//rgya gar skad du/ AR+Ya pra dz+nyA pa ra mi tA badzra ke tu mahA yA na sU tra/ bod skad du/ 'phags pa shes rab kyi pha rol tu phyin pa rdo rje rgyal mtshan gyi mdo theg pa chen po/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na| bcom ldan 'das rgyal po'i khab na bzhugs te/ thams cad dang ldan pa'i 'khor dang thabs cig go/ de nas de'i tshe 'khor der byang chub sems dpa' rdo rje rgyal mtshan 'dug pa de stan las langs te bcom ldan 'das la 'di skad ces gsol to/ /bcom ldan 'das/ chos gang dang ldan pa shes rab kyi pha rol tu phyin pa lags/ /bcom ldan 'das kyis bka' stsal pa/ rdo rje rgyal mtshan/ chos rnam pa bzhi dang ldan pa ste/ bzhi gang zhe na/ 'di lta ste/ chos thams cad stong pa nyid du mngon pa dang / 'dus byas thams cad mi rtag pa dang / sdug bsngal bar shes pa dang / spros pa thams cad dang bral ba'i chos nyid du ldan pa dang / thams cad du mi rtog mi dmigs par bsgom pa'o/ /gzhan yang chos rnam pa bzhi dang ldan na/ shes rab skye ba'i rgyu ste/ bzhi gang zhe na/ 'di lta ste/ dang po gang zag chos smra ba'i mkhan po bsten pa dang / gnyis pa de'i dam pa'i chos nyan pa dang / gsum pa don la 'jug cing sems pa dang / bzhi nga gzhan 267a @#/ /la tshul bzhin du ston par mos pa ste/ 'di ni/ shes rab skye ba'i rgyu'o/ /rigs kyi bu/ gzhan yang byang chub sems dpa' rnams kyis 'di lta ste/ chos thams cad rang bzhin gyis rnam par dag pas stong pa dang / bdag med pa dang / dngos po med pa'i ngo bo nyid dang / mtshan ma med pa dang / ma bcings pa dang / ma grol ba dang / snang ba med pa dang / mun pa med pa'i rang bzhin du shes par bya'o/ /de lta bas na/ byang chub sems dpa' rnams kyis shes rab kyi pha rol tu phyin pa la bslab par bya'o/ /chos thams cad skye ba med pa dang / gnas pa med pa'i tshul gyis shes rab kyi pha rol tu phyin pa la bslab par bya'o/ /bcom ldan 'das kyis bka' stsal pa/ dngos med ngo bo nyid du bsgom/ /shes rab skye ba'i rgyu la mos/ /mtshan ma thams cad dang bral ba'i/ /shes rab don la bslab par bya'o/ /bcom ldan 'das kyis de skad ces bka' stsal nas byang chub sems dpa' rdo rje rgyal mtshan la sogs pa lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa shes rab kyi pha rol tu phyin pa rdo rje rgyal mtshan gyi mdo rdzogs so// // |