@##/ /rgya gar skad du/ Ar+ya ma ha la li kA pa ri pr-its+tshA nA ma ma hA yA na sU tra/ bod skad du/ 'phags pa bgres mos zhus pa zhes bya theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das yul bi dzi na yul rgyu ba rgyu zhing dge slong stong nyis brgya lnga bcu'i dge slong gi dge 'dun chen po dang / byang chub sems dpa' sems dpa' chen po rab tu mang po dang thabs cig tu grong khyer chen po yangs pa can ga la ba der gshegs pa dang / de'i tshe grong gi bud med rgan mo gtugs pa/ 'khogs pa/ na tshod las 'das par gyur pa/ skyes nas lo brgya nyi shu lon pa zhig dgon pa na rtswa sdud cing 'dug ste/ bud med des bcom ldan 'das mdzes pa/ dang bar byed pa dbang po dul ba/ thugs dul ba/ dul ba dang zhi gnas mchog brnyes pa/ sbas pa/ skyon med pa/ dbang po dul ba/ mtsho ltar dang zhing gsal la rnyog pa med pa/ gser gyi mchod sdong ltar mngon par 'phags pa/ dpal gyis lham me/ lhan ne/ lhang nge ba/ skyes bu chen po'i mtshan sum cu rtsa gnyis kyis legs par brgyan pa thag ring po nas byon pa mthong ngo / /mthong nas kyang sems dad par gyur nas bcom ldan 'das la dad pa'i 59-1-311a sems kyis bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ bcom ldan 'das la lan gsum bskor ba byas nas phyogs gcig tu 'dug ste/ bud med des bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das skye ba gang nas mchis/ rga ba gang nas mchis/ gang du mchi/ bcom ldan 'das na ba gang nas mchis/ 'chi ba gang nas mchis/ gang du mchi/ bcom ldan 'das gzugs gang nas mchis/ tshor ba dang / 'du shes dang 'du byed rnams dang / rnam par shes pa gang nas mchis/ gang du mchi/ bcom ldan 'das sa'i khams gang nas mchis/ chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams gang nas mchis/ gang du mchi/ bcom ldan 'das mig gang nas mchis/ rna ba dang / sna dang / lce dang / lus dang / yid gang nas mchis/ gang du mchi/ bcom ldan 'das kyis bka' stsal pa/ sring mo skye ba gang nas kyang mi 'ong / rga ba gang nas kyang mi 'ong / gang du yang mi 'gro'o/ /sring mo na ba gang nas kyang mi 'ong / 'chi ba gang nas kyang mi 'ong / gang du yang mi 'gro'o/ /sring mo gzugs gang nas kyang mi 'ong / tshor ba dang / 'du shes dang / 'du byed rnams dang / rnam par shes pa gang nas kyang mi 'ong / gang du'ang mi 'gro'o/ /sring mo sa'i khams gang nas kyang mi 'ong / chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams gang nas kyang mi 'ong / gang du yang mi 'gro'o/ /sring mo mig gang nas kyang mi 'ong / rna ba dang / sna dang / lce dang / lus dang / yid gang nas kyang mi 'ong / gang du yang mi 'gro'o/ /sring mo 'di lta ste/ dper na gtsub shing dang / gtsub stan la yang brten la/ de bskyed pa'i mi'i rtsol ba la yang brten na me 'byung ste/ me de yang rtswa dang shing de bsregs nas rgyu med pa dang shi bar 'gyur ro/ /sring mo 'di ci snyam du sems/ me de gang nas 'ong / gang du song / gsol pa/ bcom ldan 'das zhugs de ni tshogs pa'i dbang gis byung / tshogs pa dang bral bas 'gags te 'gum mo/ /bka' stsal pa/ sring mo de bzhin du chos thams 59-1-311b cad kyang tshogs pa'i dbang gis 'byung / tshogs pa dang bral bas 'gags te/ 'di la chos gang yang gang nas