@##/ /rgya gar skad du/ da sha tsakra k+Shi ti gar b+ha nA ma ma hA yA na sU tra/ bod skad du/ 'dus pa chen po las sa'i snying po'i 'khor lo bcu pa zhes bya ba theg pa chen po'i mdo/ bam po dang po/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das ri kha la de ya zhes bya ba drang srong thub pa mang po'i spyod yul gyi gnas na/ dge slong gi dge 'dun chen po tshad med grangs med pa dang thabs gcig tu bzhugs te/ thams cad kyang nyan thos kyi dge 'dun chen po sha stag go/ /gzhan yang byang chub sems dpa' sems dpa' chen po tshad med grangs med pa dang thabs gcig pa thams cad kyang byang chub sems dpa'i dge 'dun chen po sha stag ste/ zla ba'i snying po zhes bya ba bshad ma thag tu/ de'i tshe lho phyogs nas bsung gi sprin chen po 'dus pa las bsung gi char chen po rab tu 'bab bo/ /me tog gi sprin chen po 'dus pa las me tog gi char chen po rab tu 'bab bo/ /rin po che'i lha rdzas kyi rgyan gyi sprin chen po 'dus pa las rin po che'i lha rdzas kyi rgyan gyi char chen po rab tu 'bab bo/ /lha rdzas kyi gos kyi sprin chen po 'dus pa las lha rdzas kyi gos kyi char chen po rab tu 'bab po/ /de lta bu'i sprin dang char chen pos drang srong thub pa mang po'i spyod yul gnas kyi ri de la khyab par gyur to/ /bsung dang / me tog dang / rin po che'i rgyan dang / gos de dag las chos chen po'i sgra dbyangs rnam pa sna tshogs brgya stong snyed grags par gyur pa ni 'di lta ste/ dkon mchog la skyabs su 'gro ba'i sgra dang / bslab pa'i gnas 'dzin pa'i sgra dang / ngang des shing bzod pa can gyi sgra dang / brtson 'grus rtsom pa'i sgra dang / bdud bzhi btul ba'i sgra dang / shes rab la gzhol zhing 'jug pa'i sgra dang / grags pa chen pos 'jig rten gsum du rgya cher grags pa'i sgra dang / dran pa dang / ting 'dzin dang / gzungs kyi khyad par la 60.109a nan tan bya ba'i sgra dang / stong pa nyid dang / mtshan ma med pa dang / smon pa med pa'i sgra dang / 'dod chags kyis yongs su skyo ba'i sgra dang / gzugs ni chu'i lbu ba lta bu'o zhes pa'i sgra dang / tshor ba ni chu'i chu bur lta bu'o zhes pa'i sgra dang / 'du shes ni smig rgyu lta bu'o zhes pa'i sgra dang / 'du byed ni chu shing lta bu'o zhes pa'i sgra dang / rnam par shes pa ni sgyu ma lta bu'o zhes pa'i sgra dang / mi rtag pa'i sgra dang / sdug bsngal ba'i sgra dang / bdag med pa'i sgra dang / stong pa'i sgra dang / 'dzem pa dang / ngo tsha bar ldan pa'i sgra dang / kun spong ba'i sgra dang / dran pa nye bar gzhag pa'i sgra dang / byams pa dang / snying rje dang / dga' ba dang / btang snyoms kyi sgra dang / chos kun chub pa'i sgra dang / mtho ris su skye ba dang mya ngan las 'da' ba'i sgra dang / theg pa gsum la 'bab pa'i sgra dang / chos chen po'i 'khor lo bskor ba'i sgra dang / chos chen po'i char rab tu 'bebs pa'i sgra dang / sems can yongs su smin par bya ba'i sgra dang / ngan song gsum las yongs su sgrol ba'i sgra dang / pha rol du phyin pa drug yongs su rdzogs par bya ba'i nan tan bya ba'i sgra dang / thabs mkhas pa'i sgra dang / sa bcu la 'bab pa'i sgra dang / mngon par shes pas rnam par rol pa'i sgra dang / bla na med pa'i theg pa chen po rnam par rol pa'i sgra dang / sa las phyir mi ldog pa'i sgra dang / mi skye ba'i chos kyi bzod pa'i sgra dang / spyi bo nas dbang bskur ba'i sgra dang / sangs rgyas thams cad kyi rgya mtsho chen po la 'jug pa'i sgra'i nga ro grags par gyur to/ /de'i tshe 'khor gyi dkyil 'khor mang po de dag thams cad kyis de lta bu'i sprin dang char rnam pa sna tshogs mthong zhing de ltar chos kyi sgra'i nga ro yang thos par gyur nas de dag gi so so'i yid ci la mos pa bzhin du so so'i lus la rnam pa sna tshogs kyi bsung dang / me tog dang / rin po che'i rgyan dang / lha rdzas kyi gos dam pas yongs su brgyan par mthong ngo / /yang so 60.109b so'i lag mthil gnyis na yid bzhin gyi nor bu rin po che thogs shing yid bzhin gyi nor bu rin po che de dag re re las kyang rin po che rnam pa sna tshogs char bzhin du 'bab par mthong ngo / /gzhan yang nor bu rin po che de dag las 'od zer rnam pa sna tshogs su byung ste/ 'od zer de dag gi dbang gis sems can de dag so so nas phyogs bcu'i chu klung gang gA'i klung gi bye ma snyed kyi sangs rgyas kyi zhing yang mthong ngo / /yang 'od zer de dag gi dbang gis sangs rgyas kyi zhing de dag na de bzhin gshegs pa de re re la yang 'khor mang po tshad med pas sti stang dang bcas te yongs su bskor bar mthong ngo / /gzhan yang 'od zer de'i dbang gis sangs rgyas kyi zhing de dag na sems can gang nad kyis gzir ba thams cad kyang 'od zer de dag gis reg ma thag tu nad kyi sdug bsngal dang bral bar gyur to/ /gang bsad pa la thug pa dang / btson du bzung zhing bcings pa dag kyang 'od zer de dag gis reg ma thag tu de dag las yongs su thar bar gyur to/ /gang lus dang ngag dang yid mi bde bar spyod pa'i gnas ngan len lci ba dag kyang 'od de'i dbang gis shin du yang zhing rnam par dag par gyur to/ /gang bkres shing skom pa dag kyang 'drangs shing ngoms par gyur to/ /gang bsad pa dang / chad pa rnam pa sna tshogs kyis nyon mongs par gyur pa dag kyang 'od zer de dag gis reg ma thag tu sdug bsngal ba dang bral bar gyur to/ /gang bgo ba dang / rin po che'i rgyan dang / dbyig dang / nor rdzas kyis brel cing phongs pa dag kyang bsams pa bzhin du 'byor cing ldan par gyur to/ /sems can gang srog gcod pa la dga' zhing mos pa nas log par lta ba'i bar du dga' zhing mos pa dag kyang 'od zer des reg ma thag tu srog gcod pa yongs su spong ba la dga' zhing mos pa nas log par lta ba'i bar du yongs su spong ba 60.110a la dga' zhing mos par gyur to/ /sems can gang 'dod pa mi rnyed pa rnam pa sna tshogs kyis sdug bsngal bar gyur pa dag kyang 'od zer des reg ma thag tu ji ltar re ba bzhin du rnyed par gyur to/ /gzhan yang 'od zer de'i dbang gis sangs rgyas kyi zhing thams cad kyi sems can gang sdug bsngal gyis gdungs pa dag thams cad zhi nas rab tu bde ba dang ldan par mthong ngo / /gzhan yang sangs rgyas kyi zhing de dag thams cad du 'od kyis snang bar byas pas sprin dang / rdul dang / na bun dang / rlung dang / rdzi char dang / bkra mi shis pa'i sgra dang / dri mi zhim pa dang / kha ba dang / tsha ba la sogs pa'i ro ngan pa dang / yid du mi 'ong ba'i reg bya dang / 'jigs skrag pa dang / gnod pa mang po rnams med par gyur to/ /gzhan yang las ngan pa dang / log pa'i ngag dang / log pa'i bsam pa dang / log par phyogs pa dang yongs su bral te lhag par mi grang ba dang / lhag par mi tsha ba dang / rab tu zhi zhing bde ba dang / sa gzhi lag mthil ltar mnyam pa dang / bde ba'i yo byad dam pa thams cad kyis yongs su gang bar gyur to/ /de'i tshe na 'khor mang po rnams kyi so so'i lus kyi sa'i khams lhag par lci zhing mi theg pa tsam du gyur to/ /ltas 'di lta bur gyur pa mthong nas thams cad kyang dngangs te/ de ci'i rgyu ci'i rkyen gyis ltas 'di lta bur gyur snyam du rtog pa skyes so/ /de'i tshe 'khor gyi dkyil 'khor de'i nang na brgya byin lha'i dbang po dri ma med par skyes shes bya ba bcom ldan 'das dang ha cang yang mi ring ba zhig na 'dug pa las langs nas/ bcom ldan 'das kyi zhabs la spyi bos phyag 'tshal te/ bcom ldan 'das gang na ba de logs su thal mo sbyar nas tshigs su bcad pa 'di skad ces gsol to/ /bden par gsung zhing bden gzigs pa/ /bden la rab gnas thub pa khyod/ /'dus pa'i 'khor mang thams cad la/ / 60.110b mthar phyin bden pa'i chos gsungs shig /so so'i skye bo mang po dag /sdug bsngal rgyu dang sdug bsngal sel/ /ci'i slad du 'khor 'dir ni/ /sprin dang char rnams gda' bar gyur/ /'khor rnams rab tu dga' rangs nas/ /shin du dad pa'i bsam pa skyes/ /theg pa chen por thams cad gzhol/ /yang dag lta skye som nyi rgal/ /'khor mang lha dang mi yi lus/ /lhag par sa yi khams lci bas/ /rang gis mi theg gyur pa 'di/ /ci yi rkyen gyis ltas 'di byung / /lag mthil gnyis na nor bu'i las/ /rin chen char 'bab 'od kyang 'gyed/ /phyogs bcur snang byas sdig pa bsal/ /sdug bsngal zhi nas bde ba thob/ /'dren pas gsungs shig ci yi rkyen/ /'khor gyi dkyil 'khor thams cad la/ /spos dang phreng ba sna tshogs kyis/ /so so'i lus la brgyan pa gda'/ /lha dang mi kun the tsom skyes/ /ci yi rgyu dang ci yi rkyen/ /su zhig gang nas 'dir mchi na/ /rdzu 'phrul mthu 'di ston par gyur/ /sangs rgyas byang chub sems dpa' 'am/ /'on te tshangs pa 'am bdud lags sam/ /brgya byin lags sam su mchi ba/ /'dren pa chen pos bshad du gsol/ /de'i tshe bcom ldan 'das kyis brgya byin dri ma med par skyes pa la 'di skad ces bka' stsal to/ /khyed kyis 'di ltar shes par byos shig /byang chub sems dpa' sems dpa' chen po sa'i snying po zhes bya ba yod de/ sngon bskal pa chen po tshad med grangs med pa'i bar du rnyog pa lnga'i tshe/ sangs rgyas mi bzhugs pa'i 'jig rten gyi khams su sems can yongs su smin par byed pa de/ da ltar 'khor byang chub sems dpa' bye ba khrag khrig stong phrag brgyad bcu dang bcas te 'jig rten gyi khams 'dir nga la phyag 'tshal ba dang / bsnyen bkur dang mchod pa bya ba dang / gzhan yang 'khor gyi dkyil 'khor rnams la blta ba dang / rjes su yi rang ba bskyed pa'i phyir 'khor dang bcas 60.111a te dge sbyong gi gzugs kyis 'dir 'ong bas mngon par shes pa'i mthus cho 'phrul 'di dag bstan to/ /byang chub sems dpa' sems dpa' chen po sa'i snying po zhes bya ba de tshad med grangs med bsam gyis mi khyab pa'i yon tan gyi khyad par gyis yongs su brgyan pas nyan thos dang / rang sangs rgyas dang / 'jig rten du bcas pa thams cad kyis dpog nus pa med do/ /byang chub sems dpa' de ni yon tan phul du gyur pa thams cad kyi gter du gyur pa'o/ /rnam par grol ba'i rin po che'i 'byung gnas yin no/ /byang chub sems dpa' rnams kyi mig yongs su dag par byed pa'o/ /mya ngan las 'da' bar 'gro ba'i ded dpon du gyur pa'o/ /yid bzhin gyi nor bu rin po che ltar rin po che thams cad char bzhin du 'bab pas ji ltar re zhing 'dod pa thams cad yongs su tshim par byed pa'o/ /tshong pa mang po'i rin po che'i gling lta bu'o/ /dge ba'i rtsa ba 'phel zhing skye ba'i phyir zhing gshin pa lta bu'o/ /rnam par grol ba'i bde ba la 'jog pa'i phyir snod lta bu'o/ /rin po che dam pa'i 'byung gnas su gyur pa'i phyir yon tan gyi bum pa bzang po lta bu'o/ /dge ba'i nan tan can la snang bar byed pa'i phyir nyi ma gsal ba lta bu'o/ /lam stor ba rnams la snang bar byed pa'i phyir sgron ma lta bu'o/ /nyon mongs pa'i gdung ba sel ba'i phyir zla ba ltar sim pa lta bu'o/ /rkang med pa la theg par gyur pa lta bu'o/ /lam ring por 'gro ba la tshogs kyi stegs bu lta bu'o/ /'brog bslad pa la lam ston pa lta bu'o/ /smyos shing 'khrugs pa la sman dam pa lta bu'o/ /nad kyis gzir ba la sman pa mkhas pa dang phrad pa lta bu'o/ /rgas shing 'khogs pa la rten dang khar ba lta bu'o/ /ngal ba dang dub pa la khri dang stan lta bu'o/ /chu bo bzhi rgal ba la zam pa lta bu'o/ /pha rol du 'gro ba la gru dang gzings lta bu'o/ /dge ba'i rtsa ba rnam gsum gyi 'bras bu khyad par 60.111b can smin par byed pa'o/ /dge ba rnam gsum gyi gzhi 'dren cing rgyun du 'bebs pa'o/ /sbyin pa gtong ba'i rgyun mi 'chad pa 'khor lo ltar 'jug pa'o/ /tshul khrims srung ba brtan pas ri rab lhun po lta bu'o/ /brtson 'grus gzhig par dka' ba ni rdo rje rin po che lta bu'o/ /bzod pa mi g.yo ba ni sa chen po lta bu'o/ /bsam gtan zab pa ni gter gsang ba lta bu'o/ /mnyam par 'jog pas mdzes pa ni me tog gi phreng ba lta bu'o/ /shes rab zab cing yangs pa ni rgya mtsho chen po lta bu'o/ /cis kyang mi chags pa ni nam mkha' lta bu'o/ /'bras bu dam pa'i rgyu dang nye ba ni me tog rgyas pa lta bu'o/ /mu stegs can 'dul ba la seng ge'i rgyal po lta bu'o/ /lha'i bdud yongs su 'joms pa ni klu 'am glang po che lta bu'o/ /nyon mongs pa'i dgra thams cad gcod pa ni lha'i ral gri lta bu'o/ /'du 'dzi mang pos skyo ba ni rang sangs rgyas kyi theg pa lta bu'o/ /nyon mongs pa'i dri ma 'khru ba ni chu dang ba lta bu'o/ /mi gtsang ba'i nyal nyil sel ba ni rlung drag po lta bu'o/ /kun nas nyon mongs pas glags mi gcod pa ni mtshon rnon po lta bu'o/ /'jigs pa dang bag tsha ba kun las srung ba ni gnyen nam mdza' bo lta bu'o/ /phas kyi rgol ba'i dgra las skyob pa ni 'obs sam mkhar lta bu'o/ /nyam nga ba thams cad las grol bar byed pas pha ma lta bu'o/ /zhan cing nyam chung ba rnams sbed pa ni nags stug po lta bu'o/ /dbyar lam ring por 'gro ba la bsil grib kyi shing chen po lta bu'o/ /tsha ba dang skom gyis gdungs pa rnams la chu grang lta bu'o/ /bkres pa rnams la 'bras bu zhim po lta bu'o/ /gcar bu rnams la bgo ba'i gos byed pa'o/ /tsha bas nyen pa rnams la sprin stug por gyur pa'o/ /dbul phongs pa la yid bzhin gyi nor bu rin po cher gyur pa'o/ /'jigs skrag pa dag la skyabs dang gnas su gyur pa'o/ /lo tog rnams la char par gyur pa'o/ /chu rnyog ma can rnams la nor bu chu 'dang du gyur pa'o/ /sems can 60.112a mang po'i dge ba'i rtsa ba mi 'gong bar byed pas spyod yul dam pa ston cing 'khor spro ba dang tshim par byed pa'o/ /sems can rnams lhag pa'i 'dzem pa dang ngo tsha ba la skul zhing 'dzud pa'o/ /bsod nams dang ye shes kyi tshogs sogs pa la de'i rgyan dang ldan par byed pa'o/ /nyon mongs pa yongs su sel ba la skyug pa dang 'khru ba'i sman lta bur gyur pa'o/ /sems 'khrugs pa sdud pa ni mnyam par 'jog pa'i spyod yul lta bur gyur pa'o/ /spobs pa thogs pa med pa ni zo chun rgyud pa'i 'khor lo lta bu'o/ /dmigs pa la sems sdud pa ni gzugs bzang po la rtog pa lta bu'o/ /bzod pa brtan pa ni ri rab lhun po lta bu'o/ /gzugs zab cing rgya che ba ni rgya mtsho chen po lta bu'o/ /rdzu 'phrul gyi rkang pa thogs pa med pa ni nam mkha' lta bu'o/ /sgrib pa'i bag chags thams cad yongs su sel ba ni ji ltar nyi ma tsha bas 'khyag pa cham chom bzhu ba lta bu'o/ /rtag tu bsam gtan dang / gzugs med pa dang / yang dag pa'i lam la rol cing thams cad mkhyen pa'i ye shes kyi rin po che dam pa'i gling lta bur gyur pas ched du ma brtsams kyang chos chen po'i 'khor lo rab tu bskor ro/ /rigs kyi bu de ltar byang chub sems dpa' sems dpa' chen po sa'i snying po de ni de lta bu'i yon tan gyi khyad par tshad med grangs med pa bsam gyis mi khyab pa dang ldan pa de 'khor dang bcas te gnas 'dir phyin du nye bas 'od las 'di lta bu'i cho 'phrul dang ltas sngar bstan pa yin no/ /bcom ldan 'das kyis byang chub sems dpa' sa'i snying po'i yon tan mang po bshad ma thag tu/ de'i tshe byang chub sems dpa' sems dpa' chen po sa'i snying po 'khor byang chub sems dpa' bye ba khrag khrig brgya stong phrag brgyad bcu dang bcas te rdzu 'phrul gyi mthus dge sbyong gi gzugs su ston cing lho phyogs nas bcom ldan 'das kyi spyan sngar lhags te/ 'khor mang po dang bcom ldan 'das kyi zhabs gnyis 60.112b la spyi bos gtugs te phyag 'tshal nas lan gsum bskor ba byas te/ de bzhin gshegs pa'i spyan sngar thal mo sbyar nas/ 'greng bzhin du tshigs su bcad pa 'di dag gis mngon par bstod do/ /rnam par 'dren pa rkang gnyis mchog /byams pa'i thugs kyis kun la skyob/ /sa chen ltar ni shin du bzod/ /zhe sdang khro ba'i sems kun bsal/ /mtshan dang dpe byad mchog ldan pas/ /sangs rgyas kun gyi zhing rab brgyan/ /bden pa'i byams dang snying rje yis/ /rgyal ba'i zhing kun rab tu 'gengs/ /sred pa'i dra ba kun bcad nas/ /yang dag ci bzhin bde bar gnas/ /yongs su dag pa'i zhing spangs nas/ /rnyog pa can gyi sems can dgrol/ /rnyog pa'i zhing 'dir dam bcas te/ /ngan 'gro sems can smin par mdzad/ /yang dag brtan pa'i rtsol ba yis/ /ring mo zhig nas dka' thub spyad/ /yun rings dka' thub spyad pa dag /thos nas 'jigs pa'i sems kyang skye/ /sbyin pa tshul khrims bzod pa dang / /brtson 'grus bsam gtan shes rab bskyed/ /sangs rgyas byang chub sems dpa' dang / /tshad med nyan thos bsnyen bkur mchog /gzhan yang skye bo mang po dag /bkres skom na 'chi kun las bsgral/ /so so'i skye bo gzhan gyi phyir/ /lus srog ma chags mang du btang / /yang dag dam pa'i chos tshol phyir/ /sha dang rus pa'ang mang du btang / /bdag gi bde ba kun btang nas/ /skye bo rnams la thugs brtser dgongs/ /so so'i skye bo mang po'i phyir/ /the tsom dra ba gcod la brtson/ /dbang po drug rnams rab bsdams nas/ /'dod pa thams cad ring du spangs/ /'dus byas mi rtag sdug bsngal te/ /bdag med stong pa nyid du rtogs/ /sdug bsngal las kun skye ba yi/ /rgyu ni 'dod chags sred pa'o/ /de phyir dbang po drug pas sngar/ /'dod chags yongs su gcad par bya/ /sems can gnas pa'i khams kun du/ /rtag par thugs rje 60.113a chen pos gnas/ /byang chub mchog tu sangs rgyas kyang / /sngon gyi smon lam kun mi gtong / /sems can gang zhig sdug bsngal gyis/ /rnam par gzir ba dag gzigs nas/ /shin du 'bab pa'i brtson 'grus kyis/ /de las sgrol phyir rab tu brtson/ /sbyin pa tshul khrims bzod brtson 'grus/ /bsam gtan shes rab kun bsgoms nas/ /ji ltar ma ni bu gcig la/ /byams pa'i sems kyis gso bzhin du/ /sngon yang sems can ris kun la/ /rtag tu byams pa'i thugs bskyed pas/ /de phyir myur du sangs rgyas nas/ /tshad med pa yi 'khor rnams sgrol/ /ji tsam byang chub spyod bsgoms pa/ /sems can don du ma bsngos med/ /de bas sems can thams cad la/ /pha rol phyin pa drug mi gtong / /rtag tu dus ngan tha ma'i tshe/ /bla med byang chub bsgrubs pas na/ /da yang dus ngan tha ma'i tshe/ /bla med byang chub mngon sangs rgyas/ /ngan par lta ba'i lha klu mi/ /gnod sbyin dag ni kun btul te/ /the tsom gcod cing bder bkod pa/ /rdo rje lta bu'i lam la'o/ /tshad med pa yi skye bo dag /byang chub mchog tu lung yang ston/ /mchod 'os 'dren pa'i gtsor gyur te/ /mchog gi bsod nams zhing du gyur/ /dpe zla med pa'i bcom ldan 'das/ /byams pas 'gro ba kun la skyob/ /tshad med grags pa chen po yis/ /phyogs bcu'i 'jig rten yongs su khyab/ /de bas byang chub sems dpa' rnams/ /bdag gi don du bsgrub pa'i phyir/ /kun nas lhan cig 'dir 'dus nas/ /thub pa chen po spyan sngar lhags/ /dam pa'i chos rnams thos nas ni/ /rab tu dga' ba'i sems skyes te/ /lhag par yang dag brtson bskyed nas/ /byang chub spyod la nan tan bgyid/ /rnam par 'dren pa'i chos kyi mthus/ /thams cad mngon par 'tshang rgya bas/ /de bas deng 'dir 'dren khyod kyis/ /bsdus pa'i 'khor ni sngon ma byung / /gnod sbyin khri phrag bcu gsum 60.113b snyed/ /rtag tu sha za khrag 'thung ba/ /thams cad sdig pa'i las btang nas/ /byang chub chen por 'bab cing gzhol/ /kha cig khyad par gzugs mchog dang / /bzod pa ting nge 'dzin yang thob/ /kha cig zag pa kun zad nas/ /'jig rten mchog gi dgra bcom gyur/ /kha cig tshad med bzhi bsgoms shing / /kha cig bsdu ba bzhi la gnas/ /kha cig yang dag rig bzhi thob/ /kha cig 'thun pa'i bzod la gnas/ /kha cig dpa' 'gro'i ting 'dzin thob/ /kha cig shes rab mig dang ldan/ /kha cig mi skye bzod la gnas/ /de kun 'dren pas byin gyis brlabs/ /bcom ldan gzi brjid chen po'i mthus/ /bdud kyi 'khor rnams bcom nas su/ /rnam pa dgu bcu rtsa lnga yi/ /mu stegs can gyi ris kun btul/ /sems can dmyal ba byol song dang / /yi dgas lha min rgyud kun bcom/ /bde bas sems can bden pa rnams/ /thams cad rgyal ba'i spyan sngar lhags/ /nad dang mtshon gyis 'jigs pa dang / /mu ges 'jigs pa'ang deng 'dir bcil/ /sems can mdongs shing 'thom pa dang / /yang dag lam ni stor ba bsgral/ /nyon mongs myos shing 'khrug pa dag /thams cad zhi ba'i lam la bkod/ /bdag gis bya ba kun spangs te/ /lhags nas bcom ldan zhabs la 'thug /dpag tu med pa'i zhing rnams na/ /bcom ldan da ltar bzhugs pa'i rnams/ /thams cad khyod la kun bsngags pas/ /thos nas thams cad 'di ru lhags/ /thams cad mkhyen pa rgya mtsho yi/ /yang dag yon tan tshad ma mchis/ /sems can mang po'i don mdzad pa/ /mos pa'i sems kyis phyag 'tshal lo/ /tshad med bsod nams rdzogs bgyis pas/ /bcom ldan zhabs la phyag 'tshal gyur/ /tshad med bskal pa'i bar du yang / /mchod pa mang pos mchod par shog /bdag kyang bcom ldan ji bzhin du/ /de lta bu yi yi dam bcas/ /rnyog pa can gyi 'jig rten 'dir/ /bla med byang chub thob par shog /de'i tshe byang chub sems dpa' 60.114a sems dpa' chen po sa'i snying pos tshigs su bcad pa dam pa 'di dag gis/ bcom ldan 'das la mngon par bstod nas 'khor dang bcas te gzhan yang lha rdzas kyi bsung dang me tog rnam pa sna tshogs kyi rin po che'i rgyan tshad med pa snyed kyis/ bcom ldan 'das la mngon par gtor nas steng gi bar snang la rin po che'i gdugs su gyur te/ dam pa'i chos mnyan pa'i phyir bcom ldan 'das kyi spyan sngar ci yang mi smra bar 'dug go/ /de'i tshe 'khor gyi dkyil 'khor der 'dus pa'i 'khor thams cad kyis byang chub sems dpa' sems dpa' chen po sa'i snying po mthong nas ngo mtshar rmad du gyur te/ so so nas rnam pa sna tshogs kyi lha rdzas kyi spos dang / me tog rin po che'i rgyan dang / na bza' dang / rgyal mtshan dang / ba dan dang / gdugs la sogs pa phul te/ byang chub sems dpa' sems dpa' chen po sa'i snying po la mchod pa byas nas 'di skad ces smras so/ /bdag cag gis rnyed pa rab tu rnyed do/ /bcom ldan 'das kyi byin gyis brlabs kyis mngon sum du skyes bu chen po khyod mthong nas bsti stang dang bcas te mchod pa byas par gyur to zhes smra'o/ /de nas 'khor gyi dkyil 'khor de'i nang na byang chub sems dpa' sems dpa' chen po rigs par the tsom 'dri zhes bya ba zhig 'dug pa stan las langs nas gos tshags bcos te phrag pa g.yas pa phyung nas/ bcom ldan 'das kyi zhabs la spyi bos phyag 'tshal nas pus mo g.yas pa'i lha nga sa la btsugs te/ bcom ldan 'das gang na ba de logs su thal mo sbyar nas bcom ldan 'das la 'di skad ces gsol to/ /bcom ldan 'das rigs kyi bu 'di gang nas mchis/ gnas pa'i sangs rgyas kyi zhing 'di nas ji srid cig na mchis/ yon tan dang dge ba'i rtsa ba ji tsam zhig dang ldan na bcom ldan 'das kyis bstod pa rnam pa sna tshogs kyis bsngags la phyir yang bcom ldan 'das kyi yon tan gyi rgya mtsho 60.114b bsam gyis mi khyab pa la mngon par bstod par gyur/ bdag cag gis sngon ma mthong pas ngo mtshar du gyur na bcom ldan 'das kyis bdag cag la bshad du gsol/ bcom ldan 'das kyis bka' stsal pa/ rigs kyi bu thong shig /skyes bu chen po 'di'i yon tan dang dge ba'i rtsa ba ji tsam pa de 'jig rten du bcas pa lha dang mi'i 'khor thams cad kyis rtogs par nus pa ma yin no/ /gal te de bzhin gshegs pas skyes bu chen po de'i yon tan dang dge ba'i rtsa ba rgyas par bshad na 'jig rten du bcas pa lha dang mi thams cad kyi mgo rmongs te yid mi ches par 'gyur ro/ /de nas byang chub sems dpa' rigs par the tsom 'dri bas yang gsol pa/ bcom ldan 'das bdag cag la thugs brtse ba'i slad du bshad du gsol/ bcom ldan 'das kyis bka' stsal pa/ legs par shin du nyon la yid la zung shig dang / ngas khyod la phyogs tsam zhig bshad par bya'o/ /ji ltar skyes bu chen po de yon tan gyi khyad par tshad med bsam gyis mi khyab pa dang ldan no/ /'di lta ste/ dpa' bar 'gro ba'i ting nge 'dzin gyi khyad par la bde bar gnas pa'o/ /de bzhin gshegs pa'i spyod yul yang shin du rtogs par 'jug pa'o/ /mi skye ba'i chos kyi bzod pa'i khyad par yang thob pa'o/ /sangs rgyas kyi chos thams cad la dbang du gyur pa'o/ /thams cad mkhyen pa'i ye shes kyi sa la bzod pa thob pa'o/ /thams cad mkhyen pa'i ye shes kyi rgya mtsho'i pha rol du phyin pa'o/ /seng ge rab tu bsgyings pa'i rgyal mtshan gyi ting nge 'dzin la yang shin du gnas pa'o/ /thams cad mkhyen pa'i ye shes kyi ri la yang rab tu 'dzegs pa'o/ /mu stegs can dang phas kyi rgol ba thams cad shin du choms pa ste/ sems can thams cad yongs su smin par bya ba'i phyir sangs rgyas kyi zhing ji snyed pa thams cad du de gnas par byed do/ /skyes bu chen po de ji ltar 60.115a gnas pa bzhin du sangs rgyas kyi zhing rnams kyang de bzhin du gnas te/ gang ting nge 'dzin rnams kyis tshad med pa'i yon tan gyi khyad par skyed par gyur pas gdul ba'i sems can tshad med pa dag yongs su smin par byed do/ /skyes bu chen po de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te ye shes mngon par skyed pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de na gnas pa'i sems can thams cad 'thun par ting nge 'dzin rnams kyi spyod yul kun mthong bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te dpag tu med pa'i ye shes dang ldan pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad ci nus pa bzhin du tshad med pa'i mchod pa'i yo byad dam pas sangs rgyas bcom ldan 'das de la bsti stang dang bcas pas mchod par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te rnam par dag pa'i ye shes phun sum tshogs pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad kyis 'thun par 'dod pa'i spyod yul gyi nyes pa'i skyon tshad med pa mthong nas sems rnam par dag par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te khrel ba dang ngo tsha ba dang ldan pa'i ye shes shes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad lhag pa'i 'dzem pa dang ngo tsha ba dang ldan zhing sdig pa mi dge ba'i chos dang yongs su bral nas bsam pa mi nyams par 'gyur ro/ /de ji ltar gnas pa 60.115b bzhin du sangs rgyas kyi zhing rnams kyang de bzhin du 'gyur te/ gal te theg pa thams cad dang ldan pa gsal ba zhes bya ba'i ting nge 'dzin la snyoms par zhugs nas sangs rgyas kyi zhing de dag na gnas pa'i sems can thams cad thabs mkhas pa'i rdzu 'phrul gyi mig gi mngon par shes pa dang / sngon gyi gnas dran pa'i mngon par shes pa dang / 'chi 'pho dang skye ba mngon par shes pa dang / 'jig rten 'di dang 'jig rten pha rol gyi rgyu dang 'bras bu mngon par rtogs par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te mya ngan med pa'i mngon par shes pas rig pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad mya ngan dang / yi mug pa dang / rmugs pa thams cad dang bral bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te mngon par shes pa'i khyad par dang ldan pa zhes bya ba'i ting nge 'dzin la snyoms par zhugs na/ sangs rgyas kyi zhing de dag na gnas pa'i sems can thams cad thabs mkhas pa'i mngon par shes pa dang ldan par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te 'jig rten kun du snang ba zhes bya ba'i ting nge 'dzin la snyoms par zhugs na ting nge 'dzin de'i mthus phyogs bcu'i 'jig rten gyi khams thams cad mun pa dang bral te/ sangs rgyas kyi zhing de na gnas pa thams cad kyang phyogs bcu'i sangs rgyas kyi zhing kun mngon sum du mchod bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te sangs rgyas kyi sgron ma zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas 60.116a kyi zhing de dag na gnas pa'i sems can thams cad log par lta ba yongs su spangs nas/ dkon mchog gsum la skyabs su 'gro bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du gyur te/ gal te rdo rje'i 'od ces bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag gi ri khor yug dang / khor yug chen po dang / ri rab lhun po dang / de ma yin pa'i pe gzhan dang / lung ba dang / lung phran dang / gcong rong dang / gseg ma dang / gyo mo dang / tsher ma dang / rtsa dang / shing ngan pa thams cad mi snang ngo / /sangs rgyas kyi zhing de na ji tsam du ngan par gdags pa dug dang / byad stems dang / gcan gzan ma rungs pa dang / ye 'drog dang / glo bur dang / rims nad dang / yul ngan dang / nam rmugs pa dang / rdul dang / dri ma dang / mi gtsang ba'i nyal nyil thams cad kyang zhi zhing med par 'gyur ro/ /sangs rgyas kyi zhing de'i sa gzhi yang lag mthil bzhin du mnyam zhing bkra shis pa rnam pa sna tshogs rang 'byung ba dang / rnam par dag par 'gyur ba dang / phul du 'gyur ba dang / dam par 'gyur ba dang / mtshan ma bzang po du mas yongs su brgyan par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te ye shes kyi stobs gdul dka' ba zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de na gnas pa'i bdud kyi rgyal po 'khor dang bcas te thams cad 'jigs skrag nas/ dkon mchog gsum la skyabs su 'gro bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te glog gi 'od zer zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad 'jig 60.116b rten pha rol gyi 'jigs pa dang bral zhing chos kyis spro bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te mchog dam pa'i ro dang ldan pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de na gnas pa'i sems can thams cad bsams pa bzhin du zas dang skom gyis tshim par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te mchog gi mdangs dang ldan pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad gang yang lhag pa'i mthu stobs dang mi ldan pa med de nad kyi sdug bsngal thams cad dang bral bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te mchog dam pa'i yo byad ces bya ba'i ting nge 'dzin la snyoms par zhugs na/ ting nge 'dzin de'i mthus sangs rgyas kyi zhing de dag na gnas pa'i sems can thams cad ci la mos pa bzhin du khri stan dang / gding ba dang / gos dang / rin po che'i rgyan dang / ci tsam du 'tsho ba'i yo byad du gtogs pa de dag thams cad kyis brel zhing phongs pa med de rab tu mdzes pa shin du yid du 'ong ba dang ldan par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te rtsod pa med pa'i ye shes shes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad lus dang / sems zo mdog bde zhing yang ba dang / dgra sdang ba dang / 'ching ba thams cad dang bral ba dang / 'dum zhing dga' ba dang / spro ba dang / sbyin pa dang / tshul khrims dang / bzod pa dang / 60.117a brtson 'grus rtsom pa dang / sems mi 'khrug pa dang / shes rab yongs su rdzogs pa la dga' zhing mos par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te phul du gyur pa'i spro ba zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad khyad par can gyi rab tu dga' ba tshad med pa dang ldan par 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te 'jig rten pa'i lam gyi 'od ces bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de na gnas pa'i sems can thams cad thogs pa med pa'i ye shes thob cing rnam par dag pa'i las rnam pa sna tshogs sbyong bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te rgyal ba'i rdo rje la shin du gnas pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de na gnas pa'i sems can thams cad dbang po kun dang ldan zhing dbang po mi nyams pa dang / rtag tu yang dag par 'byung ba'i lam la mos shing sems rab tu zhi bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te lhag pa'i rgyal mtshan rtog pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad bdag sdig pa mi dge ba'i chos la shin du skyo zhing mi 'dod pa dang / thams cad kyang dge ba srung ba dang / dge ba bcu'i las kyi lam gyis mtho ris kyi lhar skye bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te byams pa dang / snying rjer ldan pa zhes bya ba'i ting nge 'dzin la 60.117b bsnyoms par zhugs na ting nge 'dzin de'i mthus sangs rgyas kyi zhing de dag na gnas pa'i sems can thams cad byams pa'i sems dang / snying rje'i sems dang / gnod pa 'am/ 'tshe ba med pa'i sems dang / kun la snyoms pa'i sems dang / gcig la gcig phan pa dang bde bar byed pa'i sems skye bar 'gyur ro/ /de ji ltar gnas pa bzhin du sangs rgyas kyi zhing rnams kyang de bzhin du 'gyur te/ gal te bsod nams thams cad shin du sdud pa zhes bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag thams cad 'thab pa dang / rtsod pa dang / nad dang / mu ge dang yongs su bral te/ dus ma yin pa'i rlung dang / char pa dang / kha ba dang / rtsub pa dang / tsha ba dang / sdug bsngal ba la sogs pa'i reg bya'i yul yid du mi 'ong ba thams cad yongs su zhi bar 'gyur ro/ /de ltar skyes bu chen po de gal te rgya mtsho glog 'od ces bya ba'i ting nge 'dzin la snyoms par zhugs na ting nge 'dzin de'i mthus sangs rgyas kyi zhing de dag gi sa chen po thams cad rin po che rnam pa sna tshogs las byas par 'gyur zhing nyes pa'i skyon thams cad dang yongs su bral te rnam pa sna tshogs kyi rin po che'i shing dang / gos kyi shing dang / snod kyi shing dang / rgyan gyi shing dang / me tog gi shing dang / 'bras bu'i shing dang / rol mo sna tshogs kyi shing la sogs pa 'tsho ba'i yo byad dam pa tshad med pa snyed kyis yongs su brgyan par gyur to/ /de bzhin du mdor na rigs kyi bu de ni sems can mang po yongs su smin par bya ba'i phyir nyin re zhing snga dro'i dus su ting nge 'dzin gang gA'i klung gi bye ma snyed dag gi ting nge 'dzin la snyoms par 'jug ste/ ting nge 'dzin de las langs nas phyogs bcu'i sangs rgyas kyi zhing kun na gdul ba'i sems can thams cad la ci dang cis 'dul ba bzhin du phan pa dang bde ba'i don de dang de dag 60.118a gis yongs su smin par byed do/ /rigs kyi bu 'di ni sngon bskal pa chen po tshad med dpag tu med pa'i bar du rnyog pa lnga'i tshe de bzhin gshegs pa mi bzhugs pa'i 'jig rten gyi khams su sems can yongs su smin par byed do/ /phyi ma ma 'ongs pa'i dus su 'jig rten gyi khams la lar gal te mtshon gyis 'jigs pa byung ste/ sems can dag yongs su gdungs par gyur na/ rigs kyi bu 'di de lta bu dag mthong nas snga dro'i dus kyi tshe ting nge 'dzin rnams kyi mthus mtshon gyis 'jigs pa de dag yongs su bcil nas sems can rnams gcig la gcig byams pa'i sems kyis snying brtse bar byed do/ /'jig rten gyi khams la lar nad kyis 'jigs pa byung ste sems can kha btag pa na rigs kyi bu 'dis de lta bu dag mthong nas snga dro'i dus kyi tshe ting nge 'dzin rnams kyi mthus nad kyis 'jigs pa yongs su bcil nas sems can rnams rab tu bde ba thob par byed do/ /'jig rten gyi khams la lar gal te mu ges 'jigs pa byung ste sems can kha btag pa na/ rigs kyi bu 'dis de lta bu dag mthong nas snga dro'i dus kyi tshe ting nge 'dzin gyi mthus mu ges 'jigs pa yongs su bcil te sems can rnams kha zas kyis yongs su tshim par byed do/ /rigs kyi bu 'dis de ltar ting nge 'dzin mang po'i shugs kyis de lta bu la sogs pa tshad med/ dpag tu med/ bsam gyis mi khyab pa'i phan pa dang bde ba'i don gyis sems can gyi dbugs 'byin to/ /rigs kyi bu 'di de ltar nan tan gyi khyad par tshad med grangs med pa/ bsam gyis mi khyab pa dang ldan pas sems can thams cad la phan pa dang / bde bar byed pa'i don la rab tu brtson pa'o/ /sngon 'das pa'i dus na skye bo mang po la phan pa dang bde ba dang yongs su smin par bya ba'i phyir sangs rgyas bcom ldan 'das tshad med grangs 60.118b med pa gang gA'i klung gi bye ma snyed las zad mi shes pa'i yi dam chen po bcas te snying rje chen po dang / mi 'phrogs pa'i brtson 'grus chen po rab tu bskyed do/ /de ltar snying rje chen po dang mi 'phrogs pa'i brtson 'grus bskyed de zad mi shes pa'i yi dam bcas pas gong nas gong du 'phags pa'i shugs kyis nyin zhag gcig gam/ skad cig thang cig tsam gyis kyang so so'i skye bo tshad med pa bye ba khrag khrig btul te/ sdug bsngal rnam pa sna tshogs las bsgral nas thams cad ci dang ci 'dod pa de dang de dag gis re ba yongs su rdzogs par byed do/ /gnas gang dag na sems can gang 'dod pa rnam pa sna tshogs kyis sdug bsngal te/ 'dod pas yongs su gdungs par gyur pa dag sems rtse gcig tu byang chub sems dpa' sems dpa' chen po sa'i snying po'i mtshan nas brjod cing / dmigs pas bsti stang dang bcas pas mchod pa byas na ci dang ci 'dod pa thams cad 'thob cing sdug bsngal dang bral te/ skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang bza' ba dang / btung bas phongs par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas te mchod pa byas na ci dang ci 'dod pa thams cad 'thob cing bza' ba dang btung ba dang ldan te mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang bgo ba 'am/ rin po che'i rgyan nam/ nad kyi rkyen sman nam/ gding ba 'am/ khri stan nam/ 'tsho ba'i yo byad kyis brel cing phongs par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing 60.119a dmigs pas bsti stang dang bcas pas mchod pa byas na ci dang ci 'dod pa rnyed cing bgo ba dang / rin po che'i rgyan dang / nad kyi rkyen sman dang / gding ba dang / khri dang / 'tsho ba'i yo byad thams cad 'byor cing skal ba ji lta ba bzhin mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag byams sdug pa dang bral te/ dgra sdang bar gyur pa dang phrad par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas te mchod pa byas na/ byams sdug pa dang phrad cing dgra sdang ba dang bral te/ skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag lus dang sems nad dang sdug bsngal mang pos gzir bar gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na de kun lus dang sems bde zhing nad thams cad dang bral te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang 'thab cing rtsod par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na/ de kun lus sems bde zhing nad thams dang bral te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/[ ]/gnas gang dag na sems can gang 'thab cing rtsod par gyur pa dag gis sems rtse gcig tu byang chub sems dpa' 60.119b sems dpa' chen po sa'i snying po'i mtshan nas brjod cing dmigs pas bsti stang dang bcas te mchod pa byas na zhe 'gras pa'i sems dang bral te gcig la gcig dga' ba dang / bzod pa dang / gcig la gcig byams pa'i sems kyis 'gyod cing chags par 'gyur te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang btson du bzung ste btson rar bcug gam/ lcags dang / khong sgril dang / shing gi gdos kyis bcings sam/ yan lag bcings te sdug bsngal bar gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na/ de kun btson ra dang / lcags dang / khong sgril dang / lcags sgrog las thar te bag yongs su gyur nas dga' ba dang / skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag btson du bzung nas gzhu ba 'am/ 'tshog pa 'am/ nan la bor ba dang / gsod pa la thug pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na/ de kun btson du bzung ba dang / gzhu 'tshog pa dang / nan la bor ba las thams cad thar te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag lus dang sems dub pa dang / mthu stobs dang mi ldan cing / nyam chung ba dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang 60.120a bcas pas mchod pa byas na de kun lus dang sems yang zhing bde ba dang mthu stobs bskyed de cis 'dul ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can dbang po nyams pa dang ma tshang bar gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na/ de kun dbang po ma tshang ba med cing dbang po dang ldan te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag smyos shing sems 'khrugs sam/ 'byung po'i gdon gyis brlams pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas te mchod pa byas na/ de kun smyos shing sems 'khrugs pa dang bral te rab tu bde ba dang skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag 'dod chags dang / zhe sdang dang / gti mug dang / khong khro ba dang / phrag dog dang / nga rgyal dang / ngan par lta ba dang / gnyid dang / bag med pa dang / the tsom la sogs pas lus dang sems gdungs te mi 'pho bar gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas te mchod pa byas na/ de kun 'dod chags la sogs pa dang bral te lus dang sems rab tu bde ba dang skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag mes tshig par gyur pa 'am/ chus khyer ba 'am/ rlung 60.120b gis khyer ba 'am/ rbab tu lhung ba 'am/ shing ka 'am/ khang thog nas lhung ste sems dngangs shing 'khums par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na/ de kun mi bde ba'i bgegs dang / g.yang sa de dag thams cad las thar te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag sbrul gdug pa 'am/ gcan gzan gdug pas zin tam/ dug rnam pa sna tshogs kyis phog par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na/ de kun 'tshe zhing gnod pa thams cad dang bral te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang 'byung po'i gdon gyis btab ste rtag pa'i rims dang / zhag gcig pa dang / zhag gnyis pa dang / zhag gsum pa dang / zhag bzhi pa dang / smyos nas lus dang sems 'dar zhing 'khrugs te/ dran pa nyams shing shes pa med par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na/ de kun 'jigs pa las rnam par grol te lus dang sems rab tu bde ba dang skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang gnod sbyin dang / srin po dang 'byung po dang / sha za dang / srul po dang / lus srul po dang / grul bum dang / mdangs za ba dang / 60.121a de ma yin pa gzhan yang seng ge dang / stag dang / spyang gi la sogs pa gcan gzan gdug pas nyen pa dang / sngags dang / byad dang / g.yul ngor lhags pa dang / gzhan yang 'jigs par gyur pa rnam pa sna tshogs kyis dkris shing klags te/ lus dang sems rab tu dngangs par gyur nas shi bas 'jigs shing 'tsho bar 'dod pa dang / bde ba tshol zhing sdug bsngal mi 'dod pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas bsti stang dang bcas pas mchod pa byas na de kun 'jigs pa thams cad dang bral te lus dang srog la mi dma' ba dang skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang mang du thos par 'dod pa 'am/ mos pa dag par 'dod pa 'am/ tshul khrims dag par 'dod pa 'am/ bsam gtan bsgrub par 'dod pa 'am/ mngon par shes pa 'dod pa 'am/ shes rab 'dod pa 'am/ rnam par grol ba 'dod pa 'am/ gzugs dam pa 'dod pa 'am/ sgra snyan pa 'dod pa 'am/ dri zhim po 'dod pa 'am/ ro zhim po 'dod pa 'am/ reg bya mchog 'dod pa 'am/ khe dang rnyed pa 'dod pa 'am/ grags pa 'dod pa 'am/ bsod nams 'dod pa 'am/ bzos 'tsho bar 'dod pa 'am/ me tog dang / 'bras bu 'dod pa 'am/ skyed mos tshal 'dod pa 'am/ khri stan 'dod pa 'am/ gding ba 'dod pa 'am/ yul gyu par 'dod pa 'am/ nor dang 'bru 'dod pa 'am/ nad kyi rkyen sman 'dod pa 'am/ khang khyim 'dod pa 'am/ bran khol 'dod pa 'am/ tshon rtsi 'dod pa 'am/ char pa 'dod pa 'am/ chu 'dod pa 'am/ lo thog 'dod pa 'am/ bsil yab 'dod pa 'am/ rlung bsil ba 'dod pa 'am/ me 'dod pa 'am/ theg pa 'dod pa 'am/ bu pho dang bu mo 60.121b 'dod pa 'am/ thabs mkhas par 'dod pa 'am/ bsod nams bya bar 'dod pa 'am/ dro bar 'dod pa 'am/ bsil bar 'dod pa 'am/ yid gzhungs par 'dod pa 'am/ de ma yin pa 'jig rten dang 'jig rten las 'das pa'i don gyi dngos po rnam pa sna tshogs 'dod pa'i phyir nyon mongs shing sdug bsngal gyi gdungs par gyur pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas sti stang dang bcas te mchod pa byas na/ rigs kyi bu de'i ting nge 'dzin dam pa'i yon tan dang / mthu dang gzi brjid kyi shugs kyis de dag thams cad sdug bsngal gyis gdungs pa dang bral te/ re ba thams cad yongs su rdzogs nas skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /gnas gang dag na sems can gang dag zhing gshin pa 'am/ zhing mi gshin pa la sa bon btab nas/ gal te nan tan byas kyang rung / nan tan ma byas kyang rung ste/ sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas sti stang dang bcas te mchod pa byas na/ rigs kyi bu de'i ting nge 'dzin dam pa'i yon tan dang / mthu dang / gzi brjid kyi shugs kyis de dag gi lo thog thams cad legs shing 'bras bu smin cing legs par 'gyur ro/ /de ci'i phyir zhe na/ rigs kyi bu 'di ni sngon bskal pa chen po tshad med grangs med pa'i bar du sangs rgyas bcom ldan 'das tshad med grangs med pa dag la brtson 'grus chen po'i sbyor ba dang / brtan pa'i yi dam bcas pa'i smon lam gyi dbang gis sems can yongs su smin par bya ba'i phyir rtag tu sa chen po thams cad yongs su 'dzin pa dang / rtag tu sa bon gyi tshogs thams cad yongs su 'dzin cing rtag tu sems can thams 60.122a cad kyis yid bzhin du spyod par byed do/ /rigs kyi bu de'i rdzu 'phrul gyi mthus sa chen po 'di las skye ba'i rtswa dang / shing gi rtsa ba dang / yal ga dang / myu gu dang / lo ma dang / sdong po dang / 'dab ma dang / me tog dang / 'bras bu la sogs pa thams cad rgyas par skye shing / rtsi shing dang / lo tog la sogs pa'i me tog dang / 'bras bu yang smin cing grung ba dang / mngar ba dang / snum pa dang / dri zhim par byed do/ /gnas gang dag na sems can gang dag 'dod chags dang / zhe sdang dang / gti mug la sogs pa drag la rno bas srog gcod pa dang / ma byin par len pa dang / 'dod pas log par g.yem pa dang / brdzun du smra ba dang / ngag rtsub por smra ba dang / phra ma byed pa dang / tshig kyal par smra ba dang / 'dod chags can dang / zhe sdang dang / log par lta ba dang / mi dge ba bcu'i las kyi lam mngon du spyod pa dag gis sems rtse gcig tu byang chub sems dpa' sems dpa' chen po sa'i snying po'i mtshan nas brjod cing dmigs pas sti stang dang bcas te mchod pa byas na nyon mongs pa thams cad zhi zhing mi dge ba bcu dang yongs su bral te dge ba bcu'i las kyi lam dang ldan zhing sems can thams cad la byams pa dang / snying rje ba dang / phan pa dang / bde ba'i sems skye bar 'gyur ro/ /de ltar rigs kyi bu 'di ni de lta bu'i yon tan dam pa dang / ting nge 'dzin dang / mthu dang / gzi brjid kyi shugs dang / shin du brtson pa'i ting nge 'dzin gyis skad cig thang cig tu sangs rgyas kyi zhing tshad med grangs med par phyin cing / sangs rgyas kyi zhing de re rer yang skad cig thang cig gis sems can snod du gyur pa/ tshad med grangs med pa gang gA'i klung gi bye ma snyed sdug bsngal las bsgral nas bde ba thob par byas te skal ba ji lta ba bzhin du mtho ris kyi lhar skye ba nas mya ngan las 'da' ba'i bar du 'thob par 'gyur ro/ /de ltar rigs kyi bu de ni de lta bu'i yon tan dang / smon lam brtan pa dang / shin du 'bad pa'i brtson 'grus bsam gyis mi khyab 60.122b pa dang ldan te/ sems can yongs su smin par bya ba'i phyir phyogs bcu'i 'jig rten gyi khams su kha cig la ni tshangs pa chen po'i rgyal po'i lus su ston te sems can rnams cis 'dul ba'i chos ston to/ /kha cig la ni dbang phyug chen po'i lha'i lus su ston to/ /kha cig la ni 'dod pa'i khams kyi gzhan 'phrul dbang byed gnam gyi lha'i lus su ston to/ /kha cig la ni 'phrul dga' gnam gyi lha'i lus su ston to/ /kha cig la ni dga' ldan gnam gyi lha'i lus su ston to/ /kha cig la ni rab mtshe ma gnam gyi lha'i lus su ston to/ /kha cig la ni sum bcu rtsa gsum gnam gyi lha'i lus su ston to/ /kha cig la ni rgyal chen bzhi'i lha'i lus su ston to/ /kha cig la ni sangs rgyas kyi skur ston to/ /kha cig la ni byang chub sems dpa'i lus su ston to/ /kha cig la ni rang sangs rgyas kyi lus su ston to/ /kha cig la ni nyan thos kyi lus su ston to/ /kha cig la ni 'khor los sgyur ba'i rgyal po'i lus su ston to/ /kha cig la ni rgyal rigs kyi lus su ston to/ /kha cig la ni bram ze'i lus su ston to/ /kha cig la ni dmangs rigs kyi lus su ston to/ /kha cig la ni rje'u rigs kyi lus su ston to/ /kha cig la ni skyes pa'i lus su ston to/ /kha cig la ni bud med kyi lus su ston to/ /kha cig la ni gzhon nu'i lus su ston to/ /kha cig la ni bu mo'i lus su ston to/ /kha cig la ni dri za'i lus su ston to/ /kha cig la ni lha ma yin gyi lus su ston to/ /kha cig la ni mi'am ci'i lus su ston to/ /kha cig la ni lto 'phye chen po'i lus su ston to/ /kha cig la ni klu'i lus su ston to/ /kha cig la ni gnod sbyin gyi lus su ston to/ /kha cig la ni srin po'i lus su ston to/ /kha cig la ni grul bum gyi lus su ston to/ /kha cig la ni sha za'i lus su ston to/ /kha cig la ni yi dgas kyi lus su ston to/ /kha cig la ni srul po'i lus su ston to/ /kha cig la ni lus srul po'i lus su ston to/ / 60.123a kha cig la ni gnon po'i lus su ston to/ /kha cig la ni seng ge'i lus su ston to/ /kha cig la ni spos kyi ba lang gi lus su ston to/ /kha cig la ni rta'i lus su ston to/ /kha cig la ni khyu mchog gi lus su ston to/ /kha cig la ni gcan gzan sna tshogs kyi lus su ston to/ /kha cig la ni gshin rje'i lus su ston to/ /kha cig la ni sems can dmyal ba'i srungs ma'i lus su ston to/ /kha cig la ni sems can dmyal ba'i sems can gyi lus su ston to/ /de dag la sogs pa tshad med grangs med pa'i rnam pa sna tshogs kyi lus ston cing skye bo mang po la skal ba ji lta ba bzhin du chos ston pas theg pa gsum las phyir mi ldog pa'i sa la 'dzud do/ /rigs kyi bu skyes bu chen po de ni de ltar de lta bu'i bsam gyis mi khyab pa'i yon tan gyi khyad par dang ldan te/ de ni yon tan mchog tu gyur pa phul du gyur pa'i gter yin no/ /rnam par grol ba rin po che thams cad 'byung ba'i 'byung gnas yin no/ /byang chub sems dpa' mang po'i mig yongs su dag pa yin no/ /mya ngan las 'da' ba'i grong khyer chen por 'gro ba'i ded dpon yin no/ /de ltar ched du ma byas par gong du rgyas par bshad pa'i yon tan chen pos chos kyi 'khor lo chen po rab tu bskor ba yin no/ /'di lta ste/ rigs kyi bu gal te 'ga' zhig gis byams pa 'am/ 'jam dpal lam/ kun du spyan ras gzigs sam/ kun du bzang po la sogs pa byang chub sems dpa' sems dpa' chen po gang gA'i klung gi bye ma snyed la bskal pa brgya'i bar du sems rtse gcig tu skyabs su song nas de dag gi mtshan nas brjod cing dmigs pas bsti stang dang bcas pas mchod cing phyag 'tshal ba dang / 'dod pa'i re ba'i phyir smon lam btab pa bas 'ga' zhig gis skad cig thang cig yud tsam sems rtse gcig tu byang chub sems dpa' sems dpa' chen po sa'i snying po'i mtshan nas brjod 60.123b cing dmigs pas sti stang dang bcas pas mchod pa dang phyag byas na re ba'i smon lam thams cad myur du 'grub cing rdzogs par 'gyur ro/ /de ci'i phyir zhe na/ byang chub sems dpa' sems dpa' chen po sa'i snying po 'di sems can thams cad la phan pa dang bde ba'i don gyi phyir sems can rnams kyi smon lam yongs su rdzogs par byed na dper na yid bzhin gyi nor bu rin po che'i gter dang 'dra'o/ /de ltar skyes bu chen po 'di ni sems can yongs su smin par bya ba'i phyir yun ring po nas smon lam chen po shin du brtan pa dang / snying rje chen po dang shin du 'bad pa'i brtson 'grus bsgoms pa'i phyir byang chub sems dpa' kun bas khyad par du 'phags pa yin pas khyed kyis bsti stang dang bcas pas mchod par bya'o/ /de nas phyogs bcu nas 'dus pa'i byang chub sems dpa' sems dpa' chen po dang / nyan thos dang / lha dang / mi dang / gnod sbyin dang / dri za la sogs pa 'khor gyi dkyil 'khor thams cad 'dug pa las langs nas ci nus su so so nas gser dang / dngul dang / rin po che rnam pa sna tshogs kyi me tog dang / spos kyis byang chub sems dpa' sems dpa' chen po sa'i snying po la mchod pa'i phyir mngon par gtor to/ /de ma yin pa gzhan yang lha rdzas kyi na bza' dang / nor bu dang / nor bu rin po che dang / mu tig gi phreng ba dang / mu tig gi se mo do dang / gser dang / dngul dang / rin po che'i phreng ba dang / rgyal mtshan dang / ba dan dang / gdugs la sogs pas kyang byang chub sems dpa' sems dpa' chen po sa'i snying po la mchod pa'i phyir phul lo/ /gzhan yang tshad med pa'i lha rdzas kyi rol mo snyan pa dang / tshigs su bcad pa'i bstod pa rnam pa sna tshogs kyis byang chub sems dpa' sems dpa' chen po sa'i snying po la sti stang dang bcas pas mchod pa byas so/ /de nas byang chub sems dpa' sems dpa' chen po sa'i snying pos rnam pa sna tshogs kyi lha 60.124a rdzas kyi mchod pa'i yo byad de dag slar bcom ldan 'das la phul nas tshigs su bcad pa 'di dag smras so/ /lha dang klu dang gnod sbyin mi rnams dang / /phyogs bcu'i byang chub sems dpa'i mchod pa rnams/ /yon tan chen po 'jig rten gtso la dbul/ /mchog gi mchod pa 'di dag bzhes su gsol/ /de nas byang chub sems dpa' sems dpa' chen po sa'i snying pos tshigs su bcad pa de smras nas/ bcom ldan 'das kyi zhabs la spyi bos phyag 'tshal ba dang / de la bcom ldan 'das kyis tshigs su bcad pas 'di skad ces bka' stsal to/ /brtan pa'i blo dang rnam dag sems bskyed nas/ /sems can tshad med pa yi sdug bsngal bcil/ /rin chen dag ltar bde ba 'byung bar mthong / /rdo rje bzhin du the tsom dra ba gcod/ /snying rje chen po'i blo can brtson 'grus kyis/ /mchod pa dam pa bcom ldan 'das la dbul/ /rgya mtsho ye shes sems can sdug bsngal sgrol/ /'jigs pa med pas srid pa'i pha rol phyin/ /de nas byang chub sems dpa' sems dpa' chen po sa'i snying po 'dug pa las langs nas bcom ldan 'das la 'di skad ces gsol to/ /bcom ldan 'das bdag gis chu bo bzhi las sgrol ba'i bcom ldan 'das kyi nye gnas dge slong dang / dge slong ma dang / dge bsnyen dang / dge bsnyen ma la sogs pa dran pa 'phel ba dang / bsrung ba'i dran pa 'phel ba dang / 'tsho ba 'phel ba dang / lus bde ba 'phel ba dang / nad ma mchis pa 'phel ba dang / gzugs dang stobs 'phel ba dang / grags pa 'phel ba dang / 'tsho ba'i yo byad 'phel ba dang / gnyen bshes 'phel ba dang / slob ma 'phel ba dang / tshul khrims 'phel ba dang / mang du thos pa 'phel ba dang / sbyin pa 'phel ba dang / ting nge 'dzin 'phel ba dang / bzod pa 'phel ba dang / thabs mkhas pa 'phel ba dang / byang chub kyi yan lag dag dang / 'phags pa'i bden pa 'phel ba dang / theg pa 60.124b chen po'i yang dag pa'i lam la gzhol ba'i 'phel ba dang / chos kyi sgron ma 'phel ba dang / sems can yongs su smin par bgyi ba 'phel ba dang / byams pa chen po dang snying rje chen po 'phel ba dang / rnam par dkar ba'i chos 'phel ba dang / khams gsum du grags pa 'phel ba dang / khams gsum du chos kyi char 'phel ba dang / sa chen po thams cad kyi ro bro ba 'phel ba dang / sems can thams cad kyi mdangs dang dge ba'i las 'phel ba dang / chos kyi dga' ba dang dge ba spyod pa 'phel ba dang / shes rab kyi 'od 'phel ba dang / pha rol du phyin pa drug 'phel ba dang / spyan lnga 'phel ba dang / dbang bskur ba 'phel ba dang / lhar skye ba dang mya ngan las 'da' ba 'phel ba la sogs pa thob par byed pa nas/ 'di lta ste/ me dang chur ldan pa dang / bkra shis kyi 'od snang ba dang / thos pa 'dzin pa'i rig sngags chen po dang / gzungs kyi tshig 'di bdag gis 'das pa'i sangs rgyas bcom ldan 'das chu klung gang gA'i bye ma snyed la bsnyen bkur bgyis nas gzungs 'di thos te gzungs 'dis ni rnam par dkar ba'i chos thams cad 'phel zhing skye ba dang / sa bon gyi tshogs dang / rtsa ba dang / myu gu dang / yal ga dang / sdong po dang / lo ma dang / 'dab ma dang / me tog dang / 'bras bu dang / rtsi shing dang / lo thog gi bro ba dang bsung 'phel zhing skye ba dang / char chu dang ldan pa dang / phan par 'gyur ba'i sa dang / chu dang / me dang / rlung 'phel zhing skye ba dang / dga' ba dang / bde ba 'phel zhing skye ba dang / rin po che dang nor rdzas 'phel zhing skye ba dang / mthu stobs 'phel zhing skye ba dang / 'tsho ba'i yo byad thams cad 'phel zhing skye bar 'gyur ro/ /yang gzungs 'dis ni shes rab skye bas nyon mongs pa'i dgra yang yongs su bcom par 'gyur ba'i sngags la 'di lta ste/ tshim b+ho tshim b+ho/ tsim tshim b+ho/ A kA Sha tshim b+ho ba ka ra tshim b+ho/ a ma bar tshim b+ho/ bar tshim b+ho/ ba tsir tshim b+ho/ a ro ga tshim b+ho/ d+harma tshim b+ho/ sa twe ba tshim b+ho/ sa twe ni ha la tshim b+he/ bi ba ra 60.125a ga sha ba tshim b+ho/ u pa sha ma tshim b+ho/ nA yan tshim b+ho/ pradz+nyA sa ma mo na red+nar tshim b+ho/ k+Sha Na tshim b+ho/ bi Sha ma ba ri ya tshim b+ho/ sha si ta la ma ba tshim b+ho/ bi a dra so ta ma he le/ dam be ya ba/ tsakra se/ tsakra ba se le/ k+Shi le phi la ka ra ba/[ ]ba ra ba ri te/ ha se re pra re be/ pa re tsa ra b+han d+hane/ pa na ra/ tsa tsa tsa tsa/ te le mi la/ a ka tha ke /ki lo/ thahA re thahA re/ mi le ma d+he/ nan te ku le mi la/ aM ku tsi ta b+he/ a rai gi re/ ku ta sha ba ma le/ ton ge ton ge ton gu le/ hu rU hU rU hu rU/ ku lo sto mi le/ ma ri to/ me ri te/ b+han d+ha ta/ ha ra kha ma re ma/ hu ru hu ru/ srid pa'i dri ma sbyong ba dge bar gsungs/ /thab rtsod skal pa zhi ba 'ang dge bar gsungs/ /mi dge bsam pa sbyong ba dge bar gsungs/ /'byung ba chen po sbyong ba'ang dge bar gsungs/ /ngan par 'gro ba sbyong ba dge bar gsungs/ /sdig pa'i bag chags sbyong ba'ang dge bar gsungs/ /re ba rdzogs par byed pa dge bar gsungs/ /lo thog smin par byed pa'ang dge bar gsungs/ /sangs rgyas kun gyis dge bar gsungs pa 'di/ /de bzhin gshegs pa kun gyas byin brlabs pa/ /dge bar gsungs 'dis byang chub sems dpa'i rnams/ /byin gyis rlob mdzad rjes su yi rang ngo / /bcom ldan 'das de ltar me dang chu dang ldan pa dang / bkra shis kyi 'od snang ba dang / thos pa 'dzin pa'i rig sngags chen po gzungs kyi tshig 'di ni bdag gis 'das pa'i sangs rgyas bcom ldan 'das chu klung gang gA'i bye ma snyed la bsnyen bkur bgyis pas thos so/ /gzungs 'di ni rnam par dkar ba'i chos thams cad 'phel zhing skye bar bgyid pa nas de bzhin du rgyas pa'i longs spyod pa'i yo byad thams cad kyi bar du 'phel zhing skye bar bgyid do/ /btsun pa bcom ldan 'das gzungs 'dis ni chu bo bzhi las sgrol bar byed do/ /bcom ldan 'das kyi nye gnas su gyur pa dge slong dang / dge slong ma dang / dge bsnyen dang / dge bsnyen ma la sogs pa'i dmigs pa 'phel bar 60.125b bgyid pa nas de bzhin du rgyas par 'tsho ba'i yo byad thams cad kyi bar du 'phel zhing skye bar bgyid do/ /gzungs 'di ni bcom ldan 'das kyis 'phags pa'i gsung rab bdud rtsi lta bu yongs su rgyas pa dang / yun du gnas shing khams gsum gyi sems can thams cad la phan pa dang bde ba'i don du 'gyur ro/ /de nas byang chub sems dpa' sems dpa' chen po sa'i snying pos thos pa 'dzin pa'i rigs sngags chen po dang / gzungs kyi tshig 'di smras pa na/ ri kha la te ya rab tu g.yos nas lha'i rol mo bye ba khrag khrig kyang ma dkrol bar rang 'khrol te/ lha'i spos dang / me tog dang / rin po che tshad med pa rnam pa sna tshogs char bzhin du babs nas de'i tshe 'khor mang po de dag thams cad kyang ngo mtshar rmad du gyur to/ /de'i tshe na 'khor gyi dkyil 'khor de na lha mo bkra shis chen mo dang / dpal ldan lha mo chen mo dang / mchod dbyangs lha mo chen mo dang / brtan pa lha mo chen mo dang / chu can lha mo chen mo dang / 'od chen lha mo chen mo la sogs pa lha mo 'byung ba chen po bzhi la dbang du gyur pa stong phrag bcwa brgyad 'dug pa las langs nas/ bcom ldan 'das kyi zhabs la spyi bos phyag 'tshal te thal mo sbyar nas bsti stang dang bcas pas/ bcom ldan 'das la 'di skad ces gsol to/ /ngo mtshar che'o/ /bcom ldan 'das ngo mtshar che'o/ /bde bar gshegs pa bdag gis 'byung ba chen po bzhi dag la dbang bsgyur mod kyi 'byung ba chen po bzhi'i thog ma dang / bar ma dang / tha ma'i skye ba dang / 'gag pa dang / 'thun pa dang / mi mthun pa'i phyogs mi 'tshal te/ skyes bu chen po 'di ni shes rab kyi pha rol du phyin pa phra ba shin du zab mo thob nas 'byung ba chen po bzhi'i thog ma dang / bar ma dang / tha ma'i mtshan nyid dang / skye ba dang / 'gag pa dang / 'thun pa dang / mi mthun pa'i phyogs la shin du mkhas so/ /bcom ldan 'das kyis bka' stsal pa/ de de bzhin no/ /de de bzhin te/ rigs kyi bu 'di ni shes rab kyi pha rol du phyin pa phra ba shin du zab mo thob pas 'byung ba chen po bzhi'i thog ma dang / bar ma dang / tha ma'i mtshan nyid skye ba dang / 'gag pa dang / 'thun pa dang / mi mthun pa'i phyogs la shin du mkhas so/ /lha mo 'di ltar shes par 60.126a bya'o/ /'di lta ste/ yid bzhin gyi nor bu rin po che ni yon tan mang po dang ldan pas rin po che rnam pa sna tshogs char bzhin du 'bab ste sems can mang po la sbyin pa byed do/ /rigs kyi bu 'di yang de bzhin du byang chub kyi yan lag gi rin po che rnam pa sna tshogs char bzhin du 'bebs te sems can la sbyin pa byed do/ /'di lta ste/ rin po che'i gling ltar rin po che rnam pa sna tshogs kyis yongs su gang ba bzhin du rigs kyi bu 'di yang byang chub kyi yan lag gi rin po che rnam pa sna tshogs dang ldan no/ /'di lta ste/ lha rdzas kyi shing pa ri tsi tra la bsung dang me tog gis mdzes pa bzhin du rigs kyi bu 'di yang sangs rgyas kyi chos rin po che rnam pa sna tshogs kyis rab tu mdzes so/ /'di lta ste/ seng ge'i rgyal po ni ri dgas thams cad kyi zil gyis mi non cing mi skrag pa bzhin du rigs kyi bu 'di yang sems can thams cad kyis bag tsha ba 'am zil gyis non pa med do/ /'di lta ste/ ji ltar nyi ma gsal bas 'jig rten gyi mun pa thams cad yongs su sel ba bzhin du rigs kyi bu 'di yang sems can thams cad kyi ngan par lta ba'i ma rig pa'i mun pa thams cad sel ba'o/ /'di lta ste/ nam thang ba'i zla ba ni mtshan mo'i dus su lam stor ba'i sems can thams cad la bde ba'i lam ston te gar 'gro bar dga' ba bzhin du phyin par 'gyur ba ltar/ rigs kyi bu 'di yang ma rig pa'i mtshan mor theg pa gsum las 'brog bslad de 'khor ba'i 'brog dgon par 'khyam pa'i sems can thams cad la theg pa gsum gyis yang dag pa'i lam ston cing skal ba ji lta ba bzhin du thabs kyis yang dag par 'byung ba'i lam la 'god par byed do/ /'di lta ste/ sa chen po la ni sa bon gyi tshogs thams cad dang / rtsi shing dang / lo thog dang / sa'i khams su gtogs pa'i sems can thams cad kyi rten du 'gyur ba ltar/ rigs 60.126b kyi bu 'di la yang byang chub kyi yan lag khyad par can gyi chos thams cad ston pa'i gnas so/ /'di lta ste/ rin po che chen po'i ri rab ri'i rgyal po ni shin du brtan zhing ma god ma nyams pa bzhin du rigs kyi bu 'di yang sangs rgyas kyi ma 'dres pa'i chos thams cad la shin du gnas shing sems can thams cad mi gtong ba'i phyir mi nyams pa dang / dge ba'i rtsa ba thams cad la gtong ba'i phyir ma god pa'o/ /'di lta ste/ nam mkha' la sems can thams cad spyod pa bzhin du/ rigs kyi bu 'di yang sems can thams cad de la longs spyod do/ /rigs kyi bu 'di ni de ltar yon tan tshad med dpag tu med pa dang ldan no/ /de'i tshe 'khor mang po rnams kyis byang chub sems dpa' sems dpa' chen po sa'i snying po'i yon tan tshad med pa dang ldan pa bstod pa thos nas ngo mtshar rmad du gyur te bkur bsti dang rim gro byas nas rab tu dga' bas sems rtse gcig tu byang chub sems dpa' sa'i snying po la mig mi 'dzums par lta'o/ /de nas bcom ldan 'das kyis don de dag gsal bar bzlas pa'i phyir tshigs su bcad de bka' stsal pa/ skyes bu yang dag sa yi snying po ni/ /yon tan mang po phun sum tshogs par ldan/ /dge sbyong cha lugs 'dzin cing ston byed pa/ /ston pa chen po la ni phyag 'tshal lhags/ /sems can kun la bde ba rab tu byin/ /srid pa gsum gyi sdug bsngal kun la sgrol/ /tshad med rnam pa sna tshogs char phab nas/ /ston pa chen po la ni mchod pa byed/ /brgya byin dri ma med par skyes pa des/ /phyogs bzhi kun du bltas shing brtags nas su/ /thal mo sbyar nas sti stang rab bcas te/ /ston pa chen po la ni bsngags shing bstod/ /bdag gis bcom ldan 'das kyi 'khor mthong ba/ /nor bu rin po che yi 'od zer ltar/ /sangs rgyas mang po'i zhing kun snang byas te/ /thams cad gsal bar ma gyur gang yang med/ /mngon shes drug gis 'jig rten snang bar byed/ /deng 'dir 'dus shing lhags par 'gyur ba ni/ / 60.127a shin du dpa' ba sa yi snying po ste/ /rab tu byung ba'i spyod lam rnam par ston/ /'phags pa'i nor bu 'byung ba'i gter yin te/ /'jigs pa med pa'i sangs rgyas nga ro dbyangs/ /byang chub sems dpa' mang po'i rgyal mtshan te/ /sems can mang po 'dren pa'i gtso bo'o/ /rnam par grol ba'i rin chen 'byung khung ste/ /brtson 'grus brtan pa'i bsod nams rgya mtsho yin/ /byams pa'i blo gros snying rje brtse la mos/ /sdug bsngal ba'i sems can mang po sgrol/ /'jigs pa srung ba'i 'obs dang mkhar yin te/ /nam mkha' dang ba'i zla bzhin lam yang ston/ /sa ltar dge ba'i rtsa ba thams cad skyed/ /rdo rje ltar ni the tsom yongs su gcod/ /rnam par grol ba'i rin chen kun la gtor/ /chu ltar sgrib pa thams cad 'dag par byed/ /nyon mongs tsha bas gdungs pa'i gdugs su 'gyur/ /sman pa ltar ni nad kun 'tsho bar byed/ /zhag gcig sa yi snying po'i ming brjod pa'i/ /grags pa chen po'i bsod nams thob pa ni/ /bskal pa bye ba khrag khrig bar du yang / /blo can gzhan gyi ming nas brjod pas lhag /so so'i skye bo grol bar byed pa ni/ /nyon mongs thams cad rnam par 'ching byed pa'o/ /dpa' bar 'gro ba'i ting 'dzin mthar phyin cing / /ting 'dzin gzhan dag gi yang pha rol phyin/ /rkyen mang bcu gsum po yang rnam dag pas/ /mang po kun la ye shes nam mkha' bzhin/ /dpag tu med pa'i sangs rgyas zhing rnams kyi/ /skye bo mang po'i mun pa'i tshogs kyang bcom/ /zhing rnams ji bzhin ting 'dzin der 'jug cing / /bsam gtan bzhi po la yang rgyun du 'dug /ting nge 'dzin du zhugs nas sems can gyi/ /nyon mongs pa yi gdung ba rab tu sel/ /so so'i skye bo sngon gyi sdig pa'i las/ /mtshon dang nad dang mu ges 'jigs pa dang / /rnam pa mang pos 'tshe zhing gsod gyur pa/ /de dag kun nas rnam par grol bar byed/ /sems can nye bar len pa'i phung po lnga/ /sdug bsngal mang pos 'tshe zhing gdungs 60.127b gyur pa/ /sa'i snying po de la skyabs gsol na/ /srid pa'i sdug bsngal thams cad zhi bar 'gyur/ /sems can sdug bsngal 'khor lo rab bskor te/ /gcig gis gcig la 'tshe zhing gnod gyur pa/ /sa yi snying po de la skyabs gsol na/ /bzod cing byams pa'i sems la gnas par 'gyur/ /bcu gsum rkyen gyis rab 'jigs skrag byed cing / /tshol ba mi rnyed rkyen gyis sdug pa dag /sa yi snying po de la skyabs gsol na/ /'jigs pa med pa de la gnas par 'gyur/ /bsod nams byed la mos shing dran pa dang / /tshul khrims mang thos shes rab 'dod pa dag /sa yi snying po de la skyabs gsol na/ /re ba bzhin du thams cad rdzogs par 'gyur/ /yon tan so sor smos pa'i bzod rtsal dang / /sman dang sa bon tshogs la mos pa dag /sa yi snying po de la skyabs gsol na/ /re ba kun dang ldan zhing rdzogs par 'gyur/ /lo thog rtsi shing legs par 'dod pa dang / /khye'u dang bu mo gos dang bran khol phyir/ /sa yi snying po de la skyabs gsol na/ /rang byung bzhin du thams cad rdzogs par 'gyur/ /yon tan mang po kun dang ldan pas na/ /sa chen 'di yang mi gtong rab tu 'dzin/ /de yi rkyen gyis sman dang lo thog rnams/ /snum zhing 'jam la ro dang ldan par 'gyur/ /nyon mongs mang pos sgribs par gyur nas su/ /mi dge bcu yi las la mos pa dag /sa yi snying po de la skyabs gsol na/ /mi dge nyon mongs thams cad zhi bar 'gyur/ /rnam pa sna tshogs kun gyi lus ston cing / /skye bo mang po dag la chos kyang ston/ /sbyin pa'i yon tan thams cad rdzogs pas ni/ /sems can kun la snying brtse bde bar gyur/ /gal te bskal pa mang po brgya yi bar/ /de yi yon tan bsngags shing rab bstod de/ /mthar phyin rdzogs par 'gyur ba shin du dka'/ /de bas kun gyis sti stang bcas pas mchod/ /'dus pa chen po las byang chub sems dpa'i sa'i 60.128a snying po'i 'khor lo bcu pa zhes bya ba las gleng gzhi'i le'u ste dang po'o// // bam po gnyis pa/ de nas byang chub sems dpa' sems dpa' chen po sa'i snying po stan las langs te bla gos phyogs gcig du byas te/ bcom ldan 'das kyi zhabs la spyi bos gtugs te/ pus mo g.yas pa'i lha nga sa la btsugs te thal mo sbyar ba btud de bcom ldan 'das la 'di skad ces gsol to/ /yon tan tshad med rgya mtsho can/ /bcom ldan 'das la zhu gsol ba/ /the tsom nem nur ci mchis pa/ /bdag la rgyas par bshad du gsol/ /bcom ldan 'das kyis bka' stsal pa/ skyes bu yang dag pa khyod ni chos thams cad ye shes kyis mthong ba la thogs pa med do/ /'on kyang sems can la phan pa dang bde bar 'dod pa'i phyir khyod de bzhin gshegs pa la ci dang ci 'dod pa dris shig dang / bcom ldan 'das kyis