ་སེམས་དཔའ་དང ། ཉན་ཐོས་ཀྱི་ཉེ་གནས་མཐོང་བ་དང་མི་འབྲལ་བ་དང ། ཆོས་ཐོས་པ་དང་མི་འབྲལ་བ་དང ། དགེ་འདུན་ལ་མཆོད་པ་དང་བསྙེན་བཀུར་བྱེད་པ་དང་མི་འབྲལ་བ་དང ། ཡོན་ཏན་ཐམས་ཅད་ལ་སེམས་མི་ངོམས་པ་སྟེ། མངོན་པར་བྱང་ཆུབ་ཀྱི་བར་དུ་རྒྱུན་མི་འཆད་པ་དང་རྟག་ཏུ་སངས་རྒྱས་རྗེས་སུ་དྲན་པ་དང་མི་འབྲལ་བ་ནི་ཆུང་ངུ་ན་རྨི་ལམ་ན་ཡང་འབྲལ་བར་མི་བྱེད་དོ། །དེ་ལྟར་བྱང་ཆུབ་སེམས་དཔའ་དེ་བསོད་ནམས་དང་ཡེ་ཤེས་ཀྱི་ཚོགས་ཀྱང་མྱུར་དུ་རྫོགས་པ་དང ། རིང་པོ་མི་ཐོགས་པར་རྣམ་པར་དག་པའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་སངས་རྒྱས་ཀྱི་ཞིང་དེ་ན་སེམས་ཅན་ཐམས་ཅད་ཀྱང་རྫུས་ཏེ་སྐྱེ་བ་དང ། མཚན་དང་གཟུགས་སངས་རྒྱས་བཅོམ་ལྡན་འདས་དང་འདྲ་བ། ཉོན་མོངས་པ་སྲབ་ཅིང་ཆུང་བ། ཐེག་པ་ཆེན་པོ་ལ་བདེ་བར་གནས་པ་ཤ་སྟག་གོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་དེ་བཀའ་སྩལ་པ། ཆོས་ཀྱི་སྣོད་དུ་འགྱུར་བར་འདོད་པ་དག་།ཉོན་མོངས་ཐམས་ཅད་ཡོངས་སུ་གཅད་པར་བྱ། །ཡང་དག་སྟོང་པ་ཉིད་ལ་སྙོམས་ཞུགས་ན། །དངོས་པོ་གང་ཡང་བྱ་བར་དཀའ་བ་མིན། །སྲིད་པའི་བཅིངས་པ་ཐམས་ཅད་གཅད་པའི་ཕྱིར། །སྙོམས་པར་འཇུག་ལ་ནན་ཏན་བརྩོན་པར་བྱ། །ཏིང་འཛིན་ཡོན་ཏན་དག་དང་ལྡན་པས་ན། །གདོན་མི་ཟ་བར་དཔག་དཀའི་ཤེས་རབ་ཐོབ། །གཟུགས་མེད་པ་ཡི་བསམ་གཏན་རབ་བསྒོམ་ཞིང ། །འགོག་པའི་ཏིང་འཛིན་སྟོང་པ་ཉིད་བརྟགས་ན། །སངས་རྒྱས་དྲན་པའི་བློ་མཆོག་རབ་སྐྱེས་ཏེ། །སྡིག་པ་ཐམས་ཅད་ཡོངས་སུ་ཟད་འགྱུར་རོ། །ཡོད་དང་མེད་པའི་ཆོས་རྣམས་ཐམས་ཅད་ནི། །ཡང་དག 60.260a སྟོང་པ་ཉིད་དུ་བརྟགས་པས་བཅོམ། །ངན་པར་འགྲོ་བའི་རྒྱུད་རྣམས་ཡོངས་བསལ་ནས། །རྟག་ཏུ་སངས་རྒྱས་མང་པོ་མཐོང་བར་འགྱུར། །ཡང་དག་སྟོང་པ་ཉིད་ལ་རབ་བསྒོམས་པས། །དགེ་བའི་ཆོས་གཞན་ཀུན་ལ་བརྩོན་བྱ་སྟེ། །སངས་རྒྱས་ཐམས་ཅད་ཀུན་ལ་རབ་མཆོད་ན། །མྱུར་དུ་སངས་རྒྱས་འབྲས་བུ་ཐོབ་པར་འགྱུར། །སེམས་ཅན་ཀུན་གྱི་དགེ་བའི་གྲོགས་བྱས་ཏེ། །ཀུན་ནས་ཉོན་མོངས་པ་ཡི་ནད་བསལ་ན། །རྣམ་དག་སངས་རྒྱས་ཞིང་དུ་མྱུར་དུ་སྐྱེ། །མངོན་པར་འཚང་རྒྱ་བྱང་ཆུབ་ཆེན་པོ་འཐོབ། །སངས་རྒྱས་མཚན་དང་ལྡན་པའི་སེམས་ཅན་དག་།སངས་རྒྱས་ཞིང་དེར་ཡོངས་སུ་གང་བར་འགྱུར། །ཐམས་ཅད་སངས་རྒྱས་ཐེག་ལ་འདུན་པ་སྟེ། །ཉན་ཐོས་རང་རྒྱལ་ཐེག་པ་ཡོངས་སུ་སྤོང ། །འཕགས་པ་ཤིན་དུ་རྒྱས་པ་ཆེན་པོ་སའི་སྙིང་པོའི་འཁོར་ལོ་བཅུ་པ་བྱ་བ་ལས་བསོད་ནམས་ཀྱི་ཞིང་གི་མཚན་ཉིད་ཀྱི་ལེའུ་ཞེས་བྱ་སྟེ་བདུན་པའོ།། ་་་་་་་་་།། བཅོམ་ལྡན་འདས་ཀྱིས་ཐེག་པ་ཆེན་པོའི་རྣམ་གྲངས་འདི་བཤད་པའི་ཚེ་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་དང་མཉམ་པ་སྔོན་འདས་པའི་དུས་ན་སངས་རྒྱས་རྗེས་སུ་དྲན་པ་ལ་གོམས་པ་དག་དེང་འདིར་བཅོམ་ལྡན་འདས་ཀྱིས་སངས་རྒྱས་རྗེས་སུ་དྲན་པ་ལ་ནན་ཏན་བྱ་བའི་སྦྱོར་བ་བཤད་པ་ཐོས་ནས་སངས་རྒྱས་རྗེས་སུ་དྲན་པའི་ཏིང་ངེ་འཛིན་གྱི་སྒོ་མོ་ཐམས་ཅད་ཐོབ་བོ། །གཞན་ཡང་སེམས་ཅན་ཚད་མེད་གྲངས་མེད་པ་རྣམས་ཆོས་འདི་ཐོས་ནས་ཏིང་ངེ་འཛིན་གྱི་འཚོ་བ་མེ་ཏོག་གིས་ཕྲེང་བ་ཞེས་བྱ་བའི་གཟུངས་ཀྱི་སྒོ་མོ་ཐམས་ཅད་ཐོབ་བོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་དཔའ་བར་འགྲོ་བ་གློག་གི་འོད་ལ་རྟེན་པ་ཞེས་བྱ་བའི་གཟུངས་ཀྱི་སྒོ་མོ་ཐམས་ཅད་ཐོབ་བོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་ཆོས་ལ་སྒྱུར་བ་འོད་སྣང་བ་ལས་རྟེན་པར་བྱེད་པ་རྗེས་སུ་འཐུན་པའི་བཟོད་པ་ཐམས་ཅད་ཐོབ་བོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་རྡུལ་དང་དྲི་མ་དང་བྲལ་ཏེ་ཆོས་ཀྱི་མིག 60.260b