@##/ /gsang ba'i bdag po rdo rje bsnams pa la phyag 'tshal lo/ /de nas gnod sbyin gyi sde dpon chen po 96-1-82a yang dag shes kyis/ bcom ldan 'das la lan du mar bskor ba byas nas/ lha'i me tog dang / rin po che du mas bcom ldan 'das la mngon par bstod nas 'di skad ces gsol to/ /bcom ldan 'das lha rnams kyi rgyal po 'di la ci'i slad du rnam thos sras zhes bgyi/ ci'i slad du ngal bso po zhes bgyi/ ci'i slad du gnas srung po zhes bgyi/ ci'i slad du lus ngan po zhes bgyi/ de skad ces gsol pa dang / bcom ldan 'das kyis gsang ba'i bdag po lag na rdo rje la bka' stsal pa/ gsang ba'i bdag po khyod kyis lha'i rgyal po'i ming gi rnam grangs rnams gnod sbyin gyi tshogs chen po 'di dang / sde dpon chen po yang dag shes la yang dag par ston cig ces pa de gsungs nas/ de nas gsang ba'i bdag po lag na rdo rjes bcom ldan 'das la lan du mar bskor ba byas nas/ rdo rje snyems pa dang bcas pas/ 'gying zhing rang gi stan la 'dug ste/ 'khor 'dus pa dang / gnod sbyin gyi sde dpon chen po rnams la gzigs nas/ gnod sbyin gyi sde dpon chen po yang dag shes la 'di skad ces gsungs so/ /sde dpon yang dag shes lha'i rgyal po 'di ni rnam par snang mdzad de bzhin gshegs pa'i thugs las sprul pa ste/ sangs rgyas kyi mdzad pa ji lta ba bzhin du mdzad pa'o/ /de nas tshangs pa khyad par sems kyis bsams pa/ kye ma lha rnams kyi srid grub cing mi rnams kyi re ba skong ba'i phyir thabs ci yod ces bsams pa dang / lha thams cad kyi mnga' bdag ma hA de ba drang srong gi spyod pa la gnas shing dga' ba'i tshal na yod pa/ lha'i bu rnams kyis drang srong chen po rnam pa mang du thos pa drang srong gi spyod pa mdzad do zhes grags so/ /de'i tshe na tshangs pa khyad par sems kyis brgya byin la bskul te/ /dpal lha mo drang srong la phul lo/ /des kyang drang srong gi dka' thub bzlog go/ /rnam pa mang po thos pa dang lhan cig tu gnas pa las/ zla ba bcu na khye'u mtshan dang ldan pa cig dpal lha mo'i pang du brdzus te byung ngo / /ming yang srid grub ces btags so/ /de nas cher skyes pa dang rgyal chen bzhi'i 96-1-82b ris kyi lha rnams kyis/ lcang lo can gyi pho brang du phul te/ sa gsum pa'i rgyal por dbang bskur ro/ /de'i tshe bar snang la gnas pa'i lha rnams dang / yul 'khor srung dang / 'phags skyes po dang / mig mi bzang dang / gnod sbyin lag na rdo rje la sogs pa rnams kyis rin po che'i shing rta bkra ba phul nas bstod pa/ lha dang mi yi mgon gyur lha yi lha/ /bde mdzad sridagrub rnam mang thos pa'i sras/ /smon lam thugs rje'i mthu mnga' rin chen mang / /rnam mang thos pa'i sras la phyag 'tshal lo/ /zhes bstod de phyag 'tshal ba las rnam thos sras zhes ming du chags par gyur to/ /sde dpon chen po yang dag shes lha rnams ni lha ma yin gyi bu mo rnams 'dod la/ lha ma yin rnams ni/ lha rnams kyi shing thog 'dod pas na de dag 'thab par byed do/ /de yang lha ma yin rnams la ri rab kyi khong seng nas gzhi chen po bzhi gnas te/ dang po sgra gcan 'dzin no/ /gnyis pa mgul phreng / gsum pa rab dgod/ /bzhi pa thags bzangs ris so/ /de nas lha ma yin gyi dbang po sgra gcan dpung gi tshogs chen po dang chas te/ rgyal chen rigs bzhi'i lha rnams la brgal bar gyur to/ /de'i tshe na rgyal po rnam thos kyi bu ngal bso ste 'dzam bu'i gling lta zhing rab tu rtogs par byed do/ /yul 'khor srung dang / 'phags