dris pa de dang de'i lung bstan pas khyod kyi sems rangs par bya'o/ /de nas byang chub sems dpa' sems dpa' chen po sa'i snying pos tshigs su bcad de gsol pa/ bdag sngon bskal pa bcu gsum du/ /spyod pa dka' ba shin du spyad/ /so so'i skye bo kun don du/ /'jigs pa gsum dang rnyog lnga bsal/ /sangs rgyas bye ba khrag khrig la/ /tshad ma mchis pa'i mchod bgyis pas/ /bsam pa dag pa'i 'khor 'di dang / /tshogs chen 'dus pa'ang sngon mthong ngo / /blo can brtson 'grus rtsol ba dag /thams cad 'dus shing tshogs 'dir lhags/ /shin du skyon med 'khor 'di dag /mthong bar gyur pa ngo mtshar rmad/ /ci slad sangs rgyas zhing 'di kun/ /sdig pas dge ba nyams bgyis shing / /blo can dag gis spangs pa yi/ /ngan par spyod kun lhan cig gnas/ /mtshams med sdig pa bgyid pa dang / /yang dag dam pa'i chos la skur/ /'phags la smod cing log lta bas/ /rtag dang chad pa'i gtsug lag 'chad/ /sdig pa bcu 'i las bgyid cing / /'jig rten phyi mas mi 'jigs pa/ /theg pa rnam 60.128b gsum ring spangs shing / /sdig can dag la ngan 'gror gzhol/ /ma rig pas ni bsgribs pa'i mig /'dod chags phrag dog sgyus 'tsho ba/ /sangs rgyas 'khor lo rab bskor te/ /sems can 'di dag sgrol bar mdzad/ /ji ltar nying 'tshams sbyor ba yi/ /nyon mongs rdo rje lta bus bcad/ /ji lta bur na gzungs dag 'thob/ /de bzhin bzod pa 'ang nges par 'gyur/ /bdag gis 'dren pa tshogs chen dag /mthong bar gyur pa ngo mtshar che/ /'di 'dra'i yon tan kun tshogs pa/ /phyogs gzhan dag na ma mthong ngo / /yon tan mang po kun ldan zhing / /byang chub lam la rab brtson pas/ /ji ltar byis pa'i 'khor dag la/ /sangs rgyas 'khor lo bskor ba mdzad/ /bcom ldan 'das kyis bka' stsal pa/ legs so legs so/ /rigs kyi bu khyod kyi sngon 'das pa'i dus na yang chu klung gang gA'i bye ma snyed kyi sangs rgyas dag gi zhing na rnyog pa lnga'i tshe/ sangs rgyas bcom ldan 'das chu klung gang gA'i bye ma snyed la sngon 'di lta bu'i don dag zhu ba zhus so/ /khyod kyis dris pa'i don 'di dag la sngon yang nan tan shin du byas pas shin du rtogs shing khong du chud do/ /spyod pa mang po phun sum tshogs pa pha rol du phyin pas shin du thabs mkhas pa'i shes rab dang ldan te/ sems can thams cad yongs su smin par bya ba dang / phan pa dang bde ba'i don thob par bya ba dang / byang chub sems dpa' sems dpa' chen po thams cad thabs mkhas pas 'phags pa'i spyod pa'i gter sbyin pa la sogs pa pha rol du phyin pa drug gis sems can thams cad yongs su smin par bya ba'i spyod pa'i khyad par dang / thams cad mkhyen pa'i ye shes kyi yon tan rgya mtsho yongs su rdzogs par bya ba dang / rgyal rigs spyi bo nas dbang bskur ba'i rgyal po spyod pa mi dge ba la gnas pa thams cad ngan song gsum las bzlog cing mi ltung bar bya ba dang / zhing 'dir dkon mchog gsum gyi gdung shin du rgyas shing yun ring du gnas par bya ba'i phyir 'di lta bu'i don 60.129a dris pa legs so/ /shin du legs par nyon la yid la zung shig dang / ngas bstan par bya'o/ /bcom ldan 'das de ltar bgyi'o zhes gsol nas/ bcom ldan 'das la slar nyan to/ /de nas bcom ldan 'das kyis byang chub sems dpa' sems dpa' chen po sa'i snying po la 'di skad ces bka' stsal to/ /rigs kyi bu de bzhin gshegs pa ni sngon gyi smon lam gyi shugs kyis sangs rgyas kyi 'khor lo rnam pa bcu dang ldan te/ sangs rgyas kyi zhing rnyog pa lnga can gyi sems can thams cad rnam par dkar ba'i chos thams cad las phyir ldog pa dang / 'phags pa'i nor rin po che bdun gyis brel ba dang / mkhas pa dag dang ring du gyur pa chad pa dang / rtag pa'i dra bas kun nas klags pa dang / ngan sang du 'gro ba'i shing rta la spro zhing dga' ba dang / skye ba phyi ma'i sdug bsngal la 'jigs par mi lta ba dang / ma rig pa'i mun nag thibs po la gnas pa la dad pa dang / mi dge ba bcu'i las kyi lam rdzogs par byed pa dang / mtshams med pa lnga byed pa dang / dam pa'i chos la skur cing 'phags pa la dbang za ba/ dge ba'i chos thams cad ring du spong zhing mi dge ba'i chos rdzogs par byed pa'i gnas na bzhugs so/ /de lta bu'i sdug bsngal rnam pa sna tshogs dang ldan pa'i zhing na bzhugs kyang rab tu bde bar bzhugs te bag tsha ba med pa dang / 'jigs skrag pa med pas drang srong chen po'i gnas su phyin te sangs rgyas kyi 'khor lo bskor nas lha dang bdud du bcas pa'i mu stegs can log par smra ba thams cad btul nas/ so so'i skye bo thams cad kyi rigs la nyon mongs pa shin du sra ba rdo rje lta bu dag bsal nas ci la mos pa bzhin du so sor bkod do/ /mthu dang ldan pa'i sems can dag ni theg pa gsum las phyir mi ldog par yang mdzad do/ /rigs kyi bu 'di lta ste/ yul kha cig tu srid 60.129b med par 'gyur ba na de na gnas pa'i mi thams cad bdag gi dmag dang / gzhan gyi dmag gis yongs su gtses shing nyon mongs pa dang sdug bsngal bar gyur te/ de na gnas pa'i mi mang po yang mi bde bas 'thab pa dang / rtsod pa dang / gcig la gcig smod pa tshad med pa snyed 'byung ste/ brdzun du smra ba dang / g.yo sgyu dang / tshig rtsub por smra ba dang / skur klang 'debs shing 'khrug pa dang / dmus long dang / ling tog can du 'gyur ba dang / nad rnam pa sna tshogs kyis gzir ba dang / grang ba dang / tsha ba'i nad ma rungs pa dang / rims rnam pa mang po dang / smyo ba dang / skem byed dang / kha zas mi 'ju ba dang / sems 'khrug cing myos pa dang / dbang po ma tshang zhing yan lag dang nying lag nyams pa dang / bgo ba dang / bza' ba dang / 'tsho ba'i yo byad rnam pa sna tshogs kyis phongs shing brel te/ bdog pa thams cad yid du mi 'ong ba dang / skye bo thams cad mu stegs can dang 'jig rten gyi lha la skyabs su song zhing lta ba ngan pa dang / bsam pa ngan pa dang / mos pa ngan pa yongs su rgyas te/ yang dag pa'i lam stor nas ngan song du ltung bar 'gyur ba na/ de'i tshe yul de na gnas pa'i rgan po blo dang ldan zhing yid gzhungs pa/ mang du thos pa/ drang dkan che ba 'dus nas gros su bgros te/ yul dang grong mi kun bsdus nas thams cad kyis 'thun par rgyal bu gcig btus pa ni sngon sbyin pa rab tu byas pa/ tshul khrims shin du bsrungs pa/ brtson 'grus la brtun pa/ shin du dka' ba spyod pa dang ldan pa mchog tu gyur pa'i bsod nams kyi mtshan dang ldan pa/ dbang po yongs su rdzogs shing yan lag ma nyams pa/ lus byad che chung ran pa/ mtshan dang dpe byad bzang pos brgyan pa/ phul du gyur pa'i mdog dam pa dang ldan pa/ thams cad kyis bkur sti dang rim gro byed pa/ yul de na gnas pa'i mi thams cad kyi yid du 'ong zhing lta 'dod pa/ rang bzhin gyis drang zhing brtan 60.130a pa/ byams pa dang / snying rjer ldan pa/ mang du thos pa/ rtsal thams cad dang ldan pa dang / des pa'i bzod pas sems rab tu brgyan pa/ btsun mo dam pa'i sras thu bor gyur pa/ spos dam pa rnam pa sna tshogs rnam par dag pa'i chus lus bkrus nas/ rin po ches brgyan pa'i gos dam pa spos kyis bdugs pa rnam pa sna tshogs gyon zhing / nor bu rin po che spyi bo'i gtsug phud la btags pa/ rin po che'i me tog gi phreng bas brgyan pa'i gser gyi cod pan mgo la thogs pa/ rab tu yang la 'jam pa'i dar gyis bcings pa/ gzhan yang nor bu rin po che dang / mu tig dang / gser dang / dngul la sogs pa rin po che rnam pa sna tshogs la byas pa'i rna cha dang / se mo do dang / dpung rgyan dang / gdu bu la sogs pa thogs pa/ rin po che rnam pa sna tshogs las byas pa'i lham gyis rkang pa bteg pa/ rin po che rnam pa sna tshogs las byas pa'i gdugs kyis steng gi bla res bres pa/ sngon lha dang drang srong thams cad kyis bsrung zhing 'dzin pa'i khri bshams pa/ brgya byin la sogs pa thams cad kyis bsrung zhing skyob pa/ bzo shin du mkhas pas las su byas pa'i gzhal med khang chen por sngon rgyal po snga ma 'dug 'dug pa'i khri la bzhag nas rgyal por bcug go/ /rgyal sar zhugs nas lha'i dbang po dang / klu'i dbang po dang / gnod sbyin gyi dbang po dang / lha ma yin gyi dbang po dang / grul bum gyi dbang pos srung zhing 'dzin pa'i dril bu dang / rnga chen po brdungs nas de'i sgras yul khams kun du grags par gyur te/ rgyal rigs la sogs pa rigs chen po bzhi la gtogs pa'i mi tshad med pa snyed lus yang dag par bkrus nas gos gtsang ma gyon te/ lag na rnam pa sna tshogs kyi rin po che'i gdugs dang / rgyal mtshan dang / ba dan dang / nor bu rin po che dang / mu tig dang / gser dang / dngul dang / dung dang / man shel dang / byi ru dang / bai dUr+ya la sogs pa tshad med pa snyad thogs te 60.130b rgyal po de la phul lo/ /gzhan yang rigs mtho zhing btsun pa tshangs par spyod pa/ thos pa dang ldan zhing shes pa che ba'i bram ze thams cad kyis kyang tshigs su bcad pas bstod pa dang / glu dang dbyangs dam pa tshad med pa snyed kyis rgyal po de la bstod pa byas so/ /legs par 'gyur ba rnam pa sna tshogs thob par gyur cig ces smon lam yang btab bo/ /bkra shis pa rnam pa sna tshogs kyis rgyal po'i spyi bor gtor to/ /rgyal po snga ma'i blon po'i rigs la gtogs pa thos pa dang ldan zhing shes pa che ba/ drang ba/ g.yo med pa/ 'dzangs pa dag kyang ci rigs su blon por rim par phye ste bcug nas/ rgyal po'i las byed pas sngon yul de na bdag dang gzhan gyi dmag thams cad kyis gtse bar 'gyur ba dang / phyir rgol ba dang grogs po ngan pa thams cad med par byas nas phas rgol ba'i dgra dang / gnod pa byed pa thams cad zhi bar gyur nas/ nag po'i phyogs thams cad byang zhing rnam par dkar ba'i phyogs thams cad skyes te 'phel bar gyur to/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po de lta bu'i 'khor lo gcig dang ldan na/ 'khor lo de'i dbang gis bdag gi rgyal srid rab tu che zhing phas rgol ba'i dgra thams cad shin du thul ba las tshe yang ring bar 'gyur ro/ /rigs kyi bu de bzhin du rnyog pa lnga'i 'jig rten gyi khams mi mjed kyi sangs rgyas kyi zhing 'dir sangs rgyas mi bzhugs pa'i tshe/ de na gnas pa'i sems can thams cad rang gi sems kyi bag la nyal ba'i nyon mongs pas yongs su bcings nas nang gi dgra dang / pha rol gyi dgras rnam par gtses te/ kun nas nyon mongs pas nyon mongs nas gti mug gis ldongs te/ mi bde bar gyur pas rtag pa dang chad pa la rnam par zhen cing chags pa tshad med pa bskyod nas phan tshun rtsod cing 'gal bar byed de/ gcig la gcig dbang za zhing smod pas 'dod chags dang / zhe sdang dang / gti mug bskyed de g.yo dang sgyu'i tshul du smra zhing mi 60.131a dge ba bcu'i las kyi lam rdzogs par byed pa dang / rnam par zhen cing chags pa'i skye bo dag nyon mongs pa'i 'jig rten gyi khams 'dir rnam pa sna tshogs kyi nyon mongs pa'i nad kyis gzir ba dang ldan pas yang dag pa'i chos kyi mig ldongs te/ zhe sdang dang khong khro bas gdungs shing 'khrugs kyang yang dag pa bden pa'i chos cung zad kyang yid la mi byed de/ yang dag pa'i chos kyi ro yongs su btang nas dge ba byed pa la dbang za zhing smod do/ /de sngar bde zhing skyid pas ni brel cing phongs par 'gyur gyi rtag tu nyon mongs pa'i dra ba rnam pa mang pos dkris shing klags nas mu stegs can gyi ston pa rnam pa drug po la skyabs su song ste/ 'phags pa'i lam las phyir log cing ngan song gsum las gzhol bar gyur to/ /de'i tshe zhing de na byang chub sems dpa' sems dpa' chen po sngon sangs rgyas tshad med pa snyed la mchod cing bsnyen bkur byas pa/ sangs rgyas kyi yon tan gyi rgya mtshor zhugs pa/ snga ma 'das pa'i sangs rgyas kyi spyod yul la gnas pa thams cad 'dus shing tshogs nas nga'i spyan sngar lhags te tshig 'thun par 'di skad zer ro/ /khyod sngon 'das pa'i dus na sbyin pa tshad med pa la nan tan byas pa dang / tshul khrims rab tu bsrungs pa dang / shin du 'bad pa'i brtson 'grus kyis shin du spyad dka' ba spyad de/ thams cad yongs su rdzogs par bsgoms so/ /de lta bu'i bsod nams dang ye shes kyi tshogs dang / shes rab dang / thabs mkhas pa dang / snying rje chen po la sogs pas yongs su brgyan pas yon tan chen po'i gter du gyur pa/ ting nge 'dzin thams cad dang gzungs rnams las rab tu bzod pa/ sa'i yon tan thams cad yongs su rdzogs pa'i rgya mtshor gyur pa'o/ /g.yo dang sgyu med cing lus byad shin du ring la mtshan dang dpe byad phun sum tshogs par gyur pa dang des pa'i bzod pa dang ldan zhing shin du mdzes par gyur pa/ gzhan gyi 60.131b dring la mi 'brang bas byang chub kyi lam bsgom par ye shes kyi rgya mtsho thams cad yongs su rdzogs par gyur pa/ phul du gyur pa'i mdog mchog dam pa dang ldan par gyur pa/ nyan thos dang rang sangs rgyas thams cad kyi ston pa chen por gyur pa/ 'khor bas 'jigs skrag pa'i sems can thams cad kyi dpung gnyen du gyur pa/ byams pa dang snying rje chen po la sogs pa yon tan tshad med pas yongs su brgyan pa/ bcom ldan 'das log par dad sel dang / gser thub dang / 'od srung la sogs pa'i sras yang dag pa/ bskal pa bzang po 'dir mngon par 'tshang rgya ba/ byang chub sems dpa' thams cad kyi nang na gtso bor gyur pa/ yon tan rnam pa sna tshogs kyi spos can/ zhi gnas dang lhag mthong gi chu yongs su dag pas khrus byas pa/ khrel ba dang 'dzem pa'i gos gyon pa/ rnam par dag pa'i chos kyi dbyings gtsug gi nor bur thogs pa/ sangs rgyas thams cad kyi spyod yul rgya chen po'i me tog gi phreng ba'i cod pan thogs pa/ rnam par grol ba'i srad bus bcings pa/ gzhan yang rnam pa thams cad mkhyen pa'i ye shes dang / mi skye ba'i bzod pa la sogs pa yon tan gyi rin po ches yongs su brgyan pa/ byams pa chen po dang / snying rje dang / dga' ba dang / btang snyoms kyi lham rin po che gyon pa/ khams gsum yongs su khebs pa'i spyod pa rnam gsum gyis 'phags pa'i rgyu yongs su rdzogs par 'gyur ba'i gdugs kyis bkab pa/ sngon gyi sangs rgyas dang / lha dang / drang srong gis yongs su bzung ba'i rdo rje lta bu'i ting nge 'dzin gyi gdan bshams pa/ nyan thos dang / rang sangs rgyas thams cad kyis bkur sti dang bcas te yongs su bzung ba'i dran pa nye bar gzhag pa bzhi la bzhugs pa/ sngon gyi sangs rgyas thams cad kyis bting ba'i gdan la bzhugs nas bla na med pa'i byang chub tu mngon par sangs rgyas so/ /thams cad mkhyen pa'i ye shes su gyur pa dkon 60.132a mchog gsum gyi gdung mi gcad pa'i phyir chos kyi 'khor lo bskor to/ /chos kyi rnga rab tu brdungs nas khams gsum kun du chos kyi sgra bsgrags te lha dang / klu dang / gnod sbyin dang / srin po dang / lha ma yin dang / nam mkha' lding dang / mi 'am ci dang / lto 'phye chen po dang / grul bum dang / 'byung po dang / sha za dang / srul po dang / lus srul po dang / mi dang mi ma yin pa la sogs pa thams cad 'phags pa'i bden pa bzhis grol bar byas so/ /yan lag bcu gnyis dang ldan pa'i chos kyi 'khor lo gang 'jig rten du bcas pa dge sbyong dang / bram ze dang / lha dang / bdud dang / tshangs pa dang / mi dang mi ma yin pa la sogs pa gang gis kyang ma bskor ba de 'jig rten du bcas pa lha dang mi tshad med pa dag la phan pa dang bde ba'i don chen po mchog dam pa thob par bya ba'i phyir sngon gang gis kyang ma bskor ba de rnam pa gsum du rab tu bskor to/ /rigs kyi bu nga de lta bu'i sangs rgyas kyi 'khor lo gcig pa de dang ldan te 'khor lo de'i dbang gis yang dag pa ji lta ba bzhin du 'jig rten 'di dang 'jig rten phyi ma dang / gnas dang gnas ma yin pa mngon sum du mkhyen pas 'jigs pa med pa thob ste/ bde bar gnas shing lha dang bdud du bcas pa'i mu stegs can log par smra ba thams cad shin du btul nas tshangs pa chen po'i 'khor lo bskor te/ tshangs pa chen po'i spyad pa shin du grub pas nga ni rnyog pa lnga'i sdig pa can gyi 'jig rten gyi khams 'dir 'khor gyi dkyil 'khor du seng ge'i sgra yang dag par bsgrags te/ sems can thams cad kyi mtshams med pa lnga'i las zhi bar byas so/ /de bzhin du mi dge ba'i rtsa bar gtogs pa thams cad bsal nas skye bo thams cad kyi nyon mongs pa'i rgyun rdo rje ltar sra ba dag kyang zhi bar byed do/ /zag pa thams cad yongs su zad pa rnam par grol ba'i 'bras bu dam pa la rnam par bzhag nas ci dang ci la mos pa bzhin du thams cad bde bar 'jog 60.132b pa dang / mthu dang ldan pa'i sems can dag ni theg pa gsum la bzhag ste phyir mi ldog par yang mdzad do/ /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po thog ma rgyal sar zhugs nas rgyal po'i srid bzung ma thag tu 'das pa dang ma 'ongs pa dang / da ltar gyi rgyal po thams cad kyis chos dang khrims la shin du lta zhing rtog go/ /de ltar rgyal po kun gyi las kyi 'khor lo shin du rtogs nas rgyu dang 'bras bu smin pa yang shes te/ ci dang cir ldan pa bzhin de dang de lta bu'i thabs byin te las su bcug pas/ yul de na gnas pa'i 'dzangs ngan las las kyi 'khor lo rnam pa gsum byed du bcug go/ /las kyi 'khor lo de'i dbang gis de na gnas pa'i sems can thams cad yun ring por 'tsho ba'i yo byad yid du 'ong ba rnam pa sna tshogs la longs spyod pa dang / bde skyid 'phel zhing skye ba dang / phas rgol ba'i dgra thams cad kyang thul bar gyur to/ /las kyi 'khor lo rnam pa gsum gang zhe na/ 'di lta ste/ rgyal po srid kyi las kyi 'khor lo rnam par bzhag pas gang dgra thabs mkhas par bslabs shing rtsal sbyangs te phas rgol ba'i dgra 'dul zhing mi mang po srung bar byed pa dang / zhing dang gnas byed pa'i las kyi 'khor lo rnam par bzhag pas gang khang khyim brtsigs pa dang zhing gi las lag byad kyis phyin par byed du 'jug cing bde bar byas pas bza' ba dang btung bas mi brel bar byed pa dang / nor rin po che tshol ba'i las kyi 'khor lo rnam par bzhag pas gang tshong spogs dang / bzo rnam pa sna tshogs slob tu gzhug cing 'tsho ba'i yo byad rnam pa sna tshogs yid du spyad du yod la bde zhing skyid pa 'phel bar byed pa'o/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po rgyal po'i 'khor lo gnyis po 'di dang ldan na 'khor lo 'di'i dbang gis 60.133a bdag gi yul rab tu bde zhing skyid pa dang / phas rgol ba'i dgra dang grogs po ngan pa btul zhing lus srung ba'i nan tan la mkhas pas tshe yang ring bar 'gyur ro/ /rigs kyi bu de bzhin du de bzhin gshegs pa'i yang thog ma mngon par sangs rgyas te bla na med pa'i ye shes thob nas 'das pa dang / ma 'ongs pa dang / da ltar gyi sangs rgyas thams cad kyi chos kyi mig la shin du rtog go/ /de ltar shin du brtags pas las dang chos rnams kyi rgyu dang 'bras bu rab tu mkhyen te 'dul bar 'gyur ba'i sems can thams cad la las kyi 'khor lo rnam pa gsum rnam par gzhag go/ /las kyi 'khor lo de'i dbang gis dkon mchog gsum gyi gdung dang / chos kyi mig yun ring du gnas pa dang / bla na med pa yang dag pa'i chos rgya cher kun du khyab pa dang / skye bo thams cad rtag tu mtho ris kyi lhar skye ba nas mya ngan las 'da' ba'i bar du shin du bde ba thob pa dang / mu stegs can log par smra ba thams cad kyis mi tshugs shing yang dag pa'i chos kyi mig gis phas rgol ba thams cad chos bzhin du thul bar 'gyur ro/ /de la rigs kyi bu las kyi 'khor lo rnam pa gsum gang zhe na/ 'di lta ste/ ting nge 'dzin bsgom pa'i las kyi 'khor lo rnam par gzhag pa dang / kha don goms par bya ba'i las kyi 'khor lo rnam par gzhag pa dang / bsod nams bya ba'i las kyi 'khor lo rnam par gzhag pa dang gsum mo/ /rigs kyi bu de la ji ltar na de bzhin gshegs pa'i ting nge 'dzin bsgom pa'i las kyi 'khor lo gang zhe na/ ting nge 'dzin rnam pa bcu ste/ bcu gang zhe na/ yang dag pa ji lta ba bzhin du rnam par shes pa dang bcas pa'i lus 'di la brtags na yul drug dang / bdag dang / bdag gir zhen cing chags pa'i rgyu dang / las kyi zhing dang / ma rig pas bsgribs pa dang / sred pa'i chus brlan pa'i dbang med 60.133b par gzhan gyi dbang gis yod par gyur pas rkyen mang po la rag las pa'o/ /las dang nyon mongs pa dang sdug bsngal gyi rgyun rnam pa gsum po dgag pa'i phyir de ltar brtag go/ /las kyi rgyun gang zhe na/ gang sems can rnams ji snyed kyi 'du byed mngon du spyod pa de ma rig pa dang / sred pa'i rgyu las srid pa skye bas nyon mongs pa'i rgyun ces bya'o/ /nyon mongs pa'i dbang gis rnam par shes pa'i rgyu dang rkyen mang po 'dus pa las ming dang gzugs skye'o/ /ming dang gzugs kyi rgyu dang rkyen mang po 'dus pa las skye mched drug skye'o/ /skye mched drug gi rgyu dang rkyen mang po 'dus pa las reg pa dang / tshor ba dang / srid pa phyi ma'i skye ba dang / rga ba dang / 'chi ba la sogs pa rim gyis 'byung ba ni sdug bsngal gyi rgyun ces bya'o/ /de ltar rgyun gsum po 'di ni las kyi zhing la ma rig pa'i rgyu dang / sred pa'i brlan gyis skye bar gyur to/ /'di ltar las kyi zhing la ma rig pa'i rgyu dang / sred pa'i brlan gyis rnam pa gsum po brkam pa'i phyir nye bar len pa'i phung po lnga la mi rtag pa dang / sdug bsngal ba dang / bdag med pa dang / bems po dang / g.yo ba med pa dang / sgyu ma lta bu dang / smig rgyu ba lta bu dang / chu'i zla ba lta bu dang / rmi lam lta bu stong pa ci yang med pa/ mtshan ma med pa/ smon pa med pa/ byas pa med pa/ ma byung ba/ ma skyes pa/ gzugs med pa/ zhi ba dang / dben pa dang / ma byung ba dang / skye ba'i gnas med par rtogs so/ /de ltar nye bar len pa'i phung po lnga la shin du brtags pas stong pa nyid dang rjes su 'thun pa'i bzod pa dang / mtshan ma med pa'i rjes su 'thun pa'i bzod pa dang / smon pa med pa'i rjes su 'thun pa'i bzod pa la phyogs so/ /yang nye bar len pa'i phung po lnga la rjes su brtag par bya ba'i phyir gzhan yang thabs mkhas pas dbugs phyi nang du rgyu ba la rtog ste nang du rgyu ba dang / phyir rgyu ba'i dran pa goms par byed do/ /de la ji 60.134a ltar na dran pa'i dbang gis yang dag pa ji lta ba bzhin du dbugs phyi nang du rgyu ba la rtog ce na/ yang dag pa ji lta ba bzhin du bgrang ba dang / rjes su 'brang ba dang / zhi gnas dang / lhag mthong dang / 'jug pa dang / yongs su dag pa la rtog go/ /de la bgrang bas ni las kyi dngos po rnam pa gnyis byed par 'gyur te/ rten du gyur pas rnam par rtog pa dang / rnam par dpyod pa rnams thul ba dang / dbugs phyi nang du rgyu ba'i mtshan nyid 'dzin par nus pa'o/ /rjes su 'brang bas kyang las kyi dngos po rnam pa gnyis byed par 'gyur te/ yang dag par 'byung ba la rten cing rnam par rtog pa dang / rnam par dpyod pa dang bral ba dang / dbugs phyi nang du rgyu ba'i 'jug pa'i mtshan nyid la mkhas par gyur pa'o/ /zhi gnas kyis kyang las kyi dngos po rnam pa gnyis byed par 'gyur te/ dbugs phyi nang du rgyu ba bri bar mngon du ston pa dang / ting nge 'dzin gyi mchog la gnas par nus pa'o/ /lhag mthong gis kyang las kyi dngos po rnam pa gnyis byed par 'gyur te/ dbugs phyi nang du rgyu ba zad par mngon du ston pa dang / sems dang sems las byung ba'i chos so sor rtogs pa la gnas pa'o/ /'jug pas kyang las kyi dngos po rnam pa gnyis byed par 'gyur te/ nye bar len pa'i phung po spong ba'i sbyor ba la mkhas pa dang / 'phags pa'i sar 'jug pa la sbyor ba'o/ /yongs su dag pas kyang bya ba'i las kyi dngos po gnyis byed par 'gyur te/ kun nas nyon mongs pa spong ba dang / lta ba yongs su dag pa'o/ /de ltar sbyor ba rnam pa drug gis dbugs phyi nang du rgyu ba la rtog pa bsgoms pas nye bar len pa'i phung po lnga rtogs pa dang rjes su 'thun par 'jug go/ /de ci'i phyir zhe na/ ji ltar dbugs phyi nang du rgyu ba'i rang bzhin ni gzugs nye bar len pa'i phung po'o/ /dbugs phyi nang du rgyu ba len cing myong bar 60.134b byed pa ni tshor ba nye bar len pa'i phung po'o/ /dbugs phyi nang du rgyu ba'i mtshan nyid len pa ni 'du shes nye bar len pa'i phung po'o/ /dbugs phyi nang du rgyu ba mngon du byed pa ni 'du byed nye bar len pa'i phung po'o/ /dbugs phyi nang du rgyu ba bye brag tu 'byed pa ni rnam par shes pa nye bar len pa'i phung po ste/ de ltar nye bar len pa'i phung po rnam pa lnga bshad pa ni so so ba/ tha dad pa mi 'dra ba/ gsar ma yin pa/ rnying ma yin pa/ gnas med pa/ spungs pa med pa ma yin pa/ brjod du med pa'o/ /de ltar nye bar len pa'i phung po lnga shin du rtogs pas 'du byed rnam pa gsum yongs su spong bar 'gyur ro/ /gal te de ltar 'du byed rnam pa gsum yongs su zad par rjes su brtags pa'i mthar phyin na rnam par shes pa dang bcas pa'i lus dang / yul drug rjes su rtogs pa'i mthar phyin par 'gyur ro/ /bdag dang bdag gir zhen pa dang / las dang / ma rig pa dang / srid pa'i rgyu dang / zhing dang / kun nas 'gebs pa'i rlan pa yang thams cad zad par 'gyur ro/ /de bzhin du dran pa nye bar gzhag pa bzhi bsgom pa yang yongs su rdzogs pa nas 'phags pa'i lam yan lag brgyad pa'i bar du yang bsgom pa yongs su rdzogs par 'gyur ro/ /de bzhin du sangs rgyas kyi chos ma 'dres pa bcwa brgyad kyi bar du yang bsgom pa yongs su rdzogs par 'gyur ro/ /de bzhin du rnam pa thams cad mkhyen pa'i ye shes dang / mi skye ba'i chos kyi bzod pa dang / dpa' bar 'gro ba'i ting nge 'dzin la sogs pa'i bar du bsgom pa yongs su rdzogs par 'gyur ro/ /de bzhin du 'gro ba dang 'ong ba rjes su dran pas gzung bar bsam gtan dag la zhugs pa ni yang dag pa'i chos dam pa la gnas pa'i sems can zhes bya'o/ /bsam gtan yang dag pa ji lta ba bzhin du sgom pa zhes bya'o/ /dus gsum gyi sangs rgyas bcom ldan 60.135a 'das la yang dag par mchod pa zhes bya'o/ /sangs rgyas thams cad kyi thugs las byung ba'i sras thams cad kyi gsung las skyes pa chos kyis btul ba zhes bya'o/ /byang chub sems dpa' la las de ltar bsgoms pa las bags kyis phyir nur na yang zag pa zad pa'i dgra bcom par gyur pa nas mngon par shes pa drug dang ldan par 'gyur ro/ /byang chub sems dpa' la la de ltar bsgoms pas gong nas gong du 'phar ba ni yon tan thams cad yongs su rdzogs te/ byang chub sems dpa' sems dpa' chen por gyur pa nas sangs rgyas kyi chos ma 'dres pa bcwa brgyad dang / rnam pa thams cad mkhyen pa'i ye shes kyi bar du yongs su rdzogs par 'gyur te/ ring po mi thogs par bla na med pa'i byang chub tu mngon par rdzogs par 'tshang rgya bar 'gyur ro/ /rigs kyi bu ngas rnam pa de snyed kyi las dang / chos dang / tshor ba dang / rgyu dang / 'bras bu dang / rnam par smin pa la ye shes kyis dus gsum gyi sangs rgyas kyi chos la brtags na sems can dag ting nge 'dzin bsgom pa'i las kyi 'khor lo bcu rnam par bzhag la sgom du 'dzud do/ /rigs kyi bu de dag ni de bzhin gshegs pa'i ting nge 'dzin sgom pa'i las kyi 'khor lo zhes bya'o/ /rigs kyi bu de la ji ltar na de bzhin gshegs pa'i kha ton goms pa'i las kyi 'khor lo zhe na/ gang dge slong dang / dge slong ma dang / dge bsnyen dang / dge bsnyen ma dang / rigs kyi bu 'am/ rigs kyi bu mo dge ba'i rtsa ba chung zhing srab pa dang / kun rdzob kyi bden pa la gnas pa dbang po yongs su ma smin pa dag la ngas kha ton goms par bya ba la btsud de/ srod dang tho rangs la le lo med par shin du brtson 'grus rtsom pa dang / sems can gang bla na med pa'i ye shes tshol ba dag ni ngas rnam par dkar ba'i theg pa chen po la btsud de/ bdag nyid 60.135b klog pa dang / pha rol po gzhan klog tu 'jug pa dang / bdag nyid 'don pa dang / pha rol po gzhan 'don du 'jug pa dang / bdag nyid 'chang ba dang / pha rol po gzhan 'chang du 'jug pa dang / theg pa chen po la bdag goms par bya ba dang / pha rol po gzhan goms par byed du 'jug pa dang / bdag dang gzhan gyi kun nas nyon mongs pa bsal ba dang / bla na med pa'i thams cad mkhyen pa'i ye shes thob par bya ba dang / sems can thams cad kyi sdug bsngal zhi bar bya ba dang / 'jigs pa med pa'i grong khyer chen por bzhugs pa'i phyir rtsol lo/ /sems can gang rang sangs rgyas kyi theg pa 'dod pa dag ni ngas rten cing 'brel bar 'byung ba'i chos la btsud nas kha ton goms par byed du bcug go/ /sems can gang nyan thos kyi theg pa 'dod pa dag la ni ngas gzhung tshigs su bcad pa stong phrag brgya pa dang / 'dul ba tshigs su bcad pa stong phrag brgya pa dang / chos mngon pa dang mngon par smra ba tshigs su bcad pa stong phrag brgya pa la sogs pa kha ton goms par byed du bcug pa de ni rigs kyi bu de bzhin gshegs pa'i kha ton goms par bya ba'i las kyi 'khor lo zhes bya'o/ /rigs kyi bu de la ji ltar na de bzhin gshegs pa'i bsod nams bya ba'i las kyi 'khor lo zhe na/ 'di lta ste/ sems can gang dbang po rtul ba dang / dge ba'i rtsa ba ma bskyed pa/ shes rab zhan pa dang / le lo dang bcas pa dran pa nyams pa 'tsho ba'i yo byad rnam pa kun la zhen cing chags pa/ dge ba'i bshes gnyen yongs su spong ba dag ni ngas bsod nams bya ba'i las la btsud do/ /'di lta ste/ sangs rgyas dang / chos dang / dge 'dun la bya ba byed pa dang / mkhan po dang / slob dpon la bya ba byed pa ste rigs kyi bu de ni de bzhin gshegs pa'i bsod nams sgrub pa'i las kyi 'khor lo zhes bya'o/ /rigs kyi bu de ltar na ni 60.136a sangs rgyas kyi 'khor lo gnyis pa 'di dang ldan te/ 'khor lo de'i dbang gis bla na med pa'i dus gsum gyi las kyi ye shes kyis yang dag pa ji lta ba bzhin du sems can thams cad kyi las dang / chos dang / tshor ba dang / rgyu dang / 'bras bu yongs su smin pa mkhyen te/ cis 'dul ba bzhin du las kyi 'khor lo rnam pa gsum rnam par bzhag nas snod du gyur pa'i sems can thams cad la phan pa dang bde ba'i don dang / 'jigs pa med pa la bde bar bkod do/ /'jigs pa med pas lha dang bdud du bcas pa'i mu stegs can log par smra ba thams cad btul nas tshangs pa chen po'i 'khor lo bskor zhing / tshangs pa chen po'i spyad pa yongs su grub pas yang dag pa ji lta ba bzhin du sems can gyi rgyu dang 'bras bu kun mngon par mkhyen to/ /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po ni thabs mkhas pa'i blo dang ldan pas dge sbyong dang / bram ze dang / rgyal rigs dang / rje'u rigs dang / dmang rigs la sogs pa yon tan rnam pa sna tshogs dang / mang du thos pa dang / dpa' bo dang / bzo ba dang / rtsal che ba dang / sems can gang phyug cing yon tan dang ldan pa/ thabs mkhas pa'i blo dang ldan pa/ dpa' zhing rtul phod pa/ brtan pa/ phyir mi ldog pa/ bsod nams rnam pa sna tshogs kyis yongs su brgyan pa de dag la rgyal rigs rgyal thabs spyi bo nas dbang bskur ba'i rgyal po chen pos de dag ci dang ldan pa bzhin ci 'os ci rigs su rin po che dang / nor gyi dbyig dang / zhing 'brog dang / khang khyim dang / bran dang las byed pa'i mi la sogs pa ci rigs su sbyin par byed do/ /yul de na gnas pa'i mi yon tan dang shes pa zhan pa/ las byas pa chung ba dag la ni rgyal thabs spyi bo nas dbang bskur ba'i rgyal po chen pos de dag la yang ci 'os ci rigs su shes kyis sbyin par byed do/ /yul de na gnas pa bsod nams med cing brtson 'grus chung ba le lo 60.136b che ba/ bag med pa/ dran pa nyams pa/ snying rje'i sems med pa/ byas pa mi gzo ba/ 'jig rten phyi ma'i sdug bsngal la 'jigs par mi lta ba/ khyim gyi 'dam du bying ba/ sdig pa mang po byed pa de dag la ni rgyal po chen pos ci rigs ci 'os su chad pa rnam pa sna tshogs kyis gcod de/ kha cig la ni tshig na bas spyos shing brgyad pa dag byed do/ /kha cig la ni rin po che dang nor rdzas la sogs pa 'phrog go/ /kha cig la ni 'tsho ba'i yo byad dag kyang 'phrog go/ /kha cig la ni lcag gis gzhu ba dang btson rar bcug go/ /kha cig la ni yan lag dang nying lag gcod do/ /kha cig la ni mgo dang lus kyang gcod de de dag la sogs pa chad pa rnam pa sna tshogs kyis chad pa gcod do/ /rigs kyi bu de ltar rgyal rigs rgyal thabs spyi bo nas dbang bskur ba'i rgyal po chen po rgyal po'i 'khor lo gsum pa 'di dang ldan te/ 'khor lo de'i dbang gis bdag gi yul rab tu bde zhing skyid pas phas rgol ba'i dgra thams cad dang / grogs po ngan pa btul cing lus srung ba'i nan tan mkhas pas tshe yang ring bar 'gyur ro/ /rigs kyi bu de bzhin du de bzhin gshegs pa yang dbang po la shin du mkhas pa'i ye shes dang ldan pas 'khor gang bsod nams dang ye shes kyi tshogs dang / thabs dang shes rab las ring du gyur pa/ sbyin pa dang / dul ba dang / zhi ba yongs su spangs te dran pa nyams nas sems 'khrugs par gyur pa dag nga gang na ba der 'ongs te nga la skyabs su 'ongs nas de dag gi dbang po dang / dad pa dang / bag la nyal ba dang / mos pa shin du mkhyen pas ci dang cis 'dul ba bzhin du chad pas gcad pa'i thabs 'dul ba la sogs pa'i chos ston to/ /sems can gang nga rgyal gyi dbang du gyur te/ bslab pa mang po gzungs su mi 'dzin pa dag la ni ngas bstan pa'i dam pa'i chos yun ring du gnas par bya ba'i phyir dngos po 'di dag byed du gzhug go/ /la lar ni dran par bya ba'i dam 60.137a bca' bas chad pas gcod do/ /la lar ni tshig na bas bsdigs pa dang / gshe ba dang / spyo bas gcod do/ /la lar ni skad cig dgar zhing sma dbab pas gcod do/ /la lar ni phyag 'tshal ba dang / mi smra ba dang / rnyed pa lhan cig tu mi spyod pas gcod do/ /la lar ni rtsa dgram pa lta bu dang / la lar ni bskrad pa la sogs pa'i chad pas bcad pa ste/ de ltar gang zag de dag gi dbang po dang / dad pa dang / bag la nyal ba dang / mos pa kun mkhyen pas ci rigs ci 'os su chad pas gcod do/ /de yang don med pa'i mun pa'i tshogs bsags pa gzhom pa dang / nyon mongs pa'i chu bo bskam pa dang / mtho ris kyi lhar skye ba nas mya ngan las 'da' ba'i bde ba thob pa'i phyir mi dge ba spyod pa'i gang zag 'dul ba'i phyir ci dang ci rigs su chad pas gcad pa'i chos bstan to/ /mdo sde mang po las kyang mi dge ba spyod pa chad pas gcad pa'i chos ci dang ci rigs pa de dang de'i chos rgya cher bshad do/ /ngas mchog dam pa'i ye shes kyis sems can gang lhag pa'i bsam pa dang / dad pa dang / mos pa yongs su dag pa dang ldan pa yang shin du mkhyen pas ci dang cis 'dul ba bzhin du dge ba'i phyogs kyi khyad par rnam pa sna tshogs bstan te/ bslab cing goms su bcug pa nas dge ba'i rtsa ba thams cad kyi bar du yongs su rdzogs shing 'jigs pa med pa'i grong khyer chen por btsud do/ /rigs kyi bu nga ni de ltar sangs rgyas kyi 'khor lo gsum po 'di dang ldan te 'khor lo 'di'i dbang gis sems can thams cad kyi dbang po rnam pa sna tshogs dang / dad pa dang / bag la nyal ba dang / mos pa dang / bsam pa dang / las dang / myong ba'i chos kun mkhyen pas ci dang cis 'dul ba bzhin du phan pa dang bde ba'i don gyis 'jigs pa med pa la bde bar bkod do/ /'jigs pa med pas nga ni drang srong chen po'i gnas su dam bca' zhing sangs rgyas kyi 'khor lo rab 60.137b tu bskor nas lha dang bdud du bcas pa'i mu stegs can log par smra ba thams cad btul te 'khor mang po'i dkyil 'khor du seng ge'i sgra sgrogs so/ /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po ni bdag gi yul na gang zag ji snyed cig 'jig rten gyi lha dang mu stegs can rnam pa sna tshogs la skyabs su song zhing log pa la dad pa dang / log par lta ba dang / log pa la slob pa dang / log pa'i brtul zhugs la mngon par zhen te/ log pa'i ltas bzang ngan la chags nas don med pa'i sdug bsngal rnam pa sna tshogs kyis sdug bsngal bar gyur pa dag rgyal po chen po des shes nas rtag tu yang dang yang bsdus te/ rgyal po snga ma'i dam pa'i chos lugs kyis rgyas par bstan nas log par lta ba dang / log par dad pa spongs la/ rgyal po snga ma'i chos lugs bslab pa la nan tan du spyod cig par bkas btags te/ yul de na gnas pa'i sems can thams cad 'jug pa gcig /phyogs pa gcig /bsam pa gcig /'dod pa gcig par thams cad 'thun par rgyal po snga ma'i dam pa'i chos bzhin du gnas pa dang / bka' bzhin du nyan cing rjes su spyod pas de na gnas pa thams cad 'thun par gang bya bar rigs pa rnams byed do/ /rgyal rigs rgyal thabs spyi bo nas dbang bskur ba'i rgyal po chen po yang rtag tu blon po rnams dang 'dus nas ston mo byed cing longs spyod de/ dga' bas rol cing gshegs pas gros 'thun pas rgyal po'i las byed do/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po de ltar rgyal po'i 'khor lo bzhi po 'di dang ldan te/ 'khor lo de'i dbang gis bdag gi yul rab tu bde zhing skyid pa dang / phas rgol ba'i dgra thams cad dang / grogs po ngan pa btul zhing lus srung ba'i nan 60.138a tan la mkhas pas tshe yang ring bar 'gyur ro/ /rigs kyi bu de ltar de bzhin du de bzhin gshegs pa yang shin tu thabs mkhas pa'i mos pa mkhyen pa'i ye shes dang ldan pas 'jig rten na log pa la phyogs pa rnam pa sna tshogs dang / log par lta ba dang / log pa'i bsam pa dang / log pa'i chos la mos pa dang / log pa'i las spyod pa de'i rgyu de'i rkyen gyis sdug bsngal tshad med pa myong bar de bzhin gshags pas mkhyen cing gzigs nas rtag tu yang dang yang 'khor mang po bsdus te snga ma 'das pa'i sangs rgyas bcom ldan 'das kyi dkon mchog gsum gyi gdung bsab pa'i rgyu dang / 'bras bu dang / pha rol du phyin pa drug dang / rnal 'byor pa'i rgyu dang / sdom pa gsum la sogs pa'i rgyu dang 'bras bu'i chos rgyas par phye ste mngon par bstan nas 'khor mang po rnams rnam par grol bar byed do/ /phyin ci log tu lta ba rnams yang dag pa'i lta ba dang dge ba bcu'i yang dag pa'i las kyi lam la rnam par 'jug go/ /sems can rnams ni rtag tu 'thun par chos la 'jug /chos la spyod par thabs kyis drang zhing sgom du 'dzud pas rgyu dang 'bras bu rgyun mi 'chad par byed do/ /sems can rnams 'khor rnam bzhi dang 'thun par dge ba spyod pa'i khyad par la nan tan byed du bcug nas dran pa nye bar gzhag pa bzhi dang / ting nge 'dzin dang / rnam par grol ba'i ye shes ston pa dang / lam gyi yan lag la spro bzhin du rtse'o/ /'phags pa'i bstan pa yun du gnas par bya ba dang / dkon mchog gsum gyi gdung rgyun mi 'chad par bya ba'i phyir yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / de ma yin pa ting nge 'dzin dang / rnam par grol ba'i ye shes ston pa dang / byang chub kyi phyogs kyi khyad par 60.138b rnam pa sna tshogs la ci dgar rtser bcug go/ /rigs kyi bu nga ni de ltar sangs rgyas kyi 'khor lo bzhi pa 'di dang ldan te/ 'khor lo de'i dbang gis so so'i skye bo ci dang ci la mos pa dang / ci la phyogs pa dang / ci la dga' ba kun mkhyen pas ci dang cis 'dul ba bzhin du phan pa dang bde ba'i don gyis 'jigs pa med pa la bde bar bkod do/ /'jigs pa med pas nga ni drang srong chen po'i gnas su bzhugs te sangs rgyas kyi 'khor lo bskor nas lha dang bdud du bcas pa'i mu stegs can log par smra ba thams cad btul te 'khor mang po'i nang du seng ge'i sgra bsgrags so zhes gsungs so/ /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po bdag gi yul na gnas pa 'am/ pha rol po gzhan gyi yul na gnas pa'i sems can tshad med pa snyed pa dag gi nor dang gzugs la chags shing skyo mi shes pa dang / pha rol po gzhan gyi nor dang gzugs la chags shing 'dod pas de bsrung ba'i phyir grong dang / grong khyer dang grong 'dab dang / rgyal po'i pho brang yang 'khor dang ra bas bskor ba nas bya sha la dang / ne tso'i bar du srung du 'dzud de stor cing god par mi byed do/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po 'di ltar rgyal po'i 'khor lo lnga pa 'di dang ldan te/ 'khor lo de'i dbang gis bdag gi yul rab tu bde zhing skyid pa dang / phas rgol ba'i dgra thams cad dang / grogs po ngan pa btul cing lus srung ba'i nan tan la mkhas pas tshe yang ring bar 'gyur ro/ /rigs kyi bu de bzhin du de bzhin gshegs pa yang rang bzhin la shin du thabs mkhas pas mkhyen pa'i ye shes dang ldan pas bdud sdig can ma rungs pa dang / mu stegs can dgu bcu rtsa lnga po dang / de ma yin pa gzhan yang bdud kyi ris dang / 60.139a mu stegs can tshad med pa snyed kyis bslus pa kun mkhyen te/ sems can gang bdag gi nor dang gzugs la mngon par chags pa dang / pha rol po gzhan gyi nor dang gzugs la yang chags shing 'dod pas tshol lo/ /nga dang nga'i 'khor rnams la phrag dog bskyed de nga gsad pa'i phyir bsod snyoms kyi nang du dug bcug pa dang / me dong gi steng du gdan bting ba dang / steng nas dbab btang ba dang / bal glang smyos pa sbad pa dang / ral gri phyung ste snyegs pa dang / sa dang mi gtsang ba 'thor ba dang / mi tshangs par spyod do zhes skur pa dang / ma ning yin no zhes btags pa dang / mi ma yin pa'o zhes brjod pa dang / sgyu ma'o zhes tshig ngan pa rnam pa sna tshogs kyis kyang nga la smod cing skur to/ /nga'i nyan thos kyi slob ma la yang phrag dog bskyed de de'i rgyu de'i rkyen gyis skur cing smod pa rnam pa mang po byed par mkhyen nas/ de bzhin gshegs pa dbang po drug bsrung ba la mkhas pa dang / tshangs pa'i gnas bzhi la gnas pa dang / so so yang dag par rig pa bzhi dang ldan par gyur pa dang / nyan thos rnams la yang chos kyi mdo rnam par thar pa'i sgo gsum yongs su dag pa rnam par gzhag pa bstan to/ /ngas da ltar 'jig rten dang / 'jig rten las 'das pa'i rang bzhin kun yang dag pa ji lta ba bzhin du mkhyen to/ /de ltar sems can gyi rang bzhin tha dad pa rnam pa sna tshogs kun mkhyen nas/ de dag ci dang cis 'dul ba bzhin du phan pa dang bde ba'i don mdzad do/ /rigs kyi bu ngas de ltar sangs rgyas kyi 'khor lo lnga pa 'di dang ldan te/ 'khor lo de'i dbang gis 'jig rten pa dang / 'jig rten las 'das pa'i rang bzhin mkhyen pa'i ye shes kyis sems can gyi rang bzhin tshad med pa rnam pa sna tshogs kun so sor mkhyen pas ci dang cis 'dul ba bzhin du phan pa dang bde ba'i don gyis 60.139b 'jigs pa med pa la bde bar bkod do/ /'jigs pa med pas nga ni drang srong chen po'i gnas su bzhugs shing sangs rgyas kyi 'khor lo bskor nas lha dang bdud du bcas pa'i mu stegs can log par smra ba thams cad btul te 'khor mang po'i dkyil 'khor du seng ge'i sgra rab tu sgrogs so/ /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po ji ltar grong khyer dang / grong rdal dang / grong mdab dang / rgyal po'i pho brang brtan par bsrung ba'i phyir 'obs kyis bskor ba nas gzhung de bzhin du rgyas par sha ri dang ne tso'i bar du srungs ma btsud do/ /pho brang na 'khor dang btsun mo dang bu mor bcas pas yongs su bskor cing 'dod pa lnga la rtse zhing longs spyod rnam pa sna tshogs la bag med par dbang po drug nyam rangs su spyod do/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po de de ltar rgyal po'i 'khor lo drug pa 'di dang ldan te/ 'khor lo de'i dbang gis bdag gi yul rab tu bde zhing skyid pa dang / phas rgol ba'i dgra dang / grogs po ngan pa thams cad btul te lus srung ba'i nan tan la mkhas pas tshe yang ring bar 'gyur ro/ /rigs kyi bu de ltar de bzhin du de bzhin gshegs pa yang byang chub sems dpa' sems dpa' chen po rnams dang / nyan thos chen po rnams kyang thams cad 'phags pas bstan pa'i grong khyer brtan par btsud nas/ de'i 'og tu bsam gtan mchog dam pa la snyoms par 'jug pa nas bsam gtan bzhi'i bar du snyoms par 'jug pa dang / nam mkha' mtha' yas skye mched kyi ting nge 'dzin la snyoms par 'jug pa nas/ de bzhin du rgyas par 'du shes med 'du shes med min gyi skye mched kyi ting nge 'dzin gyi bar du snyoms par 'jug pa dang / de bzhin 60.140a du sangs rgyas thams cad kyi spyod yul gyi ting nge 'dzin gyi bar du snyoms par 'jug par 'gyur ro/ /ting nge 'dzin de dag tu zhugs nas lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / 'byung po dang / sha za dang / srul po dang / lus srul po la sogs pa sems can la gnod cing 'tshe ba/ byams pa dang / snying rje'i sems med pa/ 'jig rten phyi ma'i sdug bsngal gyis mi 'jigs pa tshad med pa bye ba brgya stong snyed ngas sangs rgyas thams cad kyi spyod yul gyi ting nge 'dzin du zhugs pa mthong nas/ thams cad nga la shin du dga' ba'i sems bskyed de/ bsam pa yongs su dag pas dkon mchog gsum la mchog dam pa'i dga' ba dang dang ba bskyed nas bsti stang dang bcas/ bkur sti dang bcas te ngo mtshar rmad du gyur nas nyes pa thams cad so sor bshags te yongs su gcad par dam bca'o/ /de'i rgyu de'i rkyen gyis skad cig yud tsam gyis tshad med dpag tu med pa'i nyon mongs pa'i sgrib pa dang / las kyi sgrib pa dang / chos kyi sgrib pa kun byang bar 'gyur te/ tshad med dpag tu med pa'i bsod nams kyi tshogs dang / ye shes kyi tshogs kun yongs su rdzogs par gyur nas/ 'khor ba la rgyab kyis bltas shing mya ngan las 'da' ba la phyogs nas/ de bzhin gshegs pa bla na med pa yang dag pa'i chos srung zhing 'dzin to/ /rigs kyi bu nga yang de ltar sangs rgyas kyi 'khor lo drug pa 'di dang ldan te/ 'khor lo de'i dbang gis de bzhin gshegs pa bsam gtan dang / ting nge 'dzin dang / rnam par grol ba dang / snyoms par 'jug pa dang / mnyam par bzhag pa tshad med pa brgya stong snyed la rnam par dag pa'i ye shes kyis 'jug cing / sems can gyi nyon mongs pa tshad med pa snyed bsal nas ci dang cis 'dul ba bzhin du phan pa dang bde ba'i don gyis 'jigs pa med pa la bde bar 'god do/ / 60.140b 'jigs pa med pas nga ni drang srong chen po'i gnas su dam bca' zhing sangs rgyas kyi 'khor lo bskor nas/ lha dang bdud du bcas pa'i mu stegs can log par smra ba thams cad btul te 'khor mang po'i dkyil 'khor du seng ge'i sgra bsgrags so zhes gsung ngo / /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po ni blon po dang / dmag rnam bzhi dang bcas te bdag gi ris su dbang ba'i grong khyer dang / grong rdal dang / grong 'dab dang / ri dang / ljongs dang / lung pa dang lung phran dang / bskyed mos tshal dang / zhing dang / 'brog dang / 'bab chu dang / rdzing dang / mtshe'u dang / chu mig dang / 'brog dgon pa dang / nags tshal la sogs par kun du byul zhing brtags nas/ yul de phyogs kyi 'jigs pa dang the tsom du bcas pa'i gnas sam/ g.yang za ba bsdur mi rung ba'i gnas sam/ pha rol gyi dgra 'khras shing 'tshe ba'i gnas rnams su rgyal rigs rgyal thabs spyi bo nas dbang bskur ba'i rgyal po chen pos rang gi nyams kyis dpags shing rnam pa thams cad du sbyangs te/ bde bar 'jog pa la sbyor ba dang / legs par bsrung zhing brtan par byas pas gnas pa'i phyogs de dag mnyam pa las byar rung ba phas kyi dgra dang grogs po ngan pa glags lta zhing 'khras pa'i gnas med par byas te/ 'jigs pa dang bag tsha ba bsal ba'i phyir yul de na gnas pa'i sems can thams cad mi bde ba'i sdug bsngal dang bral zhing rab tu bde zhing skyid par skyabs so/ /rigs kyi bu de ltar rgyal rigs rgyal thabs spyi bo nas dbang bskur ba'i rgyal po chen po rgyal po'i 'khor lo bdun pa de dang ldan te/ 'khor lo de'i dbang gis bdag gi yul rab tu bde zhing skyid pa dang / phas rgol ba'i dgra dang / grogs po ngan pa thams cad btul zhing lus bsrung ba'i nan tan la mkhas pas tshe yang ring bar 'gyur ro/ /rigs kyi 60.141a bu de ltar de bzhin du de bzhin gshegs pa yang sangs rgyas kyi spyan gyis yang dag pa ji lta ba bzhin du sems can thams cad kyi 'dod chags dang / zhe sdang dang / gti mug gi bsam pa gang dang ldan pa rab tu mkhyen to/ /yang dag pa ji lta ba bzhin nyon mongs pa rnam pa sna tshogs kyi nad mi mthun pa yang rab tu mkhyen to/ /de bzhin gshegs pas de ltar mkhyen pas shin du 'bad pa'i brtson 'grus tshad med pa dang / thabs mkhas pa'i shugs kyis ci dang cis 'dul ba bzhin du ting nge 'dzin rnam pa sna tshogs sgrub pa'i sman dam pa byin pas sems can dag nyon mongs pa'i nad bsal ba la nan tan dang brtson 'grus byed du bcug go/ /sems can gang mi gtsang ba la rtog pa'i nyon mongs pa'i nad zhi bar 'os pa zhig na/ de la mi gtsang ba la rtog pa'i sman sgom du bcug go/ /sems can gang tshangs pa'i gnas la nan tan byas pas nyon mongs pa'i nad zhi bar 'os pa zhig na tshangs pa'i gnas kyi sman sgom du bcug go/ /sems can gang rten cing 'brel te 'byung ba bsgoms pas nyon mongs pa'i nad sel bar 'os pa zhig na/ de la rten cing 'brel te byung ba'i sman sgom du bcug go/ /sems can gang dbugs 'grang ba yid la byas pas nad zhi bar 'os pa zhig na/ de la dbugs 'grang ba yid la bya ba'i sman sgom du bcug go/ /sems can gang rnam par thar pa'i sgo gsum bsgoms pas nyon mongs pa'i nad zhi bar 'os pa zhig na/ de la rnam par thar pa'i sgo gsum gyi sman sgom du bcug go/ /sems can gang bsam gtan bsgoms pas nyon mongs pa'i nad zhi bar 'os pa zhig na/ de la bsam gtan gyi sman sgom du bcug go/ /sems can gang gzugs med pa'i bsam gtan bsgoms pas nyon mongs pa'i nad zhi bar 'os pa zhig na/ de la gzugs med pa'i bsam gtan sgom du bcug go/ /sems can gang 60.141b dpa' bar 'gro ba'i ting nge 'dzin gyi bar bsgoms pas nyon mongs pa'i nad zhi bar 'os pa zhig na/ de la dpa' bar 'gro ba'i ting nge 'dzin gyi sman sgom du bcug go/ /de bas na de bzhin gshegs pas sems can dag la de lta bu'i chos kyi sman gyi sbyin pa mdzad do/ /snod du gyur pa'i sems can thams cad bdud rnam bzhi'i dbang du 'gyur bar mi mdzad do/ /snod du gyur pa'i sems can thams cad lha dang mi'i theg pa la rgyab kyis phyogs shing ngan song du gzhol bar mi mdzad do/ /de bzhin gshegs pa bla na med pa'i chos kyi sman dang / dkon mchog gsum gyi gdung myur du med par 'gyur bar mi mdzad de/ de ltar na de bzhin gshegs pas sems can rnams la de lta bu'i chos kyi sman gyi sbyin pa mdzad do/ /rigs kyi bu de bzhin gshegs pa de lta bu'i sangs rgyas kyi 'khor lo bdun pa dang ldan te/ 'khor lo de'i dbang gis bla na med pa kun du 'gro ba'i ye shes kyi spyod pas sems can thams cad la chos kyi sman rnam pa sna tshogs byin pa de sgom du btsud na nyon mongs pa'i nad kun zhi zhing 'jigs pa med pa la bde bar gnas par 'gyur ro/ /'jigs pa med pas nga ni drang srong chen po'i gnas su bzhugs te sangs rgyas kyi 'khor lo bskor nas lha dang bdud du bcas pa'i mu stegs can log par smra ba thams cad btul te/ 'khor mang po'i dkyil 'khor du seng ge'i sgra sgrogaso/ /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po bdag dang gzhan gyi rigs dang / thog ma btsas pa dang / gzhon nu'i tshe rtse ba la sogs pa thams cad la dran pa mngon par bzhag zhes sems so/ /'di lta ste/ gnas gang du thog ma btsas pa dang / khrus byas pa dang / pang du blangs shing nu zho bsnun pa dang lus dang yan lag gi tshogs mnyes pa dang / dga' bzhin du rtse ba dang / sa dang bye ma la rtse ba 60.142a dang / 'khor dang bcas te bag med pa rnam pa mang pos rtse ba dang / rtsal sbyong ba dang / de ma yin pa'i las rnam pa gzhan byed pa dang / rgyal po gzhan gyi yul du rgyu zhing 'gro ba dang / rgyal po'i bya ba sgrub pa dang / rgyal po'i las byed pa dang / rgyal tshab byed pa dang / rgyal thabs thob nas dbang du gyur te/ bde ba'i longs spyod chen po myong ba dang / grags pa chen pos phyogs kun du grags pa dang / dngos po de dag la sogs pa bsams te dran nas/ rgyal po snga ma'i chos lugs yang dag pa rnam par bzhag nas de na gnas pa'i sems can thams cad la 'tsho skyong ste/ bdag gi srid 'dzin cing pha rol mi 'tshe'o/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po de ltar rgyal po'i 'khor lo brgyad pa 'di dang ldan te/ 'khor lo de'i dbang gis bdag gi yul rab tu bde zhing skyid pa dang / phas rgol ba'i dgra dang grogs po ngan pa thams cad btul te/ lus bsrung ba'i nan tan la mkhas pas tshe yang ring bar 'gyur ro/ /rigs kyi bu de ltar de bzhin du de bzhin gshegs pa yang 'khor gyi dkyil 'khor na bzhugs pa'i tshe bdag dang pha rol po gzhan gzhan gyi sngon gyi skye ba tshad med pa snyed na ci byas pa'i dngos po kun dgongs so/ /'di lta ste/ skye ba gcig dang / skye ba gnyis dang / skye ba gsum nas skye ba tshad med pa brgya stong gi bar gyi ci byas pa'i dngos po kun dgongs so/ /de bzhin du bskal pa 'grub pa dgongs pa nas bskal pa 'jig pa yang dgongs so/ /bskal pa tshad med pa 'grub pa dang / bskal pa tshad med pa 'jig pa'i bar du thams cad dgongs te/ 'di ni sngon 'das pa'i dus na che ge mo zhig na 'dug 'dug ste rigs ni 'di zhes bya'o/ /ming ni 'di zhes bya'o/ /rus ni 'di zhes bya'o/ /kha zas ni 'di za za'o/ /bde ba dang sdug bsngal ba 'di dag myong ngo / / 60.142b tshe ni 'di snyed cig go/ /'di snyed kyi bar du 'dug 'dug go/ /tshe'i mthar thug pa na che ge mo zhig tu tshe 'phos nas 'di dag tu skyes so/ /'di dag tu tshe 'phos nas che ge mo zhig tu skyes pa la sogs pa dngos po tshad med dpag tu med pa kun dgongs pas sems can gyi dbang po so so ji lta ba bzhin du dam pa'i chos ston te/ phan pa dang bde ba'i don mdzad do/ /rigs kyi bu nga de ltar sangs rgyas kyi 'khor lo brgyad pa 'di dang ldan te/ 'khor lo de'i dbang gis sems can tshad med pa la phan pa dang bde ba'i don gyis 'jigs pa med pa la bde bar bkod do/ /'jigs pa med pas nga ni drang srong chen po'i gnas su bzhugs te/ sangs rgyas kyi 'khor lo bskor nas lha dang bdud du bcas pa'i mu stegs can la sogs pa log par smra ba thams cad btul te/ 'khor mang po'i dkyil 'khor du seng ge'i sgra sgrogs so/ /rigs kyi bu 'di lta ste/ rgyal rigs rgyal thabs spyi bo nas dbang bskur ba'i rgyal po chen po ni bsams pa bzhin du bdag gi ris na gnas pa'i sems can gyi rigs dang / rus dang / rtsal ci yod pa dang / las kyi dngos po ci byed pa dang / 'di nas tshe 'phos nas gang du skye ba dang rgyu dang 'bras bu bzang ngan gyi khyad par mi mthun pa kun shin du rtog go/ /sems can gang su'i khyim du skyes na rtul phod cing dpa' ba dang / zhan cing sdar ba dang / bzo rtsal bslabs na lobs pa dang / mi lobs pa dang / las ci byed pa dang / dge ba byed pa dang / sdig pa byed pa dang / phyug cing btsan pa dang / dbul zhing nyen pa dang / mdzes pa dang / mi mdzes pa la sogs pa kun shes pa nas tshe 'pho ba'i bar du kun shes te gang su zhig las ma zad par 'chi ba dang / gang ni las zad de 'chi ba dang / gang ni rgyal po'i khrims dang 'gal nas bsad pa dang / gang na dgras bsad pa dang / gang ni lcag gis 60.143a gzhus pas 'chi ba dang / gang ni btson rar bcug pas 'chi ba dang / gang ni bzo rtsal sbyong ba'i phyir 'chi ba dang / gang ni phas rgol ba'i dgra'i g.yul ngor 'chi ba dang / gang ni rtsod cing 'thabs nas 'chi ba dang / gang ni nor dbyig srung ba'i phyir 'chi ba dang / gang ni 'dod chags kyi dbang gis 'chi ba dang / gang ni khong khro zhing 'khon du 'dzin pa'i phyir 'chi ba dang / gang ni ngal chad nas 'chi ba dang / gang ni ltogs te 'chi ba dang / gang ni nyes pa'i skyon dang bcas te 'chi ba dang / gang ni skyon med par 'chi ba dang / gang ni rgas 'khogs te 'chi ba pa dang / gang ni dar la bab ste 'chi ba dang / gang ni gzhon nu byis pa'i tshe 'chi ba dang / gang ni dge ba'i las rnam pa mang po byas nas 'chi ba dang / gang ni mi dge ba'i las rnam pa mang po byas te 'chi ba dag kyang rab tu shes so/ /sems can gang ni dge ba spyad pa'i rgyus shi na'ang mtho ris su skye bar 'gyur ba 'ang shes te/ sems can gang ni mi dge ba spyad pa'i rgyus tshe 'phos nas ngan song du skye bar 'gyur ba 'ang rab tu shes so/ /de ltar dngos po de dag kun rab tu shes pas 'di snyam du bdag kyang brtson pa'i sbyor ba la lus dge ba dang / ngag dge ba dang / yid dge ba la spyod pa la shin du brtson par bya'o snyam du sems so/ /bdag gis thabs rnam pa sna tshogs kyis sbyin pa la goms par bya ba dang / zhi zhing dul bar bya ste tshe 'phos nas gnas bzang por skye bar bya'i/ ngan song du ltung bar mi bya'o snyam du sems so/ /de ltar rgyal rigs rgyal thabs spyi bo nas dbang bskur ba'i rgyal po chen po de lta bu'i dngos po bsams nas shin du 'bad pa'i brtson 'grus kyis lus dang ngag dang yid gsum gyis dge ba spyod pa las shin du rtsol te/ rtag tu sbyin pa spyod pa ni 'di lta ste/ zas dang / skom dang / gos dang / bal glang dang / rta dang / bzhon pa'i theg pa dang / mal cha dang / nad kyi gsos sman dang / khang khyim dang / mar me dang / sgron ma dang / 60.143b de ma yin pa 'tsho ba'i yo byad thams cad dang / bran dang las byed pa'i mi dang / gzhan yang rin po che dang / nor dbyig rnam pa sna tshogs dang / mgo dang / mig dang / lag pa dang / rkang pa nas lus dang / srog gi bar du phangs pa med par thams cad gtong ngo / /srog gcod pa yongs su spong ba nas ma byin par len pa dang / 'dod pas log par g.yem pa dang / brdzun du smra ba dang / ngag rtsub por smra ba dang / tshig kyal pa dang / phra ma dang / 'dod chags dang / zhe sdang dang / log par lta ba'i bar du yongs su spong ngo / /de'i rgyu de'i rkyen gyis rgyal rigs rgyal thabs spyi bo nas dbang bskur ba'i rgyal po chen po yon tan gyi khyad par rnam pa bcu thob po/ /bcu gang zhe na 'di lta ste/ grags pa chen po dang ldan pa yin/ nor rin po che dang ldan pa yin/ mtshan phun sum tshogs pa dang ldan pa yin/ 'khor mang po dang ldan pa yin/ mi bde ba dang nad med pa yin/ 'khor dang gnyen bshes kun shes rab rno zhing mang du thos pa yin yang dag pa dang yang dag pa'i spyod pa can la sten cing mchod pa byed pa yin/ phyogs bcu kun du shin du snyan pas rgya cher grags pa yin/ gzi brjid chen po'i mthu dang ldan pa'i lhas rtag tu srung ba yin/ tshe 'phos par gyur na yang mtho ris kyi lhar skye zhing rtag tu gnas bzang por rab tu bde ba'i longs spyod dang ldan pa yin no/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po de ltar 'khor lo dgu pa 'di dang ldan te/ 'khor lo de dang ldan pa'i dbang gis bdag gi yul rab tu bde zhing skyid pa dang / phas rgol ba'i dgra dang / grogs po ngan pa thams cad btul te lus bsrung ba'i nan tan la mkhas pas tshe yang ring bar 'gyur ro/ /rigs kyi bu de ltar de bzhin du de bzhin gshegs pa yang yang dag pa ji lta ba bzhin du sems can thams cad kyi skye ba dang 'chi 60.144a 'pho ba'i dngos po kun mkhyen to/ /yang dag pa ji lta ba bzhin du sems can gang ni lus mi dge ba spyod pa dang ldan pa/ sems can gang ni ngag mi dge ba spyod pa dang ldan pa/ sems can gang ni yid mi dge ba spyod pa dang ldan zhing 'phags pa rnams la dbang za ste/ ngan par lta ba dang ldan pas ngan par lta ba'i dbang gis tshe 'phos nas ngan song du ltung ba dang / gang ni sems can dmyal bar ltung ba dang / gang ni byol song gi skye gnas su skye ba dang / gang ni yi dgas su skye ba yang rab tu mkhyen to/ /sems can gang ni lus dge ba spyod pa dang ldan/ gang ni ngag dge ba spyod pa dang ldan/ gang ni yid dge ba spyod pa dang ldan zhing 'phags pa rnams la dbang mi za ba dang / yang dag par lta ba dang ldan te/ yang dag par lta ba'i rkyen gyis tshe 'phos nas mtho ris kyi lhar skye ba dang / mir skye ba dang / zag pa zad par 'gyur ba yang rab tu mkhyen to/ /de ltar de bzhin gshegs pas yang dag pa ji lta ba bzhin du mkhyen pas sems can de dag la byams pa dang / snying rje chen po bskyed de/ shin du 'bad pa'i brtson 'grus kyis cho 'phrul rnam pa gsum mngon par bstan te/ sems can de dag sangs rgyas kyis bstan pa'i chos dang 'dul ba la phyogs shing 'jig rten dang 'jig rten las 'das pa'i dad pa la bkod do/ /gsum gang zhe na/ 'di lta ste/ mngon par shes pa'i cho 'phrul dang / chos ston pa'i cho 'phrul dang / pha rol gyi sems shes pa'i cho 'phrul ba'o/ /cho 'phrul rnam pa de gsum gyis sems can de dag bskul nas bstan pa la bkod de/ 'jig rten dang 'jig rten las 'da' ba'i dad pa thob par byas nas/ srid pa na 'khor ba'i sems can thams cad rnam par grol bar mdzad do/ /rigs kyi bu nga de ltar sangs rgyas kyi 'khor lo dgu pa 'di dag dang ldan te/ 'khor lo de'i dbang gis sems can tshad med pa la phan pa dang 60.144b bde ba'i don gyis 'jigs pa med pa la bde bar bkod do/ /'jigs pa med pas nga ni drang srong chen po'i gnas su bzhugs te sangs rgyas kyi 'khor lo bskor nas lha dang bdud du bcas pa'i mu stegs can log par lta ba thams cad btul te/ 'khor gyi dkyil 'khor du seng ge'i sgra sgrogs so/ /rigs kyi bu 'di lta ste rgyal rigs rgyal thabs spyi bo nas dbang bskur ba'i rgyal po chen po ni gling bzhi pa'i sems can tshad med pa'i lus kyi nad rnam pa sna tshogs bsal ba'i phyir rgyal thabs btang nas spos chus lus bkrus nas gos gtsang ma sar pa gyon nas lus drang por bsrang ste/ sems can thams cad la byams pa dang / snying rje dang mnyam pa'i sems yid la byas te/ nad thams cad las thar bar bya ba'i phyir me tog dang / spos dang / rol mo rnam pa sna tshogs dang / de ma yin pa'i mchod pa'i yo byad rnam pa sna tshogs mang pos mthu che ba gzi brjid dang ldan pa'i lha thams cad la mchod pa byed do/ /de'i tshe na lha'i dbang po dang / klu'i dbang po nas lto 'phye chen po'i dbang po'i bar du thams cad kyis de ltar shes nas gcig la gcig 'di skad ces zer ro/ /rgyal rigs rgyal thabs spyi bo nas dbang bskur ba'i rgyal po chen po 'di yon tan dang ldan te/ gzi brjid che bas na gling bzhi la dbang ba'i 'khor los sgyur ba'i rgyal por 'os kyis bdag cag gis der dong la gling bzhi la dbang ba'i rgyal por dbang bskur ba dang / sems can rnams nad med cing bde bar bya ba'i phyir 'dong ngo zhes smras nas lha'i dbang po nas lto 'phye chen po'i dbang po'i bar du thams cad lhags nas rgyal rigs rgyal thabs spyi bo nas dbang bskur ba'i rgyal po chen po de 'khor los sgyur ba'i rgyal por dbang bskur te/ rin po che sna bdun dang ldan pa dang / gling bzhi la dbang byed pa dang / bu stong dang ldan te thams 60.145a cad dpa' ba rtul phod pa/ mdzes shing yid du 'ong ba dang / phas rgol ba'i dgra thul ba dang / dbang bar gyur pa'i sa chen po rgya mtsho'i mtha' nas pho brang du thug gi bar du mtshon cha mi spyod cing thams cad dam pa'i chos spyod de bde skyid par byas so/ /rigs kyi bu rgyal rigs rgyal thabs spyi bo nas dbang bskur ba'i rgyal po chen po de ltar 'khor lo bcu pa 'di dang ldan te/ 'khor lo de'i dbang gis gling chen po bzhi nas phyogs mtshams brgyad dang / gling phran brgyad khri bzhi stong dag na sems can ji snyed gnas pa de dag thams cad dge ba bcu'i las kyi lam la gnas shing / bdag gi lus shin du srung ba dang / tshe yang ring bar 'gyur ro/ /tshe 'phos nas kyang mtho ris kyi lhar skye zhing longs spyod dam pa dang ldan par 'gyur ro/ /rigs kyi bu de ltar de bzhin du de bzhin gshegs pa yang sngon byang chub sems dpa'i tshe na bdag dang gzhan gyi lus la nyon mongs pa'i nad rnam pa tshad med pa snyed yod par mkhyen nas ting nge 'dzin gyi spos chus ni lus bkrus/ bden pa'i chos dang / byams pa chen po dang / snying rje chen po'i chus khrus byas pa khrel ba dang 'dzem pa'i gos gyon nas phyogs bcu'i sangs rgyas bcom ldan 'das thams cad kyis bsam gtan dang / snyoms par 'jug pa dang / brtson 'grus dang / thabs dang / shes rab dang / byams pa dang / thugs rjes rjes su bzung ste thams cad kyis gsung 'thun par 'di skad du skyes bu chen po 'di ni bsod nams dang / ye shes chen po'i tshogs kyis yongs su brgyan pa'i snod du gyur pas rnam par thar pa gsum dang mi 'jigs pa bzhi dang / de bzhin gshegs pa'i stobs bcu dang / sangs rgyas kyi chos ma 'dres pa bcwa brgyad kyi snod du gyur pa'o/ /bla na med pa thams cad mkhyen pa'i ye shes thob pa'i gnas byams pa chen 60.145b po dang / snying rje chen po yongs su rdzogs pa/ sems can thams cad la phan pa dang bde ba'i don byed pa la spro ba/ sangs rgyas rin po che tshol ba'i tshong dpon du gyur pa/ 'khor bas sdug bsngal ba'i sems can yongs su sgrol ba sems can la mya ngan las 'da' ba'i bde ba chen po rab tu stobs pa yin te/ bdag cag sangs rgyas bcom ldan 'das thams cad bden pa'i gsung gis ci dang ci 'dod pa de dag thams cad byin te/ yang dag par rdzogs pa'i byang chub tu mngon par rdzogs par sangs rgyas nas bla na med pa'i chos thob nas chos kyi rgyal po chen por gyur te/ nga de'i tshe na bsod nams dang ye shes kyi tshogs la brten te shin du brtan pa'i brtson 'grus kyis 'phags pa'i bden pa bzhi yang dag pa ji lta ba bzhin du chud nas bla na med pa yang dag par rdzogs pa'i byang chub tu mngon par sangs rgyas so/ /rigs kyi bu ji ltar 'khor los sgyur ba'i rgyal po gling bzhi la dbang zhing dbang sgyur ba bzhin du de bzhin gshegs pa yang bsam gtan bzhi dang / gzugs med pa'i ting nge 'dzin bzhi dang / tshangs pa'i gnas bzhi dang so so yang dag par rig pa bzhi dang / 'phags pa'i bden pa bzhi dang / 'jigs pa med pa bzhi dang / de bzhin gshegs pa'i stobs bcu dang / sangs rgyas kyi chos ma 'dres pa bcwa brgyad dang / rnam pa thams cad mkhyen pa'i ye shes la dbang du gyur to/ /ji ltar 'khor los sgyur ba'i rgyal po rin po che sna bdun dang ldan pa ltar/ de bzhin gshegs pa yang byang chub kyi yan lag rnam pa bdun dang ldan no/ /ji ltar 'khor los sgyur ba'i rgyal po bu stong dang ldan te thams cad dpa' zhing rtul phod pa/ mdzes shing yid du 'ong bas pha rol po'i dgra thams cad thul ba bzhin du de bzhin gshegs pa yang dang por 'phags pa cang shes kau di n+ya nas tha mar tshe dang ldan pa rab tu bzang po dang / 60.146a rab de la sogs pa nyan thos kyi 'khor chen po sangs rgyas kyi thugs las byung ba/ bcom ldan 'das kyi gsung las skyes pa/ bstan pa'i chos las skyes pa/ sangs rgyas kyi chos thob pa dag yod de/ zag pa yongs su zad pa'i phyir dpa' la rtsal che ba zhes bya/ tshangs pa'i gnas bzhi dang ldan pas mdzes shing yid du 'ong ba zhes bya/ lha'i bdud dang mu stegs can thul bas phas rgol ba'i dgra thul ba zhes bya'o/ /ji ltar 'khor los sgyur ba'i rgyal po gling phran brgyad khri bzhi stong 'dul zhing ston pa bzhin du/ de bzhin gshegs pa yang 'dzam bu'i gling bye ba phrag brgya dang / nub kyi ban glang spyod bye ba phrag brgya dang / shar gyi lus 'phags bye ba phrag brgya dang / byang gi sgra mi snyan bye ba phrag brgya dang / rgya mtsho chen po bye ba phrag brgya dang / ri rab lhun po bye ba phrag brgya dang / rgyal chen ris bzhi bye ba phrag brgya dang / 'du shes med 'du shes med min skye mched bye ba phrag brgya dang / khor yug chen po bye ba phrag brgya de dag sangs rgyas kyi zhing shin du rgya che ba gcig tu gyur par gsung gis dbang sgyur ba la mnga' brnyes par gyur to/ /rigs kyi bu nga 'di ltar sangs rgyas kyi 'khor lo bcu pa 'di dang ldan te/ 'khor lo de'i dbang gis yang dag pa ji lta ba bzhin du bdag dang gzhan gyi lus kyi zag pa thams cad yongs su zad pa mkhyen nas/ sems can tshad med pa la phan pa dang bde ba'i don gyis 'jigs pa med pa la bde bar bkod do/ /'jigs pa med pas nga ni drang srong chen po'i gnas su bzhugs te/ sangs rgyas kyi 'khor lo bskor nas lha dang bdud du bcas pa'i mu stegs can log par smra ba thams cad btul te 'khor mang po'i nang du seng ge'i sgra sgrogs so/ /rigs kyi bu nga ni de ltar sangs rgyas kyi 'khor lo bcu pa 'di dag dang ldan te/ sngon gyi smon lam gyi shugs kyis sangs rgyas kyi zhing rnyog pa lnga 60.146b can gyi sems can thams cad rnam par dkar ba'i chos rnams nyams pa/ 'phags pa'i nor bdun gyis brel ba/ mkhas pa dag dang ring du gyur pa/ rtag pa dang chad pa'i dra bas kun nas klags shing zil gyis non pa/ ngan song du 'gro ba'i shing rta la spro zhing dga' ba skyed pa/ phyi ma'i sdug bsngal gyis mi 'jigs pa/ rtag tu kun nas khebs pa'i ma rig pa'i mun par gnas pa la dad pa/ mi dge ba bcu'i las kyi lam rdzogs par byed pa/ mtshams med pa lnga'i las byed pa/ dam pa'i chos la skur cing 'phags pa la dbang za ba/ dge ba'i chos thams cad ring du spong ba/ mi dge ba'i chos rdzogs par byed pa 'dir bzhugs te/ nga ni sangs rgyas kyi 'khor lo rnam pa bcu po 'di dang ldan pas 'jigs pa med par bde bar gnas so/ /'jigs pa med pas nga ni drang srong chen po'i gnas su bzhugs te/ sangs rgyas kyi 'khor lo bskor nas lha dang bdud du bcas pa'i mu stegs can log par smra ba thams cad btul to/ /sems can thams cad kyi rigs la rdo rje ltar sra ba'i nyon mongs pa thams cad bcom nas ci dang cis 'dul ba bzhin du snod du gyur pa'i sems can thams cad theg pa gsum las phyir mi ldog par rnam par bzhag go/ /de nas 'khor de'i nang nas 'dul ba'i byang chub sems dpa' sems dpa' chen po thams cad dang / nyan thos kyi dge 'dun thams cad dang / lha dang klu'i 'khor thams cad nas/ lus srul po dang / mi dang