@#/ /rgya gar skad du/ Ar+ya tsan+dan ang+ga nA ma d+hA ra NI/ bod skad du/ 'phags pa tsan+dan gyi yan lag ces bya ba'i gzungs/ sangs rgyas dang byang chub sems dpa' 101-1-78a thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab na dge slong gi dge 'dun chen po dge slong khri nyis stong lnga brgya'i dge slong gi dge 'dun chen po dang / byang chub sems dpa' sems dpa' chen po rab tu mang po dang / gzhan yang lha khyad par can mang po dang thabs cig tu bzhugs te/ de nas bcom ldan 'das gdan bshams pa la de bzhin gshegs pa'i cho 'phrul gyis lham me/ lhan ne/ lhang nger bzhugs so/ /de nas bcom ldan 'das kyis 'khor der byang chub sems dpa' sems dpa' chen po spyan ras gzigs dbang phyug dang / zla 'od gzhon nur gyur pa la bka' stsal pa/ rigs kyi bu 'jig rten gyi khams 'di'i pha rol gyi yang ches pha rol 'jig rten gyi khams bye ba khrag khrig 'bum phrag gang gA'i klung grangs med pa'i bye ma snyed 'das pa na/ tsan+dan gyi dpal zhes bya ba'i 'jig rten gyi khams yod de/ de na de bzhin gshegs pa dgra bcom pa yang dag par rdzogs pa'i sangs rgyas tsan+dan gyi yan lag ces bya ba da ltar yang bzhugs te/ 'tsho zhing gzhes la chos kyang ston to/ /gang 'jig rten gyi khams de'i sems can de dag thams cad ni phyir mi ldog par gyur pa sha stag ste/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas tsan+dan gyi yan lag des sems can thams cad kyi don gyi phyir tsan+dan gyi yan lag ces bya ba'i gzungs kyi rig pa'i gsang sngags kyi gzhi gsungs pa 'di thos nas phyir mi ldog pa de dag sdig pa dang bral zhing byang chub kyi sems dang mi 'bral lo/ /bcom ldan 'das de bzhin gshegs pa tshe dpag med dang / de bzhin gshegs pa mar me mdzad dang / de bzhin gshegs pa rnam par snang mdzad dang / gzhan yang 'das pa'i sangs rgyas bcom ldan 'das rnams kyis kyang sngon chad gsungs te/ ngas kyang khyed rnams la bshad kyis/ sems can thams cad rjes su gzung 101-1-78b ba'i phyir legs par rab tu nyon la yid la zung shig dang / phyi ma'i tshe phyi ma'i dus lnga brgya pa tha ma la dam pa'i chos rnam par 'jig pa'i tshe/ thams cad chos dang mi ldan pa/ mtshams med pa byed pa dang dam pa'i chos la smod pa dang / mchod rten 'dral ba/ dge 'dun gyi rdzas la rku 'phrog byed pa dang / dge sbyong ma yin par dge sbyong du khas 'che ba/ slob dpon dang mkhan po spang ba dag 'byung ste/ de dag rjes su gzung ba'i phyir tsan+dan gyi yan lag gi gzungs kyi gsang sngags gzhi sangs rgyas thams cad kyis byin gyis brlabs pa 'di bshad kyis/ byang chub sems dpa' rnams nga la nyon cig /de nas byang chub sems dpa' spyan ras gzigs dbang phyug dang / zla 'od gzhon nur gyur pas bcom ldan 'das kyi zhabs gnyis la mgo bos phyag 'tshal nas bskul ba/ byang chub sems dpa' sems dpa' chen po rnams dang / gzhan yang sems can bye ba khrag khrig phrag 'bum rnams la thugs brtse ba dang / sdig pa byang bar bgyi ba'i slad du bcom ldan 'das bshad du gsol/ bde bar gshegs pa bshad du gsol/ de bzhin gshegs pa bshad du gsol/ bdag cag gis kyang gzungs kyi gsang sngags gzhi de dag gzung bar bgyi ste/ sems can thams cad kyi don du rgya cher yang dag par bshad par bgyi'o/ /sangs rgyas dang byang chub sems dpa' thams cad la phyag 'tshal lo/ /tad+ya thA/ tsi rA te/ ma rI tsI ki/ duR+da me/ dur dAn+te/ du ra nu pra biSh+Te/tsan+da nAM ga dze/ sa man+ta pa ri sho d+ha ni/ bi shud+d+ha shI le/ tsa ri tra ba ti/ an tse d+ya pra ti b+hA ne/ sarba bud+d+ha a d+hiSh+Thi te/ b+ha ga ba te/ pA pak+Sha ye/ A shA me pa ri pU ra ya swA hA/ rigs kyi bu pho dang rigs kyi bu mo gang la la zhig gzungs chen po'i gsang sngags gzhi 'di dag 'dzin tam/ klog gam/ ston tam/ kun chub par byed na/ de tshe 'di nyid la mig rnam par dag par 'gyur ro/ /thos ma thag tu sdig pa las rab tu grol bar 'gyur/ 101-1-79a byang chub sems dpa' thams cad kyis byin gyis brlabs par 'gyur/ de bzhin gshegs pa'i sku gzugs kyang mthong bar 'gyur/ zla ba phyed kyi bar du bzlas pa byas na 'phags pa spyan ras gzigs dbang phyug dang / zla 'od gzhon nur gyur pa mthong bar 'gyur/ mtshams med pa lnga'i sdig byas pa yang 'byang bar 'gyur/ skye ba dran par 'gyur/ tshe brjes nas kyang lha rnams kyi nang du skye bar 'gyur/ khyim bdag chen po skyid pa dag gi nang du skye par 'gyur/ skye bo thams cad dga' bar 'gyur ro/ / 'di ltar sa chen po ma lus pa 'di ni grum par 'gyur yang srid/ rgya mtsho ni skams kyang srid/ de bzhin du ri'i rgyal po ri rab ni 'jig par 'gyur yang srid/ rlung ni zhags pas bcing du rung yang srid/ zla ba dang nyi ma ni sa'i steng du lhung yang srid/ nam mkha' ni lag pa gnyis kyis mnan du rung yang srid/ me ni chur 'gyur yang srid/ 'byung ba chen po bzhi ni gzhan du 'gyur yang srid/ sems can thams cad kyi sems ni gcig tu 'gyur yang srid kyi/ de bzhin gshegs pas gsungs shing byin gyis brlabs pa ni gzhan du 'gyur mi srid de/ sus kyang bskyod pa'am/ bsgul bar mi nus so/ /'di la ni bdud sdig can gyis glags rnyed par mi 'gyur ro/ /de nas byang chub sems dpa' sems dpa' chen po spyan ras gzigs dbang phyug gis/ bcom ldan 'das la phyag 'tshal nas 'di skad ces gsol to/ /bcom ldan 'das bdag gis kyang gzungs 'di'i cho ga bshad par bgyi'o/ /chos kyi rgyal po'i mchod rten ring bsrel dang bcas pa'am/ sangs rgyas kyi sku gzugs kyi spyan sngar tsan+dan dkar po'i dkyil 'khor bgyis te/ me tog sil ma gtor la tsan+dan gyi bdug pas bdugs te/ zla ba tshes pa nas brtsams nas tshes bcwa lnga'i bar du dus gsum du khrus bgyi zhing gos kyang lan gsum du brjes te/ kha zas bsreg bya 'tshal zhing gso sbyong dang ldan pa/ sems can 101-1-79b thams cad la sems snyoms pas zla ba nya'i nyin par zhag gcig smyung ba bgyis te/ rtswa bam gyi steng na mchis shing rtswa bam bting ba'i steng du nyal nas sems rtse gcig tu bzlas pa bgyid cing me tog dri zhim pos lan brgya stong du gtor nas g.yo bar 'gyur/ bdag nyid kyang bcom ldan 'das de bzhin gshegs pa 'od dpag med dang / spyan ras gzigs dbang phyug mthong bar 'gyur/ gzungs chen po thos ma thag tu ci 'dod pa de thob par 'gyur/ thos pa 'dzin par yang 'gyur/ las kyi sgrib pa thams cad kyang byang bar 'gyur ro/ /bcom ldan 'das kyis de skad ces bka' stsal nas/ dge slong de dag dang byang chub sems dpa' de dag dang / thams cad dang ldan pa'i 'khor de dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa tsan+dan gyi yan lag ces bya ba'i gzungs rdzogs so// //rgya gar gyi mkhan po dzi na mi tra dang / dA na shI la dang / zhu chen gyi lots+tsha ba ban+de ye shes sdes bsgyur cing zhus te/ skad gsar chad kyis kyang bcos nas gtan la phab pa// |