skyes po dang / mig mi bzang rnams dang / 'thab par byed do/ /de'i tshe na rnam thos sras ri rab kyi rkedapal ngal bso ba sgra gcan gyis mthong nas gzi brjid dang dpal ma bzod de/ de'i tshe na sgra gcan gyis rin po che'i me tog sna tshogs rnams kyis gtor te bstod pa/ lha yi nang na nor lha lha yi mchog /'gro ba'i skyabs mdzad ngal bso dge ba bo/ /bde gshegs spyod mdzad re ba skong mdzad pa'i/ /kun gyi mgon gyur ngal bso khyod phyag 'tshal/ /zhes bstod nas sa gsum gyi rgyal po ngal bso po rgyal bar gyur cig ces bstod nas rang gi gnas su zhugs so/ /yang dag shes des na ngal bso po zhes ming du chags par gyur to/ /sde dpon 96-1-83a chen po yang dag shes de nas lha ma yin gyi sa gnyis pa la gnas pa mgul phreng gis sgra gcan la smras pa/ sgra gcan khyod g.yul las brtan pa thob bam/ bde bar log gam zhes dris pa dang / sgra gcan gyis smras pa/ kho bo'i ni ngal bso po rgyal po'i gzi brjid kyis bsregs so/ /rnam par tshig ste bzod pa dka'o zhes smras so/ /de'i tshe mgul phreng khro bas non nas sgra gcan la smras pa/ kye sgra gcan kho bo ni stobs dang dmag gi dpung khyod bas bzhi 'gyur gyis mang bas/ 'u bu cag 'grogs te rgyal chen bzhi'i grong dang skyed mos tshal kun dga' ra ba rnams gzhom par bya'o zhes nas dpung gi tshogs dpag tu med pa dang / sgra gcan dang bcas te 'ongs par gyur to/ /de'i tshe na rgyal po rnam thos kyi bu seng ge la zhon par gyur cing gser gyi ya lad bgos te gnas pa las rgyal po gsum dang lcang lo can rnams phrogs la thug pa'i tshe/ rnam thos nyid kyi yul dang kun dga' rab la sogs pa'i gnas rnams bsrungs te/ lha ma yin rnams pham par byas so/ de'i tshe lha ma yin gyi dbang po mgul phreng gis/ gos rin po che sna tshogs kyis gtor nas bstod pa/ dpa' bo 'jigs med nyon mongs g.yul las rgyal/ /lha rnams gnas sa srung zil gnon seng ge'i gdan/ /phongs pa sgrol mdzad ya lad rnam lngas brgyan/ /mgon po gnas srung khyod la phyag 'tshal lo/ /zhes bstod nas rang gi gnas su zhugs par gyur to/ /de nas lha ma yin sa gzhi gsum la gnas pa'i rab dgod ces bya bas mgul phreng la smras pa/ lha ma yin gyi dbang po g.yul las rgyal lam/ brtan pa thob bam zhes dris pa dang / mgul phreng gis smras pa/ lha ma yin gyi bdag po kho bo cag sgra gcan dang bcas pa mgon po gnas srung bos shin tu yang pham par byas te/ chu shing gi tshal bzhin du 'dar bar byas so/ /me tog la ba mo phog pa ltar brnyings par byas so/ /zhes smras pa dang / rab dgod kyis smras pa/ kho bos lha'i 96-1-83b dbang po'i grong khyer blta na sdug dbrog par bya'o/ /rgyal chen ris bzhi pa rnams 'bangs su bya'o zhes smras nas/ rang gi yul nas dpung gi tshogs chen po sgra gcan dang mgul phreng dang bcas pa snga ma bas brgya 'gyur gyis lhag pa ri rab kyi steng du phyin to/ /de'i tshe lha'i dbang po ni chos bzang na lha'i bu rnams la chos ston to/ /de'i tshe lha ma yin gyi bdag po gsum gyi dmag dang bcas pas/ blta na sdug gi grong bar dang / skyed mos tshal rnams phrogs la thug go/ /de'i tshe nye dbang sum cu rtsa gnyis kyis brgya byin la gsol ba/ lha'i dbang po mkhyen par mdzad du gsol/ lha ma yin rnams kyis blta na sdug pa'i grong khyer phrogs la thug go zhes gsol pa dang / brgya byin gyis smras pa/ lha'i bdag po rnams song la/ byang phyogs kyi rgyal po ngal bso po la gsol ba thob cig /des g.yul las rgyal bar byed do zhes smras so/ /de nas nye dbang sum cu rtsa gnyis kyis rgyal po chen po khyod la lha ma yin gyi g.yul las rgyal bar bya ba'i phyir lha'i dbang po 'bod do zhes smras pa dang / de'i tshe rgyal po ngal bso po ri rab gser gyi mdog can de'i ste 'du gang mdzes snyam pa dang / baiDUR+Ya mdzes par mthong ste/ bdag nyid bai DU R+Ya'i lus su gnas te rta bai DU R+Ya'i mdog can zhon te/ gser gyi ya lad kyis brgyan te g.yul du 'jug par byed do/ /de'i tshe rab dgod pa la sogs pas gzi brjid ma bzod de/ rang 'pham par gyur nas sa'i sgo de nyid nas rang gi gnas su song ngo / /de'i tshe sum cu rtsa gsum pa'i lha rnams ngo mtshar skyes te/ kye ma lus ngan pa 'di 'dra bas lha ma yin gyi g.yul las rgyal bar byas so/ /zhes zer ro/ /yang dag shes rgyal chen ris bzhi'i lha rnams kyi lus kyi tshad ni rgyang grags bzhi cha'o/ / sum cu rtsa gsum pa'i lus kyi tshad ni rgyang grags phyed do/ /de ltar ngal bso po'i lus kyis sum cu rtsa gsum pa'i lus kyi phyed las mi sleb bo/ /de'i tshe nye dbang sum cu rtsa gnyis kyis rin po che'i me tog du mas gtor te bstod pa/ /lha yi nang na rgyal po nor lha khyod/ / 96-1-84a yid bzhin re ba kun gyi skyabs gyur pa/ /lus ngan pos ni lha min bye ba btul/ /nyon mongs g.yul las rgyal la phyag 'tshal lo/ /zhes bstod de/ rgyal po lus ngan po ni kho bo cag gi skyabs su gyur to zhes brjod pas de'i phyir lus ngan po zhes so/ / sde dpon yang dag shes de ltar rgyal po gnas gsum po 'di'i ming gi rnam grangs rnams shes par gyis shig /gnod sbyin gar mkhan mchog gi brtag pa phyi ma las rnam thos sras kyi ming gi rnam grangs bstan pa'i le'u ste bcu gcig pa'o////de nas sde dpon yang dag shes/ /rab tu dga' ba'i yid kyis ni/ /gsang ba'i bdag la 'di skad gsol/ /mi rnams 'byor par 'dod pa dang / /lha rnams dbul ba sel ba yi/ /de yi sgrub thabs bshad par mdzod/ /de skad gsol ba gsan nas ni/ /gsang ba'i bdag po rab bzhad de/ /gnod sbyin bdag po dag la gsungs/ /legs so sde dpon yang dag shes/ /byang chub sems dpa' rin chen mang / /rnam snang dpal phreng thugs las sprul/ /de sgrub cho ga 'di lta ste/ /rab tu dben pa'i gnas dag tu/ /bde ba'i stan la rab 'dug ste/ / khrus byas gos gtsang gyon nas ni/ /mchod pa rnams kyis rab mchod la/ /snying kha'i phyogs su yi ge hU~M/ /de las dpag med 'od spros te/ /sangs rgyas byang chub sems sogs dang / /nyan thos rang rgyal 'gro ba'i mgon/ /de rnams mdun du gsal ba las/ /phyag 'tshal skyabs 'gro la sogs bya/ /de nas byams sogs rjes dran te/ /stong pa nyid kyi ye shes ni/ /mi g.yo las byung bde bar 'dug /de nas smon lam thugs rje yis/ /rta bdun steng du 'brug sgra'i dbyangs/ /rdo rje rtse lnga de nyid gnas/ /de las yongs su rdzogs pa'i sku/ /sku mdog ljang ser dUr ba'i mdog /sems dpa' 'dzum zhing yid kyang khro/ /sgeg par bcas shing rgyan dang ldan/ /ye shes ting nge 'dzin gyis mdzes/ /mdun du rdo rje gnod mdzes ni/ /sku mdog mthing nag sbrul gyis brgyan/ /g.yas pa rdo rje ral 96-1-84b gri g.yon/ /de nas rig pa stobs po che/ /khams gsum 'joms pa sku mdog dmar/ /rdo rje dang ni rnga yab phyag /g.yas kyi phyogs su nye bar gnas/ /de yi g.yon gyi phyogs su ni/ /khro bo khams gsum bdud las rgyal/ /'khor lo dbyug to dang 'brel dkar/ / rgyab tu bdud rtsi thab sbyor ni/ /ljang khu sna tshogs rdo