mi ma yin pa la sogs pa'i bar du 'khor mang po thams cad rab tu dga' nas/ skad 'thun par legs so zhes smras te/ spos kyi char chen po rab tu phab bo/ /me tog gi char chen po yang rab tu phab bo/ /rin po che'i char chen po yang rab tu phab bo/ /na bza'i char chen po yang rab tu phab ste/ brgya stong sa chen po 'di yang rab tu g.yos so/ /de ltar 60.147a sangs rgyas kyi 'khor lo rnam pa bcu po 'di bshad pa'i tshe/ 'khor gyi dkyil 'khor de'i nang na byang chub sems dpa' sems dpa' chen po bye ba khrag khrig brgyad bcu rtsa bzhi snyed kyis mi skye ba'i chos la bzod pa thob bo/ /gzhan yang byang chub sems dpa' sems dpa' chen po tshad med pa snyed kyis gzungs dang / ting nge 'dzin dang / gzhan yang sems can tshad med grangs med pa snyed kyis bla na med pa yang dag par rdzogs pa'i byang chub tu sems bskyed de phyir mi ldog par gyur to/ /gzhan yang sems can tshad med grangs med pa snyed kyis 'bras bu thob par gyur to/ /'dus pa chen po las byang chub sems dpa' sems dpa' chen po'i sa'i snying po 'khor lo bcu pa zhes bya ba las 'khor lo bcu'i le'u ste gnyis so// // 'dus pa chen po las byang chub sems dpa' sa'i snying po 'khor lo bcu pa zhes bya ba theg pa chen po'i mdo/ bam po gsum pa/ de nas 'khor gyi dkyil 'khor de'i nang na tshangs pa chen po lha'i snying po zhes bya ba dge ba'i rtsa ba shin du bskyed pa/ sa bcu non pa byang chub sems dpa' sems dpa' chen po'i yon tan dang ldan pa zhig stan las langs nas thal mo sbyar te bcom ldan 'das kyi zhabs la spyi bos phyag 'tshal nas tshigs su bcad pa 'di dag smras so/ /shes rab rgya mtsho yon tan mdzod can la/ /bdag gis the tsom zhu zhing gsol bar bgyi/ /shes rab rgya mtsho thugs rjes skabs phye ste/ /bdag gi rtog pa'i the tsom bsal bar gsol/ /bdag cag skom gyis shin du gdungs pa ltar/ /yon tan snying po mchog gi chos ro dang / /phul du gyur pa'i don dam chos kyi ro/ /'khor du gyur pa thams cad thos par smon/ /bcom ldan 'das kyis tshangs pa chen po lha'i snying po la 'di skad ces bka' stsal to/ /khyod kyis de bzhin gshegs pa la ci dang ci 'dod pa dris shig dang / ngas dris pa de dang de'i 60.147b lung bstan pas khyod kyi sems rangs par bya'o/ /tshangs pa chen pos gsol pa/ bcom ldan 'das de ltar bgyi'o zhes gsol nas tshigs su bcad de zhus pa/ shes rab ldan zhing ting 'dzin rab bsgoms te/ /bdag med pa la bde bar gnas pa'i rnams/ /'on te dam pa'i don la gnas bgyi 'am/ /'on te 'khor ba'i 'khor bar gnas par bgyi/ /nyin mtshan chos mchog dam pa de dag la/ /'don cing goms par bgyid de rtsol ba dag /'on te nyon mongs mtsho las rgal bgyi 'am/ /'on tam ngan song dag tu ltung bar bgyi/ /bsod nams byed la shin du 'bad rtsol ba/ /nges par mya ngan 'da' la gzhol 'gyur ram/ /'on te 'khor ba'i 'khor bar gnas 'gyur ram/ /'on te ngan song dag tu ltung bar 'gyur/ /shes rab ldan pa'i rgyal thabs dbang bskur te/ /'khor lo rnam pa bcu dang ldan pa dag /'on te 'khor ba'i nang du 'bying 'gyur ram/ /'on te sangs rgyas 'bras bu thob par 'gyur/ /kun nas nyon mongs pas ni klags pa'i sems/ /nyon mongs mang pos 'khrul par gyur pa dag /ji ltar sems ni yongs su dag par sbyang / /sgom dang 'don pa'i las dag ji ltar bgyi/ /de nas bcom ldan 'das kyis tshangs pa chen po lha'i snying po de la 'di skad ces bka' stsal to/ /legs so/ /don 'di dag legs par zhu bar spobs pa legs te/ khyod ni chos 'di dag la shin du nan tan byed pa'o/ /khyod ni spyod pa thams cad yongs su rdzogs pa'o/ /khyod ni sngon 'das pa'i sangs rgyas bcom ldan 'das klung gang gA'i bye ma snyed la sgo gsum yongs su sbyang pa'o/ /dam pa'i chos spel ba'o/ /dkon mchog gsum gyi gdung 'tshob pa ste/ da yang sems can tshad med pa la phan pa dang bde ba'i don gyi phyir de bzhin gshegs pa la don zab mo 'di dag dris pa legs so/ /rigs kyi bu 'di lta ste/ 60.148a shes pa brda sprod pa chen po gnas pa dang / spyad par mi bya ba'i chos yod de/ sngon 'das pa'i sangs rgyas bcom ldan 'das thams cad kyis kyang sems can thams cad yongs su smin par bya ba dang / 'khor ba las skyo bar bya ba dang / las dang nyon mongs pa yongs su bcad pa dang / theg pa gsum myur du yongs su rdzogs par bya ba'i phyir shes pa brda sprod pa chen po gnas pa dang / spyad par mi bya ba'i chos 'di gsungs so/ /da ltar phyogs bcu na bzhugs pa'i sangs rgyas bcom ldan 'das thams cad kyis kyang sems can thams cad yongs su smin par bya ba dang / 'khor ba las skyo bar bya ba dang / las dang nyon mongs pa yongs su bcad pa dang / theg pa gsum myur du yongs su rdzogs par bya ba'i phyir shes pa brda sprod pa chen po gnas pa dang / spyad par mi bya ba'i chos 'di la gnas pa gsung ngo / /ma 'ongs pa'i sangs rgyas bcom ldan 'das thams cad kyang sems can thams cad yongs su smin par bya ba dang / 'khor ba las skyo bar bya ba dang / las dang nyon mongs pa yongs su gcad par bya ba dang / theg pa gsum myur du yongs su rdzogs par bya ba'i phyir shes pa brda sprod pa chen po gnas pa dang / spyad par mi bya ba'i chos 'di la gnas par bya ba 'di dag gsung bar 'gyur ro/ /khyod kyis sngon 'das pa'i de bzhin gshegs pa rnams las shes pa brda sprod pa chen po gnas pa dang / spyad par mi bya ba'i chos 'di la gnas par bya ba 'di rdzogs par thos pa de ngas kyang sems can thams cad yongs su smin par bya ba dang / 'khor ba las skyo bar bya ba dang / las dang nyon mongs pa yongs su gcad pa dang / theg pa gsum myur du yongs su rdzogs par bya ba'i phyir shes pa brda sprod pa chen po gnas pa dang / spyad par mi bya ba'i chos 'di la gnas par bya ba 'di la bstan par byas/ de bas na skyes bu dam pa khyod kyis legs par nyon la yid 60.148b la zung shig dang bstan par bya'o/ /bcom ldan 'das de ltar bgyi'o zhes gsol nas/ tshangs pa chen po lha'i snying po bcom ldan 'das la phyir nyan to/ /bcom ldan 'das kyis tshangs pa chen po lha'i snying po la bka' stsal pa/ gnas pa dang spyad par mi bya ba'i chos rnam pa bcu yod de/ gal te rnal 'byor can dag spyod pa ngan pa 'di las 'ga' tsam gyi rjes su zhugs na yang 'dod pa'i khams kyi dge ba'i rtsa ba tsam yang yongs su mi 'grub po/[ ]/ ji ste sngar grub na yang de ma thag tu phyir stor cing nyams par gyur na gzugs dang / gzugs med pa'i ting nge 'dzin nas theg pa gsum dang theg pa gcig gi bar du thob par 'gyur ba lta ci smos/ bcu gang zhe na/ 'di lta ste/ 'jig rten na kha cig ting nge 'dzin sgom 'dod kyang 'tsho ba'i yo byad kyis brel bas tshol ba'i rkyen gyis nyon mongs pa dang / kha cig ni ting nge 'dzin sgom 'dod kyang tshul khrims nyams shing kha na ma tho ba mang po byed pa dang / kha cig ni ting nge 'dzin sgom 'dod kyang phyin ci log tu lta zhing 'jig rten gyi ltas bzang ngan la chags te lus dang sems ma dul ba dang / kha cig ni ting nge 'dzin sgom 'dod kyang sems g.yo zhing rgod pas 'phags pa la ma gzhol te dbang po rgod pa dang / kha cig ni ting nge 'dzin sgom 'dod kyang phra ma byed pa la dga' bas dbyen byed pa dang / kha cig ni ting nge 'dzin sgom 'dod kyang ngag rtsub pos 'phags pa la smod cing dbang za ba dang / kha cig ni ting nge 'dzin sgom 'dod kyang tshig kyal pa dang / brdzun du smra ba dang / kha cig ni ting nge 'dzin sgom 'dod kyang 'dod chags dang / phrag dog gis gzhan gyi khe dang / sti stang dang / rnyed pa la mi dga' ba dang / kha cig ni ting nge 'dzin sgom 'dod kyang zhe sdang dang bcas pas sems can la gnod sems skyes pa dang / kha cig ni ting nge 'dzin sgom 'dod kyang log par lta ba dang bcas pas rgyu dang 'bras bu med par lta ba'o/ /tshangs pa chen po de ltar 60.149a shes par bya ste 'di dag ni gnas pa dang spyad par mi bya ba'i chos rnam pa bcu zhes bya'o/ /gal te ting nge 'dzin sgom pa dag spyod pa ngan pa 'di dag las 'ga' tsam gyi rjes su zhugs na 'dod pa'i khams kyi dge ba yang yongs su mi 'grub bo/ /ji ste sngar grub na yang de ma thag tu stor cing nyams par 'gyur na gzugs dang gzugs med pa'i ting nge 'dzin dang / theg pa gsum dang / gcig thob par 'gyur ba lta ci smos/ tshangs pa chen po gzhan yang gnas pa dang spyad par myi bya ba'i chos rnam pa bcu yod de/ ting nge 'dzin sgom pa dag spyod pa ngan pa 'di dag las 'ga' zhig dang ldan na ting nge 'dzin yongs su mi 'grub po/ /ji ste sngar grub na yang de ma thag tu stor cing nyams par 'gyur ro/ /bcu gang zhe na/ 'di lta ste/ las su bya ba'i dngos po la dga' zhing chags pa dang bre mo'i gtam la dga' zhing chags pa dang / gnyid kyis log pa la dga' zhing chags pa dang / zang zing tshol ba la dga' zhing chags pa dang / gzugs bzang po la dga' zhing chags pa dang / sgra snyan pa la dga' zhing chags pa dang / dri zhim po la dga' zhing chags pa dang / ro zhim po la dga' zhing chags pa dang / reg bya 'jam po la dga' zhing chags pa dang / rtog pa dang dpyod pa la dga' zhing chags pa'o/ /tshangs pa chen po de ltar shes par bya ste/ gnas pa dang spyad par mi bya ba'i chos rnam pa bcu po de ting nge 'dzin sgom pa dag spyod pa ngan pa 'di las 'ga' zhig dang ldan na yang ting nge 'dzin dag yongs su mi 'grub po/ /ji ste sngar grub na yang de ma thag tu stor cing nyams par 'gyur ro/ /gal te ting nge 'dzin ma bsgrubs na dge ba'i tshogs gzhan ci bsags kyang de ni don du mi 'gyur te/ gang bdag gi longs spyod dang / dang bas sbyin pa bsgrub pa'i phyir sems dang sems las byung ba'i chos ngan pa skye bar 'gyur ro/ /de'i rkyen 60.149b gyis rgyal po dang / blon po chen po'i khrims dang yang 'gal bar byed de/ kha cig la ni gshe shing spyo ba yang byed do/ /kha cig la ni lcag gis gzhu ba dang / kha cig la ni lus kyi yan lag dang nying lag gcod cing gcod par yang byed do/ /de'i rgyu de'i rkyen gyis nad drag pos 'debs shing yun ring por sdug bsngal myong ba dang / tshe thung ba dang / 'chi 'phos nas kyang ngan song gsum gang yang rung ba cig gi nang du skye ba nas mtshams med pa'i sems can dmyal ba'i bar du ltung bar 'gyur te/ ku drA ka dang / a ra da ka dang / de sha ku pa la ki dang / lhas sbyin la sogs pa dang 'dra bar bsam gtan las nyams pa dang / mtshams med pa'i sems can dmyal ba'i bar du ltung zhing rnam pa tshad med pa snyed kyi sdug bsngal chen po mi bzod pa kun myong bar 'gyur ro/ /de'i tshe bcom ldan 'das kyis tshe dang ldan pa cang shes kau di n+ya la 'di skad ces bka' stsal to/ /khyod dang bas mthar gnas shing ting nge 'dzin sgom pa'i dge slong dag gnas khang mchog dag na gnas shing mal cha mchog dang / kha zas mchog la spyod cing dge 'dun gyi las thams cad mi byed par gnang ngo / /de ci'i phyir zhe na/ ting nge 'dzin sgom pa dag gal te 'tsho ba'i yo byad kyis brel bar gyur na sems dang sems las byung ba'i chos ngan pa skye zhing ting nge 'dzin thams cad mi 'grub pa nas mtshams med pa'i sems can dmyal ba'i bar du ltung zhing mi bzad pa'i sdug bsngal chen po rnam pa tshad med pa snyed myong bar 'gyur ro/ /ting nge 'dzin sgom pa dag gal te 'tsho ba'i yo byad dang ldan na ting nge 'dzin mang po ma grub pa yang grub pa dang / sngar grub pa dag kyang mi nyams so/ /de'i dbang gis mi dge ba'i chos thams cad mi skye ba nas gzhung de bzhin du rgyas par mi dge ba'i rtog pa dang dpyod pa'i bar du mi skye ba la mtho ris kyi lhar skye ba nas mya ngan 'da' ba'i bar du 'thob par 'gyur ro/ /ting nge 'dzin sgom pa dag 60.150a gal te ting nge 'dzin mang po ma grub na nam gyi stod dang / nam gyi smad la mi nyal bar byas te brtson 'grus su bslab cing bsgom pa dang / 'du 'dzi yongs su spangs te 'dod pa nyung zhing chog shes par bya ba dang / ci la yang mi chags pa dang 'dod chags dang / zhe sdang dang / khong khro ba dang / 'chab pa dang / 'khrug pa dang / 'tshe ba dang / nga rgyal dang / rgyags pa dang / phrag dog dang / 'jungs pa dang / phra ma dang / ngag rtsub po dang / brdzun dang / 'jig rten gyi rtsod pa dang / bag med pa thams cad yongs su spong ngo / /gang de ltar nan tan byed pa de ni brgya byin dang / tshangs pa dang / 'jig rten skyong ba bzhi dang / 'khor los sgyur ba'i rgyal po la sogs pas bstod pa dang / bsngags pa dang / phyag dang / sti stang dang / rim gro dang / bsnyen bkur la sogs pa dang / sbyin pa bye ba khrag khrig brgya stong snyed kyang blang bar bya na/ rgyal rigs dang / bram ze dang / rje'u rigs la sogs pa'i mchod pa len pa lta ci smos/ ting nge 'dzin ma thob pa dag kyang de dag gi bstod pa dang / bsngags pa dang / phyag dang bkur sti dang / rim gro dang / bsnyen bkur dang / sbyin pa dang / mchod pa bdag gir byed du dbang na ting nge 'dzin thob pa lta smos kyang ci dgos/ de nas bcom ldan 'das kyis tshigs su bcad de bka' stsal pa/ ting 'dzin bsgoms pas the tsom gcod 'gyur te/ /de ma gtogs par gzhan gyis nus ma yin/ /de bas ting 'dzin bsgom pa mchog yin gyis/ /mkhas pa dag gis de la mchod par bya/ /de nas tshangs pa chen po lha'i snying pos 'di skad ces gsol to/ /btsun pa bcom ldan 'das sangs rgyas kyi bstan pa la rab tu byung ba dag gal te rgyal rigs sam/ blon po chen po 'am/ dbang pos lcag dang dbyug pa la sogs pas gzhus sam/ brdegs sam/ gal te btson rar bcug gam/ spyos sam brgyad dam/ yan lag gtubs sam/ srog dang phral te bkum na de ci rigs 60.150b pa lags sam/ 'on te rigs par ma lags bcom ldan 'das kyis tshangs pa chen po lha'i snying po la 'di skad ces bka' stsal to/ /rigs kyi bu sems can gang zhig nga'i bstan pa la rab tu byung nas skra dang kha spu bregs te/ ngur smrig gi tshal bu gyon na tshul khrims srung ngam/ tshul khrims nyams sam/ tshul khrims med kyang rung ste/ de la lha dang / mi dang / lha ma yin la sogs pa thams cad kyis kyang khyim pa'i chos nyid dang sbyar du yang mi gnang na/ de la lcag dang dbyig pa la sogs pas lus la gzhu zhing 'tshog pa dang / btson rar gzhug pa dang / gshe ba dang / spyo ba dang / lus kyi yan lag gtub pa dang / 'tsho ba'i dbang po dang phral ba chos ma yin pa dang sbyor ba lta ci smos/ de ci'i phyir zhe na/ tshul khrims srung zhing mang du thos pa dang ldan pa lta zhog la/ nga'i bstan pa la rab tu byung nas tshul khrims nyams te mi dge ba'i chos spyod pas nang rul cing mi gtsang bas gang ba'i srin kwa lwa dang 'dra ba/ dge sbyong ma yin par dge sbyong du khas 'che ba/ tshangs par spyod pa ma yin par tshangs par spyod par khas 'che ba/ nyon mongs pa rnam pa sna tshogs las pham pa/ zhig pa/ khas bub pa de lta bu'i tshul khrims nyams pa'i dge slong ngan pa yang lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang / mi ma yin pa la sogs pa thams cad kyi ston pa dang / 'dren par 'gyur te/ yon tan rin po che dpag tu med pa'i gter du 'gyur ro/ /gzhan yang rigs kyi bu nga'i bstan pa la rab tu byung ba dag tshul khrims nyams kyang sems can dag gzugs mthong ba tsam gyis lhag pa'i bsam pa rnam pa bcu skye bas na yon tan rin po che'i phung po dpag tu med pa bcu 'thob par 'gyur ro/ /bcu gang zhe na/ 60.151a 'di lta ste nga'i bstan pa la rab tu byung ba dag tshul khrims nyams mod kyi/ sems can dag gis mthong bar gyur na sangs rgyas rjes su dran pas bkur sti dang bcas pas dad cing gus pa'i lhag pa'i bsam pa skye'o/ /de'i rgyu de'i rkyen gyis mu stegs can gyi ston pa dang / de'i gtsug lag dang / de'i 'khor la nam du 'ang mi phyogs pa nas 'jigs pa dang bral ba yongs su mya ngan las 'das pa'i grong khyer chen po la 'jug pa'i bar du 'gyur ro/ /la las mthong nas 'phags pa'i tshul khrims rjes su dran pa la lhag pa'i bsam pa skye'o/ /de'i rgyu de'i rkyen gyis srog gcod pa yongs su spong ba dang / ma byin par len pa yongs su spong ba dang / 'dod pas log par g.yem pa yongs su spong ba dang / brdzun du smra ba yongs su spong ba dang / bag med pa'i gnas smyo ba'i khu ba chang la sogs pa 'thung ba yongs su spong ba nas 'jigs pa dang bral ba yongs su mya ngan las 'da' ba'i grong khyer chen po la 'jug pa'i bar du 'gyur ro/ /la las mthong nas sbyin pa rjes su dran pa la lhag pa'i bsam pa skye'o/ /de'i rgyu de'i rkyen gyi longs spyod chen po dang ldan zhing yang dag pa dang yang dag pa'i spyod pa can la mchod pa dang / bsnyen bkur byed pa nas 'jigs pa dang bral ba yongs su mya ngan las 'da' ba'i grong khyer chen po la 'jug pa'i bar du 'gyur ro/ /la las mthong nas ngang des pa'i bzod pa rjes su dran pa la lhag pa'i bsam pa skye'o/ /de'i rgyu de'i rkyen gyis phra ma yongs su spong ba dang / ngag rtsub po dang / tshig kyal pa dang zhe sdang yongs su spong ba nas 'jigs pa dang bral ba yongs su mya ngan las 'das pa'i grong khyer chen po la 'jug pa'i bar du 'gyur ro/ /la las mthong nas rab tu 'byung zhing brtson 'grus la nan tan bya bar rjes su dran pa la lhag pa'i 60.151b bsam pa skye'o/ /de'i rgyu de'i rkyen gyis khyim rab tu spong zhing khyim ma yin pa'i chos len te shin du 'bad pa'i brtson 'grus kyis spyod pa'i mchog nan tan byed pa nas 'jigs pa med pa'i yongs su mya ngan las 'da' ba'i grong khyer chen po la 'jug pa'i bar du 'gyur ro/ /la las mthong nas 'khrug pa'i sems yongs su spong zhing bsam gtan la mnyam par gzhog pa rjes su dran pa la lhag pa'i bsam pa skye'o/ /de'i rgyu de'i rkyen gyis ri dang / tshal dang / bas mtha' dgon pa la mos shing nyin mtshan du ting nge 'dzin bsgom pa la brtson 'grus rtsom pa nas 'jigs pa med pa'i yongs su mya ngan las 'da' ba'i grong khyer chen po la 'jug pa'i bar du 'gyur ro/ /la las mthong nas shes rab rjes su dran pa la lhag pa'i bsam pa skye'o/ /de'i rgyu de'i rkyen gyis dam pa'i chos nyan pa dang / klog pa dang / 'don pa la dga' zhing spro ba nas yongs su mya ngan las 'das pa'i grong khyer chen po la 'jug pa'i bar du 'gyur ro/ /la las mthong nas yang dag par 'byung ba dge ba'i rtsa ba sngon bskyed par rjes su dran pa la lhag pa'i bsam pa skye ba nas 'dzum bzhin du smra ba dang / spro bzhin du gtam zer ba dang / rkang pa la phyag 'tshal ba'i bar du byed par 'gyur ro/ /de'i rgyu de'i rkyen gyis rigs che zhing mtho ba dang / btsun pa'i rigs su skye zhing sems can tshad med pa kun gyis mthong na dga' ba nas 'jigs pa dang bral ba yongs su mya ngan las 'das pa'i grong khyer chen po la 'jug pa'i bar du 'gyur ro/ /rigs kyi bu nga'i bstan pa la rab tu byung ba dag tshul khrims nyams kyang sems can dag gzugs dang cha lugs mthong ba tsam gyis lhag pa'i bsam pa rnam pa 'di bcu skye ste/ yon tan rin po che'i phung po tshad med pa thob par 'gyur ro/ /de bas na rgyal po dang / blon po chen po dang / dbang po la sogs pas 60.152a de la lcag dang / dbyig pa la sogs pas gzhu zhing 'tshog pa dang / btson rar gzhug pa dang / gshe zhing spyo ba dang / lus kyi yan lag gtub pa dang / 'tsho ba'i dbang po dang phral ba la sogs pa bya bar mi rigs so/ gzhan yang tshangs pa chen po nga la skyabs su song ste/ rab tu byung ba dag tshul khrims nyams te mi dge ba'i chos spyod pa nang rul cing mi gtsang bas gang ba'i srin kwa lwa dang 'dra ba/ dge sbyong ma yin par dge sbyong du khas 'che ba/ tshangs par spyod pa ma yin par tshangs par spyod par khas 'che ba/ nyon mongs pa rnam pa mang po las pham pa/ rul ba/ khas bub pa lta bu'i dge slong tshul khrims nyams te mi dge ba spyod mod kyi lha dang / klu dang / gnod sbyin dang dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang mi ma yin pa la sogs pa thams cad kyi ston pa dang / 'dren pa'i dge ba'i bshes gnyen byed cing yon tan dpag tu med pa'i gter du 'gyur ro/ /de ltar dge slong de chos kyi snod ma yin mod kyi/ skra dang kha spu bregs te/ gos ngur smrig gyon nas cha lugs dang spyod lam 'phags pa rnams dang 'thun te/ de mthong ba tsam gyis sems can tshad med pa rnams dge ba'i rtsa ba rnam pa sna tshogs 'phel zhing skye bar 'gyur ro/ /gzhan yang sems can tshad med pa rnams mtho ris kyi lhar skye ba dang / mya ngan las 'da' ba'i lam la 'dzud par 'gyur te/ de bas na nga la skyabs su song ste rab tu byung ba dag tshul khrims srung ngam/ tshul khrims nyams sam/ tshul khrims ma nyams kyang rung ste/ 'khor los sgyur ba'i rgyal po 'am/ rgyal po gzhan nam/ blon po la sogs pas khyim pa'i chos nyid dang sbyor du yang ma gnang na/ lcag dang dbyig pa la sogs pas gzhu ba dang / 'tshog pa dang / btson rar gzhug pa dang / gshe zhing spyo ba dang / lus kyi yan lag dang nying lag gcod cing gtub pa dang / 60.152b 'tsho ba'i dbang po dang phral ba la sogs pa chos ma yin pa gzhan lta ci smos/ tshangs pa chen po de ltar tshul khrims nyams shing sdig pa spyod pa'i dge slong de ngas bstan pa'i 'dul ba las mi ro lta bu'o zhes gsungs mod kyi rab tu byung ba dang / tshul khrims dang / yon tan lhag ma'i mthu yod do/ /dper na khyu mchog gam/ gla ba lta bu shi ste rnam par shes pa dang bral nas byol song gi nang na ro yin mod kyi/ khyu mchog la gi'u wang yod pa dang / gla ba la gla rtsi yod pas sems can tshad med dpag tu med pa'i phan pa dang bde ba'i don chen por 'gyur ba bzhin du tshul khrims nyams pa'i dge slong de yang ngas bstan pa'i 'dul ba las mi ro lta bu'o zhes bya mod kyi/ rab tu byung ba dang / tshul khrims dang / yon tan lhag ma'i mthus kyang sems can tshad med dpag tu med pa la phan pa dang bde ba'i don chen por 'gyur ro/ /tshangs pa chen po 'di lta ste/ tshong pa dag kyang rgya mtsho chan por zhugs nas rigs gcig pa'i sems can tshad med pa dag bsad de mig phyung nas mig gi 'bras bu de dang / brtan zhes bya ba'i 'bras bu dang lhan cig sbyar na mig sman rin po cher 'gyur ro/ /sems can gang long ba mig med pa mngal nas phyung nas dmus long du gyur pa dag gi mig tu rin po che'i mig sman des byugs na mig nad thams cad dang bral te mig rno zhing gsal bar 'gyur ro/ /de bzhin du tshul khrims nyams pa'i dge slong yang ngas bstan pa'i 'dul ba las mi ro lta bu'o zhes bya mod kyi rab tu byung ba'i spyod lam dang / cha lugs yod pas sems can tshad med pa dag gis skad cig mthong ba tsam gyis kyang rnam par dag pa'i shes rab kyi mig thob par 'gyur na pha rol po gzhan la dam pa'i chos ston nus pa lta ci smos/ tshangs pa chen po 'di lta ste/ bdug spos bsregs na spos nyid tshig ste med par song yang dri bsung gis gzhan la bro bar byed do/ /de bzhin 60.153a du tshul khrims nyams pa'i dge slong de yang tshul khrims nyams pas bsod nams kyi zhing gshin pa ma yin te nyin mtshan du dad pas byin pas bsregs te tshe 'phos nas ngan song gsum du lhung mod kyi sems can tshad med dpag tu med pa'i phan pa dang bde ba'i don du 'gyur te/ mtho ris kyi lhar skye ba dang mya ngan las 'da' ba'i bsrang tshor bar byed do/ /de bas na tshangs pa chen po de ltar tshul khrims nyams shing sdig pa spyod pa'i dge slong la khyim pa thams cad kyis sti stang dang bcas pas mchod pa dang / rim gro bya'i rab tu byung ba de la lcag dang dbyug pas gzhu zhing 'tshog pa dang / btson rar gzhug pa dang / gshe zhing spyo ba dang / lus kyi yan lag gtub pa dang / 'tsho ba'i dbang po dang dbral du ngas ma gnang ngo / /de dag yongs su dag pa'i dge 'dun gyi nang du gso sbyin bya ba dang / tshul du 'jug pa dang / tshul nas byung ba'i tshe bskrad pa dang / phyogs bzhi'i dge 'dun gyi rnyed pa dang / longs spyod dang / bza' ba dang / btung ba dang / 'tsho ba'i yo byad la sogs pa thams cad la spyod du mi dbang ste dge sbyong gis 'dul ba'i las byed pa thams cad kyi nang du 'ong du mi gnang bar zad kyi de la gzhu ba dang / 'tshog pa dang / 'ching ba dang / srog gi dbang po la sogs pa dang dbral bar ni ma gnang ngo / /de nas bcom ldan 'das kyis tshigs su bcad de bka' stsal pa/ tsam pa ka'i me tog rnyis gyur kyang / /me tog rnam pa gzhan pas shin du lhag /dge slong tshul khrims nyams shing sdig spyod kyang / /mu stegs can dag thams cad kun pas mchog /gzhan yang tshangs pa chen po mtshams med pa'i kha na ma tho ba chen po'i las rnam pa lnga yod do/ /lnga gang zhe na/ ched du bsams te pha bsad pa dang / ched du bsams te ma bsad pa dang / ched du bsams te dgra bcom pa bsad pa dang / log par lta bas nyan thos kyi dge 'dun gyi dbyen byas pa dang / ngan sems kyis sangs rgyas kyi sku la khrag phyung ba'o/ /rnam pa 60.153b 'di lnga ni mtshams med pa'i kha na ma tho ba chen po'i las shes bya ste/ gang zag gang zhig rnam pa 'di lnga las gcig tsam byas na rab tu 'byung zhing bsnyen par rdzogs su mi rung ngo / /gal te rab tu phyung ngam bsnyen par rdzogs pa byin na de'i slob dpon de nyes pa dang bcas pa yin pas dge 'dun gyi nang nas bskrad par bya'o/ /de ltar gang zag de rab tu byung nas spyod lam dang cha lugs yod pa'i phyir de la yang lcag dang dbyig pas gzhu zhing 'tshog pa dang / btson rar gzhug pa dang / gshe zhing spyo ba dang / lus kyi yan lag gtub pa dang / srog gi dbang po dang dbral du mi gnang ngo / /gzhan yang mtshams med pa'i kha na ma tho ba chen po'i las dang nye ba rnam pa bzhi yod de/ bzhi gang zhe na/ mi dge ba'i sems kyis rang sangs rgyas bsad pa ste/ de yang srog gcod pa'i nang na kha na ma tho ba chen po'i las yin te nyes pa'i rtsa ba yin no/ /dgra bcom pa'i dge slong ma la mi tshangs par spyod pa ste/ 'dod pas log par g.yem pa'i nang na kha na ma tho ba chen po'i las yin pas nyes pa'i rtsa ba yin no/ /dad pas byin pa'i dkon mchog gsum gyi dkor nor la spyod pa ste/ ma byin par len pa'i nang na kha na ma tho ba chen po'i las yin pas nyes pa'i rtsa ba yin no/ /ngan par lta bas 'dum pa'i dge 'dun gyi dbyen byed pa ste/ brdzun du smra ba'i nang na kha na ma tho ba chen po'i las yin pas nyes pa'i rtsa ba yin no/ /gang zag gang zhig mtshams med pa'i kha na ma tho ba chen po'i las dang nye ba rnam pa bzhi po 'di las gcig tsam byas na rab tu byung zhing bsnyen par rdzogs su mi gnang ste/ gal te rab tu phyung ngam bsnyen par rdzogs pa byin na de'i slob dpon nyes pa dang bcas pa yin te nga'i bstan pa las bskrad par bya'o/ /de ltar gang zag de rab tu byung ngam bsnyen par rdzogs na spyod lam dang cha lugs dang ldan pas de la yang 60.154a lcag dang / dbyig pas gzhu zhing 'tshog pa dang / gshe ba dang spyo ba dang / btson rar gzhug pa dang / lus kyi yan lag gtub pa dang / 'tsho ba'i dbang po dang phral ba'i bar du byed du mi gnang ngo / /de ltar la la ni rtsa ba'i sdig pa yin la mtshams med pa ma yin pa yang yod do/ /la la ni mtshams med pa yin la rtsa ba'i sdig pa ma yin pa yang yod do/ /la la ni rtsa ba'i sdig kyang yin la mtshams med pa'i sdig kyang yin pa yod do/ /la la ni rtsa ba'i sdig kyang ma yin la mtshams med pa yang ma yin pa yod do/ /de la ji ltar na rtsa ba'i sdig kyang yin la mtshams med pa yang yin pa zhe na/ 'di lta ste nga'i bstan pa la rab du byung nas bsnyen par rdzogs pa la ched du bsams te bden pa mthong ba'i pha rol du phyin pa'i gang zag bsad pa ste/ 'di ni rtsa ba'i sdig kyang yin la mtshams med pa yang yin pas ngas bstan pa'i 'dul ba'i chos las myur du bskrad dgos so/ /de la ji ltar na rtsa ba'i sdig ni yin la mtshams med pa ma yin pa zhe na/ 'di lta ste nga'i bstan pa la rab tu byung nas bsnyen par rdzogs pa la ched du bsams te gang zag pha rol po gzhan gyi srog bcad pa dang / chung ngu na dug byin pas mngal na 'dug pa bsad pa ste/ de dag ni rtsa ba'i sdig yin la mtshams med pa ni ma yin no/ /gang zag de dge 'dun dang lhan cig tu gnas shing longs spyod dang / phyogs bzhi'i dge 'dun gyi nor la spyod du mi gnang ngo / /de la ji ltar na mtshams med pa ni yin la rtsa ba'i sdig ma yin pa gang zhe na/ 'di lta ste/ gang zag gang zhig dkon mchog gsum la skyabs su song ngam/ khrims lnga 'dzin tam/ khrims bcu 'dzin pa dag mtshams med pa lnga las gcig tsam byas pa dag ni mtshams med pa'i sdig yin la rtsa ba'i sdig ma yin pa zhes bya'o/ /gang zag de ni rab tu dbyung zhing bsnyen par rdzogs 60.154b su mi rung ste/ gal te rab tu phyung ngam bsnyen par rdzogs pa byin na/ de'i slob dpon sdig pa dang bcas pa yin te/ nga'i bstan pa las bskrad par bya'o/ /de la ji ltar na rtsa ba'i sdig kyang ma yin la mtshams med pa yang ma yin pa zhe na/ 'di lta ste/ gang zag gang zhig dkon mchog gsum la skyabs su song ngam/ khrims lnga bzung ba las sangs rgyas dang / chos dang / dge 'dun la the tsom za ba'i sems skye ste/ mu stegs can la skyabs su song nas ston pa'i slob dpon du 'dzin tam/ ltas su blta ba sna tshogs la ltas su 'dzin cing 'jig rten gyi lha rjed pa'o/ /gang zag gang zhig de bzhin gshegs pas gsungs pa'i dam pa'i chos nyan thos kyi theg pa dang ldan pa'i dam pa'i chos dang / rang sangs rgyas kyi theg pa dang ldan pa'i dam pa'i chos dang / theg pa chen po dang ldan pa'i dam pa'i chos la skur cing sgro 'dogs pa dang / bgegs dang bar chad byed pa dang / bdag yid mi shes shing mi dad pas pha rol po gzhan dag kyang de las zlog cing bar chad byed pa dang / gzhan dag klog pa dang / 'don pa dang / glegs bam du 'bri ba'i tshigs bcad gcig tsam gyi yang bar du gcod cing bgegs byas na/ de ni rtsa ba'i sdig kyang ma yin la mtshams med pa yang ma yin te/ kha na ma tho ba chen po'i las mtshams med pa dang nye ba zhes bya'o/ /gang zag de kha na ma tho ba'i sdig pa'i las chen po dag 'thol ba dang / bshags pa ma byas kyi bar du rab tu 'byung ba dang bsnyen par rdzogs su mi rung ste/ la la zhig gis rab tu phyung ngam/ bsnyen par rdzogs pa byin na/ de'i slob dpon de sdig pa dang bcas pa yin pas nga'i bstan pa las bskrad par bya'o/ /gang zag de rab tu byung ngam bsnyen par rdzogs nas kha na ma tho ba'i sdig pa de 'thol ba dang / bshags pa'i las ma byas na de ni ngas bstan pa'i 'dul 60.155a ba las myur du bskrad dgos so/ /de ci'i phyir zhe na/ gang zag rnam pa de gnyis ni dam pa'i chos kyi mig med par byed pa/ dam pa'i chos kyi sgron ma nub par byed pa/ dkon mchog gsum gyi gdung yongs su gcod pa ste/ lha dang mi la sogs pa yang don med pa phan pa med pa'i sdug bsngal spyod du 'jug cing ngan song du ltung bar byed pa yin no/ /gang zag rnam pa gnyis po de ni bdag nyid kyis dam pa'i chos la skur cing 'phags pa rnams la smod pa yin la/ pha rol po gzhan dag kyang dam pa'i chos la skur cing 'phags pa rnams la smod du 'dzud pa ste/ tshe 'phos ma thag tu 'tshams med pa'i sems can dmyal ba chen po ltung zhing bskal pa'i bar du sdug bsngal myong bar 'gyur te phyir gsor mi rung ngo / /tshangs pa chen po gzhan yang bcas pa'i sdig la mi gnas pa dang mi bya ba yang yod la/ rang bzhin gyi sdig la mi gnas pa dang mi bya ba yang yod/ rang bzhin gyi sdig la rtsa ba'i sdig tu 'gyur ba mi gnas pa dang mi bya ba yang yod do/ /de la ji ltar na rtsa ba'i sdig la mi gnas pa dang mi bya ba'i chos she na/ 'di lta ste/ dge slong gang zhig mi tshangs par spyod pas rtsa ba'i sdig byas pa dang ched du bsam te/ skye bo mi'i srog bcad nas rtsa ba'i sdig byas pa dang / dkon mchog gsum gyi dkor ma yin par brkus nas rtsa ba'i sdig byas pa dang / brdzun chen po smras nas rtsa ba'i sdig byas pa ste/ dge slong gang zhig rtsa ba'i sdig rnam pa 'di bzhi las 'ga' zhig byas na dge slong gis las bya ba'i nang du mi chud de/ longs spyod thams cad dang / phyogs bzhi'i dge 'dun gyi nor la spyod du mi dbang mod kyi de la yang dbyig pa dang / lcag gis brdeg cing gzhu ba dang / btson rar gzhug pa dang / spyo zhing gshe ba dang / lus kyi yan lag gtub pa dang / 'tsho ba'i dbang po dang phral ba la sogs pa thams cad byed du mi gnang ngo / /de dag ni rang 60.155b bzhin gyi sdig gi nang na rtsa ba'i sdig lci ba ste/ mi gnas pa dang mi bya ba zhes bya'o/ /ci'i phyir de la rtsa ba'i sdig ces bya zhe na/ gang zag gang gis chos rnam pa de bzhi byas na/ tshe 'phos ma thag tu ngan song du ltung bar 'gyur te/ ngan song du 'gro ba'i rtsa ba yin pas na rtsa ba'i sdig ces bya'o/ /de la ci'i phyir mtshams med pa dang / mtshams med pa la nye ba dang / rtsa ba'i sdig la mi gnas pa dang mi bya ba'i kha na ma tho ba chen po'i las ngan pa zhes gsungs she na/ rigs kyi bu 'di lta ste/ lcags kyi thu lum 'am/ ro nye'i gong bu ni steng gi nam mkha' la bor na cung zad kyang mi sdod par de ma thag tu phyir yang sa la ltung ngo / /mtshams med pa lnga dang / mtshams med pa la nye ba dang / rtsa ba'i sdig bzhi dang / dam pa'i chos la skur pa dang / dkon mchog gsum la the tsom za ba dang / gang zag sdig pa can rnam gnyis po yang de dang 'dra ste/ gang zag gang gis sdig pa rnam pa bcu gcig po de las 'ga' zhig byas na tshe 'phos ma thag tu thogs pa med par mtshams med pa'i sems can dmyal ba chen por gdon mi za bar skye zhing sdug bsngal chen po myong bar 'gyur te/ de bas na mi gnas pa dang / mi bya ba'i kha na ma tho ba chen po'i las ngan pa zhes bya'o/ /mi gnas pa dang / mi bya ba'i kha na ma tho ba chen po'i las ngan pa 'di dag byas pa'i gang zag ni lus 'di nyid la nyon mongs pa zad par byed mi nus su nges te ting nge 'dzin yang mi 'grub na yang dag pa mi 'gyur ba la zhugs pa/ thob pa lta ci smos te/ tshe 'phos ma thag tu gdon mi za bar sems can dmyal bar skye zhing sdug bsngal chen po myong bar 'gyur ro/ /tshangs pa chen po gzhan yang rigs kyi bu 'am/ rigs kyi bu mo gang gis bsam pa dag pas nga'i bstan pa la dad nas nyan thos kyi theg pa la zhugs sam/ rang sangs rgyas kyi theg pa la zhugs sam/ 60.156a theg pa chen po la zhugs te ngas bstan pa la dad pas khyim nas khyim ma yin par rab tu phyung ste bsnyen par rdzogs par bslab pa'i gnas mang po la shin du bkur sti dang / rim gror bya ba dang / rtsa ba'i sdig pa bzhi bsrung ba la shin du 'bad pa'i brtson 'grus chen po brtsam par bya'o/ /gang zag de la ni rtag tu lha dang / mi dang / mi ma yin pa la sogs pa rjes su 'brang zhing srung ste de ni lha dang / mi la sogs pa'i mchod pa yang chud mi za'o/ /theg pa gsum gang la spro zhing dga' ba bzhin de ma thag tu mtha'i gnas byed par 'gyur ro/ /de bas na yang dag pa mya ngan las 'da' bar 'dod pa dag lus dang srog stor kyang sla'i chos rnam pa de bzhi nyams par mi bya'o/ /de ci'i phyir zhe na/ so so'i skye bo dag ni rgyu rnam pa 'di gsum gyis mya ngan las 'da' ba'i bde ba thob par 'gyur ba'i phyir ro/ /gsum gang zhe na/ de bzhin gshegs pa la brten pa'i rgyu dang / 'phags pas bstan pa la brten pa'i rgyu dang / nga'i nye gnas la brten pa'i rgyu ste gsum mo/ /so so'i skye bo dag rgyu rnam pa 'di gsum la brten te brtson 'grus su nan tan byas na mya ngan las 'da' ba'i bde ba thob par 'gyur ro/ /gang zag gang gis chos rnam pa de bzhi nyams na nga yang de'i ston pa ma yin la/ de yang nga'i nyan thos ma yin no/ /gang zag gang gis chos rnam pa de bzhi nyams na de ni ngas bstan pa'i shin du zab pa/ rgya che ba'i mi rtag pa dang / sdug bsngal ba dang / stong pa nyid dang / bdag med pa dang ldan pa sems can thams cad la phan pa dang bde ba'i don du 'gyur bar bstan pa so sor thar pa las 'gal ba'o/ /gal te ngas bstan pa'i so sor thar pa las 'gal na de ni bsam gtan dang / ting nge 'dzin thams cad la ldongs shing 'thom par 'gyur te/ gzhol zhing 'jug mi nus pa dang / nyon mongs pa mang pos dkris shing klags te theg pa gsum gyi chos kyi snod kyang ma yin pas ngan song du ltung zhing sdug bsngal chen po myong bar 'gyur ro/ /rigs kyi bu 'am/ rigs kyi bu mo 60.156b gang gis ngas bstan pa'i so sor thar pa las rtsa ba bzhi ma nyams te yongs su dag na nga yang de'i ston pa yin la/ de yang nga'i nyan thos yin pas nga'i gsung gi rjes su 'brang ba/ nga'i chos la bde bar gnas pa/ bya ba thams cad kyi mthar phyin pa yin pas gang zag de ni tshul khrims kyi phung po la shin du gnas pas na dge ba'i chos thams cad la legs par gnas pa yin no/ /nyan thos kyi theg pa phun sum tshogs pa la gnas pa yin no/ /rang sangs rgyas kyi theg pa phun sum tshogs pa la gnas pa yin no/ /theg pa chen po phun sum tshogs pa la gnas pa yin no/ /de ci'i phyir zhe na/ gal te rang bzhin gyi sdig pa'i rtsa ba rnam pa bzhi po de bsrungs na/ de ni zag pa dang bcas pa dang / zag pa med pa'i dge ba'i chos thams cad kyi rgyu mchog dam pa rnam par gzhag pa yin no/ /de bas na chos rnam pa 'di bzhi srung ba ni dge ba'i chos thams cad kyi rtsa ba zhes bya'o/ /'di lta ste sa chen po la brten nas rtsi shing dang / lo tog dang / shing gel pa dang / nags tshal la sogs pa thams cad skye'o/ /de bzhin du tshul khrims kyi rtsa ba bzhi po 'di srung ba la brten nas dge ba'i chos thams cad 'phel zhing skye bar 'gyur ro/ /'di lta ste sa chen po la brten nas ri thams cad dang / ri khor yug dang / ri khor yug chen po dang / ri rab ri'i rgyal po la sogs pa thams cad bde bar gnas so/ /de bzhin du tshul khrims kyi rtsa ba bzhi po srung ba la brten nas nyan thos kyi theg pa dang / rang sangs rgyas kyi theg pa dang / bla na med pa'i theg pa chen po bde bar gnas par 'gyur ro/ /'di lta ste sa chen po la brten nas 'jig rten gyi ro bro ba'i mchog thams cad btsal gyis rnyed do/ /de bzhin du tshul khrims kyi rtsa ba bzhi po srung ba la brten nas dran pa dang / ting nge 'dzin dang / gzungs dang / ngang des pa'i bzod pa dang / 'phags pa'i lam thams cad dang / bla na med pa yang dag par rdzogs pa'i byang chub kyi bar du thob par 'gyur ro/ /'di lta ste sa chen po ni gtsang ba dang / mi gtsang ba thams cad 60.157a snyoms par 'dzin to/ /tshul khrims kyi rtsa ba bzhi shin du srungs ba'i rigs kyi bu dang / rigs kyi bu mo dag kyang de bzhin du chos kyi snod du gyur pa dang / chos kyi snod du ma gyur pa la sems mnyam par bzhag ste/ de la mi brnyas mi smad bdag mi bstod mi snyems co mi 'dri na dge ba'i chos thams cad skye ba'i gnas su 'gyur ro/ /'di lta ste/ sa chen po 'di la ni sems can thams cad de la longs spyod cing bde bar 'tsho'o/ /de bzhin du tshul khrims kyi rtsa ba bzhi shin du srung ba'i rigs kyi bu dang / rigs kyi bu mo dag kyang de bzhin gshegs pas bstan pa yang dag pa'i chos la shin du spro ba dang / mchog dam pa'i bsam pa dag pas sems can thams cad la bye brag gi 'du shes med par bsdu ba rnam pa bzhi'i chos kyis mnyam par bsdus te/ sems can thams cad chos kyi dga' ba la longs spyod cing bde bar 'tsho bar byed do/ /de nas tshe dang ldan pa u pa lis bcom ldan 'das kyis gsungs pa 'di dag thos nas 'dug pa las langs te/ gos tshags bcos nas bcom ldan 'das kyi zhabs la spyi bos gtugs te bla gos gcig tu byas/ pus mo g.yas pa'i lha nga sa la btsugs nas thal mo sbyar ba btud de/ bcom ldan 'das la 'di skad ces gsol to/ /bcom ldan 'das kyis gsungs pa ltar tshul khrims kyi rtsa ba bzhi shin du srung ba'i rigs kyi bu dang / rigs kyi bu mo dag chos kyi snod du gyur pa'i chos kyi snod du ma gyur pa kun la sems mnyam par bzhag ste/ mi brnyas mi smad bdag mi bstod mi snyems glo bur du nyes pa ma gleng ngo zhes gsungs na/ de lta na ni ma mchis pa'i dus na dge slong tshul khrims nyams zhing mi dge ba spyod pa/ dge sbyong ma lags par dge sbyong du khas 'che ba/ tshangs par spyod pa ma lags par tshangs par spyod par khas 'che ba dag la dge slong gi dge 'dun gyis ji lta bu'i thabs kyis gleng zhing dgar bar bgyi/ 60.157b bcom ldan 'das kyis tshe dang ldan pa u pa li la bka' stsal pa/ ngas mu stegs can dang / khyim pa rnams kyis dge slong gi nyes pa gleng du ni gnang ba'i skabs med do/ /dge slong gi dge 'dun gyis kyang chos bzhin ma yin pa dang / ma rtogs par tshul khrims nyams pa'i dge slong gi nyes pa gleng du ma gnang na dgar ba 'am bskrad pa lta ci smos/ chos bzhin ma yin pa dang / ma rtogs par tshul khrims nyams pa'i dge slong gi nyes pa glengs sam gal te bskrad na kha na ma tho ba chen po'i sdig pa 'thob bo/ /u pa li 'di ltar shes par bya ste/ chos bzhin ma yin pa dang / ma rtogs pa rnam pa 'di bcus tshul khrims nyams pa'i dge slong gi nyes pa glengs na kha na ma tho ba'i sdig pa chen po thob par 'gyur gyis/ mkhas pa dag gis ni de ltar mi bya'o/ /bcu gang zhe na/ dge 'dun ma dad par rgyal po'i spyan sngar ma rtogs bzhin du tshul khrims nyams pa'i dge slong gi nyes pa gleng ba dang / dge 'dun ma dad par kun du rgyu ba'i mdun du tshul khrims nyams pa'i dge slong gi nyes pa gleng ba dang dge 'dun ma dad par blon po'i mdun du tshul khrims nyams pa'i dge slong gi nyes pa gleng ba dang / dge 'dun ma dad par tshong dpon dang / khyim bdag gi mdun du tshul khrims nyams pa'i dge slong gi nyes pa gleng ba dang / bud med mong po'i mdun du tshul khrims nyams pa'i dge slong gi nyes pa gleng ba dang / skyes pa mang po'i mdun du tshul khrims nyams pa'i dge slong gi nyes pa gleng ba dang / ma rung bar byed pa mang po'i mdun du tshul khrims nyams pa'i dge slong gi nyes pa gleng ba dang / dge slong dang dge slong ma mang po'i mdun du tshul khrims nyams pa'i dge slong gi nyes pa gleng ba dang / khon yod pa'i mdun du tshul khrims nyams pa'i dge slong gi nyes pa gleng ba dang / khro ba zhe 'gras pa'i mdun du ma rtogs bzhin du tshul khrims nyams pa'i dge slong gi nyes pa gleng ba'o/ /'di dag ni chos ma yin pa dang / 60.158a ma rtogs par tshul khrims nyams pa'i dge slong gi nyes pa glengs na kha na ma tho ba'i sdig pa chen po 'thob par 'gyur ba bcu zhes bya'o/ /gal te bden pa yang dag pa la brten te glengs na yang nyes par 'gyur na bden pa ma yin pa la brten te gleng ba lta ci smos te/ kha na ma tho ba'i sdig pa chen po thob par 'gyur ro/ /gzhan yang chos ma yin pa rnam pa 'di bcus tshul khrims nyams pa'i dge slong gi nyes pa glengs na kha na ma tho ba chen po'i sdig 'thob par 'gyur gyis mkhas pa dag gis de ltar mi bya'o/ /bcu gang zhe na/ mu stegs can dag gis dge slong gi nyes pa gleng ba dang / tshul khrims med pa'i khyim pa dag gis dge slong gi nyes pa gleng ba dang / mtshams med pa byas pa dag gis dge slong gi nyes pa gleng ba dang / dam pa'i chos la skur pa dag gis dge slong gi nyes pa gleng ba dang / 'phags pa rnams la smod pa dag gis dge slong gi nyes pa gleng ba dang / glen pa sems 'khrug pa dag gis dge slong gi nyes pa gleng ba dang / nad kyis yongs su gzir pa dag gis dge slong gi nyes pa gleng ba dang / phyogs bzhi'i dge 'dun gyi rung bar byed pa bas dge slong gi nyes pa gleng ba dang / bza' shing gi ra ba srung ba dag gis dge slong gi nyes pa gleng ba dang / dge slong chad pa pa dag gis dge slong gi nyes pa gleng ba ste/ chos ma yin pa rnam pa 'di bcus dge slong tshul khrims nyams pa'i nyes pa glengs na kha na ma tho ba'i sdig pa chen po 'thob par 'gyur ro/ /ji ste bden pa yang dag pa la brten te glengs na yang nyes par 'gyur na bden pa ma yin par gleng ba lta ci smos te/ kha na ma tho ba'i sdig pa chen po thob par 'gyur ro/ /gzhan yang u pa li gal te dge slong tshul khrims nyams pa dag dge slong gi dge 'dun gyi nang na dge 'dun dang lhan cig tu gnas na/ dge slong de'i nang na tshul bzhin du byed pa/ spyod lam dang ldan pa/ yon tan lnga phrugs dang 60.158b ldan pa gcig 'dug pa las langs te/ gos tshags bcos la bsti stang dang bcas pas dge slong gi dge 'dun gyi rkang pa la phyag 'tshal la/ de nas tshul khrims nyams pa'i dge slong gi mdun du song la nyes pa gleng ngo zhes 'di skad gsol ba thob shig /tshe dang ldan pa dgongs shig bdag deng tshe dang ldan pa khyod kyi nyes pa gleng ngo / /bden pa/ brdzun pa ma yin pa dus la bab pa dus las mi 'da' ba/ 'dzum bzhin du smra ba/ mi brlang ba'i tshig dang / byams pa'i sems dang / zhe sdang med pa dang / phan pa dang / bde ba'i gnod pa ma yin pa dang / de bzhin gshegs pa'i chos kyi mig dang / chos kyi sgron ma yun du gnas par bya ba'i phyir gleng ngo / /tshe dang ldan pa khyod kyi nyes pa bdag gis chos bzhin du gleng ngo zhes gsol ba thob shig /gang zag des gleng du gnang na ni chos bzhin du gleng bar bya'o/ /gal te gleng du ma gnang na phyir yang gnas brtan dang / dge 'dun gyi rkang pa la phyag 'tshal te sti stang dang bcas pas 'di skad ces gsol cig /dge slong ming 'di zhes bgyi ba nyes pa 'di lta bu zhig bgyis te/ bdag gis chos lnga la brten te gleng bar 'tshal lo zhes gsol cig /de nas dge 'dun gyi nang na dge slong gnas brtan gyis shin du rtogs la gleng ba bas ci gleng ba dang / nyes pa ci byas pa dang / bden nam brdzun nam lci 'am yang ba rtogs la 'dul ba dang / mdo sde la brten te bsdigs pa dang / bzho ba'i thabs sna tshogs kyis dri zhing gleng bar bya'o/ /bdun shin du zhi bar bya ba'i chos kyis gang dang gang du 'thun pa de dang de'i chos kyis zhi bar bya'o/ /gal te nyes pa chen po byas na yang chad pa chen pos gcad do/ /nyes pa 'bring byas na yang chad pa 'bring gis gcad do/ /nyes pa chung ngu byas na yang chad pa chung ngus gcad de khrel ba dang / ngo tsha bas nyes pa 'thol du gzhug go/ /de nas u pa lis yang bcom ldan 'das la 'di skad 60.159a ces gsol to/ /nyes pa yang dag par byung ba'i sdig pa bgyis pa'i dge slong dag gal te khyim pa'i mthu la snyems sam/ nor gyi mthu snyems sam/ mang du thos pa'i mthu dang / smra bshags kyi mthu dang / slob ma'i mthu la snyems te/ mthu rnam pa de lta bus mjing bsdoms te/ de dge 'dun gyi ngag mi nyan la dge slong gnas brtan mdo sde dang / 'dul ba dang / ma mo 'dzin pas chos bzhin du bstan cing bcos kyang nyan du mi btub pa'i dge slong de la ji ltar chad pas gcad par bgyi/ bcom ldan 'das kyis bka' stsal pa/ dge slong gnas brtan sde snod gsum 'dzin pas dge 'dun la dad pa dris te/ rgyal po dang / blon po chen po la mthu btsal ba'i pho nya thong la gdod chos bzhin du chad pas chod cig /u pa lis yang gsol pa/ bcom ldan 'das gal te sdig pa bgyid pa'i dge slong de nor dbyig gi mthu dang / mang du thos pa'i mthu dang / smra bshags kyi mthu dang / thabs rnam pa sna tshogs kyis rgyal po dang / blon po yang dga' bar bgyis te/ thams cad chos ma lags pa bgyid pa/ tshul khrims nyams pa'i dge slong gi grogs bgyid de/ tshul khrims ngan pa tsam gyi dge slong de dag sdig pa nyam rangs su bgyid du stsal nas chos bzhin du chad pas gcad du yang mi ster na/ de'i tshe de la dge 'dun gyis ji ltar bgyi/ bcom ldan 'das kyis u pa li la bka' stsal pa/ gal te dge slong de mi gnas pa dang mi bya ba la brten te/ dge 'dun gyi nang du gnas nas sdig pa chen po mngon sum du mi snang na/ de'i tshe dge 'dun gyis skad cig gzhag go/ /gal te dge slong de mi gnas pa dang mi bya ba'i sdig pa chen po mngon sum du snang bzhin du dge 'dun gyi nang na gnas na/ de'i tshe dge 'dun dag dad pa dris te chos bzhin du bskrad de sangs rgyas kyi chos las phyir dbyung ngo / /u pa li 'di lta ste nas kyi zhing gi nang na nas la gnod 60.159b pa skyes pa yang myu gu dang / sdong bu dang / tshigs nas dang 'dra yang / nas bzang mo smye bar byed de/ nas la gnod pa de snye ma ma byung ba na nas kyi bdag pos skad cig 'jog go/ /snye ma byung ma thag pa na nas kyi bdag pos nas bzang po/ smye bar byed do snyam bsams nas rtsa thon du phyung ste zhing de'i phyi rol du 'dor ro/ /de bzhin du mi gnas pa dang mi bya ba'i dge slong tshul khrims nyams pa de khyim pa dang mthu rnam pa mang po snyems te/ dge 'dun gyi nang na gnas pa spyod lam dang cha lugs dge 'dun dang 'dra yang dge 'dun rnam par dag pa smye bar byed de/ srungs ma'i lhas ma glengs kyi bar du dge 'dun gyi nang na gnas te/ sdig pa chen po mngon sum du mi snang na de'i tshe dge 'dun gyis skad cig zhog shig /gal te lha srungs mas kyang bskul la dge 'dun gyi nang na nyes pa chen po yang mngon sum du snang bar gyur na/ de'i tshe dge 'dun dad pa dris te/ sangs rgyas kyi chos las phyir skrod cig /u pa li 'di lta ste/ rgya mtsho chen por ni ro zhag lon par mi 'jog go/ /de bzhin du nga'i nyan thos kyi dge 'dun gyi slob ma yang tshul khrims nyams pa sdig pa spyod pa'i dge slong ro dang 'dra ba dang lhan cig mi 'grogs so/ /u pa lis yang gsol pa/ bcom ldan 'das gal te tshul khrims nyams pa sdig pa byed pa'i dge slong de dge 'dun dad pa dris te bskrad kyang nor rin po che'i mthu dang / mang du thos pa'i mthu dang / smra bshags kyi mthu dang / thabs rnam pa sna tshogs kyis rgyal po dang / blon po chen po dga' bar bgyis te/ thams cad tshul khrims ngan pa can gyi grogs su gyur na/ mthu chen pos nan gyis lhan cig tu bzhag nas tshul khrims nyams pa'i dge slong dang dge 'dun lhan cig tu gnas na de'i tshe dge 'dun gyis de ji ltar bgyi/ bcom ldan 'das kyis bka' stsal pa/ de'i tshe dge 'dun gyi nang na 'dzem pa dang ngo tsha bar ldan pa dang tshul khrims dang 60.160a ldan pa'i dge slong dag tshul khrims bsrung ba'i phyir tshul khrims nyams pa'i dge slong de la zhe sdang mi bskyed pa dang / rgyal po dang / blon po chen po la gnod par ma gyur par gsol ba thob ste/ gnas de spongs la gnas gzhan du song shig / bam po bzhi pa/ de nas byang chub sems dpa' sems dpa' chen po sa'i snying pos bcom ldan 'das la 'di skad ces gsol to/ /btsun pa bcom ldan 'das gang sangs rgyas kyi zhing rnyog pa lnga can de bzhin gshegs pa mi bzhugs pa na/ de'i tshe de na gnas pa'i sems can dag nyon mongs pas gzir te mi dge ba spyod cing glen pa'i rang bzhin can du gyur nas shin du gdul dka' ba rgyal rigs gdol pa can dang / blon po gdol pa can dang / khyim bdag gdol pa can dang / tshong dpon gdol pa can dang / bram ze gdol pa can de dag la sogs pa dge ba'i rtsa ba chung ba/ dad pa'i sems ma mchis pa/ g.yo dang sgyus 'tsho ba/ glen pa dag shes pa bsnyems shing 'jig rten phyi ma'i sdug bsngal gyi 'bras bus mi 'jigs pa dang / dge ba'i bshes gnyen spong ba/ mtshams med pa'i sems can dmyal ba la 'jug cing 'bab pa de dag khe dang rnyed pa'i phyir tshul khrims nyams pa sdig pa bgyid pa'i dge slong dang sten cing chos ma yin pa la spyod pa'i grogs su gyur nas/ thams cad gdon mi za bar mtshams med pa'i sems can dmyal ba la 'jug cing 'bab pa'i gnas de dag tu bdag mchis te/ sangs rgyas bcom ldan 'das kyi chos kyis sems can de dag la phan pa dang / bde ba dang / dbugs dbyung ba'i slad du bla na med pa'i bdud rtsi lta bu'i dam pa'i chos thabs kyis bstan cing drangs te de la spyod du gzhug pa dang / rgyal rigs gdol pa can nas bram ze gdol pa can gyi bar du mtshams med pa'i sems can dmyal bar ltung ba las rnam par bzlog par bgyi'o/ /bcom ldan 'das kyis byang chub sems dpa' sems dpa' chen po sa'i snying po la 'di skad ces bka' 60.160b stsal to/ /rigs kyi bu khyod phyi ma ma 'ongs pa'i dus na sangs rgyas kyi zhing 'dir sems can dag nyon mongs pas yongs su gdungs nas sdig pa spyod cing byis pa gti mug can gdul dka' bar gyur pa gang rgyal rigs gdol pa can dang / blon po gdol pa can dang / khyim bdag gdol pa can dang / tshong dpon gdol pa can dang / dge sbyong gdol pa can dang / bram ze gdol pa can la sogs pa dge ba'i rtsa ba chung ba/ dad pa'i sems med pa/ g.yo dang sgyus 'tsho ba/ gti mug can/ shes pa snyems pa can/ dge ba'i bshes gnyen spong ba/ smras pa'i tshig bden pa med pa/ dge ba'i bshes gnyen gyis bstan pa la mi 'jug pa dang brnyas shing dbang za ba/ tshig ngan pas rnam par 'thing ba/ dam pa'i chos la the tsom za zhing log par lta ba/ 'jig rten phyi ma'i sdug bsngal gyi 'bras bu la mi 'jigs pa/ rtag tu ngang tshul ngan pa can dag la sten par dga' ba/ srog gcod pa nas log par lta ba'i bar du spyod pa la dga' zhing g.yo dang sgyus 'jig rten slu ba dang / bdag dang gzhan la gnod pa byed pa'i rgyal rigs gdol pa can nas bram ze gdol pa can gyi bar du nga'i chos 'jig par byed pa/ nga'i bstan pa la rab tu byung na yang tshul khrims nyams shing 'jig rten gyi 'du 'dzi'i las byed par spro ba la rgyal rigs dang / bram ze la sogs pas sti stang dang bcas pas mchod pa dang khe la brkam pas nor tshol ba'i phyir tshig tsam du smra zhing spyod pa dang mi ldan pa phan tshun du phrin cing yi ge skyel ba la dga' ba dang / tshong dang / khe spogs byed cing 'jig rten rgyang phan pa'i gtsug lag slob pa dang / zhing rmo ba'i las la dga' ba dang / nor rin po che sogs shing sbed pa dang / khang khyim dang / chung ma dang / bu smad srung ba dang / 'jig rten gyi sngags dang / phyag rgyas 'byung po 'khol ba dang / ltas bzang ngan blta ba dang / sman sbyar cing nad gsos pa'i nor gyis 'tsho ba dang / bza' ba dang / btung ba dang / bgo ba dang / rin po che'i rgyan la chags shing khyim pa'i las byed pa la dga' ba dang / tshul khrims 'dral zhing sdig pa 60.161a spyod pa dang / dung gi sgra la khyi'i spyod pa dang ldan pa/ dge sbyong ma yin par dge sbyong du khas 'che ba dang / tshangs par spyod pa ma yin par tshangs par spyod par khas 'che ba yod de/ rgyal rigs gdol pa can nas bram ze gdol pa can gyi bar du de dag la bsnyen bkur byed cing sti stang dang bcas pas mchod pa byed de/ de dag gi ngag kyang nyan to/ /tshul khrims nyams pa de dag kyang rgyal rigs gdol pa can nas bram ze gdol pa can gyi bar du de dag la sten par dga' zhing bkur sti dang rim gro byed de de'i ngag nyan to/ /gal te gang zag 'ga' zhig nga'i bstan pa la rab tu byung nas tshul khrims dang yon tan du ldan pa/ slob pa dang / mi slob pa la nan tan byed pa nas 'bras bu'i mthar phyin gyi bar du gyur pa la/ rgyal rigs gdol pa can nas bram ze gdol pa can gyi bar du de dag gis de la phrag dog byed de/ bsnyen bkur dang / sti stang dang / rim gro dang / mchod pa mi byed cing slar ngag nyan par yang mi byed do/ /rigs kyi bu 'di lta ste/ mi la la zhig rin po che'i gling du phyin pa las rin po che in dra ni la dang / ma hA ni la dang / gser dang / dngul dang / mu tig dang / pad ma ra ga dang / bai dUr+ya dang / rin thang med pa'i rin po che rnam pa sna tshogs bor nas nor bu 'ching bu len pa ltar de bzhin du ma 'ongs pa'i dus na sangs rgyas kyi zhing 'dir rgyal rigs gdol pa can nas bram ze gdol pa can gyi bar du yang de dang 'dra ste/ ngas bstan pa'i dam pa'i chos kyi rin po che'i gling du phyin nas tshul khrims dang yon tan du ldan pa/ don dam pa la dga' ba/ 'dzem pa dang ngo tsha bar ldan pa/ slob pa dang mi slob pa'i gang zag dang / pha rol du phyin pa drug la nan tan byed pa la brtson pa'i so so'i skye bo dge ba'i yon tan dang ldan pa/ 'phags pa'i 'khor spangs nas tshul khrims nyams pa/ sdig pa mang po spyod pa/ ngo tsha ba med pa dang 'dzem pa med pa/ tshig brlang zhing rtsub pa/ lus dang sems nga rgyal gyis dregs pa/ rnam par dkar ba'i chos dang bral ba/ 60.161b byams pa'i sems med pa/ snying rje med pa/ sdig pa'i dge slong dag la bsod nams kyi zhing du 'dzin cing bkur sti dang rim gro dang / mchod pa byed de de'i ngag nyan to/ /de ltar sdig pa can de dag ni slob dpon dang slob mar bcas te gdon mi za bar mtshams med pa'i sems can dmyal bar ltung bar 'gyur ro/ /rigs kyi bu sdig pa'i 'khor lo rnam pa bcu yod de ma 'ongs pa'i dus na sangs rgyas kyi zhing 'dir rgyal rigs gdol pa can dang / rje'u rigs gdol pa can dang / khyim bdag gdol pa can dang / tshong dpon gdol pa can dang / dge sbyong gdol pa can dang / bram ze gdol pa can dag sdig pa'i 'khor lo rnam pa bcu po las 'ga' zhig dang ldan nam/ gal te kun dang ldan na sngon bsags pa'i dge ba'i rtsa ba thams cad kyang tshig ste thal ba bzhin du 'gyur la ring po mi thogs par lus kyi yan lag kyang dum bur bcad pa dang / nyin mtshan du mar lce ldib cing smra mi nus pa dang / mi zad pa'i sdug bsngal chen po myong ba dang / tshe 'phos nas kyang gdon mi za bar mtshams med pa'i sems can dmyal ba chen por ltung bar 'gyur ro/ /bcu gang zhe na/ 'di lta ste/ de ltar tshul khrims nyams pa sdig pa spyod pa'i dge slong dag gi ngan par lta ba ni rgyal rigs dang / blon po la sogs pas bzod la/ slar de bas mthar gnas pa'i dge slong yongs su dag pa mthong na de la 'di skad zer ro/ /kye skyes bu dag 'di ltar dge slong 'di dag ni glen pa gti mug can/ tshul 'chos shing 'jig rten slu ba yin te/ kha zas dang / btung ba dang / bgo ba dang / khe dang / rnyed pa dang / grags pa 'dod pa'i phyir bdag ni stod/ gzhan la ni smod cing phrag dog gis dkrugs ma byed do/ /khe dang grags pa la skyo zhing chog mi shes pa yin pas bskrad par 'os pa de dag gi tshig kyang mnyan par mi bya'o/ /dge slong de dag ni brdzun 'ba' zhig smra zhing bden pa'i 60.162a chos dang bral bas 'bras bu thob pa yang med/ 'dod pa dang bral zhing zag pa yongs su zad pa yang ma yin la/ khe dang grags pa dang / mchod pa tsam 'dod pa'i phyir bas mthar gnas shing yon tan can du ston pa dag la mchod pa dang / bsnyen bkur dang bsti stang ma byed cig /de ni g.yo dang sgyus 'tsho ba yin gyi/ bsod nams kyi zhing yang dag pa 'am/ lam la nan tan byed pa ni ma yin no zhes skur to/ /de nas rgyal rigs gdol pa can nas bram ze gdol pa can gyi bar du thams cad kyi bas mthar gnas pa'i dge slong yongs su dag pa la dad pa'i sems mi skye/ dkon pa'i 'du shes mi 'byung ste/ sti stang bya ba'i sems med do/ /de la mchod pa dang / bsnyen bkur byed pa la mi mos shing / ji skad du bstan kyang de'i tshig mi nyan te de la brnyas shing smod do/ /de ltar bas mthar gnas pa'i dge slong yongs su dag pa la brnyas smod pa nyid chos kyi mig dang dkon mchog gsum gyi gdung la brnyas shing smod pa yin pas de'i tshe yul de na gnas pa'i lha dang / klu dang / gnod sbyin dang / lha la sogs pa dkon mchog gsum la bsam pa dag pa dad pa mi phyed pa dag rgyal rigs gdol pa can nas bram ze gdol pa can gyi bar du gdol pa can de dag thams cad khros te zhe sdang gi sems skyes nas gcig la gcig 'di skad zer ro/ /kye skyes bu dag ltos rgyal rigs gdol pa can dang / rje'u rigs dang / khyim bdag dang tshong dpon dang / dge sbyong dang bram ze gdol pa can 'di dag chos kyi mig dkon mchog gsum gyi gdung 'tshob pa thams cad la ni brnyas shing dbang bzas pas dge ba'i rtsa ba yang med par byas te mi dge ba'i bshes gnyen gyi dbang du gyur pas sdig pa'i las kyis ngan song du ltung bar 'gyur gyis bdag cag deng phyin chad de dag gi skyabs mi bya'o/ /rgyal rigs gdol pa can la sogs pa de dag gi gnas dang / yul dang / grong khyer dang / srid kyang mi bsrung ngo zhes zer te lha dang / klu dang / gnod sbyin dang / lha la sogs pa 60.162b thams cad de dag la mi skyob mi 'go ste yal bar gtong ngo / /de bas na rgyal rigs gdol pa can la sogs pa'i yul dang / grong khyer na gnas pa'i yang dag pa'i chos kyi snod du 'gyur ba dang / yang dag par bsod nams kyi zhing du 'gyur ba thams cad yul de nas byung ste 'gro'o/ /ji ste 'dug pa zhig yod na yang mi 'dod cing gtong ba'i bsam pa skyes pas bskyab cing bsrung ba'i sems med do/ /de ltar lha dang / klu dang / gnod sbyin dang / lha la sogs pa pa dang / yang dag pa'i chos kyi snod du gyur pa dang / bsod nams kyi zhing du 'gyur ba thams cad kyis rgyal rigs gdol pa can dang / de'i srid dang / yul dang / grong khyer la bsrung zhing bskyab pa'i sems med de/ bsrung zhing bskyab pa'i sems med pas de'i tshe yul de'i srid la nang gi dgra dang / phyi'i dgra gnyi ga ldang ste/ srid 'phrog pa'i phyir gcig la gcig 'tshe zhing gsod pa dang / nad dang mu ge la sogs pa yang de'i dbang gis 'byung ngo / /de nas rgyal rigs gdol pa can nas dge sbyong dang / bram ze gdol pa can gyi bar du gdol pa can de dag thams cad dang / yul de na gnas pa thams cad kyang dga' zhing spro ba'i sems med de/ sngon gyi yid du 'ong ba dang / sdug pa thams cad dang yang bral nas gnyen bshes dang / mdza' bo dang / grogs kyang gcig gis gcig yid byung zhing phrad mi 'dod pa dang / byams pa dang / snying rje med de/ phrag dog dang / ser sna byed cing sdig pa mang po yang byed par 'gyur ro/ /'di lta ste srog gcod pa nas ngan par lta ba'i bar du kun spyod cing ngo tsha ba dang / 'dzem pa med par mchod rten gyi nor dang / dge 'dun gyi nor la spyod cing za ba la 'gyod pa'i sems med do/ /rgyal rigs gdol pa can de 'dzangs shing drang po la ni sdang la/ gcam sgyu can la ni dga' bas blon po dang / dmangs gcig la gcig gnod pa byed cing 'khon dang shar gnyer nas 'thab cing rtsod pa dang pha rol po'i dgra dang g.yul sprod pa 60.163a na'ang 'og ma sems mi mthun pa'i phyir g.yul yang nyes par 'gyur ro/ /rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa gdol pa can de dag thams cad ring po mi thogs par lus kyi yan lag nyams shing nyin mtshan du mar lce lkug par 'gyur ba dang / shin du mi bzad pa'i na ba dang tsha ba'i sdug bsngal chen po myong ba dang / 'chi 'phos nas kyang gdon mi za bar mtshams med pa'i sems can dmyal bar ltung ngo / /rigs kyi bu gzhan yang rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa'i gdol pa can sdig pa'i bshes gnyen gyi rjes su spyod pa dag dge ba'i rtsa ba chung ba g.yo dang sgyus 'tsho ba/ glen pa gti mug can shes pa snyems pa/ dkon mchog gsum la bsam pa dag pa'i sems med pa/ 'jig rten phyi ma'i sdug bsngal gyi 'bras bu la 'jigs par lta ba dag de la kha cig ni nyan thos kyi theg pa la cung zad dad kyang yang dag par glen pa'i rang bzhin can du gyur pas 'di snyam du bdag las shes shing mkhas pa med do snyam nas/ ngas bstan pa'i rang sangs rgyas kyi theg pa'i chos dang / theg pa chen po'i chos la brnyas smod de 'phya zhing skur nas sems can gzhan dag kyang tshigs su bcad pa gcig tsam gyi bar du 'chang zhing 'dzin pa dang / klog cing 'don du yang mi ster to/ /de la kha cig ni rang sangs rgyas kyi theg pa la dad pa cung zad thob kyang yang dag par glen pa'i rang bzhin can du gyur pas 'di snyam du bdag las mkhas shing shes pa med do snyam nas/ ngas bstan pa'i nyan thos kyi theg pa'i chos dang / theg pa chen po'i chos la brnyas shing smod de 'phya zhing skur nas/ sems can gzhan dag tshigs su bcad pa gcig tsam gyi bar du 'chang ngam/ 'dzin tam/ klog gam/ 'don du yang mi ster to/ /de la kha cig ni theg pa 60.163b chen po'i chos la dad pa cung zad tsam thob kyang yang dag par glen pa'i rang bzhin can du gyur pas 'di snyam du bdag las shes shing mkhas pa med do snyam nas ngas bstan pa'i nyan thos kyi theg pa'i chos dang / rang sangs rgyas kyi theg pa'i chos la brnyas smod de 'phya zhing skur nas/ sems can gzhan dag tshigs su bcad pa gcig tsam gyi bar du yang 'chang zhing 'dzin tam/ klog cing 'don du yang mi ster to/ /gang zag de dag ni sangs rgyas kyi dam pa'i chos la brnyas skur ba dang / dus gsum gyi sangs rgyas bcom ldan 'das la dbang za ba dang /[ ]/dus gsum gyi sangs rgyas kyi chos kyi sde snod thams cad bshig nas bsregs te thal ba bzhin du 'jig par byed pa/ 'phags pa'i lam gyi yan lag brgyad pa thams cad gcod pa/ tshad med pa'i sems can gyi mig 'dzar ba zhes bya'o/ /rgyal rigs gdol pa can nas dge sbyong dang / bram ze gdol pa can gyi bar du de dag gis sangs rgyas kyis bstan pa'i nyan thos kyi theg pa'i chos dang / rang sangs rgyas kyi theg pa'i chos dang / theg pa chen po'i chos bcabs te bar chad byas nas tshigs su bcad pa gcig tsam gyi bar du med par byas na/ gang zag de ni chos kyi mig dang dkon mchog gsum gyi gdung 'tshob pa thams cad la ma gus pa ste/ de'i rgyu dang de'i rkyen gyis yul de srung ba'i lha dang / klu dang / gnod sbyin dang / lha la sogs pa dkon mchog gsum la bsam pa dag cing / dad pa mi phyed pa dag rgyal rigs gdol pa can nas bram ze gdol pa can gyi bar du gdol pa can de dag thams cad la khro zhing zhe sdang ba'i sems skye ba nas gzhung de bzhin du rgyas par rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa gdol pa can thams cad ring po mi thogs par lus kyi yan lag nyams shing nyin mtshan du 60.164a mar lce lkug par 'gyur ba dang / shin du mi bzad pa'i na ba dang / tsha ba'i sdug bsngal chen po myong ba dang / 'chi 'phos nas kyang gdon mi za bar mtshams med pa'i sems can dmyal ba chen por ltung ngo / /rigs kyi bu gzhan yang rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa'i gdol pa can rnams tshul khrims nyams pa sdig pa spyod pa'i dge slong gi rjes su zhugs pa nas/ gzhung de de bzhin du rgyas par yul de na chos kyi snod du gyur pa yang dag pa'i bsod nams kyi zhing du gyur pa thams cad rgyal rigs gdol pa can la sogs pa la spong ba'i sems skyed de bskyab pa 'am srung ba mi byed do/ /brgya la yul de na gnas su zin kyang chos la rten gyi khyim pa la dga' zhing gnas par mi byed pa dang / sbyin bdag gi khyim du yang dang yang du 'gro bar mi byed pa dang / gal te skad cig tsam phyin na yang tshig srung zhing mi smra ba dang / ji ste smra na yang brdzun gyi bag med de/ khyim pa'i mdun du tshul khrims nyams pa dag la 'phya ba 'am brnyas par byed pa dang / tshul khrims nyams pa sdig pa spyod pa'i dge slong de dag gi nyes pa mi rjod cing mi gleng ba dang / rtag tu bsod nams kyi zhing la sten gyi tshul khrims nyams pa yongs su spong ngo / /tshul khrims nyams pa sdig pa spyod pa'i dge slong de dag ni phyir tshul khrims srung ba dge ba'i yon tan dang ldan pa dag la khro ba dang / zhe sdang gi sems bskyed de brnyas smod pa dang / rgyal rigs gdol pa can dang / dge sbyong dang / bram ze gdol pa can dag gi bar du khyim pa'i bus pa dang / bud med kyi mdun du gcam pa dang / sgyu sna tshogs kyis brdzun zer zhing tshul khrims srung ba de dag la 'phya zhing skur pa dang / tshig ngan pa rnam pa sna tshogs 'dogs te/ rgyal rigs gdol pa can nas bram ze gdol pa can gyi bar du de dag thams cad nga'i slob ma 60.164b 'dod pa nyung zhing chog shes pa/ tshul khrims srung ba/ mang du thos pa/ spobs pa dang ldan pa'i dge sbyong la zhe sdang ba dang / khro ba'i sems skyed cing tshig rtsub po rnam pa sna tshogs kyis 'phya zhing skur du bcug nas lus dang sems mi bde bar byed do/ /gzhan yang chos gos dang / lhung bzed dang / 'tsho ba'i yo byad kyang 'phrog tu bcug nas 'tsho bas brel bar byed do/ /gzhan yang phyogs bzhi'i dge 'dun gyi nor 'phrog tu bcug nas spyod du mi ster ba dang / la la ni btson rar bcug nas lcags dang / khrong khril dang / shing gi gdos la sogs pa'i nan la bor ro/ /la la ni lus kyi yan lag gtubs/ la la ni mgo gcod du bcug go/ /rigs kyi bu khyod ltos shig /de ltar rgyal rigs gdol pa can nas dge sbyong dang / bram ze gdol pa'i bar du gdol pa can de dag tshul khrims nyams pa sdig pa spyod pa'i dge slong la brten nas de lta bu'i kha na ma tho ba chen po'i sdig pa rnam pa sna tshogs byed do/ /mtshams med pa'i sems can dmyal ba'i bar du ltung bar 'gyur ro/ /sems can gang gis mtshams med pa lnga byas sam/ tshul khrims kyi rtsa ba dag bshig gam/ mtshams med pa la nye ba'i sdig byas sam/ rang bzhin gyi sdig gam/ bcas pa'i sdig gang byas pa bas ni rgyal rigs gdol pa can nas dge sbyong dang / bram ze gdol pa can gyi bar du tshul khrims nyams pa chos las 'gal bar byed pa la bsten pa bas sdig pa yang ngo / /rigs kyi bu de ltar tshul khrims nyams pa sdig pa spyod pa'i dge slong dag de ltar chos las 'gal ba'i sdig pa chen po byas mod kyi/ 'on kyang nga'i bstan pa la gnas shing skra dang kha spu bregs te gos ngur smrig bgos nas/ spyod lam dang cha lugs 'phags pa rnams dang 'thun te/ de la ni rgyal po dang / blon po chen po dang / khyim pa rnams kyis khyim pa'i chos nyid dang yang sbyar du mi gnang na/ gzhu ba dang / 'tshog pa dang / nan la bor ba 60.165a dang / btson rar gzhug pa dang / gshe zhing spyo ba dang / lus kyi yan lag gtub pa dang / 'tsho ba'i dbang po dang phral ba chos ma yin pa byed pa lta ci smos/ rgyal po 'am/ blon po 'am/ khyim pa rnams kyis gal te de ltar byas na kha na ma tho ba'i sdig pa chen po 'thob par 'gyur te/ gdon mi za bar mtshams med pa'i sems can dmyal bar skye'o/ /'di ltar tshul khrims nyams pa sdig pa spyod pa'i dge slong la yang chad pas gcod du mi gnang na tshul khrims dang ldan pa dge ba spyod pa la lta ci smos/ rigs kyi bu dge slong gang gis tshul khrims kyi rtsa ba'i sdig las gcig nyams pa yang tshul khrims nyams shing sdig pa spyod pa'i dge slong zhes bya mod kyi/ bstan pa bzhin du dad pa'i dge 'dun gyis las byas pa'i sdom pa rgyun mi 'chad par yod de/ bslab pa dang / tshul khrims kyi bar du btang yang rnam par dkar ba'i chos kyi gsung tsam yod kyis/ de la yang rgyal po dang / blon po dang / khyim pa dang / sdom pa med pa rnams kyis brnyas smod dam/ chad pas gcad du mi gnang ngo / /de ltar dge slong de chos kyi snod ma yin te/ 'phags pa'i chos nyams pas yongs su dag pa'i dge 'dun smye bar byed cing dge sbyong gi las su bya ba'i las thams cad mi rung bar byed pa yin te/ phyogs bzhi'i dge 'dun gyi longs spyad la spyod du ni mi dbang mod kyi/ 'on kyang yid 'thun pa'i dge 'dun las bsnyen par rdzogs te sdom pa thob pa ma btang bas khyim pa skye bo thams cad pas mchog go/ /rtsa ba'i sdig nyams kyang de lta bu yin na/ de ma yin pa bcas pa'i sdig phra mo gzhan nyams pa lta ci smos te/ de bas na rgyal po dang / blon po dang / khyim pa rnams kyis brnyas pa 'am/ smod pa byed dam/ chad pas gcod du mi dbang ngo / /de ci'i phyir zhe na/ rigs kyi bu sngon 'das pa'i dus na yul ka shi zhes bya ba na rgyal po tshangs pas byin zhes bya ba zhig yod de/ des gdol pa lnga la 'di skad ces 60.165b bka' stsal to/ /khyed deng la ri kha ba can gyi drung na glang po che mche ba drug dang ldan pa u pa li'i mig ces bya ba zhig yod kyis/ khyed kyis de'i mche ba phyung la 'on cig gal te khyod kyis ma thob na gson du ma re shig ces bsgo'o/ /de'i tshe gdol pa can de dag lus dang srog gi phyir mda' gzhu zhig thogs nas gos tshon can gyon te/ dge sbyong gi tshul ltar bcos nas ri kha ba can gyi drung du glang po che'i rgyal po gang na bar song ngo / /der phyin pa dang de na glang po che mo zhig gis sngar mthong ba dang / mda' gzhu thogs pa des dngangs nas glang po che'i rgyal po'i gan du brgyugs te phyin nas 'di skad ces smras so/ /lha chen po ma gzigs sam/ mi kha cig mda' gzhu thogs te dal gyis 'jab cing mchi na ci bdag cag gi tshe'i bar chad du mi 'byung grang / glang po che'i rgyal pos mgo bteg te bltas na/ skra dang kha spu bregs nas gos tshon can gyon pa dag cig 'ong ba mthong nas glang po che mo la tshigs su bcad pa 'di dag smras so/ /sangs rgyas gang gA'i klung gi bye snyed gyi/ /rgyal mtshan chos gos gyon pa 'di dag ni/ /sdig pa thams cad yongs su spangs pas na/ /nges par sems can dag la gnod mi byed/ /de nas glang po che mos kyang tshigs su bcad nas lan btab pa/ chos gos gyon pa ltar ni byed mod kyi/ /thams cad lag na mda' gzhu thogs pas na/ /'di ni snying rje med cing ma rungs pa/ /sdig pa byed la mos pa'i gdol pa yin/ /de nas glang po che'i rgyal pos kyang tshigs su bcad de smras pa/ chos gos tshal bu gyon par snang bas na/ /byams dang snying rje'i rtsa ba de nyid yin/ /sems can kun la byams shing brtse ba'i phyir/ /sangs rgyas la ni 'di dag skyabs song nges/ /khyed cag 'di la the tsom ma za bar/ /myur du sems de rjes su bzung na mdzes/ /chos gos tshon can gyon pa 'di dag ni/ /'khor ba'i rgya mtsho las ni sgrol mdzad pa'o/ /de nas de'i tshe gdol pa de dag gis mda' dug 60.166a can gyis glang po che'i rgyal po la 'phangs nas gzas pa bzhin du snying la phog go/ /de nas glang po che mos skad chen po phyung ste ngus nas/ skad kyis brnangs bzhin du tshigs su bcad pa 'di skad ces smras so/ /chos gos gyon pa de dag ni/ /sangs rgyas la ni skyabs song snyam/ /cha lugs shin du zhir snang yang / /gdug pa'i sems ni khong na srel/ /lha yi sku la mda' 'phen pa'i/ /dgra de shin du brlag pa'i phyir/ /myur du lus kun brdzis nas su/ /'tsho ba'i dbang dang dbral bar bya/ /de nas glang po che'i rgyal pos tshigs su bcad de smras pa/ 'tsho ba'i srog dang bral kyang sla'i/ /sdig pa'i sems ni bskyed mi rigs/ /'di dag slu ba'i sems yod kyang / /cha lugs sangs rgyas slob ma 'dra/ /mkhas pa'i sems ni rnam dag pa/ /srog gi phyir ni ma yin te/ /skye bo mang po bsgral ba'i phyir/ /rtag tu byang chub spyad pa spyod/ /de'i tshe glang po che'i rgyal pos snying brtse ba'i sems skyes nas mi de dag la 'di skad ces smras so/ /khyed nga la ci 'dod/ de dag gis smras pa/ khyod kyi mche ba 'dod do/ /glang po che'i rgyal po snying shin du dga' nas mche ba phyung ste de dag la byin nas tshigs su bcad de smras pa/ khro zhing phangs pa'i bsam pa med bzhin du/ /khyed la nga yi mche ba dkar po 'di/ /byin pa'i bsod nams mngon par sangs rgyas nas/ /skye bo'i nyon mongs nad rnams zhi byed shog /rigs kyi bu sngon 'das pa'i dus na de ltar glang po che'i rgyal po byol song gi skye gnas su gyur pa yang bla na med pa yang dag par rdzogs pa'i byang chub 'dod pa'i phyir lus dang srog la ma chags par btang nas chos gos gyon pa de la rim gro dang / sti stang bya ba'i phyir des dgrar byas kyang lan mi ldon pa la ltos/ ma 'ongs pa'i dus na rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze gdol pa 60.166b can dag yang dag par glen pa'i rang bzhin can yin yang cung zad tsam gyi shes pa snyems te/ g.yo dang sgyus 'tsho zhing 'jig rten dag bslus nas 'jig rten phyi ma'i sdug bsngal gyi 'bras bu la 'jigs par mi lta bas nga'i bstan pa la skyabs su song zhing rab tu byung ba chos kyi snod du gyur pa dang / chos kyi snod du ma gyur pa kun la 'tshe zhing gnod pa byed de gshe zhing spyo ba dang / 'tshog pa dang / gzhu ba dang / btson rar gzhug pa dang / 'tsho ba'i dbang po dang phral ba'i bar du byed do/ /de ni 'das pa dang / ma 'ongs pa dang / da ltar bzhugs pa'i sangs rgyas bcom ldan 'das kyi dam tshig las 'gal ba'i kha na ma tho ba chen po byed pa ste/ gdon mi za bar mtshams med pa'i sems can dmyal ba chen por ltung ngo / /dge ba'i rtsa ba yongs su bsregs te rgyun bcad pas mkhas pa thams cad kyis yongs su spang bar bya'o/ /de dag gis de ltar kha na ma tho ba sdig pa chen po byas kyang g.yo dang sgyus 'tsho ste/ nga rgyal gyi dbang du gyur nas 'jig rten dag bslu ba'i phyir de dag kyang so so nas bdag cag kyang bla na med pa yang dag par rdzogs pa'i byang chub 'dod pa yin te/ bdag cag ni theg pa chen pos mngon par 'tshang rgya'o zhes zer ro/ /'di lta ste dper na mi zhig bdag gi mig phyung nas long bar gyur pa pha rol gzhan gyi lam mtshon pa'i phyir ri chen po la 'dzeg pa ni gnas med do/ /de bzhin du phyi ma ma 'ongs pa'i dus na rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze gdol pa can dag kyang de dang 'dra ste/ nga'i bstan pa la skyabs su song zhing rab tu byung ba chos kyi snod du gyur pa 'am/ chos kyi snod ma yin pa 'ang rung ba'i slob ma rnams la 'tshe zhing gnod par byed de/ gshe zhing spyo ba dang / brdeg pa dang / btson rar gzhug pa dang / 'tsho ba'i dbang po dang phral ba'i bar du byed de/ de ni 60.167a 'das pa dang / ma 'ongs pa dang / da ltar gyi sangs rgyas thams cad kyi dam tshig las 'gal ba'i kha na ma tho ba chen po byas pas dge ba'i rtsa ba thams cad bsregs shing rgyun bcad pas gdon mi za bar mtshams med pa'i sems can dmyal ba chen por ltung ngo / /de bas na mkhas pa rnams kyis spang bar bya'o/ /des de ltar kha na ma tho ba chen po byas kyang g.yo dang sgyus 'tsho zhing nga rgyal gyi dbang du gyur pa 'jig rten bslu ba'i phyir bdag cag ni bla na med pa'i byang chub tshol ba yin te/ bdag cag kyang theg pa chen pos mngon par 'tshang rgya'o zhes zer ro/ /de dag gis de ltar rab tu byung ba la 'tshe zhing gnod pa byas pas ma rabs tha ma'i lus kyang mi thob na theg pa rnam gnyis kyi byang chub pa 'am/ bla na med pa'i theg pa thob pa lta ci smos te skal ba chad pa yin no/ /rigs kyi bu gzhan yang sngon 'das pa'i dus na yul pan tsa la zhes bya ba yod de/ yul de'i srid 'dzin cing dbang byed do/ /de na dur sa chen po kha lam pa zhes bya ba shin du 'jigs pa'i gnas shig yod de/ gnod sbyin dang / srin po yang de na mang du gnas so/ /de dag tu phyin na 'jigs shing spu ldang ngo / /de yul de na nyes pa byas pa gsad pa zhig yod na rgyal po'i khrims kyis gsad pa de bcings ba lngas bcings nas kha lam pa zhes bya ba'i dur sa chen po der skyel te/ srin po dang / 'byung po rnams zar 'jug go/ /gsad pa gcig gis srog gi phyir skra dang kha spu bregs te chos gos kyi tshal bu zhig rnyed pa mgul du btags so/ /btson rdzis khrid de rgyal po'i khrims bzhin du bcing ba lngas bcings nas dur sa chen po der bskyal to/ /skyel ma phyir log nas de'i nub mo srin mo chen mo mtshon cha'i mig ces bya ba 'khor lnga stong dang bcas te dur khrod der lhags so/ /mi 60.167b des rgyang nas mthong nas rab tu 'jigs shing skrag go/ /de'i tshe srin mo des mi de bcing ba lngas bcings pa skra dang kha spu bregs pa chos gos kyi tshal bu mgul du btags pa mthong nas g.yas nas bskor te sti stang dang bcas pas phyag byas te thal mo sbyar nas tshigs su bcad pas 'di skad smras so/ /skyes bu khyod ni ma bsnyengs bde bar bzhugs/ /khyod la bdag cag gnod pa mi bgyid do/ /skra bregs chos gos gyon pa khyod mthong nas/ /bdag cag sangs rgyas rjes su dran par gyur/ /de'i tshe srin mo'i bu rnams kyis ma la 'di skad ces smras so/ /bdag cag shin du bkres skom pas/ /lus dang sems ni rnam par gzir/ /lus dang sems ni bde ba'i phyir/ /yum gyis mi de 'tshal du gnong / /de nas srin mos bu rnams la 'di skad ces smras so/ /sangs rgyas gang gI klung gi bye snyed kyi/ /rnam par grol ba'i rgyal mtshan gos gyon pa/ /'di la mi dge sdig pa'i sems bskyed na/ /nges par mtshams med sems can dmyal bar ltung / /de nas srin mo'i bu dang 'khor du bcas pas bskor te/ sti stang dang bcas pas phyag byas te thal mo sbyar nas tshigs su bcad pas 'di skad ces smras so/ /tshon can gyon pa khyod la so sor 'chags/ /bdag cag ji ste pha dang ma dag la/ /lus dang ngag yid mi dge byas sla yi/ /khyod la nam du 'ang gnod par mi bgyid do/ /de nas yang srin mo chen mo bong bu so zhes bya ba 'khor lnga stong dang bcas te dur khrod der lhags so/ /srin mo des kyang bcing ba lngas bcings pa skra dang kha spu bregs pa chos gos kyi tshal bu mgul du btags pa'i mi de mthong nas bskor te/ sti stang dang bcas pas phyag byas nas thal mo sbyar te tshigs su bcad pas 'di skad ces smras so/ /skyes bu bdag gis ma bsnyengs bde bar 60.168a bzhugs/ /khyod kyis mgul du btags pa'i tshal bu 'di/ /drang srong chen po'i rgyal mtshan na bza' lags/ /de la bdag cag mchod cing phyag 'tshal lo/ /de nas srin mo de'i bu rnams kyis ma la 'di skad ces smras so/ /mi yi sha dang khrag las zhim pa med/ /lus dang sems stobs skye zhing 'phel bar 'gyur/ /shin du dpa' la rtul phod 'jigs med pa/ /yum gyis de la bdag cag 'tshal du gnong / /de nas srin mos bu rnams la 'di skad ces smras so/ /lha mi'i longs spyod ldan pa thams cad kyang / /rab tu byung ba dag las thob pa'i phyir/ /chos gos gyon pa 'di la mchod pas na/ /bde ba tshad med pa yang 'thob par 'gyur/ /de nas srin mo'i bu rnams 'khor dang bcas pas bskor nas sti stang dang bcas pas phyag byas te/ thal mo sbyar nas tshigs su bcad de smras pa/ skra bregs chos gos gyon pa'i skyes bu la/ /bdag cag shin du gus par phyag 'tshal bas/ /rtag tu ma 'ongs pa yi dus kun du/ /sangs rgyas mthong zhing dad pa skye bar shog /de'i tshe yang srin mo chen mo khro gnyer 'phral skra can zhes bya ba 'khor lnga stong dang bcas te dur khrod der lhags so/ /srin mo des kyang bcing ba lngas bcings pa skra dang kha spu bregs pa chos gos kyi tshal bu mgul du btags pa'i mi de mthong nas g.yas nas bskor te/ sti stang dang bcas pas phyag byas nas thal mo sbyar te tshigs su bcad pas 'di skad ces smras so/ /drang srong chen po'i rgyal mtshan na bza' 'di/ /mkhas pa thams cad shin du bstod cing sngags/ /gang zhig 'di la mchod pa byed pa ni/ /srid pa'i bcings pa kun las nges par 'grol/ /de'i tshe srin mo de'i bu rnams kyis ma la 'di skad ces smras so/ /mi 'di'i lus kyi sha dang khrag kun ni/ / 60.168b rgyal po chen pos bdag cag rnams la bsngos/ /bdag cag 'di la za zhing thung du gnong / /mthu dang ldan nas ma yi g.yog kyang bgyi/ /de nas srin mos bu rnams la 'di skad ces smras so/ /chos gos btags pa gyon pa 'di dag ni/ /khyod kyis bza' ba'i rigs pa ma yin gyis/ /'di la mi dge sdig pa'i sems bskyed na/ /sdug bsngal chen po'i snod du gyur ta re/ /de nas srin mo'i bu rnams 'khor dang bcas pas bskor nas sti stang dang bcas pas phyag 'tshal te thal mo sbyar nas tshigs su bcad de smras pa/ khyod ni drang srong chen po'i gos gyon te/ /shin du bsod nams zhing du gyur pa yin/ /de bas bdag cag khyod la mchod pas na/ /srid pa'i bcings pa las ni thar bar shog /de'i tshe na yang srin mo chen mo mtshon cha'i gdong zhes bya ba yang 'khor lnga stong dang bcas te dur khrod der lhags so/ /srin mo des kyang mi de bcing ba lngas bcings pa skra dang kha spu bregs pa chos gos kyi tshal bu mgul du btags pa mthong nas bskor te sti stang dang bcas pas phyag 'tshal nas thal mo sbyar te tshigs su bcad pas 'di skad ces smras so/ /khyod ni btags pa'i chos gos gyon pas na/ /mya ngan 'da' ba'i bde ba thob tu nges/ /de bas khyod la bdag cag gnod byed na/ /sangs rgyas kun gyis rnam par smod kyis dogs/ /de nas srin mo de'i bu rnams kyis ma la 'di skad ces smras so/ /bdag cag rtag tu mi yi mdangs 'phrog cing / /de bzhin sha dang khrag kyang za 'thung bas/ /gzugs dang mthu ni yongs su 'phel ba'i phyir/ /bdag cag 'di la ci bder 'tshal du gnong / /de nas srin mo des bu rnams la 'di skad ces smraso/ /ji ste skra dang kha spu bregs pa yi/ /chos gos gyon pa 'di la gnod byas na/ /nges par mtshams med sems can dmyal bar ltung / /yun ring sdug bsngal chen po'i snod du 'gyur/ /de nas srin mo bu rnams dang 'khor du 60.169a bcas pas bskor nas sti stang dang bcas pas phyag 'tshal te/ thal mo sbyar nas tshigs su bcad pa 'di dag smras so/ /bdag cag sems can dmyal bas rab 'jigs te/ /de bas khyod kyi srog la gnod mi bgyid/ /bcings pa 'di yang bkrol te khyod gtang gis/ /dmyal ba'i sdug bsngal kun las thar bar shog /de'i tshe srin mo bu smad 'khor dang bcas pa snying rje'i sems bskyed nas mi de'i bcings pa bkrol te bshags pa dang / spro ba bskyed pa byas nas phyir btang ngo / /mi de phyis nyin snga rab tu rgyal po'i drung du 'ongs nas dngos po de dag rgyus kyis zhib tu gsol to/ /de'i tshe rgyal po dgra las rgyal ba 'khor dang bcas pas de skad thos nas dngangs te ngo mtshar rmad du gyur nas khrims su bcas te yul gyi mi rnams la bkas btags pa/ deng phyin chad nga'i yul na gnas pa sangs rgyas kyi slob ma tshul khrims srung ngam/ tshul khrims nyams sam/ chung ngu na tshul khrims med par skra dang kha spu bregs te ngur smrig gyon pa la su zhig kyal ka 'am gnod pa byas na thams cad gsad do zhes khrims su byas so/ /de'i rgyu de'i rkyen gyis mi mang po yang bsod nams la dga' bas thams cad bags kyis bstan pa la phyogs nas 'dzam bu'i gling na rgyal po de dbang ba'i mi thams cad bsam pa des pas dkon mchog gsum la skyabs su gsol to/ /rigs kyi bu de ltar 'das pa'i dus na srin mo yi dgas kyi rgyud du skyes pa/ mdangs 'phrog pa sha dang khrag za ba/ sdig pa la brkam pa/ snying rje med pa yang de lta bu'i tshul khrims med pa skra dang kha spu bregs pa chos gos kyi tshal bu mgul du btags pa de la bskor ba dang / sti stang dang / rim gro dang / phyag bya ba dang / mchod pa dang / tshigs su bcad pas bstod da/ gnod pa byed pa'i sems med na phyi ma ma 'ongs pa'i dus su rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze 60.169b gdol pa can la sogs pa gdug pa'i sems 'chang zhing snying rje med pa/ gnod sbyin dang / srin po bas thu bar sdig pa byed do/ /glen zhing gti mug can dge ba'i rtsa ba yongs su gcod pa de nga'i bstan pa la rab tu byung ba'i chos kyi snod du gyur pa dang / chos kyi snod du ma gyur pa yang rung / skra dang kha spu bregs te gos ngur smrig gyon pa'i slob ma la dad pa dang bkur sti mi byed de/ de la gnod pa dang / gshe zhing rdeg pa dang / nan la 'dar zhing btson rar gzhug pa dang / 'tsho ba'i dbang po dang phral ba'i bar du byed pa de ni 'das pa dang / ma 'ongs pa dang / da ltar gyi sangs rgyas bcom ldan 'das thams cad kyis bstan pa'i kha na ma tho ba chen po dang 'gal bar byed pa ste/ dge ba'i rtsa ba yongs su bsregs nas rgyun bcad pas gdon mi za bar mtshams med pa'i sems can dmyal ba chen por ltung bar 'gyur bas mkhas pa rnams kyis yongs su spang bar bya'o/ /yang rigs kyi bu sngon rgyal po bsod nams chen po zhes bya ba zhig yod de/ rgyal po de snying rje che bas nyes pa byas pas gsad pa la thug pa dag kyang gsod du mi dga'o/ /de'i tshe blon po blo dang ldan pa gcig gis rgyal po la 'di skad ces gsol to/ /rgyal po thugs ngan ma mdzad cig /rgyal pos kyang srog gcod pa'i sdig pa mi 'thob la/ gshed mas kyang 'gum mi 'tshal bar mi de 'gum pa'i thabs mchis so zhes gsol nas blon po chen po des gsad pa la thug pa'i mi de bal glang rmis pa ma rungs pa'i mdun du bzhag go/ /de nas bal glang rmis pa des mi de snas bzung ste yar bteg nas sa la brdabs pa las/ mi de gos dmar po gyon pa mthong nas chos gos yin no snyam ste/ bsam pa dag pa'i dad pa skyes nas dal gyis sa la bzhag cing de la 'gyod nas sa la btud te/ mi de'i rkang pa la snas 'phyi zhing sti stang dang bcas pas mig mi 'dzums par mi de la lta'o/ / 60.170a blon po chen po des de lta bur gyur pa mthong nas brgyugs te/ rgyal po de la de bzhin du gsol to/ /rgyal pos de skad ces thos nas dngangs te ngo mtshar rmad du gyur nas/ mi yongs la deng phyin chad dkon mchog gsum la sti stang gyis shig par bkas btags so/ /de'i rgyu de'i rkyen gyis srog gcod pa yang spangs te 'dzam bu'i gling la dbang byed par gyur to/ /ltos rigs kyi bu de ltar 'das pa'i dus na bal glang rmis pa byol song gi skye gnas su gyur pa yang chos gos la gus pas sdig mi byed na/ ma 'ongs pa'i dus na rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze gdol pa can la sogs pa sems gdug pa can snying rje'i sems med pa/ bal glang rmis pa bas thu ba'i sdig pa'i las byed do/ /bus pa glen pa can de dag nga'i bstan pa la rab tu byung ba chos kyi snod du gyur pa 'am/ chos kyi snod ma yin pa 'ang rung / skra dang kha spu bregs te gos ngur smrig gyon pa la dad pa dang gus pa mi byed de/ de la gnod pa dang / gshe zhing spyo ba dang / gzhu zhing 'tshog pa dang / btson rar gzhug pa dang / 'tsho ba'i dbang po dang phral ba'i bar du byed pas 'das pa dang / ma 'ongs pa dang / da ltar bzhugs pa'i sangs rgyas bcom ldan 'das thams cad kyis bstan pa'i kha na ma tho ba chen po dang 'gal bar byed pas dge ba'i rtsa ba bsregs nas rgyun gcad pas gdon mi za bar mtshams med pa'i sems can dmyal ba chen por ltung bar 'gyur bas mkhas pa rnams kyis spang bar bya'o/ /gal te rgyal rigs gdol pa can nas dge sbyong dang / bram ze gdol pa can gyi bar du sdig pa'i 'khor lo gsum po 'di dang ldan pas/ de'i rgyu de'i rkyen gyis yul srung ba'i lha dang / klu dang / gnod sbyin la sogs pa dkon mchog gsum la bsam pa dag cing dad pa mi phyed pa thams 60.170b cad rgyal rigs gdol pa can nas dge sbyong dang / bram ze gdol pa can gyi bar du gdol pa de dag la khro zhing zhe sdang ba'i sems skye ba nas gzhung de bzhin du rgyas par rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa gdol pa can de thams cad ring por mi thogs par lus kyi yan lag dum bur chad cing zhag mang du lce ldibs pa dang / shin du mi bzad pa'i na ba dang tsha ba'i sdug bsngal chen po myong bar 'gyur ba dang / 'chi 'phos nas kyang mtshams med pa'i sems can dmyal ba chen por ltung bar 'gyur ro/ /rigs kyi bu gzhan yang phyi ma ma 'ongs pa'i dus na sangs rgyas kyi zhing 'dir rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze gdol pa can la sogs pa sdig pa'i bshes gnyen la sten pa dge ba'i rtsa ba chung zhing zhan pa nas de bzhin du rgyas par 'jig rten phyi ma'i sdug bsngal ma mthong ba dag phyogs bzhi'i dge 'dun gyi nor dang / gtsug lag khang gi nor dang / gtsug lag tu bsngos pa'i nor dang / skyed shing gi ra ba dang / skyed shing gi ra bar bsngos pa'i nor dang / zhing 'brog dang / zhing 'brog tu bsngos pa'i nor dang / gtsug lag khang so so'i rung bar byed par gtogs pa'i skyes pa dang / bud med phrogs pa dang / nor phyugs phrogs pa dang / gos dang / bsod snyoms phrogs pa dang / gding ba dang / khri stan phrogs pa dang / nad kyi rkyen sman phrogs pa dang / de ma yin pa'i 'tsho ba'i yo byad rnam pa sna tshogs la 'phrog pa ste/ de ltar phyogs bzhi'i dge 'dun la phul ba'i nor de ni tshul khrims dang ldan pa/ yon tan dang ldan pa/ brtson 'grus rtsom pa/ slob pa dang mi slob pa la nan tan du byed pa 60.171a nas mtha'i gnas byas pa'i 'bras bu thob pa'i bar gyi dge slong yongs su dag pa spyod du gnang bar zad na/ rgyal rigs gdol pa can nas dge sbyong dang / bram ze gdol pa can gyi bar du gdol pa can de dag gis mthu dang dpung snyems te nan gyis phrogs nas/ dge slong tshul khrims dang ldan pa yongs su dag pa dag ni spyod du mi ster gyi/ tshul khrims nyams pa sdig pa spyod pa'i dge slong khyim na gnas shing khyim pa'i las byed pa dag la byin nas kha cig ni thun mong du spyod/ kha cig ni khud par yang spyod do/ /tshul khrims nyams pa'i dge slong dag gis de dag thos nas kyang kha cig ni thun mong du spyod/ kha cig ni khud par yang spyod do/ /kha cig ni khyim pa la byin nas de dang yang thun mong du spyod do/ /de'i rgyu de'i rkyen gyis yul srung ba'i lha dang / klu dang / gnod sbyin la sogs pa dkon mchog gsum la bsam pa dag cing dad pa mi phyed pa dag rgyal rigs gdol pa can nas dge sbyong dang / bram ze gdol pa can gyi bar du gdol pa can de dag la khros te zhe sdang gi sems skye ba nas de bzhin du rgyas par rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa gdol pa can de dag ring po mi thogs par lus kyi yan lag dum bur chad pa dang / zhag mang du lce ldibs pa dang / shin du mi zad pa'i na ba dang tsha ba'i sdug bsngal chen po myong zhing 'chi 'phos nas kyang gdon mi za bar mtshams med pa'i sems can dmyal ba chen por ltung bar 'gyur ro/ /rigs kyi bu gzhan yang ma 'ongs pa'i dus na sangs rgyas kyi zhing 'dir rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze gdol pa can la sogs pa sdig pa'i bshes gnyen la sten pa dge ba'i rtsa ba chung zhing zhan pa nas de bzhin du rgyas par 60.171b 'jig rten phyi ma'i sdug bsngal gyi 'bras bu ma mthong ba dag gis nga'i bstan pa la rab tu byung ba/ shes rab rno ba mang du thos pa/ tshig dang don rdzogs par smra ba dang ldan pa/ nyan thos kyi theg pa'i chos ston nus pa 'am/ rang sangs rgyas kyi theg pa'i chos chud cing ston nus pa 'am/ bla na med pa'i theg pa'i chos ston nus shing rgyas par sems can la phan pa dang / bde ba'i don du ston nus pa'i chos smra ba la spyo zhing gshe ba dang / smad pa dang / 'phya zhing skur pa dang / dbang za ba dang / gnod pa byed cing chos ston pa'i bar chad byed do/ /de'i rgyu de'i rkyen gyis yul srung ba'i lha dang / klu dang / gnod sbyin la sogs pa dkon mchog gsum la bsam pa dag cing dad pa mi phyed pa dag rgyal rigs gdol pa can nas dge sbyong dang / bram ze gdol pa can gyi bar du gdol pa can de dag la khros te/ zhe sdang gi sems skye ba nas gzhung de bzhin du rgyas par rgyal rigs gdol pa can nas blon po dang / khyim bdag dang / dge sbyong dang / bram ze la sogs pa gdol pa can de dag thams cad ring po mi thogs par bdag gi lus dum bur chad pa dang / zhag mang du lce ldibs pa dang / shin du mi bzad pa'i na ba dang tsha ba'i sdug bsngal chen po myong ba dang / 'chi 'phos nas kyang gdon mi za bar mtshams med pa'i sems can dmyal ba chen por ltung bar 'gyur ro/ /rigs kyi bu gzhan yang phyi ma ma 'ongs pa'i dus na sangs rgyas kyi zhing 'dir rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa gdol pa can sdig pa'i bshes gnyen la sten pa dge ba'i rtsa ba zhan cing chung ba nas de bzhin du rgyas par 'jig rten phyi ma'i sdug bsngal gyi 'bras bu la 'jigs par mi lta ba dag phyogs bzhi'i dge 'dun la phul ba'i nor dang / 60.172a gtsug lag khang gi zhing 'brog dang / nor phyugs dang / rin po che dang / me tog gi shing dang / 'bras bu'i shing dang / kha dog gi shing dang / bsil grib dang / bsung dang / sman gyi shing la sogs pa dang / de ma yin pa 'tsho ba'i yo byad rnam pa sna tshogs la 'phrog cing nga'i slob ma tshul khrims dang ldan pa/ yon tan dang ldan pa/ brtson 'grus rtsom pa/ slob pa dang mi slob pa la nan tan byed pa nas mtha'i gnas byas pa'i 'bras bu'i bar du thob tu nye ba'i dge slong yongs su dag pa 'ba' zhig gis spyod du dbang bar zad na/ rgyal rigs gdol pa can dang / dge sbyong dang bram ze gdol pa can la sogs pa mthu dang dpung snyems te nan gyis phrogs sam/ gzhan 'phrog tu bcug gam/ bdag spyod dam/ gzhan spyod du bcug kyang rung / de'i rgyu de'i rkyen gyis yul srung ba'i lha dang / klu dang / gnod sbyin la sogs pa dkon mchog gsum la bsam pa dag cing dad pa mi phyed pa dag rgyal rigs gdol pa can dang / dge sbyong dang / bram ze gdol pa can la sogs pa la khros te/ zhe sdang gi sems skye ba nas de bzhin du rgyas par rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze gdol pa can la sogs pa de dag thams cad ring po mi thogs par lus kyi yan lag dum bur chad pa dang / zhag mang du lce ldibs pa dang / shin du mi zad pa'i na ba dang tsha ba'i sdug bsngal chen po myong ba dang / 'chi 'phos nas kyang gdon mi za bar mtshams med pa'i sems can dmyal ba chen por ltung bar 'gyur ro/ /rigs kyi bu gzhan yang ma 'ongs pa'i dus na sangs rgyas kyi zhing 'dir rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze gdol pa can la sogs pa sdig pa'i bshes gnyen la sten pa dge ba'i rtsa ba chung zhing zhan 60.172b pa bsam pa ma dag pa g.yo dang sgyus 'tsho ba/ glen pa gti mug can cung zad kyi shes pa tsam snyems pa/ tshig la bden pa med pa/ dge ba'i bshes gnyen spong ba/ sdig pa'i grogs po la sten cing mi dge ba spyod pa/ 'phags pa'i chos la the tsom za ba/ 'jig rten phyi ma'i sdug bsngal gyi 'bras bu la 'jigs par mi lta ba dag sdig pa'i sdom pa srung bar dga' ba/ srog gcod pa nas ngan par lta ba'i bar du mos pa/ nga rgyal gyis mngon par zin pa/ 'jig rten pa dag slu ba/ bdag ni tshul khrims kyi sdom pa la gnas pa'o zhes khas 'che ba'i rgyal rigs gdol pa can dang / dge sbyong dang / bram ze gdol pa can la sogs pa dag /thabs rnam pa sna tshogs kyis nga'i bstan pa 'jig par byed cing nga'i bstan pa la rab tu byung ba dag la yang dang yang du khro zhing gshe ba dang / spyo zhing smod pa dang / nan la bor ba dang / btson rar gzhug pa dang / lus kyi yan lag gtub pa dang / 'tsho ba'i dbang po dang phral ba'i bar du byed de/ ngas bstan pa'i chos la yid mi ches pa/ mchod rten 'jig pa/ gtsug lag khang 'jig pa/ dge slong dag khyim par 'bebs pa/ skra dang kha spu 'dreg cing gos ngur smrig gyon pa'i bar chad byed pa las rnam pa sna tshogs byed du 'jug cing 'khol ba ste/ de'i rgyu de'i rkyen gyis yul srung ba'i lha dang / klu dang / gnod sbyin la sogs pa dkon mchog gsum la bsam pa dag cing dad pa mi phyed pa dag rgyal rigs gdol pa can dang / dge sbyong dang / bram ze gdol pa can la khros te zhe sdang gi sems bskyed pa nas de bzhin du rgyas par rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa gdol pa can de dag ring po mi thogs par lus kyi yan lag kun dum bur chad pa dang / zhag mang du lce ldibs pa dang / shin du mi bzad pa'i na 60.173a ba dang tsha ba'i sdug bsngal chen po myong ba dang / 'chi 'phos nas kyang gdon mi za bar mtshams med pa'i sems can dmyal bar ltung bar 'gyur ro/ /rigs kyi bu rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa 'di dag sdig pa'i 'khor lo rnam pa bcu po gsungs pa 'di las 'ga' zhig dang ldan na yang dge ba'i rtsa ba sngar bsags pa thams cad thal ba bzhin du tshig ste med par 'gyur la/ ring por mi thogs par lus kyi yan lag dum bur chad pa dang / zhag mang du lce ldibs pa dang / shin du mi bzad pa'i na ba dang tsha ba'i sdug bsngal chen po myong ba dang / shi nas kyang mtshams med pa'i sems can dmyal ba chen por ltung bar 'gyur ro/ /rgyal rigs gdol pa can dang / blon po dang / khyim bdag dang / tshong dpon dang / dge sbyong dang / bram ze la sogs pa gdol pa can 'di dag ma 'ongs pa'i dus na mi ma rabs tha ma'i lus kyang thob par dka' na theg pa rnam pa gnyis kyi byang chub bam bla na med pa'i byang chub thob pa lta ci smos te skal ba med pa med do/ /sdig pa can de theg pa chen po'i ming yang thos par dka' na bla na med par mngon par 'tshang rgya ba'i 'bras bu thob pa lta ci smos te/ gang zag de ni yun du bdag ma rung la gzhan yang ma rung bar byas pas sangs rgyas thams cad kyis kyang bskyab mi spyod do/ /rigs kyi bu 'di lta ste/ 'bru'i mar 'tshir ba'i las byed pa ni 'bru re re las srin bu re rer gyur te btsir nas mar 'byung ngo / /khyod ltos shig mar 'tshir ba'i las byed pa de nyin gcig la sems can ji snyed cig gsod par 'gyur/ gal te 'bru mar 'tshir ba de mar 'tshir ba'i gnas rnam pa bcu bcas nas nyin zhag gcig la gnas de re rer yang 'bru khal stong stong rgyun mi 60.173b 'chad par lo stong tshang bar 'tshir na gang zag des srog gcod pa'i kha na ma tho ba'i las rab tu mang ba yin nam/ byang chub sems dpa' sems dpa' chen po sa'i snying pos gsol pa/ rab tu mang ngo / /bcom ldan 'das rab tu mang ngo / /bde bar gshegs pa gang zag des srog gcod pa yang tshad ma mchis/ dpag tu ma mchis la kha na ma tho ba'i las kyang gzhal bar ram/ rtsi bar ram/ bgrang bar ram/ dper yang mi bzod de/ de bzhin gshegs pa nyag gcig gis mkhyen gyi gzhan gyis 'tshal ba ma lags so/ /bcom ldan 'das kyis bka' stsal pa/ rigs kyi bu 'di lta ste/ gal te mi la la zhig gis nor dang khe'i phyir smad 'tshong ma'i gnas rnam pa bcu bcas te/ gnas de gcig tu yang bud med smad 'tshong ma stong stong bzhag nas bud med de dag so so nas rgyan rnam pa sna tshogs kyis brgyan te/ skye bo bslus nas 'dod chags kyi las rgyun mi 'chad par lo stong gi bar du byed du bcug na/ gang zag de'i kha na ma tho ba'i sdig pa yang gzhal du med de/ brtsi bas sam/ bgrang bas sam/ dper yang mi bzod do/ /'bru mar 'tshir ba'i gnas bcu po'i sdig pa de ni smad 'tshong ma'i gnas gcig bcas pa'i sdig dang mnyam mo/ /rigs kyi bu gzhan yang 'di lta ste/ gang zag gang la la zhig nor dang khe'i phyir chang 'tshong ba'i gnas bcu bcas te/ gnas de so sor rnam pa sna tshogs kyi rgyan gyis shin du brgyan nas gnas de re rer yang thabs rnam pa sna tshogs kyis chang dad che ba'i mi stong stong brid de chang blud nas nyin mtshan du rgyun mi 'chad par lo stong gi bar du rtse na/ gang zag de'i sdig pa yang dpag tu med de/ brtsi bas sam/ bgrang bas sam/ dper yang mi bzod do/ /gong du bshad pa'i smad 'tshong ma'i gnas 60.174a bcu po'i sdig pa de chang 'tshong ba'i gnas bcas pa'i sdig gcig dang mnyam mo/ /rigs kyi bu gzhan yang 'di lta ste/ gang zag la la zhig nor dang khe'i phyir shan pa'i gnas rnam pa bcu bcas te/ gnas de re rer yang nyin zhag gcig la bal glang dang / lug dang / rnga mo dang / sha ba dang / bya dang / phag stong stong rgyun mi 'chad par lo stong gi bar du bsad na gang zag de'i kha na ma tho ba'i sdig kyang gzhal du med de/ brtsi bas sam/ bgrang bas sam/ dper yang mi bzod do/ /de ltar sngar bshad pa'i chang 'tshong ba'i gnas bcu po'i sdig pa de shan pa'i gnas gcig bcas pa'i sdig dang mnyam mo/ /'di ltar shan pa'i gnas bcu po'i sdig de rgyal rigs gdol pa can nas/ dge sbyong dang / bram ze la sogs pa'i gdol pa can de dag sdig pa'i 'khor lo bcu po las 'ga' zhig dang ldan na nyin zhag gcig gi kha na ma tho ba'i sdig kyang snga ma dang mnyam mo/ /de nas bcom ldan 'das kyis tshigs su bcad de bka' stsal pa/ mar 'tshir gnas sdig bcu po dag /smad 'tshong gnas sdig gcig dang mnyam/ /smad 'tshong gnas sdig bcu po dag /chang 'tshong gnas sdig gcig dang mnyam/ /chang 'tshong gnas ni bcu po dag /shen pa'i gnas sdig gcig dang mnyam/ /shen pa'i gnas ni bcu bcas pas/ /rgyal po gdol can sdig gcig mnyam/ / bam po lnga pa/ de nas byang chub sems dpa' sems dpa' chen po sa'i snying pos bcom ldan 'das la 'di skad ces gsol to/ /btsun pa bcom ldan 'das gal te rgyal rigs dge ba 'am/ blon po dge ba dang / khyim bdag dge ba dang / tshong dpon dge ba dang / dge sbyong dge ba dang / bram ze dge ba dag bdag shin du skyong zhing 60.174b gzhan dag kyang shin du skyong la/ 'jig rten phyi mas kyang 'dzem pa/ sangs rgyas kyi bstan pa la gnas pa/ rab tu byung ba chos kyi snod du gyur pa 'am/ chos kyi snod du ma gyur pa 'am/ chung ngu na tshul khrims ma mchis pa 'ang rung ste skra dang kha spu bregs nas gos ngur smrig 'tshal ba la shin du sti stang dang bcas te rim gro dang mchod pa bgyid do/ /gzhan yang nyan thos kyi theg pa'i chos dang / rang sangs rgyas kyi theg pa'i chos dang / theg pa chen po'i chos la sti stang dang bcas pas mchod pa nyan pa dang ba gzungs su 'dzin pa mchod pa byed pa theg pa chen po la gnas shing tshul khrims dang ldan pa yon tan dang ldan pa/ brtson 'grus rtsom zhing nan tan du bgyid pa nas 'bras bu la gnas pa'i bar gyi gang zag rjes su srung zhing mthu stobs bstang ba dang / zhu zhing 'dri ba dang / nyan cing 'dzin pa dang / dga' bzhin du gtam zer zhing gleng ba dang / tshul khrims nyams pa sdig pa spyod pa'i dge slong ring du spong ba dang / phyogs bzhi'i dge 'dun gyi nor la pha rol po gzhan chud gzon du mi gzhug cing shin du srung ba dang / phyogs bzhi'i dge 'dun gyi nor dang / mchod rten gyi nor la bdag kyang mi rku/ gzhan yang rkur mi 'dzud pa dang / bdag mi spyod/ gzhan yang spyod du mi 'dzud pa dang / theg pa rnam gsum gyi chos smra ba la sti stang dang bcas pas mchod cing mthus bstang ba dang / pha rol po gzhan dag 'phya zhing skur pa dang smod du mi 'dzud pa dang / de la rim gro bgyid cing spro ba skyed pa dang / gang rab tu byung ba dag dang / sangs rgyas kyi bstan pa'i chos la dad pas srung zhing rjes su 'dzin pa dang / mchod rten mi 'jig pa dang / dge 'dun gyi gnas dang / gtsug lag khang yang shin du srung 60.175a ba dang / skra dang kha spu bregs te gos ngur smrig gyon pa'i rab tu byung ba'i gang zag la mi brnyas mi smod pa dang / sdig pa'i 'khor lo rnam pa bcu la bdag mi spyod/ pha rol po gzhan sdig pa'i 'khor lo bcu las ring du gyur cing rgyal po snga ma'i chos dang lugs kyis rgyal po'i srid 'tsho ba dang / dkon mchog gsum gyi gdung 'tshob cing dad cing rgyas par byed pa dang / rtag tu dge ba'i bshes gnyen la sten cing byams pa'i sems kyis mi yongs la skyong ba dang / thams cad la ci dang cis 'dul ba bzhin du de dang de'i chos kyis 'dul zhing ston te/ /ngan par lta ba spangs nas yang dag pa'i chos la nan tan byed du 'dzud pa'i rgyal rigs dge ba nas bram ze dge ba'i bar du dge ba de dag bsod nams ji snyed cig thob cing sdig pa ji snyed cig 'byang bar 'gyur/ bcom ldan 'das kyis bka' stsal pa/ rigs kyi bu gal te gang zag mthu chen po dang ldan pa gcig 'jig rten du mngon par byung ste/ snga dro'i dus su yang rin po che sna bdun gyis 'dzam bu gling yongs su bkang nas sangs rgyas dang dge 'dun la 'bul ba dang / nyi ma'i gung la yang rin po che sna bdun gyis 'dzam bu'i gling yongs su bkang ste sangs rgyas dang dge 'dun la 'bul ba dang / phyi dro'i dus su yang rin po che sna bdun gyis 'dzam bu'i gling yongs su bkang ste sangs rgyas dang dge 'dun la 'bul ba dang / de bzhin du nyin re rer yang rgyun mi 'chad par lo brgya stong gi bar du sbyin pa byin na gang zag de'i bsod nams kyi tshogs de mang ba yin nam/ byang chub sems dpa' sems dpa' chen po sa'i snying pos gsol pa/ shin du mang ngo / /bcom ldan 'das shin du mang ngo / /bde bar gshegs pa gang zag de'i bsod nams kyi tshogs ni tshad ma mchis/ dpag tu ma mchis te/ brjod pa 'am/ brtsi ba 'am/ bgrang ba 'am/ dper yang mi 60.175b bzod de/ sangs rgyas nyag gcig gis mkhyen gyi gzhan gyis ni ma lags so/ /bcom ldan 'das kyis bka' stsal pa/ rigs kyi bu de de bzhin no/ /de de bzhin te/ khyod kyis smras pa de bzhin no/ /gal te rgyal rigs dge ba nas bram ze dge ba'i bar du gang zhig sdig pa'i 'khor lo rnam pa bcu po bdag kyang mi spyod la pha rol po gzhan spyod pa dag sdig pa'i 'khor lo bcu spong bar yang gzhan la ston pa'i bsod nams kyi phung po ni bsod nams kyi phung po snga ma bas tshad med/ dpag tu med/ brjod par ram/ brtsi bas sam/ bgrang bas sam/ dper yang mi bzod par che'o/ /rigs kyi bu gzhan yang 'di lta ste/ gang zag mthu chen po dang ldan pa gcig 'jig rten du mngon par byung ste phyogs bzhi'i dge 'dun gyi phyir gtsug lag khang dang / gnas khang shin du bzang zhing yangs pa gling bzhi dang mnyam pa brtsigs nas gnas de dag kun du khri stan dang / na bza' dang / bsod snyoms dang / snyun gyi rkyen sman dang / 'tsho ba'i yo byad thams cad dang ldan par bshams te de bzhin gshegs pa dang / nyan thos dang / byang chub sems dpa'i nye gnas chen po'i 'khor thams cad de na bzhugs pa la/ brtson 'grus su dge ba'i phyogs rnam pa sna tshogs la nan tan byed cing nyin mtshan le lo med par lo bye ba khrag khrig brgya stong gi bar du mchod pa dang bsnyen bkur rgyun mi 'chad par byed na/ gang zag de'i bsod nams kyi phung po shin du mang ba yin nam/ byang chub sems dpa' sems dpa' chen po sa'i snying pos gsol pa/ shin du mang ngo / /bcom ldan 'das shin du mang ngo / /bde bar gshegs pa gang zag de'i bsod nams kyi phung po ni tshad ma mchis/ dpag tu ma mchis te/ brjod par ram/ rtsi bas sam/ bgrang bas sam/ dper yang mi bzod de/ sangs rgyas nyag gcig 60.176a gis mkhyen gyi gzhan gyis ni ma lags so/ /bcom ldan 'das kyis bka' stsal pa/ de de bzhin no/ /de de bzhin te/ khyod kyis smras pa bzhin no/ /rigs kyi bu gzhan yang 'di lta ste gang zag mthu chen po dang ldan pa gcig 'jig rten du mngon par byung ste phyogs bzhi'i dge 'dun gyi phyir gtsug lag khang dang gnas khang shin du bzang la yangs pa/ gling bzhi pa bcu dang mnyam pa brtsigs te/ gnas de dag kun du khri stan dang / na bza' dang / bsod snyoms dang / gsos sman dang / 'tsho ba'i yo byad thams cad dang ldan par bshams te de bzhin gshegs pa dang / nyan thos dang / byang chub sems dpa'i dge 'dun chen po'i nye gnas thams cad de na bzhugs pa la brtson 'grus su dge ba'i phyogs rnam pa sna tshogs la nan tan byed cing nyin mtshan le lo med par lo brgya stong bye ba khrag khrig gi bar du mchod pa dang / bsnyen bkur rgyun mi 'chad par byed na/ gang zag de'i bsod nams kyi phung po shin du mang ba yin nam/ byang chub sems dpa' sems dpa' chen po sa'i snying pos gsol pa/ shin tu mang ngo / /bcom ldan 'das shin du mang ngo / /bde bar gshegs pa gang zag de'i bsod nams kyi phung po ni tshad ma mchis/ dpag tu ma mchis te/ brjod par ram/ rtsi bas sam/ bgrang bas sam/ dper yang mi bzod de/ sangs rgyas nyag gcig gis mkhyen gyi gzhan gyis ni ma lags so/ /bcom ldan 'das kyis bka' stsal pa/ rigs kyi bu de de bzhin no/ /de de bzhin te/ ji ltar khyod kyis smras pa bzhin no/ /rigs kyi bu gzhan yang 'di lta ste/ gang zag mthu chen po dang ldan pa gcig 'jig rten du mngon par byung ste/ sangs rgyas kyi ring bsrel gyi phyir mchod rten shin du mdzes pa/ mtho zhing yangs pa/ stong gsum gyi stong chen po'i 'jig rten gyi khams dang mnyam pa brtsigs 60.176b la sngar bshad pa bzhin phyogs bzhi'i dge 'dun gyi phyir gtsug lag khang dang / gnas khang brtsigs pa'i bsod nams kyi phung po bas sangs rgyas kyi ring bsrel gyi phyir mchod rten brtsigs pa'i bsod nams kyi phung po che ste/ brgya'i char yang nye bar mi 'gro ba nas stong gi char yang nye bar mi 'gro'o/ /brgya stong gi char yang nye bar mi 'gro'o/ /bye ba'i char yang nye bar mi 'gro'o/ /khrag khrig gi char yang nye bar mi 'gro'o/ /grangs kyi char ram/ rtsis kyi char ram/ dpag pa'i char ram/ dpe'i char ram/ rgyu'i char yang nye bar mi 'gro'o/ /rigs kyi bu gzhan yang 'di lta ste/ gal te pha rol du phyin pa thob pa/ rnam par grol ba brgyad dang ldan pa bsam gtan la snyoms par zhugs pa'i dgra bcom pa chen po sha stag gis stong gsum gyis stong chen po'i 'jig rten gyi khams 'dir yongs su gang ba ni 'di lta ste/ 'bras kyi ljang bu 'am/ til lam/ 'od ma 'am/ 'dam bu 'am/ bu ram shing gi tshal lta bur gyur la/ de dag thams cad bcing ba lngas bcings nas lo bye ba brgya stong snyed lon pa las mthu chen po dang ldan pa'i gang zag gcig 'jig rten du mngon par byung ste/ bsod nams 'dod pa'i phyir de dag gi bcings pa thams cad bkrol nas dgra bcom pa de dag thams cad spos chus bkrus te/ chos gos dang / lhung bzed lo brgya stong gi bar du phul nas/ gnas khang dang / khri stan dang / gos dang / bsod snyoms dang / nad kyi gsos sman dang / 'tsho ba'i yo byad rnam pa sna tshogs kyang yid bzhin du byin la/ dgra bcom pa de dag mya ngan las 'das nas kyang mchod pa byas te/ bsregs nas de dag gi ring la bsdus nas rin po che sna bdun gyi mchod rten gyi nang du bcug go /gzhan yang rin po che'i rgyal mtshan dang / ba dan dang / gdugs dang / spos dang / me tog dang / rol mo rnam pa sna tshogs kyis mchod pa'i 60.177a bsod nams kyi phung po bas sangs rgyas kyi ring bsrel gyi phyir mchod rten brtsigs pa'i bsod nams kyi phung po mang ste/ dgra bcom pa'i bcing ba bkrol te mchod pa byas pa'i bsod nams kyis brgya'i char yang nye bar mi 'gro'o/ /stong gi char yang nye bar mi 'gro'o/ /brgya stong gi char yang nye bar mi 'gro'o/ /bye ba'i char yang nye bar mi 'gro'o/ /khrag khrig gi char yang nye bar mi 'gro ba nas/ rtsis kyi char ram/ grangs kyi char ram dpag pa'i char ram/ dpe'i char ram/ rgyu'i char yang nye bar mi 'gro'o/ /rigs kyi bu gal te rgyal rigs dge ba nas bram ze dge ba'i bar du gang gis sdig pa'i 'khor lo bcu po bdag kyang mi byed la/ gzhan dag kyang sdig pa'i 'khor lo bcu po ma spyod cig par gros 'debs na de'i bsod nams kyi phung po ni bsod nams kyi phung po snga ma gang bas kyang tshad med/ dpag tu med/ brjod du med par che ste/ ji snyed kyi bsod nams skyes pa de snyed kyi sdig kyang yongs su 'byang bar 'gyur ro/ /rigs kyi bu gal te rgyal rigs dge ba 'am/ blon po dge ba 'am/ khyim bdag gam/ tshong dpon nam/ dge sbyong ngam/ bram ze dge ba gang zhig ma 'ongs pa'i dus lnga brgya'i tha ma la dam pa'i chos rnam par 'jig tu nye ba na ngas bstan pa'i chos kyi mig shin du srung zhing bdag kyang shin du sdom la/ pha rol po gzhan yang srung ba/ 'jig rten phyi ma'i bag byed pa nga'i bstan pa la rab tu byung ba'i slob ma chos kyi snod du gyur pa 'am chos kyi snod du ma gyur pa yang rung / mthar ni tshul khrims med pa yang rung ste/ skra dang kha spu bregs nas gos ngur smrig gyon pa la shin du bag byed cing sti stang dang bcas pas mchod de gnod pa mi byed dam/ gzhan yang theg pa gsum gyi dam pa'i chos shin du srung zhing nyan te 'dzin pa dang / nyan thos kyi chos la sti stang byed pa na rang sangs rgyas kyi theg pa'i chos dang theg pa chen po'i chos la 60.177b mi 'phya mi skur pa dang / rang sangs rgyas kyi theg pa pa dang / theg pa chen po la phrag dog mi skyed pa dang / rang sangs rgyas kyi theg pa'i chos la rim gro byed de nyan cing 'dzin pa na/ nyan thos kyi theg pa dang / theg pa chen po'i chos la mi 'phya mi skur/ nyan thos kyi theg pa dang / theg pa chen po la phrag dog mi skyed pa dang / theg pa chen po'i chos la rim gro byed de nyan cing 'dzin pa na nyan thos kyi theg pa dang / rang sangs rgyas kyi theg pa'i chos la mi brnyas/ mi skur cing / nyan thos kyi theg pa pa dang / rang sangs rgyas kyi theg pa la phrag dog mi skyed la/ nyan thos kyi theg pa dang rang sangs rgyas kyi theg pa'i chos mngon du mi byed do/ /theg pa chen po'i chos yang dag pa nyid mngon du byed pa dang / theg pa chen po la gnas pas tshul khrims dang ldan pa/ yon tan dang ldan pa/ brtson 'grus rtsom pa nas 'bras bu la gnas pa'i bar du nan tan byed pa'i gang zag la rtag tu bsnyen bkur byed cing g.yog dang / mchod pa dang / dad pa'i sems kyis bkur sti byed de 'dri ba dang / nyan pa dang / 'dzin par byed pa dang / tshul khrims nyams pa sdig pa spyod pa'i dge slong dag ring du spong ba dang / dad pas phul ba'i phyogs bzhi'i dge 'dun gyi nor la chos ma yin pas chud gzon du mi gzhug pa dang / phyogs bzhi'i dge 'dun gyi nor dang / mchod rten dang / dge 'dun gyi khud pa'i nor la bdag kyang thugs thub mi byed cing / pha rol po gzhan yang thug thub tu spyod du mi 'dzud pa dang / theg pa gsum gyi chos smra ba'i gang zag la shin du sti stang dang bcas pas mchod cing mthu bstang ba dang / pha rol po gzhan dag 'phya zhing skur pa dang / smod du mi gzhug pa dang / rab tu byung ba'i gang zag la shin du dad pas spro ba skyed pa dang / de bzhin gshegs pas gsungs pa'i 'phags pa'i bka' la dad cing 'dzin pa dang / mchod rten mi 'jig pa dang / phyogs bcu'i dge 'dun gyi gnas gtsug lag khang skyong ba dang / nga'i bstan pa la rab tu 60.178a byung ba'i slob ma dag la dbang mi za zhing phyir yang khyim par mi 'bebs pa dang / sdig pa'i 'khor lo rnam pa bcu po dag la bdag kyang mi spyod cing pha rol po gzhan yang sdig pa'i 'khor lo rnam pa bcu po yongs su spongs shig par gros 'debs pa dang / rgyal po snga ma'i chos lugs dang srid kyis 'tsho zhing dge ba bcu'i las kyi lam gyis 'jig rten mang po yongs su sdud cing ston pa dang / rtag tu dge ba'i bshes gnyen la sten pa dang / dkon mchog gsum gyi gdung 'tshob cing shin du rgyas par byed pa dang / chos kyi mig nam du yang mi nub par srung ba'i rgyal rigs dge ba nas bram ze dge ba'i bar du de dag de lta bu'i yon tan dang ldan pas na de dag 'tsho bas spyod pa chud za bar mi 'gyur ba dang / lha dang mi dang / gnod sbyin dang / yi dgas dang / lus srul po la sogs pa thams cad kyang dga' ste byams pa'i sems kyis srung zhing skyob bo/ /chos kyi snod du gyur pa bsod nams kyi zhing yang dag pa thams cad kyang dga' zhing snying rje'i sems kyis skyob cing rjes su 'dzin par 'gyur ro/ /de'i rgyu de'i rkyen gyis gnas pa'i yul dang / skye bo thams cad kyang phyir zhing bde la shin du skyid pa dang / phyi'i dgras kyang gnod pa byed ma nus shing thams cad bka' nyan te ma pham par ngang 'du ba dang / de'i dbang gis dge ba'i phyogs la phyir zhing brtson te mi dge ba'i rgyud yongs su skems pa dang / lha dang mi la sogs pa yongs su rgyas shing kun du srung ba'i phyir tshe shin du ring bar 'gyur ba dang / bdag gi nyon mongs pa yongs su 'jom zhing pha rol po'i nyon mongs pa yang 'jil bar byed pa/ byang chub sems dpa'i lam pha rol du phyin pa drug yongs su bzung bas log par lta ba'i lam ngan pa thams cad yongs su bcom pas 'khor ba'i rgya mtshor yun ring por 'khor ba las ldog pa/ sdig pa'i bshes gnyen spong zhing dge ba'i bshes gnyen la rtag tu sten pa dang / gang nas gang du skye ba'i gnas thams 60.178b cad du sangs rgyas dang / byang chub sems dpa' dang phrad cing bsnyen bkur ba dang / mchod pa rgyun mi 'chad par byed par 'gyur ba dang / ring po mi thogs par bsams bzhin du gang nas gang du dge ba'i sangs rgyas kyi zhing de dang de dag tu bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro/ /de nas de'i tshe 'khor de'i nang nas lha'i dbang po 'khor dang bcas pa thams cad nas sha za'i dbang po 'khor dang bcas pa thams cad kyi bar du 'dug pa las langs nas bcom ldan 'das kyi zhabs la spyi bos gtugs te thal mo sbyar nas sti stang dang bcas pas bcom ldan 'das la 'di skad ces gsol to/ /btsun pa bcom ldan 'das ma mchis pa'i dus lnga brgya'i tha ma la sangs rgyas kyi zhing 'dir dam pa'i chos rab tu rnam par 'jig tu nye ba na/ gal te rgyal rigs dge ba nas bram ze dge ba'i bar du gang sdig pa'i 'khor lo bcu po bdag kyang yongs su spangs la gzhan yang yongs su spongs shig par gros 'debs pa dang / bdag dang gzhan srung ba la mkhas pa/ 'jig rten slad ma'i bag bgyid pa la mkhas pa/ dam pa'i chos srung ba/ dkon mchog gsum gyi gdung 'tshob cing rgyun mi 'chad par rgyas par bgyid pa nas mdor na bcom ldan 'das kyis gsungs pa ltar gang zag de dag la sogs pa theg pa gsum gyi chos la sti stang dang bcas pas nyan cing 'dzin te/ nam du yang mi 'chab pa dang theg pa gsum la gnas pa'i gang zag la shin du srung zhing mchod pa bgyid de gnod pa mi bgyid pa dang / dkon mchog gsum gyi nor rdzas la shin du srung zhing god par mi bgyid pa'i rgyal rigs dge ba nas bram ze dge ba'i bar du de dag la bdag cag 'khor dang bcas pas bsrung ba dang / bskyab pa dang / chos rnam pa 'di bcu yang skye zhing 'phel bar bgyi'o/ /bcu gang zhe na tshe ring bar 'gyur ba dang / bgegs med pa skye zhing 'phel ba dang / 60.179a nad med pa skye zhing 'phel ba dang / 'khor skye zhing 'phel ba dang / nor dang rin po che skye zhing 'phel ba dang / 'tsho ba'i yo byad skye zhing 'phel ba dang / go 'phang skye zhing 'phel ba dang / grags pa skye zhing 'phel ba dang / dge ba'i grogs po skye zhing 'phel ba dang / shes rab skye zhing 'phel ba ste/ btsun pa bcom ldan 'das gal te rgyal rigs dge ba dang bram ze dge ba'i bar du sdig pa'i 'khor lo rnam pa bcu po yongs su spong zhing pha rol po gzhan yang spong bar gros 'debs la/ yon tan sngar smos pa dang ldan na bdag kyang srung zhing skyob pa dang chos rnam pa bcu po yang skye zhing 'phel bar 'gyur ro/ /bcom ldan 'das gzhan yang rgyal rigs dge ba dang / bram ze dge ba'i bar du gang sngar smos pa'i yon tan de dag dang ldan na bdag cag 'khor dang bcas pas de la bsrung zhing bskyab pa dang / chos rnam pa bcu po 'di dang yongs su bral bar bgyi'o/ /bcu gang zhe na/ 'di lta ste zhe 'gras pa thams cad dang yongs su bral ba dang / yid du mi 'ong ba'i gzugs dang / sgra dang dri dang / ro dang / reg bya'i yul dang yongs su bral ba dang / rims dang nad thams cad dang yongs su bral ba dang / log par 'dzin cing ngan par lta ba thams cad dang yongs su bral ba dang / log pa la skyabs su 'gro ba dang yongs su bral ba dang / log pa'i ltas ngan pa thams cad dang yongs su bral ba dang / log pa'i las ngan pa'i dngos po thams cad dang yongs su bral ba dang / log pa'i bshes gnyen ngan pa thams cad dang yongs su bral ba dang / khyim na gnas pa'i 'dam rdzab thams cad dang yongs su bral ba dang / dus ma yin par blo bur du 'chi ba thams cad dang yongs su bral ba ste/ btsun pa bcom ldan 'das gal te shin du dge ba'i rgyal rigs nas bram ze dge ba'i bar du gang zhig yon tan sngar gsungs pa rnams dang ldan na bdag cag 'khor dang bcas te de la srung zhing skyob pa dang / yongs su bral ba'i 60.179b chos rnam pa bcu po 'di yang thob par bgyid do/ /bcom ldan 'das gzhan yang rgyal rigs dge ba nas bram ze dge ba'i bar du gang gis sngar gsungs pa'i yon tan yongs su rdzogs par nan tan byed na bdag cag 'khor dang bcas te bsrung zhing bskyab par 'tshal lo/ /rgyal po 'khor dang bcas pa dang yul de na gnas pa'i mi thams cad kyang chos rnam pa 'di bcu dang yongs su bral bar bgyi'o/ /bcu gang zhe na/ yul pha rol gyi dgra thams cad dang / yongs su bral ba dang / bdag gi yul gyi dgra thams cad dang bral ba dang / bkra mi shis pa'i yi dgas thams cad dang yongs su bral ba dang / than pa dang yongs su bral ba dang / gnod par 'gyur ba'i char chu dang yongs su bral ba dang / dus ma lags pa'i tsha ba dang / grang ba dang / rlung dang / char drag po dang / sad dang / ser ba gnod par 'gyur ba thams cad dang yongs su bral ba dang / gza' dang ltas ngan du gyur pa thams cad dang yongs su bral ba dang / mu ge'i gnod pa thams cad dang yongs su bral ba dang / dus ma yin par nad kyis 'chi bar 'gyur ba dang yongs su bral ba dang / log par 'dzin cing ngan par lta ba thams cad dang yongs su bral ba ste/ btsun pa bcom ldan 'das gal te rgyal rigs dge ba'i rgyal pos yon tan sngar gsungs pa de dag kun la nan tan bgyid cing yongs su rdzogs par byed na bdag cag 'khor dang bcas pas bsrung zhing bskyab par 'tshal lo/ /rgyal po 'khor dang bcas pa dang / yul de na gnas pa'i mi thams cad kyang yongs su bral ba'i chos bcu po 'di dag thob par bgyid do/ /de nas bcom ldan 'das kyis lha'i dbang po 'khor dang bcas pa nas sha za'i dbang po'i bar du 'khor dang bcas pa la legs so legs so zhes bstod nas khyad rnams 'di skad du yi dam bcas pa'i dngos po 'di dag khyed kyis bya ba'i rigs pa ste/ de'i rgyu de'i rkyen gyis khyed la 'ang yun ring por phan pa dang bde ba'i don du 'gyur ro/ /de nas tshangs pa chen po lha'i snying pos 60.180a bcom ldan 'das la yang 'di skad cas gsol to/ /ma mchis pa'i dus na sangs rgyas kyi zhing 'dir rgyal rigs dge ba thams cad kyi slad du yul srung ba la sems phyir mi ldog pa'i gzungs 'di dag 'phul lo/ /yul yongs su bsrung ba'i phyir phyir mi ldog pa'i 'khor lo zhes bya ba'i gzungs sngags chen po'i tshig 'di'i gzi brjid dang mthus ma mchis pa'i dus na sangs rgyas kyi zhing 'dir rgyal rigs dge ba'i rgyal po thams cad la phas rgol ba'i dgra thams cad kyis mi tshugs pa dang / phas rgol ba'i dgra thams cad zhi zhing rang ldog par 'gyur ba dang / lus dang / ngag dang / yid kyi las shin du sdom pa dang / mkhas pa rnams kyis bsngags shing bstod pa dang / sdig pa'i chos yongs su spong zhing dge ba'i chos la rtag tu nan tan bgyid pa dang / ngan par lta ba dang / ngan par phyogs pa rtag tu spong zhing theg pa chen po la shin du 'bad pa'i brtson 'grus brtan pas nan tan bgyid pa dang / snod du gyur pa'i sems can tshad med grangs med pa yongs su smin par bgyid pa dang / shes pa gzhan gyi dring la mi 'brang bar mkhas pa'i rang bzhin can du gyur pa pha rol du phyin pa drug gi rin po che'i gter rdzogs par nan tan bgyid pas khong khro ba dang / ser sna dang / phrag dog la sogs pa kun nas nyon mongs pa'i dri ma thams cad yongs su spong ba dang / mi dang mi ma yin pa la sogs pa thams cad kyis sti stang dang bcas pas skyob par 'gyur ba dang bya ba rnams la brjed mi ngas pa dang / bsdu ba rnam bzhi'i dngos po la dga' bas sems can mi gtong ba dang / rtag tu chos kyi snod bsod nams kyi zhing du gyur pa dang mi 'bral bar 'gyur ro/ /yang bcom ldan 'das kyis lha'i snying po la bka' stsal pa/ khyod kyis ma 'ongs pa'i dus na sangs rgyas kyi zhing 'dir rgyal po rgyal rigs dge ba'i yul bsrung ba'i phyir phyir mi ldog pa'i 'khor lo'i snying po zhes bya ba'i gzungs chen po'i tshig smros shig / 60.180b yul yongs su bsrung ba la phyir mi ldog pa'i 'khor lo'i snying po zhes bya ba'i gzungs chen po'i tshig gi mthu dang gzi brjid kyis ma 'ongs pa'i dus na sangs rgyas kyi zhing 'dir rgyal po rgyal rigs dge ba thams cad la phas rgol pa'i dgra thams cad kyis mi tshugs pa nas de bzhin du rgyas par sangs rgyas dang sangs rgyas kyi 'khor gyi bar du thams cad dang mi 'bral bar bsrung bar 'gyur ba smros shig /de nas tshangs pa chen po lha'i snying pos yul yongs su srung ba la phyir mi ldog pa'i 'khor lo'i snying po zhes bya ba'i gzungs chen po'i tshig 'di dag smras so/ /tad ya thA/ mu ni mo ri/ mu ne gar+b+he/ mu ni khi li d+ha ye/ mu ni ro ga bi tsa le/ mu ni ha li te/ mu ni ga me/ shu la pak+She/ pA la la pak+She/ so'u ri sa kri ti/ to ra Na kri tsa le/ pa ta ga sha kri te/ ku ku la mri le/ a pak+Sha sa ra/ o da ha ki li ba/ mu ni pA tha ba swA hA/ tshangs pa chen po lha'i snying pos gzungs 'di dag smras nas bcom ldan 'das la yang 'di skad ces gsol to/ /bcom ldan 'das 'khor mang po dang bcas te bdag gis bshad pa'i gzungs chen po 'di la rjes su yi rang bar mdzad du gsol/ bcom ldan 'das kyis legs so legs so zhes bka' stsal to/ /'khor mang po thams cad kyis kyang legs so legs so zhes smras so/ /de nas bcom ldan 'das kyis de'i tshe na tshe dang ldan pa maud gal ya na chen po dang / byang chub sems dpa' sems dpa' chen po byams pa la 'di skad ces bka' stsal to/ /rigs kyi bu khyod kyis tshangs pa chen po lha'i snying pos phul ba yul yongs su bsrung ba la phyir mi ldog pa'i 'khor lo'i snying po zhes bya ba'i gzungs chen po'i tshig 'di dag gzungs su zung shig /ma 'ongs pa'i dus na sangs rgyas kyi zhing 'dir rgyal rigs dge ba'i rgyal po thams cad la yang rgyas par ston cig /de'i rgyu de'i rkyen gyis na rgyal rigs dge ba'i rgyal po 'khor dang bcas 60.181a pa thams cad dang / yul de na gnas pa'i mi thams cad la phan pa dang / bde ba'i don du 'gyur te/ rtag tu chos kyi 'khor lo skor ba dang / shin du grags pa che ba dang / gzi brjid che bar 'gyur ba dang / ngan par lta ba 'joms shing yang dag pa'i lta ba 'dzugs pa dang / chos kyi mig srung zhing dkon mchog gsum gyi gdung rgyun mi 'chad par 'tshob pa dang / sems can tshad med dpag tu med pa yongs su smin par byed pa dang / theg pa chen po la dad pa shin du brtan pa dang / yun ring po nas pha rol du phyin pa drug bsgom pa la gnas shing sgrib pa thams cad bcad nas myur du mtha'i gnas byed par 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad pa 'di dag gsungs so/ /de tshe tshangs chen lha yi snying pos/ /rkang gnyis mchog la 'di skad zhus so/ /dbang po rno ba'i skye bo dag ni/ /ting 'dzin sgom zhing bsod nams byed mos/ /rgyal po mkhas pas chos lugs byas pa/ /shin du 'khyam pa 'deg cing bsgral phyir/ /spyod pa'i dngos po gsum po 'di la/ /gang dag the tsom sel cing mi ldog /bcom ldan 'das kyis 'di skad bka' stsal/ /gal te mi gnas mi bya mi byas/ /blo gros che zhing shes rab rno yang / /mtshams med sems can dmyal bar ltung 'gyur/ /mkhas pa ma yin yang dag pa dag /sdig pa bcu yi 'khor lo spyod mos/ /dge ba'i rtsa ba yongs su bcad pas/ /myur du sems can dmyal bar ltung 'gyur/ /ting nge 'dzin ni nyon mongs kun gcod/ /nyan pa'i bsod nams kyis ni ma yin/ /de bas mya ngan 'da' bar 'dod pa/ /rtag tu bsam gtan la ni mnyam bzhag /mkhas pas shin du brtson 'grus rtsom pa/ /nga yi yang dag chos ni srung 'dzin/ /ngur smrig gyon la dad cing gus pas/ /nyon mongs rgya mtsho las ni grol 'gyur/ /shin du dben pa'i bas mthar gnas te/ /mtshams 60.181b med byed pa rnam par ring spangs/ /tshul khrims 'dzin cing ting 'dzin sgom la/ /dad pas srid pa'i rgya mtshor sgrol 'gyur/ /theg pa rnam gsum kun la dad pa/ /nga yi yang dag chos ni rgyas byed/ /ngur smrig gyon la mchod pa byas na/ /yon tan rnam pa'i rgya mtshor nges 'gyur/ /gdul dka'i sems ni shin du btul te/ /dge slong rnams kyi nyes pa mi gleng / /chog shes 'phags pa'i rigs 'tsho ba ni/ /rkang gnyis dam pa'i mchog tu nges 'gyur/ /dge slong sdig can dag ni spangs te/ /'phags pa'i spyod pa'i gnas la bsten bya/ /dge 'dun nor la mi spyod mi za/ /myur du byang chub chen po 'thob 'gyur/ /khams gsum kun na bde zhing skyid pa/ /de yang dkon mchog gsum las byung bas/ /de bas bde zhing skyid pa 'dod pa/ /rtag tu dkon mchog gsum la mchod byos/ /gdol pa'i rgyal po dag la sogs pa/ /dge slong sdig pa spyod pa'i grogs dag /dkon mchog gsum la nyes pa bskyed pas/ /mtshams med sems can dmyal bar ltung 'gyur/ /'bru mar 'tshir ba bcu'i sdig pa/ /smad 'tshong gcig gi sdig dang de mnyam/ /smad 'tshong ma ni bcu'i sdig dang / /chang 'tshong gcig gi sdig dang de mnyam/ /chang 'tshong gnas ni bcu'i sdig dang / /shen pa gcig gi sdig dang de mnyam/ /shen pa'i gnas ni bcu yi sdig dang / /rgyal po gcig gi sdig dang de mnyam/ /yang dag dge ba'i rgyal po dag ni/ /nga yi yang dag chos kun rgyas byed/ /theg pa rnam gsum kun la mchod pas/ /yon tan rnam pa'i rgya mtshor des 'gyur/ /rin chen sna bdun 'dzam gling bkang ste/ /sangs rgyas dge 'dun rnams la phul ba'i/ /bsod nams phung po thob pa des ni/ /sangs rgyas chos srung tsam du mi phod/ /sangs rgyas dge 'dun bzhugs pa'i gnas dag /gling bzhi bcu dang mnyam par byas pa'i/ /bsod nams phung po thob pa des kyang / / 60.182a sangs rgyas chos srung tsam ni mi phod/ /sangs rgyas dag gi mchod rten brtsigs pa/ /stong gsum khams dang mnyam pa byas pa'i/ /bsod nams phung po thob pa des kyang / /sangs rgyas chos srung tsam ni mi phod/ /dgra bcom pa yi bcings pa bkrol nas/ /mchod pa rnam pa sna tshogs kun pas/ /chos kyi bar chad ma byas pa yi/ /bsod nams de ni de bas mchog 'gyur/ /bskal pa bye ba stong gi bar du/ /mkhas pas ting 'dzin bsgoms pa yi ni/ /khyad par can gyi blo skyes gang bas/ /chos srung ba'i bsod nams de che/ /shin du dge ba'i rgyal po gang dag /sdig pa bcu'i 'khor lo spangs te/ /nga yi yang dag chos 'di bskyabs sam/ /ngur smrig gyon pa dag kyang bsrungs na/ /ngas gsungs pa yi theg pa gsum dang / /gang zag dag la 'phya skur mi byed/ /kun kyang nyan cing mchod pa byed la/ /chos smra ba yi skyabs dang mgon byed/ /dkon mchog gsum nor chud mi gzon cing / /chos gos gyon pa'i bar chad mi byed/ /snod dang snod ma yin pa kun la/ /gus na de'i bsod nams dpe med/ /ji ltar nyi ma lnga po shar na/ /rgya mtsho chen po kun ni skems te/ /de bzhin nga yi chos srung ba de/ /nyon mongs pa yi rgya mtsho skems 'gyur/ /ji ltar rlung gis 'jig pa byung ste/ /ri rnams thams cad 'jig pa bzhin du/ /nga yi chos la srung ba de yang / /kun nas nyon mongs thams cad 'joms 'gyur/ /ji ltar chu yis 'jig pa byung tshe/ /sa chen chu yis g.yengs te 'jig 'gyur/ /de bzhin nga yi chos srung ba yang / /yid du mi 'ong 'bras bu 'joms 'gyur/ /ji ltar rin chen yid bzhin nor bus/ /'dod pa thams cad yongs su rdzogs byed/ /de bzhin theg pa gsum gyi chos kyang / /sems can kun gyi smon pa rdzogs byed/ /gang gis bum pa bzang po rnyed na/ /dbul dang bral te bde skyid thob 'gyur/ / 60.182b de bzhin sangs rgyas chos dang phrad pa/ /the tsom gcod cing byang chub thos 'gyur/ /ji ltar bco lnga'i zla ba nya na/ /'od kyis nam mkha' thams cad kun snang / /de bzhin chos srung ba yi gang zag /shes rab kyis ni chos dbyings kun khyab/ /ji ltar nam mkha' kun du mnyam la/ /rdzas kyang med cing mtshan ma med pa/ /de bzhin chos srung ba'i gang zag /thams cad chos ni ro gcig par shes/ /ji ltar nyi ma'i 'od ni bkye ba/ /'jig rten mun pa thams cad kun sel/ /de bzhin chos srung ba'i gang zag /rtag tu 'jig rten kun du bde byed/ /shin du rgyas pa chen po'i mdo sa'i snying po 'khor lo bcu pa zhes bya ba las gnas shing spyad par mi bya ba'i le'u ste gsum mo// // de nas byang chub sems dpa' sems dpa' chen po rdo rje snying po zhes bya ba 'khor gyi dkyil 'khor de'i nang na 'dug pa las langs te/ bcom ldan 'das kyi zhabs la spyi bos gtugs nas bla gos phyogs gcig tu byas te/ pus mo g.yas pa'i lha nga sa la btsugs nas thal mo sbyar ba btud de tshigs su bcad pas gsol pa/ tshul khrims nyams pas rnam dag yon tan stor ba dag /'phags pa'i snod min pa yis sras ma yin zhes gsungs/ /dge sbyong chos nyid spangs shing thal ba 'dra ba dag /nga yi rnam dag 'khor 'dir gnas pa mdzes pa min/ /dri ma gsum gyis bsgos shing 'gog dang lam stor ba'i/ /khyad par can gyi mchod pa gang yang des mi zhu/ /phyogs bzhi'i dge 'dun dbang bar bsngos pa'i nor dag la/ /cha shas cung zad tsam yang spyod du ngas ma gnang / /tshul khrims rtsa ba bzhi las gcig tsam nyams pa dag /dge 'dun 'khor du mi chud rgya mtsho'i ro dang mtshungs/ /ci yi slad du deng 'dir dge slong sdig can la/ /snying rjes dang du blangs te chad pas mi gcod par/ /phyir yang nga la mchod pa byos shes skul mdzad cing / /brtse la 60.183a snying rje can gyis ngan sems yongs spongs la/ /de la sti stang bcas te bstan pa'i chos mnyan na/ /bsod nams ye shes tshogs thob snying rje chen po can/ /mngon shes 'jig rten skyong bas mdo sde gzhan dag la/ /phra la zab par gyur pa'i yang dag byang chub lam/ /theg pa chen po de la khyed kyis dad byas shing / /theg pa gnyis kyis grol ba'i lam de spongs shes gsungs/ /ci yi slad du deng 'dir theg pa gsum bshad de/ /kun gyis de la nyan cing mchod pa bgyi bar skul/ /dbang po stobs dang byang chub dge sbyong 'bras bu yang / /mdo sde 'di las 'byung gi gzhan du gsungs pa med/ /dpe med 'phags pa'i lam ni yan lag brgyad pa 'dir/ /theg pa rnam gsum kun kyang lam der 'jug byed de/ /rnam par grol bar 'dod pas brtson 'grus rab bskyed na/ /so sor re ba bzhin du byang chub 'thob par 'gyur/ /'gro ba kun gyis gtso bos 'di dag rnam dbye ba/ /snga phyir bstan pa 'di dag mi 'gal bstan pa na/ /lha dang mi dang byang chub sems dpa'i 'khor thams cad/ /yang dag bden pa rtogs shing rnam grol dga' ba bskyed/ /theg pa chen po bshad pas gang la phan 'gyur dang / /theg pa chen po bshad pas gang la gnod par 'gyur/ /nyan thos theg pas rnam par grol ba bcu po yis/ /bshad pa thos nas gang la gnod dang gang la phan par 'gyur/ /gang zhig chos 'di thos pas gong nas gong du 'phar/ /gang gis chos 'di thos pas phyir zhing ltung bar 'gyur/ /ji ltar 'dus byas kun gyi skyon gyis skyo bas na/ /rga dang 'chi ba'i rgya mtsho myur du skems par 'gyur/ /nyin mtshan dge ba rnams la shin du brtson pa dag /don mchog gang la gnas shing theg pa gang bgrod pas/ /shin du yangs shing zab pa'i chu bo bzhi las sgrol/ /'jig rten skyong bas rnam par phye ste kun srungs shig /de nas bcom ldan 'das 60.183b kyis byang chub sems dpa' sems dpa' chen po rdo rje'i snying po la 'di skad ces bka' stsal to/ /legs so legs so/ /rigs kyi bu khyod skye bo tshad med pa la phan pa dang / bde ba'i don gyi phyir lha dang / mi dang / lha ma yin la sogs pa'i don chen po'i phyir de bzhin gshegs pa la shin du zab mo'i don 'di dag zhus pa legs so/ /shin du legs par nyon la shin du yid la zung shig dang / ngas khyod la rnam par phye ste bshad do zhes bka' stsal nas/ byang chub sems dpa' rdo rje'i snying po bcom ldan 'das la slar nyan to/ /bcom ldan 'das kyis bka' stsal pa/ rigs kyi bu gang zag rnam pa bcu po 'di dag ni 'khor bar 'khor zhing mi lus shin du rnyed par dka'o/ /gang zag rnam pa bcu po gang zhe na/ 'di lta ste/ dge ba'i rtsa ba mi skyed pa dang / bsod nams kyi las mi byed pa dang / kun nas nyon mongs pa'i nying 'tshams sbyor ba dang / grogs po sdig pa'i rjes su spyod pa dang / 'jig rten phyi ma'i sdug bsngal gyi 'bras bu la 'jigs par mi lta ba dang / 'dod chags bdo bar 'gyur ba dang / zhe sdang bdo bar 'gyur ba dang / gti mug bdo bar 'gyur ba dang / sems myos shing 'khrug pa dang / log par lta ba'i sdig pa can du 'dzin pa ste/ gnas shing spyad par mi bya ba rnam pa bcu po 'di'i rgyus sems can dag tshul khrims kyi rtsa ba 'jig cing tshul khrims nyams par byed pas ngan song du ltung bar 'gyur ro/ /gnas shing spyad par mi bya ba rnam pa bcu po gang zhe na/ 'di lta ste/ nga'i bstan pa la rab tu byung ba dag la la ni lhag pa'i spyod pa nyams la mos pa ma nyams pa yong yod/ la la ni mos pa