kyang 'ong ba'am/ gang du yang 'gro ba med do/ /sring mo 'di lta ste/ mig dang gzugs la brten nas/ mig gi rnam par shes pa byung yang mig gi rnam par shes pa de la skyed par byed pa yang med/ 'gags par byed pa yang med/ gang du yang sogs pa med/ phung po gang las kyang 'ong ba'am/ 'gro ba yang med la/ gang gi rnam par shes pa'i rkyen gyis las mngon par 'dus byas nas khams gsum du 'bras bu rnam pa gsum gyis 'bras bu nye bar ston te/ 'bras bu de yang stong pa/ 'ong ba med pa/ 'gro ba med pa/ sus kyang ma bskyed pa/ sus kyang ma bkag pa ste/ sring mo chos thams cad ni rang bzhin gyis 'gags pa'o/ /de bzhin du rna ba dang / sgra dang / sna dang / dri dang / lce dang / ro dang / lus dang / reg bya dang / yid dang / chos rnams la rten nas yid kyi rnam par shes pa byung yang yid kyi rnam par shes pa de la skyed par byed pa yang med/ 'gags par byed pa yang med/ gang yang sogs pa yang / phung po gang las kyang 'ong ba'am/ 'gro ba yang med la/ yid kyi rnam par shes pa'i rkyen gyis las mngon par 'du byas nas khams gsum du 'bras bu rnam pa gsum gyis 'bras bu nye bar ston te/ 'bras bu de yang stong pa 'ong ba med pa 'gro ba med pa/ sus kyang ma bskyed pa/ sus kyang ma bkag pa ste/ sring mo chos thams cad ni rang bzhin gyis 'gags pa'o/ /sring mo 'di lta ste dper na/ shing dang / pags pa dang / dbyug gu la yang brten/ de skyed pa'i mi'i rtsol ba la yang brten nas rnga'i sgra 'byung ste/ rnga'i sgra de 'das pa yang stong / ma 'ongs pa yang stong / da ltar byung ba yang stong ste/ sgra ni shing la yang mi gnas/ pags pa la yang mi gnas/ dbyug gu la yang mi gnas/ mi'i lag pa la yang mi gnas mod kyi/ 'on kyang de'i rkyen gyis sgra 'dogs te/ gang sgra de 'dogs pa de yang stong pa/ 'ong ba med pa/ 'gro ba med pa/ sus kyang ma bskyed pa/ sus kyang ma bkag pa ste/ sring mo chos thams cad ni rang bzhin gyis 'gags pa'o/ /sring mo de bzhin du chos thams cad ni rkyen gyi kho na la rag las pa ste/ 'di ltar ma rig pa dang / sred pa dang / las dang / rnam par shes pa'o/ /chos de dag yod na 'chi 'pho dang / skye ba 'dogs te/ 59-1-312a gang 'chi 'pho dang skye ba 'dogs pa de yang stong pa/ 'ong ba med pa/ 'gro ba med pa/ sus kyang ma bskyed pa/ sus kyang ma bkag pa ste/ sring mo chos thams cad ni rang bzhin gyis 'gags pa'o/ /sring mo de ltar sus rnga sgra'i tshul rab tu shes pa des stong pa nyid rab tu shes so/ /sus stong pa nyid rab tu shes pa des mya ngan las 'das pa rab tu shes so/ /sus mya ngan las 'das pa rab tu shes pa de/ tha snyad rnam pa sna tshogs kyis tha snyad 'dogs kyang dngos po gang la yang mngon par zhen pa med de/ bdag gi 'di dang / de ni bdag go zhe'am/ sems can no zhe'am/ srog go zhe'am/ gso ba'o zhe'am/ skyes bu'o zhe'am/ gang zag go zhe'am/ shed las skyes so zhe'am/ shed bu'o zhe'am/ byed pa po zhe'am/ byed du 'jug pa po zhe'am/ len pa po zhe'am/ 'dor ba po zhes de mngon par zhen pa med par chos ston/ chos rab tu ston/ yang dag pa'i mtha' ston/ yang dag pa'i mtha' rab tu ston to/ /sring mo 'di lta ste dper na ri mo mkhan nam/ ri mo mkhan gyi slob ma zhig gis ras bcos ma shin tu phyi bdar byas pa'am/ shing leb