rje 'dzin/ grwa dang grwa yi phyogs rnams su/ /sgeg mo phreng ba gar dang glu/ /bdug pa me tog mar me rnams/ /khyams dang de yi grwa la'o/ /lcags kyu la sogs sgo yi bdag /ye shes ting nge 'dzin gyis mdzes/ /sa bon hU~M las yang dag 'byung / /me rlung chu nas nam mkha' la/ /yongs su gyur pa'i gzhal yas khang / /ye shes rtsig pa lngas mdzes pa'i/ /de yi bdag po sems dpa'i tshul/ /bcu drug 'khor gyis rab bskor ba'i/ /de yi gsang sngags 'di lta ste/ /oM badzra tsaN+Da sarba du Sh+DA na ta ka /ha na da ha pa tsa hU~M phaT/ oM badzra kro d+ha sum b+ha rA dza hU~M/ oM badzra kro d+ha ha na da ha gup+ta pi d+h+wan sa ya dzA Ti laM bo d+ha ra hU~M phaT/ oM badzra kro d+ha trai lokya bi dza ya hU~M phaT/ oM badzra kro d+ha a mr-i ta kuN+Da li ha na ha na hU~M phaT/ oM badzra lA s+ye hU~M/ oM badzra mA le trAM/ oM badzra gI tI hrIH/ oM badzra ni ra ti a/ oM badzra d+hU pe hU~M/ oM badzra phuSh+pe trAM/ oM badzra A lo ke hrIH/ oM badzra gan d+he a/ oM badzra aM ku sha dzaH/ oM badzra pA sha hU~M/ oM badzra s+pho Ta baM/ oM badzra g+haN+De hoH/ de dag rnams kyis mchod byas nas/ 'bum phrag gcig tu yongs bzlas na/ /byang chub chen por 'gyur ba ste/ /ral gri mig sman rkang mgyogs dang / /ril bu mi snang bcud kyis len/ /bum pa bzang dang gser 'gyur dang / /grub pa brgyad ni thob gyur te/ /lha bran rnams kyang g.yog tu byed/ /de la sogs pa'i yon tan rnams/ /rig pa 'di las 'byung bar 'gyur/ /gnod sbyin gar mkhan mchog gi brtag pa phyi ma las/ bcu bdun pa'i le'u ste bcu gnyis pa'o////sde dpon chen po yang dag shes/ /gnas gsum pa yi rgyal po yi/ /sgrub 96-1-85a pa yang dag rab bshad bya/ rab tu dben pa'i sa phyogs su/ /bde ba'i stan la rab 'dug nas/ /rang gi snying khar nyi mar hU~M/ de yi 'od kyis 'gro ba sbyangs/ /bla ma sangs rgyas mchod byas bstod/ /tshad med bzhi dang yang dag ldan/ /stong pa nyid kyis brtan byas te/ /tsha zer can du yang dag hU~M/ /'od 'phros rda rje hU~M dang ldan/ /de gyur gsang ba'i bdag po ni/ /sku mdog ljang ser yid tsam khro/ /rdo rje dang ni ut+pal 'dzin/ sangs rgyas dpag med rab 'phro ba'i/ /bdag nyid de ltar bsam par bya/ /de nas de yi mdun du ni/ /bru~M las byung ba'i gzhal yas khang / /ka ba brgyad khri dag dang ldan/ /rin chen bzhi las grub pa yi/ /rtse mo yang thog nor bus spras/ /zur bzhi rim brtsegs pho brang dgu/ /dbus kyis yi cha rnams su/ /rdzing bu bzang pos yang dag spras/ /de dbus 'jigs byed seng ge'i gdan/ /bai las skyes pa'i sa gsum bdag /lha rnams rgyal po bsam par bya/ /sngar gyi gtso bo'i thugs ka las/ /'od 'phros ye shes bkug la bstim/ /sku gsum ldan zhing de nyid kyi/ /gnas drug rdo rje'i byin gyis brlab/ /de la mchod bstodagasol bya zhing / /snying po'i sngags kyis mnyes par bya/ /oM badzra pA NihU~M hU~M phaT/ oM bai shra ba NA ye swA hA/ 'gro 'du me yi 'khor lo bzhin/ /gsal ba gsum dang ldan pa yis/ /de nyid rig par mchod byas na/ / sa gsum mgon po rab mnyes nas/ /'dod pa'i don rnams sgrub byed cing / /'bum phrag gcig gis sa rnams g.yo/ /ri la gnas pa'i gnod sbyin rnams/ /bran g.yog rab tu byed pa yin/ /'bum phrag gnyis kyis gnas khang 'bar/ /bar snang gnas pa'i gnod sbyin rnams/ /bran g.yog rab tu byed pa yin/ /des ci bsgo ba'i ngag nyan byed/ /'bum phrag gsum gyis phyogs rnams bsreg /grags pas phyogs