nyams la lhag pa'i spyod pa ma nyams pa yang yod/ la la ni lhag pa'i spyod pa dang mos pa gnyi ga nyams pa yang yod/ la la ni tshul khrims nyams la lta ba ma nyams pa yang yod/ la la ni lta ba 60.184a nyams la tshul khrims ma nyams pa yang yod/ la la ni tshul khrims dang lta ba gnyi ga nyams pa yang yod do/ /la la ni lhag pa'i spyod pa dang / mos pa dang / tshul khrims dang / lta ba ma nyams kyang sdig pa'i grogs po'i dbang du gyur te gnas shing spyad par mi bya ba dag byed pa yang yod/ la la ni dge ba'i bshes gnyen la rten pa'i dbang du gyur kyang glan pa'i rang bzhin can lug bzhin du lkug pa las kyi dngos po'i bye brag kyang mi phyed la/ dge ba'i bshes gnyen gyis dge ba dang mi dge ba'i chos bstan pa thos kyang mi go mi 'dzin mi shes te/ de'i rgyu de'i rkyen gyis gnas shing spyad par mi bya ba dag byed de/ nor dang / rin po che dang / 'tsho ba'i yo byad rnam pa sna tshogs kyis mi skyo bar kun du tshol ba'i rgyus sems 'khrugs pas gnas shing spyad par mi bya ba dag byed pa'i 'dus byas kyi nad mang pos gzir cing gdungs pa'i 'jig rten pa'i lha rjed pa dang / sngags la sogs pa byed pa de'i rgyu de'i rkyen gyis gnas pa dang spyad par mi bya ba dag byed do/ /'di ltar gnas pa dang spyad par mi bya ba rnam pa bcu po'i rgyus sems can dag tshul khrims kyi rtsa ba nyams shing mthong ba'i chos la 'phags pa'i snod du ma gyur pa/ tshul khrims nyams pa'i phyir ngan song du ltung bar 'gyur ro/ /rigs kyi bu gang zag gang lhag pa'i spyod pa nyams kyang mos pa ma nyams pa dag gnas pa dang / spyad par mi bya ba gang yang rung ba rnam pa gcig gi rgyus rtsa ba'i sdig gcig nyams pa las de shin du 'jigs skrag ste 'dzem pa dang / ngo tsha bas phyin chad kyang gang yang mi byed par sdig pa spangs na de bzhin gshegs pas de la phan gdags pa'i phyir lam sun 'byin pa'i dge sbyong zhes gsungs so/ /de ci'i phyir zhe na/ de lta bu'i sdig pa chen po'i las byas kyang 'phral du mi 'chab par 'thol te/ 'dzem pa dang ngo tsha bas 'gyod tshangs byas na/ des de ltar 'dzem pa dang ngo tsha bas so 60.184b sor bshags pas sdig pa byang ba'i phyir phyin cad byed pa'i rgyun gcod par 'gyur ro/ /des dge sbyong gi las dang cho gar bya ba thams cad kyi nang du mi chud la/ bskrad par bya zhing dge sbyong gi 'tsho ba'i yo byad thams cad la yang spyod du mi dbang mod kyi/ gang zag de ni theg pa gsum gyi chos kyi snod du 'gyur bas/ de bzhin gshegs pas thugs brtse ba'i phyir de la bar bar ni nyan thos kyi theg pa'i chos kyang 'chad do/ /bar bar ni rang sangs rgyas kyi theg pa'i chos kyang 'chad do/ /bar bar ni de la bla na med pa'i theg pa'i chos kyang bshad pas skye ba gnyis sam gsum na smon lam gyi mthu dang / dge ba'i bshes gnyen gyi mthus sdig pa'i las byas pa sdig par gyur pa thams cad byang ste/ la la ni nyan thos kyi theg pa'i 'bras bu thob bo/ /la la ni rang sangs rgyas kyi theg pas mya ngan las 'da'o/ /la la ni shin du rgya che ba bla na med pa'i theg pa'i don rtogs par 'gyur ba'ang srid do/ /gzhung de bzhin du tshul khrims nyams la lta ba ma nyams pa yang shes par bya'o/ /gang zag gang mos pa nyams la lhag pa'i spyod pa ma nyams na de bzhin gshegs pas de la phan gdags pa'i phyir tshangs pa'i gnas bzhi bsgrub pa'i chos ston te/ 'di ni nyan thos kyi theg pa'i snod do/ /'di ni rang sangs rgyas kyi theg pa'i snod dang ldan pa'o/ /gang zag gang lhag pa'i spyod pa dang mos pa gnyi ga nyams na de theg pa gang gi chos kyi snod du yang mi 'gyur mod kyi/ de bzhin gshegs pas de la phan gdags pa'i phyir sbyin pa'i bsngags pa 'chad do/ /gang zag gang lta ba nyams la tshul khrims ma nyams na de theg pa gang gi chos kyi snod du yang mi 'gyur mod kyi/ de bzhin gshegs pas de la phan gdags pa'i phyir de la rten cing 'brel par 'byung ba'i chos bshad de ngan par lta ba spangs te lus 'di nyid kyis 60.185a nyan thos sam rang sangs rgyas kyi chos rtogs par mdzad do/ /yang na skye ba gzhan gyi dus na chud cing rtogs par mdzad do/ /gang zag gang tshul khrims dang lta ba gnyis ka nyams na de ni 'phags pa'i chos kyi snod ma yin na de bzhin gshegs pas de la phan gdags pa'i phyir sbyin pa'i bsngags pa 'chad do/ /gang zag gang lhag pa'i spyod pa dang / mos pa dang / tshul khrims dang / lta ba kun ma nyams kyang sdig pa'i bshes gnyen gyi dbang du gyur te rten cing gnas na de bzhin gshegs pas de la phan gdags pa'i phyir dge ba bcu'i las kyi lam bsngags shing 'chad do/ /gang zag gang zhig dge ba'i bshes gnyen la rten du zin kyang ngan cing glen pa'i rang bzhin can lug bzhin du lkug cing dge ba dang mi dge ba gang yang brda mi phrad pa de la de bzhin gshegs pas phan gdags pa'i phyir kha ton goms par bya ba'i phyir bsngags pa 'chad do/ /gang zag gang 'dod chags kyi nad rnam pa sna tshogs kyis yongs su gzir te/ 'dus byas rnam pa sna tshogs kyi lta bas myos pa rnams la de bzhin gshegs pas phan gdags pa'i phyir rnam par grol ba/ tshol ba la ni 'khor ba las byung bar byed pa nyan thos kyi theg pa 'phags pa'i bden pa bzhi 'chad do/ /chad par lta ba la ni rten cing 'brel bar 'byung ba'i bsngags pa 'chad do/ /rtag par lta ba la ni khams gsum gyi srid pa'i rgyun 'di dag nas shi 'phos nas gzhan du skye ste/ rdza mkhan gyi 'khor lo ltar rgyun mi 'chad par 'khor ba dang / mi rtag pa la sogs pa'i chos 'chad do/ /rigs kyi bu de bzhin gshegs pas ji skad du ming dang / brda dang / yi ge dang / tshig dang / sgra skad kyis bstan pa thams cad 'bras bu med cing don med pa ma yin te/ kun kyang sems can yongs su smin par bya ba'i don du ma bstan pa med do/ /de bas na 60.185b de bzhin gshegs pas gsungs pa'i chos la 'phya zhing skur na sems can rnams kyi yang dag pa'i chos gyi mig bcar ba'i sdig pa yin pas mtshams med pa las 'das pa 'am/ mtshams med pa dang 'dra ba'i kha na ma tho ba'i sdig pa tshad med pa thob par 'gyur ro/ /gang gis ngas sems can la phan pa dang bde ba'i phyir gsungs pa'i dam pa'i chos nyan thos kyi theg pa la brten te gsungs sam/ rang sangs rgyas kyi theg pa la brten te gsungs sam/ theg pa chen po la brten te gsungs pa gang la yang rung / 'phya zhing skur pa 'am/ bar chad dang bgegs byas sam/ chung ngu na tshigs su bcad pa gcig tsam 'chab pa'i las byas na de ni dam pa'i chos la skur pa yin par rigs par bya ste/ 'phags pa'i lam gyi yan lag brgyad med par byed pa/ sems can thams cad kyi dam pa'i chos kyi mig nyams par byed pa yin pas gang zag de ni de ltar bdag kyang don med pa chen po spyod la/ pha rol po gzhan don med pa chen po spyod du 'jug pa'o/ /yang gang zag de ni khrel ba dang / ngo tsha ba med pa'i dge 'dun la brten cing de bzhin gshegs pa'i dam pa'i chos la 'phya zhing skur pa 'debs pa'o zhes bya'o/ /rigs kyi bu gzhan yang dge slong rnam pa bzhi yod do/ /bzhi gang zhe na/ don dam pa'i dge slong dang / kun rdzob gyi dge slong dang / lug lkug pa lta bu'i dge slong dang / khrel ba dang ngo tsha ba med pa'i dge slong ngo / /de la ji ltar na don dam pa'i dge slong zhe na/ 'di lta ste/ sangs rgyas bcom ldan 'das sam/ byang chub sems dpa' sems dpa' chen po'i dge slong yon tan chen po dang ldan pa chos thams cad la dbang du gyur pa 'am/ rang sangs rgyas kyi byang chub bam/ dgra bcom pa 'am/ phyir mi 'ong ba 'am/ lan cig phyir 'ong ba 'am/ rgyun du zhugs pa ste/ gang zag rnam pa bdun po 'di dag ni don dam pa'i dge slong du bsdu ba dang / 60.186a skye bo gang khyim na gnas shing skra dang kha spu yang ma bregs/ chos gos kyang mi gyon/ rab tu byung ba so sor thar pa'i tshul khrims thams cad kyang ma mnos gsol ba dang / zhu ba'i las dang / gso sbyin dang / tshul gyi las thams cad kyi nang du mi chud mod kyi/ 'phags pa'i chos dang ldan la 'phags pa'i 'bras bu thob pas na de yang don dam pa'i dge slong du bsdus te/ de dag ni don dam pa'i dge slong zhes bya'o/ /de la ji ltar na kun rdzob kyi dge slong zhe na/ skra dang kha spu bregs te gos ngur smrig gyon cing rab tu byung la so sor thar pa'i tshul khrims dang ldan na de ni kun rdzob kyi dge slong zhes bya'o/ /de la ji ltar na lug lkug pa lta bu'i dge slong zhe na/ rtsa ba'i sdig la sogs pa nyams sam ma nyams pa yang mi shes/ lci ba 'am yang ba yang mi shes nyes pa phra mo rnam pa sna tshogs byas kyang 'gyod cing 'thol mi shes/ nyes pa byas pa la sla gyad byed cing sdig pa phra mo la mi lta/ mi 'jigs/ mkhas pa'i skyes bu la ni mi sten/ skabs skabs su mang du thos pa shes rab dang ldan pa la bsnyen bkur dang / g.yog kyang mi byed/ sti stang dang bcas te zhu zhing 'dri ba yang mi shes/ dge ba ni gang / mi dge ba ni gang / sdig pa ni gang / sdig pa med pa ni gang gang byas na legs/ gang byas na ma legs pa yang zhu ba dang 'dri ba mi byed pa'i gang zag de dag ni lug lkug pa lta bu'i dge slong du bsdus te/ lug lkug pa lta bu'i dge slong zhes bya'o/ /de la ji ltar na khrel ba dang / ngo tsha ba med pa'i dge slong gang zhe na sems can gang 'tsho ba tsam gyi phyir nga'i bstan pa la phyogs te rab tu byung ngo / /rab tu byung nas so sor thar pa'i tshul khrims srung ba thams cad nyams te khrel ba dang ngo tsha ba med la 'jig rten phyi ma'i sdug bsngal gyi 'bras bu la mi lta/ mi 'jigs/ khong rul cing btsog pas gang ba'i srin kwa lwa 'dra ba/ dung 60.186b gi sgra la khyi'i spyod pa dang ldan pa/ rtag tu brdzun smra zhing bden pa'i tshig med pa/ ser sna dang phrag dog dang / gti mug dang nga rgyal gyis mngon par zin te las kyi mchog dam pa gsum las ring du gyur pa khe dang bkur sti dang grags pa la chags te yul drug la mos pa/ 'dod chags kyis g.yengs pa/ gzugs dang / sgra dang / dri dang / ro dang / reg bya'i yul la chags pa'i gang zag de dag ni khrel ba dang / ngo tsha ba med pa dam pa'i chos la 'phya zhing skur pa'i nang du bsdus te/ de ni khrel ba dang ngo tsha ba med pa'i dge slong zhes bya'o/ /rigs kyi bu don dam pa'i dge slong zhes bya ba ni la la 'phags pa'i lam las rgyal ba'i dge sbyong gi nang du bsdu ba yang yod de/ lam las rgyal ba zhes bya ba ni gang 'phags pa'i lam gyi yan lag brgyad la gnas shing bdag kyang nyon mongs pa'i chu bo las sgrol la pha rol po gzhan dag kyang sgrol ba'o/ /de yang ji lta zhe na/ sangs rgyas bcom ldan 'das dang / rang rgyal ba dang / dgra bcom pa ste/ gang zag rnam pa gsum po 'di dag ni srid pa'i yan lag gi 'khor thams cad dang ring du gyur pa'i phyir 'phags pa'i lam las rgyal ba zhes bya'o/ /gzhan yang byang chub sems dpa'i dge 'dun gzhan gyi dring la mi 'jog par chos thams cad la ye shes kyis thogs pa med par gzigs shing sems can thams cad la phan pa dang / bde ba'i don gyis sdud pa yang lam las rgyal ba'i dge sbyong gi nang du bsdu'o/ /don dam pa'i dge slong dang / kun rdzob kyi dge slong kha cig ni lam ston pa'i dge slong gi nang du bsdu'o/ /gang so sor thar pa'i tshul khrims dang ldan zhing / yang dag pa'i dge ba'i skye bo nas 'jig rten gyi yang dag par lta ba dang ldan pa'i bar du shes pa brda sprod pa la brten te cho 'phrul gyi mthus gzhan la 'phags pa'i lam gyi chos rnam par phye ste ston cing 'chad pa'i gang zag de ni lam ston pa'i dge 60.187a sbyong tha ma ste/ lam ston pa'i dge sbyong zhes bya'o/ /rgyun du zhugs pa'i 'bras bu thob pa'i gang zag ni gnyis pa zhes bya'o/ /lan cig phyir 'ong ba'i 'bras bu thob pa'i gang zag ni gsum pa zhes bya'o phyir mi 'ong ba'i 'bras bu thob pa'i gang zag de ni bzhi pa zhes bya'o/ /gzhan yang byang chub sems dpa' sems dpa' chen po'i dge 'dun ni lnga pa zhes bya'o/ /sa dang po la gnas pa nas sa bcu dang srid pa tha ma'i lus la gnas pa de yang lam ston pa'i dge sbyong gi nang du bsdu'o/ /gang so sor thar pa'i tshul khrims dang ldan zhing spyod lam rnam par dag pa dang ldan pa dag ni lam gyis 'tsho ba'i dge sbyong gi nang du bsdus te/ lam gyis srog 'dzin pa'i phyir lam gyis 'tsho ba'i dge sbyong zhes bya'o/ /gzhan yang byang chub sems dpa' sems dpa' chen po gang sems can thams cad la phan pa dang bde ba'i don du sdud cing pha rol du phyin pa drug la nan tan byed pa dang ldan pa de yang lam gyis 'tsho ba zhes bya'o/ /de ltar lam las rgyal ba dang / lam ston pa dang / lam gyis 'tsho ba'i dge sbyong rnam pa gsum po 'di ni 'jig rten pa'i bsod nams kyi zhing yang dag pa zhes bya'o/ /de las gzhan pa'i dge sbyong dag ni lam sun 'byin pa zhes bya ste/ yang dag pa ma yin mod kyi de yang bsod nams kyi zhing gi grangs su 'gro'o/ /gang 'dzem pa dang ngo tsha ba med pa'i dge 'dun la gnas shing brten pa'i gang zag de ni ngas yang dag par bstan pa'i 'dul ba'i chos las mi ro lta bu'o zhes gsungs so/ /yongs su dag pa'i dge 'dun gyi rgya mtsho las dbyung bar bya ba chos kyi snod ma yin pas na gang zag de la nga ni ston pa yin no zhes mi gsungs la gang zag de yang nga'i nyan thos ma yin no/ /ngo tsha med pa'i dge 60.187b slong chos kyi snod du ma gyur pa dag nga la ston par 'dzin cing / nga'i ring bsrel dang / nga'i sku gzugs brnyan la shin du dad pa dang / nga'i chos dang dge 'dun dang / 'phags pa'i tshul khrims la yang shin du dad pas bdag kyang lta ba ngan par mi 'dzin la pha rol po gzhan yang lta ba ngan pa la chags par mi byed pa dang / ngas bstan pa'i chos rgyas par ston te/ shin du bsngags shing bstod pa byed kyi/ de la 'phya ba 'am/ skur pa mi 'debs pa dang / rtag tu yang dag pa'i smon lam 'debs pa dang / sdig pa byas ma thag tu yang dang yang 'thol cing 'gyod de spong na las kyi sgrib pa mang po zhi bar 'gyur te/ de ltar gang zag de dkon mchog gsum dang / 'phags pa'i tshul khrims la dad pa'i shugs kyis mu segs can dgu bcu rtsa lnga bas brgya stong snyed kyis lhag go/ /myur du mya ngan las 'da' ba'i grong khyer du phyin pa ni ma yin mod kyi 'khor los sgyur ba'i rgyal pos kyang mi skur na/ de ma yin pa skye bo gzhan lta smos kyang ci dgos de bas na de bzhin gshegs pas sems can thams cad las dang myong ba'i chos kyi mtshan nyid rnam pa tha dad par mkhyen cing gzigs pa'i phyir gang 'di skad du nga'i bstan pa'i chos la dad nas skra dang kha spu bregs te/ gos ngur smrig gyon pa la rgyal rigs la sogs pa gshe zhing spyo ba dang / chad pas gcad du mi dbang ngo zhes gsungs te/ gang gis brnyas smad dam/ rab tu byung ba thams cad la gshe zhing spyos sam/ chad pas bcad na kha na ma tho ba'i 'bras bu smin pa ni ji ltar rgyas par bshad pa bzhin no/ /gzhan yang nga'i bstan pa la khyim nas khyim med par rab tu byung ste skra dang kha spu bregs nas gos ngur smrig gyon na/ de la 'das pa dang / ma byon pa dang / da ltar bzhugs pa'i sangs rgyas bcom ldan 'das thams cad kyis thugs rjes rjes su 'dzin to/ /spyod lam dang / cha lugs dang / 60.188a chos gos gyon pa la yang 'das pa dang / ma byon pa dang / da ltar bzhugs pa'i sangs rgyas bcom ldan 'das thams cad kyis kyang thugs rjes rjes su 'dzin to/ /de bas na skra dang kha spu brags te gos ngur smrig gyon pa'i rab tu byung ba la brnyas smad na/ de ni 'das pa dang / ma byon pa dang / da ltar bzhugs pa'i sangs rgyas bcom ldan 'das thams cad la brnyas smod pa yin no/ /de'i rgyu de'i rkyen gyis mkhas pas blo can sdug bsngal gyis skyo zhing 'jigs pa/ lha dang / mi dang / mya ngan las 'da' ba'i bde ba 'dod pa dag khyim nas khyim med par rab tu byung ste skra dang kha spu brags nas gos ngur smrig gyon pa la brnyas pa dang / smod pa mi bya'o/ /gang ngo tsha ba med pa'i dge sbyong tshul khrims nyams pa theg pa gsum gyi 'phags pa'i chos kyi snod du ma gyur pa bdag nyid lta ba ngan pa'i sdig pa la mngon par zhen te/ gzhan yang lta ba ngan pa'i sdig pa la chags par byed pa de la rgyal rigs dge ba dang / dge sbyong dang / bram ze dang / blon po dang khyim bdag dang tshong dpon dang rje'u rigs dang / dmangs rigs dang / skyes pa dang / bud med dag med do zhes smra ba dang / gzhan yang 'jig rten na pha yang med/ ma yang med pa nas/ dge ba dang mi dge ba dang / rnam par smin pa'i 'bras bu yang med/ 'phags pa'i lam gyi 'bras bu thob pa yang med do zhes smra ba dang / chos thams cad rgyu las skyes pa ma yin no zhes smra ba dang / gzhan yang gzugs yod pa'i khams ni rtag pa yin gyi 'jig pa'i chos ma yin par 'dzin pa dang / gang gzugs med pa'i khams ni rtag pa yin gyi/ 'jig pa'i chos ma yin par 'dzin pa dang / la la ni mu stegs can gyi brtul shugs kyis mthar phyin pa'i rnam par dag pa thob par 'dzin to/ /la la ni nyan thos kyi theg pa 'ba' zhig gis mthar phyin pa'i rnam par dag pa thob kyi/ rang sangs rgyas kyi theg pa dang / theg pa chen pos ma 60.188b yin par 'dzin te/ nyan thos kyi theg pa la dad cing yid ches nas bsngags shing bstod pa dang / 'byed cing ston gyi/ rang sangs rgyas kyi theg pa dang / theg pa chen po la 'phya zhing skur pa 'debs pa dang / smod cing bar chad byed pa bgegs byed de ston du mi ster ba yang yod do/ /la la ni rang sangs rgyas kyi theg pa 'ba' zhig gis mthar phyin pa'i rnam par dag pa 'thob kyi/ nyan thos kyi theg pa dang / theg pa chen pos ma yin par 'dzin te/ rang sangs rgyas kyi theg pa la dad cing yid ches te bstod cing bsngags pa dang / 'byed cing ston gyi nyan thos kyi theg pa dang / theg pa chen po la 'phya zhing skur pa 'debs pa dang / smod cing bar chad byed pa la bgegs byed de ston du mi ster ba yang yod do/ /la la ni theg pa chen po 'ba' zhig gis mthar phyin pa'i rnam par dag pa 'thob kyi/ nyan thos kyi theg pa dang / rang sangs rgyas kyi thag pas ma yin par 'dzin te/ theg pa chen po la bdag dad cing yid ches pas pha rol gzhan yang dad cing yid ches par byed/ bdag rim gro dang / bkur sti byed pas pha rol po gzhan yang rim gro dang / bkur sti byed du 'dzud/ bdag de la bstod cing bsngags pas pha rol po gzhan yang bstod cing bsngags su bcug pa dag glegs bam du bris pas pha rol po gzhan yang glegs bam du 'drir bcug bdag klog cing 'don pas pha rol po gzhan yang klog cing 'don du 'jug bdag nyan cing 'dzin pas pha rol po gzhan dag kyang nyan cing 'dzin du bcug /bdag sems shing yid la byed pas pha rol po gzhan yang sems shing yid la byed du bcug ste/ skye bo chos kyi snod du gyur pa 'am/ snod du ma gyur pa yang rung thams cad la theg pa chen po don dam pa shin du zab pa phra ba rnam par 'byed cing ston te nyan thos kyi theg pa dang / rang sangs rgyas kyi theg pa la 'phya zhing skur pa 'debs pa dang smod cing bgegs dang bar chad 60.189a byed de ston du mi ster ba dang / bdag ma dad pas gzhan dad pa skye ba'i bgegs byed pa dang / bdag rim gro mi byed pas gzhan rim gro byed pa'i bgegs byed pa dang / bdag mi stod pas gzhan stod pa'i bgegs byed pa dang / bdag glegs bam du mi 'dri bas gzhan glegs bam du 'bri ba'i bgegs byed pa dang / bdag klog pa dang / 'don pa dang / nyan pa dang / 'dzin pa dang / shes pa dang / yid la mi byed pas gzhan klog pa dang / 'don pa dang / nyan pa dang / 'dzin pa dang / sems pa dang / yid la byed pa'i bgegs byed de/ theg pa gnyis kyi chos mi ston pa yang yod do/ /la la ni sbyin pa 'ba' zhig byas pas mthar phyin pa'i rnam par dag pa 'thob kyi/ tshul khrims kyis ma yin/ bzod pas ma yin pa nas shes rab kyi bar du ma yin par 'dzin to/ /la la ni tshul khrims 'ba' zhig gis mthar phyin pa'i rnam par dag pa thob kyi/ sbyin pa dang / bzod pas ma yin pa nas shes rab kyi bar du ma yin par 'dzin to/ /la la ni bzod pa 'ba' shig gis mthar phyin pa'i rnam par dag pa thob kyi/ sbyin pa dang / tshul khrims kyis ma yin pa nas shes rab kyi bar du ma yin par 'dzin to/ /la la ni brtson 'grus 'ba' shig gis mthar phyin pa'i rnam par dag pa thob kyi sbyin pa dang / tshul khrims kyis ma yin pa nas shes rab kyi bar du ma yin par 'dzin to/ /la la ni bsam gtan 'ba' zhig gis mthar phyin pa'i rnam par dag pa thob kyi sbyin pa dang / tshul khrims kyis ma yin pa nas shes rab kyi bar du ma yin par 'dzin to/ /la la ni shes rab 'ba' zhig gis mthar phyin pa'i rnam par dag pa thob kyi/ sbyin pa dang / tshul khrims kyis ma yin pa nas bsam gtan gyi bar du ma yin par 'dzin to/ /la la ni 'jig rten gyi bzo rtsal rnam pa sna tshogs sbyangs shing shes pas mthar phyin pa'i rnam par 60.189b dag pa thob par 'dzin to/ /la la ni brag las mchong ba dang / me ma mur du mchong ba dang / smyung ba la sogs pa'i brtul shugs kyi rnam pa mang pos mthar phyin pa'i rnam par dag pa thob par 'dzin te ston to/ /rigs kyi bu de ltar tshul khrims nyams pa sdig pa spyod pa'i dge slong chos kyi snod ma yin pa des brdzun rnam pa sna tshogs kyis yang dag pa'i chos kyi snod kun bslus te skye bo mang po lta ba ngan pa la bltar btsud do/ /de ltar de dag phyin ci log tu ngan par lta ba'i dbang gis rgyal rigs dge ba nas rje'u rigs dang / dmangs rigs dang / skyes pa dang / bud med la sogs pa dad pa yongs su dag pa dag ma rung bar byas nas tshul khrims dang / thos pa dang / sbyin pa dang / shes rab kyang nyams par byas te/ rgyal rigs gdol pa can nas rje'u rigs gdol pa can gyi bar du thams cad gdol pa can du bsgyur bas de dag ni chos kyi snod ma yin te/ tshul khrims nyams pa'i dge slong dang / rgyal rigs gdol pa can la sogs pa ston pa dang slob mar bcas te/ dge ba'i rtsa ba bcad pas mtshams med pa'i sems can dmyal ba'i bar du ltung bar 'gyur ro/ /rigs kyi bu ji ltar mi ro bam nas rul cing zhig pa las 'gro ba thams cad kyi yid du mi 'ong zhing snar mnam pa reg ma thag tu 'jig pa dang nye 'am/ 'bags na mnam pa bzhin du rgyal rigs dge ba nas dmangs rigs dge ba'i bar du tshul khrims nyams pa/ sdig pa spyod pa/ chos kyi snod ma yin pa de lta bsnyen tam 'grogs sam/ lhan cig gnas sam/ las lhan cig byed na de ma thag tu ngan par lta ba btsog cing mnam pa gos par 'gyur ro/ /rigs kyi bu de ltar de bzhin du rgyal rigs dge ba nas dmangs rigs 60.190a dge ba'i bar du dad pa dang / tshul khrims dang / thos pa dang / sbyin pa dang / shes rab kun nyams te/ gdol pa can du gyur pas de ni ston pa dang slob mar bcas te dge ba'i rtsa ba bcad pas na mtshams med pa'i sems can dmyal ba'i bar du ltung bar 'gyur ro/ / bam po drug pa/ rigs kyi bu de ltar rgyal rigs la sogs pa skye bo tshad med pa tshul khrims nyams pa sdig pa spyod pa/ chos kyi snod ma yin pa'i dge slong bsten pas dge ba'i chos thams cad nyams pa nas mtshams med pa'i sems can dmyal ba'i bar du ltung bar 'gyur ba la ltos de bas na mtho ris kyi lhar skye ba nas mya ngan las 'da' ba'i bde ba'i bar du 'dod pa dag lam las rgyal ba'i dge sbyong la bsnyen bkur dang / mchod pa dang / bkur sti byas te theg pa gsum gyi chos kyi mdo mnyan par gsol ba gdab bo/ /gzhan yang lam ston pa nas lam gyis 'tsho ba'i dge sbyong btsal bar bya'o/ /lam de gsum la gnas pa'i dge sbyong med na yang lam sun 'byin pa'i dge sbyong btsal bar bya'o/ /tshul khrims nyams mod kyi/ yang dag par lta ba dang / mos pa dang / lhag pa'i spyod pa dang ldan pas de la ni bsnyen bkur dang / mchod pa dag byos la theg pa gsum gyi don dri bar bya'i lhag pa'i spyod pa dang / mos pa dang lta ba kun nyams pa la ni bsnyen bkur dang / mchod pa bya ba ma yin no/ /tshul khrims nyams pa dag tshul khrims nyams mod kyi log par mi lta la/ mos pa dang / lhag pa'i spyod pa dang lta bar ldan pas na de dang de gang na bar song ste nyan thos kyi theg pa'i chos dang / rang sangs rgyas kyi theg pa'i chos dang / theg pa chen po'i chos zhu zhing mnyan par bya'i brnyas shing smad par mi bya'o/ /theg pa gsum las gang yang rung ba cig la dad de smon lam 'debs shing brtson 'grus rtsom zhing rjes su slob kyang theg pa gzhan la yang brnyas pa dang smad par mi bya'o/ /gang gis theg 60.190b pa gsum las theg pa gang yang rung ste/ gcig gi tshigs su bcad pa gcig tsam la brnyas smod pa de la ni bsnyen bkur mi bya mi bsnyen mi 'grogs lhan cig tu mi gnas las 'thun par mi bya'o/ /gang gis de la bsnyen bkur byed cing bsten tam 'grogs sam lhan cig tu gnas sam las lhan cig byed na gdon mi za bar mtshams med pa'i sems can dmyal bar ltung bar 'gyur ro/ /rigs kyi bu de bas na theg pa gsum las gang yang rung ba gcig la gnas te/ 'khor ba las 'da' zhing rab tu bde ba la mos te/ sdug bsngal gyi skyo ba dag de bzhin gshegs pas gsungs pa'i dam pa'i chos nyan thos kyi theg pa la brten te gsungs pa dang / rang sangs rgyas kyi theg pa la brten te gsungs pa dang / theg pa chen po la brten te gsungs pa kun la dad cing shin du bkur sti bya'i/ de la 'phya zhing skur pa 'debs pa dang / bar chad dang / bgegs dang chung ngu na tshigs su bcad pa gcig tsam gyi bgegs kyang ma byed cig rtag tu sti stang dang bcas te klog pa dang 'don pa dang nyan pa la shin du brten pa'i yi dam bcas te rtogs par bya'o/ /theg pa gsum las gang yang rung ba'i chos gcig la 'phya zhing skur na de dang lhan cig tu mi gnas chung ngu na zhagacig tsam yang bsnyen bkur dang chos mnyan par mi bya'o/ /sems can gang zhig theg pa gsum las theg pa gcig tsam la 'phya zhing skur tam/ theg pa gsum la 'phya zhing skur pa'i gang zag la brten te 'dri ba dang nyan pa byas na/ de'i rgyu de'i rkyen gyis mtshams med pa'i sems can dmyal ba chen por ltung zhing sdug bsngal chen po myong bar 'gyur te rab tu thar bar dka'o/ /de ci'i phyir zhe na/ rigs kyi bu nga sngon 'das pa'i dus na byang chub sems dpa'i spyad pa spyod cing bla na med pa'i ye shes tshol ba la brtson pas nan tan byed pa na bar bar ni nyan thos kyi theg pa dang ldan pa'i dam pa'i chos 'dod pa'i phyir chung ngu na tshigs su bcad pa gcig tsam gyi phyir yang lus kyi yan lag lag pa dang / rkang pa dang / sha dang khrag dang / lpags pa dang / rus pa dang / mgo dang / mig dang rkang dang klad pa'i bar du yongs su gtong ngo / /bar bar ni 60.191a rang sangs rgyas kyi theg pa la brten te gsungs pa'i dam pa'i chos 'dod pa'i phyir chung ngu na tshigs su bcad pa gcig tsam gyi phyir yang lus kyi yan lag lag pa dang / rkang pa dang / sha dang / khrag dang / lpags pa dang / rus pa dang / mgo dang / mig dang / rkang dang / klad pa'i bar du yongs su gtong ngo / /bar bar ni theg pa chen po la brten te gsungs pa'i dam pa'i chos 'dod pa'i phyir chung ngu na tshigs su bcad pa gcig tsam gyi phyir yang lus kyi yan lag lag pa dang / rkang pa dang / sha dang / khrag dang / lpags pa dang / rus pa dang / mgo dang / mig dang / rkang dang / klad pa'i bar du yongs su gtong ngo / /de ltar dka' ba spyad pas theg pa gsum la chung ngu na tshigs su bcad pa gcig tsam rnyed na shin du dga' rangs te sti stang dang bcas pas 'chang zhing gzungs su 'dzin la ji skad gsungs pa bzhin du spyod de/ cung zad kyang mi gtong bas bskal pa tshad med pa'i bar du shin du spyad dka' ba thams cad spyad pas gdod mtha'i las byas pas bla na med pa'i ye shes kyi 'bras bu thob par gyur to/ /gzhan yang sems can thams cad la phan pa dang bde ba'i don gyi phyir theg pa gsum gyi dam pa'i chos las rnam par phye ste bshad do/ /de lta bas na de la 'phya zhing skur pa dang / bar chad dang / bgegs dang / chung ngu na tshigs su bcad pa gcig tsam yang 'chab par mi bya'o/ /de la rtag tu bkur sti dang bcas pas klog pa dang / 'don pa dang nyan par shin du brtan pa'i yi dam bca'o/ /rigs kyi bu 'di ltar theg pa gsum po'i dam pa'i chos 'di ni 'das pa dang / ma 'ongs pa dang / da ltar bzhugs pa'i sangs rgyas bcom ldan 'das klung gang gA'i bye ma dang mnyam pa thams cad kyis 'thun par gsungs te/ byin gyi brlabs kyis thams cad byin gyis rlob bo/ /sems can thams cad 'khor ba'i sdug bsngal chen po las gdon cing bsgral ba dang / dkon mchog gsum gyi gdung rgyun mi 'chad 60.191b par bya ba'i phyir yongs su gzung ba yin no/ /de bas na theg pa gsum gyi dam pa'i chos la thams cad kyis dad cing bkur sti bya'i/ de la 'phya zhing skur pa 'debs pa dang / bar chad dang / bgegs mi bya ste/ theg pa gsum gyi dam pa'i chos las tshigs su bcad pa gcig tsam med par byas na gdon mi za bar mtshams med pa'i sems can dmyal bar ltung bar 'gyur ro/ /rigs kyi bu gzhan yang ma 'ongs pa'i dus na sangs rgyas kyi zhing 'dir rgyal rigs gdol pa can dang / bram ze gdol pa can dang / blon po gdol pa can dang / khyim bdag gdol pa can dang / dge sbyong gdol pa can dang / tshong dpon gdol pa can dang / rje'u rigs dang dmang rigs gdol pa can gyi skyes pa 'am/ bud med de dag g.yo dang sgyus 'tsho zhing glan pa gti mug can cung zad tsam gyi shes pa snyems pa/ rang bzhin gyis gtum pa khro ba/ spro thung ba brlang ba/ 'jig rten phyi ma'i sdug bsngal gyi 'bras bu la 'jigs par mi lta ba/ srog gcod pa la dga' ba nas log par lta ba dang / ser sna dang / phrag dog dang / 'jungs pa dang / 'dod chags kyi bar du dga' zhing dge ba'i bshes gnyen la rgyab kyis phyogs nas sdig pa'i bshes gnyen la bsten pa theg pa gsum gyi 'phags pa'i chos kyi snod ma yin pa dag nyan thos kyi theg pa'i chos cung zad thos pas sangs rgyas kun gyis yongs su bzung ba'i rang sangs rgyas kyi theg pa'i chos dang / bla na med pa'i theg pa chen po'i chos la 'phya zhing skur pa 'dabs pa dang / smod pa dang / bar chad dang / bgegs byed de yongs su rgyas par mi byed do/ /la la ni rang sangs rgyas kyi theg pa'i chos cung zad thos nas/ sangs rgyas kun gyis yongs su bzung ba'i nyan thos kyi theg pa'i chos dang / bla na med pa'i theg pa'i chos la 'phya ba dang / skur pa 'debs pa dang / smod pa dang / bar chad dang bgegs byed de yongs su rgyas par mi byed do/ / 60.192a la la ni bla na med pa'i theg pa chen po'i chos cung zad thos nas sangs rgyas kun gyis yongs su gzung ba'i nyan thos kyi theg pa'i chos dang / rang sangs rgyas kyi theg pa'i chos la 'phya ba dang / skur pa 'debs pa dang / smod pa dang / bar chad dang / bgegs byed de yongs su rgyas par mi byed la/ khe dang grags pa'i phyir 'di skad du bdag ni theg pa chen po pa yin te/ theg pa chen po'i grogs su gyur pa theg pa chen po 'ba' zhig nyan pa dang / 'chang ba dang / gzungs su 'dzin par dga'i/ nyan thos dang / rang sangs rgyas kyi theg pa pa'i chos la mi dga'/ theg pa gnyis po la sten par mi 'dod do zhes zer ro/ /de ltar theg pa chen po pa yin no zhes brdzun zer ba de bdag gti mug gis mngon par zin te/ nga rgyal gyi dbang du gyur pas de ltar theg pa gsum gyi yang dag pa'i chos la 'phya zhing skur pa 'debs pa dang / bar chad dang bgegs byed de yongs su rgyas par yang mi byed do/ /theg pa gsum po slob pa'i gang zag la yang 'phya zhing skur nas smod de mthu med par byed do/ /rigs kyi bu 'das pa dang / ma 'ongs pa dang / da ltar bzhugs pa'i sangs rgyas bcom ldan 'das dang / byang chub sems dpa' sems dpa' chen po thams cad sems can thams cad la phan pa dang / bde ba'i don gyi phyir thugs rje chen po'i shugs kyis dngos po rnam pa 'di gnyis yongs su bzung ngo / /gang zhe na/ dkon mchog gsum gyi gdung rgyun mi 'chad par byed pa khyim nas khyim med par rab tu byung ste skra dang kha spu bregs nas gos ngur smrig gyon pa dang / theg pa gsum las byung ba 'phags pa'i bden pa bzhi la sogs pa dam pa'i chos dang ldan pa'o/ /dngos po rnam pa gnyis po 'di ni sangs rgyas bcom ldan 'das dang / byang chub sems dpa' sems dpa' chen po 'ba' zhig gis yongs su bzung ba mdzad kyis nyan thos dang rang sangs rgyas 60.192b la sogs pas ni ma yin no/ /gzhan yang bye ba khrag khrig brgya stong snyed kyi tshangs pa chen po dang / brgya byin lha'i dbang po dang / gling bzhi la dbang ba'i 'khor los sgyur ba'i rgyal po la sogs pas yongs su bzung ba ma yin no/ /ma 'ongs pa'i dus na sangs rgyas kyi zhing 'dir rgyal rigs gdol pa can dag nga'i bstan pa la rab tu byung ste skra dang kha spu bregs nas gos ngur smrig gyon pa la thabs kyis nye ba'i skyon dang klan ka tshol te/ rkyen rnam pa mang pos gshe shing spyo ba dang / smod cing sma phab pa dang / gzhu ba dang / 'tshog pa dang / btson rar gzhug pa dang / 'tsho ba'i yo byad 'phrog pa dang / chos gos 'phrog pa nas khyim par phab ste/ khyim pa'i las rnam pa sna tshogs byed du bcug pa dang / nan gyis 'khol zhing chad pas gcod pa dang / skrod pa dang / bza' ba dang / btung ba gcod pa dang / 'tsho ba'i dbang po dang bral ba'i bar du byed do/ /rgyal po rgyal rigs gdol pa can de de ltar glan zhing gti mug gi rang bzhin can du gyur pas nga rgyal gyi dbang gis mngon par zin pa de sangs rgyas dang / byang chub sems dpa'i thugs rje'i mthus yongs su bzung ba'i slob ma rnams la smod pa dang / sma 'bebs pa dang / nan gyis chad pas gcod pa la sogs pa byed pa'o/ /sangs rgyas dang byang chub sems dpa' thams cad kyis thugs rje chen po'i shugs kyis yongs su bzung ba'i chos shin du zab mo la yang 'phya zhing skur te ma rung bar byed do/ /dus gsum gyi sangs rgyas bcom ldan 'das dang / byang chub sems dpa' thams cad kyis yongs su bzung ba'i theg pa rnam pa gsum gyi dam pa'i chos kyi bar chad dang bgegs byed de yongs su rgyas par mi byed do/ /de ltar rgyal rigs gdol pa can nas rje'u rigs dang / dmangs rigs gdol pa can gyi bar du glen zhing gti mug gi rang bzhin can dang / nga rgyal gyis mngon par zin pa de ni theg pa chen po pa'o zhes khas 'che 60.193a ba de dag nyan thos dang / rang sangs rgyas kyi theg pa'i snod du yang ma gyur na bla na med pa theg pa chen po'i chos kyi snod du gyur pa lta ci smos te/ khe dang grags pa dang / bkur sti dang / mchod pa 'dod pa'i phyir 'jig rten pa glen zhing gti mug can thams cad bslus nas bdag ni theg pa chen po pa'o zhes zer te/ de bzhin gshegs pa'i theg pa gnyis kyi dam pa'i chos la 'phya zhing skur pa 'debs so/ /de ltar gang zag glen zhing gti mug can g.yo dang sgyus 'tsho zhing nga rgyal gyis mngon par zin pa ser sna dang / phrag dog dang / 'dod chags kyis kun nas bslang bas de'i rgyu de'i rkyen gyis nga'i chos kyi mig ma rung ba dang myur du med par byas so/ /des ni dus gsum gyi sangs rgyas bcom ldan 'das thams cad kyi dam tshig las 'gal ba'i kha na ma tho ba chen po byed pa yin no/ /dus gsum gyi byang chub sems dpa' thams cad kyi dam tshig las 'gal ba'i kha na ma tho ba chen po byas pa yin no dus gsum gyi nyan thos thams cad kyi dam tshig las 'gal ba'i kha na ma tho ba chen po'i sdig byed pa yin te/ ring po mi thogs par lus kyi yan lag kun zhig pa dang / nad ma rungs pa chen po rnam pa mang pos btab par 'gyur ro/ /rgyal rigs gdol pa can nas rje'u rigs dang / dmangs rigs dang / gdol pa can gyi skyes pa 'am/ bud med 'di dag thams cad sdig pa'i las byed cing phyin ci log tu lta ba'i dbang gis dge ba'i rtsa ba thams cad bcad pas/ gal te dus gzhan du sbyin pa'i bsod nams mang du byas su zin kyang ma 'ongs pa'i dus na yi dgas sam byol song gi khams su skye ste phyug po'i bde ba myong bar mi 'gyur ro/ /lus de nyid kyis gzugs dang gzugs med pa'i khams su skye ba'i dge ba'i rtsa ba chung ngu yang bskyed mi nus na nyan thos sam/ rang sangs rgyas sam bla na med pa'i theg pa chen po lhun gyis grub pa rnam pa thams cad mkhyen pa'i ye shes kyi 60.193b dge ba'i rtsa ba'i sa bon skyed pa lta ci smos/ gzhan yang de'i lce la rtag tu nad kyis gnod par 'gyur zhing / nyin zhag du mar lce lkug cing smra mi nus pa dang / shin du mi bzad pa'i na ba dang tsha ba'i sdug bsngal chen po myong ba dang / 'chi 'phos nas kyang mtshams med pa'i sems can dmyal bar ltung bar 'gyur ro/ /de bas na de bzhin gshegs pas rgyal rigs dge ba nas rje'u rigs dang / dmangs rigs la sogs pa'i skyes pa 'am/ bud med de dag la yun ring por phan pa dang bde ba'i don gyi phyir yang dang yang 'di skad gsungs te/ khyed kyis nga'i bstan pa la skra dang kha spu bregs te gos ngur smrig gi tshal bu gyon cing rab tu byung ba la gnod pa dang / gshe zhing spyo ba la sogs pa ma byed cig /ngas bstan pa'i theg pa gsum gyi dam pa'i chos la 'phya zhing skur pa 'debs pa dang / smod pa dang / bar chad dang / bgegs ma byed cig ces gsungs so/ /ngas bstan pa las ched du 'gal bar byas na sdig pa'i rnam par smin pa ni ji ltar rgyas par bshad pa bzhin no/ /de ci'i phyir zhe na/ nga'i bstan pa la skyabs su song ste skra dang kha spu bregs nas gos ngur smrig gyon cing rab tu byung ba'i cha lugs can de la 'das pa dang / ma 'ongs pa dang / da ltar bzhugs pa'i sangs rgyas bcom ldan 'das dang / byang chub sems dpa' thams cad kyis thugs rje chen po'i byin gyi brlabs kyis yongs su bzung ba'o/ /skra dang kha spu bregs te gos ngur smrig gyon cing rab tu byung ba'i spyod lam can de ni 'phags pa rnams kyi rnam par grol ba'i rgyal mtshan yin/ nyan thos thams cad kyis rnam par grol bas longs spyod pa'i chos kyi ro'i rgyal mtshan yin no/ /rang sangs rgyas kyi theg pa pa thams cad kyis rnam par grol bas longs spyod pa'i chos kyi ro'i rgyal mtshan yin no/ /theg pa chen po pa thams cad kyis rnam par grol bas longs spyod pa'i chos kyi ro'i rgyal mtshan yin no/ /de bzhin gshegs pas gsungs pa'i theg pa gsum gyi dam pa'i chos yin no/ /dus gsum gyi sangs rgyas dang byang chub sems dpa' thams cad 60.194a kyi thugs rje chen po'i byin gyi brlabs kyis yongs su bzung ba yin no/ /'phags pa rnams kyi rnam par grol ba'i gnas yin no/ /nyan thos kyi theg pa pa thams cad kyi rnam par grol bas longs spyod pa'i chos kyi ro'i gnas yin no/ /rang sangs rgyas kyi theg pa pa thams cad kyis rnam par grol bas longs spyod pa'i chos kyi ro'i gnas yin no/ /theg pa chen po pa thams cad kyi rnam par grol bas longs spyod pa'i chos kyi ro'i gnas yin no/ /rigs kyi bu de lta bas na rnam par grol ba tshol ba dag nga'i bstan pa la skyabs su song ba skra dang kha spu bregs te gos ngur smrig gyon pa rab tu byung ba'i gang zag la bsnyen bkur dang / mchod pa dang / sti stang bya'o/ /bdag gis sngar nyan thos kyi theg pa'i chos la dad de/ bdag nyan cing gzungs su 'dzin na gzhan yang nyan cing 'dzin du gzhug go/ /bdag klog cing kha ton byed na gzhan yang klog cing 'don du gzhug go/ /bdag glegs bam du 'dri na gzhan yang glegs bam du 'drir gzhug go/ /bdag sbyin pa byed na gzhan yang sbyin pa byed du gzhug go/ /bdag ston cing 'chad na gzhan yang ston cing 'chad pa dang / yid la bya ba dang / nan tan bya ba dang / rgya cher spel du gzhug go/ /ji ltar rang sangs rgyas kyi theg pa'i chos la dad cing yid ches te/ bdag nyan cing gzungs su 'dzin na gzhan yang nyan cing 'dzin du gzhug go/ /bdag klog cing kha ton du byed na gzhan yang klog cing 'don du gzhug go/ /bdag glegs bam du 'dri na gzhan yang glegs bam du 'brir gzhug go/ /bdag sbyin pa byed na gzhan yang sbyin pa byed du gzhug go/ /bdag ston cing 'chad na gzhan yang ston cing 'chad pa dang / yid la bya ba dang / nan tan bya ba dang / rgya cher spel du gzhug go/ /'di ltar theg pa chen po la dad cing yid ches te/ bdag nyan cing gzungs su 'dzin na gzhan yang nyan cing 'dzin du gzhug go/ /bdag klog cing kha ton byed na gzhan 60.194b yang klog cing 'don du gzhug go/ /bdag glegs bam du 'dri na gzhan yang glegs bam du 'drir gzhug go/ /bdag sbyin pa byed na gzhan yang sbyin pa byed du gzhug go/ /bdag ston cing 'chad na gzhan yang ston cing 'chad pa dang / yid la bya ba dang / nan tan bya ba dang / rgya cher spel du gzhug go/ /gal te snod du ma gyur na bdag kyang mi nyan gzhan yang nyan du mi gzhug pa nas gzhung de bzhin du rgyas par bshad pa bzhin no/ /sdig pa'i chos thams cad ring du spang ba dang / sdig pa'i grogs po spang ba dang / dge ba'i bshes gnyen la stan pa dang / pha rol du phyin pa drug la brtson zhing su nan tan byed pa dang / mi dge ba'i las thams cad yang dang yang 'gyod cing mthol ba dang / ci la mos pa bzhin du yang dag pa'i smon lam gdab par bya'o/ /gang de ltar byed pa ni lus 'di nyid kyis nyan thos kyi theg pa'i snod du yang 'gyur la/ rang sangs rgyas kyi rigs las kyang phyir mi ldog /theg pa chen po'i rigs las kyang phyir mi ldog pa'i gnas yod do/ /de bas na theg pa gsum char la yang bslab cing nan tan bya'i/ nga rgyal gyis theg pa chen po pa'o zhes khas 'che zhing nyan thos kyi theg pa dang / rang sangs rgyas kyi theg pa'i chos la 'phya zhing skur par mi bya'o/ /ngas sngon theg pa chen po'i chos kyi snod du gyur pa brtan par spyod pa 'ba' zhig la de skad du theg pa chen po sgom pa 'ba' zhig gis mtha'i gnas byed par 'gyur ro/ /zhes bshad pa dang 'dir 'gal ba med do/ /de nas bcom ldan 'das kyis don 'di dag gsal bar bzlas pa'i phyir tshigs su bcad pa 'di gsungs so/ /'khor gyi dkyil 'khor chen po'i mngon sum/ /rdo rje'i snying pos nga la zhus pa/ /tshul khrims nyams pa'i dge slong dag la/ /ci phyir mchod pa gyis shig ces skul/ /sbyangs pa'i yon tan kun kyang nyams nas/ /glen zhing ngan par lta ba 60.195a 'dzin pa/ /chos kyi snod min lam sun 'byin la/ /spyo 'am chad pas gcad du mi gnang / /de las theg pa gsum gyi dam chos/ /yang dag pa yi rnam par sgrol ba/ /sman bzang lta bu bshad pa thos na/ /zhi ba'i mya ngan 'das 'gyur zhes gsungs/ /ci yi phyir na mdo sde gzhan las/ /theg pa chen po gcig gis grol 'gyur/ /theg pa gnyis kyi chos la slob spangs/ /yang 'dir theg pa gsum bshad ci phyir/ /sems can kun la thugs brtse can gyis/ /ngan par lta ba'i las kun spangs te/ /phan pa dang ni bde ba'i don phyir/ /rnam par grol zhing the tsom gcod gsol/ /rgyal rigs rgyal po dag la phan pa/ /rje'u rigs dmangs rigs bar du bde phyir/ /dge slong dag la gnod byed mi gnang / /kha na ma tho chen po'i sdig 'gyur/ /kha spu bregs shing ngur smrig gos gyon/ /sangs rgyas rnams kyi chos kyi rgyal mtshan/ /rnam par grol ba'i lam gyi mig yin/ /sangs rgyas kun gyis byin gyis brlabs pa/ /spyod lam mang po yongs su nyams kyang / /rnam par grol ba yongs su spangs min/ /ngan par lta ba'i sdig pa spangs pas/ /myur du mya ngan 'das pa 'thob 'gyur/ /ji ltar sman rab 'khus par gyur kyang / /nad rnams kun la shin du phan 'gyur/ /de bzhin spyod lam nyams pa de yang / /pha rol sdug bsngal zhi bar byed 'gyur/ /zhu ba'i las dang gso sbyin dag tu/ /dge sbyong de ni der 'dug ma gnang / /gzhan la dam pa'i chos ston dbang ste/ /gnyi gas bsod nams chen po thob 'gyur/ /dkon mchog gsum la dad cing phyogs te/ /nga la ston pa chen por 'dzin pa/ /mi dge sdig pa mang po spong 'gyur/ /mu stegs mang po gang bas de mchog /ji ltar srin mo'i gling du 'khyams pa'i/ /'jigs shing skrag pa'i tshong pa de dag /kun gyis rta spu nyag re bzung bas/ /rgya mtsho las rgal 60.195b bgegs dang bral ba/ /de ltar tshul khrims nyams pa de ni/ /mi dge ngan par lta ba spangs te/ /dad pa gcig gi rgyu yi mthus na/ /nyon mongs pa yi srin las thar 'gyur/ /rnam par grol ba'i rgyal mtshan bsrungs te/ /sangs rgyas mang pos byin gyis brlabs pa'i/ /tshul khrims nyams la gnod mi byed na/ /kha na ma tho'i sdig lci spong 'gyur/ /bsod nams chen po la ni mos shing / /yang dag rnam par grol la dga' ba/ /snod dang snod min kun la mnyam srung / /des ni rnam grol thob par mi dka'/ /glen pa nga rgyal theg pa chen por/ /khas 'che de ni shes pa'i mthu med/ /theg pa gnyis kyi chos la rmongs na/ /theg pa chen por rig 'gyur ci smos/ /dper na mig gi 'bras bu nyams na/ /kha dog rnam pa mthong bar mi 'gyur/ /de bzhin dad pa nyams shing med na/ /theg pa chen po shes par mi nus/ /chu bran btung ba'i mthu yang med na/ /rgya mtsho chen po ga la rngub nus/ /theg pa gnyis kyang goms mi nus na/ /theg pa chen po ga la slob nus/ /theg pa gnyis kyi chos la dad nas/ /theg pa chen po la ni dad 'gyur/ /theg chen chos la dad pa med par/ /tshig tu smra bas don du mi 'gyur/ /nang ni yang dag chad par lta zhing / /theg pa chen po can zhes khas 'che/ /mi dge gsum gyi las ni mi srung / /nga yi dam chos ma rung 'jig byed/ /gang zag de ni tshe 'phos gyur nas/ /mtshams med sems can dmyal bar ltung nges/ /de bas dbang po brtan cing bshad bya'i/ /snod du ma gyur pa la ma yin/ /byams pa'i sems med nga rgyal dregs shing / /gtum zhing brlang ba dbang po zhen pa/ /de ni chad par lta ba yin par/ /mkhas pa rnams kyis de dag shes bya/ /nyan thos dang ni rang rgyal ba dang / /theg pa chen po'i snod ma yin no/ /sangs rgyas kun la smad cing skur pas/ /nges par mtshams med dmyal bar ltung 'gyur/ /'du 'dzi la dga' 60.196a tshul khrims srung zhing / /slob dpon 'chab cing sdug bsngal 'jigs pa/ /mkhas pa dag gis shes par gyis shig /de ni nyan thos theg pa yin no/ /sbyin la dga' zhing skye 'gog rtog pa/ /bas mtha'i gnas la dga' ba dag ni/ /rang rgyal pa yi theg pa yin par/ /mkhas pa dag gis shes par gyis shig /dge ba'i rtsa ba kun dang ldan zhing / /byams pa dang ni snying rje'i sems kyis/ /rtag tu phan pa'i don la dga' ba/ /de ni theg pa chen po yin no/ /tshul khrims bsrung phyir lus srog spong zhing / /sems can dag la mi 'tshe mi gnod/ /stong pa nyid kyi chos la brtson pa/ /theg pa chen po yin par shes bya/ /thams cad chos la sems kyis bzod cing / /smra ba'i tshig 'jam 'jungs pa med pa/ /chos la rtag tu dga' zhing spro ba/ /de yang theg pa chen po yin no/ /chos kyi snod dang snod min kun la/ /bsam pa mnyam pas phan pa'i don byed/ /'jig rten chos kyis mi gos la dag /de yang theg chen yin par shes bya/ /de bas mkhas pa blo can dag ni/ /theg pa gsum la shin du dang bskyed/ /dge 'dun dag la gnod mi byed na/ /myur du bla med byang chub grub 'gyur/ /rigs kyi bu gzhan yang rgyal rigs dge ba dang / bram ze dge ba dang / blon po dge ba dang / khyim bdag dge ba dang / tshong dpon dge ba dang / dge sbyong dge ba dang / rje'u rigs dang / dmangs rigs la sogs pa'i skyes pa 'am/ bud med de dag gnas pa dang spyad par bya ba'i 'khor lo rnam pa bcu dang ldan na lus 'di nyid kyis nyan thos kyi theg pa'i rigs las ldog cing nyams par mi 'gyur ba dang / tshe 'di nyid la nyan thos kyi theg pa'i 'phags pa'i chos kyi snod du 'gyur te/ rang sangs rgyas kyi theg pa dang / theg pa chen po'i snod du ni ma yin no/ /bcu gang zhe na 'di lta ste/ bsam pa yongs su dag pa'i dad pas dge ba dang mi dge ba'i las kyi 'bras 60.196b bu yod par yid ches pa dang / khrel ba dang ngo tsha ba dang ldan pas mi dge ba'i grogs dang ngan par lta ba thams cad yongs su spong ba dang / sdom pa la shin du gnas te/ srog gcod pa yongs su spong ba nas bag med par 'gyur ba'i khu ba 'thung ba'i bar du yongs su spong ba dang / byams pa'i sems la gnas te zhe sdang dang / khong khro ba thams cad yongs su spong ba dang / snying rje'i sems la gnas te sems can nyam thag pa thams cad sgrol ba dang / dga' ba'i sems la bde bar gnas te/ ngag gi las mi dge ba bzhi yongs su spong ba dang / btang snyoms kyi sems la gnas te/ 'dod chags dang ser sna dang / phrag dog thams cad yongs su spong bas dang yang dag pa la phyogs te slu ba'i ltas bzang ngan kun yongs su spong zhing log pa mu stegs can la mi sten pa dang / shin du 'bad pa'i brtson 'grus dang ldan te dge ba'i chos kun la nan tan byed pa dang / rtag tu dgon pa la dga' zhing chos kyi don tshol ba la mi skyo bar spro ba'o/ /rigs kyi bu rgyal rigs dge ba nas rje'u rigs dang / dmangs rigs la sogs pa'i skyes pa dang / bud med de dag gnas pa dang spyad par bya ba'i 'khor lo bcu po 'di dag dang ldan na tshe 'di nyid la nyan thos kyi theg pa pa'i rigs las ldog cing nyams par mi 'gyur ba dang / tshe 'di nyid la nyan thos kyi theg pa'i 'phags pa'i chos mngon du gyur pa dang nyan thos kyi 'phags pa'i chos kyi snod du gyur te/ rang sangs rgyas kyi theg pa dang / theg pa chen po'i 'phags pa'i chos mngon du gyur pa dang / rang sangs rgyas kyi theg pa dang theg pa chen po'i snod du 'gyur ba ni ma yin no/ /gzhung des rang sangs rgyas kyi theg pa dang / theg pa chen po yang shes par bya'o/ /rigs kyi bu de ltar gnas pa dang spyad par ldan pa'i 'khor lo bcu po de dag ni nyan thos dang / rang sangs rgyas dang / byang chub sems 60.197a dpa' dang / sangs rgyas bcom ldan 'das thams cad kyi thun mong du yod pa'o/ /rigs kyi bu gzhan yang gnas pa dang spyad par bya ba'i 'khor lo rnam pa bcu nyan thos dang thun mong ma yin pa/ rang sangs rgyas dang / byang chub sems dpa' dang / sangs rgyas bcom ldan 'das dang thun mong ba yod do/ /gang rgyal rigs dge ba nas rje'u rigs dang / dmangs rigs la sogs pa'i skyes pa dang / bud med de dag gnas pa dang spyad par bya ba'i 'khor lo bcu po 'di dag dang ldan na tshe 'di nyid kyis rang sangs rgyas kyi theg pa'i rigs las kyang nyams par mi 'gyur ba dang / ldog pa dang lus 'di nyid la rang sangs rgyas gyi theg pa'i 'phags pa'i chos rig pa dang / rang sangs rgyas kyi 'phags pa'i chos kyi snod du 'gyur ro/ /bcu gang zhe na/ 'di lta ste lus dang / ngag dang / yid kyi las rnam par dag par sbyong ba dang / khrel ba dang / ngo tsha ba dang ldan te/ bdag gi lus kyis skyo ba dang nye bar len pa'i phung po lnga la shin du 'jigs pa skyed pa dang / 'khor ba'i 'dod pa las shin du rgal dka' bar lta ba dang / rtag tu dben pa'i gnas la dga' zhing 'du 'dzi yongs su spong ba dang / bas mtha' dgon pa la dga' zhing gzhan gyi skyon mi gleng ba dang / dbang po rnams sdom zhing sems rtag tu zhi bas ting nge 'dzin du byed pa dang / rten cing 'brel te 'byung ba la mkhas pas rgyu dang 'bras bu la shin du rtog pa dang / rtag tu bsam gtan la mnyam par 'jog par dga' ba dang / kun nas ldang ba'i chos yongs su 'gog pa la mkhas pa'o/ /rigs kyi bu rgyal rigs dge ba nas rje'u rigs dang / dmangs rigs la sogs pa'i skyes pa dang bud med de dag gnas pa dang spyad par bya ba'i 'khor lo bcu po 'di dag dang ldan pas tshe 'di nyid kyis rang sangs rgyas kyi theg pa'i rigs las phyir ldog cing nyams pa yod par mi 'gyur ba dang / tshe 'di nyid kyis rang sangs rgyas kyi theg pa'i 60.197b 'phags pa'i chos mngon du 'gyur ba dang / rang sangs rgyas kyi theg pa'i 'phags pa'i chos kyi snod du 'gyur ba'o/ /rigs kyi bu 'di dag ni nyan thos dang / rang sangs rgyas thams cad kyi gnas pa dang spyad par bya ba'i 'khor lo zhes bya ste/ nyan thos dang / rang sangs rgyas thams cad kyis 'khor lo 'di la gnas na myur du srid pa gsum gyi rgya mtsho las rgal te mya ngan las 'das pa'i grong khyer chen por phyin par 'gyur ro/ /rigs kyi bu gnas pa dang spyad par bya ba'i 'khor lo zhes bya ba'i tshig gi don gang lags de la gnas pa zhes bya ba ni 'dzin pa dang bcas pa/ bdag gi ba'i gnas su bcas pa/ sdud par byed pa dang bcas pa 'brel bar byed pa dang bcas pa'o/ /de la spyad pa zhes bya ba ni phung po spyod pa dang / khams spyod pa dang / skye mched spyod pa dang / 'brel pa dang bcas pa'i spyod pa'o/ /'khor lo zhes bya ba ni bslab pa dang / dam tshig gi 'khor lo ste dper na 'khor los sgyur ba'i rgyal po ni shing rta'i 'khor lo 'am 'khor lo de gtso bor spyod do/ /de bzhin du nyan thos dang / rang sangs rgyas thams cad 'khor lo 'di la brten nas mya ngan las 'da' ba'i lam tshol te/ de bas na rnam pa 'di gnyis ni theg pa chen po'i snod ma yin no/ /de ci'i phyir zhe na/ de dag ni spyod pa dma' zhing zhan pa la brten pas theg pa chen po'i snod ma yin no/ /bdag phung po rnams spyod pa la 'dzin par byed pa dang bcas pa la skyo zhing 'jigs te/ bdag 'ba' zhig sdug bsngal thams cad las rnam par grol ba tshol gyi sems can thams cad rnam par dgrol ba'i phyir nan tan byed pa ma yin pas theg pa chen po'i snod ma yin no/ /bdag khams rnams spyod pa la gnas su bcas pas skyo zhing 'jigs te/ bdag sdug bsngal thams cad las rnam par grol ba tshol gyi sems can thams cad rnam par dgrol ba'i phyir nan tan byed pa ma yin pas na theg pa chen po'i snod ma yin no/ /bdag skye 60.198a mched mngon par 'du ba rnams spyod pa la sdud par byed pa dang bcas pas skyo zhing 'jigs te/ bdag sdug bsngal thams cad las rnam par grol ba tshol gyi sems can thams cad rnam par dgrol ba'i phyir nan tan byed pa ma yin pas na theg pa chen po'i snod ma yin no/ /de dag 'brel pa dang bcas pa'i spyod pa la 'brel pa'i dbang gis gnas shing brten nas gnas shing brten pa mngon par 'du byed de sems can thams cad sdud pa la mi dga' zhing byams pa dang / snying rje med de 'brel pa dang bcas pa'i phyir theg pa chen po'i snod ma yin no/ /gzhan dag sdug bsngal mang po myong bar mthong yang yal bar btang ste mi skyo ba la bdag 'ba' zhig rnam par grol ba tshol ba'i phyir theg pa chen po'i snod ma yin no/ /de dag bdag gi kun nas nyon mongs pa'i mgo bcad pas sems can thams cad kyi kun nas nyon mongs pa'i mgo gcod pa la mi spro bas theg pa chen po'i snod ma yin no/ /de dag theg pa chen po'i 'khor los byang chub la 'bab pa ma yin pas na theg pa chen po'i snod ma yin no/ /de dag 'od chen po'i 'khor los byang chub la 'bab pa ma yin pas na theg pa chen po'i snod ma yin no/ /de dag gcig pu zla med par mya ngan las 'das pa'i grong khyer du 'gro ba la dga' zhing nan tan byed pas na theg pa chen po'i snod ma yin no/ /rigs kyi bu sems can gang nyan thos kyi theg pa dang / rang sangs rgyas kyi theg pa'i chos la la nan tan ma byas pa brtson 'grus ma brtsams pa dag ni dbang po yongs su ma smin te/ dbang po zhan pa/ brtson 'grus chung ba dag la gal te shin du zab mo theg pa chen po'i dam pa'i chos bstan na bshad pa dang nyan pa gnyi ga kha na ma tho ba chen po'i sdig thob par 'gyur te de ni sangs rgyas thams cad la 'khus pa yin no/ /de ci'i phyir zhe na/ sems can gang nyan thos kyi theg pa dang / rang sangs rgyas kyi theg pa'i chos la nan tan ma byas shing brtson 60.198b 'grus ma brtsams te/ dbang po zhan pa/ brtson 'grus chung ba dag shin du zab pa theg pa chen po'i dam pa'i chos mnyan na sems can de ni yang dag par glen pa/ gti mug pa yin te de ni bdag shes par khas 'che yang chad pa'i mtha' dang / log pa'i 'du shes su 'gyur ba dang rgyu med par smra zhing las kyi 'bras bu rnams la med par 'dzin pas dge ba byas pa dang / sdig pa byas pa thams cad la med par 'dzin pa dang / theg pa chen po la brdzun du smra zhing nga'i dam pa'i chos ma rung bar byed pa chos ma yin pa la ni chos yin par 'chad pa chos la ni chos ma yin par 'chad pa/ dge sbyong ma yin pa la dge sbyong yin par 'chad pa dge sbyong yang dag pa la ni dge sbyong ma yin par 'chad pa 'dul ba ma yin pa la ni 'dul bar 'chad pa 'dul ba yang dag pa la ni 'dul ba ma yin par 'chad de/ glen pa gti mug gi rang bzhin can nga rgyal gyis mngon par zin pa phrag dog dang ser snas yongs su bsten pa theg pa chen po'i chos la bstod cing srung ba dang kun du rgyas par byed kyang nyan thos kyi theg pa dang / rang sangs rgyas kyi theg pa'i chos la 'phya zhing skur nas rgyas par mi byed do/ /de ni nyan thos kyi theg pa dang rang sangs rgyas kyi theg pa dang / bla na med pa yang dag pa'i theg pa la brtan te/ khyim nas khyim ma yin par rab tu byung nas bsnyen par rdzogs kyang dge slong nyid du 'gyur bar yang dag pa ji lta ba bzhin du mi shes pa dang / dge ba'i chos thams cad mngon par sdud pa'i rgyu yang dag pa ji lta ba bzhin du mi shes pas nga'i slob ma chos kyi snod du gyur pa dang / chos kyi snod du ma gyur pa dang / slob pa dang / mi slob pa la nan tan byed pa dang / mtha'i gnas byas pa'i 'bras bu thob pa dang / dge ba'i skye bo tshul khrims srung ba dang / tshul khrims nyams pa dang / tshul khrims med pa dag la rnam pa sna tshogs kyis spyo zhing gshe ba dang / gnod pa byed pa dang / chos gos dang / lhung bzed 'phrog pa dang / 60.199a 'tsho ba'i yo byad la spyod du mi ster ba dang / bzung zhing bcing ba yang byed do/ /de ltar rgyu dang 'bras bu thams cad med par lta zhing chad par smra ba dag ni mi'i nang na gnas kyang / de ni yang dag par srin po zhes bya ste/ ma 'ongs pa'i dus na bskal pa chen po grangs med pa'i bar du yang mi'i lus thob par dka'o/ /sems can dmyal bar tshad med pa'i sdug bsngal myong bar yang sla'i/ mi'i nang na chad par lta ba ni ma yin no/ /de ltar gang zag glen pa de ni ring po mi thogs par lus kyi yan lag dum bur chad cing nyin zhag du mar lce lkug cing smra mi nus pa dang / shin du mi bzad pa'i na ba dang tsha ba'i sdug bsngal chen po myong ba dang / tshe 'phos nas gdon mi za bar mtshams med pa'i sems can dmyal bar ltung zhing ngan song kun du 'khor lo bzhin du 'khor la sdug bsngal mang po len te thar ba'i dus med do/ /bskal pa brgya stong gi bar du yang mi'i lus thob par dka'o/ /gal te bskal pa tshad med grangs med pa 'das nas mi'i lus thob na yang sangs rgyas mi bzhugs pa rnyog pa lnga'i 'jig rten gyi khams su skye ste dmus long du 'gyur ba dang 'on pa dang lkug pa dang lce med pa dang / nad rnam pa sna tshogs kyis gzir ba dang lus thung zhing mi sdug pas kun gyi yid du mi 'ong ba dang / smra mi mkhas shing tshig rnar mi 'ong ba dang / sems rtag tu myos shing ci yang mi shes pa dang / dbul phongs pa'i rigs su skyes nas ci yang mi rnyed pa dang / dge ba'i bshes gnyen dang mi phrad pa dang / sdig pa'i bshes gnyen gyi rjes su sdig pa'i las byed pa la dga' ba dang / ngan par lta ba la chags shing mtshams med pa'i sdig pa byed pa la dga' bas phyir yang mtshams med pa'i sems can dmyal bar ltung bar 'gyur te/ ngan song las shin du thar bar dka'o/ /de ltar glen pa gti mug can chad pa dang / 'gog par smra ba des nga'i dam pa'i chos ma rung bar byas nas nga'i slob ma 60.199b tshul khrims srung ba dang / tshul khrims nyams pa dang / tshul khrims med pa la nan tan gyis chad pas gcod cing dge ba'i phyogs la bde bar spyod du mi ster te/ de'i rgyu de'i rkyen gyis bskal pa brgya stong gi bar du ngan song du lhung nas mun pa nas mun par rgyu ste/ thar ba'i dus med do/ /de ltar sems can de'i sdig pa rnam par smin pa ni nyan thos dang rang sangs rgyas kyi theg pa'i chos mnyan pa la nan tan ma byas par shin du zab pa theg pa chen po'i dam pa'i chos la nyan cing nan tan byed pa la rtsol ba'i phyir ro/ /de ltar glen pa gti mug can chad par lta bar smra ba de mi ma rabs tha ma'i lus kyang thob par dka' na 'phags pa'i chos kyi snod du 'gyur ba lta ci smos nyan thos dang / rang sangs rgyas kyi mya ngan las 'da' ba yang mi thob na shin du zab pa bla na med pa yang dag par rdzogs pa'i byang chub thob pa lta ci smos te/ sems can de'i nyes pa ni nyan thos kyi theg pa'i chos dang / rang sangs rgyas kyi theg pa'i chos ma bslabs par theg pa chen po'i chos la zhugs par gyur pa'i phyir ro/ /rigs kyi bu 'di lta ste/ rdza so ma btang ba'i nang du mar dang 'o ma blugs na thams cad 'thungs nas snod dang bcud gnyi ga ma rung bar byed do/ /de ci'i phyir zhe na/ snod la skyon yod pa'i phyir ro/ /de bzhin du sems can dag kyang nyan thos kyi theg pa dang / rang sangs rgyas kyi theg pa'i chos la shin du nan tan ma byas pa yang dag pa'i brtson 'grus ma brtsams pa dbang po yongs su ma smin pa dbang po zhan pa/ brtson 'grus chung ba dag la gang gis shin du zab pa theg pa chen po'i dam pa'i chos bshad na bshad pa dang nyan pa gnyi ga kha na ma tho ba chen po'i sdig thob par 'gyur te/ sangs rgyas thams cad la 'khus pa'i skyon du 'gyur ba ni gong du rgyas par bshad pa bzhin no/ /yang 'di lta ste 'jig rten pa'i bang mdzod zag pa zhig ral can gyi nang du nor rin po che bcug na 60.200a na chud zos shing stor bar 'gyur ro/ /de bzhin du sems can gang theg pa gnyis kyi chos la 'phya zhing skur te ma dad pa nan tan du mi slob pa dag la theg pa chen po bshad na yang dag pa ji lta ba bzhin du mi shes te/ de'i dbang gis sdig byed cing 'khor ba'i mtha' zad mi shes par 'gyur ro/ /'di lta ste gru zag pa bug rdol can skyed pa dang 'deg pa mi nus pa la zhon te rgya mtsho'i nang du 'jug pa de bzhin du sems can gang ser sna dang / phrag dog gi dbang du gyur pa theg pa gnyis kyi chos la nan tan ma byas par bdag ni theg pa chen po pa yin no zhes khas 'che ba de ni chad par lta ba/ nga rgyal can g.yo dang sgyus zag pa can du gyur pa'i lus kyis thams cad mkhyen pa'i rgya mtshor 'jug mi nus so/ /'di lta ste gang zag dmus long du gyur pa ni rin po che rnam pa sna tshogs bstan pa'i gnas su mi 'gyur ro/ /de bzhin du nga rgyal gyi dbang du gyur pa bag med pa stong par lta ba la chags shing theg pa gnyis mi slob pa'i shes rab kyi mig med pas dmus long du gyur pa la ni bla na med pa'i theg pa chen po'i yon tan rin po che bstan pa'i gnas su mi 'gyur ro/ /'di lta ste lus shin du mnam zhing rul bar gyur pa la byug pa dri zhim pa rnam pa sna tshogs kyis byugs kyang dri zhim par mi 'gyur ro/ /de bzhin du sems can glen pa gti mug can nga rgyal gyis mngon par zin pa/ theg pa gnyis kyi chos la brtson par ma dad cing srog gcod pa ma spangs pa nas log par lta ba'i bar du ma spangs pa de dag ni bla na med pa'i theg pa chen po la nan tan byed kyang shin du zab mo'i chos shes par mi nus so/ /'di lta ste gram khrod du sa bon bzang po btab ste shin du las cher byas kyang 'bras bu dang lo tog rnyed par mi 'gyur ro/ /de bzhin du sems can gang theg pa gnyis kyi chos la nga rgyal dang / le lo byed de nan tan mi byed pa dang / 'dod pa lnga la chags te mi skyo ba dag lus 60.200b de nyid la theg pa chen po'i rigs su shin du spyad dka' ba'i brtson 'grus byas kyang cir yang 'grub pa'i don med do/ /'di lta ste/ rdza ma sngar dug gi snod byas pa'i nang du phyis sha kha ra chung zad tsam btab pas spyad du mi rung ngo / /de bzhin du sems can gang theg pa gnyis kyi chos la nan tan mi byed pa rgyu med par smra ba la theg pa chen po bstan kyang bdag dang gzhan la phan pa'i don du mi 'gyur ro/ /'di lta ste/ sngar sha kha ra'i snod byas pa'i rdza ma'i nang du phyis dug cung zad btab na yang spyad du mi rung ngo / /de bzhin du sems can gang theg pa gnyis kyi chos la nan tan ma byas par theg pa chen po ston na gnyi ga nyams shing 'khyams par 'gyur ro/ /'di lta ste/ dper na smyos shing sems 'khrugs pa'i mdun du rol mo sna tshogs byas kyang bye brag mi phyed pa de bzhin du sems can gang theg pa gnyis kyi chos la shin du nan tan ma byas pa 'dod chags dang / zhe sdang dang / gti mug la sogs pa'i nyon mongs pa drag pos sems bslad pas rgyu med par 'dzin pa/ chad pa dang med par smra ba/ dbang po ma smin pa dag la theg pa chen po yun ring mo zhig tu bshad kyang shes par ram rtogs par mi nus so/ /'di lta ste/ gang zhig go cha med de mtshon cha mi thogs par g.yul ngor song na gdon mi za bar rmas shing sdug bsngal myong bar 'gyur ro/ /de bzhin du sems can gang theg pa gnyis kyi chos la nan tan ma byas pa shes rab zhan pa/ dbang po dang snod du ma gyur pa dag la theg pa chen po bshad na gdon mi za bar log par 'dzin pa'i phyir sdig pa'i las kun byed pa la zad pa'i mtha' med do/ /de ltar glen pa gti mug can de ring po mi thogs par lus kyi yan lag dum bur chad pa nyin zhag du mar lce lkug cing smra mi nus pa dang / shin du mi zad pa'i na ba dang tsha ba'i sdug bsngal chen po myong ba dang 'chi 'phos nas kyang gdon mi za bar mtshams med pa'i sems can dmyal bar skye ste ngan song rnams su 60.201a 'khor zhing 'jug pa ni ji ltar sngar rgyas par bshad pa bzhin no/ /rigs kyi bu de bas na mkhas pa dag ni sngar pha rol po'i sems brtags te gdod chos bstan par bya'o/ /sngar byams pa'i sems dang / snying rje'i sems dang / dga' ba'i sems dang / phan pa'i sems dang / le lo med pa'i sems dang / shin du bzod pa'i sems dang / nga rgyal med pa'i sems dang / phrag dog med pa'i sems dang / 'jungs pa med pa'i sems dang / mnyam par gzhag pa'i ting nge 'dzin gyi sems bskyed nas gdod pha rol po la dam pa'i chos bstan par bya'i/ sems can pha rol pos chos thos nas 'khor bar 'khor ba'i g.yang sa chen por lhung bar mi bya'o/ /de bas na de bzhin gshegs pa ni sems can thams cad kyi sems kyi mtshan nyid thugs su chud nas dri ma med pa mi len par spyod pa'i 'khor los dam pa'i chos ston te/ go cha chen po bgos pa'i byang chub sems dpa' sems dpa' chen po rnams gzhan la chos ston pa yang de bzhin te/ byams shing brtse ba'i phyir nyon mongs pa thams cad yongs su gcad pa dang / srid pa gsum gyi rgya mtsho las bsgral ba dang / sems can dag theg pa gsum gang la dad pa'i theg pa gcig la 'dzud cing myur du rdzogs par bya ba'i phyir dam pa'i chos ston gyi/ 'khor bar 'khor ba'i g.yang sa chen por ltung bar ni nams kyang mi byed do/ /de la ji ltar na dri ma med par spyod pa'i 'khor lo zhes bya zhe na/ de la dri ma med pa zhes bya ba ni chos ston pa'i tshe na phung po yod pa'i phyir ma yin/ skye mched yod pa'i phyir ma yin/ khams yod pa'i phyir ma yin/ 'dod pa'i khams yod pa'i phyir ma yin/ gzugs yod pa'i khams yod pa'i phyir ma yin/ gzugs med pa'i khams yod pa'i phyir ma yin/ 'jig rten 'di yod pa'i phyir ma yin/ 'jig rten pha rol po yod pa'i phyir ma yin/ 'du byed yod pa'i phyir ma yin/ tshor ba 60.201b yod pa'i phyir ma yin/ 'du shes yod pa'i phyir ma yin/ rtog pa yod pa'i phyir ma yin/ rig pa yod pa'i phyir ma yin/ yid la bya ba yod pa'i phyir ma yin/ ma rig pa yod pa'i phyir ma yin pa nas rga shi'i bar du yod pa'i phyir ma yin/ 'gro ba yod pa dang / 'gro ba med pa'i phyir sems can la dam pa'i chos ston pa ma yin no/ /'di lta ste/ phung po dang / khams dang / skye mched nas 'gro ba dang 'gro ba med pa'i bar du rgyas par bshad pa kun kyang rab tu zhi bas sems can la dam pa'i chos ston to/ /de lta bas na dri ma med pa zhes bya'o/ /spyod pa zhes bya ba ni 'di lta ste/ 'di nas 'chi 'pho ba dang pha rol du skye ba yongs su gcad pa'i phyir sems can dag la chos ston to/ /phung po dang / khams dang / skye mched yongs su gcad pa nas de bzhin du 'gro ba dang mi 'gro ba'i bar du rgyas par yongs su gcod pa'i phyir sems can rnams la chos ston pa ni spyod pa zhes bya'o/ /'khor lo zhes bya ba ni 'di lta ste/ zla ba nya ba'i 'od shin du sim zhing gsal ba thogs pa med par nam mkha' la snang bas thams cad du thogs pa med pa'i spyod yul du 'gyur ba de bzhin du de bzhin gshegs pa dang / byang chub sems dpa' rnams kyi ji snyed rdzu 'phrul dang / mngon par shes pa dang / shes pa brda sprod pa dang / bslab par bya ba dang / rnam par rgyal ba'i 'khor lo gsum pos mdzad pa thogs pa med par 'jig rten gyi khams kun du snod du gyur pa'i sems can thams cad la phan pa dang bde ba'i phyir sems can dag gzhan la skyabs su 'gro ba dang / 'jig rten rgyang pan pa thams cad dang ma 'dres pa dang / nyan thos dang / rang sangs rgyas thams cad dang ma 'dres par sems can dag 'khor ba'i sdug bsngal thams cad bcad de/ shin du bde ba'i byang chub kyi mya ngan las 'da' ba thob par byed pa ni 'khor lo zhes 60.202a bya'o/ /de ltar na de dag ni sangs rgyas dang / byang chub sems dpa' rnams kyi dri ma med par spyod pa'i 'khor lo zhes bya'o/ /de la ji ltar na mi len par spyod pa'i 'khor lo zhe na/ chos thams cad la thogs pa med par ji ltar nyi ma'i dkyil 'khor kun du snang ba bzhin du theg pa gsum gyi dbang po dang snod ji lta ba bzhin du chags pa med par dam pa'i chos ston to/ /de bzhin gshegs pa sems can rnams la chos ston pa ni ji ltar nam mkha' tha dad pa'i mtshan nyid med pa ltar tshad med pa'i ting nge 'dzin dang / rnam par grol ba'i dbang dang / bkod pas yongs su zin par sems can dag la chags pa med par dam pa'i chos ston to/ /go cha chen po bgos