bam/ rtsig ngos shin tu phyi bdar byas pa zhig la tshon sna tshogs 'gyed cing gzugs kyi rnam pa gang dang gang 'dod pa 'di lta ste/ skyes pa'i gzugs kyi rnam pa'am/ bud med kyi gzugs kyi rnam pa'am/ glang po che'i gzugs kyi rnam pa'am/ rta'i gzugs kyi rnam pa'am/ bong bu'i gzugs kyi rnam pa'am/ de dag yan lag dang / nying lag dang / dbang po thams cad ma tshang ba med par tshegs chung ngus mngon par sgrub cing 'dri ste/ mngon par sgrub par byed kyang / de la chos gang yang ri mo mkhan gyi lag pa'am/ sems las gzugs su 'phos pa med mod kyi/ 'on kyang de'i rkyen gyis gzugs 'dogs te/ gang gzugs 'dogs pa de yang stong pa/ 'ong ba med pa/ 'gro ba med pa/ sus kyang ma bskyed pa/ sus kyang ma bkag pa ste/ sring mo chos thams cad ni rang bzhin gyis 'gags pa'o/ /sring mo de bzhin du bsod nams su nye bar 'gro ba'i mngon par 'du byed pa rnams yod na 'di lta ste lha'am mi'i nang du bsod nams su nye bar 'gro ba'i lus mngon par grub kyang de la gang 'jig rten 'di nas 'jig rten pha rol tu 'pho ba ni rdul tsam yang med mod kyi 'on kyang mngon par 'du byed pa'i rkyen 59-1-312b gyis skye ba sna tshogs yod de/ skye mched yod pa'i lus su rnam par rig go/ /de bzhin du bsod nams ma yin par nye bar 'gro ba'i 'du byed rnams yod na 'di lta ste/ sems can dmyal ba'am/ dud 'gro'i skye gnas sam/ gshin rje'i 'jig rten nam/ lha ma yin rnams su bsod nams ma yin pa'i lus mngon par 'grub kyang de la gang 'jig rten 'di nas 'jig rten pha rol tu 'pho ba ni rdul tsam yang med mod kyi/ 'on kyang mngon par 'du byed pa'i rkyen gyis skye ba sna tshogs yod de/ skye mched yod pas lus su rnam par rig go/ /sring mo 'di lta ste dper na klu rnams kyi klu'i mthus sprin gyi tshogs rgya chen po 'byung ste/ sprin gyi dra ba de dag gis sa khebs par byas nas char chen po rgya cher 'bebs te/ char chen po rgya cher phab nas kyang sgang dang gshongs ngoms par byed de/ sgang dang gshongs ngoms par byas nas/ slar 'gro yang de dag klu'i lus sam sems las byung ba yang med mod kyi/ klu rnams kyis klu'i mthu nyid kyis sprin gyi tshogs rgya chen po 'byung ngo / /sring mo de bzhin du bsod nams su nye bar 'gro ba'i mngon par 'du byed pa yod na 'di lta ste/ lha'am mi'i nang du bsod nams su nye bar 'gro ba'i lus rnams mngon par 'grub bo/ /de bzhin du bsod nams ma yin par nye bar 'gro ba'i mngon par 'du byed pa rnams yod na 'di lta ste sems can dmyal ba'am/ dud 'gro'i skye gnas sam/gshin rje'i 'jig rten nam/ lha ma yin rnams su bsod nams ma yin par nye bar 'gro ba'i lus mngon par 'grub kyang de la mngon par 'du bya ba yang stong pa/ mngon par 'du byed pa po yang stong pa/ mngon par 'du byed pa'i 'bras bu yang stong pa'o/ /sring mo mi g.yo bar nye bar 'gro ba'i mngon par 'du byed pa rnams yod na gzugs med pa rnams su rnam par shes pa mtshams sbyor te/ gang gis rnam par shes pa de gzugs med pa rnams su mtshams sbyor ba de yang stong pa/ gang rnam par shes pa de gzugs med pa rnams su mtshams sbyor ba de yang stong pa'o/ /de ci'i phyir zhe na/ sring mo chos thams cad ni ngo bo nyid kyis stong pa'i phyir te/ 'on kyang chos rnams 'dogs so/ /mkhas pa rnams ni de la mngon par mi