bcur rgyas par khyab/ /'bum phrag bzhi yis bza' btung thob/ /gnod sbyin lha 96-1-85b yi bu mo rnams/ /bud med gzugs kyis rig 'dzin mchod/ /'bum phrag lnga yi nor dang ldan/ /sa 'og gnas pa'i klu rnams kyis/ /nor dang 'bru yi char pa 'bebs//'bum phrag drug gis 'khor bzangs rnyed/ /chos la gnas pa'i gnod sbyin rnams/ /mi yi byis pa'i gzugs su ston/ /'bum phrag bdun gyis rig rgyud 'phel/ /chos dang ldan pa'i lha rnams ni/ /sems can don du skye bar byed/ /'bum phrag brgyad kyis tshe 'phel zhing / /stobs chen sum cu rtsa gnyis dang / /sde dpon chen po nyi shu brgyad/ / de yi rjes 'brang bar chad sel/ /dgus ni bcud len sman rnams rnyed/ /gnod sbyin rig 'dzin chen po rnams/ /de yi stobs dang tshe 'phel phyir/ /sman pa'i gzugs su yang dag gnas/ /bcus ni mngon par shes pa 'thob/ /yon tan kun gyis rab tu gang / / gnod sbyin gar mkhan mchog gi brtag pa phyi ma las gdul bya'i phyag na rdo rje'i gsang sngags kyi phan yon bstan pa'i le'u ste bcu gsum pa'o////sde dpon chen po yang dag shes/ /rig pa'i cho ga zab mo 'di/ /bsgrim mi dgos pa las thams cad byed pa ste/ so shing la bsngags shing gang la byin pa de dbang du 'gyur ro/ /rtsa dUr ba'i yam shing la 'bras thug po che dang / gi wang brta dang bsregs na nor 'phel bar byed do/ /yi ge brgyad pa'i rig sngags 'di nyid gser gyi byang bu la mngon par bris te/ zangs dang ga'u la sbyor ba byas la/ sbrang rtsi'i nang du 'khor lo bcug ste/ brda rgyud phyag rgya bcas pa'i snyim par bcug ste 'bum phrag bcu bzlas na gong du bstan pa'i yon tan rnams 'byung ste the tshom mi bya'o/ /'khor lo de'i sgrub pa ni gzhan yang bang mdzod du khang pa grwa bzhi shin tu mdzes pa tshon rtsis kha dog bsgyur ba/ tsan+dan dmar po'i dris khyab par byugs la/ rgyar khru do pa/ dpangs su khru gsum pa byas te/ de'i dbus su bum pa lnga 'bru lngas bkang ba'i steng du bzhag la/ zla ba 'ong ngo cog gi tshes bcu'i nyin par mchod 96-1-86a pa bya zhing gsol ba btab na nor gyi phung po 'phel bar byed de/ dkor mdzod kyi sgrub pa ste gter gyi phung po'o/ /yang snga ma'i 'khor lo de thab kyi dbus su sna tshogs rdo rje'i steng du bzhag la/ thab kyi logs bzhi dang / grwa bzhir bum pa gang ba'i gzugs bzhi dang logs bzhir ba bzhi bri bar bya ste/ seng ldeng gi mes bskol na g.yos pa mi zad par mi byed do/ /yang 'khor lo de gtsug lag khang du sbas na gang bsgrubs pa'i gnod sbyin de mngon du 'gyur ro/ /yang 'khor lo de phyug po'i bang mdzod du mis ma tshor bar sbas na/ 'bru'i phung porang gi gnas su 'pho'o/ /yang 'khor lo de btsun mo'i skye gnas su sbas te brda rgyud kyi phyag bcas pa dpal lha mo'i mdun du gsol ba btab na/ gsol ba btab pa'i rigs rgyud de 'phel bar byed do/ /gnod sbyin gar mkhan mchog gi brtag pa phyi ma las yi ge brgyad pa'i las tshogs bstan pa'i le'u ste bcu bzhi pa'o// //sde dpon chen po yang dag shes mi rnams 'bru'i phung po spel bar 'dod pas dpal lha mo bsgrub par bya ste/ lha'i rgyal po lcang lo can gyi pho brang byang shar na/ khang pa dam pa gser gyi rgyal mtshan zhes bya ba na/ dpal lha mo bzhugs te/ de nas de bzhin gshegs pa 'dzam bu'i gling gi rgyal mtshan gser bzang po la nam mkha' mdzod kyi ting nge 'dzin zhus nas sbyin bdag chen por gyur to/ /bru~M las rin po che'i khang pa mdzes pa'i dbus su pad+ma dgu'i steng du bum