pa'i byang chub sems dpa' sems dpa' chen po rnams pha rol la chos ston pa yang de dang 'dra ste/ chos ston pa ni yod pa yang ma yin/ med pa yang ma yin/ gzugs nyid stong pa ma yin/ gzugs las gzhan pa stong pa ma yin pa nas rnam par shes pa nyid kyi bar du stong pa ma yin/ rnam par shes pa las gzhan pa stong pa ma yin no/ /mig nyid stong pa ma yin/ mig las gzhan pa stong pa ma yin pa nas yid nyid kyi bar du stong pa ma yin/ yid las gzhan pa stong pa ma yin no/ /gzugs nyid stong pa ma yin/ gzugs las gzhan pa stong pa ma yin pa nas chos nyid kyi bar du stong pa ma yin/ chos las gzhan pa stong pa ma yin no/ /mig gi rnam par shes pa nyid stong pa ma yin/ mig gi rnam par shes pa las gzhan pa stong pa ma yin pa nas yid kyi rnam par shes pa nyid kyi bar du stong pa ma yin no/ /yid kyi rnam par shes pa las gzhan pa stong pa ma yin no/ /'dod pa'i khams nyid stong pa ma yin/ 'dod pa'i khams las gzhan pa stong pa ma yin pa nas nam mkha' mtha' yas skye mched stongs nyid stong pa ma 60.202b yin/ nam mkha' mtha' yas skye mched stengs las gzhan pa stong pa ma yin no/ /rnam shes mtha' yas skye mched stengs nyid stong pa ma yin/ rnam shes mtha' yas skye mched stengs las gzhan pa stong pa ma yin/ cung zad med pa'i skye mched stengs nyid stong pa ma yin/ cung zad med pa'i skye mched stengs las gzhan pa stong pa ma yin no/ /'du shes med 'du shes med min skye mched stengs nyid stong pa ma yin/ 'du shes med 'du shes med min skye mched stengs las gzhan pa stong pa ma yin no/ /dran pa nye bar gzhag pa bzhi nyid stong pa ma yin/ dran pa nye bar gzhag pa bzhi las gzhan pa stong pa ma yin pa nas 'phags pa'i lam yan lag brgyad pa nyid kyi bar du stong pa ma yin/ 'phags pa'i lam yan lag brgyad pa las gzhan pa stong pa ma yin no/ /rten cing 'brel te 'byung ba nyid stong pa ma yin/ rten cing 'brel te 'byung ba'i chos las gzhan pa stong pa ma yin no/ /bsrung bar bya ba gsum po nyid stong pa ma yin/ bsrung bar bya ba gsum po las gzhan pa stong pa ma yin no/ /'jigs pa med pa bzhi nyid stong pa ma yin/ /'jigs pa med pa bzhi las gzhan pa stong pa ma yin no/ /stobs bcu nyid stong pa ma yin/ stobs bcu las gzhan pa stong pa ma yin no/ /ma 'dres pa'i chos bcwo brgyad nyid stong pa ma yin/ ma 'dres pa'i chos bcwa brgyad las gzhan pa stong pa ma yin no/ /byams pa chen po dang / snying rje chen po dang / dga' ba chen po dang / btang snyoms chen po nyid stong pa ma yin/ byams pa chen po dang / snying rje chen po dang / dga' ba chen po dang / btang snyoms chen po las gzhan pa stong pa ma yin no/ /mya ngan las 'da' ba nyid stong pa ma yin/ mya ngan las 'das pa las gzhan pa stong pa ma yin no/ /de dag ni de bzhin gshegs pa dang / byang chub sems dpa' rnams kyi sems can rnams la dam pa'i chos ston pa la 60.203a dbu ma'i nan tan zhes bya'o/ /rigs kyi bu de ltar na de bzhin gshegs pas sems can dag la dri ma med par spyod pa'i 'khor los chos ston te/ ji ltar zla ba nya ba'i 'od shin du gsal zhing sim pa dang / thogs pa med par nam mkha' kun du khyab pa dang / spyod yul thams cad du thogs pa med par snang ba nas gzhung de bzhin du rgyas par ston to/ /dang du mi len par spyod pa'i 'khor los kyang dam pa'i chos ston cing chos thams cad la thogs pa med pa ni ji ltar nyi ma'i 'od kun du gsal ba ltar theg pa gsum gyi snod dang dbang po ji lta ba bzhin du dam pa'i chos chags pa med par ston to/ /de bzhin gshegs pas sems can dag la chos ston pa ni ji ltar nam mkha' la mtshan nyid tha dad pa med pa ltar ting nge 'dzin tshad med pas rnam par rol pa'i dbang dang / bkod pas yongs su bzung bas sems can dag la chags pa med par dam pa'i chos ston te/ theg pa gsum las gang dang 'thun pa bzhin du 'dzud do/ /go cha chen po bgos pa'i byang chub sems dpa' sems dpa' chen pos gzhan la chos ston pa yang de bzhin te/ sems can rnams la mchog dam pa shin du zab pa'i chos 'di thos par byas te theg pa gsum las gang la mos pa de gcig la 'dzud cing dge ba'i rtsa ba yongs su smin par bya ba dang / theg pa gcig la bde bar dgod pa dang / gang 'khor ba'i gnas su sdig pa mi dge ba'i las rnam pa thams cad 'phel bar mi byed cing / thams cad mya ngan las 'da' ba shin du brtan pa dang phyir mi ldog par yang byed do/ /rigs kyi bu byang chub sems dpa' sems dpa' chen po dag sems can grangs med tshad med pa'i 'khor ba yongs su gcad pa'i phyir chos ston to/ /nyan thos dang / rang sangs rgyas ni bdag gi 'khor ba 'ba' shig gcad pa'i phyir pha rol la chos ston to/ /byang chub sems dpa' sems dpa' 60.203b chen po ni sems can tshad med grangs med pa dag chu bo bzhi las bsgral ba'i phyir gzhan la chos ston to/ /nyan thos dang / rang sangs rgyas ni bdag chu bo bzhi las bsgral ba'i phyir gzhan la chos ston to/ /byang chub sems dpa' sems dpa' chen po ni sems can tshad med grangs med pa'i nyon mongs pa'i nad bsal ba'i phyir gzhan la chos ston to/ /nyan thos dang / rang sangs rgyas ni bdag nyid kyi nyon mongs pa'i nad bsal ba'i phyir/ gzhan la chos ston to/ /byang chub sems dpa' sems dpa' chen po ni sems can thams cad kyi phung po'i nyon mongs pa'i bag chags kyi rgyun lhag ma ma lus par gcad pa'i phyir gzhan la chos ston to/ /nyan thos dang / rang sangs rgyas ni bdag 'ba' shig gi phung po'i nyon mongs pa'i bag chags kyi rgyun lhag ma ma lus par gcad pa'i phyir gzhan la chos ston to/ /byang chub sems dpa' sems dpa' chen po ni snying rje chen po'i 'bras bu bsgrub pa'i phyir snying rje chen pos rgyu byas te gzhan la chos ston to/ /nyan thos dang / rang sangs rgyas ni snying rje chen po'i 'bras bu'i phyir snying rje chen pos rgyu byas te gzhan la chos ston pa ma yin no/ /byang chub sems dpa' sems dpa' chen po ni sems can thams cad la dmigs te gzhan la chos ston to/ /nyan thos dang / rang sangs rgyas ni sems can rnams la dmigs pa med par gzhan la chos ston to/ /byang chub sems dpa' sems dpa' chen po ni sems can thams cad kyi sdug bsngal zhi bar bya ba'i phyir gzhan la chos ston to/ /nyan thos dang / rang sangs rgyas ni bdag 'ba' zhig gi sdug bsngal zhi bar bya ba'i phyir gzhan la chos ston to/ /byang chub sems dpa' sems dpa' chen po ni sems can thams cad la chos kyi ros khyab par bya ba'i phyir gzhan la chos ston to/ /nyan thos dang / rang sangs rgyas ni bdag 'ba' zhig la chos kyi ros khyab par bya ba'i phyir/ 60.204a gzhan la chos ston to/ /byang chub sems dpa' sems dpa' chen po ni sems can thams cad rgyal ba'i chos kyi 'od thob par bya ba'i phyir gzhan la chos ston to/ /nyan thos dang / rang sangs rgyas ni bdag 'ba' zhig rgyal ba'i chos kyi 'od thob par bya ba'i phyir gzhan la chos ston to/ /rigs kyi bu mdor na byang chub sems dpa' sems dpa' chen po ni sdom pa tshad med pas sems can thams cad kyi ma rig pa'i mun pa chen po yongs su bsal ba dang / 'jigs pa'i dngos po chen po dang / gnod par 'gyur ba thams cad yongs su bsal te 'od kyi snang ba chen po 'thob pa dang / grags pa chen po 'thob pa dang / yang dag pa ji lta ba bzhin du thams cad mkhyen pa'i ye shes rtogs par bya ba'i phyir gzhan la chos ston to/ /nyan thos dang / rang sangs rgyas ni sdom pa cung zad kyis bdag gi ma rig pa'i mun pa bsal ba dang / 'od snang ba cung zad 'thob pa dang / grags pa cung zad 'thob pa dang / yang dag pa ji lta ba bzhin du chos chud pa'i ye shes cung zad rtogs par bya ba'i phyir gzhan la chos ston to/ /rigs kyi bu nyan thos dang / rang sangs rgyas ni gzhan la yang dag par dmigs pa med do/ /gzhan la yang dag par snying rje ba med do/ /gzhan la yang dag par mi brnyas pa'i sems med do/ /gzhan la yang dag par phan pa dang bde bar bya ba'i sems med do/ /gzhan la yang dag par dkrol zhing sgrol ba'i sems med do/ /gzhan la yang dag par 'deg pa'i sems med do/ /gzhan la yang dag par bsngags shing bstod pa'i sems med do/ /pha rol la yang dag par g.yo dang sgyu med par bstod pa ma yin no/ /gzhan la yang dag par bdag gi lus la mi lta zhing gzhan gyi phan pa dang bde ba sgrub pa ma yin no/ /gzhan la yang dag par lus dang / ngag dang / yid kyi las mi nyams pa ma yin no/ /rigs kyi bu theg pa chen po la gnas na ci yang bdag gir dmigs pa 60.204b gang yang yang dag par med pa nas de bzhin du rgyas par pha rol la lus dang / ngag dang / yid kyi las gzhan la gnod pa skyed pa gang yang med do/ / bam po bdun pa/ rigs kyi bu gzhan yang sems can gang rang bzhin gyis gdug pa/ tshig brlang zhing rtsub pa/ yang dag par glen pa/ gti mug gi rang bzhin can shes pa snyems pa srog gcod pa ma spangs pa nas ngan par lta ba'i bar du ma spangs pa/ gzhan dag gi khe dang / bkur sti dang / mchod pa dang / grags pa rnyed pa mthong na phrag dog skyed pa/ bdag rtag tu khe dang / bkur sti dang / mchod pa dang / grags pa tshol bas mi ngoms pa/ bdag stod cing gzhan la smod pa/ bdag gi lus dang / ngag dang / yid kyi las mi sdom pa/ sdig pa thams cad spyod pa la rtag tu dga' ba/ rang gi sems gdug pa/ snying rje'i sems med pa/ 'dzem pa med pa/ ngo tsha ba med pa/ gzhan la 'tshe ba la dga' ba/ bsod nams kyi zhing la bzang ngan du rnam par 'byed pa/ nga'i bstan pa la zhugs pa rab tu byung ba la skyon tshol zhing gnod par klags lta ba la dga' ba/ skyon cung zad tsam byung na bden nam brdzun ma brtags par 'phya zhing skur te gshe zhing spyo ba/ sems ma dul ba/ rgod pa g.yeng ba/ rab tu byung ba la 'tshe bar dga' ba/ bdag gi skyon la mi sems shing gzhan la 'phya ba/ theg pa chen po'i yon tan dang / bsngags pa brjod pa thos na tshol zhing 'jug pa'i sems skye mod kyi/ kha na ma tho ba'i sdig lci ba spyod pa la dga' ba/ rab tu ma zhi ba/ gzhan la bslu ba'i phyir theg pa chen po'i chos la bdag nyan cing gzhan yang nyan du gzhug pa'i tshul ston pa dang / bdag klog pa dang / kha ton byed cing gzhan yang klog cing kha ton byed du 'jug pa'i tshul ston pa dang / bdag bstod pa'i phyir gzhan la smod pa de theg pa chen po'i chos la sti stang dang bcas pas bstod kyang theg pa chen po'i spyod yul la nan tan du ma bslabs pas don khong du chud pa med 60.205a par bdag ni theg pa chen po pa'o zhes khas 'che zhing khe dang / grags pa dang / bdag gi 'tsho ba btsal ba'i phyir gzhan bdag la gnas 'cha' zhing slob tu 'jug go /dper na tshul khrims nyams pa sdig pa spyod pa'i 'dul ba 'dzin pa lta bu bdag tshul khrims nyams la sdig pa spyod kyang khe dang / grags pa'i phyir gzhan dag 'dul ba'i sde snod slob par gzhen 'dabs pa de ltar g.yo dang gya gyur ldan la slu ba'i ngang can gyi sems can de dag ni mi'i lus tha ma yang thob par dka' zhing mtho ris kyi lha dang / theg pa gnyis kyi mya ngan las 'da' ba yang nyams te mi thob na theg pa chen po thob pa lta ci smos te de ni gnas med do/ /de 'chi 'phos nas kyang sems can dmyal bar ltung ste/ thar pa'i dus med pas mkhas pa dag gis de la bsten par mi bya'o/ /khrel ba dang / ngo tsha ba med pa 'khor mang po'i nang du khe dang / bkur sti'i phyir nga ni theg pa chen po pa'o zhes seng ge'i sgra sgrogs pas glen pa gti mug can dag dang bsnyen cing grogs su byed do/ /de ni dper na bong bus seng ge'i lpags pa gyon te bdag ni seng ge'o zhes khas 'che bas mi zhig gis rgyang nas mthong na/ de seng ge nyid yin par 'dzin to/ /de nas des sgra phyung ba dang / thams cad kyis bong bu yin par shes nas kun gyis mchil mas btab ste/ so so nas smras pa/ 'di ko mi gtsang ba za ba'i sdig to bong bu lta na zhes tshig ngan pa sna tshogs kyis smad de dong ngo / /de ltar na de bzhin du ngas bshad pa'i gang zag mi dge ba bcu'i las kyi lam spyod pa la spro ba/ lha dang mi thams cad kyi sa bon bsregs pa yin te/ nyan thos dang / rang sangs rgyas kyi theg pa'i chos las kyang phyir ldog pa yin na theg pa chen po'i snod du 'gyur ba lta ci smos/ de ltar glen pa gti mug can nga rgyal gyis mngon par zin te bdag theg pa chen po pa'o zhes pha rol la sgyus brjod cing khe dang / bkur sti sdud pa de ni dper na rkang 60.205b lag med pa'i mi glen pa zhig dgra la brgal ba'i phyir g.yul du zhugs kyi nga bdag nyon mongs pa las don du 'grub pa med do/ /de ltar de bzhin du theg pa chen po par sgyus khas 'che ba de yang 'di ltar dad pa'i lag pa dang / tshul khrims kyi rkang pa ma tshang bar rang gi las dang spyod pa la mi dpog cing nyon mongs pa'i g.yul chen po la rgol bar chags pa ni bdag nyon mongs pa tsam las don du mi 'gyur ro/ /gang zag de sgo gsum mi sdom par sdig pa 'ba' zhig spyod cing bdag ni theg pa chen po pa'o zhes khas 'che yang theg pa gsum gyi chos kyi snod ma yin pas sems can thams cad kyi nyon mongs pa'i dgra shin tu gnas pa choms par ram/ sems can thams cad la 'phags pa'i lam gyi yan lag brgyad ston par ram/ 'jigs pa mad pa'i mya ngan las 'da' ba'i grong khyer du dgod pa'i gnas med do/ /de ci'i phyir zhe na/ rigs kyi bu theg pa chen po zhes bya ba ni phul du gyur pa'i tshul khrims rnam par dag par srung ba/ phul du gyur pa'i dge ba'i mchog spyod par ldan pa/ phul du gyur pa'i khrel ba dang / ngo tsha bar brten pa'o/ /'jig rten phyi ma'i sdug bsngal gyi 'bras bu la shin du lta zhing 'jigs pa'o/ /mi dge ba'i chos thams cad yongs su spong zhing dge ba'i chos thams cad la nan tan byed pa la spro ba'o/ /byams pa dang / snying rjes sems can thams cad la khyab pa'o/ /sems can thams cad la phan pa dang / bde ba'i don bya ba'i phyir rtsol ba'o/ /sems can thams cad 'khor ba'i sdug bsngal las sgrol zhing 'don pa'o/ /bdag gis lus kyi bde ba la mi lta bar sems can thams cad la phan pa dang bde ba'i don stobs pa ste/ de dag ni theg pa chen po la gnas pa zhes bya'o/ /rigs kyi bu mtshan nyid gang dag dang ldan na nyan thos kyi theg pa zhes bya zhe na/ gang dag yang dag pa'i dran pa la bde bar gnas zhing ting nge 'dzin la mnyam par 'jog par mos 60.206a pas rtag tu brtson pa dang / g.yo dang sgyu spangs shing las kyi 'bras bu la yid ches pa dang / 'dod pa lnga la mi chags shing 'jig rten gyi chos brgyad kyis mi gos pa dang / mgo'i thod la me 'bar ba bzhin du dge ba la shin du brtson pa dang / phung po dang / khams dang / skye mched la shin du rtog pa dang / 'phags pa'i rigs la bde bar gnas par rtag tu mos pa ste/ mtshan nyid 'di dag dang ldan pa ni nyan thos kyi theg pa zhes bya ste/ gang zag 'di rang sangs rgyas kyi theg pa'i snod du yang mi 'gyur na theg pa chen po'i snod du 'gyur ba lta ci smos/ rigs kyi bu mtshan nyid gang dag dang ldan pas rang sangs rgyas kyi theg pa zhes bya zhe na/ sems can gang dag nyan thos kyi yon tan de dag thams cad dang ldan la gzhan yang nye bar len pa'i phung po lnga la yang dang yang du mi rtag par rjes su rtog pa la gnas pa dang / skye zhing 'gog pa la yang dang yang du rjes su rtog pa la gnas pa dang / rten cing 'brel te 'byung ba'i chos rnams ni 'gog pa'i chos can du shin du rtog pa ste/ mtshan nyid 'di dag dang ldan na rang sangs rgyas kyi theg pa zhes bya ste/ sems can de theg pa chen po'i chos kyi snod ni ma yin no/ /de nas bcom ldan 'das kyis don de dag bzlas pa'i phyir tshigs su bcad de gsungs pa/ gal te dge ba'i rgyal rigs rgyal po dang / /rje'u rigs dmangs rigs shin du dge ba'i bar/ /dad la sogs pa'i 'khor lo bcu bsgoms na/ /nyan thos theg pa'i snod du de 'gyur ro/ /rang rgyal theg pa'i sgo gsum rnam par dag /khrel dang 'dzem par ldan zhing phung pos 'jigs/ /nyes pa'i skyon shes bas mtha'i gnas la dga'/ /dran pas dbang po srung zhing sems kyang zhi/ /rten cing 'brel ba rtogs pas bsam gtan sgom/ /phung po khams dang skye mched rtogs la mkhas/ /gnas dang spyod lam 'khor lo 'di bcus na/ /theg pa mchog gi snod 'gyur srid mtsho rgal/ /theg pa gsum min gnyis kyi 'khor lo yis/ /bdag nyid nyon mongs rnam par grol rtsol zhing / /bag chags mi gtong sems can mi sgrol 60.206b ba'i/ /gang zag de ni theg chen snod ma yin/ /byis pa dbang po zhan pa'i le lo can/ /theg pa gnyis la nan tan mi byed pa/ /theg pa chen po'i 'khor lo ldan mi 'gyur/ /de ni rgya chen theg chen snod ma yin/ /byis pa gcig pu rnam par grol tshol ba/ /blo dang spyod par zhan cing byams sems med/ /chad par lta la chags pa ngan song gzhol/ /yang dag chos spong chos ma yin pa ston/ /theg pa gnyis la skur cing sdom pa spong / /bsnyen par rdzogs shing theg chen khas 'che ba/ /nga yi chos 'jig sems can kun la slu/ /de yi dbang gis mi lus thob par dka'/ /nga yi bstan la zhugs pa'i 'phags pa dang / /ngur smrig gyon la 'tshe 'am gnod byed dam/ /gshe 'am spyos sam lhung bzed gos phrogs na/ /lha dang mi yi bde ba yun du stor/ /de bas gang zhig mi lus thob 'dod cing / /'chi ba'i dus na lkug pa'i skyon spangs shing / /rtag tu sangs rgyas kun dang phrad 'dod pa/ /theg gsum chos rnams kun du bsrung bar byos/ /theg pa gsum las theg pa mchog 'dod pa/ /theg pa gsum chos rtog la mkhas pa ste/ /dga' zhing spro bas gzhan la rgyas ston na/ /nges par sangs rgyas 'gyur la the tsom spongs/ /tshul khrims nyams shing 'jungs pa nga rgyal can/ /bdag bstod gzhan smod theg chen khas 'che ba/ /de dag spangs te mkhas la bsten par bya/ /nges par 'tshang rgya khams gsum 'da' bar 'gyur/ /theg pa gsum las gang dang 'thun pa bzhin/ /byams dang snying rjes theg pa gsum chos ston/ /mi re bzhin du yongs su rdzogs byas na/ /nges par 'tshang rgyar 'gyur la the tsom spongs/ /phung po khams dang skye mched zhi bar shes/ /nam mkha' bzhin du ci la 'ang mi gnas te/ /chos bstan sems can mang po kun yang sdud/ /dpag med ye shes blo gros dam pa thob/ /tshul khrims nyams par dga' la sdig pa can/ /theg pa chen po'i yon tan mchog thos nas/ /khe dang grags phyir theg chen khas 'che ba/ /bong bu seng ge'i 60.207a lbags pa gyon pa bzhin/ /deng 'dir thams cad 'khor la bka' stsal pa/ /gang zhig myur du byang chub mchog 'dod na/ /dge bcu'i las kyi lam la nan tan byos/ /nga yi chos la mi smad shin du bsrung / /ngas sngon mdo sde gzhan dag las gsungs la/ /byang chub chen po 'dod pas theg chen spyad/ /nyan thos rang rgyal theg pa spongs shig pa/ /de ni rnam dag 'khor la bstan pa'i chos/ /sangs rgyas tshad med bye ba mchod byas pas/ /sdig pa spangs nas rnam dag sems sbyong ba/ /shin du brtson pa'i skye bo de dag la/ /gnyis su med de theg pa gcig pu bshad/ /da lta'i 'khor 'di theg pa gsum snod can/ /la la nyan thos theg pa'i chos dang ldan/ /las kyi dngos po mang pos 'jigs pa dag /de ni byang chub mchog gi snod ma yin/ /la la dben par dga' zhing rang byang chub/ /de yang byang chub mchog gi snod ma yin/ /la la ye shes mchog la bkod 'os pa/ /de bas mos pa bzhin du theg gsum shod/ /sbyangs pa'i yon tan tsam gyis grol 'dod pa/ /theg chen bshad pa thos na ngan song ltung / /bad kan nad la 'o ma 'thung bcug bzhin/ /de phyir dug tu 'gyur gyi nad mi sel/ /de bzhin snod min nyan thos theg pa dag /theg chen bshad pa thos na rmongs 'gyur zhing / /chad par smra la ngan song ltung 'gyur bas/ /de bas dbang po brtags te chos bstan to/ /shin du rgyas pa chen po'i mdo sa'i snying po'i 'khor lo bcu pa zhes bya ba las gnas pa dang spyad pa'i le'u ste bzhi pa'o// // de'i tshe bcom ldan 'das kyis tshigs su bcad pa de dag gsungs pa na 'khor gyi dkyil 'khor de'i nang na sems can tshad med pa brgya stong snyed sngon chos thos pa las yid gol te stong pa yin par go nas rgyu dang 'bras bu med par lta zhing dge ba'i rtsa ba yongs su bcad nas ngan song du ltung bar 'gyur ba dag mdo sde 'di bshad pa thos nas phyir yang yang dag pa'i lta ba dang ldan par gyur to/ /de nas de 60.207b dag 'dug pa las langs te/ bcom ldan 'das kyi spyan sngar shin du 'dzem pa bskyed de/ so sor bshags pa bya ba'i phyir thal mo sbyar ba btud de phyag 'tshal nas/ bcom ldan 'das la 'di skad ces gsol to/ /btsun pa bcom ldan 'das bdag cag sngon nyan thos kyi theg pa'i rigs su dge ba'i rtsa ba bskyed pa las nyan thos kyi theg pa de yang yongs su ma smin par rang sangs rgyas kyi theg pa'i chos thos so/ /de la 'ang rmongs shing mngon du ma gyur pas stong par lta zhing rgyu dang 'bras bu yang med par 'dzin to/ /de'i rgyu de'i rkyen gyis lus dang / ngag dang / yid kyi sgo nas sdig pa mi dge ba'i las tshad med pa bgyis pas ngan song dag tu ltung bar 'gyur ba las deng bcom ldan 'das kyi spyan sngar mdo sde 'di bshad pa thos nas slar yang yang dag pa'i lta ba rnyed de shin du 'dzem pa dang / ngo tsha ba'i sems kyis so sor bshags te ma bcabs pas de dag yongs su byang bar gyur cig /deng slan chad ji snyed sgrib par 'gyur ba'i las rnams mi bgyid par yongs su bsrung bar 'tshal lo/ /bdag cag gi sdig pa de dag yongs su sbyang ba dang / slan chad mi bgyid par bcom ldan 'das thugs brtse bas rjes su gzung du gsol/ bdag cag ma 'ongs pa na ngan song gi sdug bsngal myong bar 'gyur ba las thugs brtse bas bskyab tu gsol/ bdag cag slar yang sngon spyad pa'i nyan thos kyi theg pa la spyod cing nan tan bgyid kyis/ bcom ldan 'das thugs brtse ba'i slad du bstan du gsol/ bcom ldan 'das kyis bka' stsal pa/ legs so legs so/ /khyed 'di ltar 'dzem pa dang / ngo tsha bas so sor bshags pa legs so/ /nga'i bstan pa la ma nyams pa'i skyes bu dam pa gnyis yod de/ gcig ni rang bzhin gyis yongs su dag cing thog ma nas nyes pa mi byed pa'o/ /gcig ni nyes pa byas su zin kyang 'dzem pa dang ngo tsha bas so sor 'chags pa ste skyes bu dam pa 'di gnyis ni nga'i chos la shin du 'dun 60.208a pa rnam par dag pa zhes bya'o/ /de nas bcom ldan 'das kyis de dag gi mos pa bzhin du 'phags pa'i bden pa bzhi'i chos bstan te/ 'khor de'i nang na la las ni bzod pa tha ma thob/ la las ni bzod pa bar ma thob/ la las ni bzod pa mchog thob/ la las ni 'jig rten gyi mchog gi chos thob/ la las ni rgyun du zhugs pa'i 'bras bu thob/ la las ni lan cig phyir 'ong ba'i 'bras bu thob/ la las ni phyir mi 'ong ba'i 'bras bu thob bo/ /gzhan yang dge slong brgyad khri bzhi stong zag pa thams cad zad pa/ sems rnam par grol ba/ blo shin du rnam par dag pa'i dgra bcom par gyur nas dga' bzhin du sangs rgyas la phyag 'tshal te phyir yang so sor stan la 'khod do/ /yang 'khor gyi dkyil 'khor de'i nang na sems can bye ba khrag khrig brgya stong phrag lnga bcu rtsa bdun gyis sngon thos pa'i chos stong pa yin par 'khrul nas rgyu dang 'bras bu med par lta zhing / dge ba'i rtsa ba yongs su bcad nas ngan song du ltung bar 'gyur ba nas mdo sde 'di bshad pa thos nas phyir yang yang dag pa'i lta ba rnyed de 'dug pa las langs nas bcom ldan 'das kyi zhabs la spyi bos gtugs te/ bcom ldan 'das kyi spyan sngar shin du 'dzem pa dang ngo tsha ba dang bcas pas so sor bshags te thal mo sbyar ba btud cing bcom ldan 'das la 'di skad ces gsol to/ /btsun pa bcom ldan 'das bdag cag sngon rang sangs rgyas kyi theg pa'i rigs su dge ba'i rtsa ba bskyed pa las rang sangs rgyas kyi theg pa'i snod du yang yongs su ma smin par theg pa chen po'i chos thos nas dad pa dang mos pa skyes kyang ma rig pas ldongs shing rtogs par ma gyur te stong par lta zhing rgyu dang 'bras bu med par bzung ngo / /de'i rgyu de'i rkyen gyis lus dang / ngag dang / yid kyis sdig pa mi dge ba'i las tshad med pa dag bgyis pas bskal pa tshad med pa'i bar du shin du mi bzad pa'i sdug bsngal rnam pa sna tshogs myong zhing ngan song du ltung bar 'gyur ba las deng bcom ldan 'das kyi spyan sngar mdo 60.208b sde bshad pa thos nas slar yang dag pa'i lta ba rnyed de/ shin du 'dzem pa dang ngo tsha bar ldan pa mi 'chab pa'i sems kyis so sor 'chags te/ deng slan chad ji snyed sgrib par 'gyur ba'i las rnams mi bgyid par yongs su bsrung bar 'tshal lo/ /bcom ldan 'das thugs brtse ba can gyis bdag cag gi sdig pa de dag yongs su byang ba dang / slan chad mi bgyid par rjes su gzung du gsol/ bdag cag ma 'ongs pa na ngan song gi sdug bsngal myong bar 'gyur ba las bcom ldan 'das kyis thugs rjes bskyab tu gsol/ bdag cag slar yang sngon spyad pa'i rang sangs rgyas kyi theg pa la spyod cing nan tan bgyid kyis bcom ldan 'das thugs brtse ba can gyis bstan du gsol/ bcom ldan 'das kyis legs so zhes bka' stsal te legs so/ /legs so/ /khyed 'di ltar 'dzem pa dang / ngo tsha bas so sor bshags pa legs so/ /nga'i bstan pa la ma nyams pa'i skyes bu gnyis yod de/ gcig ni rang bzhin gyis yongs su dag cing thog ma nas nyes pa mi byed pa'o/ /gcig ni nyes pa byas su zin kyang 'dzem pa dang ngo tsha bas so sor 'chags pa ste/ skyes bu dam pa 'di gnyis ni nga'i chos la shin du 'dun pa rnam par dag pa zhes bya'i/ /de nas bcom ldan 'das kyis de dag gis mos pa bzhin du rten cing 'brel te 'byung ba'i chos bstan nas da dag thams cad rang sangs rgyas kyi theg pa la nan tan byas te/ thams cad mthar kyis rgyal mtshan la dmigs pa zhes bya ba'i ting nge 'dzin yongs su rdzogs nas rang sangs rgyas kyi theg pa las phyir mi ldog cing dga' bzhin du/ bcom ldan 'das la phyag 'tshal nas phyir yang so so'i stan la 'khod do/ /yang 'khor gyi dkyil 'khor de'i nang na sems can bye ba brgya stong phrag brgyad bcu snyed sngon 'das pa'i sangs rgyas kyi chos la skur ba nas chung ngu na sangs rgyas kyi bstan pa tshigs su bcad pa gcig tsam la smad pa de'i rgyu de'i rkyen gyis ngan 60.209a song dag tu ltung zhing sdug bsngal mang po myong ste/ slar mi'i lus thob na yang thog ma nas lkug pa dig pa lce ldib cing smra mi shes pa dag mdo sde 'di bshad pa thos nas yang dag pa'i lta ba rnyed de/ de dag 'dug pa las langs nas bcom ldan 'das kyi zhabs la spyi bos phyag 'tshal nas bcom ldan 'das kyi spyan sngar shin du 'dzem pa dang / ngo tsha bas sngon gyi sdig pa'i las so sor bshags nas thal mo sbyar ba btud te/ bcom ldan 'das la mig mi 'dzums par lta'o/ /bcom ldan 'das kyis de dag thams cad smra nus par byin gyis brlabs te/ de'i tshe bcom ldan 'das kyis mkhyen bzhin du de dag la bka' stsal pa/ khyed rnams sngon mi dge ba'i las ci zhig byas na 'khor gyi dkyil 'khor 'di'i nang na smra mi shes par gyur/ de dag gis bcom ldan 'das la 'di skad ces gsol to/ /btsun pa bcom ldan 'das bdag cag kha cig gis ni sngon rnam par gzigs de bzhin gshegs pa'i bstan pa'i chos la kha cig gis ni theg pa chen po'i chos la skur to/ /la la ni rang sangs rgyas kyi theg pa'i chos la skur to/ /kha cig gis ni nyan thos kyi theg pa'i chos la skur to/ /de la chung ngu na tshigs su bcad pa gcig tsam la skur pas bdag cag mi dge ba'i las de dag gi dbang gis bskal pa dgu bcu rtsa gcig gi bar du 'khor bar 'khor zhing rtag tu sems can dmyal ba dang / byol song gi skye gnas dang / yi dgas kyi 'jig rten du skyes te/ lkug pa dang / dig pa dang / lce med pa dang / smra mi nus pa dang / shin du mi bzad pa'i sdug bsngal chen po myong ste/ gdod tshe 'di la mi lus thob kyis kyang lkug pa dang / dig pa dang / rtag tu lce nad du gyur pa las bcom ldan 'das kyi byin gyi brlabs kyis smra nus pa dang / sngon 'das pa'i dus na mi dge ba'i las kyi sgrib pa ci dang ci bgyis pa thams cad dang dran par gyur to/ /de'i nang na yang 60.209b kha cig ni 'di skad du btsun pa bcom ldan 'das bdag cag sngon bcom ldan 'das gtsug tor can gyi bstan pa'i chos la kha cig gis ni theg pa chen po la skur to/ /kha cig gis ni rang sangs rgyas kyi theg pa la skur pa nas sngon gyi dmigs pa ji lta ba bzhin du ston pa yang ji ltar rgyas par bshad pa bzhin no/ /de'i nang na kha cig ni 'di skad du btsun pa bcom ldan 'das bdag cag sngon thams cad skyob de bzhin gshegs pa'i bstan pa la kha cig gis ni theg pa chen po yang dag pa'i chos la skur pa nas dmigs pa ji lta ba bzhin du ston pa yang ji ltar rgyas par bshad pa yin no/ /de la kha cig gis ni 'di skad du btsun pa bcom ldan 'das bdag cag sngon log par dad sel de bzhin gshegs pa'i bstan pa la kha cig ni theg pa chen po yang dag pa'i chos la skur ba nas dmigs pa ji lta ba bzhin du ston pa yang ji ltar gong du rgyas par bshad pa bzhin no/ /de la kha cig gis ni 'di skad du btsun pa bcom ldan 'das bdag cag sngon gser thub de bzhin gshegs pa'i bstan pa la kha cig gis ni theg pa chen po yang dag pa'i chos la skur pa nas dmigs pa ji lta ba bzhin du ston pa yang ji ltar gong du rgyas par bshad pa yin no/ /de la kha cig gis ni 'di skad du btsun pa bcom ldan 'das bdag cag sngon 'od srungs de bzhin gshegs pa'i bstan pa la kha cig gis ni theg pa chen po'i dam pa'i chos la skur to/ /kha cig gis ni rang sangs rgyas kyi theg pa'i chos la skur to/ /kha cig gis ni nyan thos kyi theg pa pa'i chos la skur ba nas chung ngu na tshigs su bcad pa gcig tsam la skur pas mi dge ba'i las kyi dbang gis de tshun chad 'khor bar 'khor te/ rtag tu sems can dmyal ba dang / byol song gi skye gnas dang / gshin rje'i 'jig rten du skyes shing lkugs pa dang / dig pa dang / 60.210a lce med pa dang / brda mi phrad pa dang / shin du mi bzad pa'i sdug bsngal chen po myong nas gdod tshe 'di la mi'i lus thob kyis kyang lkug pa dang / dig pa dang / lce nad can du gyur pa dang / brda mi phrad pa las bcom ldan 'das kyi byin gyi brlabs kyis gdod smra nus pa dang / sngon 'das pa'i dus na mi dge ba'i las kyi sgrib pa ci bgyis pa thams cad dran par gyur cing / bdag cag bcom ldan 'das kyi spyan sngar mdo sde bshad pa 'di thos nas slar yang yang dag pa'i lta ba rnyed de shin du ngo tsha ba dang / 'dzem pa dang / mi 'chab pa'i sems kyis so sor 'chags so/ /deng slan chad ji snyed sgrib par 'gyur ba'i las rnams mi bgyid par yongs su bsrung bar 'tshal lo/ /bcom ldan 'das thugs brtse ba can gyis bdag cag gi sdig pa de dag yongs su byang ba dang / slan chad mi bgyid par rjes su gzung du gsol/ ma 'ongs pa na yang ngan song gi sdug bsngal yongs su myong bar 'gyur ba las bcom ldan 'das kyi thugs rjes bskyab pa dang / dam pa'i chos bstan du gsol/ bcom ldan 'das kyis legs so zhes bka' stsal te/ legs so legs so/ /khyed 'di ltar 'dzem pa dang / ngo tsha bas so sor bshags pa legs so/ /nga'i bstan pa la skyes bu dam pa ma nyams pa zhes bya ba gnyis yod de/ gcig ni rang bzhin gyis yongs su dag cing thog ma nas nyes pa mi byed pa'o/ /gcig ni nyes pa byas su zin kyang 'dzem pa dang / ngo tsha bas so sor 'chags pa ste/ skyes bu dam pa 'di gnyis ni nga'i bstan pa'i chos la shin du 'dun pa rnam par dag pa zhes bya'o/ /de nas bcom ldan 'das kyis de dag mos pa ji lta ba bzhin du dam pa'i chos rnam pa sna tshogs bstan cing bshad de so sor ci dga' ba'i bde ba thob par byas so/ /de dag dga' bzhin du bcom ldan 'das la phyag 'tshal nas so so'i stan la 'khod do/ /de'i tshe 'khor gyi dkyil 'khor de'i nang na nyan thos 60.210b tshad med pa brgya stong snyed dang / byang chub sems dpa' tshad med pa bye ba brgya stong snyed kyis mdo sde 'di bshad pa thos nas mi dge ba'i las kyi sgrib pa sngon ci byas pa dran te/ bcom ldan 'das kyi zhabs la spyi bos phyag 'tshal nas bcom ldan 'das kyi spyan sngar shin du 'dzem pa dang ngo tsha ba'i sems kyis so sor bshags shing thal mo sbyar te sti stang dang bcas pas bcom ldan 'das la 'di skad ces gsol to/ /btsun pa bcom ldan 'das bdag cag sngon sangs rgyas tshad med pa dag gi dam pa'i chos la la la ni 'di skad du bdag cag sangs rgyas de'i nye gnas chos kyi snod du gyur pa 'am/ chos kyi snod du ma gyur pa la khro ba dang / zhe sdang ba dang / gshe zhing spyo ba dang / smod pa dang / brnyas pa dang / rnam pa sna tshogs kyis 'phya zhing skur te/ gnod par klags lta ba dang / yon tan bcabs nas nyes pa bsgrags te/ bdag cag mi dge ba'i las de'i dbang gis bskal pa tshad med pa'i bar du ngan song du ltung zhing shin du mi bzad pa'i sdug bsngal chen po myong ngo / /phyis sangs rgyas tshad med pa dag la bsnyen bkur dang / mchod pa bgyis so/ /gzhan yang byang chub sems dpa' sems dpa' chen po tshad med pa snyed la bsnyen bkur dang / mchod pa dang / g.yog bgyis nas sangs rgyas de re re dang / byang chub sems dpa' sems dpa' chen po de re re la shin du 'dzem pa dang ngo tsha bas sdig pa'i las kyi sgrib pa dag so sor bshags so/ /sangs rgyas de re re dang / byang chub sems dpa' sems dpa' chen po de re re la yang chos kyi rnam grangs tshad med pa snyed mnyan te/ thos nas shin du nan tan bgyis pa dang / shin du spyad dka' ba tshad med pa dag spyad kyang las kyi sgrib pa'i lhag ma lus pas bdag cag shin du bde ba'i mya ngan las 'da' ba ma thob po/ /bdag cag ting nge 'dzin kyi sgo'i khyad par dang / yon tan yang ma thob po/ /bdag cag deng bcom ldan 'das kyi spyan sngar mdo sde 60.211a bshad pa 'di thos nas lhag par shin du 'dzem pa dang / ngo tsha ba'i sems dang / mi 'chab pa'i sems kyis so sor 'chags so/ /yongs su byang bar shogs shig /deng slan chad ji snyed sgrib par 'gyur ba'i las rnams mi bgyid par yongs su bsrung bar 'tshal lo/ /bcom ldan 'das thugs brtse ba can gyis bdag cag gi sdig pa de dag yongs su byang ba dang / slan chad mi bgyid par rjes su gzung du gsol/ bdag cag ma 'ongs pa na ngan song gi sdug bsngal myong bar 'gyur ba las bcom ldan 'das kyi thugs rjes bskyab du gsol/ bdag cag bcom ldan 'das kyis byin gyi brlabs kyi mthus mos pa ji lta ba bzhin du mya ngan las 'da' ba'i bde ba myur du thob pa dang / ting nge 'dzin kyi sgo'i yon tan gyi khyad par thob par mdzad du gsol/ de la kha cig ni 'di skad du bdag cag sngon bcom ldan 'das che ge mo zhig gi nye gnas chos kyi snod dang / chos kyi snod ma yin pa la tshig rtsub po zhe gcod pa rnam pa sna tshogs kyis 'tshe zhing gnod pa bgyis pas bdag cag sdig pa mi dge ba'i las de'i dbang gis bskal pa tshad med pa'i bar du ngan song du ltung bar gyur pa nas de bzhin du gong du rgyas par bshad pa bzhin no/ /la la ni bdag cag 'di skad du sngon bcom ldan 'das che ge mo zhig gi nye gnas chos kyi snod dang / chos kyi snod ma yin pa la gzhu ba dang / 'tshog pas 'tshe ba dang / gnod pa bgyis pas mi dge ba'i las de'i dbang gis bskal pa tshad med pa'i bar du ngan song du ltung bar gyur pa nas de bzhin du gong du rgyas par bshad pa bzhin no/ /de la kha cig ni 'di skad du bdag cag sngon bcom ldan 'das che ge mo zhig gi nye gnas chos kyi snod dang / chos kyi snod ma yin pa'i chos gos dang / lhung bzed phrogs pas mi dge ba'i las de'i dbang gis bskal pa tshad med pa'i bar du ngan song du ltung bar gyur pa nas de bzhin du gong du rgyas par bshad pa bzhin no/ /de la kha cig ni 'di skad du bdag cag sngon bcom ldan 'das che ge mo zhig gis nye gnas chos kyi snod dang / chos kyi snod ma yin pa'i 'tsho ba'i yo byad rnam pa sna tshogs phrogs 60.211b te bza' ba dang / btung ba phrogs shing bar chad byas pas mi dge ba'i las de'i dbang gis bskal pa tshad med pa'i bar du ngan song du ltung ba nas de bzhin du gong du rgyas par bshad pa bzhin no/ /de la kha cig ni 'di skad du bdag cag sngon bcom ldan 'das che ge mo zhig gi nye gnas chos kyi snod dang / chos kyi snod ma yin pa dag gi chos gos phrogs nas khyim par phab ste/ las rnam pa sna tshogs byed du bcug pas mi dge ba'i las de'i dbang gis bskal pa tshad med pa'i bar du ngan song du ltung ba nas de bzhin du gong du rgyas par bshad pa bzhin no/ /de la kha cig ni 'di skad du bdag cag sngon bcom ldan 'das che ge mo zhig gi nye gnas rab tu byung ba chos kyi snod dang / chos kyi snod ma yin pa dag nyes pa byas pa dang / nyes pa ma byas pa la lcags dang / khong sgril dang / shing sgrog du bcug ste gtses pas mi dge ba'i las de'i dbang gis bskal pa tshad med pa'i bar du bdag cag ngan song du lhung ba nas de bzhin du gong du rgyas par bshad pa bzhin no/ /de la kha cig ni 'di skad du bdag cag sngon bcom ldan 'das che ge mo zhig gi nye gnas rab tu byung ba chos kyi snod dang / chos kyi snod ma yin pa dag la dbang za ba'i sems kyis 'tshe ba dang / gnod pa rnam pa sna tshogs kyis mi bde bar bgyis pas bdag cag mi dge ba'i las de'i dbang gis bskal pa tshad med pa'i bar du shin du mi bzad pa'i sdug bsngal chen po myong bar gyur to/ /phyis sangs rgyas tshad med pa dag la bsnyen bkur dang / mchod pa dang / mnyes pa bgyis so/ /gzhan yang byang chub sems dpa' sems dpa' chen po tshad med pa snyed de dag la yang bsnyen bkur ba dang / mchod pa dang / mnyes pa bgyis te/ sangs rgyas de re re dang / byang chub sems dpa' sems dpa' chen po de re re la yang shin du 'dzem pa dang bcas pas mi dge ba'i las de dag so sor 'chags so/ /sangs rgyas de re re dang / byang chub 60.212a sems dpa' sems dpa' chen po de re re las kyang tshad med pa'i chos kyi rnam grangs mnyan te thos nas/ shin du 'bad pa'i brtson 'grus kyis nan tan bgyis te/ shin du spyad dka' ba spyad kyang las kyi sgrib pa'i lhag ma lus pas bdag cag da dung shin du bde ba'i mya ngan las 'das pa'i bde ba ma thob po/ /ting nge 'dzin gyi yon tan gyi sgo'i khyad par ma thob po/ /bdag cag deng bcom ldan 'das kyi spyan sngar mdo sde 'di thos nas lhag par shin du 'dzem pa dang / mi 'chab pas so sor bshags te yongs su byang bar gyur to/ /deng slan chad ji snyed sgrib par 'gyur ba'i las rnams mi bgyid par yongs su bsrung bar 'tshal lo/ /bcom ldan 'das thugs brtse ba can gyis bdag cag gi sdig pa de dag yongs su byang ba dang / slan chad mi bgyid par rjes su gzung du gsol/ bdag cag ma 'ongs pa na ngan song gi sdug bsngal myong bar 'gyur ba las bcom ldan 'das kyi thugs rjes bskyab du gsol/ bdag cag bcom ldan 'das kyi byin gyi brlabs kyi mthus mya ngan las 'da' ba'i bde ba myur du thob pa dang / gzhan yang ting nge 'dzin gyi sgo'i yon tan gyi khyad par thob par mdzad du gsol/ de nas bcom ldan 'das kyis nyan thos dang byang chub sems dpa'i 'khor de dag la bka' stsal pa/ legs so legs so/ /khyed 'di ltar shin du 'dzem pa dang bcas pas so sor bshags pa legs so/ /yongs su ma nyams pa'i skyes bu dam pa gnyis yod de/ gcig ni rang bzhin gyis rnam par dag cing thog ma nas nyes pa mi byed pa'o/ /gcig ni nyes pa byas su zin kyang 'dzem pa dang bcas pas so sor 'chags pa ste/ skyes bu 'di gnyis ni nga'i bstan pa la shin du 'dun pa rnam par dag pa zhes bya'o/ /rigs kyi bu 'di ltar sangs rgyas kyi bstan pa la rab tu byung ba'i nye gnas la gnod pa byas pa'i sdig pa'i gnan gong du bshad pa'i mtshams med pa dang / nye ba'i sdig pa ni ming 60.212b tsam du zad de/ sdig pa zhes kyang mi bya'o/ /sangs rgyas kyi nye gnas rab tu byung ba la gnod pa byas na de'i sdig pa ni gong du bshad pa'i mtshams med pa lnga'i sdig pa las tshad med grangs med pas lhag par che'o/ /de ci'i phyir zhe na dge slong gang tshul khrims nyams te sdig pa byed kyang sems can bye ba khrag khrig brgya stong tshad med pa snyed la mya ngan las 'da' ba phyin ci ma log pa'i lam ston nus so/ /sems can mang po la yon tan chen po'i rin po che'i gter du 'gyur ba nas de bzhin du ji ltar rgyas par bshad pa bzhin no/ /tshul khrims srung zhing dge ba'i chos spyod pa lta ci smos/ de bas na gang gis sangs rgyas kyi bstan pa la rab tu byung ba'i slob ma la 'tshe ba dang gnod pa byas na de ni dkon mchog gsum gyi gdung gcod pa yin par shes par bya'o/ /de ni sems can thams cad kyi chos kyi mig bcar ba yin no/ /de ni ngas sngon shin du dka' ba spyad nas rnyed pa'i dam pa'i chos ma rung bar byas pa yin no/ /de ni sems can thams cad la shin du gnod pa chen po byas pa yin no/ /de bas na sangs rgyas kyi bstan pa la rab tu byung ba la gnod pa byas na de'i sdig pa ni sngar bshad pa'i mtshams med pa lnga'i sdig pa bas tshad med grangs med pas lhag par che'o/ /de bas na khyed kyis deng nga'i mdun du shin du bsam pa dag cing lhag pa'i 'dzem pa dang 'bad par bcas pas sngon mi dge ba'i las kyi sgrib pa thams cad so sor bshad pa'i phyir khyed la thugs rje chen pos rjes su bzung bas khyed kyi sdig pa'i las kyi sgrib pa thams cad khad kyis byang bar gyur te sangs rgyas kyi zhing 'dir bskal pa bzang po'i sangs rgyas stong 'byung ba thams cad la yang khyed kyis 'di bzhin du de bzhin gshegs pa de dag gi spyan sngar yang sdig pa'i las kyi sgrib pa thams cad shin du so sor shogs shig /ma 'ongs pa'i nyes pa yang shin du bsrung bar gyis shig / 60.213a bskal pa bzang po'i sangs rgyas stong gi tha ma snang mdzad ces bya ba'i de bzhin gshegs pa dgra bcom pa yang dag par rdzogs pa'i sangs rgyas mkhyen pa dang zhabs su ldan pa/ bde bar gshegs pa/ 'jig rten rig pa/ bla na med pa skyes bu 'dul zhing kha lo sgyur ba/ lha dang mi'i ston pa sangs rgyas bcom ldan 'das de'i spyan sngar yang sdig pa'i las kyi sgrib pa thams cad shin du so sor shogs shig dang / lhag ma ma lus par yongs su byang bar 'gyur ro/ /de'i tshe nyan thos de dag dang / byang chub sems dpa' de dag gis gsol pa/ de de bzhin no/ /bcom ldan 'das bdag cag gal te 'di ltar sangs rgyas nangs kyi tha ma snang mdzad kyi tshe/ yang dag pa'i lta ba thob cing log par lta ba rnam par spangs te/ sdig pa'i las kyi sgrib pa thams cad lhag ma ma lus par 'byang zhing sdug bsngal thams cad las rnam par grol bar 'gyur na/ bdag cag bskal pa bzang po 'di la mtshams med pa'i sems can dmyal bar skyes te/ sdug bsngal rnam pa sna tshogs myong na yang bzod do/ /bcom ldan 'das kyis bka' stsal pa/ legs so legs so/ /khyed kyis 'di ltar rtul phod pa dang / shin du 'bad pa'i brtson 'grus brtan pa dang / smon lam gyi mthus gdon mi za bar sangs rgyas snang mdzad kyi tshe sngon gyi las kyi sgrib pa thams cad byang ba dang / lhag pa'i bsam pas sti stang dang bcas te bsnyen bkur dang / mchod pa gdon mi za bar byed par 'gyur ro/ /de bzhin gshegs pa snang mdzad kyis kyang gdon mi za bar nyon mongs pa thams cad yongs su gcad pa'i dgra bcom par 'gyur bar mdzad do/ /gdon mi za bar ting nge 'dzin gyi sgo'i yon tan gyi khyad par thob par mdzad do/ /de nas nyan thos de dag dang / byang chub sems dpa' de dag dga' bzhin du bcom ldan 'das kyi zhabs la phyag 'tshal nas phyir yang so so'i stan la 'khod do/ /de'i tshe 60.213b bcom ldan 'das kyis byang chub sems dpa' sems dpa' chen po rdo rje'i snying po la bka' stsal pa/ rigs kyi bu ngas sangs rgyas kyi spyan gyis 'jig rten thams cad la brtags na/ ma 'ongs pa'i dus na sangs rgyas kyi zhing 'dir tshad med grangs med pa bye ba khrag khrig brgya stong snyed kyi rgyal rigs gdol pa can dang / bram ze gdol pa can dang / blon po gdol pa can dang / khyim bdag gdol pa can dang / tshong dpon gdol pa can dang / dge sbyong gdol pa can dang / rje'u rigs dang / dmangs rigs dang gdol pa can gyi skyes pa 'am/ bud med la sogs pa de dag dge ba'i rtsa ba chung ngu bskyed pas mi'i lus thob du zin kyang mi dge ba'i bshes gnyen dang sten cing log pa'i lta ba bskyed pas sdig pa mi dge ba'i las kyis nga'i bla na med pa'i dam pa'i chos shin du zab mo 'jig par byed do/ /nga'i bstan pa rgyas par mi byed/ rgyas pa rnams med par byed cing mos pa mi skyed/ ngas bstan pa'i nyan thos kyi theg pa can gyi dam pa'i chos la 'phya zhing skur te/ bgegs dang bar chad byed cing rgyas par mi byed pa dang / bar bar ni ngas bstan pa'i rang sangs rgyas kyi theg pa can gyi dam pa'i chos la 'phya zhing skur pa dang / bgegs dang bar chad byed cing rgyas par mi byed pa dang / bar bar ni ngas bstan pa'i bla na med pa'i theg pa can gyi dam pa'i chos la 'phya zhing skur pa dang / bgegs dang bar chad byed cing rgyas par mi byed pa dang / bar bar ni ngas bstan pa la rab tu byung ba chos kyi snod dang / chos kyi snod ma yin pa la zhe sdang skyed cing gshe ba dang / spyo ba dang / smod pa dang / tshig rnam pa sna tshogs kyis gnod par klags lta ste/ 'phya zhing skur ba dang / yon tan bcas nas nyes pa bsgrags te/ de bzhin du smod pa'i sems kyis 'tshe ba dang / gnod pa rnam pa sna tshogs byed do/ /de ltar gang zag 'phags pa'i chos kyi snod du ma gyur pa de yang yang dag par glen zhing gti mug gi 60.214a rang bzhin can yin te/ chung zad tsam gyi shes pa snyems pa'i nga rgyal can de 'di nas tshe 'phos ma thag tu ngan song gsum du lhung ste/ tshad med pa snyed kyis shin du mi zad pa'i sdug bsngal chen po myong bar 'gyur ro/ /bskal pa tshad med pa bye ba khrag khrig brgya stong gi bar du mi'i lus thob par dka' ba nas de bzhin du rgyas par gong du bshad pa bzhin no/ /rigs kyi bu sems can de mtshams med pa'i sems can dmyal ba chen po na 'dug ste/ sdug bsngal chen po myong yang sla'i de lta bu'i lus sdig pa can nga rgyal gyis mngon par zin pa/ sdig pa'i bshes gnyen gyi rjes su 'brang zhing mi dge ba'i las byed pas 'khor bar 'khor te/ shin du bsgral dka' ba rtag tu 'khor bar sdug bsngal gyis gdungs par gyur pa ni ma yin no/ /de'i tshe 'khor gyi dkyil 'khor de'i nang na blo gros chen po can gyi sems can tshad med/ grangs med pa snyed stan las langs te/ bcom ldan 'das kyi zhabs la spyi bos phyag 'tshal nas/ bcom ldan 'das gang na ba de logs su thal mo sbyar te mchi ma blags nas bcom ldan 'das la 'di skad ces gsol to/ /btsun pa bcom ldan 'das 'di ltar 'jig rten gyi sems can 'di dag mi'i lus shin du thob par dka' ba rnyed kyang dad pa yongs su spong ngo / /yang dag pa'i smon lam yongs su spong ngo / /yang dag pa'i mos pa dang / yang dag pa'i lta ba yongs su spong ngo / /dge ba'i bshes gnyen yongs su spong ngo / /dus bzang po dang / gnas bzang po dang / tshul khrims dag pa yongs su spong ngo / /yang dag pa'i ting nge 'dzin dang / yang dag pa'i shes rab yongs su spong ngo / /sems can 'di dag shin du thob par dka' ba'i mi'i lus thob mod kyi/ glen pa mi shes pa dang / nga rgyal gyi dbang gis ji ltar gong du bshad pa'i sdig lci ba rnams kun bgyid de/ bcom ldan 'das kyi dam pa'i chos la skur ba dang / bcom ldan 'das 60.214b kyi bstan pa la rab tu byung ba'i nye gnas la 'tshe ba dang gnod pa bgyid do/ /bdag cag deng bcom ldan 'das kyi spyan sngar sems rtse gcig pas yang dag pa'i yi dam bcu'o/ /bdag cag deng slan chad 'khor bar 'khor ba 'di phan chad nas nam rnam par grol ba ma thob kyi bar du de lta bu'i sdig pa'i grogs po dang mi mjal ba dang / de lta bu'i sdig pa'i las mi bgyid pa dang / sangs rgyas kyi dam pa'i chos la mi skur ba dang / rab tu byung ba'i gang zag la gnod pa mi bgyid pa dang / sems can gyi chos kyi mig mi 'byin pa dang / dkon mchog gsum gyi gdung rgyun mi 'chad par dam bcas pa dang / bcom ldan 'das bdag cag la thugs brtse ba'i slad du dam bcas pa de dag rjes su gzung du gsol/ de'i tshe 'khor gyi dkyil 'khor de'i nang na sems can blo dang ldan pa tshad med pa bye ba khrag khrig brgya stong snyed stan las langs te/ bcom ldan 'das kyi zhabs la spyi bos phyag 'tshal nas thal mo sbyar ba btud de bcom ldan 'das la 'di skad ces gsol to/ /btsun pa bcom ldan 'das bdag cag deng bcom ldan 'das kyi spyan sngar bsam pa nges par dam bca' bar 'tshal te/ 'khor bar 'khor ba 'di phan chad nas nam chos kyi bzod pa ma thob kyi bar du rgyal por ma gyur cig /blon por ma gyur cig /yul gyi ston par ma gyur cig /grong rdal dang / grong khyer dang / grong 'dab kyi bdag por ma gyur cig /dmag la dbang ba'i bdag por ma gyur cig /tshong dpon du ma gyur cig /mchod pa dang / gtsug lag khang la dbang ba'i bdag por ma gyur cig /tshong dpon dang / khyim bdag dang / dge sbyong gi bdag por ma gyur cig /slob dpon dang bla mar ma gyur cig /khyim pa'i lus su ma gyur cig /zhal che lce gcod pa'i dbang por ma gyur cig /phyug pa dang btsan pa'i bdag por ma gyur cig /bdag cag chos kyi bzod pa ma thob par de lta bu'i gnas su skyes na de nyid sangs rgyas kyi bstan 60.215a pa la mi dge ba'i rgyur 'gyur ba zhes bya ste/ kha na ma tho ba'i sdig pa chen po byed pas/ bcom ldan 'das kyis gsungs pa'i dam pa'i chos la 'phya zhing skur ba zhes bgyi'o/ /sangs rgyas kyi bstan pa la rab tu byung ba la 'tshe zhing gnod pa bgyid pa'o/ /sems can mang po'i chos kyi mig 'byin pa'o/ /dkon mchog gsum gyi gdung rgyun gcod pa'o/ /sems can tshad med pa la gnod pa dang 'tshe ba bgyid pa'o/ /de'i dbang gis gdon mi 'tshal bar mtshams med pa'i sems can dmyal bar ltung ste/ ngan song du 'khor ba las thar pa'i dus ma mchis so/ /bcom ldan 'das bdag cag la thugs brtse ba'i slad du smon lam 'di dag byin gyis brlab par gsol/ de'i tshe 'khor gyi dkyil 'khor der 'dus pa'i lha dang / klu dang / gnod sbyin dang / dri za dang / mi dang / mi ma yin la sogs pa thams cad stan las langs te/ bcom ldan 'das kyi zhabs la mgo bos phyag 'tshal nas mchi ma blags te thal mo sbyar ba btud nas bcom ldan 'das la 'di skad ces gsol to/ /btsun pa bcom ldan 'das bdag cag thog ma ma mchis pa nas 'khor zhing glen pa dang / mi shes pa dang / nga rgyal gyi dbang gis mi dge ba'i las thams cad bskyed de/ lus kyi las mi dge ba dang / ngag gi las mi dge ba dang / yid kyi las mi dge ba bdag gis bgyis pa dang / gzhan bgyid du stsal ba dang / mthong ba dang thos pa la rjes su yi rang ba'i sdig pa de dag thams cad deng bcom ldan 'das kyi spyan sngar shin du 'dzem pa dang / mi 'chab pa'i sems kyis so sor bshags pas slan chad mi bgyid par yongs su bsrung ba dang / ma mchis pa'i dus kyi sgrib par 'gyur ba'i sdig pa byang bar gyur cig /de bzhin du lan cig /lan gnyis/ lan gsum gyi bar du brjod do/ /deng slan chad 'khor ba'i mthas gtugs pa'i bar du rtag tu sdig pa'i grogs po dang mi phrad pa dang / mi dge ba'i dbang du ma gyur cig /gal te phrad na 60.215b yang de'i rjes su mi 'jug par bsam pa nges pas dam bca' bar 'tshal lo/ /sdig pa'i las de dag thams cad bgyid par ma gyur cig /bdag cag yun ring por sdug bsngal myong bar ma gyur cig /bcom ldan 'das bdag cag la thugs brtse ba'i slad du smon lam 'di dag rjes su gzung bar gsol/ de nas bcom ldan 'das kyis 'dus pa'i 'khor de dag thams cad la bka' stsal pa/ legs so legs so/ /khyed ma 'ongs pa'i sdug bsngal gyis 'jigs pa dang / 'dzem pas so sor bshags pa legs so/ /khyed kyis 'khor ba'i chu bo chen po las bsgral ba dang / 'jigs pa med pa'i mya ngan las 'das pa'i grong khyer du 'jug pa'i phyir 'di lta bu'i smon lam btab pa legs so/ /rigs kyi bu chos rnam pa 'di bcu dang ldan na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa thob par 'gyur ro/ /bcu gang zhe na 'di lta ste/ rigs kyi bu byang chub sems dpa' sems dpa' chen po rnams gang nang gi lus la mi gnas/ phyi rol gyi lus la mi gnas/ phyi nang gi lus la mi gnas/ 'das pa'i lus la mi gnas/ ma 'ongs pa'i lus la mi gnas/ da ltar gyi lus la mi gnas pa ste/ chos dang po 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob bo/ /rigs kyi bu gzhan yang byang chub sems dpa' sems dpa' chen po rnams gang nang gi tshor ba la mi gnas/ phyi rol gyi tshor ba la mi gnas/ phyi nang gnyi ga'i tshor ba la mi gnas/ 'das pa'i tshor ba la mi gnas/ ma 'ongs pa'i tshor ba la mi gnas/ da ltar gyi tshor ba la mi gnas pa ste/ chos gnyis pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /rigs kyi bu gzhan 60.216a yang byang chub sems dpa' sems dpa' chen po rnams gang nang gi 'du shes la ci gnas phyi rol gyi 'du shes la mi gnas phyi nang gnyi ga'i 'du shes la mi gnas 'das pa'i 'du shes la mi gnas ma 'ongs pa'i 'du shes la mi gnas da ltar gyi 'du shes la mi gnas pa ste chos gsum pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /rigs kyi bu gzhan yang byang chub sems dpa' sems dpa' chen po rnams gang nang gi 'du byed la mi gnas phyi rol gyi 'du byed la mi gnas phyi nang gnyi ga'i 'du byed la mi gnas 'das pa'i 'du byed la mi gnas ma 'ongs pa'i 'du byed la mi gnas da ltar gyi 'du byed la mi gnas pa ste/ chos bzhi pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob bo/ /rigs kyi bu gzhan yang byang chub sems dpa' sems dpa' chen po rnams gang nang gi rnam par shes pa la mi gnas phyi rol gyi rnam par shes pa la mi gnas/ phyi nang gnyi ga'i rnam par shes pa la mi gnas/ 'das pa'i rnam par shes pa la mi gnas/ ma 'ongs pa'i rnam par shes pa la mi gnas/ da ltar gyi rnam par shes pa la mi gnas pa ste/ chos lnga pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /rigs kyi bu gzhan yang byang chub sems dpa' sems dpa' chen po rnams gang 'jig rten 'di la mi gnas pa ste chos drug pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /rigs kyi bu gzhan yang byang chub sems dpa' sems dpa' chen po rnams gang 'jig rten pha rol la mi gnas pa ste/ chos bdun pa 'dis na byang chub sems dpa' 60.216b sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /rigs kyi bu gzhan yang byang chub sems dpa' sems dpa' chen po rnams gang 'dod pa'i khams la mi gnas pa ste/ chos brgyad pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /rigs kyi bu gzhan yang byang chub sems dpa' sems dpa' chen po gang gzugs yod pa'i khams la mi gnas pa ste/ chos dgu pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /rigs kyi bu gzhan yang byang chub sems dpa' sems dpa' chen po gang gzugs med pa'i khams la mi gnas pa ste/ chos bcu pa 'dis na byang chub sems dpa' sems dpa' chen po rnams yang dag pa'i lam skyon med pa'i chos kyi bzod pa 'thob par 'gyur ro/ /bcom ldan 'das kyis chos kyi rnam grangs 'di bshad pa'i tshe 'khor gyi dkyil 'khor de'i nang na byang chub sems dpa' sems dpa' chen po bye ba brgya stong bdun bcu rtsa gnyis snyed kyis mi skye ba'i chos kyi bzod pa 'thob bo/ /byang chub sems dpa' bye ba khrag khrig brgya stong phrag brgyad bcu rtsa bzhi snyed kyis chos kyi rjes su 'thun pa'i bzod pa 'thob bo/ /nyan thos tshad med pa brgya stong snyed kyis nyon mongs pa thams cad yongs su bcad pa nas dgra bcom pa'i bar du thob par gyur to/ /sems can khrag khrig brgya stong snyed kyis sngon ma bskyed pa'i bla na med pa yang dag par rdzogs pa'i byang chub tu sems bskyed de de bzhin gshegs pa las phyir mi ldog pa'i sa la gnas par gyur to/ /sems can grangs med tshad med pa snyed kyis sngon rang sangs rgyas kyi sems ma bskyed pa de sems bskyed par gyur to/ /gzhan yang sems can grangs med tshad med pa snyed kyis 60.217a sngon nyan thos kyi sems ma bskyed pa de bskyed par gyur to/ /yang de'i tshe bcom ldan 'das kyis 'khor mang po la bka' stsal pa/ sems can gang chos kyi bzod pa thob pas ni rgyal rigs rgyal thabs spyi bo nas dbang bskur ba'i gnas su gnas par byas te/ nor rin po che rnam pa sna tshogs la longs spyod cing bdag nyid chen po'i gnas su longs spyod par ngas gnang gi sems can gzhan ni ma yin no/ /byang chub sems dpa' rdo rje'i snying pos yang bcom ldan 'das la 'di skad ces gsol to/ /bcom ldan 'das sems can gang chos kyi bzod pa ma thob par rgyal rigs rgyal thabs spyi bo nas dbang bskur ba'i gnas su gnas te/ nor rin po che rnam pa sna tshogs la spyod pa dang / bdag nyid che ba'i gnas su gnas par nges par ma gnang ngam/ 'on te gnang ba'i skabs kyang mchis/ bcom ldan 'das kyis bka' stsal pa/ sems can gang chos kyi bzod pa ma thob kyang dge ba bcu'i las kyi lam spyod la/ sems can gzhan yang slob du bcug na/ de yang ngas rgyal rigs rgyal thabs spyi bo nas dbang bskur ba'i gnas su nor rin po che rnam pa sna tshogs dang / gzhan yang bdag nyid che ba'i gnas su 'dug cing longs spyod du gnang ngo / /sems can gang chos kyi bzod pa yang ma thob la/ dge ba bcu'i las kyi lam yang mi spyod de/ sems can gzhan yang slob pa la mi 'dzud la dbang chen po dang nan tan gyis rgyal thabs spyi bo nas dbang bskur ba'i rgyal po byed de/ nor rin po che rnam pa sna tshogs dang / bdag nyid chen po'i gnas su longs spyod pa dag ni rgyal rigs gdol pa can dang / gzhan yang bdag nyid che ba'i gnas su longs spyod pa'i gdol pa can gyi bdag po zhes bya ste/ glen pa gti mug can nga rgyal gyis mngon par zin pa/ nga'i dam pa'i chos shin du zab mo 'jig par byed pa/ dkon mchog gsum gyi gdung gcod cing dam pa'i chos kyi sgron ma med 60.217b par byed pa/ nga'i bstan pa la rab tu byung ba dag la gnod pa dang / 'tshe ba rnam pa sna tshogs byed pa/ 'tshog pa dang / gzhu ba dang / chad pas gcod pa dang / chos gos dang / lhung bzed dang / 'tsho ba'i yo byad 'phrog pa dang / chos gos phrogs te khyim par phab nas las rnam pa sna tshogs byed du bcug pa dang / bcings pa dang / btson du bzung ba nas 'tsho ba'i dbang po dang phral ba dang nga'i bstan pa dam pa'i chos la 'phya zhing skur pa dang / bar du gcod cing bgegs byed cing yongs su rgyas par mi byed pa dang / mchod rten dang / dge 'dun gyi nor 'phrog par byed pa'i gang zag de ni gdon mi za bar mtshams med pa'i sems can dmyal bar ltung ste/ sdug bsngal chen po myong zhing ngan song gi gnas su 'khor zhing thar pa'i dus med do/ /de nas byang chub sems dpa' rdo rje'i snying pos yang gsol pa/ bcom ldan 'das sems can gang chos kyi bzod pa yang ma thob/ dge ba bcu'i las kyi lam yang mi spyod/ sems can gzhan yang spyod par mi skur bar dbang chen po dang nan gyis rgyal thabs spyi bo nas dbang bskur ba'i gnas su rgyal po bgyid cing nor rin po che rnam pa sna tshogs dang / gzhan yang bdag nyid che ba'i gnas su gnas pa la rgyu gzhan dang thabs gzhan gyis mtshams med pa'i sems can dmyal ba las gdon cing ngan song gzhan gyi sdug bsngal las kyang thar bar bgyi ba mchis sam/ bcom ldan 'das kyis bka' stsal pa/ rgyu gzhan dang thabs gzhan gyis gdon du rung ba yod do/ /sems can gang rgyal thabs spyi bo nas dbang bskur ba'i rgyal por zhugs la longs spyod rnam pa sna tshogs la spyod pa chos kyi bzod pa yang ma thob/ dge ba bcu'i las kyi lam yang mi ldan yang dad pa'i mthu dang ldan te/ dkon mchog gsum la rim gro dang / sti stang byed cing sangs rgyas kyi bstan pa'i theg pa gsum dang ldan pa'i dam pa'i chos la chung ngu na tshigs su bcad pa gcig tsam la yang 60.218a 'phya zhing skur ba 'am/ bar du gcod pa 'am/ bgegs mi byed la/ sangs rgyas kyi bstan pa la rab tu byung ba'i nye gnas tshul khrims can nam/ tshul khrims nyams pa 'am/ tshul khrims med kyang rung / skra dang kha spu bregs te/ gos ngur smrig gyon pa thams cad la 'tshe ba dang / gnod pa dang / gzhu ba dang / 'tshog pa dang / chad pas gcod pa dang / chos gos dang / lhung bzed dang / 'tsho ba'i yo byad phrogs pa dang / chos gos phrogs te khyim par phab nas las byed du bcug pa dang / btson rar bcug pa nas 'tsho ba'i dbang po dang phral ba'i bar du mi byed la/ mchog rten dang / dge 'dun gyi nor mi 'phrog pa dang / ngan pa sdig pa can dag rab tu byung ba la 'tshe ba dang / gnod pa byed du mi 'dzud pa dang / dkon mchog gsum gyi nor la 'phrog cing spyod du mi 'dzud pa dang / sangs rgyas kyi bstan pa theg pa gsum dang ldan pa'i dam pa'i chos la sti stang dang bcas pas mnyan cing gzungs su 'dzin pa dang / mnyan te gzungs su bzung nas kyang ji ltar bshad pa bzhin du chos kyi rjes su brtson 'grus dang / nan tan byed pa dang / ngas bstan pa'i theg pa gsum gyis 'phags pa'i nye gnas dag la mchod pa dang / bsnyen bkur dang / sti stang dang bcas pas g.yog byed pa dang / theg pa chen po la shin du brtan pa'i yi dam bcas te the tsom dang phyir ldog pa'i sems mi skyed pa dang / gzhan yang sems can dag theg pa chen po la dad cing yid ches pa dang / gzungs su 'dzin pa dang / slob pa la nan tan byed du 'jug na/ rgyal rigs gdol pa can 'di dang / gzhan yang bdag nyid che ba'i gdol pa can dag ni snga ma 'das pa'i sangs rgyas kyis kyang rgyal thabs kyi dbang bskur zhing longs spyod rnam pa sna tshogs la spyod du gnang ngo / / 60.218b gzhan yang grong dang / grong khyer dang / nor dbyig thams cad la spyod kyang mtshams med pa'i sems can dmyal bar mi ltung ba nas/ ngan song gzhan gyi bar du yang ltung bar mi 'gyur ro/ /de ni ngas rgyal thabs kyi dbang skur zhing longs spyod rnam pa sna tshogs la spyod du gnang ngo / /de ltar na de dag ni grong dang grong khyer na spyod kyang mtshams med pa'i sems can dmyal bar mi ltung ba nas ngan song gzhan du yang mi ltung ngo / /sems can gang sdig pa'i las kyi sgrib pa thams cad lhag ma ma lus par byang bar 'dod na ngas bstan pa'i dam pa'i chos kyi rnam grangs 'di la nan tan du bslab cing gzungs su gzung bar bya'o/ /gang gis de ltar dge 'dun gyi mngon sum du gyur pa la shin du 'dzem pa dang / ngo tsha ba'i sems kyis sdig pa'i las so sor bshags na sngon gyi dus na byas pa'i sdig pa'i las thams cad lhag ma ma lus par yongs su byang bar 'gyur ro/ /bam po brgyad pa/ de'i tshe byang chub sems dpa' sems dpa' chen po rdo rje'i snying pos yang bcom ldan 'das la 'di skad ces gsol to/ /btsun pa bcom ldan 'das byang chub sems dpa' sems dpa' chen pos ji ltar na nyan thos kyi theg pa la 'khrul pa ma mchis pa lags/ ji ltar na nyan thos kyi theg pa'i gang zag la 'khrul pa ma mchis pa lags/ ji ltar na rang sangs rgyas kyi theg pa la 'khrul pa ma mchis pa lags/ ji ltar na rang sangs rgyas kyi theg pa'i gang zag la 'khrul pa ma mchis pa lags/ ji ltar na theg pa chen po la 'khrul pa ma mchis pa lags/ ji ltar na theg pa chen po'i gang zag la 'khrul pa ma mchis pa lags/ ji ltar na dkon mchog gsum gyi gdung rtag par yongs su 'phel bar bgyid pa lags/ ji ltar na de bzhin gshegs pa'i bstan pa la rab tu byung ba chos kyi snod dam/ chos kyi snod ma lags pa yang rung / chung ngu na chos gos kyi tshal bu 60.219a 'tshal zhing skra dang kha spu bregs pa thams cad la 'khrul pa ma mchis pa lags/ ji ltar na theg pa chen po'i chos la gong nas gong du 'phar zhing phyir mi ldog par 'gyur ba lags/ ji ltar na rno ba'i shes rab dang / bsod nams kyi khyad par rtag tu skye zhing 'phel bar 'gyur ba lags/ ji ltar na ting nge 'dzin dang / gzungs dang / bzod pa dang / sa rnams la dbang du 'gyur zhing phyir mi ldog par 'gyur ba lags/ ji ltar na rtag tu dge ba'i bshes gnyen dang mjal zhing rjes su 'thun par 'gyur ba lags/ ji ltar na rtag tu sangs rgyas thams cad mthong ba dang mi 'bral zhing byang chub sems dpa' dang / nyan thos kyi nye gnas dang mi 'bral ba dang / chos thos pa dang mi 'bral ba dang / dge 'dun la mchod pa dang / bsnyen bkur bgyid pa dang mi 'bral bar 'gyur ba lags/ ji ltar na dge ba'i rtsa ba thams cad la rab tu brtson pas sems mi ngoms pa lags/ ji ltar na byang chub kyi spyod pa rnam pa sna tshogs la sems mi ngoms pa lags/ de nas bcom ldan 'das kyis byang chub sems dpa' sems dpa' chen po rdo rje'i snying po la 'di skad ces bka' stsal pa/ rigs kyi bu byang chub sems dpa' sems dpa' chen po'i 'khor lo rnam pa bcu yod de/ byang chub sems dpa' sems dpa' chen po gang 'khor lo bcu pa 'di dang ldan na nyan thos kyi theg pa la 'khrul pa med par 'gyur ro/ /nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur ro/ /rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur ro/ /theg pa chen po'i gang zag la 'khrul pa med par 'gyur ro/ /dkon mchog gsum gyi gdung rtag par yongs su 'phel bar 'gyur ro/ /de bzhin gshegs pa'i bstan pa la rab tu byung ba chos kyi snod dam/ chos kyi snod ma yin pa yang rung chung ngu na chos gos kyi tshal bu gyon zhing skra dang kha spu bregs pa thams cad la 60.219b 'khrul pa med par 'gyur ro/ /theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin thams cad dang / gzungs dang / bzod pa dang / sa rnams la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing de'i rjes su 'gro ba dang / rtag tu sangs rgyas thams cad mthong ba dang mi 'bral zhing byang chub sems dpa' dang / rang sangs rgyas kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral ba dang / dge ba'i rtsa ba thams cad la brtson pas sems mi ngoms pa dang / byang chub kyi spyod pa dang smon lam rnam pa sna tshogs kyis sems mi ngoms pa dang / sngon sdig pa mi dge ba'i las ci byas pa thams cad 'phags pa'i chos kyi ye shes rdo rje ltar sa la rno bas lhag ma ma lus par bcom ste rnam par smin pa'i 'bras bu mi myong ba dang / gsar du sdig pa mi dge ba'i las thams cad mi byed pa dang / skyo ba dang sgyid lug pa med pa'i sems kyis bla na med pa'i chos kyi 'khor lo skor ba dang / byang chub kyi yan lag rin po che sna bdun nan tan byed pa la skyo zhing sgyid lug pa med pa'i sems dang / sems can thams cad kyi nyon mongs pa'i nad rnams 'jil ba la skyo zhing sgyid lug pa med pa'i sems kyis sems can thams cad kyi rten dang / gnas su 'gyur zhing nye bar 'tsho ba yin no/ /rigs kyi bu 'di lta ste/ 'khor los sgyur ba'i rgyal po rin po che sna bdun dang ldan pa ni gar 'gro yang rin po che'i 'khor lo thog mar 'gro ste/ rin po che gzhan de'i phyi bzhin 'brang ngo / /gling bzhi kun du rgyu zhing sems can thams cad kyi lus dang sems kyi rnyog pa thams cad kyang bsal te/ sems can thams cad kyi lus dang sems kyi bde ba yang skye zhing 'phel bar byed do/ /byang chub sems 60.220a dpa' sems dpa' chen po yang de bzhin du 'khor lo bcu po 'di dang ldan na nyan thos kyi theg pa la 'khrul pa med pa nas/ sems can thams cad kyi rten dang gnas su 'gyur zhing nye bar 'tsho ba'i bar du 'thob par 'gyur ro/ /rigs kyi bu 'di lta ste/ shing rta chen po ni 'khor lo bzhi dang ldan te/ mi mang po de'i nang du 'dug nas lam chen por 'gro'o/ /lam de ni bong ba 'am/ gyo mo 'am/ gseg ma 'am/ rtsa 'am/ shing ngam/ lo ma 'am/ yal ga 'am/ me tog gam/ 'bras bu ji snyed yod pa thams cad shing rta'i 'khor lo de'i 'og tu song nas thams cad chag cing grugs te nor du mi rung bar byed do/ /de bzhin du byang chub sems dpa' sems dpa' chen po yang 'khor lo rnam pa bcu dang ldan na nyon mongs pa'i sgrib pa dang / sems can gyi sgrib pa dang / chos kyi sgrib pa thams cad yongs su bcom ste/ rnam par smin pa mi len par byed do/ /rigs kyi bu 'di lta ste/ 'khor lo rnon po ni thang cig 'phangs pas phas rgol ba'i dgra'i mgo dang / yan lag bcad de/ de spyod pa'i mthu med par byed do/ /de bzhin du byang chub sems dpa' sems dpa' chen po yang 'khor lo rnam pa bcu po 'di dang ldan na rgyud lngar 'khor ba'i sdug bsngal chen po thams cad 'jom pa dang / nyon mongs pa dang sdig pa'i las thams cad yongs su gcad de/ rnam par smin pa len par mi byed do/ /rigs kyi bu 'di lta ste/ me'i bskal pa byung ba'i tshe nyi ma lnga gcig car shar nas gling bzhi'i klung dang / mtsho dang / chu bo dang / chu'i khams su gtogs pa gsher ba thams cad gang yang mi skems pa med do/ /de bzhin du byang chub sems dpa' sems dpa' chen po yang 'khor lo rnam pa bcu po 'di dang ldan na rgyu bzhi dang / nyon mongs pa'i sgrib pa dang / sems can gyi sgrib pa dang / chos kyi sgrib pa dang / sdug bsngal gyi rtsa bar smin pa thams cad yongs su skems par byed do/ /rigs kyi bu 'di lta ste/ rlung gi bskal pa byung ba'i tshe phyogs bzhi 60.220b nas rlung chen po dus gcig tu langs pas 'jig rten gyi khams thams cad ni ri bo che chung dang / sa chen po rnams thams cad 'jig cing 'thor bar 'gyur ro/ /de bzhin du byang chub sems dpa' sems dpa' chen po yang 'khor lo rnam pa 'di bcu dang ldan na 'jig rten gyi phyin ci log bzhi dang / nga rgyal gyi ri bo thams cad mi shigs pa gang yang med pa dang / sems can thams cad kyi nyon mongs pa'i sgrib pa dang / sems can gyi sgrib pa dang chos kyi sgrib pa dang / sdug bsngal gyi rnam par smin pa'i rtsa ba thams cad kyang 'jig cing 'thor bar 'gyur ro/ /rigs kyi bu 'di lta ste/ seng ge'i rgyal po ral pa can gyi skad