@#/ /rgya gar skad du/ dI r+g+han kha pa ri prA dza ka pa ri pr-i ts+tshA nA ma sU tra/ bod skad du/ kun tu rgyu ba sen rings kyis zhus pa zhes bya ba'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa'i dus gcig na/ bcom ldan 'das rgyal po'i khab na/ bya rgod kyi phung po'i ri la/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs so/ /de nas bcom ldan 'das 'khor bzhi po dag la chos ston te/ tshangs par spyod pa/ thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa/ yongs su rdzogs pa/ yongs su dag pa/ yongs su byang ba/ yang dag par rab tu ston to/ /de'i tshe kun tu rgyu sen rings bcom ldan 'das ga la ba der song ste phyin nas/ bcom ldan 'das kyi spyan sngar/ khar ba la om tshugs bcas te cang mi smra bar 'dug nas bltas te/ bcom ldan 'das la 'di skad ces gsol to/ /kye go'u ta ma 'jig rten ni las bdag gir bya ba/ las kyi bgo skal la spyod pa/ las kyi 'ching ba can las brtan par bya'o zhes de skad smras pa ni bden na/ dge sbyong go'u ta mas sngon las ci zhig byas shing bsags na/ des dge sbyong go'u ta ma rdo rje'i lus dang ldan par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar srog gcod pa spangs pa'i las de'i 'bras bu yin no/ /dge sbyong go'u ta mas sngon las ci zhig byas shing bsags na/ des dge sbyong go'u tam sor mo ring zhing sor mo'i bar dra bas 'brel par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar len pa spangs pa'i las de'i 'bras bu yin no/ /dge sbyong go'u ta mas sngon las ci zhig byas shing 74-1-299a bsags na/ des dge sbyong go'u ta ma dbang po yongs su tshang zhing lus rab tu rgyas par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar 'dod pa la log par g.yem pa spangs pa'i las de'i 'bras bu yin no/ /dge sbyong go'u ta mas sngon ci zhig byas shing bsags na/ des dge sbyong go'u ta ma lces gdong gi dkyil 'khor thams cad khebs/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar brdzun du smra ba spangs pa'i las de'i 'bras bu yin no/ /dge sbyong go'u ta mas sngon las ci zhig byas shing bsags na/ des dge sbyong go'u ta ma seng ge'i stabs su 'gro bar gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar 'bru'i chang dang / sbyar ba'i chang myos pa bag med pa'i gnas spangs pa'i las de'i 'bras bu yin no/ /dge sbyong go'u ta mas sngon las ci zhig byas shing bsags na/ des dge sbyong go'u ta ma so bzhi bcu dang ldan zhing so mnyam la so dkar bar gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar dus ma yin pa'i zas spangs pa'i las de'i 'bras bu yin no/ / dge sbyong go'u ta mas sngon las ci zhig byas shing bsags na/ des dge sbyong go'u ta ma tshul khrims kyi spos kyis lus byugs par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar phreng ba dang / spos dang / byug pa dang / kha dog 'chang ba spangs pa'i las de'i 'bras bu yin no/ /dge sbyong go'u ta mas sngon las ci zhig byas shing bsags na/ des dge sbyong go'u ta ma lus mtshan thams cad kyis brgyan par gyur/ bcom ldan 74-1-299b 'das kyis bka' stsal pa/ bram ze chen po 'di ni ngas tshe rabs snga ma'i skye bar glu dang gar dang / rgyan rnams spangs pas las de'i 'bras bu yin no/ /dge sbyong go'u ta mas sngon las ci zhig byas shing bsags na/ des dge sbyong go'u ta ma stan gsum la yongs su spyod/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar khri stan mthon po dang / khri stan chen po spangs pa'i las de'i 'bras bu yin no/ /dge sbyong go'u ta mas sngon las ci zhig byas shing bsags na/ des dge sbyong go'u ta ma mgo'i gtsug tor 'phags par gyur/ bcom ldan 'das kyis bka' stsal pa/ bram ze chen po 'di ni ngas tshe rabs snga ma'i skye bar/ sangs rgyas dang / chos dang / dge 'dun dang / pha ma dang / slob dpon dang / mkhan po dang / bla ma dang / sbyin gnas rnams la yan lag lnga sa la gtugs te mgo bos phyag 'tshal lo/ /mchod pa'i las de'i 'bras bu yin no/ /de nas kun tu rgyu sen rings kyis khar ba sa la bor nas/ bcom ldan 'das kyi zhabs la mgo bos phyag 'tshal te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das bdag ji srid 'tsho'i bar du sangs rgyas la skyabs su mchi'o/ /ji srid 'tsho'i bar du chos la skyabs su mchi'o/ /ji srid 'tsho'i bar du dge 'dun la skyabs su mchi'o/ /ji srid 'tsho'i bar du yan lag brgyad pa'i bsnyen gnas la nye bar gnas par bgyi'o/ /srog chags thams cad gsod dang gzhan nor rku dang mi tshangs spyod pa dang / /ngag gi dbye ba brdzun dang myos skyed dus min za ba dang / /phreng ba kha dog glu dang gar dang rtse 'jo mal stan mthon po rnams/ /deng nas bdag gis spangs te yon tan brgyad kyis 74-1-300a dgra bcom tshul du bgyi/ /de bzhin du lan gnyis lan gsum du'o/ /bdag gis gso sbyong gi tshul khrims kyi sdom pa yang dag par 'dzin pa 'di sems kyi rgyan dang / sems kyi yo byad dang / byang chub kyi tshogs su 'gyur ba dang / don gyi dam pa thams cad mkhyen pa'i ye shes dang mya ngan las 'das pa'i bde ba bla na med pa la gnas par gyur cig /bcom ldan 'das kyis bka' stsal pa/ bram ze chen po khyod de ltar byed pa legs so legs so/ /bcom ldan 'das kyis de skad ces bka' stsal nas/ dge slong de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// // kun tu rgyu sen rings kyis zhus pa'i mdo rdzogs so// //bka' dang por gtogs so// // |