pa dgu bsam par bya'o/ /dbus kyi bum pa'i steng du shrI gyur pa las lha mo dUr ba ljang gu'i mdog can rgyan thams cad kyis brgyan pa'o/ /lag pa g.yas na rin po ches mtshan pa'i pad+ma 'dzin pa/ g.yon skyabs sbyin pa'i phyag rgya can no/ /de'i phyi rol bum pa brgyad kyi steng du grogs mo brgyad de/ de yang nor rgyun ma dang / zla shel can dang / sbyin byed ma dang / rab sbyin ma dang / 'phags ma dang / sbas pa mo dang / rab bzangs ma dang / lha mo dbyangs can ma rnams 96-1-86b bsam par bya'o/ /de dag kyang lang tsho dar la bab cing / sgeg pa'i nyams dang ldan pa gser gyi mdog can bum pa dang 'bras kyi snye ma 'dzin pa/ rang gi mdza' bo'i grogs kyi 'khor gyis bskor ba bsam par bya'o/ /de rnams kyi snying po mngon par sgrub pa na/ /tat+ya thA/ dzi ni gr-i Ni/ sarba a kaR+Ya sid d+ha ni/ si si mi/ si li si ni mi ni mi/ a lak+Sha yA me/ nA sha ye swA hA/ oM bA su d+ha ri N+yai swA hA/ oM tsan+d+ra kA n+t+yai swA hA/ oM dA dA yai swA hA/ oM A R+YA yai swA hA/ oM su b+ha drA yai swA hA/ oM gu b+hA yai swA hA/ oM de byai swA hA/ oM sa ra swa t+yai swA hA/ gnod sbyin de rnams kyi byang chub kyi spyod pa rlabs po che mngon par sgrub pa ste/ sngon du bsnyen pa 'bum phrag gcig byas te/ dpal lha mo'i mdun du 'bras bu can gyi shing la las sna tshogs pa'i thab tu hil dkar po'i sbyin sreg byas la/ de'i thal ba 'bru'i bang bar gtor na 'bru'i phung po chen po 'phel bar byed do/ /tsan+dan dkar pos dpal lha mo'i gzugs tshon gang ba byas te/ rin po che lnga dang / 'bru'i rnam pa dang / dar ser pos dril la snyim par bcug ste/ 'bum phrag bzlas nas mdzod khang du 'bru'i phung po'i steng du bzhag nas dus khyad par can la sbrang rtsi dang / bu ra ma dang / 'o ma'i mchod yon phul la/ gsol ba btab na 'bru'i phung po chen po 'phel lo/ /gnod sbyin gar mkhan mchog gi brtag pa phyi ma las dpal lha mos 'bru'i phung po spel ba'i le'u ste bcwa lnga pa'o////de nas gzhan yang gnod sbyin chen po'i sgrub pa bshad par bya ste/ de yang gang zhe na/ rlung dang / me dang / sa'i khyon dang / ri rab rnams yongs su gyur pa las lha'i pho brang du gyur pa ni/ lcang lo can gyi bkod pa las/ rim pa'i 'phar ma bzhi dang ldan pa ste/ dbus su hU~M yongs su gyur pa las rdo rje dang de dang bcas pa'i hU~M yongs su gyur pa las/ khro bo'i rgyal po gos sngon po can bsam par bya ba ni/ zhal brgyad dang / zhabs brgyad dang / phyag bcu drug dang ldan pa ste/ 96-1-87a mthing nag byis pa'i gzugs can rgyan thams cad kyis brgyan pa'o/ /zhal brgyad ni g.yas ser ba dang / g.yon ljang ba dang / dbus mthing ba dang / rgyab zhal dmar po'o/ /de'i steng gi zhal gsum ni g.yas dkar ba dang / g.yon dmar ba dang / ut+pa la sngon po 'dra ba ni dbus ma'i zhal lo/ /de'i steng na zhi ba rgyan dang bcas pa dUr ba'i mdog can mi bskyod pa dang ldan pa'o/ /phyag rnams na rdo rje dang / rdo rje dbyug to dang / glang po che'i mche ba dang / khyab 'jug gi 'khor lo dang / lcags kyu dang / brag ri dang / me thab rnams bsnams pa'o/ /de dag ni g.yas pa na'o/ /g.yon pa rnams ni sdigs mdzub dang bcas pa'i snod chen po dang / dung dang / zhags pa dang / gsal shing dang / 'phan lce lnga pa dang / rgyal mtshan bsnams pa'o/ /chu shel can gyi steng du gar thabs brgyad kyis zhabs brdabs pas klu chen po brgyad kyi gdan dang bcas shing