zhen te/ mngon par zhen pa med pas mi rtsod do/ /rtsod pa med pa ni dge sbyong gi chos kyi mchog go/ /gsol pa/ 'di ltar bcom 59-1-313a ldan 'das kyis chos zab mo bka' stsal pas bcom ldan 'das bdag kyang chos 'di dag la shes rab kyi mig 'jug ste slar zhing yid gnyis ma mchis/ the tshom ma mchis so/ /bcom ldan 'das bdag sngon ni chos 'di dag ma thos pas the tshom mchis so/ /da ni bdag rgas/ /bdag 'khogs/ bdag sdug bsngal/ bdag dbul/ bdag mgon ma mchis te/ bdag mi 'tsho zhing 'gum mi mnga'o/ /bcom ldan 'das bdag gis chos 'di thos pas 'di na rgas pa'am/ dbul ba'am/ bde ba'am/ nad ma mchis pa'am/ na ba'am/ phyug pa'am/ dbul ba gang yang ma mchis so/ /zhes bdag tu 'du shes pa dang bral bar gyur to/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das gang gi slad du bcom ldan 'das kyis chos kyi rnam grangs zab mo 'di lta bu bka' stsal pa/ des kyang 'di ltar rab tu btsal bas bud med 'di ni bsod nams dang ldan pa mkhas pa/ shes rab can gyi rang bzhin can lags pa snyam bdag bgyid do/ /bcom ldan 'das kyis bka' stsal pa/ kun dga' bo de de bzhin no/ /kun dga' bo ji skad smras pa de de bzhin te/ bud med 'di ni bsod nams dang ldan pa mkhas pa/ shes rab kyi rang bzhin can no/ /kun dga' bo bud med 'di tshe rabs lnga brgya'i bar du nga'i mar gyur te/ kun dga' bo ngas tshe rabs de dang de dag tu yang bud med 'di bla na med pa yang dag par rdzogs pa'i byang chub tu dge ba'i rtsa ba bskyed do/ /kun dga' bo nga bud med 'di la shin tu phangs par bya ba dang / dang ba dang gus par gyur to/ /'di yang bdag gi bu spyad pa gang la spyod pa'i spyad pa de la bdag gis kyang spyad de/ theg pa bde ba'i bla na med pa yang dag par rdzogs pa'i byang chub mngon par rdzogs par 'tshang rgya bar bya'o snyam mo/ /gsol pa/ bcom ldan 'das 'di ci'i slad du 'di ltar dbul bar gyur/ bcom ldan 'das kyis bka' stsal pa/ kun dga' bo nga byang chub sems dpa'i spyad pa spyod pa na gang gi tshe bcom ldan 'das de bzhin gshegs pa dgra bcom pa yang dag par rdzogs pa'i sangs rgyas 'khor ba 'jig gi bstan pa la nga rab tu byung bar gyur pa de'i tshe kun dga' bo bud med 'di nga'i mar gyur te/ des 'dod pas nga ma btang nas de'i phyir nga za ma gcig zan bcad pa dang / de'i 'og tu 'dis 'dod pas nga btang bar gyur te/ kun 59-1-313b dga' bo 'di las de'i rnam par smin pas de ltar dbul bar gyur to/ /kun dga' bo 'di ni 'di'i dbul ba'i tha ma yin te/ kun dga' bo bud med 'di ni 'di nas shi 'phos nas bcom ldan 'das yang dag par rdzogs pa'i sangs rgyas 'od dpag med kyi sangs rgyas kyi zhing 'jig rten gyi khams bde ba can du bud med kyi dbang po la 'dod chags dang bral nas skyes pa'i dbang po thob par gyur te/ der skyes nas sangs rgyas bcom ldan 'das grangs med dpag tu med cing bsam gyis mi khyab pa la mchod pa byed par 'gyur/ sems can grangs med dpag tu med cing bsam gyis mi khyab pa dag byang chub la 'dzud par 'gyur/ sems can grangs med dpag tu med cing bsam gyis mi khyab pa dag byang chub la yongs su smin par byed par 'gyur/ sems can grangs med dpag tu med cing bsam gyis mi khyab pa dag byang chub la 'god par 'gyur/ sems can grangs med dpag tu med cing bsam gyis mi