རྣམ་པར་དག་པ་སྐྱེས་ཏེ་རྒྱུན་དུ་ཞུགས་པའི་འབྲས་བུ་ཐོབ་བོ། །གཞན་ཡང་སེམས་ཅན་ཚད་མེད་པ་དག་ནི་བཅོམ་ལྡན་འདས་ཀྱིས་བཤད་པ་ཐོས་ནས་ལན་ཅིག་ཕྱིར་ལྡོག་པའི་འབྲས་བུ་ཐོབ་བོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་ཕྱིར་མི་ལྡོག་པའི་འབྲས་བུ་ཐོབ་པོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་མཆོག་གི་དགྲ་བཅོམ་པའི་འབྲས་བུ་ཐོབ་བོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་ཁམས་གསུམ་གྱི་བཙོན་ར་ནས་འབྱུང་བར་རྩོམ་པས་བཅོམ་ལྡན་འདས་ལ་རྟེན་ཅིང་རབ་ཏུ་བྱུང་ནས་ཡང་དག་པའི་ཆོས་ལ་ཞུགས་པར་གྱུར་ཏོ། །གཞན་ཡང་སེམས་ཅན་ཚད་མེད་པ་དག་ནམ་འཚོའི་བར་དུ་དགེ་བ་བཅུའི་ལས་ཀྱི་ལམ་ལ་བདེ་བར་གནས་ཤིང་ཉན་ཐོས་ཀྱི་ཐེག་པར་སེམས་བསྐྱེད་པས་ཕྱིར་མི་ལྡོག་པར་གྱུར་ཏོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་ནམ་འཚོའི་བར་དུ་དགེ་བ་བཅུའི་ལས་ཀྱི་ལམ་ལ་བདེ་བར་གནས་ནས། རང་སངས་རྒྱས་ཀྱི་ཐེག་པར་སེམས་བསྐྱེད་པ་ལས་ཕྱིར་མི་ལྡོག་པར་གྱུར་ཏོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་ནམ་འཚོའི་བར་དུ་དགེ་བ་བཅུའི་ལས་ཀྱི་ལམ་ལ་བདེ་བར་གནས་ནས་ཐེག་པ་ཆེན་པོར་སེམས་བསྐྱེད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །གཞན་ཡང་སེམས་ཅན་ཚད་མེད་གྲངས་མེད་པ་དག་ནི་བཅོམ་ལྡན་འདས་ཀྱིས་བཤད་པ་ཐོས་ནས་འཇིག་རྟེན་གྱི་ཡང་དག་པར་ལྟ་བ་ཐོབ་པར་གྱུར་ཏོ། །ཡང་དག་པར་ལྟ་བ་དེའི་དབང་གིས་ངན་སོང་དུ་འགྲོ་བའི་རྒྱུ་དང ། ཀུན་ནས་ཉོན་མོངས་པའི་ལས་དང ། ཉོན་མོངས་པ་ཐམས་ཅད་བྱང 60.261a ནས་མཐོ་རིས་སུ་འགྲོ་བའི་རྒྱུ་དང ། ཡང་དག་པའི་སྨོན་ལམ་དང ། དགེ་བའི་ལས་ཐམས་ཅད་སྐྱེ་ཞིང་འཕེལ་བར་འགྱུར་རོ། །གཞན་ཡང་སེམས་ཅན་ཚད་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་དཀོན་མཆོག་གསུམ་ལ་སྐྱབས་སུ་སོང་སྟེ། དགེ་བསྙེན་གྱི་སྡོམ་པ་བླངས་ནས་སངས་རྒྱས་མཆོད་པ་ལ་སྤྲོ་བ་དང ། ཆོས་ཐོས་པ་ལ་དགའ་བ་དང ། དགེ་འདུན་གྱི་གཡོག་བྱེད་པ་ལ་མོས་ཏེ། ཉིན་མཚན་དུ་འབད་པའི་བརྩོན་འགྲུས་ལ་སེམས་པར་ཚད་མེད་པར་གྱུར་ཏོ། །གཞན་ཡང་སེམས་ཅན་ཚད་མེད་གྲངས་མེད་པ་དག་བཅོམ་ལྡན་འདས་ཀྱིས་བཤད་པ་ཐོས་ནས་ལོག་པ་ལ་འབབ་པ་དང ། ལོག་པ་ལ་ཕྱོགས་པ་དང ། བློ་གྲོས་ངན་པ་དང ། ལས་ངན་པ་ཐམས་ཅད་ཡོངས་སུ་སྤངས་ཏེ། སངས་རྒྱས་ཀྱི་ཆོས་ལ་མི་འགྱུར་བའི་དད་པ་ཐོབ་ནས་ཁྱིམ་ན་གནས་པའི་ཆོས་ཡོངས་སུ་སྤངས་ཏེ་རྣམ་པར་དག་པས་རབ་ཏུ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ངས་སའི་སྙིང་པོའི་འཁོར་ལོ་བཅུ་པ་ཤེས་པ་བརྡ་སྤྲོད་པ་ཆེན་པོ་ཆོས་ཀྱི་སྒོ་མོ་འདི། ཁྱོད་ཀྱི་ལག་ཏུ་གཏད་ཀྱིས་ཁྱོད་ཀྱིས་གཟུངས་སུ་ཟུང་ལ་ཤིན་དུ་རྒྱས་པར་གྱིས་ཤིག་།སེམས་ཅན་གང་ཆོས་ཀྱི་རྣམ་གྲངས་འདི་ལ་ཀློག་གམ། འདོན་ཏམ། ཡིད་ལ་བྱེད་དམ། གཞན་ལ་ཡང་རྒྱ་ཆེར་འཆད་དམ། ཡང་དག་པའི་སྤྱད་པ་ལ་གནས་པ་དག་ལ་ཁྱོད་ཀྱིས་ཆོས་རྣམ་པ་འདི་བཅུས་བསྲུངས་ཏེ། ཡུན་རིང་པོར་ཕན་པ་དང་བདེ་བའི་དོན་ཐོབ་པར་གྱིས་ཤིག་།བཅུ་གང་ཞེ་ན། འདི་ལྟ་སྟེ། དེའི་ཐབས་དང་བདོག་པའི་ནོར་ཐམས་ཅད་བསྲུངས་ཏེ་ཉམས་པར་མི་བྱ་བ་དང ། གནོད་པ་ཐམས་ཅད་ལས་བསྲུངས་ཏེ། མེད་པར་བྱ་བ་དང ། ལོག་པར་ལྟ་བ་དང ། ལོག་པར་ཕྱོགས་པ་ལས་བསྲུངས་ཏེ་མི་དགེ་བ་བཅུའི་ལས་ཀྱི་ལམ་སྤང་བར་བྱ་བ་དང ། དེའི་ལུས་དང་ངག་ལ་གནོད་པ་ཐམས་ཅད་ལས་བསྲུངས་ཏེ་མེད་པར་བྱ་བ་དང ། འཕྱ་བ་དང་སྐུར་པ་ཐམས་ཅད་ལས 60.261b བསྲུངས་ཏེ་མེད་པར་བྱ་བ་དང ། ཚུལ་ཁྲིམས་དང ། སྤྱོད་པ་ཐམས་ཅད་ཉམས་པར་མི་འགྱུར་བར་སྲུང་བ་དང ། དེ་ལ་མི་མ་ཡིན་པ་ཐམས་ཅད་དང ། འབྱུང་བ་ཆེན་པོ་འཁྲུགས་པ་དང ། དུས་མ་ཡིན་པའི་ནད་དང ། མི་དགེ་བ་ཐམས་ཅད་ཡོངས་སུ་སེལ་བར་སྲུང་བ་དང ། དེ་ལ་དུས་མ་ཡིན་པ་ཚུལ་མ་ཡིན་པ། ལྟས་ངན་དང ། རིམས་ཐམས་ཅད་མི་འབྱུང་བར་སྲུང་བ་དང ། དེ་ལ་འཆི་བའི་དུས་བྱེད་པ་ན་ཡང་སངས་རྒྱས་ཐམས་ཅད་མཐོང་བར་སྲུང་བ་དང ། དེ་ཚེ་འཕོས་ནས་ཀྱང་བདེ་འགྲོར་སྐྱེ་བ་དང ། ཕན་པ་དང་བདེ་བའི་དོན་ཐོབ་པར་ཡོངས་སུ་སྲུང་བར་བྱེད་དོ། །རིགས་ཀྱི་བུ་སེམས་ཅན་གང་ཆོས་ཀྱི་རྣམ་གྲངས་འདི་ཀློག་པ་དང ། འདོན་པ་དང་དོན་ཡིད་ལ་བྱེད་པ་དང ། གཞན་ལ་རྒྱ་ཆེར་འཆད་དམ། ཡང་དག་པའི་སྤྱོད་པ་ལ་གནས་པ་དག་ལ་ཁྱོད་ཀྱིས་ཆོས་རྣམ་པ་འདི་བཅུ་ཤིན་དུ་བསྲུངས་ཤིང ། བྱིན་གྱིས་བརླབས་ཏེ། ཆོས་རྣམ་པ་འདི་བཅུས་ཡུན་རིང་པོར་ཕན་པ་དང་བདེ་བར་གྱིས་ཤིག་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་དེ་བཞིན་ནོ། །བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་གཟུངས་སུ་འཛིན་ཅིང་ཤིན་དུ་རྒྱས་པར་བགྱིའོ། །སེམས་ཅན་གང་ཆོས་ཀྱི་རྣམ་གྲངས་འདི་ལ་ཀློག་པ་དང ། འདོན་པ་དང་དོན་ཡིད་ལ་བགྱིད་པ་དང ། ཕ་རོལ་པོ་ལ་རྒྱ་ཆེར་སྟོན་པ་དང ། ཡང་དག་པའི་སྤྱོད་པ་ལ་གནས་པ་དག་ལ་བདག་གིས་ཆོས་རྣམ་པ་འདི་བཅུས་ཤིན་དུ་བསྲུངས་ཏེ་ཡུན་རིང་པོར་ཕན་པ་དང་བདེ་བར་བགྱིའོ། །དེ་ནས་བཅོམ་ལྡན་འདས་ཀྱིས་མདོ་སྡེ་འདི་གསུངས་ནས། འཁོར་གྱི་དཀྱིལ་འཁོར་དེ་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རིགས་པར་ཐེ་ཙོམ་འདྲི་བ་དང ། ཚངས་པ་ཆེན་པོ་ལྷའི་སྙིང་པོ་དང ། ལྷ་དང ། ཀླུ་དང ། གནོད་སྦྱིན་དང ། 60.262a དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང་མི་མ་ཡིན་པ་ལ་སོགས་པ་འཁོར་མང་པོ་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །འདུས་པ་ཆེན་པོ་ལས་བྱང་ཆུབ་སེམས་དཔའ་སའི་སྙིང་པོའི་འཁོར་ལོ་བཅུ་པ་ལས་བདེ་བའི་དོན་ཐོབ་པ་ཡོངས་སུ་གདམས་པ་ཞེས་བྱ་བའི་ལེའུ་སྟེ་བརྒྱད་དོ། །འདུས་པ་ཆེན་པོ་བྱང་ཆུབ་སེམས་དཔའ་སའི་སྙིང་པོའི་འཁོར་ལོ་བཅུ་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱའི་མཁན་པོ་ཧཝ་ཤང་ཟབ་མོ་ལ་སོགས་པ་དང ། ཞུ་ཆེན་གྱི་ལོ་ཙ་བ་བན་དེ་རྣམ་པར་མི་རྟོག་གིས་བསྒྱུར་ཅིང་ཞུས་ཏེ་གཏན་ལ་ཕབ་པ། ། |