ma lus par 'dar bar bsam mo/ /de yi mdun du ngal bso ni/ /bai las yang dag rab skyes pa/ seng ge'i gdan la legs bzhugs shing / /gser mdog rin chen rgyan gyis spras/ /g.yas pa rin chen rgyal mtshan te/ /g.yon pa sku gdung rab bsnams shing / /'od zer dpag med rab 'phro ba/ /gdug pa sreg mdzad dbus nyid na/ /rang gi rigs kyi bdag po dang / /gnyis med ye shes las grub bzhugs/ /gnod sbyin bye ba'i tshogs bcas rnams/ /rang gi 'khor du rnam par bsam/ /mdun du dzam b+ha la gser gyi mdog can/ ne'u le dang / rin po che 'bar ba bsnams pa'o/ /g.yas phyogs su gang ba bzang po gser gyi mdog can/ ne'u le dang / bum pa bsnams pa'o/ / rgyab tu nor bu bzang po dkar po/ ne'u le dang rin po che'i snye ma bsnams pa'o/ /g.yon du rta bdag ku be ra mdog nag po ne'u le dang / ral gri bsnams pa'o/ /yang dag shes ser po ne'u le dang rin po che'i gri bsnams pa'o/ /'brog gnas nag po ste ne'u le dang rin 96-1-87b po che'i mdung bsnams pa'o/ /pany+tsi ka ser skya la ne'u le dang khang pa brtsegs pa bsnams pa'o/ /rol ba 'khyil pa ni mdog dkar po ste ne'u le dang gri phub 'dzin pa'o/ /de dag rnams ni rta'i steng na gnas shing rig pa 'dzin pa'i dgos pa sgrub pa'o/ /'phar ma gsum bar ni sde dpon nyi shu rtsa brgyad bsam pa ni ring po dang / mig bzang dang / gang po dang / ser skya ste/ shar phyogs na gnas pa'o/ /seng ge dang / nye ba'i seng ge dang / dung can dang / dga' bo ste/ lho phyogs na gnas pa'o/ /seng ge dang / seng ge'i ral pa can dang / bla ma ser skya ste/ nub phyogs na gnas pa'o/ /'dzin pa dang / 'dzin dga' dang / brtson skyong dang / khyab 'jug ste/ byang phyogs na gnas pa'o/ /byang shar na lnga spyod dang / shar lhon tshig lnga ser po dang / lho nub na ri mnyam dang / byang nub na gser can te/ de rnams ni nor bu'i rigs so/ /yang shar phyogs nas pa dang / lho phyogs na shin tu sa pa dang / nub phyogs na nag po dang / byang phyogs na nye nag ste/ de dag ni ba lang gi rigs so/ /byang shar na nyi ma dang / shar lho na zla ba dang / lho nub na me dang / byang nub na rlung ste/ de dag ni ba lang gi rigs so/ /sde dpon nyi shu rtsa brgyad po de dag ni gri dang phub 'dzin pa mdog dmar nag cung zad khros pa'o/ /yang de'i phyi rim du stobs can sum cu rtsa gnyis bsam pa/ dbang po dang / zla ba dang / chu zla dang / skye dgu'i bdag po dang / bai ra d+hA dza dang / dbang ldan dang / tsan+dan dang / 'dod pa'i gtso bo ste/ shar phyogs na gnas so/ /mgrin ngan dang / mgul nges dang / ba Di dang / nor bu dang / nor spyod dang / sgra rab dang / nye lnga po dang / ri mnyam ste/ lho phyogs na gnas pa'o/ /gser can dang / gang po dang / seng ldeng dang / g.yon phyogs lha dang / ba lang skyong dang / 'brog gnas dang / mi'i rgyal po dang / rgyal ba'i khyu mchog dang / nub phyogs na gnas pa'o/ /tshig lnga ser po dang / bzhin bzang dang / ring po dang / dri za sna tshogs sde 96-1-88a 'bras bu gsum pa dang / mgul gsum pa dang / lcags mdung ring po dang / lha las byung ba'i ma ldan te/ byang phyogs na gnas pa'o/ /de dag ni sa ga'i rigs te/ ngal bso ba po rgyal po'i dmag dpon no/ /stobs chen sum cu rtsa gnyis bsam pa ni/ mdog ljang nag go cha dang bcas shing mdung dang ral gri 'dzin pa'o/ /de'i phyi rol du gnod sbyin dang / lus srul po dang / srin po'i tshogs dpag tu med pa bsam pa'o/ /de ltar gnod sbyin gyi tshogs chen po rnams bsams te/ rig pa'i sngags brjod pa ni/ sangs rgyas gang gA'i bye ma snyed kyis/ rjes su gnang ba'i rig pa'i mchog /sngar med phyis kyang mi 'byung la/ /'di ma gtogs pa'i rig pa ni/ /gzhan dag snying po med rtsar mtshungs/ /tad+ya thA/ oM b+ho b+ho pan nA ga a d+hi pa ta ye/ phu phu ha ra ha ra nA gA nAM/ phu phu pra ha ra nA gA nAM/ phu phu tshin+da tshin+da nA ga hr-i da yA ni/ phu phu b+hin+da nA ga dA ma ni/ bi si ma man+d+ha nA ga sha rI ra Ni/ bi s+pho Ta ya/ nA ga na ya nA ni/ ha sa ha sa/ d+ha ra d+ha ra/ mA ra ya/ nA sha ya/ sarba big+h+na na/ bi nA sha ka rA ya/ sarba sha truM saM g+ha bi nA sha ka rA ya phaT/ oM nI lA m+ba ra d+ha ra badzra pA Ni hU~M hU~M phaT phaT swA hA/ de ltar bcom ldan 'das yang dag pa'i rig pas mnyes par byas la/ klu dang / gnod sbyin dang / 'bar ba'i tshogs rnams yang dag par zhi bar byed pa'i sangs rgyas rnams kyis rjes su gnang ba'o/ /de ltar rig pa'i mchog 'di sgrub pa'i rig pa 'dzin pas ni ji ltar 'dod pa sgrub bo// //gsang ba'i bdag pos yang gsungs pa/ /ngal bso dge ba'i stobs po che/ /gsang sngags rgyal po rmad du byung / /lha rnams kun gyi dmag dpon mchog /de yi rig pa'i sngags bshad pa/ /na mo rat+na tra yA ya/ na mo bai shra ba NA ya/ ma hA rA dzA ya/ tad+ya thA/ oM si mi si mi/ su mu su mu/ tsaN+Da tsaN+Da/ tsa ra tsa ra/ sa ra sa ra/ ka ra ka ra/ ki li ki li/ ku lu ku lu/ mu ru mu ru/ tsu ru tsu ru/ sA d+ha ya/ A ta ma na ni t+t+yad/ an 96-1-88b d+ha rad+hA hu swA hA/ na mo bai shra pa NA ya swA hA/ d+ha na dA ye swA hA/ na mo ra tha ba ri bU rA ya swA hA/ sde dpon yang dag shes rig pa'i rgyal po 'dod pa'i don thams cad ma bsgrims par 'byung ste/ sangs rgyas thams cad kyis rjes su gnang ba'o/ /gzhan yang bsam pa rdzogs byed pa'i/ /'gro ba'i rgud pa sel mdzad pa'i/ /rin chen gter mdzod chen po ni/ /nga yis rab tu bshad par bya/ /oM bai shra ba NA ya swA hA/ oM dzam+b+ha la dza len+d+ra ya swA hA/ oM pUr+Na b+ha drA ya swA hA/ oM ma Ni b+ha drA ya swA hA/ oM ku be rA ya swA hA/ oM saM bra dza nA ya swA hA/ oM gu h+ya d+ha nA ya swA hA/ oM bAny+tsi kA ya swA hA/ oM tsi pi kuN+Da la ye swA hA/ rig pa'i sngags 'di ni mchog ster ba ste/ lha rgud pa dang mi rgud pa rnams kyi don du gsang ba'i bdag pos bshad pa'o/ /gnod sbyin gar mkhan mchog gi brtag pa phyi ma las/ gnod sbyin gyi tshogs ngal bso po'i dmag gi sde rnams sgrub pa'i le'u ste bcu drug pa'o// //de nas bcom ldan 'das kyis gsang ba'i bdag po lag na rdo rje la legs so zhes bya ba gnang ste/ legs so legs so/ /khyod kyis ngal bso po'i ming gi rnam grangs dang / gtan tshigs dang / sgrub pa dang / dpyad mang pos ma 'ongs pa'i lha rgud pa dang / mi rgud pa rnams kyi don du ming gi rnam grangs bstan pa yang legs so/ /bcom ldan 'das kyis de skad ces bka' stsal pa dang / rdo rje snying po la sogs pa phyogs bcu nas lhags pa'i byang chub sems dpa' rnams dang / shA ri'i bu la sogs pa nyan thos chen po rnams dang / tshangs pa dang / brgya byin dang / dga' ba'i dbang po la sogs pa dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /gnod sbyin gar mkhan mchog gi rgyud rdzogs so// //kha che'i mkhas pa dA na gu p+ta las/ rab zhi lots+tsha bas lhun gyis grub pa'i gtsug lag tho ling rgyan du bsgyur ba'o// // |