thang cig phyung bas gcan zan thams cad dang / 'phur ba dang / 'gro ba thams cad skrag cing 'gul mi nus par 'gyur ro/ /de bzhin du byang chub sems dpa' sems dpa' chen po yang 'khor lo rnam pa 'di bcu dang ldan pa'i chos kyi sgra thang cig bsgrags pas mu stegs can dang / log par ston pa'i sdig pa'i grogs su gyur pa thams cad 'jigs skrag nas smra ba'i tshig 'khrul zhing 'dri ba dang rgol mi nus par 'gyur ro/ /rigs kyi bu 'di lta ste/ brgya byin lha yi dbang po lha ma yin dang 'thab pa'i tshe lha'i dmag gis bskor cing lag na rdo rje thogs te g.yul du zhugs na lha ma yin thams cad skrag pas ldog par 'gyur ro/ /de bzhin du byang chub sems dpa' sems dpa' chen po yang 'khor lo rnam pa 'di bcu dang ldan na log par lta ba'i mu stegs can thams cad dang / log par ston pa'i sdig pa'i grogs po thams cad skrag nas 'bros par 'gyur ro/ /rigs kyi bu 'di lta ste/ yid bzhin gyi nor bu rin po che rgyal mtshan gyi rtse mo la btags na rin po che rnam pa sna tshogs char bzhin du 'bab ste/ dbul phongs pa'i sems can thams cad la sbyin pa byed do/ /de bzhin du byang chub sems dpa' sems dpa' 60.221a chen po yang 'khor lo rnam pa 'di bcu dang ldan te/ rnam par dag pa'i tshul khrims kyi rgyal mtshan la gnas na chos chen po'i char rab tu 'bebs pas sems can tshad med pa snyed thams cad la sbyin pa byed par 'gyur ro/ /rigs kyi bu 'di lta ste/ mtshan mo'i dus su 'jig rten kun mun par gyur bas 'thom zhing 'brog bslad pa na zla ba nya ba shar bas mun pa thams cad bsal te/ 'brog bslad pa rnams kyi lam mtshon par 'gyur ba de bzhin du/ byang chub sems dpa' sems dpa' chen po yang 'khor lo rnam pa 'di bcu dang ldan na sems can gang ma rig pa'i mun pas ldongs te 'phags pa'i lam yan lag brgyad stor ba rnams la byang chub sems dpa' dam pa'i chos bshad de/ ma rig pa'i mun pa thams cad bsal nas/ chos kyi snang ba skyes pa'i phyir 'phags pa'i lam yan lag brgyad pa mngon du gyur te/ zag pa thams cad bcad nas sdug bsngal gyi mtha' zad par byed do/ /rigs kyi bu 'di lta ste/ nyi ma'i dkyil 'khor chen po 'jig rten du shar ba na lo tog thams cad skye zhing 'phel te/ me tog dang / lo thog dang / lo ma thams cad rgyas pa dang / mnam shing btsog pa thams cad sel ba dang / lo thog gi 'bru dang / sman gyi 'bras bu thams cad smin pa dang / gangs kyi ri bo kun zhu bas 'bab chu kun brug ste/ rim gyis rgya mtsho chen por 'bab par 'gyur ro/ /de bzhin du byang chub sems dpa' sems dpa' chen po yang 'khor lo rnam pa 'di bcu dang ldan te/ lhag pa'i sbyin pa la gnas shing / dul ba'i tshul khrims dang / bde ba'i bzod pa dang / brtson 'grus dang / bsam gtan dang / shes rab dang / thabs dang / byams pa dang / snying rje dang / spobs pa'i yon tan shin du rgyas shing sems can thams cad la dam pa'i chos ston to/ /chos de'i 'od kyi gzi brjid kyis sems can thams cad kyi dge 60.221b ba'i rtsa ba lhag pa'i lo tog rnam pa sna tshogs skye zhing 'phel ba dang / lhag pa'i spyod pa dam pa'i me tog dang / lo ma rnam pa sna tshogs shin du rgyas pa dang / nyon mongs pa'i las ngan pa thams cad yongs su sel ba dang / mtho ris dang / mya ngan las 'da' ba'i 'bras bu yongs su smin par 'gyur ba dang / log par lta ba dang / nga rgyal gyi ri bo thams cad zhu zhing 'bab pas yang dag pa'i dang ba dang / tshul khrims dang / thos pa dang / gtong ba dang / shes rab dang / ting nge 'dzin gyi chu rim gyis 'bab cing mya ngan las 'da' ba'i rgya mtsho 'gengs pa dang / sems can thams cad yid bzhin du 'jigs pa med pa mya ngan las 'da' ba'i grong khyer du 'jug par 'gyur ro/ /rigs kyi bu de la ji ltar na byang chub sems dpa' sems dpa' chen po'i 'khor lo bcu po gang zhe na/ rigs kyi bu 'khor lo bcu zhes bya ba ni chos gzhan la mi gdags kyi/ dge ba bcu'i las kyi lam nyid yin par shes par bya'o/ /'khor lo rnam pa bcu po 'di dag dang ldan pas na byang chub sems dpa' sems dpa' chen po zhes bya ste/ sdig pa thams cad las rnam par grol ba dang / dge ba'i chos thams cad yid bzhin du rdzogs pa dang / myur du mya ngan las 'da' ba chen po'i rgya mtsho yongs su 'gengs pa dang / thabs mkhas pa chen po'i ye shes kyi 'od kyis skye bo thams cad yongs su smin par byed cing thams cad la phan pa dang / bde ba yongs su thob par byed do/ /de ci'i phyir zhe na/ rigs kyi bu snga ma 'das pa'i sangs rgyas bcom ldan 'das thams cad kyis kyang mi dge ba bcu'i las kyi lam yongs su spangs te/ dge ba bcu'i las kyi lam 'di la yongs su bsngags pas 'bras bu thob par gyur to/ /de bas na gang gis dge ba bcu'i las kyi lam bshad pa 'di dag las/ 'ga' zhig nam 'tsho'i bar du ma nyams par srung na 'bras bu khyad par can mchog tu 'gyur ba 60.222a thams cad thob pa ni ji ltar bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du srog gcod pa yongs su spangs na de nyid sems can thams cad la mi 'jigs pa sbyin pa yin te/ sems can dag la 'jigs shing bag tsha bar mi byed pas de'i 'jigs pa'i sdug bsngal mi skyed pa'i dbang gis dge ba'i rtsa ba thams cad myur du yongs su rdzogs par 'gyur ro/ /thog ma med pa'i mtha' nas rgyud lngar 'khor ba'i rgya mtshor bying ba/ srog gcod pa'i dbang gis lus dang / ngag dang / yid kyis sdig pa mi dge ba'i las bdag kyang byed la gzhan yang byed du 'jug cing mthong ba dang / thos pa'i rjes su yi rang ba las byung ba'i nyon mongs pa'i sgrib pa dang / sems can gyi sgrib pa dang / chos kyi sgrib pa dang / tshe'i sgrib pas bsgribs par gyur to/ /'di ltar srog gcod pa yongs su spangs pa'i 'khor los de dag lhag ma ma lus par yongs su bcom zhing brnyil bas rnam par smin pa'i 'bras bu mi myong bar byed do/ /lus 'di nyid la yang lha dang / mi la sogs pa kun dga' zhing yid du 'ong ba dang / dogs pa mi skye ba dang / lus dang sems rab tu bde zhing yun ring du 'tsho bar 'gyur ro/ /'chi 'pho ba'i dus byed pa na yang lus dang sems sdug bsngal gyis mi gdung zhing yid du 'ong ba'i bu dang / chung ma dang / 'khor thams cad kyis yongs su bskor bas 'chi 'pho ba'i dus byed kyi shin du 'jigs pa gshin rje'i pho nya mthong bar mi 'gyur ro/ /gzhan yang yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ lus dang sems rab tu dga' ba dang / de la bkur sti dang bcas pas shin du dad pa skye bar 'gyur ro/ /yang tshe 'phos nas kyang phyir mi'i nang du skye ste/ 60.222b dbang po yongs su rdzogs shing yan lag dang ldan pa dang / gang nas gang du skyes par nad med pa dang / tshe ring ba dang / byad gzugs bzang ba dang / yid gzhungs pa dang / rab tu bde zhing skyid pa dang / gzhan yang yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ de'i rjes su slob pa dang / srog gcod pa yongs su spong ba dang / sdig pa mi dge ba'i chos thams cad yongs su gcod pa dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang sbyor ba thams cad la rim gyis gzhol zhing shin du yangs pa'i ye shes kyi rgya mtsho la 'jug pa nas bla na med pa'i byang chub thob pa'i bar du 'gyur ro/ /sangs rgyas kyi zhing mtshon cha med pa dang / dgra dang 'tshe ba'i ming mi grag pa dang / 'jigs pa thams cad dang bral te rab tu bde skyid pa dang / nad med pa dang / tshe ring ba'i zhing du sems can dag skye bar 'gyur ro/ /de bzhin gshegs pa'i tshe'i tshad kyang dpag tu med de sems can dag cis 'dul ba'i bzhin du dad pa'i chos ston to/ /yongs su mya ngan las 'das nas kyang dam pa'i chos yun ring du gnas shing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen po srog gcod pa yongs su spangs pa'i 'khor lo ste dang po'o/ /byang chub sems dpa' sems dpa' chen po 'khor lo de dang ldan na nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i 60.223a gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa yang rung / chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur ro/ /theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing rjes su 'gro ba dang / rtag tu sangs rgyas thams cad mthong ba dang mi 'bral zhing byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang smon lam rnam pa sna tshogs kyis sems mi ngoms par 'gyur te/ 'bras bu gzhan thob pa yang ji ltar rgyas par bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du ma byin par len pa yongs su spangs na de nyid sems can thams cad la mi 'jigs pa'i sbyin pa yin te/ yongs su gdung ba med pa dang / 'tshe ba med pa dang / bdag nyid tshul bzhin du rnyed pa'i nor gyis chog shes par gnas kyis/ chos ma yin pa'i nor dang khe la re ba med pa de'i dbang gis dge ba'i rtsa ba thams cad kyang yongs su rdzogs par 'gyur ro/ /thog ma med pa'i mtha' nas rgyud lngar 'khor zhing 'khor ba'i rgya mtshor bying bar 'gyur ba yang ma byin par len pa'i dbang gis lus dang / ngag dang / yid mi dge ba'i lam rnams bdag kyang byed la/ gzhan yang byed du 'dzud cing 60.223b mthong ba dang thos pa'i rjes su yi rang ba las byung ba'i nyon mongs pa'i sgrib pa dang / sems can gyi sgrib pa dang / chos kyi sgrib pa dang / rin po che dang nor la sgrib pas bsgribs par gyur to/ /'di ltar ma byin par len pa yongs su spangs pa'i 'khor los lhag ma ma lus par yongs su bcom pas rnam par smin pa'i 'bras bu mi myong ste/ lus 'di nyid la yang lha dang mi la sogs pa kun dga' zhing yid du 'ong bas dogs pa mi skye ba dang / lus dang sems rab tu bde ba dang / nor rin po che thams cad dang ldan par 'gyur ro/ /nam 'chi 'pho ba'i dus byed pa na yang lus dang sems sdug bsngal gyis mi gdung zhing yid du 'ong ba'i bu dang chung ma dang / 'khor thams cad kyis yongs su bskor bas 'chi 'pho ba'i dus byed kyi/ shin du 'jigs pa gshin rje'i pho nya mthong bar mi 'gyur ro/ /gzhan yang yid du 'ong ba'i dge ba'i bshes gnyen gyi chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ lus dang sems rab tu dga' ba dang de la bkur sti dang bcas pas dang ba skye bar 'gyur ro/ /tshe 'phos nas kyang phyir mi'i nang du skye ste/ dbang po yongs su rdzogs shing yan lag dang ldan pa dang / gang nas gang du skyes par longs spyod chen po dang ldan zhing byad gzugs bzang ba dang / yid gzhungs pa dang / rab tu bde zhing skyid pa dang / 'jigs pa lnga dang nor thun mong du mi 'gyur ro/ /phyir yang yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams dang yon tan dang ldan pa/ bsod nams kyi zhing yang dag pa dang phrad de/ de'i rjes su slob cing ma byin par len pa yongs su spong ba dang / sdig pa mi dge ba'i chos thams cad yongs su gcod pa dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems 60.224a dpa'i smon lam dang spyod pa thams cad la rim gyis gzhol ba dang / shin du yangs pa'i ye shes kyi rgya mtsho la 'jug pa nas bla na med pa'i byang chub kyi bar du 'thob par 'gyur ro/ /yang sangs rgyas kyi zhing rin po che rnam pa sna tshogs kyis brgyan pa dang / rin po che'i shing dang / rin po che'i rdzing dang / rin po che'i gzhal med khang la sogs pas yongs su gang ba dang / bdag dang bdag gir 'dzin pa dang bral ba rgyan thams cad kyis bkod pa dang ldan pa'i zhing der sems can dag skye bar 'gyur ro/ /de bzhin gshegs pa'i tshe'i tshad kyang dpag tu med de sems can dag cis 'dul ba bzhin du dam pa'i chos ston to/ /yongs su mya ngan las 'das nas kyang dam pa'i chos yun ring du gnas shing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen pos ma byin par len pa yongs su spangs pa'i 'khor lo gnyis pa'o/ /byang chub sems dpa' sems dpa' chen po 'khor lo 'di dang ldan na nyan thos kyi theg pa la 'khrul pa med par 'gyur ro/ /nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa yang rung chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur/ theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye 60.224b zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing de'i rjes su 'gro ba dang / rtag tu sangs rgyas thams cad mthong ba dang mi 'bral zhing byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang smon lam rnam pa sna tshogs kyis sems mi ngoms par 'gyur te/ 'bras bu thob pa dag kyang ji ltar bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho ba'i bar du 'dod pas log par g.yem pa yongs su spangs na/ de nyid sems can thams cad 'dod pa'i rlung gis g.yengs pa las 'jigs pa med pa/ phrag dog med pa/ 'tshe ba med pa/ yongs su gdung ba med pa/ 'khrug pa med pa'i sbyin pa yin te/ bdag gi chung mas chog shes shing gzhan gyi chung ma la re ba med pas de'i dbang gis dge ba'i rtsa ba thams cad yongs su rdzogs par 'gyur ro/ /thog ma med pa'i mtha' nas rgyud lngar 'khor bar 'khor ba'i rgya mtshor 'bying ba yang 'dod pas log par g.yem pa'i dbang gis lus dang ngag dang / yid mi dge ba'i las bdag kyang byed la/ gzhan yang byed du 'jug cing mthong ba dang thos pa'i rjes su yi rang ba las byung ba nyon mongs pa'i sgrib pa dang / sems can gyi sgrib pa dang / chos kyi sgrib pa dang / chung ma'i sgrib pas bsgribs par gyur to/ /'di ltar 'dod pas log par g.yem pa yongs su spangs pa'i 'khor los lhag ma ma lus par bcom pas rnam par smin pa'i 'bras bu mi len te/ lus 'di nyid la yang lha dang mi la sogs pa kun dga' zhing yid du 'ong bas dogs pa mi skye ba 60.225a dang / lus dang sems rab tu bde ba dang / chung ma lhod pa dang bcas pa ma yin par 'gyur ro/ /'chi 'pho ba'i dus byed pa na yang lus dang sems la sdug bsngal gyis mi gdungs shing yid du 'ong ba'i bu dang / chung ma dang / 'khor thams cad kyis yongs su bskor bas 'chi 'pho ba'i dus byed par 'gyur gyi/ shin du 'jigs pa'i gshin rje'i pho nya ni mthong bar mi 'gyur ro/ /gzhan yang yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ lus dang sems rab tu dga' ba dang / de la bkur sti dang bcas pas de la shin du dad pa skye bar 'gyur ro/ /tshe 'phos nas kyang phyir mi'i nang du skyes te/ dbang po yongs su rdzogs shing yan lag dang ldan pa dang / gang nas gang du skyes par 'khor phun sum tshogs pa dang / byad gzugs bzang ba dang / yid gzhungs pa dang / rab tu bde zhing skyid pa dang / phyir yang shin du yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ de'i rjes su slob cing 'dod pas log par g.yem pa yongs su spong ba dang / sdig pa mi dge ba'i chos thams cad yongs su spong ba dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad la rim gyis gzhol zhing shin du yangs pa'i ye shes kyi rgya mtsho la 'jug pa nas bla na med pa'i byang chub 'thob pa'i bar du 'gyur ro/ /sangs rgyas kyi zhing bud med med pa dang / 'dod chags dang g.yem pa med pa/ tshangs par spyod pa mchog dang ldan pa'i sems can dag zhing der skye ste/ de dag thams cad kyang rdzus te skye'i mi gtsang ba'i mngal nas skye ba ni ma yin no/ /de bzhin gshegs pa'i tshe'i tshad kyang dpag tu med de/ 60.225b sems can dag la cis 'dul ba bzhin du dam pa'i chos ston to/ /yongs su mya ngan las 'das nas kyang dam pa'i chos yun ring du gnas shing / sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen po 'dod pas log par g.yem pa yongs su spangs pa'i 'khor lo gsum pa'o/ /byang chub sems dpa' sems dpa' chen po 'khor lo 'di dang ldan na nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa yang rung chung ngu na chos gos kyi tshal bu gyon zhing skra dang kha spu bregs pa la 'khrul pa med par 'gyur/ theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing rjes su 'thun par 'gyur ba dang / rtag tu sangs rgyas mthong ba dang mi 'bral zhing / byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang smon lam rnam pa sna tshogs 60.226a kyis sems mi ngoms pa dang / 'bras bu gzhan dag thob pa yang ji ltar bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du brdzun du smra ba yongs su spangs na sems can thams cad kyis rtag tu bkur ba dang / tshig btsugs pa tshad mar 'gyur ba dang / tshig kun nyan cing gus pa dang dogs pa mi skye bar 'gyur te/ de'i dbang gis dge ba'i rtsa ba yongs su rdzogs par 'gyur ro/ /thog ma med pa'i mtha' nas rgyud lngar 'khor bar 'khor ba'i rgya mtshor 'bying ba yang brdzun du smra ba'i dbang gis lus dang / ngag dang / yid kyis sdig pa mi dge ba'i las bdag kyang byed la/ gzhan yang byed du 'dzud cing mthong ba dang thos pa'i rjes su yi rang ba las byung ba'i nyon mongs pa'i sgrib pa dang / sems can gyi sgrib pa dang / chos kyi sgrib pa dang / tshig btsugs pa las sgrib pas bsgribs par 'gyur ro/ /'di ltar brdzun du smra ba yongs su spangs pa'i 'khor los lhag ma ma lus par yongs su bcom pas rnam par smin pa'i 'bras bu mi len par 'gyur ro/ /lus 'di nyid la lha dang mi la sogs pa kun dga' zhing yid du 'ong ba dang / dogs pa mi skye ba dang / lus dang sems rab tu bde ba dang / tshig tu smra ba thams cad la gzhan yid ches shing nyan par 'gyur ro/ /'chi 'pho ba'i dus byed pa na yang lus dang sems kyi sdug bsngal gyis mi gdung zhing yid du 'ong ba'i bu dang / chung ma dang / 'khor thams cad kyis yongs su bskor bas 'chi 'pho ba'i dus byed kyi shin du 'jigs pa'i gshin rje'i pho nya ni mthong bar mi 'gyur ro/ /gzhan yang yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ lus dang sems rab tu dga' ba dang / de la bkur sti dang bcas pas shin du dad pa skye bar 'gyur ro/ /tshe 'phos nas kyang phyir mi'i lus su skye zhing dbang 60.226b po yongs su rdzogs pa yan lag dang ldan pa dang / gang nas gang du skyes par tshig btsugs pa dang / byad gzugs bzang ba dang / yid gzhungs pa dang / rab tu bde zhing skyid pa dang / yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ de'i rjes su slob pa dang / brdzun du smra ba yongs su spangs pa dang / sdig pa mi dge ba'i chos thams cad yongs su gcod pa/ dge ba'i chos khyad par can thams cad rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad la rim gyis gzhol ba dang / shin du yangs pa'i ye shes kyi rgya mtsho la 'jug pa nas bla na med pa'i byang chub 'thob pa'i bar du 'gyur ro/ /sangs rgyas kyi zhing thams cad bden par smra ba/ sgyu dang bral ba/ lha'i gsung gis yongs su brgyan pa dang / slu ba med cing sems kyi spyod pa drang ba dang / yang dag pa'i spyad pa rnam par dkar ba'i chos 'ba' shig la spyod pa/ lha'i gos bsung can gyon pa/ rin po che'i rgyan gyis bkod pa'i sems can dag zhing der skye bar 'gyur ro/ /de bzhin gshegs pa'i tshe'i tshad kyang dpag tu med de/ sems can dag cis 'dul ba bzhin du chos ston to/ /yongs su mya ngan las 'das nas kyang dam pa'i chos yun ring du gnas shing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen po'i brdzun du smra ba yongs su spangs pa'i 'khor lo bzhi pa'o/ /byang chub sems dpa' sems dpa' chen pos 'khor lo 'di dang ldan na nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen 60.227a po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel bar byed pa dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa yang rung chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur/ theg pa chen po'i chos la gong nas gong du 'phar zhing phyir mi ldog par 'gyur ba dang / rno ba'i shes rab dang / bsod nams kyi khyad par rtag tu 'phel zhing skye ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing de'i rjes su 'gro ba dang / rtag tu sangs rgyas mthong ba dang mi 'bral ba dang / byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral zhing dge ba'i rtsa ba thams cad shin du tshol ba la brtson pas sems mi ngoms pa dang / byang chub kyi spyod pa dang smon lam rnam pa sna tshogs kyis sems mi ngoms par 'gyur te/ 'bras bu gzhan 'thob pa yang ji ltar bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du phra ma yongs su spangs na sems can thams cad kyis rtag tu bkur zhing bla mar byed pa dang / tshig tu smra ba thams cad gzhan gyis mnyan pa dang / 'dum pa dang / dogs pa mi skye bar 'gyur te/ de'i dbang gis dge ba'i rtsa ba yongs su rdzogs par 'gyur ro/ /thog ma med pa'i mtha' nas rgyud lngar 'khor bar 'khor ba'i rgya mtshor 'bying ba yang phra ma byas pa'i dbang gis lus dang / ngag dang / yid kyis mi dge ba'i las bdag kyang byed la/ gzhan yang byed du 'dzud cing mthong ba dang thos pa'i rjes su yi rang ba las byung ba nyon mongs pa'i sgrib pa dang / sems can gyi sgrib pa dang / 60.227b chos kyi sgrib pa dang / 'dum pa la sgrib pas bsgribs par 'gyur ro/ /'di ltar phra ma'i tshig yongs su spangs pa'i 'khor los lhag ma ma lus par yongs su bcom pas rnam par smin pa'i 'bras bu mi lan par byed do/ /lus 'di nyid la lha dang mi la sogs pa kun dga' zhing yid du 'ong ba dang / dogs pa mi skye ba dang / lus dang sems rab tu bde ba dang / tshig tu smra ba thams cad la nyan cing 'dum par 'gyur ro/ /'chi 'pho ba'i dus byed pa na yang lus dang sems la sdug bsngal gyis mi gdung zhing yid du 'ong ba'i bu dang / chung ma dang / 'khor thams cad kyis yongs su bskor bas 'chi 'pho ba'i dus byed par 'gyur gyi/ shin du 'jigs pa'i gshin rje'i pho nya mthong bar mi 'gyur ro/ /yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa bsod nams kyi zhing yang dag pa dang phrad de/ lus dang sems rab tu dga' ba dang bkur sti dang bcas pas shin du dad pa skye bar 'gyur/ tshe 'phos nas kyang phyir mi'i nang du skye ste/ dbang po yongs su rdzogs shing yan lag dang ldan pa dang / gang nas gang du skyes par smra ba'i tshig 'jam zhing 'dum pa dang / byad gzugs bzang ba dang / yid gzhungs pa dang / rab tu bde zhing skyid pa dang / phyir yang yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa/ bsod nams kyi zhing yang dag pa dang phrad de/ de'i rjes su slob pa dang / phra ma'i tshig dang yongs su bral bas sdig pa mi dge ba'i chos thams cad yongs su gcod pa dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad la rim gyis gzhol zhing ye shes kyi rgya mtsho la 'jug pa nas bla na med pa'i byang chub thob pa'i bar du 'gyur ro/ / 60.228a sangs rgyas kyi zhing shin du brtan pa sra ba mi shigs pa dang / lha rdzas bzang pos yongs su brgyan par 'gyur ba dang / 'thun pa dang / mi rtsod pa shin du dul zhing 'dum pa dge ba'i chos tshol ba'i sems can dag zhing der skye bar 'gyur ro/ /rtag tu 'dum zhing gus pas dam pa'i chos nyan pa dang / de bzhin gshegs pa'i tshe'i tshad kyang dpag tu med do/ /sems can dag ci dang cis 'dul ba bzhin du dam pa'i chos ston to/ /yongs su mya ngan las 'das nas kyang dam pa'i chos yun ring du gnas shing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen pos phra ma yongs su spangs pa'i 'khor lo lnga pa'o/ /byang chub sems dpa' sems dpa' chen po 'khor lo 'di dang ldan na nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa yang rung chung ngu na chos gos kyi tshal bu gyon zhing skra dang kha spu bregs pa la 'khrul pa med par 'gyur/ theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing de'i rjes su 'gro ba dang / rtag tu sangs rgyas mthong ba dang mi 60.228b 'bral zhing byang chub sems dpa' dang nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun mchod pa dang bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang / smon lam rnam pa sna tshogs kyis sems mi ngoms par 'gyur te/ 'bras bu gzhan thob pa yang ji skad bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du zhe gcod pa'i tshig thams cad yongs su spangs na sems can thams cad kyis bkur zhing bla mar byed pa dang / tshig tu smra ba kun la pha rol po kun dga' zhing nyan pas dogs pa med par 'gyur te/ de'i dbang gis dge ba'i rtsa ba thams cad yongs su rdzogs par 'gyur ro/ /thog ma med pa'i mtha' nas rgyud lngar 'khor bar 'khor ba'i rgya mtshor 'bying ba yang zhe gcod pa'i tshig gi dbang gis lus dang / ngag dang / yid mi dge ba'i las bdag kyang byed la/ gzhan yang byed du 'dzud cing mthong ba dang thos pa'i rjes su yi rang ba las byung ba nyon mongs pa'i sgrib pa dang / sems can gyi sgrib pa dang / chos kyi sgrib pa dang / shin du dul ba la sgrib pas bsgribs par gyur to/ /'di ltar zhe gcod pa'i tshig yongs su spangs pa'i 'khor los lhag ma ma lus par yongs su bcom pa'i dbang gis rnam par smin pa'i 'bras bu yongs su mi len te/ lus 'di nyid la yang lha dang mi la sogs pa kun dga' bas dogs pa mi skye ba dang / lus dang sems rab tu bde ba dang / tshig tu smra ba thams cad pha rol gyi yid du 'ong ba dang snyan par 'gyur ro/ /nam 'chi 'pho ba'i dus byed pa na yang lus dang sems la sdug bsngal gyis mi gdung zhing nyon mi mongs pa dang / yid du 'ong ba'i bu dang chung ma dang 'khor thams 60.229a cad kyis yongs su bskor bas 'chi 'pho ba'i dus byed par 'gyur gyi shin du 'jigs pa'i gshin rje'i pho nya mthong bar mi 'gyur ro/ /yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams kyi zhing yang dag pa dang phrad de lus dang sems rab tu dga' ba dang / de la bkur sti dang bcas pas shin du dad pa skye bar 'gyur ro/ /tshe 'phos kyang phyir mi'i nang du skyes na yang dbang po yongs su rdzogs shing yan lag dang ldan pa dang / gang nas gang du skyes par tshig 'jam por smra ba dang / byad gzugs bzang ba dang / yid gzhungs pa dang / rab tu bde zhing skyid pa dang / phyir yang yid du 'ong ba'i dge ba'i bshes gnyen chos kyis dul ba/ tshul khrims dang / yon tan du ldan pa/ bsod nams kyi zhing yang dag pa dang phrad de de'i rjes su slob pa dang / zhe gcod pa'i tshig yongs su spong ba dang / sdig pa mi dge ba'i chos thams cad yongs su gcod pa dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad rim gyis gzhol zhing shin du yangs pa'i ye shes kyi rgya mtsho la 'jug pa nas bla na med pa'i byang chub kyi bar du 'thob pa dang / sangs rgyas kyi zhing na yid du mi 'ong ba'i sgra thams cad dang bral te/ yid du 'ong ba'i sgra dbyangs snyan pa rnam pa sna tshogs dang / chos kyi sgras zhing de yongs su gang ba dang / dran pa dang blo gros su ldan pa/ tshangs pa'i dbyangs can/ shin du dul ba'i sems can dag zhing der skye ba dang / rtag tu tshig 'jam pos gcig la gcig skul bar byed do/ /de bzhin gshegs pa'i tshe'i tshad kyang dpag tu med de/ sems can dag cis 'dul ba bzhin du chos ston pa dang / yongs su mya ngan las 'das nas kyang dam pa'i chos yun 60.229b ring du gnas zhing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen po zhe gcod pa'i tshig yongs su spong ba'i 'khor lo drug pa'o/ /byang chub sems dpa' sems dpa' chen po 'khor lo 'di dang ldan pas nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro// dkon mchog gsum gyi gdung yongs su 'phel ba dang de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa yang rung chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur/ theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing rjes su 'gro bar 'gyur ba dang / rtag tu sangs rgyas thams cad mthong ba dang mi 'bral zhing byang chub sems dpa' dang nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang / bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang smon lam rnam pa sna tshogs kyis sems mi ngoms par 'gyur te/ 'bras bu gzhan dag thob pa yang ji 60.230a skad bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du tshig kyal pa yongs su spangs pas sems can thams cad kyis bkur zhing bla mar byed pa dang / tshig tu smra ba thams cad don du 'gyur zhing tshig thos pa rnams nyan cing gus pas dogs pa med par 'gyur ro/ /de'i dbang gis dge ba'i rtsa ba thams cad yongs su rdzogs par 'gyur ro/ /thog ma med pa'i mtha' nas rgyud lngar 'khor bar 'khor ba'i rgya mtshor bying ba yang tshig kyal pa smra ba'i dbang gis lus dang / ngag dang / yid mi dge ba'i las bdag kyang byed la/ gzhan yang byed du 'dzud cing mthong ba dang thos pa'i rjes su yi rang ba las byung ba'i nyon mongs pa'i sgrib pa dang / sems can gyi sgrib pa dang / chos kyi sgrib pa dang / don du smra ba la sgrib pas bsgribs par gyur to/ /'di ltar tshig kyal pa yongs su spangs pa'i 'khor los lhag ma ma lus par yongs su bcom pas rnam par smin pa'i 'bras bu mi len par byed do/ /lus 'di nyid la lha dang mi la sogs pa kun dga' zhing yid du 'ong bas dogs pa med par 'gyur ba dang / lus dang sems rab tu bde ba dang / tshig tu smra ba thams cad don du 'gyur ba dang / 'chi 'pho ba'i dus byed pa na yang lus dang sems la sdug bsngal gyis mi gdung zhing yid du 'ong ba'i bu dang / chung ma dang / 'khor gyis yongs su bskor bas 'chi 'pho ba'i dus byed par 'gyur gyi shin du 'jigs pa'i gshin rje'i pho nya mthong bar mi 'gyur ro/ /yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams kyi zhing yang dag pa dang phrad de lus dang sems rab tu dga' ba dang / de la bkur sti dang bcas shing shin du dad pa skye bar 'gyur ro/ /tshe 'phos nas kyang phyir mi'i nang du skye zhing dbang po 60.230b yongs su rdzogs pa yan lag dang ldan pa dang / gang nas gang du skyes par phan pa dang / don du 'gyur ba'i tshig smra ba dang / byad gzugs bzang ba dang / yid gzhungs pa dang / rab tu bde zhing skyid pa dang / phyir yang yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams kyi zhing yang dag pa dang phrad de/ de'i rjes su slob pa dang / tshig kyal par smra ba yongs su spong ba dang / sdig pa mi dge ba'i chos thams cad yongs su gcod pa dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad la rim gyis gzhol zhing shin du yangs pa'i ye shes kyi rgya mtsho la 'jug pa nas bla na med pa'i byang chub 'thob pa'i bar du 'gyur ro/ /sangs rgyas kyi zhing don med pa'i tshig thams cad dang bral te/ byang chub sems dpa'i sde snod du gtogs pa'i chos chen po'i sgra mchog dam pa rnam pa mang pos zhing de yongs su khyab pa dang / dpag tu med pa'i smon lam dang / ye shes dam pa phun sum tshogs pas chos kyi don rnam pa sna tshogs 'chad pa la mkhas pa'i sems can de lta bu dag zhing der skye bar 'gyur ro/ /de bzhin gshegs pa'i tshe'i tshad kyang dpag tu med de/ sems can dag cis 'dul ba bzhin du dam pa'i chos ston to/ /yongs su mya ngan las 'das nas kyang dam pa'i chos yun ring du gnas shing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen po tshig kyal pa yongs su spangs pa'i 'khor lo bdun pa'o/ /byang chub sems dpa' sems dpa' chen po 'khor lo 'di dang ldan pas nyan thos kyi theg pa la 'khrul pa med par 'gyur/ nyan thos kyi theg pa'i 60.231a gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam chos kyi snod ma yin pa yang rung chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur/ theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyan dang phrad cing de'i rjes su 'gro ba dang / rtag tu sangs rgyas thams cad mthong ba dang mi 'bral zhing byang chub sems dpa' dang nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang smon lam rnam pa sna tshogs kyis sems mi ngoms par 'gyur te/ 'bras bu gzhan thob pa yang ji skad bshad pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du chags sems yongs su spangs na sems can thams cad kyis bkur zhing btsun par byed pa dang / sems rnam par dag cing rnyog pa dang bral te/ de'i dbang gis dge ba'i rtsa ba thams cad yongs su rdzogs 60.231b par 'gyur ro/ /thog ma med pa'i mtha' nas rgyud lngar 'khor bar 'khor ba'i rgya mtshor 'bying ba yang chags sems kyi dbang gis lus dang / ngag dang / yid sdig pa mi dge ba'i las bdag kyang byed la gzhan yang byed du 'dzud cing mthong ba dang thos pa'i rjes su yi rang ba las byung ba nyon mongs pa'i sgrib pa dang / sems can gyi sgrib pa dang / chos kyi sgrib pa dang / 'dod sems med pa la sgrib pas bsgribs par 'gyur ro/ /'dod sems yongs su spong ba'i 'khor los lhag ma ma lus par yongs su bcom pas rnam par smin pa'i 'bras bu yongs su mi len te/ lus 'di nyid la yang lha dang mi la sogs pa kun dga' zhing yid du 'ong ba dang / dogs pa med par 'gyur ba dang / lus dang sems rab tu bde ba dang / sems rnam par dag cing rnyog pa dang bral bar 'gyur ro/ /'chi 'pho ba'i dus byed pa na yang lus dang sems la sdug bsngal gyis mi gdung ba dang / yid du 'ong ba'i bu dang / chung ma dang / 'khor gyis yongs su bskor bas 'chi ba'i dus byad par 'gyur gyi/ shin du 'jigs pa'i gshin rje'i pho nya mthong bar mi 'gyur ro/ /yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams kyi zhing yang dag pa dang phrad de lus dang sems rab tu dga' ba dang / de la bkur sti dang bcas pas shin du dad pa skye bar 'gyur ro/ /tshe 'phos nas kyang phyir mi'i nang du skye zhing dbang po yongs su rdzogs pa/ yan lag dang ldan pa/ gang nas gang du skyes par sems rnam par dag cing rnyog pa med pa dang / byad gzugs bzang ba dang / yid gzhungs pa dang / rab tu bde zhing skyid pa dang / phyir yang yid du 'ong ba'i dge ba'i bshes gnyen chos kyis dul ba/ tshul khrims dang yon 60.232a tan du ldan pa bsod nams kyi zhing yang dag pa dang phrad de de'i rjes su slob pa dang / chags sems yongs su spong ba dang / mi dge ba'i chos yongs su gcad pa dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad la rim gyis gzhol zhing shin du yangs pa'i ye shes kyi rgya mtsho la 'jug pa nas bla na med pa'i byang chub 'thob pa'i bar du 'gyur ro/ /sangs rgyas kyi zhing lag mthil bzhin du mnyam la rin po che rnam pa mang pos yongs su gang ba dang / rin po che'i shing rnam pa sna tshogs dkrigs pa dang / rin po che'i gos dang / rin po che'i rgyan gyi yo byad dang / rin po che'i rgyal mtshan dang / ba dan dang / gdugs dang / gser dang / dngul dang / mu tig gi dra ba dang / shing la sogs pas yongs su gang ba dang / shin du yid du 'ong zhing blta na sdug pa/ nga rgyal yongs su spangs pa/ byad gzugs shin du mdzes pa dang / dbang po ma nyams pa/ sems mnyam pa'i sems can dag zhing der skye bar 'gyur te/ chags sems med pa'i yon tan phun sum tshogs pas brgyan par 'gyur ro/ /de bzhin gshegs pa'i tshe'i tshad kyang dpag tu med de/ sems can dag cis 'dul ba bzhin du dam pa'i chos ston to/ /yongs su mya ngan las 'das nas kyang dam pa'i chos yun ring du gnas shing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen po chags sems yongs su spangs pa'i 'khor lo brgyad pa'o/ /byang chub sems dpa' sems dpa' chen po 'khor lo 'di dang ldan na nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med 60.232b par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa yang rung chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur ro/ /theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing de'i rjes su 'thun par 'gyur ba dang / rtag tu sangs rgyas thams cad mthong ba dang mi 'bral zhing / byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang / bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas mi ngoms pa/ byang chub kyi spyod pa dang smon lam rnam pa sna tshogs kyis sems mi ngoms par 'gyur te/ 'bras bu gzhan dag thob pa yang ji skad bshad pa bzhin no/ / bam po dgu pa/ rigs kyi bu gzhan yang byang chub sems dpa' sems dpa' chen po gang nam 'tsho'i bar du gnod sems yongs su spangs na/ sems can thams cad kyis bkur zhing bla mar byed pa dang / sems rnam par dag pa dang / dri ma dang bral bar 'gyur te/ de'i dbang gis dge ba'i rtsa ba thams cad yongs su rdzogs par 'gyur ro/ /thog ma med pa'i mtha' nas rgyud lngar 60.233a 'khor bar 'khor ba'i rgya mtshor 'bying ba yang gnod sems kyi dbang gis lus dang / ngag dang / yid sdig pa mi dge ba'i las bdag kyang byed la gzhan yang byed du 'dzud cing mthong ba dang thos pa'i rjes su yi rang ba las byung ba nyon mongs pa'i sgrib pa dang / sems can gyi sgrib pa dang / chos kyi sgrib pa dang / gnod sems byed pa la sgrib pas bsgribs par gyur to/ /'di ltar gnod sems yongs su spangs pa'i 'khor los lhag ma ma lus par yongs su bcom pas rnam par smin pa'i 'bras bu yongs su mi len te/ lus 'di nyid la yang lha dang mi la sogs pa kun dga' zhing yid du 'ong ba dang / dogs par mi 'gyur ba dang / sems rnam par dag pa dang / dri ma dang bral bar 'gyur ro/ /'chi 'pho ba'i dus byed pa na yang lus dang sems la sdug bsngal gyis mi gdung zhing yid du 'ong ba'i bu dang / chung ma dang / 'khor thams cad kyis yongs su bskor bas 'chi 'pho ba'i dus byed par 'gyur gyi/ shin du 'jigs pa'i gshin rje'i pho nya mthong bar mi 'gyur ro/ /yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams kyi zhing yang dag pa dang phrad de lus dang sems rab tu dga' ba dang / de la bkur sti dang bcas pas shin du dad pa skye bar 'gyur ro/ /tshe 'phos nas kyang phyir mi'i nang du skye zhing dbang po yongs su rdzogs pa dang / yan lag dang ldan pa dang / gang nas gang du skyes par sems rnam par dag cing dri ma dang bral ba dang / byad gzugs bzang ba dang / yid gzhungs pa dang / rab tu bde zhing skyid pa dang / phyir yang yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams kyi zhing yang dag pa dang phrad de de'i rjes su 'thun par slob pa dang / gnod sems yongs su spong ba dang / sdig pa mi dge ba'i chos thams cad yongs su gcod pa dang / 60.233b dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad rim gyis gzhol zhing shin du yangs pa'i ye shes kyi rgya mtsho la 'jug pa nas bla na med pa'i byang chub 'thob pa'i bar du 'gyur ro/ /sangs rgyas kyi zhing rnyog pa dang / smye ba dang / sprin dang / khug rlangs dang / rdul dang / dri ma dang / mi sdug pa dang / mi mdzes pa thams cad dang bral te/ rin po che mang pos shin du brgyan pa yid du 'ong ba dang / nga rgyal dang bral ba/ gzugs mdzes shing sdug pa/ dbang po ma nyams pa/ sems rtag tu zhi ba'i sems can dag zhing der skye ste/ byams pa dang / snying rje dang / yon tan phun sum tshogs pas brgyan par 'gyur ro/ /de bzhin gshegs pa'i tshe'i tshad kyang dpag tu med de/ sems can dag cis 'dul ba bzhin du dam pa'i chos ston to/ /yongs su mya ngan las 'das nas kyang dam pa'i chos yun ring du gnas shing sems can tshad med pa la phan pa dang bde ba'i don byed par 'gyur ro/ /rigs kyi bu 'di ni byang chub sems dpa' sems dpa' chen po gnod sems yongs su spangs pa'i 'khor lo dgu pa'o/ /byang chub sems dpa' sems dpa' chen po 'khor lo 'di dang ldan na nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod 60.234a ma yin pa yang rung chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur ro/ /theg pa chen po'i chos la gong nas gong du 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing de'i rjes su slob pa dang / rtag tu sangs rgyas thams cad mthong ba dang mi 'bral zhing / byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang / bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang smon lam rnam pa sna tshogs kyis sems mi ngoms par 'gyur te/ 'bras bu gzhan dag thob pa yang ji skad bstan pa bzhin no/ /rigs kyi bu gzhan yang byang chub sems dpa' sems dpa' chen po gang nam 'tsho'i bar du log par lta ba yongs su spangs na sems can thams cad kyis bkur zhing bla mar byed pa dang / sems rnam par dag cing log par rtog pa dang bral bar 'gyur te/ de'i dbang gis dge ba'i rtsa ba thams cad yongs su rdzogs par 'gyur ro/ /thog ma med pa'i mtha' nas rgyud lngar 'khor bar 'khor ba'i rgya mtshor 'bying ba yang log par lta ba'i dbang gis lus dang / ngag dang / yid sdig pa mi dge ba'i las bdag kyang byed la gzhan yang byed du 'dzud cing mthong ba dang thos pa'i rjes su yi rang ba las byung ba'i nyon mongs pa'i sgrib pa dang / sems can gyi sgrib pa dang chos kyi sgrib pa dang / yang dag par lta ba la sgrib pas bsgribs par gyur to/ / 60.234b 'di ltar log par lta ba yongs su spangs pa'i 'khor los lhag ma ma lus par bcom pas rnam par smin pa'i 'bras bu yongs su mi len te/ lus 'di nyid la yang lha dang mi la sogs pa kun dga' zhing yid du 'ong ba dang / dogs pa med par 'gyur ba dang / lus dang sems rab tu bde ba dang / sems rnam par dag cing log par lta ba dang bral bar 'gyur ro/ /'chi 'pho ba'i dus byed pa na yang lus dang sems la sdug bsngal gyis mi gdung zhing yid du 'ong ba'i bu dang / chung ma dang / 'khor thams cad kyis yongs su bskor bas 'chi 'pho ba'i dus byed par 'gyur gyi/ shin du 'jigs pa'i gshin rje'i pho nya mthong bar mi 'gyur ro/ /yid du 'ong ba'i dge ba'i bshes gnyen chos kyis dul ba tshul khrims dang yon tan du ldan pa/ bsod nams kyi zhing yang dag pa dang phrad de lus dang sems rab tu dga' ba dang / bkur sti dang bcas pas shin du dad pa skye bar 'gyur ro/ /tshe 'phos nas kyang phyir mi'i nang du skye zhing dbang po yongs su rdzogs pa yan lag dang ldan pa gang nas gang du skyes par sems rnam par dag cing log par lta ba dang bral ba dang / byad gzugs bzang ba dang / yid gzhungs pa dang / rab tu bde zhing skyid pa dang / phyir yang yid du 'ong ba'i dge ba'i bshes gnyen chos kyis dul ba/ tshul khrims dang yon tan du ldan pa/ bsod nams kyi zhing yang dag pa dang phrad de de'i rjes su 'thun par slob pa dang / log par lta ba'i chos yongs su spong ba dang / sdig pa mi dge ba'i chos thams cad yongs su gcod pa dang / dge ba'i chos khyad par can thams cad yongs su rdzogs pa dang / theg pa chen po'i chos kyi rnam grangs thams cad tshol ba dang / byang chub sems dpa'i smon lam dang spyod pa thams cad rim gyis gzhol zhing shin du yangs pa'i ye shes kyi rgya mtsho la 'jug pa nas bla na med pa'i byang chub 'thob pa'i bar du 'gyur ro/ /sangs rgyas kyi zhing nyan thos dang / rang sangs rgyas kyi theg pa dang bral ba dang / lha'i 60.235a bdud kyi 'khor thams cad dang bral ba dang / mu stegs can gyi 'khor thams cad dang bral ba dang / rin po che rnam pa sna tshogs kyis brgyan cing shin du mdzes pa dang / yang dag par lta ba dang ldan zhing ngo mtshar dang / bkra shis dang / tshul ngan pa'i lta ba sna tshogs dang / rtag par lta ba dang / chad par lta ba dang / bdag dang bdag gir lta ba thams cad yongs su spangs pa'i sems can dag zhing der skye ste/ shin du tshe ring ba dang / theg pa chen po'i ro gcig la longs spyod par 'gyur ba dang / de bzhin gshegs pa'i tshe'i tshad kyang dpag tu med de/ sems can dag cis 'dul ba bzhin du chos ston pa dang / yongs su mya ngan las 'das nas kyang dam pa'i chos yun ring du gnas shing / sems can tshad med pa la phan pa dang / bde ba'i don du ro gcig pa'i chos bstan pa la rtsod pa med pas yongs su rgyas par byed cing bgegs dang bar chad med par 'gyur ro/ /rigs kyi bu 'di ni byang chub sems dpa' sems dpa' chen po log par lta ba yongs su spangs pa'i 'khor lo bcu pa'o/ /byang chub sems dpa' sems dpa' chen po 'khor lo rnam pa bcu po 'di dang ldan pas nyan thos kyi theg pa la 'khrul pa med par 'gyur/ nyan thos kyi theg pa'i gang zag la 'khrul pa med par 'gyur ro/ /rang sangs rgyas kyi theg pa la 'khrul pa med par 'gyur/ rang sangs rgyas kyi theg pa'i gang zag la 'khrul pa med par 'gyur ro/ /theg pa chen po la 'khrul pa med par 'gyur/ theg pa chen po'i gang zag la 'khrul pa med par 'gyur ro/ /dkon mchog gsum gyi gdung yongs su 'phel ba dang / de bzhin gshegs pa'i bstan pa la rab tu byung ba'i nye gnas chos kyi snod dam/ chos kyi snod ma yin pa la yang rung chung ngu na chos gos kyi tshal bu gyon cing skra dang kha spu bregs pa la 'khrul pa med par 'gyur ba dang / theg pa chen po'i chos la gong nas gong du 60.235b 'phar zhing phyir mi ldog pa dang / rno ba'i shes rab dang / bsod nams kyi khyad par rtag tu skye zhing 'phel ba dang / ting nge 'dzin dang / gzungs dang / bzod pa dang / sa rnams thams cad la dbang du 'gyur zhing phyir mi ldog pa dang / rtag tu dge ba'i bshes gnyen dang phrad cing rjes su slob pa dang / rtag tu sangs rgyas thams cad mthong ba dang mi 'bral zhing / byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang / bsnyen bkur byed pa dang mi 'bral ba dang / dge ba'i rtsa ba thams cad tshol ba la brtson pas sems mi ngoms pa dang / byang chub kyi spyod pa dang / smon lam dang / pha rol du phyin pa drug la sems mi ngoms par 'gyur te/ 'bras bu gzhan 'thob pa yang ji skad bshad pa bzhin no/ /rigs kyi bu byang chub sems dpa' sems dpa' chen po gang 'khor lo rnam pa bcu po de dag dang ldan na myur du bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro/ /de ci'i phyir zhe na/ snga ma 'das pa'i de bzhin gshegs pa dgra bcom pa yang dag par rdzogs pa'i sangs rgyas thams cad kyang mi dge ba bcu'i las yongs su spangs nas thams cad kyis dge ba bcu'i las kyi lam gyi 'bras bu bsngags shing bstod de/ sems can thams cad la bde ba dang phan pa'i don dang / byang chub kyi lam skye zhing 'phel bar bya ba dang / sems can thams cad kyi las dang nyon mongs pa'i sdug bsngal lhag ma ma lus par bsal bar bya ba dang / ngan song gsum bskam par bya ba dang / dkon mchog gsum gyi gdung bsab par bya ba dang / khams gsum gyi srid pa yongs su gcad par bya ba dang / phung po dang / khams dang / skye mched gcad par bya ba dang / thams cad myur du 'jigs pa 60.236a med pa'i mya ngan las 'da' ba'i grong khyer du gzud pa'i phyir ji skad bshad pa bzhin du mi dge ba bcu'i las kyi 'bras bu yongs su spong ngo / /de bas na rigs kyi bu gal te yang dag pa ji lta ba bzhin du dge ba bcu'i las kyi lam 'di ma bsgrubs par mngon par 'tshang rgya ba 'am/ chung ngu na yang dag pa ji lta ba bzhin du dge ba bcu'i las kyi lam 'ga' tsam yang mi srung bar nga ni theg pa chen po yang dag par spyod pa'o zhe 'am/ nga ni bla na med pa yang dag par rdzogs pa'i byang chub sgrub pa'o zhes zer na/ gang zag de ni shin du brdzun par smra ba ste/ phyogs bcu'i sangs rgyas bcom ldan 'das kyi spyan sngar 'jig rten slu ba dang / 'dzem pa dang / ngo tsha ba med pa yang stong par smra zhing chad par lta ba/ glen pa mi shes pa slu ba can yin te/ de'i tshe 'phos nas ngan song du ltung bar shes par bya'o/ /rigs kyi bu gang tshig tu brjod pa tsam 'am mnyan pa tsam gyis chog ste/ dge ba bcu'i las kyi lam bsgoms pa 'am/ nan tan bya mi dgos par byang chub dang / mya ngan las 'das par thob du zin na ni bskal pa gcig la yud tsam thang cig gis phyogs bcu'i sangs rgyas kyi zhing thams cad kyi sa'i khams kyi rdul phra mo snyed kyi sems can thams cad byang chub mngon par 'tshang rgya ste/ mya ngan las 'da' bar 'gyur ba zhig na de ni de lta bu'i gnas med do/ /de ci'i phyir zhe na/ dge ba bcu'i las kyi lam ni theg pa chen po'i rtsa ba yin te/ byang chub kyi rgyu dang mya ngan las 'da' ba'i them skas lta bu'o/ /rigs kyi bu gal te sems bskyed pa tsam 'am smon lam btab pa tsam gyis chog ste/ dge ba bcu'i las kyi lam goms par nan tan bya mi dgos par byang chub dang / yongs su mya ngan las 'da' ba 'thob du zin na ni bskal pa gcig la yud tsam thang cig gis phyogs bcu'i 60.236b sangs rgyas kyi zhing thams cad sa'i khams kyi rdul phra mo snyed kyi sems can dag yang dag par rdzogs pa'i byang chub tu mngon par 'tshang rgya zhing mya ngan las 'da' bar 'gyur ba zhig na de ni de lta bu'i gnas med do/ /de ci'i phyir zhe na/ dge ba bcu'i las kyi lam ni 'jig rten dang 'jig rten las 'da' ba'i 'bras bu'i khyad par dang yon tan gyi rgyur 'gyur ro/ /rigs kyi bu gal te dge ba bcu'i las kyi lam la nan tan du ma byas na phyogs bcu'i sangs rgyas kyi zhing thams cad kyi rdul phra mo snyed kyi bskal par bdag ni theg pa chen po pa'o zhes zer te/ 'chad dam/ nyan tam/ sems bskyed dam/ smon lam btab kyang byang chub dang / mya ngan las 'da' ba 'thob par mi 'gyur la gzhan yang 'khor ba'i sdug bsngal las 'don mi nus so/ /rigs kyi bu dge ba bcu'i las kyi lam la nan tan byas pas 'jig rten na rgyal rigs dang / bram ze la sogs pa rigs chen po dang / rgyal chen ris bzhi'i lha nas 'du shes med 'du shes med min skye mched stengs kyi bar du yod pa dang / nyan thos kyi theg pa dang / rang sangs rgyas kyi theg pa dang / bla na med pa yang dag par rdzogs pa'i byang chub kyi bar du yang yod par 'gyur te/ de dag kun kyang dge ba bcu'i las kyi lam la shin du nan tan byed pa'i khyad par dang bye brag las gyur to/ /de bas na rigs kyi bu gang myur du bla na med pa yang dag par rdzogs pa'i byang chub thob par 'dod na dge ba bcu'i las kyi lam la nan tan gyi rgyan gyis brgyan te/ mi dge ba bcu'i sdom pa la mi gnas na bla na med pa yang dag par rdzogs pa'i byang chub tu mngon par 'tshang rgya'o/ /gang myur du theg pa chen po'i spyod yul du chud par 'dod dam/ myur du bla na med pa yang dag par rdzogs pa'i byang chub thob par 'dod dam/ myur du dge ba'i chos thams cad yongs su rdzogs 60.237a par 'dod na sngar dge ba bcu'i las kyi lam shin du bsrung bar bya'o/ /de ci'i phyir zhe na/ dge ba bcu'i las kyi lam gyis ni dge ba'i chos thams cad dang / yon tan rnam par gzhag pa'i gzhi dang / 'jig rten dang / 'jig rten las 'da' ba'i 'bras bu'i mchog thob par byed pa'i rgyu yin no/ /de bas na dge ba bcu'i las kyi lam la shin du nan tan bya'o/ /de nas bcom ldan 'das kyis don 'di dag gsal bar bzlas pa'i phyir tshigs su bcad de gsungs pa/ srid pa'i sdug bsngal kun gcod cing / /byang chub chen po 'thob 'dod pa/ /dge bcu'i 'khor lo'i nan tan la/ /le lo ma byed brtson par gyis/ /theg pa gsum gyi dam chos dang / /theg pa rnam gsum gang zag dang / /rab tu byung ba thams cad la/ /'khrul pa med par 'thob par 'gyur/ /theg chen spyod la dad mos shing / /thams cad 'khor gyi dbugs 'byin pa'i/ /chos mchog rtogs nas zhing dag der/ /byang chub chen po myur du 'thob/ /gal te srog gcod yongs spangs na/ /kun gyis bkur zhing bla mar byed/ /rtag tu nad med tshe yang ring / /bde zhing skyid la gnod pa med/ /skye ba'i gnas ni thams cad du/ /sangs rgyas spyod yul lam la mos/ /sangs rgyas chos dang dge 'dun mthong / /myur du bla med byang chub 'thob/ /ma byin len pa yongs spangs na/ /mkhas pas bkur zhing bla mar byed/ /'dod chags skye ba'i lam kun zhi/ /'dod chags med pa skye bar 'gyur/ /skye ba kun du longs spyod ldan/ /sbyin bdag chen por de 'gyur te/ /rin chen mang pos brgyan pa dang / /yid 'ong sangs rgyas zhing yang 'thob/ /'dod pas log g.yem yongs spangs na/ /nyon mongs dri ma zhi bar 'gyur/ /'dod chags srid pa'i mtsho yang skems/ /rnam dag sangs rgyas zhing myur 'thob/ /sems can rnam pa mang po yang / /'dod pa'i 'dam 60.237b las 'byin par 'gyur/ /theg chen la ni rab bkod nas/ /tshangs pa'i spyad pa spyod du btsud/ /brdzun du smra ba yongs spangs na/ /'phags pa'i dbang dang ye shes 'thob/ /rtag tu bden la smra bar dga'/ /brdzun du 'gyur ba'i sdug bsngal 'jil/ /tshig gcig tshad mar btsugs pas na/ /sangs rgyas chos dang dge 'dun mthong / /brdzun mi smra ba bsgoms pas na/ /byang chub chen po myur du 'thob/ /phra ma'i tshig smra yongs spangs na/ /dge ba'i chos kyi snod du 'gyur/ /sangs rgyas chos dang dge 'dun mthong / /chad par lta bar yong mi 'gyur/ /'phags pa'i chags med dga' ba dang / /rin chen gter gyi gzungs 'thob cing / /zab mo chos kyi rgya mtshor rig /myur du bla med byang chub 'thob/ /gal te zhe gcod tshig spangs te/ /'jam zhing mnyen pa'i tshig smras na/ /sems can kun gyis bkur bar 'gyur/ /snga ma'i mi dge las kyang zhi/ /'khor rnams rtag tu dga' ba dang / /byang chub sems dpa'i ston par 'gyur/ /sangs rgyas mang po'i spyod yul shes/ /sa bcu las kyang 'da' bar 'gyur/ /kyal par smra ba yongs spangs na/ /mkhas pas bkur zhing bla mar byed/ /gzhan la tshig tu smra ba kun/ /yon tan rnam lnga 'thob par 'gyur/ /rtag tu 'phags pa'i tshig nyan cing / /'phags pa'i lam tshol spro bar 'gyur/ /sangs rgyas rgya mtsho yongs rdzogs shing / /thams cad mkhyen pa myur du 'thob/ /gal te chags sems yongs spangs te/ /'phags pa rnams la mi smod cing / /ngur smrig gyon la mchod par byed/ /theg pa gsum gyi byang chub sgrub/ /rtag tu rnam dag zhing du skye/ /ston pa'i gnas su gnas par 'gyur/ /bla med theg pa la zhon te/ /rgyal ba'i ye shes myur du 'thob/ /gal te gnod sems yongs spangs te/ /gcig tu byams pa'i sems bsgoms na/ /mnyam par gzhag pa'ang myur du 60.238a 'thob/ /'phags pa'i spyod yul mos par 'gyur/ /rnam dag sangs rgyas zhing du skye/ /nyes pa'i skyon rnams kun dang bral/ /de la gnas na byang chub 'thob/ /gnod sems thams cad spang bar bya/ /ngan par lta ba yongs spangs te/ /rnam dag dad pa'i sems sgoms na/ /theg gsum ston la mos byed cing / /sangs rgyas kun la mchod pa byed/ /ngan song gsum las yongs thar te/ /'phags pa'i dge 'dun rnams dang phrad/ /byang chub sems dpa'i yon tan ldan/ /ye shes mchog kyang 'thob par 'gyur/ /dge ba bcu yi las lam gyis/ /byang chub mchog thob 'gyur zhes gsungs/ /snyoms par 'jug dang gzungs rnams dang / /sa dang bzod pa skye bar 'gyur/ /bdag nyid che ba'i 'khor lo 'dis/ /ngan song thams cad rab bcom nas/ /sdig pa'i sgrib pa kun kyang choms/ /myur du byang chub chen po thob/ /'phags pa shin du rgyas pa chen po sa'i snying po 'khor lo bcu pa zhes bya ba las dge ba bcu'i las kyi lam zhes bya ba'i le'u ste drug pa'o// // rigs kyi bu gzhan yang byang chub sems dpa' sems dpa' chen po zang zing gi sbyin pa'i go cha chen po'i 'khor lo rnam pa bcu yod de/ byang chub sems dpa' sems dpa' chen po gang 'khor lo de dang ldan na thog ma sems bskyed pa nas 'dod pa lnga yongs su bsal te/ nyan thos dang rang sangs rgyas thams cad las shin du 'das nas nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang rang sangs rgyas kyi theg pa pa thams cad kyis mchod pa dang / bsrung ba dang / bsnyen bkur byed par 'gyur ro/ /bcu gang zhe na/ 'di lta ste/ rnam pa sna tshogs kyi zas dang / skom dang / gos dang / rin po che'i rgyan dang / bal glang dang / rta dang / shing rta dang / lus kyi yan lag dang / rkang pa dang / lag pa dang / rna ba dang sna dang / mgo dang / mig dang / 60.238b rkang dang / klad pa dang / lpags pa dang / rus pa dang / sha dang / khrag dang / yul dang / srid dang / bu dang / chung ma dang / bran pho dang / bran mo dang / khang khyim dang / zhing 'brog la sogs pa de dag thams cad sbyin pa de re re byed pa na lus dang srog la mi lta zhing bdag gcig pu 'jig rten dang 'jig rten las 'das pa'i bde ba 'dod pa'i phyir sems bskyed de sbyin pa byed pa ma yin gyi/ sems can thams cad la byams pa chen po snying rje chen po'i myu gu bskyed pa'i phyir sbyin pa sbyin pa'i sems bskyed do/ /thabs mkhas pa dang shes rab mchog bskyed pa'i phyir sbyin pa sbyin pa'i sems bskyed do/ /sems can thams cad la byams pa chen po phan pa dang / bde ba'i don gyi phyir sbyin pa sbyin pa'i sems bskyed do/ /sems can thams cad kyi sdug bsngal bsal ba'i phyir sbyin pa sbyin pa'i sems bskyed do/ /gzhan las spag go snyam pa med pa'i sems dang / brlang ba med pa'i sems dang / phrag dog med pa'i sems dang / ser sna dang zhum pa med pa'i sems kyis sbyin pa sbyin no/ /gang sbyin pa'i dngos po che yang rung / chung yang rung / chung ngu na zan changs gcig tsam gyi sbyin pa byas na yang rnam par smin pa'i 'bras bu la mi re bar sbyin pa sbyin pa'i sems bskyed do/ /nyan thos kyi theg pa'i 'bras bu la mi re bar sbyin pa sbyin pa'i sems bskyed do/ /rang sangs rgyas kyi theg pa'i 'bras bu la mi re bar sbyin pa sbyin pa'i sems bskyed do/ /gang sbyin pa'i dngos po de che yang rung / chung yang rung / chung ngu na zan changs gcig tsam gyi sbyin pa byas na yang rnam pa thams cad mkhyen pa'i ye shes su bsngo zhing sbyin pa sbyin pa'i sems bskyed do/ /rigs kyi bu byang chub sems dpa' sems dpa' chen po zang zing gi sbyin pa'i go cha chen po'i 'khor lo rnam pa bcu po de dang ldan na/ thog ma sems bskyed pa na 'dod pa rnam pa lnga yongs su bsal ba'i phyir nyan thos dang / rang sangs rgyas thams cad las shin du 'das pa dang / nyan thos dang / 60.239a rang sangs rgyas thams cad kyi bsod nams chen po'i zhing du 'gyur ba dang / nyan thos dang / rang sangs rgyas kyi theg pa pa thams cad kyis mchod cing bsnyen bkur bya ba dang / yongs su bsrung bar 'gyur ro/ /de ci'i phyir zhe na/ nyan thos dang / rang sangs rgyas kyis sbyin pa sbyin pa'i sems bskyed pa ni byams pa dang / snying rje chen po'i sems med kyi bdag gi dbul ba de spong ba dang / bdag sdug bsngal las thar pa dang / bdag bde ba thob par bya ba dang / bdag mya ngan las 'da' bar bya ba'i phyir sbyin pa byed de/ sems can thams cad kyi phyir sbyin pa byed pa ni ma yin no/ /byang chub sems dpa' sems dpa' chen po sbyin pa sbyin na ni byams pa dang / snying rje chen po'i sems kyis sems can thams cad kyi dbul phongs pa spong ba dang / sems can thams cad sdug bsngal las gdon pa dang / sems can thams cad bde ba thob par byed pa dang / sems can thams cad mya ngan las bzla ba'i phyir sbyin pa byed kyi/ bdag 'ba' shig gi phyir sbyin pa spyod pa ma yin no/ /de lta bas na nyan thos dang / rang sangs rgyas thams cad las shin du 'das pa/ nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / bsnyen bkur byed cing yongs su srung bar 'gyur ro/ /byang chub sems dpa' sems dpa' chen po gang zang zing gi sbyin pa'i pha rol du phyin pa la spyod pa na 'dod pa rnam lnga'i mchog la sems mi chags te/ bdag nyid dbang ba bde ba'i yo byad thams cad sems can kun la sbyin pa byed de/ sems can thams cad yongs su sdud pa'i sems dang / bdag gi sdug bsngal thams cad la ji mi snyam pa'i bzod pa'i sems dang / sems can thams cad kyi sdug bsngal zhi bar bya ba'i sems dang / sems can thams cad la bde ba sbyin pa'i sems dang / sems can 60.239b thams cad mya ngan las bzla ba'i sems la gnas te sbyin pa byed do/ /de bas na nyan thos dang / rang sangs rgyas thams cad las shin du 'das pa/ nyan thos dang rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / bsnyen bkur dang / srung ba byed par 'gyur ro/ /rigs kyi bu gal te 'dod pa lnga la sems mi chags shing byams pa dang / snying rje chen pos sbyin pa byed na byang chub sems dpa' sems dpa' chen po zhes bya'o/ /nyan thos dang rang sangs rgyas thams cad kyi bsod nams kyi zhing yang dag pa zhes bya'o/ /gal te 'jig rten gyi 'dod pa rnam lnga yang ma spangs la byams pa dang / snying rje chen po yang med par sbyin pa byed na sbyin pa'i dngos po tshad med grangs med dpag tu med pa btang yang byang chub sems dpa' sems dpa' chen po zhes mi bya ste/ nyan thos dang / rang sangs rgyas kyi bsod nams kyi zhing yang dag pa yang ma yin pas sbyin pa 'di ni 'phags pa rnams kyi phyag rgyas btab pa ma yin no/ /de bas na 'jig rten gyi 'dod pa lnga spangs te/ byams pa dang / snying rje chen po dang ldan pas sbyin pa bya'o/ /gal te 'jig rten gyi 'dod pa lnga yang ma spangs la byams pa dang / snying rje chen po yang med par sbyin pa byed na byang chub sems dpa' zhes kyang mi bya la bsod nams kyi zhing yang dag pa yang ma yin no/ /rigs kyi bu 'dod pa rnam pa lnga la chags pas sbyin pa byed na bdag nyid kyi lus kyi sdug bsngal gyi cha chung zad kyang zhi bar mi 'gyur na sems can thams cad kyi sdug bsngal tshad med pa bsal ba lta ci smos/ de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ zang zing sbyin pa'i 'khor lo ldan pa/ /mkhas pa bsam pa dag pa'i mos pas/ / 60.240a 'dod pa rnam lnga dag ni spangs te/ /sems can kun la phan dang bde byed/ /sems can kun la bde ba'i phyir gyi/ /rnam smin 'bras bu de phyir ma yin/ /sbyin pa'i dngos po byin pa chung yang / /yang dag bsod nams zhing du de 'gyur/ /sbyin pa'i dngos po mang du byas kyang / /'dod pa rnam lnga dag la gnas na/ /'phags pa dag gi phyag rgyas ma btab/ /ma nges pa yi tshogs la gnas 'gyur/ /sbyin pa'i dngos po byin pa chung yang / /'dod pa lnga la mi gnas pa ni/ /nyan thos dag dang rang rgyal ba yi/ /yang dag bsod nams zhing du de 'gyur/ /de bas 'dod pa rnam lnga spangs la/ /rtag tu rnam dag sbyin pa byed cing / /sems can kun la bde ba byas na/ /yang dag bsod nams zhing du de 'gyur/ /rigs kyi bu gzhan yang byang chub sems dpa' sems dpa' chen pos chos kyi sbyin pa'i go cha chen po'i 'khor lo rnam pa bcu yod de/ byang chub sems dpa' sems dpa' chen po 'khor lo de dang ldan na thog ma sems bskyed nas 'dod pa rnam lnga yongs su bsal ba'i phyir myur du nyi ma'i sgron ma'i 'od ces bya ba'i ting nge 'dzin thob cing nyan thos dang / rang sangs rgyas thams cad las shin du 'das pa/ nyan thos dang / rang sangs rgyas thams cad kyi bsod nams chen po'i zhing du 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / bsrung ba dang / bsnyen bkur bya bar 'gyur ro/ /bcu gang zhe na/ 'di lta ste/ de bzhin gshegs pa rnams kyis bstan pa dam pa'i chos nyan thos kyi theg pa dang ldan pa'i dam pa'i chos dang / rang sangs rgyas kyi theg pa dang ldan pa'i dam pa'i chos dang / theg pa chen po dang ldan pa'i dam pa'i chos dang / 'jig rten gyi chos dang / 'jig rten las 'das pa'i chos dang / zag pa dang bcas pa'i chos dang / zag pa zad pa'i 60.240b chos dang / 'dus byas kyi chos dang / 'dus ma byas kyi chos dang / gnyis su med pa'i chos rnams te/ byang chub sems dpa' sems dpa' chen po chos rnam pa bcu po 'di la dad cing gus par byed pa dang / ji skad thos pa rnams ci nus su gzungs su 'dzin cing yid la byed do/ /rab tu rtog go/ /mthar khong du chud par byed cing gzhan dag la yang ci rigs par rtog par byed do/ /nam chos ston pa'i tshe na phrag dog med pa'i sems dang / ser sna med pa'i sems dang / nga rgyal med pa'i sems dang / rnyed par mi re ba'i sems dang / gzhan mi smod pa'i sems dang / bdag mi stod pa'i sems dang / sti stang dang bcas pa'i sems dang / phan pa'i sems dang / byams pa chen po'i sems dang / snying rje chen po'i sems su bya'o/ /nyan thos kyi theg pa can gyi gang zag la ni nyan thos kyi chos ston cing 'chad kyi/ de la rang sangs rgyas kyi chos sam/ theg pa chen po'i chos kyis ma yin pa dang / rang sangs rgyas kyi theg pa can gyi gang zag la ni rang sangs rgyas kyi theg pa'i chos ston gyi/ nyan thos kyi theg pa'i chos sam/ theg pa chen po'i chos kyis ma yin pa dang / theg pa chen po'i gang zag la ni theg pa chen po'i chos ston gyi/ nyan thos dang / rang sangs rgyas kyi theg pa pa'i chos kyis ma yin pa dang / sems can gyi dbang po dang / snod ji lta ba bzhin du dam pa'i chos ston gyi/ dbang po dang snod du ma gyur pa la chos mi ston to/ /gang theg pa chen po'i sems can la rang sangs rgyas kyi theg pa spyod cig par ram/ nyan thos kyi theg pa spyod cig par mi skul lo/ /rang sangs rgyas kyi theg pa can gyi sems can la skabs kha cig tu theg pa chen po'i spyod pa la nan tan byos shig ces skul ba'i skabs ni yod de/ nyan thos kyi theg pa can gyi sems can la skabs kha cig tu rang sangs rgyas 60.241a kyi theg pa'i spyod pa dang / theg pa chen po'i spyod pa la nan tan gyis shig ces skul ba'i skabs kyang yod de/ de bzhin gshegs pa'i bstan pa'i dam pa'i chos chung ngu na tshigs su bcad pa gcig gam tshigs su bcad pa phyed tsam la yang shin du dad cing bkur sti byed kyi/ de la 'phya ba 'am skur pa 'am/ bgegs sam/ bar chad mi byed de/ chos ston pa la sangs rgyas dang 'dra bar 'du shes pa dang / chos nyan pa'i 'khor rnams la nad pa dang 'dra bar 'du shes pa dang / gang 'chad pa'i chos la sman bzang po dang 'dra bar 'du shes shing 'dod pa rnam pa lnga yongs su bcad de re ba med pas dam pa'i chos ston to/ /rigs kyi bu 'di dag ni byang chub sems dpa' sems dpa' chen po'i chos kyi sbyin pa'i go cha chen po'i 'khor lo rnam pa bcu zhes bya'o/ /byang chub sems dpa' sems dpa' chen po gang 'khor lo de dang ldan na 'dod pa lnga yongs su bsal te/ myur du nyi ma'i sgron ma'i 'od ces bya ba'i ting nge 'dzin thob cing nyan thos dang rang sangs rgyas thams cad las shin du 'das pa dang / nyan thos dang / rang sangs rgyas thams cad kyi bsod nams kyi zhing du 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / bsrung ba dang / bsnyen bkur byed par 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ mkhas pa chos kyi sbyin pa spyod pa dag /snod bzhin theg pa gsum gyi chos ston to/ /theg pa gzhan dag de la ston mi byed/ /thos nas de la 'phya zhing skur mi 'gyur/ /dbang po snod bzhin dam pa'i chos ston gyi/ /dbang po snod min dag la ma yin no/ /so sor ji ltar ci la mos pa bzhin/ /de dang de yi chos ston mgu bar byed/ /theg pa chen po spyod pa'i gang zag la/ /theg pa rnam pa gnyis kyi chos mi bstan/ /bar rab theg pa gnyis 60.241b kyi gang zag la/ /theg pa 'bring dang rab kyi chos ston to/ /shin du dad cing gus pas chos mnyan gyi/ /de la 'phya zhing skur bar mi bya'o/ /chos smra ba la mchod pa byed pa ni/ /sangs rgyas 'dra bar de la 'du shes bskyed/ /kun nas nyon mongs pa yi nad bsal phyir/[ \u0f7e ]/dam pa'i chos kyi sman dag nyan par bskul/ /khe dang grags pa shin du ring spangs te/ /dam pa'i chos dag bstan cing bshad par bya/ /rigs kyi bu gzhan yang byang chub sems dpa' sems dpa' chen po'i tshul khrims rnam par dag pa'i go cha chen po'i 'khor lo yod de/ byang chub sems dpa' sems dpa' chen po gang 'khor lo de dang ldan na/ thog ma sems bskyed nas 'dod pa lnga yongs su bsal te/ nyan thos dang / rang sangs rgyas thams cad las shin du 'das pa/ nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / bsrung ba dang / bsnyen bkur bya bar 'gyur ro/ /de la ji ltar na tshul khrims rnam par dag pa go cha chen po'i 'khor lo zhe na/ rigs kyi bu byang chub sems dpa'i tshul khrims rnam par dag pa rnam pa gnyis te/ thun mong ba dang / thun mong ba ma yin no/ /de la ji ltar na byang chub sems dpa'i tshul khrims rnam par dag pa'i 'khor lo thun mong ba zhe na gang khyim na gnas pa dge bsnyen pha dang / dge bsnyen ma'i tshul khrims kyi sdom pa blangs pa 'am/ yang na rab tu byung ba so sor thar pa'i tshul khrims kyis bsnyen par rdzogs pa ste/ sdom pa 'di dang so sor thar pa'i tshul khrims 'di ni byang chub sems dpa'i tshul khrims rnam par dag pa'i 'khor lo thun mong ba ste/ nyan thos dang / rang sangs rgyas thams cad dang thun mong ba yin no/ /byang chub sems dpa' tshul khrims kyi 'khor lo rnam par dag pa 'di'i dbang gis sems can thams cad kyi kun nas nyon 60.242a mongs pa chod par ram/ log par lta ba sel bar ram/ las kyi sgrib pa dang / 'khor ba las grol bar mi 'gyur te/ go cha chen po'i 'khor lo zhes kyang mi bya/ byang chub sems dpa' sems dpa' chen po zhes kyang mi bya ste/ nyan thos dang rang sangs rgyas thams cad kyi bsod nams kyi zhing yang dag pa ma yin no/ /de la ji ltar na byang chub sems dpa'i tshul khrims rnam par dag pa go cha chen po'i 'khor lo thun mong ma yin pa zhe na/ gang byang chub sems dpa' rnams phyogs bcu'i sems can thams cad la mnyam pa nyid kyi sems dang / gnod pa med pa'i sems dang / 'khon du 'dzin pa med pa'i sems kyis rnam par dag pa'i tshul khrims srung ngo / /tshul khrims dang / tshul khrims ngan pa can dang / sbyin pa dang / ser sna dang / byams pa dang / zhe sdang dang / brtson 'grus dang / le lo can rab 'bring tha ma kun la bye brag mi 'byed pa'i sems dang / khyad par med pa'i 'du shes kyis tshul khrims yongs su srung ngo / /khams gsum gyi sems can thams cad la zhe sdang med pa dang / khong khro ba med pa dang / ngan par spyod pa med pas tshul khrims yongs su srung ngo / /srid pa gsum gyi phung po dang / khams dang / skye mched la rnam par rtog pa med pas tshul khrims yongs su srung ngo / /'dod pa'i khams la mi gnas par tshul khrims srung ngo / /gzugs yod pa'i khams la mi gnas par tshul khrims srung ngo / /gzugs med pa'i khams la mi gnas