khyab pa dag byang chub la bkod nas da ste bskal pa brgya stong phrag drug cu rtsa brgyad na/ stong gsum gyi stong chen po'i 'jig rten gyi khams 'di nyid du/ de bzhin gshegs pa dgra bcom pa yang dag par rdzogs pa'i sangs rgyas byang chub kyi yan lag gi me tog byed ces bya bar 'gyur te/ kun dga' bo sum cu rtsa gsum pa'i lha rnams kyi longs spyod dang / yongs su spyod pa ji lta ba bzhin du sangs rgyas kyi zhing de'i sems can rnams kyi longs spyod pa dang kun spyod pa/ de yang de dang 'dra bar 'gyur ro/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad bka' stsal to/ /nga yi mdun na thal sbyar gang 'dug pa/ /rgan mo 'di la kun dga' khyod ltos shig /'di ni mi yi dam pa sangs rgyas 'gyur/ /byang chub yan lag me tog byed ces bya/ /'di ni bud med dngos po 'di spangs nas/ /bde ba can gyi 'jig rten khams su 'gro/ /rgyal ba tshe dpag med de bsnyen bkur nas/ /khams gsum rgyal ba mtshungs med sangs rgyas 'gyur/ /'jig rten khams gzhan dag na gang bzhugs pa/ /drang srong chen po 'jig rten don mdzad pa/ /rnam 'dren de dag la yang bsnyen bkur nas/ /'di ni mtshungs med mi mchog sangs rgyas 'gyur/ /de dag kun las chos kyang thos gyur nas/ /bsam pa dag pas de bzhin 59-1-314a 'grub par 'gyur/ /byang chub sems mchog mi bskyod gnas nas ni/ /sems can dpag med chos la spyod par byed/ /de yi tshe na gang dag dman pa dang / /sna tshogs lus dang kha dog ngan pa dang / /rmongs dang 'theng po de bzhin zhar ba dang / /lag rdum mdze can de dag 'byung mi 'gyur/ /nyi zla me dang glog dang nor bu rnams/ /de dag 'od ni de tshe 'byung mi 'gyur/ /rnam 'dren byang chub yan lag me tog gi/ /thub pa'i 'od kyis kun du gsal bar khyab/ /sum cu rtsa gsum lha mchog rnams kyi ni/ /chu zheng rtags dang kha dog ci 'dra ba/ /de 'dra'i rang bzhin can gyi skye bo yis/ /de tshe ma smad zhing ni gang bar 'gyur/ /de na bud med bdud kyi ris kyang med/ /bdud kyi bud med bdud kyi phyag brnyan med/ /bde bar gshegs pa de na chos ston tshe/ /de na mu stegs can gyi ming mi grags/ /bde bar gshegs pa de na chos ston tshe/ /de dus yi dgas dud 'gro'i skyes gnas dang / /sems dmyal ngan song rnams kyi ming mi grags/ /de na bud med ming yang grags mi 'gyur/ /'di na nyan thos rkyen gyi theg pa ltar/ /de tshe theg pa rnam par gzhag pa med/ /kun kyang rdzogs pa'i byang chub sems dang ldan/ /de dag byams la gnas shing snying rje can/ /zhing der mi rnams thams cad rtag par yang / /brdzus shing skyes te mngal las rnam par thar/ /skye dran blo mchog ldan shing mkhas pa ste/ /legs par gsungs pa thos nas thos pa 'dzin/ /zhing gi bkod tshul ci 'dra 'byung 'gyur ba/ /yon tan bskal par 'dir ni brjod byas kyang / /rgya mtsho las ni chu thigs gcig lta bur/ /dpe tsam du yang brjod par mi 'gyur ro/ /bcom ldan 'das kyis de skad ces bka' stsal nas/ tshe dang ldan pa kun dga' bo dang / rgan mo de dang / byang chub sems dpa' de dag dang / dge slong de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// //'phags pa bgres mos zhus pa zhes bya ba theg pa chen po'i mdo rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban de ye shes sdes bsgyur cing zhus te gtan la phab pa// // |