par tshul khrims srung ngo / /srid pa'i rnam par smin pa'i 'bras bu thams cad la mi gnas par tshul khrims srung ngo / /rnyed pa dang mi rnyed pa la mi gnas par tshul khrims srung ngo / /'du byed rnams la mi gnas par tshul khrims srung ste/ 'di dag ni byang chub sems dpa'i tshul khrims rnam par dag pa go cha chen po'i 'khor lo thun mong ma yin pa zhes bya'o/ /rigs kyi bu byang chub sems dpa' sems dpa' chen po gang tshul khrims rnam par dag pa 60.242b go cha chen po'i 'khor lo 'di dang ldan na thog ma sems bskyed nas 'dod pa lnga yongs su bsal te/ byang chub sems dpa' sems dpa' chen po zhes bya'o/ /nyan thos dang / rang sangs rgyas thams cad las shin du 'das shing nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur bya bar 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ khyim na gnas shing sdom pa len pa/ /rang byung so sor thar pa'i tshul khrims/ /theg pa gnyis dang thun mong yin te/ /byang chub chen po zhes ni mi bya/ /mkhas pa stong pa nyid chos sgom pa/ /'jig rten kun la mi rten mi gnas/ /srid pa kun la gnas ma yin par/ /rnam par dag pa'i tshul khrims srung ngo / /mtshan ma spong ba'i tshul khrims dag ni/ /chags pa med de zag pa kun med/ /tshul khrims 'di lta srung ba dag ni/ /yang dag bsod nams zhing zhes de bya/ /rigs kyi bu gzhan yang byang chub sems dpa' sems dpa' chen po'i bzod pa'i go cha chen po'i 'khor lo zhes bya ba yod de byang chub sams dpa' sems dpa' chen po gang 'khor lo 'di dang ldan na thog ma sems bskyed nas 'dod pa lnga yongs su bsal te/ nyan thos dang / rang sangs rgyas thams cad las shin du 'das pa/ nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / bsrung ba dang / bsnyen bkur byed par 'gyur ro/ /de la ji ltar na bzod pa'i go cha chen po'i 'khor lo zhe na/ rigs kyi bu byang chub sems dpa'i bzod pa la mtshan nyid rnam pa gnyis te/ gang zhe na 'jig rten pa dang / 'jig rten las 'das pa'o/ /de la ji ltar na byang chub sems dpa'i 'jig rten gyi 60.243a bzod pa zhe na/ de ni zag pa dang bcas pa'i bzod pa ste/ sems can la dmigs pa/ len pa dang bcas pa/ mtshan ma dang bcas pa rnam par smin pa'i 'bras bu la rten pa/ bsod nams kyi las la brten te bzod par byed pa'o/ /gzhan yang bdag gi gzugs dang / sgra dang / dri dang / ro dang / reg bya la brten nas bzod par byed pa'o/ /'jug pa dang bcas pa'i bzod pa ji mi snyam pa med pa'i bzod pa dang / mthu zhan pa'i bzod pa'i sems can gtong ba'i bzod pa dang / g.yo dang sgyur bcas pa'i bzod pa dang / pha rol la 'drid pa'i bzod pa dang / sems can la phan pa dang bde ba'i don mi byed pa'i bzod pa ste/ 'di dag ni byang chub sems dpa'i 'jig rten gyi bzod pa zhes bya ste/ bzod pa 'di ni nyan thos dang rang sangs rgyas la sogs pa dang thun mong ma yin gyi go cha chen po'i 'khor lo zhes mi bya'o/ /de la ji ltar na byang chub sems dpa' sems dpa' chen po yang ma yin te/ nyan thos dang / rang sangs rgyas thams cad kyi bsod nams kyi zhing yang dag pa zhes kyang mi bya'o/ /de la ji ltar na byang chub sems dpa'i 'jig rten las 'das pa'i bzod pa go cha chen po'i 'khor lo zhe na/ zag pa med pa'i bzod pa ste/ 'phags pa thams cad kyi chos chen po'i 'od kyis sems can thams cad la phan pa dang bde ba'i don gyi phyir chags pa med pa'i bzod pa dang / bya ba'i dngos po thams cad dang / tshig tu smra ba dang / rgyu dang / mtshan ma dang / yi ge dang / sgra skad thams cad yongs su bcad pa'i skye mched la brten pa'i bzod pa spyod do/ /bzod pa 'di bsgoms pas kun nas nyon mongs pa gsum dang / bskal pa rnam gsum dang / mtshan nyid gsum dang / dus gsum dang / srid pa gsum dang / 'du byed rnam gsum dang / mi dge ba'i rtsa ba gsum dang / chu bo bzhi dang / mdud pa rnam bzhi dang / nye bar len pa bzhi dang / lus kyi mdud pa 60.243b rnam bzhi la sogs pa yongs su bcad pas bzod pa 'di sgom pa'i tshe sems dang yid rab tu zhi bas 'di ni byang chub sems dpa'i 'jig rten las 'das pa'i go cha chen po'i 'khor lo'i bzod pa zhes bya'o/ /rigs kyi bu byang chub sems dpa' sems dpa' chen po go cha chen po'i 'khor lo'i bzod pa de dang ldan pas thog ma sems bskyed pa nas 'dod pa lnga rnams yongs su bsal ba'i phyir byang chub sems dpa' sems dpa' chen po zhes bya'o/ /nyan thos dang / rang sangs rgyas thams cad las shin du 'das shing nyan thos dang / rang sangs rgyas thams cad kyi bsod nams kyi zhing chen por 'gyur ba nyan thos dang / rang sangs rgyas kyi theg pa pa thams cad kyis mchod pa dang / bsrung ba dang / bsnyen bkur byed par 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ bzod pa la ni rnam pa gnyis te/ /mtshan mar bcas dang mtshan ma med pa/ /mtshan mar bcas pa'i bzod pa chags yod/ /mkhas pa dag ni de la mi bstod/ /'du byed rnam gsum phung po khams dang / /skye mched la rten bzod pa sgom pa/ /de ni zag bcas bzod pa yin te/ /byang chub sems dpa' chen po ma yin/ /phyin ci log ni rnam bzhi bsal nas/ /chags pa med pa'i bzod pa sgom zhing / /'du byed rnam pa gsum dag zhi na/ /bzod pa 'di la thams cad bstod 'gyur/ /'du byed thams cad rab tu zhi zhing / /rtog pa thams cad yongs su spangs te/ /sems ni nam mkha' 'dra bar mnyam pa/ /bzod pa 'di la thams cad bstod 'gyur/ /thams cad chos la ro gcig 'thun par/ /stong pa mtshan ma med pa zhi ba/ /sems ni ci la 'ang mi gnas mi chags/ /bzod pa 'di ni phan don cher 'gyur/ /rigs kyi bu gzhan yang byang chub sems dpa' sems dpa' chen po'i 60.244a brtson 'grus kyi go cha chen po'i 'khor lo yod de/ byang chub sems dpa' sems dpa' chen po gang 'khor lo de dang ldan na thog ma sems bskyed pa nas 'dod pa lnga yongs su bsal te/ nyan thos dang / rang sangs rgyas thams cad las shin du 'das pa nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang rang sangs rgyas kyi theg pa pa thams cad kyis mchod pa dang / srung ba dang / bsnyen bkur byad par 'gyur ro/ /de la ji ltar na brtson 'grus kyi go cha chen po'i 'khor lo zhe na/ rigs kyi bu byang chub sems dpa'i brtson 'grus la rnam pa gnyis te/ 'jig rten pa dang / 'jig rten las 'das pa'o/ /de la ji ltar na byang chub sems dpa'i 'jig rten pa'i brtson 'grus zhe na/ byang chub sems dpa' rnams shin du 'bad pa'i brtson 'grus kyis 'jig rten gyi bsod nams kyi las kyi dngos po rnam pa gsum la nan tan byed do/ /bsod nams gang zhe na/ 'di lta ste/ sbyin pa byed pa'i bsod nams kyi las dang / tshul khrims srung ba'i bsod nams byed pa'i las dang / bsgom pa'i bsod nams byed pa'i las so/ /las 'di dag byed pa ni brtson 'grus rnam pa gsum zhes bya ste/ brtson 'grus rnam pa gsum po 'di dag ni sems can la dmigs pa zag pa dang bcas pa/ nye bar len pa dang bcas pa/ rnam par smin pa'i 'bras bu la brten pa bsod nams kyi las la brten pa ste/ de ni byang chub sems dpa'i 'jig rten gyi brtson 'grus zhes bya'o/ /brtson 'grus 'di ni nyan thos dang / rang sangs rgyas kyi theg pa la sogs pa dang thun mong yin te/ go cha chen po'i 'khor lo zhes mi bya/ byang chub sems dpa' sems dpa' chen po zhes kyang mi bya ste/ nyan thos dang / rang sangs rgyas thams cad kyi bsod nams kyi zhing yang dag pa yang ma yin no/ / 60.244b de la ji ltar na byang chub sems dpa'i 'jig rten las 'das pa'i brtson 'grus kyi go cha chen po'i 'khor lo zhe na/ byang chub sems dpa' dag shin du 'bad pa'i brtson 'grus kyis sems can thams cad la mnyam pa'i sems kyis nyon mongs pa'i las dang sdug bsngal thams cad sel ba ste/ brtson 'grus 'di ni 'phags pa thams cad kyis bsngags pa/ zag pa med pa/ nye bar len pa med pa/ rten dang gnas med de/ brtson 'grus dang / le lo dang / sbyin pa dang / ser sna dang / tshul khrims dang / ngan pa'i tshul khrims can dang / byams pa dang / zhe sdang dang / sems can rab dang / 'bring dang / tha ma kun la mi 'byed pa'i sems dang / bye brag med pa'i 'du shes kyis shin du 'bad pa'i brtson 'grus rtsom mo/ /khams gsum gyi sems can thams cad la mnyam pa nyid dang / dmigs pa med pas bya ba'i las byed de smra ba dang / rtog pa dang / dpyod pa'i gnas thams cad la mi gnas pa'i sems kyis shin du 'bad pa'i brtson 'grus rtsom mo/ /srid pa gsum gyi phung po dang / khams dang / skye mched la rnam par rtog pa med pas shin du 'bad pa'i brtson 'grus rtsom ste/ 'dod pa'i khams la mi gnas pa'i 'bad pa'i brtson 'grus dang / gzugs yod pa'i khams la mi gnas pa'i 'bad pa'i brtson 'grus dang / gzugs med pa'i khams la mi gnas pa'i 'bad pa'i brtson 'grus dang / srid pa'i rnam par smin pa'i 'bras bu thams cad la mi rtog pa'i 'bad pa'i brtson 'grus dang / rnyed pa dang ma rnyed pa kun la mi gnas pa'i 'bad pa'i brtson 'grus dang / 'du byed rnams la mi gnas 60.245a pa'i 'bad pa'i brtson 'grus dang / 'jig rten gyi bsod nams kyi las kyi dngos po gsum la mi gnas pa'i 'bad pa'i brtson 'grus dang / 'jig rten las 'das pa dang ldan pa'i bsod nams kyi las kyi dngos po rnam pa gsum la mi gnas pa'i 'bad pa'i brtson 'grus dang / 'jig rten las 'das pa dang ldan pa'i bsod nams kyi las kyi dngos po rnam pa gsum la shin du brtson 'grus rtsom pa ste/ 'di ni byang chub sems dpa'i 'jig rten las 'das pa'i brtson 'grus kyi go cha chen po'i 'khor lo zhes bya'o/ /rigs kyi bu byang chub sems dpa' sems dpa' chen po'i gang brtson 'grus kyi go cha chen po'i 'khor lo de dang ldan na thog ma sems bskyed pa nas 'dod pa rnam lnga yongs su bsal te/ byang chub sems dpa' sems dpa' chen po zhes bya'o/ /nyan thos dang / rang sangs rgyas thams cad las shin du 'das te/ nyan thos dang / rang sangs rgyas thams cad kyi bsod nams kyi zhing du 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur byed par 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ dbang po drug la shin du chags pa'i/ /bus pa chu bo lngas ni khyer ba/ /shin du 'bad pa'i brtson 'grus rtsom yang / /mkhas pa rnams kyis de la smod 'gyur/ /sems can dmigs shing zag dang bcas la/ /len par bcas shing brtson 'grus rtsom na/ /yang dag bsod nams zhing ma yin te/ /byang chub sems dpa' chen po ma yin/ /mkhas pa brtson 'grus rtsom pa dag ni/ /chags pa thams cad ring du spangs te/ /sems ni ci la 'ang mi gnas mi chags/ /yang dag bsod nams zhing zhes de bya/ /ming dang gzugs la chags pa med cing / /phung po 60.245b khams dang skye mched spangs te/ /thams cad 'khor gyi rten du 'gyur ba/ /de ni byang chub sems dpa' chen po/ /'jig rten spyod kyang chu zla bzhin te/ /'bad pa'i brtson 'grus rtsom pa'i mthar phyin/ /'khor lo 'di yis yongs su bcom pa/ /skye bo kun nas nyon mongs bcings pa'o/ /rigs kyi bu gzhan yang byang chub sems dpa' sems dpa' chen po'i bsam gtan gyi go cha chen po'i 'khor lo yod de/ byang chub sems dpa' sems dpa' chen po gang 'khor lo 'di dang ldan na thog ma sems bskyed pa nas 'dod pa lnga yongs su bsal te/ nyan thos dang / rang sangs rgyas thams cad las shin du 'das nas nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur byed par 'gyur ro/ /de la ji ltar na bsam gtan gyi go cha chen po'i 'khor lo zhe na/ rigs kyi bu byang chub sems dpa'i bsam gtan la rnam pa gnyis te/ 'jig rten dang / 'jig rten las 'das pa'o/ /de la ji ltar na byang chub sems dpa'i 'jig rten gyi bsam gtan zhe na/ byang chub sems dpa' rnams phung po la gnas nas bsam gtan sgom pa dang / khams la gnas nas bsam gtan sgom pa dang / skye mched la gnas nas bsam gtan sgom pa dang / 'dod pa'i khams la gnas nas bsam gtan sgom pa dang / gzugs yod pa'i khams la gnas nas bsam gtan sgom pa dang / gzugs med pa'i khams la gnas nas bsam gtan sgom pa dang / sdom pa gsum la gnas nas bsam gtan sgom pa dang / rnam par grol ba gsum la gnas nas bsam gtan sgom pa dang / dran pa nye bar gzhag pa bzhi la gnas nas bsam gtan sgom pa dang / yang dag par spong ba bzhi la gnas 60.246a nas bsam gtan sgom pa dang / rdzu 'phrul gyi rkang pa bzhi la gnas nas bsam gtan sgom pa dang / dbang po lnga la gnas nas bsam gtan sgom pa dang / stobs lnga la gnas nas bsam gtan sgom pa dang / byang chub kyi yan lag bdun la gnas nas bsam gtan sgom pa dang / 'phags pa'i lam yan lag brgyad pa la gnas nas bsam gtan sgom pa dang / sa'i khams la gnas nas bsam gtan sgom pa dang / chu'i khams la gnas nas bsam gtan sgom pa dang / me'i khams la gnas nas bsam gtan sgom pa dang / rlung gi khams la gnas nas bsam gtan sgom pa dang / nam mkha'i khams la gnas nas bsam gtan sgom pa dang / rnam par shes pa'i khams la gnas nas bsam gtan sgom pa dang / bde ba'i tshor ba la gnas nas bsam gtan sgom pa dang / sdug bsngal ba'i tshor ba la gnas nas bsam gtan sgom pa dang / bde ba yang ma yin sdug bsngal ba yang ma yin pa'i tshor ba la gnas nas bsam gtan sgom pa dang / nam mkha' mtha' yas skye mched la gnas nas bsam gtan sgom pa dang / rnam shes mtha' yas skye mched la gnas nas bsam gtan sgom pa dang / cung zad med pa'i skye mched la gnas nas bsam gtan sgom pa dang / 'du shes med 'du shes med min skye mched la gnas nas bsam gtan sgom pa dang / 'jig rten 'di la gnas nas sgom pa dang / 'jig rten pha rol la gnas nas bsam gtan sgom pa dang / 'du shes chung ngu la gnas nas bsam gtan sgom pa dang / 'du shes chen po la gnas nas bsam gtan sgom pa dang / 'du shes tshad med pa la gnas nas bsam gtan sgom pa ste/ bsam gtan de dag ni zag pa dang bcas pa/ nye bar len pa dang bcas pa/ chags pa dang bcas pa ste/ 'di ni byang chub 60.246b sems dpa'i 'jig rten dang bcas pa'i bsam gtan zhes bya'o/ /bsam gtan 'di ni nyan thos dang / rang sangs rgyas kyi theg pa dang thun mong ba zhes bya ste/ go cha chen po'i 'khor lo ma yin byang chub sems dpa' sems dpa' chen po zhes mi bya ste/ nyan thos dang / rang sangs rgyas thams cad kyi bsod nams kyi zhing yang dag par ma yin no/ /de la ji ltar na byang chub sems dpa'i 'jig rten las 'das pa'i bsam gtan gang zhe na/ 'di lta ste/ byang chub sems dpa' rnams phung po dang bral bar bsam gtan sgom pa dang / khams dang bral bar bsam gtan sgom pa dang / skye mched dang bral bar bsam gtan sgom pa dang / 'dod pa'i khams dang bral bar bsam gtan sgom pa dang / gzugs kyi khams dang bral bar bsam gtan sgom pa dang / gzugs med pa'i khams dang bral bar bsam gtan sgom pa dang / sdom pa gsum dang bral bar bsam gtan sgom pa dang / rnam par thar pa gsum dang bral bar bsam gtan sgom pa dang / dran pa nye bar gzhag pa bzhi dang bral bar bsam gtan sgom pa dang / yang dag par spong ba bzhi dang bral bar bsam gtan sgom pa dang / rdzu 'phrul gyi rkang pa bzhi dang bral bar bsam gtan sgom pa dang / dbang po lnga dang bral bar bsam gtan sgom pa dang / stobs lnga dang bral bar bsam gtan sgom pa dang / byang chub kyi yan lag bdun dang bral bar bsam gtan sgom pa dang / 'phags pa'i lam yan lag brgyad pa dang bral bar bsam gtan sgom pa dang / sa'i khams dang bral bar bsam gtan sgom pa dang / chu'i khams dang bral bar bsam gtan sgom pa dang / me'i khams dang bral bar bsam gtan sgom pa dang / rlung gi khams dang bral bar bsam gtan sgom pa dang / nam mkha'i 60.247a khams dang bral bar bsam gtan sgom pa dang / rnam par shes pa'i khams dang bral bar bsam gtan sgom pa dang / bde bar tshor ba dang bral bar bsam gtan sgom pa dang / sdug bsngal du tshor ba dang bral bar bsam gtan sgom pa dang / sdug bsngal ba yang ma yin bde ba yang ma yin par tshor ba dang bral bar bsam gtan sgom pa dang / nam mkha' mtha' yas skye mched dang bral bar bsam gtan sgom pa dang / rnam shes mtha' yas skye mched dang bral bar bsam gtan sgom pa dang / chung zad med pa'i skye mched dang bral bar bsam gtan sgom pa dang / 'du shes med 'du shes med min skye mched dang bral bar bsam gtan sgom pa dang / 'jig rten 'di dang bral bar bsam gtan sgom pa dang / 'jig rten pha rol dang bral bar bsam gtan sgom pa dang / 'du shes chung ngu dang bral bar bsam gtan sgom pa dang / 'du shes chen po dang bral bar bsam gtan sgom pa dang / 'du shes tshad med pa dang bral bar bsam gtan sgom pa ste/ bsam gtan 'di ni 'phags pa'i 'od zer chen po bskyed pa/ zag pa med pa/ nye bar len pa med pa/ chags pa med pa ste/ 'di ni byang chub sems dpa'i 'jig rten las 'das pa'i bsam gtan gyi go cha chen po'i 'khor lo zhes bya'o/ /rigs kyi bu byang chub sems dpa' sems dpa' chen po gang bsam gtan gyi go cha chen po'i 'khor lo 'di dang ldan na thog ma sems bskyed pa nas 'dod pa lnga yongs su bsal te/ byang chub sems dpa' sems dpa' chen po zhes bya'o/ /nyan thos dang / rang sangs rgyas thams cad las shin du 'das shing nyan thos dang / rang sangs rgyas thams cad kyi bsod nams kyi zhing du 'gyur ba dang / nyan thos dang / rang sangs rgyas kyi theg 60.247b pa pa thams cad kyis mchod pa dang / bsrung ba dang / bsnyen bkur byed par 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ bdag gi khur lci spong ba'i phyir ni/ /dmigs dang bcas pa'i ting 'dzin bsgoms te/ /bdag gi kun nas nyon mongs gcod 'dod/ /yang dag mkhas pa'i mtshan nyid ma yin/ /snod la rten cing rtog dang bcas pa/ /rnam par grol 'dod ting 'dzin sgom yang / /tshu rol pha rol mu la gnas na/ /sems can dag la phan don byed min/ /sems can kun la phan dang bde phyir/ /ting 'dzin sgom zhing khur lci spongs te/ /kun nas nyon mongs thams cad sel ba/ /de ni yang dag mkhas pa'i mtshan nyid/ /sems can thams cad sim par byed phyir/ /mi gnas pa yi ting 'dzin sgom ste/ /'dod pa'i srid pa thams cad chod pa/ /de ni blo gros chen po zhes bya/ /srid pas bcings pa thams cad bkrol te/ /'jigs pa med pa'i grong du bzung phyir/ /rab tu zhi ba'i ting 'dzin sgom pa/ /de ni byang chub sems dpa' chen po'o/ / bam po bcu pa ste tha ma/ rigs kyi bu gzhan yang byang chub sems dpa' sems dpa' chen po shes rab kyi go cha chen po'i 'khor lo zhes bya ba yod de/ byang chub sems dpa' sems dpa' chen po gang 'khor lo de dang ldan na thog ma sems bskyed pa nas 'dod pa lnga yongs su bsal te/ nyan thos dang / rang sangs rgyas thams cad las shin du 'das shing nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur byed par 'gyur ro/ /de la ji ltar na shes rab kyi go cha chen po'i 'khor lo zhe na/ rigs kyi bu byang chub sems dpa'i shes rab la ni rnam pa gnyis te/ 'jig rten gyi dang 60.248a 'jig rten las 'das pa'o/ /de la ji ltar na byang chub sems dpa'i 'jig rten pa'i shes rab ce na/ 'di lta ste/ byang chub sems dpa' rnams theg pa gsum gyi dam pa'i chos klog pa dang / 'don pa dang / glegs bam du 'dri ba dang / nyan pa dang / pha rol la ston cing 'chad pa 'ba' shig la rten te/ sems can thams cad kyi ma rig pa'i mun pa sel bar 'dod pa dang sems can thams cad kyi shes rab kyi sgron ma 'byung ba'i phyir de bzhin gshegs pa'i bstan pa'i nyan thos kyi theg pa dang ldan pa'i chos la shin du 'bad pa'i brtson 'grus kyis klog pa dang / 'don pa dang / nyan pa dang / glegs bam du 'dri ba dang / gzhan dag la rgyas par ston cing 'chad pa dang / yang dag pa'i brtson 'grus kyis nan tan byed pa dang / de bzhin gshegs pas bstan pa'i rang sangs rgyas kyi theg pa dang ldan pa'i chos la klog pa dang / 'don pa dang / nyan pa dang / glegs bam du 'dri ba dang / gzhan dag la rgyas par ston cing 'chad pa dang / yang dag pa'i brtson 'grus kyis nan tan du spyod do/ /de bzhin gshegs pas bstan pa'i theg pa chen po dang ldan pa'i chos la brtson 'grus su klog pa dang / 'don pa dang / nyan pa dang / glegs bam du 'dri ba dang / gzhan la yang rgyas par ston cing 'chad pa dang / yang dag pa'i brtson 'grus kyis nan tan byed pa ste/ 'phags pa'i zag pa med pa'i lam gyi yan lag tshol ba ma yin/ 'phags pa'i lam tshol ba ma yin/ 'phags pa'i lam du gtogs pa'i rnam par grol ba tshol ba ma yin/ rab tu zhi ba yang dag pa'i shes rab la nan tan byed pa ma yin te/ rtag tu lta ba dang bcas pa/ shes rab dang bcas pa'i shes rab la nan tan byed do/ /de ltar len pa dang bcas pa/ chags pa dang bcas pa'i shes rab ni byang chub sems dpa'i 'jig rten gyi shes rab ces bya'o/ /shes rab de ni nyan thos dang / rang sangs 60.248b rgyas thams cad dang thun mong ba yin te/ go cha chen po'i 'khor lo zhes mi bya/ de la byang chub sems dpa' sems dpa' chen po zhes kyang mi bya ste/ nyan thos dang / rang sangs rgyas thams cad kyi bsod nams kyi zhing yang dag pa ma yin no/ /de la ji ltar na byang chub sems dpa'i 'jig rten las 'das pa'i shes rab ce na/ 'di lta ste/ byang chub sems dpa' rnams byang chub kyi lam la brtson 'grus su nan tan byed pa ni ci nus su theg pa gsum gyi yang dag pa'i chos la klog pa dang / 'don pa dang / nyan pa dang / glegs bam du 'bri ba dang / gzhan dag la rgyas par ston cing 'chad kyang de la dmigs su med pa'i sbyor ba la gnas te/ mi g.yo ba dang / mi rtog pa dang / ngo bo nyid med pa dang / nam mkha' lta bu'i sems dang / rab tu zhi ba'i sems dang / 'phel ba dang / 'grib pa med pa'i shes rab dang / chags pa med pa'i sems dang / skye ba dang 'gog pa med pa'i sems dang / phyir mi ldog pa'i sems dang / chos mnyam pa nyid gyi sems dang / de bzhin nyid kyi sems dang / yang dag pa'i mtha'i sems dang / chos kyi dbyings kyi sems dang / bdag med pa'i sems dang / rnam par mi rtog pa'i sems dang / rab tu zhi ba dang / bzod pa dang / rtog pa dang bral ba'i sems kyis grub pa dang / 'jigs pa med pa'i sa la shin du thabs mkhas pas bde bar gnas pa dang / mi gnas pa mi chags pa'i mchog dam pa'i blo gros kyi sa la thabs mkhas pas bde bar gnas pa ste/ shes rab 'di ni len pa med pa chags pa med pas byang chub sems dpa'i 'jig rten las 'das pa'i shes rab kyi go cha chen po'i 'khor lo zhes bya'o/ /rigs kyi bu byang chub sems dpa' sems dpa' chen po shes rab kyi go cha chen po'i 'khor 60.249a lo 'di dang ldan na thog ma sems bskyed nas 'dod pa lnga yongs su bsal ba'i phyir byang chub sems dpa' sems dpa' chen po zhes bya'o/ /nyan thos dang / rang sangs rgyas kyi sa las shin du 'das shing nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas thams cad kyi mchod pa dang / srung ba dang / bsnyan bkur bya ba'o/ /rigs kyi bu gzhan yang byang chub sems dpa' sems dpa' chen po'i thabs mkhas pa'i go cha chen po'i 'khor lo yod de/ byang chub sems dpa' sems dpa' chen po gang 'khor lo 'di dang ldan na thog ma sems bskyed nas 'dod pa lnga yongs su bsal te/ nyan thos dang rang sangs rgyas thams cad las shin du 'das nas nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur byed par 'gyur ro/ /de la ji ltar na thabs mkhas pa'i go cha chen po'i 'khor lo zhe na/ rigs kyi bu byang chub sems dpa'i thabs mkhas pa la rnam pa gnyis te/ 'jig rten pa dang / 'jig rten las 'das pa'o/ /de la ji ltar na byang chub sems dpa'i 'jig rten pa'i thabs mkhas pa yin zhe na/ 'di lta sta/ byang chub sems dpa' rnams bdag gi don nam gzhan gyi don nam/ gnyi ga'i don la bdag dang gzhan du rtog cing bzo dang sgyu rtsal rnam pa sna tshogs kyis bdag dang gzhan gyi don yongs su bsgrub pa'i phyir sangs rgyas bcom ldan 'das dang / byang chub sems dpa' dang / rang sangs rgyas dang / nyan thos la mchod pa dang / bsnyen bkur byed pa dang / pha dang / ma dang / nad pa dang / nyam thag pa dang / mgon dang rten med pa dang / gnod pa mang pos sdug 60.249b bsngal bar gyur pa mthong na shin du thabs mkhas pas sgrol zhing bsdu ba'i dngos po rnams zhes sems can yongs su smin par byed do/ /byang chub sems dpa' de bdag theg pa chen po la gnas pas nyan thos kyi theg pa pa dang / rang sangs rgyas kyi theg pa pa dang / theg pa chen po'i snod ma yin pa nyan thos dang / rang sangs rgyas kyi dbang po yongs su ma smin pa la shin du phra la zab pa dam pa'i chos ston te/ slob tu gzhug pa dang / 'phags pa'i bsam gtan la nan tan du byed du gzhug go/ /gzhan yang don dam pa'i bden pa bsten te nan tan byed du gzhug pa dang / phyin ci log bzhi las bzla zhing mi ltung ba'i chos kyi mtshan nyid rig par bya ba dang / so so yang dag par rig pa bzhi la gzhol bar bya ba nas/ gzhan yang dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / lhag ma dang bcas pa dang / lhag ma ma lus pa'i lam dang lam gyi 'bras bu'i bar du 'jug par bya ba la mkhas pa'i ye shes kyis yongs su smin par byed do/ /sems can gang khe dang / grags pa dang / longs spyod la chags te dbang po rgod pa/ dge ba'i rtsa ba yongs su ma smin pa la ni mdo sde dang / 'dul ba dang / ma mo klog pa dang / 'don pa byed du gzhug pa dang / sangs rgyas gzhan gyis bshad pa las gzhan pa rnam par grol ba dang 'thun pa'i gtsug lag klog cing 'don du bcug ste yongs su smin par byed do/ /sems can gang sbyin pa byed pa la mi mos pa la ni nor rin po che dang / nor dbyig rnam pa sna tshogs gtong bar skul bas yongs su smin par byed do/ /sems can gang gtum pa mi nges pa'i rang bzhin can tshangs pa'i gnas bzhi slob tu skul 60.250a ba dang sems can gang zhe sdang can la bzod pa slob par skul ba dang / sems can gang le lo can la ni brtson 'grus slob tu skul ba dang / sems can gang sems g.yeng ba la ni bsam gtan sgom par skul ba dang / sems can gang 'chal ba'i shes rab can la ni yang dag pa'i chos ston pas bka' lung brda sprod cing lung 'bogs pa la thabs mkhas pas yongs su smin par byed do/ /sems can gang dkon mchog gsum la mngon par ma dad cing mi gnas pa dang / mi spyod pa can la ni dkon mchog gsum la skyabs su 'gro ba dang / dkon mchog gsum la dad pa dang / dge bsnyen ma'i sdom pa bslabs pas yongs su smin par byed do/ /gzhan yang bzo dang sgyu rtsal rnam pa sna tshogs kyi gnas la slob cing spyod du btsud pas yongs su smin par byed do/ /de la sogs pa byang chub sems dpa' sems dpa' chen po 'jig rten pa'i shin du thabs mkhas pa'i ye shes kyi rnam pa ni chu klung gang gA'i bye ma snyed pas mang ngo / /de ltar yi ge dang / gtsug lag dang / bzo dang / sgyu rtsal gyi las kyi gnas thams cad la lhag pa'i spyod pa dang / brtson 'grus dang / thabs mkhas pa'i ye shes kyis mu stegs can dang / ston pa gzhan la zhugs pa thams cad btul ba de ni byang chub sems dpa'i 'jig rten pa'i thabs mkhas pa'o/ /thabs mkhas pa 'di ni nyan thos dang / rang sangs rgyas thams cad dang thun mong ba yin te/ sangs rgyas kyi chos thams cad gnas pa'i rgyur gyur pa/ thabs mkhas pa spyod pa'i gnas su gyur pa dge bsnyen pa'i sdom pa la bslab pa dang / shin du thabs mkhas pa lhun gyis grub pas rtog pa med pa'i phyir ldog pa med pa'i chos su gyur pa'o/ /gzhan yang rigs kyi bu byang chub sems dpa' gang ston pa mkhas pa la 'ang mi rten/ dge ba'i bshes gnyen la 'ang mi ltos par 'jig rten gyi thabs mkhas 60.250b pa la nan tan byed na/ byang chub sems dpa' de ni 'jig rten gyi thabs mkhas pas rmongs pa yin te/ ngan song du ltung bar 'gyur ro/ /de ni 'jig rten las 'das pa'i shin du thabs mkhas pa'i ye shes la gzhol zhing gnas par yang mi nus la/ thams cad kyi bsod nams kyi zhing yang dag pa ma yin no/ /shin du thabs mi mkhas pas sems can gyi dbang po dang / spyod pa'i khyad par yang mi shes la/ shin du thabs mkhas pa la 'ang rmongs par gyur pas nyan thos kyi theg pa dang / rang sangs rgyas kyi theg pa dang / theg pa chen po'i snod ma yin pa dang / theg pa chen po'i dbang por ma smin pa dag la theg pa chen po ston pa dang / slob cing nan tan byed du bcug go/ /gang theg pa chen po'i chos kyi snod du gyur pa'i sems can la ni nyan thos dang / rang sangs rgyas kyi theg pa'i chos ston cing / nyan thos dang / rang sangs rgyas kyi theg pa la slob cing nan tan byed du bcug go/ /gang sangs rgyas kyi theg pa'i chos kyi snod du gyur pa'i sems can la ni nyan thos kyi theg pa'i chos ston cing / nyan thos kyi theg pa la slob cing nan tan byed du bcug go/ /gang nyan thos kyi theg pa'i chos kyi snod du gyur pa'i sems can la ni 'khor ba'i chos la ni bde ba dang dga' bar ston te/ 'khor ba'i chos la skyo ba skyed par mi ston to/ /gzhan yang shin du thabs mkhas pa la rmongs pas sems can gang srog gcod pa la dga' ba nas de bzhin du log par lta ba'i bar du mos pa dag la ni shin du zab pa theg pa chen po'i chos ston te/ de la 'khor ba 'di nas shi 'phos nas pha rol du skye zhing sdug bsngal gyi 'bras bu rnam par smin pa myong ba la skyo zhing 'jigs pa dang / sdig pa mi dge ba'i chos spang ba mi ston to/ /gzhan yang shin du thabs mkhas pa la rmongs pas sems can gang tshul khrims srung bar mos pa la ni sbyin 60.251a pa spyod du 'jug go/ /sems can gang bzod pa sgom par mos pa la ni bzod pa spong ba ston cing tshul khrims srung du 'jug go/ /sems can gang brtson 'grus sgom par mos pa la ni brtson 'grus spong ba ston cing bzod pa spyod du 'jug go/ /sems can gang bsam gtan sgom par mos pa la ni bsam gtan spong ba ston cing brtson 'grus la nan tan byed du bcug go/ /sems can gang shes rab sgom par mos pa la ni shes rab spong ba ston cing bsam gtan sgom du 'jug go/ /de ltar byang chub sems dpa' 'jig rten gyi thabs mkhas pa la rmongs pas yang dag pa ji lta ba bzhin du sems can la phan pa dang bde ba'i don byed mi nus te/ sems can thams cad kyi sdig pa'i grogs por gyur to/ /thabs mkhas pa 'di ni dmigs pa dang bcas pa chags pa dang bcas pa ste/ 'di ni byang chub sems dpa'i 'jig rten gyi thabs mkhas pa zhes bya'o/ /de ltar 'jig rten gyi thabs mkhas pa 'di ni nyan thos dang / rang sangs rgyas kyi theg pa dang thun mong pa yin te/ go cha chen po'i 'khor lo ma yin/ byang chub sems dpa' sems dpa' chen po zhes kyang mi bya ste/ nyan thos dang / rang sangs rgyas thams cad kyi bsod nams kyi zhing yang dag pa ma yin no/ /de la ji ltar na byang chub sems dpa' 'jig rten las 'das pa'i shin du thabs mkhas pa yin zhe na/ 'di lta ste/ byang chub sems dpa' rnams bdag gi don btang ste/ gzhan gyi don lhur byed pas bzo dang sgyu rtsal rnam pa sna tshogs mngon par ston pas yongs su smin par bya ba'i phyir sangs rgyas bcom ldan 'das dang / byang chub sems dpa' dang / nyan thos dang / rang sangs rgyas dang / pha dang ma la bsnyen bkur dang / mchod pa byed pa dang / nad pa dang / phongs pa nyam thag pa dang / mgon 60.251b dang skyabs med pa dang / shin du sdug bsngal rnam pa mang pos gzir ba la thabs kyis sgrol ba dang / bsdu ba'i dngos po rnam pa bzhis sems can yongs su smin par byed do/ /ci la mos pa dang / dbang po dang / snod ji lta ba bzhin du sems can la dam pa'i chos ston to/ /gzhan yang rim gyis nyan thos kyi theg pa pa ni rang sangs rgyas kyi theg pa la slob cing nan tan byed par skul ba dang / rang sangs rgyas kyi theg pa pa ni theg pa chen po slob cing nan tan byed par skul ba dang / gal te nyan thos dang / rang sangs rgyas kyi theg par dbang po ma smin pa ni 'khor ba'i sdug bsngal gyi chos kyis skyo ba ston cing 'khor bas skyo ba dang / mya ngan las 'da' ba tshol bar skul lo/ /sems can gang srog gcod pa la mos pa nas log par lta ba'i bar du chags pa la ni dbang po dang / rang bzhin ji lta ba bzhin du 'khor bar 'khor ba'i chos ston pa dang / 'jig rten 'di nas pha rol du skye ba dang / pha rol kyi sdug bsngal gyi 'bras bu myong bar ston te/ sdig pa mi dge ba'i chos kyis 'jigs pa dang skyo ba ston to/ /kha cig la ni nyan thos kyi theg pa dang ldan pa'i chos ston to/ /kha cig la ni rang sangs rgyas kyi theg pa dang ldan pa'i chos ston to/ /kha cig la ni bla na med pa'i theg pa'i chos yang dag par bstan te khad kyis slob tu 'jug go/ /sems can gang sbyin pa la mos par gyur pa rnams la ni tshul khrims rnam par dag pa'i mchog srung bar bstan pa de bzhin du rgyas par sems can gang bsam gtan la mos par gyur pa la ni zag pa med pa 'phags pa'i lam gyi mchog gis bsdus pa dang / shes rab bla na med pa ston cing nan tan byed du bcug ste/ shin du thabs mkhas pa 'di ni dmigs pa med pa dang / chags pa med pa ste/ 60.252a 'di ni byang chub sems dpa'i 'jig rten las 'das pa'i thabs mkhas pa'i go cha chen po'i 'khor lo zhes bya'o/ /rigs kyi bu byang chub sems dpa' sems dpa' chen po gang shin du thabs mkhas pa'i go cha chen po'i 'khor lo 'di dang ldan na thog ma sems bskyed nas 'dod pa rnam pa lnga yongs su bsal bas byang chub sems dpa' sems dpa' chen po zhes bya'o/ /nyan thos dang / rang sangs rgyas thams cad las shin du 'das shing nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur bya ba'o/ /de nas bcom ldan 'das kyis don de dag gsal bar bzlas pa'i phyir tshigs su bcad de bka' stsal pa/ shes rab nan tan rnam gnyis te/ /'jig rten bcas dang 'jig rten 'das/ /chags pa de ni 'jig rten bcas/ /chags med pa ni 'jig rten 'das/ /shin du thabs mkhas nan tan ni/ /khyad par rnam pa gnyis la gnas/ /dmigs pa yod pa 'jig rten bcas/ /dmigs med de ni 'jig rten 'das/ /gang zhig theg pa gcig ston pa/ /de ni legs par chos ston min/ /bdag kyang yongs su mi smin na/ /gzhan gyi don du ga la 'gyur/ /gcig tu mi dge sems can la/ /theg pa gsum gyi chos ston na/ /de ni gti mug rmongs pa ste/ /byang chub chen po de ma yin/ /theg pa gsum la 'jug spro zhing / /yang dag pa yi chos 'dod la/ /'khor bas spro ba'i chos ston na/ /mkhas pa'i rang bzhin de ma yin/ /rtse gcig blo yis rab brtags te/ /'dod dang mos pa bzhin du ston/ /'di ni shin du thabs mkhas pas/ /mkhas pa rnams kyis de la bsngags/ /sems can sdig pa dag 60.252b spyod cing / /theg pa gsum gyi snod 'gyur na/ /dbang po'i snod bzhin chos bstan te/ /sdig pa kun las grol bar byed/ /rigs kyi bu gzhan yang byang chub sems dpa' sems dpa' chen po byams pa chen po'i go cha chen po'i 'khor lo yod do/ /byang chub sems dpa' sems dpa' chen po gang 'khor lo 'di dang ldan na thog ma sems bskyed nas 'dod pa rnam lnga yongs su bsal te/ nyan thos dang / rang sangs rgyas thams cad las shin du 'das pas nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / bsrung ba dang / bsnyen bkur bya bar 'gyur ro/ /de la ji ltar na byams pa chen po'i go cha chen po'i 'khor lo zhe na/ rigs kyi bu byang chub sems dpa'i byams pa la rnam pa gnyis te/ chos la dmigs pa'i byams pa dang / sems can la dmigs pa'i byams pa'o/ /chos la dmigs pa'i byams pa ni byams pa chen po'i go cha chen po'i 'khor lo zhes bya'o/ /sems can la dmigs pa'i byams pa ni byams pa chen po'i go cha zhes mi bya'o/ /de ci'i phyir zhe na/ sems can la dmigs pa'i byams pa ni nyan thos dang / rang sangs rgyas kyi theg pa dang thun mong du gyur pa ste/ nyan thos dang / rang sangs rgyas ni bdag la phan pa dang bde ba'i don gyi phyir sems can la dmigs pa'i bzod pa la nan tan byed pa'o/ /nyan thos dang / rang sangs rgyas ni bdag zhi ba dang / bdag mya ngan las 'da' ba dang / bdag gi sgrib pa bsal ba dang / bdag gi kun nas nyon mongs pa gcad pa'i phyir yin gyi/ sems can thams cad kyi phyir sems can la dmigs pa'i byams pas brtson 'grus la nan tan byed pa ni ma yin no/ / 60.253a de bas na byams pa 'di ni byams pa chen po zhes mi bya ste/ go cha chen po ma yin no/ /chos la dmigs pa'i byams pa ni nyan thos dang / rang sangs rgyas kyi theg pa pa dang thun mong ba ma yin gyi/ byang chub sems dpa' sems dpa' chen po rnams 'ba' zhig gis nan tan byed nus par 'gyur ro/ /byang chub sems dpa' sems dpa' chen po ni sems can thams cad la phan pa dang bde ba'i don du/ brtson 'grus kyi sbyor bas chos la dmigs pa'i byams pa 'di la nan tan byed do/ /byang chub sems dpa' sems dpa' chen po ni sems can thams cad yongs su mya ngan las 'das pa dang / kun nas nyon mongs pa yongs su gcad pa'i phyir shin du 'bad pa'i brtson 'grus kyis chos la dmigs pa'i byams pa la nan tan byed do/ /de bas na byams pa 'di ni byams pa chen po'i go cha chen po zhes bya'o/ /gzhan yang byang chub sems dpa' chos la dmigs pa'i byams pa la nan tan byed pa ni phung po la mi gnas/ skye mched la mi gnas/ khams la mi gnas/ dran pa nye bar gzhag pa rnams la mi gnas pa nas byang chub kyi lam gyi yan lag gi bar du mi gnas so/ /'dod pa'i khams la mi gnas/ gzugs kyi khams la mi gnas/ gzugs med pa'i khams la mi gnas/ 'jig rten 'di la mi gnas/ 'jig rten pha rol la mi gnas/ tshu rol gyi mu la mi gnas/ pha rol gyi mu la mi gnas/ dmigs pa la mi gnas/ mi dmigs pa la mi gnas te/ de ltar byang chub sems dpa' chos la dmigs pa'i byams pa la nan tan byed pas nyan thos dang / rang sangs rgyas thams cad kyi theg pa'i sa las shin du 'das te/ de ni byang chub sems dpa'i chos la dmigs pa'i byams pa chen po'i go cha chen po'i 'khor lo zhes bya'o/ /rigs kyi bu byang chub sems 60.253b dpa' sems dpa' chen po gang byams pa chen po'i go cha chen po'i 'khor lo 'di dang ldan pa'i thog ma sems bskyed nas 'dod pa rnam lnga yongs su bsal te/ nyan thos dang / rang sangs rgyas thams cad las shin du 'das pa/ nyan thos dang / rang sangs rgyas thams cad kyi bsod nams kyi zhing du 'gyur ba dang / nyan thos dang / rang sangs rgyas kyi theg pa thams cad kyis mchod pa dang / bsrung ba dang / bsnyen bkur bya bar 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ nyan thos dang ni rang rgyal ba/ /sems can dmigs pa'i byams sgom pa/ /sems la bcu gsum skyon 'chang zhing / /bdag la phan pa'i don phyir rtsol/ /byang chub sems dpa' grags chen ni/ /sems can thams cad kun gyi phyir/ /thun mong ma yin byams chen bsgoms/ /bcu gsum sems kyi skyon rnams spangs/ /dri ma bcu gsum rab spangs nas/ /byang chub chen por gzhol bar byed/ /chos la dmigs pa'i byams bsgoms na/ /bsod nams zhing grub ring ba min/ /bcu gsum stobs la bder gnas na/ /sems can kun las shin du 'phags/ /ji ltar seng ge'i rgyal po de/ /ri dgas kun las 'phags pa bzhin/ /bcu gsum dgra rnams shin du btul/ /rtag dang chad pa'i mthar 'dzin spangs/ /sems la cis kyang mi gos na/ /myur du byang chub chen po 'thob/ /rigs kyi bu gzhan yang byang chub sems dpa' sems dpa' chen po snying rje chen po'i go cha chen po'i 'khor lo yod do/ /byang chub sems dpa' sems dpa' chen po gang 'khor lo 'di dang ldan na thog ma sems 60.254a bskyed nas 'dod pa rnam pa lnga yongs su bsal te/ nyan thos dang / rang sangs rgyas thams cad las shin du 'das pas nyan thos dang / rang sangs rgyas thams cad kyi bsod nams kyi zhing chen por 'gyur zhing / nyan thos dang / rang sangs rgyas thams cad kyi theg pa pa thams cad kyis mchod pa dang / srung ba dang / bsnyen bkur byed par 'gyur ro/ /de ji ltar zhe na/ nyan thos dang / rang sangs rgyas kyi theg pa pa thams cad ni bdag la phan pa dang bde ba'i don gyi phyir snying rje la spyod kyi/ sems can thams cad la phan pa dang bde ba'i don gyi phyir snying rje chen po skyed pa ma yin no/ /byang chub sems dpa' sems dpa' chen po ni bdag 'ba' zhig la phan pa dang bde ba'i don gyi phyir snying rje chen po bskyed pa ma yin gyi/ sems can thams cad la phan pa dang bde ba'i phyir snying rje chen po skyed do/ /de bas na byang chub sems dpa' snying rje chen po'i go cha chen po'i 'khor lo dang ldan pas nyan thos dang / rang sangs rgyas thams cad las shin du 'das pa nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur bya bar 'gyur ro/ /byang chub sems dpa' sems dpa' chen po ni sems can thams cad la phan pa dang bde ba'i don gyi phyir bsdu ba'i dngos po rnam pa bzhis sems can yongs su smin par byed do/ /snying rje chen pos sems can thams cad la bde ba'i don gyi phyir sbyin pas yongs su sdud pa ni 'di lta ste/ rin po che dang / nor dang / dbyig dang / theg pa dang / bran dang / las byed pa'i mi dang / yul dang / srid dang / bu dang / chung ma 60.254b dang /[ ]lus dang / srog gi bar du yongs su gtong ba la ser sna med de/ mi dmigs pa'i spyod pa la sbyor bas 'dul ba'i sems can yod par mi mthong / sbyin pa byed par mi mthong / len par mi mthong / nor gyi dngos por mi mthong / sbyin pa spyod par mi mthong / sbyin pa byas pa'i 'bras bur mi mthong ba nas mi dmigs pa'i bar du yang mi mthong ste/ de lta bu'i snying rje chen po skyed do/ /sems can thams cad la phan pa dang bde ba'i don gyi phyir ngag snyan pa dang / don sgrub pa dang / don 'thun pas ci dang cis 'dul ba bzhin du mi dmigs pa yang mi mthong ba'i bar du de dang des rgyas par ston cing 'chad do/ /de ltar byang chub sems dpa' sems dpa' chen pos rtag tu mchog dam pa'i dul ba'i sems dang / rab tu zhi ba'i sems dang / tshad med pa'i sems dang / phung po dang / khams dang / skye mched thams cad la mngon par 'du mi byed pa'i sems kyis gang nas gang du skyes kyang g.yo ba med pa dang / mi gnas pa'i snying rje chen po'i go cha chen po'i 'khor lo 'dis snod du gyur pa'i sems can thams cad yongs su smin par byed pa la skyo ba med do/ /de ltar na byang chub sems dpa' snying rje chen po'i go cha chen po'i 'khor lo zhes bya ste/ nyan thos dang / rang sangs rgyas thams cad dang thun mong ba ma yin no/ /rigs kyi bu byang chub sems dpa' sems dpa' chen po gang snying rje chen po'i go cha chen po'i 'khor lo 'di dang ldan na thog ma sems bskyed nas 'dod pa lnga yongs su bsal te/ byang chub sems dpa' sems dpa' chen po zhes bya'o/ /nyan thos dang / rang sangs rgyas thams cad las shin du 'das shing / nyan thos dang / rang sangs rgyas thams cad kyi bsod nams kyi zhing du 'gyur ba dang / nyan thos dang / rang sangs rgyas kyi theg pa pa thams cad kyis mchod pa 60.255a dang / srung ba dang / bsnyen bkur byed par 'gyur ro/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ shin du zab mo dam pa'i chos dag /snying rje chen po'i gzhi ru de 'gyur/ /shin du dpag dka' nam mkha' 'dra ste/ /gnas pa med de gzugs kyang med do/ /byang chub sems dpa'i brtson 'grus chen po/ /yon tan chen po dang ni ldan te/ /rgyal ba'i ye shes snying rje chen pos/ /dpa' bo 'jig rten 'da' bar des 'gyur/ /mgon dang skyabs med sems can dag ni/ /'khor ba'i sdug bsngal rnyog pas bcings pa/ /snying rje chen po'i chu yis bkrus te/ /sems can rnam par grol bar byed do/ /byang chub sems dpa'i snying rje bskyed pas/ /'khor ba'i rgya mtsho skems par byed de/ /nyan thos theg pa'i 'khor rnams dang ni/ /rang rgyal theg pa spyod pas ma yin/ /'dod chags zhe sdang gti mug sems can/ /ngan song dag tu ltung bar 'gyur ba/ /snying rje chen po'i chu yis bkrus te/ /sdug bsngal kun las grol bar byed do/ /rigs kyi bu gzhan yang byang chub sems dpa' sems dpa' chen po tshig so so yang dag par rig pa/ nam mkha'i dbyings dang mnyam pa/ tshad med pa/ mtha' yas pa/ shin du rgya chen po dang ldan pa ji snyed sangs rgyas kyi chos thams cad de/ ting nge 'dzin rnams dang / gzungs rnams dang / shin du brtan pa'i bzod pa chen po'i go cha chen po'i 'khor lo yod de/ byang chub sems dpa' sems dpa' chen po gang 'khor lo 'di dang ldan na thog ma sems bskyed nas 'dod pa rnam lnga yongs su bsal te/ nyan thos dang / rang sangs rgyas thams cad las shin du 'das pa nyan thos dang / rang sangs rgyas thams cad kyi bsod nams kyi zhing chen por 'gyur ba dang / nyan thos dang / rang sangs rgyas 60.255b kyi theg pa pa thams cad kyis mchod pa dang / srung ba dang / bsnyen bkur byed par 'gyur ro/ /de la ji ltar na byang chub sems dpa' sems dpa' chen po tshig so so yang dag par rig pa nam mkha'i dbyings dang mnyam pa/ tshad med pa mtha' yas pa/ shin du rgya che ba dang ldan pa ji snyed sangs rgyas kyi chos thams cad de/ ting nge 'dzin rnams dang / gzungs rnams dang / shin du brtan pa chen po'i go cha chen po'i 'khor lo zhe na/ 'di lta ste/ byang chub sems dpa' rnams chos thams cad la shin du rtog pa ni ji ltar zla ba'i dkyil 'khor gyi 'od kyis nam mkha' kun du khyab pa bzhin du/ sems mnyam pa nyid du gyur pa/ mtshan ma med pa rten pa med pa mi gnas pa/ gos pa med pa'i ting nge 'dzin thams cad kyi sgo dang / gzungs kyi sgo thams cad la sems kyi spyod pa med pa/ mig dang / gzugs dang / mig gi rnam par shes pa dang / mig gi 'dus te reg pa la yid kyis rnam par zhen pa dang bral ba/ sems kyi spyod pa med pa las mig gi 'dus te reg pa'i rkyen gyis nang gi tshor ba rnam gsum skyes te/ bde ba dang / sdug bsngal dang / bde ba yang ma yin sdug bsngal ba yang ma yin par tshor ba la sems rab tu zhi zhing chags pa med do/ /de bzhin du rna ba dang / sgra dang / rna ba'i rnam par shes pa dang / rna ba'i 'dus te reg pa dang / sna dang / dri dang / sna'i rnam par shes pa dang / sna'i 'dus te reg pa dang / lce dang / ro dang / lce'i rnam par shes pa dang / lce'i 'dus te reg pa dang / lus dang / reg bya dang / lus kyi rnam par shes pa dang / lus kyi 'dus te reg pa dang / yid dang / chos dang / yid kyi rnam par shes pa dang / yid kyi 'dus te reg pa'i bar du gzhung de bzhin du rgyas par sems dang / yid dang / rnam par shes pa thams cad rtag tu zhi zhing chags pa med do/ /sems dang / yid dang / rnam par shes pa las skyes 60.256a pa'i tshor ba rnam gsum ste/ bde ba dang / sdug bsngal dang / bde ba yang ma yin sdug bsngal ba yang ma yin par tshor ba la sems rtag tu zhi zhing chags pa med do/ /dus gsum gyi phung po dang / khams dang / skye mched rnams kyi rnam pa thams cad la len pa med pa/ sems kyi spyod pa med pa'o/ /gang ji snyed khams gsum dang / 'du byed gsum dang / reg bya gsum dang / tshor ba gsum dang / dbang po gsum dang / theg pa gsum dang / sdom pa gsum dang / rnam par grol ba gsum dang / rnam pa de dag thams cad la sems rab tu zhi ba/ gnas med pa/ mtshan ma med pa/ len pa med pas mnyam pa nyid du gnas so/ /gang ji snyed sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / pha rol du phyin pa thams cad la sems kyi spyod pa med pa rab tu zhi bar gnas so/ /de bzhin du dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa la yang sems kyi spyod pa med pa rab tu zhi bar gnas so/ /gang ji snyed dgu mthar gyis gnas pa'i snyoms par 'jug pa la yang sems kyis spyod pa med par rab tu zhi bar gnas so/ /gzhan yang mngon par 'du byed pa gsum dang / chos la sgrib pa med pa'i ye shes dang / lam gyi yan lag dang / lam gyi rang bzhin 'dren par byed pa dag la yang len pa med pa/ sems kyi spyod pa med pa/ kun gzhi rnam par shes pa dang / kun gzhi rnam par shes pa ma yin pa dang / nye bar len pa dang bcas pa dang / nye bar len pa med pa dang / zag pa dang bcas pa dang / zag pa med pa dang / tshu rol gyi mu dang / pha rol gyi mu dang / chung ngu 60.256b dang / chen po dang / tshad med pa dang / byed pa dang / mi byed pa dang / dge ba dang / mi dge ba dang / lung du mi ston pa thams cad kyi rnam pa la len pa med pa dang / sems kyi spyod pa med par rab tu zhi bar gnas so/ /gang ji snyed byams pa chen po dang / snying rje chen po dang / thabs mkhas pas sems can smin par byed pa nas srung bar bya ba med pa gsum dang / mi 'jigs pa bzhi dang / sangs rgyas kyi chos ma 'dres pa bcwa brgyad kyi bar du chos thams cad kyi rnam pa la len pa med pa/ sems kyi spyod pa med par rab tu zhi bar gnas so/ /byang chub sems dpa' sems dpa' chen po dag 'khor lo 'di'i dbang gis tshor ba rnam gsum gyi nyes pa yongs su bsal ba dang / rnam par rtog pa thams cad yongs su zhi ba dang / mtshan ma'i chos thams cad yongs su spong bar 'gyur ro/ /gzhan yang ji snyed nam mkha'i mig dang / spyi bo'i ting nge 'dzin rnams dang / gzungs rnams la thabs mkhas pa'i go cha chen po'i 'khor lo yang 'dren par 'gyur te/ byang chub sems dpa' 'khor lo de la gnas pas gang 'das pa'i dus kyi sdig pa mi dge ba'i las kyi lhag mas gnyer te ngan 'gro mnar med pa dang / gzhan yang srid pa dang / 'gro ba rnams su 'khor ba'i las thams cad lhag ma ma lus par yongs su bsal te/ rnam par smin pa'i 'bras bu mi myong bar byed do/ /gzhan yang rigs kyi bu 'di lta ste/ mun pa nag pos nam mkha' thams cad yog pa na nyi ma shar ba'i tshe mun pa thams cad sel bar 'gyur ro/ /de bzhin du byang chub sems dpa' yang tshig so so yang dag par rig pa nam mkha'i dbyings dang mnyam pa/ tshad med pa/ mtha' yas pa/ yangs shing rgya 60.257a chen po dang ldan pas ji snyed sangs rgyas kyi chos thams cad de/ ting nge 'dzin rnams dang / gzungs rnams dang / shin du brten pa'i bzod pa'i go cha chen po'i 'khor lo yang grub cing 'dren par 'gyur ro/ /gzhan yang nam mkha'i mig dang / spyi bo'i ting nge 'dzin rnams dang / gzungs rnams la thabs mkhas pa'i go cha chen po'i 'khor lo la gnas pa dpag tu med pa nam mkha' lta bu'i ye shes kyi nyi mas phyin ci log bzhi'i mun pa yongs su bsal te/ 'das pa'i dus kyi sdig pa mi dge ba'i las kyi lhag mas gnyer te ngan 'gro mnar med pa dang / gzhan yang srid pa dang 'gro ba rnams su 'khor bar 'khor ba'i las thams cad lhag ma ma lus par yongs su sel te/ rnam par smin pa'i 'bras bu myong bar mi byed do/ /gzhan yang de'i dbang gis sangs rgyas kyi chos rnams la dbang thob pa dang / phyir mi ldog par 'gyur te/ sdig pa'i grogs po'i dbang du mi 'gro zhing rjes su mi spyod pa dang / rtag tu sangs rgyas mthong ba dang mi 'bral ba dang / byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral ba dang / yon tan thams cad la sems mi ngoms pa nas byang chub kyi bar du rgyun mi 'chad de/ rtag tu sangs rgyas rjes su dran pa dang mi 'bral ba ni chung ngu na rmi lam du yang bar chad med par 'gyur ro/ /rigs kyi bu de la ji ltar na byang chub sems dpa' sems dpa' chen po tshig so so yang dag par rig pas nam mkha'i dbyings dang mnyam pa/ tshad med pa/ mtha' yas pa/ yangs shing rgya che ba dang ldan pas ji snyed sangs rgyas kyi chos thams cad de/ ting nge 'dzin rnams dang / gzungs rnams dang / shin du brtan pa'i bzod pa'i go cha chen po'i 'khor lo 'dren par 60.257b 'gyur zhe na/ 'di lta ste/ byang chub sems dpa' rnams bsam gtan dang po nas bsam gtan bzhi pa'i bar du snyoms par 'jug pa dang / nam mkha' mtha' yas skye mched nas 'du shes med 'du shes med min skye mched kyi bar du snyoms par 'jug pa dang / 'du shes dang tshor ba 'gog pa'i ting nge 'dzin la snyoms par 'jug pa'i ting nge 'dzin 'di la gnas na tshor ba rnam gsum dang / 'du byed gsum po yongs su bcad de/ mngon par 'du byed pa dang / g.yo ba'i sems kyi spyod pa med pa/ tshor ba dang / 'du shes dang / sems pa dang / rig pa dang / yid la byed pa la sogs pa kun gcod par 'gyur ro/ /ting nge 'dzin 'di la gnas na zhag gcig gam/ zhag bdun gyi bar du bsam gtan gyi zas za bar 'gyur ro/ /ting nge 'dzin de las langs na yang sems rab tu zhi ba len pa med cing / lhan ner gnas par 'gyur ro/ /gzhan yang don dam pa'i mthas gtugs pa'i stong pa nyid kyi ting nge 'dzin la mnyam par 'jog go/ /ting nge 'dzin de la gnas na sems rab tu mnyam pas nam mkha' ltar chags pa med pa dang / lus kyi ba spu'i bu ga kun nas zil dngar gyi thigs pa skar ma snar ma lta bu mngon par byung bas kun nas nyon mongs pas bcings pa'i yongs su gdung ba thams cad sel bar 'gyur ro/ /ting nge 'dzin de las langs nas yang dag pa'i dran pa thob ste/ dga' ba khyad par can gyis lus la khyab par gyur pa ni ji ltar lha'i sras po dang / dbang phyug chen po dang / bde ba'i ting nge 'dzin thams cad la 'jug pa nas lus kyi ba spu'i khung bu kun nas rab tu bde ba myong ba bzhin de ltar byang chub sems dpa' de lus la bde bas reg pas sangs rgyas rjes su dran par 'gyur ro/ /sangs rgyas rjes su dran pas sangs rgyas mthong ba las mtshan ma gzhan mthong ba med do/ /byang chub sems dpa' de'i tshe sangs rgyas gcig yid la byas na sangs rgyas gcig mthong ngo / /gal te sangs 60.258a rgyas mang po yid la byas na sangs rgyas mang po mthong ngo / /gal te sangs rgyas kyi sku chung bar yid la byas na sangs rgyas kyi sku chung ngur mthong ngo / /gal te sangs rgyas kyi sku chen por yid la byas na sangs rgyas kyi sku chen por mthong ngo / /gal te sangs rgyas kyi sku tshad med par yid la byas na sangs rgyas kyi sku tshad med par mthong ngo / /gal te bdag gi lus sangs rgyas kyi sku'i mtshan dang ldan par yid la byas na bdag gi lus de sangs rgyas kyi sku dang 'dra bar mtshan phun sum tshogs par mthong ngo / /gal te gzhan gyi lus sangs rgyas kyi skur yid la byas na gzhan gyi lus sangs rgyas dang 'dra bar mtshan phun sum tshogs par mthong ngo / /gal te sems can dang sems can ma yin pa dang / ji snyed gzugs su gtogs pa thams cad sangs rgyas kyi sku mtshan dang ldan par yid la byas na sems can dang / sems can ma yin pa dang / ji snyed gzugs su gtogs pa thams cad sangs rgyas kyi sku dang 'dra bar mtshan phun sum tshogs par mthong gi gzugs gzhan du mi mthong ngo / /byang chub sems dpa' de'i tshe yang 'di snyam du chos thams cad dang / gzugs thams cad ni sgyu ma dang 'dra ste/ yang dag pa ma yin pas bdag gis tshor ba rnam gsum dang / 'du byed gsum la sogs pa chos thams cad lhag ma ma lus par yongs su gcad do snyam nas 'gog pa'i ting nge 'dzin la snyoms par zhugs so/ /ting nge 'dzin de la gnas nas blo sngon du btang ba bzhin du thams cad yongs su bcad de ting nge 'dzin gyi ro'i zas kyis 'tsho'o/ /gal te na zhag bdun nam/ zhag bdun gnyis sam/ bdun gsum 'am/ bzhi 'am/ lnga 'am/ drug gam/ bdun nam/ brgyad dam/ gal te na bskal pa tshad med pa bye ba khrag khrig brgya stong gi bar du ci nus su gnas te/ ting nge 'dzin gyi zas za'o/ /ting nge 'dzin de las langs nas sems rab tu zhi bas ci la yang mi chags te bde bar gnas so/ /gal te don dam pa'i mthas gtugs 60.258b pa'i ting nge 'dzin la zhugs na yang sngar ji skad bshad pa bzhin du sangs rgyas kyi sku mtshan dang ldan pa yid la bya ba nas chos thams cad dang / gzugs thams cad sgyu ma dang 'dra ste yang dag pa ma yin pa'i bar du chud par byed do/ /rigs kyi bu 'di ni byang chub sems dpa' sems dpa' chen po'i tshig so so yang dag par rig pa nam mkha'i dbyings dang mnyam pa/ tshad med pa/ mtha' yas pa/ yangs shing rgya che ba dang ldan pa ji snyed sangs rgyas kyi chos thams cad de/ ting nge 'dzin thams cad dang / gzungs thams cad dang / shin du brtan pa'i bzod pa'i go cha chen po'i 'khor lo zhes bya ste/ byang chub sems dpa' sems dpa' chen po dag 'khor lo 'di dang ldan na nam mkha'i mig dang / spyi bo'i ting nge 'dzin rnams dang / gzungs rnams las shin du thabs mkhas pa thams cad lhag ma ma lus par spangs te rnam par smin pa'i 'bras bu len par mi byed do/ /gzhan yang rigs kyi bu 'di lta ste/ 'jig rten gyi khams su mes 'jig pa 'byung du nye ba ni nyi ma lnga cig car shar te/ 'jig rten gyi khams na rdzing bu dang / rdzing bu chen po dang / 'bab chu dang / 'bab chu chen po dang / mtsho dang / mtsho chen po'i chu rnams lhag ma ma lus par thams cad skems par 'gyur ro/ /de bzhin du byang chub sems dpa' yang tshig so so yang dag par rig pa nam mkha'i dbyings dang mnyam pa/ tshad med pa/ mtha' yas pa/ yangs shing rgya che ba dang ldan pas sangs rgyas kyi chos thams cad de/ ting nge 'dzin rnams dang / gzungs rnams dang / shin du brten pa'i bzod pa chen po go cha chen po'i 'khor lo yang mngon par 'dren to/ /gzhan yang nam mkha'i mig dang / spyi bo'i ting nge 'dzin rnams dang / gzungs rnams la thabs mkhas pa'i go cha chen po'i 'khor lo la yang gnas shing 'dren par 'gyur ro/ /gang 'das pa'i dus kyi sdig pa mi dge ba'i las kyi lhag mas gnyer te/ ngan 'gro mnar med pa dang / gzhan 60.259a yang srid pa dang / 'gro ba rnams su 'khor bar 'khor ba'i las thams cad lhag ma ma lus par yongs su bskams te/ rnam par smin pa'i 'bras bu mi len par byed do/ /gzhan yang rigs kyi bu 'di lta ste/ 'jig rten du chu'i 'jig pa byung ba na stong gsum gyi stong chen po'i 'jig rten gyi khams chu 'di'i khams chung ngu'i gling chen po bzhi dang / gling phran brgyad dang / ri rab ri'i rgyal po dang / ri phran thams cad chu yis bkrus te zhig nas lhag ma ma lus par zad par 'gyur ro/ /de bzhin du byang chub sems dpa' yang tshig so so yang dag par rig pa nam mkha'i dbyings dang mnyam pa/ tshad med pa/ mtha' yas pa/ yangs shing rgya che ba dang ldan pas ji snyed sangs rgyas kyi chos thams cad de/ ting nge 'dzin rnams dang / gzungs rnams dang / shin du brtan pa'i bzod pa'i go cha chen po'i 'khor lo yang 'grub cing 'dren par 'gyur ro/ /nam mkha'i mig dang / spyi bo'i ting nge 'dzin rnams dang / gzungs rnams la thabs mkhas pa'i go cha chen po'i 'khor lo la gnas shing 'dren par 'gyur bas 'das pa'i dus kyi sdig pa mi dge ba'i las kyi lhag mas gnyer te ngan 'gro mnar med pa dang / gzhan yang srid pa dang / 'gro ba rnams su 'khor ba 'khor ba'i las la mkhas pa'i go cha chen po'i 'khor lo la yang gnas par 'gyur ro/ /'khor lo 'di la gnas pas dpag tu med pa nam mkha' lta bu'i ye shes kyi nyi ma byung bas rang gi lus la phyin ci log bzhi dang / ma rig pa'i mun pa thams cad yongs su sel bar 'gyur ro/ /'das pa'i dus kyi sdig pa mi dge ba'i las kyi lhag mas gnyer te ngan 'gro mnar med pa dang / gzhan yang srid pa dang / 'gro ba rnams su 'khor bar 'khor ba'i las thams cad kyang lhag ma ma lus par yongs su sel te/ rnam par smin pa'i 'bras bu yang myong bar mi byed do/ /rigs kyi bu byang chub sems dpa' sems dpa' chen po gang 'khor lo 'di dang ldan na thog ma sems bskyed pa nas 'dod pa rnam lnga yongs su bsal te/ nyan thos dang / rang sangs rgyas thams cad las 60.259b shin du 'das shing / nyan thos dang / rang sangs rgyas thams cad kyi bsod nams kyi zhing du 'gyur ba dang / nyan thos dang / rang sangs rgyas kyi theg pa pa thams cad kyis mchod pa dang / srung ba dang / bsnyen bkur byed par 'gyur ro/ /'khor lo 'di'i dbang gis sangs rgyas kyi chos thams cad la dbang du 'gyur ba dang / phyir mi ldog pa dang / sdig pa'i grogs po'i dbang du mi 'gro ba dang / sangs rgyas thams cad mthong ba dang mi 'bral zhing byang chub sems dpa' dang / nyan thos kyi nye gnas mthong ba dang mi 'bral ba dang / chos thos pa dang mi 'bral ba dang / dge 'dun la mchod pa dang bsnyen bkur byed pa dang mi 'bral ba dang / yon tan thams cad la sems mi ngoms pa ste/ mngon par byang chub kyi bar du rgyun mi 'chad pa dang rtag tu sangs rgyas rjes su dran pa dang mi 'bral ba ni chung ngu na rmi lam na yang 'bral bar mi byed do/ /de ltar byang chub sems dpa' de bsod nams dang ye shes kyi tshogs kyang myur du rdzogs pa dang / ring po mi thogs par rnam par dag pa'i sangs rgyas kyi zhing du bla na med pa yang dag par rdzogs pa'i byang chub tu mngon par sangs rgyas nas sangs rgyas kyi zhing de na sems can thams cad kyang rdzus te skye ba dang / mtshan dang gzugs sangs rgyas bcom ldan 'das dang 'dra ba/ nyon mongs pa srab cing chung ba/ theg pa chen po la bde bar gnas pa sha stag go/ /de nas bcom ldan 'das kyis don 'di dag gsal bar bzlas pa'i phyir tshigs su bcad de bka' stsal pa/ chos kyi snod du 'gyur bar 'dod pa dag /nyon mongs thams cad yongs su gcad par bya/ /yang dag stong pa nyid la snyoms zhugs na/ /dngos po gang yang bya bar dka' ba min/ /srid pa'i bcings pa thams cad gcad pa'i phyir/ /snyoms par 'jug la nan tan brtson par bya/ /ting 'dzin yon tan dag dang ldan pas na/ /gdon mi za bar dpag dka'i shes rab thob/ /gzugs med pa yi bsam gtan rab bsgom zhing / /'gog pa'i ting 'dzin stong pa nyid brtags na/ /sangs rgyas dran pa'i blo mchog rab skyes te/ /sdig pa thams cad yongs su zad 'gyur ro/ /yod dang med pa'i chos rnams thams cad ni/ /yang dag 60.260a stong pa nyid du brtags pas bcom/ /ngan par 'gro ba'i rgyud rnams yongs bsal nas/ /rtag tu sangs rgyas mang po mthong bar 'gyur/ /yang dag stong pa nyid la rab bsgoms pas/ /dge ba'i chos gzhan kun la brtson bya ste/ /sangs rgyas thams cad kun la rab mchod na/ /myur du sangs rgyas 'bras bu thob par 'gyur/ /sems can kun gyi dge ba'i grogs byas te/ /kun nas nyon mongs pa yi nad bsal na/ /rnam dag sangs rgyas zhing du myur du skye/ /mngon par 'tshang rgya byang chub chen po 'thob/ /sangs rgyas mtshan dang ldan pa'i sems can dag /sangs rgyas zhing der yongs su gang bar 'gyur/ /thams cad sangs rgyas theg la 'dun pa ste/ /nyan thos rang rgyal theg pa yongs su spong / /'phags pa shin du rgyas pa chen po sa'i snying po'i 'khor lo bcu pa bya ba las bsod nams kyi zhing gi mtshan nyid kyi le'u zhes bya ste bdun pa'o// // bcom ldan 'das kyis theg pa chen po'i rnam grangs 'di bshad pa'i tshe 'khor gyi dkyil 'khor de'i nang na byang chub sems dpa' sems dpa' chen po gang gA'i klung gi bye ma snyed dang mnyam pa sngon 'das pa'i dus na sangs rgyas rjes su dran pa la goms pa dag deng 'dir bcom ldan 'das kyis sangs rgyas rjes su dran pa la nan tan bya ba'i sbyor ba bshad pa thos nas sangs rgyas rjes su dran pa'i ting nge 'dzin gyi sgo mo thams cad thob bo/ /gzhan yang sems can tshad med grangs med pa rnams chos 'di thos nas ting nge 'dzin gyi 'tsho ba me tog gis phreng ba zhes bya ba'i gzungs kyi sgo mo thams cad thob bo/ /gzhan yang sems can tshad med grangs med pa dag bcom ldan 'das kyis bshad pa thos nas dpa' bar 'gro ba glog gi 'od la rten pa zhes bya ba'i gzungs kyi sgo mo thams cad thob bo/ /gzhan yang sems can tshad med grangs med pa dag bcom ldan 'das kyis bshad pa thos nas chos la sgyur ba 'od snang ba las rten par byed pa rjes su 'thun pa'i bzod pa thams cad thob bo/ /gzhan yang sems can tshad med grangs med pa dag bcom ldan 'das kyis bshad pa thos nas rdul dang dri ma dang bral te chos kyi mig 60.260b rnam par dag pa skyes te rgyun du zhugs pa'i 'bras bu thob bo/ /gzhan yang sems can tshad med pa dag ni bcom ldan 'das kyis bshad pa thos nas lan cig phyir ldog pa'i 'bras bu thob bo/ /gzhan yang sems can tshad med grangs med pa dag bcom ldan 'das kyis bshad pa thos nas phyir mi ldog pa'i 'bras bu thob po/ /gzhan yang sems can tshad med grangs med pa dag bcom ldan 'das kyis bshad pa thos nas mchog gi dgra bcom pa'i 'bras bu thob bo/ /gzhan yang sems can tshad med grangs med pa dag bcom ldan 'das kyis bshad pa thos nas khams gsum gyi btson ra nas 'byung bar rtsom pas bcom ldan 'das la rten cing rab tu byung nas yang dag pa'i chos la zhugs par gyur to/ /gzhan yang sems can tshad med pa dag nam 'tsho'i bar du dge ba bcu'i las kyi lam la bde bar gnas shing nyan thos kyi theg par sems bskyed pas phyir mi ldog par gyur to/ /gzhan yang sems can tshad med grangs med pa dag bcom ldan 'das kyis bshad pa thos nas nam 'tsho'i bar du dge ba bcu'i las kyi lam la bde bar gnas nas/ rang sangs rgyas kyi theg par sems bskyed pa las phyir mi ldog par gyur to/ /gzhan yang sems can tshad med grangs med pa dag bcom ldan 'das kyis bshad pa thos nas nam 'tsho'i bar du dge ba bcu'i las kyi lam la bde bar gnas nas theg pa chen por sems bskyed cing bla na med pa yang dag par rdzogs pa'i byang chub las phyir mi ldog par gyur to/ /gzhan yang sems can tshad med grangs med pa dag ni bcom ldan 'das kyis bshad pa thos nas 'jig rten gyi yang dag par lta ba thob par gyur to/ /yang dag par lta ba de'i dbang gis ngan song du 'gro ba'i rgyu dang / kun nas nyon mongs pa'i las dang / nyon mongs pa thams cad byang 60.261a nas mtho ris su 'gro ba'i rgyu dang / yang dag pa'i smon lam dang / dge ba'i las thams cad skye zhing 'phel bar 'gyur ro/ /gzhan yang sems can tshad med pa dag bcom ldan 'das kyis bshad pa thos nas dkon mchog gsum la skyabs su song ste/ dge bsnyen gyi sdom pa blangs nas sangs rgyas mchod pa la spro ba dang / chos thos pa la dga' ba dang / dge 'dun gyi g.yog byed pa la mos te/ nyin mtshan du 'bad pa'i brtson 'grus la sems par tshad med par gyur to/ /gzhan yang sems can tshad med grangs med pa dag bcom ldan 'das kyis bshad pa thos nas log pa la 'bab pa dang / log pa la phyogs pa dang / blo gros ngan pa dang / las ngan pa thams cad yongs su spangs te/ sangs rgyas kyi chos la mi 'gyur ba'i dad pa thob nas khyim na gnas pa'i chos yongs su spangs te rnam par dag pas rab tu byung bar gyur to/ /de nas bcom ldan 'das kyis byang chub sems dpa' sems dpa' chen po nam mkha'i snying po la 'di skad ces bka' stsal to/ /rigs kyi bu ngas sa'i snying po'i 'khor lo bcu pa shes pa brda sprod pa chen po chos kyi sgo mo 'di/ khyod kyi lag tu gtad kyis khyod kyis gzungs su zung la shin du rgyas par gyis shig /sems can gang chos kyi rnam grangs 'di la klog gam/ 'don tam/ yid la byed dam/ gzhan la yang rgya cher 'chad dam/ yang dag pa'i spyad pa la gnas pa dag la khyod kyis chos rnam pa 'di bcus bsrungs te/ yun ring por phan pa dang bde ba'i don thob par gyis shig /bcu gang zhe na/ 'di lta ste/ de'i thabs dang bdog pa'i nor thams cad bsrungs te nyams par mi bya ba dang / gnod pa thams cad las bsrungs te/ med par bya ba dang / log par lta ba dang / log par phyogs pa las bsrungs te mi dge ba bcu'i las kyi lam spang bar bya ba dang / de'i lus dang ngag la gnod pa thams cad las bsrungs te med par bya ba dang / 'phya ba dang skur pa thams cad las 60.261b bsrungs te med par bya ba dang / tshul khrims dang / spyod pa thams cad nyams par mi 'gyur bar srung ba dang / de la mi ma yin pa thams cad dang / 'byung ba chen po 'khrugs pa dang / dus ma yin pa'i nad dang / mi dge ba thams cad yongs su sel bar srung ba dang / de la dus ma yin pa tshul ma yin pa/ ltas ngan dang / rims thams cad mi 'byung bar srung ba dang / de la 'chi ba'i dus byed pa na yang sangs rgyas thams cad mthong bar srung ba dang / de tshe 'phos nas kyang bde 'gror skye ba dang / phan pa dang bde ba'i don thob par yongs su srung bar byed do/ /rigs kyi bu sems can gang chos kyi rnam grangs 'di klog pa dang / 'don pa dang don yid la byed pa dang / gzhan la rgya cher 'chad dam/ yang dag pa'i spyod pa la gnas pa dag la khyod kyis chos rnam pa 'di bcu shin du bsrungs shing / byin gyis brlabs te/ chos rnam pa 'di bcus yun ring por phan pa dang bde bar gyis shig /de nas byang chub sems dpa' sems dpa' chen po nam mkha'i snying pos bcom ldan 'das la 'di skad ces gsol to/ /de de bzhin no/ /bcom ldan 'das bdag gis chos kyi rnam grangs gzungs su 'dzin cing shin du rgyas par bgyi'o/ /sems can gang chos kyi rnam grangs 'di la klog pa dang / 'don pa dang don yid la bgyid pa dang / pha rol po la rgya cher ston pa dang / yang dag pa'i spyod pa la gnas pa dag la bdag gis chos rnam pa 'di bcus shin du bsrungs te yun ring por phan pa dang bde bar bgyi'o/ /de nas bcom ldan 'das kyis mdo sde 'di gsungs nas/ 'khor gyi dkyil 'khor de na gnas pa'i byang chub sems dpa' sems dpa' chen po nam mkha'i snying po dang / byang chub sems dpa' sems dpa' chen po sa'i snying po dang / byang chub sems dpa' sems dpa' chen po rdo rje'i snying po dang / byang chub sems dpa' sems dpa' chen po rigs par the tsom 'dri ba dang / tshangs pa chen po lha'i snying po dang / lha dang / klu dang / gnod sbyin dang / 60.262a dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang mi ma yin pa la sogs pa 'khor mang po thams cad bcom ldan 'das kyis gsungs pa la mngon par dga'o/ /'dus pa chen po las byang chub sems dpa' sa'i snying po'i 'khor lo bcu pa las bde ba'i don thob pa yongs su gdams pa zhes bya ba'i le'u ste brgyad do/ /'dus pa chen po byang chub sems dpa' sa'i snying po'i 'khor lo bcu pa zhes bya ba theg pa chen po'i mdo rdzogs so// // rgya'i mkhan po hwa shang zab mo la sogs pa dang / zhu chen gyi lo tsa ba ban de rnam par mi rtog gis bsgyur cing zhus te gtan la phab pa/ / |